ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ದಶಮಃ ಪ್ರಪಾಠಕಃ - ಮಹಾನಾರಾಯಣೋಪನಿಷತ್
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ । ತೇ॒ಜ॒ಸ್ವಿನಾ॒ ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ॥
ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥
ಅನುವಾಕಂ 1
ಅಮ್ಭ॑ಸ್ಯ ಪಾ॒ರೇ ಭುವ॑ನಸ್ಯ॒ ಮದ್ಧ್ಯೇ॒ ನಾಕ॑ಸ್ಯ ಪೃ॒ಷ್ಠೇ ಮ॑ಹ॒ತೋ ಮಹೀ॑ಯಾನ್ ।
ಶು॒ಕ್ರೇಣ॒ ಜ್ಯೋತೀಗ್ಂ॑ಷಿ ಸಮನು॒ಪ್ರವಿ॑ಷ್ಟಃ ಪ್ರ॒ಜಾಪ॑ತಿಶ್ಚರತಿ॒ ಗರ್ಭೇ॑ ಅ॒ನ್ತಃ ॥
ಯಸ್ಮಿ॑ನ್ನಿ॒ದಗ್ಂ ಸಞ್ಚ॒ ವಿಚೈತಿ॒ ಸರ್ವಂ॒-ಯಁಸ್ಮಿ॑-ನ್ದೇ॒ವಾ ಅಧಿ॒ ವಿಶ್ವೇ॑ ನಿಷೇ॒ದುಃ ।
ತದೇ॒ವ ಭೂ॒ತ-ನ್ತದು॒ ಭವ್ಯ॑ಮಾ ಇ॒ದ-ನ್ತದ॒ಖ್ಷರೇ॑ ಪರ॒ಮೇ ವ್ಯೋ॑ಮನ್ನ್ ॥
ಯೇನಾ॑ ವೃ॒ತ-ಙ್ಖಞ್ಚ॒ ದಿವ॑-ಮ್ಮ॒ಹೀಞ್ಚ॒ ಯೇನಾ॑ದಿ॒ತ್ಯ-ಸ್ತಪ॑ತಿ॒ ತೇಜ॑ಸಾ॒ ಭ್ರಾಜ॑ಸಾ ಚ ।
ಯಮ॒ನ್ತ-ಸ್ಸ॑ಮು॒ದ್ರೇ ಕ॒ವಯೋ॒ ವಯ॑ನ್ತಿ॒ ಯದ॒ಖ್ಷರೇ॑ ಪರ॒ಮೇ ಪ್ರ॒ಜಾಃ ॥
ಯತಃ॑ ಪ್ರಸೂ॒ತಾ ಜ॒ಗತಃ॑ ಪ್ರಸೂತೀ॒ ತೋಯೇ॑ನ ಜೀ॒ವಾನ್ ವ್ಯಚ॑ಸರ್ಜ॒ (ವ್ಯಸ॑ಸರ್ಜ॒) ಭೂಮ್ಯಾ᳚ಮ್ ।
ಯದೋಷ॑ಧೀಭಿಃ ಪು॒ರುಷಾ᳚-ನ್ಪ॒ಶೂಗ್ಶ್ಚ॒ ವಿವೇ॑ಶ ಭೂ॒ತಾನಿ॑ ಚರಾಚ॒ರಾಣಿ॑ ॥
ಅತಃ॑ ಪರ॒-ನ್ನಾನ್ಯ॒-ದಣೀ॑ಯಸಹಿ॒ ಪರಾ᳚-ತ್ಪರಂ॒-ಯಁ-ನ್ಮಹ॑ತೋ ಮ॒ಹಾನ್ತ᳚ಮ್ ।
ಯದೇ॑ಕ-ಮ॒ವ್ಯಕ್ತ॒-ಮನ॑ನ್ತರೂಪಂ॒-ವಿಁಶ್ವ॑-ಮ್ಪುರಾ॒ಣ-ನ್ತಮ॑ಸಃ॒ ಪರ॑ಸ್ತಾತ್ ॥ 1 ॥
ತದೇ॒ವರ್ತ-ನ್ತದು॑ ಸ॒ತ್ಯಮಾ॑ಹು॒-ಸ್ತದೇ॒ವ ಬ್ರಹ್ಮ॑ ಪರ॒ಮ-ಙ್ಕ॑ವೀ॒ನಾಮ್ ।
ಇ॒ಷ್ಟಾ॒ಪೂ॒ರ್ತ-ಮ್ಬ॑ಹು॒ಧಾ ಜಾ॒ತ-ಞ್ಜಾಯ॑ಮಾನಂ-ವಿಁ॒ಶ್ವ-ಮ್ಬಿ॑ಭರ್ತಿ॒ ಭುವ॑ನಸ್ಯ॒ ನಾಭಿಃ॑ ॥
ತದೇ॒ವಾಗ್ನಿ-ಸ್ತದ್ವಾ॒ಯು-ಸ್ತಥ್ಸೂರ್ಯ॒ಸ್ತದು॑ ಚ॒ನ್ದ್ರಮಾಃ᳚ ।
ತದೇ॒ವ ಶು॒ಕ್ರಮ॒ಮೃತ॒-ನ್ತದ್ಬ್ರಹ್ಮ॒ ತದಾಪ॒-ಸ್ಸ ಪ್ರ॒ಜಾಪ॑ತಿಃ ॥
ಸರ್ವೇ॑ ನಿಮೇ॒ಷಾ ಜ॒ಜ್ಞಿರೇ॑ ವಿ॒ದ್ಯುತಃ॒ ಪುರು॑ಷಾ॒ದಧಿ॑ ।
ಕ॒ಲಾ ಮು॑ಹೂ॒ರ್ತಾಃ ಕಾಷ್ಠಾ᳚ಶ್ಚಾಹೋ-ರಾ॒ತ್ರಾಶ್ಚ॑ ಸರ್ವ॒ಶಃ ॥
ಅ॒ರ್ಧ॒ಮಾ॒ಸಾ ಮಾಸಾ॑ ಋ॒ತವ॑-ಸ್ಸಂವಁಥ್ಸ॒ರಶ್ಚ॑ ಕಲ್ಪನ್ತಾಮ್ । ಸ ಆಪಃ॑ ಪ್ರದು॒ಘೇ ಉ॒ಭೇ ಇ॒ಮೇ ಅ॒ನ್ತರಿ॑ಖ್ಷ॒-ಮಥೋ॒ ಸುವಃ॑ ॥
ನೈನ॑-ಮೂ॒ರ್ಧ್ವ-ನ್ನ ತಿ॒ರ್ಯ-ಞ್ಚ॒ ನ ಮದ್ಧ್ಯೇ॒ ಪರಿ॑ಜಗ್ರಭತ್ । ನ ತಸ್ಯೇ॑ಶೇ॒ ಕಶ್ಚ॒ನ ತಸ್ಯ॑ ನಾಮ ಮ॒ಹದ್ಯಶಃ॑ ॥ 2 ॥
ನ ಸ॒ದೃಂಶೇ॑ ತಿಷ್ಠತಿ॒ ರೂಪ॑ಮಸ್ಯ॒ ನ ಚಖ್ಷು॑ಷಾ ಪಶ್ಯತಿ॒ ಕಶ್ಚ॒ನೈನ᳚ಮ್ ।
ಹೃ॒ದಾ ಮ॑ನೀ॒ಷಾ ಮನ॑ಸಾ॒-ಽಭಿ ಕ್ಲೃ॑ಪ್ತೋ॒ ಯ ಏ॑ನಂ-ವಿಁ॒ದು-ರಮೃ॑ತಾ॒ಸ್ತೇ ಭ॑ವನ್ತಿ ॥
ಅ॒ದ್ಭ್ಯ-ಸ್ಸಮ್ಭೂ॑ತಃ ಪೃಥಿ॒ವ್ಯೈ ರಸಾ᳚ಚ್ಚ । ವಿ॒ಶ್ವಕ॑ರ್ಮಣ॒-ಸ್ಸಮ॑ವರ್ತ॒ತಾಧಿ॑ ।
ತಸ್ಯ॒ ತ್ವಷ್ಟಾ॑ ವಿ॒ದಧ॑ದ್ರೂ॒ಪಮೇ॑ತಿ ॥
ತತ್ಪುರು॑ಷಸ್ಯ॒ ವಿಶ್ವ॒ಮಾಜಾ॑ನ॒ಮಗ್ರೇ᳚ ।
ವೇದಾ॒ಹಮೇ॒ತ-ಮ್ಪುರು॑ಷ-ಮ್ಮ॒ಹಾನ್ತ᳚ಮ್ ।
ಆ॒ದಿ॒ತ್ಯ ವ॑ರ್ಣ॒-ನ್ತಮ॑ಸಃ॒ ಪರ॑ಸ್ತಾತ್ ।
ತಮೇ॒ವಂ-ವಿಁ॒ದ್ವಾನ॒ಮೃತ॑ ಇ॒ಹ ಭ॑ವತಿ । ನಾನ್ಯಃ ಪನ್ಥಾ॑ ವಿದ್ಯ॒ತೇ-ಽಯ॑ನಾಯ ॥
ಪ್ರ॒ಜಾಪ॑ತಿಶ್ಚರತಿ॒ ಗರ್ಭೇ॑ ಅ॒ನ್ತಃ । ಅ॒ಜಾಯ॑ಮಾನೋ ಬಹು॒ಧಾ ವಿಜಾ॑ಯತೇ । ತಸ್ಯ॒ ಧೀರಾಃ॒ ಪರಿ॑ಜಾನನ್ತಿ॒ ಯೋನಿ᳚ಮ್ । ಮರೀ॑ಚೀನಾ-ಮ್ಪ॒ದಮಿ॑ಚ್ಛನ್ತಿ ವೇ॒ಧಸಃ॑ ॥ ಯೋ ದೇ॒ವೇಭ್ಯ॒ ಆತ॑ಪತಿ । ಯೋ ದೇ॒ವಾನಾ᳚-ಮ್ಪು॒ರೋಹಿ॑ತಃ । ಪೂರ್ವೋ॒ ಯೋ ದೇ॒ವೇಭ್ಯೋ॑ ಜಾ॒ತಃ । ನಮೋ॑ ರು॒ಚಾಯ॒ ಬ್ರಾಹ್ಮ॑ಯೇ ॥ ರುಚ॑-ಮ್ಬ್ರಾ॒ಹ್ಮ-ಞ್ಜ॒ನಯ॑ನ್ತಃ । ದೇ॒ವಾ ಅಗ್ರೇ॒ ತದ॑ಬ್ರುವನ್ನ್ ।
ಯಸ್ತ್ವೈ॒ವ-ಮ್ಬ್ರಾ᳚ಹ್ಮ॒ಣೋ ವಿ॒ದ್ಯಾತ್ । ತಸ್ಯ॑ ದೇ॒ವಾ ಅಸ॒ನ್ ವಶೇ᳚ ॥ ಹ್ರೀಶ್ಚ॑ತೇ ಲ॒ಖ್ಷ್ಮೀಶ್ಚ॒ ಪತ್ನ್ಯೌ᳚ । ಅ॒ಹೋ॒ರಾ॒ತ್ರೇ ಪಾ॒ರ್ಶ್ವೇ । ನಖ್ಷ॑ತ್ರಾಣಿ ರೂ॒ಪಮ್ ।
ಅ॒ಶ್ವಿನೌ॒ ವ್ಯಾತ್ತ᳚ಮ್ । ಇ॒ಷ್ಟ-ಮ್ಮ॑ನಿಷಾಣ । ಅ॒ಮು-ಮ್ಮ॑ನಿಷಾಣ । ಸರ್ವ॑-ಮ್ಮನಿಷಾಣ ॥
ಹಿ॒ರ॒ಣ್ಯ॒ಗ॒ರ್ಭ-ಸ್ಸಮ॑ವರ್ತ॒ತಾಗ್ರೇ॑ ಭೂ॒ತಸ್ಯ॑ ಜಾ॒ತಃ ಪತಿ॒ರೇಕ॑ ಆಸೀತ್ ।
ಸ ದಾ॑ಧಾರ ಪೃಥಿ॒ವೀ-ನ್ದ್ಯಾಮು॒ತೇಮಾ-ಙ್ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥
ಯಃ ಪ್ರಾ॑ಣ॒ತೋ ನಿ॑ಮಿಷ॒ತೋ ಮ॑ಹಿ॒ತ್ವೈಕ॒ ಇದ್ರಾಜಾ॒ ಜಗ॑ತೋ ಬ॒ಭೂವ॑ ।
ಯ ಈಶೇ॑ ಅ॒ಸ್ಯ ದ್ವಿ॒ಪದ॒-ಶ್ಚತು॑ಷ್ಪ॒ದಃ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥
ಯ ಆ᳚ತ್ಮ॒ದಾ ಬ॑ಲ॒ದಾ ಯಸ್ಯ॒ ವಿಶ್ವ॑ ಉಪಾ॒ಸ॑ತೇ ಪ್ರ॒ಶಿಷಂ॒-ಯಁಸ್ಯ॑ ದೇ॒ವಾಃ ।
ಯಸ್ಯ॑ ಛಾ॒ಯಾಮೃತಂ॒-ಯಁಸ್ಯ॑ ಮೃ॒ತ್ಯುಃ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥
ಯಸ್ಯೇ॒ಮೇ ಹಿ॒ಮವ॑ನ್ತೋ ಮಹಿ॒ತ್ವಾ ಯಸ್ಯ॑ ಸಮು॒ದ್ರಗ್ಂ ರ॒ಸಯಾ॑ ಸ॒ಹಾ-ಽಽಹುಃ ।
ಯಸ್ಯೇ॒ಮಾಃ ಪ್ರ॒ದಿಶೋ॒ ಯಸ್ಯ॑ ಬಾ॒ಹೂ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥
ಯ-ಙ್ಕ್ರನ್ದ॑ಸೀ॒ ಅವ॑ಸಾ ತಸ್ತಭಾ॒ನೇ ಅ॒ಭ್ಯೈಖ್ಷೇ॑ತಾ॒-ಮ್ಮನ॑ಸಾ॒ ರೇಜ॑ಮಾನೇ ।
ಯತ್ರಾಧಿ॒ಸೂರ॒ ಉದಿ॑ತೌ॒ ವ್ಯೇತಿ॒ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥
ಯೇನ॒ ದ್ಯೌರು॒ಗ್ರಾ ಪೃ॑ಥಿ॒ವೀ ಚ॑ ದೃ॒ಢೇ ಯೇನ॒ ಸುವ॑ಸ್ ಸ್ತಭಿ॒ತಂ-ಯೇಁನ॒ ನಾಕಃ॑ ।
ಯೋ ಅ॒ನ್ತರಿ॑ಖ್ಷೇ॒ ರಜ॑ಸೋ ವಿ॒ಮಾನಃ॒ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥
ಆಪೋ॑ ಹ॒ ಯನ್ಮ॑ಹ॒ತೀ ವಿಶ್ವ॒ಮಾಯ॒ನ್-ದಖ್ಷ॒ನ್ದಧಾ॑ನಾ ಜ॒ನಯ॑ನ್ತೀ-ರ॒ಗ್ನಿಮ್ ।
ತತೋ॑ ದೇ॒ವಾನಾ॒-ನ್ನಿರ॑ವರ್ತ॒ತಾಸು॒ರೇಕಃ॒ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥
ಯಶ್ಚಿ॒ದಾಪೋ॑ ಮಹಿ॒ನಾ ಪ॒ರ್ಯಪ॑ಶ್ಯ॒-ದ್ದ್ಖ್ಷ॒ನ್ದಧಾ॑ನಾ ಜ॒ನಯ॑ನ್ತೀ-ರ॒ಗ್ನಿಮ್ ।
ಯೋ ದೇ॒ವೇಷ್ವಧಿ॑ ದೇ॒ವ ಯೇಕ॒ ಆಸೀ॒-ತ್ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ॥
ಅ॒ದ್ಭ್ಯ-ಸ್ಸಮ್ಭೂ॑ತೋ ಹಿರಣ್ಯಗ॒ರ್ಭ ಇತ್ಯ॒ಷ್ಟೌ ॥
ಏ॒ಷ ಹಿ ದೇ॒ವಃ ಪ್ರ॒ದಿಶೋ-ಽನು॒ ಸರ್ವಾಃ॒ ಪೂರ್ವೋ॑ ಹಿ ಜಾ॒ತ-ಸ್ಸ ಉ॒ ಗರ್ಭೇ॑ ಅ॒ನ್ತಃ ।
ಸ ವಿ॒ಜಾಯ॑ಮಾನ-ಸ್ಸಜನಿ॒ಷ್ಯಮಾ॑ಣಃ ಪ್ರ॒ತ್ಯಂ-ಮುಖಾ᳚ ಸ್ತಿಷ್ಠತಿ ವಿ॒ಶ್ವತೋ॑ಮುಖಃ ॥
ವಿ॒ಶ್ವತ॑ಶ್ಚ-ಖ್ಷುರು॒ತ ವಿ॒ಶ್ವತೋ॑ ಮುಖೋ ವಿ॒ಶ್ವತೋ॑ ಹಸ್ತ ಉ॒ತ ವಿ॒ಶ್ವತ॑ಸ್ಪಾತ್ ।
ಸ-ಮ್ಬಾ॒ಹುಭ್ಯಾ॒-ನ್ನಮ॑ತಿ॒ ಸ-ಮ್ಪತ॑ತ್ರೈ॒-ರ್ದ್ಯಾವಾ॑ ಪೃಥಿ॒ವೀ ಜ॒ನಯ॑-ನ್ದೇ॒ವ ಏಕಃ॑ ॥
ವೇ॒ನಸ್ತ-ತ್ಪಶ್ಯ॒ನ್. ವಿಶ್ವಾ॒ ಭುವ॑ನಾನಿ ವಿ॒ದ್ವಾನ್. ಯತ್ರ॒ ವಿಶ್ವ॒-ಮ್ಭವ॒ತ್ಯೇಕ॑-ನೀಳಮ್ ।
ಯಸ್ಮಿ॑ನ್ನಿ॒ದಗ್ಂ ಸಞ್ಚ॒ ವಿಚೈಕ॒ಗ್ಂ॒ ಸ ಓತಃ॒ ಪ್ರೋತ॑ಶ್ಚ ವಿ॒ಭುಃ ಪ್ರ॒ಜಾಸು॑ ॥
ಪ್ರತದ್ವೋ॑ಚೇ ಅ॒ಮೃತ॒ನ್ನು ವಿ॒ದ್ವಾ-ನ್ಗ॑ನ್ಧ॒ರ್ವೋ ನಾಮ॒ ನಿಹಿ॑ತ॒-ಙ್ಗುಹಾ॑ಸು ॥ 3 ॥
ತ್ರೀಣಿ॑ ಪ॒ದಾ ನಿಹಿ॑ತಾ॒ ಗುಹಾ॑ಸು॒ ಯಸ್ತದ್ವೇದ॑ ಸವಿ॒ತುಃ ಪಿ॒ತಾ-ಽಸ॑ತ್ ॥ ಸ ನೋ॒ ಬನ್ಧು॑-ರ್ಜನಿ॒ತಾ ಸ ವಿ॑ಧಾ॒ತಾ ಧಾಮಾ॑ನಿ॒ ವೇದ॒ ಭುವ॑ನಾನಿ॒ ವಿಶ್ವಾ᳚ । ಯತ್ರ॑ ದೇ॒ವಾ ಅ॒ಮೃತ॑ಮಾನ-ಶಾ॒ನಾಸ್ತೃ॒ತೀಯೇ॒ ಧಾಮಾ᳚ನ್ಯ॒-ಭ್ಯೈರ॑ಯನ್ತ ॥
ಪರಿ॒ ದ್ಯಾವಾ॑ಪೃಥಿ॒ವೀ ಯ॑ನ್ತಿ ಸ॒ದ್ಯಃ ಪರಿ॑ ಲೋ॒ಕಾ-ನ್ಪರಿ॒ ದಿಶಃ॒ ಪರಿ॒ ಸುವಃ॑ । ಋ॒ತಸ್ಯ॒ ತನ್ತುಂ॑-ವಿಁತತಂ-ವಿಁ॒ಚೃತ್ಯ॒ ತದ॑ಪಶ್ಯ॒-ತ್ತದ॑ಭವ-ತ್ಪ್ರ॒ಜಾಸು॑ ॥
ಪ॒ರೀತ್ಯ॑ ಲೋ॒ಕಾ-ನ್ಪ॒ರೀತ್ಯ॑ ಭೂ॒ತಾನಿ॑ ಪ॒ರೀತ್ಯ॒ ಸರ್ವಾಃ᳚ ಪ್ರ॒ದಿಶೋ॒ ದಿಶ॑ಶ್ಚ । ಪ್ರ॒ಜಾಪ॑ತಿಃ ಪ್ರಥಮ॒ಜಾ ಋ॒ತಸ್ಯಾ॒ತ್ಮನಾ॒-ಽಽತ್ಮಾನ॑-ಮ॒ಭಿ-ಸಮ್ಬ॑ಭೂವ ॥
ಸದ॑ಸ॒ಸ್ಪತಿ॒-ಮದ್ಭು॑ತ-ಮ್ಪ್ರಿ॒ಯಮಿನ್ದ್ರ॑ಸ್ಯ॒ ಕಾಮ್ಯ᳚ಮ್ । ಸನಿ॑-ಮ್ಮೇ॒ಧಾ ಮ॑ಯಾಸಿಷಮ್ ॥
ಉದ್ದೀ᳚ಪ್ಯಸ್ವ ಜಾತವೇದೋ ಽಪ॒ಘ್ನನ್ನಿಋ॑ರ್ತಿ॒-ಮ್ಮಮ॑ ॥ 4 ॥
ಪ॒ಶೂಗ್ಶ್ಚ॒ ಮಹ್ಯ॒ಮಾವ॑ಹ॒ ಜೀವ॑ನಞ್ಚ॒ ದಿಶೋ॑ ದಿಶ ॥
ಮಾನೋ॑ ಹಿಗ್ಂಸೀ ಜ್ಜಾತವೇದೋ॒ ಗಾಮಶ್ವ॒-ಮ್ಪುರು॑ಷ॒-ಞ್ಜಗ॑ತ್ ।
ಅಬಿ॑ಭ್ರ॒ದಗ್ನ॒ ಆಗ॑ಹಿ ಶ್ರಿ॒ಯಾ ಮಾ॒ ಪರಿ॑ಪಾತಯ ॥
ಪುರು॑ಷಸ್ಯ ವಿದ್ಮ ಸಹಸ್ರಾ॒ಖ್ಷಸ್ಯ॑ ಮಹಾದೇ॒ವಸ್ಯ॑ ಧೀಮಹಿ । ತನ್ನೋ॑ ರುದ್ರಃ ಪ್ರಚೋ॒ದಯಾ᳚ತ್ ॥
ತತ್ಪುರು॑ಷಾಯ ವಿ॒ದ್ಮಹೇ॑ ಮಹಾದೇ॒ವಾಯ॑ ಧೀಮಹಿ ।
ತನ್ನೋ॑ ರುದ್ರಃ ಪ್ರಚೋ॒ದಯಾ᳚ತ್ ॥
ತತ್ಪುರು॑ಷಾಯ ವಿ॒ದ್ಮಹೇ॑ ವಕ್ರತು॒ಣ್ಡಾಯ॑ ಧೀಮಹಿ ।
ತನ್ನೋ॑ ದನ್ತಿಃ ಪ್ರಚೋ॒ದಯಾ᳚ತ್ ॥
ತತ್ಪುರು॑ಷಾಯ ವಿ॒ದ್ಮಹೇ॑ ಚಕ್ರತು॒ಣ್ಡಾಯ॑ ಧೀಮಹಿ ॥ 5 ॥
ತನ್ನೋ॑ ನನ್ದಿಃ ಪ್ರಚೋ॒ದಯಾ᳚ತ್ ॥
ತತ್ಪುರು॑ಷಾಯ ವಿ॒ದ್ಮಹೇ॑ ಮಹಾಸೇ॒ನಾಯ॑ ಧೀಮಹಿ ।
ತನ್ನ॑-ಷ್ಷಣ್ಮುಖಃ ಪ್ರಚೋ॒ದಯಾ᳚ತ್ ॥
ತತ್ಪುರು॑ಷಾಯ ವಿ॒ದ್ಮಹೇ॑ ಸುವರ್ಣಪ॒ಖ್ಷಾಯ॑ ಧೀಮಹಿ । ತನ್ನೋ॑ ಗರುಡಃ ಪ್ರಚೋ॒ದಯಾ᳚ತ್ ॥
ವೇ॒ದಾ॒ತ್ಮ॒ನಾಯ॑ ವಿ॒ದ್ಮಹೇ॑ ಹಿರಣ್ಯಗ॒ರ್ಭಾಯ॑ ಧೀಮಹಿ । ತನ್ನೋ᳚ ಬ್ರಹ್ಮ ಪ್ರಚೋ॒ದಯಾ᳚ತ್ ॥
ನಾ॒ರಾ॒ಯ॒ಣಾಯ॑ ವಿ॒ದ್ಮಹೇ॑ ವಾಸುದೇ॒ವಾಯ॑ ಧೀಮಹಿ ।
ತನ್ನೋ॑ ವಿಷ್ಣುಃ ಪ್ರಚೋ॒ದಯಾ᳚ತ್ ॥
ವ॒ಜ್ರ॒ನ॒ಖಾಯ॑ ವಿ॒ದ್ಮಹೇ॑ ತೀಖ್ಷ್ಣ-ದ॒ಗ್ಗ್॒ಷ್ಟ್ರಾಯ॑ ಧೀಮಹಿ ॥ 6 ॥
ತನ್ನೋ॑ ನಾರಸಿಗ್ಂಹಃ ಪ್ರಚೋ॒ದಯಾ᳚ತ್ ॥
ಭಾ॒ಸ್ಕ॒ರಾಯ॑ ವಿ॒ದ್ಮಹೇ॑ ಮಹದ್ದ್ಯುತಿಕ॒ರಾಯ॑ ಧೀಮಹಿ ।
ತನ್ನೋ॑ ಆದಿತ್ಯಃ ಪ್ರಚೋ॒ದಯಾ᳚ತ್ ॥
ವೈ॒ಶ್ವಾ॒ನ॒ರಾಯ॑ ವಿ॒ದ್ಮಹೇ॑ ಲಾಲೀ॒ಲಾಯ॑ ಧೀಮಹಿ ।
ತನ್ನೋ॑ ಅಗ್ನಿಃ ಪ್ರಚೋ॒ದಯಾ᳚ತ್ ॥
ಕಾ॒ತ್ಯಾ॒ಯ॒ನಾಯ॑ ವಿ॒ದ್ಮಹೇ॑ ಕನ್ಯಕು॒ಮಾರಿ॑ ಧೀಮಹಿ ।
ತನ್ನೋ॑ ದುರ್ಗಿಃ ಪ್ರಚೋ॒ದಯಾ᳚ತ್ ॥
ಸ॒ಹ॒ಸ್ರ॒ಪರ॑ಮಾ ದೇ॒ವೀ॒ ಶ॒ತಮೂ॑ಲಾ ಶ॒ತಾಙ್ಕು॑ರಾ ।
ಸರ್ವಗ್ಂ॑ ಹರತು॑ ಮೇ ಪಾ॒ಪ॒-ನ್ದೂ॒ರ್ವಾ ದು॑ಸ್ಸ್ವಪ್ನ॒ ನಾಶ॑ನೀ ॥
ಕಾಣ್ಡಾ᳚-ತ್ಕಾಣ್ಡಾ-ತ್ಪ್ರ॒ರೋಹ॑ನ್ತೀ॒ ಪರು॑ಷಃ ಪರುಷಃ॒ ಪರಿ॑ ॥ 7 ॥
ಏ॒ವಾ ನೋ॑ ದೂರ್ವೇ॒ ಪ್ರತ॑ನು ಸ॒ಹಸ್ರೇ॑ಣ ಶ॒ತೇನ॑ ಚ ॥
ಯಾ ಶ॒ತೇನ॑ ಪ್ರತ॒ನೋಷಿ॑ ಸ॒ಹಸ್ರೇ॑ಣ ವಿ॒ರೋಹ॑ಸಿ ।
ತಸ್ಯಾ᳚ಸ್ತೇ ದೇವೀಷ್ಟಕೇ ವಿ॒ಧೇಮ॑ ಹ॒ವಿಷಾ॑ ವ॒ಯಮ್ ॥
ಅಶ್ವ॑ಕ್ರಾ॒ನ್ತೇ ರ॑ಥಕ್ರಾ॒ನ್ತೇ॒ ವಿ॒ಷ್ಣುಕ್ರಾ᳚ನ್ತೇ ವ॒ಸುನ್ಧ॑ರಾ ।
ಶಿರಸಾ॑ ಧಾರ॑ಯಿಷ್ಯಾ॒ಮಿ॒ ರ॒ಖ್ಷ॒ಸ್ವ ಮಾ᳚-ಮ್ಪದೇ॒ ಪದೇ ॥
ಭೂಮಿ-ರ್ಧೇನು-ರ್ಧರಣೀ ಲೋ॑ಕಧಾ॒ರಿಣೀ ।
ಉ॒ಧೃತಾ॑-ಽಸಿ ವ॑ರಾಹೇ॒ಣ॒ ಕೃ॒ಷ್ಣೇ॒ನ ಶ॑ತ ಬಾ॒ಹುನಾ ॥
ಮೃ॒ತ್ತಿಕೇ॑ ಹನ॑ ಮೇ ಪಾ॒ಪಂ॒-ಯಁ॒ನ್ಮ॒ಯಾ ದು॑ಷ್ಕೃತ॒-ಙ್ಕೃತಮ್ । ಮೃ॒ತ್ತಿಕೇ᳚ ಬ್ರಹ್ಮ॑ದತ್ತಾ॒-ಽಸಿ॒ ಕಾ॒ಶ್ಯಪೇ॑ನಾಭಿ॒ಮನ್ತ್ರಿ॑ತಾ । ಮೃ॒ತ್ತಿಕೇ॑ ದೇಹಿ॑ ಮೇ ಪು॒ಷ್ಟಿ॒-ನ್ತ್ವ॒ಯಿ ಸ॑ರ್ವ-ಮ್ಪ್ರ॒ತಿಷ್ಠಿ॑ತಮ್ ॥ 8 ॥
ಮೃ॒ತ್ತಿಕೇ᳚ ಪ್ರತಿಷ್ಠಿ॑ತೇ ಸ॒ರ್ವ॒-ನ್ತ॒ನ್ಮೇ ನಿ॑ರ್ಣುದ॒ ಮೃತ್ತಿ॑ಕೇ । ತಯಾ॑ ಹ॒ತೇನ॑ ಪಾಪೇ॒ನ॒ ಗ॒ಚ್ಛಾ॒ಮಿ ಪ॑ರಮಾ॒-ಙ್ಗತಿಮ್ ॥ ಯತ॑ ಇನ್ದ್ರ॒ ಭಯಾ॑ಮಹೇ॒ ತತೋ॑ ನೋ॒ ಅಭ॑ಯ-ಙ್ಕೃಧಿ ।
ಮಘ॑ವನ್ ಛ॒ಗ್ಧಿ ತವ॒ ತನ್ನ॑ ಊ॒ತಯೇ॒ ವಿದ್ವಿಷೋ॒ ವಿಮೃಧೋ॑ ಜಹಿ ॥
ಸ್ವ॒ಸ್ತಿ॒ದಾ ವಿ॒ಶಸ್ಪತಿ॑-ರ್ವೃತ್ರ॒ಹಾ ವಿಮೃಧೋ॑ ವ॒ಶೀ ।
ವೃಷೇನ್ದ್ರಃ॑ ಪು॒ರ ಏ॑ತು ನ-ಸ್ಸ್ವಸ್ತಿ॒ದಾ ಅ॑ಭಯಙ್ಕ॒ರಃ ॥
ಸ್ವ॒ಸ್ತಿ ನ॒ ಇನ್ದ್ರೋ॑ ವೃ॒ದ್ಧಶ್ರ॑ವಾ-ಸ್ಸ್ವ॒ಸ್ತಿ ನಃ॑ ಪೂ॒ಷಾ ವಿ॒ಶ್ವವೇ॑ದಾಃ । ಸ್ವ॒ಸ್ತಿ ನ॒ಸ್ತಾರ್ಖ್ಷ್ಯೋ॒ ಅರಿ॑ಷ್ಟನೇಮಿ-ಸ್ಸ್ವ॒ಸ್ತಿ ನೋ॒ ಬೃಹ॒ಸ್ಪತಿ॑-ರ್ದಧಾತು ॥
ಆಪಾ᳚ನ್ತ-ಮನ್ಯುಸ್ತೃ॒ಪಲ॑ಪ್ರಭರ್ಮಾ॒ ಧುನಿ॒-ಶ್ಶಿಮೀ॑ವಾಂ॒-ಛರು॑ಮಾಗ್ಂ ಋಜೀ॒ಷೀ । ಸೋಮೋ॒ ವಿಶ್ವಾ᳚ನ್ಯತ॒ಸಾ ವನಾ॑ನಿ॒ ನಾರ್ವಾಗಿನ್ದ್ರ॑-ಮ್ಪ್ರತಿ॒ಮಾನಾ॑ನಿ ದೇಭುಃ ॥ 9 ॥
ಬ್ರಹ್ಮ॑ ಜಜ್ಞಾ॒ನ-ಮ್ಪ್ರ॑ಥ॒ಮ-ಮ್ಪು॒ರಸ್ತಾ॒-ದ್ವಿಸೀ॑ಮ॒ತ-ಸ್ಸು॒ರುಚೋ॑ ವೇ॒ನ ಆ॑ವಃ । ಸ ಬು॒ಧ್ನಿಯಾ॑ ಉಪ॒ಮಾ ಅ॑ಸ್ಯ ವಿ॒ಷ್ಠಾ-ಸ್ಸ॒ತಶ್ಚ॒ ಯೋನಿ॒-ಮಸ॑ತಶ್ಚ॒ ವಿವಃ॑ ॥
ಸ್ಯೋ॒ನಾ ಪೃ॑ಥಿವಿ॒ ಭವಾ॑ ನೃಖ್ಷ॒ರಾ ನಿ॒ವೇಶ॑ನೀ । ಯಚ್ಛಾ॑ ನ॒-ಶ್ಶರ್ಮ॑ ಸ॒ಪ್ರಥಾಃ᳚ ॥
ಗ॒ನ್ಧ॒ದ್ವಾ॒ರಾ-ನ್ದು॑ರಾಧ॒ರ್ಷಾ॒-ನ್ನಿ॒ತ್ಯಪು॑ಷ್ಟಾ-ಙ್ಕರೀ॒ಷಿಣೀ᳚ಮ್ । ಈ॒ಶ್ವರೀಗ್ಂ॑ ಸರ್ವ॑ಭೂತಾ॒ನಾ॒-ನ್ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ ॥
ಶ್ರೀ᳚ರ್ಮೇ ಭ॒ಜತು । ಅಲಖ್ಷ್ಮೀ᳚ರ್ಮೇ ನ॒ಶ್ಯತು ।
ವಿಷ್ಣು॑ಮುಖಾ॒ ವೈ ದೇ॒ವಾ-ಶ್ಛನ್ದೋ॑-ಭಿರಿ॒ಮಾನ್ ಁಲೋ॒ಕಾ-ನ॑ನಪಜ॒ಯ್ಯ-ಮ॒ಭ್ಯ॑ಜಯನ್ನ್ । ಮ॒ಹಾಗ್ಂ ಇನ್ದ್ರೋ॒ ವಜ್ರ॑ಬಾಹು-ಷ್ಷೋಡ॒ಶೀ ಶರ್ಮ॑ ಯಚ್ಛತು ॥ 10 ॥
ಸ್ವ॒ಸ್ತಿ ನೋ॑ ಮ॒ಘವಾ॑ ಕರೋತು॒ ಹನ್ತು॑ ಪಾ॒ಪ್ಮಾನಂ॒-ಯೋಁ᳚-ಽಸ್ಮಾ-ನ್ದ್ವೇಷ್ಟಿ॑ ॥
ಸೋ॒ಮಾನ॒ಗ್ಗ್॒ ಸ್ವರ॑ಣ-ಙ್ಕೃಣು॒ಹಿ ಬ್ರ॑ಹ್ಮಣಸ್ಪತೇ । ಕ॒ಖ್ಷೀವ॑ನ್ತಂ॒-ಯಁ ಔ॑ಶಿ॒ಜಮ್ ।
ಶರೀ॑ರಂ-ಯಁಜ್ಞಶಮ॒ಲ-ಙ್ಕುಸೀ॑ದ॒-ನ್ತಸ್ಮಿ᳚-ನ್ಥ್ಸೀದತು॒ ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ॥
ಚರ॑ಣ-ಮ್ಪ॒ವಿತ್ರಂ॒-ವಿಁತ॑ತ-ಮ್ಪುರಾ॒ಣಂ-ಯೇಁನ॑ ಪೂ॒ತ-ಸ್ತರ॑ತಿ ದುಷ್ಕೃ॒ತಾನಿ॑ ।
ತೇನ॑ ಪ॒ವಿತ್ರೇ॑ಣ ಶು॒ದ್ಧೇನ॑ ಪೂ॒ತಾ ಅತಿ॑ ಪಾ॒ಪ್ಮಾನ॒-ಮರಾ॑ತಿ-ನ್ತರೇಮ ॥
ಸ॒ಜೋಷಾ॑ ಇನ್ದ್ರ॒ ಸಗ॑ಣೋ ಮ॒ರುದ್ಭಿ॒-ಸ್ಸೋಮ॑-ಮ್ಪಿಬ ವೃತ್ರಹಞ್ಛೂರ ವಿ॒ದ್ವಾನ್ ।
ಜ॒ಹಿ ಶತ್ರೂ॒ಗ್ಂ॒ ರಪ॒ ಮೃಧೋ॑ ನುದ॒ಸ್ವಾಥಾಭ॑ಯ-ಙ್ಕೃಣುಹಿ ವಿ॒ಶ್ವತೋ॑ ನಃ ॥
ಸು॒ಮಿ॒ತ್ರಾ ನ॒ ಆಪ॒ ಓಷ॑ಧಯ-ಸ್ಸನ್ತು ದುರ್ಮಿ॒ತ್ರಾಸ್ತಸ್ಮೈ॑
ಭೂಯಾಸು॒-ರ್ಯಾ᳚-ಽಸ್ಮಾ-ನ್ದ್ವೇಷ್ಟಿ॒ ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥
ಆಪೋ॒ ಹಿಷ್ಠಾ ಮ॑ಯೋ॒ ಭುವ॒ಸ್ತಾ ನ॑ ಊ॒ರ್ಜೇ ದ॑ಧಾತನ ॥ 11 ॥
ಮ॒ಹೇರಣಾ॑ಯ॒ ಚಖ್ಷ॑ಸೇ । ಯೋ ವ॑-ಶ್ಶಿ॒ವತ॑ಮೋ॒ ರಸ॒-ಸ್ತಸ್ಯ॑ ಭಾಜಯತೇ॒ ಹ ನಃ॑ । ಉ॒ಶ॒ತೀ-ರಿ॑ವ ಮಾ॒ತರಃ॑ । ತಸ್ಮಾ॒ ಅರ॑ಙ್ಗಮಾಮವೋ॒ ಯಸ್ಯ॒ ಖ್ಷಯಾ॑ಯ॒ ಜಿನ್ವ॑ಥ ।
ಆಪೋ॑ ಜ॒ನಯ॑ಥಾ ಚ ನಃ ॥ ಹಿರ॑ಣ್ಯಶೃಙ್ಗಂ॒-ವಁರು॑ಣ॒-ಮ್ಪ್ರಪ॑ದ್ಯೇ ತೀ॒ರ್ಥ-ಮ್ಮೇ॑ ದೇಹಿ॒ ಯಾಚಿ॑ತಃ ।
ಯ॒ನ್ಮಯಾ॑ ಭು॒ಕ್ತ-ಮ॒ಸಾಧೂ॑ನಾ-ಮ್ಪಾ॒ಪೇಭ್ಯ॑ಶ್ಚ ಪ್ರ॒ತಿಗ್ರ॑ಹಃ ॥ ಯನ್ಮೇ॒ ಮನ॑ಸಾ ವಾ॒ಚಾ॒ ಕ॒ರ್ಮ॒ಣಾ ವಾ ದು॑ಷ್ಕೃತ॒-ಙ್ಕೃತಮ್ । ತನ್ನ॒ ಇನ್ದ್ರೋ॒ ವರು॑ಣೋ॒ ಬೃಹ॒ಸ್ಪತಿ॑-ಸ್ಸವಿ॒ತಾ ಚ॑ ಪುನನ್ತು॒ ಪುನಃ॑ ಪುನಃ ॥
ನಮೋ॒-ಽಗ್ನಯೇ᳚-ಽಫ್ಸು॒ಮತೇ॒ ನಮ॒ ಇನ್ದ್ರಾ॑ಯ॒ ನಮೋ॒ ವರು॑ಣಾಯ॒ ನಮೋ ವಾರುಣ್ಯೈ॑ ನಮೋ॒-ಽದ್ಭ್ಯಃ ॥ 12 ॥
ಯದ॒ಪಾ-ಙ್ಕ್ರೂ॒ರಂ-ಯಁದ॑ಮೇ॒ದ್ಧ್ಯಂ-ಯಁದ॑ಶಾ॒ನ್ತ-ನ್ತದಪ॑ಗಚ್ಛತಾತ್ ॥ ಅ॒ತ್ಯಾ॒ಶ॒ನಾ-ದ॑ತೀಪಾ॒ನಾ॒-ದ್ಯ॒ಚ್ಚ ಉ॒ಗ್ರಾ-ತ್ಪ್ರ॑ತಿ॒ಗ್ರಹಾ᳚ತ್ । ತನ್ನೋ॒ ವರು॑ಣೋ ರಾ॒ಜಾ॒ ಪಾ॒ಣಿನಾ᳚ ಹ್ಯವ॒ಮರ್ಶ॑ತು ॥ ಸೋ॑-ಽಹಮ॑ಪಾ॒ಪೋ ವಿ॒ರಜೋ॒ ನಿರ್ಮು॒ಕ್ತೋ ಮು॑ಕ್ತಕಿ॒ಲ್ಬಿಷಃ । ನಾಕ॑ಸ್ಯ ಪೃ॒ಷ್ಠಮಾರು॑ಹ್ಯ॒ ಗಚ್ಛೇ॒-ದ್ಬ್ರಹ್ಮ॑ಸಲೋ॒ಕತಾಮ್ ॥ ಯಶ್ಚಾ॒ಫ್ಸು ವರು॑ಣ॒-ಸ್ಸ ಪು॒ನಾತ್ವ॑ಘಮರ್ಷ॒ಣಃ ॥ ಇ॒ಮ-ಮ್ಮೇ॑ ಗಙ್ಗೇ ಯಮುನೇ ಸರಸ್ವತಿ॒ ಶುತು॑ದ್ರಿ॒ ಸ್ತೋಮಗ್ಂ॑ ಸಚತಾ॒ ಪರು॒ಷ್ಣಿಯಾ ।
ಅ॒ಸಿ॒ಕ್ನಿ॒ಯಾ ಮ॑ರುದ್ವೃಧೇ ವಿ॒ತಸ್ತ॒ಯಾ-ಽಽರ್ಜೀ॑ಕೀಯೇ ಶೃಣು॒ಹ್ಯಾ ಸು॒ಷೋಮ॑ಯಾ ॥
ಋ॒ತಞ್ಚ॑ ಸ॒ತ್ಯಞ್ಚಾ॒-ಭೀ᳚ದ್ಧಾ॒ ತ್ತಪ॒ಸೋ-ಽದ್ಧ್ಯ॑ಜಾಯತ ।
ತತೋ॒ ರಾತ್ರಿ॑-ರಜಾಯತ॒ ತತ॑-ಸ್ಸಮು॒ದ್ರೋ ಅ॑ರ್ಣ॒ವಃ ॥ 13 ॥
ಸ॒ಮು॒ದ್ರಾ-ದ॑ರ್ಣ॒ವಾ-ದಧಿ॑ ಸಂವಁಥ್ಸ॒ರೋ ಅ॑ಜಾಯತ ।
ಅ॒ಹೋ॒ರಾ॒ತ್ರಾಣಿ॑ ವಿ॒ದಧ॒-ದ್(ಮಿ॒ದಧ॒ದ್) ವಿಶ್ವ॑ಸ್ಯ ಮಿಷ॒ತೋ ವ॒ಶೀ ॥ ಸೂ॒ರ್ಯಾ॒ಚ॒ನ್ದ್ರ॒ಮಸೌ॑ ಧಾ॒ತಾ ಯ॑ಥಾ ಪೂ॒ರ್ವ ಮ॑ಕಲ್ಪಯತ್ । ದಿವ॑ಞ್ಚ ಪೃಥಿ॒ವೀ-ಞ್ಚಾ॒ನ್ತರಿ॑ಖ್ಷ॒ ಮಥೋ॒ ಸುವಃ॑ ॥ ಯ-ತ್ಪೃ॑ಥಿ॒ವ್ಯಾಗ್ಂ ರಜ॑ಸ್ಸ್ವ॒ ಮಾನ್ತರಿ॑ಖ್ಷೇ ವಿ॒ರೋದ॑ಸೀ । ಇ॒ಮಾಗ್ ಸ್ತದಾ॒ಪೋ ವ॑ರುಣಃ ಪು॒ನಾತ್ವ॑ಘಮರ್ಷ॒ಣಃ ॥ ಪು॒ನನ್ತು॒ ವಸ॑ವಃ ಪು॒ನಾತು॒ ವರು॑ಣಃ ಪು॒ನಾತ್ವ॑ಘಮರ್ಷ॒ಣಃ ।
ಏ॒ಷ ಭೂ॒ತಸ್ಯ॑ ಮ॒ದ್ಧ್ಯೇ ಭುವ॑ನಸ್ಯ ಗೋ॒ಪ್ತಾ ॥
ಏ॒ಷ ಪು॒ಣ್ಯಕೃ॑ತಾಂ-ಲೋಁ॒ಕಾ॒ನೇ॒ಷ ಮೃ॒ತ್ಯೋರ್-ಹಿ॑ರ॒ಣ್ಮಯ᳚ಮ್ । ದ್ಯಾವಾ॑ಪೃಥಿ॒ವ್ಯೋರ್-ಹಿ॑ರ॒ಣ್ಮಯ॒ಗ್ಂ॒ ಸಗ್ಗ್ಶ್ರಿ॑ತ॒ಗ್ಂ॒ ಸುವಃ॑ ॥ 14 ॥
ಸ ನ॒-ಸ್ಸುವ॒-ಸ್ಸಗ್ಂ ಶಿ॑ಶಾಧಿ ॥
ಆರ್ದ್ರ॒-ಞ್ಜ್ವಲ॑ತಿ॒ ಜ್ಯೋತಿ॑-ರ॒ಹಮ॑ಸ್ಮಿ । ಜ್ಯೋತಿ॒-ರ್ಜ್ವಲ॑ತಿ॒ ಬ್ರಹ್ಮಾ॒ಹಮ॑ಸ್ಮಿ । ಯೋ॑-ಽಹಮ॑ಸ್ಮಿ॒ ಬ್ರಹ್ಮಾ॒ಹಮ॑ಸ್ಮಿ । ಅ॒ಹಮ॑ಸ್ಮಿ॒ ಬ್ರಹ್ಮಾ॒ಹಮ॑ಸ್ಮಿ । ಅ॒ಹಮೇ॒ವಾಹ-ಮ್ಮಾ-ಞ್ಜು॑ಹೋಮಿ॒ ಸ್ವಾಹಾ᳚ ॥ ಅ॒ಕಾ॒ರ್ಯ॒-ಕಾ॒ರ್ಯ॑ವ ಕೀ॒ರ್ಣೀ ಸ್ತೇ॒ನೋ ಭ್ರೂ॑ಣ॒ಹಾ ಗು॑ರುತ॒ಲ್ಪಗಃ । ವರು॑ಣೋ॒-ಽಪಾಮ॑ಘಮರ್ಷ॒ಣ-ಸ್ತಸ್ಮಾ᳚-ತ್ಪಾ॒ಪಾ-ತ್ಪ್ರಮು॑ಚ್ಯತೇ ॥
ರ॒ಜೋಭೂಮಿ॑ಸ್ತ್ವ॒ಮಾಗ್ಂ ರೋದ॑ಯಸ್ವ॒ ಪ್ರವ॑ದನ್ತಿ॒ ಧೀರಾಃ᳚ ॥
ಆಕ್ರಾ᳚ನ್-ಥ್ಸಮು॒ದ್ರಃ ಪ್ರ॑ಥ॒ಮೇ ವಿಧ॑ರ್ಮ-ಞ್ಜ॒ನಯ॑-ನ್ಪ್ರ॒ಜಾ ಭುವ॑ನಸ್ಯ॒ ರಾಜಾ᳚ ।
ವೃಷಾ॑ ಪ॒ವಿತ್ರೇ॒ ಅಧಿ॒ಸಾನೋ॒ ಅವ್ಯೇ॑ ಬೃ॒ಹ-ಥ್ಸೋಮೋ॑
ವಾವೃಧೇ ಸುವಾ॒ನ ಇನ್ದುಃ॑ ॥ 15 ॥
(ಪುರ॑ಸ್ತಾ॒--ದ್ಯಶೋ॒ - ಗುಹಾ॑ಸು॒ - ಮಮ॑ - ಚಕ್ರತು॒ಣ್ಡಾಯ॑ ಧೀಮಹಿ - ತೀಖ್ಷದ॒ಗ್ಗ್॒ಷ್ಠ್ರಾಯ॑ ಧೀಮಹಿ॒ - ಪರಿ॑ - ಪ್ರ॒ತಿಷ್ಠಿ॑ತಂ - ದೇಭು--ರ್ ಯಚ್ಛತು - ದಧಾತನಾ॒- ದ್ಭ್ಯೋ᳚ - ಽರ್ಣ॒ವಃ - ಸುವೋ॒ - ರಾಜೈಕ॑-ಞ್ಚ) (ಅ. 1)
ರು॒ದ್ರೋ॒ ರು॒ದ್ರಶ್ಚ॒ ದನ್ತಿ॒ಶ್ಚ॒ ನ॒ನ್ದಿ॒-ಷ್ಷ॒ಣ್ಮು॒ಖ॒ ಏ॒ವ ಚ॑ । ಗ॒ರು॒ಡೋ॒ ಬ್ರ॒ಹ್ಮ॒ ವಿ॒ಷ್ಣು॒ಶ್ಚ॒ ನಾ॒ರ॒ಸಿ॒ಗ್ಂ॒ಹ॒ಸ್ತ॒ಥೈ॒ವ ಚ॑ । ಆ॒ದಿ॒ತ್ಯೋ॒-ಽಗ್ನಿ॒ಶ್ಚ॒ ದು॒ರ್ಗಿ॒ಶ್ಚ॒ ಕ್ರ॒ಮೇ॒ಣ॒ ದ್ವಾದ॒ಶಾಮ್ಭ॑ಸಿ ।
ಮ॒ ಮ॒ ವ॒ ಚ॒ ಮ॒ ಸು॒ ವೇ॒ ನಾ॒ ವ॒ ಭಾ॒ ವೈ॒ ಕಾ॒ತ್ಯಾ॒ಯ॒ನಾಯ॑ ।
ಅನುವಾಕಂ 2
ಜಾ॒ತವೇ॑ದಸೇ ಸುನವಾಮ॒ ಸೋಮ॑-ಮರಾತೀಯ॒ತೋ ನಿದ॑ಹಾತಿ॒ ವೇದಃ॑ । ಸ ನಃ॑ ಪರ್ಷ॒ದತಿ॑ ದು॒ರ್ಗಾಣಿ॒ ವಿಶ್ವಾ॑ ನಾ॒ವೇವ॒ ಸಿನ್ಧು॑-ನ್ದುರಿ॒ತಾ-ಽತ್ಯ॒ಗ್ನಿಃ ॥
ತಾಮ॒ಗ್ನಿವ॑ರ್ಣಾ॒-ನ್ತಪ॑ಸಾ ಜ್ವಲ॒ನ್ತೀಂ-ವೈಁ॑ರೋಚ॒ನೀ-ಙ್ಕ॑ರ್ಮಫ॒ಲೇಷು॒ ಜುಷ್ಟಾ᳚ಮ್ । ದು॒ರ್ಗಾ-ನ್ದೇ॒ವೀಗ್ಂ ಶರ॑ಣಮ॒ಹ-ಮ್ಪ್ರಪ॑ದ್ಯೇ ಸು॒ತರ॑ಸಿ ತರಸೇ॒ ನಮಃ॑ ॥
ಅಗ್ನೇ॒ ತ್ವ-ಮ್ಪಾ॑ರಯಾ॒ ನವ್ಯೋ॑ ಅ॒ಸ್ಮಾನ್-ಥ್ಸ್ವ॒ಸ್ತಿ-ಭಿ॒ರತಿ॑ ದು॒ರ್ಗಾಣಿ॒ ವಿಶ್ವಾ᳚ । ಪೂಶ್ಚ॑ ಪೃ॒ಥ್ವೀ ಬ॑ಹು॒ಲಾ ನ॑ ಉ॒ರ್ವೀ ಭವಾ॑ ತೋ॒ಕಾಯ॒ ತನ॑ಯಾಯ॒ ಶಂಯೋಁಃ ॥
ವಿಶ್ವಾ॑ನಿ ನೋ ದು॒ರ್ಗಹಾ॑ ಜಾತವೇದ॒-ಸ್ಸಿನ್ಧು॒-ನ್ನ ನಾ॒ವಾ ದು॑ರಿ॒ತಾ-ಽತಿ॑ಪರ್ಷಿ । ಅಗ್ನೇ॑ ಅತ್ರಿ॒ವ-ನ್ಮನ॑ಸಾ ಗೃಣಾ॒ನೋ᳚-ಽಸ್ಮಾಕ॑-ಮ್ಬೋದ್ಧ್ಯವಿ॒ತಾ ತ॒ನೂನಾ᳚ಮ್ ॥
ಪೃ॒ತ॒ನಾ॒ಜಿತ॒ಗ್ಂ॒ ಸಹ॑ಮಾನ-ಮು॒ಗ್ರಮ॒ಗ್ನಿಗ್ಂ ಹು॑ವೇಮ ಪರ॒ಮಾ-ಥ್ಸ॒ಧಸ್ಥಾ᳚ತ್ । ಸ ನಃ॑ ಪರ್ಷ॒ದತಿ॑ ದು॒ರ್ಗಾಣಿ॒ ವಿಶ್ವಾ॒ ಖ್ಷಾಮ॑ದ್ದೇ॒ವೋ ಅತಿ॑ ದುರಿ॒ತಾ-ಽತ್ಯ॒ಗ್ನಿಃ ॥
ಪ್ರ॒ತ್ನೋಷಿ॑-ಕ॒ಮೀಡ್ಯೋ॑ ಅದ್ಧ್ವ॒ರೇಷು॑ ಸ॒ನಾಚ್ಚ॒ ಹೋತಾ॒ ನವ್ಯ॑ಶ್ಚ॒ ಸಥ್ಸಿ॑ । ಸ್ವಾಞ್ಚಾ᳚ಗ್ನೇ ತ॒ನುವ॑-ಮ್ಪಿ॒ಪ್ರಯ॑ಸ್ವಾ॒ಸ್ಮಭ್ಯ॑ಞ್ಚ॒ ಸೌಭ॑ಗ॒ಮಾಯ॑ಜಸ್ವ ॥
ಗೋಭಿ॒-ರ್ಜುಷ್ಟ॑ಮ॒ಯುಜೋ॒ ನಿಷಿ॑ಕ್ತ॒-ನ್ತವೇ᳚ನ್ದ್ರ ವಿಷ್ಣೋ॒-ರನು॒ಸಞ್ಚ॑ರೇಮ ।
ನಾಕ॑ಸ್ಯ ಪೃ॒ಷ್ಠಮ॒ಭಿ ಸಂ॒ವಁಸಾ॑ನೋ॒ ವೈಷ್ಣ॑ವೀಂ-ಲೋಁ॒ಕ ಇ॒ಹ ಮಾ॑ದಯನ್ತಾಮ್ ॥ 16 ॥
(ದು॒ರಿ॒ತಾ-ಽತ್ಯ॒ಗ್ನಿಶ್ಚ॒ತ್ವಾರಿ॑ ಚ) (ಅ. 2)
ಅನುವಾಕಂ 3
ಭೂ-ರನ್ನ॑-ಮ॒ಗ್ನಯೇ॑ ಪೃಥಿ॒ವ್ಯೈ ಸ್ವಾಹಾ॒ ,
ಭುವೋ-ಽನ್ನಂ॑-ವಾಁ॒ಯವೇ॒-ಽನ್ತರಿ॑ಖ್ಷಾಯ॒ ಸ್ವಾಹಾ॒,
ಸುವ॒ರನ್ನ॑-ಮಾದಿ॒ತ್ಯಾಯ॑ ದಿ॒ವೇ ಸ್ವಾಹಾ॒ ,
ಭೂರ್ಭುವ॒ಸ್ಸುವ॒-ರನ್ನ॑-ಞ್ಚ॒ನ್ದ್ರಮ॑ಸೇ ದಿ॒ಗ್ಭ್ಯ-ಸ್ಸ್ವಾಹಾ॒ ,
ನಮೋ॑ ದೇ॒ವೇಭ್ಯ॑-ಸ್ಸ್ವ॒ಧಾ ಪಿ॒ತೃಭ್ಯೋ॒ ಭೂರ್ಭುವ॒ಸ್ಸುವ॒-ರನ್ನ॒ಮೋಮ್ ॥ 17 ॥
ಅನುವಾಕಂ 4
ಭೂರ॒ಗ್ನಯೇ॑ ಪೃಥಿ॒ವ್ಯೈ ಸ್ವಾಹಾ॒,
ಭುವೋ॑ ವಾ॒ಯವೇ॒-ಽನ್ತರಿ॑ಖ್ಷಾಯ॒ ಸ್ವಾಹಾ॒ ,
ಸುವ॑ರಾದಿ॒ತ್ಯಾಯ॑ ದಿ॒ವೇ ಸ್ವಾಹಾ॒ ,
ಭೂರ್ಭುವ॒ಸ್ಸುವ॑-ಶ್ಚ॒ನ್ದ್ರಮ॑ಸೇ ದಿ॒ಗ್ಭ್ಯ-ಸ್ಸ್ವಾಹಾ॒,
ನಮೋ॑ ದೇ॒ವೇಭ್ಯ॑-ಸ್ಸ್ವ॒ಧಾ ಪಿ॒ತೃಭ್ಯೋ॒ ಭೂರ್ಭುವ॒ಸ್ಸುವ॒-ರಗ್ನ॒ ಓಮ್ ॥ 18 ॥
ಅನುವಾಕಂ 5
ಭೂರ॒ಗ್ನಯೇ॑ ಚ ಪೃಥಿ॒ವ್ಯೈ ಚ॑ ಮಹ॒ತೇ ಚ॒ ಸ್ವಾಹಾ॒ ,
ಭುವೋ॑ ವಾ॒ಯವೇ॑ ಚಾ॒ನ್ತರಿ॑ಖ್ಷಾಯ ಚ ಮಹ॒ತೇ ಚ॒ ಸ್ವಾಹಾ॒ ,
ಸುವ॑ರಾದಿ॒ತ್ಯಾಯ॑ ಚ ದಿ॒ವೇ ಚ॑ ಮಹ॒ತೇ ಚ॒ ಸ್ವಾಹಾ॒ ,
ಭೂ-ರ್ಭುವ॒ಸ್ಸುವ॑-ಶ್ಚ॒ನ್ದ್ರಮ॑ಸೇ ಚ॒ ನಖ್ಷ॑ತ್ರೇಭ್ಯಶ್ಚ ದಿ॒ಗ್ಭ್ಯಶ್ಚ॑ ಮಹ॒ತೇ ಚ॒ ಸ್ವಾಹಾ॒,
ನಮೋ॑ ದೇ॒ವೇಭ್ಯ॑-ಸ್ಸ್ವ॒ಧಾ ಪಿ॒ತೃಭ್ಯೋ॒ ಭೂರ್ಭುವ॒ಸ್ಸುವ॒-ರ್ಮಹ॒ರೋಮ್ ॥ 19 ॥
ಅನುವಾಕಂ 6
ಪಾಹಿ ನೋ ಅಗ್ನ ಏನ॑ಸೇ ಸ್ವಾ॒ಹಾ । ಪಾಹಿ ನೋ ವಿಶ್ವವೇದ॑ಸೇ ಸ್ವಾ॒ಹಾ । ಯಜ್ಞ-ಮ್ಪಾಹಿ ವಿಭಾವ॑ಸೋ ಸ್ವಾ॒ಹಾ । ಸರ್ವ-ಮ್ಪಾಹಿ ಶತಕ್ರ॑ತೋ ಸ್ವಾ॒ಹಾ ॥ 20 ॥
ಅನುವಾಕಂ 7
ಪಾ॒ಹಿ ನೋ॑ ಅಗ್ನ॒ ಏಕ॑ಯಾ । ಪಾ॒ಹ್ಯು॑ತ ದ್ವಿ॒ತೀಯ॑ಯಾ । ಪಾ॒ಹ್ಯೂರ್ಜ॑-ನ್ತೃ॒ತೀಯ॑ಯಾ ।
ಪಾ॒ಹಿ ಗೀ॒ರ್ಭಿ-ಶ್ಚ॑ತ॒ಸೃಭಿ॑-ರ್ವಸೋ॒ ಸ್ವಾಹಾ᳚ ॥ 21 ॥
ಅನುವಾಕಂ 8
ಯಶ್ಛನ್ದ॑ಸಾ-ಮೃಷ॒ಭೋ ವಿ॒ಶ್ವರೂ॑ಪ॒-ಶ್ಛನ್ದೋ᳚ಭ್ಯ॒ ಶ್ಛನ್ದಾಗ್॑ಸ್ಯಾ ವಿ॒ವೇಶ॑ । ಸಚಾಗ್ಂ ಶಿಕ್ಯಃ ಪುರೋ ವಾಚೋ॑ಪನಿ॒ಷ-ದಿನ್ದ್ರೋ᳚ ಜ್ಯೇ॒ಷ್ಠ ಇ॑ನ್ದ್ರಿ॒ಯಾಯ॒ ಋಷಿ॑ಭ್ಯೋ॒
ನಮೋ॑ ದೇ॒ವೇಭ್ಯ॑-ಸ್ಸ್ವ॒ಧಾ ಪಿ॒ತೃಭ್ಯೋ॒ ಭೂರ್ಭುವ॒ಸ್ಸುವ॒ ಶ್ಛನ್ದ॒ ಓಮ್ ॥ 22 ॥
ಅನುವಾಕಂ 9
ನಮೋ॒ ಬ್ರಹ್ಮ॑ಣೇ ಧಾ॒ರಣ॑-ಮ್ಮೇ ಅ॒ಸ್ತ್ವ-ನಿ॑ರಾಕರಣಂ-ಧಾ॒ರಯಿ॑ತಾ ಭೂಯಾಸ॒-ಙ್ಕರ್ಣ॑ಯೋ-ಶ್ಶ್ರು॒ತ-ಮ್ಮಾಚ್ಯೋ᳚ಢ್ವ॒-ಮ್ಮಮಾ॒ಮುಷ್ಯ॒ ಓಮ್ ॥ 23 ॥
ಅನುವಾಕಂ 10
ಋ॒ತ-ನ್ತಪ॑-ಸ್ಸ॒ತ್ಯ-ನ್ತಪ॑-ಶ್ಶ್ರು॒ತ-ನ್ತಪ॑-ಶ್ಶಾ॒ನ್ತ-ನ್ತಪೋ॒ ದಮ॒ ಸ್ತಪ॒-ಶ್ಶಮ॒ಸ್ತಪೋ॒ ದಾನ॒-ನ್ತಪೋ॒ ಯಜ್ಞ॒-ನ್ತಪೋ॒ ಭೂರ್ಭುವ॒ಸ್ಸುವ॒-ರ್ಬ್ರಹ್ಮೈ॒-ತದುಪಾ᳚ಸ್ಯೈ॒-ತತ್ತಪಃ॑ ॥ 24 ॥
ಅನುವಾಕಂ 11
ಯಥಾ॑ ವೃ॒ಖ್ಷಸ್ಯ॑ ಸ॒ಪುಂಷ್ಪಿ॑ತಸ್ಯ ದೂ॒ರಾ-ದ್ಗ॒ನ್ಧೋ ವಾ᳚ತ್ಯೇ॒ವ-ಮ್ಪುಣ್ಯ॑ಸ್ಯ ಕ॒ರ್ಮಣೋ॑ ದೂ॒ರಾ-ದ್ಗ॒ನ್ಧೋ ವಾ॑ತಿ॒ ಯಥಾ॑-ಽಸಿಧಾ॒ರಾ-ಙ್ಕ॒ರ್ತೇ-ಽವ॑ಹಿತಾ-ಮವ॒ಕ್ರಾಮೇ॒ ಯದ್ಯುವೇ॒ ಯುವೇ॒ ಹವಾ॑ ವಿ॒ಹ್ವಯಿ॑ಷ್ಯಾಮಿ ಕ॒ರ್ತ-ಮ್ಪ॑ತಿಷ್ಯಾ॒ಮೀತ್ಯೇ॒ವ-ಮ॒ಮೃತಾ॑-ದಾ॒ತ್ಮಾನ॑-ಞ್ಜು॒ಗುಫ್ಸೇ᳚ತ್ ॥ 25 ॥
ಅನುವಾಕಂ 12
ಅ॒ಣೋ-ರಣೀ॑ಯಾ-ನ್ಮಹ॒ತೋ ಮಹೀ॑ಯಾ-ನಾ॒ತ್ಮಾ ಗುಹಾ॑ಯಾ॒-ನ್ನಿಹಿ॑ತೋ-ಽಸ್ಯ ಜ॒ನ್ತೋಃ । ತಮ॑ಕ್ರತು-ಮ್ಪಶ್ಯತಿ ವೀತಶೋ॒ಕೋ ಧಾ॒ತುಃ ಪ್ರ॒ಸಾದಾ᳚-ನ್ಮಹಿ॒ಮಾನ॑ಮೀಶಮ್ ॥
ಸ॒ಪ್ತ ಪ್ರಾ॒ಣಾಃ ಪ್ರ॒ಭವ॑ನ್ತಿ॒ ತಸ್ಮಾ᳚-ಥ್ಸ॒ಪ್ತಾರ್ಚಿಷ॑-ಸ್ಸ॒ಮಿಧ॑-ಸ್ಸ॒ಪ್ತ ಜಿ॒ಹ್ವಾಃ । ಸ॒ಪ್ತ ಇ॒ಮೇ ಲೋ॒ಕಾ ಯೇಷು॒ ಚರ॑ನ್ತಿ ಪ್ರಾ॒ಣಾ ಗು॒ಹಾಶ॑ಯಾ॒-ನ್ನಿಹಿ॑ತಾ-ಸ್ಸ॒ಪ್ತ ಸ॑ಪ್ತ ॥
ಅತ॑-ಸ್ಸಮು॒ದ್ರಾ ಗಿ॒ರಯ॑ಶ್ಚ॒ ಸರ್ವೇ॒-ಽಸ್ಮಾ-ಥ್ಸ್ಯನ್ದ॑ನ್ತೇ॒ ಸಿನ್ಧ॑ವ॒-ಸ್ಸರ್ವ॑ರೂಪಾಃ । ಅತ॑ಶ್ಚ॒ ವಿಶ್ವಾ॒ ಓಷ॑ಧಯೋ॒ ರಸಾ᳚ಚ್ಚ॒ ಯೇನೈ॑ಷ ಭೂ॒ತ-ಸ್ತಿ॑ಷ್ಠತ್ಯನ್ತರಾ॒ತ್ಮಾ ॥
ಬ್ರ॒ಹ್ಮಾ ದೇ॒ವಾನಾ᳚-ಮ್ಪದ॒ವೀಃ ಕ॑ವೀ॒ನಾ-ಮೃಷಿ॒-ರ್ವಿಪ್ರಾ॑ಣಾ-ಮ್ಮಹಿ॒ಷೋ ಮೃ॒ಗಾಣಾ᳚ಮ್ ।
ಶ್ಯೇ॒ನೋ ಗೃಧ್ರಾ॑ಣಾ॒ಗ್॒ ಸ್ವಧಿ॑ತಿ॒-ರ್ವನಾ॑ನಾ॒ಗ್ಂ॒ ಸೋಮಃ॑ ಪ॒ವಿತ್ರ॒ ಮತ್ಯೇ॑ತಿ॒ ರೇಭನ್ನ್॑ ॥
ಅ॒ಜಾ ಮೇಕಾಂ॒-ಲೋಁಹಿ॑ತ-ಶುಕ್ಲ-ಕೃ॒ಷ್ಣಾ-ಮ್ಬ॒ಹ್ವೀ-ಮ್ಪ್ರ॒ಜಾ-ಞ್ಜ॒ನಯ॑ನ್ತೀ॒ಗ್ಂ॒ ಸರೂ॑ಪಾಮ್ । ಅ॒ಜೋ ಹ್ಯೇಕೋ॑ ಜು॒ಷಮಾ॑ಣೋ-ಽನು॒ಶೇತೇ॒ ಜಹಾ᳚ತ್ಯೇನಾ-ಮ್ಭು॒ಕ್ತ-ಭೋ॑ಗಾ॒ಮಜೋ᳚-ಽನ್ಯಃ ॥ 26 ॥
ಹ॒ಗ್ಂ॒ಸ-ಶ್ಶು॑ಚಿ॒ಷ-ದ್ವಸು॑-ರನ್ತರಿಖ್ಷ॒-ಸದ್ಧೋತಾ॑ ವೇದಿ॒ಷ-ದತಿ॑ಥಿ-ರ್ದುರೋಣ॒ಸತ್ ।
ನೃ॒ಷದ್ವ॑ರ॒-ಸದೃ॑ತ॒-ಸ-ದ್ವ್ಯೋ॑ಮ॒-ಸದ॒ಬ್ಜಾ ಗೋ॒ಜಾ ಋ॑ತ॒ಜಾ ಅ॑ದ್ರಿ॒ಜಾ ಋ॒ತ-ಮ್ಬೃ॒ಹತ್ ॥
ಘೃ॒ತ-ಮ್ಮಿ॑ಮಿಖ್ಷಿರೇ ಘೃ॒ತಮ॑ಸ್ಯ॒ ಯೋನಿ॑-ರ್ಘೃ॒ತೇ ಶ್ರಿ॒ತೋ ಘೃ॒ತಮು॑ವಸ್ಯ॒ ಧಾಮ॑ ।
ಅ॒ನು॒ಷ್ವ॒ಧಮಾವ॑ಹ ಮಾ॒ದಯ॑ಸ್ವ॒ ಸ್ವಾಹಾ॑ ಕೃತಂ-ವೃಁಷಭ ವಖ್ಷಿ ಹ॒ವ್ಯಮ್ ॥
ಸ॒ಮು॒ದ್ರಾ ದೂ॒ರ್ಮಿ-ರ್ಮಧು॑ಮಾ॒ಗ್ಂ॒ ಉದಾ॑ರ-ದುಪಾ॒ಗ್ಂ॒ಶುನಾ॒ ಸಮ॑ಮೃತ॒ತ್ವ ಮಾ॑ನಟ್ ।
ಘೃ॒ತಸ್ಯ॒ ನಾಮ॒ ಗುಹ್ಯಂ॒-ಯಁದಸ್ತಿ॑ ಜಿ॒ಹ್ವಾ ದೇ॒ವಾನಾ॑-ಮ॒ಮೃತ॑ಸ್ಯ॒ ನಾಭಿಃ॑ ॥
ವ॒ಯ-ನ್ನಾಮ॒ ಪ್ರಬ್ರ॑ವಾಮಾ ಘೃ॒ತೇನಾ॒ಸ್ಮಿನ್. ಯ॒ಜ್ಞೇ ಧಾ॑ರಯಾಮಾ॒ ನಮೋ॑ಭಿಃ ।
ಉಪ॑ ಬ್ರ॒ಹ್ಮಾ ಶೃ॑ಣವಚ್ಛ॒ಸ್ಯಮಾ॑ನ॒-ಞ್ಚತು॑-ಶ್ಶೃಙ್ಗೋ ಽವಮೀ-ದ್ಗೌ॒ರ ಏ॒ತತ್ ॥
ಚ॒ತ್ವಾರಿ॒ ಶೃಙ್ಗಾ॒ ತ್ರಯೋ॑ ಅಸ್ಯ॒ ಪಾದಾ॒ ದ್ವೇ ಶೀ॒ರ॒.ಷೇ ಸ॒ಪ್ತ ಹಸ್ತಾ॑ಸೋ ಅ॒ಸ್ಯ ।
ತ್ರಿಧಾ॑ ಬ॒ದ್ಧೋ ವೃ॑ಷ॒ಭೋ ರೋ॑ರವೀತಿ ಮ॒ಹೋ ದೇ॒ವೋ ಮರ್ತ್ಯಾ॒ಗ್ಂ॒ ಆವಿ॑ವೇಶ ॥ 27 ॥
ತ್ರಿಧಾ॑ ಹಿ॒ತ-ಮ್ಪ॒ಣಿಭಿ॑-ರ್ಗು॒ಹ್ಯಮಾ॑ನ॒-ಙ್ಗವಿ॑-ದೇ॒ವಾಸೋ॑ ಘೃ॒ತಮನ್ವ॑ವಿನ್ದನ್ನ್ । ಇನ್ದ್ರ॒ ಏಕ॒ಗ್ಂ॒ ಸೂರ್ಯ॒ ಏಕ॑-ಞ್ಜಜಾನ ವೇ॒ನಾ ದೇಕಗ್ಗ್॑ ಸ್ವ॒ಧಯಾ॒ ನಿಷ್ಟ॑ತಖ್ಷುಃ ॥
ಯೋ ದೇ॒ವಾನಾ᳚-ಮ್ಪ್ರಥ॒ಮ-ಮ್ಪು॒ರಸ್ತಾ॒-ದ್ವಿಶ್ವಾ॒ಧಿಯೋ॑ ರು॒ದ್ರೋ ಮ॒ಹರ್ಷಿಃ॑ । ಹಿ॒ರ॒ಣ್ಯ॒ಗ॒ರ್ಭ-ಮ್ಪ॑ಶ್ಯತ॒ ಜಾಯ॑ಮಾನ॒ಗ್ಂ॒ ಸನೋ॑ ದೇ॒ವ-ಶ್ಶು॒ಭಯಾ॒ ಸ್ಮೃತ್ಯಾ॒ ಸಂಯುಁ॑ನಕ್ತು ॥ ಯಸ್ಮಾ॒ತ್ಪರ॒-ನ್ನಾಪ॑ರ॒ ಮಸ್ತಿ॒ ಕಿಞ್ಚಿ॒ದ್ಯಸ್ಮಾ॒-ನ್ನಾಣೀ॑ಯೋ॒ ನ ಜ್ಯಾಯೋ᳚-ಽಸ್ತಿ॒ ಕಶ್ಚಿ॑ತ್ ।
ವೃ॒ಖ್ಷ ಇ॑ವ ಸ್ತಬ್ಧೋ ದಿ॒ವಿ ತಿ॑ಷ್ಠ॒-ತ್ಯೇಕ॒ಸ್ತೇನೇ॒ದ-ಮ್ಪೂ॒ರ್ಣ-ಮ್ಪುರು॑ಷೇಣ॒ ಸರ್ವ᳚ಮ್ ॥
ನ ಕರ್ಮ॑ಣಾ ನ ಪ್ರ॒ಜಯಾ॒ ಧನೇ॑ನ॒ ತ್ಯಾಗೇ॑ನೈಕೇ ಅಮೃತ॒ತ್ವ-ಮಾ॑ನ॒ಶುಃ ।
ಪರೇ॑ಣ॒ ನಾಕ॒-ನ್ನಿಹಿ॑ತ॒-ಙ್ಗುಹಾ॑ಯಾಂ-ವಿಁ॒ಭ್ರಾಜ॑ದೇ॒ತ-ದ್ಯತ॑ಯೋ ವಿ॒ಶನ್ತಿ॑ ॥ ವೇ॒ದಾ॒ನ್ತ॒ ವಿ॒ಜ್ಞಾನ॒-ಸುನಿ॑ಶ್ಚಿತಾ॒ರ್ಥಾ-ಸ್ಸನ್ಯಾ॑ಸ ಯೋ॒ಗಾದ್ಯತ॑ಯ-ಶ್ಶುದ್ಧ॒ ಸತ್ತ್ವಾಃ᳚ ।
ತೇ ಬ್ರ॑ಹ್ಮಲೋ॒ಕೇ ತು॒ ಪರಾ᳚ನ್ತಕಾಲೇ॒ ಪರಾ॑ಮೃತಾ॒-ತ್ಪರಿ॑ಮುಚ್ಯನ್ತಿ॒ ಸರ್ವೇ᳚ ॥ ದ॒ಹ್ರಂ॒-ವಿಁ॒ಪಾ॒ಪ-ಮ್ಪ॒ರಮೇ᳚ಶ್ಮ ಭೂತಂ॒-ಯಁ-ತ್ಪು॑ಣ್ಡರೀ॒ಕ-ಮ್ಪು॒ರಮ॑ದ್ಧ್ಯ ಸ॒ಗ್ಗ್॒ಸ್ಥಮ್ । ತ॒ತ್ರಾ॒ಪಿ॒ ದ॒ಹ್ರ-ಙ್ಗ॒ಗನಂ॑-ವಿಁಶೋಕ॒-ಸ್ತಸ್ಮಿ॑ನ್. ಯದ॒ನ್ತಸ್ತ-ದುಪಾ॑ಸಿತ॒ವ್ಯಮ್ ॥
ಯೋ ವೇದಾದೌ ಸ್ವ॑ರಃ ಪ್ರೋ॒ಕ್ತೋ॒ ವೇ॒ದಾನ್ತೇ॑ ಚ
ಪ್ರ॒ತಿಷ್ಠಿ॑ತಃ । ತಸ್ಯ॑ ಪ್ರ॒ಕೃತಿ॑-ಲೀನ॒ಸ್ಯ॒ ಯಃ॒ ಪರ॑-ಸ್ಸ॒ ಮ॒ಹೇಶ್ವ॑ರಃ ॥ 28 ॥
(ಅಜೋ᳚-ಽನ್ಯ॒ - ಆವಿ॑ವೇಶ॒ - ಸರ್ವೇ॑ ಚ॒ತ್ವಾರಿ॑ ಚ) (ಅ. 12)
ಅನುವಾಕಂ 13
ಸ॒ಹ॒ಸ್ರ॒ಶೀರ್ಷ॑-ನ್ದೇ॒ವಂ॒-ವಿಁ॒ಶ್ವಾಖ್ಷಂ॑-ವಿಁ॒ಶ್ವ ಶ॑-ಮ್ಭುವಮ್ । ವಿಶ್ವ॑-ನ್ನಾ॒ರಾಯ॑ಣ-ನ್ದೇ॒ವ॒ಮ॒ಖ್ಷರ॑-ಮ್ಪರ॒ಮ-ಮ್ಪ॒ದಮ್ ॥
ವಿ॒ಶ್ವತಃ॒ ಪರ॑ಮಾನ್ನಿ॒ತ್ಯಂ॒-ವಿಁ॒ಶ್ವ-ನ್ನಾ॑ರಾಯ॒ಣಗ್ಂ ಹ॑ರಿಮ್ । ವಿಶ್ವ॑ಮೇ॒ವೇದ-ಮ್ಪುರು॑ಷ॒-ಸ್ತ-ದ್ವಿಶ್ವ॒ಮುಪ॑ಜೀವತಿ ॥
ಪತಿಂ॒-ವಿಁಶ್ವ॑ಸ್ಯಾ॒ತ್ಮೇಶ್ವ॑ರ॒ಗ್ಂ॒ ಶಾಶ್ವ॑ತಗ್ಂ ಶಿ॒ವಮ॑ಚ್ಯುತಮ್ । ನಾ॒ರಾಯ॒ಣ-ಮ್ಮ॑ಹಾಜ್ಞೇ॒ಯಂ॒-ವಿಁ॒ಶ್ವಾತ್ಮಾ॑ನ-ಮ್ಪ॒ರಾಯ॑ಣಮ್ ॥
ನಾ॒ರಾಯ॒ಣ ಪ॑ರೋ ಜ್ಯೋ॒ತಿ॒ರಾ॒ತ್ಮಾ ನಾ॑ರಯ॒ಣಃ ಪ॑ರಃ ।
ನಾ॒ರಾಯ॒ಣ ಪ॑ರ-ಮ್ಬ್ರ॒ಹ್ಮ॒ ತ॒ತ್ತ್ವ-ನ್ನಾ॑ರಾಯ॒ಣಃ ಪ॑ರಃ । ನಾ॒ರಾಯ॒ಣ ಪ॑ರೋ ಧ್ಯಾ॒ತಾ॒ ಧ್ಯಾ॒ನ-ನ್ನಾ॑ರಾಯ॒ಣಃ ಪ॑ರಃ ॥ ಯಚ್ಚ॑ ಕಿ॒ಞ್ಚಿಜ್-ಜ॑ಗ-ಥ್ಸ॒ರ್ವ॒-ನ್ದೃ॒ಶ್ಯತೇ᳚ ಶ್ರೂಯ॒ತೇ-ಽಪಿ॑ ವಾ ॥ 29 ॥
ಅನ್ತ॑-ರ್ಬ॒ಹಿಶ್ಚ॑ ತ-ಥ್ಸ॒ರ್ವಂ॒-ವ್ಯಾಁ॒ಪ್ಯ ನಾ॑ರಾಯ॒ಣ-ಸ್ಸ್ಥಿ॑ತಃ ॥
ಅನ॑ನ್ತ॒ ಮವ್ಯ॑ಯ-ಙ್ಕ॒ವಿಗ್ಂ ಸ॑ಮು॒ದ್ರೇ-ಽನ್ತಂ॑-ವಿಁ॒ಶ್ವ ಶ॑ಭುಂವಁಮ್ । ಪ॒ದ್ಮ॒ಕೋ॒ಶ-ಪ್ರ॑ತೀಕಾ॒ಶ॒ಗ್ಂ॒ ಹೃ॒ದಯ॑-ಞ್ಚಾಪ್ಯ॒ಧೋಮು॑ಖಮ್ ॥
ಅಧೋ॑ ನಿ॒ಷ್ಟ್ಯಾ ವಿ॑ತಸ್ತ್ಯಾ॒ನ್ತೇ॒ ನಾ॒ಭ್ಯಾಮು॑ಪರಿ॒ ತಿಷ್ಠ॑ತಿ ।
ಜ್ವಾ॒ಲ॒ಮಾ॒ಲಾ ಕು॑ಲ-ಮ್ಭಾ॒ತೀ॒ ವಿ॒ಶ್ವಸ್ಯಾ॑ಯತ॒ನ-ಮ್ಮ॑ಹತ್ ॥
ಸನ್ತ॑ತಗ್ಂ ಶಿ॒ಲಾಭಿ॑ಸ್ತು॒ ಲಮ್ಬ॑ತ್ಯಾ ಕೋಶ॒ಸನ್ನಿ॑ಭಮ್ ।
ತಸ್ಯಾನ್ತೇ॑ ಸುಷಿ॒ರಗ್ಂ ಸೂ॒ಖ್ಷ್ಮ-ನ್ತಸ್ಮಿ᳚ನ್-ಥ್ಸ॒ರ್ವ-ಮ್ಪ್ರತಿ॑ಷ್ಠಿತಮ್ ॥
ತಸ್ಯ॒ ಮದ್ಧ್ಯೇ॑ ಮ॒ಹಾನ॑ಗ್ನಿ-ರ್ವಿ॒ಶ್ವಾರ್ಚಿ॑-ರ್ವಿ॒ಶ್ವತೋ॑ ಮುಖಃ । ಸೋ-ಽಗ್ರ॑ಭು॒ಗ್ ವಿಭ॑ಜ-ನ್ತಿ॒ಷ್ಠ॒-ನ್ನಾಹಾ॑ರ-ಮಜ॒ರಃ ಕ॒ವಿಃ । ತಿ॒ರ್ಯ॒ಗೂ॒ರ್ಧ್ವ ಮ॑ಧ-ಶ್ಶಾ॒ಯೀ॒ ರ॒ಶ್ಮಯ॑ಸ್ತಸ್ಯ॒ ಸನ್ತ॑ತಾ ॥ ಸ॒ನ್ತಾ॒ಪಯ॑ತಿ ಸ್ವ-ನ್ದೇ॒ಹಮಾಪಾ॑ದತಲ॒ ಮಸ್ತ॑ಕಃ । ತಸ್ಯ॒ ಮದ್ಧ್ಯೇ॒ ವಹ್ನಿ॑ಶಿಖಾ ಅ॒ಣೀಯೋ᳚ರ್ಧ್ವಾ ವ್ಯ॒ವಸ್ಥಿ॑ತಃ ॥
ನೀ॒ಲತೋ॑ ಯದ॑ ಮದ್ಧ್ಯ॒ಸ್ಥಾ॒-ದ್ವಿ॒ದ್ಯುಲ್ಲೇ॑ಖೇವ॒ ಭಾಸ್ವ॑ರಾ ।
ನೀ॒ವಾರ॒ ಶೂಕ॑ವತ್ತ॒ನ್ವೀ॒ ಪೀ॒ತಾ ಭಾ᳚ಸ್ವತ್ಯ॒ಣೂಪ॑ಮಾ ॥
ತಸ್ಯಾ᳚-ಶ್ಶಿಖಾ॒ಯಾ ಮ॑ದ್ಧ್ಯೇ ಪ॒ರಮಾ᳚ತ್ಮಾ ವ್ಯ॒ವಸ್ಥಿ॑ತಃ ।
ಸ ಬ್ರಹ್ಮ॒ ಸ ಶಿವ॒-ಸ್ಸ ಹರಿ॒-ಸ್ಸೇನ್ದ್ರ॒-ಸ್ಸೋ-ಽಖ್ಷ॑ರಃ ಪರ॒ಮ-ಸ್ಸ್ವ॒ರಾಟ್ ॥ 30 ॥
(ಅಪಿ॑ ವಾ॒ - ಸನ್ತ॑ತಾ॒ ಷಟ್ ಚ॑) (ಅ. 13)
ಅನುವಾಕಂ 14
ಆ॒ದಿ॒ತ್ಯೋ ವಾ ಏ॒ಷ ಏ॒ತ-ನ್ಮ॒ಣ್ಡಲ॒-ನ್ತಪ॑ತಿ॒ ತತ್ರ॒ ತಾ ಋಚ॒ಸ್ತದೃ॒ಚಾ ಮ॑ಣ್ಡಲ॒ಗ್ಂ॒ ಸ ಋ॒ಚಾಂ-ಲೋಁ॒ಕೋ-ಽಥ॒ಯ ಏ॒ಷ ಏ॒ತಸ್ಮಿ॑-ನ್ಮ॒ಣ್ಡಲೇ॒-ಽರ್ಚಿ-ರ್ದೀ॒ಪ್ಯತೇ॒ ತಾನಿ॒ ಸಾಮಾ॑ನಿ॒ ಸ ಸಾ॒ಮ್ನಾಂ-ಲೋಁ॒ಕೋ-ಽಥ॒ ಯ ಏ॒ಷ ಏ॒ತಸ್ಮಿ॑-ನ್ಮ॒ಣ್ಡಲೇ॒-ಽರ್ಚಿಷಿ॒ ಪುರು॑ಷ॒ಸ್ತಾನಿ॒ ಯಜೂಗ್ಂ॑ಷಿ॒ ಸ ಯಜು॑ಷಾ ಮಣ್ಡಲ॒ಗ್ಂ॒ ಸ ಯಜು॑ಷಾಂ-ಲೋಁ॒ಕ-ಸ್ಸೈಷಾ ತ್ರ॒ಯ್ಯೇವ॑ ವಿ॒ದ್ಯಾ ತ॑ಪತಿ॒ ಯ ಏ॒ಷೋ᳚-ಽನ್ತ-ರಾ॑ದಿ॒ತ್ಯೇ ಹಿ॑ರ॒ಣ್ಮಯಃ॒ ಪುರು॑ಷಃ ॥ 31 ॥
ಅನುವಾಕಂ 15
ಆ॒ದಿ॒ತ್ಯೋ ವೈ ತೇಜ॒ ಓಜೋ॒ ಬಲಂ॒-ಯಁಶ॒-ಶ್ಚಖ್ಷು॒-ಶ್ಶ್ರೋತ್ರ॑ಮಾ॒ತ್ಮಾ ಮನೋ॑ ಮ॒ನ್ಯು-ರ್ಮನು॑-ರ್ಮೃ॒ತ್ಯು-ಸ್ಸ॒ತ್ಯೋ ಮಿ॒ತ್ರೋ ವಾ॒ಯುರಾ॑ಕಾ॒ಶಃ ಪ್ರಾ॒ಣೋ ಲೋ॑ಕಪಾ॒ಲಃ ಕಃ ಕಿ-ಙ್ಕ-ನ್ತ-ಥ್ಸ॒ತ್ಯಮನ್ನ॑-ಮ॒ಮೃತಾ॑ ಜೀ॒ವೋ ವಿಶ್ವಃ॑ ಕತ॒ಮ-ಸ್ಸ್ವ॑ಯ॒ಭು-ಮ್ಬ್ರಹ್ಮೈ॒ ತದಮೃ॑ತ ಏ॒ಷ ಪುರು॑ಷ ಏ॒ಷ ಭೂ॒ತಾನಾ॒-ಮಧಿ॑ಪತಿ॒-ರ್ಬ್ರಹ್ಮ॑ಣ॒-ಸ್ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋ-ತ್ಯೇ॒ತಾಸಾ॑ಮೇ॒ವ ದೇ॒ವತಾ॑ನಾ॒ಗ್ಂ॒ ಸಾಯು॑ಜ್ಯಗ್ಂ ಸಾ॒ರ್ಷ್ಟಿತಾಗ್ಂ॑ ಸಮಾನ ಲೋ॒ಕತಾ॑-ಮಾಪ್ನೋತಿ॒ ಯ ಏ॒ವಂ-ವೇಁದೇ᳚ತ್ಯುಪ॒ನಿಷತ್ ॥ 32 ॥
ಅನುವಾಕಂ 16
ನಿಧ॑ನಪತಯೇ॒ ನಮಃ । ನಿಧ॑ನಪತಾನ್ತಿಕಾಯ॒ ನಮಃ ।
ಊರ್ಧ್ವಾಯ॒ ನಮಃ । ಊರ್ಧ್ವಲಿಙ್ಗಾಯ॒ ನಮಃ ।
ಹಿರಣ್ಯಾಯ॒ ನಮಃ । ಹಿರಣ್ಯಲಿಙ್ಗಾಯ॒ ನಮಃ ।
ಸುವರ್ಣಾಯ॒ ನಮಃ । ಸುವರ್ಣಲಿಙ್ಗಾಯ॒ ನಮಃ ।
ದಿವ್ಯಾಯ॒ ನಮಃ । ದಿವ್ಯಲಿಙ್ಗಾಯ॒ ನಮಃ ॥ 33 ॥
ಭವಾಯ॒ ನಮಃ । ಭವಲಿಙ್ಗಾಯ॒ ನಮಃ ।
ಶರ್ವಾಯ॒ ನಮಃ । ಶರ್ವಲಿಙ್ಗಾಯ॒ ನಮಃ ।
ಶಿವಾಯ॒ ನಮಃ । ಶಿವಲಿಙ್ಗಾಯ॒ ನಮಃ ।
ಜ್ವಲಾಯ॒ ನಮಃ । ಜ್ವಲಲಿಙ್ಗಾಯ॒ ನಮಃ ।
ಆತ್ಮಾಯ॒ ನಮಃ । ಆತ್ಮಲಿಙ್ಗಾಯ॒ ನಮಃ ।
ಪರಮಾಯ॒ ನಮಃ । ಪರಮಲಿಙ್ಗಾಯ॒ ನಮಃ ।
ಏತಥ್ಸೋಮಸ್ಯ॑ ಸೂರ್ಯ॒ಸ್ಯ॒ ಸರ್ವಲಿಙ್ಗಗ್ಗ್॑ ಸ್ಥಾಪ॒ಯ॒ತಿ॒ ಪಾಣಿಮನ್ತ್ರ॑-ಮ್ಪವಿ॒ತ್ರಮ್ ॥ 34 ॥
ಅನುವಾಕಂ 17
ಸ॒ದ್ಯೋಜಾ॒ತ-ಮ್ಪ್ರ॑ಪದ್ಯಾ॒ಮಿ॒ ಸ॒ದ್ಯೋಜಾ॒ತಾಯ॒ ವೈ ನಮೋ॒ ನಮಃ॑ । ಭ॒ವೇ ಭ॑ವೇ॒ ನಾತಿ॑ಭವೇ ಭವಸ್ವ॒ ಮಾಮ್ । ಭ॒ವೋದ್ಭ॑ವಾಯ॒ ನಮಃ॑ ॥ 35 ॥
ಅನುವಾಕಂ 18
ವಾ॒ಮ॒ದೇ॒ವಾಯ॒ ನಮೋ᳚ ಜ್ಯೇ॒ಷ್ಠಾಯ॒ ನಮ॑-ಶ್ಶ್ರೇ॒ಷ್ಠಾಯ॒ ನಮೋ॑ ರು॒ದ್ರಾಯ॒ ನಮಃ॒ ಕಾಲಾ॑ಯ॒
ನಮಃ॒ ಕಲ॑ವಿಕರಣಾಯ॒ ನಮೋ॒ ಬಲ॑ವಿಕರಣಾಯ॒ ನಮೋ॒ ಬಲಾ॑ಯ॒ ನಮೋ॒ ಬಲ॑ಪ್ರಮಥನಾಯ॒ ನಮ॒-ಸ್ಸರ್ವ॑ಭೂತದಮನಾಯ॒ ನಮೋ॑ ಮ॒ನೋನ್ಮ॑ನಾಯ॒ ನಮಃ॑ ॥ 36 ॥
ಅನುವಾಕಂ 19
ಅ॒ಘೋರೇ᳚ಭ್ಯೋ-ಽಥ॒ ಘೋರೇ᳚ಭ್ಯೋ॒ ಘೋರ॒ಘೋರ॑ತರೇಭ್ಯಃ ।
ಸರ್ವೇ᳚ಭ್ಯ-ಸ್ಸರ್ವ॒ ಶರ್ವೇ᳚ಭ್ಯೋ॒ ನಮ॑ಸ್ತೇ ಅಸ್ತು ರು॒ದ್ರರೂ॑ಪೇಭ್ಯಃ ॥ 37 ॥
ಅನುವಾಕಂ 20
ತತ್ಪುರು॑ಷಾಯ ವಿ॒ದ್ಮಹೇ॑ ಮಹಾದೇ॒ವಾಯ॑ ಧೀಮಹಿ ।
ತನ್ನೋ॑ ರುದ್ರಃ ಪ್ರಚೋ॒ದಯಾ᳚ತ್ ॥ 38 ॥
ಅನುವಾಕಂ 21
ಈಶಾನ-ಸ್ಸರ್ವ॑ವಿದ್ಯಾ॒ನಾ॒- ಮೀಶ್ವರ-ಸ್ಸರ್ವ॑ಭೂತಾ॒ನಾ॒-ಮ್ಬ್ರಹ್ಮಾಧಿ॑ಪತಿ॒-ರ್ಬ್ರಹ್ಮ॒ಣೋ-ಽಧಿ॑ಪತಿ॒-ರ್ಬ್ರಹ್ಮಾ॑ ಶಿ॒ವೋ ಮೇ॑ ಅಸ್ತು ಸದಾಶಿ॒ವೋಮ್ ॥ 39 ॥
ಅನುವಾಕಂ 22
ನಮೋ ಹಿರಣ್ಯಬಾಹವೇ ಹಿರಣ್ಯವರ್ಣಾಯ ಹಿರಣ್ಯರೂಪಾಯ ಹಿರಣ್ಯಪತಯೇ ಽಬಿಙ್ಕಾಪತಯ ಉಮಾಪತಯೇ ಪಶುಪತಯೇ॑ ನಮೋ॒ ನಮಃ ॥ 40 ॥
ಅನುವಾಕಂ 23
ಋ॒ತಗ್ಂ ಸ॒ತ್ಯ-ಮ್ಪ॑ರ-ಮ್ಬ್ರ॒ಹ್ಮ॒ ಪು॒ರುಷ॑-ಙ್ಕೃಷ್ಣ॒ಪಿಙ್ಗ॑ಲಮ್ । ಊ॒ರ್ಧ್ವರೇ॑ತಂ-ವಿಁ॑ರೂಪಾ॒ಖ್ಷಂ॒-ವಿಁ॒ಶ್ವರೂ॑ಪಾಯ॒ ವೈ ನಮೋ॒ ನಮಃ॑ ॥ 41 ॥
ಅನುವಾಕಂ 24
ಸರ್ವೋ॒ ವೈ ರು॒ದ್ರಸ್ತಸ್ಮೈ॑ ರು॒ದ್ರಾಯ॒ ನಮೋ॑ ಅಸ್ತು ।
ಪುರು॑ಷೋ॒ ವೈ ರು॒ದ್ರ-ಸ್ಸನ್ಮ॒ಹೋ ನಮೋ॒ ನಮಃ॑ ।
ವಿಶ್ವ॑-ಮ್ಭೂ॒ತ-ಮ್ಭುವ॑ನ-ಞ್ಚಿ॒ತ್ರ-ಮ್ಬ॑ಹು॒ಧಾ ಜಾ॒ತ-ಞ್ಜಾಯ॑ಮಾನ-ಞ್ಚ॒ ಯತ್ । ಸರ್ವೋ॒ ಹ್ಯೇ॑ಷ ರು॒ದ್ರಸ್ತಸ್ಮೈ॑ ರು॒ದ್ರಾಯ॒ ನಮೋ॑ ಅಸ್ತು ॥ 42 ॥
ಅನುವಾಕಂ 25
ಕದ್ರು॒ದ್ರಾಯ॒ ಪ್ರಚೇ॑ತಸೇ ಮೀ॒ಢುಷ್ಟ॑ಮಾಯ॒ ತವ್ಯ॑ಸೇ । ವೋ॒ಚೇಮ॒ ಶನ್ತ॑ಮಗ್ಂ ಹೃ॒ದೇ ॥ ಸರ್ವೋ॒ಹ್ಯೇ॑ಷ ರು॒ದ್ರಸ್ತಸ್ಮೈ॑ ರು॒ದ್ರಾಯ॒ ನಮೋ॑ ಅಸ್ತು ॥ 43 ॥
ಅನುವಾಕಂ 26
ಯಸ್ಯ॒ ವೈ ಕ॑ಙ್ಕತ್ಯಗ್ನಿ-ಹೋತ್ರ॒ಹವ॑ಣೀ ಭವತಿ॒ ಪ್ರತ್ಯೇ॒ವಾ-ಸ್ಯಾಹು॑ತಯ-ಸ್ತಿಷ್ಠ॒ನ್ತ್ಯಥೋ॒ ಪ್ರತಿ॑ಷ್ಠಿತ್ಯೈ ॥ 44 ॥
ಅನುವಾಕಂ 27
(ಠಿಸ್ ಏಕ್ಷ್ಪನ್ಸಿಒನ್ ಇಸ್ ಅಪ್ಪೆಅರಿನ್ಗ್ ಇ-ನ್ತೈ. ಸಂ. 1.2.14.1 fಒ-ರ್ಕೃ॒ಣು॒ಷ್ವ ಪಾಜ॒ ಇತಿ॒ ಪಞ್ಚ॑ । )
ಕೃ॒ಣು॒ಷ್ವ ಪಾಜಃ॒ ಪ್ರಸಿ॑ತಿ॒ನ್ನ ಪೃ॒ಥ್ವೀಂ-ಯಾಁ॒ಹಿ ರಾಜೇ॒ ವಾ॑ಮವಾ॒ಗ್ಂ॒ ಇಭೇ॑ನ । ತೃ॒ಷ್ವೀಮನು॒ ಪ್ರಸಿ॑ತಿ-ನ್ದ್ರೂಣಾ॒ನೋ-ಽಸ್ತಾ॑-ಽಸಿ॒ ವಿದ್ಧ್ಯ॑ ರ॒ಖ್ಷ ಸ॒ಸ್ತಪಿ॑ಷ್ಠೈಃ ॥ 1 ॥
ತವ॑ ಭ್ರ॒ಮಾಸ॑ ಆಶು॒ಯಾ ಪ॑ತ॒ನ್ತ್ಯನು॑ ಸ್ಪೃಶ ಧೃಷ॒ತಾ ಶೋಶು॑ಚಾನಃ । ತಪೂಗ್॑ಷ್ಯಗ್ನೇ ಜು॒ಹ್ವಾ॑ ಪತ॒ಗಾನ್ನ ಸ॑ನ್ದಿತೋ॒ ವಿಸೃ॑ಜ॒ ವಿಷ್ವ॑ ಗು॒ಲ್ಕಾಃ ॥ 2 ॥
ಪ್ರತಿ॒ಸ್ಪಶೋ॒ ವಿಸೃ॑ಜ॒ ತೂರ್ಣಿ॑ ತಮೋ॒ ಭವಾ॑ ಪಾ॒ಯು-ರ್ವಿ॒ಶೋ ಅ॒ಸ್ಯಾ ಅದ॑ಬ್ಧಃ । ಯೋ ನೋ॑ ದೂ॒ರೇ ಅ॒ಘಶಗ್ಂ॑ಸೋ॒ ಯೋ ಅನ್ತ್ಯ॑ಗ್ನೇ॒ ಮಾಕಿ॑ಷ್ಟೇ॒ ವ್ಯಥಿ॒ರಾ
ದ॑ಧರ್ಷೀತ್ ॥ 3 ॥
ಉದ॑ಗ್ನೇ ತಿಷ್ಠ॒ ಪ್ರತ್ಯಾ ತ॑ನುಷ್ವ॒ನ್ಯ॑ ಮಿತ್ರಾಗ್ಂ॑ ಓಷತಾ-ತ್ತಿಗ್ಮಹೇತೇ । ಯೋ ನೋ॒ ಅರಾ॑ತಿಗ್ಂ ಸಮಿಧಾನ ಚ॒ಕ್ರೇ ನೀ॒ಚಾತ-ನ್ಧ॑ಖ್ಷ್ಯತ॒ ಸನ್ನ ಶುಷ್ಕ᳚ಮ್ ॥ 4 ॥
ಊ॒ರ್ಧ್ವೋ ಭ॑ವ॒ ಪ್ರತಿ॑ವಿದ್॒ಧ್ಯಾ-ಧ್ಯ॒ಸ್ಮದಾ॒ ವಿಷ್ಕೃ॑ಣುಷ್ವ॒ ದೈವ್ಯಾ᳚ನ್ಯಗ್ನೇ । ಅವ॑ಸ್ಥಿ॒ರಾ ತ॑ನುಹಿ ಯಾತು॒ ಜೂನಾ᳚-ಞ್ಜಾ॒ಮಿಮಜಾ॑ಮಿ॒-ಮ್ಪ್ರಮೃ॑ಣೀಹಿ॒ ಶತ್ರೂನ್॑ ॥ 5 ॥
ಕೃ॒ಣು॒ಷ್ವ ಪಾಜ॒ ಇತಿ॒ ಪಞ್ಚ॑ ॥ 45 ॥
ಅನುವಾಕಂ 28
ಅದಿ॑ತಿ-ರ್ದೇ॒ವಾ ಗ॑ನ್ಧ॒ರ್ವಾ ಮ॑ನು॒ಷ್ಯಾಃ᳚ ಪಿ॒ತರೋ-ಽಸು॑ರಾ॒-ಸ್ತೇಷಾಗ್ಂ॑ ಸರ್ವ ಭೂ॒ತಾನಾ᳚-ಮ್ಮಾ॒ತಾ ಮೇ॒ದಿನೀ॑ ಮಹ॒ತಾ ಮ॒ಹೀ ಸಾ॑ವಿ॒ತ್ರೀ ಗಾ॑ಯ॒ತ್ರೀ ಜಗ॑ತ್ಯು॒ರ್ವೀ ಪೃ॒ಥ್ವೀ ಬ॑ಹು॒ಲಾ ವಿಶ್ವಾ॑ ಭೂ॒ತಾ ಕ॑ತ॒ಮಾ ಕಾಯಾ ಸಾ ಸ॒ತ್ಯೇ-ತ್ಯ॒ಮೃತೇತಿ॑ ವಸಿ॒ಷ್ಠಃ ॥ 46 ॥
ಅನುವಾಕಂ 29
ಆಪೋ॒ ವಾ ಇ॒ದಗ್ಂ ಸರ್ವಂ॒-ವಿಁಶ್ವಾ॑ ಭೂ॒ತಾನ್ಯಾಪಃ॑ ಪ್ರಾ॒ಣಾ ವಾ ಆಪಃ॑ ಪ॒ಶವ॒ ಆಪೋ-ಽನ್ನ॒ಮಾಪೋ -ಽಮೃ॑ತ॒ಮಾಪ॑-ಸ್ಸ॒ಮ್ರಾಡಾಪೋ॑ ವಿ॒ರಾಡಾಪ॑-ಸ್ಸ್ವ॒ರಾಡಾಪ॒-ಶ್ಛನ್ದಾ॒ಗ್॒ಸ್ಯಾಪೋ॒ ಜ್ಯೋತೀ॒ಗ್॒ಷ್ಯಾಪೋ॒ ಯಜೂ॒ಗ್॒ಷ್ಯಾಪ॑-ಸ್ಸ॒ತ್ಯಮಾಪ॒-ಸ್ಸರ್ವಾ॑ ದೇ॒ವತಾ॒ ಆಪೋ॒ ಭೂರ್ಭುವ॒ಸ್ಸುವ॒ರಾಪ॒ ಓಮ್ ॥ 47 ॥
ಅನುವಾಕಂ 30
ಆಪಃ॑ ಪುನನ್ತು ಪೃಥಿ॒ವೀ-ಮ್ಪೃ॑ಥಿ॒ವೀ ಪೂ॒ತಾ ಪು॑ನಾತು॒ ಮಾಮ್ ।
ಪು॒ನನ್ತು॒ ಬ್ರಹ್ಮ॑ಣ॒ಸ್ಪತಿ॒-ರ್ಬ್ರಹ್ಮ॑ ಪೂ॒ತಾ ಪು॑ನಾತು॒
ಮಾಮ್ ॥
ಯದುಚ್ಛಿ॑ಷ್ಟ॒-ಮಭೋ᳚ಜ್ಯಂ॒-ಯಁದ್ವಾ॑ ದು॒ಶ್ಚರಿ॑ತ॒-ಮ್ಮಮ॑ । ಸರ್ವ॑-ಮ್ಪುನನ್ತು॒ ಮಾಮಾಪೋ॑-ಽಸ॒ತಾಞ್ಚ॑ ಪ್ರತಿ॒ಗ್ರಹ॒ಗ್ಗ್॒ ಸ್ವಾಹಾ᳚ ॥ 48 ॥
ಅನುವಾಕಂ 31
ಅಗ್ನಿಶ್ಚ ಮಾ ಮನ್ಯುಶ್ಚ ಮನ್ಯುಪತಯಶ್ಚ ಮನ್ಯು॑ಕೃತೇ॒ಭ್ಯಃ ।
ಪಾಪೇಭ್ಯೋ॑ ರಖ್ಷ॒ನ್ತಾಮ್ । ಯದಹ್ನಾ ಪಾಪ॑ಮಕಾ॒ರ್॒ಷಮ್ ।
ಮನಸಾ ವಾಚಾ॑ ಹಸ್ತಾ॒ಭ್ಯಾಮ್ । ಪದ್ಭ್ಯಾ-ಮುದರೇ॑ಣ ಶಿ॒ಶ್ನಾ ।
ಅಹ॒ಸ್ತದ॑ವಲು॒ಪನ್ತು । ಯತ್ಕಿಞ್ಚ॑ ದುರಿ॒ತ-ಮ್ಮಯಿ॑ ।
ಇದಮಹ-ಮಾಮಮೃ॑ತ ಯೋ॒ನೌ ।
ಸತ್ಯೇ ಜ್ಯೋತಿಷಿ ಜುಹೋ॑ಮಿ ಸ್ವಾ॒ಹಾ ॥ 49 ॥
ಅನುವಾಕಂ 32
ಸೂರ್ಯಶ್ಚ ಮಾ ಮನ್ಯುಶ್ಚ ಮನ್ಯುಪತಯಶ್ಚ ಮನ್ಯು॑ಕೃತೇ॒ಭ್ಯಃ । ಪಾಪೇಭ್ಯೋ॑ ರಖ್ಷ॒ನ್ತಾಮ್ । ಯದ್ರಾತ್ರಿಯಾ ಪಾಪ॑ಮಕಾ॒ರ್॒ಷಮ್ ।
ಮನಸಾ ವಾಚಾ॑ ಹಸ್ತಾ॒ಭ್ಯಾಮ್ । ಪದ್ಭ್ಯಾ-ಮುದರೇ॑ಣ ಶಿ॒ಶ್ನಾ ।
ರಾತ್ರಿ॒-ಸ್ತದ॑ವಲು॒ಪನ್ತು । ಯತ್ಕಿಞ್ಚ॑ ದುರಿ॒ತ-ಮ್ಮಯಿ॑ ।
ಇದಮಹ-ಮಾಮಮೃ॑ತ ಯೋ॒ನೌ । ಸೂರ್ಯೇ ಜ್ಯೋತಿಷಿ ಜುಹೋ॑ಮಿ ಸ್ವಾ॒ಹಾ ॥ 50 ॥
ಅನುವಾಕಂ 33
ಓಮಿತ್ಯೇಕಾಖ್ಷ॑ರ-ಮ್ಬ್ರ॒ಹ್ಮ । ಅಗ್ನಿರ್ದೇವತಾ ಬ್ರಹ್ಮ॑ ಇತ್ಯಾ॒ರ್ಷಮ್ । ಗಾಯತ್ರ-ಞ್ಛನ್ದ-ಮ್ಪರಮಾತ್ಮಂ॑ ಸರೂ॒ಪಮ್ । ಸಾಯುಜ್ಯಂ-ವಿಁ॑ನಿಯೋ॒ಗಮ್ ॥ 51 ॥
ಅನುವಾಕಂ 34
ಆಯಾ॑ತು॒ ವರ॑ದಾ ದೇ॒ವೀ॒ ಅ॒ಖ್ಷರ॑-ಮ್ಬ್ರಹ್ಮ॒ ಸಮ್ಮಿ॑ತಮ್ ।
ಗಾ॒ಯ॒ತ್ರೀ᳚-ಞ್ಛನ್ದ॑ಸಾ-ಮ್ಮಾ॒ತೇದ-ಮ್ಬ್ರ॑ಹ್ಮ ಜು॒ಷಸ್ವ॑ ಮೇ ।
ಯದಹ್ನಾ᳚-ತ್ಕುರು॑ತೇ ಪಾ॒ಪ॒-ನ್ತದಹ್ನಾ᳚-ತ್ಪ್ರತಿ॒ಮುಚ್ಯ॑ತೇ ।
ಯ-ದ್ರಾತ್ರಿಯಾ᳚-ತ್ಕುರು॑ತೇ ಪಾ॒ಪ॒-ನ್ತ-ದ್ರಾತ್ರಿಯಾ᳚-ತ್ಪ್ರತಿ॒ಮುಚ್ಯ॑ತೇ ।
ಸರ್ವ॑ ವ॒ರ್ಣೇ ಮ॑ಹಾದೇ॒ವಿ॒ ಸ॒ನ್ಧ್ಯಾ ವಿ॑ದ್ಯೇ ಸ॒ರಸ್ವ॑ತಿ ॥ 52 ॥
ಅನುವಾಕಂ 35
ಓಜೋ॑-ಽಸಿ॒ ಸಹೋ॑-ಽಸಿ॒ ಬಲ॑ಮಸಿ॒ ಭ್ರಾಜೋ॑-ಽಸಿ ದೇ॒ವಾನಾ॒-ನ್ಧಾಮ॒ನಾಮಾ॑॑-ಽಸಿ॒ ವಿಶ್ವ॑ಮಸಿ ವಿ॒ಶ್ವಾಯು॒-ಸ್ಸರ್ವ॑ಮಸಿ ಸ॒ರ್ವಾಯು-ರಭಿಭೂರೋಂ-ಗಾಯತ್ರೀ-ಮಾವಾ॑ಹಯಾ॒ಮಿ॒
ಸಾವಿತ್ರೀ-ಮಾವಾ॑ಹಯಾ॒ಮಿ॒ ಸರಸ್ವತೀ-ಮಾವಾ॑ಹಯಾ॒ಮಿ॒ ಛನ್ದರ್ಷೀ-ನಾವಾ॑ಹಯಾ॒ಮಿ॒ ಶ್ರಿಯ-ಮಾವಾ॑ಹಯಾ॒ಮಿ॒ ಗಾಯತ್ರಿಯಾ ಗಾಯತ್ರೀ ಛನ್ದೋ ವಿಶ್ವಾಮಿತ್ರ ಋಷಿ-ಸ್ಸವಿತಾ ದೇವತಾ-ಽಗ್ನಿರ್ಮುಖ-ಮ್ಬ್ರಹ್ಮಾ ಶಿರೋ ವಿಷ್ಣುರ್ಹೃದಯಗ್ಂ ರುದ್ರಃ
ಶಿಖಾ ಪೃಥಿವೀಯೋನಿಃ ಪ್ರಾಣಾಪಾನ-ವ್ಯಾನೋದಾನ-ಸಮಾನಾ ಸಪ್ರಾಣಾ ಶ್ವೇತವರ್ಣಾ ಸಾಙ್ಖ್ಯಾಯನ-ಸಗೋತ್ರಾ ಗಾಯತ್ರೀ ಚತುರ್ವಿಗ್ಂಶತ್ಯಖ್ಷರಾ ತ್ರಿಪದಾ॑ ಷಟ್ಕು॒ಖ್ಷಿಃ॒ ಪಞ್ಚ ಶೀರ್ಷೋಪನಯನೇ ವಿ॑ನಿಯೋ॒ಗ॒,
ಓ-ಮ್ಭೂಃ । ಓ-ಮ್ಭುವಃ । ಓಗ್ಂ ಸುವಃ । ಓ-ಮ್ಮಹಃ । ಓ-ಞ್ಜನಃ ।
ಓ-ನ್ತಪಃ । ಓಗ್ಂ ಸ॒ತ್ಯಮ್ । ಓ-ನ್ತ-ಥ್ಸ॑ವಿ॒ತುರ್ವರೇ᳚ಣ್ಯ॒-ಮ್ಭರ್ಗೋ॑ ದೇ॒ವಸ್ಯ॑ ಧೀಮಹಿ ।
ಧಿಯೋ॒ ಯೋ ನಃ॑ ಪ್ರಚೋ॒ದಯಾ᳚ತ್ ।
ಓಮಾಪೋ॒ ಜ್ಯೋತೀ॒ ರಸೋ॒-ಽಮೃತ॒-ಮ್ಬ್ರಹ್ಮ॒ ಭೂರ್ಭುವ॒ಸ್ಸುವ॒ರೋಮ್ ॥ 53 ॥
ಅನುವಾಕಂ 36
ಉ॒ತ್ತಮೇ॑ ಶಿಖ॑ರೇ ಜಾ॒ತೇ॒ ಭೂ॒ಮ್ಯಾ-ಮ್ಪ॑ರ್ವತ॒ ಮೂರ್ಧ॑ನಿ ।
ಬ್ರಾ॒ಹ್ಮಣೇ᳚ಭ್ಯೋ-ಽಭ್ಯ॑ನುಜ್ಞಾ॒ತಾ॒ ಗ॒ಚ್ಛ ದೇ॑ವಿ ಯ॒ಥಾಸು॑ಖಮ್ ॥ ಸ್ತುತೋ ಮಯಾ ವರದಾ ವೇ॑ದಮಾ॒ತಾ॒ ಪ್ರಚೋದಯನ್ತೀ ಪವನೇ᳚ ದ್ವಿಜಾ॒ತಾ । ಆಯುಃ ಪೃಥಿವ್ಯಾಂ-ದ್ರವಿಣ-ಮ್ಬ್ರ॑ಹ್ಮವ॒ರ್ಚ॒ಸ॒-ಮ್ಮಹ್ಯ-ನ್ದತ್ವಾ ಪ್ರಜಾತುಂ
ಬ್ರ॑ಹ್ಮಲೋ॒ಕಮ್ ॥ 54 ॥
ಅನುವಾಕಂ 37
ಘೃಣಿ॒-ಸ್ಸೂರ್ಯ॑ ಆದಿ॒ತ್ಯೋ ನ ಪ್ರಭಾ॑-ವಾ॒ತ್ಯಖ್ಷ॑ರಮ್ । ಮಧು॑ಖ್ಷರನ್ತಿ॒ ತ-ದ್ರ॑ಸಮ್ । ಸ॒ತ್ಯಂ-ವೈಁ ತ-ದ್ರಸ॒-ಮಾಪೋ॒ ಜ್ಯೋತೀ॒ರಸೋ॒-ಽಮೃತ॒-ಮ್ಬ್ರಹ್ಮ॒
ಭೂರ್ಭುವ॒ಸ್ಸುವ॒ರೋಮ್ ॥ 55 ॥
ಅನುವಾಕಂ 38
ಬ್ರಹ್ಮ॑ ಮೇತು॒ ಮಾಮ್ । ಮಧು॑ ಮೇತು॒ ಮಾಮ್ । ಬ್ರಹ್ಮ॑-ಮೇ॒ವ ಮಧು॑ ಮೇತು॒ ಮಾಮ್ ॥ ಯಾಸ್ತೇ॑ ಸೋಮ ಪ್ರ॒ಜಾವ॒ಥ್ಸೋ-ಽಭಿ॒ಸೋ ಅ॒ಹಮ್ । ದುಸ್ಷ್ವ॑ಪ್ನ॒ಹ-ನ್ದು॑ರುಷ್ವಹ ।
ಯಾಸ್ತೇ॑ ಸೋಮ ಪ್ರಾ॒ಣಾಗ್ಸ್ತಾ-ಞ್ಜು॑ಹೋಮಿ ॥
ತ್ರಿಸು॑ಪರ್ಣ॒ ಮಯಾ॑ಚಿತ-ಮ್ಬ್ರಾಹ್ಮ॒ಣಾಯ॑ ದದ್ಯಾತ್ । ಬ್ರ॒ಹ್ಮ॒ಹ॒ತ್ಯಾಂ-ವಾಁ ಏ॒ತೇ ಘ್ನ॑ನ್ತಿ ।
ಯೇ ಬ್ರಾ᳚ಹ್ಮ॒ಣಾ-ಸ್ತ್ರಿಸು॑ಪರ್ಣ॒-ಮ್ಪಠ॑ನ್ತಿ । ತೇ ಸೋಮ॒-ಮ್ಪ್ರಾಪ್ನು॑ವನ್ತಿ । ಆ॒ಸ॒ಹ॒ಸ್ರಾ-ತ್ಪ॒ಕ್ತಿ-ಮ್ಪುನ॑ನ್ತಿ । ಓಮ್ ॥ 56 ॥
ಅನುವಾಕಂ 39
ಬ್ರಹ್ಮ॑ ಮೇ॒ಧಯಾ᳚ । ಮಧು॑ ಮೇ॒ಧಯಾ᳚ । ಬ್ರಹ್ಮ॑ಮೇ॒ವ ಮಧು॑ ಮೇ॒ಧಯಾ᳚ ॥ ಅ॒ದ್ಯಾ ನೋ॑ ದೇವ ಸವಿತಃ ಪ್ರ॒ಜಾವ॑ಥ್ಸಾವೀ॒-ಸ್ಸೌಭ॑ಗಮ್ । ಪರಾ॑ ದು॒ಸ್ಷ್ವಪ್ನಿ॑ಯಗ್ಂ ಸುವ । ವಿಶ್ವಾ॑ನಿ ದೇವ ಸವಿತ-ರ್ದುರಿ॒ತಾನಿ॒ ಪರಾ॑ಸುವ । ಯ-ದ್ಭ॒ದ್ರ-ನ್ತನ್ಮ॒ ಆಸು॑ವ ॥ ಮಧು॒ವಾತಾ॑ ಋತಾಯ॒ತೇ ಮಧು॑ಖ್ಷರನ್ತಿ॒ ಸಿನ್ಧ॑ವಃ । ಮಾದ್ಧ್ವೀ᳚ರ್ನ-ಸ್ಸ॒ನ್ತ್ವೋಷ॑ಧೀಃ । ಮಧು॒ನಕ್ತ॑ ಮು॒ತೋಷಸಿ॒ ಮಧು॑ಮ॒-ತ್ಪಾರ್ಥಿ॑ವ॒ಗ್ಂ॒ ರಜಃ॑ । ಮಧು॒ದ್ಯೌರ॑ಸ್ತು ನಃ ಪಿ॒ತಾ । ಮಧು॑ಮಾನ್ನೋ॒ ವನ॒ಸ್ಪತಿ॒-ರ್ಮಧು॑ಮಾಗ್ಂ ಅಸ್ತು॒ ಸೂರ್ಯಃ॑ ।
ಮಾದ್ಧ್ವೀ॒ ರ್ಗಾವೋ॑ ಭವನ್ತು ನಃ ॥
ಯ ಇ॒ಮ-ನ್ತ್ರಿಸು॑ಪರ್ಣ॒-ಮಯಾ॑ಚಿತ-ಮ್ಬ್ರಾಹ್ಮ॒ಣಾಯ॑ ದದ್ಯಾತ್ ।
ಭ್ರೂ॒ಣ॒ಹ॒ತ್ಯಾಂ-ವಾಁ ಏ॒ತೇ ಘ್ನ॑ನ್ತಿ । ಯೇ ಬ್ರಾ᳚ಹ್ಮ॒ಣಾ-ಸ್ತ್ರಿಸು॑ಪರ್ಣ॒-ಮ್ಪಠ॑ನ್ತಿ । ತೇ ಸೋಮ॒-ಮ್ಪ್ರಾಪ್ನು॑ವನ್ತಿ । ಆ॒ಸ॒ಹ॒ಸ್ರಾ-ತ್ಪ॒ಕ್ತಿ-ಮ್ಪುನ॑ನ್ತಿ । ಓಮ್ ॥ 57 ॥
ಅನುವಾಕಂ 40
ಬ್ರಹ್ಮ॑ ಮೇ॒ಧವಾ᳚ । ಮಧು॑ ಮೇ॒ಧವಾ᳚ । ಬ್ರಹ್ಮ॑ಮೇ॒ವ ಮಧು॑ ಮೇ॒ಧವಾ᳚ ॥ ಬ್ರ॒ಹ್ಮಾ ದೇ॒ವಾನಾ᳚-ಮ್ಪದ॒ವೀಃ ಕ॑ವೀ॒ನಾ-ಮೃಷಿ॒-ರ್ವಿಪ್ರಾ॑ಣಾ-ಮ್ಮಹಿ॒ಷೋ ಮೃ॒ಗಾಣಾ᳚ಮ್ ।
ಶ್ಯೇ॒ನೋ ಗೃದ್ಧ್ರಾ॑ಣಾ॒ಗ್॒ ಸ್ವಧಿ॑ತಿ॒-ರ್ವನಾ॑ನಾ॒ಗ್ಂ॒ ಸೋಮಃ॑ ಪ॒ವಿತ್ರ॒-ಮತ್ಯೇ॑ತಿ॒ ರೇಭನ್ನ್॑ ॥
ಹ॒ಗ್ಂ॒ಸ-ಶ್ಶು॑ಚಿ॒ಷ-ದ್ವಸು॑ರನ್ತರಿಖ್ಷ॒ ಸದ್ಧೋತಾ॑- ವೇದಿ॒ಷ-ದತಿ॑ಥಿ-ರ್ದುರೋಣ॒ಸತ್ ।
ನೃ॒ಷದ್ವ॑ರ॒-ಸದೃ॑ತ॒-ಸ-ದ್ವ್ಯೋ॑ಮ॒-ಸದ॒ಬ್ಜಾ- ಗೋ॒ಜಾ ಋ॑ತ॒ಜಾ ಅ॑ದ್ರಿ॒ಜಾ ಋ॒ತ-ಮ್ಬೃ॒ಹತ್ ॥ ಋ॒ಚೇತ್ವಾ॑ ರು॒ಚೇತ್ವಾ॒ ಸಮಿ-ಥ್ಸ್ರ॑ವನ್ತಿ ಸ॒ರಿತೋ॒ ನ ಧೇನಾಃ᳚ ।
ಅ॒ನ್ತರ್-ಹೃ॒ದಾ ಮನ॑ಸಾ ಪೂ॒ಯಮಾ॑ನಾಃ ।
ಘೃ॒ತಸ್ಯ॒ ಧಾರಾ॑ ಅ॒ಭಿಚಾ॑ಕಶೀಮಿ ।
ಹಿ॒ರ॒ಣ್ಯಯೋ॑ ವೇತ॒ಸೋ ಮದ್ಧ್ಯ॑ ಆಸಾಮ್ ।
ತಸ್ಮಿ᳚ನ್-ಥ್ಸುಪ॒ರ್ಣೋ ಮ॑ಧು॒ಕೃ-ತ್ಕು॑ಲಾ॒ಯೀ ಭಜ॑ನ್ನಾಸ್ತೇ॒ ಮಧು॑ ದೇ॒ವತಾ᳚ಭ್ಯಃ ।
ತಸ್ಯಾ॑ ಸತೇ॒ ಹರ॑ಯ-ಸ್ಸ॒ಪ್ತತೀರೇ᳚ ಸ್ವ॒ಧಾ-ನ್ದುಹಾ॑ನಾ ಅ॒ಮೃತ॑ಸ್ಯ॒ ಧಾರಾ᳚ಮ್ । ಯ ಇ॒ದ-ನ್ತ್ರಿಸು॑ಪರ್ಣ॒-ಮಯಾ॑ಚಿತ-ಮ್ಬ್ರಾಹ್ಮ॒ಣಾಯ॑ ದದ್ಯಾತ್ । ವೀ॒ರ॒ಹ॒ತ್ಯಾಂ-ವಾಁ ಏ॒ತೇ ಘ್ನ॑ನ್ತಿ । ಯೇ ಬ್ರಾ᳚ಹ್ಮ॒ಣಾ-ಸ್ತ್ರಿಸು॑ಪರ್ಣ॒-ಮ್ಪಠ॑ನ್ತಿ ।
ತೇ ಸೋಮ॒-ಮ್ಪ್ರಾಪ್ನು॑ವನ್ತಿ । ಆ॒ಸ॒ಹ॒ಸ್ರಾ-ತ್ಪ॒ಙ್ಕ್ತಿ-ಮ್ಪುನ॑ನ್ತಿ । ಓಮ್ ॥ 58 ॥
ಅನುವಾಕಂ 41
ಮೇ॒ಧಾದೇ॒ವೀ ಜು॒ಷಮಾ॑ಣಾ ನ॒ ಆಗಾ᳚-ದ್ವಿ॒ಶ್ವಾಚೀ॑ ಭ॒ದ್ರಾ ಸು॑ಮನ॒ಸ್ಯ ಮಾ॑ನಾ । ತ್ವಯಾ॒ ಜುಷ್ಟಾ॑ ನು॒ದಮಾ॑ನಾ ದು॒ರುಕ್ತಾ᳚-ನ್ಬೃ॒ಹದ್ವ॑ದೇಮ ವಿ॒ದಥೇ॑ ಸು॒ವೀರಾಃ᳚ ॥
ತ್ವಯಾ॒ ಜುಷ್ಟ॑ ಋ॒ಷಿ-ರ್ಭ॑ವತಿ ದೇವಿ॒ ತ್ವಯಾ॒ ಬ್ರಹ್ಮಾ॑-ಽಽಗ॒ತಶ್ರೀ॑ ರು॒ತ ತ್ವಯಾ᳚ । ತ್ವಯಾ॒ ಜುಷ್ಟ॑ಶ್ಚಿ॒ತ್ರಂ-ವಿಁ॑ನ್ದತೇ ವಸು॒ ಸಾ ನೋ॑ ಜುಷಸ್ವ॒ ದ್ರವಿ॑ಣೋ ನಮೇಧೇ ॥ 59 ॥
ಅನುವಾಕಂ 42
ಮೇ॒ಧಾ-ಮ್ಮ॒ ಇನ್ದ್ರೋ॑ ದದಾತು ಮೇ॒ಧಾ-ನ್ದೇ॒ವೀ ಸರ॑ಸ್ವತೀ ।
ಮೇ॒ಧಾ-ಮ್ಮೇ॑ ಅ॒ಶ್ವಿನಾ॑-ವು॒ಭಾವಾಧ॑ತ್ತಾ॒-ಮ್ಪುಷ್ಕ॑ರಸ್ರಜಾ ॥ ಅ॒ಫ್ಸ॒ರಾಸು॑ ಚ॒ ಯಾ ಮೇ॒ಧಾ ಗ॑ನ್ಧ॒ರ್ವೇಷು॑ ಚ॒ ಯನ್ಮನಃ॑ ।
ದೈವೀ᳚-ಮ್ಮೇ॒ಧಾ ಸರ॑ಸ್ವತೀ॒ ಸಾ ಮಾ᳚-ಮ್ಮೇ॒ಧಾ ಸು॒ರಭಿ॑-ರ್ಜುಷತಾ॒ಗ್॒ ಸ್ವಾಹಾ᳚ ॥ 60 ॥
ಅನುವಾಕಂ 43
ಆಮಾ᳚-ಮ್ಮೇ॒ಧಾ ಸು॒ರಭಿ॑-ರ್ವಿ॒ಶ್ವರೂ॑ಪಾ॒ ಹಿರ॑ಣ್ಯವರ್ಣಾ॒ ಜಗ॑ತೀ ಜಗ॒ಮ್ಯಾ । ಊರ್ಜ॑ಸ್ವತೀ॒ ಪಯ॑ಸಾ॒ ಪಿನ್ವ॑ಮಾನಾ॒ ಸಾ ಮಾ᳚-ಮ್ಮೇ॒ಧಾ ಸು॒ಪ್ರತೀ॑ಕಾ ಜುಷನ್ತಾಮ್ ॥ 61 ॥
ಅನುವಾಕಂ 44
ಮಯಿ॑ ಮೇ॒ಧಾ-ಮ್ಮಯಿ॑ ಪ್ರ॒ಜಾ-ಮ್ಮಯ್ಯ॒ಗ್ನಿಸ್ತೇಜೋ॑ ದಧಾತು॒ ಮಯಿ॑ ಮೇ॒ಧಾ-ಮ್ಮಯಿ॑ ಪ್ರ॒ಜಾ-ಮ್ಮಯೀನ್ದ್ರ॑ ಇನ್ದ್ರಿ॒ಯ-ನ್ದ॑ಧಾತು॒ ಮಯಿ॑ ಮೇ॒ಧಾ-ಮ್ಮಯಿ॑ ಪ್ರ॒ಜಾ-ಮ್ಮಯಿ॒ ಸೂರ್ಯೋ॒ ಭ್ರಾಜೋ॑ ದಧಾತು ॥ 62 ॥
ಅನುವಾಕಂ 45
ಅಪೈ॑ತು ಮೃ॒ತ್ಯು-ರ॒ಮೃತ॑ನ್ನ॒ ಆಗ॑ನ್ ವೈವಸ್ವ॒ತೋ ನೋ॒ ಅಭ॑ಯಙ್ಕೃಣೋತು । ಪ॒ರ್ಣಂ-ವಁನ॒ಸ್ಪತೇ॑ ರಿವಾ॒ಭಿನ॑-ಶ್ಶೀಯತಾಗ್ಂ ರ॒ಯಿ-ಸ್ಸಚ॑ತಾನ್ನ॒-ಶ್ಶಚೀ॒ಪತಿಃ॑ ॥ 63 ॥
ಅನುವಾಕಂ 46
ಪರ॑-ಮ್ಮೃತ್ಯೋ॒ ಅನು॒ ಪರೇ॑ಹಿ॒ ಪನ್ಥಾಂ॒-ಯಁಸ್ತೇ॒ಸ್ವ ಇತ॑ರೋ ದೇವ॒ಯಾನಾ᳚ತ್ । ಚಖ್ಷು॑ಷ್ಮತೇ ಶೃಣ್ವ॒ತೇ ತೇ᳚ ಬ್ರವೀಮಿ॒ ಮಾನಃ॑ ಪ್ರ॒ಜಾಗ್ಂ ರೀ॑ರಿಷೋ॒ ಮೋತ ವೀ॒ರಾನ್ ॥ 64 ॥
ಅನುವಾಕಂ 47
ವಾತ॑-ಮ್ಪ್ರಾ॒ಣ-ಮ್ಮನ॑ಸಾ॒ ನ್ವಾರ॑ಭಾಮಹೇ ಪ್ರ॒ಜಾಪ॑ತಿಂ॒-ಯೋಁ ಭುವ॑ನಸ್ಯ ಗೋ॒ಪಾಃ । ಸನೋ॑ ಮೃ॒ತ್ಯೋ ಸ್ತ್ರಾ॑ಯತಾ॒-ಮ್ಪಾತ್ವಗ್ಂಹ॑ಸೋ॒ ಜ್ಯೋಗ್ ಜೀ॒ವಾ ಜ॒ರಾಮ॑ಶೀಮಹಿ ॥ 65 ॥
ಅನುವಾಕಂ 48
ಅ॒ಮು॒ತ್ರ॒ ಭೂಯಾ॒ದಧ॒ ಯದ್ಯ॒ಮಸ್ಯ॒ ಬೃಹ॑ಸ್ಪತೇ ಅ॒ಭಿಶ॑ಸ್ತೇ॒ರ ಮು॑ಞ್ಚಃ । ಪ್ರತ್ಯೌ॑ಹತಾ ಮ॒ಶ್ವಿನಾ॑ ಮೃ॒ತ್ಯು ಮ॑ಸ್ಮಾ-ದ್ದೇ॒ವಾನಾ॑ಮಗ್ನೇ ಭಿ॒ಷಜಾ॒ ಶಚೀ॑ಭಿಃ ॥ 66 ॥
ಅನುವಾಕಂ 49
ಹರಿ॒ಗ್ಂ॒ ಹರ॑ನ್ತ॒- ಮನು॑ಯನ್ತಿ ದೇ॒ವಾ ವಿಶ್ವ॒ಸ್ಯೇಶಾ॑ನಂ-ವೃಁಷ॒ಭ-ಮ್ಮ॑ತೀ॒ನಾಮ್ । ಬ್ರಹ್ಮ॒ ಸರೂ॑ಪ॒-ಮನು॑ಮೇ॒ದಮಾ॑ಗಾ॒-ದಯ॑ನ॒-ಮ್ಮಾ ವಿವ॑ಧೀ॒-ರ್ವಿಕ್ರ॑ಮಸ್ವ ॥ 67 ॥
ಅನುವಾಕಂ 50
ಶಲ್ಕೈ॑ರ॒ಗ್ನಿ-ಮಿ॑ನ್ಧಾ॒ನ ಉ॒ಭೌ ಲೋ॒ಕೌ ಸ॑ನೇಮ॒ಹಮ್ ।
ಉ॒ಭಯೋ᳚ ರ್ಲೋ॒ಕಯಾ॑ರ್-ಋ॒ಧ್ದ್ವಾ-ಽತಿ॑ ಮೃ॒ತ್ಯು-ನ್ತ॑ರಾಮ್ಯ॒ಹಮ್ ॥ 68 ॥
ಅನುವಾಕಂ 51
ಮಾ ಛಿ॑ದೋ ಮೃತ್ಯೋ॒ ಮಾ ವ॑ಧೀ॒ರ್ಮಾ ಮೇ॒ ಬಲಂ॒-ವಿಁವೃ॑ಹೋ॒ ಮಾ ಪ್ರಮೋ॑ಷೀಃ । ಪ್ರ॒ಜಾ-ಮ್ಮಾ ಮೇ॑ ರೀರಿಷ॒ ಆಯು॑ರುಗ್ರ ನೃ॒ಚಖ್ಷ॑ಸ-ನ್ತ್ವಾ ಹ॒ವಿಷಾ॑ ವಿಧೇಮ ॥ 69 ॥
ಅನುವಾಕಂ 52
ಮಾ ನೋ॑ ಮ॒ಹಾನ್ತ॑ಮು॒ತ ಮಾ ನೋ॑ ಅರ್ಭ॒ಕ-ಮ್ಮಾ ನ॒ ಉಖ್ಷ॑ನ್ತಮು॒ತ ಮಾ ನ॑ ಉಖ್ಷಿ॒ತಮ್ ।
ಮಾ ನೋ॑ ವಧೀಃ ಪಿ॒ತರ॒-ಮ್ಮೋತ ಮಾ॒ತರ॑-ಮ್ಪ್ರಿ॒ಯಾ ಮಾ ನ॑ಸ್ತ॒ನುವೋ॑ ರುದ್ರ ರೀರಿಷಃ ॥ 70 ॥
ಅನುವಾಕಂ 53
ಮಾ ನ॑ಸ್ತೋ॒ಕೇ ತನ॑ಯೇ॒ ಮಾ ನ॒ ಆಯು॑ಷಿ॒ ಮಾ ನೋ॒ ಗೋಷು॒ ಮಾ ನೋ॒ ಅಶ್ವೇ॑ಷು ರೀರಿಷಃ । ವೀ॒ರಾನ್ಮಾ ನೋ॑ ರುದ್ರ ಭಾಮಿ॒ತೋವ॑ಧೀರ್-ಹ॒ವಿಷ್ಮ॑ನ್ತೋ॒ ನಮ॑ಸಾ ವಿಧೇಮ ತೇ ॥ 71 ॥
ಅನುವಾಕಂ 54
ಪ್ರಜಾ॑ಪತೇ॒ ನ ತ್ವದೇ॒ತಾ-ನ್ಯ॒ನ್ಯೋ ವಿಶ್ವಾ॑ ಜಾ॒ತಾನಿ॒ ಪರಿ॒ತಾ ಬ॑ಭೂವ । ಯ-ತ್ಕಾ॑ಮಾಸ್ತೇ ಜುಹು॒ಮಸ್ತನ್ನೋ॑ ಅಸ್ತು ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ 72 ॥
ಅನುವಾಕಂ 55
ಸ್ವ॒ಸ್ತಿ॒ದಾ ವಿ॒ಶಸ್ಪತಿ॑-ರ್ವೃತ್ರ॒ಹಾ ವಿಮೃಧೋ॑ ವ॒ಶೀ ।
ವೃಷೇನ್ದ್ರಃ॑ ಪು॒ರ ಏ॑ತು ನಸ್ಸ್ವಸ್ತಿ॒ದಾ ಅ॑ಭಯ-ಙ್ಕ॒ರಃ ॥ 73 ॥
ಅನುವಾಕಂ 56
ತ್ರ್ಯ॑ಮ್ಬಕಂ-ಯಁಜಾಮಹೇ ಸುಗ॒ನ್ಧಿ-ಮ್ಪು॑ಷ್ಟಿ॒ವರ್ಧ॑ನಮ್ । ಉ॒ರ್ವಾ॒ರು॒ಕಮಿ॑ವ॒ ಬನ್ಧ॑ನಾ-ನ್ಮೃ॒ತ್ಯೋ-ರ್ಮು॑ಖ್ಷೀಯ॒ ಮಾ-ಽಮೃತಾ᳚ತ್ ॥ 74 ॥
ಅನುವಾಕಂ 57
ಯೇ ತೇ॑ ಸ॒ಹಸ್ರ॑ಮ॒ಯುತ॒-ಮ್ಪಾಶಾ॒ ಮೃತ್ಯೋ॒ ಮರ್ತ್ಯಾ॑ಯ॒ ಹನ್ತ॑ವೇ । ತಾನ್. ಯ॒ಜ್ಞಸ್ಯ॑ ಮಾ॒ಯಯಾ॒ ಸರ್ವಾ॒ನವ॑ ಯಜಾಮಹೇ ॥ 75 ॥
ಅನುವಾಕಂ 58
ಮೃ॒ತ್ಯವೇ॒ ಸ್ವಾಹಾ॑ ಮೃ॒ತ್ಯವೇ॒ ಸ್ವಾಹಾ᳚ ॥ 76 ॥
ಅನುವಾಕಂ 59
ದೇ॒ವಕೃ॑ತ॒ಸ್ಯೈನ॑ಸೋ-ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಮ॒ನು॒ಷ್ಯ॑ಕೃತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಪಿ॒ತೃಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಆ॒ತ್ಮಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಅ॒ನ್ಯಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಅ॒ಸ್ಮತ್ಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಯದ್ದಿ॒ವಾ ಚ॒ ನಕ್ತ॒-ಞ್ಚೈನ॑ಶ್ಚಕೃ॒ಮ ತಸ್ಯಾ॑ ವ॒ಯಜ॑ನಮಸಿ॒ ಸ್ವಾಹಾ᳚ ।
ಯ-ಥ್ಸ್ವ॒ಪನ್ತ॑ಶ್ಚ॒ ಜಾಗ್ರ॑ತ॒-ಶ್ಚೈನ॑ಶ್ಚ-ಕೃ॒ಮ ತಸ್ಯಾ॑ ವ॒ಯಜ॑ನಮಸಿ॒ ಸ್ವಾಹಾ᳚ ।
ಯ-ಥ್ಸು॒ಷುಪ್ತ॑ಶ್ಚ॒ ಜಾಗ್ರ॑ತ॒-ಶ್ಚೈನ॑ಶ್ಚ-ಕೃ॒ಮ ತಸ್ಯಾ॑ ವ॒ಯಜ॑ನಮಸಿ॒ ಸ್ವಾಹಾ᳚ ।
ಯ-ದ್ವಿ॒ದ್ವಾಗ್ಂಸ॒ಶ್ಚಾ ವಿ॑ದ್ವಾಗ್ಂಸ॒ಶ್ಚೈನ॑ಶ್ಚ-ಕೃ॒ಮ ತಸ್ಯಾ॑ ವ॒ಯಜ॑ನಮಸಿ॒ ಸ್ವಾಹಾ᳚ ।
ಏನಸ ಏನಸೋ ವಯಜನಮ॑ಸಿ ಸ್ವಾ॒ಹಾ ॥ 77 ॥
ಅನುವಾಕಂ 60
ಯದ್ವೋ॑ ದೇವಾಶ್ಚಕೃ॒ಮ ಜಿ॒ಹ್ವಯಾ॑ ಗು॒ರುಮನ॑ಸೋ ವಾ॒ ಪ್ರಯು॑ತೀ ದೇವ॒ ಹೇಡ॑ನಮ್ ।
ಅರಾ॑ವಾ॒ಯೋ ನೋ॑ ಅ॒ಭಿದು॑ಚ್ಛುನಾ॒ಯತೇ॒ ತಸ್ಮಿ॒-ನ್ತದೇನೋ॑ ವಸವೋ॒ ನಿಧೇ॑ತನ॒ ಸ್ವಾಹಾ᳚ ॥ 78 ॥
ಅನುವಾಕಂ 61
ಕಾಮೋ-ಽಕಾರ್ಷೀ᳚-ನ್ನಮೋ॒ ನಮಃ ।
ಕಾಮೋ-ಽಕಾರ್ಷೀ-ತ್ಕಾಮಃ ಕರೋತಿ ನಾಹ-ಙ್ಕರೋಮಿ
ಕಾಮಃ ಕರ್ತಾ ನಾಹ-ಙ್ಕರ್ತಾ ಕಾಮಃ॑ ಕಾರ॒ಯಿತಾ ನಾಹ॑-ಙ್ಕಾರ॒ಯಿತಾ ಏಷ ತೇ ಕಾಮ ಕಾಮಾ॑ಯ ಸ್ವಾ॒ಹಾ ॥ 79 ॥
ಅನುವಾಕಂ 62
ಮನ್ಯುರಕಾರ್ಷೀ᳚-ನ್ನಮೋ॒ ನಮಃ ।
ಮನ್ಯುರಕಾರ್ಷೀ-ನ್ಮನ್ಯುಃ ಕರೋತಿ ನಾಹ-ಙ್ಕರೋಮಿ ಮನ್ಯುಃ ಕರ್ತಾ ನಾಹ-ಙ್ಕರ್ತಾ ಮನ್ಯುಃ॑ ಕಾರ॒ಯಿತಾ ನಾಹ॑-ಙ್ಕಾರ॒ಯಿತಾ ಏಷ ತೇ ಮನ್ಯೋ ಮನ್ಯ॑ವೇ ಸ್ವಾ॒ಹಾ ॥ 80 ॥
ಅನುವಾಕಂ 63
ತಿಲಾಞ್ಜುಹೋಮಿ ಸರಸಾಗ್ಂ ಸಪಿಷ್ಟಾ-ನ್ಗನ್ಧಾರ ಮಮ ಚಿತ್ತೇ ರಮ॑ನ್ತು ಸ್ವಾ॒ಹಾ ॥ ಗಾವೋ ಹಿರಣ್ಯ-ನ್ಧನಮನ್ನಪಾನಗ್ಂ ಸರ್ವೇಷಾಗ್ ಶ್ರಿ॑ಯೈ ಸ್ವಾ॒ಹಾ ॥ ಶ್ರಿಯಞ್ಚ ಲಖ್ಷ್ಮಿಞ್ಚ ಪುಷ್ಟಿಞ್ಚ ಕೀರ್ತಿ॑-ಞ್ಚಾ ನೃ॒ಣ್ಯತಾಮ್ ।
ಬ್ರಹ್ಮಣ್ಯ-ಮ್ಬ॑ಹುಪು॒ತ್ರತಾಮ್ । ಶ್ರದ್ಧಾಮೇಧೇ ಪ್ರಜಾ-ಸ್ಸನ್ದದಾ॑ತು ಸ್ವಾ॒ಹಾ ॥ 81 ॥
ಅನುವಾಕಂ 64
ತಿಲಾಃ ಕೃಷ್ಣಾ-ಸ್ತಿ॑ಲಾ-ಶ್ಶ್ವೇ॒ತಾ॒-ಸ್ತಿಲಾ-ಸ್ಸೌಮ್ಯಾ ವ॑ಶಾನು॒ಗಾಃ ।
ತಿಲಾಃ ಪುನನ್ತು॑ ಮೇ ಪಾ॒ಪಂ॒-ಯಁತ್ಕಿಞ್ಚಿ-ದ್ದುರಿತ-ಮ್ಮ॑ಯಿ ಸ್ವಾ॒ಹಾ ॥ ಚೋರ॒ಸ್ಯಾನ್ನ-ನ್ನ॑ವಶ್ರಾ॒ದ್ಧ॒-ಮ್ಬ್ರ॒ಹ್ಮ॒ಹಾ ಗು॑ರುತ॒ಲ್ಪಗಃ । ಗೋಸ್ತೇಯಗ್ಂ ಸ॑ರಾಪಾ॒ನ॒-ಮ್ಭ್ರೂಣಹತ್ಯಾ ತಿಲಾ ಶಾನ್ತಿಗ್ಂ ಶಮಯ॑ನ್ತು ಸ್ವಾ॒ಹಾ ॥
ಶ್ರೀಶ್ಚ ಲಖ್ಷ್ಮೀಶ್ಚ ಪುಷ್ಟೀಶ್ಚ ಕೀರ್ತಿ॑-ಞ್ಚಾ ನೃ॒ಣ್ಯತಾಮ್ ।
ಬ್ರಹ್ಮಣ್ಯ-ಮ್ಬ॑ಹುಪು॒ತ್ರತಾಮ್ ।
ಶ್ರದ್ಧಾಮೇಧೇ ಪ್ರಜ್ಞಾತು ಜಾತವೇದ-ಸ್ಸನ್ದದಾ॑ತು ಸ್ವಾ॒ಹಾ ॥ 82 ॥
ಅನುವಾಕಂ 65
ಪ್ರಾಣಾಪಾನ-ವ್ಯಾನೋದಾನ-ಸಮಾನಾ ಮೇ॑ ಶುದ್ಧ್ಯ॒ನ್ತಾಂ॒
ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ವಾಂ-ಮನ-ಶ್ಚಖ್ಷುಃ-ಶ್ರೋತ್ರ-ಜಿಹ್ವಾ-ಘ್ರಾಣ-ರೇತೋ-ಬುದ್ಧ್ಯಾಕೂತಿ-ಸ್ಸಙ್ಕಲ್ಪಾ ಮೇ॑ ಶುದ್ಧ್ಯ॒ನ್ತಾ॒-ಞ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ತ್ವಕ್-ಚರ್ಮ-ಮಾಗ್ಂಸ-ರುಧಿರ-ಮೇದೋ-ಮಜ್ಜಾ-ಸ್ನಾಯವೋ-ಽಸ್ಥೀನಿ
ಮೇ॑ ಶುದ್ಧ್ಯ॒ನ್ತಾ॒-ಞ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ಶಿರಃ ಪಾಣಿ ಪಾದ ಪಾರ್ಶ್ವ ಪೃಷ್ಠೋ-ರೂದರ-ಜಙ್ಘ-ಶಿಶ್ರ್ನೋಪಸ್ಥ ಪಾಯವೋ ಮೇ॑ ಶುದ್ಧ್ಯ॒ನ್ತಾ॒-ಞ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ಉತ್ತಿಷ್ಠ ಪುರುಷ ಹರಿತ-ಪಿಙ್ಗಲ ಲೋಹಿತಾಖ್ಷಿ ದೇಹಿ ದೇಹಿ ದದಾಪಯಿತಾ ಮೇ॑ ಶುದ್ಧ್ಯ॒ನ್ತಾ॒-ಞ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥ 83 ॥
ಅನುವಾಕಂ 66
ಪೃಥಿವ್ಯಾಪ ಸ್ತೇಜೋ ವಾಯು-ರಾಕಾಶಾ ಮೇ॑ ಶುದ್ಧ್ಯ॒ನ್ತಾಂ॒
ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ಶಬ್ದ-ಸ್ಪರ್ಶ-ರೂಪರಸ-ಗನ್ಧಾ ಮೇ॑ ಶುದ್ಧ್ಯ॒ನ್ತಾಂ॒
ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ಮನೋ-ವಾಕ್-ಕಾಯ-ಕರ್ಮಾಣಿ ಮೇ॑ ಶುದ್ಧ್ಯ॒ನ್ತಾಂ॒
ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ಅವ್ಯಕ್ತಭಾವೈ-ರ॑ಹಙ್ಕಾ॒ರ॒-ರ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ಆತ್ಮಾ ಮೇ॑ ಶುದ್ಧ್ಯ॒ನ್ತಾ॒-ಞ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ಅನ್ತರಾತ್ಮಾ ಮೇ॑ ಶುದ್ಧ್ಯ॒ನ್ತಾ॒-ಞ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ಪರಮಾತ್ಮಾ ಮೇ॑ ಶುದ್ಧ್ಯ॒ನ್ತಾ॒-ಞ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥
ಖ್ಷು॒ಧೇ ಸ್ವಾಹಾ᳚ ॥ ಖ್ಷುತ್ಪಿ॑ಪಾಸಾಯ॒ ಸ್ವಾಹಾ᳚ ॥
ವಿವಿ॑ಟ್ಯೈ॒ ಸ್ವಾಹಾ᳚ ॥ ಋಗ್ವಿ॑ಧಾನಾಯ॒ ಸ್ವಾಹಾ᳚ ॥ ಕ॒ಷೋ᳚ತ್ಕಾಯ॒ ಸ್ವಾಹಾ᳚ ॥
ಖ್ಷು॒ತ್ಪಿ॒ಪಾ॒ಸಾಮ॑ಲ-ಞ್ಜ್ಯೇ॒ಷ್ಠಾ॒ಮ॒ಲ॒ಖ್ಷ್ಮೀ-ರ್ನಾ॑ಶಯಾ॒ಮ್ಯಹಮ್ ।
ಅಭೂ॑ತಿ॒-ಮಸ॑ಮೃದ್ಧಿ॒ಞ್ಚ॒ ಸರ್ವಾಂ (ಸರ್ವಾ) ನಿರ್ಣುದ ಮೇ ಪಾಪ್ಮಾ॑ನಗ್ಗ್ ಸ್ವಾ॒ಹಾ ॥
ಅನ್ನಮಯ-ಪ್ರಾಣಮಯ-ಮನೋಮಯ-ವಿಜ್ಞಾನಮಯ-ಮಾನನ್ದಮಯ-ಮಾತ್ಮಾ ಮೇ॑ ಶುದ್ಧ್ಯ॒ನ್ತಾ॒-ಞ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥ 84 ॥
ಅನುವಾಕಂ 67
ಅ॒ಗ್ನಯೇ॒ ಸ್ವಾಹಾ᳚ । ವಿಶ್ವೇ᳚ಭ್ಯೋ ದೇ॒ವೇಭ್ಯ॒-ಸ್ಸ್ವಾಹಾ᳚ । ಧ್ರು॒ವಾಯ॑ ಭೂ॒ಮಾಯ॒ ಸ್ವಾಹಾ᳚ । ಧ್ರು॒ವ॒ಖ್ಷಿತ॑ಯೇ॒ ಸ್ವಾಹಾ᳚ । ಅ॒ಚ್ಯು॒ತ॒ಖ್ಷಿತ॑ಯೇ॒ ಸ್ವಾಹಾ᳚ । ಅ॒ಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹಾ᳚ ॥ ಧರ್ಮಾ॑ಯ॒ ಸ್ವಾಹಾ᳚ । ಅಧ॑ರ್ಮಾಯ॒ ಸ್ವಾಹಾ᳚ । ಅ॒ದ್ಭ್ಯ-ಸ್ಸ್ವಾಹಾ᳚ । ಓ॒ಷ॒ಧಿ॒ವ॒ನ॒ಸ್ಪ॒ತಿಭ್ಯ॒-ಸ್ಸ್ವಾಹಾ᳚ ॥ 85 ॥
ರ॒ಖ್ಷೋ॒ದೇ॒ವ॒ಜ॒ನೇಭ್ಯ॒-ಸ್ಸ್ವಾಹಾ᳚ ।
ಗೃಹ್ಯಾ᳚ಭ್ಯ॒-ಸ್ಸ್ವಾಹಾ᳚ । ಅ॒ವ॒ಸಾನೇ᳚ಭ್ಯ॒-ಸ್ಸ್ವಾಹಾ᳚ । ಅ॒ವ॒ಸಾನ॑ಪತಿಭ್ಯ॒-ಸ್ಸ್ವಾಹಾ᳚ ।
ಸ॒ರ್ವ॒ಭೂ॒ತೇಭ್ಯ॒-ಸ್ಸ್ವಾಹಾ᳚ । ಕಾಮಾ॑ಯ॒ ಸ್ವಾಹಾ᳚ । ಅ॒ನ್ತರಿ॑ಖ್ಷಾಯ॒ ಸ್ವಾಹಾ᳚ । ಯದೇಜ॑ತಿ॒ ಜಗ॑ತಿ॒ ಯಚ್ಚ॒ ಚೇಷ್ಟ॑ತಿ॒ ನಾಮ್ನೋ॑ ಭಾ॒ಗೋ-ಽಯ-ನ್ನಾಮ್ನೇ॒ ಸ್ವಾಹಾ᳚ ।
ಪೃ॒ಥಿ॒ವ್ಯೈ ಸ್ವಾಹಾ᳚ । ಅ॒ನ್ತರಿ॑ಖ್ಷಾಯ॒ ಸ್ವಾಹಾ᳚ ॥ 86 ॥
ದಿ॒ವೇ ಸ್ವಾಹಾ᳚ । ಸೂರ್ಯಾ॑ಯ॒ ಸ್ವಾಹಾ᳚ । ಚ॒ನ್ದ್ರಮ॑ಸೇ॒ ಸ್ವಾಹಾ᳚ । ನಖ್ಷ॑ತ್ರೇಭ್ಯ॒-ಸ್ಸ್ವಾಹಾ᳚ । ಇನ್ದ್ರಾ॑ಯ॒ ಸ್ವಾಹಾ᳚ । ಬೃಹ॒ಸ್ಪತ॑ಯೇ॒ ಸ್ವಾಹಾ᳚ । ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಬ್ರಹ್ಮ॑ಣೇ॒ ಸ್ವಾಹಾ᳚ । ಸ್ವ॒ಧಾ ಪಿ॒ತೃಭ್ಯ॒-ಸ್ಸ್ವಾಹಾ᳚ ।
ನಮೋ॑ ರು॒ದ್ರಾಯ॑ ಪಶು॒ಪತ॑ಯೇ॒ ಸ್ವಾಹಾ᳚ ॥ 87 ॥
ದೇ॒ವೇಭ್ಯ॒-ಸ್ಸ್ವಾಹಾ᳚ । ಪಿ॒ತೃಭ್ಯ॑-ಸ್ಸ್ವ॒ಧಾ-ಽಸ್ತು॑ । ಭೂ॒ತೇಭ್ಯೋ॒ ನಮಃ॑ । ಮ॒ನು॒ಷ್ಯೇ᳚ಭ್ಯೋ॒ ಹನ್ತಾ᳚ । ಪ್ರ॒ಜಾಪ॑ತಯೇ॒ ಸ್ವಾಹಾ᳚ । ಪ॒ರ॒ಮೇ॒ಷ್ಠಿನೇ॒ ಸ್ವಾಹಾ᳚ ॥
ಯಥಾ ಕೂ॑ಪ-ಶ್ಶ॒ತಧಾ॑ರ-ಸ್ಸ॒ಹಸ್ರ॑ಧಾರೋ॒ ಅಖ್ಷಿ॑ತಃ ।
ಏ॒ವಾ ಮೇ॑ ಅಸ್ತು ಧಾ॒ನ್ಯಗ್ಂ ಸ॒ಹಸ್ರ॑ಧಾರ॒-ಮಖ್ಷಿ॑ತಮ್ । ಧನ॑ಧಾನ್ಯೈ॒ ಸ್ವಾಹಾ᳚ ॥
ಯೇ ಭೂ॒ತಾಃ ಪ್ರ॒ಚರ॑ನ್ತಿ॒ ದಿವಾ॒ನಕ್ತ॒-ಮ್ಬಲಿ॑-ಮಿ॒ಚ್ಛನ್ತೋ॑ ವಿ॒ತುದ॑ಸ್ಯ॒ ಪ್ರೇಷ್ಯಾಃ᳚ । ತೇಭ್ಯೋ॑ ಬ॒ಲಿ-ಮ್ಪು॑ಷ್ಟಿ॒ಕಾಮೋ॑ ಹರಾಮಿ॒ ಮಯಿ॒ ಪುಷ್ಟಿ॒-ಮ್ಪುಷ್ಟಿ॑ಪತಿ-ರ್ದಧಾತು॒ ಸ್ವಾಹಾ᳚ ॥ 88 ॥
(ಓ॒ಷ॒ಧಿ॒ವ॒ನ॒ಸ್ಪ॒ತಿಭ್ಯ॒-ಸ್ಸ್ವಾಹಾ॒ - ಽನ್ತರಿ॑ಖ್ಷಾಯ॒ ಸ್ವಾಹಾ॒ - ನಮೋ॑ ರು॒ದ್ರಾಯ॑ ಪಶು॒ಪತ॑ಯೇ॒ ಸ್ವಾಹಾ॑ - ವಿ॒ತುದ॑ಸ್ಯ॒ ಪ್ರೇಷ್ಯಾ॒ ಏಕ॑-ಞ್ಚ) (ಅ. 67)
ಅನುವಾಕಂ 68
ಓ᳚-ನ್ತ-ದ್ಬ್ರ॒ಹ್ಮ । ಓ᳚-ನ್ತ-ದ್ವಾ॒ಯುಃ । ಓ᳚-ನ್ತದಾ॒ತ್ಮಾ । ಓ᳚-ನ್ತ-ಥ್ಸ॒ತ್ಯಮ್ । ಓ᳚-ನ್ತ-ಥ್ಸರ್ವ᳚ಮ್ । ಓ᳚-ನ್ತ-ತ್ಪುರೋ॒-ರ್ನಮಃ ।
ಅನ್ತಶ್ಚರತಿ॑ ಭೂತೇ॒ಷು॒ ಗುಹಾಯಾಂ-ವಿಁ॑ಶ್ವ ಮೂ॒ರ್ತಿಷು ।
ತ್ವಂ-ಯಁಜ್ಞಸ್ತ್ವಂ-ವಁಷಟ್ಕಾರಸ್ತ್ವ-ಮಿದ್ರಸ್ತ್ವಗ್ಂ ರುದ್ರಸ್ತ್ವಂವಿಁಷ್ಣುಸ್ತ್ವ-ಮ್ಬ್ರಹ್ಮತ್ವ॑-ಮ್ಪ್ರಜಾ॒ಪತಿಃ ।
ತ್ವ-ನ್ತ॑ದಾಪ॒ ಆಪೋ॒ ಜ್ಯೋತೀ॒ ರಸೋ॒-ಽಮೃತ॒-ಮ್ಬ್ರಹ್ಮ॒ ಭೂರ್ಭುವ॒ಸ್ಸುವ॒ರೋಮ್ ॥ 89 ॥
ಅನುವಾಕಂ 69
ಶ್ರ॒ದ್ಧಾಯಾ᳚-ಮ್ಪ್ರಾ॒ಣೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ ।
ಶ್ರ॒ದ್ಧಾಯಾ॑ಮಪಾ॒ನೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ ।
ಶ್ರ॒ದ್ಧಾಯಾಂ᳚-ವ್ಯಾಁ॒ನೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ ।
ಶ್ರ॒ದ್ಧಾಯಾ॑ಮುದಾ॒ನೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ ।
ಶ್ರ॒ದ್ಧಾಯಾಗ್ಂ॑ ಸಮಾ॒ನೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ ।
ಬ್ರಹ್ಮ॑ಣಿ ಮ ಆ॒ತ್ಮಾ-ಽಮೃ॑ತ॒ತ್ವಾಯ॑ ॥ ಅ॒ಮೃ॒ತೋ॒ಪ॒ಸ್ತರ॑ಣಮಸಿ ॥
ಶ್ರ॒ದ್ಧಾಯಾ᳚-ಮ್ಪ್ರಾ॒ಣೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ ।
ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ಪ್ರಾ॒ಣಾಯ॒ ಸ್ವಾಹಾ᳚ ।
ಶ್ರ॒ದ್ಧಾಯಾ॑ಮಪಾ॒ನೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ ।
ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ಅ॒ಪಾ॒ನಾಯ॒ ಸ್ವಾಹಾ᳚ ।
ಶ್ರ॒ದ್ಧಾಯಾಂ᳚-ವ್ಯಾಁ॒ನೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ । ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ವ್ಯಾ॒ನಾಯ॒ ಸ್ವಾಹಾ᳚ ।
ಶ್ರ॒ದ್ಧಾಯಾ॑-ಮುದಾ॒ನೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ ।
ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ಉ॒ದಾ॒ನಾಯ॒ ಸ್ವಾಹಾ᳚ ।
ಶ್ರ॒ದ್ಧಾಯಾಗ್ಂ॑ ಸಮಾ॒ನೇ ನಿವಿ॑ಷ್ಟೋ॒-ಽಮೃತ॑-ಞ್ಜುಹೋಮಿ । ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ಸ॒ಮಾ॒ನಾಯ॒ ಸ್ವಾಹಾ᳚ ।
ಬ್ರಹ್ಮ॑ಣಿ ಮ ಆ॒ತ್ಮಾ-ಽಮೃ॑ತ॒ತ್ವಾಯ॑ ॥ ಅ॒ಮೃ॒ತಾ॒ಪಿ॒ಧಾ॒ನಮ॑ಸಿ ॥ 90 ॥
ಅನುವಾಕಂ 70
ಶ್ರ॒ದ್ಧಾಯಾ᳚-ಮ್ಪ್ರಾ॒ಣೇ ನಿವಿ॑ಶ್ಯಾ॒-ಽಮೃತಗ್ಂ॑ ಹು॒ತಮ್ । ಪ್ರಾ॒ಣ ಮನ್ನೇ॑ನಾಪ್ಯಾಯಸ್ವ ।
ಶ್ರ॒ದ್ಧಾಯಾ॑ಮಪಾ॒ನೇ ನಿವಿ॑ಶ್ಯಾ॒-ಽಮೃತಗ್ಂ॑ ಹು॒ತಮ್ । ಅ॒ಪಾ॒ನ ಮನ್ನೇ॑ನಾಪ್ಯಾಯಸ್ವ ।
ಶ್ರ॒ದ್ಧಾಯಾಂ᳚-ವ್ಯಾಁ॒ನೇ ನಿವಿ॑ಶ್ಯಾ॒-ಽಮೃತಗ್ಂ॑ ಹು॒ತಮ್ । ವ್ಯಾ॒ನ ಮನ್ನೇ॑ನಾಪ್ಯಾಯಸ್ವ ।
ಶ್ರ॒ದ್ಧಾಯಾ॑-ಮುದಾ॒ನೇ ನಿವಿ॑ಶ್ಯಾ॒-ಽಮೃತಗ್ಂ॑ ಹು॒ತಮ್ । ಉ॒ದಾ॒ನ ಮನ್ನೇ॑ನಾಪ್ಯಾಯಸ್ವ ।
ಶ್ರ॒ದ್ಧಾಯಾಗ್ಂ॑ ಸಮಾ॒ನೇ ನಿವಿ॑ಶ್ಯಾ॒-ಽಮೃತಗ್ಂ॑ ಹು॒ತಮ್ ।
ಸ॒ಮಾನ॒ ಮನ್ನೇ॑ನಾಪ್ಯಾಯಸ್ವ ॥ 91 ॥
ಅನುವಾಕಂ 71
ಅಙ್ಗುಷ್ಠಮಾತ್ರಃ ಪುರುಷೋ-ಽಙ್ಗುಷ್ಠಞ್ಚ॑ ಸಮಾ॒ಶ್ರಿತಃ ।
ಈಶ-ಸ್ಸರ್ವಸ್ಯ ಜಗತಃ ಪ್ರಭುಃ ಪ್ರೀಣಾತಿ॑ ವಿಶ್ವ॒ಭುಕ್ ॥ 92 ॥
ಅನುವಾಕಂ 72
ವಾಮ್ಮ॑ ಆ॒ಸನ್ನ್ । ನ॒ಸೋಃ ಪ್ರಾ॒ಣಃ । ಅ॒ಖ್ಷ್ಯೋ-ಶ್ಚಖ್ಷುಃ॑ । ಕರ್ಣ॑ಯೋ॒-ಶ್ಶ್ರೋತ್ರ᳚ಮ್ । ಬಾ॒ಹು॒ವೋ-ರ್ಬಲ᳚ಮ್ । ಊ॒ರು॒ವೋ ರೋಜಃ॑ । ಅರಿ॑ಷ್ಟಾ॒ ವಿಶ್ವಾ॒ನ್ಯಙ್ಗಾ॑ನಿ ತ॒ನೂಃ ।
ತ॒ನುವಾ॑ ಮೇ ಸ॒ಹ ನಮ॑ಸ್ತೇ ಅಸ್ತು॒ ಮಾ ಮಾ॑ ಹಿಗ್ಂಸೀಃ ॥ 93 ॥
ಅನುವಾಕಂ 73
ವಯ॑-ಸ್ಸುಪ॒ರ್ಣಾ ಉಪ॑ಸೇದು॒ರಿನ್ದ್ರ॑-ಮ್ಪ್ರಿ॒ಯ ಮೇ॑ಧಾ॒ ಋಷ॑ಯೋ॒ ನಾಧ॑ಮಾನಾಃ । ಅಪ॑ದ್ಧ್ವಾ॒ನ್ತ ಮೂ᳚ರ್ಣು॒ಹಿ ಪೂ॒ರ್ಧಿ ಚಖ್ಷು॑-ರ್ಮುಮು॒ಗ್ಧ್ಯ॑ಸ್ಮಾ-ನ್ನಿ॒ಧಯೇ॑ ಽವಬ॒ದ್ಧಾನ್ ॥ 94 ॥
ಅನುವಾಕಂ 74
ಪ್ರಾಣಾನಾ-ಙ್ಗ್ರನ್ಥಿರಸಿ ರುದ್ರೋ ಮಾ॑ ವಿಶಾ॒ನ್ತಕಃ ।
ತೇನಾನ್ನೇನಾ᳚-ಪ್ಯಾಯ॒ಸ್ವ ॥ 95 ॥
ಅನುವಾಕಂ 75
ನಮೋ ರುದ್ರಾಯ ವಿಷ್ಣವೇ ಮೃತ್ಯು॑ರ್ಮೇ ಪಾ॒ಹಿ ॥ 96 ॥
ಅನುವಾಕಂ 76
ತ್ವಮ॑ಗ್ನೇ॒ ದ್ಯುಭಿ॒-ಸ್ತ್ವಮಾ॑ಶು-ಶು॒ಖ್ಷಣಿ॒-ಸ್ತ್ವಮ॒ದ್ಭ್ಯ-ಸ್ತ್ವಮಶ್ಮ॑ನ॒ಸ್ಪರಿ॑ । ತ್ವಂ-ವಁನೇ᳚ಭ್ಯ॒-ಸ್ತ್ವಮೋಷ॑ಧೀಭ್ಯ॒-ಸ್ತ್ವ-ನ್ನೃ॒ಣಾ-ನ್ನೃ॑ಪತೇ ಜಾಯಸೇ॒ ಶುಚಿಃ॑ ॥ 97 ॥
ಅನುವಾಕಂ 77
ಶಿ॒ವೇನ॑ ಮೇ॒ ಸನ್ತಿ॑ಷ್ಠಸ್ವ ಸ್ಯೋ॒ನೇನ॑ ಮೇ॒ ಸನ್ತಿ॑ಷ್ಠಸ್ವ ಸುಭೂ॒ತೇನ॑ ಮೇ॒ ಸನ್ತಿ॑ಷ್ಠಸ್ವ ಬ್ರಹ್ಮವರ್ಚ॒ಸೇನ॑ ಮೇ॒ ಸನ್ತಿ॑ಷ್ಠಸ್ವ ಯ॒ಜ್ಞಸ್ಯರ್ಧಿ॒ ಮನು॒ ಸನ್ತಿ॑ಷ್ಠ॒ ಸ್ವೋಪ॑ ತೇ ಯಜ್ಞ॒ ನಮ॒ ಉಪ॑ ತೇ॒ ನಮ॒ ಉಪ॑ ತೇ॒ ನಮಃ॑ ॥ 98 ॥
ಅನುವಾಕಂ 78
ಸ॒ತ್ಯ-ಮ್ಪರ॒-ಮ್ಪರಗ್ಂ॑ ಸ॒ತ್ಯಗ್ಂ ಸ॒ತ್ಯೇನ॒ ನ ಸು॑ವ॒ರ್ಗಾ-ಲ್ಲೋ॒ಕಾಚ್ಚ್ಯ॑ವನ್ತೇ
ಕ॒ದಾಚ॒ನ ಸ॒ತಾಗ್ಂ ಹಿ ಸ॒ತ್ಯ-ನ್ತಸ್ಮಾ᳚-ಥ್ಸ॒ತ್ಯೇ ರ॑ಮನ್ತೇ॒, (1)
ತಪ॒ ಇತಿ॒ ತಪೋ॒ ನಾನಶ॑ನಾ॒-ತ್ಪರಂ॒-ಯಁದ್ಧಿ ಪರ॒-ನ್ತಪ॒ಸ್ತ-ದ್ದುಧ॑ರ್ಷಂ॒
ತ-ದ್ದುರಾ॑ಧರ್ಷ॒-ನ್ತಸ್ಮಾ॒-ತ್ತಪ॑ಸಿ ರಮನ್ತೇ॒, (2)
ದಮ॒ ಇತಿ॒ ನಿಯ॑ತ-ಮ್ಬ್ರಹ್ಮಚಾ॒ರಿಣ॒-ಸ್ತಸ್ಮಾ॒-ದ್ದಮೇ॑ ರಮನ್ತೇ॒, (3)
ಶಮ॒ ಇತ್ಯರ॑ಣ್ಯೇ ಮು॒ನಯ॒-ಸ್ತಸ್ಮಾ॒ಚ್ಛಮೇ॑ ರಮನ್ತೇ, (4)
ದಾ॒ನಮಿತಿ॒ ಸರ್ವಾ॑ಣಿ ಭೂ॒ತಾನಿ॑ ಪ್ರ॒ಶಗ್ಂಸ॑ನ್ತಿ ದಾ॒ನಾನ್ನಾತಿ॑ ದು॒ಶ್ಚರ॒-ನ್ತಸ್ಮಾ᳚-ದ್ದಾ॒ನೇ ರ॑ಮನ್ತೇ, (5)
ಧ॒ರ್ಮ ಇತಿ॒ ಧರ್ಮೇ॑ಣ॒ ಸರ್ವ॑ಮಿ॒ದ-ಮ್ಪರಿ॑ಗೃಹೀತ-ನ್ಧ॒ರ್ಮಾನ್ನಾತಿ॑-ದು॒ಷ್ಕರಂ॒
ತಸ್ಮಾ᳚--ದ್ಧ॒ರ್ಮೇ ರ॑ಮನ್ತೇ, (6)
ಪ್ರ॒ಜನ॒ ಇತಿ॒ ಭೂಯಾಗ್ಂ॑॑ಸ॒-ಸ್ತಸ್ಮಾ॒-ದ್ಭೂಯಿ॑ಷ್ಠಾಃ॒ ಪ್ರಜಾ॑ಯನ್ತೇ॒ ತಸ್ಮಾ॒-ದ್ಭೂಯಿ॑ಷ್ಠಾಃ ಪ್ರ॒ಜನ॑ನೇ ರಮನ್ತೇ॒, (7)
-ಽಗ್ನಯ॒ ಇತ್ಯಾ॑ಹ॒ ತಸ್ಮಾ॑-ದ॒ಗ್ನಯ॒ ಆಧಾ॑ತವ್ಯಾ ಅಗ್ನಿಹೋ॒ತ್ರ-ಮಿತ್ಯಾ॑ಹ॒ ತಸ್ಮಾ॑-ದಗ್ನಿಹೋ॒ತ್ರೇ ರ॑ಮನ್ತೇ, (8)
ಯ॒ಜ್ಞ ಇತಿ॑ ಯ॒ಜ್ಞೋ ಹಿ ದೇ॒ವಾ ಸ್ತಸ್ಮಾ᳚-ದ್ಯ॒ಜ್ಞೇ ರ॑ಮನ್ತೇ, (9)
ಮಾನ॒ಸ-ಮಿತಿ॑ ವಿ॒ದ್ವಾಗ್ಂಸ॒-ಸ್ತಸ್ಮಾ᳚-ದ್ವಿ॒ದ್ವಾಗ್ಂಸ॑ ಏ॒ವ ಮಾ॑ನ॒ಸೇ
ರ॑ಮನ್ತೇ, (10)
ನ್ಯಾ॒ಸ ಇತಿ॑ ಬ್ರ॒ಹ್ಮಾ ಬ್ರ॒ಹ್ಮಾ ಹಿ ಪರಃ॒ ಪರೋ॑ ಹಿ ಬ್ರ॒ಹ್ಮಾ ತಾನಿ॒ ವಾ ಏ॒ತಾನ್ಯವ॑ರಾಣಿ॒
ಪರಾಗ್ಂ॑ಸಿ ನ್ಯಾ॒ಸ ಏ॒ವಾತ್ಯ॑ರೇಚಯ॒-ದ್ಯ ಏ॒ವಂ-ವೇಁದೇ᳚ತ್ಯುಪ॒ನಿಷತ್ ॥ 99 ॥
ಅನುವಾಕಂ 79
ಪ್ರಾ॒ಜಾ॒ಪ॒ತ್ಯೋ ಹಾರು॑ಣಿ-ಸ್ಸುಪ॒ರ್ಣೇಯಃ॑ ಪ್ರ॒ಜಾಪ॑ತಿ-ಮ್ಪಿ॒ತರ॒-ಮುಪ॑ಸಸಾರ॒ ಕಿ-ಮ್ಭ॑ಗವ॒ನ್ತಃ ಪ॑ರ॒ಮಂ-ವಁ॑ದ॒ನ್ತೀತಿ॒ ತಸ್ಮೈ॒ ಪ್ರೋ॑ವಾಚ, (1)
ಸ॒ತ್ಯೇನ॑ ವಾ॒ಯುರಾವಾ॑ತಿ ಸ॒ತ್ಯೇ-ನಾ॑ದಿ॒ತ್ಯೋ ರೋ॑ಚತೇ ದಿ॒ವಿ ಸ॒ತ್ಯಂ-ವಾಁ॒ಚಃ ಪ್ರ॑ತಿ॒ಷ್ಠಾ ಸ॒ತ್ಯೇ ಸ॒ರ್ವ-ಮ್ಪ್ರತಿ॑ಷ್ಠಿತ॒-ನ್ತಸ್ಮಾ᳚-ಥ್ಸ॒ತ್ಯ-ಮ್ಪ॑ರ॒ಮಂ-ವಁದ॑ನ್ತಿ॒, (2)
ತಪ॑ಸಾ ದೇ॒ವಾ ದೇ॒ವತಾ॒-ಮಗ್ರ॑ ಆಯ॒-ನ್ತಪ॒ಸರ್ಷ॑ಯ॒-ಸ್ಸುವ॒ರನ್ವ॑-ವಿನ್ದ॒-ನ್ತಪ॑ಸಾ ಸ॒ಪತ್ನಾ॒-ನ್ಪ್ರಣು॑ದಾ॒-ಮಾರಾ॑ತೀ॒ ಸ್ತಪ॑ಸಿ ಸ॒ರ್ವ-ಮ್ಪ್ರತಿ॑ಷ್ಠಿತ॒-ನ್ತಸ್ಮಾ॒-ತ್ತಪಃ॑ ಪರ॒ಮಂ-ವಁದ॑ನ್ತಿ॒, (3)
ದಮೇ॑ನ ದಾ॒ನ್ತಾಃ ಕಿ॒ಲ್ಬಿಷ॑-ಮವಧೂ॒ನ್ವನ್ತಿ॒ ದಮೇ॑ನ ಬ್ರಹ್ಮಚಾ॒ರಿಣ॒-ಸ್ಸುವ॑ರಗಚ್ಛ॒-ನ್ದಮೋ॑ ಭೂ॒ತಾನಾ᳚-ನ್ದುರಾ॒ಧರ್ಷ॒-ನ್ದಮೇ॑ ಸ॒ರ್ವ-ಮ್ಪ್ರತಿ॑ಷ್ಠಿತ॒-ನ್ತಸ್ಮಾ॒-ದ್ದಮಃ॑ ಪರ॒ಮಂ-ವಁದ॑ನ್ತಿ॒, (4)
ಶಮೇ॑ನ ಶಾ॒ನ್ತಾ-ಶ್ಶಿ॒ವ-ಮಾ॒ಚರ॑ನ್ತಿ॒ ಶಮೇ॑ನ ನಾ॒ಕ-ಮ್ಮು॒ನಯೋ॒-ಽನ್ವವಿ॑ನ್ದ॒ನ್ ಛಮೋ॑ ಭೂ॒ತಾನಾ᳚-ನ್ದುರಾ॒ಧರ್ಷ॒-ಞ್ಛಮೇ॑ ಸ॒ರ್ವ-ಮ್ಪ್ರತಿ॑ಷ್ಠಿತ॒-ನ್ತಸ್ಮಾ॒ಚ್ಛಮಃ॑ ಪರ॒ಮಂ-ವಁದ॑ನ್ತಿ, (5)
ದಾ॒ನಂ-ಯಁ॒ಜ್ಞಾನಾಂ॒-ವಁರೂ॑ಥ॒-ನ್ದಖ್ಷಿ॑ಣಾ ಲೋ॒ಕೇ ದಾ॒ತಾರಗ್ಂ॑ ಸರ್ವ ಭೂ॒ತಾನ್ಯು॑ಪಜೀ॒ವನ್ತಿ॑ ದಾ॒ನೇನಾರಾ॑ತೀ॒-ರಪಾ॑ನುದನ್ತ ದಾ॒ನೇನ॑ ದ್ವಿಷ॒ನ್ತೋ ಮಿ॒ತ್ರಾ ಭ॑ವನ್ತಿ ದಾ॒ನೇ ಸ॒ರ್ವ-ಮ್ಪ್ರತಿ॑ಷ್ಠಿತ॒-ನ್ತಸ್ಮಾ᳚-ದ್ದಾ॒ನ-ಮ್ಪ॑ರ॒ಮಂ-ವಁದ॑ನ್ತಿ, (6)
ಧ॒ರ್ಮೋ ವಿಶ್ವ॑ಸ್ಯ॒ ಜಗ॑ತಃ ಪ್ರತಿ॒ಷ್ಠಾ ಲೋ॒ಕೇ ಧ॒ರ್ಮಿಷ್ಠ॑-ಮ್ಪ್ರ॒ಜಾ ಉ॑ಪಸ॒ರ್ಪನ್ತಿ॑ ಧ॒ರ್ಮೇಣ॑ ಪಾ॒ಪ-ಮ॑ಪ॒ನುದ॑ತಿ ಧ॒ರ್ಮೇ ಸ॒ರ್ವ-ಮ್ಪ್ರತಿ॑ಷ್ಠಿತ॒-ನ್ತಸ್ಮಾ᳚-ದ್ಧ॒ರ್ಮ-ಮ್ಪ॑ರ॒ಮಂ-ವಁದ॑ನ್ತಿ, (7)
ಪ್ರ॒ಜನ॑ನಂ॒-ವೈಁ ಪ್ರ॑ತಿ॒ಷ್ಠಾ ಲೋ॒ಕೇ ಸಾ॒ಧು ಪ್ರ॒ಜಾಯಾ᳚ ಸ್ತ॒ನ್ತುನ್-ತ॑ನ್ವಾ॒ನಃ ಪಿ॑ತೃ॒ಣಾ
ಮ॑ನೃ॒ಣೋ ಭವ॑ತಿ॒ ತದೇ॑ವ ತ॒ಸ್ಯಾ ಅನೃ॑ಣ॒-ನ್ತಸ್ಮಾ᳚-ತ್ಪ್ರ॒ಜನ॑ನ-ಮ್ಪರ॒ಮಂ-ವಁದ॑ನ್ತ್ಯ॒, (8)
ಗ್ನಯೋ॒ ವೈ ತ್ರಯೀ॑ ವಿ॒ದ್ಯಾ ದೇ॑ವ॒ಯಾನಃ॒ ಪನ್ಥಾ॑ ಗಾರ್ಹಪ॒ತ್ಯ ಋಕ್-ಪೃ॑ಥಿ॒ವೀ ರ॑ಥನ್ತ॒ರ -ಮ॑ನ್ವಾಹಾ-ರ್ಯ॒ಪಚ॑ನಂ॒-ಯಁಜು॑ರ॒ನ್ತರಿ॑ಖ್ಷಂ-ವಾಁಮದೇ॒ವ್ಯ ಮಾ॑ಹವ॒ನೀಯ॒-ಸ್ಸಾಮ॑ಸುವ॒ರ್ಗೋ ಲೋ॒ಕೋ ಬೃ॒ಹತ್-ತಸ್ಮಾ॑-ದ॒ಗ್ನೀ-ನ್ಪ॑ರ॒ಮಂ-ವಁದ॑ನ್ತ್ಯ, (9)
ಗ್ನಿಹೋ॒ತ್ರಗ್ಂ ಸಾ॑ಯ-ಮ್ಪ್ರಾ॒ತ-ರ್ಗೃ॒ಹಾಣಾಂ॒-ನಿಷ್ಕೃ॑ತಿ॒-ಸ್ಸ್ವಿ॑ಷ್ಟಗ್ಂ ಸುಹು॒ತಂ-ಯಁ॑ಜ್ಞಕ್ರತೂ॒ನಾ-ಮ್ಪ್ರಾಯ॑ಣಗ್ಂ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಜ್ಯೋತಿ॒-ಸ್ತಸ್ಮಾ॑-ದಗ್ನಿಹೋ॒ತ್ರ-ಮ್ಪ॑ರ॒ಮಂ-ವಁದ॑ನ್ತಿ, (10)
ಯ॒ಜ್ಞ ಇತಿ॑ ಯ॒ಜ್ಞೇನ॒ ಹಿ ದೇ॒ವಾ ದಿವ॑-ಙ್ಗ॒ತಾ ಯ॒ಜ್ಞೇನಾಸು॑ರಾ॒-ನಪಾ॑ನುದನ್ತ ಯ॒ಜ್ಞೇನ॑ ದ್ವಿಷ॒ನ್ತೋ ಮಿ॒ತ್ರಾ ಭ॑ವನ್ತಿ ಯ॒ಜ್ಞೇ ಸ॒ರ್ವ-ಮ್ಪ್ರತಿ॑ಷ್ಠಿತ॒-ನ್ತಸ್ಮಾ᳚-ದ್ಯ॒ಜ್ಞ-ಮ್ಪ॑ರ॒ಮಂ-ವಁದ॑ನ್ತಿ, (11)
ಮಾನ॒ಸಂ-ವೈಁ ಪ್ರಾ॑ಜಾಪ॒ತ್ಯ-ಮ್ಪ॒ವಿತ್ರ॑-ಮ್ಮಾನ॒ಸೇನ॒ ಮನ॑ಸಾ ಸಾ॒ಧು ಪ॑ಶ್ಯತಿ ಮಾನ॒ಸಾ ಋಷ॑ಯಃ ಪ್ರ॒ಜಾ ಅ॑ಸೃಜನ್ತ ಮಾನ॒ಸೇ ಸ॒ರ್ವ-ಮ್ಪ್ರತಿ॑ಷ್ಠಿತ॒-ನ್ತಸ್ಮಾ᳚-ನ್ಮಾನ॒ಸ-ಮ್ಪ॑ರ॒ಮಂ-ವಁದ॑ನ್ತಿ, (12)
ನ್ಯಾ॒ಸ ಇ॒ತ್ಯಾಹು॑-ರ್ಮನೀ॒ಷಿಣೋ᳚ ಬ್ರ॒ಹ್ಮಾಣ॑-ಮ್ಬ್ರ॒ಹ್ಮಾ ವಿಶ್ವಃ॑ ಕತ॒ಮ-ಸ್ಸ್ವ॑ಯ॒ಭುಂಃ ಪ್ರ॒ಜಾಪ॑ತಿ-ಸ್ಸಂವಁಥ್ಸರ॒ ಇತಿ॑, (13)
ಸಂವಁಥ್ಸ॒ರೋ॑ ಽಸಾವಾ॑ದಿ॒ತ್ಯೋ ಯ ಏ॒ಷ ಆ॑ದಿ॒ತ್ಯೇ ಪುರು॑ಷ॒-ಸ್ಸ ಪ॑ರಮೇ॒ಷ್ಠೀ ಬ್ರಹ್ಮಾ॒ತ್ಮಾ, (14)
ಯಾಭಿ॑ರಾದಿ॒ತ್ಯ-ಸ್ತಪ॑ತಿ ರ॒ಶ್ಮಿಭಿ॒ಸ್ತಾಭಿಃ॑ ಪ॒ರ್ಜನ್ಯೋ॑ ವರ್ಷತಿ ಪ॒ರ್ಜನ್ಯೇ॑-ನೌಷಧಿ-ವನಸ್ಪ॒ತಯಃ॒ ಪ್ರಜಾ॑ಯನ್ತ ಓಷಧಿ-ವನಸ್ಪ॒ತಿಭಿ॒-ರನ್ನ॑-ಮ್ಭವ॒ತ್ಯನ್ನೇ॑ನ ಪ್ರಾ॒ಣಾಃ ಪ್ರಾ॒ಣೈ-ರ್ಬಲ॒-ಮ್ಬಲೇ॑ನ॒ ತಪ॒-ಸ್ತಪ॑ಸಾ ಶ್ರ॒ದ್ಧಾ ಶ್ರ॒ದ್ಧಯಾ॑ ಮೇ॒ಧಾ ಮೇ॒ಧಯಾ॑ ಮನೀ॒ಷಾ ಮ॑ನೀ॒ಷಯಾ॒ ಮನೋ॒ ಮನ॑ಸಾ॒ ಶಾನ್ತಿ॒-ಶ್ಶಾನ್ತ್ಯಾ॑ ಚಿ॒ತ್ತ-ಞ್ಚಿ॒ತ್ತೇನ॒ ಸ್ಮೃತಿ॒ಗ್ಗ್॒ ಸ್ಮೃತ್ಯಾ॒ ಸ್ಮಾರ॒ಗ್ಗ್॒ ಸ್ಮಾರೇ॑ಣ ವಿ॒ಜ್ಞಾನಂ॑-ವಿಁ॒ಜ್ಞಾನೇ॑-ನಾ॒ತ್ಮಾನಂ॑-ವೇಁದಯತಿ॒ ತಸ್ಮಾ॑ದ॒ನ್ನ-ನ್ದದ॒ನ್-ಥ್ಸರ್ವಾ᳚ಣ್ಯೇ॒ತಾನಿ॑ ದದಾ॒-ತ್ಯನ್ನಾ᳚-ತ್ಪ್ರಾ॒ಣಾ ಭ॑ವನ್ತಿ ಭೂ॒ತಾನಾ᳚-ಮ್ಪ್ರಾ॒ಣೈ-ರ್ಮನೋ॒ ಮನ॑ಸಶ್ಚ ವಿ॒ಜ್ಞಾನಂ॑-ವಿಁ॒ಜ್ಞಾನಾ॑-ದಾನ॒ನ್ದೋ ಬ್ರ॑ಹ್ಮ ಯೋ॒ನಿಃ, (15)
ಸ ವಾ ಏ॒ಷ ಪುರು॑ಷಃ ಪಞ್ಚ॒ಧಾ ಪ॑ಞ್ಚಾ॒ತ್ಮಾ ಯೇನ॒ ಸರ್ವ॑ಮಿ॒ದ-ಮ್ಪ್ರೋತ॑-ಮ್ಪೃಥಿ॒ವೀ ಚಾ॒ನ್ತರಿ॑ಖ್ಷ-ಞ್ಚ॒ ದ್ಯೌಶ್ಚ॒ ದಿಶ॑ಶ್ಚಾವಾನ್ತರದಿ॒ಶಾಶ್ಚ॒ ಸ ವೈ ಸರ್ವ॑ಮಿ॒ದ-ಞ್ಜಗ॒ಥ್ಸ ಸ॒ಭೂತಗ್ಂ॑ ಸ ಭ॒ವ್ಯ-ಞ್ಜಿ॑ಜ್ಞಾಸ ಕ್ಲೃ॒ಪ್ತ ಋ॑ತ॒ಜಾ ರಯಿ॑ಷ್ಠಾ ಶ್ರ॒ದ್ಧಾ ಸ॒ತ್ಯೋ ಮಹ॑ಸ್ವಾ-ನ್ತ॒ಪಸೋ॒ ಪರಿ॑ಷ್ಠಾ॒ದ್, (ವರಿ॑ಷ್ಠಾ॒ದ್) (16)
ಜ್ಞಾತ್ವಾ॑ ತಮೇ॒ವ-ಮ್ಮನ॑ಸಾ ಹೃ॒ದಾ ಚ॒ ಭೂಯೋ॑ ನ ಮೃ॒ತ್ಯು-ಮುಪ॑ಯಾಹಿ ವಿ॒ದ್ವಾನ್ (17)
ತಸ್ಮಾ᳚-ನ್ನ್ಯಾ॒ಸ-ಮೇ॒ಷಾ-ನ್ತಪ॑ಸಾ-ಮತಿರಿಕ್ತ॒ಮಾಹು॑ರ್, (18)
ವಸುರ॒ಣ್ವೋ॑ ವಿ॒ಭೂರ॑ಸಿ ಪ್ರಾ॒ಣೇ ತ್ವಮಸಿ॑ ಸನ್ಧಾ॒ತಾ ಬ್ರಹ್ಮ॑-ನ್ತ್ವಮಸಿ॑ ವಿಶ್ವ॒ಧೃತ್ತೇ॑-ಜೋ॒ದಾಸ್ ತ್ವಮ॑ಸ್ಯ॒ಗ್ನಿ-ರ॑ಸಿ ವರ್ಚೋ॒ದಾ-ಸ್ತ್ವಮ॑ಸಿ॒ ಸೂರ್ಯ॑ಸ್ಯ ದ್ಯುಮ್ನೋ॒ದಾ ಸ್ತ್ವಮ॑ಸಿ ಚ॒ನ್ದ್ರಮ॑ಸ ಉಪಯಾ॒ಮಗೃ॑ಹೀತೋ-ಽಸಿ ಬ್ರ॒ಹ್ಮಣೇ᳚
ತ್ವಾ॒ ಮಹಸ॒, (19)
ಓಮಿತ್ಯಾ॒ತ್ಮಾನಂ॑-ಯುಁಞ್ಜೀತೈ॒ತದ್ವೈ ಮ॑ಹೋಪ॒ನಿಷ॑ದ-ನ್ದೇ॒ವಾನಾ॒-ಙ್ಗುಹ್ಯಂ॒-ಯಁ ಏ॒ವಂ-ವೇಁದ॑
ಬ್ರ॒ಹ್ಮಣೋ॑ ಮಹಿ॒ಮಾನ॑-ಮಾಪ್ನೋತಿ॒ ತಸ್ಮಾ᳚-ದ್ಬ್ರ॒ಹ್ಮಣೋ॑ ಮಹಿ॒ಮಾನ॑-ಮಿತ್ಯುಪ॒ನಿಷತ್ ॥ 100 ॥
ಅನುವಾಕಂ 80
ತಸ್ಯೈ॒ವಂ-ವಿಁ॒ದುಷೋ॑ ಯ॒ಜ್ಞಸ್ಯಾ॒ತ್ಮಾ ಯಜ॑ಮಾನಃ-ಶ್ರ॒ಧ್ದಾಪತ್ನೀ॒ ಶರೀ॑ರ-ಮಿ॒ದ್ಧ್ಮಮುರೋ॒ ವೇದಿ॒-ರ್ಲೋಮಾ॑ನಿ ಬ॒ರ॒ಃಇ-ರ್ವೇ॒ದಃ-ಶಿಖಾ॒ ಹೃದ॑ಯಂ॒-ಯೂಁಪಃ॒ ಕಾಮ॒ ಆಜ್ಯ॑-ಮ್ಮ॒ನ್ಯುಃ ಪ॒ಶು-ಸ್ತಪೋ॒-ಽಗ್ನಿ-ರ್ದಮ॑-ಶ್ಶಮಯಿ॒ತಾ ದಖ್ಷಿ॑ಣಾ॒-ವಾಘೋತಾ᳚ ಪ್ರಾ॒ಣ ಉ॑ದ್ಗ॒ತಾ ಚಖ್ಷು॑ರಧ್ವ॒ರ್ಯು-ರ್ಮನೋ॒ ಬ್ರಹ್ಮಾ॒ ಶ್ರೋತ್ರ॑ಮ॒ಗ್ನೀ-
ಧ್ಯಾವ॒ಧ್ದ್ರಿಯ॑ತೇ॒ ಸಾ ದೀ॒ಖ್ಷಾ ಯದಶ್ರ್ನಾ॑ತಿ॒ ತಧ್ದವಿ॒-ರ್ಯತ್ಪಿಬ॑ತಿ॒ ತದ॑ಸ್ಯ ಸೋಮಪಾ॒ನಂ-ಯಁದ್ರಮ॑ತೇ॒ ತದು॑ಪ॒ಸದೋ॒ ಯ-ಥ್ಸ॒ಞ್ಚರ॑-ತ್ಯುಪ॒ವಿಶ॑-ತ್ಯು॒ತ್ತಿಷ್ಠ॑ತೇ ಚ॒ ಸಪ್ರ॑ವ॒ರ್ಗ್ಯೋ॑ ಯನ್ಮುಖ॒-ನ್ತದಾ॑ಹವ॒ನೀಯೋ॒ ಯಾ ವ್ಯಾಹೃ॑ತಿ-ರಾಹು॒ತಿ-ರ್ಯದ॑ಸ್ಯ ವಿ॒ಜ್ಞಾನ॒-ನ್ತಜ್ಜು॒ಹೋತಿ॒ ಯಥ್ಸಾ॒ಯ-ಮ್ಪ್ರಾ॒ತರ॑ತ್ತಿ॒ ತಥ್ಸ॒ಮಿಧಂ॒-ಯಁತ್ಪ್ರಾ॒ತ-ರ್ಮ॒ದ್ಧ್ಯನ್ದಿ॑ನಗ್ಂ ಸಾ॒ಯ-ಞ್ಚ॒ ತಾನಿ॒ ಸವ॑ನಾನಿ॒
ಯೇ ಅ॑ಹೋರಾ॒ತ್ರೇ ತೇ ದ॑ರ್ಶಪೂರ್ಣಮಾ॒ಸೌ ಯೇ᳚-ಽರ್ಧಮಾ॒ಸಾಶ್ಚ॒ ಮಾಸಾ᳚ಶ್ಚ॒ ತೇ ಚಾ॑ತುರ್ಮಾ॒ಸ್ಯಾನಿ॒ ಯ ಋ॒ತವ॒ಸ್ತೇ ಪ॑ಶುಬ॒ನ್ಧಾ ಯೇ ಸಂ॑ವಁಥ್ಸ॒ರಾಶ್ಚ॑ ಪರಿವಥ್ಸ॒ರಾಶ್ಚ॒ ತೇ-ಽಹ॑ರ್ಗ॒ಣಾ-ಸ್ಸ॑ರ್ವ ವೇದ॒ಸಂ-ವಾಁ ಏ॒ತ-ಥ್ಸ॒ತ್ರಂ-ಯಁನ್ಮರ॑ಣ॒-ನ್ತದ॑ವ॒ಭೃಥ॑
ಏ॒ತದ್ವೈ ಜ॑ರಾಮರ್ಯ-ಮಗ್ನಿಹೋ॒ತ್ರಗ್ಂ ಸ॒ತ್ರಂ-ಯಁ ಏ॒ವಂ-ವಿಁ॒ದ್ವಾ-ನು॑ದ॒ಗಯ॑ನೇ ಪ್ರ॒ಮೀಯ॑ತೇ ದೇ॒ವಾನಾ॑ಮೇ॒ವ ಮ॑ಹಿ॒ಮಾನ॑-ಙ್ಗ॒ತ್ವಾ-ಽಽದಿ॒ತ್ಯಸ್ಯ॒ ಸಾಯು॑ಜ್ಯ-ಙ್ಗಚ್ಛ॒ತ್ಯಥ॒ ಯೋ ದ॑ಖ್ಷಿ॒ಣೇ ಪ್ರ॒ಮೀಯ॑ತೇ ಪಿತೃ॒ಣಾ-ಮೇ॒ವ ಮ॑ಹಿ॒ಮಾನ॑-ಙ್ಗ॒ತ್ವಾ ಚ॒ನ್ದ್ರಮ॑ಸ॒-ಸ್ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋತ್ಯೇ॒ತೌ ವೈ ಸೂ᳚ರ್ಯಾ ಚನ್ದ್ರ॒ಮಸೌ᳚-ರ್ಮಹಿ॒ಮಾನೌ᳚ ಬ್ರಾಹ್ಮ॒ಣೋ ವಿ॒ದ್ವಾ-ನ॒ಭಿಜ॑ಯತಿ॒ ತಸ್ಮಾ᳚-ದ್ಬ್ರ॒ಹ್ಮಣೋ॑ ಮಹಿ॒ಮಾನ॑ಮಾಪ್ನೋತಿ॒ ತಸ್ಮಾ᳚-ದ್ಬ್ರ॒ಹ್ಮಣೋ॑ ಮಹಿ॒ಮಾನ॑-ಮಿತ್ಯುಪ॒ನಿಷತ್ ॥ 101 ॥
ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ ।
ತೇ॒ಜ॒ಸ್ವಿನಾ॒ ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ॥
ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥
॥ ಇತಿ ಮಹಾನಾರಾಯಣೋಪನಿಷ-ಥ್ಸಮಾಪ್ತಾ ॥
(ಅಮ್ಭ॒ಸ್ಯೈಕ॑ಪಞ್ಚಾ॒ಶಚ್ಛ॒ತಂ - ಜಾ॒ತವೇ॑ದಸೇ॒ ಚತು॑ರ್ದಶ॒ - ಭೂರನ್ನಂ॒ - ಭೂರ॒ಗ್ನಯೇ॒ - ಭೂರ॒ಗ್ನಯೇ॒ ಚೈಕ॑ಮೇಕಂ - ಪಾಹಿ - ಪಾ॒ಹಿ ಚ॒ತ್ವಾರಿ॑ ಚತ್ವಾರಿ॒ - ಯಶ್ಛನ್ದ॑ಸಾ॒-ನ್ದ್ವೇ - ನಮೋ॒ ಬ್ರಹ್ಮ॑ಣೇ - ಋ॒ತ-ನ್ತಪೋ॒ - ಯಥಾ॑ ವೃ॒ಖ್ಷಸ್ಯೈಕ॑ ಮೇಕ - ಮ॒ಣೋರಣೀ॑ಯಾ॒ಗ್॒ ಶ್ಚತು॑ಸ್ತ್ರಿಗ್ಂಶಥ್ - ಸಹಸ್ರ॒ಶೀ॑ಷ॒ಗ್ಂ॒ ಷಟ್ವಿ॑ಗ್ಂಶತಿ - ರಾದಿ॒ತ್ಯೋ ವಾ ಏ॒ಷ - ಆ॑ದಿ॒ತ್ಯೋ ವೈ ತೇಜ॒ ಏಕ॑ಮೇಕಂ॒ - ನಿಧ॑ನಪತಯೇ॒ ತ್ರಯೋ॑ವಿಗ್ಂಶತಿಃ - ಸ॒ದ್ಯೋಜಾ॒ತ-ನ್ತ್ರೀಣಿ॑ - ವಾಮದೇ॒ವಾಯೈಕ॑ - ಮ॒ಘೋರೇ᳚ಭ್ಯ॒ - ಸ್ತತ್ಪುರು॑ಷಾಯ॒ ದ್ವೇ ದ್ವೇ॒ - ಈಶಾನೋ - ನಮೋ ಹಿರಣ್ಯಬಾಹವ॒ ಏಕ॑ಮೇಕ - ಮೃ॒ತಗ್ಂ ಸ॒ತ್ಯ-ನ್ದ್ವೇ - ಸರ್ವೋ॒ ವೈ ಚ॒ತ್ವಾರಿ॒ - ಕದ್ರು॒ದ್ರಾಯ॒ ತ್ರೀಣಿ॒ - ಯಸ್ಯ॒ ವೈ ಕಙ್ಕ॑ತೀ - ಕೃಣು॒ಷ್ವ ಪಾಜೋ - ಽದಿ॑ತಿ॒ - ರಾಪೋ॒ ವಾ ಇ॒ದಗ್ಂ ಸರ್ವ॒ ಮೇಕ॑ಮೇಕ॒ - ಮಾಪಃ॑ ಪುನನ್ತು ಚ॒ತ್ವಾ - ರ್ಯಗ್ನಿಶ್ಚ - ಸೂರ್ಯಶ್ಚ ನವ॑ - ನ॒ವೋಮಿತಿ॑ ಚ॒ತ್ವಾ - ರ್ಯಾಯಾ॑ತು॒ ಪಚೌ - ಜೋ॑-ಽಸಿ॒ ದಶೋ॒ - ತ್ತಮೇ॑ ಚ॒ತ್ವಾರಿ॒ - ಘೃಣಿ॒ಸ್ತ್ರೀಣಿ॒ - ಬ್ರಹ್ಮ॑ಮೇತು॒ ಮಾಂ-ಯಾಁಸ್ತೇ᳚ ಬ್ರಹ್ಮಹ॒ತ್ಯಾ-ನ್ದ್ವಾದ॑ಶ॒ - ಬ್ರಹ್ಮ॑ ಮೇ॒ಧಯಾ॒-ಽದ್ಯಾ ನ॑ ಇ॒ಮಂ
ಭ್ರೂ॑ಷಹ॒ತ್ಯಾಂ - ಬ್ರಹ್ಮ॑ ಮೇ॒ಧವಾ᳚ ಬ್ರ॒ಹ್ಮಾ ದೇ॒ವಾನಾ॑ಮಿ॒ದಂ-ವೀಁ॑ರಹ॒ತ್ಯಾಮೇಕಾ॒ನ್ನ ವಿ॑ಗ್ಂಶತಿ॒ ರೇಕಾ॒ನ್ನವಿ॑ಗ್ಂಶತಿ--ರ್ ಮೇ॒ಧಾ ದೇ॒ವೀ - ಮೇ॒ಧಾ-ಮ್ಮ॒ ಇನ್ದ್ರ॑ಶ್ಚ॒ತ್ವಾರಿ॑ ಚತ್ವಾ॒ರ್ಯಾ - ಮಾ᳚-ಮ್ಮೇ॒ಧಾ ದ್ವೇ - ಮಯಿ॑ ಮೇ॒ಧಾ ಮೇಕ॒- ಮಪೈ॑ತು॒ - ಪರಂ॒ - ಁವಾತ॑-ಮ್ಪ್ರಾ॒ಣ - ಮ॑ಮುತ್ರ॒ಭೂಯಾ॒-ದ್- ದ್ಧರಿ॒ಗ್ಂ॒ - ಶಲ್ಕೈ॑ರ॒ಗ್ನಿಂ - ಮಾ ಛಿ॑ದೋ ಮೃತ್ಯೋ॒ - ಮಾ ನೋ॑ ಮ॒ಹಾನ್ತಂ॒ - ಮಾನ॑ಸ್ತೋ॒ಕೇ - ಪ್ರಜಾ॑ಪತೇ - ಸ್ವಸ್ತಿ॒ದಾ - ತ್ರ್ಯ॑ಮ್ಬಕಂ॒ - ಁಯೇ ತೇ॑ ಸ॒ಹಸ್ರ॒-ನ್ದ್ವೇ ದ್ವೇ - ಮೃ॒ತ್ಯವೇ॒ ಸ್ವಾಹೈಕಂ॑ - ದೇ॒ವಕೃ॑ತ॒ಸ್ಯೈಕಾ॑ದಶ॒ - ಯದ್ವೋ॑ ದೇವಾಃ॒ - ಕಾಮೋ-ಽಕಾರ್ಷೀ॒ನ್ - ಮನ್ಯುರಕಾರ್ಷೀ॒-ದ್ದ್ವೇ ದ್ವೇ॒ - ತಿಲಾಞ್ಜುಹೋಮಿ ಗಾವ-ಶ್ಶ್ರಿಯ-ಮ್ಪ್ರ॑ಜಾಃ ಪಞ್ಚ॒ - ತಿಲಾಃ ಕೃಣ್ಷಾಶ್ಚೋರ॑ಸ್ಯ॒ ಶ್ರೀಃ ಪ್ರಜ್ಞಾತು ಜಾತವೇ॑ದ-ಸ್ಸ॒ಪ್ತ - ಪ್ರಾಣ ವಾ-ಕ್ತ್ವಕ್ ಛಿರ ಉತ್ತಿಷ್ಠ ಪುರುಷ॑ ಪಞ್ಚ॒ - ಪೃಥಿವೀ ಶಬ್ದ ಮನೋ ವಾಗ್ ವ್ಯಕ್ತಾ-ಽಽತ್ಮಾ-ಽನ್ತರಾತ್ಮಾ ಪರಮಾತ್ಮಾ ಮೇ᳚ ಖ್ಷು॒ಧೇ-ಽನ್ನಮಯ॒ ಪಞ್ಚ॑ದಶಾ॒ - ಗ್ನಯೇ॒ ಸ್ವಾಹೈಕ॑ಚತ್ವಾರಿ॒ಗ್ಂ॒ಶ - ರ್ದೋ᳚ ನ್ತದ್ಬ್ರ॒ಹ್ಮ ನವ॑ -
ಶ್ರ॒ದ್ಧಾಯಾ᳚-ಮ್ಪ್ರಾ॒ಣೇ ನಿವಿಷ್ಟ॒ ಶ್ಚತು॑ರ್ವಿಗ್ಂಶತಿಃ - ಶ್ರ॒ದ್ಧಾಯಾ॒-ನ್ದಶಾ - ಙ್ಗುಷ್ಠ ಮಾತ್ರಃ ಪುರುಷೋ ದ್ವೇ - ವಾಮ್ಮ॑ ಆ॒ಸನ್ನ॒ಷ್ಟೌ - ವಯ॑-ಸ್ಸುಪ॒ರ್ಷಾಃ - ಪ್ರಾಣಾನಾ-ಙ್ಗ್ರನ್ಥಿರಸಿ ದ್ವೇ ದ್ವೇ - ನಮೋ ರುದ್ರಾಯೈಕಂ॒ - ತ್ವಮ॑ಗ್ನೇ॒ ದ್ಯುಭಿರ್॒ ದ್ವೇ - ಶಿ॒ವೇನ॑ ಮೇ॒ ಸನ್ತಿ॑ಷ್ಠಸ್ವ - ಸ॒ತ್ಯಂ - ಪ್ರಾ॑ಜಾಪ॒ತ್ಯ - ಸ್ತಸ್ಯೈ॒ವ ಮೇಕ॑ ಮೇಕ॒ ಮಶತಿಃ)
(ಅಮ್ಭ॑ಸ್ಯಪಾ॒ರೇ - ಸ್ವ॒ಸ್ತಿ ನಃ॑ - ಪಾ॒ಹಿ ನೋ॑ ಅಗ್ನ॒ ಏಕ॑ಯಾ - ಽಽದಿ॒ತ್ಯೋ ವಾ ಏ॒ಷ - ಋ॒ತಗ್ಂ ಸ॒ತ್ಯ - ಮೋ ಮಿತ್ಯಾ - ಮಾ᳚-ಮ್ಮೇ॒ಧಾ - ಮಾ ನ॑ಸ್ತೋ॒ಕೇ - ತಿಲಾಜುಹೋಮಿ - ಶ್ರ॒ದ್ಧಾಯಾ᳚-ಮ್ಪ್ರಾ॒ಣೇ ನಿವಿ॑ಶ್ಯ॒ - ತಸ್ಯೈ॒ವ ಮೇಕೋತ್ತ॑ರಶ॒ತಂ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ದಶಮಃ ಪ್ರಪಾಠಕ-ಸ್ಸಮಾಪ್ತಃ ॥
॥ ಇತಿ ತೈತ್ತಿರೀಯ ಯಜುರಾರಣ್ಯಕಂ ಸಮಾಪ್ತಮ್ ॥
