(ශ්රීමද්භාගවතං 6.16.34-48)
චිත්රකේතුරුවාච ।
අජිත ජිතඃ සමමතිභිඃ සාධුභි-
ර්භවාන් ජිතාත්මභිර්භවතා ।
විජිතාස්තේऽපි ච භජතාමකාමාත්මනාං
ය ආත්මදෝऽතිකරුණඃ ॥ 34 ॥
තව විභවඃ ඛලු භගවන්
ජගදුදයස්ථිතිලයාදීනි ।
විශ්වසෘජස්තේංऽශාංශාස්තත්ර
මෘෂා ස්පර්ධංතේ පෘථගභිමත්යා ॥ 35 ॥
පරමාණුපරමමහතෝස්ත්ව-
මාද්යංතාංතරවර්තී ත්රයවිධුරඃ ।
ආදාවංතේऽපි ච සත්ත්වානාං
යද්ධ්රුවං තදේවාංතරාලේऽපි ॥ 36 ॥
ක්ෂිත්යාදිභිරේෂ කිලාවෘතඃ
සප්තභිර්දශගුණෝත්තරෛරංඩකෝශඃ ।
යත්ර පතත්යණුකල්පඃ
සහාංඩකෝටිකෝටිභිස්තදනංතඃ ॥ 37 ॥
විෂයතෘෂෝ නරපශවෝ
ය උපාසතේ විභූතීර්න පරං ත්වාම් ।
තේෂාමාශිෂ ඊශ තදනු
විනශ්යංති යථා රාජකුලම් ॥ 38 ॥
කාමධියස්ත්වයි රචිතා
න පරම රෝහංති යථා කරංභබීජානි ।
ජ්ඤානාත්මන්යගුණමයේ
ගුණගණතෝऽස්ය ද්වංද්වජාලානි ॥ 39 ॥
ජිතමජිත තදා භවතා
යදාහ භාගවතං ධර්මමනවද්යම් ।
නිෂ්කිංචනා යේ මුනය ආත්මාරාමා
යමුපාසතේऽපවර්ගාය ॥ 40 ॥
විෂමමතිර්න යත්ර නෘණාං
ත්වමහමිති මම තවේති ච යදන්යත්ර ।
විෂමධියා රචිතෝ යඃ
ස හ්යවිශුද්ධඃ ක්ෂයිෂ්ණුරධර්මබහුලඃ ॥ 41 ॥
කඃ ක්ෂේමෝ නිජපරයෝඃ
කියානර්ථඃ ස්වපරද්රුහා ධර්මේණ ।
ස්වද්රෝහාත්තව කෝපඃ
පරසංපීඩයා ච තථාධර්මඃ ॥ 42 ॥
න ව්යභිචරති තවේක්ෂා යයා
හ්යභිහිතෝ භාගවතෝ ධර්මඃ ।
ස්ථිරචරසත්ත්වකදංබේෂ්වපෘථග්ධියෝ
යමුපාසතේ ත්වාර්යාඃ ॥ 43 ॥
න හි භගවන්නඝටිතමිදං
ත්වද්දර්ශනාන්නෘණාමඛිලපාපක්ෂයඃ ।
යන්නාම සකෘච්ඡ්රවණාත්පුල්කසකෝऽපි
විමුච්යතේ සංසාරාත් ॥ 44 ॥
අථ භගවන් වයමධුනා
ත්වදවලෝකපරිමෘෂ්ටාශයමලාඃ ।
සුරඍෂිණා යදුදිතං තාවකේන
කථමන්යථා භවති ॥ 45 ॥
විදිතමනංත සමස්තං තව
ජගදාත්මනෝ ජනෛරිහාචරිතම් ।
විජ්ඤාප්යං පරමගුරෝඃ කියදිව
සවිතුරිව ඛද්යෝතෛඃ ॥ 46 ॥
නමස්තුභ්යං භගවතේ සකලජග-
ත්ස්ථිතිලයෝදයේශාය ।
දුරවසිතාත්මගතයේ
කුයෝගිනාං භිදා පරමහංසාය ॥ 47 ॥
යං වෛ ශ්වසංතමනු විශ්වසෘජඃ ශ්වසංති
යං චේකිතානමනු චිත්තය උච්චකංති ।
භූමංඩලං සර්ෂපායති යස්ය මූර්ධ්නි
තස්මෛ නමෝ භගවතේऽස්තු සහස්රමූර්ධ්නේ ॥ 48 ॥
॥ ඉති ශ්රීමද්භාගවතමහාපුරාණේ ෂෂ්ඨස්කංධේ ෂෝඩශාධ්යායාංතර්ගතං චිත්රකේතුකෘතං අනංතස්තෝත්රම් ॥
