(श्रीमद्भागवतं 6.16.34-48)
चित्रकेतुरुवाच ।
अजित जितः सममतिभिः साधुभि-
र्भवान् जितात्मभिर्भवता ।
विजितास्तेऽपि च भजतामकामात्मनां
य आत्मदोऽतिकरुणः ॥ 34 ॥
तव विभवः खलु भगवन्
जगदुदयस्थितिलयादीनि ।
विश्वसृजस्तेंऽशांशास्तत्र
मृषा स्पर्धंते पृथगभिमत्या ॥ 35 ॥
परमाणुपरममहतोस्त्व-
माद्यंतांतरवर्ती त्रयविधुरः ।
आदावंतेऽपि च सत्त्वानां
यद्ध्रुवं तदेवांतरालेऽपि ॥ 36 ॥
क्षित्यादिभिरेष किलावृतः
सप्तभिर्दशगुणोत्तरैरंडकोशः ।
यत्र पतत्यणुकल्पः
सहांडकोटिकोटिभिस्तदनंतः ॥ 37 ॥
विषयतृषो नरपशवो
य उपासते विभूतीर्न परं त्वाम् ।
तेषामाशिष ईश तदनु
विनश्यंति यथा राजकुलम् ॥ 38 ॥
कामधियस्त्वयि रचिता
न परम रोहंति यथा करंभबीजानि ।
ज्ञानात्मन्यगुणमये
गुणगणतोऽस्य द्वंद्वजालानि ॥ 39 ॥
जितमजित तदा भवता
यदाह भागवतं धर्ममनवद्यम् ।
निष्किंचना ये मुनय आत्मारामा
यमुपासतेऽपवर्गाय ॥ 40 ॥
विषममतिर्न यत्र नृणां
त्वमहमिति मम तवेति च यदन्यत्र ।
विषमधिया रचितो यः
स ह्यविशुद्धः क्षयिष्णुरधर्मबहुलः ॥ 41 ॥
कः क्षेमो निजपरयोः
कियानर्थः स्वपरद्रुहा धर्मेण ।
स्वद्रोहात्तव कोपः
परसंपीडया च तथाधर्मः ॥ 42 ॥
न व्यभिचरति तवेक्षा यया
ह्यभिहितो भागवतो धर्मः ।
स्थिरचरसत्त्वकदंबेष्वपृथग्धियो
यमुपासते त्वार्याः ॥ 43 ॥
न हि भगवन्नघटितमिदं
त्वद्दर्शनान्नृणामखिलपापक्षयः ।
यन्नाम सकृच्छ्रवणात्पुल्कसकोऽपि
विमुच्यते संसारात् ॥ 44 ॥
अथ भगवन् वयमधुना
त्वदवलोकपरिमृष्टाशयमलाः ।
सुरऋषिणा यदुदितं तावकेन
कथमन्यथा भवति ॥ 45 ॥
विदितमनंत समस्तं तव
जगदात्मनो जनैरिहाचरितम् ।
विज्ञाप्यं परमगुरोः कियदिव
सवितुरिव खद्योतैः ॥ 46 ॥
नमस्तुभ्यं भगवते सकलजग-
त्स्थितिलयोदयेशाय ।
दुरवसितात्मगतये
कुयोगिनां भिदा परमहंसाय ॥ 47 ॥
यं वै श्वसंतमनु विश्वसृजः श्वसंति
यं चेकितानमनु चित्तय उच्चकंति ।
भूमंडलं सर्षपायति यस्य मूर्ध्नि
तस्मै नमो भगवतेऽस्तु सहस्रमूर्ध्ने ॥ 48 ॥
॥ इति श्रीमद्भागवतमहापुराणे षष्ठस्कंधे षोडशाध्यायांतर्गतं चित्रकेतुकृतं अनंतस्तोत्रम् ॥
