(శ్రీమద్భాగవత మహాపురాణే ప్రథమస్కన్ధే అష్టమాధ్యాయః)
కున్త్యువాచ ।
నమస్యే పురుషం త్వాద్యమీశ్వరం ప్రకృతేః పరమ్ ।
అలక్ష్యం సర్వభూతానామన్తర్బహిరవస్థితమ్ ॥ 18 ॥
మాయాజవనికాచ్ఛన్నమజ్ఞాధోక్షజమవ్యయమ్ ।
న లక్ష్యసే మూఢదృశా నటో నాట్యధరో యథా ॥ 19 ॥
తథా పరమహంసానాం మునీనామమలాత్మనామ్ ।
భక్తియోగవిధానార్థం కథం పశ్యేమ హి స్త్రియః ॥ 20 ॥
కృష్ణాయ వాసుదేవాయ దేవకీనన్దనాయ చ ।
నన్దగోపకుమారాయ గోవిన్దాయ నమో నమః ॥ 21 ॥
నమః పఙ్కజనాభాయ నమః పఙ్కజమాలినే ।
నమః పఙ్కజనేత్రాయ నమస్తే పఙ్కజాఙ్ఘ్రయే ॥ 22 ॥
యథా హృషీకేశ ఖలేన దేవకీ కంసేన రుద్ధాతిచిరం శుచార్పితా ।
విమోచితాహం చ సహాత్మజా విభో త్వయైవ నాథేన ముహుర్విపద్గణాత్ ॥ 23 ॥
విషాన్మహాగ్నేః పురుషాదదర్శనాదసత్సభాయా వనవాసకృచ్ఛ్రతః ।
మృధే మృధేఽనేకమహాఱథాస్త్రతో ద్రౌణ్యస్త్రతశ్చాస్మ హరేఽభిరక్షితాః ॥ 24 ॥
విపదః సన్తు తాః శశ్వత్తత్ర తత్ర జగద్గురో ।
భవతో దర్శనం యత్స్యాదపునర్భవదర్శనమ్ ॥ 25 ॥
జన్మైశ్వర్యశ్రుతశ్రీభిరేధమానమదః పుమాన్ ।
నైవార్హత్యభిధాతుం వై త్వామకిఞ్చనగోచరమ్ ॥ 26 ॥
నమోఽకిఞ్చనవిత్తాయ నివృత్తగుణవృత్తయే ।
ఆత్మారామాయ శాన్తాయ కైవల్యపతయే నమః ॥ 27 ॥
మన్యే త్వాం కాలమీశానమనాదినిధనం విభుమ్ ।
సమం చరన్తం సర్వత్ర భూతానాం యన్మిథః కలిః ॥ 28 ॥
న వేద కశ్చిద్భగవంశ్చికీర్షితం తవేహమానస్య నృణాం విడమ్బనమ్ ।
న యస్య కశ్చిద్దయితోఽస్తి కర్హిచిద్ద్వేష్యశ్చ యస్మిన్విషమా మతిర్నృణామ్ ॥ 29 ॥
జన్మ కర్మ చ విశ్వాత్మన్నజస్యాకర్తురాత్మనః ।
తిర్యన్నృషిషు యాదఃసు తదత్యన్తవిడమ్బనమ్ ॥ 30 ॥
గోప్యాదదే త్వయి కృతాగసి దామ తావద్యాతే దశాశ్రుకలిలాఞ్జనసమ్భ్రమాక్షమ్ ।
వక్త్రం నినీయ భయభావనయా స్థితస్య సా మాం విమోహయతి భీరపి యద్బిభేతి ॥ 31 ॥
కేచిదాహురజం జాతం పుణ్యశ్లోకస్య కీర్తయే ।
యదోః ప్రియస్యాన్వవాయే మలయస్యేవ చన్దనమ్ ॥ 32 ॥
అపరే వసుదేవస్య దేవక్యాం యాచితోఽభ్యగాత్ ।
అజస్త్వమస్య క్షేమాయ వధాయ చ సురద్విషామ్ ॥ 33 ॥
భారావతారణాయాన్యే భువో నావ ఇవోదధౌ ।
సీదన్త్యా భూరిభారేణ జాతో హ్యాత్మభువార్థితః ॥ 34 ॥
భవేస్మిన్క్లిశ్యమానానామవిద్యాకామకర్మభిః ।
శ్రవణస్మరణార్హాణి కరిష్యన్నితి కేచన ॥ 35 ॥
శృణ్వన్తి గాయన్తి గృణన్త్యభీక్ష్ణశః స్మరన్తి నన్దన్తి తవేహితం జనాః ।
త ఏవ పశ్యన్త్యచిరేణ తావకం భవప్రవాహోపరమం పదామ్బుజమ్ ॥ 36 ॥
అప్యద్య నస్త్వం స్వకృతేహిత ప్రభో జిహాససి స్విత్సుహృదోఽనుజీవినః ।
యేషాం న చాన్యద్భవతః పదామ్బుజాత్పరాయణం రాజసు యోజితాంహసామ్ ॥ 37 ॥
కే వయం నామరూపాభ్యాం యదుభిః సహ పాణ్డవాః ।
భవతోఽదర్శనం యర్హి హృషీకాణామివేశితుః ॥ 38 ॥
నేయం శోభిష్యతే తత్ర యథేదానీం గదాధర ।
త్వత్పదైరఙ్కితా భాతి స్వలక్షణవిలక్షితైః ॥ 39 ॥
ఇమే జనపదాః స్వృద్ధాః సుపక్వౌషధివీరుధః ।
వనాద్రినద్యుదన్వన్తో హ్యేధన్తే తవ వీక్షితైః ॥ 40 ॥
అథ విశ్వేశ విశ్వాత్మన్విశ్వమూర్తే స్వకేషు మే ।
స్నేహపాశమిమం ఛిన్ధి దృఢం పాణ్డుషు వృష్ణిషు ॥ 41 ॥
త్వయి మేఽనన్యవిషయా మతిర్మధుపతేఽసకృత్ ।
రతిముద్వహతాదద్ధా గఙ్గేవౌఘముదన్వతి ॥ 42 ॥
శ్రీకృష్ణ కృష్ణసఖ వృష్ణ్యృషభావనిద్రుగ్రాజన్యవంశదహనానపవర్గవీర్య ।
గోవిన్ద గోద్విజసురార్తిహరావతార యోగేశ్వరాఖిలగురో భగవన్నమస్తే ॥ 43 ॥
॥ ఇతి శ్రీమద్భాగవతే మహాపురాణే పారమహంస్యాం సంహితాయాం ప్రథమస్కన్ధే అష్టమేఽధ్యాయే శ్రీకున్తీకృతకృష్ణస్తుతిః సమ్పూర్ణా ॥
