(పద్మపురాణ, ఉత్తరఖణ్డ, 245.304-318)
దృష్ట్వా తస్మిన్ జలే దేవం విస్మయం పరమం యయౌ ।
తుష్టావాథ యదుశ్రేష్ఠో హరిం సర్వగమీశ్వరమ్ ॥ 304 ॥
అక్రూర ఉవాచ ।
కాలాత్మనే నమస్తుభ్యమనాదినిధనాయ చ ।
అవ్యక్తాయ నమస్తుభ్యమవికారాయ తే నమః ॥ 305 ॥
భూతభర్త్రే నమస్తుభ్యం భూతవ్యాఘ్ర నమో నమః ।
నమస్తే సర్వభూతానాం నియన్త్రే పరమాత్మనే ॥ 306 ॥
వికారాయావికారాయ ప్రత్యక్షపురుషాయ చ ।
గుణభర్త్రే నమస్తుభ్యం నియమాయ నమో నమః ॥ 307 ॥
దేశకాలాదినిర్భేదరహితాయ పరాత్మనే ।
అనన్తాయ నమస్తుభ్యమచ్యుతాయ నమో నమః ॥ 308 ॥
గోవిన్దాయ నమస్తుభ్యం త్రయీనాథాయ శార్ఙ్గిణే ।
నారాయణాయ విశ్వాయ వాసుదేవాయ తే నమః ॥ 309 ॥
విష్ణవే పురురూపాయ శాశ్వతాయ నమో నమః ।
పద్మనేత్రాయ నిత్యాయ శఙ్ఖచక్రధరాయ చ ॥ 310 ॥
ఉద్యత్కోటిరవిప్రఖ్య భూషణాఞ్చితవర్చసే ।
హరయే సర్వలోకానామీశ్వరాయ నమో నమః ॥ 311 ॥
సవిత్రే సర్వజగతాం బీజాయ పరమాత్మనే ।
సఙ్కర్షణాయ కృష్ణాయ ప్రద్యుమ్నాయ నమో నమః ॥ 312 ॥
అనిరుద్ధాయ ధాత్రే చ విధాత్రే విశ్వయోనయే ।
సహస్రమూర్త్తయే తుభ్యం బహుమూర్ద్ధాఙ్ఘ్రిబాహవే ॥ 313 ॥
సహస్రనామ్నే నిత్యాయ పురుషాయ నమో నమః ।
నమస్తే నాగపర్యఙ్కశాయినే సౌమ్యరూపిణే ॥ 314 ॥
కేశవాయ నమస్తుభ్యం పీతవస్త్రధరాయ చ ।
లక్ష్మీఘనకుచాశ్లేషవిమర్దోజ్జ్వలవర్చసే ।
శ్రీధరాయ నమస్తుభ్యం శ్రీశాయానన్తరూపిణే ॥ 315 ॥
ఈశ్వర ఉవాచ ।
స్నానకాలే పఠేద్యస్తు దేవం ధ్యాయన్సనాతనమ్ ।
ఇమం స్తవం నరో భక్త్యా మహద్భిర్ముచ్యతే హ్యఘైః ॥ 316 ॥
సర్వతీర్థఫలం ప్రాప్య విష్ణుసాయుజ్యమాప్నుయాత్ ।
ఏవమన్తర్జలే దేవం స్తుత్వా భాగవతోత్తమః ॥ 317 ॥
అర్చయామాస స జలైః కుసుమైశ్చ సుగన్ధిభిః ।
కృతకృత్యస్తదాక్రూరో నిర్గత్య యమునాజలాత్ ॥ 318 ॥
॥ ఇతి శ్రీపద్మపురాణే ఉత్తరఖణ్డే పఞ్చచత్వారింశాధికద్విశతతమాధ్యాయాన్తర్గతం అక్రూరకృతా శ్రీకృష్ణస్తుతిః సమాప్తా ॥
