ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಚತುರ್ಥಃ ಪ್ರಪಾಠಕಃ - ಉಪಹೋಮಾಃ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಉಪಹೋಮಾಃ
ಜುಷ್ಟೋ॒ ದಮೂ॑ನಾ॒ ಅತಿ॑ಥಿರ್ದುರೋ॒ಣೇ । ಇ॒ಮ-ನ್ನೋ॑ ಯ॒ಜ್ಞಮುಪ॑ ಯಾಹಿ ವಿ॒ದ್ವಾನ್ । ವಿಶ್ವಾ॑ ಅಗ್ನೇ-ಽಭಿ॒ ಯುಜೋ॑ ವಿ॒ಹತ್ಯ॑ । ಶ॒ತ್ರೂ॒ಯ॒ತಾಮಾಭ॑ರಾ॒ ಭೋಜ॑ನಾನಿ ॥ ಅಗ್ನೇ॒ ಶರ್ಧ॑ ಮಹ॒ತೇ ಸೌಭ॑ಗಾಯ । ತವ॑ ದ್ಯು॒ಮ್ನಾನ್ಯು॑ತ್ತ॒ಮಾನಿ॑ ಸನ್ತು । ಸ-ಞ್ಜಾ᳚ಸ್ಪ॒ತ್ಯಗ್ಂ ಸು॒ಯಮ॒ಮಾ ಕೃ॑ಣುಷ್ವ । ಶ॒ತ್ರೂ॒ಯ॒ತಾಮ॒ಭಿತಿ॑ಷ್ಠಾ॒ ಮಹಾಗ್ಂ॑ಸಿ ॥ ಅಗ್ನೇ॒ ಯೋ ನೋ॒-ಽಭಿತೋ॒ ಜನಃ॑ । ವೃಕೋ॒ ವಾರೋ॒ ಜಿಘಾಗ್ಂ॑ಸತಿ ॥ 1 ॥

ತಾಗ್​ಸ್ತ್ವಂ-ವೃಁ॑ತ್ರಹಞ್ಜಹಿ । ವಸ್ವ॒ಸ್ಮಭ್ಯ॒-ಮಾಭ॑ರ ॥ ಅಗ್ನೇ॒ ಯೋ ನೋ॑-ಽಭಿ॒ದಾಸ॑ತಿ । ಸ॒ಮಾ॒ನೋ ಯಶ್ಚ॒ ನಿಷ್ಟ್ಯಃ॑ । ಇ॒ದ್ಧ್ಮಸ್ಯೇ॑ವ ಪ್ರ॒ಖ್ಷಾಯ॑ತಃ । ಮಾ ತಸ್ಯೋಚ್ಛೇ॑ಷಿ॒ ಕಿಞ್ಚ॒ನ ॥ ತ್ವಮಿ॑ನ್ದ್ರಾಭಿ॒ಭೂರ॑ಸಿ । ದೇ॒ವೋ ವಿಜ್ಞಾ॑ತವೀರ್ಯಃ । ವೃ॒ತ್ರ॒ಹಾ ಪು॑ರು॒ಚೇತ॑ನಃ ॥ ಅಪ॒ ಪ್ರಾಚ॑ ಇನ್ದ್ರ॒ ವಿಶ್ವಾಗ್ಂ॑ ಅ॒ಮಿತ್ರಾನ್॑ ॥ 2 ॥

ಅಪಾಪಾ॑ಚೋ ಅಭಿಭೂತೇ ನುದಸ್ವ । ಅಪೋದೀ॑ಚೋ॒ ಅಪ॑ ಶೂರಧ॒ರಾಚ॑ ಊ॒ರೌ । ಯಥಾ॒ ತವ॒ ಶರ್ಮ॒ನ್ಮದೇ॑ಮ ॥ ತಮಿನ್ದ್ರಂ॑-ವಾಁಜಯಾಮಸಿ । ಮ॒ಹೇ ವೃ॒ತ್ರಾಯ॒ ಹನ್ತ॑ವೇ । ಸ ವೃಷಾ॑ ವೃಷ॒ಭೋ ಭು॑ವತ್ ॥ ಯು॒ಜೇ ರಥ॑-ಙ್ಗ॒ವೇಷ॑ಣ॒ಗ್ಂ॒ ಹರಿ॑ಭ್ಯಾಮ್ । ಉಪ॒ ಬ್ರಹ್ಮಾ॑ಣಿ ಜುಜುಷಾ॒ಣ-ಮ॑ಸ್ಥುಃ । ವಿಬಾ॑ಧಿಷ್ಟಾ॒ಸ್ಯ ರೋದ॑ಸೀ ಮಹಿ॒ತ್ವಾ । ಇನ್ದ್ರೋ॑ ವೃ॒ತ್ರಾಣ್ಯ॑ಪ್ರ॒ತೀ ಜ॑ಘ॒ನ್ವಾನ್ ॥ 3 ॥

ಹ॒ವ್ಯ॒ವಾಹ॑-ಮಭಿಮಾತಿ॒ಷಾ-ಽಹ᳚ಮ್ । ರ॒ಖ್ಷೋ॒ಹಣ॒-ಮ್ಪೃತ॑ನಾಸು ಜಿ॒ಷ್ಣುಮ್ । ಜ್ಯೋತಿ॑ಷ್ಮನ್ತ॒-ನ್ದೀದ್ಯ॑ತ॒-ಮ್ಪುರ॑ನ್ಧಿಮ್ । ಅ॒ಗ್ನಿಗ್ಗ್​ ಸ್ವಿ॑ಷ್ಟ॒ಕೃತ॒ಮಾ ಹು॑ವೇಮ ॥ ಸ್ವಿ॑ಷ್ಟಮಗ್ನೇ ಅ॒ಭಿ ತ-ತ್ಪೃ॑ಣಾಹಿ । ವಿಶ್ವಾ॑ ದೇವ॒ ಪೃತ॑ನಾ ಅ॒ಭಿಷ್ಯ । ಉ॒ರು-ನ್ನಃ॒ ಪನ್ಥಾ᳚-ಮ್ಪ್ರದಿ॒ಶನ್ವಿ ಭಾ॑ಹಿ । ಜ್ಯೋತಿ॑ಷ್ಮದ್ಧೇಹ್ಯ॒ಜರ॑-ನ್ನ॒ ಆಯುಃ॑ ॥ ತ್ವಾಮ॑ಗ್ನೇ ಹ॒ವಿಷ್ಮ॑ನ್ತಃ । ದೇ॒ವ-ಮ್ಮರ್ತಾ॑ಸ ಈಡತೇ ॥ 4 ॥

ಮನ್ಯೇ᳚ ತ್ವಾ ಜಾ॒ತವೇ॑ದಸಮ್ । ಸ ಹ॒ವ್ಯಾ ವ॑ಖ್ಷ್ಯಾ-ಽನು॒ಷಕ್ ॥ ವಿಶ್ವಾ॑ನಿ ನೋ ದು॒ರ್ಗಹಾ॑ ಜಾತವೇದಃ । ಸಿನ್ಧು॒-ನ್ನ ನಾ॒ವಾ ದು॑ರಿ॒ತಾ-ಽತಿ॑ಪರ್​ಷಿ । ಅಗ್ನೇ॑ ಅತ್ರಿ॒ವ-ನ್ಮನ॑ಸಾ ಗೃಣಾ॒ನಃ । ಅ॒ಸ್ಮಾಕ॑-ಮ್ಬೋದ್ಧ್ಯವಿ॒ತಾ ತ॒ನೂನಾ᳚ಮ್ ॥ ಪೂ॒ಷಾ ಗಾ ಅನ್ವೇ॑ತು ನಃ । ಪೂ॒ಷಾ ರ॑ಖ್ಷ॒ತ್ವರ್ವ॑ತಃ । ಪೂ॒ಷಾ ವಾಜಗ್ಂ॑ ಸನೋತು ನಃ ॥ ಪೂ॒ಷೇಮಾ ಆಶಾ॒ ಅನು॑ವೇದ॒ ಸರ್ವಾಃ᳚ ॥ 5 ॥

ಸೋ ಅ॒ಸ್ಮಾಗ್ಂ ಅಭ॑ಯತಮೇನ ನೇಷತ್ । ಸ್ವ॒ಸ್ತಿ॒ದಾ ಅಘೃ॑ಣಿ॒-ಸ್ಸರ್ವ॑ವೀರಃ । ಅಪ್ರ॑ಯುಚ್ಛ-ನ್ಪು॒ರ ಏ॑ತು॒ ಪ್ರಜಾ॒ನನ್ನ್ ॥ ತ್ವಮ॑ಗ್ನೇ ಸ॒ಪ್ರಥಾ॑ ಅಸಿ । ಜುಷ್ಟೋ॒ ಹೋತಾ॒ ವರೇ᳚ಣ್ಯಃ । ತ್ವಯಾ॑ ಯ॒ಜ್ಞಂ-ವಿಁತ॑ನ್ವತೇ ॥ ಅ॒ಗ್ನೀ ರಖ್ಷಾಗ್ಂ॑ಸಿ ಸೇಧತಿ । ಶು॒ಕ್ರಶೋ॑ಚಿ॒ರಮ॑ರ್ತ್ಯಃ । ಶುಚಿಃ॑ ಪಾವ॒ಕ ಈಡ್ಯಃ॑ ॥ ಅಗ್ನೇ॒ ರಖ್ಷಾ॑ಣೋ॒ ಅಗ್ಂಹ॑ಸಃ ॥ 6 ॥

ಪ್ರತಿ॑ಷ್ಮ ದೇವ॒ ರೀಷ॑ತಃ । ತಪಿ॑ಷ್ಠೈರ॒ಜರೋ॑ ದಹ ॥ ಅಗ್ನೇ॒ ಹಗ್ಂಸಿ॒ ನ್ಯ॑ತ್ರಿಣ᳚ಮ್ । ದೀದ್ಯ॒-ನ್ಮರ್ತ್ಯೇ॒ಷ್ವಾ । ಸ್ವೇ ಖ್ಷಯೇ॑ ಶುಚಿವ್ರತ ॥ ಆ ವಾ॑ತ ವಾಹಿ ಭೇಷ॒ಜಮ್ । ವಿ ವಾ॑ತ ವಾಹಿ॒ ಯದ್ರಪಃ॑ । ತ್ವಗ್ಂಹಿ ವಿ॒ಶ್ವ ಭೇ॑ಷಜಃ । ದೇ॒ವಾನಾ᳚-ನ್ದೂ॒ತ ಈಯ॑ಸೇ ॥ ದ್ವಾವಿ॒ಮೌ ವಾತಾ॑ ವಾತಃ ॥ 7 ॥

ಆ ಸಿನ್ಧೋ॒ರಾ ಪ॑ರಾ॒ವತಃ॑ । ದಖ್ಷ॑-ಮ್ಮೇ ಅ॒ನ್ಯ ಆ॒ವಾತು॑ । ಪರಾ॒-ಽನ್ಯೋ ವಾ॑ತು॒ ಯದ್ರಪಃ॑ ॥ ಯದ॒ದೋ ವಾ॑ತ ತೇ ಗೃ॒ಹೇ । ಅ॒ಮೃತ॑ಸ್ಯ ನಿ॒ಧಿರ್​ಹಿ॒ತಃ । ತತೋ॑ ನೋ ದೇಹಿ ಜೀ॒ವಸೇ᳚ । ತತೋ॑ ನೋ ಧೇಹಿ ಭೇಷ॒ಜಮ್ । ತತೋ॑ ನೋ॒ ಮಹ॒ ಆವ॑ಹ ॥ ವಾತ॒ ಆವಾ॑ತು ಭೇಷ॒ಜಮ್ । ಶ॒ಮ್ಭೂ-ರ್ಮ॑ಯೋ॒ ಭೂರ್ನೋ॑ ಹೃ॒ದೇ ॥ 8 ॥

ಪ್ರಣ॒ ಆಯೂಗ್ಂ॑ಷಿ ತಾರಿಷತ್ ॥ ತ್ವಮ॑ಗ್ನೇ ಅ॒ಯಾ-ಽಸಿ॑ । ಅ॒ಯಾ ಸನ್ಮನ॑ಸಾ ಹಿ॒ತಃ । ಅ॒ಯಾ ಸನಃಅ॒ವ್ಯಮೂ॑ಹಿಷೇ । ಅ॒ಯಾ ನೋ॑ ಧೇಹಿ ಭೇಷ॒ಜಮ್ ॥ ಇ॒ಷ್ಟೋ ಅ॒ಗ್ನಿರಾಹು॑ತಃ । ಸ್ವಾಹಾ॑ಕೃತಃ ಪಿಪರ್ತು ನಃ । ಸ್ವ॒ಗಾ ದೇ॒ವೇಭ್ಯ॑ ಇ॒ದ-ನ್ನಮಃ॑ ॥ ಕಾಮೋ॑ ಭೂ॒ತಸ್ಯ॒ ಭವ್ಯ॑ಸ್ಯ । ಸ॒ಮ್ರಾಡೇಕೋ॒ ವಿರಾ॑ಜತಿ ॥ 9 ॥

ಸ ಇ॒ದ-ಮ್ಪ್ರತಿ॑ ಪಪ್ರಥೇ । ಋ॒ತೂನು-ಥ್ಸೃ॑ಜತೇ ವ॒ಶೀ ॥ ಕಾಮ॒ಸ್ತದಗ್ರೇ॒ ಸಮ॑ವರ್ತ॒ತಾಧಿ॑ । ಮನ॑ಸೋ॒ ರೇತಃ॑ ಪ್ರಥ॒ಮಂ-ಯಁದಾಸೀ᳚ತ್ । ಸ॒ತೋ ಬನ್ಧು॒ಮಸ॑ತಿ॒ ನಿರ॑ವಿನ್ದನ್ನ್ । ಹೃ॒ದಿ ಪ್ರ॒ತೀಷ್ಯಾ॑ ಕ॒ವಯೋ॑ ಮನೀ॒ಷಾ ॥ ತ್ವಯಾ॑ ಮನ್ಯೋ ಸ॒ರಥ॑-ಮಾರು॒ಜನ್ತಃ॑ । ಹರ್​ಷ॑ಮಾಣಾಸೋ ಧೃಷ॒ತಾ ಮ॑ರುತ್ವಃ । ತಿ॒ಗ್ಮೇಷ॑ವ॒ ಆಯು॑ಧಾ ಸ॒ಗ್ಂ॒ಶಿಶಾ॑ನಾಃ । ಉಪ॒ಪ್ರಯ॑ನ್ತಿ॒ ನರೋ॑ ಅ॒ಗ್ನಿರೂ॑ಪಾಃ ॥ 10 ॥

ಮ॒ನ್ಯುರ್ಭಗೋ॑ ಮ॒ನ್ಯುರೇ॒ವಾಸ॑ ದೇ॒ವಃ । ಮ॒ನ್ಯುರ್-ಹೋತಾ॒ ವರು॑ಣೋ ವಿ॒ಶ್ವವೇ॑ದಾಃ । ಮ॒ನ್ಯುಂ-ವಿಁಶ॑ ಈಡತೇ ದೇವ॒ಯನ್ತೀಃ᳚ । ಪಾ॒ಹಿ ನೋ॑ ಮನ್ಯೋ॒ ತಪ॑ಸಾ॒ ಶ್ರಮೇ॑ಣ ॥ ತ್ವಮ॑ಗ್ನೇ ವ್ರತ॒ಭೃಚ್ಛುಚಿಃ॑ । ದೇ॒ವಾಗ್ಂ ಆಸಾ॑ದಯಾ ಇ॒ಹ । ಅಗ್ನೇ॑ ಹ॒ವ್ಯಾಯ॒ ವೋಢ॑ವೇ ॥ ವ್ರ॒ತಾ ನು ಬಿಭ್ರ॑ದ್ವ್ರತ॒ಪಾ ಅದಾ᳚ಭ್ಯಃ । ಯಜಾ॑ ನೋ ದೇ॒ವಾಗ್ಂ ಅ॒ಜರ॑-ಸ್ಸು॒ವೀರಃ॑ । ದಧ॒-ದ್ರತ್ನಾ॑ನಿ ಸುವಿದಾ॒ನೋ ಅ॑ಗ್ನೇ । ಗೋ॒ಪಾ॒ಯ ನೋ॑ ಜೀ॒ವಸೇ॑ ಜಾತವೇದಃ ॥ 11 ॥
(ಜಿಘಾಗ್ಂ॑ಸ - ತ್ಯ॒ಮಿತ್ರಾ᳚ - ಞ್ಜಘ॒ನ್ವಾ - ನೀ॑ಡತೇ॒ - ಸರ್ವಾ॒ - ಅಗ್ಂಹ॑ಸೋ - ವಾತೋ - ಹೃ॒ದೇ - ರಾ॑ಜ - ತ್ಯ॒ಗ್ನಿರೂ॑ಪಾಃ - ಸುವಿದಾ॒ನೋ ಅ॑ಗ್ನ॒ ಏಕ॑-ಞ್ಚ ) (ಅ. 1)

ಅನುವಾಕಂ 2 - ಉಪಹೋಮಾಃ
ಚಖ್ಷು॑ಷೋ ಹೇತೇ॒ ಮನ॑ಸೋ ಹೇತೇ । ವಾಚೋ॑ ಹೇತೇ॒ ಬ್ರಹ್ಮ॑ಣೋ ಹೇತೇ । ಯೋ ಮಾ॑-ಽಘಾ॒ಯು-ರ॑ಭಿ॒ದಾಸ॑ತಿ । ತಮ॑ಗ್ನೇ ಮೇ॒ನ್ಯಾ-ಽಮೇ॒ನಿ-ಙ್ಕೃ॑ಣು ॥ ಯೋ ಮಾ॒ ಚಖ್ಷು॑ಷಾ॒ ಯೋ ಮನ॑ಸಾ । ಯೋ ವಾ॒ಚಾ ಬ್ರಹ್ಮ॑ಣಾ ಽಘಾ॒ಯು-ರ॑ಭಿ॒ದಾಸ॑ತಿ । ತಯಾ᳚-ಽಗ್ನೇ॒ ತ್ವ-ಮ್ಮೇ॒ನ್ಯಾ । ಅ॒ಮುಮ॑ಮೇ॒ನಿ-ಙ್ಕೃ॑ಣು ॥ ಯ-ತ್ಕಿಞ್ಚಾ॒ಸೌ ಮನ॑ಸಾ॒ ಯಚ್ಚ॑ ವಾ॒ಚಾ । ಯ॒ಜ್ಞೈ-ರ್ಜು॒ಹೋತಿ॒ ಯಜು॑ಷಾ ಹ॒ವಿರ್ಭಿಃ॑ ॥ 12 ॥

ತ-ನ್ಮೃ॒ತ್ಯು-ರ್ನಿರ್-ಋ॑ತ್ಯಾ ಸಂ​ವಿಁದಾ॒ನಃ । ಪು॒ರಾ-ಽಽದಿ॒ಷ್ಟಾದಾಹು॑ತೀರಸ್ಯ ಹನ್ತು ॥ ಯಾ॒ತು॒ಧಾನಾ॒ ನಿರ್-ಋ॑ತಿ॒ರಾದು॒ ರಖ್ಷಃ॑ । ತೇ ಅ॑ಸ್ಯಘ್ನ॒-ನ್ತ್ವನೃ॑ತೇನ ಸ॒ತ್ಯಮ್ । ಇನ್ದ್ರೇ॑ಷಿತಾ॒ ಆಜ್ಯ॑ಮಸ್ಯ ಮಥ್ನನ್ತು । ಮಾತ-ಥ್ಸಮೃ॑ದ್ಧಿ॒ ಯದ॒ಸೌ ಕ॒ರೋತಿ॑ ॥ ಹನ್ಮಿ॑ ತೇ॒-ಽಹ-ಙ್ಕೃ॒ತಗ್ಂ ಹ॒ವಿಃ । ಯೋ ಮೇ॑ ಘೋ॒ರಮಚೀ॑ ಕೃತಃ । ಅಪಾ᳚ಞ್ಚೌ ತ ಉ॒ಭೌ ಬಾ॒ಹೂ । ಅಪ॑ನಹ್ಯಾಮ್ಯಾ॒ಸ್ಯ᳚ಮ್ ॥ 13 ॥

ಅಪ॑ನಹ್ಯಾಮಿ ತೇ ಬಾ॒ಹೂ । ಅಪ॑ನಹ್ಯಾಮ್ಯಾ॒ಸ್ಯ᳚ಮ್ । ಅ॒ಗ್ನೇ-ರ್ದೇ॒ವಸ್ಯ॒ ಬ್ರಹ್ಮ॑ಣಾ । ಸರ್ವ॑-ನ್ತೇ-ಽವಧಿಷ-ಙ್ಕೃ॒ತಮ್ ॥ ಪು॒ರಾ ಽಮುಷ್ಯ॑ ವಷಟ್ಕಾ॒ರಾತ್ । ಯ॒ಜ್ಞ-ನ್ದೇ॒ವೇಷು॑ ನಸ್ಕೃಧಿ । ಸ್ವಿ॑ಷ್ಟಮ॒ಸ್ಮಾಕ॑-ಮ್ಭೂಯಾತ್ । ಮಾ-ಽಸ್ಮಾ-ನ್ಪ್ರಾಪ॒-ನ್ನರಾ॑ತಯಃ ॥ ಅನ್ತಿ॑ ದೂ॒ರೇ ಸ॒ತೋ ಅ॑ಗ್ನೇ । ಭ್ರಾತೃ॑ವ್ಯಸ್ಯಾ ಽಭಿ॒ದಾಸ॑ತಃ ॥ 14 ॥

ವ॒ಷ॒ಟ್ಕಾ॒ರೇಣ॒ ವಜ್ರೇ॑ಣ । ಕೃ॒ತ್ಯಾಗ್ಂ ಹ॑ನ್ಮಿ ಕೃ॒ತಾಮ॒ಹಮ್ ॥ ಯೋ ಮಾ॒ ನಕ್ತ॒-ನ್ದಿವಾ॑ ಸಾ॒ಯಮ್ । ಪ್ರಾ॒ತಶ್ಚಾಹ್ನೋ॑ ನಿ॒ಪೀಯ॑ತಿ । ಅ॒ದ್ಯಾ ತಮಿ॑ನ್ದ್ರ॒ ವಜ್ರೇ॑ಣ । ಭ್ರಾತೃ॑ವ್ಯ-ಮ್ಪಾದಯಾಮಸಿ ॥ ಇನ್ದ್ರ॑ಸ್ಯ ಗೃ॒ಹೋ॑-ಽಸಿ॒ ತ-ನ್ತ್ವಾ᳚ । ಪ್ರಪ॑ದ್ಯೇ॒ ಸಗು॒-ಸ್ಸಾಶ್ವಃ॑ । ಸ॒ಹ ಯನ್ಮೇ॒ ಅಸ್ತಿ॒ ತೇನ॑ ॥ ಈಡೇ॑ ಅ॒ಗ್ನಿಂ-ವಿಁ॑ಪ॒ಶ್ಚಿತ᳚ಮ್ ॥ 15 ॥

ಗಿ॒ರಾ ಯ॒ಜ್ಞಸ್ಯ॒ ಸಾಧ॑ನಮ್ । ಶ್ರು॒ಷ್ಟೀ॒ವಾನ॑-ನ್ಧಿ॒ತಾವಾ॑ನಮ್ ॥ ಅಗ್ನೇ॑ ಶ॒ಕೇಮ॑ ತೇ ವ॒ಯಮ್ । ಯಮ॑-ನ್ದೇ॒ವಸ್ಯ॑ ವಾ॒ಜಿನಃ॑ । ಅತಿ॒ ದ್ವೇಷಾಗ್ಂ॑ಸಿ ತರೇಮ ॥ ಅವ॑ತ-ಮ್ಮಾ॒ ಸಮ॑ನಸೌ॒ ಸಮೋ॑ಕಸೌ । ಸಚೇ॑ತಸೌ॒ ಸರೇ॑ತಸೌ । ಉ॒ಭೌ ಮಾಮ॑ವತ-ಞ್ಜಾತವೇದಸೌ । ಶಿ॒ವೌ ಭ॑ವತಮ॒ದ್ಯ ನಃ॑ ॥ ಸ್ವ॒ಯ-ಙ್ಕೃ॑ಣ್ವಾ॒ನ-ಸ್ಸು॒ಗಮಪ್ರ॑ಯಾವಮ್ ॥ 16 ॥

ತಿ॒ಗ್ಮಶೃ॑ಙ್ಗೋ ವೃಷ॒ಭ-ಶ್ಶೋಶು॑ಚಾನಃ । ಪ್ರ॒ತ್ನಗ್ಂ ಸ॒ಧಸ್ಥ॒-ಮನು॒ಪಶ್ಯ॑ಮಾನಃ । ಆ ತನ್ತು॑ಮ॒ಗ್ನಿ-ರ್ದಿ॒ವ್ಯ-ನ್ತ॑ತಾನ ॥ ತ್ವ-ನ್ನ॒ಸ್ತನ್ತು॑ರು॒ತ ಸೇತು॑ರಗ್ನೇ । ತ್ವ-ಮ್ಪನ್ಥಾ॑ ಭವಸಿ ದೇವ॒ಯಾನಃ॑ । ತ್ವಯಾ᳚ ಽಗ್ನೇ ಪೃ॒ಷ್ಠಂ-ವಁ॒ಯಮಾರು॑ಹೇಮ । ಅಥಾ॑ ದೇ॒ವೈ-ಸ್ಸ॑ಧ॒ಮಾದ॑-ಮ್ಮದೇಮ ॥ ಉದು॑ತ್ತ॒ಮ-ಮ್ಮು॑ಮುಗ್ಧಿ ನಃ । ವಿ ಪಾಶ॑-ಮ್ಮದ್ಧ್ಯ॒ಮ-ಞ್ಚೃ॑ತ । ಅವಾ॑ಧ॒ಮಾನಿ॑ ಜೀ॒ವಸೇ᳚ ॥ 17 ॥

ವ॒ಯಗ್ಂ ಸೋ॑ಮ ವ್ರ॒ತೇ ತವ॑ । ಮನ॑ಸ್ತ॒ನೂಷು॒ ಬಿಭ್ರ॑ತಃ । ಪ್ರ॒ಜಾ ವ॑ನ್ತೋ ಅಶೀಮಹಿ ॥ ಇ॒ನ್ದ್ರಾ॒ಣೀ ದೇ॒ವೀ ಸು॒ಭಗಾ॑ ಸು॒ಪತ್ನೀ᳚ । ಉದಗ್ಂಶೇ॑ನ ಪತಿ॒ವಿದ್ಯೇ॑ ಜಿಗಾಯ । ತ್ರಿ॒ಗ್ಂ॒ಶದ॑ಸ್ಯಾ ಜ॒ಘನಂ॒-ಯೋಁಜ॑ನಾನಿ । ಉ॒ಪಸ್ಥ॒ ಇನ್ದ್ರ॒ಗ್ಗ್॒ ಸ್ಥವಿ॑ರ-ಮ್ಬಿಭರ್ತಿ ॥ ಸೇನಾ॑ ಹ॒ ನಾಮ॑ ಪೃಥಿ॒ವೀ ಧ॑ನಞ್ಜ॒ಯಾ । ವಿ॒ಶ್ವವ್ಯ॑ಚಾ॒ ಅದಿ॑ತಿ॒-ಸ್ಸೂರ್ಯ॑ತ್ವಕ್ । ಇ॒ನ್ದ್ರಾ॒ಣೀ ದೇ॒ವೀ ಪ್ರಾ॒ಸಹಾ॒ ದದಾ॑ನಾ ॥ 18 ॥

ಸಾ ನೋ॑ ದೇ॒ವೀ ಸು॒ಹವಾ॒ ಶರ್ಮ॑ ಯಚ್ಛತು ॥ ಆ ತ್ವಾ॑ ಽಹಾರ್​ಷಮ॒ನ್ತರ॑ಭೂಃ । ಧ್ರು॒ವಸ್ತಿ॒ಷ್ಠಾವಿ॑ಚಾಚಲಿಃ । ವಿಶ॑ಸ್ತ್ವಾ॒ ಸರ್ವಾ॑ ವಾಞ್ಛನ್ತು । ಮಾ ತ್ವ-ದ್ರಾ॒ಷ್ಟ್ರ-ಮಧಿ॑ಭ್ರಶತ್ ॥ ಧ್ರು॒ವಾ ದ್ಯೌ-ರ್ಧ್ರು॒ವಾ ಪೃ॑ಥಿ॒ವೀ । ಧ್ರು॒ವಂ-ವಿಁಶ್ವ॑ಮಿ॒ದ-ಞ್ಜಗ॑ತ್ । ಧ್ರು॒ವಾ ಹ॒ ಪರ್ವ॑ತಾ ಇ॒ಮೇ । ಧ್ರು॒ವೋ ರಾಜಾ॑ ವಿ॒ಶಾಮ॒ಯಮ್ ॥ ಇ॒ಹೈವೈಧಿ॒ ಮಾ ವ್ಯ॑ಥಿಷ್ಠಾಃ ॥ 19 ॥

ಪರ್ವ॑ತ ಇ॒ವಾ ವಿ॑ಚಾಚಲಿಃ । ಇನ್ದ್ರ॑ ಇವೇ॒ಹ ಧ್ರು॒ವಸ್ತಿ॑ಷ್ಠ । ಇ॒ಹ ರಾ॒ಷ್ಟ್ರ-ಮು॑ಧಾರಯ ॥ ಅ॒ಭಿತಿ॑ಷ್ಠ ಪೃತನ್ಯ॒ತಃ । ಅಧ॑ರೇ ಸನ್ತು॒ ಶತ್ರ॑ವಃ । ಇನ್ದ್ರ॑ ಇವ ವೃತ್ರ॒ಹಾತಿ॑ಷ್ಠ । ಅ॒ಪಃ, ಖ್ಷೇತ್ರಾ॑ಣಿ ಸ॒ಜಂ​ಯಁನ್ನ್॑ ॥ ಇನ್ದ್ರ॑ ಏಣಮದೀಧರತ್ । ಧ್ರು॒ವ-ನ್ಧ್ರು॒ವೇಣ॑ ಹ॒ವಿಷಾ᳚ । ತಸ್ಮೈ॑ ದೇ॒ವಾ ಅಧಿ॑ಬ್ರವನ್ನ್ । ಅ॒ಯ-ಞ್ಚ॒ ಬ್ರಹ್ಮ॑ಣ॒ಸ್ಪತಿಃ॑ ॥ 20 ॥
(ಹ॒ವಿರ್ಭಿ॑ - ರಾ॒ಸ್ಯ॑ - ಮಭಿ॒ ದಾಸ॑ತೋ - ವಿಪ॒ಶ್ಚಿತ॒ - ಮಪ್ರ॑ಯಾವಂ - ಜೀ॒ವಸೇ॒ - ದದಾ॑ನಾ - ವ್ಯಥಿಷ್ಠಾ - ಬ್ರವ॒ನ್ನೇಕ॑-ಞ್ಚ) (ಅ. 2)

ಅನುವಾಕಂ 3 - ಉಪಹೋಮಾಃ
ಜುಷ್ಟೀ॑ ನರೋ॒ ಬ್ರಹ್ಮ॑ಣಾ ವಃ ಪಿತೃ॒ಣಾಮ್ । ಅಖ್ಷ॑ಮವ್ಯಯ॒-ನ್ನ ಕಿಲಾ॑ ರಿಷಾಥ । ಯಚ್ಛಕ್ವ॑ರೀಷು ಬೃಹ॒ತಾ ರವೇ॑ಣ । ಇನ್ದ್ರೇ॒ ಶುಷ್ಮ॒ಮದ॑ಧಾಥಾ ವಸಿಷ್ಠಾಃ ॥ ಪಾ॒ವ॒ಕಾ ನ॒-ಸ್ಸರ॑ಸ್ವತೀ । ವಾಜೇ॑ಭಿ-ರ್ವಾ॒ಜಿನೀ॑ವತೀ । ಯ॒ಜ್ಞಂ-ವಁ॑ಷ್ಟು ಧಿ॒ಯಾ ವ॑ಸುಃ ॥ ಸರ॑ಸ್ವತ್ಯ॒ಭಿ ನೋ॑ ನೇಷಿ॒ ವಸ್ಯಃ॑ । ಮಾ ಪ॑ಸ್ಫರೀಃ॒ ಪಯ॑ಸಾ॒ ಮಾ ನ॒ ಆ ಧ॑ಕ್ । ಜು॒ಷಸ್ವ॑ ನ-ಸ್ಸ॒ಖ್ಯಾ॑ ವೇ॒ಶ್ಯಾ॑ ಚ ॥ 21 ॥

ಮಾ ತ್ವತ್ಖ್ಷೇತ್ರಾ॒-ಣ್ಯರ॑ಣಾನಿ ಗನ್ಮ ॥ ವೃ॒ಞ್ಜೇ ಹ॒ವಿರ್ನಮ॑ಸಾ ಬ॒ರ್॒ಹಿರ॒ಗ್ನೌ । ಅಯಾ॑ಮಿ॒ ಸ್ರುಗ್ ಘೃ॒ತವ॑ತೀ ಸುವೃ॒ಕ್ತಿಃ । ಅಮ್ಯ॑ಖ್ಷಿ॒ ಸದ್ಮ॒ ಸದ॑ನೇ ಪೃಥಿ॒ವ್ಯಾಃ । ಅಶ್ರಾ॑ಯಿ ಯ॒ಜ್ಞ-ಸ್ಸೂರ್ಯೇ॒ ನ ಚಖ್ಷುಃ॑ ॥ ಇ॒ಹಾರ್ವಾಞ್ಚ॒ಮತಿ॑ಹ್ವಯೇ । ಇನ್ದ್ರ॒-ಞ್ಜೈತ್ರಾ॑ಯ॒ ಜೇತ॑ವೇ । ಅ॒ಸ್ಮಾಕ॑ಮಸ್ತು॒ ಕೇವ॑ಲಃ ॥ ಅ॒ರ್ವಾಞ್ಚ॒ಮಿನ್ದ್ರ॑ಮ॒ಮುತೋ॑ ಹವಾಮಹೇ । ಯೋ ಗೋ॒ಜಿ-ದ್ಧ॑ನ॒ಜಿ-ದ॑ಶ್ವ॒ಜಿದ್ಯಃ ॥ 22 ॥

ಇ॒ಮ-ನ್ನೋ॑ ಯ॒ಜ್ಞಂ-ವಿಁ॑ಹ॒ವೇ ಜು॑ಷಸ್ವ । ಅ॒ಸ್ಯ ಕು॑ರ್ಮೋ ಹರಿವೋ ಮೇ॒ದಿನ॑-ನ್ತ್ವಾ ॥ ಅಸ॑ಮೃಂಷ್ಟೋ ಜಾಯಸೇ ಮಾತೃ॒ವೋ-ಶ್ಶುಚಿಃ॑ । ಮ॒ನ್ದ್ರಃ ಕ॒ವಿರುದ॑ತಿಷ್ಠೋ॒ ವಿವ॑ಸ್ವತಃ । ಘೃ॒ತೇನ॑ ತ್ವಾ ಽವರ್ಧಯನ್ನಗ್ನ ಆಹುತ । ಧೂ॒ಮಸ್ತೇ॑ ಕೇ॒ತುರ॑ಭವ-ದ್ದಿ॒ವಿ ಶ್ರಿ॒ತಃ ॥ ಅ॒ಗ್ನಿರಗ್ರೇ᳚ ಪ್ರಥ॒ಮೋ ದೇ॒ವತಾ॑ನಾಮ್ । ಸಂ​ಯಾಁ॑ತಾನಾ-ಮುತ್ತ॒ಮೋ ವಿಷ್ಣು॑ರಾಸೀತ್ । ಯಜ॑ಮಾನಾಯ ಪರಿ॒ಗೃಹ್ಯ॑ ದೇ॒ವಾನ್ । ದೀ॒ಖ್ಷಯೇ॒ದಗ್ಂ ಹ॒ವಿರಾಗ॑ಚ್ಛತ-ನ್ನಃ ॥ 23 ॥

ಅ॒ಗ್ನಿಶ್ಚ॑ ವಿಷ್ಣೋ॒ ತಪ॑ ಉತ್ತ॒ಮ-ಮ್ಮ॒ಹಃ । ದೀ॒ಖ್ಷಾ॒ಪಾ॒ಲೇಭ್ಯೋ॒ ವನ॑ತ॒ಗ್ಂ॒ ಹಿ ಶ॑ಕ್ರಾ । ವಿಶ್ವೈ᳚-ರ್ದೇ॒ವೈ-ರ್ಯ॒ಜ್ಞಿಯೈ᳚-ಸ್ಸಂ​ವಿಁದಾ॒ನೌ । ದೀ॒ಖ್ಷಾಮ॒ಸ್ಮೈ ಯಜ॑ಮಾನಾಯ ಧತ್ತಮ್ ॥ ಪ್ರತ-ದ್ವಿಷ್ಣು॑-ಸ್ಸ್ತವತೇ ವೀ॒ರ್ಯಾ॑ಯ । ಮೃ॒ಗೋ ನ ಭೀ॒ಮಃ ಕು॑ಚ॒ರೋ ಗಿ॑ರಿ॒ಷ್ಠಾಃ । ಯಸ್ಯೋ॒ರುಷು॑ ತ್ರಿ॒ಷು ವಿ॒ಕ್ರಮ॑ಣೇಷು । ಅಧಿ॑ಖ್ಷಿ॒ಯನ್ತಿ॒ ಭುವ॑ನಾನಿ॒ ವಿಶ್ವಾ᳚ ॥ ನೂ ಮರ್ತೋ॑ ದಯತೇ ಸನಿ॒ಷ್ಯನ್. ಯಃ । ವಿಷ್ಣ॑ವ ಉರುಗಾ॒ಯಾಯ॒ ದಾಶ॑ತ್ ॥ 24 ॥

ಪ್ರ ಯ-ಸ್ಸ॒ತ್ರಾಚಾ॒ ಮನ॑ಸಾ॒ ಯಜಾ॑ ತೈ । ಏ॒ತಾವ॑ನ್ತ॒-ನ್ನರ್ಯ॑ಮಾ॒ವಿವಾ॑ಸಾತ್ ॥ ವಿಚ॑ಕ್ರಮೇ ಪೃಥಿ॒ವೀಮೇ॒ಷ ಏ॒ತಾಮ್ । ಖ್ಷೇತ್ರಾ॑ಯ॒ ವಿಷ್ಣು॒-ರ್ಮನು॑ಷೇ ದಶ॒ಸ್ಯನ್ನ್ । ಧ್ರು॒ವಾಸೋ॑ ಅಸ್ಯ ಕೀ॒ರಯೋ॒ ಜನಾ॑ಸಃ । ಉ॒ರು॒ಖ್ಷಿ॒ತಿಗ್ಂ ಸು॒ಜನಿ॑ಮಾ ಚಕಾರ ॥ ತ್ರಿರ್ದೇ॒ವಃ ಪೃ॑ಥಿ॒ವೀಮೇ॒ಷ ಏ॒ತಾಮ್ । ವಿಚ॑ಕ್ರಮೇ ಶ॒ತರ್ಚ॑ಸ-ಮ್ಮಹಿ॒ತ್ವಾ । ಪ್ರ ವಿಷ್ಣು॑-ರಸ್ತು ತ॒ವಸ॒ಸ್ತ ವೀ॑ಯಾನ್ । ತ್ವೇ॒ಷಗ್ಗ್​ ಹ್ಯ॑ಸ್ಯ॒ ಸ್ಥವಿ॑ರಸ್ಯ॒ ನಾಮ॑ ॥ 25 ॥

ಹೋತಾ॑ರ-ಞ್ಚಿ॒ತ್ರರ॑ಥ-ಮದ್ಧ್ವ॒ರಸ್ಯ॑ । ಯ॒ಜ್ಞಸ್ಯ॑ ಯಜ್ಞಸ್ಯ ಕೇ॒ತುಗ್ಂ ರುಶ॑ನ್ತಮ್ । ಪ್ರತ್ಯ॑ರ್ಧಿ-ನ್ದೇ॒ವಸ್ಯ॑ ದೇವಸ್ಯ ಮ॒ಹ್ನಾ । ಶ್ರಿ॒ಯಾ ತ್ವ॑-ಽಗ್ನಿಮತಿ॑ಥಿ॒-ಞ್ಜನಾ॑ನಾಮ್ ॥ ಆ ನೋ॒ ವಿಶ್ವಾ॑ಭಿರೂ॒ತಿಭಿ॑-ಸ್ಸ॒ಜೋಷಾಃ᳚ । ಬ್ರಹ್ಮ॑ ಜುಷಾ॒ಣೋ ಹ॑ರ್ಯಶ್ವ ಯಾಹಿ । ವರೀ॑ವೃಜ॒-ಥ್ಸ್ಥವಿ॑ರೇಭಿ-ಸ್ಸುಶಿಪ್ರ । ಅ॒ಸ್ಮೇ ದಧ॒-ದ್ವೃಷ॑ಣ॒ಗ್ಂ॒ ಶುಷ್ಮ॑ಮಿನ್ದ್ರ ॥ ಇನ್ದ್ರ॑-ಸ್ಸುವ॒ರ್॒ಷಾ ಜ॒ನಯ॒ನ್ನಹಾ॑ನಿ । ಜಿ॒ಗಾಯೋ॒ಶಿಗ್ಭಿಃ॒ ಪೃತ॑ನಾ ಅಭಿ॒ಶ್ರೀಃ ॥ 26 ॥

ಪ್ರಾರೋ॑ಚಯ॒ನ್ಮನ॑ವೇ ಕೇ॒ತುಮಹ್ನಾ᳚ಮ್ । ಅವಿ॑ನ್ದ॒ಜ್ಜ್ಯೋತಿ॑-ರ್ಬೃಹ॒ತೇ ರಣಾ॑ಯ ॥ ಅಶ್ವಿ॑ನಾ॒ವವ॑ಸೇ॒ ನಿಹ್ವ॑ಯೇ ವಾಮ್ । ಆ ನೂ॒ನಂ-ಯಾಁ॑ತಗ್ಂ ಸುಕೃ॒ತಾಯ॑ ವಿಪ್ರಾ । ಪ್ರಾ॒ತ॒ರ್ಯು॒ಕ್ತೇನ॑ ಸು॒ವೃತಾ॒ ರಥೇ॑ನ । ಉ॒ಪಾಗ॑ಚ್ಛತ॒ಮವ॒ಸಾ ಽಽಗ॑ತ-ನ್ನಃ ॥ ಅ॒ವಿ॒ಷ್ಟ-ನ್ಧೀ॒ಷ್ವಶ್ವಿ॑ನಾ ನ ಆ॒ಸು । ಪ್ರ॒ಜಾವ॒-ದ್ರೇತೋ॒ ಅಹ್ರ॑ಯ-ನ್ನೋ ಅಸ್ತು । ಆವಾ᳚-ನ್ತೋ॒ಕೇ ತನ॑ಯೇ॒ ತೂತು॑ಜಾನಾಃ । ಸು॒ರತ್ನಾ॑ಸೋ ದೇ॒ವವೀ॑ತಿ-ಙ್ಗಮೇಮ ॥ 27 ॥

ತ್ವಗ್ಂ ಸೋ॑ಮ॒ ಕ್ರತು॑ಭಿ-ಸ್ಸು॒ಕ್ರತು॑ರ್ಭೂಃ । ತ್ವ-ನ್ದಖ್ಷೈ᳚-ಸ್ಸು॒ದಖ್ಷೋ॑ ವಿ॒ಶ್ವವೇ॑ದಾಃ । ತ್ವಂ-ವೃಁಷಾ॑ ವೃಷ॒ತ್ವೇಭಿ॑-ರ್ಮಹಿ॒ತ್ವಾ । ದ್ಯು॒ಮ್ನೇಭಿ॑-ರ್ದ್ಯು॒ಮ್ನ್ಯ॑ಭವೋ ನೃ॒ಚಖ್ಷಾಃ᳚ ॥ ಅಷಾ॑ಢಂ-ಯುಁ॒ಥ್ಸು ಪೃತ॑ನಾಸು॒ ಪಪ್ರಿ᳚ಮ್ । ಸು॒ವ॒ರ॒.ಷಾಮ॒ಫ್ಸ್ವಾಂ-ವೃಁ॒ಜನ॑ಸ್ಯ ಗೋ॒ಪಾಮ್ । ಭ॒ರೇ॒ಷು॒ಜಾಗ್ಂ ಸು॑ಖ್ಷಿ॒ತಿಗ್ಂ ಸು॒ಶ್ರವ॑ಸಮ್ । ಜಯ॑ನ್ತ॒-ನ್ತ್ವಾಮನು॑ ಮದೇಮ ಸೋಮ ॥ ಭವಾ॑ ಮಿ॒ತ್ರೋ ನ ಶೇವ್ಯೋ॑ ಘೃ॒ತಾಸು॑ತಿಃ । ವಿಭೂ॑ತದ್ಯುಮ್ನ ಏವ॒ಯಾ ಉ॑ ಸ॒ಪ್ರಥಾಃ᳚ ॥ 28 ॥

ಅಧಾ॑ ತೇ ವಿಷ್ಣೋ ವಿ॒ದುಷಾ॑ಚಿ॒ದೃಧ್ಯಃ॑ । ಸ್ತೋಮೋ॑ ಯ॒ಜ್ಞಸ್ಯ॒ ರಾದ್ಧ್ಯೋ॑ ಹ॒ವಿಷ್ಮ॑ತಃ ॥ ಯಃ ಪೂ॒ರ್ವ್ಯಾಯ॑ ವೇ॒ಧಸೇ॒ ನವೀ॑ಯಸೇ । ಸು॒ಮಜ್ಜಾ॑ನಯೇ॒ ವಿಷ್ಣ॑ವೇ॒ ದದಾ॑ಶತಿ । ಯೋ ಜಾ॒ತಮ॒ಸ್ಯ ಮ॑ಹ॒ತೋ ಮ॒ಹಿ ಬ್ರವಾ᳚ತ್ । ಸೇದು॒-ಶ್ಶ್ರವೋ॑ಭಿ-ರ್ಯು॒ಜ್ಯ॑-ಞ್ಚಿದ॒ಭ್ಯ॑ಸತ್ ॥ ತಮು॑ ಸ್ತೋತಾರಃ ಪೂ॒ರ್ವ್ಯಂ-ಯಁಥಾ॑ ವಿ॒ದ ಋ॒ತಸ್ಯ॑ । ಗರ್ಭಗ್ಂ॑ ಹ॒ವಿಷಾ॑ ಪಿಪರ್ತನ । ಆ-ಽಸ್ಯ॑ ಜಾ॒ನನ್ತೋ॒ ನಾಮ॑ ಚಿದ್ವಿವಕ್ತನ । ಬೃ॒ಹತ್ತೇ॑ ವಿಷ್ಣೋ ಸುಮ॒ತಿ-ಮ್ಭ॑ಜಾಮಹೇ ॥ 29 ॥

ಇ॒ಮಾ ಧಾ॒ನಾ ಘೃ॑ತ॒ಸ್ನುವಃ॑ । ಹರೀ॑ ಇ॒ಹೋಪ॑ವಖ್ಷತಃ । ಇನ್ದ್ರಗ್ಂ॑ ಸು॒ಖತ॑ಮೇ॒ ರಥೇ᳚ ॥ ಏ॒ಷ ಬ್ರ॒ಹ್ಮಾ ಯ ಋ॒ತ್ವಿಯಃ॑ । ಇನ್ದ್ರೋ॒ ನಾಮ॑ ಶ್ರು॒ತೋ ಗ॒ಣೇ ॥, ಪ್ರ ತೇ॑ ಮ॒ಹೇ । ವಿ॒ದಥೇ॑ ಶ॒ಗ್ಂಸಿಷ॒ಗ್ಂ॒ ಹರೀ᳚ । ಯ ಋ॒ತ್ವಿಯಃ॒ ಪ್ರ ತೇ॑ ವನ್ವೇ । ವ॒ನುಷೋ॑ ಹರ್ಯ॒ತ-ಮ್ಮದ᳚ಮ್ । ಇನ್ದ್ರೋ॒ ನಾಮ॑ ಘೃ॒ತ-ನ್ನ ಯಃ । ಹರಿ॑ಭಿ॒ಶ್ಚಾರು॒ ಸೇಚ॑ತೇ । ಶ್ರು॒ತೋ ಗ॒ಣ ಆ ತ್ವಾ॑ ವಿಶನ್ತು ॥ 30 ॥

ಹರಿ॑ವರ್ಪಸ॒-ಙ್ಗಿರಃ॑ ॥ ಆಚ॑ರ್​ಷಣಿ॒ಪ್ರಾ ವೃ॑ಷ॒ಭೋ ಜನಾ॑ನಾಮ್ । ರಾಜಾ॑ ಕೃಷ್ಟೀ॒ನಾ-ಮ್ಪು॑ರುಹೂ॒ತ ಇನ್ದ್ರಃ॑ । ಸ್ತು॒ತ-ಶ್ಶ್ರ॑ವ॒ಸ್ಯನ್ನವ॒ಸೋಪ॑ಮ॒ದ್ರಿಕ್ । ಯು॒ಕ್ತ್ವಾ ಹರೀ॒ ವೃಷ॒ಣಾ ಽಽಯಾ᳚ಹ್ಯ॒ರ್ವಾಮ್ ॥ ಪ್ರ ಯ-ಥ್ಸಿನ್ಧ॑ವಃ ಪ್ರಸ॒ವಂ-ಯಁದಾಯನ್ನ್॑ । ಆಪ॑-ಸ್ಸಮು॒ದ್ರಗ್ಂ ರ॒ತ್ಥ್ಯೇ॑ವ ಜಗ್ಮುಃ । ಅತ॑ಶ್ಚಿ॒ದಿನ್ದ್ರ॒-ಸ್ಸದ॑ಸೋ॒ ವರೀ॑ಯಾನ್ । ಯದೀ॒ಗ್ಂ॒ ಸೋಮಃ॑ ಪೃ॒ಣಾತಿ॑ ದು॒ಗ್ಧೋ ಅ॒ಗ್ಂ॒ಶುಃ ॥ ಹ್ವಯಾ॑ಮಸಿ॒ ತ್ವೇನ್ದ್ರ॑ ಯಾ॒ಹ್ಯ॑ರ್ವಾಮ್ ॥ 31 ॥

ಅರ॑-ನ್ತೇ॒ ಸೋಮ॑ಸ್ತ॒ನುವೇ॑ ಭವಾತಿ । ಶತ॑ಕ್ರತೋ ಮಾ॒ದಯ॑ಸ್ವಾ ಸು॒ತೇಷು॑ । ಪ್ರಾಸ್ಮಾಗ್ಂ ಅ॑ವ॒ ಪೃತ॑ನಾಸು॒ ಪ್ರ ಯು॒ಥ್ಸು ॥ ಇನ್ದ್ರಾ॑ಯ॒ ಸೋಮಾಃ᳚ ಪ್ರ॒ದಿವೋ॒ ವಿದಾ॑ನಾಃ । ಋ॒ಭು-ರ್ಯೇಭಿ॒-ರ್ವೃಷ॑ಪರ್ವಾ॒-ವಿಹಾ॑ಯಾಃ । ಪ್ರ॒ಯ॒ಮ್ಯಮಾ॑ಣಾ॒-ನ್ಪ್ರತಿ॒ ಷೂಗೃ॑ಭಾಯ । ಇನ್ದ್ರ॒ ಪಿಬ॒ ವೃಷ॑ಧೂತಸ್ಯ॒ ವೃಷ್ಣಃ॑ ॥ ಅಹೇ॑ಡಮಾನ॒ ಉಪ॑ಯಾಹಿ ಯ॒ಜ್ಞಮ್ । ತುಭ್ಯ॑-ಮ್ಪವನ್ತ॒ ಇನ್ದ॑ವ-ಸ್ಸು॒ತಾಸಃ॑ । ಗಾವೋ॒ ನ ವ॑ಜ್ರಿನ್-ಥ್ಸ್ವ॒ಮೋಕೋ॒ ಅಚ್ಛ॑ ॥ 32 ॥

ಇನ್ದ್ರಾಗ॑ಹಿ ಪ್ರಥ॒ಮೋ ಯಜ್ಞಿಯಾ॑ನಾಮ್ ॥ ಯಾ ತೇ॑ ಕಾ॒ಕು-ಥ್ಸುಕೃ॑ತಾ॒ ಯಾ ವರಿ॑ಷ್ಠಾ । ಯಯಾ॒ ಶಶ್ವ॒ತ್ಪಿಬ॑ಸಿ॒ ಮದ್ಧ್ವ॑ ಊ॒ರ್ಮಿಮ್ । ತಯಾ॑ ಪಾಹಿ॒ ಪ್ರ ತೇ॑ ಅದ್ಧ್ವ॒ರ್ಯುರ॑ಸ್ಥಾತ್ । ಸ-ನ್ತೇ॒ ವಜ್ರೋ॑ ವರ್ತತಾಮಿನ್ದ್ರ ಗ॒ವ್ಯುಃ ॥ ಪ್ರಾ॒ತ॒ರ್ಯುಜಾ॒ ವಿಬೋ॑ಧಯ । ಅಶ್ವಿ॑ನಾ॒ವೇಹ ಗ॑ಚ್ಛತಮ್ । ಅ॒ಸ್ಯ ಸೋಮ॑ಸ್ಯ ಪೀ॒ತಯೇ᳚ ॥ ಪ್ರಾ॒ತ॒ರ್ಯಾವಾ॑ಣಾ ಪ್ರಥ॒ಮಾ ಯ॑ಜದ್ಧ್ವಮ್ । ಪು॒ರಾ ಗೃದ್ಧ್ರಾ॒ದರ॑ರುಷಃ ಪಿಬಾಥಃ । ಪ್ರಾ॒ತರ್​ಹಿ ಯ॒ಜ್ಞಮ॒ಶ್ವಿನಾ॒ ದಧಾ॑ತೇ । ಪ್ರಶಗ್ಂ॑ ಸನ್ತಿ ಕ॒ವಯಃ॑ ಪೂರ್ವ॒ಭಾಜಃ॑ ॥ ಪ್ರಾ॒ತರ್ಯ॑ಜದ್ಧ್ವಮ॒ಶ್ವಿನಾ॑ ಹಿನೋತ । ನ ಸಾ॒ಯಮ॑ಸ್ತಿ ದೇವ॒ಯಾ ಅಜು॑ಷ್ಟಮ್ । ಉ॒ತಾನ್ಯೋ ಅ॒ಸ್ಮ-ದ್ಯ॑ಜತೇ॒ ವಿಚಾ॑ಯಃ । ಪೂರ್ವಃ॑ ಪೂರ್ವೋ॒ ಯಜ॑ಮಾನೋ॒ ವನೀ॑ಯಾನ್ ॥ 33 ॥
(ಚಾ॒ - ಶ್ವ॒ಜಿದ್ಯೋ-ಗ॑ಚ್ಛತ-ನ್ನೋ॒ - ದಾಶ॒ನ್ - ನಾಮಾ॑ - ಭಿ॒ಶ್ರೀ--ರ್ ಗ॑ಮೇಮ - ಸ॒ಪ್ರಥಾ॑ - ಭಜಾಮಹೇ - ವಿಶನ್ತು - ಯಾ॒ಹ್ಯ॑ರ್ವಾಂ - ಚ್ಛ॑ - ಪಿಬಾಥ॒-ಷ್ಷಟ್ಚ॑) (ಅ. 3)

ಅನುವಾಕಂ 4 - ಉಪಹೋಮಾಃ
ನ॒ಕ್ತ॒-ಞ್ಜಾ॒ತಾ-ಽಸ್ಯೋ॑ಷಧೇ । ರಾಮೇ॒ ಕೃಷ್ಣೇ॒ ಅಸಿ॑ಕ್ನಿ ಚ । ಇ॒ದಗ್ಂ ರ॑ಜನಿ ರಜಯ । ಕಿ॒ಲಾಸ॑-ಮ್ಪಲಿ॒ತ-ಞ್ಚ॒ ಯತ್ ॥ ಕಿ॒ಲಾಸ॑-ಞ್ಚ ಪಲಿ॒ತ-ಞ್ಚ॑ । ನಿರಿ॒ತೋ ನಾ॑ಶಯಾ॒ ಪೃಷ॑ತ್ । ಆ ನ॒-ಸ್ಸ್ವೋ ಅ॑ಶ್ನುತಾಂ॒-ವಁರ್ಣಃ॑ । ಪರಾ᳚ ಶ್ವೇ॒ತಾನಿ॑ ಪಾತಯ ॥ ಅಸಿ॑ತ-ನ್ತೇ ನಿ॒ಲಯ॑ನಮ್ । ಆ॒ಸ್ಥಾನ॒ಮಸಿ॑ತ॒-ನ್ತವ॑ ॥ 34 ॥

ಅಸಿ॑ಕ್ನಿಯಸ್ಯೋಷಧೇ । ನಿರಿ॒ತೋ ನಾ॑ಶಯಾ॒ ಪೃಷ॑ತ್ ॥ ಅ॒ಸ್ಥಿ॒ಜಸ್ಯ॑ ಕಿ॒ಲಾಸ॑ಸ್ಯ । ತ॒ನೂ॒ಜಸ್ಯ॑ ಚ॒ ಯತ್ತ್ವ॒ಚಿ । ಕೃ॒ತ್ಯಯಾ॑ ಕೃ॒ತಸ್ಯ॒ ಬ್ರಹ್ಮ॑ಣಾ । ಲಖ್ಷ್ಮ॑ ಶ್ವೇ॒ತಮ॑ನೀನಶಮ್ ॥ ಸರೂ॑ಪಾ॒ ನಾಮ॑ ತೇ ಮಾ॒ತಾ । ಸರೂ॑ಪೋ॒ ನಾಮ॑ ತೇ ಪಿ॒ತಾ । ಸರೂ॑ಪಾ ಽಸ್ಯೋಷಧೇ॒ ಸಾ । ಸರೂ॑ಪಮಿ॒ದ-ಙ್ಕೃ॑ಧಿ ॥ 35 ॥

ಶು॒ನಗ್ಂ ಹು॑ವೇಮ ಮ॒ಘವಾ॑ನ॒ಮಿನ್ದ್ರ᳚ಮ್ । ಅ॒ಸ್ಮಿನ್ಭರೇ॒ ನೃತ॑ಮಂ॒-ವಾಁಜ॑ಸಾತೌ । ಶೃ॒ಣ್ವನ್ತ॑-ಮು॒ಗ್ರಮೂ॒ತಯೇ॑ ಸ॒ಮಥ್ಸು॑ । ಘ್ನನ್ತಂ॑-ವೃಁ॒ತ್ರಾಣಿ॑ ಸ॒ಜಿನ್ತ॒-ನ್ಧನಾ॑ನಾಮ್ ॥ ಧೂ॒ನು॒ಥ ದ್ಯಾ-ಮ್ಪರ್ವ॑ತಾನ್ದಾ॒ಶುಷೇ॒ ವಸು॑ । ನಿ ವೋ॒ ವನಾ॑ ಜಿಹತೇ॒ ಯಾಮ॑ನೋ ಭಿ॒ಯಾ । ಕೋ॒ಪಯ॑ಥ ಪೃಥಿ॒ವೀ-ಮ್ಪೃ॑ಶ್ನಿಮಾತರಃ । ಯು॒ಧೇ ಯದು॑ಗ್ರಾಃ॒ ಪೃಷ॑ತೀ॒-ರಯು॑ಗ್ಧ್ವಮ್ ॥ ಪ್ರವೇ॑ಪಯನ್ತಿ॒ ಪರ್ವ॑ತಾನ್ । ವಿವಿ॑ಞ್ಚನ್ತಿ॒ ವನ॒ಸ್ಪತೀನ್॑ ॥ 36 ॥

ಪ್ರೋವಾ॑ರತ ಮರುತೋ ದು॒ರ್ಮದಾ॑ ಇವ । ದೇವಾ॑ಸ॒-ಸ್ಸರ್ವ॑ಯಾ ವಿ॒ಶಾ ॥ ಪು॒ರು॒ತ್ರಾ ಹಿ ಸ॒ದೃಙ್ಙಸಿ॑ । ವಿಶೋ॒ ವಿಶ್ವಾ॒ ಅನು॑ ಪ್ರ॒ಭು । ಸ॒ಮಥ್ಸು॑ ತ್ವಾ ಹವಾಮಹೇ ॥ ಸ॒ಮಥ್ಸ್ವ॒ಗ್ನಿ-ಮವ॑ಸೇ । ವಾ॒ಜ॒ಯನ್ತೋ॑ ಹವಾಮಹೇ । ವಾಜೇ॑ಷು ಚಿ॒ತ್ರರಾ॑ಧಸಮ್ ॥ ಸಙ್ಗ॑ಚ್ಛದ್ಧ್ವ॒ಗ್ಂ॒ ಸಂ​ವಁ॑ದದ್ಧ್ವಮ್ । ಸಂ-ವೋಁ॒ ಮನಾಗ್ಂ॑ಸಿ ಜಾನತಾಮ್ ॥ 37 ॥

ದೇ॒ವಾ ಭಾ॒ಗಂ-ಯಁಥಾ॒ ಪೂರ್ವೇ᳚ । ಸ॒ಜಾ॒ನ್ನಾ॒ನಾ ಉ॒ಪಾಸ॑ತ ॥ ಸ॒ಮಾ॒ನೋ ಮನ್ತ್ರ॒-ಸ್ಸಮಿ॑ತಿ-ಸ್ಸಮಾ॒ನೀ । ಸ॒ಮಾ॒ನ-ಮ್ಮನ॑-ಸ್ಸ॒ಹ ಚಿ॒ತ್ತಮೇ॑ಷಾಮ್ । ಸ॒ಮಾ॒ನ-ಙ್ಕೇತೋ॑ ಅ॒ಭಿ-ಸಗ್ಂರ॑ಭದ್ಧ್ವಮ್ । ಸ॒ಜ್ಞಾನ್ನೇ॑ನ ವೋ ಹ॒ವಿಷಾ॑ ಯಜಾಮಃ ॥ ಸ॒ಮಾ॒ನೀ ವ॒ ಆಕೂ॑ತಿಃ । ಸ॒ಮಾ॒ನಾ ಹೃದ॑ಯಾನಿ ವಃ । ಸ॒ಮಾ॒ನಮ॑ಸ್ತು ವೋ॒ ಮನಃ॑ । ಯಥಾ॑ ವ॒-ಸ್ಸುಸ॒ಹಾ-ಽಸ॑ತಿ ॥ 38 ॥

ಸ॒ಜ್ಞಾನ್ನ॑-ನ್ನ॒-ಸ್ಸ್ವೈಃ । ಸ॒ಜ್ಞಾನ್ನ॒ಮರ॑ಣೈಃ । ಸ॒ಜ್ಞಾನ್ನ॑ಮಶ್ವಿನಾ ಯು॒ವಮ್ । ಇ॒ಹಾಸ್ಮಾಸು॒ ನಿಯ॑ಚ್ಛತಮ್ ॥ ಸ॒ಜ್ಞಾನ್ನ॑-ಮ್ಮೇ॒ ಬೃಹ॒ಸ್ಪತಿಃ॑ । ಸ॒ಜ್ಞಾನ್ನಗ್ಂ॑ ಸವಿ॒ತಾ ಕ॑ರತ್ । ಸ॒ಜ್ಞಾನ್ನ॑ಮಶ್ವಿನಾ ಯು॒ವಮ್ । ಇ॒ಹ ಮಹ್ಯ॒-ನ್ನಿಯ॑ಚ್ಛತಮ್ ॥ ಉಪ॑ಚ್ಛಾ॒ಯಾಮಿ॑ವ॒ ಘೃಣೇಃ᳚ । ಅಗ॑ನ್ಮ॒ ಶರ್ಮ॑ ತೇ ವ॒ಯಮ್ ॥ 39 ॥

ಅಗ್ನೇ॒ ಹಿರ॑ಣ್ಯಸನ್ದೃಶಃ ॥ ಅದ॑ಬ್ಧೇಭಿ-ಸ್ಸವಿತಃ ಪಾ॒ಯುಭಿ॒ಷ್ಟ್ವಮ್ । ಶಿ॒ವೇಭಿ॑ರ॒ದ್ಯ ಪರಿ॑ಪಾಹಿ ನೋ॒ ಗಯ᳚ಮ್ । ಹಿರ॑ಣ್ಯಜಿಹ್ವ-ಸ್ಸುವಿ॒ತಾಯ॒ ನವ್ಯ॑ಸೇ । ರಖ್ಷಾ॒ಮಾಕಿ॑ರ್ನೋ ಅ॒ಘಶಗ್ಂ॑ಸ ಈಶತ ॥ ಮದೇ॑ಮದೇ॒ ಹಿ ನೋ॑ ದ॒ದುಃ । ಯೂ॒ಥಾ ಗವಾ॑ಮೃಜು॒ಕ್ರತುಃ॑ । ಸಙ್ಗೃ॑ಭಾಯ ಪು॒ರೂ ಶ॒ತಾ । ಉ॒ಭ॒ಯಾ ಹ॒ಸ್ತ್ಯಾ ವಸು॑ । ಶಿ॒ಶೀ॒ಹಿ ರಾ॒ಯ ಆಭ॑ರ ॥ 40 ॥

ಶಿಪ್ರಿ॑ನ್ ವಾಜಾನಾ-ಮ್ಪತೇ । ಶಚೀ॑ವ॒ಸ್ತವ॑ ದ॒ಗ್ಂ॒ಸನಾ᳚ । ಆ ತೂ ನ॑ ಇನ್ದ್ರ ಭಾಜಯ । ಗೋಷ್ವಶ್ವೇ॑ಷು ಶು॒ಭ್ರುಷು॑ । ಸ॒ಹಸ್ರೇ॑ಷು ತುವೀಮಘ ॥ ಯ-ದ್ದೇ॑ವಾ ದೇವ॒ ಹೇಡ॑ನಮ್ । ದೇವಾ॑ಸಶ್ಚಕೃ॒ಮಾ ವ॒ಯಮ್ । ಆದಿ॑ತ್ಯಾ॒ಸ್ತಸ್ಮಾ᳚ನ್ಮಾ ಯೂ॒ಯಮ್ । ಋ॒ತಸ್ಯ॒ರ್ತೇನ॑ ಮುಞ್ಚತ ॥ ಋ॒ತಸ್ಯ॒ರ್ತೇ-ನಾ॑ದಿತ್ಯಾಃ ॥ 41 ॥

ಯಜ॑ತ್ರಾ ಮು॒ಞ್ಚತೇ॒ಹ ಮಾ᳚ । ಯ॒ಜ್ಞೈರ್ವೋ॑ ಯಜ್ಞವಾಹಸಃ । ಆ॒ಶಿಖ್ಷ॑ನ್ತೋ॒ ನ ಶೇ॑ಕಿಮ ॥ ಮೇದ॑ಸ್ವತಾ॒ ಯಜ॑ಮಾನಾಃ । ಸ್ರು॒ಚಾ-ಽಽಜ್ಯೇ॑ನ॒ ಜುಹ್ವ॑ತಃ । ಅ॒ಕಾ॒ಮಾ ವೋ॑ ವಿಶ್ವೇ ದೇವಾಃ । ಶಿಖ್ಷ॑ನ್ತೋ॒ ನೋಪ॑ ಶೇಕಿಮ ॥ ಯದಿ॒ ದಿವಾ॒ ಯದಿ॒ ನಕ್ತ᳚ಮ್ । ಏನ॑ ಏನ॒ಸ್ಯೋ-ಽಕ॑ರತ್ । ಭೂ॒ತ-ಮ್ಮಾ॒ ತಸ್ಮಾ॒ದ್ಭವ್ಯ॑-ಞ್ಚ ॥ 42 ॥

ದ್ರು॒ಪ॒ದಾದಿ॑ವ ಮುಞ್ಚತು ॥ ದ್ರು॒ಪ॒ದಾದಿ॒ವೇ-ನ್ಮು॑ಮುಚಾ॒ನಃ । ಸ್ವಿ॒ನ್ನ-ಸ್ಸ್ನಾ॒ತ್ವೀ ಮಲಾ॑ದಿವ । ಪೂ॒ತ-ಮ್ಪ॒ವಿತ್ರೇ॑ಣೇ॒ ವಾಜ್ಯ᳚ಮ್ । ವಿಶ್ವೇ॑ ಮುಞ್ಚನ್ತು॒ ಮೈನ॑ಸಃ ॥ ಉದ್ವ॒ಯ-ನ್ತಮ॑ಸ॒ಸ್ಪರಿ॑ । ಪಶ್ಯ॑ನ್ತೋ॒ ಜ್ಯೋತಿ॒ರುತ್ತ॑ರಮ್ । ದೇ॒ವ-ನ್ದೇ॑ವ॒ತ್ರಾ ಸೂರ್ಯ᳚ಮ್ । ಅಗ॑ನ್ಮ॒ ಜ್ಯೋತಿ॑ರುತ್ತ॒ಮಮ್ ॥ 43 ॥
(ತವ॑ - ಕೃಧಿ॒ - ವನ॒ಸ್ಪತೀ᳚ - ಞ್ಜಾನತಾ॒ - ಮಸ॑ತಿ - ವ॒ಯಂ - ಭ॑ರಾ - ದಿತ್ಯಾ - ಶ್ಚ॒ - +ನವ॑ ಚ) (ಅ. 4)

ಅನುವಾಕಂ 5 - ಉಪಹೋಮಾಃ
ವೃಷಾ॒ ಸೋ ಅ॒ಗ್ಂ॒ಶುಃ ಪ॑ವತೇ ಹ॒ವಿಷ್ಮಾ॒ನ್-ಥ್ಸೋಮಃ॑ । ಇನ್ದ್ರ॑ಸ್ಯ ಭಾ॒ಗ ಋ॑ತ॒ಯು-ಶ್ಶ॒ತಾಯುಃ॑ । ಸ ಮಾ॒ ವೃಷಾ॑ಣಂ-ವೃಁಷ॒ಭ-ಙ್ಕೃ॑ಣೋತು । ಪ್ರಿ॒ಯಂ-ವಿಁ॒ಶಾಗ್ಂ ಸರ್ವ॑ವೀರಗ್ಂ ಸು॒ವೀರ᳚ಮ್ ॥ ಕಸ್ಯ॒ ವೃಷಾ॑ ಸು॒ತೇ ಸಚಾ᳚ । ನಿ॒ಯುತ್ವಾ᳚ನ್ ವೃಷ॒ಭೋ ರ॑ಣತ್ । ವೃ॒ತ್ರ॒ಹಾ ಸೋಮ॑ಪೀತಯೇ ॥ ಯಸ್ತೇ॑ ಶೃಙ್ಗ ವೃಷೋ ನಪಾತ್ । ಪ್ರಣ॑ಪಾ-ತ್ಕುಣ್ಡ॒ಪಾಯ್ಯಃ॑ । ನ್ಯ॑ಸ್ಮಿನ್ದದ್ಧ್ರ॒ ಆ ಮನಃ॑ ॥ 44 ॥

ತಗ್ಂ ಸ॒ದ್ಧ್ರೀಚೀ॑ರೂ॒ತಯೋ॒ ವೃಷ್ಣಿ॑ಯಾನಿ । ಪೌಗ್ಗ್​ಸ್ಯಾ॑ನಿ ನಿ॒ಯುತ॑-ಸ್ಸಶ್ಚು॒ರಿನ್ದ್ರ᳚ಮ್ । ಸ॒ಮು॒ದ್ರ-ನ್ನ ಸಿನ್ಧ॑ವ ಉ॒ಕ್ಥಶು॑ಷ್ಮಾಃ । ಉ॒ರು॒ವ್ಯಚ॑ಸ॒-ಙ್ಗಿರ॒ ಆವಿ॑ಶನ್ತಿ ॥ ಇನ್ದ್ರಾ॑ಯ॒ ಗಿರೋ॒ ಅನಿ॑ಶಿತಸರ್ಗಾಃ । ಅ॒ಪಃ ಪ್ರೈರ॑ಯ॒ನ್-ಥ್ಸಗ॑ರಸ್ಯ ಬು॒ದ್ದಧ್ನಾತ್ । ಯೋ ಅಖ್ಷೇ॑ಣೇವ ಚ॒ಕ್ರಿಯಾ॒ ಶಚೀ॑ಭಿಃ । ವಿಷ್ವ॑ಕ್ತ॒ಸ್ತಮ್ಭ॑ ಪೃಥಿ॒ವೀಮು॒ತ ದ್ಯಾಮ್ ॥ ಅಖ್ಷೋ॑ದಯ॒ಚ್ಛವ॑ಸಾ॒ ಖ್ಷಾಮ॑ ಬು॒ದ್ಧ್ನಮ್ । ವಾರ್ಣವಾ॑ತ॒ಸ್ತವಿ॑ಷೀಭಿ॒ರಿನ್ದ್ರಃ॑ ॥ 45 ॥

ದೃ॒ಢಾನ್ಯೌ᳚ಘ್ನಾದು॒ಶಮಾ॑ನ॒ ಓಜಃ॑ । ಅವಾ॑ಭಿನತ್ಕ॒ಕುಭಃ॒ ಪರ್ವ॑ತಾನಾಮ್ ॥ ಆ ನೋ॑ ಅಗ್ನೇ ಸುಕೇ॒ತುನಾ᳚ । ರ॒ಯಿಂ-ವಿಁ॒ಶ್ವಾಯು॑ಪೋಷಸಮ್ । ಮಾ॒ರ್ಡೀ॒ಕ-ನ್ಧೇ॑ಹಿ ಜೀ॒ವಸೇ᳚ ॥ ತ್ವಗ್ಂ ಸೋ॑ಮ ಮ॒ಹೇ ಭಗ᳚ಮ್ । ತ್ವಂ-ಯೂಁನ॑ ಋತಾಯ॒ತೇ । ದಖ್ಷ॑-ನ್ದಧಾಸಿ ಜೀ॒ವಸೇ᳚ ॥ ರಥಂ॑-ಯುಁಞ್ಜತೇ ಮ॒ರುತ॑-ಶ್ಶು॒ಭೇ ಸ॒ಗಮ್ । ಸೂರೋ॒ ನ ಮಿ॑ತ್ರಾವರುಣಾ॒ ಗವಿ॑ಷ್ಟಿಷು ॥ 46 ॥

ರಜಾಗ್ಂ॑ಸಿ ಚಿ॒ತ್ರಾ ವಿ ಚ॑ರನ್ತಿ ತ॒ನ್ಯವಃ॑ । ದಿ॒ವ-ಸ್ಸ॑ಮ್ರಾಜಾ॒ ಪಯ॑ಸಾ ನ ಉಖ್ಷತಮ್ ॥ ವಾಚ॒ಗ್ಂ॒ ಸು ಮಿ॑ತ್ರಾವರುಣಾ॒ವಿರಾ॑ವತೀಮ್ । ಪ॒ರ್ಜನ್ಯ॑ಶ್ಚಿ॒ತ್ರಾಂ-ವಁ॑ದತಿ॒ ತ್ವಿಷೀ॑ಮತೀಮ್ । ಅ॒ಭ್ರಾ ವ॑ಸತ ಮರುತ-ಸ್ಸು ಮಾ॒ಯಯಾ᳚ । ದ್ಯಾಂ-ವಁ॑ರ್​ಷಯತ-ಮರು॒ಣಾಮ॑ರೇ॒ಪಸ᳚ಮ್ ॥ ಅಯು॑ಕ್ತ ಸ॒ಪ್ತ ಶು॒ನ್ಧ್ಯುವಃ॑ । ಸೂರೋ॒ ರಥ॑ಸ್ಯ ನ॒ಪ್ತ್ರಿಯಃ॑ । ತಾಭಿ॑ರ್ಯಾತಿ॒ ಸ್ವಯು॑ಕ್ತಿಭಿಃ ॥ ವಹಿ॑ಷ್ಠೇಭಿರ್ವಿ॒ಹರ॑ನ್. ಯಾಸಿ॒ ತನ್ತು᳚ಮ್ ॥ 47 ॥

ಅ॒ವ॒ವ್ಯಯ॒ನ್ನಸಿ॑ತ-ನ್ದೇವ॒ ವಸ್ವಃ॑ । ದವಿ॑ದ್ಧ್ವತೋ ರ॒ಶ್ಮಯ॒-ಸ್ಸೂರ್ಯ॑ಸ್ಯ । ಚರ್ಮೇ॒ವಾವಾ॑ಧು॒ಸ್ತಮೋ॑ ಅ॒ಫ್ಸ್ವ॑ನ್ತಃ ॥ ಪ॒ರ್ಜನ್ಯಾ॑ಯ॒ ಪ್ರಗಾ॑ಯತ । ದಿ॒ವಸ್ಪು॒ತ್ರಾಯ॑ ಮೀ॒ಢುಷೇ᳚ । ಸ ನೋ॑ ಯ॒ವಸ॑ಮಿಚ್ಛತು ॥ ಅಚ್ಛಾ॑ ವದ ತ॒ವಸ॑-ಙ್ಗೀ॒ರ್ಭಿರಾ॒ಭಿಃ । ಸ್ತು॒ಹಿ ಪ॒ರ್ಜನ್ಯ॒-ನ್ನಮ॒ಸಾ ವಿ॑ವಾಸ । ಕನಿ॑ಕ್ರದ-ದ್ವೃಷ॒ಭೋ ಜೀ॒ರದಾ॑ನುಃ । ರೇತೋ॑ ದಧಾ॒ತ್ವೋಷ॑ಧೀಷು॒ ಗರ್ಭ᳚ಮ್ ॥ 48 ॥

ಯೋ ಗರ್ಭ॒ಮೋಷ॑ಧೀನಾಮ್ । ಗವಾ᳚-ಙ್ಕೃ॒ಣೋತ್ಯರ್ವ॑ತಾಮ್ । ಪ॒ರ್ಜನ್ಯಃ॑ ಪುರು॒ಷೀಣಾ᳚ಮ್ ॥ ತಸ್ಮಾ॒ ಇದಾ॒ಸ್ಯೇ॑ ಹ॒ವಿಃ । ಜು॒ಹೋತಾ॒ ಮಧು॑ಮತ್ತಮಮ್ । ಇಡಾ᳚-ನ್ನ-ಸ್ಸಂ॒​ಯಁತ॑-ಙ್ಕರತ್ ॥ ತಿ॒ಸ್ರೋ ಯದ॑ಗ್ನೇ ಶ॒ರದ॒ಸ್ತ್ವಾಮಿತ್ । ಶುಚಿ॑-ಙ್ಘೃ॒ತೇನ॒ ಶುಚ॑ಯ-ಸ್ಸಪ॒ರ್ಯನ್ನ್ । ನಾಮಾ॑ನಿ ಚಿದ್ದಧಿರೇ ಯ॒ಜ್ಞಿಯಾ॑ನಿ । ಅಸೂ॑ದಯನ್ತ ತ॒ನುವ॒-ಸ್ಸುಜಾ॑ತಾಃ ॥ 49 ॥

ಇನ್ದ್ರ॑ಶ್ಚ ನ-ಶ್ಶುನಾಸೀರೌ । ಇ॒ಮಂ-ಯಁ॒ಜ್ಞ-ಮ್ಮಿ॑ಮಿಖ್ಷತಮ್ । ಗರ್ಭ॑-ನ್ಧತ್ತಗ್ಗ್​ ಸ್ವ॒ಸ್ತಯೇ᳚ ॥ ಯಯೋ॑ರಿ॒ದಂ-ವಿಁಶ್ವ॒-ಮ್ಭುವ॑ನ-ಮಾವಿ॒ವೇಶ॑ । ಯಯೋ॑ರಾನ॒ನ್ದೋ ನಿಹಿ॑ತೋ॒ ಮಹ॑ಶ್ಚ । ಶುನಾ॑ಸೀರಾವೃ॒ತುಭಿ॑-ಸ್ಸಂ​ವಿಁದಾ॒ನೌ । ಇನ್ದ್ರ॑ವನ್ತೌ ಹ॒ವಿರಿ॒ದ-ಞ್ಜು॑ಷೇಥಾಮ್ ॥ ಆ ಘಾ॒ ಯೇ ಅ॒ಗ್ನಿಮಿ॑ನ್ಧ॒ತೇ । ಸ್ತೃ॒ಣನ್ತಿ॑ ಬ॒ರ್॒ಹಿರಾ॑ನು॒ಷಕ್ । ಯೇಷಾ॒ಮಿನ್ದ್ರೋ॒ ಯುವಾ॒ ಸಖಾ᳚ ॥ ಅಗ್ನ॒ ಇನ್ದ್ರ॑ಶ್ಚ ಮೇ॒ದಿನಾ᳚ । ಹ॒ಥೋ ವೃ॒ತ್ರಾಣ್ಯ॑ಪ್ರ॒ತಿ । ಯು॒ವಗ್ಂ ಹಿ ವೃ॑ತ್ರ॒ಹನ್ತ॑ಮಾ ॥ ಯಾಭ್ಯಾ॒ಗ್ಂ॒ ಸುವ॒ರಜ॑ಯ॒ನ್ನಗ್ರ॑ ಏ॒ವ । ಯಾವಾ॑ತಸ್ಥ॒ತು-ರ್ಭುವ॑ನಸ್ಯ॒ ಮದ್ಧ್ಯೇ᳚ । ಪ್ರಚ॑ರ್​ಷ॒ಣೀ ವೃ॑ಷಣಾ॒ ವಜ್ರ॑ಬಾಹೂ । ಅ॒ಗ್ನೀ ಇನ್ದ್ರಾ॑ ವೃತ್ರ॒ಹಣಾ॑ ಹುವೇ ವಾಮ್ ॥ 50 ॥
(ಮನ॒ - ಇನ್ದ್ರೋ॒ - ಗಾವಿ॑ಷ್ಟಿಷು॒ - ತನ್ತುಂ॒ - ಗರ್ಭ॒ಗ್ಂ॒ - ಸುಜಾ॑ತಾಃ॒ - ಸಖಾ॑ ಸ॒ಪ್ತ ಚ॑) (ಅ. 5)

ಅನುವಾಕಂ 6 - ಉಪಹೋಮಾಃ
ಉ॒ತ ನಃ॑ ಪ್ರಿ॒ಯಾ ಪ್ರಿ॒ಯಾಸು॑ । ಸ॒ಪ್ತಸ್ವಸಾ॒ ಸುಜು॑ಷ್ಟಾ । ಸರ॑ಸ್ವತೀ॒ ಸ್ತೋಮ್ಯಾ॑ ಽಭೂತ್ ॥ ಇ॒ಮಾ ಜುಹ್ವಾ॑ನಾ ಯು॒ಷ್ಮದಾ ನಮೋ॑ಭಿಃ । ಪ್ರತಿ॒ ಸ್ತೋಮಗ್ಂ॑ ಸರಸ್ವತಿ ಜುಷಸ್ವ । ತವ॒ ಶರ್ಮ॑-ನ್ಪ್ರಿ॒ಯತ॑ಮೇ॒ ದಧಾ॑ನಾಃ । ಉಪ॑ಸ್ಥೇಯಾಮ ಶರ॒ಣ-ನ್ನ ವೃ॒ಖ್ಷಮ್ ॥ ತ್ರೀಣಿ॑ ಪ॒ದಾ ವಿಚ॑ಕ್ರಮೇ । ವಿಷ್ಣು॑ರ್ಗೋ॒ಪಾ ಅದಾ᳚ಭ್ಯಃ । ತತೋ॒ ಧರ್ಮಾ॑ಣಿ ಧಾ॒ರಯನ್ನ್॑ ॥ 51 ॥

ತದ॑ಸ್ಯ ಪ್ರಿ॒ಯಮ॒ಭಿ ಪಾಥೋ॑ ಅಶ್ಯಾಮ್ । ನರೋ॒ ಯತ್ರ॑ ದೇವ॒ಯವೋ॒ ಮದ॑ನ್ತಿ । ಉ॒ರು॒ಕ್ರ॒ಮಸ್ಯ॒ ಸ ಹಿ ಬನ್ಧು॑ರಿ॒ತ್ಥಾ । ವಿಷ್ಣೋಃ᳚ ಪ॒ದೇ ಪ॑ರ॒ಮೇ ಮದ್ಧ್ವ॒ ಉಥ್ಸಃ॑ ॥ ಕ್ರ॒ತ್ವಾ॒ ದಾ ಅ॑ಸ್ಥು॒ ಶ್ರೇಷ್ಠಃ॑ । ಅ॒ದ್ಯ ತ್ವಾ॑ ವ॒ನ್ವನ್-ಥ್ಸು॒ರೇಕ್ಣಾಃ᳚ । ಮರ್ತ॑ ಆನಾಶ ಸುವೃ॒ಕ್ತಿಮ್ ॥ ಇ॒ಮಾ ಬ್ರ॑ಹ್ಮ ಬ್ರಹ್ಮವಾಹ । ಪ್ರಿ॒ಯಾ ತ॒ ಆ ಬ॒ರ॒ಃಇ-ಸ್ಸೀ॑ದ । ವೀ॒ಹಿ ಸೂ॑ರ ಪುರೋ॒ಡಾಶ᳚ಮ್ ॥ 52 ॥

ಉಪ॑ ನ-ಸ್ಸೂ॒ನವೋ॒ ಗಿರಃ॑ । ಶೃ॒ಣ್ವನ್ತ್ವ॒ಮೃತಸ್ಯ॒ ಯೇ । ಸು॒ಮೃ॒ಡೀ॒ಕಾ ಭ॑ವನ್ತು ನಃ ॥ ಅ॒ದ್ಯಾ ನೋ॑ ದೇವ ಸವಿತಃ । ಪ್ರ॒ಜಾವ॑-ಥ್ಸಾವೀ॒-ಸ್ಸೌಭ॑ಗಮ್ । ಪರಾ॑ ದು॒ಸ್ಷ್ವಪ್ನಿ॑ಯಗ್ಂ ಸುವ ॥ ವಿಶ್ವಾ॑ನಿ ದೇವ ಸವಿತಃ । ದು॒ರಿ॒ತಾನಿ॒ ಪರಾ॑ಸುವ । ಯ-ದ್ಭ॒ದ್ರ-ನ್ತನ್ಮ॒ ಆಸು॑ವ ॥ ಶುಚಿ॑ಮ॒ರ್ಕೈ-ರ್ಬೃಹ॒ಸ್ಪತಿ᳚ಮ್ ॥ 53 ॥

ಅ॒ದ್ಧ್ವ॒ರೇಷು॑ ನಮಸ್ಯತ । ಅ॒ನಾ॒ಮ್ಯೋಜ॒ ಆಚ॑ಕೇ ॥ ಯಾ ಧಾ॒ರಯ॑ನ್ತ ದೇ॒ವಾ ಸು॒ದಖ್ಷಾ॒ ದಖ್ಷ॑ಪಿತಾರಾ । ಅ॒ಸು॒ರ್ಯಾ॑ಯ॒ ಪ್ರಮ॑ಹಸಾ ॥ ಸ ಇತ್ಖ್ಷೇತಿ॒ ಸುಧಿ॑ತ॒ ಓಕ॑ಸಿ॒ ಸ್ವೇ । ತಸ್ಮಾ॒ ಇಡಾ॑ ಪಿನ್ವತೇ ವಿಶ್ವ॒ದಾನೀ᳚ । ತಸ್ಮೈ॒ ವಿಶ॑-ಸ್ಸ್ವ॒ಯಮೇ॒ವಾನ॑ಮನ್ತಿ । ಯಸ್ಮಿ॑-ನ್ಬ್ರ॒ಹ್ಮಾ ರಾಜ॑ನಿ॒ ಪೂರ್ವ॒ ಏತಿ॑ ॥ ಸಕೂ॑ತಿಮಿನ್ದ್ರ॒ ಸಚ್ಯು॑ತಿಮ್ । ಸಚ್ಯು॑ತಿ-ಞ್ಜ॒ಘನ॑ಚ್ಯುತಿಮ್ ॥ 54 ॥

ಕ॒ನಾತ್ಕಾ॒ಭಾ-ನ್ನ॒ ಆಭ॑ರ । ಪ್ರ॒ಯ॒ಫ್ಸ್ಯನ್ನಿ॑ವ ಸ॒ಕ್ಥ್ಯೌ᳚ ॥ ವಿನ॑ ಇನ್ದ್ರ॒ ಮೃಧೋ॑ ಜಹಿ । ಕನೀ॑ಖುನದಿವ ಸಾ॒ಪಯನ್ನ್॑ । ಅ॒ಭಿ ನ॒-ಸ್ಸುಷ್ಟು॑ತಿ-ನ್ನಯ ॥ ಪ್ರ॒ಜಾಪ॑ತಿ-ಸ್ಸ್ತ್ರಿ॒ಯಾಂ-ಯಁಶಃ॑ । ಮು॒ಷ್ಕಯೋ॑ರದಧಾ॒-ಥ್ಸಪ᳚ಮ್ । ಕಾಮ॑ಸ್ಯ॒ ತೃಪ್ತಿ॑ಮಾನ॒ನ್ದಮ್ । ತಸ್ಯಾ᳚ಗ್ನೇ ಭಾಜಯೇ॒ಹ ಮಾ᳚ ॥ ಮೋದಃ॑ ಪ್ರಮೋ॒ದ ಆ॑ನ॒ನ್ದಃ ॥ 55 ॥

ಮು॒ಷ್ಕಯೋ॒ರ್ನಿಹಿ॑ತ॒-ಸ್ಸಪಃ॑ । ಸೃ॒ತ್ವೇವ॒ ಕಾಮ॑ಸ್ಯ ತೃಪ್ಯಾಣಿ । ದಖ್ಷಿ॑ಣಾನಾ-ಮ್ಪ್ರತಿಗ್ರ॒ಹೇ ॥ ಮನ॑ಸಶ್ಚಿ॒ತ್ತ-ಮಾಕೂ॑ತಿಮ್ । ವಾ॒ಚ-ಸ್ಸ॒ತ್ಯ-ಮ॑ಶೀಮಹಿ । ಪ॒ಶೂ॒ನಾಗ್ಂ ರೂ॒ಪಮನ್ನ॑ಸ್ಯ । ಯಶ॒-ಶ್ಶ್ರೀ-ಶ್ಶ್ರ॑ಯತಾ॒-ಮ್ಮಯಿ॑ ॥ ಯಥಾ॒ ಽಹಮ॒ಸ್ಯಾ ಅತೃ॑ಪಗ್ಗ್​ ಸ್ತ್ರಿ॒ಯೈ ಪುಮಾನ್॑ । ಯಥಾ॒ ಸ್ತ್ರೀ ತೃಪ್ಯ॑ತಿ ಪು॒ಗ್ಂ॒ಸಿ ಪ್ರಿ॒ಯೇ ಪ್ರಿ॒ಯಾ । ಏ॒ವ-ಮ್ಭಗ॑ಸ್ಯ ತೃಪ್ಯಾಣಿ ॥ 56 ॥

ಯ॒ಜ್ಞಸ್ಯ॒ ಕಾಮ್ಯಃ॑ ಪ್ರಿ॒ಯಃ ॥ ದದಾ॒ಮೀತ್ಯ॒ಗ್ನಿರ್ವ॑ದತಿ । ತಥೇತಿ॑ ವಾ॒ಯುರಾ॑ಹ॒ ತತ್ । ಹನ್ತೇತಿ॑ ಸ॒ತ್ಯ-ಞ್ಚ॒ನ್ದ್ರಮಾಃ᳚ । ಆ॒ದಿ॒ತ್ಯ-ಸ್ಸ॒ತ್ಯಮೋಮಿತಿ॑ ॥ ಆಪ॒ಸ್ತ-ಥ್ಸ॒ತ್ಯಮಾಭ॑ರನ್ನ್ । ಯಶೋ॑ ಯ॒ಜ್ಞಸ್ಯ॒ ದಖ್ಷಿ॑ಣಾಮ್ । ಅ॒ಸೌ ಮೇ॒ ಕಾಮ॒-ಸ್ಸಮೃ॑ದ್ಧ್ಯತಾಮ್ ॥ ನ ಹಿ ಸ್ಪಶ॒ಮವಿ॑ದ-ನ್ನ॒ನ್ಯಮ॒ಸ್ಮಾತ್ । ವೈ॒ಶ್ವಾ॒ನ॒ರಾ-ತ್ಪು॑ರ ಏ॒ತಾರ॑ಮ॒ಗ್ನೇಃ ॥ 57 ॥

ಅಥೇ॑ಮಮನ್ಥನ್ನ॒ಮೃತ॒ಮಮೂ॑ರಾಃ । ವೈ॒ಶ್ವಾ॒ನ॒ರ-ಙ್ಖ್ಷೇ᳚ತ್ರ॒ಜಿತ್ಯಾ॑ಯ ದೇ॒ವಾಃ ॥ ಯೇಷಾ॑ಮಿ॒ಮೇ ಪೂರ್ವೇ॒ ಅರ್ಮಾ॑ಸ॒ ಆಸನ್ನ್॑ । ಅ॒ಯೂ॒ಪಾ-ಸ್ಸದ್ಮ॒ ವಿಭೃ॑ತಾ ಪು॒ರೂಣಿ॑ । ವೈಶ್ವಾ॑ನರ॒ ತ್ವಯಾ॒ ತೇ ನು॒ತ್ತಾಃ । ಪೃ॒ಥಿ॒ವೀ-ಮ॒ನ್ಯಾಮ॒ಭಿತ॑ಸ್ಥು॒-ರ್ಜನಾ॑ಸಃ ॥ ಪೃ॒ಥಿ॒ವೀ-ಮ್ಮಾ॒ತರ॑-ಮ್ಮ॒ಹೀಮ್ । ಅ॒ನ್ತರಿ॑ಖ್ಷ॒-ಮುಪ॑ಬ್ರುವೇ । ಬೃ॒ಹ॒ತೀಮೂ॒ತಯೇ॒ ದಿವ᳚ಮ್ ॥ ವಿಶ್ವ॑-ಮ್ಬಿಭರ್ತಿ ಪೃಥಿ॒ವೀ ॥ 58 ॥

ಅ॒ನ್ತರಿ॑ಖ್ಷಂ॒-ವಿಁಪ॑ಪ್ರಥೇ । ದು॒ಹೇ ದ್ಯೌ-ರ್ಬೃ॑ಹ॒ತೀ ಪಯಃ॑ ॥ ನ ತಾ ನ॑ಶನ್ತಿ॒ ನ ದ॑ಭಾತಿ॒ ತಸ್ಕ॑ರಃ । ನೈನಾ॑ ಅಮಿ॒ತ್ರೋ ವ್ಯಥಿ॒ರಾದ॑ಧರ್​ಷತಿ । ದೇ॒ವಾಗ್​ಶ್ಚ॒ ಯಾಭಿ॒-ರ್ಯಜ॑ತೇ॒ ದದಾ॑ತಿ ಚ । ಜ್ಯೋಗಿತ್ತಾಭಿ॑-ಸ್ಸಚತೇ॒ ಗೋಪ॑ತಿ-ಸ್ಸ॒ಹ ॥ ನ ತಾ ಅರ್ವಾ॑ ರೇ॒ಣುಕ॑ಕಾಟೋ ಅಶ್ನುತೇ । ನ ಸಗ್ಗ್॑ ಸ್ಕೃತ॒ತ್ರ-ಮುಪ॑ಯನ್ತಿ॒ ತಾ ಅ॒ಭಿ । ಉ॒ರು॒ಗಾ॒ಯಮಭ॑ಯ॒-ನ್ತಸ್ಯ॒ ತಾ ಅನು॑ । ಗಾವೋ॒ ಮರ್ತ್ಯ॑ಸ್ಯ॒ ವಿಚ॑ರನ್ತಿ॒ ಯಜ್ವ॑ನಃ ॥ 59 ॥

ರಾತ್ರೀ॒ ವ್ಯ॑ಖ್ಯದಾಯ॒ತೀ । ಪು॒ರು॒ತ್ರಾ ದೇ॒ವ್ಯ॑ಖ್ಷಭಿಃ॑ । ವಿಶ್ವಾ॒ ಅಧಿ॒ ಶ್ರಿಯೋ॑-ಽಧಿತ ॥ ಉಪ॑ ತೇ॒ ಗಾ ಇ॒ವಾಕ॑ರಮ್ । ವೃ॒ಣೀ॒ಷ್ವ ದು॑ಹಿತ-ರ್ದಿವಃ । ರಾತ್ರೀ॒ ಸ್ತೋಮ॒-ನ್ನ ಜಿ॒ಗ್ಯುಷೀ᳚ ॥ ದೇ॒ವೀಂ-ವಾಁಚ॑ಮಜನಯನ್ತ ದೇ॒ವಾಃ । ತಾಂ-ವಿಁ॒ಶ್ವರೂ॑ಪಾಃ ಪ॒ಶವೋ॑ ವದನ್ತಿ । ಸಾ ನೋ॑ ಮ॒ನ್ದ್ರೇಷ॒ಮೂರ್ಜ॒-ನ್ದುಹಾ॑ನಾ । ಧೇ॒ನುರ್ವಾಗ॒ಸ್ಮಾನುಪ॒ ಸುಷ್ಟು॒ತೈತು॑ ॥ 60 ॥

ಯ-ದ್ವಾಗ್ವದ॑ನ್ತ್ಯ-ವಿಚೇತ॒ನಾನಿ॑ । ರಾಷ್ಟ್ರೀ॑ ದೇ॒ವಾನಾ᳚-ನ್ನಿಷ॒ಸಾದ॑ ಮ॒ನ್ದ್ರಾ । ಚತ॑ಸ್ರ॒ ಊರ್ಜ॑-ನ್ದುದುಹೇ॒ ಪಯಾಗ್ಂ॑ಸಿ । ಕ್ವ॑ ಸ್ವಿ ದಸ್ಯಾಃ ಪರ॒ಮ-ಞ್ಜ॑ಗಾಮ ॥ ಗೌ॒ರೀ ಮಿ॑ಮಾಯ ಸಲಿ॒ಲಾನಿ॒ ತಖ್ಷ॑ತೀ । ಏಕ॑ಪದೀ ದ್ವಿ॒ಪದೀ॒ ಸಾ ಚತು॑ಷ್ಪದೀ । ಅ॒ಷ್ಟಾಪ॑ದೀ॒ ನವ॑ಪದೀ ಬಭೂ॒ವುಷೀ᳚ । ಸ॒ಹಸ್ರಾ᳚ಖ್ಷರಾ ಪರ॒ಮೇ ವ್ಯೋ॑ಮನ್ನ್ ॥ ತಸ್ಯಾಗ್ಂ॑ ಸಮು॒ದ್ರಾ ಅಧಿ॒ ವಿ ಖ್ಷ॑ರನ್ತಿ । ತೇನ॑ ಜೀವನ್ತಿ ಪ್ರ॒ದಿಶ॒ಶ್ಚತ॑ಸ್ರಃ ॥ 61 ॥

ತತಃ॑, ಖ್ಷರತ್ಯ॒ಖ್ಷರ᳚ಮ್ । ತ-ದ್ವಿಶ್ವ॒-ಮುಪ॑ಜೀವತಿ ॥ ಇನ್ದ್ರಾ॒ ಸೂರಾ॑ ಜ॒ನಯ॑ನ್-ವಿ॒ಶ್ವಕ॑ರ್ಮಾ । ಮ॒ರುತ್ವಾಗ್ಂ॑ ಅಸ್ತು ಗ॒ಣವಾ᳚ನ್-ಥ್ಸಜಾ॒ತವಾನ್॑ । ಅ॒ಸ್ಯ ಸ್ನು॒ಷಾ-ಶ್ವಶು॑ರಸ್ಯ॒ ಪ್ರಶಿ॑ಷ್ಟಿಮ್ । ಸ॒ಪತ್ನಾ॒ ವಾಚ॒-ಮ್ಮನ॑ಸಾ॒ ಉಪಾ॑ಸತಾಮ್ ॥ ಇನ್ದ್ರ॒-ಸ್ಸೂರೋ॑ ಅತರ॒-ದ್ರಜಾಗ್ಂ॑ಸಿ । ಸ್ನು॒ಷಾ ಸ॒ಪತ್ನಾ॒-ಶ್ಶ್ವಶು॑ರೋ॒-ಽಯಮ॑ಸ್ತು । ಅ॒ಯಗ್ಂ ಶತ್ರೂ᳚ಞ್ಜಯತು॒ ಜರ್​ಹೃ॑ಷಾಣಃ । ಅ॒ಯಂ-ವಾಁಜ॑-ಞ್ಜಯತು॒ ವಾಜ॑ಸಾತೌ ॥ ಅ॒ಗ್ನಿಃ, ಖ್ಷ॑ತ್ರ॒ಭೃದನಿ॑ಭೃಷ್ಟ॒ಮೋಜಃ॑ । ಸ॒ಹ॒ಸ್ರಿಯೋ॑ ದೀಪ್ಯತಾ॒-ಮಪ್ರ॑ಯುಚ್ಛನ್ನ್ । ವಿ॒ಭ್ರಾಜ॑ಮಾನ-ಸ್ಸಮಿಧಾ॒ನ ಉ॒ಗ್ರಃ । ಆ-ಽನ್ತರಿ॑ಖ್ಷಮರುಹ॒ದ-ಗ॒ನ್ದ್ಯಾಮ್ ॥ 62 ॥
(ಧಾ॒ರಯ॑ನ್ - ಪುರೋ॒ಡಾಶಂ॒ - ಬೃಹ॒ಸ್ಪತಿಂ॑ - ಜ॒ಘನ॑ಚ್ಯುತಿ - ಮಾನ॒ನ್ದೋ - ಭಗ॑ಸ್ಯ ತೃಪ್ಯಾ - ಣ್ಯ॒ಗ್ನೇಃ - ಪೃ॑ಥಿ॒ವೀ - ಯಜ್ವ॑ನ - ಏತು - ಪ್ರ॒ದಿಶ॒ಶ್ಚತ॑ಸ್ರೋ॒ - ವಾಜ॑ಸಾತೌ ಚ॒ತ್ವಾರಿ॑ ಚ) (ಅ. 6)

ಅನುವಾಕಂ 7 - ಉಪಹೋಮಾಃ
ವೃಷಾ᳚ ಽಸ್ಯ॒ಗ್ಂ॒ಶು-ರ್ವೃ॑ಷ॒ಭಾಯ॑ ಗೃಹ್ಯಸೇ । ವೃಷಾ॒-ಽಯಮು॒ಗ್ರೋ ನೃ॒ಚಖ್ಷ॑ಸೇ । ದಿ॒ವ್ಯಃ ಕ॑ರ್ಮ॒ಣ್ಯೋ॑ ಹಿ॒ತೋ ಬೃ॒ಹನ್ನಾಮ॑ । ವೃ॒ಷ॒ಭಸ್ಯ॒ ಯಾ ಕ॒ಕುತ್ ॥ ವಿ॒ಷೂ॒ವಾನ್. ವಿ॑ಷ್ಣೋ ಭವತು । ಅ॒ಯಂ-ಯೋಁ ಮಾ॑ಮ॒ಕೋ ವೃಷಾ᳚ । ಅಥೋ॒ ಇನ್ದ್ರ॑ ಇವ ದೇ॒ವೇಭ್ಯಃ॑ । ವಿಬ್ರ॑ವೀತು॒ ಜನೇ᳚ಭ್ಯಃ ॥ ಆಯು॑ಷ್ಮನ್ತಂ॒-ವಁರ್ಚ॑ಸ್ವನ್ತಮ್ । ಅಥೋ॒ ಅಧಿ॑ಪತಿಂ-ವಿಁ॒ಶಾಮ್ ॥ 63 ॥

ಅ॒ಸ್ಯಾಃ ಪೃ॑ಥಿ॒ವ್ಯಾ ಅದ್ಧ್ಯ॑ಖ್ಷಮ್ । ಇ॒ಮಮಿ॑ನ್ದ್ರ ವೃಷ॒ಭ-ಙ್ಕೃ॑ಣು ॥ ಯ-ಸ್ಸು॒ಶೃಙ್ಗ॑-ಸ್ಸುವೃಷ॒ಭಃ । ಕ॒ಲ್ಯಾಣೋ॒ ದ್ರೋಣ॒ ಆಹಿ॑ತಃ । ಕಾರ್​ಷೀ॑ವಲಪ್ರಗಾಣೇನ । ವೃ॒ಷ॒ಭೇಣ॑ ಯಜಾಮಹೇ ॥ ವೃ॒ಷ॒ಭೇಣ॒ ಯಜ॑ಮಾನಾಃ । ಅಕ್ರೂ॑ರೇಣೇವ ಸ॒ರ್ಪಿಷಾ᳚ । ಮೃಧ॑ಶ್ಚ॒ ಸರ್ವಾ॒ ಇನ್ದ್ರೇ॑ಣ । ಪೃತ॑ನಾಶ್ಚ ಜಯಾಮಸಿ ॥ 64 ॥

ಯಸ್ಯಾ॒ಯಮೃ॑ಷ॒ಭೋ ಹ॒ವಿಃ । ಇನ್ದ್ರಾ॑ಯ ಪರಿಣೀ॒ಯತೇ᳚ । ಜಯಾ॑ತಿ॒ ಶತ್ರು॑ಮಾ॒ಯನ್ತ᳚ಮ್ । ಅಥೋ॑ ಹನ್ತಿ ಪೃತನ್ಯ॒ತಃ ॥ ನೃ॒ಣಾಮಹ॑ ಪ್ರ॒ಣೀರಸ॑ತ್ । ಅಗ್ರ॑ ಉದ್ಭಿನ್ದ॒ತಾಮ॑ಸತ್ ॥ ಇನ್ದ್ರ॒ ಶುಷ್ಮ॑-ನ್ತ॒ನುವಾ॒ ಮೇರ॑ಯಸ್ವ । ನೀ॒ಚಾ ವಿಶ್ವಾ॑ ಅ॒ಭಿತಿ॑ಷ್ಠಾ॒ಭಿಮಾ॑ತೀಃ । ನಿ ಶೃ॑ಣೀಹ್ಯಾಬಾ॒ಧಂ-ಯೋಁ ನೋ॒ ಅಸ್ತಿ॑ । ಉ॒ರು-ನ್ನೋ॑ ಲೋ॒ಕ-ಙ್ಕೃ॑ಣುಹಿ ಜೀರದಾನೋ ॥ 65 ॥

ಪ್ರೇಹ್ಯ॒ಭಿಪ್ರೇಹಿ॒ ಪ್ರಭ॑ರಾ॒ ಸಹ॑ಸ್ವ । ಮಾ ವಿವೇ॑ನೋ॒ ವಿ ಶೃ॑ಣುಷ್ವಾ॒ ಜನೇ॑ಷು । ಉದೀ॑ಡಿ॒ತೋ ವೃ॑ಷಭ॒ ತಿಷ್ಠ॒ ಶುಷ್ಮೈಃ᳚ । ಇನ್ದ್ರ॒ ಶತ್ರೂ᳚-ನ್ಪು॒ರೋ ಅ॒ಸ್ಮಾಕ॑ ಯುದ್ಧ್ಯ ॥ ಅಗ್ನೇ॒ ಜೇತಾ॒ ತ್ವ-ಞ್ಜ॑ಯ । ಶತ್ರೂ᳚ನ್-ಥ್ಸಹಸ॒ ಓಜ॑ಸಾ । ವಿ ಶತ್ರೂ॒ನ್॒. ವಿಮೃಧೋ॑ ನುದ ॥ ಏ॒ತ-ನ್ತೇ॒ ಸ್ತೋಮ॑-ನ್ತುವಿಜಾತ॒ ವಿಪ್ರಃ॑ । ರಥ॒-ನ್ನ ಧೀರ॒-ಸ್ಸ್ವಪಾ॑ ಅತಖ್ಷಮ್ । ಯದೀದ॑ಗ್ನೇ॒ ಪ್ರತಿ॒ ತ್ವ-ನ್ದೇ॑ವ॒ ಹರ್ಯಾಃ᳚ ॥ 66 ॥

ಸುವ॑ರ್ವತೀರ॒ಪ ಏ॑ನಾ ಜಯೇಮ ॥ ಯೋ ಘೃ॒ತೇನಾ॒ಭಿಮಾ॑ನಿತಃ । ಇನ್ದ್ರ॒ ಜೈತ್ರಾ॑ಯ ಜಜ್ಞಿಷೇ । ಸ ನ॒-ಸ್ಸಙ್ಕಾ॑ಸು ಪಾರಯ । ಪೃ॒ತ॒ನಾ॒ಸಾಹ್ಯೇ॑ಷು ಚ ॥ ಇನ್ದ್ರೋ॑ ಜಿಗಾಯ ಪೃಥಿ॒ವೀಮ್ । ಅ॒ನ್ತರಿ॑ಖ್ಷ॒ಗ್ಂ॒ ಸುವ॑ರ್ಮ॒ಹತ್ । ವೃ॒ತ್ರ॒ಹಾ ಪು॑ರು॒ಚೇತ॑ನಃ ॥ ಇನ್ದ್ರೋ॑ ಜಿಗಾಯ॒ ಸಹ॑ಸಾ॒ ಸಹಾಗ್ಂ॑ಸಿ । ಇನ್ದ್ರೋ॑ ಜಿಗಾಯ॒ ಪೃತ॑ನಾನಿ॒ ವಿಶ್ವಾ᳚ ॥ 67 ॥

ಇನ್ದ್ರೋ॑ ಜಾ॒ತೋ ವಿ ಪುರೋ॑ ರುರೋಜ । ಸ ನಃ॑ ಪರ॒ಸ್ಪಾ ವರಿ॑ವಃ ಕೃಣೋತು ॥ ಅ॒ಯ-ಙ್ಕೃ॒ತ್ನುರಗೃ॑ಭೀತಃ । ವಿ॒ಶ್ವ॒ಜಿ-ದು॒ದ್ಭಿದಿ-ಥ್ಸೋಮಃ॑ । ಋಷಿ॒-ರ್ವಿಪ್ರಃ॒ ಕಾವ್ಯೇ॑ನ ॥ ವಾ॒ಯುರ॑ಗ್ರೇ॒ಗಾ ಯ॑ಜ್ಞ॒ಪ್ರೀಃ । ಸಾ॒ಕ-ಙ್ಗ॒ನ್ಮನ॑ಸಾ ಯ॒ಜ್ಞಮ್ । ಶಿ॒ವೋ ನಿ॒ಯುದ್ಭಿ॑-ಶ್ಶಿ॒ವಾಭಿಃ॑ ॥ ವಾಯೋ॑ ಶು॒ಕ್ರೋ ಅ॑ಯಾಮಿ ತೇ । ಮದ್ಧ್ವೋ॒ ಅಗ್ರ॒-ನ್ದಿವಿ॑ಷ್ಟಿಷು ॥ 68 ॥

ಆಯಾ॑ ಹಿ॒ ಸೋಮ॑ಪೀತಯೇ । ಸ್ವಾ॒ರು॒ಹೋ ದೇ॑ವ ನಿ॒ಯುತ್ವ॑ತಾ ॥ ಇ॒ಮಮಿ॑ನ್ದ್ರ ವರ್ಧಯ ಖ್ಷ॒ತ್ರಿಯಾ॑ಣಾಮ್ । ಅ॒ಯಂ-ವಿಁ॒ಶಾಂ-ವಿಁ॒ಶ್ಪತಿ॑ರಸ್ತು॒ ರಾಜಾ᳚ । ಅ॒ಸ್ಮಾ ಇ॑ನ್ದ್ರ॒ ಮಹಿ॒ ವರ್ಚಾಗ್ಂ॑ಸಿ ಧೇಹಿ । ಅ॒ವ॒ರ್ಚಸ॑-ಙ್ಕೃಣುಹಿ॒ ಶತ್ರು॑ಮಸ್ಯ ॥ ಇ॒ಮಮಾಭ॑ಜ॒ ಗ್ರಾಮೇ॒ ಅಶ್ವೇ॑ಷು॒ ಗೋಷು॑ । ನಿರ॒ಮು-ಮ್ಭ॑ಜ॒ ಯೋ॑-ಽಮಿತ್ರೋ॑ ಅಸ್ಯ । ವರ್​ಷ್ಮ॑ನ್ ಖ್ಷ॒ತ್ರಸ್ಯ॑ ಕ॒ಕುಭಿ॑ ಶ್ರಯಸ್ವ । ತತೋ॑ ನ ಉ॒ಗ್ರೋ ವಿಭ॑ಜಾ॒ ವಸೂ॑ನಿ ॥ 69 ॥

ಅ॒ಸ್ಮೇ ದ್ಯಾ॑ವಾಪೃಥಿವೀ॒ ಭೂರಿ॑ ವಾ॒ಮಮ್ । ಸ-ನ್ದು॑ಹಾಥಾ-ಙ್ಘರ್ಮ॒ದುಘೇ॑ವ ಧೇ॒ನುಃ । ಅ॒ಯಗ್ಂ ರಾಜಾ᳚ ಪ್ರಿ॒ಯ ಇನ್ದ್ರ॑ಸ್ಯ ಭೂಯಾತ್ । ಪ್ರಿ॒ಯೋ ಗವಾ॒ಮೋಷ॑ಧೀನಾ-ಮು॒ತಾಪಾಮ್ ॥ ಯು॒ನಜ್ಮಿ॑ ತ ಉತ್ತ॒ರಾವ॑ನ್ತ॒-ಮಿನ್ದ್ರ᳚ಮ್ । ಯೇನ॒ ಜಯಾ॑ಸಿ॒ ನ ಪರಾ॒ಜಯಾ॑ಸೈ । ಸ ತ್ವಾ॑ ಽಕರೇಕವೃಷ॒ಭಗ್ಗ್​ ಸ್ವಾನಾ᳚ಮ್ । ಅಥೋ॑ ರಾಜನ್ನುತ್ತ॒ಮ-ಮ್ಮಾ॑ನ॒ವಾನಾ᳚ಮ್ ॥ ಉತ್ತ॑ರ॒ಸ್ತ್ವಮಧ॑ರೇ ತೇ ಸ॒ಪತ್ನಾಃ᳚ । ಏಕ॑ವೃಷಾ॒ ಇನ್ದ್ರ॑ಸಖಾ ಜಿಗೀ॒ವಾನ್ ॥ 70 ॥

ವಿಶ್ವಾ॒ ಆಶಾಃ॒ ಪೃತ॑ನಾ-ಸ್ಸ॒ಜಂ​ಯಁ॒ಞ್ಜಯನ್ನ್॑ । ಅ॒ಭಿತಿ॑ಷ್ಠ ಶತ್ರೂಯ॒ತ-ಸ್ಸ॑ಹಸ್ವ ॥ ತುಭ್ಯ॑-ಮ್ಭರನ್ತಿ ಖ್ಷಿ॒ತಯೋ॑ ಯವಿಷ್ಠ । ಬ॒ಲಿಮ॑ಗ್ನೇ॒ ಅನ್ತಿ॑ ತ॒ ಓತ ದೂ॒ರಾತ್ । ಆ ಭನ್ದಿ॑ಷ್ಠಸ್ಯ ಸುಮ॒ತಿ-ಞ್ಚಿ॑ಕಿದ್ಧಿ । ಬೃ॒ಹತ್ತೇ॑ ಅಗ್ನೇ॒ ಮಹಿ॒ ಶರ್ಮ॑ ಭ॒ದ್ರಮ್ ॥ ಯೋ ದೇ॒ಹ್ಯೋ ಅನ॑ಮಯದ್ವಧ॒ಸ್ನೈಃ । ಯೋ ಅರ್ಯ॑ಪತ್ನೀ-ರು॒ಷಸ॑ಶ್ಚ॒ಕಾರ॑ । ಸ ನಿ॒ರುದ್ಧ್ಯಾ॒ ನಹು॑ಷೋ ಯ॒ಹ್ವೋ ಅ॒ಗ್ನಿಃ । ವಿಶ॑ಶ್ಚಕ್ರೇ ಬಲಿ॒ಹೃತ॒-ಸ್ಸಹೋ॑ಭಿಃ ॥ 71 ॥

ಪ್ರ ಸ॒ದ್ಯೋ ಅ॑ಗ್ನೇ॒ ಅತ್ಯ᳚ಷ್ಯ॒ನ್ಯಾನ್ । ಆ॒ವಿರ್ಯಸ್ಮೈ॒ ಚಾರು॑ತರೋ ಬ॒ಭೂಥ॑ । ಈ॒ಡೇನ್ಯೋ॑ ವಪು॒ಷ್ಯೋ॑ ವಿ॒ಭಾವಾ᳚ । ಪ್ರಿ॒ಯೋ ವಿ॒ಶಾಮತಿ॑ಥಿ॒-ರ್ಮಾನು॑ಷೀಣಾಮ್ ॥ ಬ್ರಹ್ಮ॑ ಜ್ಯೇಷ್ಠಾ ವೀ॒ರ್ಯಾ॑ ಸಮ್ಭೃ॑ತಾನಿ । ಬ್ರಹ್ಮಾಗ್ರೇ॒ ಜ್ಯೇಷ್ಠ॒-ನ್ದಿವ॒ಮಾತ॑ತಾನ । ಋ॒ತಸ್ಯ॒ ಬ್ರಹ್ಮ॑ ಪ್ರಥ॒ಮೋತ ಜ॑ಜ್ಞೇ । ತೇನಾ॑ರ್​ಹತಿ॒ ಬ್ರಹ್ಮ॑ಣಾ॒ ಸ್ಪರ್ಧಿ॑ತು॒-ಙ್ಕಃ ॥ ಬ್ರಹ್ಮ॒ ಸ್ರುಚೋ॑ ಘೃ॒ತವ॑ತೀಃ । ಬ್ರಹ್ಮ॑ಣಾ॒ ಸ್ವರ॑ವೋ ಮಿ॒ತಾಃ ॥ 72 ॥

ಬ್ರಹ್ಮ॑ ಯ॒ಜ್ಞಸ್ಯ॒ ತನ್ತ॑ವಃ । ಋ॒ತ್ವಿಜೋ॒ ಯೇ ಹ॑ವಿ॒ಷ್ಕೃತಃ॑ ॥ ಶೃಙ್ಗಾ॑ಣೀ॒ವೇಚ್ಛೃ॒ಙ್ಗಿಣಾ॒ಗ್ಂ॒ ಸನ್ದ॑ದೃಶ್ರಿರೇ । ಚ॒ಷಾಲ॑ವನ್ತ॒-ಸ್ಸ್ವರ॑ವಃ ಪೃಥಿ॒ವ್ಯಾಮ್ । ತೇ ದೇ॒ವಾಸ॒-ಸ್ಸ್ವರ॑ವಸ್ತಸ್ಥಿ॒ವಾಗ್ಂಸಃ॑ । ನಮ॒-ಸ್ಸಖಿ॑ಭ್ಯ-ಸ್ಸ॒ನ್ನಾನ್ಮಾ ಽವ॑ಗಾತ ॥ ಅ॒ಭಿ॒ಭೂರ॒ಗ್ನಿರ॑ತರ॒-ದ್ರಜಾಗ್ಂ॑ಸಿ । ಸ್ಪೃಧೋ॑ ವಿ॒ಹತ್ಯ॒ ಪೃತ॑ನಾ ಅಭಿ॒ಶ್ರೀಃ । ಜು॒ಷಾ॒ಣೋ ಮ॒ ಆಹು॑ತಿ-ಮ್ಮಾ ಮಹಿಷ್ಟ । ಹ॒ತ್ವಾ ಸ॒ಪತ್ನಾ॒ನ್॒. ವರಿ॑ವಸ್ಕರನ್ನಃ ॥ ಈಶಾ॑ನ-ನ್ತ್ವಾ॒ ಭುವ॑ನಾನಾ-ಮಭಿ॒ಶ್ರಿಯ᳚ಮ್ । ಸ್ತೌಮ್ಯ॑ಗ್ನ ಉರು॒ಕೃತಗ್ಂ॑ ಸು॒ವೀರ᳚ಮ್ । ಹ॒ವಿ-ರ್ಜು॑ಷಾ॒ಣ-ಸ್ಸ॒ಪತ್ನಾಗ್ಂ॑ ಅಭಿ॒ಭೂರ॑ಸಿ । ಜ॒ಹಿ ಶತ್ರೂ॒ಗ್ಂ॒ರಪ॒ ಮೃಧೋ॑ ನುದಸ್ವ ॥ 73 ॥
(ವಿ॒ಶಾಂ - ಜ॑ಯಾಮಸಿ - ಜೀರದಾನೋ॒ - ಹರ್ಯಾ॒ - ವಿಶ್ವಾ॒ - ದಿವಿ॑ಷ್ಟಿಷು॒ - ವಸೂ॑ನಿ - ಜಿಗೀ॒ವಾನ್ಥ್ - ಸಹೋ॑ಭಿ--ರ್ ಮಿ॒ತಾ - ನ॑ ಶ್ಚ॒ತ್ವಾರಿ॑ ಚ) (ಅ. 7)

ಅನುವಾಕಂ 8 - ಉಪಹೋಮಾಃ
ಸ ಪ್ರ॑ತ್ನ॒ವನ್ನವೀ॑ಯಸಾ । ಅಗ್ನೇ᳚ ದ್ಯು॒ಮ್ನೇನ॑ ಸಂ॒​ಯಁತಾ᳚ । ಬೃ॒ಹ-ತ್ತತನ್ಥ ಭಾ॒ನುನಾ᳚ ॥ ನವ॒-ನ್ನು ಸ್ತೋಮ॑ಮ॒ಗ್ನಯೇ᳚ । ದಿ॒ವ-ಶ್ಶ್ಯೇ॒ನಾಯ॑ ಜೀಜನಮ್ । ವಸೋಃ᳚ ಕು॒ವಿದ್ವ॒ನಾತಿ॑ ನಃ ॥ ಸ್ವಾ॒ರು॒ಹಾ ಯಸ್ಯ॒ ಶ್ರಿಯೋ॑ ದೃ॒ಶೇ । ರ॒ಯಿರ್ವೀ॒ರವ॑ತೋ ಯಥಾ । ಅಗ್ರೇ॑ ಯ॒ಜ್ಞಸ್ಯ॒ ಚೇತ॑ತಃ ॥ ಅದಾ᳚ಭ್ಯಃ ಪುರ ಏ॒ತಾ ॥ 74 ॥

ಅ॒ಗ್ನಿರ್ವಿ॒ಶಾ-ಮ್ಮಾನು॑ಷೀಣಾಮ್ । ತೂರ್ಣೀ॒ ರಥ॒-ಸ್ಸದಾ॒ ನವಃ॑ ॥ ನವ॒ಗ್ಂ॒ ಸೋಮಾ॑ಯ ವಾ॒ಜಿನೇ᳚ । ಆಜ್ಯ॒-ಮ್ಪಯ॑ಸೋ-ಽಜನಿ । ಜುಷ್ಟ॒ಗ್ಂ॒ ಶುಚಿ॑ತಮಂ॒-ವಁಸು॑ ॥ ನವಗ್ಂ॑ ಸೋಮ ಜುಷಸ್ವ ನಃ । ಪೀ॒ಯೂಷ॑ಸ್ಯೇ॒ಹ ತೃ॑ಪ್ಣುಹಿ । ಯಸ್ತೇ॑ ಭಾ॒ಗ ಋ॒ತಾವ॒ಯಮ್ ॥ ನವ॑ಸ್ಯ ಸೋಮ ತೇ ವ॒ಯಮ್ । ಆ ಸು॑ಮ॒ತಿಂ-ವೃಁ॑ಣೀಮಹೇ ॥ 75 ॥

ಸ ನೋ॑ ರಾಸ್ವ ಸಹ॒ಸ್ರಿಣಃ॑ ॥ ನವಗ್ಂ॑ ಹ॒ವಿರ್ಜು॑ಷಸ್ವ ನಃ । ಋ॒ತುಭಿ॑-ಸ್ಸೋಮ॒ ಭೂತ॑ಮಮ್ । ತದ॒ಙ್ಗ ಪ್ರತಿ॑ಹರ್ಯ ನಃ । ರಾಜನ᳚-ಥ್ಸೋಮ ಸ್ವ॒ಸ್ತಯೇ᳚ ॥ ನವ॒ಗ್ಗ್॒ ಸ್ತೋಮ॒-ನ್ನವಗ್ಂ॑ ಹ॒ವಿಃ । ಇ॒ನ್ದ್ರಾ॒ಗ್ನಿಭ್ಯಾ॒-ನ್ನಿವೇ॑ದಯ । ತಜ್ಜು॑ಷೇತಾ॒ಗ್ಂ॒ ಸಚೇ॑ತಸಾ ॥ ಶುಚಿ॒-ನ್ನು ಸ್ತೋಮ॒-ನ್ನವ॑ಜಾತಮ॒ದ್ಯ । ಇನ್ದ್ರಾ᳚ಗ್ನೀ ವೃತ್ರಹಣಾ ಜು॒ಷೇಥಾ᳚ಮ್ ॥ 76 ॥

ಉ॒ಭಾ ಹಿ ವಾಗ್ಂ॑ ಸು॒ಹವಾ॒ ಜೋಹ॑ವೀಮಿ । ತಾ ವಾಜಗ್ಂ॑ ಸ॒ದ್ಯ ಉ॑ಶ॒ತೇ ಧೇಷ್ಠಾ᳚ ॥ ಅ॒ಗ್ನಿರಿನ್ದ್ರೋ॒ ನವ॑ಸ್ಯ ನಃ । ಅ॒ಸ್ಯ ಹ॒ವ್ಯಸ್ಯ॑ ತೃಪ್ಯತಾಮ್ । ಇ॒ಹ ದೇ॒ವೌ ಸ॑ಹ॒ಸ್ರಿಣೌ᳚ ॥ ಯ॒ಜ್ಞ-ನ್ನ॒ ಆ ಹಿ ಗಚ್ಛ॑ತಾಮ್ । ವಸು॑ಮನ್ತಗ್ಂ ಸುವ॒ರ್ವಿದ᳚ಮ್ । ಅ॒ಸ್ಯ ಹ॒ವ್ಯಸ್ಯ॑ ತೃಪ್ಯತಾಮ್ । ಅ॒ಗ್ನಿರಿನ್ದ್ರೋ॒ ನವ॑ಸ್ಯ ನಃ ॥ ವಿಶ್ವಾ᳚-ನ್ದೇ॒ವಾಗ್​ ಸ್ತ॑ರ್ಪಯತ ॥ 77 ॥

ಹ॒ವಿಷೋ॒-ಽಸ್ಯ ನವ॑ಸ್ಯ ನಃ । ಸು॒ವ॒ರ್ವಿದೋ॒ ಹಿ ಜ॑ಜ್ಞಿ॒ರೇ ॥ ಏದ-ಮ್ಬ॒ರ್॒ಹಿ-ಸ್ಸು॒ಷ್ಟರೀ॑ಮಾ॒ ನವೇ॑ನ । ಅ॒ಯಂ-ಯಁ॒ಜ್ಞೋ ಯಜ॑ಮಾನಸ್ಯ ಭಾ॒ಗಃ । ಅ॒ಯ-ಮ್ಬ॑ಭೂವ॒ ಭುವ॑ನಸ್ಯ॒ ಗರ್ಭಃ॑ । ವಿಶ್ವೇ॑ ದೇ॒ವಾ ಇ॒ದಮ॒ದ್ಯಾಗ॑ಮಿಷ್ಠಾಃ ॥ ಇ॒ಮೇ ನು ದ್ಯಾವಾ॑ಪೃಥಿ॒ವೀ ಸ॒ಮೀಚೀ᳚ । ತ॒ನ್ವಾ॒ನೇ ಯ॒ಜ್ಞ-ಮ್ಪು॑ರು॒ಪೇಶ॑ಸ-ನ್ಧಿ॒ಯಾ । ಆ-ಽಸ್ಮೈ॑ ಪೃಣೀತಾ॒-ಮ್ಭುವ॑ನಾನಿ॒ ವಿಶ್ವಾ᳚ । ಪ್ರ॒ಜಾ-ಮ್ಪುಷ್ಟಿ॑ಮ॒ಮೃತ॒-ನ್ನವೇ॑ನ ॥ 78 ॥

ಇ॒ಮೇ ಧೇ॒ನೂ ಅ॒ಮೃತಂ॒-ಯೇಁ ದು॒ಹಾತೇ᳚ । ಪಯ॑ಸ್ವ-ತ್ಯುತ್ತ॒ರಾಮೇ॑ತು॒ ಪುಷ್ಟಿಃ॑ । ಇ॒ಮಂ-ಯಁ॒ಜ್ಞ-ಞ್ಜು॒ಷಮಾ॑ಣೇ॒ ನವೇ॑ನ । ಸ॒ಮೀಚೀ॒ ದ್ಯಾವಾ॑ಪೃಥಿ॒ವೀ ಘೃ॒ತಾಚೀ᳚ ॥ ಯವಿ॑ಷ್ಠೋ ಹವ್ಯ॒ವಾಹ॑ನಃ । ಚಿ॒ತ್ರಭಾ॑ನು-ರ್ಘೃ॒ತಾಸು॑ತಿಃ । ನವ॑ಜಾತೋ॒ ವಿರೋ॑ಚಸೇ । ಅಗ್ನೇ॒ ತತ್ತೇ॑ ಮಹಿತ್ವ॒ನಮ್ ॥ ತ್ವಮ॑ಗ್ನೇ ದೇ॒ವತಾ᳚ಭ್ಯಃ । ಭಾ॒ಗೇ ದೇ॑ವ॒ ನ ಮೀ॑ಯಸೇ ॥ 79 ॥

ಸ ಏ॑ನಾ ವಿ॒ದ್ವಾನ್. ಯ॑ಖ್ಷ್ಯಸಿ । ನವ॒ಗ್ಗ್॒ ಸ್ತೋಮ॑-ಞ್ಜುಷಸ್ವ ನಃ ॥ ಅ॒ಗ್ನಿಃ ಪ್ರ॑ಥ॒ಮಃ ಪ್ರಾಶ್ಞಾ॑ತು । ಸ ಹಿ ವೇದ॒ ಯಥಾ॑ ಹ॒ವಿಃ । ಶಿ॒ವಾ ಅ॒ಸ್ಮಭ್ಯ॒-ಮೋಷ॑ಧೀಃ । ಕೃ॒ಣೋತು॑ ವಿ॒ಶ್ವಚ॑ರ್​ಷಣಿಃ ॥ ಭ॒ದ್ರಾನ್ನ॒-ಶ್ಶ್ರೇಯ॒-ಸ್ಸಮ॑ನೈಷ್ಟ ದೇವಾಃ । ತ್ವಯಾ॑-ಽವ॒ಸೇನ॒ ಸಮ॑ಶೀಮಹಿ ತ್ವಾ । ಸ ನೋ॑ ಮಯೋ॒ಭೂಃ ಪಿ॑ತೋ॒ ಆವಿ॑ಶಸ್ವ । ಶ-ನ್ತೋ॒ಕಾಯ॑ ತ॒ನುವೇ᳚ ಸ್ಯೋ॒ನಃ ॥ ಏ॒ತಮು॒ ತ್ಯ-ಮ್ಮಧು॑ನಾ॒ ಸಂ​ಯುಁ॑ತಂ॒-ಯಁವ᳚ಮ್ । ಸರ॑ಸ್ವತ್ಯಾ॒ ಅಧಿ॑ಮ॒ನಾವ॑ಚರ್ಕೃಷುಃ । ಇನ್ದ್ರ॑ ಆಸೀ॒-ಥ್ಸೀರ॑ಪತಿ-ಶ್ಶ॒ತಕ್ರ॑ತುಃ । ಕೀ॒ನಾಶಾ॑ ಆಸ-ನ್ಮ॒ರುತ॑-ಸ್ಸು॒ದಾನ॑ವಃ ॥ 80 ॥
(ಪು॒ರ॒ ಏ॒ತಾ - ವೃ॑ಣೀಮಹೇ - ಜು॒ಷೇಥಾ᳚ನ್-ತರ್ಪಯ-ತಾ॒ಮೃತ॒-ನ್ನವೇ॑ನ-ಮೀಯಸೇ-ಸ್ಯೋ॒ನ ಶ್ಚ॒ತ್ವಾರಿ॑ ಚ) (ಅ. 8)

(ಜುಷ್ಟ॒ - ಶ್ಚಖ್ಷು॑ಷೋ॒ - ಜುಷ್ಟೀ॑ ನರೋ - ನಕ್ತ-ಞ್ಜಾ॒ತಾ - ವೃಷಾ॒ ಸ - ಉ॒ತ ನೋ॒ - ವೃಷಾ᳚-ಽಸ್ಯ॒ಗ್ಂ॒ಶುಃ - ಸ ಪ್ರ॑ತ್ನ॒ವದ॒ಷ್ಟೌ)

(ಜುಷ್ಟೋ॑ - ಮ॒ನ್ಯು-ರ್ಭಗೋ॒ - ಜುಷ್ಟೀ॑ ನರೋ॒ - ಹರಿ॑ವರ್ಪಸ॒-ಙ್ಗಿರಃ॒ - ಶಿಪ್ರಿ॑ನ್ ವಾಜಾನಾ - ಮು॒ತ ನೋ॒ - ಯ-ದ್ವಾಗ್ವದ॑ನ್ತೀ॒ - ವಿಶ್ವಾ॒ ಆಶಾ॒ ಅಶೀ॑ತಿಃ )

(ಜುಷ್ಟಃ॑ - ಸು॒ದಾನ॑ವಃ )

॥ ಹರಿಃ॑ ಓಮ್ ।

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಚತುರ್ಥಃ ಪ್ರಪಾಠಕ-ಸ್ಸಮಾಪ್ತಃ ॥