ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ತೃತೀಯಃ ಪ್ರಪಾಠಕಃ - ವಾಜಪೇಯಬ್ರಾಹ್ಮಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಪುನರಾಧೇಯಶೇಷಃ ಆಜ್ಯಭಾಗಯೋರ್ವಿಶೇಷಃ

ದೇ॒ವಾ॒ಸು॒ರಾ-ಸ್ಸಂ-ಯಁ॑ತ್ತಾ ಆಸನ್ನ್ । ತೇ ದೇ॒ವಾ ವಿ॑ಜ॒ಯ-ಮು॑ಪ॒ಯನ್ತಃ॑ । ಅ॒ಗ್ನೀಷೋಮ॑ಯೋ-ಸ್ತೇಜ॒ಸ್ವಿನೀ᳚ಸ್ತ॒ನೂ-ಸ್ಸ-ನ್ನ್ಯ॑ದಧತ । ಇ॒ದಮು॑ ನೋ ಭವಿಷ್ಯತಿ । ಯದಿ॑ ನೋ ಜೇ॒ಷ್ಯನ್ತೀತಿ॑ । ತೇನಾ॒ಗ್ನೀಷೋಮಾ॒-ವಪಾ᳚ಕ್ರಾಮತಾಮ್ । ತೇ ದೇ॒ವಾ ವಿ॒ಜಿತ್ಯ॑ । ಅ॒ಗ್ನೀಷೋಮಾ॒-ವನ್ವೈ᳚ಚ್ಛನ್ನ್ । ತೇ᳚-ಽಗ್ನಿ-ಮನ್ವ॑ವಿನ್ದ-ನ್ನೃ॒ತುಷೂ-ಥ್ಸ॑ನ್ನಮ್ । ತಸ್ಯ॒ ವಿಭ॑ಕ್ತೀಭಿ-ಸ್ತೇಜ॒ಸ್ವಿನೀ᳚ಸ್ತ॒ನೂ-ರವಾ॑ರುನ್ಧತ ॥ 1 ॥

ತೇ ಸೋಮ॒-ಮನ್ವ॑ವಿನ್ದನ್ನ್ । ತಮ॑ಘ್ನನ್ನ್ । ತಸ್ಯ॑ ಯಥಾ-ಽಭಿ॒ಜ್ಞಾಯ॑-ನ್ತ॒ನೂ-ರ್ವ್ಯ॑ಗೃಹ್ಣತ । ತೇ ಗ್ರಹಾ॑ ಅಭವನ್ನ್ । ತ-ದ್ಗ್ರಹಾ॑ಣಾ-ಙ್ಗ್ರಹ॒ತ್ವಮ್ । ಯಸ್ಯೈ॒ವಂ-ವಿಁ॒ದುಷೋ॒ ಗ್ರಹಾ॑ ಗೃ॒ಹ್ಯನ್ತೇ᳚ । ತಸ್ಯ॒ ತ್ವೇ॑ವ ಗೃ॑ಹೀ॒ತಾಃ ॥ ನಾನಾ᳚ಗ್ನೇಯ-ಮ್ಪುನರಾ॒ಧೇಯೇ॑ ಕುರ್ಯಾತ್ । ಯದನಾ᳚ಗ್ನೇಯ-ಮ್ಪುನರಾ॒ಧೇಯೇ॑ ಕು॒ರ್ಯಾತ್ । ವ್ಯೃ॑ದ್ಧಮೇ॒ವ ತತ್ ॥ 2 ॥

ಅನಾ᳚ಗ್ನೇಯಂ॒-ವಾಁ ಏ॒ತ-ತ್ಕ್ರಿ॑ಯತೇ । ಯ-ಥ್ಸ॒ಮಿಧ॒-ಸ್ತನೂ॒ನಪಾ॑ತಮಿ॒ಡೋ ಬ॒ರ್॒ಹಿ-ರ್ಯ॑ಜತಿ ॥ ಉ॒ಭಾವಾ᳚ಗ್ನೇ॒ಯಾ-ವಾಜ್ಯ॑ಭಾಗೌ ಸ್ಯಾತಾಮ್ ॥ ಅನಾ᳚ಜ್ಯಭಾಗೌ-ಭವತ॒ ಇತ್ಯಾ॑ಹುಃ । ಯದು॒ಭಾವಾ᳚ಗ್ನೇ॒ಯಾವ॒ನ್ವಞ್ಚಾ॒ವಿತಿ॑ । ಅ॒ಗ್ನಯೇ॒ ಪವ॑ಮಾನಾ॒ಯೋತ್ತ॑ರ-ಸ್ಸ್ಯಾತ್ । ಯ-ತ್ಪವ॑ಮಾನಾಯ । ತೇನಾಜ್ಯ॑ ಭಾಗಃ । ತೇನ॑ ಸೌ॒ಮ್ಯಃ ॥ ಬುಧ॑ನ್ವತ್ಯಾಗ್ನೇ॒ಯ-ಸ್ಯಾಜ್ಯ॑-ಭಾಗಸ್ಯ ಪುರೋ-ಽನುವಾ॒ಕ್ಯಾ॑ ಭವತಿ ॥ 3 ॥

ಯಥಾ॑ ಸು॒ಪ್ತ-ಮ್ಬೋ॒ಧಯ॑ತಿ । ತಾ॒ದೃಗೇ॒ವ ತತ್ ॥ ಅ॒ಗ್ನಿನ್ಯ॑ಕ್ತಾಃ ಪತ್ನೀ ಸಂ​ಯಾಁ॒ಜಾನಾ॒ಮೃಚ॑-ಸ್ಸ್ಯುಃ । ತೇನಾ᳚ಗ್ನೇ॒ಯಗ್ಂ ಸರ್ವ॑-ಮ್ಭವತಿ ॥ ಏ॒ಕ॒ಧಾ ತೇ॑ಜ॒ಸ್ವಿನೀ᳚-ನ್ದೇ॒ವತಾ॒-ಮುಪೈ॒ತೀತ್ಯಾ॑ಹುಃ । ಸೈನ॑ಮೀಶ್ವ॒ರಾ ಪ್ರ॒ದಹ॒ ಇತಿ॑ ॥ ನೇತಿ॑ ಬ್ರೂಯಾತ್ । ಪ್ರ॒ಜನ॑ನಂ॒-ವಾಁ ಅ॒ಗ್ನಿಃ । ಪ್ರ॒ಜನ॑ನ-ಮೇ॒ವೋಪೈ॒ತೀತಿ॑ ॥ ಕೃ॒ತಯ॑ಜು॒-ಸ್ಸಮ್ಭೃ॑ತ ಸಮ್ಭಾರ॒ ಇತ್ಯಾ॑ಹುಃ ॥ 4 ॥

ನ ಸ॒ಭೃನ್ತ್ಯಾ᳚-ಸ್ಸಮ್ಭಾ॒ರಾಃ । ನ ಯಜುಃ॑ ಕಾ॒ರ್ಯ॑ಮಿತಿ॑ ॥ ಅಥೋ॒ ಖಲು॑ । ಸ॒ಭೃನ್ತ್ಯಾ॑ ಏ॒ವ ಸ॑ಭಾಂ॒ರಾಃ । ಕಾ॒ರ್ಯಂ॑-ಯಁಜುಃ॑ । ಪು॒ನ॒ರಾ॒ಧೇಯ॑ಸ್ಯ॒ ಸಮೃ॑ದ್ಧ್ಯೈ ॥ ತೇನೋ॑ಪಾ॒ಗ್ಂ॒ಶು ಪ್ರಚ॑ರತಿ । ಏಷ್ಯ॑ ಇವ॒ ವಾ ಏ॒ಷಃ । ಯ-ತ್ಪು॑ನ-ರಾ॒ಧೇಯಃ॑ । ಯಥೋ॑ಪಾ॒ಗ್ಂ॒ಶು ನ॒ಷ್ಟಮಿ॒ಚ್ಛತಿ॑ ॥ 5 ॥

ತಾ॒ದೃಗೇ॒ವ ತತ್ ॥ ಉ॒ಚ್ಚೈ-ಸ್ಸ್ವಿ॑ಷ್ಟ॒ಕೃತ॒ಮು-ಥ್ಸೃ॑ಜತಿ । ಯಥಾ॑ ನ॒ಷ್ಟಂ-ವಿಁ॒ತ್ವಾ ಪ್ರಾಹಾ॒ಯಮಿತಿ॑ । ತಾ॒ದೃಗೇ॒ವ ತತ್ ॥ ಏ॒ಕ॒ಧಾ ತೇ॑ಜ॒ಸ್ವಿನೀ᳚-ನ್ದೇ॒ವತಾ॒ಮುಪೈ॒ತೀತ್ಯಾ॑ಹುಃ । ಸೈನ॑ಮೀಶ್ವ॒ರಾ ಪ್ರ॒ದಹ॒ ಇತಿ॑ । ತತ್ತಥಾ॒ ನೋಪೈ॑ತಿ । ಪ್ರ॒ಯಾ॒ಜಾ॒ನೂ॒ಯಾ॒ಜೇಷ್ವೇ॒ವ ವಿಭ॑ಕ್ತೀಃ ಕುರ್ಯಾತ್ । ಯ॒ಥಾ॒ಪೂ॒ರ್ವ-ಮಾಜ್ಯ॑ಭಾಗೌ॒ ಸ್ಯಾತಾ᳚ಮ್ । ಏ॒ವ-ಮ್ಪ॑ತ್ನೀ ಸಂ​ಯಾಁ॒ಜಾಃ ॥ 6 ॥

ತ-ದ್ವೈ᳚ಶ್ವಾನ॒ರವ॑ತ್-ಪ್ರ॒ಜನ॑ನವತ್ತರ॒-ಮುಪೈ॒ತೀತಿ॑ ॥ ತದಾ॑ಹುಃ । ವ್ಯೃ॑ದ್ಧಂ॒-ವಾಁ ಏ॒ತತ್ । ಅನಾ᳚ಗ್ನೇಯಂ॒-ವಾಁ ಏ॒ತ-ತ್ಕ್ರಿ॑ಯತ॒ ಇತಿ॑ ॥ ನೇತಿ॑ ಬ್ರೂಯಾತ್ । ಅ॒ಗ್ನಿ-ಮ್ಪ್ರ॑ಥ॒ಮಂ-ವಿಁಭ॑ಕ್ತೀನಾಂ-ಯಁಜತಿ । ಅ॒ಗ್ನಿಮು॑ತ್ತ॒ಮ-ಮ್ಪ॑ತ್ನೀ ಸಂ​ಯಾಁ॒ಜಾನಾ᳚ಮ್ । ತೇನಾ᳚ಗ್ನೇ॒ಯಮ್ । ತೇನ॒ ಸಮೃ॑ದ್ಧ-ಙ್ಕ್ರಿಯತ॒ ಇತಿ॑ ॥ 7 ॥
(ಅ॒ರು॒ನ್ಧ॒ - ತೈ॒ವ ತ-ದ್- ಭ॑ವತಿ॒ - ಸಮ್ಭೃ॑ತಸಮ್ಭಾರ॒ ಇತ್ಯಾ॑ಹು - ರಿ॒ಚ್ಛತಿ॑ - ಪತ್ನೀಸಂ​ಯಾಁ॒ಜಾ - +ನವ॑ ಚ) ( ಆ1)

ಅನುವಾಕಂ 2 - ವಾಜಪೇಯಸ್ಯ ವಿಧಿಃ
ದೇ॒ವಾ ವೈ ಯಥಾ॒ದರ್​ಶಂ॑-ಯಁ॒ಜ್ಞಾನಾಹ॑ರನ್ತ । ಯೋ᳚-ಽಗ್ನಿಷ್ಟೋ॒ಮಮ್ । ಯ ಉ॒ಕ್ಥ್ಯ᳚ಮ್ । ಯೋ॑-ಽತಿರಾ॒ತ್ರಮ್ । ತೇ ಸ॒ಹೈವ ಸರ್ವೇ॑ ವಾಜ॒ಪೇಯ॑-ಮಪಶ್ಯನ್ನ್ । ತೇ । ಅ॒ನ್ಯೋ᳚ನ್ಯಸ್ಮೈ॒ ನಾತಿ॑ಷ್ಠನ್ತ । ಅ॒ಹಮ॒ನೇನ॑ ಯಜಾ॒ ಇತಿ॑ । ತೇ᳚-ಽಬ್ರುವನ್ನ್ । ಆ॒ಜಿಮ॒ಸ್ಯ ಧಾ॑ವಾ॒ಮೇತಿ॑ ॥ 8 ॥

ತಸ್ಮಿ॑-ನ್ನಾ॒ಜಿಮ॑ಧಾವನ್ನ್ । ತ-ಮ್ಬೃಹ॒ಸ್ಪತಿ॒-ರುದ॑ಜಯತ್ । ತೇನಾ॑ಯಜತ । ಸ ಸ್ವಾರಾ᳚ಜ್ಯ-ಮಗಚ್ಛತ್ । ತಮಿನ್ದ್ರೋ᳚-ಽಬ್ರವೀತ್ । ಮಾಮ॒ನೇನ॑ ಯಾಜ॒ಯೇತಿ॑ । ತೇನೇನ್ದ್ರ॑-ಮಯಾಜಯತ್ । ಸೋ-ಽಗ್ರ॑-ನ್ದೇ॒ವತಾ॑ನಾ॒-ಮ್ಪರ್ಯೈ᳚ತ್ । ಅಗ॑ಚ್ಛ॒-ಥ್ಸ್ವಾರಾ᳚ಜ್ಯಮ್ । ಅತಿ॑ಷ್ಠನ್ತಾಸ್ಮೈ॒ ಜ್ಯೈಷ್ಠ್ಯಾ॑ಯ ॥ 9 ॥

ಯ ಏ॒ವಂ-ವಿಁ॒ದ್ವಾನ್. ವಾ॑ಜ॒ಪೇಯೇ॑ನ॒ ಯಜ॑ತೇ । ಗಚ್ಛ॑ತಿ॒ ಸ್ವಾರಾ᳚ಜ್ಯಮ್ । ಅಗ್ರಗ್ಂ॑ ಸಮಾ॒ನಾನಾ॒-ಮ್ಪರ್ಯೇ॑ತಿ । ತಿಷ್ಠ॑ನ್ತೇ-ಽಸ್ಮೈ॒ ಜ್ಯೈಷ್ಠ್ಯಾ॑ಯ ॥ ಸ ವಾ ಏ॒ಷ ಬ್ರಾ᳚ಹ್ಮ॒ಣಸ್ಯ॑ ಚೈ॒ವ ರಾ॑ಜ॒ನ್ಯ॑ಸ್ಯ ಚ ಯ॒ಜ್ಞಃ ॥ ತಂ-ವಾಁ ಏ॒ತಂ-ವಾಁ॑ಜ॒ಪೇಯ॒ ಇತ್ಯಾ॑ಹುಃ । ವಾ॒ಜಾಪ್ಯೋ॒ ವಾ ಏ॒ಷಃ । ವಾಜ॒ಗ್ಗ್॒ ಹ್ಯೇ॑ತೇನ॑ ದೇ॒ವಾ ಐಫ್ಸನ್ನ್॑ ॥ ಸೋಮೋ॒ ವೈ ವಾ॑ಜ॒ಪೇಯಃ॑ । ಯೋ ವೈ ಸೋಮಂ॑-ವಾಁಜ॒ಪೇಯಂ॒-ವೇಁದ॑ ॥ 10 ॥

ವಾ॒ಜ್ಯೇ॑ವೈನ॑-ಮ್ಪೀ॒ತ್ವಾ ಭ॑ವತಿ । ಆ-ಽಸ್ಯ॑ ವಾ॒ಜೀ ಜಾ॑ಯತೇ ॥ ಅನ್ನಂ॒-ವೈಁ ವಾ॑ಜ॒ಪೇಯಃ॑ । ಯ ಏ॒ವಂ-ವೇಁದ॑ । ಅತ್ತ್ಯನ್ನ᳚ಮ್ । ಆ-ಽಸ್ಯಾ᳚ನ್ನಾ॒ದೋ ಜಾ॑ಯತೇ ॥ ಬ್ರಹ್ಮ॒ ವೈ ವಾ॑ಜ॒ಪೇಯಃ॑ । ಯ ಏ॒ವಂ-ವೇಁದ॑ । ಅತ್ತಿ॒ ಬ್ರಹ್ಮ॒ಣಾ-ಽನ್ನ᳚ಮ್ । ಆ-ಽಸ್ಯ॑ ಬ್ರ॒ಹ್ಮಾ ಜಾ॑ಯತೇ ॥ 11 ॥

ವಾಗ್ವೈ ವಾಜ॑ಸ್ಯ ಪ್ರಸ॒ವಃ । ಯ ಏ॒ವಂ-ವೇಁದ॑ । ಕ॒ರೋತಿ॑ ವಾ॒ಚಾ ವೀ॒ರ್ಯ᳚ಮ್ । ಐನಂ॑-ವಾಁ॒ಚಾ ಗ॑ಚ್ಛತಿ । ಅಪಿ॑ವತೀಂ॒-ವಾಁಚಂ॑-ವಁದತಿ ॥ ಪ್ರ॒ಜಾಪ॑ತಿ-ರ್ದೇ॒ವೇಭ್ಯೋ॑ ಯ॒ಜ್ಞಾನ್ ವ್ಯಾದಿ॑ಶತ್ । ಸ ಆ॒ತ್ಮನ್ ವಾ॑ಜ॒ಪೇಯ॑-ಮಧತ್ತ । ತ-ನ್ದೇ॒ವಾ ಅ॑ಬ್ರುವನ್ನ್ । ಏ॒ಷ ವಾವ ಯ॒ಜ್ಞಃ । ಯ-ದ್ವಾ॑ಜ॒ಪೇಯಃ॑ ॥ 12 ॥

ಅಪ್ಯೇ॒ವ ನೋ-ಽತ್ರಾ॒ಸ್ತ್ವಿತಿ॑ । ತೇಭ್ಯ॑ ಏ॒ತಾ ಉಜ್ಜಿ॑ತೀಃ॒ ಪ್ರಾಯ॑ಚ್ಛತ್ ॥ ತಾ ವಾ ಏ॒ತಾ ಉಜ್ಜಿ॑ತಯೋ॒ ವ್ಯಾಖ್ಯಾ॑ಯನ್ತೇ । ಯ॒ಜ್ಞಸ್ಯ॑ ಸರ್ವ॒ತ್ವಾಯ॑ । ದೇ॒ವತಾ॑ನಾ॒-ಮನಿ॑ರ್ಭಾಗಾಯ ॥ ದೇ॒ವಾ ವೈ ಬ್ರಹ್ಮ॑ಣ॒ಶ್ಚಾನ್ನ॑ಸ್ಯ ಚ॒ ಶಮ॑ಲ॒ಮಪಾ᳚ಘ್ನನ್ನ್ । ಯ-ದ್ಬ್ರಹ್ಮ॑ಣ॒-ಶ್ಶಮ॑ಲ॒ಮಾಸೀ᳚ತ್ । ಸಾ ಗಾಥಾ॑ ನಾರಾಶ॒ಗ್ಗ್॒ಸ್ಯ॑ ಭವತ್ । ಯದನ್ನ॑ಸ್ಯ । ಸಾ ಸುರಾ᳚ ॥ 13 ॥

ತಸ್ಮಾ॒-ದ್ಗಾಯ॑ತಶ್ಚ ಮ॒ತ್ತಸ್ಯ॑ ಚ॒ ನ ಪ್ರ॑ತಿ॒ಗೃಹ್ಯ᳚ಮ್ । ಯ-ತ್ಪ್ರ॑ತಿಗೃಹ್ಣೀ॒ಯಾತ್ । ಶಮ॑ಲ॒-ಮ್ಪ್ರತಿ॑ಗೃಹ್ಣೀಯಾತ್ ॥ ಸರ್ವಾ॒ ವಾ ಏ॒ತಸ್ಯ॒ ವಾಚೋ ಽವ॑ರುದ್ಧಾಃ । ಯೋ ವಾ॑ಜಪೇಯಯಾ॒ಜೀ । ಯಾ ಪೃ॑ಥಿ॒ವ್ಯಾಂ-ಯಾಁ-ಽಗ್ನೌ ಯಾ ರ॑ಥನ್ತ॒ರೇ । ಯಾ-ಽನ್ತರಿ॑ಖ್ಷೇ॒ ಯಾ ವಾ॒ಯೌ ಯಾ ವಾ॑ಮದೇ॒ವ್ಯೇ । ಯಾ ದಿ॒ವಿ ಯಾ-ಽಽದಿ॒ತ್ಯೇ ಯಾ ಬೃ॑ಹ॒ತಿ । ಯಾ-ಽಫ್ಸು ಯೌಷ॑ಧೀಷು॒ ಯಾ ವನ॒ಸ್ಪತಿ॑ಷು ॥ ತಸ್ಮಾ᳚-ದ್ವಾಜಪೇಯಯಾ॒ಜ್ಯಾರ್ತ್ವಿ॑ಜೀನಃ । ಸರ್ವಾ॒ ಹ್ಯ॑ಸ್ಯ॒ ವಾಚೋ ಽವ॑ರುದ್ಧಾಃ ॥ 14 ॥
(ಧಾ॒ವಾ॒ಮೇತಿ॒ - ಜ್ಯೈಷ್ಠ್ಯಾ॑ಯ॒ - ವೇದ॑ - ಬ್ರ॒ಹ್ಮಾ ಜಾ॑ಯತೇ-ವಾಜ॒ಪೇಯಃ॒-ಸುರಾ-ಽಽರ್ತ್ವಿ॑ಜೀನ॒ ಏಕಂ॑ ಚ ) (ಅ. 2)

ಅನುವಾಕಂ 3 - ತಸ್ಯಗ್ರಹವಿಶೇಷಾಃ
ದೇ॒ವಾ ವೈ ಯದ॒ನ್ಯೈ-ರ್ಗ್ರಹೈ᳚-ರ್ಯ॒ಜ್ಞಸ್ಯ॒ ನಾವಾರು॑ನ್ಧತ । ತದ॑ತಿಗ್ರಾ॒ಹ್ಯೈ॑-ರತಿ॒ಗೃಹ್ಯಾ-ವಾ॑ರುನ್ಧತ । ತದ॑ತಿಗ್ರಾ॒ಹ್ಯಾ॑ಣಾ-ಮತಿಗ್ರಾಹ್ಯ॒ತ್ವಮ್ ॥ ಯದ॑ತಿಗ್ರಾ॒ಹ್ಯಾ॑ ಗೃ॒ಹ್ಯನ್ತೇ᳚ । ಯದೇ॒ವಾನ್ಯೈ-ರ್ಗ್ರಹೈ᳚-ರ್ಯ॒ಜ್ಞಸ್ಯ॒ ನಾವ॑ರು॒ನ್ಧೇ । ತದೇ॒ವ ತೈರ॑ತಿ॒ಗೃಹ್ಯಾ-ವ॑ರುನ್ಧೇ ॥ ಪಞ್ಚ॑ ಗೃಹ್ಯನ್ತೇ । ಪಾಙ್ಕ್ತೋ॑ ಯ॒ಜ್ಞಃ । ಯಾವಾ॑ನೇ॒ವ ಯ॒ಜ್ಞಃ । ತಮಾ॒ಪ್ತ್ವಾ ಽವ॑ರುನ್ಧೇ ॥ 15 ॥

ಸರ್ವ॑ ಐ॒ನ್ದ್ರಾ ಭ॑ವನ್ತಿ । ಏ॒ಕ॒ಧೈವ ಯಜ॑ಮಾನ ಇನ್ದ್ರಿ॒ಯ-ನ್ದ॑ಧತಿ ॥ ಸ॒ಪ್ತದ॑ಶ ಪ್ರಾಜಾಪ॒ತ್ಯಾ ಗ್ರಹಾ॑ ಗೃಹ್ಯನ್ತೇ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒-ರಾಪ್ತ್ಯೈ᳚ ॥ ಏಕ॑ಯ॒ರ್ಚಾ ಗೃ॑ಹ್ಣಾತಿ । ಏ॒ಕ॒ಧೈವ ಯಜ॑ಮಾನೇ ವೀ॒ರ್ಯ॑-ನ್ದಧಾತಿ ॥ ಸೋ॒ಮ॒ಗ್ರ॒ಹಾಗ್​ಶ್ಚ॑ ಸುರಾಗ್ರ॒ಹಾಗ್​ಶ್ಚ॑ ಗೃಹ್ಣಾತಿ । ಏ॒ತ-ದ್ವೈ ದೇ॒ವಾನಾ᳚-ಮ್ಪರ॒ಮಮನ್ನ᳚ಮ್ । ಯ-ಥ್ಸೋಮಃ॑ ॥ 16 ॥

ಏ॒ತ-ನ್ಮ॑ನು॒ಷ್ಯಾ॑ಣಾಮ್ । ಯ-ಥ್ಸುರಾ᳚ । ಪ॒ರ॒ಮೇಣೈ॒ವಾಸ್ಮಾ॑ ಅ॒ನ್ನಾದ್ಯೇ॒ನಾವ॑ರ-ಮ॒ನ್ನಾದ್ಯ॒-ಮವ॑ರುನ್ಧೇ ॥ ಸೋ॒ಮ॒ಗ್ರ॒ಹಾ-ನ್ಗೃ॑ಹ್ಣಾತಿ । ಬ್ರಹ್ಮ॑ಣೋ॒ ವಾ ಏ॒ತ-ತ್ತೇಜಃ॑ । ಯ-ಥ್ಸೋಮಃ॑ । ಬ್ರಹ್ಮ॑ಣ ಏ॒ವ ತೇಜ॑ಸಾ॒ ತೇಜೋ॒ ಯಜ॑ಮಾನೇ ದಧಾತಿ । ಸು॒ರಾ॒ಗ್ರ॒ಹಾ-ನ್ಗೃ॑ಹ್ಣಾತಿ । ಅನ್ನ॑ಸ್ಯ॒ ವಾ ಏ॒ತಚ್ಛಮ॑ಲಮ್ । ಯ-ಥ್ಸುರಾ᳚ ॥ 17 ॥

ಅನ್ನ॑ಸ್ಯೈ॒ವ ಶಮ॑ಲೇನ॒ ಶಮ॑ಲಂ॒-ಯಁಜ॑ಮಾನಾ॒-ದಪ॑ಹನ್ತಿ ॥ ಸೋ॒ಮ॒ಗ್ರ॒ಹಾಗ್​ಶ್ಚ॑ ಸುರಾಗ್ರ॒ಹಾಗ್​ಶ್ಚ॑ ಗೃಹ್ಣಾತಿ । ಪುಮಾ॒ನ್॒. ವೈ ಸೋಮಃ॑ । ಸ್ತ್ರೀ ಸುರಾ᳚ । ತ-ನ್ಮಿ॑ಥು॒ನಮ್ । ಮಿ॒ಥು॒ನಮೇ॒ವಾಸ್ಯ॒ ತ-ದ್ಯ॒ಜ್ಞೇ ಕ॑ರೋತಿ ಪ್ರ॒ಜನ॑ನಾಯ । ಆ॒ತ್ಮಾನ॑ಮೇ॒ವ ಸೋ॑ಮಗ್ರ॒ಹೈ-ಸ್ಸ್ಪೃ॑ಣೋತಿ । ಜಾ॒ಯಾಗ್ಂ ಸು॑ರಾ ಗ್ರ॒ಹೈಃ । ತಸ್ಮಾ᳚-ದ್ವಾಜಪೇಯಯಾ॒ಜ್ಯ॑ಮುಷ್ಮಿ॑ಁಲ್ಲೋ॒ಕೇ ಸ್ತ್ರಿಯ॒ಗ್ಂ॒ ಸಮ್ಭ॑ವತಿ । ವಾ॒ಜ॒ಪೇಯಾ॑-ಭಿಜಿತ॒ಗ್ಗ್॒ ಹ್ಯ॑ಸ್ಯ ॥ 18 ॥

ಪೂರ್ವೇ॑ ಸೋಮಗ್ರ॒ಹಾ ಗೃ॑ಹ್ಯನ್ತೇ । ಅಪ॑ರೇ ಸುರಾಗ್ರ॒ಹಾಃ । ಪು॒ರೋ॒ಖ್ಷಗ್ಂ ಸೋ॑ಮಗ್ರ॒ಹಾನ್ಥ್- ಸಾ॑ದಯತಿ । ಪ॒ಶ್ಚಾ॒ದ॒ಖ್ಷಗ್ಂ ಸು॑ರಾಗ್ರ॒ಹಾನ್ । ಪಾ॒ಪ॒ವ॒ಸ್ಯ॒ಸಸ್ಯ॒ ವಿಧೃ॑ತ್ಯೈ ॥ ಏ॒ಷ ವೈ ಯಜ॑ಮಾನಃ । ಯ-ಥ್ಸೋಮಃ॑ । ಅನ್ನ॒ಗ್ಂ॒ ಸುರಾ᳚ । ಸೋ॒ಮ॒ಗ್ರ॒ಹಾಗ್​ಶ್ಚ॑ ಸುರಾಗ್ರ॒ಹಾಗ್​ಶ್ಚ॒ ವ್ಯತಿ॑ಷಜತಿ । ಅ॒ನ್ನಾದ್ಯೇ॑ನೈ॒ವೈನಂ॒-ವ್ಯಁತಿ॑ಷಜತಿ ॥ 19 ॥

ಸ॒ಪೃಞ್ಚ॑-ಸ್ಸ್ಥ॒ ಸ-ಮ್ಮಾ॑ ಭ॒ದ್ರೇಣ॑ ಪೃ॒ಙ್ಕ್ತೇತ್ಯಾ॑ಹ । ಅನ್ನಂ॒-ವೈಁ ಭ॒ದ್ರಮ್ । ಅ॒ನ್ನಾದ್ಯೇ॑ನೈ॒ವೈನ॒ಗ್ಂ॒ ಸಗ್ಂಸೃ॑ಜತಿ ॥ ಅನ್ನ॑ಸ್ಯ॒ ವಾ ಏ॒ತಚ್ಛಮ॑ಲಮ್ । ಯ-ಥ್ಸುರಾ᳚ । ಪಾ॒ಪ್ಮೆವ॒ ಖಲು॒ ವೈ ಶಮ॑ಲಮ್ । ಪಾ॒ಪ್ಮನಾ॒ ವಾ ಏ॑ನಮೇ॒ತಚ್ಛಮ॑ಲೇನ॒ ವ್ಯತಿ॑ಷಜತಿ । ಯ-ಥ್ಸೋ॑ಮಗ್ರ॒ಹಾಗ್​ಶ್ಚ॑ ಸುರಾಗ್ರ॒ಹಾಗ್​ಶ್ಚ॑ ವ್ಯತಿ॒ಷಜ॑ತಿ ॥ ವಿ॒ಪೃಚ॑-ಸ್ಸ್ಥ॒ ವಿ ಮಾ॑ ಪಾ॒ಪ್ಮನಾ॑ ಪೃ॒ಙ್ಕ್ತೇತ್ಯಾ॑ಹ । ಪಾ॒ಪ್ಮನೈ॒ವೈನ॒ಗ್ಂ॒ ಶಮ॑ಲೇನ॒ ವ್ಯಾವ॑ರ್ತಯತಿ ॥ 20 ॥

ತಸ್ಮಾ᳚-ದ್ವಾಜಪೇಯಯಾ॒ಜೀ ಪೂ॒ತೋ ಮೇದ್ಧ್ಯೋ॑ ದಖ್ಷಿ॒ಣ್ಯಃ॑ ॥ ಪ್ರಾಂಉ-ದ್ದ್ರ॑ವತಿ ಸೋಮಗ್ರ॒ಹೈಃ । ಅ॒ಮುಮೇ॒ವ ತೈ-ರ್ಲೋ॒ಕ-ಮ॒ಭಿಜ॑ಯತಿ । ಪ್ರ॒ತ್ಯಙ್ಖ್ಸು॑ರಾ ಗ್ರ॒ಹೈಃ । ಇ॒ಮಮೇ॒ವ ತೈ-ರ್ಲೋ॒ಕ-ಮ॒ಭಿಜ॑ಯತಿ ॥ ಪ್ರತಿ॑ಷ್ಠನ್ತಿ ಸೋಮಗ್ರ॒ಹೈಃ । ಯಾವ॑ದೇ॒ವ ಸ॒ತ್ಯಮ್ । ತೇನ॑ ಸೂಯತೇ ॥ ವಾ॒ಜ॒ಸೃದ್ಭ್ಯ॑-ಸ್ಸುರಾಗ್ರ॒ಹಾನ್. ಹ॑ರನ್ತಿ । ಅನೃ॑ತೇನೈ॒ವ ವಿಶ॒ಗ್ಂ॒ ಸಗ್ಂಸೃ॑ಜತಿ ॥ ಹಿ॒ರ॒ಣ್ಯ॒ಪಾ॒ತ್ರ-ಮ್ಮಧೋಃ᳚ ಪೂ॒ರ್ಣ-ನ್ದ॑ದಾತಿ । ಮ॒ಧ॒ವ್ಯೋ॑-ಽಸಾ॒ನೀತಿ॑ ॥ ಏ॒ಕ॒ಧಾ ಬ್ರ॒ಹ್ಮಣ॒ ಉಪ॑ ಹರತಿ । ಏ॒ಕ॒ಧೈವ ಯಜ॑ಮಾನ॒ ಆಯು॒ಸ್ತೇಜೋ॑ ದಧಾತಿ ॥ 21 ॥
(ಆ॒ಪ್ತ್ವಾ-ಽವ॑ರುನ್ಧೇ॒ - ಸೋಮಃ॒ - ಶಮ॑ಲಂ॒-ಯಁ-ಥ್ಸುರಾ॒ - ಹ್ಯ॑-ಸ್ಯೈನಂ॒-ವ್ಯಁತಿ॑ಷಜತಿ॒ - ವ್ಯಾವ॑ರ್ತಯತಿ - ಸೃಜತಿ ಚ॒ತ್ವಾರಿ॑ ಚ ) (ಅ. 3)

ಅನುವಾಕಂ 4 - ಪಶವ-ಸ್ಸಪ್ತದಶ
ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ನಾಗ್ನಿ॑ಷ್ಟೋ॒ಮೋ ನೋಕ್ಥ್ಯಃ॑ । ನ ಷೋ॑ಡ॒ಶೀ ನಾತಿ॑ರಾ॒ತ್ರಃ । ಅಥ॒ ಕಸ್ಮಾ᳚-ದ್ವಾಜ॒ಪೇಯೇ॒ ಸರ್ವೇ॑ ಯಜ್ಞಕ್ರ॒ತವೋ-ಽವ॑ರುದ್ಧ್ಯನ್ತ॒ ಇತಿ॑ । ಪ॒ಶುಭಿ॒ರಿತಿ॑ ಬ್ರೂಯಾತ್ ॥ ಆ॒ಗ್ನೇ॒ಯ-ಮ್ಪ॒ಶುಮಾಲ॑ಭತೇ । ಅ॒ಗ್ನಿ॒ಷ್ಟೋ॒ಮಮೇ॒ವ ತೇನಾವ॑ರುನ್ಧೇ । ಐ॒ನ್ದ್ರಾ॒ಗ್ನೇನೋ॒ಕ್ಥ್ಯ᳚ಮ್ । ಐ॒ನ್ದ್ರೇಣ॑ ಷೋಡ॒ಶಿನ॑-ಸ್ಸ್ತೋ॒ತ್ರಮ್ । ಸಾ॒ರ॒ಸ್ವ॒ತ್ಯಾ-ಽತಿ॑ರಾ॒ತ್ರಮ್ ॥ 22 ॥

ಮಾ॒ರು॒ತ್ಯಾ ಬೃ॑ಹ॒ತ-ಸ್ಸ್ತೋ॒ತ್ರಮ್ । ಏ॒ತಾವ॑ನ್ತೋ॒ ವೈ ಯ॑ಜ್ಞಕ್ರ॒ತವಃ॑ । ತಾ-ನ್ಪ॒ಶುಭಿ॑ರೇ॒ವಾ-ವ॑ರುನ್ಧೇ ॥ ಆ॒ತ್ಮಾನ॑ಮೇ॒ವ ಸ್ಪೃ॑ಣೋ-ತ್ಯಗ್ನಿಷ್ಟೋ॒ಮೇನ॑ । ಪ್ರಾ॒ಣಾ॒ಪಾ॒ನಾ-ವು॒ಕ್ಥ್ಯೇ॑ನ । ವೀ॒ರ್ಯಗ್ಂ॑ ಷೋಡ॒ಶಿನ॑-ಸ್ಸ್ತೋ॒ತ್ರೇಣ॑ । ವಾಚ॑-ಮತಿರಾ॒ತ್ರೇಣ॑ । ಪ್ರ॒ಜಾ-ಮ್ಬೃ॑ಹ॒ತ-ಸ್ಸ್ತೋ॒ತ್ರೇಣ॑ । ಇ॒ಮಮೇ॒ವ ಲೋ॒ಕಮ॒ಭಿ ಜ॑ಯತ್ಯಗ್ನಿಷ್ಟೋ॒ಮೇನ॑ । ಅ॒ನ್ತರಿ॑ಖ್ಷ-ಮು॒ಕ್ಥ್ಯೇ॑ನ ॥ 23 ॥

ಸು॒ವ॒ರ್ಗಂ-ಲೋಁ॒ಕಗ್ಂ ಷೋ॑ಡ॒ಶಿನ॑-ಸ್ಸ್ತೋ॒ತ್ರೇಣ॑ । ದೇ॒ವ॒ಯಾನಾ॑ನೇ॒ವ ಪ॒ಥ ಆರೋ॑ಹ-ತ್ಯತಿರಾ॒ತ್ರೇಣ॑ । ನಾಕಗ್ಂ॑ ರೋಹತಿ ಬೃಹ॒ತ-ಸ್ಸ್ತೋ॒ತ್ರೇಣ॑ । ತೇಜ॑ ಏ॒ವಾತ್ಮ-ನ್ಧ॑ತ್ತ ಆಗ್ನೇ॒ಯೇನ॑ ಪ॒ಶುನಾ᳚ । ಓಜೋ॒ ಬಲ॑ಮೈನ್ದ್ರಾ॒ಗ್ನೇನ॑ । ಇ॒ನ್ದ್ರಿ॒ಯ-ಮೈ॒ನ್ದ್ರೇಣ॑ । ವಾಚಗ್ಂ॑ ಸಾರಸ್ವ॒ತ್ಯಾ । ಉ॒ಭಾವೇ॒ವ ದೇ॑ವಲೋ॒ಕ-ಞ್ಚ॑ ಮನುಷ್ಯಲೋ॒ಕ-ಞ್ಚಾ॒ಭಿಜ॑ಯತಿ ಮಾರು॒ತ್ಯಾ ವ॒ಶಯಾ᳚ ॥ ಸ॒ಪ್ತದ॑ಶ ಪ್ರಾಜಾಪ॒ತ್ಯಾ-ನ್ಪ॒ಶೂನಾಲ॑ಭತೇ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ ॥ 24 ॥

ಪ್ರ॒ಜಾಪ॑ತೇ॒ರಾಪ್ತ್ಯೈ᳚ ॥ ಶ್ಯಾ॒ಮಾ ಏಕ॑ರೂಪಾ ಭವನ್ತಿ । ಏ॒ವಮಿ॑ವ॒ ಹಿ ಪ್ರ॒ಜಾಪ॑ತಿ॒-ಸ್ಸಮೃ॑ದ್ಧ್ಯೈ ॥ ತಾ-ನ್ಪರ್ಯ॑ಗ್ನಿಕೃತಾ॒-ನುಥ್ಸೃ॑ಜತಿ ॥ ಮ॒ರುತೋ॑ ಯ॒ಜ್ಞಮ॑ಜಿಘಾಗ್ಂಸ-ನ್ಪ್ರ॒ಜಾಪ॑ತೇಃ । ತೇಭ್ಯ॑ ಏ॒ತಾ-ಮ್ಮಾ॑ರು॒ತೀಂ-ವಁ॒ಶಾಮಾಲ॑ಭತ । ತಯೈ॒ವೈನಾ॑-ನಶಮಯತ್ ॥ ಮಾ॒ರು॒ತ್ಯಾ ಪ್ರ॒ಚರ್ಯ॑ । ಏ॒ತಾನ್-ಥ್ಸಞ್ಜ್ಞ॑ಪಯೇತ್ । ಮ॒ರುತ॑ ಏ॒ವ ಶ॑ಮಯಿ॒ತ್ವಾ ॥ 25 ॥

ಏ॒ತೈಃ ಪ್ರಚ॑ರತಿ । ಯ॒ಜ್ಞಸ್ಯಾಘಾ॑ತಾಯ ॥ ಏ॒ಕ॒ಧಾ ವ॒ಪಾ ಜು॑ಹೋತಿ । ಏ॒ಕ॒ದೇ॒ವ॒ತ್ಯಾ॑ ಹಿ । ಏ॒ತೇ । ಅಥೋ॑ ಏಕ॒ಧೈವ ಯಜ॑ಮಾನೇ ವೀ॒ರ್ಯ॑-ನ್ದಧಾತಿ ॥ ನೈ॒ವಾ॒ರೇಣ॑ ಸ॒ಪ್ತದ॑ಶಶರಾವೇ-ಣೈ॒ತರ್​ಹಿ॒ ಪ್ರಚ॑ರತಿ । ಏ॒ತ-ತ್ಪು॑ರೋಡಾಶಾ॒ ಹ್ಯೇ॑ತೇ । ಅಥೋ॑ ಪಶೂ॒ನಾಮೇ॒ವ ಛಿ॒ದ್ರಮಪಿ॑ದಧಾತಿ ॥ ಸಾ॒ರ॒ಸ್ವ॒ತ್ಯೋತ್ತ॒ಮಯಾ॒ ಪ್ರಚ॑ರತಿ । ವಾಗ್ ವೈ ಸರ॑ಸ್ವತೀ । ತಸ್ಮಾ᳚-ತ್ಪ್ರಾ॒ಣಾನಾಂ॒-ವಾಁಗು॑ತ್ತ॒ಮಾ । ಅಥೋ᳚ ಪ್ರ॒ಜಾಪ॑ತಾವೇ॒ವ ಯ॒ಜ್ಞ-ಮ್ಪ್ರತಿ॑ಷ್ಠಾಪಯತಿ । ಪ್ರ॒ಜಾಪ॑ತಿ॒ರ್॒ ಹಿ ವಾಕ್ ॥ ಅಪ॑ನ್ನದತೀ ಭವತಿ । ತಸ್ಮಾ᳚-ನ್ಮನು॒ಷ್ಯಾ᳚-ಸ್ಸರ್ವಾಂ॒-ವಾಁಚಂ॑-ವಁದನ್ತಿ ॥ 26 ॥
(ಅ॒ತಿ॒ರಾ॒ತ್ರ - ಮ॒ನ್ತರಿ॑ಖ್ಷಮು॒ಕ್ಥ್ಯೇ॑ನ - ಪ್ರ॒ಜಾಪ॑ತಿಃ - ಶಮಯಿ॒ತ್ವೋತ್ - ತ॒ಮಯಾ॒ ಪ್ರಚ॑ರತಿ॒ ಷಟ್ ಚ॑) (ಅ. 4)

ಅನುವಾಕಂ 5 - ರಥಯಾಜನಂ
ಸಾ॒ವಿ॒ತ್ರ-ಞ್ಜು॑ಹೋತಿ॒ ಕರ್ಮ॑ಣಃ ಕರ್ಮಣಃ ಪು॒ರಸ್ತಾ᳚ತ್ ॥ ಕಸ್ತ-ದ್ವೇ॒ದೇತ್ಯಾ॑ಹುಃ । ಯ-ದ್ವಾ॑ಜ॒ಪೇಯ॑ಸ್ಯ॒ ಪೂರ್ವಂ॒-ಯಁದಪ॑ರ॒ಮಿತಿ॑ । ಸ॒ವಿ॒ತೃಪ್ರ॑ಸೂತ ಏ॒ವ ಯ॑ಥಾಪೂ॒ರ್ವ-ಙ್ಕರ್ಮಾ॑ಣಿ ಕರೋತಿ ॥ ಸವ॑ನೇ ಸವನೇ ಜುಹೋತಿ । ಆ॒ಕ್ರಮ॑ಣಮೇ॒ವ ತ-ಥ್ಸೇತುಂ॒-ಯಁಜ॑ಮಾನಃ ಕುರುತೇ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ವಾ॒ಚಸ್ಪತಿ॒-ರ್ವಾಚ॑ಮ॒ದ್ಯ ಸ್ವ॑ದಾತಿ ನ॒ ಇತ್ಯಾ॑ಹ । ವಾಗ್ವೈ ದೇ॒ವಾನಾ᳚-ಮ್ಪು॒ರಾ-ಽನ್ನ॑ಮಾಸೀತ್ । ವಾಚ॑ಮೇ॒ವಾಸ್ಮಾ॒ ಅನ್ನಗ್ಗ್॑ ಸ್ವದಯತಿ ॥ 27 ॥

ಇನ್ದ್ರ॑ಸ್ಯ॒ ವಜ್ರೋ॑-ಽಸಿ॒ ವಾರ್ತ್ರ॑ಘ್ನ॒ ಇತಿ॒ ರಥ॑ಮು॒ಪಾವ॑ಹರತಿ॒ ವಿಜಿ॑ತ್ಯೈ ॥ ವಾಜ॑ಸ್ಯ॒ ನು ಪ್ರ॑ಸ॒ವೇ ಮಾ॒ತರ॑-ಮ್ಮ॒ಹೀಮಿತ್ಯಾ॑ಹ । ಯಚ್ಚೈ॒ವೇಯಮ್ । ಯಚ್ಚಾ॒ಸ್ಯಾಮಧಿ॑ । ತದೇ॒ವಾ-ವ॑ರುನ್ಧೇ । ಅಥೋ॒ ತಸ್ಮಿ॑ನ್ನೇ॒ವೋಭಯೇ॒-ಽಭಿಷಿ॑ಚ್ಯತೇ ॥ ಅ॒ಫ್ಸ್ವ॑ನ್ತರ॒-ಮೃತ॑ಮ॒ಫ್ಸು ಭೇ॑ಷ॒ಜಮಿತ್ಯಶ್ವಾ᳚-ನ್ಪಲ್ಪೂಲಯತಿ । ಅ॒ಫ್ಸು ವಾ ಅಶ್ವ॑ಸ್ಯ॒ ತೃತೀ॑ಯ॒-ಮ್ಪ್ರವಿ॑ಷ್ಟಮ್ । ತದ॑ನು॒ವೇನ॒ನ್ವವ॑ಪ್ಲವತೇ । ಯದ॒ಫ್ಸು ಪ॑ಲ್ಪೂ॒ಲಯ॑ತಿ ॥ 28 ॥

ಯದೇ॒ವಾಸ್ಯಾ॒ಫ್ಸು ಪ್ರವಿ॑ಷ್ಟಮ್ । ತದೇ॒ವಾವ॑ರುನ್ಧೇ ॥ ಬ॒ಹು ವಾ ಅಶ್ವೋ॑-ಽಮೇ॒ದ್ಧ್ಯ-ಮುಪ॑ಗಚ್ಛತಿ । ಯದ॒ಫ್ಸು ಪ॑ಲ್ಪೂ॒ಲಯ॑ತಿ । ಮೇದ್ಧ್ಯಾ॑ನೇ॒ವೈನಾ᳚ನ್ ಕರೋತಿ ॥ ವಾ॒ಯುರ್ವಾ᳚ ತ್ವಾ॒ ಮನು॑ರ್ವಾ॒ ತ್ವೇತ್ಯಾ॑ಹ । ಏ॒ತಾ ವಾ ಏ॒ತ-ನ್ದೇ॒ವತಾ॒ ಅಗ್ರೇ॒ ಅಶ್ವ॑ಮಯುಞ್ಜನ್ನ್ । ತಾಭಿ॑ರೇ॒ವೈನಾನ್॑. ಯುನಕ್ತಿ । ಸ॒ವಸ್ಯೋಜ್ಜಿ॑ತ್ಯೈ ॥ ಯಜು॑ಷಾ ಯುನಕ್ತಿ॒ ವ್ಯಾವೃ॑ತ್ತ್ಯೈ ॥ 29 ॥

ಅಪಾ᳚-ನ್ನ ಪಾದಾಶುಹೇಮ॒ನ್ನಿತಿ॒ ಸಮ್ಮಾ᳚ರ್​ಷ್ಟಿ । ಮೇದ್ಧ್ಯಾ॑ನೇ॒ವೈನಾ᳚ನ್ ಕರೋತಿ । ಅಥೋ॒ ಸ್ತೌತ್ಯೇ॒ವೈನಾ॑ನಾ॒ಜಿಗ್ಂ ಸ॑ರಿಷ್ಯ॒ತಃ ॥ ವಿ॒ಷ್ಣು॒ ಕ್ರ॒ಮಾನ್ ಕ್ರ॑ಮತೇ । ವಿಷ್ಣು॑ರೇ॒ವ ಭೂ॒ತ್ವೇಮಾಁಲ್ಲೋ॒ಕಾ-ನ॒ಭಿಜ॑ಯತಿ ॥ ವೈ॒ಶ್ವ॒ದೇ॒ವೋ ವೈ ರಥಃ॑ । ಅ॒ಙ್ಕೌ ನ್ಯ॒ಙ್ಕಾವ॒ಭಿತೋ॒ ರಥಂ॒-ಯಾಁವಿತ್ಯಾ॑ಹ । ಯಾ ಏ॒ವ ದೇ॒ವತಾ॒ ರಥೇ॒ ಪ್ರವಿ॑ಷ್ಟಾಃ । ತಾಭ್ಯ॑ ಏ॒ವ ನಮ॑ಸ್ಕರೋತಿ । ಆ॒ತ್ಮನೋ-ಽನಾ᳚ರ್ತ್ಯೈ ॥ ಅಶ॑ಮರಥ-ಮ್ಭಾವುಕೋ-ಽಸ್ಯ॒ ರಥೋ॑ ಭವತಿ । ಯ ಏ॒ವಂ-ವೇಁದ॑ ॥ 30 ॥
(ಸ್ವ॒ದ॒ಯ॒ತಿ॒ - ಪ॒ಲ್ಪೂ॒ಲಯ॑ತಿ॒ - ವ್ಯಾವೃ॑ತ್ತ್ಯಾ॒ - ಅನಾ᳚ರ್ತ್ಯೈ॒ ದ್ವೇ ಚ॑) (ಅ. 5)

ಅನುವಾಕಂ 6 - ರಥಧಾವನಂ
ದೇ॒ವಸ್ಯಾ॒ಹಗ್ಂ ಸ॑ವಿ॒ತುಃ ಪ್ರ॑ಸ॒ವೇ ಬೃಹ॒ಸ್ಪತಿ॑ನಾ ವಾಜ॒ಜಿತಾ॒ ವಾಜ॑-ಞ್ಜೇಷ॒ಮಿತ್ಯಾ॑ಹ । ಸ॒ವಿ॒ತೃಪ್ರ॑ಸೂತ ಏ॒ವ ಬ್ರಹ್ಮ॑ಣಾ॒ ವಾಜ॒ಮುಜ್ಜ॑ಯತಿ ॥ ದೇ॒ವಸ್ಯಾ॒ಹಗ್ಂ ಸ॑ವಿ॒ತುಃ ಪ್ರ॑ಸ॒ವೇ ಬೃಹ॒ಸ್ಪತಿ॑ನಾ ವಾಜ॒ಜಿತಾ॒ ವರ್​ಷಿ॑ಷ್ಠ॒-ನ್ನಾಕಗ್ಂ॑ ರುಹೇಯ॒ಮಿತ್ಯಾ॑ಹ । ಸ॒ವಿ॒ತೃಪ್ರ॑ಸೂತ ಏ॒ವ ಬ್ರಹ್ಮ॑ಣಾ॒ ವರ್​ಷಿ॑ಷ್ಠ॒-ನ್ನಾಕಗ್ಂ॑ ರೋಹತಿ ॥ ಚಾತ್ವಾ॑ಲೇ ರಥಚ॒ಕ್ರ-ನ್ನಿಮಿ॑ತಗ್ಂ ರೋಹತಿ । ಅತೋ॒ ವಾ ಅಙ್ಗಿ॑ರಸ ಉತ್ತ॒ಮಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯನ್ನ್ । ಸಾ॒ಖ್ಷಾದೇ॒ವ ಯಜ॑ಮಾನ-ಸ್ಸುವ॒ರ್ಗಂ-ಲೋಁ॒ಕಮೇ॑ತಿ ॥ ಆವೇ᳚ಷ್ಟಯತಿ । ವಜ್ರೋ॒ ವೈ ರಥಃ॑ । ವಜ್ರೇ॑ಣೈ॒ವ ದಿಶೋ॒-ಽಭಿಜ॑ಯತಿ ॥ 31 ॥

ವಾ॒ಜಿನಾ॒ಗ್ಂ॒ ಸಾಮ॑ ಗಾಯತೇ । ಅನ್ನಂ॒-ವೈಁ ವಾಜಃ॑ । ಅನ್ನ॑ಮೇ॒-ವಾವ॑ರುನ್ಧೇ ॥ ವಾ॒ಚೋ ವರ್​ಷ್ಮ॑ ದೇ॒ವೇಭ್ಯೋ-ಽಪಾ᳚ಕ್ರಾಮತ್ । ತ-ದ್ವನ॒ಸ್ಪತೀ॒-ನ್ಪ್ರಾವಿ॑ಶತ್ । ಸೈಷಾ ವಾಗ್-ವನ॒ಸ್ಪತಿ॑ಷು ವದತಿ । ಯಾ ದು॑ನ್ದು॒ಭೌ । ತಸ್ಮಾ᳚-ದ್ದುನ್ದು॒ಭಿ-ಸ್ಸರ್ವಾ॒ ವಾಚೋತಿ॑ ವದತಿ ॥ ದು॒ನ್ದು॒ಭೀನ್-ಥ್ಸ॒ಮಾಘ್ನ॑ನ್ತಿ । ಪ॒ರ॒ಮಾ ವಾ ಏ॒ಷಾ ವಾಕ್ ॥ 32 ॥

ಯಾ ದು॑ನ್ದು॒ಭೌ । ಪ॒ರ॒ಮಯೈ॒ವ ವಾ॒ಚಾ-ಽವ॑ರಾಂ॒-ವಾಁಚ॒ಮ-ವ॑ರುನ್ಧೇ । ಅಥೋ॑ ವಾ॒ಚ ಏ॒ವ ವರ್​ಷ್ಮ॒ ಯಜ॑ಮಾ॒ನೋ ಽವ॑ರುನ್ಧೇ ॥ ಇನ್ದ್ರಾ॑ಯ॒ ವಾಚಂ॑-ವಁದ॒ತೇನ್ದ್ರಂ॒-ವಾಁಜ॑-ಞ್ಜಾಪಯ॒ತೇನ್ದ್ರೋ॒ ವಾಜ॑ಮಜಯಿ॒-ದಿತ್ಯಾ॑ಹ । ಏ॒ಷ ವಾ ಏ॒ತರ್​ಹೀನ್ದ್ರಃ॑ । ಯೋ ಯಜ॑ತೇ । ಯಜ॑ಮಾನ ಏ॒ವ ವಾಜ॒ಮುಜ್ಜ॑ಯತಿ ॥ ಸ॒ಪ್ತದ॑ಶ ಪ್ರವ್ಯಾ॒ಧಾನಾ॒ಜಿ-ನ್ಧಾ॑ವನ್ತಿ । ಸ॒ಪ್ತ॒ದ॒ಶಗ್ಗ್​ ಸ್ತೋ॒ತ್ರ-ಮ್ಭ॑ವತಿ । ಸ॒ಪ್ತದ॑ಶ ಸಪ್ತದಶ ದೀಯನ್ತೇ ॥ 33 ॥

ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒-ರಾಪ್ತ್ಯೈ᳚ ॥ ಅರ್ವಾ॑-ಽಸಿ॒ ಸಪ್ತಿ॑ರಸಿ ವಾ॒ಜ್ಯ॑ಸೀತ್ಯಾ॑ಹ । ಅ॒ಗ್ನಿರ್ವಾ ಅರ್ವಾ᳚ । ವಾ॒ಯು-ಸ್ಸಪ್ತಿಃ॑ । ಆ॒ದಿ॒ತ್ಯೋ ವಾ॒ಜೀ । ಏ॒ತಾಭಿ॑ರೇ॒ವಾಸ್ಮೈ॑ ದೇ॒ವತಾ॑ಭಿ-ರ್ದೇವರ॒ಥಂ-ಯುಁ॑ನಕ್ತಿ ॥ ಪ್ರ॒ಷ್ಟಿ॒ವಾ॒ಹಿನಂ॑-ಯುಁನಕ್ತಿ । ಪ್ರ॒ಷ್ಟಿ॒ವಾ॒ಹೀ ವೈ ದೇ॑ವರ॒ಥಃ । ದೇ॒ವ॒ರ॒ಥಮೇ॒ವಾಸ್ಮೈ॑ ಯುನಕ್ತಿ ॥ 34 ॥

ವಾಜಿ॑ನೋ॒ ವಾಜ॑-ನ್ಧಾವತ॒ ಕಾಷ್ಠಾ᳚-ಙ್ಗಚ್ಛ॒ತೇತ್ಯಾ॑ಹ । ಸು॒ವ॒ರ್ಗೋ ವೈ ಲೋ॒ಕಃ ಕಾಷ್ಠಾ᳚ । ಸು॒ವ॒ರ್ಗಮೇ॒ವ ಲೋ॒ಕಂ-ಯಁ॑ನ್ತಿ ॥ ಸು॒ವ॒ರ್ಗಂ-ವಾಁ ಏ॒ತೇ ಲೋ॒ಕಂ-ಯಁ॑ನ್ತಿ । ಯ ಆ॒ಜಿ-ನ್ಧಾವ॑ನ್ತಿ ॥ ಪ್ರಾಞ್ಚೋ॑ ಧಾವನ್ತಿ । ಪ್ರಾಂಇ॑ವ॒ ಹಿ ಸು॑ವ॒ರ್ಗೋ ಲೋ॒ಕಃ ॥ ಚ॒ತ॒ಸೃಭಿ॒ರನು॑ ಮನ್ತ್ರಯತೇ । ಚ॒ತ್ವಾರಿ॒ ಛನ್ದಾಗ್ಂ॑ಸಿ । ಛನ್ದೋ॑ಭಿರೇ॒ವೈನಾ᳚ನ್-ಥ್ಸುವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ ॥ 35 ॥

ಪ್ರ ವಾ ಏ॒ತೇ᳚-ಽಸ್ಮಾಲ್-ಲೋ॒ಕಾಚ್ಚ್ಯ॑ವನ್ತೇ । ಯ ಆ॒ಜಿ-ನ್ಧಾವ॑ನ್ತಿ । ಉದ॑ಞ್ಚ॒ ಆವ॑ರ್ತನ್ತೇ । ಅ॒ಸ್ಮಾದೇ॒ವ ತೇನ॑ ಲೋ॒ಕಾನ್ನಯ॑ನ್ತಿ ॥ ರ॒ಥ॒ವಿ॒ಮೋ॒ಚ॒ನೀಯ॑-ಞ್ಜುಹೋತಿ॒ ಪ್ರತಿ॑ಷ್ಠಿತ್ಯೈ ॥ ಆ ಮಾ॒ ವಾಜ॑ಸ್ಯ ಪ್ರಸ॒ವೋ ಜ॑ಗಮ್ಯಾ॒ದಿತ್ಯಾ॑ಹ । ಅನ್ನಂ॒-ವೈಁ ವಾಜಃ॑ । ಅನ್ನ॑ಮೇ॒ವಾವ॑ರುನ್ಧೇ ॥ ಯ॒ಥಾ॒ಲೋ॒ಕಂ-ವಾಁ ಏ॒ತ ಉಜ್ಜ॑ಯನ್ತಿ । ಯ ಆ॒ಜಿ-ನ್ಧಾವ॑ನ್ತಿ ॥ 36 ॥

ಕೃ॒ಷ್ಣಲ॑-ಙ್ಕೃಷ್ಣಲಂ-ವಾಁಜ॒ಸೃದ್ಭ್ಯಃ॒ ಪ್ರಯ॑ಚ್ಛತಿ । ಯಮೇ॒ವ ತೇ ವಾಜಂ॑-ಲೋಁ॒ಕಮು॒ಜ್ಜಯ॑ನ್ತಿ । ತ-ಮ್ಪ॑ರಿ॒ಕ್ರೀಯಾ-ವ॑ರುನ್ಧೇ ॥ ಏ॒ಕ॒ಧಾ ಬ್ರ॒ಹ್ಮಣ॒ ಉಪ॑ಹರತಿ । ಏ॒ಕ॒ಧೈವ ಯಜ॑ಮಾನೇ ವೀ॒ರ್ಯ॑-ನ್ದಧಾತಿ ॥ ದೇ॒ವಾ ವಾ ಓಷ॑ಧೀಷ್ವಾ॒ಜಿಮ॑ಯುಃ । ತಾ ಬೃಹ॒ಸ್ಪತಿ॒-ರುದ॑ಜಯತ್ । ಸ ನೀ॒ವಾರಾ॒ನ್ನಿರ॑ವೃಣೀತ । ತನ್ನೀ॒ವಾರಾ॑ಣಾ-ನ್ನೀವಾರ॒ತ್ವಮ್ ॥ ನೈ॒ವಾ॒ರಶ್ಚ॒ರು-ರ್ಭ॑ವತಿ ॥ 37 ॥

ಏ॒ತದ್ವೈ ದೇ॒ವಾನಾ᳚-ಮ್ಪರ॒ಮಮನ್ನ᳚ಮ್ । ಯನ್ನೀ॒ವಾರಾಃ᳚ । ಪ॒ರ॒ಮೇಣೈ॒ವಾಸ್ಮಾ॑ ಅ॒ನ್ನಾದ್ಯೇ॒-ನಾವ॑ರ-ಮ॒ನ್ನಾದ್ಯ॒ಮವ॑ರುನ್ಧೇ ॥ ಸ॒ಪ್ತದ॑ಶಶರಾವೋ ಭವತಿ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒-ರಾಪ್ತ್ಯೈ᳚ ॥ ಖ್ಷೀ॒ರೇ ಭ॑ವತಿ । ರುಚ॑ಮೇ॒ವಾಸ್ಮಿ॑ನ್-ದಧಾತಿ ॥ ಸ॒ರ್ಪಿಷ್ವಾ᳚-ನ್ಭವತಿ ಮೇದ್ಧ್ಯ॒ತ್ವಾಯ॑ ॥ ಬಾ॒ರ್॒ಹ॒ಸ್ಪ॒ತ್ಯೋ ವಾ ಏ॒ಷ ದೇ॒ವತ॑ಯಾ ॥ 38 ॥

ಯೋ ವಾ॑ಜ॒ಪೇಯೇ॑ನ॒ ಯಜ॑ತೇ । ಬಾ॒ರ್॒ಹ॒ಸ್ಪ॒ತ್ಯ ಏ॒ಷ ಚ॒ರುಃ ॥ ಅಶ್ವಾ᳚ನ್-ಥ್ಸರಿಷ್ಯ॒ತ-ಸ್ಸ॒ಸ್ರುಷ॒ಶ್ಚಾವ॑-ಘ್ರಾಪಯತಿ । ಯಮೇ॒ವ ತೇ ವಾಜಂ॑-ಲೋಁ॒ಕಮು॒ಜ್ಜಯ॑ನ್ತಿ । ತಮೇ॒ವಾವ॑ರುನ್ಧೇ ॥ ಅಜೀ॑ಜಿಪತ ವನಸ್ಪತಯ॒ ಇನ್ದ್ರಂ॒-ವಾಁಜಂ॒-ವಿಁಮು॑ಚ್ಯದ್ಧ್ವ॒ಮಿತಿ॑ ದುನ್ದು॒ಭೀನ್. ವಿಮು॑ಞ್ಚತಿ । ಯಮೇ॒ವ ತೇ ವಾಜಂ॑-ಲೋಁ॒ಕಮಿ॑ನ್ದ್ರಿ॒ಯ-ನ್ದು॑ನ್ದು॒ಭಯ॑ ಉ॒ಜ್ಜಯ॑ನ್ತಿ । ತಮೇ॒ವಾ-ವ॑ರುನ್ಧೇ ॥ 39 ॥
(ಅ॒ಭಿಜ॑ಯತಿ॒ - ವಾ ಏ॒ಷಾ ವಾಗ್ - ದೀ॑ಯನ್ತೇ - ಽಸ್ಮೈ ಯುನಕ್ತಿ - ಗಮಯತಿ॒ - ಯ ಆ॒ಜಿ-ನ್ಧಾವ॑ನ್ತಿ - ಭವತಿ - ದೇ॒ವತ॑ಯಾ॒ - +-ಽಷ್ಟೌ ಚ॑) (ಅ. 6)

ಅನುವಾಕಂ 7 - ಯೂಪಾರೋಹಣಂ
ತಾ॒ರ್ಪ್ಯಂ-ಯಁಜ॑ಮಾನ॒-ಮ್ಪರಿ॑ಧಾಪಯತಿ । ಯ॒ಜ್ಞೋ ವೈ ತಾ॒ರ್ಪ್ಯಮ್ । ಯ॒ಜ್ಞೇನೈ॒ವೈನ॒ಗ್ಂ॒ ಸಮ॑ರ್ಧಯತಿ । ದ॒ರ್ಭ॒ಮಯ॒-ಮ್ಪರಿ॑ಧಾಪಯತಿ । ಪ॒ವಿತ್ರಂ॒-ವೈಁ ದ॒ರ್ಭಾಃ । ಪು॒ನಾತ್ಯೇ॒ವೈನ᳚ಮ್ । ವಾಜಂ॒-ವಾಁ ಏ॒ಷೋ-ಽವ॑ರುರುಥ್ಸತೇ । ಯೋ ವಾ॑ಜ॒ಪೇಯೇ॑ನ॒ ಯಜ॑ತೇ । ಓಷ॑ಧಯಃ॒ ಖಲು॒ ವೈ ವಾಜಃ॑ । ಯ-ದ್ದ॑ರ್ಭ॒ಮಯ॑-ಮ್ಪರಿಧಾ॒ಪಯ॑ತಿ ॥ 40 ॥

ವಾಜ॒ಸ್ಯಾವ॑-ರುದ್ಧ್ಯೈ ॥ ಜಾಯ॒ ಏಹಿ॒ ಸುವೋ॒ ರೋಹಾ॒ವೇತ್ಯಾ॑ಹ । ಪತ್ನಿ॑ಯಾ ಏ॒ವೈಷ ಯ॒ಜ್ಞಸ್ಯಾ᳚ನ್-ವಾರ॒ಮ್ಭೋ-ಽನ॑ವಚ್ಛಿತ್ಯೈ ॥ ಸ॒ಪ್ತದ॑ಶಾ-ರತ್ನಿ॒ರ್ಯೂಪೋ॑ ಭವತಿ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒ರಾಪ್ತ್ಯೈ᳚ ॥ ತೂ॒ಪ॒ರ-ಶ್ಚತು॑ರಶ್ರಿ-ರ್ಭವತಿ ॥ ಗೌ॒ಧೂ॒ಮ-ಞ್ಚ॒ಷಾಲ᳚ಮ್ । ನ ವಾ ಏ॒ತೇ ವ್ರೀ॒ಹಯೋ॒ ನ ಯವಾಃ᳚ । ಯ-ದ್ಗೋ॒ಧೂಮಾಃ᳚ ॥ 41 ॥

ಏ॒ವಮಿ॑ವ॒ ಹಿ ಪ್ರ॒ಜಾಪ॑ತಿ॒-ಸ್ಸಮೃ॑ದ್ಧ್ಯೈ । ಅಥೋ॑ ಅ॒ಮುಮೇ॒ವಾಸ್ಮೈ॑ ಲೋ॒ಕಮನ್ನ॑ವನ್ತ-ಙ್ಕರೋತಿ ॥ ವಾಸೋ॑ಭಿ-ರ್ವೇಷ್ಟಯತಿ । ಏ॒ಷ ವೈ ಯಜ॑ಮಾನಃ । ಯದ್ಯೂಪಃ॑ । ಸ॒ರ್ವ॒ದೇ॒ವ॒ತ್ಯಂ॑-ವಾಁಸಃ॑ । ಸರ್ವಾ॑ಭಿರೇ॒ವೈನ॑-ನ್ದೇ॒ವತಾ॑ಭಿ॒-ಸ್ಸಮ॑ರ್ಧಯತಿ । ಅಥೋ॑ ಆ॒ಕ್ರಮ॑ಣಮೇ॒ವ ತಥ್ಸೇತುಂ॒-ಯಁಜ॑ಮಾನಃ ಕುರುತೇ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ದ್ವಾದ॑ಶ ವಾಜಪ್ರಸ॒ವೀಯಾ॑ನಿ ಜುಹೋತಿ ॥ 42 ॥

ದ್ವಾದ॑ಶ॒ ಮಾಸಾ᳚-ಸ್ಸಂ​ವಁಥ್ಸ॒ರಃ । ಸಂ॒​ವಁ॒ಥ್ಸ॒ರಮೇ॒ವ ಪ್ರೀ॑ಣಾತಿ । ಅಥೋ॑ ಸಂ​ವಁಥ್ಸ॒ರಮೇ॒ವಾಸ್ಮಾ॒ ಉಪ॑ ದಧಾತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ದ॒ಶಭಿಃ॒ ಕಲ್ಪೈ॑ ರೋಹತಿ । ನವ॒ ವೈ ಪುರು॑ಷೇ ಪ್ರಾ॒ಣಾಃ । ನಾಭಿ॑ರ್ದಶ॒ಮೀ । ಪ್ರಾ॒ಣಾನೇ॒ವ ಯ॑ಥಾಸ್ಥಾ॒ನ-ಙ್ಕ॑ಲ್ಪಯಿ॒ತ್ವಾ । ಸು॒ವ॒ರ್ಗಂ-ಲೋಁ॒ಕಮೇ॑ತಿ । ಏ॒ತಾವ॒ದ್ವೈ ಪುರು॑ಷಸ್ಯ॒ ಸ್ವಮ್ ॥ 43 ॥

ಯಾವ॑ತ್-ಪ್ರಾ॒ಣಾಃ । ಯಾವ॑ದೇ॒ವಾಸ್ಯಾಸ್ತಿ॑ । ತೇನ॑ ಸ॒ಹ ಸು॑ವ॒ರ್ಗಂ-ಲೋಁ॒ಕಮೇ॑ತಿ ॥ ಸುವ॑ರ್ದೇ॒ವಾಗ್ಂ ಅ॑ಗ॒ನ್ಮೇತ್ಯಾ॑ಹ । ಸು॒ವ॒ರ್ಗಮೇ॒ವ ಲೋ॒ಕಮೇ॑ತಿ । ಅ॒ಮೃತಾ॑ ಅಭೂ॒ಮೇತ್ಯಾ॑ಹ । ಅ॒ಮೃತ॑ಮಿವ॒ ಹಿ ಸು॑ವ॒ರ್ಗೋ ಲೋ॒ಕಃ । ಪ್ರ॒ಜಾಪ॑ತೇಃ ಪ್ರ॒ಜಾ ಅ॑ಭೂ॒ಮೇತ್ಯಾ॑ಹ । ಪ್ರಾ॒ಜಾ॒ಪ॒ತ್ಯೋ ವಾ ಅ॒ಯಂ-ಲೋಁ॒ಕಃ । ಅ॒ಸ್ಮಾದೇ॒ವ ತೇನ॑ ಲೋ॒ಕಾನ್ನೈತಿ॑ ॥ 44 ॥

ಸಮ॒ಹ-ಮ್ಪ್ರ॒ಜಯಾ॒ ಸ-ಮ್ಮಯಾ᳚ ಪ್ರ॒ಜೇತ್ಯಾ॑ಹ । ಆ॒ಶಿಷ॑ಮೇ॒ವೈತಾ-ಮಾಶಾ᳚ಸ್ತೇ ॥ ಆ॒ಸ॒ಪು॒ಟೈ-ರ್ಘ್ನ॑ನ್ತಿ । ಅನ್ನಂ॒-ವಾಁ ಇ॒ಯಮ್ । ಅ॒ನ್ನಾದ್ಯೇ॑ನೈ॒ವೈನ॒ಗ್ಂ॒ ಸಮ॑ರ್ಧಯನ್ತಿ । ಊಷೈ᳚-ರ್ಘ್ನನ್ತಿ । ಏ॒ತೇ ಹಿ ಸಾ॒ಖ್ಷಾದನ್ನ᳚ಮ್ । ಯದೂಷಾಃ᳚ । ಸಾ॒ಖ್ಷಾದೇ॒ವೈನ॑-ಮ॒ನ್ನಾದ್ಯೇ॑ನ॒ ಸಮ॑ರ್ಧಯನ್ತಿ ॥ ಪು॒ರಸ್ತಾ᳚ತ್-ಪ್ರ॒ತ್ಯಞ್ಚ᳚-ಙ್ಘ್ನನ್ತಿ ॥ 45 ॥

ಪು॒ರಸ್ತಾ॒ದ್ಧಿ ಪ್ರ॑ತೀ॒ಚೀನ॒-ಮನ್ನ॑ಮ॒ದ್ಯತೇ᳚ ॥ ಶೀ॒ರ್॒ಷ॒ತೋ ಘ್ನ॑ನ್ತಿ । ಶೀ॒ರ್॒ಷ॒ತೋ ಹ್ಯನ್ನ॑ಮ॒ದ್ಯತೇ᳚ ॥ ದಿ॒ಗ್ಭ್ಯೋ ಘ್ನ॑ನ್ತಿ । ದಿ॒ಗ್ಭ್ಯ ಏ॒ವಾಸ್ಮಾ॑ ಅ॒ನ್ನಾದ್ಯ॒-ಮವ॑ರುನ್ಧತೇ ॥ ಈ॒ಶ್ವ॒ರೋ ವಾ ಏ॒ಷ ಪರಾಂ᳚-ಪ್ರ॒ದಘಃ॑ । ಯೋ ಯೂಪ॒ಗ್ಂ॒ ರೋಹ॑ತಿ ॥ ಹಿರ॑ಣ್ಯಮ॒ದ್ಧ್ಯ-ವ॑ರೋಹತಿ । ಅ॒ಮೃತಂ॒-ವೈಁ ಹಿರ॑ಣ್ಯಮ್ । ಅ॒ಮೃತಗ್ಂ॑ ಸುವ॒ರ್ಗೋ ಲೋ॒ಕಃ ॥ 46 ॥

ಅ॒ಮೃತ॑ ಏ॒ವ ಸು॑ವ॒ರ್ಗೇ ಲೋ॒ಕೇ ಪ್ರತಿ॑ ತಿಷ್ಠತಿ ॥ ಶ॒ತಮಾ॑ನ-ಮ್ಭವತಿ । ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯಃ । ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ ತಿಷ್ಠತಿ ॥ ಪುಷ್ಟ್ಯೈ॒ ವಾ ಏ॒ತ-ದ್ರೂ॒ಪಮ್ । ಯದ॒ಜಾ । ತ್ರಿ-ಸ್ಸಂ॑​ವಁಥ್ಸ॒ರಸ್ಯಾ॒ನ್ಯಾನ್-ಪ॒ಶೂ-ನ್ಪರಿ॒ ಪ್ರಜಾ॑ಯತೇ ॥ ಬ॒ಸ್ತಾ॒ಜಿ॒ನ-ಮ॒ದ್ಧ್ಯವ॑ ರೋಹತಿ । ಪುಷ್ಟ್ಯಾ॑ಮೇ॒ವ ಪ್ರ॒ಜನ॑ನೇ॒ ಪ್ರತಿ॑ತಿಷ್ಠತಿ ॥ 47 ॥
(ಪ॒ರಿ॒ಧಾ॒ಪಯ॑ತಿ - ಗೋ॒ಧೂಮಾ॑ - ಜುಹೋತಿ॒ - ಸ್ವಂ - ನೈತಿ॑ - ಪ್ರ॒ತ್ಯಞ್ಜ॑-ಙ್ಘ್ನನ್ತಿ - ಲೋ॒ಕೋ - +ನವ॑ ಚ (ಅ. 7)

ಅನುವಾಕಂ 8 - ಅನ್ನಹೋಮಾಃ, ಅಭಿಷೇಕಶ್ಚ
ಸ॒ಪ್ತಾನ್ನ॑-ಹೋ॒ಮಾಞ್ಜು॑ಹೋತಿ । ಸ॒ಪ್ತ ವಾ ಅನ್ನಾ॑ನಿ । ಯಾವ॑ನ್ತ್ಯೇ॒ವಾನ್ನಾ॑ನಿ । ತಾನ್ಯೇ॒ವಾವ॑ರುನ್ಧೇ । ಸ॒ಪ್ತ ಗ್ರಾ॒ಮ್ಯಾ ಓಷ॑ಧಯಃ । ಸ॒ಪ್ತಾರ॒ಣ್ಯಾಃ । ಉ॒ಭಯೀ॑ಷಾ॒-ಮವ॑ರುದ್ಧ್ಯೈ ॥ ಅನ್ನ॑ಸ್ಯಾ-ನ್ನಸ್ಯ ಜುಹೋತಿ । ಅನ್ನ॑ಸ್ಯಾನ್ನ॒ಸ್ಯಾ-ವ॑ರುದ್ಧ್ಯೈ ॥ ಯ-ದ್ವಾ॑ಜಪೇಯಯಾ॒ಜ್ಯ-ನ॑ವರುದ್ಧಸ್ಯಾಶ್ಞೀ॒ಯಾತ್ ॥ 48 ॥

ಅವ॑ರುದ್ಧೇನ॒ ವ್ಯೃ॑ದ್ಧ್ಯೇತ । ಸರ್ವ॑ಸ್ಯ ಸಮವ॒ದಾಯ॑ ಜುಹೋತಿ । ಅನ॑ವರುದ್ಧ॒-ಸ್ಯಾವ॑ರುದ್ಧ್ಯೈ ॥ ಔದು॑ಮ್ಬರೇಣ ಸ್ರು॒ವೇಣ॑ ಜುಹೋತಿ । ಊರ್ಗ್ವಾ ಅನ್ನ॑-ಮುದು॒ಮ್ಬರಃ॑ । ಊ॒ರ್ಜ ಏ॒ವಾನ್ನಾದ್ಯ॒ಸ್ಯಾವ॑ರುದ್ಧ್ಯೈ ॥ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತ್ಯಾ॑ಹ । ಸ॒ವಿ॒ತೃ ಪ್ರ॑ಸೂತ ಏ॒ವೈನ॒-ಮ್ಬ್ರಹ್ಮ॑ಣಾ ದೇ॒ವತಾ॑ಭಿ-ರ॒ಭಿಷಿ॑ಞ್ಚತಿ ॥ ಅನ್ನ॑ಸ್ಯಾನ್ನಸ್ಯಾ॒ಭಿಷಿ॑ಞ್ಚತಿ । ಅನ್ನ॑ಸ್ಯಾನ್ನ॒ಸ್ಯಾವ॑ರುದ್ಧ್ಯೈ ॥ 49 ॥

ಪು॒ರಸ್ತಾ᳚ತ್-ಪ್ರ॒ತ್ಯಞ್ಚ॑-ಮ॒ಭಿಷಿ॑ಞ್ಚತಿ । ಪು॒ರಸ್ತಾ॒ದ್ಧಿ-ಪ್ರ॑ತೀ॒ಚೀನ॒-ಮನ್ನ॑ಮ॒ದ್ಯತೇ᳚ । ಶೀ॒ರ್॒ಷ॒ತೋ॑-ಽಭಿಷಿ॑ಞ್ಚತಿ । ಶೀ॒ರ್॒ಷ॒ತೋ ಹ್ಯನ್ನ॑ಮ॒ದ್ಯತೇ᳚ ॥ ಆಮುಖಾ॑ದ॒ನ್ವವ॑ ಸ್ರಾವಯತಿ । ಮು॒ಖ॒ತ ಏ॒ವಾಸ್ಮಾ॑ ಅ॒ನ್ನಾದ್ಯ॑-ನ್ದಧಾತಿ ॥ ಅ॒ಗ್ನೇಸ್ತ್ವಾ॒ ಸಾಮ್ರಾ᳚ಜ್ಯೇನಾ॒ಭಿಷಿ॑ಞ್ಚಾ॒ಮೀತ್ಯಾ॑ಹ । ಏ॒ಷ ವಾ ಅ॒ಗ್ನೇ-ಸ್ಸ॒ವಃ । ತೇನೈ॒ವೈನ॑-ಮ॒ಭಿಷಿ॑ಞ್ಚತಿ । ಇನ್ದ್ರ॑ಸ್ಯ ತ್ವಾ॒ ಸಾಮ್ರಾ᳚ಜ್ಯೇನಾ॒ಭಿಷಿ॑ಞ್ಚಾ॒ಮೀತ್ಯಾ॑ಹ ॥ 50 ॥

ಇ॒ನ್ದ್ರಿ॒ಯ-ಮೇ॒ವಾಸ್ಮಿ॑-ನ್ನೇ॒ತೇನ॑ ದಧಾತಿ । ಬೃಹ॒ಸ್ಪತೇ᳚ಸ್ತ್ವಾ॒ ಸಾಮ್ರಾ᳚ಜ್ಯೇನಾ॒ಭಿಷಿ॑ಞ್ಚಾ॒-ಮೀತ್ಯಾ॑ಹ । ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿಃ॑ । ಬ್ರಹ್ಮ॑ಣೈ॒ವೈನ॑-ಮ॒ಭಿಷಿ॑ಞ್ಚತಿ ॥ ಸೋ॒ಮ॒ಗ್ರ॒ಹಾಗ್​ಶ್ಚಾ॑-ವದಾನೀ॒ಯಾನಿ॑ ಚ॒ರ್ತ್ವಿಗ್ಭ್ಯ॒ ಉಪ॑ ಹರನ್ತಿ । ಅ॒ಮುಮೇ॒ವ ತೈ-ರ್ಲೋ॒ಕ-ಮನ್ನ॑ವನ್ತ-ಙ್ಕರೋತಿ । ಸು॒ರಾ॒ಗ್ರ॒ಹಾಗ್​ಶ್ಚಾ॑-ನವದಾನೀ॒ಯಾನಿ॑ ಚ ವಾಜ॒ಸೃದ್ಭ್ಯಃ॑ । ಇ॒ಮಮೇ॒ವ ತೈ-ರ್ಲೋ॒ಕ-ಮನ್ನ॑ವನ್ತ-ಙ್ಕರೋತಿ । ಅಥೋ॑ ಉ॒ಭಯೀ᳚ಷ್ವೇ॒ವಾಭಿಷಿ॑ಚ್ಯತೇ ॥ ವಿ॒ಮಾ॒ಥ-ಙ್ಕು॑ರ್ವತೇ ವಾಜ॒ಸೃತಃ॑ ॥ 51 ॥

ಇ॒ನ್ದ್ರಿ॒ಯಸ್ಯಾವ॑ರುದ್ಧ್ಯೈ ॥ ಅನಿ॑ರುಕ್ತಾಭಿಃ ಪ್ರಾತಸ್ಸವ॒ನೇ ಸ್ತು॑ವತೇ । ಅನಿ॑ರುಕ್ತಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒ರಾಪ್ತ್ಯೈ᳚ । ವಾಜ॑ವತೀಭಿ॒-ರ್ಮಾದ್ಧ್ಯ॑ನ್ದಿನೇ । ಅನ್ನಂ॒-ವೈಁ ವಾಜಃ॑ । ಅನ್ನ॑ಮೇ॒ವಾ-ವ॑ರುನ್ಧೇ । ಶಿ॒ಪಿ॒ವಿ॒ಷ್ಟವ॑ತೀಭಿ-ಸ್ತೃತೀಯಸವ॒ನೇ । ಯ॒ಜ್ಞೋ ವೈ ವಿಷ್ಣುಃ॑ । ಪ॒ಶವ॒-ಶ್ಶಿಪಿಃ॑ । ಯ॒ಜ್ಞ ಏ॒ವ ಪ॒ಶುಷು॒ ಪ್ರತಿ॑ ತಿಷ್ಠತಿ ॥ ಬೃ॒ಹದನ್ತ್ಯ॑-ಮ್ಭವತಿ । ಅನ್ತ॑ಮೇ॒ವೈನಗ್ಗ್॑ ಶ್ರಿ॒ಯೈ ಗ॑ಮಯತಿ ॥ 52 ॥
(ಅ॒ಶ್ಞೀ॒ಯಾ - ದನ್ನ॑ಸ್ಯಾನ್ನ॒ಸ್ಯಾ ವ॑ರುದ್ಧ್ಯಾ॒ - ಇನ್ದ್ರ॑ಸ್ಯ ತ್ವಾ॒ ಸಾಮ್ರಾ᳚ಜ್ಯೇನಾ॒ಭಿಷಿ॑ಞ್ಚಾ॒ ಮೀತ್ಯಾ॑ಹ-ವಾಜ॒ಸೃತಃ॒ - ಶಿಪಿ॒ ಸ್ತ್ರೀಣಿ॑ ಚ) (ಅ. 8)

ಅನುವಾಕಂ 9 - ಅತಿಗ್ರಾಹ್ಯಾಃ, ಪಞ್ಚೈನ್ದ್ರಾಃ
ನೃ॒ಷದ॒-ನ್ತ್ವೇತ್ಯಾ॑ಹ । ಪ್ರ॒ಜಾ ವೈ ನೄನ್ । ಪ್ರ॒ಜಾನಾ॑ಮೇ॒ವೈತೇನ॑ ಸೂಯತೇ । ದ್ರು॒ಷದ॒ಮಿತ್ಯಾ॑ಹ । ವನ॒ಸ್ಪತ॑ಯೋ॒ ವೈ ದ್ರು । ವನ॒ಸ್ಪತೀ॑ನಾಮೇ॒ವೈ ತೇನ॑ ಸೂಯತೇ । ಭು॒ವ॒ನ॒ಸದ॒-ಮಿತ್ಯಾ॑ಹ । ಯ॒ದಾ ವೈ ವಸೀ॑ಯಾ॒-ನ್ಭವ॑ತಿ । ಭುವ॑ನಮಗ॒ನ್ನಿತಿ॒ ವೈ ತಮಾ॑ಹುಃ । ಭುವ॑ನಮೇ॒ವೈತೇನ॑ ಗಚ್ಛತಿ ॥ 53 ॥

ಅ॒ಫ್ಸು॒ಷದ॑-ನ್ತ್ವಾ ಘೃತ॒ಸದ॒-ಮಿತ್ಯಾ॑ಹ । ಅ॒ಪಾಮೇ॒ವೈತೇನ॑ ಘೃ॒ತಸ್ಯ॑ ಸೂಯತೇ । ವ್ಯೋ॒ಮ॒ಸದ॒-ಮಿತ್ಯಾ॑ಹ । ಯ॒ದಾ ವೈ ವಸೀ॑ಯಾ॒-ನ್ಭವ॑ತಿ । ವ್ಯೋ॑ಮಾಗ॒ನ್ನಿತಿ॒ ವೈ ತಮಾ॑ಹುಃ । ವ್ಯೋ॑ಮೈ॒ವೈತೇನ॑ ಗಚ್ಛತಿ ॥ ಪೃ॒ಥಿ॒ವಿ॒ಷದ॑-ನ್ತ್ವಾ-ಽನ್ತರಿಖ್ಷ॒ಸದ॒-ಮಿತ್ಯಾ॑ಹ । ಏ॒ಷಾಮೇ॒ವೈತೇನ॑ ಲೋ॒ಕಾನಾಗ್ಂ॑ ಸೂಯತೇ । ತಸ್ಮಾ᳚-ದ್ವಾಜಪೇ-ಯಯಾ॒ಜೀ ನ ಕ-ಞ್ಚ॒ನ ಪ್ರ॒ತ್ಯವ॑ರೋಹತಿ । ಅಪೀ॑ವ॒ ಹಿ ದೇ॒ವತಾ॑ನಾಗ್ಂ ಸೂ॒ಯತೇ᳚ ॥ 54 ॥

ನಾ॒ಕ॒ಸದ॒-ಮಿತ್ಯಾ॑ಹ । ಯ॒ದಾವೈ ವಸೀ॑ಯಾ॒-ನ್ಭವ॑ತಿ । ನಾಕ॑ಮಗ॒ನ್ನಿತಿ॒ ವೈ ತಮಾ॑ಹುಃ । ನಾಕ॑ಮೇ॒ವೈತೇನ॑ ಗಚ್ಛತಿ ॥ ಯೇ ಗ್ರಹಾಃ᳚ ಪಞ್ಚಜ॒ನೀನಾ॒ ಇತ್ಯಾ॑ಹ । ಪ॒ಞ್ಚ॒ಜ॒ನಾನಾ॑-ಮೇ॒ವೈತೇನ॑ ಸೂಯತೇ ॥ ಅ॒ಪಾಗ್ಂ ರಸ॒ಮುದ್ವ॑ಯಸ॒-ಮಿತ್ಯಾ॑ಹ । ಅ॒ಪಾಮೇ॒ವೈತೇನ॒ ರಸ॑ಸ್ಯ ಸೂಯತೇ । ಸೂರ್ಯ॑ರಶ್ಮಿಗ್ಂ ಸ॒ಮಾಭೃ॑ತ॒-ಮಿತ್ಯಾ॑ಹ ಸಶುಕ್ರ॒ತ್ವಾಯ॑ ॥ 55 ॥
(ಗ॒ಚ್ಛ॒ತಿ॒ - ಸೂ॒ಯತೇ॒ - +ನವ॑ ಚ) (ಅ. 9)

ಅನುವಾಕಂ 10 - ಪಿಣ್ಡಪಿತೃಯಜ್ಞಃ ದರ್​ಶಪೂರ್ಣಮಾಸಬ್ರಾಹ್ಮಣಶೇಷಃ
ಇನ್ದ್ರೋ ವೃ॒ತ್ರಗ್ಂ ಹ॒ತ್ವಾ । ಅಸು॑ರಾ-ನ್ಪರಾ॒ಭಾವ್ಯ॑ । ಸೋ॑-ಽಮಾವಾ॒ಸ್ಯಾ᳚-ಮ್ಪ್ರತ್ಯಾಗ॑ಚ್ಛತ್ । ತೇ ಪಿ॒ತರಃ॑ ಪೂರ್ವೇ॒ದ್ಯು-ರಾಗ॑ಚ್ಛನ್ನ್ । ಪಿ॒ತೄನ್. ಯ॒ಜ್ಞೋ॑-ಽಗಚ್ಛತ್ । ತ-ನ್ದೇ॒ವಾಃ ಪುನ॑ರಯಾಚನ್ತ । ತಮೇ᳚ಭ್ಯೋ॒ ನ ಪುನ॑ರದದುಃ । ತೇ᳚-ಽಬ್ರುವ॒ನ್ ವರಂ॑-ವೃಁಣಾಮಹೈ । ಅಥ॑ ವಃ॒ ಪುನ॑ರ್ದಾಸ್ಯಾಮಃ । ಅ॒ಸ್ಮಭ್ಯ॑ಮೇ॒ವ ಪೂ᳚ರ್ವೇ॒ದ್ಯುಃ ಕ್ರಿ॑ಯಾತಾ॒ ಇತಿ॑ ॥ 56 ॥

ತಮೇ᳚ಭ್ಯಃ॒ ಪುನ॑ರದದುಃ । ತಸ್ಮಾ᳚ತ್-ಪಿ॒ತೃಭ್ಯಃ॑ ಪೂರ್ವೇ॒ದ್ಯುಃ ಕ್ರಿ॑ಯತೇ । ಯ-ತ್ಪಿ॒ತೃಭ್ಯಃ॑ ಪೂರ್ವೇ॒ದ್ಯುಃ ಕ॒ರೋತಿ॑ । ಪಿ॒ತೃಭ್ಯ॑ ಏ॒ವ ತ-ದ್ಯ॒ಜ್ಞ-ನ್ನಿ॒ಷ್ಕ್ರೀಯ॒ ಯಜ॑ಮಾನಃ॒ ಪ್ರತ॑ನುತೇ ॥ ಸೋಮಾ॑ಯ ಪಿ॒ತೃಪೀ॑ತಾಯ ಸ್ವ॒ಧಾ ನಮ॒ ಇತ್ಯಾ॑ಹ । ಪಿ॒ತುರೇ॒ವಾಧಿ॑ ಸೋಮಪೀ॒ಥಮವ॑ ರುನ್ಧೇ । ನ ಹಿ ಪಿ॒ತಾ ಪ್ರ॒ಮೀಯ॑ಮಾಣ॒ ಆಹೈ॒ಷ ಸೋ॑ಮಪೀ॒ಥ ಇತಿ॑ । ಇ॒ನ್ದ್ರಿ॒ಯಂ-ವೈಁ ಸೋ॑ಮಪೀ॒ಥಃ । ಇ॒ನ್ದ್ರಿ॒ಯಮೇ॒ವ ಸೋ॑ಮಪೀ॒ಥಮವ॑-ರುನ್ಧೇ । ತೇನ᳚ನ್ದ್ರಿ॒ಯೇಣ॑ ದ್ವಿ॒ತೀಯಾ᳚-ಞ್ಜಾ॒ಯಾಮ॒ಭ್ಯ॑ಶ್ಞುತೇ ॥ 57 ॥

ಏ॒ತ-ದ್ವೈ ಬ್ರಾಹ್ಮ॑ಣ-ಮ್ಪು॒ರಾ ವಾ॑ಜಶ್ರವ॒ಸಾ ವಿ॒ದಾಮ॑ಕ್ರನ್ನ್ । ತಸ್ಮಾ॒-ತ್ತೇ ದ್ವೇದ್ವೇ॑ ಜಾ॒ಯೇ ಅ॒ಭ್ಯಾ᳚ಖ್ಷತ । ಯ ಏ॒ವಂ-ವೇಁದ॑ । ಅ॒ಭಿ ದ್ವಿ॒ತೀಯಾ᳚-ಞ್ಜಾ॒ಯಾಮ॑ಶ್ಞುತೇ ॥ ಅ॒ಗ್ನಯೇ॑ ಕವ್ಯ॒ವಾಹ॑ನಾಯ ಸ್ವ॒ಧಾ ನಮ॒ ಇತ್ಯಾ॑ಹ । ಯ ಏ॒ವ ಪಿ॑ತೃ॒ಣಾಮ॒ಗ್ನಿಃ । ತ-ಮ್ಪ್ರೀ॑ಣಾತಿ ॥ ತಿ॒ಸ್ರ ಆಹು॑ತೀ-ರ್ಜುಹೋತಿ ॥ ತ್ರಿರ್ನಿದ॑ಧಾತಿ ॥ ಷಟ್-ಥ್ಸಮ್ಪ॑ದ್ಯನ್ತೇ ॥ 58 ॥

ಷಡ್ವಾ ಋ॒ತವಃ॑ । ಋ॒ತೂನೇ॒ವ ಪ್ರೀ॑ಣಾತಿ ॥ ತೂ॒ಷ್ಣೀ-ಮ್ಮೇಖ್ಷ॑ಣ॒-ಮಾದ॑ಧಾತಿ । ಅಸ್ತಿ॑ ವಾ॒ ಹಿ ಷ॒ಷ್ಠ ಋ॒ತುರ್ನ ವಾ᳚ ॥ ದೇ॒ವಾನ್. ವೈ ಪಿ॒ತೄ-ನ್ಪ್ರೀ॒ತಾನ್ । ಮ॒ನು॒ಷ್ಯಾಃ᳚ ಪಿ॒ತರೋ-ಽನು॒ ಪ್ರಪಿ॑ಪತೇ । ತಿ॒ಸ್ರ ಆಹು॑ತೀ-ರ್ಜುಹೋತಿ । ತ್ರಿರ್ನಿದ॑ಧಾತಿ । ಷಟ್-ಥ್ಸಮ್ಪ॑ದ್ಯನ್ತೇ । ಷಡ್ವಾ ಋ॒ತವಃ॑ ॥ 59 ॥

ಋ॒ತವಃ॒ ಖಲು॒ ವೈ ದೇ॒ವಾಃ ಪಿ॒ತರಃ॑ । ಋ॒ತೂನೇ॒ವ ದೇ॒ವಾ-ನ್ಪಿ॒ತೄ-ನ್ಪ್ರೀ॑ಣಾತಿ । ತಾನ್ಪ್ರೀ॒ತಾನ್ । ಮ॒ನು॒ಷ್ಯಾಃ᳚ ಪಿ॒ತರೋ-ಽನು॒ ಪ್ರಪಿ॑ಪತೇ ॥ ಸ॒ಕೃ॒ದಾ॒ಚ್ಛಿ॒ನ್ನ-ಮ್ಬ॒ರ್॒ಹಿ-ರ್ಭ॑ವತಿ । ಸ॒ಕೃದಿ॑ವ॒ ಹಿ ಪಿ॒ತರಃ॑ ॥ ತ್ರಿರ್ನಿದ॑ಧಾತಿ । ತೃ॒ತೀಯೇ॒ ವಾ ಇ॒ತೋ ಲೋ॒ಕೇ ಪಿ॒ತರಃ॑ । ತಾನೇ॒ವ ಪ್ರೀ॑ಣಾತಿ ॥ ಪರಾಂ॒ಆವ॑ರ್ತತೇ ॥ 60 ॥

ಹ್ಲೀಕಾ॒ ಹಿ ಪಿ॒ತರಃ॑ ॥ ಒಷ್ಮಣೋ᳚ ವ್ಯಾ॒ವೃತ॒ ಉಪಾ᳚ಸ್ತೇ । ಊ॒ಷ್ಮಭಾ॑ಗಾ॒ ಹಿ ಪಿ॒ತರಃ॑ ॥ ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ಪ್ರಾಶ್ಯಾಂ(3)ನ ಪ್ರಾಶ್ಯಾ(3)ಮಿತಿ॑ । ಯ-ತ್ಪ್ರಾ᳚ಶ್ಞೀ॒ಯಾತ್ । ಜನ್ಯ॒ಮನ್ನ॑ಮದ್ಯಾತ್ । ಪ್ರ॒ಮಾಯು॑ಕ-ಸ್ಸ್ಯಾತ್ । ಯನ್ನ ಪ್ರಾ᳚ಶ್ಞೀ॒ಯಾತ್ । ಅಹ॑ವಿ-ಸ್ಸ್ಯಾತ್ ॥ 61 ॥

ಪಿ॒ತೃಭ್ಯ॒ ಆವೃ॑ಶ್ಚ್ಯೇತ । ಅ॒ವ॒ಘ್ರೇಯ॑ಮೇ॒ವ । ತನ್ನೇವ॒ ಪ್ರಾಶಿ॑ತ॒-ನ್ನೇವಾಪ್ರಾ॑ಶಿತಮ್ ॥ ವೀ॒ರಂ-ವಾಁ॒ ವೈ ಪಿ॒ತರಃ॑ ಪ್ರ॒ಯನ್ತೋ॒ ಹರ॑ನ್ತಿ । ವೀ॒ರಂ-ವಾಁ॑ ದದತಿ । ದ॒ಶಾ-ಞ್ಛಿ॑ನತ್ತಿ । ಹರ॑ಣಭಾಗಾ॒ ಹಿ ಪಿ॒ತರಃ॑ । ಪಿ॒ತೄನೇ॒ವ ನಿ॒ರವ॑ದಯತೇ ॥ ಉತ್ತ॑ರ॒ ಆಯು॑ಷಿ॒ ಲೋಮ॑ ಛಿನ್ದೀತ । ಪಿ॒ತೃ॒ಣಾಗ್​ ಹ್ಯೇ॑ತರ್​ಹಿ॒ ನೇದೀ॑ಯಃ ॥ 62 ॥

ನಮ॑ಸ್ಕರೋತಿ । ನ॒ಮ॒ಸ್ಕಾ॒ರೋ ಹಿ ಪಿ॑ತೃ॒ಣಾಮ್ ॥ ನಮೋ॑ ವಃ ಪಿತರೋ॒ ರಸಾ॑ಯ । ನಮೋ॑ ವಃ ಪಿತರ॒-ಶ್ಶುಷ್ಮಾ॑ಯ । ನಮೋ॑ ವಃ ಪಿತರೋ ಜೀ॒ವಾಯ॑ । ನಮೋ॑ ವಃ ಪಿತರ-ಸ್ಸ್ವ॒ಧಾಯೈ᳚ । ನಮೋ॑ ವಃ ಪಿತರೋ ಮ॒ನ್ಯವೇ᳚ । ನಮೋ॑ ವಃ ಪಿತರೋ ಘೋ॒ರಾಯ॑ । ಪಿತ॑ರೋ॒ ನಮೋ॑ ವಃ । ಯ ಏ॒ತಸ್ಮಿ॑ನ್ ಁಲೋ॒ಕೇ ಸ್ಥ ॥ 63 ॥

ಯು॒ಷ್ಮಾಗ್​ಸ್ತೇ-ಽನು॑ । ಯೇ᳚-ಽಸ್ಮಿಁಲ್ಲೋ॒ಕೇ । ಮಾ-ನ್ತೇ ನು॑ । ಯ ಏ॒ತಸ್ಮಿ॑ಁಲ್ಲೋ॒ಕೇ ಸ್ಥ । ಯೂ॒ಯ-ನ್ತೇಷಾಂ॒-ವಁಸಿ॑ಷ್ಠಾ ಭೂಯಾಸ್ತ । ಯೇ᳚-ಽಸ್ಮಿಁಲ್ಲೋ॒ಕೇ । ಅ॒ಹ-ನ್ತೇಷಾಂ॒-ವಁಸಿ॑ಷ್ಠೋ ಭೂಯಾಸ॒ಮಿತ್ಯಾ॑ಹ । ವಸಿ॑ಷ್ಠ-ಸ್ಸಮಾ॒ನಾನಾ᳚-ಮ್ಭವತಿ । ಯ ಏ॒ವಂ-ವಿಁ॒ದ್ವಾನ್-ಪಿ॒ತೃಭ್ಯಃ॑ ಕ॒ರೋತಿ॑ ॥ ಏ॒ಷ ವೈ ಮ॑ನು॒ಷ್ಯಾ॑ಣಾಂ-ಯಁ॒ಜ್ಞಃ ॥ 64 ॥

ದೇ॒ವಾನಾಂ॒-ವಾಁ ಇತ॑ರೇ ಯ॒ಜ್ಞಾಃ । ತೇನ॒ ವಾ ಏ॒ತ-ತ್ಪಿ॑ತೃಲೋ॒ಕೇ ಚ॑ರತಿ ॥ ಯ-ತ್ಪಿ॒ತೃಭ್ಯಃ॑ ಕ॒ರೋತಿ॑ । ಸ ಈ᳚ಶ್ವ॒ರಃ ಪ್ರಮೇ॑ತೋಃ । ಪ್ರಾ॒ಜಾ॒ಪ॒ತ್ಯಯ॒ರ್ಚಾ ಪುನ॒ರೈತಿ॑ । ಯ॒ಜ್ಞೋ ವೈ ಪ್ರ॒ಜಾಪ॑ತಿಃ । ಯ॒ಜ್ಞೇನೈ॒ವ ಸ॒ಹ ಪುನ॒ರೈತಿ॑ । ನ ಪ್ರ॒ಮಾಯು॑ಕೋ ಭವತಿ ॥ ಪಿ॒ತೃ॒ಲೋ॒ಕೇ ವಾ ಏ॒ತ-ದ್ಯಜ॑ಮಾನಶ್ಚರತಿ । ಯ-ತ್ಪಿ॒ತೃಭ್ಯಃ॑ ಕ॒ರೋತಿ॑ । ಸ ಈ᳚ಶ್ವ॒ರ ಆರ್ತಿ॒ಮಾರ್ತೋಃ᳚ । ಪ್ರ॒ಜಾಪ॑ತಿ॒-ಸ್ತ್ವಾವೈನ॒-ನ್ತತ॒ ಉನ್ನೇ॑ತುಮರ್​ಹ॒ತೀತ್ಯಾ॑ಹುಃ । ಯ-ತ್ಪ್ರಾ॑ಜಾಪ॒ತ್ಯಯ॒ರ್ಚಾ ಪುನ॒ರೈತಿ॑ । ಪ್ರ॒ಜಾಪ॑ತಿರೇ॒ವೈನ॒-ನ್ತತ॒ ಉನ್ನ॑ಯತಿ । ನಾರ್ತಿ॒ಮಾರ್ಚ್ಛ॑ತಿ॒ ಯಜ॑ಮಾನಃ ॥ 65 ॥
(ಇತ್ಯ॑ - ಶ್ಞುತೇ - ಪದ್ಯನ್ತೇ - ಪದ್ಯನ್ತೇ॒ ಷಡ್ವಾ ಋ॒ತವೋ॑ - ವರ್ತ॒ತೇ-ಽ - ಹ॑ವಿ-ಸ್ಸ್ಯಾ॒ನ್ - ನೇದೀ॑ಯಃ॒ - ಸ್ಥ - ಯ॒ಜ್ಞೋ - ಯಜ॑ಮಾನಶ್ಚರತಿ॒ ಯ-ತ್ಪಿ॒ತೃಭ್ಯಃ॑ ಕ॒ರೋತಿ॒ ಪಞ್ಚ॑ ಚ) (ಅ. 10)

(ದೇ॒ವಾ॒ಸು॒ರಾ ಅ॒ಗ್ನೀಷೋಮ॑ಯೋ--ರ್ ದೇ॒ವಾ ವೈ ಯಥಾ॒ ದರ್​ಶಂ॑ - ದೇ॒ವಾ ವೈ ಯದ॒ನ್ಯೈ-ರ್ಗ್ರಹೈ᳚--ರ್ ಬ್ರಹ್ಮವಾ॒ದಿನೋ॒ ನಾಗ್ನಿ॑ಷ್ಟೋ॒ಮೋ ನ - ಸಾ॑ವಿ॒ತ್ರಂ - ದೇ॒ವಸ್ಯಾ॒ಹಂ - ತಾ॒ರ್ಪ್ಯಗ್ಂ - ಸ॒ಪ್ತಾನ್ನ॑ಹೋ॒ಮಾನ್ - ನೃ॒ಷದಂ॒ - ತ್ವೇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ ದಶ॑)

(ದೇ॒ವಾ॒ಸು॒ರಾ - ವಾ॒ಜ್ಯೇ॑ವೈನಂ॒ - ತಸ್ಮಾ᳚-ದ್ವಾಜಪೇಯಯಾ॒ಜೀ - ದೇ॒ವಸ್ಯಾ॒ಹಂ - ಁವಾಜ॒ಸ್ಯಾವ॑ರುದ್ಧ್ಯಾ- ಇನ್ದ್ರಿ॒ಯಮೇ॒ವಾಸ್ಮಿ॒ನ್॒. - ಹ್ಲೀಕಾ॒ ಹಿ ಪಿ॒ತರಃ॒ ಪಞ್ಚ॑ಷಷ್ಟಿಃ)

(ದೇ॒ವಾ॒ಸು॒ರಾ - ಯಜ॑ಮಾನಃ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ತೃತೀಯಃ ಪ್ರಪಾಠಕ-ಸ್ಸಮಾಪ್ತಃ ॥