ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಪ್ರಥಮಃ ಪ್ರಪಾಠಕಃ - ಅಗ್ನಿಹೋತ್ರಬ್ರಾಹ್ಮಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಅಗ್ನಿಹೋತ್ರಸ್ಯೋಪೋದ್ಧಾತಃ
ಅಙ್ಗಿ॑ರಸೋ॒ ವೈ ಸ॒ತ್ರಮಾ॑ಸತ । ತೇಷಾ॒-ಮ್ಪೃಶ್ನಿ॑-ರ್ಘರ್ಮ॒ಧುಗಾ॑ಸೀತ್ । ಸರ್ಜೀ॒ಷೇಣಾ॑ಜೀವತ್ । ತೇ᳚-ಽಬ್ರುವನ್ನ್ । ಕಸ್ಮೈ॒ ನು ಸ॒ತ್ರಮಾ᳚ಸ್ಮಹೇ । ಯೇ᳚-ಽಸ್ಯಾ ಓಷ॑ಧೀ॒ರ್ನ ಜ॒ನಯಾ॑ಮ॒ ಇತಿ॑ । ತೇ ದಿ॒ವೋ ವೃಷ್ಟಿ॑-ಮಸೃಜನ್ತ । ಯಾವ॑ನ್ತ-ಸ್ಸ್ತೋ॒ಕಾ ಅ॒ವಾಪ॑ದ್ಯನ್ತ । ತಾವ॑ತೀ॒ರೋಷ॑ಧಯೋ ಽಜಾಯನ್ತ ॥ ತಾ ಜಾ॒ತಾಃ ಪಿ॒ತರೋ॑ ವಿ॒ಷೇಣಾ॑ಲಿಮ್ಪನ್ನ್ ॥ 1 ॥

ತಾಸಾ᳚-ಞ್ಜ॒ಗ್ಧ್ವಾ ರುಪ್ಯ॒ನ್ತ್ಯೈತ್ । ತೇ᳚-ಽಬ್ರುವನ್ನ್ । ಕ ಇ॒ದಮಿ॒ತ್ಥ-ಮ॑ಕ॒ರಿತಿ॑ । ವ॒ಯ-ಮ್ಭಾ॑ಗ॒ಧೇಯ॑-ಮಿ॒ಚ್ಛಮಾ॑ನಾ॒ ಇತಿ॑ ಪಿ॒ತರೋ᳚-ಽಬ್ರುವನ್ನ್ । ಕಿಂ-ವೋಁ॑ ಭಾಗ॒ಧೇಯ॒ಮಿತಿ॑ । ಅ॒ಗ್ನಿ॒ಹೋ॒ತ್ರ ಏ॒ವ ನೋ-ಽಪ್ಯ॒ಸ್ತ್ವಿತ್ಯ॑-ಬ್ರುವನ್ನ್ । ತೇಭ್ಯ॑ ಏ॒ತ-ದ್ಭಾ॑ಗ॒ಧೇಯ॒-ಮ್ಪ್ರಾಯ॑ಚ್ಛನ್ನ್ । ಯದ್ಧು॒ತ್ವಾ ನಿ॒ಮಾರ್​ಷ್ಟಿ॑ । ತತೋ॒ ವೈ ತ ಓಷ॑ಧೀರ-ಸ್ವದಯನ್ನ್ ॥ ಯ ಏ॒ವಂ-ವೇಁದ॑ ॥ 2 ॥

ಸ್ವದ॑ನ್ತೇ-ಽಸ್ಮಾ॒ ಓಷ॑ಧಯಃ । ತೇ ವ॒ಥ್ಸಮು॒-ಪಾವಾ॑ಸೃಜನ್ನ್ । ಇ॒ದ-ನ್ನೋ॑ ಹ॒ವ್ಯ-ಮ್ಪ್ರದಾ॑ಪ॒ಯೇತಿ॑ । ಸೋ᳚-ಽಬ್ರವೀ॒ದ್ವರಂ॑-ವೃಁಣೈ । ದಶ॑ ಮಾ॒ ರಾತ್ರೀ᳚ರ್ಜಾ॒ತ-ನ್ನ ದೋ॑ಹನ್ನ್ । ಆ॒ಸ॒ಙ್ಗ॒ವ-ಮ್ಮಾ॒ತ್ರಾ ಸ॒ಹ ಚ॑ರಾ॒ಣೀತಿ॑ । ತಸ್ಮಾ᳚-ದ್ವ॒ಥ್ಸ-ಞ್ಜಾ॒ತ-ನ್ದಶ॒ ರಾತ್ರೀ॒ರ್ನ ದು॑ಹನ್ತಿ । ಆ॒ಸ॒ಙ್ಗ॒ವ-ಮ್ಮಾ॒ತ್ರಾ ಸ॒ಹ ಚರ॑ತಿ । ವಾರೇ॑ವೃತ॒ಗ್ಗ್॒ಹ್ಯ॑ಸ್ಯ । ತಸ್ಮಾ᳚-ದ್ವ॒ಥ್ಸಗ್ಂ ಸಗ್ಂ॑ಸೃಷ್ಟಧ॒ಯಗ್ಂ ರು॒ದ್ರೋ ಘಾತು॑ಕಃ । ಅತಿ॒ ಹಿ ಸ॒ನ್ಧಾ-ನ್ಧಯ॑ತಿ ॥ 3 ॥
(ಅ॒ಲಿ॒ಮ್ಪ॒ನ್ - ವೇದ॒ - ಘಾತು॑ಕ॒ ಏಕ॑-ಞ್ಚ) (ಅ. 1)

ಅನುವಾಕಂ 2 - ಅಗ್ನಿಹೋತ್ರನಿರೂಪಣಂ
ಪ್ರ॒ಜಾಪ॑ತಿ-ರ॒ಗ್ನಿ-ಮ॑ಸೃಜತ । ತ-ಮ್ಪ್ರ॒ಜಾ ಅನ್ವ॑ಸೃಜ್ಯನ್ತ । ತಮ॑ಭಾ॒ಗ ಉಪಾ᳚ಸ್ತ । ಸೋ᳚-ಽಸ್ಯ ಪ್ರ॒ಜಾಭಿ॒-ರಪಾ᳚ಕ್ರಾಮತ್ । ತಮ॑ವ॒ರುರು॑-ಥ್ಸಮಾ॒ನೋ-ಽನ್ವೈ᳚ತ್ । ತಮ॑ವ॒ರುಧ॒-ನ್ನಾಶ॑ಕ್ನೋತ್ । ಸ ತಪೋ॑ ಽತಪ್ಯತ । ಸೋ᳚-ಽಗ್ನಿ-ರುಪಾ॑ರಮ॒ತಾತಾ॑ಪಿ॒ ವೈ ಸ್ಯ ಪ್ರ॒ಜಾಪ॑ತಿ॒ರಿತಿ॑ । ಸ ರ॒ರಾಟಾ॒ದುದ॑ಮೃಷ್ಟ ॥ 4 ॥

ತ-ದ್ಘೃ॒ತಮ॑ಭವತ್ । ತಸ್ಮಾ॒ದ್ಯಸ್ಯ॑ ದಖ್ಷಿಣ॒ತಃ ಕೇಶಾ॒ ಉನ್ಮೃ॑ಷ್ಟಾಃ । ತಾ-ಞ್ಜ್ಯೇ᳚ಷ್ಠಲ॒ಖ್ಷ್ಮೀ ಪ್ರಾ॑ಜಾಪ॒ತ್ಯೇತ್ಯಾ॑ಹುಃ । ಯ-ದ್ರ॒ರಾಟಾ॑ದು॒ದಮೃ॑ಷ್ಟ । ತಸ್ಮಾ᳚-ದ್ರ॒ರಾಟೇ॒ ಕೇಶಾ॒ ನ ಸ॑ನ್ತಿ । ತದ॒ಗ್ನೌ ಪ್ರಾಗೃ॑ಹ್ಣಾತ್ । ತದ್ವ್ಯ॑ಚಿಕಿ॒ಥ್ಸತ್ । ಜು॒ಹವಾ॒ನೀ(3) ಮಾ ಹೌ॒ಷಾ(3)ಮಿತಿ॑ । ತ-ದ್ವಿ॑ಚಿಕಿ॒ಥ್ಸಾಯೈ॒ ಜನ್ಮ॑ ॥ ಯ ಏ॒ವಂ-ವಿಁ॒ದ್ವಾನ್. ವಿ॑ಚಿ॒ಕಿಥ್ಸ॑ತಿ ॥ 5 ॥

ವಸೀ॑ಯ ಏ॒ವ ಚೇ॑ತಯತೇ ॥ ತಂ-ವಾಁಗ॒ಭ್ಯ॑ವದ-ಜ್ಜು॒ಹುಧೀತಿ॑ । ಸೋ᳚-ಽಬ್ರವೀತ್ । ಕಸ್ತ್ವಮ॒ಸೀತಿ॑ । ಸ್ವೈವ ತೇ॒ ವಾಗಿತ್ಯ॑ಬ್ರವೀತ್ । ಸೋ॑-ಽಜುಹೋ॒-ಥ್ಸ್ವಾಹೇತಿ॑ । ತಥ್ಸ್ವಾ॑ಹಾಕಾ॒ರಸ್ಯ॒ ಜನ್ಮ॑ ॥ ಯ ಏ॒ವಗ್ಗ್​ ಸ್ವಾ॑ಹಾಕಾ॒ರಸ್ಯ॒ ಜನ್ಮ॒ ವೇದ॑ । ಕ॒ರೋತಿ॑ ಸ್ವಾಹಾಕಾ॒ರೇಣ॑ ವೀ॒ರ್ಯ᳚ಮ್ ॥ ಯಸ್ಯೈ॒ವಂ-ವಿಁ॒ದುಷ॑-ಸ್ಸ್ವಾಹಾಕಾ॒ರೇಣ॒ ಜುಹ್ವ॑ತಿ ॥ 6 ॥

ಭೋಗಾ॑ಯೈ॒ವಾಸ್ಯ॑ ಹು॒ತ-ಮ್ಭ॑ವತಿ ॥ ತಸ್ಯಾ॒ ಆಹು॑ತ್ಯೈ॒ ಪುರು॑ಷ-ಮಸೃಜತ । ದ್ವಿ॒ತೀಯ॑-ಮಜುಹೋತ್ । ಸೋ-ಽಶ್ವ॑-ಮಸೃಜತ । ತೃ॒ತೀಯ॑-ಮಜುಹೋತ್ । ಸ ಗಾ॑ಮಸೃಜತ । ಚ॒ತು॒ರ್ಥ-ಮ॑ಜುಹೋತ್ । ಸೋ-ಽವಿ॑ಮಸೃಜತ । ಪ॒ಞ್ಚ॒ಮ-ಮ॑ಜುಹೋತ್ । ಸೋ॑-ಽಜಾಮ॑ಸೃಜತ ॥ 7 ॥

ಸೋ᳚-ಽಗ್ನಿ-ರ॑ಬಿಭೇತ್ । ಆಹು॑ತೀಭಿ॒ರ್ವೈ ಮಾ᳚-ಽಽಪ್ನೋ॒ತೀತಿ॑ । ಸ ಪ್ರ॒ಜಾಪ॑ತಿ॒-ಮ್ಪುನಃ॒ ಪ್ರಾವಿ॑ಶತ್ । ತ-ಮ್ಪ್ರ॒ಜಾಪ॑ತಿ-ರಬ್ರವೀತ್ । ಜಾಯ॒ಸ್ವೇತಿ॑ । ಸೋ᳚-ಽಬ್ರವೀತ್ । ಕಿ-ಮ್ಭಾ॑ಗ॒ಧೇಯ॑ಮ॒ಭಿ ಜ॑ನಿಷ್ಯ॒ ಇತಿ॑ । ತುಭ್ಯ॑ಮೇ॒ವೇದಗ್ಂ ಹೂ॑ಯಾತಾ॒ ಇತ್ಯ॑ಬ್ರವೀತ್ । ಸ ಏ॒ತ-ದ್ಭಾ॑ಗ॒ಧೇಯ॑ಮ॒ಭ್ಯ॑ಜಾಯತ । ಯದ॑ಗ್ನಿಹೋ॒ತ್ರಮ್ ॥ 8 ॥

ತಸ್ಮಾ॑ದಗ್ನಿಹೋ॒ತ್ರ-ಮು॑ಚ್ಯತೇ ॥ ತದ್ಧೂ॒ಯಮಾ॑ನ-ಮಾದಿ॒ತ್ಯೋ᳚-ಽಬ್ರವೀತ್ । ಮಾ ಹೌ॑ಷೀಃ । ಉ॒ಭಯೋ॒ರ್ವೈ-ನಾ॑ವೇ॒ತದಿತಿ॑ । ಸೋ᳚-ಽಗ್ನಿ-ರ॑ಬ್ರವೀತ್ । ಕ॒ಥ-ನ್ನೌ॑ ಹೋಷ್ಯ॒ನ್ತೀತಿ॑ । ಸಾ॒ಯಮೇ॒ವ ತುಭ್ಯ॑-ಞ್ಜು॒ಹವನ್ನ್॑ । ಪ್ರಾ॒ತರ್ಮಹ್ಯ॒-ಮಿತ್ಯ॑ಬ್ರವೀತ್ । ತಸ್ಮಾ॑ದ॒ಗ್ನಯೇ॑ ಸಾ॒ಯಗ್ಂ ಹೂ॑ಯತೇ । ಸೂರ್ಯಾ॑ಯ ಪ್ರಾ॒ತಃ ॥ 9 ॥

ಆ॒ಗ್ನೇ॒ಯೀ ವೈ ರಾತ್ರಿಃ॑ । ಐ॒ನ್ದ್ರಮಹಃ॑ । ಯದನು॑ದಿತೇ॒ ಸೂರ್ಯೇ᳚ ಪ್ರಾ॒ತರ್ಜು॑ಹು॒ಯಾತ್ । ಉ॒ಭಯ॑ಮೇ॒ವಾಗ್ನೇ॒ಯಗ್ಗ್​ ಸ್ಯಾ᳚ತ್ । ಉದಿ॑ತೇ॒ ಸೂರ್ಯೇ᳚ ಪ್ರಾ॒ತರ್ಜು॑ಹೋತಿ । ತಥಾ॒-ಽಗ್ನಯೇ॑ ಸಾ॒ಯಗ್ಂ ಹೂ॑ಯತೇ । ಸೂರ್ಯಾ॑ಯ ಪ್ರಾ॒ತಃ ॥ ರಾತ್ರಿಂ॒-ವಾಁ ಅನು॑ ಪ್ರ॒ಜಾಃ ಪ್ರ ಜಾ॑ಯನ್ತೇ । ಅಹ್ನಾ॒ ಪ್ರತಿ॑ ತಿಷ್ಠನ್ತಿ । ಯಥ್ಸಾ॒ಯ-ಞ್ಜು॒ಹೋತಿ॑ ॥ 10 ॥

ಪ್ರೈವ ತೇನ॑ ಜಾಯತೇ । ಉದಿ॑ತೇ॒ ಸೂರ್ಯೇ᳚ ಪ್ರಾ॒ತ-ರ್ಜು॑ಹೋತಿ । ಪ್ರತ್ಯೇ॒ವ ತೇನ॑ ತಿಷ್ಠತಿ ॥ ಪ್ರ॒ಜಾಪ॑ತಿರ-ಕಾಮಯತ॒ ಪ್ರಜಾ॑ಯೇ॒ಯೇತಿ॑ । ಸ ಏ॒ತದ॑ಗ್ನಿಹೋ॒ತ್ರ-ಮ್ಮಿ॑ಥು॒ನ-ಮ॑ಪಶ್ಯತ್ । ತದುದಿ॑ತೇ॒ ಸೂರ್ಯೇ॑-ಽಜುಹೋತ್ । ಯಜು॑ಷಾ॒ ಽನ್ಯತ್ । ತೂ॒ಷ್ಣೀಮ॒ನ್ಯತ್ । ತತೋ॒ ವೈ ಸ ಪ್ರಾಜಾ॑ಯತ । ಯಸ್ಯೈ॒ವಂ-ವಿಁ॒ದುಷ॒ ಉದಿ॑ತೇ॒ ಸೂರ್ಯೇ᳚-ಽಗ್ನಿಹೋ॒ತ್ರ-ಞ್ಜುಹ್ವ॑ತಿ ॥ 11 ॥

ಪ್ರೈವ ಜಾ॑ಯತೇ । ಅಥೋ॒ ಯಥಾ॒ ದಿವಾ᳚ ಪ್ರಜಾ॒ನನ್ನೇತಿ॑ । ತಾ॒ದೃಗೇ॒ವ ತತ್ ॥ ಅಥೋ॒ ಖಲ್ವಾ॑ಹುಃ । ಯಸ್ಯ॒ ವೈ ದ್ವೌ ಪುಣ್ಯೌ॑ ಗೃ॒ಹೇ ವಸ॑ತಃ । ಯಸ್ತಯೋ॑ರ॒ನ್ಯಗ್ಂ ರಾ॒ಧಯ॑ತ್ಯ॒ನ್ಯ-ನ್ನ । ಉ॒ಭೌ ವಾವ ಸ ತಾವೃ॑ಚ್ಛ॒ತೀತಿ॑ । ಅ॒ಗ್ನಿಂ-ವಾಁವಾದಿ॒ತ್ಯ-ಸ್ಸಾ॒ಯ-ಮ್ಪ್ರವಿ॑ಶತಿ । ತಸ್ಮಾ॑ದ॒ಗ್ನಿರ್ದೂ॒ರಾನ್ನಕ್ತ॑-ನ್ದದೃಶೇ ।
ಉ॒ಭೇ ಹಿ ತೇಜ॑ಸೀ ಸ॒ಪನ್ದ್ಯೇ॑ತೇ ॥ 12 ॥

ಉ॒ದ್ಯನ್ತಂ॒-ವಾಁವಾದಿ॒ತ್ಯ-ಮ॒ಗ್ನಿರನು॑ ಸ॒ಮಾರೋ॑ಹತಿ । ತಸ್ಮಾ᳚ದ್ಧೂ॒ಮ ಏ॒ವಾಗ್ನೇರ್ದಿವಾ॑ ದದೃಶೇ । ಯದ॒ಗ್ನಯೇ॑ ಸಾ॒ಯ-ಞ್ಜು॑ಹು॒ಯಾತ್ । ಆ ಸೂರ್ಯಾ॑ಯ ವೃಶ್ಚ್ಯೇತ । ಯಥ್ಸೂರ್ಯಾ॑ಯ ಪ್ರಾ॒ತ-ರ್ಜು॑ಹು॒ಯಾತ್ । ಆ-ಽಗ್ನಯೇ॑ ವೃಶ್ಚ್ಯೇತ । ದೇ॒ವತಾ᳚ಭ್ಯ-ಸ್ಸ॒ಮದ॑-ನ್ದದ್ಧ್ಯಾತ್ । ಅ॒ಗ್ನಿರ್ಜ್ಯೋತಿ॒-ರ್ಜ್ಯೋತಿ॒-ಸ್ಸೂರ್ಯ॒-ಸ್ಸ್ವಾಹೇತ್ಯೇ॒ವ ಸಾ॒ಯಗ್ಂ ಹೋ॑ತ॒ವ್ಯ᳚ಮ್ । ಸೂರ್ಯೋ॒ ಜ್ಯೋತಿ॒-ರ್ಜ್ಯೋತಿ॑ರ॒ಗ್ನಿ-ಸ್ಸ್ವಾಹೇತಿ॑ ಪ್ರಾ॒ತಃ । ತಥೋ॒ಭಾಭ್ಯಾಗ್ಂ॑ ಸಾ॒ಯಗ್ಂ ಹೂ॑ಯತೇ ॥ 13 ॥

ಉ॒ಭಾಭ್ಯಾ᳚-ಮ್ಪ್ರಾ॒ತಃ । ನ ದೇ॒ವತಾ᳚ಭ್ಯ-ಸ್ಸ॒ಮದ॑-ನ್ದಧಾತಿ ॥ ಅ॒ಗ್ನಿರ್ಜ್ಯೋತಿ॒ರಿತ್ಯಾ॑ಹ । ಅ॒ಗ್ನಿರ್ವೈ ರೇ॑ತೋ॒ಧಾಃ ॥ ಪ್ರ॒ಜಾ ಜ್ಯೋತಿ॒ರಿತ್ಯಾ॑ಹ । ಪ್ರ॒ಜಾ ಏ॒ವಾಸ್ಮೈ॒ ಪ್ರ ಜ॑ನಯತಿ ॥ ಸೂರ್ಯೋ॒ ಜ್ಯೋತಿ॒ರಿತ್ಯಾ॑ಹ । ಪ್ರ॒ಜಾಸ್ವೇ॒ವ ಪ್ರಜಾ॑ತಾಸು॒ ರೇತೋ॑ ದಧಾತಿ ॥ ಜ್ಯೋತಿ॑ರ॒ಗ್ನಿ-ಸ್ಸ್ವಾಹೇತ್ಯಾ॑ಹ । ಪ್ರ॒ಜಾ ಏ॒ವ ಪ್ರಜಾ॑ತಾ ಅ॒ಸ್ಯಾ-ಮ್ಪ್ರತಿ॑ಷ್ಠಾಪಯತಿ ॥ 14 ॥

ತೂ॒ಷ್ಣೀಮುತ್ತ॑ರಾ॒-ಮಾಹು॑ತಿ-ಞ್ಜುಹೋತಿ । ಮಿ॒ಥು॒ನ॒ತ್ವಾಯ॒ ಪ್ರಜಾ᳚ತ್ಯೈ ॥ ಯದುದಿ॑ತೇ॒ ಸೂರ್ಯೇ᳚ ಪ್ರಾ॒ತ-ರ್ಜು॑ಹು॒ಯಾತ್ । ಯಥಾ-ಽತಿ॑ಥಯೇ॒ ಪ್ರದ್ರು॑ತಾಯ ಶೂ॒ನ್ಯಾಯಾ॑ವಸ॒ಥಾ-ಯಾ॑ಹಾ॒ರ್ಯಗ್ಂ॑ ಹರ॑ನ್ತಿ । ತಾ॒ದೃಗೇ॒ವ ತತ್ ।
ಕ್ವಾಹ॒ ತತ॒ಸ್ತ-ದ್ಭವ॒ತೀತ್ಯಾ॑ಹುಃ । ಯಥ್ಸ ನ ವೇದ॑ । ಯಸ್ಮೈ॒ ತದ್ಧರ॒ನ್ತೀತಿ॑ । ತಸ್ಮಾ॒-ದ್ಯದೌ॑ಷ॒ಸ-ಞ್ಜು॒ಹೋತಿ॑ । ತದೇ॒ವ ಸ॑ಪ್ರ॒ನ್ತಿ । ಅಥೋ॒ ಯಥಾ॒ ಪ್ರಾರ್ಥ॑ಮೌಷ॒ಸ-ಮ್ಪ॑ರಿ॒ ವೇವೇ᳚ಷ್ಟಿ । ತಾ॒ದೃಗೇ॒ವ ತತ್ ॥ 15 ॥
(ಅ॒ಮೃ॒ಷ್ಟ॒ - ವಿ॒ಚಿ॒ಕಿಥ್ಸ॑ತಿ॒ - ಜುಹ್ವ॑ - ತ್ಯ॒ಜಾಮ॑ಸೃಜ - ತಾಗ್ನಿಹೋ॒ತ್ರಗ್ಂ - ಸೂರ್ಯಾ॑ಯ ಪ್ರಾ॒ತ--ರ್ ಜು॒ಹೋತಿ॒ - ಜುಹ್ವ॑ತಿ - ಸ॒ಮ್ಪದ್ಯೇ॑ತೇ - ಹೂಯತೇ - ಸ್ಥಾಪಯತಿ - ಸಮ್ಪ್ರ॒ತಿ ದ್ವೇ ಚ॑) (ಅ. 2)

ಅನುವಾಕಂ 3 - ಉಪಯೋಖ್ಷ್ಯಮಾಣಸ್ಯ ಹವಿಷ-ಸ್ಸಂಸ್ಕಾರಃ
ರು॒ದ್ರೋ ವಾ ಏ॒ಷಃ । ಯದ॒ಗ್ನಿಃ । ಪತ್ನೀ᳚ ಸ್ಥಾ॒ಲೀ । ಯನ್ಮದ್ಧ್ಯೇ॒-ಽಗ್ನೇ-ರ॑ಧಿ॒ಶ್ರಯೇ᳚ತ್ । ರು॒ದ್ರಾಯ॒ ಪತ್ನೀ॒ಮಪಿ॑ ದದ್ಧ್ಯಾತ್ । ಪ್ರ॒ಮಾಯು॑ಕಾ ಸ್ಯಾತ್ । ಉದೀ॒ಚೋ-ಽಙ್ಗಾ॑ರಾನ್ನಿ॒ರೂಹ್ಯಾಧಿ॑ ಶ್ರಯತಿ । ಪತ್ನಿ॑ಯೈ ಗೋಪೀ॒ಥಾಯ॑ ॥ ವ್ಯ॑ನ್ತಾನ್ ಕರೋತಿ । ತಥಾ॒ ಪತ್ನ್ಯ-ಪ್ರ॑ಮಾಯುಕಾ ಭವತಿ ॥ 16 ॥

ಘ॒ರ್ಮೋ ವಾ ಏ॒ಷೋ-ಽಶಾ᳚ನ್ತಃ । ಅಹ॑ರಹಃ॒ ಪ್ರವೃ॑ಜ್ಯತೇ । ಯದ॑ಗ್ನಿಹೋ॒ತ್ರಮ್ । ಪ್ರತಿ॑ಷಿಞ್ಚೇ-ತ್ಪ॒ಶುಕಾ॑ಮಸ್ಯ । ಶಾ॒ನ್ತಮಿ॑ವ॒ ಹಿ ಪ॑ಶ॒ವ್ಯ᳚ಮ್ ॥ ನ ಪ್ರತಿ॑ಷಿಞ್ಚೇ-ದ್ಬ್ರಹ್ಮವರ್ಚ॒ಸಕಾ॑ಮಸ್ಯ । ಸಮಿ॑ದ್ಧಮಿವ॒ ಹಿ ಬ್ರ॑ಹ್ಮವರ್ಚ॒ಸಮ್ ॥ ಅಥೋ॒ ಖಲು॑ । ಪ್ರ॒ತಿ॒ಷಿಚ್ಯ॑ಮೇ॒ವ । ಯತ್-ಪ್ರ॑ತಿಷಿ॒ಞ್ಚತಿ॑ ॥ 17 ॥

ತತ್-ಪ॑ಶ॒ವ್ಯ᳚ಮ್ । ಯಜ್ಜು॒ಹೋತಿ॑ । ತದ್ಬ್ರ॑ಹ್ಮವರ್ಚ॒ಸಿ । ಉ॒ಭಯ॑ಮೇ॒ವಾಕಃ॑ ॥ ಪ್ರಚ್ಯು॑ತಂ॒-ವಾಁ ಏ॒ತದ॒ಸ್ಮಾ-ಲ್ಲೋ॒ಕಾತ್ । ಅಗ॑ತ-ನ್ದೇವಲೋ॒ಕಮ್ । ಯಚ್ಛೃ॒ತಗ್ಂ ಹ॒ವಿರನ॑ಭಿಘಾರಿತಮ್ । ಅ॒ಭಿದ್ಯೋ॑ತಯತಿ । ಅ॒ಭ್ಯೇ॑ವೈನ॑ದ್ಘಾರಯತಿ । ಅಥೋ॑ ದೇವ॒ತ್ರೈವೈನ॑-ದ್ಗಮಯತಿ ॥ 18 ॥

ಪರ್ಯ॑ಗ್ನಿ ಕರೋತಿ । ರಖ್ಷ॑ಸಾ॒-ಮಪ॑ಹತ್ಯೈ ॥ ತ್ರಿಃ ಪರ್ಯ॑ಗ್ನಿ ಕರೋತಿ । ತ್ರ್ಯಾ॑ವೃ॒ದ್ಧಿ ಯ॒ಜ್ಞಃ । ಅಥೋ॑ ಮೇದ್ಧ್ಯ॒ತ್ವಾಯ॑ ॥ ಯತ್-ಪ್ರಾ॒ಚೀನ॑-ಮುದ್ವಾ॒ಸಯೇ᳚ತ್ । ಯಜ॑ಮಾನಗ್ಂ ಶು॒ಚಾ ಽರ್ಪ॑ಯೇತ್ । ಯ-ದ್ದ॑ಖ್ಷಿ॒ಣಾ । ಪಿ॒ತೃ॒ದೇ॒ವ॒ತ್ಯಗ್ಗ್॑ ಸ್ಯಾತ್ । ಯತ್-ಪ್ರ॒ತ್ಯಕ್ ॥ 19 ॥

ಪತ್ನೀಗ್ಂ॑ ಶು॒ಚಾ ಽರ್ಪ॑ಯೇತ್ । ಉ॒ದೀ॒ಚೀನ॒-ಮುದ್ವಾ॑ಸಯತಿ । ಏ॒ಷಾ ವೈ ದೇ॑ವಮನು॒ಷ್ಯಾಣಾಗ್ಂ॑ ಶಾ॒ನ್ತಾ ದಿಕ್ । ತಾಮೇ॒ವೈನ॒ದನೂ-ದ್ವಾ॑ಸಯತಿ॒ ಶಾನ್ತ್ಯೈ᳚ ॥ ವರ್ತ್ಮ॑ ಕರೋತಿ । ಯ॒ಜ್ಞಸ್ಯ॒ ಸನ್ತ॑ತ್ಯೈ ॥ ನಿಷ್ಟ॑ಪತಿ । ಉಪೈ॒ವ ತಥ್ಸ್ತೃ॑ಣಾತಿ ॥ ಚ॒ತುರುನ್ನ॑ಯತಿ । ಚತು॑ಷ್ಪಾದಃ ಪ॒ಶವಃ॑ ॥ 20 ॥

ಪ॒ಶೂನೇ॒ವಾ-ವ॑ರುನ್ಧೇ ॥ ಸರ್ವಾ᳚ನ್-ಪೂ॒ರ್ಣಾನುನ್ನ॑ಯತಿ । ಸರ್ವೇ॒ ಹಿ ಪುಣ್ಯಾ॑ ರಾ॒ದ್ಧಾಃ ॥ ಅ॒ನೂಚ॒ ಉನ್ನ॑ಯತಿ । ಪ್ರ॒ಜಾಯಾ॑ ಅನೂಚೀನ॒ತ್ವಾಯ॑ । ಅ॒ನೂಚ್ಯೇ॒ವಾಸ್ಯ॑ ಪ್ರ॒ಜಾ ಽರ್ಧು॑ಕಾ ಭವತಿ ॥ ಸ-ಮ್ಮೃ॑ಶತಿ॒ ವ್ಯಾವೃ॑ತ್ತ್ಯೈ ॥ ನಾಹೋ᳚ಷ್ಯ॒ನ್ನುಪ॑ ಸಾದಯೇತ್ । ಯದಹೋ᳚ಷ್ಯನ್ನುಪ ಸಾ॒ದಯೇ᳚ತ್ । ಯಥಾ॒ ಽನ್ಯಸ್ಮಾ॑ ಉಪನಿ॒ಧಾಯ॑ ॥ 21 ॥

ಅ॒ನ್ಯಸ್ಮೈ᳚ ಪ್ರ॒ಯಚ್ಛ॑ತಿ । ತಾ॒ದೃಗೇ॒ವ ತತ್ । ಆ-ಽಸ್ಮೈ॑ ವೃಶ್ಚ್ಯೇತ । ಯದೇ॒ವ ಗಾರ್​ಹ॑ಪತ್ಯೇ-ಽಧಿ॒ಶ್ರಯ॑ತಿ । ತೇನ॒ ಗಾರ್​ಹ॑ಪತ್ಯ-ಮ್ಪ್ರೀಣಾತಿ ॥ ಅ॒ಗ್ನಿರ॑ಬಿಭೇತ್ । ಆಹು॑ತಯೋ॒ ಮಾ-ಽತ್ಯೇ᳚ಷ್ಯ॒ನ್ತೀತಿ॑ । ಸ ಏ॒ತಾಗ್ಂ ಸ॒ಮಿಧ॑-ಮಪಶ್ಯತ್ । ತಾಮಾ-ಽಧ॑ತ್ತ । ತತೋ॒ ವಾ ಅ॒ಗ್ನಾವಾಹು॑ತಯೋ-ಽದ್ಧ್ರಿಯನ್ತ ॥ 22 ॥

ಯದೇ॑ನಗ್ಂ ಸ॒ಮಯ॑ಚ್ಛತ್ । ತಥ್ಸ॒ಮಿಧ॑-ಸ್ಸಮಿ॒ತ್ತ್ವಮ್ । ಸ॒ಮಿಧ॒ಮಾದ॑ಧಾತಿ । ಸಮೇ॒ವೈನಂ॑-ಯಁಚ್ಛತಿ । ಆಹು॑ತೀನಾ॒-ನ್ಧೃತ್ಯೈ᳚ । ಅಥೋ॑ ಅಗ್ನಿಹೋ॒ತ್ರಮೇ॒ವೇದ್ಧ್ಮವ॑ತ್-ಕರೋತಿ । ಆಹು॑ತೀನಾ॒-ಮ್ಪ್ರತಿ॑ಷ್ಠಿತ್ಯೈ ॥ ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ಯದೇಕಾಗ್ಂ॑ ಸ॒ಮಿಧ॑ಮಾ॒ಧಾಯ॒ ದ್ವೇ ಆಹು॑ತೀ ಜು॒ಹೋತಿ॑ । ಅಥ॒ ಕಸ್ಯಾಗ್ಂ॑ ಸ॒ಮಿಧಿ॑ ದ್ವಿ॒ತೀಯಾ॒-ಮಾಹು॑ತಿ-ಞ್ಜುಹೋ॒ತೀತಿ॑ ॥ 23 ॥

ಯ-ದ್ದ್ವೇ ಸ॒ಮಿಧಾ॑ವಾದ॒ದ್ಧ್ಯಾತ್ । ಭ್ರಾತೃ॑ವ್ಯಮಸ್ಮೈ ಜನಯೇತ್ । ಏಕಾಗ್ಂ॑ ಸ॒ಮಿಧ॑ಮಾ॒ಧಾಯ॑ । ಯಜು॑ಷಾ॒ ಽನ್ಯಾಮಾಹು॑ತಿ-ಞ್ಜುಹೋತಿ । ಉ॒ಭೇ ಏ॒ವ ಸ॒ಮಿದ್ವ॑ತೀ॒ ಆಹು॑ತೀ ಜುಹೋತಿ । ನಾಸ್ಮೈ॒ ಭ್ರಾತೃ॑ವ್ಯ-ಞ್ಜನಯತಿ ॥ ಆದೀ᳚ಪ್ತಾಯಾ-ಞ್ಜುಹೋತಿ । ಸಮಿ॑ದ್ಧಮಿವ॒ ಹಿ ಬ್ರ॑ಹ್ಮವರ್ಚ॒ಸಮ್ । ಅಥೋ॒ ಯಥಾ-ಽತಿ॑ಥಿ॒-ಞ್ಜ್ಯೋತಿ॑ಷ್ಕೃ॒ತ್ವಾ ಪ॑ರಿ॒ವೇವೇ᳚ಷ್ಟಿ । ತಾ॒ದೃಗೇ॒ವ ತತ್ ॥ ಚ॒ತುರುನ್ನ॑ಯತಿ । ದ್ವಿರ್ಜು॑ಹೋತಿ । ತಸ್ಮಾ᳚-ದ್ದ್ವಿ॒ಪಾ-ಚ್ಚತು॑ಷ್ಪಾದಮತ್ತಿ । ಅಥೋ᳚ ದ್ವಿ॒ಪದ್ಯೇ॒ವ ಚತು॑ಷ್ಪದಃ॒ ಪ್ರತಿ॑ಷ್ಠಾಪಯತಿ ॥ 24 ॥
(ಭ॒ವ॒ತಿ॒ - ಪ್ರ॒ತಿ॒ಷಿ॒ಞ್ಚತಿ॑ - ಗಮಯತಿ - ಪ್ರ॒ತ್ಯಕ್ - ಪ॒ಶವ॑ - ಉಪನಿ॒ಧಾ - ಯಾ᳚ದ್ಘ್ರಿಯ॒ನ್ - ತೇತಿ॒ - ತಚ್ಚ॒ತ್ವಾರಿ॑ ಚ) (ಅ. 3)

ಅನುವಾಕಂ 4 - ಉಪಯುಕ್ತಸ್ಯ ಹವಿಷ-ಸ್ಸಂಸ್ಕಾರಃ
ಉ॒ತ್ತ॒ರಾವ॑ತೀಂ॒-ವೈಁ ದೇ॒ವಾ ಆಹು॑ತಿ॒ಮಜು॑ಹವುಃ । ಅವಾ॑ಚೀ॒ಮಸು॑ರಾಃ । ತತೋ॑ ದೇ॒ವಾ ಅಭ॑ವನ್ನ್ । ಪರಾ-ಽಸು॑ರಾಃ । ಯ-ಙ್ಕಾ॒ಮಯೇ॑ತ॒ ವಸೀ॑ಯಾನ್-ಥ್ಸ್ಯಾ॒ದಿತಿ॑ । ಕನೀ॑ಯ॒ಸ್ತಸ್ಯ॒ ಪೂರ್ವಗ್ಂ॑ ಹು॒ತ್ವಾ । ಉತ್ತ॑ರ॒-ಮ್ಭೂಯೋ॑ ಜುಹುಯಾತ್ । ಏ॒ಷಾ ವಾ ಉ॑ತ್ತ॒ರಾವ॒ತ್ಯಾಹು॑ತಿಃ । ತಾ-ನ್ದೇ॒ವಾ ಅ॑ಜುಹವುಃ । ತತ॒ಸ್ತೇ॑-ಽಭವನ್ನ್ ॥ 25 ॥

ಯಸ್ಯೈ॒ವ-ಞ್ಜುಹ್ವ॑ತಿ । ಭವ॑ತ್ಯೇ॒ವ ॥ ಯ-ಙ್ಕಾ॒ಮಯೇ॑ತ॒ ಪಾಪೀ॑ಯಾನ್-ಥ್ಸ್ಯಾ॒ದಿತಿ॑ । ಭೂಯ॒ಸ್ತಸ್ಯ॒ ಪೂರ್ವಗ್ಂ॑ ಹು॒ತ್ವಾ । ಉತ್ತ॑ರ॒-ಙ್ಕನೀ॑ಯೋ ಜುಹುಯಾತ್ । ಏ॒ಷಾ ವಾ ಅವಾ॒ಚ್ಯಾಹು॑ತಿಃ । ತಾಮಸು॑ರಾ ಅಜುಹವುಃ । ತತ॒ಸ್ತೇ ಪರಾ॑-ಽಭವನ್ನ್ । ಯಸ್ಯೈ॒ವ-ಞ್ಜುಹ್ವ॑ತಿ । ಪರೈ॒ವ ಭ॑ವತಿ ॥ 26 ॥

ಹು॒ತ್ವೋಪ॑ ಸಾದಯ॒ತ್ಯಜಾ॑ಮಿತ್ವಾಯ । ಅಥೋ॒ ವ್ಯಾವೃ॑ತ್ತ್ಯೈ ॥ ಗಾರ್​ಹ॑ಪತ್ಯ॒-ಮ್ಪ್ರತೀ᳚ಖ್ಷತೇ । ಅನ॑ನುದ್ಧ್ಯಾಯಿನ-ಮೇ॒ವೈನ॑-ಙ್ಕರೋತಿ ॥ ಅ॒ಗ್ನಿ॒ಹೋ॒ತ್ರಸ್ಯ॒ ವೈ ಸ್ಥಾ॒ಣುರ॑ಸ್ತಿ । ತಂ-ಯಁ ಋ॒ಚ್ಛೇತ್ । ಯ॒ಜ್ಞ॒ಸ್ಥಾ॒ಣುಮೃ॑ಚ್ಛೇತ್ । ಏ॒ಷ ವಾ ಅ॑ಗ್ನಿಹೋ॒ತ್ರಸ್ಯ॑ ಸ್ಥಾ॒ಣುಃ । ಯತ್-ಪೂರ್ವಾ-ಽಽಹು॑ತಿಃ । ತಾಂ-ಯಁದುತ್ತ॑ರಯಾ॒-ಽಭಿ ಜು॑ಹು॒ಯಾತ್ ॥ 27 ॥

ಯ॒ಜ್ಞ॒ಸ್ಥಾ॒ಣು-ಮೃ॑ಚ್ಛೇತ್ । ಅ॒ತಿ॒ಹಾಯ॒ ಪೂರ್ವಾ॒ಮಾಹು॑ತಿ-ಞ್ಜುಹೋತಿ । ಯ॒ಜ್ಞ॒ಸ್ಥಾ॒ಣುಮೇ॒ವ ಪರಿ॑ ವೃಣಕ್ತಿ । ಅಥೋ॒ ಭ್ರಾತೃ॑ವ್ಯಮೇ॒ವಾಪ್ತ್ವಾ ಽತಿ॑ಕ್ರಾಮತಿ ॥ ಅ॒ವಾ॒ಚೀನಗ್ಂ॑ ಸಾ॒ಯಮುಪ॑ ಮಾರ್​ಷ್ಟಿ । ರೇತ॑ ಏ॒ವ ತ-ದ್ದ॑ಧಾತಿ । ಊ॒ರ್ಧ್ವ-ಮ್ಪ್ರಾ॒ತಃ । ಪ್ರ ಜ॑ನಯತ್ಯೇ॒ವ ತತ್ ॥ ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ಚ॒ತುರುನ್ನ॑ಯತಿ ॥ 28 ॥

ದ್ವಿರ್ಜು॑ಹೋತಿ । ಅಥ॒ ಕ್ವ॑ ದ್ವೇ ಆಹು॑ತೀ ಭವತ॒ ಇತಿ॑ । ಅ॒ಗ್ನೌ ವೈ᳚ಶ್ವಾನ॒ರ ಇತಿ॑ ಬ್ರೂಯಾತ್ । ಏ॒ಷ ವಾ ಅ॒ಗ್ನಿರ್ವೈ᳚ಶ್ವಾನ॒ರಃ । ಯದ್ಬ್ರಾ᳚ಹ್ಮ॒ಣಃ । ಹು॒ತ್ವಾ ದ್ವಿಃ ಪ್ರಾಶ್ಞಾ॑ತಿ । ಅ॒ಗ್ನಾವೇ॒ವ ವೈ᳚ಶ್ವಾನ॒ರೇ ದ್ವೇ ಆಹು॑ತೀ ಜುಹೋತಿ ॥ ದ್ವಿರ್ಜು॒ಹೋತಿ॑ । ದ್ವಿರ್ನಿಮಾ᳚ರ್​ಷ್ಟಿ । ದ್ವಿಃ ಪ್ರಾಶ್ಞಾ॑ತಿ ॥ 29 ॥

ಷಟ್-ಥ್ಸಮ್ಪ॑ದ್ಯನ್ತೇ । ಷಡ್ವಾ ಋ॒ತವಃ॑ । ಋ॒ತೂನೇ॒ವ ಪ್ರೀ॑ಣಾತಿ । ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ಕಿ॒-ನ್ದೇ॒ವ॒ತ್ಯ॑-ಮಗ್ನಿಹೋ॒ತ್ರಮಿತಿ॑ । ವೈ॒ಶ್ವ॒ದೇ॒ವಮಿತಿ॑ ಬ್ರೂಯಾತ್ । ಯ-ದ್ಯಜು॑ಷಾ ಜು॒ಹೋತಿ॑ । ತದೈ᳚ನ್ದ್ರಾ॒ಗ್ನಮ್ । ಯತ್-ತೂ॒ಷ್ಣೀಮ್ । ತತ್-ಪ್ರಾ॑ಜಾಪ॒ತ್ಯಮ್ ॥ 30 ॥

ಯನ್ನಿ॒ಮಾರ್​ಷ್ಟಿ॑ । ತದೋಷ॑ಧೀನಾಮ್ । ಯದ್ದ್ವಿ॒ತೀಯ᳚ಮ್ । ತತ್-ಪಿ॑ತೃ॒ಣಾಮ್ । ಯತ್-ಪ್ರಾಶ್ಞಾ॑ತಿ । ತ-ದ್ಗರ್ಭಾ॑ಣಾಮ್ । ತಸ್ಮಾ॒-ದ್ಗರ್ಭಾ॒ ಅನ॑ಶ್ನನ್ತೋ ವರ್ಧನ್ತೇ । ಯದಾ॒ಚಾಮ॑ತಿ । ತನ್ಮ॑ನು॒ಷ್ಯಾ॑ಣಾಮ್ ॥ ಉದ॑ಮ್ಪರ್ಯಾ॒ವೃತ್ಯಾಚಾ॑ಮತಿ ॥ 31 ॥

ಆ॒ತ್ಮನೋ॑ ಗೋಪೀ॒ಥಾಯ॑ ॥ ನಿರ್ಣೇ॑ನೇಕ್ತಿ॒ ಶುದ್ಧ್ಯೈ᳚ ॥ ನಿಷ್ಟ॑ಪತಿ ಸ್ವ॒ಗಾಕೃ॑ತ್ಯೈ । ಉ-ದ್ದಿ॑ಶತಿ । ಸ॒ಪ್ತ॒ರ್॒ಷೀನೇ॒ವ ಪ್ರೀ॑ಣಾತಿ ॥ ದ॒ಖ್ಷಿ॒ಣಾ ಪ॒ರ್ಯಾವ॑ರ್ತತೇ । ಸ್ವಮೇ॒ವ ವೀ॒ರ್ಯ॑ಮನು॑ ಪ॒ರ್ಯಾವ॑ರ್ತತೇ । ತಸ್ಮಾ॒-ದ್ದಖ್ಷಿ॒ಣೋ-ಽರ್ಧ॑ ಆ॒ತ್ಮನೋ॑ ವೀ॒ರ್ಯಾ॑ವತ್ತರಃ । ಅಥೋ॑ ಆದಿ॒ತ್ಯಸ್ಯೈ॒ವಾವೃತ॒ಮನು॑ ಪ॒ರ್ಯಾವ॑ರ್ತತೇ ॥ ಹು॒ತ್ವೋಪ॒ ಸಮಿ॑ನ್ಧೇ ॥ 32 ॥

ಬ್ರ॒ಹ್ಮ॒ವ॒ರ್ಚ॒ಸಸ್ಯ॒ ಸಮಿ॑ದ್ಧ್ಯೈ ॥ ನ ಬ॒ರ॒ಃಇರನು॒ ಪ್ರ ಹ॑ರೇತ್ । ಅಸಗ್ಗ್॑ಸ್ಥಿತೋ॒ ವಾ ಏ॒ಷ ಯ॒ಜ್ಞಃ । ಯದ॑ಗ್ನಿಹೋ॒ತ್ರಮ್ । ಯದ॑ನು ಪ್ರ॒ಹರೇ᳚ತ್ । ಯ॒ಜ್ಞಂ-ವಿಁಚ್ಛಿ॑ನ್ದ್ಯಾತ್ । ತಸ್ಮಾ॒ನ್ನಾನು॑ ಪ್ರ॒ಹೃತ್ಯ᳚ಮ್ । ಯ॒ಜ್ಞಸ್ಯ॒ ಸನ್ತ॑ತ್ಯೈ ॥ ಅ॒ಪೋ ನಿ ನ॑ಯತಿ । ಅ॒ವ॒ಭೃ॒ಥಸ್ಯೈ॒ವ ರೂ॒ಪಮ॑ಕಃ ॥ 33 ॥
(ಅ॒ಭ॒ವ॒ನ್ - ಭ॒ವ॒ತಿ॒ - ಜು॒ಹು॒ಯಾನ್ - ನ॑ಯತಿ - ಮಾರ್​ಷ್ಟಿ॒ ದ್ವಿಃ ಪ್ರಾಶ್ಞಾ॑ತಿ - ಪ್ರಾಜಾಪ॒ತ್ಯ - ಮಾಚಾ॑ಮತೀ - ನ್ಧೇ - ಽಕಃ) (ಅ. 4)

ಅನುವಾಕಂ 5 - ಕಾಮ್ಯಾನಿ ಹೋಮದ್ರವ್ಯಾಣಿ
ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ಅ॒ಗ್ನಿ॒ಹೋ॒ತ್ರಪ್ರಾ॑ಯಣಾ ಯ॒ಜ್ಞಾಃ । ಕಿ-ಮ್ಪ್ರಾ॑ಯಣ-ಮಗ್ನಿಹೋ॒ತ್ರಮಿತಿ॑ । ವ॒ಥ್ಸೋ ವಾ ಅ॑ಗ್ನಿಹೋ॒ತ್ರಸ್ಯ॒ ಪ್ರಾಯ॑ಣಮ್ । ಅ॒ಗ್ನಿ॒ಹೋ॒ತ್ರಂ-ಯಁಜ್ಞಾನಾ᳚ಮ್ ॥ ತಸ್ಯ॑ ಪೃಥಿ॒ವೀ ಸದಃ॑ । ಅ॒ನ್ತರಿ॑ಖ್ಷ॒-ಮಾಗ್ನೀ᳚ದ್ಧ್ರಮ್ । ದ್ಯೌರ್-ಹ॑ವಿ॒ರ್ಧಾನ᳚ಮ್ । ದಿ॒ವ್ಯಾ ಆಪಃ॒ ಪ್ರೋಖ್ಷ॑ಣಯಃ । ಓಷ॑ಧಯೋ ಬ॒ರ॒ಃಇಃ ॥ 34 ॥
ವನ॒ಸ್ಪತ॑ಯ ಇ॒ದ್ಧ್ಮಃ । ದಿಶಃ॑ ಪರಿ॒ಧಯಃ॑ । ಆ॒ದಿ॒ತ್ಯೋ ಯೂಪಃ॑ । ಯಜ॑ಮಾನಃ ಪ॒ಶುಃ । ಸ॒ಮು॒ದ್ರೋ॑-ಽವಭೃ॒ಥಃ । ಸಂ॒​ವಁ॒ಥ್ಸ॒ರ-ಸ್ಸ್ವ॑ಗಾಕಾ॒ರಃ । ತಸ್ಮಾ॒ದಾಹಿ॑ತಾಗ್ನೇ॒-ಸ್ಸರ್ವ॑ಮೇ॒ವ ಬ॑ರ್​ಹಿ॒ಷ್ಯ॑-ನ್ದ॒ತ್ತ-ಮ್ಭ॑ವತಿ । ಯ-ಥ್ಸಾ॒ಯ-ಞ್ಜು॒ಹೋತಿ॑ । ರಾತ್ರಿ॑ಮೇ॒ವ ತೇನ॑ ದಖ್ಷಿ॒ಣ್ಯಾ᳚-ಙ್ಕುರುತೇ । ಯತ್-ಪ್ರಾ॒ತಃ ॥ 35 ॥

ಅಹ॑ರೇ॒ವ ತೇನ॑ ದಖ್ಷಿ॒ಣ್ಯ॑-ಙ್ಕುರುತೇ । ಯತ್-ತತೋ॒ ದದಾ॑ತಿ । ಸಾ ದಖ್ಷಿ॑ಣಾ ॥ ಯಾವ॑ನ್ತೋ॒ ವೈ ದೇ॒ವಾ ಅಹು॑ತ॒ಮಾದನ್ನ್॑ । ತೇ ಪರಾ॑-ಽಭವನ್ನ್ । ತ ಏ॒ತದ॑ಗ್ನಿಹೋ॒ತ್ರಗ್ಂ ಸರ್ವ॑ಸ್ಯೈ॒ವ ಸ॑ಮವ॒ದಾಯಾ॑ಜುಹವುಃ । ತಸ್ಮಾ॑ದಾಹುಃ । ಅ॒ಗ್ನಿ॒ಹೋ॒ತ್ರಂ-ವೈಁ ದೇ॒ವಾ ಗೃ॒ಹಾಣಾ॒-ನ್ನಿಷ್ಕೃ॑ತಿ-ಮಪಶ್ಯ॒ನ್ನಿತಿ॑ । ಯ-ಥ್ಸಾ॒ಯ-ಞ್ಜು॒ಹೋತಿ॑ । ರಾತ್ರಿ॑ಯಾ ಏ॒ವ ತದ್ಧು॒ತಾದ್ಯಾ॑ಯ ॥ 36 ॥

ಯಜ॑ಮಾನ॒ಸ್ಯಾ-ಪ॑ರಾಭಾವಾಯ । ಯತ್-ಪ್ರಾ॒ತಃ । ಅಹ್ನ॑ ಏ॒ವ ತದ್ಧು॒ತಾದ್ಯಾ॑ಯ । ಯಜ॑ಮಾನ॒ಸ್ಯಾ-ಪ॑ರಾಭಾವಾಯ । ಯತ್-ತತೋ॒-ಽಶ್ನಾತಿ॑ । ಹು॒ತಮೇ॒ವ ತತ್ ॥ ದ್ವಯೋಃ॒ ಪಯ॑ಸಾ ಜುಹುಯಾತ್-ಪ॒ಶುಕಾ॑ಮಸ್ಯ । ಏ॒ತದ್ವಾ ಅ॑ಗ್ನಿಹೋ॒ತ್ರ-ಮ್ಮಿ॑ಥು॒ನಮ್ । ಯ ಏ॒ವಂ-ವೇಁದ॑ । ಪ್ರ ಪ್ರ॒ಜಯಾ॑ ಪ॒ಶುಭಿ॑-ರ್ಮಿಥು॒ನೈ-ರ್ಜಾ॑ಯತೇ ॥ 37 ॥

ಇ॒ಮಾಮೇ॒ವ ಪೂರ್ವ॑ಯಾ ದು॒ಹೇ । ಅ॒ಮೂಮುತ್ತ॑ರಯಾ । ಅ॒ಧಿ॒ಶ್ರಿತ್ಯೋತ್ತ॑ರ॒ಮಾ ನ॑ಯತಿ । ಯೋನಾ॑ವೇ॒ವ ತ-ದ್ರೇತ॑-ಸ್ಸಿಞ್ಚತಿ ಪ್ರ॒ಜನ॑ನೇ ॥ ಆಜ್ಯೇ॑ನ ಜುಹುಯಾ॒ತ್-ತೇಜ॑ಸ್ಕಾಮಸ್ಯ । ತೇಜೋ॒ ವಾ ಆಜ್ಯ᳚ಮ್ । ತೇ॒ಜ॒ಸ್ವ್ಯೇ॑ವ ಭ॑ವತಿ । ಪಯ॑ಸಾ ಪ॒ಶುಕಾ॑ಮಸ್ಯ । ಏ॒ತದ್ವೈ ಪ॑ಶೂ॒ನಾಗ್ಂ ರೂ॒ಪಮ್ । ರೂ॒ಪೇಣೈ॒ವಾಸ್ಮೈ॑ ಪ॒ಶೂನವ॑ ರುನ್ಧೇ ॥ 38 ॥

ಪ॒ಶು॒ಮಾನೇ॒ವ ಭ॑ವತಿ । ದ॒ದ್ಧ್ನೇನ್ದ್ರಿ॒ಯ ಕಾ॑ಮಸ್ಯ । ಇ॒ನ್ದ್ರಿ॒ಯಂ-ವೈಁ ದಧಿ॑ । ಇ॒ನ್ದ್ರಿ॒ಯಾ॒ವ್ಯೇ॑ವ ಭ॑ವತಿ । ಯ॒ವಾ॒ಗ್ವಾ᳚ ಗ್ರಾಮ॑ಕಾಮಸ್ಯೌಷ॒ಧಾ ವೈ ಮ॑ನು॒ಷ್ಯಾಃ᳚ । ಭಾ॒ಗ॒ಧೇಯೇ॑ನೈ॒ವಾಸ್ಮೈ॑ ಸಜಾ॒ತಾನವ॑-ರುನ್ಧೇ । ಗ್ರಾ॒ಮ್ಯೇ॑ವ ಭ॑ವತಿ ॥
ಅಯ॑ಜ್ಞೋ॒ ವಾ ಏ॒ಷಃ । ಯೋ॑ಸಾ॒ಮಾ ॥ 39 ॥

ಚ॒ತುರುನ್ನ॑ಯತಿ । ಚತು॑ರಖ್ಷರಗ್ಂ ರಥನ್ತ॒ರಮ್ । ರ॒ಥ॒ನ್ತ॒ರಸ್ಯೈ॒ಷ ವರ್ಣಃ॑ । ಉ॒ಪರೀ॑ವ ಹರತಿ । ಅ॒ನ್ತರಿ॑ಖ್ಷಂ-ವಾಁಮದೇ॒ವ್ಯಮ್ । ವಾ॒ಮ॒ದೇ॒ವ್ಯಸ್ಯೈ॒ಷ ವರ್ಣಃ॑ । ದ್ವಿರ್ಜು॑ಹೋತಿ । ದ್ವ್ಯ॑ಖ್ಷರ-ಮ್ಬೃ॒ಹತ್ । ಬೃ॒ಹ॒ತ ಏ॒ಷ ವರ್ಣಃ॑ । ಅ॒ಗ್ನಿ॒ಹೋ॒ತ್ರಮೇ॒ವ ತ-ಥ್ಸಾಮ॑ನ್ವತ್-ಕರೋತಿ ॥ 40 ॥

ಯೋ ವಾ ಅ॑ಗ್ನಿಹೋ॒ತ್ರಸ್ಯೋ॑ಪ॒ಸದೋ॒ ವೇದ॑ । ಉಪೈ॑ನಮುಪ॒ಸದೋ॑ ನಮನ್ತಿ । ವಿ॒ನ್ದತ॑ ಉಪಸ॒ತ್ತಾರ᳚ಮ್ । ಉ॒ನ್ನೀಯೋಪ॑ ಸಾದಯತಿ । ಪೃ॒ಥಿ॒ವೀಮೇ॒ವ ಪ್ರೀ॑ಣಾತಿ । ಹೋ॒ಷ್ಯನ್ನುಪ॑ ಸಾದಯತಿ । ಅ॒ನ್ತರಿ॑ಖ್ಷಮೇ॒ವ ಪ್ರೀ॑ಣಾತಿ । ಹು॒ತ್ವೋಪ॑ ಸಾದಯತಿ । ದಿವ॑ಮೇ॒ವ ಪ್ರೀ॑ಣಾತಿ । ಏ॒ತಾ ವಾ ಅ॑ಗ್ನಿಹೋ॒ತ್ರಸ್ಯೋ॑ಪ॒ಸದಃ॑ ॥ 41 ॥

ಯ ಏ॒ವಂ-ವೇಁದ॑ । ಉಪೈ॑ನ-ಮುಪ॒ಸದೋ॑ ನಮನ್ತಿ । ವಿ॒ನ್ದತ॑ ಉಪಸ॒ತ್ತಾರ᳚ಮ್ ॥ ಯೋ ವಾ ಅ॑ಗ್ನಿಹೋ॒ತ್ರಸ್ಯಾಶ್ರಾ॑ವಿತ-ಮ್ಪ್ರ॒ತ್ಯಾಶ್ರಾ॑ವಿತ॒ಗ್ಂ॒ ಹೋತಾ॑ರ-ಮ್ಬ್ರ॒ಹ್ಮಾಣಂ॑-ವಁಷಟ್ಕಾ॒ರಂ-ವೇಁದ॑ । ತಸ್ಯ॒ ತ್ವೇ॑ವ ಹು॒ತಮ್ । ಪ್ರಾ॒ಣೋ ವಾ ಅ॑ಗ್ನಿಹೋ॒ತ್ರಸ್ಯಾಶ್ರಾ॑ವಿತಮ್ । ಅ॒ಪಾ॒ನಃ ಪ್ರ॒ತ್ಯಾಶ್ರಾ॑ವಿತಮ್ । ಮನೋ॒ ಹೋತಾ᳚ । ಚಖ್ಷು॑-ರ್ಬ್ರ॒ಹ್ಮಾ । ನಿ॒ಮೇ॒ಷೋ ವ॑ಷಟ್ಕಾ॒ರಃ ॥ 42 ॥

ಯ ಏ॒ವಂ-ವೇಁದ॑ । ತಸ್ಯ॒ ತ್ವೇ॑ವ ಹು॒ತಮ್ ॥ ಸಾ॒ಯಂ॒-ಯಾಁವಾ॑ನಶ್ಚ॒ ವೈ ದೇ॒ವಾಃ ಪ್ರಾ॑ತ॒ರ್ಯಾವಾ॑ಣಶ್ಚಾ-ಗ್ನಿಹೋ॒ತ್ರಿಣೋ॑ ಗೃ॒ಹಮಾಗ॑ಚ್ಛನ್ತಿ । ತಾನ್. ಯನ್ನ ತ॒ರ್ಪಯೇ᳚ತ್ । ಪ್ರ॒ಜಯಾ᳚-ಽಸ್ಯ ಪ॒ಶುಭಿ॒ರ್ವಿ ತಿ॑ಷ್ಠೇರನ್ನ್ । ಯತ್ತ॒ರ್ಪಯೇ᳚ತ್ । ತೃ॒ಪ್ತಾ ಏ॑ನ-ಮ್ಪ್ರ॒ಜಯಾ॑ ಪ॒ಶುಭಿ॑ಸ್ತರ್ಪಯೇಯುಃ ॥ ಸ॒ಜೂರ್ದೇ॒ವೈ-ಸ್ಸಾ॒ಯಂ-ಯಾಁವ॑ಭಿ॒ರಿತಿ॑ ಸಾ॒ಯಗ್ಂ ಸ-ಮ್ಮೃ॑ಶತಿ । ಸ॒ಜೂರ್ದೇ॒ವೈಃ ಪ್ರಾ॒ತರ್ಯಾವ॑ಭಿ॒ರಿತಿ॑ ಪ್ರಾ॒ತಃ । ಯೇ ಚೈ॒ವ ದೇ॒ವಾ-ಸ್ಸಾ॑ಯಂ॒-ಯಾಁವಾ॑ನೋ॒ ಯೇ ಚ॑ ಪ್ರಾತ॒ರ್ಯಾವಾ॑ಣಃ ॥ 43 ॥

ತಾನೇ॒ವೋಭಯಾಗ್॑ ಸ್ತರ್ಪಯತಿ । ತ ಏ॑ನ-ನ್ತೃ॒ಪ್ತಾಃ ಪ್ರ॒ಜಯಾ॑ ಪ॒ಶುಭಿ॑ ಸ್ತರ್ಪಯನ್ತಿ ॥ ಅ॒ರು॒ಣೋ ಹ॑ ಸ್ಮಾ॒ಹೌಪ॑ವೇಶಿಃ । ಅ॒ಗ್ನಿ॒ಹೋ॒ತ್ರ ಏ॒ವಾಹಗ್ಂ ಸಾ॒ಯ-ಮ್ಪ್ರಾ॑ತ॒ರ್ವಜ್ರ॒-ಮ್ಭ್ರಾತೃ॑ವ್ಯೇಭ್ಯಃ॒ ಪ್ರ ಹ॑ರಾಮಿ । ತಸ್ಮಾ॒-ನ್ಮತ್ಪಾಪೀ॑ಯಾಗ್ಂಸೋ॒ ಭ್ರಾತೃ॑ವ್ಯಾ॒ ಇತಿ॑ । ಚ॒ತುರುನ್ನ॑ಯತಿ । ದ್ವಿರ್ಜು॑ಹೋತಿ । ಸ॒ಮಿ-ಥ್ಸ॑ಪ್ತ॒ಮೀ । ಸ॒ಪ್ತಪ॑ದಾ॒ ಶಕ್ವ॑ರೀ । ಶಾ॒ಕ್ವ॒ರೋ ವಜ್ರಃ॑ । ಅ॒ಗ್ನಿ॒ಹೋ॒ತ್ರ ಏ॒ವ ತಥ್ಸಾ॒ಯ-ಮ್ಪ್ರಾ॑ತ॒ರ್ವಜ್ರಂ॒-ಯಁಜ॑ಮಾನೋ॒ ಭ್ರಾತೃ॑ವ್ಯಾಯ॒ ಪ್ರ ಹ॑ರತಿ । ಭವ॑ತ್ಯಾ॒ತ್ಮನಾ᳚ । ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತಿ ॥ 44 ॥
(ಬ॒ರ್॒ಹಿಃ - ಪ್ರಾ॒ತ--ರ್ ಹು॒ತಾದ್ಯಾ॑ಯ - ಜಾಯತೇ - ರುನ್ಧೇ - ಽಸಾ॒ಮಾ - ಕ॑ರೋ - ತ್ಯೇ॒ತಾ ವಾ ಅ॑ಗ್ನಿಹೋ॒ತ್ರಸ್ಯೋ॑ ಪ॒ಸದೋ॑ - ವಷಟ್ಕಾ॒ರ - ಶ್ಚ॑ ಪ್ರಾತ॒ರ್ಯಾವಾ॑ಣೋ॒ - ವಜ್ರ॒ಸ್ತ್ರೀಣಿ॑ ಚ) (ಅ. 5)

ಅನುವಾಕಂ 6 - ಅಭ್ಯುದ್ದ್ರವಣಮ್, ಹೋಮಾಭಾವಪ್ರತೀಕಾರಶ್ಚ
ಪ್ರ॒ಜಾಪ॑ತಿ-ರಕಾಮಯ-ತಾತ್ಮ॒ನ್ ವನ್ಮೇ॑ ಜಾಯೇ॒ತೇತಿ॑ । ಸೋ॑-ಽಜುಹೋತ್ । ತಸ್ಯಾ᳚ತ್ಮ॒ನ್ ವದ॑ಜಾಯತ । ಅ॒ಗ್ನಿ-ರ್ವಾ॒ಯುರಾ॑-ದಿ॒ತ್ಯಃ । ತೇ᳚-ಽಬ್ರುವನ್ನ್ । ಪ್ರ॒ಜಾಪ॑ತಿ-ರಹೌಷೀ-ದಾತ್ಮ॒ನ್-ವನ್ಮೇ॑ ಜಾಯೇ॒ತೇತಿ॑ । ತಸ್ಯ॑ ವ॒ಯಮ॑ಜನಿಷ್ಮಹಿ । ಜಾಯ॑ತಾ-ನ್ನ ಆತ್ಮ॒ನ್-ವದಿತಿ॒ ತೇ॑-ಽಜುಹವುಃ । ಪ್ರಾ॒ಣಾನಾ॑ಮ॒ಗ್ನಿಃ । ತ॒ನುವೈ॑ ವಾ॒ಯುಃ ॥ 45 ॥

ಚಖ್ಷು॑ಷ ಆದಿ॒ತ್ಯಃ । ತೇಷಾಗ್ಂ॑ ಹು॒ತಾದ॑ಜಾಯತ॒ ಗೌರೇ॒ವ ॥ ತಸ್ಯೈ॒ ಪಯ॑ಸಿ॒ ವ್ಯಾಯ॑ಚ್ಛನ್ತ । ಮಮ॑ ಹು॒ತಾದ॑ಜನಿ॒ ಮಮೇತಿ॑ । ತೇ ಪ್ರ॒ಜಾಪ॑ತಿ-ಮ್ಪ್ರ॒ಶ್ನಮಾ॑ಯನ್ನ್ । ಸ ಆ॑ದಿ॒ತ್ಯೋ᳚-ಽಗ್ನಿ-ಮ॑ಬ್ರವೀತ್ । ಯ॒ತ॒ರೋ ನೌ॒ ಜಯಾ᳚ತ್ । ತನ್ನೌ॑ ಸ॒ಹಾಸ॒ದಿತಿ॑ । ಕಸ್ಯೈ ಕೋ-ಽಹೌ॑ಷೀ॒ದಿತಿ॑ ಪ್ರ॒ಜಾಪ॑ತಿ-ರಬ್ರವೀ॒ತ್-ಕಸ್ಯೈ ಕ॒ ಇತಿ॑ । ಪ್ರಾ॒ಣಾನಾ॑ಮ॒ಹಮಿತ್ಯ॒ಗ್ನಿಃ ॥ 46 ॥

ತ॒ನುವಾ॑ ಅ॒ಹಮಿತಿ॑ ವಾ॒ಯುಃ । ಚಖ್ಷು॑ಷೋ॒-ಽಹಮಿತ್ಯಾ॑ದಿ॒ತ್ಯಃ । ಯ ಏ॒ವ ಪ್ರಾ॒ಣಾನಾ॒ಮಹೌ॑ಷೀತ್ । ತಸ್ಯ॑ ಹು॒ತಾದ॑ಜ॒ನೀತಿ॑ । ಅ॒ಗ್ನೇರ್-ಹು॒ತಾದ॑ಜ॒ನೀತಿ॑ । ತದ॑ಗ್ನಿಹೋ॒ತ್ರಸ್ಯಾ᳚-ಗ್ನಿಹೋತ್ರ॒ತ್ವಮ್ । ಗೌರ್ವಾ ಅ॑ಗ್ನಿಹೋ॒ತ್ರಮ್ । ಯ ಏ॒ವಂ-ವೇಁದ॒ ಗೌರ॑ಗ್ನಿಹೋ॒ತ್ರಮಿತಿ॑ । ಪ್ರಾ॒ಣಾ॒ಪಾ॒ನಾಭ್ಯಾ॑-ಮೇ॒ವಾಗ್ನಿಗ್ಂ ಸಮ॑ರ್ಧಯತಿ । ಅವ್ಯ॑ರ್ಧುಕಃ ಪ್ರಾಣಾಪಾ॒ನಾಭ್ಯಾ᳚-ಮ್ಭವತಿ ॥ 47 ॥

ಯ ಏ॒ವಂ-ವೇಁದ॑ ॥ ತೌ ವಾ॒ಯುರ॑ಬ್ರವೀತ್ । ಅನು॒ ಮಾ ಭ॑ಜತ॒ಮಿತಿ॑ । ಯದೇ॒ವ ಗಾರ್​ಹ॑ಪತ್ಯೇ-ಽಧಿ॒ಶ್ರಿತ್ಯಾ॑-ಹವ॒ನೀಯ॑-ಮ॒ಭ್ಯು॑ದ್ದ್ರವಾನ್॑ । ತೇನ॒ ತ್ವಾ-ಮ್ಪ್ರೀ॑ಣಾ॒ನಿತ್ಯ॑-ಬ್ರೂತಾಮ್ । ತಸ್ಮಾ॒-ದ್ಯ-ದ್ಗಾರ್​ಹ॑ಪತ್ಯೇ-ಽಧಿ॒-ಶ್ರಿತ್ಯಾ॑ಹವ॒ನೀಯ॑-ಮ॒ಭ್ಯು॑ದ್ದ್ರವ॑ತಿ । ವಾ॒ಯುಮೇ॒ವ ತೇನ॑ ಪ್ರೀಣಾತಿ ॥ ಪ್ರ॒ಜಾಪ॑ತಿ-ರ್ದೇ॒ವತಾ᳚-ಸ್ಸೃ॒ಜಮಾ॑ನಃ । ಅ॒ಗ್ನಿಮೇ॒ವ ದೇ॒ವತಾ॑ನಾ-ಮ್ಪ್ರಥ॒ಮ-ಮ॑ಸೃಜತ । ಸೋ᳚-ಽನ್ಯದಾ॑ಲಂ॒-ಭ್ಯ॑ಮವಿ॑ತ್ತ್ವಾ ॥ 48 ॥

ಪ್ರ॒ಜಾಪ॑ತಿಮ॒ಭಿ ಪ॒ರ್ಯಾವ॑ರ್ತತ । ಸ ಮೃ॒ತ್ಯೋ-ರ॑ಬಿಭೇತ್ । ಸೋ॑-ಽಮುಮಾ॑ದಿ॒ತ್ಯ-ಮಾ॒ತ್ಮನೋ॒ ನಿರ॑ಮಿಮೀತ । ತಗ್ಂಹು॒ತ್ವಾ ಪರಾ᳚ಮ್ಪ॒ರ್ಯಾವ॑ರ್ತತ । ತತೋ॒ ವೈ ಸ ಮೃ॒ತ್ಯುಮಪಾ॑ಜಯತ್ । ಅಪ॑ ಮೃ॒ತ್ಯು-ಞ್ಜ॑ಯತಿ । ಯ ಏ॒ವಂ-ವೇಁದ॑ ॥ ತಸ್ಮಾ॒-ದ್ಯಸ್ಯೈ॒ವಂ-ವಿಁ॒ದುಷಃ॑ । ಉ॒ತೈಕಾ॒ಹಮು॒ತ ದ್ವ್ಯ॒ಹ-ನ್ನ ಜುಹ್ವ॑ತಿ । ಹು॒ತಮೇ॒ವಾಸ್ಯ॑ ಭವತಿ । ಅ॒ಸೌ ಹ್ಯಾ॑ದಿ॒ತ್ಯೋ᳚-ಽಗ್ನಿಹೋ॒ತ್ರಮ್ ॥ 49 ॥
(ತ॒ನುವೈ॑ ವಾ॒ಯು - ರ॒ಗ್ನಿ--ರ್ ಭ॑ವ॒ - ತ್ಯವಿ॑ತ್ತ್ವಾ - ಭವ॒ತ್ಯೇಕ॑-ಞ್ಚ) (ಅ. 6)

ಅನುವಾಕಂ 7 - ಹವಿಷ-ಸ್ಸರ್ವದೇವತಾಸಮ್ಬನ್ಧೇನ ಪ್ರಶಂಸಾ
ರೌ॒ದ್ರ-ಙ್ಗವಿ॑ । ವಾ॒ಯ॒ವ್ಯ॑-ಮುಪ॑ಸೃಷ್ಟಮ್ । ಆ॒ಶ್ವಿ॒ನ-ನ್ದು॒ಹ್ಯಮಾ॑ನಮ್ । ಸೌ॒ಮ್ಯ-ನ್ದು॒ಗ್ಧಮ್ । ವಾ॒ರು॒ಣಮಧಿ॑ಶ್ರಿತಮ್ । ವೈ॒ಶ್ವ॒ದೇ॒ವಾ ಭಿ॒ನ್ದವಃ॑ । ಪೌ॒ಷ್ಣಮುದ॑ನ್ತಮ್ । ಸಾ॒ರ॒ಸ್ವ॒ತಂ-ವಿಁ॒ಷ್ಯನ್ದ॑ಮಾನಮ್ । ಮೈ॒ತ್ರಗ್ಂ ಶರಃ॑ । ಧಾ॒ತುರುದ್ವಾ॑ಸಿತಮ್ । ಬೃಹ॒ಸ್ಪತೇ॒ರುನ್ನೀ॑ತಮ್ । ಸ॒ವಿ॒ತುಃ ಪ್ರಕ್ರಾ᳚ನ್ತಮ್ । ದ್ಯಾ॒ವಾ॒ಪೃ॒ಥಿ॒ವ್ಯಗ್ಗ್॑ ಹ್ರಿ॒ಯಮಾ॑ಣಮ್ । ಐ॒ನ್ದ್ರಾ॒ಗ್ನ-ಮುಪ॑ಸನ್ನಮ್ । ಅ॒ಗ್ನೇಃ ಪೂರ್ವಾ ಽಽಹು॑ತಿಃ । ಪ್ರ॒ಜಾಪ॑ತೇ॒-ರುತ್ತ॑ರಾ । ಐ॒ನ್ದ್ರಗ್ಂ ಹು॒ತಮ್ ॥ 50 ॥
(ಉದ್ವಾ॑ಸಿತಗ್ಂ ಸ॒ಪ್ತ ಚ॑) (ಅ. 7)

ಅನುವಾಕಂ 8 - ದೋಹನಪ್ರಕಾರೋ-ಽಗ್ನಿಹೋತ್ರಹೋತ್ರಶ್ಚ
ದ॒ಖ್ಷಿ॒ಣ॒ತ ಉಪ॑ ಸೃಜತಿ । ಪಿ॒ತೃ॒ಲೋ॒ಕಮೇ॒ವ ತೇನ॑ ಜಯತಿ ॥ ಪ್ರಾಚೀ॒ಮಾವ॑ರ್ತಯತಿ । ದೇ॒ವ॒ಲೋ॒ಕಮೇ॒ವ ತೇನ॑ ಜಯತಿ । ಉದೀ॑ಚೀಮಾ॒ವೃತ್ಯ॑ ದೋಗ್ಧಿ । ಮ॒ನು॒ಷ್ಯ॒ಲೋ॒ಕಮೇ॒ವ ತೇನ॑ ಜಯತಿ ॥ ಪೂರ್ವೌ॑ ದುಹ್ಯಾಜ್ಜ್ಯೇ॒ಷ್ಠಸ್ಯ॑ ಜ್ಯೈಷ್ಠಿನೇ॒ಯಸ್ಯ॑ । ಯೋ ವಾ॑ ಗ॒ತಶ್ರೀ॒-ಸ್ಸ್ಯಾತ್ । ಅಪ॑ರೌ ದುಹ್ಯಾತ್-ಕನಿ॒ಷ್ಠಸ್ಯ॑ ಕಾನಿಷ್ಠಿನೇ॒ಯಸ್ಯ॑ । ಯೋ ವಾ॒ ಬುಭೂ॑ಷೇತ್ ॥ 51 ॥

ನ ಸ-ಮ್ಮೃ॑ಶತಿ । ಪಾ॒ಪ॒ವ॒ಸ್ಯ॒ಸಸ್ಯ॒ ವ್ಯಾವೃ॑ತ್ತ್ಯೈ ॥ ವಾ॒ಯ॒ವ್ಯಂ॑-ವಾಁ ಏ॒ತದುಪ॑ಸೃಷ್ಟಮ್ । ಆ॒ಶ್ವಿ॒ನ-ನ್ದು॒ಹ್ಯಮಾ॑ನಮ್ । ಮೈ॒ತ್ರ-ನ್ದು॒ಗ್ಧಮ್ । ಅ॒ರ್ಯ॒ಮ್ಣ ಉ॑ದ್ವಾ॒ಸ್ಯಮಾ॑ನಮ್ । ತ್ವಾ॒ಷ್ಟ್ರ-ಮು॑ನ್ನೀ॒ಯಮಾ॑ನಮ್ । ಬೃಹ॒ಸ್ಪತೇ॒-ರುನ್ನೀ॑ತಮ್ । ಸ॒ವಿ॒ತುಃ ಪ್ರಕ್ರಾ᳚ನ್ತಮ್ । ದ್ಯಾ॒ವಾ॒ಪೃ॒ಥಿ॒ವ್ಯಗ್ಗ್॑ ಹ್ರಿ॒ಯಮಾ॑ಣಮ್ ॥ 52 ॥

ಐ॒ನ್ದ್ರಾ॒ಗ್ನಮುಪ॑ ಸಾದಿತಮ್ । ಸರ್ವಾ᳚ಭ್ಯೋ॒ ವಾ ಏ॒ಷ ದೇ॒ವತಾ᳚ಭ್ಯೋ ಜುಹೋತಿ । ಯೋ᳚-ಽಗ್ನಿಹೋ॒ತ್ರ-ಞ್ಜು॒ಹೋತಿ॑ ॥ ಯಥಾ॒ ಖಲು॒ ವೈ ಧೇ॒ನು-ನ್ತೀ॒ರ್ಥೇ ತ॒ರ್ಪಯ॑ತಿ । ಏ॒ವಮ॑ಗ್ನಿಹೋ॒ತ್ರೀ ಯಜ॑ಮಾನ-ನ್ತರ್ಪಯತಿ । ತೃಪ್ಯ॑ತಿ ಪ್ರ॒ಜಯಾ॑ ಪ॒ಶುಭಿಃ॑ । ಪ್ರಸು॑ವ॒ರ್ಗಂ-ಲೋಁ॒ಕ-ಞ್ಜಾ॑ನಾತಿ । ಪಶ್ಯ॑ತಿ ಪು॒ತ್ರಮ್ । ಪಶ್ಯ॑ತಿ॒ ಪೌತ್ರ᳚ಮ್ । ಪ್ರ ಪ್ರ॒ಜಯಾ॑ ಪ॒ಶುಭಿ॑-ರ್ಮಿಥು॒ನೈ-ರ್ಜಾ॑ಯತೇ । ಯಸ್ಯೈ॒ವಂ-ವಿಁ॒ದುಷೋ᳚-ಽಗ್ನಿಹೋ॒ತ್ರ-ಞ್ಜುಹ್ವ॑ತಿ । ಯ ಉ॑ ಚೈನ ದೇ॒ವಂ-ವೇಁದ॑ ॥ 53 ॥
(ಬಭೂ॑ಷೇ- ದ್ಧ್ರಿ॒ಯಮಾ॑ಣಂ - ಜಾಯತೇ॒ ದ್ವೇ ಚ॑) (ಅ. 8)

ಅನುವಾಕಂ 9 - ಅಗ್ನಿಹೋತ್ರಸ್ಯಾಸಂಸೃಷ್ಟಹೋಮಮನ್ತ್ರೌ
ತ್ರಯೋ॒ ವೈ ಪ್ರೈ॑ಯಮೇ॒ಧಾ ಆ॑ಸನ್ನ್ । ತೇಷಾ॒-ನ್ತ್ರಿರೇಕೋ᳚-ಽಗ್ನಿಹೋ॒ತ್ರ-ಮ॑ಜುಹೋತ್ । ದ್ವಿರೇಕಃ॑ । ಸ॒ಕೃದೇಕಃ॑ । ತೇಷಾಂ॒-ಯಁಸ್ತ್ರಿರಜು॑ಹೋತ್ । ಸ ಋ॒ಚಾ-ಽಜು॑ಹೋತ್ । ಯೋ ದ್ವಿಃ । ಸ ಯಜು॑ಷಾ । ಯ-ಸ್ಸ॒ಕೃತ್ । ಸ ತೂ॒ಷ್ಣೀಮ್ ॥ 54 ॥

ಯಶ್ಚ॒ ಯಜು॒ಷಾ ಽಜು॑ಹೋ॒ದ್ಯಶ್ಚ॑ ತೂ॒ಷ್ಣೀಮ್ । ತಾವು॒ಭಾವಾ᳚ರ್ಧ್ನುತಾಮ್ । ತಸ್ಮಾ॒-ದ್ಯಜು॒ಷಾ ಽಽಹು॑ತಿಃ॒ ಪೂರ್ವಾ॑ ಹೋತ॒ವ್ಯಾ᳚ । ತೂ॒ಷ್ಣೀಮುತ್ತ॑ರಾ । ಉ॒ಭೇ ಏ॒ವರ್ಧೀ ಅವ॑ರುನ್ಧೇ । ಅ॒ಗ್ನಿ-ರ್ಜ್ಯೋತಿ॒-ರ್ಜ್ಯೋತಿ॑ರ॒ಗ್ನಿ-ಸ್ಸ್ವಾಹೇತಿ॑ ಸಾ॒ಯ-ಞ್ಜು॑ಹೋತಿ । ರೇತ॑ ಏ॒ವ ತ-ದ್ದ॑ಧಾತಿ । ಸೂರ್ಯೋ॒ ಜ್ಯೋತಿ॒-ರ್ಜ್ಯೋತಿ॒-ಸ್ಸೂರ್ಯ॒-ಸ್ಸ್ವಾಹೇತಿ॑ ಪ್ರಾ॒ತಃ । ರೇತ॑ ಏ॒ವ ಹಿ॒ತ-ಮ್ಪ್ರ ಜ॑ನಯತಿ ॥ ರೇತೋ॒ ವಾ ಏ॒ತಸ್ಯ॑ ಹಿ॒ತ-ನ್ನ ಪ್ರ ಜಾ॑ಯತೇ ॥ 55 ॥

ಯಸ್ಯಾ᳚ಗ್ನಿಹೋ॒ತ್ರಮಹು॑ತ॒ಗ್ಂ॒ ಸೂರ್ಯೋ॒-ಽಭ್ಯು॑ದೇತಿ॑ । ಯ-ದ್ಯನ್ತೇ॒ ಸ್ಯಾತ್ । ಉ॒ನ್ನೀಯ॒ ಪ್ರಾಂಉ॒ದಾದ್ರ॑ವೇತ್ । ಸ ಉ॑ಪ॒ಸಾದ್ಯಾತಮಿ॑ತೋ-ರಾಸೀತ । ಸ ಯ॒ದಾ ತಾಮ್ಯೇ᳚ತ್ । ಅಥ॒ ಭೂ-ಸ್ಸ್ವಾಹೇತಿ॑ ಜುಹುಯಾತ್ । ಪ್ರ॒ಜಾಪ॑ತಿ॒ರ್ವೈ ಭೂ॒ತಃ । ತಮೇ॒ವೋ-ಪಾ॑ಸರತ್ । ಸ ಏ॒ವೈನ॒-ನ್ತತ॒ ಉನ್ನ॑ಯತಿ । ನಾರ್ತಿ॒ಮಾರ್ಚ್ಛ॑ತಿ॒ ಯಜ॑ಮಾನಃ ॥ 56 ॥
(ತೂ॒ಷ್ಣೀಂ - ಜಾ॑ಯತೇ॒ - ಯಜ॑ಮಾನಃ) (ಅ. 9)

ಅನುವಾಕಂ 10 - ವಹ್ನೇರವಸ್ಥಾವಿಶೇಷಾನುಸಾರೇಣ ಹೋಮಃ
ಯದ॒ಗ್ನಿ-ಮು॒ದ್ಧರ॑ತಿ । ವಸ॑ವ॒ಸ್ತರ್​ಹ್ಯ॒ಗ್ನಿಃ । ತಸ್ಮಿ॒ನ್॒. ಯಸ್ಯ॒ ತಥಾ॑ವಿಧೇ॒ ಜುಹ್ವ॑ತಿ । ವಸು॑ಷ್ವೇ॒ವಾಸ್ಯಾ᳚ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥ ನಿಹಿ॑ತೋ ಧೂಪಾ॒ಯಞ್ಛೇ॑ತೇ । ರು॒ದ್ರಾಸ್ತಹ್ಯ॒ರ್ಗ್ನಿಃ । ತಸ್ಮಿ॒ನ್.॒ ಯಸ್ಯ॒ ತಥಾ॑ವಿಧೇ॒ ಜುಹ್ವ॑ತಿ । ರು॒ದ್ರೇಷ್ವೇ॒ವಾಸ್ಯಾ᳚ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥ ಪ್ರ॒ಥ॒ಮಮಿ॒ದ್ಧ್ಮಮ॒ರ್ಚಿರಾ ಲ॑ಭತೇ । ಆ॒ದಿ॒ತ್ಯಾಸ್ತರ್​ಹ್ಯ॒ಗ್ನಿಃ ॥ 57 ॥

ತಸ್ಮಿ॒ನ್॒. ಯಸ್ಯ॒ ತಥಾ॑ವಿಧೇ॒ ಜುಹ್ವ॑ತಿ । ಆ॒ದಿ॒ತ್ಯೇಷ್ವೇ॒ವಾಸ್ಯಾ᳚ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥ ಸರ್ವ॑ ಏ॒ವ ಸ॑ರ್ವ॒ಶ ಇ॒ದ್ಧ್ಮ ಆದೀ᳚ಪ್ತೋ ಭವತಿ । ವಿಶ್ವೇ॑ ದೇ॒ವಾಸ್ತಹ್ಯ॒ರ್ಗ್ನಿಃ । ತಸ್ಮಿ॒ನ್॒. ಯಸ್ಯ॒ ತಥಾ॑ವಿಧೇ॒ ಜುಹ್ವ॑ತಿ । ವಿಶ್ವೇ᳚ಷ್ವೇ॒ವಾಸ್ಯ॑ ದೇ॒ವೇಷ್ವ॑ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥ ನಿ॒ತ॒ರಾಮ॒ರ್ಚಿರು॒ಪಾವೈ॑ತಿ ಲೋಹಿ॒ನೀಕೇ॑ವ ಭವತಿ । ಇನ್ದ್ರ॒ಸ್ತರ್​ಹ್ಯ॒ಗ್ನಿಃ । ತಸ್ಮಿ॒ನ್॒. ಯಸ್ಯ॒ ತಥಾ॑ವಿಧೇ॒ ಜುಹ್ವ॑ತಿ । ಇನ್ದ್ರ॑ ಏ॒ವಾಸ್ಯಾ᳚ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥ 58 ॥

ಅಙ್ಗಾ॑ರಾ ಭವನ್ತಿ । ತೇಭ್ಯೋ-ಽಙ್ಗಾ॑ರೇಭ್ಯೋ॒-ಽರ್ಚಿರುದೇ॑ತಿ । ಪ್ರ॒ಜಾಪ॑ತಿ॒ಸ್ತರ್​ಹ್ಯ॒ಗ್ನಿಃ । ತಸ್ಮಿ॒ನ್॒. ಯಸ್ಯ॒ ತಥಾ॑ವಿಧೇ॒ ಜುಹ್ವ॑ತಿ । ಪ್ರ॒ಜಾಪ॑ತಾವೇ॒ವಾಸ್ಯಾ᳚ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥ ಶರೋ-ಽಙ್ಗಾ॑ರಾ॒ ಅದ್ಧ್ಯೂ॑ಹನ್ತೇ । ಬ್ರಹ್ಮ॒-ತರ್​ಹ್ಯ॒ಗ್ನಿಃ । ತಸ್ಮಿ॒ನ್.॒ ಯಸ್ಯ॒ ತಥಾ॑ವಿಧೇ॒ ಜುಹ್ವ॑ತಿ । ಬ್ರಹ್ಮ॑ನ್ನೇ॒ವಾಸ್ಯಾ᳚ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥ ವಸು॑ಷು ರು॒ದ್ರೇಷ್ವಾ॑ದಿ॒ತ್ಯೇಷು॒ ವಿಶ್ವೇ॑ಷು ದೇ॒ವೇಷು॑ । ಇನ್ದ್ರೇ᳚ ಪ್ರ॒ಜಾಪ॑ತೌ॒ ಬ್ರಹ್ಮನ್ನ್॑ । ಅಪ॑ರಿವರ್ಗಮೇ॒ವಾಸ್ಯೈ॒ತಾಸು॑ ದೇ॒ವತಾ॑ಸು ಹು॒ತ-ಮ್ಭ॑ವತಿ । ಯಸ್ಯೈ॒ವಂ-ವಿಁ॒ದುಷೋ᳚-ಽಗ್ನಿಹೋ॒ತ್ರ-ಞ್ಜುಹ್ವ॑ತಿ । ಯ ಉ॑ ಚೈನ ದೇ॒ವಂ-ವೇಁದ॑ ॥ 59 ॥
(ಆ॒ದಿ॒ತ್ಯಾಸ್ತರ್​ಹ್ಯ॒ಗ್ನಿ--ರ್ ಇನ್ದ್ರ॑ ಏ॒ವಾಸ್ಯಾ᳚ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ - ದೇ॒ವೇಷು॑ ಚ॒ತ್ವಾರಿ॑ ಚ) (ಅ. 10)

(ಯದ॒ಗ್ನಿ-ನ್ನಿಹಿ॑ತಃ ಪ್ರಥ॒ಮಗ್ಂ ಸರ್ವ॑ ಏ॒ವ ನಿ॑ತ॒ರಾಮಙ್ಗಾ॑ರಾ॒-ಶ್ಶರೋ-ಽಙ್ಗಾ॑ರಾ॒
ಬ್ರಹ್ಮ॒ವಸು॑ಷ್ವ॒ಷ್ಟೌ)

ಅನುವಾಕಂ 11 - ಕಾಲಭೇದೇನ ಸಮನ್ತ್ರಕ-ಮ್ಪರಿಷೇಚನಂ
ಋ॒ತ-ನ್ತ್ವಾ॑ ಸ॒ತ್ಯೇನ॒ ಪರಿ॑ಷಿಞ್ಚಾ॒ಮೀತಿ॑ ಸಾ॒ಯ-ಮ್ಪರಿ॑ಷಿಞ್ಚತಿ । ಸ॒ತ್ಯ-ನ್ತ್ವ॒ರ್ತೇನ॒ ಪರಿ॑ಷಿಞ್ಚಾ॒ಮೀತಿ॑ ಪ್ರಾ॒ತಃ । ಅ॒ಗ್ನಿರ್ವಾ ಋ॒ತಮ್ । ಅ॒ಸಾವಾ॑ದಿ॒ತ್ಯ-ಸ್ಸ॒ತ್ಯಮ್ । ಅ॒ಗ್ನಿಮೇ॒ವ ತದಾ॑ದಿ॒ತ್ಯೇನ॑ ಸಾ॒ಯ-ಮ್ಪರಿ॑ಷಿಞ್ಚತಿ । ಅ॒ಗ್ನಿನಾ॑ ಽಽದಿ॒ತ್ಯ-ಮ್ಪ್ರಾ॒ತಸ್ಸಃ । ಯಾವ॑ದಹೋರಾ॒ತ್ರೇ ಭವ॑ತಃ । ತಾವ॑ದಸ್ಯ ಲೋ॒ಕಸ್ಯ॑ । ನಾರ್ತಿ॒ರ್ನ ರಿಷ್ಟಿಃ॑ । ನಾನ್ತೋ॒ ನ ಪ॑ರ್ಯ॒ನ್ತೋ᳚-ಽಸ್ತಿ । ಯಸ್ಯೈ॒ವಂ-ವಿಁ॒ದುಷೋ᳚-ಽಗ್ನಿಹೋ॒ತ್ರ-ಞ್ಜುಹ್ವ॑ತಿ । ಯ ಉ॑ ಚೈನ ದೇ॒ವಂ-ವೇಁದ॑ ॥ 60 ॥
(ಅ॒ಸ್ತಿ॒ ದ್ವೇ ಚ॑) (ಅ. 11)

(ಅಙ್ಗಿ॑ರಸಃ - ಪ್ರ॒ಜಾಪ॑ತಿರ॒ಗ್ನಿಗ್ಂ - ರು॒ದ್ರ - ಉ॑ತ್ತ॒ರಾವ॑ತೀಂ - ಬ್ರಹ್ಮವಾ॒ದಿನೋ᳚ ಽಗ್ನಿಹೋ॒ತ್ರಪ್ರಾ॑ಯಣಾ ಯ॒ಜ್ಞಾಃ - ಪ್ರ॒ಜಾಪ॑ತಿರಕಾಮಯತಾತ್ಮ॒ನ್ವ-ದ್- ರೌ॒ದ್ರ-ಙ್ಗವಿ॑ -ದಖ್ಷಿಣ॒ತ - ಸ್ತ್ರಯೋ॒ ವೈ - ಯದ॒ಗ್ನಿ - ಮೃ॒ತ-ನ್ತ್ವಾ॑ ಸ॒ತ್ಯೇನೈಕಾ॑ದಶ)

(ಅಙ್ಗಿ॑ರಸಃ॒ - ಪ್ರೈವ ತೇನ॑ - ಪ॒ಶೂನೇ॒ವ - ಯನ್ನಿ॒ಮಾರ್​ಷ್ಟಿ॒ - ಯೋ ವಾ ಅ॑ಗ್ನಿಹೋ॒ತ್ರಸ್ಯೋ॑ಪ॒ಸದೋ॑ - ದಖ್ಷಿಣ॒ತ-ಷ್ಷ॑ಷ್ಟಿಃ )

(ಅಙ್ಗಿ॑ರಸೋ॒ - ಯ ಉ॑ ಚೈನ ದೇ॒ವಂ-ವೇಁದ॑)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಪ್ರಥಮಃ ಪ್ರಪಾಠಕ-ಸ್ಸಮಾಪ್ತಃ ॥