ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ದ್ವಿತೀಯಃ ಪ್ರಪಾಠಕಃ - ಸ್ವಾಧ್ಯಾಯಬ್ರಾಹ್ಮಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1
ಸಹ॒ ವೈ ದೇ॒ವಾನಾ॒-ಞ್ಚಾಸು॑ರಾಣಾ-ಞ್ಚ ಯ॒ಜ್ಞೌ ಪ್ರತ॑ತಾವಾಸ್ತಾಂ-ವಁ॒ಯಗ್ಗ್​ ಸ್ವ॒ರ್ಗಂ-ಲೋಁ॒ಕಮೇ᳚ಷ್ಯಾಮೋ ವ॒ಯಮೇ᳚ಷ್ಯಾಮ॒ ಇತಿ॒ ತೇ-ಽಸು॑ರಾ-ಸ್ಸ॒ನ್ನಹ್ಯ॒ ಸಹ॑ಸೈ॒ವಾಚ॑ರ-ನ್ಬ್ರಹ್ಮ॒ಚರ್ಯೇ॑ಣ॒ ತಪ॑ಸೈವ ದೇ॒ವಾಸ್ತೇ-ಽಸು॑ರಾ ಅಮುಹ್ಯ॒ಗ್ಗ್॒ಸ್ತೇ ನ ಪ್ರಾಜಾ॑ನ॒ಗ್ಗ್॒ಸ್ತೇ ಪರಾ॑ಭವ॒ನ್ತೇ ನ ಸ್ವ॒ರ್ಗಂ-ಲೋಁ॒ಕಮಾ॑ಯ॒ನ್, ಪ್ರಸೃ॑ತೇನ॒ ವೈ ಯ॒ಜ್ಞೇನ॑ ದೇ॒ವಾ-ಸ್ಸ್ವ॒ರ್ಗಂ-ಲೋಁ॒ಕಮಾ॑ಯ॒-ನ್ನ ಪ್ರಸೃ॑ತೇ॒ನಾಸು॑ರಾ॒-ನ್ಪರಾ॑-ಽಭಾವಯ॒ನ್ ,ಪ್ರಸೃ॑ತೋ ಹ॒ ವೈ ಯ॑ಜ್ಞೋಪವೀ॒ತಿನೋ॑ ಯ॒ಜ್ಞೋ-ಽಪ್ರ॑ಸೃ॒ತೋ-ಽನು॑ಪವೀ॒ತಿನೋ॒ ಯತ್ಕಿಞ್ಚ॑ ಬ್ರಾಹ್ಮ॒ಣೋ ಯ॑ಜ್ಞೋಪವೀ॒ತ್ಯಧೀ॑ತೇ॒ ಯಜ॑ತ ಏ॒ವ ತ-ತ್ತಸ್ಮಾ᳚-ದ್ಯಜ್ಞೋಪವೀ॒ತ್ಯೇ॑ವಾಧೀ॑ಯೀತ ಯಾ॒ಜಯೇ॒-ದ್ಯಜೇ॑ತ ವಾ ಯ॒ಜ್ಞಸ್ಯ॒ ಪ್ರಸೃ॑ತ್ಯಾ॒ , ಅಜಿ॑ನಂ॒-ವಾಁಸೋ॑ ವಾ ದಖ್ಷಿಣ॒ತ ಉ॑ಪ॒ವೀಯ॒ ದಖ್ಷಿ॑ಣ-ಮ್ಬಾ॒ಹುಮುದ್ಧ॑ರ॒ತೇ-ಽವ॑ ಧತ್ತೇ ಸ॒ವ್ಯಮಿತಿ॑ ಯಜ್ಞೋಪವೀ॒ತಮೇ॒ತದೇ॒ವ ವಿಪ॑ರೀತ-ಮ್ಪ್ರಾಚೀನಾವೀ॒ತಗ್ಂ ಸಂ॒​ವೀಁತ॑-ಮ್ಮಾನು॒ಷಮ್ ॥ 1 ॥

ಅನುವಾಕಂ 2
ರಖ್ಷಾಗ್ಂ॑ಸಿ॒ ಹವಾ॑ ಪುರೋನುವಾ॒ಕೇ ತಪೋ-ಽಗ್ರ॑ಮತಿಷ್ಠನ್ತ॒ ತಾ-ನ್ಪ್ರ॒ಜಾಪ॑ತಿ-ರ್ವ॒ರೇಣೋ॒ಪಾಮ॑ನ್ತ್ರಯತ॒ ತಾನಿ॒ ವರ॑ಮವೃಣೀತಾದಿ॒ತ್ಯೋ ನೋ॒ ಯೋದ್ಧಾ॒ ಇತಿ॒ ತಾ-ನ್ಪ್ರ॒ಜಾಪ॑ತಿ-ರಬ್ರವೀ॒-ದ್ಯೋಧ॑ಯ॒ದ್ಧ್ವಮಿತಿ॒ ತಸ್ಮಾ॒ದುತ್ತಿ॑ಷ್ಠನ್ತ॒ಗ್ಂ॒ ಹವಾ॒ ತಾನಿ॒ ರಖ್ಷಾಗ್॑ಸ್ಯಾದಿ॒ತ್ಯಂ-ಯೋಁಧ॑ಯನ್ತಿ॒ ಯಾವ॑ದಸ್ತ॒ಮನ್ವ॑ಗಾ॒-ತ್ತಾನಿ॑ ಹ॒ ವಾ ಏ॒ತಾನಿ॒ ರಖ್ಷಾಗ್ಂ॑ಸಿ ಗಾಯತ್ರಿ॒ಯಾ ಽಭಿ॑ಮನ್ತ್ರಿತೇ॒ನಾಮ್ಭ॑ಸಾ ಶಾಮ್ಯನ್ತಿ॒ ತದು॑ ಹ॒ ವಾ ಏ॒ತೇ ಬ್ರ॑ಹ್ಮವಾ॒ದಿನಃ॑ ಪೂ॒ರ್ವಾಭಿ॑ಮು॒ಖಾ-ಸ್ಸ॒ನ್ಧ್ಯಾಯಾ᳚-ಙ್ಗಾಯತ್ರಿ॒ಯಾ-ಽಭಿ॑ಮನ್ತ್ರಿತಾ॒ ಆಪ॑ ಊ॒ರ್ಧ್ವಂ-ವಿಁಖ್ಷಿ॑ಪನ್ತಿ॒ ತಾ ಏ॒ತಾ ಆಪೋ॑ ವ॒ಜ್ರೀಭೂ॒ತ್ವಾ ತಾನಿ॒ ರಖ್ಷಾಗ್ಂ॑ಸಿ
ಮ॒ನ್ದೇಹಾ-ಽರು॑ಣೇ ದ್ವೀ॒ಪೇ ಪ್ರಖ್ಷಿ॑ಪನ್ತಿ॒ ಯ-ತ್ಪ್ರ॑ದಖ್ಷಿ॒ಣ-ಮ್ಪ್ರಕ್ರ॑ಮನ್ತಿ॒ ತೇನ॑ ಪಾ॒ಪ್ಮಾನ॒ಮವ॑ ಧೂನ್ವನ್ತ್ಯು॒ದ್ಯನ್ತ॑ಮಸ್ತಂ॒-ಯಁನ್ತ॑ಮಾದಿ॒ತ್ಯ-ಮ॑ಭಿದ್ಧ್ಯಾ॒ಯನ್ ಕು॒ರ್ವ-ನ್ಬ್ರಾ᳚ಹ್ಮ॒ಣೋ ವಿ॒ದ್ವಾನ್-ಥ್ಸ॒ಕಲ॑-ಮ್ಭ॒ದ್ರಮ॑ಶ್ನುತೇ॒ ಽಸಾವಾ॑ದಿ॒ತ್ಯೋ ಬ್ರ॒ಹ್ಮೇತಿ॒ ಬ್ರಹ್ಮೈ॒ವ ಸ-ನ್ಬ್ರಹ್ಮಾ॒ಪ್ಯೇತಿ॒ ಯ ಏ॒ವಂ-ವೇಁದ॑ ॥ 2 ॥

ಅನುವಾಕಂ 3
ಯ-ದ್ದೇ॑ವಾ ದೇವ॒ಹೇಡ॑ನಂ॒ (ದೇವ॒ಹೇಳ॑ನಂ॒) ದೇವಾ॑ಸಶ್ಚಕೃ॒ಮಾ ವ॒ಯಮ್ ।
ಆದಿ॑ತ್ಯಾ॒ಸ್ತಸ್ಮಾ᳚ನ್ಮಾ ಮುಞ್ಚತ॒ರ್ತಸ್ಯ॒ರ್ತೇನ॒ ಮಾಮಿ॒ತ ॥
ದೇವಾ॑ ಜೀವನಕಾ॒ಮ್ಯಾ ಯ-ದ್ವಾ॒ಚಾ-ಽನೃ॑ತಮೂದಿ॒ಮ ।
ತಸ್ಮಾ᳚ನ್ನ ಇ॒ಹ ಮು॑ಞ್ಚತ॒ ವಿಶ್ವೇ॑ ದೇವಾ-ಸ್ಸ॒ಜೋಷ॑ಸಃ ॥
ಋ॒ತೇನ॑ ದ್ಯಾವಾಪೃಥಿವೀ ಋ॒ತೇನ॒ ತ್ವಗ್ಂ ಸ॑ರಸ್ವತಿ ।
ಕೃ॒ತಾನ್ನಃ॑ ಪಾ॒ಹ್ಯೇನ॑ಸೋ॒ ಯ-ತ್ಕಿಞ್ಚಾನೃ॑ತಮೂದಿ॒ಮ ॥
ಇ॒ನ್ದ್ರಾ॒ಗ್ನೀ ಮಿ॒ತ್ರಾವರು॑ಣೌ॒ ಸೋಮೋ॑ ಧಾ॒ತಾ ಬೃಹ॒ಸ್ಪತಿಃ॑ ।
ತೇ ನೋ॑ ಮುಞ್ಚ॒ನ್ತ್ವೇನ॑ಸೋ॒ ಯದ॒ನ್ಯಕೃ॑ತಮಾರಿ॒ಮ ॥
ಸ॒ಜಾ॒ತ॒ಶ॒ಗ್ಂ॒ಸಾದು॒ತ ಜಾ॑ಮಿಶ॒ಗ್ಂ॒ ಸಾಜ್ಜ್ಯಾಯ॑ಸ॒-ಶ್ಶಗ್ಂಸಾ॑ದು॒ತ ವಾ॒ ಕನೀ॑ಯಸಃ ।
ಅನಾ॑ಧೃಷ್ಟ-ನ್ದೇ॒ವಕೃ॑ತಂ॒-ಯಁದೇನ॒ಸ್ತಸ್ಮಾ॒-ತ್ತ್ವಮ॒ಸ್ಮಾ-ಞ್ಜಾ॑ತವೇದೋ ಮುಮುಗ್ಧಿ ॥
ಯದ್ವಾ॒ಚಾ ಯ-ನ್ಮನ॑ಸಾ ಬಾ॒ಹುಭ್ಯಾ॑-ಮೂ॒ರುಭ್ಯಾ॑ಮಷ್ಠೀ॒ವದ್ಭ್ಯಾ॑ ಶಿ॒ಶ್ನೈರ್ಯದನೃ॑ತ-ಞ್ಚಕೃ॒ಮಾ ವ॒ಯಮ್ ।
ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಾ॒ ಗಾರ್​ಹ॑ಪತ್ಯಃ॒ ಪ್ರಮು॑ಞ್ಚತು ಚಕೃ॒ಮ ಯಾನಿ॑ ದುಷ್ಕೃ॒ತಾ ॥
ಯೇನ॑ ತ್ರಿ॒ತೋ ಅ॑ರ್ಣ॒ವಾ-ನ್ನಿ॑ರ್ಬ॒ಭೂವ॒ ಯೇನ॒ ಸೂರ್ಯ॒-ನ್ತಮ॑ಸೋ ನಿರ್ಮು॒ಮೋಚ॑ ।
ಯೇನೇನ್ದ್ರೋ॒ ವಿಶ್ವಾ॒ ಅಜ॑ಹಾ॒ದರಾ॑ತೀ॒ಸ್ತೇನಾ॒ಹ-ಞ್ಜ್ಯೋತಿ॑ಷಾ॒ ಜ್ಯೋತಿ॑ರಾನಶಾ॒ನ ಆ᳚ಖ್ಷಿ ॥
ಯ-ತ್ಕುಸೀ॑ದ॒ಮಪ್ರ॑ತೀತ್ತ॒-ಮ್ಮಯೇ॒ಹ ಯೇನ॑ ಯ॒ಮಸ್ಯ॑ ನಿ॒ಧಿನಾ॒ ಚರಾ॑ಮಿ ।
ಏ॒ತತ್ತದ॑ಗ್ನೇ ಅನೃ॒ಣೋ ಭ॑ವಾಮಿ॒ ಜೀವ॑ನ್ನೇ॒ವ ಪ್ರತಿ॒ ತತ್ತೇ॑ ದಧಾಮಿ ॥
ಯನ್ಮಯಿ॑ ಮಾ॒ತಾ ಗರ್ಭೇ॑ ಸ॒ತಿ । ಏನ॑ಶ್ಚ॒ಕಾರ॒ ಯತ್ಪಿ॒ತಾ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥ ಯದಾ॑ ಪಿ॒ಪೇಷ॑ ಮಾ॒ತರ॑-ಮ್ಪಿ॒ತರ᳚ಮ್ । ಪು॒ತ್ರಃ ಪ್ರಮು॑ದಿತೋ॒ ಧಯನ್ನ್॑ । ಅಹಿಗ್ಂ॑ಸಿತೌ ಪಿ॒ತರೌ॒ ಮಯಾ॒ ತತ್ । ತದ॑ಗ್ನೇ ಅನೃ॒ಣೋ ಭ॑ವಾಮಿ ॥ ಯದ॒ನ್ತರಿ॑ಖ್ಷ-ಮ್ಪೃಥಿ॒ವೀಮು॒ತ ದ್ಯಾಮ್ । ಯನ್ಮಾ॒ತರ॑-ಮ್ಪಿ॒ತರಂ॑-ವಾಁ ಜಿಹಿಗ್ಂಸಿ॒ಮ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥
ಯದಾ॒ಶಸಾ॑ ನಿ॒ಶಸಾ॒ ಯತ್ಪ॑ರಾ॒ಶಸಾ᳚ । ಯದೇನ॑ಶ್ಚ ಕೃ॒ಮಾ ನೂತ॑ನಂ॒-ಯಁತ್ಪು॑ರಾ॒ಣಮ್ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥ ಅತಿ॑ಕ್ರಾಮಾಮಿ ದುರಿ॒ತಂ-ಯಁದೇನಃ॑ । ಜಹಾ॑ಮಿ ರಿ॒ಪ್ರ-ಮ್ಪ॑ರ॒ಮೇ ಸ॒ಧಸ್ಥೇ᳚ । ಯತ್ರ॒ ಯನ್ತಿ॑ ಸು॒ಕೃತೋ॒ ನಾಪಿ॑ ದು॒ಷ್ಕೃತಃ॑ । ತಮಾರೋ॑ಹಾಮಿ ಸು॒ಕೃತಾ॒-ನ್ನು ಲೋ॒ಕಮ್ ॥ ತ್ರಿ॒ತೇ ದೇ॒ವಾ ಅ॑ಮೃಜತೈ॒-ತದೇನಃ॑ । ತ್ರಿ॒ತ ಏ॒ತನ್ಮ॑ನು॒ಷ್ಯೇ॑ಷು ಮಾಮೃಜೇ । ತತೋ॑ ಮಾ॒ ಯದಿ॒ ಕಿಞ್ಚಿ॑ದಾನ॒ಶೇ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥
ದಿ॒ವಿ ಜಾ॒ತಾ ಅ॒ಫ್ಸು ಜಾ॒ತಾಃ । ಯಾ ಜಾ॒ತಾ ಓಷ॑ಧೀಭ್ಯಃ । ಅಥೋ॒ ಯಾ ಅ॑ಗ್ನಿ॒ಜಾ ಆಪಃ॑ । ತಾ ನ॑-ಶ್ಶುನ್ಧನ್ತು॒ ಶುನ್ಧ॑ನೀಃ ॥ ಯದಾಪೋ॒ ನಕ್ತ॑-ನ್ದುರಿ॒ತ-ಞ್ಚರಾ॑ಮ । ಯದ್ವಾ॒ ದಿವಾ॒ ನೂತ॑ನಂ॒-ಯಁತ್ಪು॑ರಾ॒ಣಮ್ । ಹಿರ॑ಣ್ಯ-ವರ್ಣಾ॒ಸ್ತತ॒ ಉತ್ಪು॑ನೀತ ನಃ ॥ ಇ॒ಮ-ಮ್ಮೇ॑ ವರುಣ ಶ್ರುಧೀ॒ ಹವ॑ಮ॒ದ್ಯಾ ಚ॑ ಮೃಡಯ । ತ್ವಾಮ॑ವ॒ಸ್ಯುರಾ ಚ॑ಕೇ ॥
ತತ್ತ್ವಾ॑ ಯಾಮಿ॒ ಬ್ರಹ್ಮ॑ಣಾ॒ ವನ್ದ॑ಮಾನ॒-ಸ್ತದಾ ಶಾ᳚ಸ್ತೇ॒ ಯಜ॑ಮಾನೋ ಹ॒ವಿರ್ಭಿಃ॑ । ಅಹೇ॑ಡಮಾನೋ ವರುಣೇ॒ಹ ಬೋ॒ದ್ಧ್ಯುರು॑ಶಸ॒ ಮಾ ನ॒ ಆಯುಃ॒ ಪ್ರಮೋ॑ಷೀಃ ॥ ತ್ವ-ನ್ನೋ॑ ಅಗ್ನೇ॒ ವರು॑ಣಸ್ಯ ವಿ॒ದ್ವಾ-ನ್ದೇ॒ವಸ್ಯ॒ ಹೇಡೋ-ಽವ॑ ಯಾಸಿ ಸೀಷ್ಠಾಃ । ಯಜಿ॑ಷ್ಠೋ॒ ವಹ್ನಿ॑ ತಮ॒-ಶ್ಶೋಶು॑ಚಾನೋ॒ ವಿಶ್ವಾ॒ ದ್ವೇಷಾ॑ಸಿ॒ ಪ್ರಮು॑ಮುಗ್ಧ್ಯ॒ಸ್ಮತ್ ॥ ಸ ತ್ವನ್ನೋ॑ ಅಗ್ನೇ-ಽವ॒ಮೋ ಭ॑ವೋ॒ತೀ ನೇದಿ॑ಷ್ಠೋ ಅ॒ಸ್ಯಾ ಉ॒ಷಸೋ॒ ವ್ಯು॑ಷ್ಟೌ । ಅವ॑ ಯಖ್ಷ್ವ ನೋ॒ ವರು॑ಣ॒ ರರಾ॑ಣೋ ವೀ॒ಹಿ ಮೃ॑ಡೀ॒ಕ ಸು॒ಹವೋ॑ ನ ಏಧಿ ॥ ತ್ವಮ॑ಗ್ನೇ ಅ॒ಯಾ-ಽಸಿ॑ । ಅ॒ಯಾ ಸನ್ಮನ॑ಸಾ ಹಿ॒ತಃ । ಅ॒ಯಾ ಸನಃಅ॒ವ್ಯಮೂ॑ಹಿಷೇ । ಅ॒ಯಾ ನೋ॑ ಧೇಹಿ ಭೇಷ॒ಜಮ್ । ಇ॒ಷ್ಟೋ ಅ॒ಗ್ನಿರಾಹು॑ತಃ । ಸ್ವಾಹಾ॑ಕೃತಃ ಪಿಪರ್ತು ನಃ । ಸ್ವ॒ಗಾ ದೇ॒ವೇಭ್ಯ॑ ಇ॒ದ-ನ್ನಮಃ॑ ॥ 3 ॥
(ಮು॒ಮು॒ಗ್ಧಿ॒ ಸ॒ಪ್ತ ಚ॑) (ಅ. 3)

ಅನುವಾಕಂ 4
ಯದದೀ᳚ವ್ಯನ್ನೃ॒ಣಮ॒ಹ-ಮ್ಬ॒ಭೂವಾದಿ॑-ಥ್ಸನ್ವಾ ಸಞ್ಜ॒ಗರ॒ ಜನೇ᳚ಭ್ಯಃ । ಅ॒ಗ್ನಿರ್ಮಾ॒ ತಸ್ಮಾ॒ದಿನ್ದ್ರ॑ಶ್ಚ ಸಂ​ವಿಁದಾ॒ನೌ ಪ್ರಮು॑ಞ್ಚತಾಮ್ ॥ ಯದ್ಧಸ್ತಾ᳚ಭ್ಯಾ-ಞ್ಚ॒ಕರ॒ ಕಿಲ್ಬಿ॑ಷಾಣ್ಯ॒ಖ್ಷಾಣಾಂ᳚-ವಁ॒ಗ್ನುಮು॑ಪ॒ಜಿಘ್ನ॑ಮಾನಃ ।
ಉ॒ಗ್ರ॒ಮ್ಪ॒ಶ್ಯಾ ಚ॑ ರಾಷ್ಟ್ರ॒ಭೃಚ್ಚ॒ ತಾನ್ಯ॑ಫ್ಸ॒ರಸಾ॒ ವನು॑ದತ್ತಾ-ಮೃ॒ಣಾನಿ॑ ॥ ಉಗ್ರ॑ಪಂಶ್ಯೇ॒ ರಾಷ್ಟ್ರ॑ಭೃ॒-ತ್ಕಿಲ್ಬಿ॑ಷಾಣಿ॒ ಯದ॒ಖ್ಷವೃ॑ತ್ತ॒ಮನು॑ದತ್ತಮೇ॒ತತ್ ।
ನೇನ್ನ॑ ಋ॒ಣಾನೃ॒ಣವ॒ ಇಥ್ಸ॑ಮಾನೋ ಯ॒ಮಸ್ಯ॑ ಲೋ॒ಕೇ ಅಧಿ॑ ರಜ್ಜು॒ರಾಯ॑ ॥ ಅವ॑ ತೇ॒ ಹೇಡೋ॑ ವರುಣ॒ ನಮೋ॑ಭಿ॒ರವ॑ ಯ॒ಜ್ಞೇಭಿ॑ರೀಮಹೇ ಹ॒ವಿರ್ಭಿಃ॑ । ಖ್ಷಯ॑ನ್ನ॒ಸ್ಮಭ್ಯ॑ಮಸುರ ಪ್ರಚೇತೋ॒ ರಾಜ॒ನ್ನೇನಾಗ್ಂ॑ಸಿ ಶಿಶ್ರಥಃ ಕೃ॒ತಾನಿ॑ ॥ ಉದು॑ತ್ತ॒ಮಂ-ವಁ॑ರುಣ॒ ಪಾಶ॑ಮ॒ಸ್ಮದವಾ॑-ಽಧ॒ಮಂ-ವಿಁಮ॑ದ್ಧ್ಯ॒ಮಗ್ಗ್​ ಶ್ರ॑ಥಾಯ । ಅಥಾ॑ ವ॒ಯಮಾ॑ದಿತ್ಯ ವ್ರ॒ತೇ ತವಾ-ಽನಾ॑ಗಸೋ॒ ಅದಿ॑ತಯೇ ಸ್ಯಾಮ ॥ ಇ॒ಮ-ಮ್ಮೇ॑ ವರುಣ ಶ್ರುಧೀ॒ ಹವ॑ಮ॒ದ್ಯಾ ಚ॑ ಮೃಡಯ । ತ್ವಾಮ॑ವ॒ಸ್ಯುರಾ ಚ॑ಕೇ ॥
ತತ್ತ್ವಾ॑ ಯಾಮಿ॒ ಬ್ರಹ್ಮ॑ಣಾ॒ ವನ್ದ॑ಮಾನ॒-ಸ್ತದಾ ಶಾ᳚ಸ್ತೇ॒ ಯಜ॑ಮಾನೋ ಹ॒ವಿರ್ಭಿಃ॑ । ಅಹೇ॑ಡಮಾನೋ ವರುಣೇ॒ಹ ಬೋ॒ದ್ಧ್ಯುರು॑ಶಸ॒ ಮಾ ನ॒ ಆಯುಃ॒ ಪ್ರಮೋ॑ಷೀಃ ॥ ತ್ವ-ನ್ನೋ॑ ಅಗ್ನೇ॒ ವರು॑ಣಸ್ಯ ವಿ॒ದ್ವಾ-ನ್ದೇ॒ವಸ್ಯ॒ ಹೇಡೋ-ಽವ॑ ಯಾಸಿ ಸೀಷ್ಠಾಃ । ಯಜಿ॑ಷ್ಠೋ॒ ವಹ್ನಿ॑ ತಮ॒-ಶ್ಶೋಶು॑ಚಾನೋ॒ ವಿಶ್ವಾ॒ ದ್ವೇಷಾ॑ಸಿ॒ ಪ್ರಮು॑ಮುಗ್ಧ್ಯ॒ಸ್ಮತ್ ॥ ಸ ತ್ವನ್ನೋ॑ ಅಗ್ನೇ-ಽವ॒ಮೋ ಭ॑ವೋ॒ತೀ ನೇದಿ॑ಷ್ಠೋ ಅ॒ಸ್ಯಾ ಉ॒ಷಸೋ॒ ವ್ಯು॑ಷ್ಟೌ । ಅವ॑ ಯಖ್ಷ್ವ ನೋ॒ ವರು॑ಣ॒ ರರಾ॑ಣೋ ವೀ॒ಹಿ ಮೃ॑ಡೀ॒ಕ ಸು॒ಹವೋ॑ ನ ಏಧಿ ॥ ಸಙ್ಕು॑ಸುಕೋ॒ ವಿಕು॑ಸುಕೋ ನಿರ್-ಋ॒ಥೋ ಯಶ್ಚ॑ ನಿಸ್ವ॒ನಃ । ತೇ-ಽ(1॒)ಸ್ಮ-ದ್ಯಖ್ಷ್ಮ॒ಮನಾ॑ಗಸೋ ದೂ॒ರಾ-ದ್ದೂ॒ರಮ॑ಚೀಚತಮ್ ॥ ನಿರ್ಯ॑ಖ್ಷ್ಮಮಚೀಚತೇ ಕೃ॒ತ್ಯಾ-ನ್ನಿರ್-ಋ॑ತಿ-ಞ್ಚ । ತೇನ॒ ಯೋ-ಽ(1॒)ಸ್ಮಥ್ಸಮೃ॑ಚ್ಛಾತೈ॒ ತಮ॑ಸ್ಮೈ॒ ಪ್ರಸು॑ವಾಮಸಿ ॥ ದು॒ಶ್ಶ॒ಗ್ಂ॒ಸಾ॒ನು॒ಶ॒ಗ್ಂ॒ಸಾಭ್ಯಾ᳚-ಙ್ಘ॒ಣೇನಾ॑ನುಘ॒ಣೇನ॑ ಚ । ತೇನಾ॒ನ್ಯೋ-ಽ(1)॒ಸ್ಮ-ಥ್ಸಮೃ॑ಚ್ಛಾತೈ॒ ತಮ॑ಸ್ಮೈ॒ ಪ್ರಸು॑ವಾಮಸಿ ॥
ಸಂ​ವಁರ್ಚ॑ಸಾ॒ ಪಯ॑ಸಾ॒ ಸನ್ತ॒ನೂಭಿ॒ರಗ॑ನ್ಮಹಿ॒ ಮನ॑ಸಾ॒ ಸಗ್ಂ ಶಿ॒ವೇನ॑ । ತ್ವಷ್ಟಾ॑ ನೋ॒ ಅತ್ರ॒ ವಿದ॑ಧಾತು ರಾ॒ಯೋ-ಽನು॑ಮಾರ್​ಷ್ಟು ತ॒ನ್ವೋ(1॒) ಯ-ದ್ವಿಲಿ॑ಷ್ಟಮ್ ॥ 4 ॥
(ಕೃ॒ತ್ಯಾ-ನ್ನಿರ್-ಋ॑ತಿ-ಞ್ಚ॒ ಪಞ್ಚ॑ ಚ) (ಅ. 4)

ಅನುವಾಕಂ 5
ಆಯು॑ಷ್ಟೇ ವಿ॒ಶ್ವತೋ॑ ದಧದ॒ಯಮ॒ಗ್ನಿರ್ವರೇ᳚ಣ್ಯಃ ।
ಪುನ॑ಸ್ತೇ ಪ್ರಾ॒ಣ ಆಯಾ॑ತಿ॒ ಪರಾ॒ ಯಖ್ಷ್ಮಗ್ಂ॑ ಸುವಾಮಿ ತೇ ॥
ಆ॒ಯು॒ರ್ದಾ ಅ॑ಗ್ನೇ ಹ॒ವಿಷೋ॑ ಜುಷಾ॒ಣೋ ಘೃ॒ತಪ್ರ॑ತೀಕೋ ಘೃ॒ತಯೋ॑ನಿರೇಧಿ । ಘೃ॒ತ-ಮ್ಪೀ॒ತ್ವಾ ಮಧು॒ ಚಾರು॒ ಗವ್ಯ॑-ಮ್ಪಿ॒ತೇವ॑ ಪು॒ತ್ರಮ॒ಭಿ ರ॑ಖ್ಷತಾದಿ॒ಮಮ್ ॥
ಇ॒ಮಮ॑ಗ್ನ॒ ಆಯು॑ಷೇ॒ ವರ್ಚ॑ಸೇ ಕೃಧಿ ತಿ॒ಗ್ಮಮೋಜೋ॑ ವರುಣ॒ ಸಗ್ಂಶಿ॑ಶಾಧಿ । ಮಾ॒ತೇವಾ᳚ಸ್ಮಾ ಅದಿತೇ॒ ಶರ್ಮ॑ ಯಚ್ಛ॒ ವಿಶ್ವೇ॑ ದೇವಾ॒ ಜರ॑ದಷ್ಟಿ॒-ರ್ಯಥಾ-ಽಸ॑ತ್ ॥
ಅಗ್ನ॒ ಆಯೂಗ್ಂ॑ಷಿ ಪವಸ॒ ಆಸು॒ವೋರ್ಜ॒ಮಿಷ॑-ಞ್ಚ ನಃ ।
ಆ॒ರೇ ಬಾ॑ಧಸ್ವ ದು॒ಚ್ಛುನಾ᳚ಮ್ ॥ ಅಗ್ನೇ॒ ಪವ॑ಸ್ವ॒ ಸ್ವಪಾ॑ ಅ॒ಸ್ಮೇ ವರ್ಚ॑-ಸ್ಸು॒ವೀರ್ಯ᳚ಮ್ । ದಧ॑-ದ್ರ॒ಯಿ-ಮ್ಮಯಿ॒ ಪೋಷ᳚ಮ್ ॥ 5.1ಅ ॥
ಅ॒ಗ್ನಿರ್-ಋಷಿಃ॒ ಪವ॑ಮಾನಃ॒ ಪಾಞ್ಚ॑ಜನ್ಯಃ ಪು॒ರೋಹಿ॑ತಃ । ತಮೀ॑ಮಹೇ ಮಹಾಗ॒ಯಮ್ ॥ ಅಗ್ನೇ॑ ಜಾ॒ತಾ-ನ್ಪ್ರಣು॑ದಾ ನ-ಸ್ಸ॒ಪತ್ನಾ॒-ನ್ಪ್ರತ್ಯಜಾ॑ತಾಞ್ಜಾತವೇದೋ ನುದಸ್ವ ।
ಅ॒ಸ್ಮೇ ದೀ॑ದಿಹಿ ಸು॒ಮನಾ॒ ಅಹೇ॑ಡ॒ಞ್ಛರ್ಮ॑ನ್ತೇ (ಅಹೇ॑ಳ॒ಞ್ಛರ್ಮ॑ನ್ತೇ) ಸ್ಯಾಮ ತ್ರಿ॒ವರೂ॑ಥ ಉ॒ದ್ಭೌ ॥
ಸಹ॑ಸಾ ಜಾ॒ತಾ-ನ್ಪ್ರಣು॑ದಾ ನ-ಸ್ಸ॒ಪತ್ನಾ॒-ನ್ಪ್ರತ್ಯಜಾ॑ತಾಞ್ಜಾತವೇದೋ ನುದಸ್ವ । ಅಧಿ॑ ನೋ ಬ್ರೂಹಿ ಸುಮನ॒ಸ್ಯಮಾ॑ನೋ ವ॒ಯಗ್ಗ್​ ಸ್ಯಾ॑ಮ॒ ಪ್ರಣು॑ದಾ ನ-ಸ್ಸ॒ಪತ್ನಾನ್॑ ॥ ಅಗ್ನೇ॒ ಯೋ ನೋ॒-ಽಭಿತೋ॒ ಜನೋ॒ ವೃಕೋ॒ ವಾರೋ॒ ಜಿಘಾಗ್ಂ॑ಸತಿ । ತಾಗ್​ಸ್ತ್ವಂ-ವೃಁ॑ತ್ರಹಞ್ಜಹಿ॒ ವಸ್ವ॒ಸ್ಮಭ್ಯ॒ಮಾ ಭ॑ರ ॥ ಅಗ್ನೇ॒ ಯೋ ನೋ॑-ಽಭಿ॒ದಾಸ॑ತಿ ಸಮಾ॒ನೋ ಯಶ್ಚ॒ ನಿಷ್ಟ್ಯಃ॑ । ತಂ-ವಁ॒ಯಗ್ಂ ಸ॒ಮಿಧ॑-ಙ್ಕೃ॒ತ್ವಾ ತುಭ್ಯ॑ಮ॒ಗ್ನೇ-ಽಪಿ॑ದದ್ಧ್ಮಸಿ ॥ 5.1ಬ್ ॥

ಯೋ ನ॒-ಶ್ಶಪಾ॒ದಶ॑ಪತೋ॒ ಯಶ್ಚ॑ ನ॒-ಶ್ಶಪ॑ತ॒-ಶ್ಶಪಾ᳚ತ್ ।
ಉ॒ಷಾಶ್ಚ॒ ತಸ್ಮೈ॑ ನಿ॒ಮ್ರುಕ್ಚ॒ ಸರ್ವ॑-ಮ್ಪಾ॒ಪಗ್ಂ ಸಮೂ॑ಹತಾಮ್ ॥
ಯೋ ನ॑-ಸ್ಸ॒ಪತ್ನೋ॒ ಯೋ ರಣೋ॒ ಮರ್ತೋ॑-ಽಭಿ॒ದಾಸ॑ತಿ ದೇವಾಃ ।
ಇ॒ದ್ಧ್ಮಸ್ಯೇ॑ವ ಪ್ರ॒ಖ್ಷಾಯ॑ತೋ॒ ಮಾ ತಸ್ಯೋಚ್ಛೇ॑ಷಿ॒ ಕಿಞ್ಚ॒ನ ॥ ಯೋ ಮಾನ್ದ್ವೇಷ್ಟಿ॑ ಜಾತವೇದೋ॒ ಯ-ಞ್ಚಾ॒ಹ-ನ್ದ್ವೇಷ್ಮಿ॒ ಯಶ್ಚ॒ ಮಾಮ್ । ಸರ್ವಾ॒ಗ್॒ಸ್ತಾನ॑ಗ್ನೇ॒ ಸನ್ದ॑ಹ॒ ಯಾಗ್​ಶ್ಚಾ॒ಹ-ನ್ದ್ವೇಷ್ಮಿ॒ ಯೇ ಚ॒ ಮಾಮ್ ॥ ಯೋ ಅ॒ಸ್ಮಭ್ಯ॑ಮರಾತೀ॒ಯಾ-ದ್ಯಶ್ಚ॑ ನೋ॒ ದ್ವೇಷ॑ತೇ॒ ಜನಃ॑ । ನಿನ್ದಾ॒ದ್ಯೋ ಅ॒ಸ್ಮಾ-ನ್ದಿಫ್ಸಾ᳚ಚ್ಚ॒ ಸರ್ವಾ॒ಗ್॒ಸ್ತಾನ್ಮ॑ಷ್ಮ॒ಷಾ ಕು॑ರು ॥
ಸಗ್ಂಶಿ॑ತ-ಮ್ಮೇ॒ ಬ್ರಹ್ಮ॒ ಸಗ್ಂಶಿ॑ತಂ-ವೀಁ॒ರ್ಯಾಂ (1॒) ಬಲ᳚ಮ್ । ಸಗ್ಂಶಿ॑ತ-ಙ್ಖ್ಷ॒ತ್ರ-ಮ್ಮೇ॑ ಜಿ॒ಷ್ಣು ಯಸ್ಯಾ॒ಹಮಸ್ಮಿ॑ ಪು॒ರೋಹಿ॑ತಃ ॥
ಉದೇ॑ಷಾ-ಮ್ಬಾ॒ಹೂ ಅ॑ತಿರ॒ಮು-ದ್ವರ್ಚೋ॒ ಅಥೋ॒ ಬಲ᳚ಮ್ ।
ಖ್ಷಿ॒ಣೋಮಿ॒ ಬ್ರಹ್ಮ॑ಣಾ॒-ಽಮಿತ್ರಾ॒ನುನ್ನ॑ಯಾಮಿ॒ ಸ್ವಾಁ(2) ಅ॒ಹಮ್ ॥ ಪುನ॒ರ್ಮನಃ॒ ಪುನ॒ರಾಯು॑ರ್ಮ॒ ಆಗಾ॒-ತ್ಪುನ॒ಶ್ಚಖ್ಷುಃ॒ ಪುನ॒-ಶ್ಶ್ರೋತ್ರ॑-ಮ್ಮ॒ ಆಗಾ॒ತ್
ಪುನಃ॑ ಪ್ರಾ॒ಣಃ ಪುನ॒ರಾಧೀ॑ತ-ಮ್ಮ॒ ಆಗಾ᳚ತ್ ।
ವೈ॒ಶ್ವಾ॒ನ॒ರೋ ಮೇ-ಽದ॑ಬ್ಧಸ್ತನೂ॒ಪಾ ಅವ॑ಬಾಧತಾ-ನ್ದುರಿ॒ತಾನಿ॒ ವಿಶ್ವಾ᳚ ॥ 5.1ಚ್ ॥
(ಪೋಷಂ॑ - ದದ್ಧ್ಮಸಿ - ಪು॒ರೋಹಿ॑ತಶ್ಚ॒ತ್ವಾರಿ॑ ಚ) (ಅ. 5)

ಅನುವಾಕಂ 6
ವೈ॒ಶ್ವಾ॒ನ॒ರಾಯ॒ ಪ್ರತಿ॑ವೇದಯಾಮೋ॒ ಯದೀ॑ನೃ॒ಣಗ್ಂ ಸ॑ಙ್ಗ॒ರೋ ದೇ॒ವತಾ॑ಸು । ಸ ಏ॒ತಾ-ನ್ಪಾಶಾ᳚-ನ್ಪ್ರ॒ಮುಚ॒-ನ್ಪ್ರವೇ॑ದ॒ ಸ ನೋ॑ ಮುಞ್ಚಾತು ದುರಿ॒ತಾದವ॒ದ್ಯಾತ್ ॥
ವೈ॒ಶ್ವಾ॒ನ॒ರಃ ಪವ॑ಯಾನ್ನಃ ಪ॒ವಿತ್ರೈ॒ರ್ಯ-ಥ್ಸ॑ಙ್ಗ॒ರ-ಮ॒ಭಿಧಾವಾ᳚ಮ್ಯಾ॒ಶಾಮ್ । ಅನಾ॑ಜಾನ॒-ನ್ಮನ॑ಸಾ॒ ಯಾಚ॑ಮಾನೋ॒ ಯದತ್ರೈನೋ॒ ಅವ॒ ತ-ಥ್ಸು॑ವಾಮಿ ॥
ಅ॒ಮೀ ಯೇ ಸು॒ಭಗೇ॑ ದಿ॒ವಿ ವಿ॒ಚೃತೌ॒ ನಾಮ॒ ತಾರ॑ಕೇ ।
ಪ್ರೇಹಾಮೃತ॑ಸ್ಯ ಯಚ್ಛತಾ-ಮೇ॒ತ-ದ್ಬ॑ದ್ಧಕ॒ಮೋಚ॑ನಮ್ ॥
ವಿಜಿ॑ಹೀರ್​ಷ್ವ ಲೋ॒ಕಾನ್ ಕೃ॑ಧಿ ಬ॒ನ್ಧಾ-ನ್ಮು॑ಞ್ಚಾಸಿ॒ ಬದ್ಧ॑ಕಮ್ । ಯೋನೇ॑ರಿವ॒ ಪ್ರಚ್ಯು॑ತೋ॒ ಗರ್ಭ॒-ಸ್ಸರ್ವಾ᳚-ನ್ಪ॒ಥೋ ಅ॑ನುಷ್ವ ॥
ಸ ಪ್ರ॑ಜಾ॒ನ-ನ್ಪ್ರತಿ॑ಗೃಭ್ಣೀತ ವಿ॒ದ್ವಾ-ನ್ಪ್ರ॒ಜಾಪ॑ತಿಃ ಪ್ರಥಮ॒ಜಾ ಋ॒ತಸ್ಯ॑ । ಅ॒ಸ್ಮಾಭಿ॑ರ್ದ॒ತ್ತ-ಞ್ಜ॒ರಸಃ॑ ಪ॒ರಸ್ತಾ॒ದಚ್ಛಿ॑ನ್ನ॒-ನ್ತನ್ತು॑ಮನು॒ ಸಞ್ಚ॑ರೇಮ ॥ 6.1ಅ ॥

ತ॒ತ-ನ್ತನ್ತು॒ಮನ್ವೇಕೇ॒ ಅನು॒ ಸಞ್ಚ॑ರನ್ತಿ॒ ಯೇಷಾ᳚-ನ್ದ॒ತ್ತ-ಮ್ಪಿತ್ರ್ಯ॒ಮಾಯ॑ನವತ್ । ಅ॒ಬ॒ನ್ಧ್ವೇಕೇ॒ ದದ॑ತಃ ಪ್ರ॒ಯಚ್ಛಾ॒-ದ್ದಾತು॒ಚ್ಚೇ-ಚ್ಛ॒ಕ್ನವಾ॒ಗ್ಂ॒ ಸ-ಸ್ಸ್ವ॒ರ್ಗ ಏ॑ಷಾಮ್ ॥
ಆರ॑ಭೇಥಾ॒ಮನು॒ ಸಗ್ಂರ॑ಭೇಥಾಗ್ಂ ಸಮಾ॒ನ-ಮ್ಪನ್ಥಾ॑ಮವಥೋ ಘೃ॒ತೇನ॑ । ಯದ್ವಾ᳚-ಮ್ಪೂ॒ರ್ತ-ಮ್ಪರಿ॑ವಿಷ್ಟಂ॒-ಯಁದ॒ಗ್ನೌ ತಸ್ಮೈ॒ ಗೋತ್ರಾ॑ಯೇ॒ಹ ಜಾಯಾ॑ಪತೀ॒ ಸಗ್ಂರ॑ಭೇಥಾಮ್ ॥ ಯದ॒ನ್ತರಿ॑ಖ್ಷ-ಮ್ಪೃಥಿ॒ವೀಮು॒ತ ದ್ಯಾಂ-ಯಁನ್ಮಾ॒ತರ॑-ಮ್ಪಿ॒ತರಂ॑-ವಾಁ ಜಿಹಿಗ್ಂಸಿ॒ಮ ।
ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸೋ॒ ಗಾರ್​ಹ॑ಪತ್ಯ॒ ಉನ್ನೋ॑ ನೇಷ-ದ್ದುರಿ॒ತಾ ಯಾನಿ॑ ಚಕೃ॒ಮ ॥ ಭೂಮಿ॑ರ್ಮಾ॒ತಾ-ಽದಿ॑ತಿರ್ನೋ ಜ॒ನಿತ್ರ॒-ಮ್ಭ್ರಾತಾ॒ನ್ತರಿ॑ಖ್ಷ-ಮ॒ಭಿಶ॑ಸ್ತ ಏನಃ ।
ದ್ಯೌರ್ನಃ॑ ಪಿ॒ತಾ ಪಿ॑ತೃ॒ಯಾಚ್ಛ-ಮ್ಭ॑ವಾಸಿ ಜಾ॒ಮಿ ಮಿ॒ತ್ವಾ ಮಾ ವಿ॑ವಿಥ್ಸಿ ಲೋ॒ಕಾತ್ ॥ ಯತ್ರ॑ ಸು॒ಹಾರ್ದ॑-ಸ್ಸು॒ಕೃತೋ॒ ಮದ॑ನ್ತೇ ವಿ॒ಹಾಯ॒ ರೋಗ॑-ನ್ತ॒ನ್ವಾ(1)॒ಗ್ಗ್॒ ಸ್ವಾಯಾ᳚ಮ್ ।
ಅ॒ಶ್ಲೋ॒ಣಾಙ್ಗೈ॒ರಹ್ರು॑ತಾ-ಸ್ಸ್ವ॒ರ್ಗೇ ತತ್ರ॑ ಪಶ್ಯೇಮ ಪಿ॒ತರ॑-ಞ್ಚ ಪು॒ತ್ರಮ್ ॥ ಯದನ್ನ॒ಮದ್ಮ್ಯನೃ॑ತೇನ ದೇವಾ ದಾ॒ಸ್ಯನ್ನದಾ᳚ಸ್ಯನ್ನು॒ತ ವಾ॑ ಕರಿ॒ಷ್ಯನ್ನ್ ।
ಯ-ದ್ದೇ॒ವಾನಾ॒-ಞ್ಚಖ್ಷು॒ಷ್ಯಾಗೋ॒ ಅಸ್ತಿ॒ ಯದೇ॒ವ ಕಿಞ್ಚ॑ ಪ್ರತಿಜಗ್ರಾ॒ಹಮ॒ಗ್ನಿರ್ಮಾ॒ ತಸ್ಮಾ॑ದನೃ॒ಣ-ಙ್ಕೃ॑ಣೋತು ॥
ಯದನ್ನ॒ಮದ್ಮಿ॑ ಬಹು॒ಧಾ ವಿರೂ॑ಪಂ॒-ವಾಁಸೋ॒ ಹಿರ॑ಣ್ಯಮು॒ತ ಗಾಮ॒ಜಾಮವಿ᳚ಮ್ ।
ಯ-ದ್ದೇ॒ವಾನಾ॒-ಞ್ಚಖ್ಷು॒ಷ್ಯಾಗೋ॒ ಅಸ್ತಿ॒ ಯದೇ॒ವ ಕಿಞ್ಚ॑ ಪ್ರತಿಜಗ್ರಾ॒ಹಮ॒ಗ್ನಿರ್ಮಾ॒ ತಸ್ಮಾ॑ದನೃ॒ಣ-ಙ್ಕೃ॑ಣೋತು ॥
ಯ॒ನ್ಮಯಾ॑ ಮನ॑ಸಾ ವಾ॒ಚಾ॒ ಕೃ॒ತ॒ಮೇನಃ॑ ಕದಾ॒ಚನ ।
ಸರ್ವಸ್ಮಾ᳚-ನ್ಮೇಡಿ॑ತೋ (ಮೇಳ॑ತಾ) ಮೋ॒ಗ್ಧಿ॒ ತ್ವಗ್ಂ ಹಿ
ವೇತ್ಥ॑ ಯಥಾತ॒ಥಮ್ ॥ 6.1ಬ್ ॥
(ಚ॒ರೇ॒ಮ॒ - ಪು॒ತ್ರಗ್ಂ ಷಟ್ಚ॑) (ಅ. 6)

ಅನುವಾಕಂ 7
ವಾತ॑ರಶನಾ ಹ॒ ವಾ ಋಷ॑ಯ-ಶ್ಶ್ರಮ॒ಣಾ ಊ॒ರ್ಧ್ವಮ॑ನ್ಥಿ॒ನೋ ಬ॑ಭೂವು॒ಸ್ತಾ-ನೃಷ॑ಯೋ॒-ಽರ್ಥ-ಮಾ॑ಯ॒ಗ್ಗ್॒ಸ್ತೇ ನಿ॒ಲಾಯ॑-ಮಚರ॒ಗ್ಗ್॒ಸ್ತೇ-ಽನು॑ಪ್ರವಿಶುಃ ಕೂಶ್ಮಾ॒ಣ್ಡಾನಿ॒ ತಾಗ್​-ಸ್ತೇಷ್ವನ್ವ॑ವಿನ್ದ-ಞ್ಛ್ರ॒ದ್ಧಯಾ॑ ಚ॒ ತಪ॑ಸಾ ಚ॒ , ತಾನೃಷ॑ಯೋ-ಽಬ್ರುವನ್ ಕ॒ಥಾ ನಿ॒ಲಾಯ॑-ಞ್ಚರ॒ಥೇತಿ॒ ತ ಋಷೀ॑ನಬ್ರುವ॒ನ್ನಮೋ॑ ವೋ-ಽಸ್ತು ಭಗವನ್ತೋ॒-ಽಸ್ಮಿ-ನ್ಧಾ᳚ಮ್ನಿ॒ ಕೇನ॑ ವ-ಸ್ಸಪರ್ಯಾ॒ಮೇತಿ॒ ತಾನೃಷ॑ಯೋ-ಽಬ್ರುವ-ನ್ಪ॒ವಿತ್ರ॑-ನ್ನೋ ಬ್ರೂತ॒ ಯೇನಾ॑ರೇ॒ಪಸ॑-ಸ್ಸ್ಯಾ॒ಮೇತಿ॒ ತ ಏ॒ತಾನಿ॑ ಸೂ॒ಕ್ತಾನ್ಯ॑ಪಶ್ಯ॒ನ್॒. ,
ಯ-ದ್ದೇ॑ವಾ ದೇವ॒ಹೇಡ॑ನಂ॒ (ದೇವ॒ಹೇಳ॑ನಂ॒) ಁಯದದೀ᳚ವ್ಯನ್ನೃ॒ಣಮ॒ಹ-ಮ್ಬ॒ಭೂವಾಯು॑ಷ್ಟೇ ವಿ॒ಶ್ವತೋ॑
ದಧ॒ದಿತ್ಯೇ॒ತೈರಾಜ್ಯ॑-ಞ್ಜುಹುತ ವೈಶ್ವಾನ॒ರಾಯ॒ ಪ್ರತಿ॑ವೇದಯಾಮ॒ ಇತ್ಯುಪ॑ತಿಷ್ಠತ॒ ಯದ॑ರ್ವಾ॒ಚೀನ॒ಮೇನೋ᳚ ಭ್ರೂಣಹ॒ತ್ಯಾಯಾ॒ಸ್ತಸ್ಮಾ᳚-ನ್ಮೋಖ್ಷ್ಯದ್ಧ್ವ॒ ಇತಿ॒ ,ತ ಏ॒ತೈರ॑ಜುಹವು॒ಸ್ತೇ-ಽರೇ॒ಪಸೋ॑-ಽಭವನ್ ಕರ್ಮಾ॒ದಿಷ್ವೇ॒ತೈ-ರ್ಜು॑ಹುಯಾ-ತ್ಪೂ॒ತೋ ದೇ॑ವಲೋ॒ಕಾ-ನ್ಥ್ಸಮ॑ಶ್ನುತೇ ॥ 7 ॥

ಅನುವಾಕಂ 8
ಕೂ॒ಶ್ಮಾ॒ಣ್ಡೈ-ರ್ಜು॑ಹುಯಾ॒-ದ್ಯೋ-ಽಪೂ॑ತ ಇವ॒ ಮನ್ಯೇ॑ತ॒ ಯಥಾ᳚ ಸ್ತೇ॒ನೋ ಯಥಾ᳚ ಭ್ರೂಣ॒ಹೈವಮೇ॒ಷ ಭ॑ವತಿ॒ ಯೋ-ಽಯೋನೌ॒ ರೇತ॑-ಸ್ಸಿ॒ಞ್ಚತಿ॒, ಯದ॑ರ್ವಾ॒ಚೀನ॒ಮೇನೋ᳚ ಭ್ರೂಣಹ॒ತ್ಯಾಯಾ॒ಸ್ತಸ್ಮಾ᳚-ನ್ಮುಚ್ಯತೇ॒ ಯಾವ॒ದೇನೋ॑ ದೀ॒ಖ್ಷಾಮುಪೈ॑ತಿ ದೀಖ್ಷಿ॒ತ ಏ॒ತೈ-ಸ್ಸ॑ತ॒ತಿ ಜು॑ಹೋತಿ ಸಂ​ವಁಥ್ಸ॒ರ-ನ್ದೀ᳚ಖ್ಷಿ॒ತೋ ಭ॑ವತಿ ಸಂ​ವಁಥ್ಸ॒ರಾದೇ॒ವಾತ್ಮಾನ॑-ಮ್ಪುನೀತೇ॒ ಮಾಸ॑-ನ್ದೀಖ್ಷಿ॒ತೋ ಭ॑ವತಿ॒ ಯೋ ಮಾಸ॒-ಸ್ಸ ಸಂ​ವಁಥ್ಸ॒ರ-ಸ್ಸಂ॑​ವಁಥ್ಸ॒ರಾದೇ॒ವಾತ್ಮಾನ॑-ಮ್ಪುನೀತೇ॒ ಚತು॑ರ್ವಿಗ್ಂಶತಿ॒ಗ್ಂ॒ ರಾತ್ರೀ᳚ರ್ದೀಖ್ಷಿ॒ತೋ ಭ॑ವತಿ॒ ಚತು॑ರ್ವಿಗ್ಂಶತಿ-ರರ್ಧಮಾ॒ಸಾ-ಸ್ಸಂ॑​ವಁಥ್ಸ॒ರ-ಸ್ಸಂ॑​ವಁಥ್ಸ॒ರಾದೇ॒ವಾತ್ಮಾನ॑-ಮ್ಪುನೀತೇ॒ ದ್ವಾದ॑ಶ॒ ರಾತ್ರೀ᳚ರ್ದೀಖ್ಷಿ॒ತೋ ಭ॑ವತಿ॒ ದ್ವಾದ॑ಶ॒ ಮಾಸಾ᳚-ಸ್ಸಂ​ವಁಥ್ಸ॒ರ-ಸ್ಸಂ॑​ವಁಥ್ಸ॒ರಾದೇ॒ವಾತ್ಮಾನ॑-ಮ್ಪುನೀತೇ॒ ಷಡ್ರಾತ್ರೀ᳚ರ್ದೀಖ್ಷಿ॒ತೋ ಭ॑ವತಿ॒ ಷಡ್ವಾ ಋ॒ತವ॑-ಸ್ಸಂ​ವಁಥ್ಸ॒ರ-ಸ್ಸಂ॑​ವಁಥ್ಸ॒ರಾದೇ॒ವಾತ್ಮಾನ॑-ಮ್ಪುನೀತೇ ತಿ॒ಸ್ರೋ ರಾತ್ರೀ᳚-ರ್ದೀಖ್ಷಿ॒ತೋ ಭ॑ವತಿ ತ್ರಿ॒ಪದಾ॑ ಗಾಯ॒ತ್ರೀ ಗಾ॑ಯತ್ರಿ॒ಯಾ ಏ॒ವಾತ್ಮಾನ॑-ಮ್ಪುನೀತೇ॒ ನ ಮಾ॒ಗ್ಂ॒ಸಮ॑ಶ್ಞೀಯಾ॒ನ್ನ ಸ್ತ್ರಿಯ॒ಮುಪೇ॑ಯಾ॒ನ್ನೋಪರ್ಯಾ॑ಸೀತ॒ ಜುಗು॑ಫ್ಸೇ॒ತಾನೃ॑ತಾ॒ತ್ಪಯೋ᳚ ಬ್ರಾಹ್ಮ॒ಣಸ್ಯ॑ ವ್ರ॒ತಂ-ಯಁ॑ವಾ॒ಗೂ ರಾ॑ಜ॒ನ್ಯ॑ಸ್ಯಾ॒ಮಿಖ್ಷಾ॒ ವೈಶ್ಯ॒ಸ್ಯಾಥೋ॑ ಸೌ॒ಮ್ಯೇ-ಽಪ್ಯ॑ದ್ಧ್ವ॒ರ ಏ॒ತದ್ವ್ರ॒ತ-ಮ್ಬ್ರೂ॑ಯಾ॒-ದ್ಯದಿ॒ ಮನ್ಯೇ॑-ತೋಪ॒ದಸ್ಯಾ॒ಮೀತ್ಯೋ॑ದ॒ನ-ನ್ಧಾ॒ನಾ-ಸ್ಸಕ್ತೂ᳚-ಙ್ಘೃ॒ತಮಿತ್ಯನು॑ವ್ರತಯೇದಾ॒ತ್ಮನೋ-ಽನು॑ಪದಾಸಾಯ ॥ 8 ॥

ಅನುವಾಕಂ 9
ಅ॒ಜಾನ್. ಹ॒ ವೈ ಪೃಶ್ಞೀಗ್॑ಸ್ತಪ॒ಸ್ಯಮಾ॑ನಾ॒-ನ್ಬ್ರಹ್ಮ॑ ಸ್ವಯ॒ಮ್ಭ್ವ॑ಭ್ಯಾನ॑ರ್​ಷ॒ತ್ತ ಋಷ॑ಯೋ-ಽಭವ॒-ನ್ತದೃಷೀ॑ಣಾ-ಮೃಷಿ॒ತ್ವ-ನ್ತಾ-ನ್ದೇ॒ವತಾ॒ಮುಪಾ॑ತಿಷ್ಠನ್ತ ಯ॒ಜ್ಞಕಾ॑ಮಾ॒ಸ್ತ ಏ॒ತ-ಮ್ಬ್ರ॑ಹ್ಮಯ॒ಜ್ಞ-ಮ॑ಪಶ್ಯ॒ನ್-ತಮಾ-ಽಹ॑ರ॒ನ್-ತೇನಾ॑ಯಜನ್ತ॒ ಯದೃ॒ಚೋ-ಽದ್ಧ್ಯಗೀ॑ಷತ॒ ತಾಃ ಪಯ॑ ಆಹುತಯೋ ದೇ॒ವಾನಾ॑ಮಭವ॒ನ್॒. ಯ-ದ್ಯಜೂಗ್ಂ॑ಷಿ ಘೃ॒ತಾಹು॑ತಯೋ॒ ಯ-ಥ್ಸಾಮಾ॑ನಿ॒ ಸೋಮಾ॑ಹುತಯೋ॒ ಯದಥ॑ರ್ವಾಙ್ಗಿ॒ರಸೋ॒ ಮದ್ಧ್ವಾ॑ಹುತಯೋ॒ ಯದ್ಬ್ರಾ᳚ಹ್ಮ॒ಣಾನೀ॑ತಿಹಾ॒ಸಾನ್-ಪು॑ರಾ॒ಣಾನಿ॒ ಕಲ್ಪಾ॒-ನ್ಗಾಥಾ॑ ನಾರಾಶ॒ಗ್ಂ॒ಸೀರ್ಮೇ॑ದಾಹು॒ತಯೋ॑ ದೇ॒ವಾನಾ॑-ಮಭವ॒ನ್ತಾಭಿಃ॒, ಖ್ಷುಧ॑-ಮ್ಪಾ॒ಪ್ಮಾನ॒-ಮಪಾ᳚ಘ್ನ॒-ನ್ನಪ॑ಹತಪಾಪ್ಮಾನೋ ದೇ॒ವಾ-ಸ್ಸ್ವ॒ರ್ಗಂ-ಲೋಁ॒ಕಮಾ॑ಯ॒-ನ್ಬ್ರಹ್ಮ॑ಣ॒-ಸ್ಸಾಯು॑ಜ್ಯ॒-ಮೃಷ॑ಯೋ-ಽಗಚ್ಛನ್ನ್ ॥ 9 ॥

ಅನುವಾಕಂ 10
ಪಞ್ಚ॒ ವಾ ಏ॒ತೇ ಮ॑ಹಾಯ॒ಜ್ಞಾ-ಸ್ಸ॑ತ॒ತಿ ಪ್ರತಾ॑ಯನ್ತೇ ಸತ॒ತಿ ಸನ್ತಿ॑ಷ್ಠನ್ತೇ ದೇವಯ॒ಜ್ಞಃ ಪಿ॑ತೃಯ॒ಜ್ಞೋ ಭೂ॑ತಯ॒ಜ್ಞೋ ಮ॑ನುಷ್ಯಯ॒ಜ್ಞೋ ಬ್ರ॑ಹ್ಮಯ॒ಜ್ಞ ಇತಿ॒ ಯದ॒ಗ್ನೌ ಜು॒ಹೋತ್ಯ॒ಪಿ ಸ॒ಮಿಧ॒-ನ್ತ-ದ್ದೇ॑ವಯ॒ಜ್ಞ-ಸ್ಸನ್ತಿ॑ಷ್ಠತೇ॒ ಯ-ತ್ಪಿ॒ತೃಭ್ಯ॑-ಸ್ಸ್ವ॒ಧಾ ಕ॒ರೋತ್ಯಪ್ಯ॒ಪಸ್ತ-ತ್ಪಿ॑ತೃಯ॒ಜ್ಞ-ಸ್ಸನ್ತಿ॑ಷ್ಠತೇ॒ಯ-ದ್ಭೂ॒ತೇಭ್ಯೋ॑ ಬ॒ಲಿಗ್ಂ ಹರ॑ತಿ॒ ತ-ದ್ಭೂ॑ತಯ॒ಜ್ಞ-ಸ್ಸನ್ತಿ॑ಷ್ಠತೇ॒ ಯದ್ಬ್ರಾ᳚ಹ್ಮ॒ಣೇಭ್ಯೋ-ಽನ್ನ॒-ನ್ದದಾ॑ತಿ॒ ತನ್ಮ॑ನುಷ್ಯಯ॒ಜ್ಞ-ಸ್ಸನ್ತಿ॑ಷ್ಠತೇ॒ ಯಥ್ಸ್ವಾ᳚ದ್ಧ್ಯಾ॒ಯ-ಮಧೀ॑ಯೀ॒-ತೈಕಾ॑ಮಪ್ಯೃ॒ಚಂ-ಯಁಜುಃ॒-ಸಾಮ॑ ವಾ॒ ತದ್ಬ್ರ॑ಹ್ಮಯ॒ಜ್ಞ-ಸ್ಸನ್ತಿ॑ಷ್ಠತೇ॒ ಯದೃ॒ಚೋ-ಽಧೀ॑ತೇ॒ ಪಯ॑ಸಃ॒ ಕೂಲ್ಯಾ॑ ಅಸ್ಯ ಪಿ॒ತೄ-ನ್ಥ್ಸ್ವ॒ಧಾ ಅ॒ಭಿವ॑ಹನ್ತಿ॒ ಯ-ದ್ಯಜೂಗ್ಂ॑ಷಿ ಘೃ॒ತಸ್ಯ॑ ಕೂಲ್ಯಾ॒ ಯ-ಥ್ಸಾಮಾ॑ನಿ॒ ಸೋಮ॑ ಏಭ್ಯಃ ಪವತೇ॒ ಯದಥ॑ರ್ವಾಙ್ಗಿ॒ರಸೋ॒ ಮಧೋಃ᳚ ಕೂಲ್ಯಾ॒ ಯದ್ಬ್ರಾ᳚ಹ್ಮ॒ಣಾ-ನೀ॑ತಿಹಾ॒ಸಾನ್-ಪು॑ರಾ॒ಣಾನಿ॒ ಕಲ್ಪಾ॒-ನ್ಗಾಥಾ॑ ನಾರಾಶ॒ಗ್ಂ॒ಸೀ-ರ್ಮೇದ॑ಸಃ॒ ಕೂಲ್ಯಾ॑ ಅಸ್ಯ ಪಿ॒ತೄನ್-ಥ್ಸ್ವ॒ಧಾ ಅ॒ಭಿವ॑ಹನ್ತಿ॒ ಯದೃ॒ಚೋ-ಽಧೀ॑ತೇ॒ ಪಯ॑ ಆಹುತಿಭಿರೇ॒ವ ತ-ದ್ದೇ॒ವಾಗ್​ಸ್ತ॑ರ್ಪಯತಿ॒ ಯ-ದ್ಯಜೂಗ್ಂ॑ಷಿ ಘೃ॒ತಾಹು॑ತಿಭಿ॒ರ್ಯ-ಥ್ಸಾಮಾ॑ನಿ॒ ಸೋಮಾ॑ಹುತಿಭಿ॒-ರ್ಯದಥ॑ರ್ವಾಙ್ಗಿ॒ರಸೋ॒ ಮದ್ಧ್ವಾ॑ಹುತಿಭಿ॒-ರ್ಯದ್ಬ್ರಾ᳚ಹ್ಮ॒ಣಾ-ನೀ॑ತಿಹಾ॒ಸಾನ್-ಪು॑ರಾ॒ಣಾನಿ॒ ಕಲ್ಪಾ॒-ನ್ಗಾಥಾ॑ ನಾರಾಶ॒ಗ್ಂ॒ಸೀ-ರ್ಮೇ॑ದಾಹು॒ತಿಭಿ॑ರೇ॒ವ ತ-ದ್ದೇ॒ವಾಗ್​ಸ್ತ॑ರ್ಪಯತಿ॒ ತ ಏ॑ನ-ನ್ತೃ॒ಪ್ತಾ ಆಯು॑ಷಾ॒ ತೇಜ॑ಸಾ॒ ವರ್ಚ॑ಸಾ ಶ್ರಿ॒ಯಾ ಯಶ॑ಸಾ ಬ್ರಹ್ಮವರ್ಚ॒ಸೇನಾ॒ನ್ನಾದ್ಯೇ॑ನ ಚ ತರ್ಪಯನ್ತಿ ॥ 10 ॥

ಅನುವಾಕಂ 11
ಬ್ರ॒ಹ್ಮ॒ಯ॒ಜ್ಞೇನ॑ ಯ॒ಖ್ಷ್ಯಮಾ॑ಣಃ॒ ಪ್ರಾಚ್ಯಾ᳚-ನ್ದಿ॒ಶಿ ಗ್ರಾಮಾ॒ದಛ॑ದಿರ್ದ॒ರ್॒ಶ ಉದೀ᳚ಚ್ಯಾ-ಮ್ಪ್ರಾಗುದೀ॒ಚ್ಯಾಂ-ವೋಁ॒ದಿತ॑ ಆದಿ॒ತ್ಯೇ ದ॑ಖ್ಷಿಣ॒ತ ಉ॑ಪ॒ವೀಯೋ॑ಪ॒ವಿಶ್ಯ॒ ಹಸ್ತಾ॑ವವ॒ನಿಜ್ಯ॒ ತ್ರಿರಾಚಾ॑ಮೇ॒ದ್ದ್ವಿಃ ಪ॑ರಿ॒ಮೃಜ್ಯ॑ ಸ॒ಕೃದು॑ಪ॒ಸ್ಪೃಶ್ಯ॒ ಶಿರ॒ಶ್ಚಖ್ಷು॑ಷೀ॒ ನಾಸಿ॑ಕೇ॒ ಶ್ರೋತ್ರೇ॒ ಹೃದ॑ಯಮಾ॒ಲಭ್ಯ॒ ಯ-ತ್ತ್ರಿರಾ॒ಚಾಮ॑ತಿ॒ ತೇನ॒ ಋಚಃ॑ ಪ್ರೀಣಾತಿ॒ ಯದ್ದ್ವಿಃ ಪ॑ರಿ॒ಮೃಜ॑ತಿ॒ ತೇನ ಯಜೂಗ್ಂ॑ಷಿ॒ ಯ-ಥ್ಸ॒ಕೃದು॑ಪ॒ಸ್ಪೃಶ॑ತಿ॒ ತೇನ॒ ಸಾಮಾ॑ನಿ॒ (ಯ-ಥ್ಸ॒ವ್ಯ-ಮ್ಪಾ॒ಣಿ ಪಾ॒ದೌ ಪ್ರೋ॒ಖ್ಷತಿ॒) ಯಚ್ಛಿರ॒ಶ್ಚಖ್ಷು॑ಷೀ॒ ನಾಸಿ॑ಕೇ॒ ಶ್ರೋತ್ರೇ॒ ಹೃದ॑ಯಮಾ॒ಲಭ॑ತೇ॒ ತೇನಾಥ॑ರ್ವಾಙ್ಗಿ॒ರಸೋ᳚ ಬ್ರಾಹ್ಮ॒ಣಾ-ನೀ॑ತಿಹಾ॒ಸಾ-ನ್ಪು॑ರಾ॒ಣಾನಿ॒ ಕಲ್ಪಾ॒-ನ್ಗಾಥಾ॑ ನಾರಾಶ॒ಗ್ಂ॒ಸೀಃ ಪ್ರೀ॑ಣಾತಿ॒ ದರ್ಭಾ॑ಣಾ-ಮ್ಮ॒ಹದು॑ಪ॒ಸ್ತೀರ್ಯೋ॒ಪಸ್ಥ॑-ಙ್ಕೃ॒ತ್ವಾ ಪ್ರಾಂಆಸೀ॑ನ-ಸ್ಸ್ವಾದ್ಧ್ಯಾ॒ಯಮಧೀ॑ಯೀತಾ॒ಪಾಂ-ವಾಁ ಏ॒ಷ ಓಷ॑ಧೀನಾ॒ಗ್ಂ॒ ರಸೋ॒ ಯ-ದ್ದ॒ರ್ಭಾ-ಸ್ಸರ॑ಸಮೆ॒ವ ಬ್ರಹ್ಮ॑ ಕುರುತೇ ದಖ್ಷಿಣೋತ್ತ॒ರೌ ಪಾ॒ಣೀ (ಪಾ॒ದೌ) ಕೃ॒ತ್ವಾ ಸಪ॒ವಿತ್ರಾ॒ವೋಮಿತಿ॒ ಪ್ರತಿ॑ಪದ್ಯತ ಏ॒ತದ್ವೈ ಯಜು॑ಸ್ತ್ರಯೀಂ-ವಿಁ॒ದ್ಯಾ-ಮ್ಪ್ರತ್ಯೇ॒ಷಾ ವಾಗೇ॒ತತ್ಪ॑ರ॒ಮಮ॒ಖ್ಷರ॒-ನ್ತದೇ॒ತದೃ॒ಚಾ-ಽಭ್ಯು॑ಕ್ತಮೃ॒ಚೋ ಅ॒ಖ್ಷರೇ॑ ಪರ॒ಮೇ ವ್ಯೋ॑ಮ॒ನ್॒. ಯಸ್ಮಿ॑-ನ್ದೇ॒ವಾ ಅಧಿ॒ ವಿಶ್ವೇ॑ ನಿಷೇ॒ದುರ್ಯಸ್ತನ್ನ ವೇದ॒ ಕಿಮೃ॒ಚಾ ಕ॑ರಿಷ್ಯತಿ॒ ಯ ಇತ್ತದ್ವಿ॒ದುಸ್ತ ಇ॒ಮೇ ಸಮಾ॑ಸತ॒ ಇತಿ॒ ತ್ರೀನೇ॒ವ ಪ್ರಾಯು॑ಙ್ಕ್ತ॒ ಭೂರ್ಭುವ॒ಸ್ಸ್ವ॑ರಿತ್ಯಾ॑ಹೈ॒ತದ್ವೈ ವಾ॒ಚ-ಸ್ಸ॒ತ್ಯಂ-ಯಁದೇ॒ವ ವಾ॒ಚ-ಸ್ಸ॒ತ್ಯ-ನ್ತ-ತ್ಪ್ರಾಯು॒ಙ್ಕ್ತಾಥ॑ ಸಾವಿ॒ತ್ರೀ-ಙ್ಗಾ॑ಯ॒ತ್ರೀ-ನ್ತ್ರಿರನ್ವಾ॑ಹ ಪ॒ಚ್ಛೋ᳚-ಽರ್ಧರ್ಚ॑ಶೋ-ಽನವಾ॒ನಗ್ಂ ಸ॑ವಿ॒ತಾ ಶ್ರಿಯಃ॑ ಪ್ರಸವಿ॒ತಾ ಶ್ರಿಯ॑ಮೇ॒ವಾಪ್ನೋ॒ತ್ ಯಥೋ᳚ ಪ್ರ॒ಜ್ಞಾತ॑ಯೈ॒ವ ಪ್ರ॑ತಿ॒ಪದಾ॒ ಛನ್ದಾಗ್ಂ॑ಸಿ॒ ಪ್ರತಿ॑ಪದ್ಯತೇ ॥ 11 ॥

ಅನುವಾಕಂ 12
ಗ್ರಾಮೇ॒ ಮನ॑ಸಾ ಸ್ವಾದ್ಧ್ಯಾ॒ಯಮಧೀ॑ಯೀತ॒ ದಿವಾ॒ ನಕ್ತಂ॑-ವೇಁ॒ತಿ ಹ॑ ಸ್ಮಾ॒ಹ ಶೌ॒ಚ ಆ᳚ಹ್ನೇ॒ಯ ಉ॒ತಾರ॑ಣ್ಯೇ॒-ಽಬಲ॑ ಉ॒ತ ವಾ॒ಚೋತ ತಿಷ್ಠ॑ನ್ನು॒ತ ವ್ರಜ॑ನ್ನು॒ತಾಸೀ॑ನ ಉ॒ತ ಶಯಾ॑ನೋ॒-ಽಧೀಯೀ॑ತೈ॒ವ ಸ್ವಾ᳚ದ್ಧ್ಯಾ॒ಯ-ನ್ತಪ॑ಸ್ವೀ॒ ಪುಣ್ಯೋ॑ ಭವತಿ॒ ಯ ಏ॒ವಂ-ವಿಁ॒ದ್ವಾನ್-ಥ್ಸ್ವಾ᳚ದ್ಧ್ಯಾ॒ಯಮಧೀ॑ತೇ॒ ನಮೋ॒ ಬ್ರಹ್ಮ॑ಣೇ॒ ನಮೋ॑ ಅಸ್ತ್ವ॒ಗ್ನಯೇ॒ ನಮಃ॑ ಪೃಥಿ॒ವ್ಯೈ ನಮ॒ ಓಷ॑ಧೀಭ್ಯಃ ।
ನಮೋ॑ ವಾ॒ಚೇ ನಮೋ॑ ವಾ॒ಚಸ್ಪತ॑ಯೇ॒ ನಮೋ॒ ವಿಷ್ಣ॑ವೇ ಬೃಹ॒ತೇ ಕ॑ರೋಮಿ ॥ 12 ॥

ಅನುವಾಕಂ 13
ಮ॒ದ್ಧ್ಯನ್ದಿ॑ನೇ ಪ್ರ॒ಬಲ॒ಮಧೀ॑ಯೀತಾ॒ಸೌ ಖಲು॒ ವಾವೈಷ ಆ॑ದಿ॒ತ್ಯೋ ಯದ್ಬ್ರಾ᳚ಹ್ಮ॒ಣಸ್ತಸ್ಮಾ॒ತ್ತರ್​ಹಿ॒ ತೇಖ್ಷ್ಣಿ॑ಷ್ಠ-ನ್ತಪತಿ॒ ತದೇ॒ಷಾ-ಽಭ್ಯು॑ಕ್ತಾ ॥
ಚಿ॒ತ್ರ-ನ್ದೇ॒ವಾನಾ॒ಮುದ॑ಗಾ॒ದನೀ॑ಕ॒-ಞ್ಚಖ್ಷು॑ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒ಗ್ನೇಃ ।
ಆ-ಽಪ್ರಾ॒ ದ್ಯಾವಾ॑ಪೃಥಿ॒ವೀ ಅ॒ನ್ತರಿ॑ಖ್ಷ॒ಗ್ಂ॒ ಸೂರ್ಯ॑ ಆ॒ತ್ಮಾ ಜಗ॑ತಸ್ತ॒ಸ್ಥುಷ॒ಶ್ಚೇತಿ॒ ಸ ವಾ ಏ॒ಷ ಯ॒ಜ್ಞ-ಸ್ಸ॒ದ್ಯಃ ಪ್ರತಾ॑ಯತೇ ಸ॒ದ್ಯ-ಸ್ಸನ್ತಿ॑ಷ್ಠತೇ॒ ತಸ್ಯ॒ ಪ್ರಾಖ್ಸಾ॒ಯಮ॑ವಭೃ॒ಥೋ ನಮೋ॒ ಬ್ರಹ್ಮ॑ಣ॒ ಇತಿ॑ ಪರಿಧಾ॒ನೀಯಾ॒-ನ್ತ್ರಿರನ್ವಾ॑ಹಾ॒ಪ ಉ॑ಪ॒ಸ್ಪೃಶ್ಯ॑ ಗೃ॒ಹಾನೇ॑ತಿ॒ ತತೋ॒ ಯತ್ಕಿಞ್ಚ॒ ದದಾ॑ತಿ॒ ಸಾ ದಖ್ಷಿ॑ಣಾ ॥ 13 ॥

ಅನುವಾಕಂ 14
ತಸ್ಯ॒ ವಾ ಏ॒ತಸ್ಯ॑ ಯ॒ಜ್ಞಸ್ಯ॒ ಮೇಘೋ॑ ಹವಿ॒ರ್ಧಾನಂ॑-ವಿಁ॒ದ್ಯುದ॒ಗ್ನಿರ್ವ॒ರ್॒ಷಗ್ಂ ಹ॒ವಿ-ಸ್ಸ್ತ॑ನಯಿ॒ತ್ನು-ರ್ವ॑ಷಟ್ಕಾ॒ರೋ ಯದ॑ವ॒ಸ್ಫೂರ್ಜ॑ತಿ॒ ಸೋ-ಽನು॑ವಷಟ್ಕಾ॒ರೋ ವಾ॒ಯುರಾ॒ತ್ಮಾ-ಽಮಾ॑ವಾ॒ಸ್ಯಾ᳚ ಸ್ವಿಷ್ಟ॒ಕೃದ್ಯ ಏ॒ವಂ-ವಿಁ॒ದ್ವಾನ್ಮೇ॒ಘೇ ವ॒ರ್॒ಷತಿ॑ ವಿ॒ದ್ಯೋತ॑ಮಾನೇ ಸ್ತ॒ನಯ॑ತ್ಯವ॒ಸ್ಫೂರ್ಜ॑ತಿ॒ ಪವ॑ಮಾನೇ ವಾ॒ಯಾವ॑ಮಾವಾ॒ಸ್ಯಾ॑ಯಾಗ್​ ಸ್ವಾದ್ಧ್ಯಾ॒ಯಮಧೀ॑ತೇ॒
ತಪ॑ ಏ॒ವ ತತ್ತ॑ಪ್ಯತೇ॒ ತಪೋ॑ ಹಿ ಸ್ವಾದ್ಧ್ಯಾ॒ಯ ಇತ್ಯು॑ತ್ತ॒ಮ-ನ್ನಾಕಗ್ಂ॑ ರೋಹತ್ಯುತ್ತ॒ಮ-ಸ್ಸ॑ಮಾ॒ನಾನಾ᳚-ಮ್ಭವತಿ॒ ಯಾವ॑ನ್ತಗ್ಂ ಹ॒ ವಾ ಇ॒ಮಾಂ-ವಿಁ॒ತ್ತಸ್ಯ॑ ಪೂ॒ರ್ಣಾ-ನ್ದದ॑ಥ್ಸ್ವ॒ರ್ಗಂ-ಲೋಁ॒ಕ-ಞ್ಜ॑ಯತಿ॒ ತಾವ॑ನ್ತಂ-ಲೋಁ॒ಕ-ಞ್ಜ॑ಯತಿ॒ ಭೂಯಾಗ್ಂ॑ಸ-ಞ್ಚಾಖ್ಷ॒ಯ್ಯ-ಞ್ಚಾಪ॑ ಪುನರ್ಮೃ॒ತ್ಯು-ಞ್ಜ॑ಯತಿ॒ ಬ್ರಹ್ಮ॑ಣ॒-ಸ್ಸಾಯು॑ಜ್ಯ-ಙ್ಗಚ್ಛತಿ ॥ 14 ॥

ಅನುವಾಕಂ 15
ತಸ್ಯ॒ ವಾ ಏ॒ತಸ್ಯ॑ ಯ॒ಜ್ಞಸ್ಯ॒ ದ್ವಾವ॑ನದ್ಧ್ಯಾ॒ಯೌ ಯದಾ॒-ಽಽತ್ಮಾ-ಽಶುಚಿ॒-ರ್ಯ-ದ್ದೇ॒ಶ-ಸ್ಸಮೃ॑ದ್ಧಿರ್ದೈವ॒ತಾನಿ॒ ಯ ಏ॒ವಂ-ವಿಁ॒ದ್ವಾ-ನ್ಮ॑ಹಾರಾ॒ತ್ರ ಉ॒ಷಸ್ಯುದಿ॑ತೇ॒ ವ್ರಜ॒ಗ್ಗ್॒ಸ್ತಿಷ್ಠ॒-ನ್ನಾಸೀ॑ನ॒-ಶ್ಶಯಾ॑ನೋ॒-ಽರಣ್ಯೇ᳚ ಗ್ರಾಮೇ॒ ವಾ ಯಾವ॑ತ್ತ॒ರಸಗ್ಗ್॑ ಸ್ವಾದ್ಧ್ಯಾ॒ಯಮಧೀ॑ತೇ॒ ಸರ್ವಾ᳚ನ್ ಁಲೋ॒ಕಾಞ್ಜ॑ಯತಿ॒ ಸರ್ವಾ᳚ನ್ ಁಲೋ॒ಕಾನ॑ನೃ॒ಣೋ-ಽನು॒ ಸಞ್ಚ॑ರತಿ॒ ತದೇ॒ಷಾ-ಽಭ್ಯು॑ಕ್ತಾ ॥ ಅ॒ನೃ॒ಣಾ ಅ॒ಸ್ಮಿನ್ನ॑ನೃ॒ಣಾಃ ಪರ॑ಸ್ಮಿಗ್ಗ್​ಸ್ತೃ॒ತೀಯೇ॑ ಲೋ॒ಕೇ ಅ॑ನೃ॒ಣಾ-ಸ್ಸ್ಯಾ॑ಮ । ಯೇ ದೇ॑ವ॒ಯಾನಾ॑ ಉ॒ತ ಪಿ॑ತೃ॒ಯಾಣಾ॒-ಸ್ಸರ್ವಾ᳚-ನ್ಪ॒ಥೋ ಅ॑ನೃ॒ಣಾ ಆಖ್ಷೀ॑ಯೇ॒ಮೇತ್ಯ॒ಗ್ನಿಂ-ವೈಁ ಜಾ॒ತ-ಮ್ಪಾ॒ಪ್ಮಾ ಜ॑ಗ್ರಾಹ॒ ತನ್ದೇ॒ವಾ ಆಹು॑ತೀಭಿಃ ಪಾ॒ಪ್ಮಾನ॒ಮಪಾ᳚ಘ್ನ॒-ನ್ನಾಹು॑ತೀನಾಂ-ಯಁ॒ಜ್ಞೇನ॑ ಯ॒ಜ್ಞಸ್ಯ॒ ದಖ್ಷಿ॑ಣಾಭಿ॒-ರ್ದಖ್ಷಿ॑ಣಾನಾ-ಮ್ಬ್ರಾಹ್ಮ॒ಣೇನ॑ ಬ್ರಾಹ್ಮ॒ಣಸ್ಯ॒ ಛನ್ದೋ॑ಭಿ॒-ಶ್ಛನ್ದ॑ಸಾಗ್​ ಸ್ವಾದ್ಧ್ಯಾ॒ಯೇನಾಪ॑ಹತಪಾಪ್ಮಾ ಸ್ವಾದ್ಧ್ಯಾ॒ಯೋ॑ ದೇ॒ವಪ॑ವಿತ್ರಂ॒-ವಾಁ ಏ॒ತತ್ತಂ-ಯೋಁ-ಽನೂ᳚-ಥ್ಸೃ॒ಜತ್ಯಭಾ॑ಗೋ ವಾ॒ಚಿ ಭ॑ವ॒ತ್ಯಭಾ॑ಗೋ ನಾ॒ಕೇ ತದೇ॒ಷಾ-ಽಭ್ಯು॑ಕ್ತಾ ॥ ಯಸ್ತಿ॒ತ್ಯಾಜ॑ ಸಖಿ॒ವಿದ॒ಗ್ಂ॒ ಸಖಾ॑ಯ॒-ನ್ನ ತಸ್ಯ॑ ವಾ॒ಚ್ಯಪಿ॑ ಭಾ॒ಗೋ ಅ॑ಸ್ತಿ । ಯದೀಗ್ಂ॑ ಶೃ॒ಣೋತ್ಯ॒ಲಕಗ್ಂ॑ ಶೃಣೋತಿ॒ ನ ಹಿ ಪ್ರ॒ವೇದ॑ ಸುಕೃ॒ತಸ್ಯ॒ ಪನ್ಥಾ॒ಮಿತಿ॒ ತಸ್ಮಾ᳚-ಥ್ಸ್ವಾದ್ಧ್ಯಾ॒ಯೋ-ಽದ್ಧ್ಯೇ॑ತ॒ವ್ಯೋ॑ ಯಂ-ಯಁ॑-ಙ್ಕ್ರ॒ತುಮಧೀ॑ತೇ॒ ತೇನ॑ ತೇನಾಸ್ಯೇ॒ಷ್ಟ-ಮ್ಭ॑ವತ್ಯ॒ಗ್ನೇ-ರ್ವಾ॒ಯೋ-ರಾ॑ದಿ॒ತ್ಯಸ್ಯ॒ ಸಾಯು॑ಜ್ಯ-ಙ್ಗಚ್ಛತಿ॒ ತದೇ॒ಷಾ-ಽಭ್ಯು॑ಕ್ತಾ ॥
ಯೇ ಅ॒ರ್ವಾಂಉ॒ತ ವಾ॑ ಪುರಾ॒ಣೇ ವೇ॒ದಂ-ವಿಁ॒ದ್ವಾಗ್ಂಸ॑ಮ॒ಭಿತೋ॑ ವದನ್ತ್ಯಾದಿ॒ತ್ಯಮೇ॒ವ ತೇ ಪರಿ॑ವದನ್ತಿ॒ ಸರ್ವೇ॑ ಅ॒ಗ್ನಿ-ನ್ದ್ವಿ॒ತೀಯ॑-ನ್ತೃ॒ತೀಯ॑-ಞ್ಚ ಹ॒ಗ್ಂ॒ಸಮಿತಿ॒ ಯಾವ॑ತೀ॒ರ್ವೈ ದೇ॒ವತಾ॒ಸ್ತಾ-ಸ್ಸರ್ವಾ॑ ವೇದ॒ವಿದಿ॑ ಬ್ರಾಹ್ಮ॒ಣೇ ವ॑ಸನ್ತಿ॒ ತಸ್ಮಾ᳚-ದ್ಬ್ರಾಹ್ಮ॒ಣೇಭ್ಯೋ॑ ವೇದ॒ವಿದ್ಭ್ಯೋ॑ ದಿ॒ವೇದಿ॑ವೇ॒ ನಮ॑ಸ್ಕುರ್ಯಾ॒ನ್ನಾಶ್ಲೀ॒ಲ-ಙ್ಕೀ᳚ರ್ತಯೇದೇ॒ತಾ ಏ॒ವ ದೇ॒ವತಾಃ᳚ ಪ್ರೀಣಾತಿ ॥ 15 ॥

ಅನುವಾಕಂ 16
ರಿಚ್ಯ॑ತ ಇವ॒ ವಾ ಏ॒ಷ ಪ್ರೇವ ರಿ॑ಚ್ಯತೇ॒ ಯೋ ಯಾ॒ಜಯ॑ತಿ॒ ಪ್ರತಿ॑ ವಾ ಗೃ॒ಹ್ಣಾತಿ॑ ಯಾ॒ಜಯಿ॑ತ್ವಾ ಪ್ರತಿಗೃ॒ಹ್ಯ ವಾ-ಽನ॑ಶ್ನ॒ನ್ತ್ರಿ-ಸ್ಸ್ವಾ᳚ದ್ಧ್ಯಾ॒ಯಂ-ವೇಁ॒ದಮಧೀ॑ಯೀತ ತ್ರಿರಾ॒ತ್ರಂ-ವಾಁ॑ ಸಾವಿ॒ತ್ರೀ-ಙ್ಗಾ॑ಯ॒ತ್ರೀ-ಮ॒ನ್ವಾತಿ॑ರೇಚಯತಿ॒ ವರೋ॒ ದಖ್ಷಿ॑ಣಾ॒ ವರೇ॑ಣೈ॒ವ ವರಗ್ಗ್॑ ಸ್ಪೃಣೋತ್ಯಾ॒ತ್ಮಾ ಹಿ ವರಃ॑ ॥ 16 ॥

ಅನುವಾಕಂ 17
ದು॒ಹೇ ಹ॒ ವಾ ಏ॒ಷ ಛನ್ದಾಗ್ಂ॑ಸಿ॒ ಯೋ ಯಾ॒ಜಯ॑ತಿ॒ ಸ ಯೇನ॑ ಯಜ್ಞಕ್ರ॒ತುನಾ॑ ಯಾ॒ಜಯೇ॒-ಥ್ಸೋ-ಽರ॑ಣ್ಯ-ಮ್ಪ॒ರೇತ್ಯ॑ ಶುಚೌ ದೇ॒ಶೇ ಸ್ವಾ᳚ದ್ಧ್ಯಾ॒ಯ-ಮೇ॒ವೈನ॒-ಮಧೀ॑ಯನ್ನಾಸೀ॒ತ ತಸ್ಯಾ॒ನಶ॑ನ-ನ್ದೀ॒ಖ್ಷಾ ಸ್ಥಾ॒ನಮು॑ಪ॒ಸದ॒ ಆಸ॑ನಗ್ಂ ಸು॒ತ್ಯಾ ವಾಗ್ಜು॒ಹೂರ್ಮನ॑ ಉಪ॒ಭೃದ್ಧೃ॒ತಿರ್ಧ್ರು॒ವಾ ಪ್ರಾ॒ಣೋ ಹ॒ವಿ-ಸ್ಸಾಮಾ᳚ದ್ಧ್ವ॒ರ್ಯು-ಸ್ಸ ವಾ ಏ॒ಷ ಯ॒ಜ್ಞಃ
ಪ್ರಾ॒ಣದ॑ಖ್ಷಿ॒ಣೋ-ಽನ॑ನ್ತದಖ್ಷಿಣ॒-ಸ್ಸಮೃ॑ದ್ಧತರಃ ॥ 17 ॥

ಅನುವಾಕಂ 18
ಕ॒ತಿ॒ಧಾ-ಽವ॑ಕೀರ್ಣೀ ಪ್ರವಿ॒ಶತಿ॑ ಚತು॒ರ್ಧೇತ್ಯಾ॑ಹು-ರ್ಬ್ರಹ್ಮವಾ॒ದಿನೋ॑ ಮ॒ರುತಃ॑ ಪ್ರಾ॒ಣೈರಿನ್ದ್ರ॒-ಮ್ಬಲೇ॑ನ॒ ಬೃಹ॒ಸ್ಪತಿ॑-ಮ್ಬ್ರಹ್ಮವರ್ಚ॒ಸೇನಾ॒ಗ್ನಿಮೇ॒ವೇತ॑ರೇಣ॒ ಸರ್ವೇ॑ಣ॒ ತಸ್ಯೈ॒ತಾ-ಮ್ಪ್ರಾಯ॑ಶ್ಚಿತ್ತಿಂ-ವಿಁ॒ದಾಞ್ಚ॑ಕಾರ ಸುದೇ॒ವಃ ಕಾ᳚ಶ್ಯ॒ಪೋ ಯೋ
ಬ್ರ॑ಹ್ಮಚಾ॒ರ್ಯ॑ವ॒ಕಿರೇ॑ದಮಾವಾ॒ಸ್ಯಾ॑ಯಾ॒ಗ್ಂ॒ ರಾತ್ರ್ಯಾ॑ಮ॒ಗ್ನಿ-ಮ್ಪ್ರ॒ಣೀಯೋ॑ಪಸಮಾ॒ಧಾಯ॒ ದ್ವಿರಾಜ್ಯ॑ಸ್ಯೋಪ॒ಘಾತ॑-ಞ್ಜುಹೋತಿ॒ ಕಾಮಾವ॑ಕೀರ್ಣೋ॒-ಽಸ್ಮ್ಯವ॑ಕೀರ್ಣೋ-ಽಸ್ಮಿ॒ ಕಾಮ॒ ಕಾಮಾ॑ಯ॒ ಸ್ವಾಹಾ॒ ಕಾಮಾಭಿ॑ದ್ರುಗ್ಧೋ॒-ಽಸ್ಮ್ಯಭಿ॑ದ್ರುಗ್ಧೋ-ಽಸ್ಮಿ॒ ಕಾಮ॒ ಕಾಮಾ॑ಯ॒ ಸ್ವಾಹೇತ್ಯ॒ಮೃತಂ॒-ವಾಁ ಆಜ್ಯ॑ಮ॒ಮೃತ॑ಮೇ॒ವಾತ್ಮ-ನ್ಧ॑ತ್ತೇ ಹು॒ತ್ವಾ ಪ್ರಯ॑ತಾಞ್ಜ॒ಲಿಃ ಕವಾ॑ತಿರ್ಯಙ್ಙ॒ಗ್ನಿಮ॒ಭಿ ಮ॑ನ್ತ್ರಯೇತ॒ ಸ-ಮ್ಮಾ॑ ಸಿಞ್ಚನ್ತು ಮ॒ರುತ॒-ಸ್ಸಮಿನ್ದ್ರ॒-ಸ್ಸಮ್ಬೃಹ॒ಸ್ಪತಿಃ॑ ।
ಸ-ಮ್ಮಾ॒-ಽಯಮ॒ಗ್ನಿ-ಸ್ಸಿ॑ಞ್ಚ॒ತ್ವಾಯು॑ಷಾ ಚ॒ ಬಲೇ॑ನ॒ ಚಾಯು॑ಷ್ಮನ್ತ-ಙ್ಕರೋತ॒ ಮೇತಿ॒ ಪ್ರತಿ॑ ಹಾಸ್ಮೈ ಮ॒ರುತಃ॑ ಪ್ರಾ॒ಣಾ-ನ್ದ॑ಧತಿ॒ ಪ್ರತೀನ್ದ್ರೋ॒ ಬಲ॒-ಮ್ಪ್ರತಿ॒ ಬೃಹ॒ಸ್ಪತಿ॑-ರ್ಬ್ರಹ್ಮವರ್ಚ॒ಸ-ಮ್ಪ್ರತ್ಯ॒ಗ್ನಿರಿ॒ತರ॒ಥ್ಸರ್ವ॒ಗ್ಂ॒ ಸರ್ವ॑ತನುರ್ಭೂ॒ತ್ವಾ ಸರ್ವ॒ಮಾಯು॑ರೇತಿ॒ ತ್ರಿರ॒ಭಿಮ॑ನ್ತ್ರಯೇತ॒ ತ್ರಿಷ॑ತ್ಯಾ॒ ಹಿ ದೇ॒ವಾ ಯೋ-ಽಪೂ॑ತ ಇವ॒ ಮನ್ಯೇ॑ತ॒ ಸ ಇ॒ತ್ಥ-ಞ್ಜು॑ಹುಯಾದಿ॒ತ್ಥ-ಮ॒ಭಿಮ॑ನ್ತ್ರಯೇತ॒ ಪುನೀ॑ತ ಏ॒ವಾತ್ಮಾನ॒-ಮಾಯು॑ರೇ॒ವಾತ್ಮ-ನ್ಧ॑ತ್ತೇ॒ ವರೋ॒ ದಖ್ಷಿ॑ಣಾ॒ ವರೇ॑ಣೈ॒ವ ವರಗ್ಗ್॑ ಸ್ಪೃಣೋತ್ಯಾ॒ತ್ಮಾ ಹಿ ವರಃ॑ ॥ 18 ॥

ಅನುವಾಕಂ 19
ಭೂಃ ಪ್ರಪ॑ದ್ಯೇ॒ ಭುವಃ॒ ಪ್ರಪ॑ದ್ಯೇ॒ ಸ್ವಃ॑ ಪ್ರಪ॑ದ್ಯೇ॒ ಭೂರ್ಭುವ॒ಸ್ಸ್ವಃ॑ ಪ್ರಪ॑ದ್ಯೇ॒ ಬ್ರಹ್ಮ॒ ಪ್ರಪ॑ದ್ಯೇ ಬ್ರಹ್ಮಕೋ॒ಶ-ಮ್ಪ್ರಪ॑ದ್ಯೇ॒-ಽಮೃತ॒-ಮ್ಪ್ರಪ॑ದ್ಯೇ-ಽಮೃತಕೋ॒ಶ-ಮ್ಪ್ರಪ॑ದ್ಯೇ ಚತುರ್ಜಾ॒ಲ-ಮ್ಬ್ರ॑ಹ್ಮಕೋ॒ಶಂ-ಯಁ-ಮ್ಮೃ॒ತ್ಯುರ್ನಾವ॒ಪಶ್ಯ॑ತಿ॒ ತ-ಮ್ಪ್ರಪ॑ದ್ಯೇ ದೇ॒ವಾ-ನ್ಪ್ರಪ॑ದ್ಯೇ ದೇವಪು॒ರ-ಮ್ಪ್ರಪ॑ದ್ಯೇ॒ ಪರೀ॑ವೃತೋ॒ ವರೀ॑ವೃತೋ॒ ಬ್ರಹ್ಮ॑ಣಾ॒ ವರ್ಮ॑ಣಾ॒-ಽಹ-ನ್ತೇಜ॑ಸಾ॒ ಕಶ್ಯ॑ಪಸ್ಯ॒ ಯಸ್ಮೈ॒ ನಮ॒ಸ್ತಚ್ಛಿರೋ॒ ಧರ್ಮೋ॑ ಮೂ॒ರ್ಧಾನ॑-ಮ್ಬ್ರ॒ಹ್ಮೋತ್ತ॑ರಾ॒ ಹನು॑ರ್ಯ॒ಜ್ಞೋ-ಽಧ॑ರಾ॒ ವಿಷ್ಣು॒ರ್॒ ಹೃದ॑ಯಗ್ಂ ಸಂ​ವಁಥ್ಸ॒ರಃ ಪ್ರ॒ಜನ॑ನಮ॒ಶ್ವಿನೌ॑ ಪೂರ್ವ॒ಪಾದಾ॑ವ॒ತ್ರಿರ್ಮದ್ಧ್ಯ॑-ಮ್ಮಿ॒ತ್ರಾವರು॑ಣಾ ವಪರ॒ಪಾದಾ॑ವ॒ಗ್ನಿಃ ಪುಚ್ಛ॑ಸ್ಯ ಪ್ರಥ॒ಮ-ಙ್ಕಾಣ್ಡ॒-ನ್ತತ॒ ಇನ್ದ್ರ॒ಸ್ತತಃ॑ ಪ್ರ॒ಜಾಪ॑ತಿ॒ರಭ॑ಯ-ಞ್ಚತು॒ರ್ಥಗ್ಂ ಸ ವಾ ಏ॒ಷ ದಿ॒ವ್ಯ-ಶ್ಶಾ᳚ಕ್ವ॒ರ-ಶ್ಶಿಶು॑ಮಾರ॒ಸ್ತಗ್ಂ ಹ॒ ಯ ಏ॒ವಂ-ವೇಁದಾಪ॑ ಪುನರ್ಮೃ॒ತ್ಯು-ಞ್ಜ॑ಯತಿ॒ ಜಯ॑ತಿ ಸ್ವ॒ರ್ಗಂ-ಲೋಁ॒ಕ-ನ್ನಾದ್ಧ್ವನಿ॒ ಪ್ರಮೀ॑ಯತೇ॒ ನಾಫ್ಸು ಪ್ರಮೀ॑ಯತೇ॒ ನಾಗ್ನೌ ಪ್ರಮೀ॑ಯತೇ॒ ನಾನ॒ಪತ್ಯಃ॑ ಪ್ರಮೀ॒ಯತೇ॑ ಲ॒ಘ್ವಾನ್ನೋ॑ ಭವತಿ ಧ್ರು॒ವಸ್ತ್ವಮ॑ಸಿ ಧ್ರು॒ವಸ್ಯ ಖ್ಷಿ॑ತಮಸಿ॒ ತ್ವ-ಮ್ಭೂ॒ತಾನಾ॒ಮಧಿ॑ಪತಿರಸಿ॒ ತ್ವ-ಮ್ಭೂ॒ತಾನಾ॒ಗ್॒ ಶ್ರೇಷ್ಠೋ॑-ಽಸಿ॒ ತ್ವಾ-ಮ್ಭೂ॒ತಾನ್ಯುಪ॑ಪ॒ರ್ಯಾವ॑ರ್ತನ್ತೇ॒ ನಮ॑ಸ್ತೇ॒ ನಮ॒-ಸ್ಸರ್ವ॑-ನ್ತೇ॒ ನಮೋ॒ ನಮಃ॑ ॥
[ಫಾಟ ಭ್ಹೇದಂ - ನಮೋ॒ ನಮ॑-ಶ್ಶಿಶುಕುಮಾರಾಯ॒ ನಮಃ॑ ] ॥ 19 ॥

ಅನುವಾಕಂ 20
ನಮಃ॒ ಪ್ರಾಚ್ಯೈ॑ ದಿ॒ಶೇ ಯಾಶ್ಚ॑ ದೇ॒ವತಾ॑ ಏ॒ತಸ್ಯಾ॒-ಮ್ಪ್ರತಿ॑ವಸನ್ತ್ಯೇ॒ ತಾಭ್ಯ॑ಶ್ಚ॒ ನಮೋ॒ ನಮೋ ದಖ್ಷಿ॑ಣಾಯೈ ದಿ॒ಶೇ ಯಾಶ್ಚ॑ ದೇ॒ವತಾ॑ ಏ॒ತಸ್ಯಾ॒-ಮ್ಪ್ರತಿ॑ವಸನ್ತ್ಯೇ॒ ತಾಭ್ಯ॑ಶ್ಚ॒ ನಮೋ॒ ನಮಃ॒ ಪ್ರತೀ᳚ಚ್ಯೈ ದಿ॒ಶೇ ಯಾಶ್ಚ॑ ದೇ॒ವತಾ॑ ಏ॒ತಸ್ಯಾ॒-ಮ್ಪ್ರತಿ॑ವಸನ್ತ್ಯೇ॒ ತಾಭ್ಯ॑ಶ್ಚ॒ ನಮೋ॒ ನಮ॒ ಉದೀ᳚ಚ್ಯೈ ದಿ॒ಶೇ ಯಾಶ್ಚ॑ ದೇ॒ವತಾ॑ ಏ॒ತಸ್ಯಾ॒-ಮ್ಪ್ರತಿ॑ವಸನ್ತ್ಯೇ॒ ತಾಭ್ಯ॑ಶ್ಚ॒ ನಮೋ॒ ನಮ॑ ಊ॒ರ್ಧ್ವಾಯೈ॑ ದಿ॒ಶೇ ಯಾಶ್ಚ॑ ದೇ॒ವತಾ॑ ಏ॒ತಸ್ಯಾ॒-ಮ್ಪ್ರತಿ॑ವಸನ್ತ್ಯೇ॒ ತಾಭ್ಯ॑ಶ್ಚ॒ ನಮೋ॒ ನಮೋ-ಽಧ॑ರಾಯೈ ದಿ॒ಶೇ ಯಾಶ್ಚ॑ ದೇ॒ವತಾ॑ ಏ॒ತಸ್ಯಾ॒-ಮ್ಪ್ರತಿ॑ವಸನ್ತ್ಯೇ॒ ತಾಭ್ಯ॑ಶ್ಚ॒ ನಮೋ॒ ನಮೋ॑-ಽವಾನ್ತ॒ರಾಯೈ॑ ದಿ॒ಶೇ ಯಾಶ್ಚ॑ ದೇ॒ವತಾ॑ ಏ॒ತಸ್ಯಾ॒-ಮ್ಪ್ರತಿ॑ವಸನ್ತ್ಯೇ॒ ತಾಭ್ಯ॑ಶ್ಚ॒ ನಮೋ॒ ನಮೋ ಗಙ್ಗಾಯಮುನಯೋರ್ಮದ್ಧ್ಯೇ ಯೇ॑ ವಸ॒ನ್ತಿ॒ ತೇ ಮೇ ಪ್ರಸನ್ನಾತ್ಮಾನಸ್ಚಿರ-ಞ್ಜೀವಿತಂ-ವಁ॑ರ್ಧಯ॒ನ್ತಿ॒ ನಮೋ ಗಙ್ಗಾಯಮುನಯೋರ್ಮುನಿ॑ಭ್ಯಶ್ಚ॒ ನಮೋ॒ ನಮೋ ಗಙ್ಗಾಯಮುನಯೋರ್ಮುನಿ॑ಭ್ಯಶ್ಚ॒ ನಮಃ ॥ 20 ॥

(ಸಹ॒ - ರಖ್ಷಾಗ್ಂ॑ಸಿ॒ - ಯ-ದ್ದೇ॑ವಾ-ಸ್ಸ॒ಪ್ತದ॑ಶ॒ - ಯದದೀ᳚ವ್ಯ॒-ನ್ಪಞ್ಚ॑ದಶ॒ - ಯು॑ಷ್ಟೇ॒ ಚತು॑ಸ್ತ್ರಿಗ್ಂಶ-ದ್- ವೈಶ್ವಾನ॒ರಾಯ॒ ಷಡ್ವಿಗ್ಂ॑ಶತಿ॒-ರ್ವಾತ॑ರಶನಾ ಹ - ಕುಶ್ಮಾ॒ಣ್ಡೈ- ರ॒ಜಾನ್. ಹ॒ - ಪಞ್ಚ॑ - ಬ್ರಹ್ಮಯ॒ಜ್ಞೇನ॒ - ಗ್ರಾಮೇ॑ - ಮ॒ದ್ಧ್ಯನ್ದಿ॑ನೇ॒ - ತಸ್ಯ॒ ವೈ ಮೇಘ॒ - ಸ್ತಸ್ಯ॒ ವೈ ದ್ವೌ - ರಿಚ್ಯ॑ತೇ - ದು॒ಹೇ ಹ॑ - ಕತಿ॒ಧಾ-ಽವ॑ಕೀರ್ಣೀ॒ - ಭೂ--ರ್ ನಮಃ॒ ಪ್ರಾಚ್ಯೈ॑ ವಿಗ್ಂಶ॒ತಿಃ )

(ಸಹ॑ ವೈ - ಮುನಿ॑ಭ್ಯಶ್ಚ॒ ನಮಃ )

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ದ್ವಿತೀಯಃ ಪ್ರಪಾಠಕ-ಸ್ಸಮಾಪ್ತಃ ॥