(ଶ୍ରୀମଦ୍ଭାଗଵତଂ 6.16.34-48)
ଚିତ୍ରକେତୁରୁଵାଚ ।
ଅଜିତ ଜିତଃ ସମମତିଭିଃ ସାଧୁଭି-
ର୍ଭଵାନ୍ ଜିତାତ୍ମଭିର୍ଭଵତା ।
ଵିଜିତାସ୍ତେଽପି ଚ ଭଜତାମକାମାତ୍ମନାଂ
ୟ ଆତ୍ମଦୋଽତିକରୁଣଃ ॥ 34 ॥
ତଵ ଵିଭଵଃ ଖଲୁ ଭଗଵନ୍
ଜଗଦୁଦୟସ୍ଥିତିଲୟାଦୀନି ।
ଵିଶ୍ଵସୃଜସ୍ତେଂଽଶାଂଶାସ୍ତତ୍ର
ମୃଷା ସ୍ପର୍ଧଂତେ ପୃଥଗଭିମତ୍ୟା ॥ 35 ॥
ପରମାଣୁପରମମହତୋସ୍ତ୍ଵ-
ମାଦ୍ୟଂତାଂତରଵର୍ତୀ ତ୍ରୟଵିଧୁରଃ ।
ଆଦାଵଂତେଽପି ଚ ସତ୍ତ୍ଵାନାଂ
ୟଦ୍ଧ୍ରୁଵଂ ତଦେଵାଂତରାଲେଽପି ॥ 36 ॥
କ୍ଷିତ୍ୟାଦିଭିରେଷ କିଲାଵୃତଃ
ସପ୍ତଭିର୍ଦଶଗୁଣୋତ୍ତରୈରଂଡକୋଶଃ ।
ୟତ୍ର ପତତ୍ୟଣୁକଲ୍ପଃ
ସହାଂଡକୋଟିକୋଟିଭିସ୍ତଦନଂତଃ ॥ 37 ॥
ଵିଷୟତୃଷୋ ନରପଶଵୋ
ୟ ଉପାସତେ ଵିଭୂତୀର୍ନ ପରଂ ତ୍ଵାମ୍ ।
ତେଷାମାଶିଷ ଈଶ ତଦନୁ
ଵିନଶ୍ୟଂତି ୟଥା ରାଜକୁଲମ୍ ॥ 38 ॥
କାମଧିୟସ୍ତ୍ଵୟି ରଚିତା
ନ ପରମ ରୋହଂତି ୟଥା କରଂଭବୀଜାନି ।
ଜ୍ଞାନାତ୍ମନ୍ୟଗୁଣମୟେ
ଗୁଣଗଣତୋଽସ୍ୟ ଦ୍ଵଂଦ୍ଵଜାଲାନି ॥ 39 ॥
ଜିତମଜିତ ତଦା ଭଵତା
ୟଦାହ ଭାଗଵତଂ ଧର୍ମମନଵଦ୍ୟମ୍ ।
ନିଷ୍କିଂଚନା ୟେ ମୁନୟ ଆତ୍ମାରାମା
ୟମୁପାସତେଽପଵର୍ଗାୟ ॥ 40 ॥
ଵିଷମମତିର୍ନ ୟତ୍ର ନୃଣାଂ
ତ୍ଵମହମିତି ମମ ତଵେତି ଚ ୟଦନ୍ୟତ୍ର ।
ଵିଷମଧିୟା ରଚିତୋ ୟଃ
ସ ହ୍ୟଵିଶୁଦ୍ଧଃ କ୍ଷୟିଷ୍ଣୁରଧର୍ମବହୁଲଃ ॥ 41 ॥
କଃ କ୍ଷେମୋ ନିଜପରୟୋଃ
କିୟାନର୍ଥଃ ସ୍ଵପରଦ୍ରୁହା ଧର୍ମେଣ ।
ସ୍ଵଦ୍ରୋହାତ୍ତଵ କୋପଃ
ପରସଂପୀଡୟା ଚ ତଥାଧର୍ମଃ ॥ 42 ॥
ନ ଵ୍ୟଭିଚରତି ତଵେକ୍ଷା ୟୟା
ହ୍ୟଭିହିତୋ ଭାଗଵତୋ ଧର୍ମଃ ।
ସ୍ଥିରଚରସତ୍ତ୍ଵକଦଂବେଷ୍ଵପୃଥଗ୍ଧିୟୋ
ୟମୁପାସତେ ତ୍ଵାର୍ୟାଃ ॥ 43 ॥
ନ ହି ଭଗଵନ୍ନଘଟିତମିଦଂ
ତ୍ଵଦ୍ଦର୍ଶନାନ୍ନୃଣାମଖିଲପାପକ୍ଷୟଃ ।
ୟନ୍ନାମ ସକୃଚ୍ଛ୍ରଵଣାତ୍ପୁଲ୍କସକୋଽପି
ଵିମୁଚ୍ୟତେ ସଂସାରାତ୍ ॥ 44 ॥
ଅଥ ଭଗଵନ୍ ଵୟମଧୁନା
ତ୍ଵଦଵଲୋକପରିମୃଷ୍ଟାଶୟମଲାଃ ।
ସୁରଋଷିଣା ୟଦୁଦିତଂ ତାଵକେନ
କଥମନ୍ୟଥା ଭଵତି ॥ 45 ॥
ଵିଦିତମନଂତ ସମସ୍ତଂ ତଵ
ଜଗଦାତ୍ମନୋ ଜନୈରିହାଚରିତମ୍ ।
ଵିଜ୍ଞାପ୍ୟଂ ପରମଗୁରୋଃ କିୟଦିଵ
ସଵିତୁରିଵ ଖଦ୍ୟୋତୈଃ ॥ 46 ॥
ନମସ୍ତୁଭ୍ୟଂ ଭଗଵତେ ସକଲଜଗ-
ତ୍ସ୍ଥିତିଲୟୋଦୟେଶାୟ ।
ଦୁରଵସିତାତ୍ମଗତୟେ
କୁୟୋଗିନାଂ ଭିଦା ପରମହଂସାୟ ॥ 47 ॥
ୟଂ ଵୈ ଶ୍ଵସଂତମନୁ ଵିଶ୍ଵସୃଜଃ ଶ୍ଵସଂତି
ୟଂ ଚେକିତାନମନୁ ଚିତ୍ତୟ ଉଚ୍ଚକଂତି ।
ଭୂମଂଡଲଂ ସର୍ଷପାୟତି ୟସ୍ୟ ମୂର୍ଧ୍ନି
ତସ୍ମୈ ନମୋ ଭଗଵତେଽସ୍ତୁ ସହସ୍ରମୂର୍ଧ୍ନେ ॥ 48 ॥
॥ ଇତି ଶ୍ରୀମଦ୍ଭାଗଵତମହାପୁରାଣେ ଷଷ୍ଠସ୍କଂଧେ ଷୋଡଶାଧ୍ୟାୟାଂତର୍ଗତଂ ଚିତ୍ରକେତୁକୃତଂ ଅନଂତସ୍ତୋତ୍ରମ୍ ॥
