శ్రీవసిష్ఠ ఉవాచ ।
భగవన్ కేన విధినా నామభిర్వేఙ్కటేశ్వరమ్ ।
పూజయామాస తం దేవం బ్రహ్మా తు కమలైః శుభైః ॥ 1 ॥
పృచ్ఛామి తాని నామాని గుణయోగపరాణి కిమ్ ।
ముఖ్యవృత్తీని కిం బ్రూహి లక్షకాణ్యథవా హరేః ॥ 2 ॥
నారద ఉవాచ ।
నామాన్యనన్తాని హరేః గుణయోగాని కాని చిత్ ।
ముఖ్యవృత్తీని చాన్యాని లక్షకాణ్యపరాణి చ ॥ 3 ॥
పరమార్థైః సర్వశబ్దైరేకో జ్ఞేయః పరః పుమాన్ ।
ఆదిమధ్యాన్తరహితస్త్వవ్యక్తోఽనన్తరూపభృత్ ॥ 4 ॥
చన్ద్రార్కవహ్నివాయ్వాద్యా గ్రహర్క్షాణి నభో దిశః ।
అన్వయవ్యతిరేకాభ్యాం సన్తి నో సన్తి యన్మతేః ॥ 5 ॥
తస్య దేవస్య నామ్నాం హి పారం గన్తుం హి కః క్షమః ।
తథాఽపి చాభిధానాని వేఙ్కటేశస్య కానిచిత్ ॥ 6 ॥
బ్రహ్మగీతాని పుణ్యాని తాని వక్ష్యామి సువ్రత ।
యదుచ్చారణమాత్రేణ విముక్తాఘః పరం వ్రజేత్ ॥ 7 ॥
వేఙ్కటేశస్య నామ్నాం హి సహస్రస్య ఋషిర్విధిః ।
ఛన్దోఽనుష్టుప్తథా దేవః శ్రీవత్సాఙ్కో రమాపతిః ॥ 8 ॥
బీజభూతస్తథోఙ్కారో హ్రీం క్లీం శక్తిశ్చ కీలకమ్ ।
ఓం నమో వేఙ్కటేశాయేత్యాదిర్మన్త్రోఽత్ర కథ్యతే ॥ 9 ॥
బ్రహ్మాణ్డగర్భః కవచమస్త్రం చక్రగదాధరః ।
వినియోగోఽభీష్టసిద్ధౌ హృదయం సామగాయనః ॥ 10 ॥
అస్య శ్రీ వేఙ్కటేశ సహస్రనామ స్తోత్ర మహామన్త్రస్య బ్రహ్మా ఋషిః అనుష్టుప్ ఛన్దః శ్రీవత్సాఙ్కో రమాపతిర్దేవతా ఓం బీజం హ్రీం శక్తిః క్లీం కీలకం బ్రహ్మాణ్డగర్భ ఇతి కవచం చక్రగదాధర ఇత్యస్త్రం సామగానమితి హృదయం ఓం నమో వేఙ్కటేశాయేత్యాదిర్మన్త్రః శ్రీ వేఙ్కటేశ ప్రీత్యర్థే జపే వినియోగః ॥
ధ్యానమ్
భాస్వచ్చన్ద్రమసౌ యదీయనయనే భార్యా యదీయా రమా
యస్మాద్విశ్వసృడప్యభూద్యమికులం యద్ధ్యానయుక్తం సదా
నాథో యో జగతాం నగేన్ద్రదుహితుర్నాథోఽపి యద్భక్తిమాన్
తాతో యో మదనస్య యో దురితహా తం వేఙ్కటేశం భజే ॥
ఊర్ధ్వౌ హస్తౌ యదీయౌ సురరిపుదళనే బిభ్రతౌ శఙ్ఖచక్రే
సేవ్యావఙ్ఘ్రీ స్వకీయావభిదధదధరో దక్షిణో యస్య పాణిః ।
తావన్మాత్రం భవాబ్ధిం గమయతి భజతామూరుగో వామపాణిః
శ్రీవత్సాఙ్కశ్చ లక్ష్మీర్యదురసి లసతస్తం భజే వేఙ్కటేశమ్ ॥
ఇతి ధ్యాయన్ వేఙ్కటేశం శ్రీవత్సాఙ్కం రమాపతిమ్ ।
వేఙ్కటేశో విరూపాక్ష ఇత్యారభ్య జపేత్క్రమాత్ ॥
స్తోత్రం
ఓం వేఙ్కటేశో విరూపాక్షో విశ్వేశో విశ్వభావనః ।
విశ్వసృడ్విశ్వసంహర్తా విశ్వప్రాణో విరాడ్వపుః ॥ 1 ॥
శేషాద్రినిలయోఽశేషభక్తదుఃఖప్రణాశనః ।
శేషస్తుత్యః శేషశాయీ విశేషజ్ఞో విభుః స్వభూః ॥ 2 ॥
విష్ణుర్జిష్ణుశ్చ వర్ధిష్ణురుత్సహిష్ణుః సహిష్ణుకః ।
భ్రాజిష్ణుశ్చ గ్రసిష్ణుశ్చ వర్తిష్ణుశ్చ భరిష్ణుకః ॥ 3 ॥
కాలయన్తా కాలగోప్తా కాలః కాలాన్తకోఽఖిలః ।
కాలగమ్యః కాలకణ్ఠవన్ద్యః కాలకలేశ్వరః ॥ 4 ॥
శమ్భుః స్వయమ్భూరమ్భోజనాభిః స్తమ్భితవారిధిః ।
అమ్భోధినన్దినీజానిః శోణామ్భోజపదప్రభః ॥ 5 ॥
కమ్బుగ్రీవః శమ్బరారిరూపః శమ్బరజేక్షణః ।
బిమ్బాధరో బిమ్బరూపీ ప్రతిబిమ్బక్రియాతిగః ॥ 6 ॥
గుణవాన్ గుణగమ్యశ్చ గుణాతీతో గుణప్రియః ।
దుర్గుణధ్వంసకృత్సర్వసుగుణో గుణభాసకః ॥ 7 ॥
పరేశః పరమాత్మా చ పరఞ్జ్యోతిః పరా గతిః ।
పరం పదం వియద్వాసాః పారమ్పర్యశుభప్రదః ॥ 8 ॥
బ్రహ్మాణ్డగర్భో బ్రహ్మణ్యో బ్రహ్మసృడ్బ్రహ్మబోధితః ।
బ్రహ్మస్తుత్యో బ్రహ్మవాదీ బ్రహ్మచర్యపరాయణః ॥ 9 ॥
సత్యవ్రతార్థసన్తుష్టః సత్యరూపీ ఝషాఙ్గవాన్ ।
సోమకప్రాణహారీ చాఽఽనీతామ్నాయోఽబ్ధిసఞ్చరః ॥ 10 ॥
దేవాసురవరస్తుత్యః పతన్మన్దరధారకః ।
ధన్వన్తరిః కచ్ఛపాఙ్గః పయోనిధివిమన్థకః ॥ 11 ॥
అమరామృతసన్ధాతా ధృతసం‍మోహినీవపుః ।
హరమోహకమాయావీ రక్షస్సన్దోహభఞ్జనః ॥ 12 ॥
హిరణ్యాక్షవిదారీ చ యజ్ఞో యజ్ఞవిభావనః ।
యజ్ఞీయోర్వీసముద్ధర్తా లీలాక్రోడః ప్రతాపవాన్ ॥ 13 ॥
దణ్డకాసురవిధ్వంసీ వక్రదంష్ట్రః క్షమాధరః ।
గన్ధర్వశాపహరణః పుణ్యగన్ధో విచక్షణః ॥ 14 ॥
కరాలవక్త్రః సోమార్కనేత్రః షడ్గుణవైభవః ।
శ్వేతఘోణీ ఘూర్ణితభ్రూర్ఘుర్ఘురధ్వనివిభ్రమః ॥ 15 ॥
ద్రాఘీయాన్ నీలకేశీ చ జాగ్రదమ్బుజలోచనః ।
ఘృణావాన్ ఘృణిసమ్మోహో మహాకాలాగ్నిదీధితిః ॥ 16 ॥
జ్వాలాకరాళవదనో మహోల్కాకులవీక్షణః ।
సటానిర్భిన్నమేఘౌఘో దంష్ట్రారుగ్వ్యాప్తదిక్తటః ॥ 17 ॥
ఉచ్ఛ్వాసాకృష్టభూతేశో నిశ్శ్వాసత్యక్తవిశ్వసృట్ ।
అన్తర్భ్రమజ్జగద్గర్భోఽనన్తో బ్రహ్మకపాలహృత్ ॥ 18 ॥
ఉగ్రో వీరో మహావిష్ణుర్జ్వలనః సర్వతోముఖః ।
నృసింహో భీషణో భద్రో మృత్యుమృత్యుః సనాతనః ॥ 19 ॥
సభాస్తమ్భోద్భవో భీమః శీరోమాలీ మహేశ్వరః ।
ద్వాదశాదిత్యచూడాలః కల్పధూమసటాచ్ఛవిః ॥ 20 ॥
హిరణ్యకోరఃస్థలభిన్నఖః సింహముఖోఽనఘః ।
ప్రహ్లాదవరదో ధీమాన్ భక్తసఙ్ఘప్రతిష్ఠితః ॥ 21 ॥
బ్రహ్మరుద్రాదిసంసేవ్యః సిద్ధసాధ్యప్రపూజితః ।
లక్ష్మీనృసింహో దేవేశో జ్వాలాజిహ్వాన్త్రమాలికః ॥ 22 ॥
ఖడ్గీ ఖేటీ మహేష్వాసీ కపాలీ ముసలీ హలీ ।
పాశీ శూలీ మహాబాహుర్జ్వరఘ్నో రోగలుణ్ఠకః ॥ 23 ॥
మౌఞ్జీయుక్ ఛాత్రకో దణ్డీ కృష్ణాజినధరో వటుః ।
అధీతవేదో వేదాన్తోద్ధారకో బ్రహ్మనైష్ఠికః ॥ 24 ॥
అహీనశయనప్రీతః ఆదితేయోఽనఘో హరిః ।
సంవిత్ప్రియః సామవేద్యో బలివేశ్మప్రతిష్ఠితః ॥ 25 ॥
బలిక్షాలితపాదాబ్జో విన్ధ్యావలివిమానితః ।
త్రిపాదభూమిస్వీకర్తా విశ్వరూపప్రదర్శకః ॥ 26 ॥
ధృతత్రివిక్రమః స్వాఙ్ఘ్రినఖభిన్నాణ్డఖర్పరః ।
పజ్జాతవాహినీధారాపవిత్రితజగత్త్రయః ॥ 27 ॥
విధిసమ్మానితః పుణ్యో దైత్యయోద్ధా జయోర్జితః ।
సురరాజ్యప్రదః శుక్రమదహృత్సుగతీశ్వరః ॥ 28 ॥
జామదగ్న్యః కుఠారీ చ కార్తవీర్యవిదారణః ।
రేణుకాయాః శిరోహారీ దుష్టక్షత్రియమర్దనః ॥ 29 ॥
వర్చస్వీ దానశీలశ్చ ధనుష్మాన్ బ్రహ్మవిత్తమః ।
అత్యుదగ్రః సమగ్రశ్చ న్యగ్రోధో దుష్టనిగ్రహః ॥ 30 ॥
రవివంశసముద్భూతో రాఘవో భరతాగ్రజః ।
కౌసల్యాతనయో రామో విశ్వామిత్రప్రియఙ్కరః ॥ 31 ॥
తాటకారిః సుబాహుఘ్నో బలాతిబలమన్త్రవాన్ ।
అహల్యాశాపవిచ్ఛేదీ ప్రవిష్టజనకాలయః ॥ 32 ॥
స్వయంవరసభాసంస్థ ఈశచాపప్రభఞ్జనః ।
జానకీపరిణేతా చ జనకాధీశసంస్తుతః ॥ 33 ॥
జమదగ్నితనూజాతయోద్ధాఽయోధ్యాధిపాగ్రణీః ।
పితృవాక్యప్రతీపాలస్త్యక్తరాజ్యః సలక్ష్మణః ॥ 34 ॥
ససీతశ్చిత్రకూటస్థో భరతాహితరాజ్యకః ।
కాకదర్పప్రహర్తా చ దణ్డకారణ్యవాసకః ॥ 35 ॥
పఞ్చవట్యాం విహారీ చ స్వధర్మపరిపోషకః ।
విరాధహాఽగస్త్యముఖ్యమునిసమ్మానితః పుమాన్ ॥ 36 ॥
ఇన్ద్రచాపధరః ఖడ్గధరశ్చాక్షయసాయకః ।
ఖరాన్తకో దూషణారిస్త్రిశిరస్కరిపుర్వృషః ॥ 37 ॥
తతః శూర్పణఖానాసాచ్ఛేత్తా వల్కలధారకః ।
జటావాన్ పర్ణశాలాస్థో మారీచబలమర్దకః ॥ 38 ॥
పక్షిరాట్కృతసంవాదో రవితేజా మహాబలః ।
శబర్యానీతఫలభుక్ హనూమత్పరితోషితః ॥ 39 ॥
సుగ్రీవాఽభయదో దైత్యకాయక్షేపణభాసురః ।
సప్తతాలసముచ్ఛేత్తా వాలిహృత్కపిసంవృతః ॥ 40 ॥
వాయుసూనుకృతాసేవస్త్యక్తపమ్పః కుశాసనః ।
ఉదన్వత్తీరగః శూరో విభీషణవరప్రదః ॥ 41 ॥
సేతుకృద్దైత్యహా ప్రాప్తలఙ్కోఽలఙ్కారవాన్ స్వయమ్ ।
అతికాయశిరశ్ఛేత్తా కుమ్భకర్ణవిభేదనః ॥ 42 ॥
దశకణ్ఠశిరోధ్వంసీ జామ్బవత్ప్రముఖావృతః ।
జానకీశః సురాధ్యక్షః సాకేతేశః పురాతనః ॥ 43 ॥
పుణ్యశ్లోకో వేదవేద్యః స్వామితీర్థనివాసకః ।
లక్ష్మీసరఃకేళిలోలో లక్ష్మీశో లోకరక్షకః ॥ 44 ॥
దేవకీగర్భసమ్భూతో యశోదేక్షణలాలితః ।
వసుదేవకృతస్తోత్రో నన్దగోపమనోహరః ॥ 45 ॥
చతుర్భుజః కోమలాఙ్గో గదావాన్నీలకున్తలః ।
పూతనాప్రాణసంహర్తా తృణావర్తవినాశనః ॥ 46 ॥
గర్గారోపితనామాఙ్కో వాసుదేవో హ్యధోక్షజః ।
గోపికాస్తన్యపాయీ చ బలభద్రానుజోఽచ్యుతః ॥ 47 ॥
వైయాఘ్రనఖభూషశ్చ వత్సజిద్వత్సవర్ధనః ।
క్షీరసారాశనరతో దధిభాణ్డప్రమర్దనః ॥ 48 ॥
నవనీతాపహర్తా చ నీలనీరదభాసురః ।
ఆభీరదృష్టదౌర్జన్యో నీలపద్మనిభాననః ॥ 49 ॥
మాతృదర్శితవిశ్వాఽఽస్య ఉలూఖలనిబన్ధనః ।
నలకూబరశాపాన్తో గోధూళిచ్ఛురితాఙ్గకః ॥ 50 ॥
గోసఙ్ఘరక్షకః శ్రీశో బృన్దారణ్యనివాసకః ।
వత్సాన్తకో బకద్వేషీ దైత్యామ్బుదమహానిలః ॥ 51 ॥
మహాజగరచణ్డాగ్నిః శకటప్రాణకణ్టకః ।
ఇన్ద్రసేవ్యః పుణ్యగాత్రః ఖరజిచ్చణ్డదీధితిః ॥ 52 ॥
తాలపక్వఫలాశీ చ కాళీయఫణిదర్పహా ।
నాగపత్నీస్తుతిప్రీతః ప్రలమ్బాసురఖణ్డనః ॥ 53 ॥
దావాగ్నిబలసంహారీ ఫలాహారీ గదాగ్రజః ।
గోపాఙ్గనాచేలచోరః పాథోలీలావిశారదః ॥ 54 ॥
వంశగానప్రవీణశ్చ గోపీహస్తామ్బుజార్చితః ।
మునిపత్న్యాహృతాహారో మునిశ్రేష్ఠో మునిప్రియః ॥ 55 ॥
గోవర్ధనాద్రిసన్ధర్తా సఙ్క్రన్దనతమోఽపహః ।
సదుద్యానవిలాసీ చ రాసక్రీడాపరాయణః ॥ 56 ॥
వరుణాభ్యర్చితో గోపీప్రార్థితః పురుషోత్తమః ।
అక్రూరస్తుతిసమ్ప్రీతః కుబ్జాయౌవనదాయకః ॥ 57 ॥
ముష్టికోరఃప్రహారీ చ చాణూరోదరదారణః ।
మల్లయుద్ధాగ్రగణ్యశ్చ పితృబన్ధనమోచకః ॥ 58 ॥
మత్తమాతఙ్గపఞ్చాస్యః కంసగ్రీవానికృన్తనః ।
ఉగ్రసేనప్రతిష్ఠాతా రత్నసింహాసనస్థితః ॥ 59 ॥
కాలనేమిఖలద్వేషీ ముచుకున్దవరప్రదః ।
సాల్వసేవితదుర్ధర్షరాజస్మయనివారణః ॥ 60 ॥
రుక్మిగర్వాపహారీ చ రుక్మిణీనయనోత్సవః ।
ప్రద్యుమ్నజనకః కామీ ప్రద్యుమ్నో ద్వారకాధిపః ॥ 61 ॥
మణ్యాహర్తా మహామాయో జామ్బవత్కృతసఙ్గరః ।
జామ్బూనదామ్బరధరో గమ్యో జామ్బవతీవిభుః ॥ 62 ॥
కాలిన్దీప్రథితారామకేలిర్గుఞ్జావతంసకః ।
మన్దారసుమనోభాస్వాన్ శచీశాభీష్టదాయకః ॥ 63 ॥
సత్రాజిన్మానసోల్లాసీ సత్యాజానిః శుభావహః ।
శతధన్వహరః సిద్ధః పాణ్డవప్రియకోత్సవః ॥ 64 ॥
భద్రప్రియః సుభద్రాయా భ్రాతా నాగ్నాజితీవిభుః ।
కిరీటకుణ్డలధరః కల్పపల్లవలాలితః ॥ 65 ॥
భైష్మీప్రణయభాషావాన్ మిత్రవిన్దాధిపోఽభయః ।
స్వమూర్తికేలిసమ్ప్రీతో లక్ష్మణోదారమానసః ॥ 66 ॥
ప్రాగ్జ్యోతిషాధిపధ్వంసీ తత్సైన్యాన్తకరోఽమృతః ।
భూమిస్తుతో భూరిభోగో భూషణామ్బరసంయుతః ॥ 67 ॥
బహురామాకృతాహ్లాదో గన్ధమాల్యానులేపనః ।
నారదాదృష్టచరితో దేవేశో విశ్వరాడ్గురుః ॥ 68 ॥
బాణబాహువిదారశ్చ తాపజ్వరవినాశకః ।
ఉషోద్ధర్షయితాఽవ్యక్తః శివవాక్తుష్టమానసః ॥ 69 ॥
మహేశజ్వరసంస్తుత్యః శీతజ్వరభయాన్తకః ।
నృగరాజోద్ధారకశ్చ పౌణ్డ్రకాదివధోద్యతః ॥ 70 ॥
వివిధారిచ్ఛలోద్విగ్నబ్రాహ్మణేషు దయాపరః ।
జరాసన్ధబలద్వేషీ కేశిదైత్యభయఙ్కరః ॥ 71 ॥
చక్రీ చైద్యాన్తకః సభ్యో రాజబన్ధవిమోచకః ।
రాజసూయహవిర్భోక్తా స్నిగ్ధాఙ్గః శుభలక్షణః ॥ 72 ॥
ధానాభక్షణసమ్ప్రీతః కుచేలాభీష్టదాయకః ।
సత్త్వాదిగుణగమ్భీరో ద్రౌపదీమానరక్షకః ॥ 73 ॥
భీష్మధ్యేయో భక్తవశ్యో భీమపూజ్యో దయానిధిః ।
దన్తవక్త్రశిరశ్ఛేత్తా కృష్ణః కృష్ణాసఖః స్వరాట్ ॥ 74 ॥
వైజయన్తీప్రమోదీ చ బర్హిబర్హవిభూషణః ।
పార్థకౌరవసన్ధానకారీ దుశ్శాసనాన్తకః ॥ 75 ॥
బుద్ధో విశుద్ధః సర్వజ్ఞః క్రతుహింసావినిన్దకః ।
త్రిపురస్త్రీమానభఙ్గః సర్వశాస్త్రవిశారదః ॥ 76 ॥
నిర్వికారో నిర్మమశ్చ నిరాభాసో నిరామయః ।
జగన్మోహకధర్మీ చ దిగ్వస్త్రో దిక్పతీశ్వరః ॥ 77 ॥
కల్కీ మ్లేచ్ఛప్రహర్తా చ దుష్టనిగ్రహకారకః ।
ధర్మప్రతిష్టాకారీ చ చాతుర్వర్ణ్యవిభాగకృత్ ॥ 78 ॥
యుగాన్తకో యుగాక్రాన్తో యుగకృద్యుగభాసకః ।
కామారిః కామకారీ చ నిష్కామః కామితార్థదః ॥ 79 ॥
భర్గో వరేణ్యః సవితుః శార్ఙ్గీ వైకుణ్ఠమన్దిరః ।
హయగ్రీవః కైటభారిః గ్రాహఘ్నో గజరక్షకః ॥ 80 ॥
సర్వసంశయవిచ్ఛేత్తా సర్వభక్తసముత్సుకః ।
కపర్దీ కామహారీ చ కలా కాష్ఠా స్మృతిర్ధృతిః ॥ 81 ॥
అనాదిరప్రమేయౌజాః ప్రధానః సన్నిరూపకః ।
నిర్లేపో నిఃస్పృహోఽసఙ్గో నిర్భయో నీతిపారగః ॥ 82 ॥
నిష్ప్రేష్యో నిష్క్రియః శాన్తో నిష్ప్రపఞ్చో నిధిర్నయః
కర్మ్యకర్మీ వికర్మీ చ కర్మేప్సుః కర్మభావనః ॥ 83 ॥
కర్మాఙ్గః కర్మవిన్యాసో మహాకర్మీ మహావ్రతీ ।
కర్మభుక్కర్మఫలదః కర్మేశః కర్మనిగ్రహః ॥ 84 ॥
నరో నారాయణో దాన్తః కపిలః కామదః శుచిః ।
తప్తా జప్తాఽక్షమాలావాన్ గన్తా నేతా లయో గతిః ॥ 85 ॥
శిష్టో ద్రష్టా రిపుద్వేష్టా రోష్టా వేష్టా మహానటః ।
రోద్ధా బోద్ధా మహాయోద్ధా శ్రద్ధావాన్ సత్యధీః శుభః ॥ 86 ॥
మన్త్రీ మన్త్రో మన్త్రగమ్యో మన్త్రకృత్పరమన్త్రహృత్ ।
మన్త్రభృన్మన్త్రఫలదో మన్త్రేశో మన్త్రవిగ్రహః ॥ 87 ॥
మన్త్రాఙ్గో మన్త్రవిన్యాసో మహామన్త్రో మహాక్రమః ।
స్థిరధీః స్థిరవిజ్ఞానః స్థిరప్రజ్ఞః స్థిరాసనః ॥ 88 ॥
స్థిరయోగః స్థిరాధారః స్థిరమార్గః స్థిరాగమః ।
నిశ్శ్రేయసో నిరీహోఽగ్నిర్నిరవద్యో నిరఞ్జనః ॥ 89 ॥
నిర్వైరో నిరహఙ్కారో నిర్దమ్భో నిరసూయకః ।
అనన్తోఽనన్తబాహూరురనన్తాఙ్ఘ్రిరనన్తదృక్ ॥ 90 ॥
అనన్తవక్త్రోఽనన్తాఙ్గోఽనన్తరూపో హ్యనన్తకృత్ ।
ఊర్ధ్వరేతా ఊర్ధ్వలిఙ్గో హ్యూర్ధ్వమూర్ధోర్ధ్వశాఖకః ॥ 91 ॥
ఊర్ధ్వ ఊర్ధ్వాధ్వరక్షీ చ హ్యూర్ధ్వజ్వాలో నిరాకులః ।
బీజం బీజప్రదో నిత్యో నిదానం నిష్కృతిః కృతీ ॥ 92 ॥
మహానణీయన్ గరిమా సుషమా చిత్రమాలికః ।
నభః స్పృఙ్నభసో జ్యోతిర్నభస్వాన్నిర్నభా నభః ॥ 93 ॥
అభుర్విభుః ప్రభుః శమ్భుర్మహీయాన్ భూర్భువాకృతిః ।
మహానన్దో మహాశూరో మహోరాశిర్మహోత్సవః ॥ 94 ॥
మహాక్రోధో మహాజ్వాలో మహాశాన్తో మహాగుణః ।
సత్యవ్రతః సత్యపరః సత్యసన్ధః సతాం గతిః ॥ 95 ॥
సత్యేశః సత్యసఙ్కల్పః సత్యచారిత్రలక్షణః ।
అన్తశ్చరో హ్యన్తరాత్మా పరమాత్మా చిదాత్మకః ॥ 96 ॥
రోచనో రోచమానశ్చ సాక్షీ శౌరిర్జనార్దనః ।
ముకున్దో నన్దనిష్పన్దః స్వర్ణబిన్దుః పురన్దరః ॥ 97 ॥
అరిన్దమః సుమన్దశ్చ కున్దమన్దారహాసవాన్ ।
స్యన్దనారూఢచణ్డాఙ్గో హ్యానన్దీ నన్దనన్దనః ॥ 98 ॥
అనసూయానన్దనోఽత్రినేత్రానన్దః సునన్దవాన్ ।
శఙ్ఖవాన్పఙ్కజకరః కుఙ్కుమాఙ్కో జయాఙ్కుశః ॥ 99 ॥
అమ్భోజమకరన్దాఢ్యో నిష్పఙ్కోఽగరుపఙ్కిలః ।
ఇన్ద్రశ్చన్ద్రరథశ్చన్ద్రోఽతిచన్ద్రశ్చన్ద్రభాసకః ॥ 100 ॥
ఉపేన్ద్ర ఇన్ద్రరాజశ్చ వాగిన్ద్రశ్చన్ద్రలోచనః ।
ప్రత్యక్ పరాక్ పరన్ధామ పరమార్థః పరాత్పరః ॥ 101 ॥
అపారవాక్ పారగామీ పారావారః పరావరః ।
సహస్వానర్థదాతా చ సహనః సాహసీ జయీ ॥ 102 ॥
తేజస్వీ వాయువిశిఖీ తపస్వీ తాపసోత్తమః ।
ఐశ్వర్యోద్భూతికృద్భూతిరైశ్వర్యాఙ్గకలాపవాన్ ॥ 103 ॥
అమ్భోధిశాయీ భగవాన్ సర్వజ్ఞః సామపారగః ।
మహాయోగీ మహాధీరో మహాభోగీ మహాప్రభుః ॥ 104 ॥
మహావీరో మహాతుష్టిర్మహాపుష్టిర్మహాగుణః ।
మహాదేవో మహాబాహుర్మహాధర్మో మహేశ్వరః ॥ 105 ॥
సమీపగో దూరగామీ స్వర్గమార్గనిరర్గలః ।
నగో నగధరో నాగో నాగేశో నాగపాలకః ॥ 106 ॥
హిరణ్మయః స్వర్ణరేతా హిరణ్యార్చిర్హిరణ్యదః ।
గుణగణ్యః శరణ్యశ్చ పుణ్యకీర్తిః పురాణగః ॥ 107 ॥
జన్యభృజ్జన్యసన్నద్ధో దివ్యపఞ్చాయుధో వశీ ।
దౌర్జన్యభఙ్గః పర్జన్యః సౌజన్యనిలయోఽలయః ॥ 108 ॥
జలన్ధరాన్తకో భస్మదైత్యనాశీ మహామనాః ।
శ్రేష్ఠః శ్రవిష్ఠో ద్రాఘిష్ఠో గరిష్ఠో గరుడధ్వజః ॥ 109 ॥
జ్యేష్ఠో ద్రఢిష్ఠో వర్షిష్ఠో ద్రాఘీయాన్ ప్రణవః ఫణీ ।
సమ్ప్రదాయకరః స్వామీ సురేశో మాధవో మధుః ॥ 110 ॥
నిర్నిమేషో విధిర్వేధా బలవాన్ జీవనం బలీ ।
స్మర్తా శ్రోతా వికర్తా చ ధ్యాతా నేతా సమోఽసమః ॥ 111 ॥
హోతా పోతా మహావక్తా రన్తా మన్తా ఖలాన్తకః ।
దాతా గ్రాహయితా మాతా నియన్తాఽనన్తవైభవః ॥ 112 ॥
గోప్తా గోపయితా హన్తా ధర్మజాగరితా ధవః ।
కర్తా క్షేత్రకరః క్షేత్రప్రదః క్షేత్రజ్ఞ ఆత్మవిత్ ॥ 113 ॥
క్షేత్రీ క్షేత్రహరః క్షేత్రప్రియః క్షేమకరో మరుత్ ।
భక్తిప్రదో ముక్తిదాయీ శక్తిదో యుక్తిదాయకః ॥ 114 ॥
శక్తియుఙ్మౌక్తికస్రగ్వీ సూక్తిరామ్నాయసూక్తిగః ।
ధనఞ్జయో ధనాధ్యక్షో ధనికో ధనదాధిపః ॥ 115 ॥
మహాధనో మహామానీ దుర్యోధనవిమానితః ।
రత్నాకరో రత్నరోచీ రత్నగర్భాశ్రయః శుచిః ॥ 116 ॥
రత్నసానునిధిర్మౌళిరత్నభా రత్నకఙ్కణః ।
అన్తర్లక్ష్యోఽన్తరభ్యాసీ చాన్తర్ధ్యేయో జితాసనః ॥ 117 ॥
అన్తరఙ్గో దయావాంశ్చ హ్యన్తర్మాయో మహార్ణవః ।
సరసః సిద్ధరసికః సిద్ధిః సాధ్యః సదాగతిః ॥ 118 ॥
ఆయుఃప్రదో మహాయుష్మానర్చిష్మానోషధీపతిః ।
అష్టశ్రీరష్టభాగోఽష్టకకుబ్వ్యాప్తయశో వ్రతీ ॥ 119 ॥
అష్టాపదః సువర్ణాభో హ్యష్టమూర్తిస్త్రిమూర్తిమాన్ ।
అస్వప్నః స్వప్నగః స్వప్నః సుస్వప్నఫలదాయకః ॥ 120 ॥
దుఃస్వప్నధ్వంసకో ధ్వస్తదుర్నిమిత్తః శివఙ్కరః ।
సువర్ణవర్ణః సమ్భావ్యో వర్ణితో వర్ణసమ్ముఖః ॥ 121 ॥
సువర్ణముఖరీతీరశివధ్యాతపదామ్బుజః ।
దాక్షాయణీవచస్తుష్టో దూర్వాసోదృష్టిగోచరః ॥ 122 ॥
అమ్బరీషవ్రతప్రీతో మహాకృత్తివిభఞ్జనః ।
మహాభిచారకధ్వంసీ కాలసర్పభయాన్తకః ॥ 123 ॥
సుదర్శనః కాలమేఘశ్యామః శ్రీమన్త్రభావితః ।
హేమామ్బుజసరఃస్నాయీ శ్రీమనోభావితాకృతిః ॥ 124 ॥
శ్రీప్రదత్తామ్బుజస్రగ్వీ శ్రీకేళిః శ్రీనిధిర్భవః ।
శ్రీప్రదో వామనో లక్ష్మీనాయకశ్చ చతుర్భుజః ॥ 125 ॥
సన్తృప్తస్తర్పితస్తీర్థస్నాతృసౌఖ్యప్రదర్శకః ।
అగస్త్యస్తుతిసంహృష్టో దర్శితావ్యక్తభావనః ॥ 126 ॥
కపిలార్చిః కపిలవాన్ సుస్నాతాఘవిపాటనః ।
వృషాకపిః కపిస్వామిమనోఽన్తఃస్థితవిగ్రహః ॥ 127 ॥
వహ్నిప్రియోఽర్థసమ్భావ్యో జనలోకవిధాయకః ।
వహ్నిప్రభో వహ్నితేజాః శుభాభీష్టప్రదో యమీ ॥ 128 ॥
వారుణక్షేత్రనిలయో వరుణో వారణార్చితః ।
వాయుస్థానకృతావాసో వాయుగో వాయుసమ్భృతః ॥ 129 ॥
యమాన్తకోఽభిజననో యమలోకనివారణః ।
యమినామగ్రగణ్యశ్చ సంయమీ యమభావితః ॥ 130 ॥
ఇన్ద్రోద్యానసమీపస్థః ఇన్ద్రదృగ్విషయః ప్రభుః ।
యక్షరాట్ సరసీవాసో హ్యక్షయ్యనిధికోశకృత్ ॥ 131 ॥
స్వామితీర్థకృతావాసః స్వామిధ్యేయో హ్యధోక్షజః ।
వరాహాద్యష్టతీర్థాభిసేవితాఙ్ఘ్రిసరోరుహః ॥ 132 ॥
పాణ్డుతీర్థాభిషిక్తాఙ్గో యుధిష్ఠిరవరప్రదః ।
భీమాన్తఃకరణారూఢః శ్వేతవాహనసఖ్యవాన్ ॥ 133 ॥
నకులాభయదో మాద్రీసహదేవాభివన్దితః ।
కృష్ణాశపథసన్ధాతా కున్తీస్తుతిరతో దమీ ॥ 134 ॥
నారదాదిమునిస్తుత్యో నిత్యకర్మపరాయణః ।
దర్శితావ్యక్తరూపశ్చ వీణానాదప్రమోదితః ॥ 135 ॥
షట్కోటితీర్థచర్యావాన్ దేవతీర్థకృతాశ్రమః ।
బిల్వామలజలస్నాయీ సరస్వత్యమ్బుసేవితః ॥ 136 ॥
తుమ్బురూదకసంస్పర్శజనచిత్తతమోఽపహః ।
మత్స్యవామనకూర్మాదితీర్థరాజః పురాణభృత్ ॥ 137 ॥
చక్రధ్యేయపదామ్భోజః శఙ్ఖపూజితపాదుకః ।
రామతీర్థవిహారీ చ బలభద్రప్రతిష్ఠితః ॥ 138 ॥
జామదగ్న్యసరస్తీర్థజలసేచనతర్పితః ।
పాపాపహారికీలాలసుస్నాతాఘవినాశనః ॥ 139 ॥
నభోగఙ్గాభిషిక్తశ్చ నాగతీర్థాభిషేకవాన్ ।
కుమారధారాతీర్థస్థో వటువేషః సుమేఖలః ॥ 140 ॥
వృద్ధస్య సుకుమారత్వప్రదః సౌన్దర్యవాన్ సుఖీ ।
ప్రియంవదో మహాకుక్షిరిక్ష్వాకుకులనన్దనః ॥ 141 ॥
నీలగోక్షీరధారాభూర్వరాహాచలనాయకః ।
భరద్వాజప్రతిష్ఠావాన్ బృహస్పతివిభావితః ॥ 142 ॥
అఞ్జనాకృతపూజావాన్ ఆఞ్జనేయకరార్చితః ।
అఞ్జనాద్రినివాసశ్చ ముఞ్జకేశః పురన్దరః ॥ 143 ॥
కిన్నరద్వయసమ్బన్ధిబన్ధమోక్షప్రదాయకః ।
వైఖానసమఖారమ్భో వృషజ్ఞేయో వృషాచలః ॥ 144 ॥
వృషకాయప్రభేత్తా చ క్రీడనాచారసమ్భ్రమః ।
సౌవర్చలేయవిన్యస్తరాజ్యో నారాయణః ప్రియః ॥ 145 ॥
దుర్మేధోభఞ్జకః ప్రాజ్ఞో బ్రహ్మోత్సవమహోత్సుకః ।
భద్రాసురశిరశ్ఛేత్తా భద్రక్షేత్రీ సుభద్రవాన్ ॥ 146 ॥
మృగయాఽక్షీణసన్నాహః శఙ్ఖరాజన్యతుష్టిదః ।
స్థాణుస్థో వైనతేయాఙ్గభావితో హ్యశరీరవాన్ ॥ 147 ॥
భోగీన్ద్రభోగసంస్థానో బ్రహ్మాదిగణసేవితః ।
సహస్రార్కచ్ఛటాభాస్వద్విమానాన్తఃస్థితో గుణీ ॥ 148 ॥
విష్వక్సేనకృతస్తోత్రః సనన్దనవరీవృతః ।
జాహ్నవ్యాదినదీసేవ్యః సురేశాద్యభివన్దితః ॥ 149 ॥
సురాఙ్గనానృత్యపరో గన్ధర్వోద్గాయనప్రియః ।
రాకేన్దుసఙ్కాశనఖః కోమలాఙ్ఘ్రిసరోరుహః ॥ 150 ॥
కచ్ఛపప్రపదః కున్దగుల్ఫకః స్వచ్ఛకూర్పరః ।
మేదురస్వర్ణవస్త్రాఢ్యకటిదేశస్థమేఖలః ॥ 151 ॥
ప్రోల్లసచ్ఛురికాభాస్వత్కటిదేశః శుభఙ్కరః ।
అనన్తపద్మజస్థాననాభిర్మౌక్తికమాలికః ॥ 152 ॥
మన్దారచామ్పేయమాలీ రత్నాభరణసమ్భృతః ।
లమ్బయజ్ఞోపవీతీ చ చన్ద్రశ్రీఖణ్డలేపవాన్ ॥ 153 ॥
వరదోఽభయదశ్చక్రీ శఙ్ఖీ కౌస్తుభదీప్తిమాన్ ।
శ్రీవత్సాఙ్కితవక్షస్కో లక్ష్మీసంశ్రితహృత్తటః ॥ 154 ॥
నీలోత్పలనిభాకారః శోణామ్భోజసమాననః ।
కోటిమన్మథలావణ్యశ్చన్ద్రికాస్మితపూరితః ॥ 155 ॥
సుధాస్వచ్ఛోర్ధ్వపుణ్డ్రశ్చ కస్తూరీతిలకాఞ్చితః ।
పుణ్డరీకేక్షణః స్వచ్ఛో మౌలిశోభావిరాజితః ॥ 156 ॥
పద్మస్థః పద్మనాభశ్చ సోమమణ్డలగో బుధః ।
వహ్నిమణ్డలగః సూర్యః సూర్యమణ్డలసంస్థితః ॥ 157 ॥
శ్రీపతిర్భూమిజానిశ్చ విమలాద్యభిసంవృతః ।
జగత్కుటుమ్బజనితా రక్షకః కామితప్రదః ॥ 158 ॥
అవస్థాత్రయయన్తా చ విశ్వతేజస్స్వరూపవాన్ ।
జ్ఞప్తిర్జ్ఞేయో జ్ఞానగమ్యో జ్ఞానాతీతః సురాతిగః ॥ 159 ॥
బ్రహ్మాణ్డాన్తర్బహిర్వ్యాప్తో వేఙ్కటాద్రిగదాధరః ।
వేఙ్కటాద్రిగదాధర ఓం నమః ఇతి ॥
ఏవం శ్రీవేఙ్కటేశస్య కీర్తితం పరమాద్భుతమ్ ॥ 160 ॥
నామ్నాం సహస్రం సంశ్రావ్యం పవిత్రం పుణ్యవర్ధనమ్ ।
శ్రవణాత్సర్వదోషఘ్నం రోగఘ్నం మృత్యునాశనమ్ ॥ 1 ॥
దారిద్ర్యభేదనం ధర్మ్యం సర్వైశ్వర్యఫలప్రదమ్ ।
కాలాహివిషవిచ్ఛేది జ్వరాపస్మారభఞ్జనమ్ ॥ 2 ॥
[శత్రుక్షయకరం రాజగ్రహపీడానివారణమ్ ।
బ్రహ్మరాక్షసకూష్మాణ్డభేతాలభయభఞ్జనమ్ ॥]
విద్యాభిలాషీ విద్యావాన్ ధనార్థీ ధనవాన్ భవేత్ ।
అనన్తకల్పజీవీ స్యాదాయుష్కామో మహాయశాః ॥ 3 ॥
పుత్రార్థీ సుగుణాన్పుత్రాన్ లభేతాఽఽయుష్మతస్తతః ।
సఙ్గ్రామే శత్రువిజయీ సభాయాం ప్రతివాదిజిత్ ॥ 4 ॥
దివ్యైర్నామభిరేభిస్తు తులసీపూజనాత్సకృత్ ।
వైకుణ్ఠవాసీ భగవత్సదృశో విష్ణుసన్నిధౌ ॥ 5 ॥
కల్హారపూజనాన్మాసాత్ ద్వితీయ ఇవ యక్షరాట్ ।
నీలోత్పలార్చనాత్సర్వరాజపూజ్యః సదా భవేత్ ॥ 6 ॥
హృత్సంస్థితైర్నామభిస్తు భూయాద్దృగ్విషయో హరిః ।
వాఞ్ఛితార్థం తదా దత్వా వైకుణ్ఠం చ ప్రయచ్ఛతి ॥ 7 ॥
త్రిసన్ధ్యం యో జపేన్నిత్యం సమ్పూజ్య విధినా విభుమ్ ।
త్రివారం పఞ్చవారం వా ప్రత్యహం క్రమశో యమీ ॥ 8 ॥
మాసాదలక్ష్మీనాశః స్యాత్ ద్విమాసాత్ స్యాన్నరేన్ద్రతా ।
త్రిమాసాన్మహదైశ్వర్యం తతః సమ్భాషణం భవేత్ ॥ 9 ॥
మాసం పఠన్న్యూనకర్మపూర్తిం చ సమవాప్నుయాత్ ।
మార్గభ్రష్టశ్చ సన్మార్గం గతస్వః స్వం స్వకీయకమ్ ॥ 10 ॥
చాఞ్చల్యచిత్తోఽచాఞ్చల్యం మనస్స్వాస్థ్యం చ గచ్ఛతి ।
ఆయురారోగ్యమైశ్వర్యం జ్ఞానం మోక్షం చ విన్దతి ॥ 11 ॥
సర్వాన్కామానవాప్నోతి శాశ్వతం చ పదం తథా ।
సత్యం సత్యం పునస్సత్యం సత్యం సత్యం న సంశయః ॥ 12 ॥
ఇతి శ్రీ బ్రహ్మాణ్డపురాణే వసిష్ఠనారదసంవాదే శ్రీవేఙ్కటాచలమాహాత్మ్యే శ్రీ వేఙ్కటేశ సహస్రనామ స్తోత్రం సమాప్తమ్ ।
