ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ಪಞ್ಚಮಃ ಪ್ರಪಾಠಕಃ - ನಖ್ಷತ್ರೇಷ್ಟಿಕಾಣ್ಡಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ನಖ್ಷತ್ರೇಷ್ಟಕಾಮನ್ತ್ರಾಃ, ವಿಕೃತಿರೂಪಚಯನಗತಾಃ

ಅ॒ಗ್ನೇಃ ಕೃತ್ತಿ॑ಕಾಃ । ಶು॒ಕ್ರ-ಮ್ಪ॒ರಸ್ತಾ॒-ಜ್ಜ್ಯೋತಿ॑-ರ॒ವಸ್ತಾ᳚ತ್ ॥ ಪ್ರ॒ಜಾಪ॑ತೇ ರೋಹಿ॒ಣೀ । ಆಪಃ॑ ಪ॒ರಸ್ತಾ॒ದೋಷ॑ಧಯೋ॒ ಽವಸ್ತಾ᳚ತ್ ॥ ಸೋಮ॑ಸ್ಯೇನ್ವ॒ಕಾ ವಿತ॑ತಾನಿ । ಪ॒ರಸ್ತಾ॒ದ್ವಯ॑ನ್ತೋ॒ ಽವಸ್ತಾ᳚ತ್ ॥ ರು॒ದ್ರಸ್ಯ॑ ಬಾ॒ಹೂ । ಮೃ॒ಗ॒ಯವಃ॑ ಪ॒ರಸ್ತಾ᳚ದ್ವಿಖ್ಷಾ॒ರೋ॑-ಽವಸ್ತಾ᳚ತ್ ॥ ಅದಿ॑ತ್ಯೈ॒ ಪುನ॑ರ್ವಸೂ । ವಾತಃ॑ ಪ॒ರಸ್ತಾ॑ದಾ॒ರ್ದ್ರ-ಮ॒ವಸ್ತಾ᳚ತ್ ॥ 1 ॥

ಬೃಹ॒ಸ್ಪತೇ᳚ಸ್ತಿ॒ಷ್ಯಃ॑ । ಜುಹ್ವ॑ತಃ ಪ॒ರಸ್ತಾ॒-ದ್ಯಜ॑ಮಾನಾ ಅ॒ವಸ್ತಾ᳚ತ್ ॥ ಸ॒ರ್ಪಾಣಾ॑-ಮಾಶ್ರೇ॒ಷಾಃ । ಅ॒ಭ್ಯಾ॒ಗಚ್ಛ॑ನ್ತಃ ಪ॒ರಸ್ತಾ॑ದಭ್ಯಾ॒ನೃತ್ಯ॑ನ್ತೋ॒-ಽವಸ್ತಾ᳚ತ್ ॥ ಪಿ॒ತೃ॒ಣಾ-ಮ್ಮ॒ಘಾಃ । ರು॒ದನ್ತಃ॑ ಪ॒ರಸ್ತಾ॑ದಪಭ್ರ॒ಗ್ಂ॒ಶೋ॑-ಽವಸ್ತಾ᳚ತ್ ॥ ಅ॒ರ್ಯ॒ಮ್ಣಃ ಪೂರ್ವೇ॒ ಫಲ್ಗು॑ನೀ । ಜಾ॒ಯಾ ಪ॒ರಸ್ತಾ॑ದೃಷ॒ಭೋ॑-ಽವಸ್ತಾ᳚ತ್ ॥ ಭಗ॒ಸ್ಯೋತ್ತ॑ರೇ । ವ॒ಹ॒ತವಃ॑ ಪ॒ರಸ್ತಾ॒ದ್ವಹ॑ಮಾನಾ ಅ॒ವಸ್ತಾ᳚ತ್ ॥ 2 ॥

ದೇ॒ವಸ್ಯ॑ ಸವಿ॒ತುರ್-ಹಸ್ತಃ॑ । ಪ್ರ॒ಸ॒ವಃ ಪ॒ರಸ್ತಾ᳚-ಥ್ಸ॒ನಿರ॒ವಸ್ತಾ᳚ತ್ ॥ ಇನ್ದ್ರ॑ಸ್ಯ ಚಿ॒ತ್ರಾ । ಋ॒ತ-ಮ್ಪ॒ರಸ್ತಾ᳚-ಥ್ಸ॒ತ್ಯ-ಮ॒ವಸ್ತಾ᳚ತ್ ॥ ವಾ॒ಯೋ-ರ್ನಿಷ್ಟ್ಯಾ᳚ ವ್ರ॒ತತಿಃ॑ । ಪ॒ರಸ್ತಾ॒-ದಸಿ॑ದ್ಧಿ-ರ॒ವಸ್ತಾ᳚ತ್ ॥ ಇ॒ನ್ದ್ರಾ॒ಗ್ನಿ॒ಯೋ-ರ್ವಿಶಾ॑ಖೇ । ಯು॒ಗಾನಿ॑ ಪ॒ರಸ್ತಾ᳚ತ್-ಕೃ॒ಷಮಾ॑ಣಾ ಅ॒ವಸ್ತಾ᳚ತ್ ॥ ಮಿ॒ತ್ರಸ್ಯಾ॑-ನೂರಾ॒ಧಾಃ । ಅ॒ಭ್ಯಾ॒ರೋಹ॑ತ್-ಪ॒ರಸ್ತಾ॑-ದ॒ಭ್ಯಾರೂ॑ಢ-ಮ॒ವಸ್ತಾ᳚ತ್ ॥ 3 ॥

ಇನ್ದ್ರ॑ಸ್ಯ ರೋಹಿ॒ಣೀ । ಶೃ॒ಣತ್-ಪ॒ರಸ್ತಾ᳚ತ್-ಪ್ರತಿಶೃ॒ಣ-ದ॒ವಸ್ತಾ᳚ತ್ ॥ ನಿರ್-ಋ॑ತ್ಯೈ-ಮೂಲ॒ವರ್​ಹ॑ಣೀ । ಪ್ರ॒ತಿ॒ಭ॒ಞ್ಜನ್ತಃ॑ ಪ॒ರಸ್ತಾ᳚ತ್-ಪ್ರತಿಶೃ॒ಣನ್ತೋ॒-ಽವಸ್ತಾ᳚ತ್ ॥ ಅ॒ಪಾ-ಮ್ಪೂರ್ವಾ॑ ಅಷಾ॒ಢಾಃ । ವರ್ಚಃ॑ ಪ॒ರಸ್ತಾ॒-ಥ್ಸಮಿ॑ತಿ-ರ॒ವಸ್ತಾ᳚ತ್ ॥ ವಿಶ್ವೇ॑ಷಾ-ನ್ದೇ॒ವಾನಾ॒-ಮುತ್ತ॑ರಾಃ । ಅ॒ಭಿ॒ಜಯ॑ತ್-ಪ॒ರಸ್ತಾ॑-ದ॒ಭಿಜಿ॑ತ-ಮ॒ವಸ್ತಾ᳚ತ್ ॥ ವಿ॒ಷ್ಣೋ᳚-ಶ್ಶ್ರೋ॒ಣಾ ಪೃ॒ಚ್ಛಮಾ॑ನಾಃ । ಪ॒ರಸ್ತಾ॒ತ್-ಪನ್ಥಾ॑ ಅ॒ವಸ್ತಾ᳚ತ್ ॥ 4 ॥

ವಸೂ॑ನಾ॒ಗ್॒ ಶ್ರವಿ॑ಷ್ಠಾಃ । ಭೂ॒ತ-ಮ್ಪ॒ರಸ್ತಾ॒-ದ್ಭೂತಿ॑ರ॒ವಸ್ತಾ᳚ತ್ ॥ ಇನ್ದ್ರ॑ಸ್ಯ-ಶ॒ತಭಿ॑ಷಕ್ । ವಿ॒ಶ್ವವ್ಯ॑ಚಾಃ ಪ॒ರಸ್ತಾ᳚-ದ್ವಿ॒ಶ್ವಖ್ಷಿ॑ತಿ-ರ॒ವಸ್ತಾ᳚ತ್ ॥ ಅ॒ಜಸ್ಯೈಕ॑ಪದಃ॒ ಪೂರ್ವೇ᳚ ಪ್ರೋಷ್ಠಪ॒ದಾಃ । ವೈ॒ಶ್ವಾ॒ನ॒ರ-ಮ್ಪ॒ರಸ್ತಾ᳚-ದ್ವೈಶ್ವಾವಸ॒ವ-ಮ॒ವಸ್ತಾ᳚ತ್ ॥ ಅಹೇ᳚ರ್ಬು॒ಧ್ನಿಯ॒-ಸ್ಯೋತ್ತ॑ರೇ । ಅ॒ಭಿ॒ಷಿ॒ಞ್ಚನ್ತಃ॑ ಪ॒ರಸ್ತಾ॑-ದಭಿಷು॒ಣ್ವನ್ತೋ॒-ಽವಸ್ತಾ᳚ತ್ ॥ ಪೂ॒ಷ್ಣೋ ರೇ॒ವತೀ᳚ । ಗಾವಃ॑ ಪ॒ರಸ್ತಾ᳚-ದ್ವ॒ಥ್ಸಾ ಅ॒ವಸ್ತಾ᳚ತ್ ॥ ಅ॒ಶ್ವಿನೋ॑ರಶ್ವ॒ಯುಜೌ᳚ । ಗ್ರಾಮಃ॑ ಪ॒ರಸ್ತಾ॒ಥ್ಸೇನಾ॒ ಽವಸ್ತಾ᳚ತ್ ॥ ಯ॒ಮಸ್ಯಾ॑ಪ॒ಭರ॑ಣೀಃ । ಅ॒ಪ॒ಕರ್​ಷ॑ನ್ತಃ ಪ॒ರಸ್ತಾ॑-ದಪ॒ವಹ॑ನ್ತೋ॒-ಽವಸ್ತಾ᳚ತ್ ॥ ಪೂ॒ರ್ಣಾ ಪ॒ಶ್ಚಾದು॒ತ ಪೂ॒ರ್ಣಾ ಪು॒ರಸ್ತಾ॒ದುನ್ಮ॑ಧ್ಯ॒ತಃ ಪೌ᳚ರ್ಣಮಾ॒ಸೀ ಜಿ॑ಗಾಯ । ತಸ್ಯಾ᳚-ನ್ದೇ॒ವಾ ಅಧಿ॑ ಸಂ॒​ವಁಸ॑ನ್ತ ಉತ್ತ॒ಮೇ ನಾಕ॑ ಇ॒ಹ ಮಾ॑ದಯನ್ತಾಮ್ ॥, ಯತ್ತೇ॑ ದೇ॒ವಾ ಅದ॑ಧು ರ್ಭಾಗ॒ಧೇಯ॒ಮಮಾ॑ವಾಸ್ಯೇ ಸಂ॒​ವಁಸ॑ನ್ತೋ ಮಹಿ॒ತ್ವಾ । ಸಾನೋ॑ ಯ॒ಜ್ಞ-ಮ್ಪಿ॑ಪೃಹಿ ವಿಶ್ವವಾರೇ ರ॒ಯಿ-ನ್ನೋ॑ ಧೇಹಿ ಸುಭಗೇ ಸು॒ವೀರ᳚ಮ್ ॥ ॥ 5 ॥
(ಆ॒ರ್ದ್ರಮ॒ವಸ್ತಾ॒-ದ್- ವಹ॑ಮಾನಾ ಅ॒ವಸ್ತಾ॑ - ದ॒ಭ್ಯಾರೂ॑ಢಮ॒ವಸ್ತಾ॒ತ್ - ಪನ್ಥಾ॑ ಅ॒ವಸ್ತಾ᳚-ದ್- ವ॒ಥ್ಸಾ ಅ॒ವಸ್ತಾ॒-ತ್ಪಞ್ಚ॑ ಚ) (ಅ. 1)

ಅನುವಾಕಂ 2 - ಕರ್ಮಾನುಷ್ಠಾನಾರ್​ಹಃ ನಖ್ಷತ್ರರೂಪಃ ಪುಣ್ಯಕಾಲಃ
ಯ-ತ್ಪುಣ್ಯ॒-ನ್ನಖ್ಷ॑ತ್ರಮ್ । ತ-ದ್ಬ-ಟ್ಕು॑ರ್ವೀತೋಪವ್ಯು॒ಷಮ್ । ಯ॒ದಾ ವೈ ಸೂರ್ಯ॑ ಉ॒ದೇತಿ॑ । ಅಥ॒ ನಖ್ಷ॑ತ್ರ॒-ನ್ನೈತಿ॑ । ಯಾವ॑ತಿ॒ ತತ್ರ॒ ಸೂರ್ಯೋ॒ ಗಚ್ಛೇ᳚ತ್ । ಯತ್ರ॑ ಜಘ॒ನ್ಯ॑-ಮ್ಪಶ್ಯೇ᳚ತ್ । ತಾವ॑ತಿ ಕುರ್ವೀತ ಯ-ತ್ಕಾ॒ರೀ ಸ್ಯಾತ್ । ಪು॒ಣ್ಯಾ॒ಹ ಏ॒ವ ಕು॑ರುತೇ । ಏ॒ವಗ್ಂ ಹ॒ ವೈ ಯ॒ಜ್ಞೇಷು॑-ಞ್ಚ ಶ॒ತದ್ಯು॑ಮ್ನ-ಞ್ಚ ಮಾ॒ಥ್ಸ್ಯೋ ನಿ॑ರವಸಾಯ॒ಯಾ-ಞ್ಚ॑ಕಾರ ॥ 6 ॥

ಯೋ ವೈ ನ॑ಖ್ಷ॒ತ್ರಿಯ॑-ಮ್ಪ್ರ॒ಜಾಪ॑ತಿಂ॒-ವೇಁದ॑ । ಉ॒ಭಯೋ॑ರೇನಂ-ಲೋಁ॒ಕಯೋ᳚ರ್ವಿದುಃ । ಹಸ್ತ॑ ಏ॒ವಾಸ್ಯ॒ ಹಸ್ತಃ॑ । ಚಿ॒ತ್ರಾ ಶಿರಃ॑ । ನಿಷ್ಟ್ಯಾ॒ ಹೃದ॑ಯಮ್ । ಊ॒ರೂ ವಿಶಾ॑ಖೇ । ಪ್ರ॒ತಿ॒ಷ್ಠಾ ಽನೂ॑ರಾ॒ಧಾಃ । ಏ॒ಷ ವೈ ನ॑ಖ್ಷ॒ತ್ರಿಯಃ॑ ಪ್ರ॒ಜಾಪ॑ತಿಃ । ಯ ಏ॒ವಂ-ವೇಁದ॑ । ಉ॒ಭಯೋ॑ರೇನಂ-ಲೋಁ॒ಕಯೋ᳚ರ್ವಿದುಃ ॥ 7 ॥

ಅ॒ಸ್ಮಿಗ್ಗ್​ಶ್ಚಾ॒-ಮುಷ್ಮಿಗ್ಗ್॑ಶ್ಚ ॥ ಯಾ-ಙ್ಕಾ॒ಮಯೇ॑ತ ದುಹಿ॒ತರ॑-ಮ್ಪ್ರಿ॒ಯಾ ಸ್ಯಾ॒ದಿತಿ॑ । ತಾ-ನ್ನಿಷ್ಟ್ಯಾ॑ಯಾ-ನ್ದದ್ಯಾತ್ । ಪ್ರಿ॒ಯೈವ ಭ॑ವತಿ । ನೇವ॒ ತು ಪುನ॒ರಾಗ॑ಚ್ಛತಿ ॥ ಅ॒ಭಿ॒ಜಿನ್ನಾಮ॒ ನಖ್ಷ॑ತ್ರಮ್ । ಉ॒ಪರಿ॑ಷ್ಟಾ-ದಷಾ॒ಢಾನಾ᳚ಮ್ । ಅ॒ವಸ್ತಾ᳚ಚ್ಛ್ರೋ॒ಣಾಯೈ᳚ । ದೇ॒ವಾ॒ಸು॒ರಾ-ಸ್ಸಂ​ಯಁ॑ತ್ತಾ ಆಸನ್ನ್ । ತೇ ದೇ॒ವಾಸ್ತಸ್ಮಿ॒-ನ್ನಖ್ಷ॑ತ್ರೇ॒-ಽಭ್ಯ॑ಜಯನ್ನ್ ॥ 8 ॥

ಯದ॒ಭ್ಯಜ॑ಯನ್ನ್ । ತದ॑ಭಿ॒ಜಿತೋ॑-ಽಭಿಜಿ॒ತ್ತ್ವಮ್ । ಯ-ಙ್ಕಾ॒ಮಯೇ॑ತಾ-ನಪಜ॒ಯ್ಯ-ಞ್ಜ॑ಯೇ॒ದಿತಿ॑ । ತಮೇ॒ತಸ್ಮಿ॒-ನ್ನಖ್ಷ॑ತ್ರೇ ಯಾತಯೇತ್ । ಅ॒ನ॒ಪ॒ಜ॒ಯ್ಯಮೇ॒ವ ಜ॑ಯತಿ । ಪಾ॒ಪಪ॑ರಾಜಿತಮಿವ॒ ತು ॥ ಪ್ರ॒ಜಾಪ॑ತಿಃ ಪ॒ಶೂನ॑ಸೃಜತ । ತೇ ನಖ್ಷ॑ತ್ರ-ನ್ನಖ್ಷತ್ರ॒-ಮುಪಾ॑ತಿಷ್ಠನ್ತ । ತೇ ಸ॒ಮಾವ॑ನ್ತ ಏ॒ವಾಭ॑ವನ್ನ್ । ತೇ ರೇ॒ವತೀ॒-ಮುಪಾ॑ತಿಷ್ಠನ್ತ ॥ 9 ॥

ತೇ ರೇ॒ವತ್ಯಾ॒-ಮ್ಪ್ರಾಭ॑ವನ್ನ್ । ತಸ್ಮಾ᳚-ದ್ರೇ॒ವತ್ಯಾ᳚-ಮ್ಪಶೂ॒ನಾ-ಙ್ಕು॑ರ್ವೀತ । ಯ-ತ್ಕಿಞ್ಚಾ᳚ರ್ವಾ॒ಚೀನ॒ಗ್ಂ॒ ಸೋಮಾ᳚ತ್ । ಪ್ರೈವ ಭ॑ವನ್ತಿ ॥ ಸ॒ಲಿ॒ಲಂ-ವಾಁ ಇ॒ದಮ॑ನ್ತ॒ರಾಸೀ᳚ತ್ । ಯದತ॑ರನ್ನ್ । ತ-ತ್ತಾರ॑ಕಾಣಾ-ನ್ತಾರಕ॒ತ್ವಮ್ । ಯೋ ವಾ ಇ॒ಹ ಯಜ॑ತೇ । ಅ॒ಮುಗ್ಂ ಸಲೋ॒ಕ-ನ್ನ॑ಖ್ಷತೇ । ತನ್ನಖ್ಷ॑ತ್ರಾಣಾ-ನ್ನಖ್ಷತ್ರ॒ತ್ವಮ್ ॥ 10 ॥

ದೇ॒ವ॒ಗೃ॒ಹಾ ವೈ ನಖ್ಷ॑ತ್ರಾಣಿ । ಯ ಏ॒ವಂ-ವೇಁದ॑ । ಗೃ॒ಹ್ಯೇ॑ವ ಭ॑ವತಿ ॥ ಯಾನಿ॒ ವಾ ಇ॒ಮಾನಿ॑ ಪೃಥಿ॒ವ್ಯಾಶ್ಚಿ॒ತ್ರಾಣಿ॑ । ತಾನಿ॒ ನಖ್ಷ॑ತ್ರಾಣಿ । ತಸ್ಮಾ॑-ದಶ್ಲೀ॒ಲನಾ॑ಮಗ್ಗ್​-ಶ್ಚಿ॒ತ್ರೇ । ನಾವ॑ಸ್ಯೇ॒ನ್ನ ಯ॑ಜೇತ । ಯಥಾ॑ ಪಾಪಾ॒ಹೇ ಕು॑ರು॒ತೇ । ತಾ॒ದೃಗೇ॒ವ ತತ್ ॥ ದೇ॒ವ॒ನ॒ಖ್ಷ॒ತ್ರಾಣಿ॒ ವಾ ಅ॒ನ್ಯಾನಿ॑ ॥ 11 ॥

ಯ॒ಮ॒ನ॒ಖ್ಷ॒ತ್ರಾಣ್ಯ॒ನ್ಯಾನಿ॑ । ಕೃತ್ತಿ॑ಕಾಃ ಪ್ರಥ॒ಮಮ್ । ವಿಶಾ॑ಖೇ ಉತ್ತ॒ಮಮ್ । ತಾನಿ॑ ದೇವನಖ್ಷ॒ತ್ರಾಣಿ॑ । ಅ॒ನೂ॒ರಾ॒ಧಾಃ ಪ್ರ॑ಥ॒ಮಮ್ । ಅ॒ಪ॒ಭರ॑ಣೀ-ರುತ್ತ॒ಮಮ್ । ತಾನಿ॑ ಯಮನಖ್ಷ॒ತ್ರಾಣಿ॑ । ಯಾನಿ॑ ದೇವನಖ್ಷ॒ತ್ರಾಣಿ॑ । ತಾನಿ॒ ದಖ್ಷಿ॑ಣೇನ॒ ಪರಿ॑ಯನ್ತಿ । ಯಾನಿ॑ ಯಮನಖ್ಷ॒ತ್ರಾಣಿ॑ ॥ 12 ॥

ತಾನ್ಯುತ್ತ॑ರೇಣ ॥ ಅನ್ವೇ॑ಷಾಮರಾ॒ಥ್ಸ್ಮೇತಿ॑ । ತದ॑ನೂರಾ॒ಧಾಃ । ಜ್ಯೇ॒ಷ್ಠಮೇ॑ಷಾ-ಮವಧಿ॒ಷ್ಮೇತಿ॑ । ತಜ್ಜ್ಯೇ᳚ಷ್ಠ॒ಘ್ನೀ । ಮೂಲ॑ಮೇಷಾಮವೃಖ್ಷಾ॒ಮೇತಿ॑ । ತ-ನ್ಮೂ॑ಲ॒ವರ್​ಹ॑ಣೀ । ಯನ್ನಾಸ॑ಹನ್ತ । ತದ॑ಷಾ॒ಢಾಃ । ಯದಶ್ಲೋ॑ಣತ್ ॥ 13 ॥

ತಚ್ಛ್ರೋ॒ಣಾ । ಯದಶೃ॑ಣೋತ್ । ತಚ್ಛ್ರವಿ॑ಷ್ಠಾಃ । ಯಚ್ಛ॒ತ-ಮಭಿ॑ಷಜ್ಯನ್ನ್ । ತಚ್ಛ॒ತಭಿ॑ಷಕ್ । ಪ್ರೋ॒ಷ್ಠ॒ಪ॒ದೇಷೂದ॑ಯಚ್ಛನ್ತ । ರೇ॒ವತ್ಯಾ॑ಮರವನ್ತ । ಅ॒ಶ್ವ॒ಯುಜೋ॑ರಯುಞ್ಜತ । ಅ॒ಪ॒ಭರ॑ಣೀ॒ಷ್ವ ಪಾ॑ವಹನ್ನ್ । ತಾನಿ॒ ವಾ ಏ॒ತಾನಿ॑ ಯಮನಖ್ಷ॒ತ್ರಾಣಿ॑ ॥ ಯಾನ್ಯೇ॒ವ ದೇ॑ವನಖ್ಷ॒ತ್ರಾಣಿ॑ । ತೇಷು॑ ಕುರ್ವೀತ ಯತ್ಕಾ॒ರೀ ಸ್ಯಾತ್ । ಪು॒ಣ್ಯಾ॒ಹ ಏ॒ವ ಕು॑ರುತೇ ॥ 14 ॥
(ಚ॒ಕಾ॒ - ರೈ॒ವಂ-ವೇಁದೋ॒ಭಯೋ॑ ರೇನಂ-ಲೋಁ॒ಕಯೋ᳚ರ್ವಿದು - ರಜಯನ್ - ರೇ॒ವತೀ॒ಮುಪಾ॑ತಿಷ್ಠನ್ತ - ನಖ್ಷತ್ರ॒ತ್ವ - ಮ॒ನ್ಯಾನಿ॒ - ಯಾನಿ॑ ಯಮನಖ್ಷ॒ತ್ರಾ - ಣ್ಯಶ್ಲೋ॑ಣ--ದ್ಯಮನಖ್ಷ॒ತ್ರಾಣಿ॒ ತ್ರೀಣಿ॑ ಚ) (ಅ. 2)

ಅನುವಾಕಂ 3 - ಕರ್ಮಾನುಷ್ಠಾನಾರ್​ಹಃ ದಿವಸಭಾಗರೂಪಃ ಹೇಯೋಪಾದೇಯಕಾಲ ವಿಭಾಗಃ
ದೇ॒ವಸ್ಯ॑ ಸವಿ॒ತುಃ ಪ್ರಾ॒ತಃ ಪ್ರ॑ಸ॒ವಃ ಪ್ರಾ॒ಣಃ । ವರು॑ಣಸ್ಯ ಸಾ॒ಯಮಾ॑ಸ॒ವೋ॑-ಽಪಾ॒ನಃ ॥ ಯ-ತ್ಪ್ರ॑ತೀ॒ಚೀನ॑-ಮ್ಪ್ರಾತ॒ಸ್ತನಾ᳚ತ್ । ಪ್ರಾ॒ಚೀನಗ್ಂ॑ ಸಙ್ಗ॒ವಾತ್ । ತತೋ॑ ದೇ॒ವಾ ಅ॑ಗ್ನಿಷ್ಟೋ॒ಮ-ನ್ನಿರ॑ಮಿಮತ । ತತ್-ತದಾತ್ತ॑ವೀರ್ಯ-ನ್ನಿರ್ಮಾ॒ರ್ಗಃ ॥ ಮಿ॒ತ್ರಸ್ಯ॑ ಸಙ್ಗ॒ವಃ । ತತ್-ಪುಣ್ಯ॑-ನ್ತೇಜ॒ಸ್ವ್ಯಹಃ॑ ।
ತಸ್ಮಾ॒ತ್ತರ್​ಹಿ॑ ಪ॒ಶವ॑-ಸ್ಸ॒ಮಾಯ॑ನ್ತಿ ॥ ಯ-ತ್ಪ್ರ॑ತೀ॒ಚೀನಗ್ಂ॑ ಸಙ್ಗ॒ವಾತ್ ॥ 15 ॥

ಪ್ರಾ॒ಚೀನ॑-ಮ್ಮ॒ದ್ಧ್ಯನ್ದಿ॑ನಾತ್ । ತತೋ॑ ದೇ॒ವಾ ಉ॒ಕ್ಥ್ಯ॑-ನ್ನಿರ॑ಮಿಮತ । ತತ್-ತದಾತ್ತ॑ವೀರ್ಯ-ನ್ನಿರ್ಮಾ॒ರ್ಗಃ ॥ ಬೃಹ॒ಸ್ಪತೇ᳚-ರ್ಮ॒ದ್ಧ್ಯನ್ದಿ॑ನಃ । ತತ್-ಪುಣ್ಯ॑-ನ್ತೇಜ॒ಸ್ವ್ಯಹಃ॑ । ತಸ್ಮಾ॒ತ್ತರ್​ಹಿ॒ ತೇಖ್ಷ್ಣಿ॑ಷ್ಠ-ನ್ತಪತಿ ॥ ಯತ್-ಪ್ರ॑ತೀ॒ಚೀನ॑-ಮ್ಮ॒ದ್ಧ್ಯನ್ದಿ॑ನಾತ್ । ಪ್ರಾ॒ಚೀನ॑-ಮಪರಾ॒ಹ್ಣಾತ್ । ತತೋ॑ ದೇ॒ವಾ-ಷ್ಷೋ॑ಡ॒ಶಿನ॒-ನ್ನಿರ॑ಮಿಮತ । ತತ್ತದಾತ್ತ॑ವೀರ್ಯ-ನ್ನಿರ್ಮಾ॒ರ್ಗಃ ॥ 16 ॥

ಭಗ॑ಸ್ಯಾಪರಾ॒ಹ್ಣಃ । ತತ್-ಪುಣ್ಯ॑-ನ್ತೇಜ॒ಸ್ವ್ಯಹಃ॑ । ತಸ್ಮಾ॑ದಪರಾ॒ಹ್ಣೇ ಕು॑ಮಾ॒ರ್ಯೋ॑ ಭಗ॑ಮಿ॒ಚ್ಛಮಾ॑ನಾ-ಶ್ಚರನ್ತಿ ॥ ಯತ್-ಪ್ರ॑ತೀ॒ಚೀನ॑ಮಪರಾ॒ಹ್ಣಾತ್ । ಪ್ರಾ॒ಚೀನಗ್ಂ॑ ಸಾ॒ಯಾತ್ । ತತೋ॑ ದೇ॒ವಾ ಅ॑ತಿರಾ॒ತ್ರ-ನ್ನಿರ॑ಮಿಮತ । ತತ್ತದಾತ್ತ॑ವೀರ್ಯ-ನ್ನಿರ್ಮಾ॒ರ್ಗಃ ॥ ವರು॑ಣಸ್ಯ ಸಾ॒ಯಮ್ । ತತ್-ಪುಣ್ಯ॑-ನ್ತೇಜ॒ಸ್ವ್ಯಹಃ॑ । ತಸ್ಮಾ॒ತ್ತರ್​ಹಿ॒ ನಾನೃ॑ತಂ-ವಁದೇತ್ ॥ 17 ॥

ಬ್ರಾ॒ಹ್ಮ॒ಣೋ ವಾ ಅ॑ಷ್ಟಾವಿ॒ಗ್ಂ॒ಶೋ ನಖ್ಷ॑ತ್ರಾಣಾಮ್ । ಸ॒ಮಾ॒ನಸ್ಯಾಹ್ನಃ॒ ಪಞ್ಚ॒ ಪುಣ್ಯಾ॑ನಿ॒ ನಖ್ಷ॑ತ್ರಾಣಿ । ಚ॒ತ್ವಾರ್ಯ॑ಶ್ಲೀ॒ಲಾನಿ॑ । ತಾನಿ॒ ನವ॑ । ಯಚ್ಚ॑ ಪ॒ರಸ್ತಾ॒ನ್ನಖ್ಷ॑ತ್ರಾಣಾಂ॒-ಯಁಚ್ಚಾ॒ವಸ್ತಾ᳚ತ್ । ತಾನ್ಯೇಕಾ॑ದಶ । ಬ್ರಾ॒ಹ್ಮ॒ಣೋ ದ್ವಾ॑ದ॒ಶಃ । ಯ ಏ॒ವಂ-ವಿಁ॒ದ್ವಾನ್-ಥ್ಸಂ॑​ವಁಥ್ಸ॒ರಂ-ವ್ರಁ॒ತ-ಞ್ಚರ॑ತಿ । ಸಂ॒​ವಁ॒ಥ್ಸ॒ರೇಣೈ॒ವಾಸ್ಯ॑ ವ್ರ॒ತ-ಙ್ಗು॒ಪ್ತ-ಮ್ಭ॑ವತಿ ॥ ಸ॒ಮಾ॒ನಸ್ಯಾಹ್ನಃ॒ ಪಞ್ಚ॒ ಪುಣ್ಯಾ॑ನಿ॒ ನಖ್ಷ॑ತ್ರಾಣಿ । ಚ॒ತ್ವಾರ್ಯ॑ಶ್ಲೀ॒ಲಾನಿ॑ । ತಾನಿ॒ ನವ॑ । ಆ॒ಗ್ನೇ॒ಯೀ ರಾತ್ರಿಃ॑ । ಐ॒ನ್ದ್ರಮಹಃ॑ । ತಾನ್ಯೇಕಾ॑ದಶ । ಆ॒ದಿ॒ತ್ಯೋ ದ್ವಾ॑ದ॒ಶಃ । ಯ ಏ॒ವಂ-ವಿಁ॒ದ್ವಾನ್-ಥ್ಸಂ॑​ವಁಥ್ಸ॒ರಂ-ವ್ರಁ॒ತ-ಞ್ಚರ॑ತಿ । ಸಂ॒​ವಁ॒ಥ್ಸ॒ರೇಣೈ॒ವಾಸ್ಯ॑ ವ್ರ॒ತ-ಙ್ಗು॒ಪ್ತ-ಮ್ಭ॑ವತಿ ॥ 18 ॥
(ಸ॒ಙ್ಗ॒ವಾಥ್ - ಷೋ॑ಡ॒ಶಿನ॒-ನ್ನಿರ॑ಮಿಮತ॒ ತತ್ತದಾತ್ತ॑ವೀರ್ಯ-ನ್ನಿರ್ಮಾ॒ಗೋ - ವ॑ದೇ-ದ್- ಭವತಿ ಸಮಾ॒ನಸ್ಯಾಹ್ನಃ॒ ಪಞ್ಚ॒ ಪುಣ್ಯಾ॑ನಿ॒ ನಖ್ಷ॑ತ್ರಾಣ್ಯ॒ಷ್ಟೌ ಚ॑) (ಅ. 3)

ಅನುವಾಕಂ 4 - ಸೋಮಶೇಷಭೂತಾ ಪಾತ್ರಸ್ತುತಿಃ.(ಆಧ್ವರಬ್ರಾಹ್ಮಣಶೇಷಃ)
ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ಕತಿ॒ ಪಾತ್ರಾ॑ಣಿ ಯ॒ಜ್ಞಂ-ವಁ॑ಹ॒ನ್ತೀತಿ॑ । ತ್ರಯೋ॑ದ॒ಶೇತಿ॑ ಬ್ರೂಯಾತ್ । ಸ ಯದ್ಬ್ರೂ॒ಯಾತ್ । ಕಸ್ತಾನಿ॒ ನಿರ॑ಮಿಮೀ॒ತೇತಿ॑ । ಪ್ರ॒ಜಾಪ॑ತಿ॒ರಿತಿ॑ ಬ್ರೂಯಾತ್ । ಸ ಯದ್ಬ್ರೂ॒ಯಾತ್ । ಕುತ॒ಸ್ತಾನಿ॒ ನಿರ॑ಮಿಮೀ॒ತೇತಿ॑ । ಆ॒ತ್ಮನ॒ ಇತಿ॑ । ಪ್ರಾ॒ಣಾ॒ಪಾ॒ನಾಭ್ಯಾ॑-ಮೇ॒ವೋಪಾಗ್॑-ಶ್ವನ್ತರ್ಯಾ॒ಮೌ ನಿರ॑ಮಿಮೀತ ॥ 19 ॥

ವ್ಯಾ॒ನಾದು॑ಪಾಗ್ಂಶು॒ ಸವ॑ನಮ್ । ವಾ॒ಚ ಐ᳚ನ್ದ್ರವಾಯ॒ವಮ್ । ದ॒ಖ್ಷ॒ಕ್ರ॒ತುಭ್ಯಾ᳚-ಮ್ಮೈತ್ರಾವರು॒ಣಮ್ । ಶ್ರೋತ್ರಾ॑ದಾಶ್ವಿ॒ನಮ್ । ಚಖ್ಷು॑ಷ-ಶ್ಶು॒ಕ್ರಾ ಮ॒ನ್ಥಿನೌ᳚ । ಆ॒ತ್ಮನ॑ ಆಗ್ರಯ॒ಣಮ್ । ಅಙ್ಗೇ᳚ಭ್ಯ ಉ॒ಕ್ಥ್ಯ᳚ಮ್ । ಆಯು॑ಷೋ ಧ್ರು॒ವಮ್ । ಪ್ರ॒ತಿ॒ಷ್ಠಾಯಾ॑ ಋತುಪಾ॒ತ್ರೇ ॥ ಯ॒ಜ್ಞಂ-ವಾಁವ ತ-ಮ್ಪ್ರ॒ಜಾಪ॑ತಿ॒-ರ್ನಿರ॑ಮಿಮೀತ । ಸ ನಿರ್ಮಿ॑ತೋ॒ ನಾದ್ಧ್ರಿ॑ಯತ॒ ಸಮ॑ವ್ಲೀಯತ । ಸ ಏ॒ತಾ-ನ್ಪ್ರ॒ಜಾಪ॑ತಿ-ರಪಿವಾ॒ಪಾನ॑-ಪಶ್ಯತ್ । ತಾನ್ನಿರ॑ವಪತ್ । ತೈರ್ವೈ ಸ ಯ॒ಜ್ಞಮಪ್ಯ॑ವಪತ್ । ಯದ॑ಪಿವಾ॒ಪಾ ಭವ॑ನ್ತಿ । ಯ॒ಜ್ಞಸ್ಯ॒ ಧೃತ್ಯಾ॒ ಅಸಂ॑​ವ್ಲಁಯಾಯ ॥ 20 ॥
(ಉ॒ಪಾ॒ಗ್॒ಶ್ವ॒ನ್ತ॒ರ್ಯಾ॒ಮೌ ನಿರ॑ಮಿಮೀತಾ- ಮಿಮೀತ॒ ಷಟ್ ಚ॑) (ಅ. 4)

ಅನುವಾಕಂ 5 - ಚಾತುರ್ಮಾಸ್ಯಶೇಷಾ ವಪನಮನ್ತ್ರಾಃ, (ರಾಜಸೂಯಬ್ರಾಹ್ಮಣಂ)
ಋ॒ತಮೇ॒ವ ಪ॑ರಮೇ॒ಷ್ಠಿ । ಋ॒ತ-ನ್ನಾತ್ಯೇ॑ತಿ॒ ಕಿ-ಞ್ಚ॒ನ । ಋ॒ತೇ ಸ॑ಮು॒ದ್ರ ಆಹಿ॑ತಃ । ಋ॒ತೇ ಭೂಮಿ॑ರಿ॒ಯಗ್ಗ್​ ಶ್ರಿ॒ತಾ । ಅ॒ಗ್ನಿಸ್ತಿ॒ಗ್ಮೇನ॑ ಶೋ॒ಚಿಷಾ᳚ । ತಪ॒ ಆಕ್ರಾ᳚ನ್ತ-ಮು॒ಷ್ಣಿಹಾ᳚ । ಶಿರ॒ಸ್ತಪ॒ಸ್ಯಾಹಿ॑ತಮ್ । ವೈ॒ಶ್ವಾ॒ನ॒ರಸ್ಯ॒ ತೇಜ॑ಸಾ । ಋ॒ತೇನಾ᳚ಸ್ಯ॒ ನಿವ॑ರ್ತಯೇ । ಸ॒ತ್ಯೇನ॒ ಪರಿ॑ವರ್ತಯೇ ॥ 21 ॥

ತಪ॑ಸಾ॒-ಽಸ್ಯಾನು॑ವರ್ತಯೇ । ಶಿ॒ವೇನಾ॒ಸ್ಯೋಪ॑ವರ್ತಯೇ । ಶ॒ಗ್ಮೇನಾ᳚ಸ್ಯಾ॒-ಭಿವ॑ರ್ತಯೇ । ತದೃ॒ತ-ನ್ತ-ಥ್ಸ॒ತ್ಯಮ್ । ತ-ದ್ವ್ರ॒ತ-ನ್ತಚ್ಛ॑ಕೇಯಮ್ । ತೇನ॑ ಶಕೇಯ॒-ನ್ತೇನ॑ ರಾದ್ಧ್ಯಾಸಮ್ ॥ ಯ-ದ್ಘ॒ರ್ಮಃ ಪ॒ರ್ಯವ॑ರ್ತಯತ್ । ಅನ್ತಾ᳚-ನ್ಪೃಥಿ॒ವ್ಯಾ ದಿ॒ವಃ । ಅ॒ಗ್ನಿರೀಶಾ॑ನ॒ ಓಜ॑ಸಾ । ವರು॑ಣೋ ಧೀ॒ತಿಭಿ॑-ಸ್ಸ॒ಹ ॥ 22 ॥

ಇನ್ದ್ರೋ॑ ಮ॒ರುದ್ಭಿ॒-ಸ್ಸಖಿ॑ಭಿ-ಸ್ಸ॒ಹ ॥ ಅ॒ಗ್ನಿಸ್ತಿ॒ಗ್ಮೇನ॑ ಶೋ॒ಚಿಷಾ᳚ । ತಪ॒ ಆಕ್ರಾ᳚ನ್ತ-ಮು॒ಷ್ಣಿಹಾ᳚ । ಶಿರ॒ಸ್ತಪ॒ಸ್ಯಾಹಿ॑ತಮ್ । ವೈ॒ಶ್ವಾ॒ನ॒ರಸ್ಯ॒ ತೇಜ॑ಸಾ । ಋ॒ತೇನಾ᳚ಸ್ಯ॒ ನಿವ॑ರ್ತಯೇ । ಸ॒ತ್ಯೇನ॒ ಪರಿ॑ವರ್ತಯೇ । ತಪ॑ಸಾ॒ ಽಸ್ಯಾನು॑ವರ್ತಯೇ । ಶಿ॒ವೇನಾ॒ಸ್ಯೋಪ॑ವರ್ತಯೇ । ಶ॒ಗ್ಮೇನಾ᳚ಸ್ಯಾ॒ಭಿವ॑ರ್ತಯೇ ॥ 23 ॥

ತದೃ॒ತ-ನ್ತ-ಥ್ಸ॒ತ್ಯಮ್ । ತ-ದ್ವ್ರ॒ತ-ನ್ತಚ್ಛ॑ಕೇಯಮ್ । ತೇನ॑ ಶಕೇಯ॒-ನ್ತೇನ॑ ರಾದ್ಧ್ಯಾಸಮ್ ॥ ಯೋ ಅ॒ಸ್ಯಾಃ ಪೃ॑ಥಿ॒ವ್ಯಾಸ್ತ್ವ॒ಚಿ । ನಿ॒ವ॒ರ್ತಯ॒ತ್ಯೋಷ॑ಧೀಃ । ಅ॒ಗ್ನಿರೀಶಾ॑ನ॒ ಓಜ॑ಸಾ । ವರು॑ಣೋ ಧೀ॒ತಿಭಿ॑-ಸ್ಸ॒ಹ । ಇನ್ದ್ರೋ॑ ಮ॒ರುದ್ಭಿ॒-ಸ್ಸಖಿ॑ಭಿ-ಸ್ಸ॒ಹ ॥ ಅ॒ಗ್ನಿಸ್ತಿ॒ಗ್ಮೇನ॑ ಶೋ॒ಚಿಷಾ᳚ । ತಪ॒ ಆಕ್ರಾ᳚ನ್ತ-ಮು॒ಷ್ಣಿಹಾ᳚ ॥ 24 ॥

ಶಿರ॒ಸ್ತಪ॒ಸ್ಯಾಹಿ॑ತಮ್ । ವೈ॒ಶ್ವಾ॒ನ॒ರಸ್ಯ॒ ತೇಜ॑ಸಾ । ಋ॒ತೇನಾ᳚ಸ್ಯ॒ ನಿವ॑ರ್ತಯೇ । ಸ॒ತ್ಯೇನ॒ ಪರಿ॑ವರ್ತಯೇ । ತಪ॑ಸಾ॒ ಽಸ್ಯಾನು॑ವರ್ತಯೇ । ಶಿ॒ವೇನಾ॒ಸ್ಯೋಪ॑ವರ್ತಯೇ । ಶ॒ಗ್ಮೇನಾ᳚ಸ್ಯಾ॒-ಭಿವ॑ರ್ತಯೇ । ತದೃ॒ತ-ನ್ತ-ಥ್ಸ॒ತ್ಯಮ್ । ತ-ದ್ವ॒ತ-ನ್ತಚ್ಛ॑ಕೇಯಮ್ । ತೇನ॑ ಶಕೇಯ॒-ನ್ತೇನ॑ ರಾದ್ಧ್ಯಾಸಮ್ ॥ 25 ॥

ಏಕ॒-ಮ್ಮಾಸ॒-ಮುದ॑ಸೃಜತ್ । ಪ॒ರ॒ಮೇ॒ಷ್ಠೀ ಪ್ರ॒ಜಾಭ್ಯಃ॑ । ತೇನಾ᳚ಭ್ಯೋ॒ ಮಹ॒ ಆವ॑ಹತ್ । ಅ॒ಮೃತ॒-ಮ್ಮರ್ತ್ಯಾ᳚ಭ್ಯಃ । ಪ್ರ॒ಜಾಮನು॒ ಪ್ರಜಾ॑ಯಸೇ । ತದು॑ ತೇ ಮರ್ತ್ಯಾ॒ಮೃತ᳚ಮ್ । ಯೇನ॒ ಮಾಸಾ॑ ಅರ್ಧಮಾ॒ಸಾಃ । ಋ॒ತವಃ॑ ಪರಿವಥ್ಸ॒ರಾಃ । ಯೇನ॒ ತೇ ತೇ᳚ ಪ್ರಜಾಪತೇ । ಈ॒ಜಾ॒ನಸ್ಯ॒ ನ್ಯವ॑ರ್ತಯನ್ನ್ ॥ 26 ॥

ತೇನಾ॒ಹಮ॒ಸ್ಯ ಬ್ರಹ್ಮ॑ಣಾ । ನಿವ॑ರ್ತಯಾಮಿ ಜೀ॒ವಸೇ᳚ ॥ ಅ॒ಗ್ನಿಸ್ತಿ॒ಗ್ಮೇನ॑ ಶೋ॒ಚಿಷಾ᳚ । ತಪ॒ ಆಕ್ರಾ᳚ನ್ತ-ಮು॒ಷ್ಣಿಹಾ᳚ । ಶಿರ॒ಸ್ತಪ॒ಸ್ಯಾಹಿ॑ತಮ್ । ವೈ॒ಶ್ವಾ॒ನ॒ರಸ್ಯ॒ ತೇಜ॑ಸಾ । ಋ॒ತೇನಾ᳚ಸ್ಯ॒ ನಿವ॑ರ್ತಯೇ । ಸ॒ತ್ಯೇನ॒ ಪರಿ॑ವರ್ತಯೇ । ತಪ॑ಸಾ॒ ಽಸ್ಯಾನು॑ವರ್ತಯೇ । ಶಿ॒ವೇನಾ॒ಸ್ಯೋಪ॑ವರ್ತಯೇ । ಶ॒ಗ್ಮೇನಾ᳚ಸ್ಯಾ॒ಭಿವ॑ರ್ತಯೇ । ತದೃ॒ತ-ನ್ತ-ಥ್ಸ॒ತ್ಯಮ್ । ತ-ದ್ವ್ರ॒ತ-ನ್ತಚ್ಛ॑ಕೇಯಮ್ । ತೇನ॑ ಶಕೇಯ॒-ನ್ತೇನ॑ ರಾದ್ಧ್ಯಾಸಮ್ ॥ 27 ॥
(ಪರಿ॑ವರ್ತಯೇ - ಸ॒ಹಾ - ಭಿವ॑ರ್ತಯ - ಉ॒ಷ್ಣಿಹಾ॑ - ರಾದ್ಧ್ಯಾಸಂ॒ - ನ್ಯವ॑ರ್ತಯ॒ನ್ - ನುಪ॑ವರ್ತಯೇ ಚ॒ತ್ವಾರಿ॑ ಚ) (ಅ. 5)

ಅನುವಾಕಂ 6 - ಚಾತುರ್ಮಾಸ್ಯಶೇಷಾ ವಪನವಿಧಿಃ (ರಾಜಸೂಯಬ್ರಾಹ್ಮಣಂ)
ದೇ॒ವಾ ವೈ ಯ-ದ್ಯ॒ಜ್ಞೇ ಽಕು॑ರ್ವತ । ತದಸು॑ರಾ ಅಕುರ್ವತ । ತೇ-ಽಸು॑ರಾ ಊ॒ರ್ಧ್ವ-ಮ್ಪೃ॒ಷ್ಠೇಭ್ಯೋ॒ ನಾಪ॑ಶ್ಯನ್ನ್ । ತೇ ಕೇಶಾ॒ನಗ್ರೇ॑-ಽವಪನ್ತ । ಅಥ॒ ಶ್ಮಶ್ರೂ॑ಣಿ । ಅಥೋ॑ಪಪ॒ಖ್ಷೌ । ತತ॒ಸ್ತೇ-ಽವಾ᳚ಞ್ಚ ಆಯನ್ನ್ । ಪರಾ॑-ಽಭವನ್ನ್ । ಯಸ್ಯೈ॒ವಂ-ವಁಪ॑ನ್ತಿ । ಅವಾಂ॑ಏತಿ ॥ 28 ॥

ಅಥೋ॒ ಪರೈ॒ವ ಭ॑ವತಿ । ಅಥ॑ ದೇ॒ವಾ ಊ॒ರ್ಧ್ವ-ಮ್ಪೃ॒ಷ್ಠೇಭ್ಯೋ॑-ಽಪಶ್ಯನ್ನ್ । ತ ಉ॑ಪಪ॒ಖ್ಷಾವಗ್ರೇ॑-ಽವಪನ್ತ । ಅಥ॒ ಶ್ಮಶ್ರೂ॑ಣಿ । ಅಥ॒ ಕೇಶಾನ್॑ । ತತ॒ಸ್ತೇ॑-ಽಭವನ್ನ್ । ಸು॒ವ॒ರ್ಗಂ-ಲೋಁ॒ಕಮಾ॑ಯನ್ನ್ । ಯಸ್ಯೈ॒ವಂ-ವಁಪ॑ನ್ತಿ । ಭವ॑ತ್ಯಾ॒ತ್ಮನಾ᳚ । ಅಥೋ॑ ಸುವ॒ರ್ಗಂ-ಲೋಁ॒ಕಮೇ॑ತಿ ॥ 29 ॥

ಅಥೈ॒ತ-ನ್ಮನು॑-ರ್ವ॒ಪ್ತ್ರೇ ಮಿ॑ಥು॒ನ-ಮ॑ಪಶ್ಯತ್ । ಸ ಶ್ಮಶ್ರೂ॒ಣ್ಯಗ್ರೇ॑-ಽವಪತ । ಅಥೋ॑ಪಪ॒ಖ್ಷೌ । ಅಥ॒ ಕೇಶಾನ್॑ । ತತೋ॒ ವೈ ಸ ಪ್ರಾಜಾ॑ಯತ ಪ್ರ॒ಜಯಾ॑ ಪ॒ಶುಭಿಃ॑ । ಯಸ್ಯೈ॒ವಂ-ವಁಪ॑ನ್ತಿ । ಪ್ರ ಪ್ರ॒ಜಯಾ॑ ಪ॒ಶುಭಿ॑-ರ್ಮಿಥು॒ನೈ-ರ್ಜಾ॑ಯತೇ ॥ ದೇ॒ವಾ॒ಸು॒ರಾ-ಸ್ಸಂ​ಯಁ॑ತ್ತಾ ಆಸನ್ನ್ । ತೇ ಸಂ॑​ವಁಥ್ಸ॒ರೇ ವ್ಯಾಯ॑ಚ್ಛನ್ತ । ತಾ-ನ್ದೇ॒ವಾಶ್ಚಾ॑ತು-ರ್ಮಾ॒ಸ್ಯೈರೇ॒ವಾಭಿ ಪ್ರಾಯು॑ಞ್ಜತ ॥ 30 ॥

ವೈ॒ಶ್ವ॒ದೇ॒ವೇನ॑ ಚ॒ತುರೋ॑ ಮಾ॒ಸೋ॑-ಽವೃಞ್ಜ॒ತೇನ್ದ್ರ॑ರಾಜಾನಃ । ತಾಞ್ಛೀ॒ರ್॒ಷನ್ನಿ ಚಾವ॑ರ್ತಯನ್ತ॒ ಪರಿ॑ ಚ । ವ॒ರು॒ಣ॒ ಪ್ರ॒ಘಾ॒ಸೈ-ಶ್ಚ॒ತುರೋ॑ ಮಾ॒ಸೋ॑-ಽವೃಞ್ಜತ॒ ವರು॑ಣರಾಜಾನಃ । ತಾಞ್ಛೀ॒ರ್॒ಷನ್ನಿ ಚಾವ॑ರ್ತಯನ್ತ॒ ಪರಿ॑ ಚ । ಸಾ॒ಕ॒ಮೇ॒ಧೈಶ್ಚ॒ತುರೋ॑ ಮಾ॒ಸೋ॑-ಽವೃಞ್ಜತ॒ ಸೋಮ॑ರಾಜಾನಃ । ತಾಞ್ಛೀ॒ರ॒.ಷನ್ನಿ ಚಾವ॑ರ್ತಯನ್ತ॒ ಪರಿ॑ ಚ । ಯಾ ಸಂ॑​ವಁಥ್ಸ॒ರ ಉ॑ಪಜೀ॒ವಾ ಽಽಸೀ᳚ತ್ । ತಾಮೇ॑ಷಾ-ಮವೃಞ್ಜತ । ತತೋ॑ ದೇ॒ವಾ ಅಭ॑ವನ್ನ್ । ಪರಾ-ಽಸು॑ರಾಃ ॥ 31 ॥

ಯ ಏ॒ವಂ-ವಿಁ॒ದ್ವಾಗ್​-ಶ್ಚಾ॑ತುರ್ಮಾ॒ಸ್ಯೈ-ರ್ಯಜ॑ತೇ । ಭ್ರಾತೃ॑ವ್ಯಸ್ಯೈ॒ವ ಮಾ॒ಸೋ ವೃ॒ಕ್ತ್ವಾ । ಶೀ॒ರ್॒ಷನ್ನಿ ಚ॑ ವ॒ರ್ತಯ॑ತೇ॒ ಪರಿ॑ ಚ । ಯೈಷಾ ಸಂ॑​ವಁಥ್ಸ॒ರ ಉ॑ಪಜೀ॒ವಾ । ವೃ॒ಙ್ಕ್ತೇ ತಾ-ಮ್ಭ್ರಾತೃ॑ವ್ಯಸ್ಯ । ಖ್ಷು॒ಧಾ ಽಸ್ಯ॒ ಭ್ರಾತೃ॑ವ್ಯಃ॒ ಪರಾ॑ ಭವತಿ ॥ ಲೋ॒ಹಿ॒ತಾ॒ಯ॒ಸೇನ॒ ನಿವ॑ರ್ತಯತೇ । ಯದ್ವಾ ಇ॒ಮಾಮ॒ಗ್ನಿರ್-ಋ॒ತಾವಾಗ॑ತೇ ನಿವ॒ರ್ತಯ॑ತಿ । ಏ॒ತದೇ॒ವೈನಾಗ್ಂ॑ ರೂ॒ಪ-ಙ್ಕೃ॒ತ್ವಾ ನಿವ॑ರ್ತಯತಿ । ಸಾ ತತ॒-ಶ್ಶ್ವ-ಶ್ಶ್ವೋ॒ ಭೂಯ॑ಸೀ॒ ಭವ॑ನ್ತ್ಯೇತಿ ॥ 32 ॥

ಪ್ರಜಾ॑ಯತೇ । ಯ ಏ॒ವಂ-ವಿಁ॒ದ್ವಾಁಲ್ಲೋ॑ಹಿತಾಯ॒ಸೇನ॑ ನಿವ॒ರ್ತಯ॑ತೇ । ಏ॒ತದೇ॒ವ ರೂ॒ಪ-ಙ್ಕೃ॒ತ್ವಾ ನಿವ॑ರ್ತಯತೇ । ಸ ತತ॒-ಶ್ಶ್ವ-ಶ್ಶ್ವೋ॒ ಭೂಯಾ॒ನ್-ಭವ॑ನ್ನೇತಿ । ಪ್ರೈವ ಜಾ॑ಯತೇ ॥ ತ್ರೇ॒ಣ್ಯಾ ಶ॑ಲ॒ಲ್ಯಾ ನಿವ॑ರ್ತಯೇತ । ತ್ರೀಣಿ॑ ತ್ರೀಣಿ॒ ವೈ ದೇ॒ವಾನಾ॑ಮೃ॒ದ್ಧಾನಿ॑ । ತ್ರೀಣಿ॒ ಛನ್ದಾಗ್ಂ॑ಸಿ । ತ್ರೀಣಿ॒ ಸವ॑ನಾನಿ । ತ್ರಯ॑ ಇ॒ಮೇ ಲೋ॒ಕಾಃ ॥ 33 ॥

ಋ॒ದ್ಧ್ಯಾಮೇ॒ವ ತ-ದ್ವೀ॒ರ್ಯ॑ ಏ॒ಷು ಲೋ॒ಕೇಷು॒ ಪ್ರತಿ॑ ತಿಷ್ಠತಿ ॥ ಯಚ್ಚಾ॑ತುರ್ಮಾಸ್ಯಯಾ॒-ಜ್ಯಾ᳚ತ್ಮನೋ॒ ನಾವ॒ದ್ಯೇತ್ । ದೇ॒ವೇಭ್ಯ॒ ಆವೃ॑ಶ್ಚ್ಯೇತ । ಚ॒ತೃ॒ಷು ಚ॑ತೃಷು॒ ಮಾಸೇ॑ಷು॒ ನಿವ॑ರ್ತಯೇತ । ಪ॒ರೋಖ್ಷ॑ಮೇ॒ವ ತ-ದ್ದೇ॒ವೇಭ್ಯ॑ ಆ॒ತ್ಮನೋ-ಽವ॑ದ್ಯ॒ತ್ಯನಾ᳚ ವ್ರಸ್ಕಾಯ ॥ ದೇ॒ವಾನಾಂ॒-ವಾಁ ಏ॒ಷ ಆನೀ॑ತಃ । ಯಶ್ಚಾ॑ತುರ್ಮಾಸ್ಯಯಾ॒ಜೀ । ಯ ಏ॒ವಂ-ವಿಁ॒ದ್ವಾನ್ನಿ ಚ॑ ವ॒ರ್ತಯ॑ತೇ॒ ಪರಿ॑ ಚ । ದೇ॒ವತಾ॑ ಏ॒ವಾಪ್ಯೇ॑ತಿ । ನಾಸ್ಯ॑ ರು॒ದ್ರಃ ಪ್ರ॒ಜಾ-ಮ್ಪ॒ಶೂ-ನ॒ಭಿಮ॑ನ್ಯತೇ ॥ 34 ॥
(ಏ॒ತ್ಯೇ॒- ತ್ಯ॒ - ಯು॒ಞ್ಜ॒ತಾ - ಸು॑ರಾ - ಏತಿ - ಲೋ॒ಕಾ - ಮ॑ನ್ಯತೇ) (ಅ. 6)

ಅನುವಾಕಂ 7 - ಅಗ್ನಿಚಯನಶೇಷಾ ಇಷ್ಟಕೋಪಧಾನಮನ್ತ್ರಾಃ, ತತ್ರ ಸನ್ತತ್ಯಾಖ್ಯೇಷ್ಟಕಾಮನ್ತ್ರಾಃ
ಆಯು॑ಷಃ ಪ್ರಾ॒ಣಗ್ಂ ಸನ್ತ॑ನು । ಪ್ರಾ॒ಣಾದ॑ಪಾ॒ನಗ್ಂ ಸನ್ತ॑ನು । ಅ॒ಪಾ॒ನಾ-ದ್ವ್ಯಾ॒ನಗ್ಂ ಸನ್ತ॑ನು । ವ್ಯಾ॒ನಾಚ್ಚಖ್ಷು॒-ಸ್ಸನ್ತ॑ನು । ಚಖ್ಷು॑ಷ॒-ಶ್ಶ್ರೋತ್ರ॒ಗ್ಂ॒ ಸನ್ತ॑ನು । ಶ್ರೋತ್ರಾ॒-ನ್ಮನ॒-ಸ್ಸನ್ತ॑ನು । ಮನ॑ಸೋ॒ ವಾಚ॒ಗ್ಂ॒ ಸನ್ತ॑ನು । ವಾ॒ಚ ಆ॒ತ್ಮಾನ॒ಗ್ಂ॒ ಸನ್ತ॑ನು । ಆ॒ತ್ಮನಃ॑ ಪೃಥಿ॒ವೀಗ್ಂ ಸನ್ತ॑ನು । ಪೃ॒ಥಿ॒ವ್ಯಾ ಅ॒ನ್ತರಿ॑ಖ್ಷ॒ಗ್ಂ॒ ಸನ್ತ॑ನು । ಅ॒ನ್ತರಿ॑ಖ್ಷಾ॒-ದ್ದಿವ॒ಗ್ಂ॒ ಸನ್ತ॑ನು ।ದಿವ॒-ಸ್ಸುವ॒-ಸ್ಸನ್ತ॑ನು ॥ 35 ॥
(ಅ॒ನ್ತರಿ॑ಖ್ಷ॒ಗ್ಂ॒ ಸನ್ತ॑ನು॒ ದ್ವೇ ಚ॑) (ಅ. 7)

ಅನುವಾಕಂ 8 - ಅಗ್ನಿಚಯನಶೇಷಾ ಥರ್ವಶಿರೋ-ಽಭಿಧಾನಾನಾಮಿಷ್ಟಕಾನಾ-ಮ್ಮನ್ತ್ರಾಃ
ಇನ್ದ್ರೋ॑ ದಧೀ॒ಚೋ ಅ॒ಸ್ಥಭಿಃ॑ । ವೃ॒ತ್ರಾಣ್ಯ ಪ್ರ॑ತಿಷ್ಕುತಃ । ಜ॒ಘಾನ॑ ನವ॒ ತೀರ್ನವ॑ ॥ ಇ॒ಚ್ಛನ್ನಶ್ವ॑ಸ್ಯ॒ ಯಚ್ಛಿರಃ॑ । ಪರ್ವ॑ತೇ॒ಷ್ವಪ॑ ಶ್ರಿತಮ್ । ತ-ದ್ವಿ॑ದಚ್ಛರ್ಯ॒ಣಾವ॑ತಿ ॥ ಅತ್ರಾ ಹ ॒ಗೋರಮ॑ನ್ವತ । ನಾಮ॒ ತ್ವಷ್ಟು॑ರಪೀ॒ಚ್ಯ᳚ಮ್ । ಇ॒ತ್ಥಾ ಚ॒ನ್ದ್ರಮ॑ಸೋ ಗೃ॒ಹೇ ॥ ಇನ್ದ್ರ॒ಮಿದ್ಗಾ॒ಥಿನೋ॑ ಬೃ॒ಹತ್ ॥ 36 ॥

ಇನ್ದ್ರ॑ಮ॒ರ್ಕೇಭಿ॑ರ॒ರ್ಕಿಣಃ॑ । ಇನ್ದ್ರಂ॒-ವಾಁಣೀ॑ರನೂಷತ ॥ ಇನ್ದ್ರ॒ ಇದ್ಧರ್ಯೋ॒-ಸ್ಸಚಾ᳚ । ಸಮ್ಮಿ॑ಶ್ಲ॒ ಆವ॑ಚೋ॒ ಯುಜಾ᳚ । ಇನ್ದ್ರೋ॑ ವ॒ಜ್ರೀ ಹಿ॑ರ॒ಣ್ಯಯಃ॑ ॥ ಇನ್ದ್ರೋ॑ ದೀ॒ರ್ಘಾಯ॒ ಚಖ್ಷ॑ಸೇ । ಆ ಸೂರ್ಯಗ್ಂ॑ ರೋಹಯ-ದ್ದಿ॒ವಿ । ವಿ ಗೋಭಿ॒ರದ್ರಿ॑ಮೈರಯತ್ ॥ ಇನ್ದ್ರ॒ ವಾಜೇ॑ಷು ನೋ ಅವ । ಸ॒ಹಸ್ರ॑ ಪ್ರಧನೇಷು ಚ ॥ 37 ॥

ಉ॒ಗ್ರ ಉ॒ಗ್ರಾಭಿ॑ರೂ॒ತಿಭಿಃ॑ ॥ ತಮಿನ್ದ್ರಂ॑-ವಾಁಜಯಾಮಸಿ । ಮ॒ಹೇ ವೃ॒ತ್ರಾಯ॒ ಹನ್ತ॑ವೇ । ಸ ವೃಷಾ॑ ವೃಷ॒ಭೋ ಭು॑ವತ್ ॥ ಇನ್ದ್ರ॒-ಸ್ಸದಾಮ॑ನೇ ಕೃ॒ತಃ । ಓಜಿ॑ಷ್ಠ॒-ಸ್ಸ ಬಲೇ॑ ಹಿ॒ತಃ । ದ್ಯು॒ಮ್ನೀ ಶ್ಲೋ॒ಕೀ ಸ ಸೌ॒ಮ್ಯಃ॑ ॥ ಗಿ॒ರಾ ವಜ್ರೋ॒ ನ ಸಮ್ಭೃ॑ತಃ । ಸಬ॑ಲೋ॒ ಅನ॑ಪಚ್ಯುತಃ । ವ॒ವ॒ಖ್ಷು-ರು॒ಗ್ರೋ ಅಸ್ತೃ॑ತಃ ॥ 38 ॥
(ಬೃ॒ಹ- ಚ್ಚಾ - ಸ್ತೃ॑ತಃ) (ಅ. 8)

ಅನುವಾಕಂ 9 - ಸೋಮಶೇಷಭೂತಾ ಇಷ್ಟಯಃ. (ಆಧ್ವರಬ್ರಾಹ್ಮಣಂ)
ದೇ॒ವಾ॒ಸು॒ರಾ-ಸ್ಸಂ​ಯಁ॑ತ್ತಾ ಆಸನ್ನ್ । ಸ ಪ್ರ॒ಜಾಪ॑ತಿ॒ರಿನ್ದ್ರ॑-ಞ್ಜ್ಯೇ॒ಷ್ಠ-ಮ್ಪು॒ತ್ರಮಪ॒ ನ್ಯ॑ಧತ್ತ । ನೇದೇ॑ನ॒ಮಸು॑ರಾ॒ ಬಲೀ॑ಯಾಗ್ಂ ಸೋ-ಽಹನ॒ನ್ನಿತಿ॑ । ಪ್ರ॒ಹ್ರಾದೋ॑ ಹ॒ ವೈ ಕಾ॑ಯಾಧ॒ವಃ । ವಿ॒ರೋಚ॑ನ॒ಗ್ಗ್॒ ಸ್ವ-ಮ್ಪು॒ತ್ರಮಪ॒ ನ್ಯ॑ಧತ್ತ । ನೇದೇ॑ನ-ನ್ದೇ॒ವಾ ಅ॑ಹನ॒ನ್ನಿತಿ॑ । ತೇ ದೇ॒ವಾಃ ಪ್ರ॒ಜಾಪ॑ತಿ-ಮುಪಸ॒ಮೇತ್ಯೋ॑ಚುಃ । ನಾರಾ॒ಜಕ॑ಸ್ಯ ಯು॒ದ್ಧಮ॑ಸ್ತಿ । ಇನ್ದ್ರ॒ಮನ್ವಿ॑ಚ್ಛಾ॒ಮೇತಿ॑ । ತಂ-ಯಁ॑ಜ್ಞಕ್ರ॒ತುಭಿ॒-ರನ್ವೈ᳚ಚ್ಛನ್ನ್ ॥ 39 ॥

ತಂ-ಯಁ॑ಜ್ಞಕ್ರ॒ತುಭಿ॒ರ್ನಾನ್ವ॑ವಿನ್ದನ್ನ್ । ತಮಿಷ್ಟಿ॑ಭಿ॒-ರನ್ವೈ᳚ಚ್ಛನ್ನ್ । ತಮಿಷ್ಟಿ॑ಭಿ॒-ರನ್ವ॑ವಿನ್ದನ್ನ್ । ತದಿಷ್ಟೀ॑ನಾ-ಮಿಷ್ಟಿ॒ತ್ವಮ್ । ಏಷ್ಟ॑ಯೋ ಹ॒ ವೈ ನಾಮ॑ । ತಾ ಇಷ್ಟ॑ಯ॒ ಇತ್ಯಾಚ॑ಖ್ಷತೇ ಪ॒ರೋಖ್ಷೇ॑ಣ । ಪ॒ರೋಖ್ಷ॑ಪ್ರಿಯಾ ಇವ॒ ಹಿ ದೇ॒ವಾಃ ॥ ತಸ್ಮಾ॑ ಏ॒ತಮಾ᳚ಗ್ನಾವೈಷ್ಣ॒ವ-ಮೇಕಾ॑ದಶಕಪಾಲ-ನ್ದೀಖ್ಷ॒ಣೀಯ॒-ನ್ನಿರ॑ವಪನ್ನ್ । ತದ॑ಪ॒ದ್ರುತ್ಯಾ॑ತನ್ವತ । ತಾನ್ಪ॑ತ್ನೀ ಸಂ​ಯಾಁ॒ಜಾನ್ತ॒ ಉಪಾ॑ನಯನ್ನ್ ॥ 40 ॥

ತೇ ತದ॑-ನ್ತಮೇ॒ವ ಕೃ॒ತ್ವೋದ॑ದ್ರವನ್ನ್ ॥ ತೇ ಪ್ರಾ॑ಯ॒ಣೀಯ॑ಮ॒ಭಿ ಸ॒ಮಾರೋ॑ಹನ್ನ್ । ತದ॑ಪ॒ದ್ರುತ್ಯಾ॑ತನ್ವತ । ತಾಞ್ಛಂ॒​ಯ್ವಁ॑ನ್ತ॒ ಉಪಾ॑ನಯನ್ನ್ । ತೇ ತದ॑ತಮ್ಮೇ॒ವ ಕೃ॒ತ್ವೋದ॑ದ್ರವನ್ನ್ ॥ ತ ಆ॑ತಿ॒ಥ್ಯಮ॒ಭಿ ಸ॒ಮಾರೋ॑ಹನ್ನ್ । ತದ॑ಪ॒ದ್ರುತ್ಯಾ॑ತನ್ವತ । ತಾನಿಡಾ᳚ನ್ತ॒ ಉಪಾ॑ನಯನ್ನ್ । ತೇ ತದ॑ತಮ್ಮೇ॒ವ ಕೃ॒ತ್ವೋದ॑ದ್ರವನ್ನ್ । ತಸ್ಮಾ॑ ದೇ॒ತಾ ಏ॒ತದ॑ನ್ತಾ॒ ಇಷ್ಟ॑ಯ॒-ಸ್ಸನ್ತಿ॑ಷ್ಠನ್ತೇ ॥ 41 ॥

ಏ॒ವಗ್ಂ ಹಿ ದೇ॒ವಾ ಅಕು॑ರ್ವತ । ಇತಿ॑ ದೇ॒ವಾ ಅ॑ಕುರ್ವತ । ಇತ್ಯು॒ ವೈ ಮ॑ನು॒ಷ್ಯಾಃ᳚ ಕುರ್ವತೇ ॥ ತೇ ದೇ॒ವಾ ಊ॑ಚುಃ । ಯದ್ವಾ ಇ॒ದಮು॒ಚ್ಚೈ-ರ್ಯ॒ಜ್ಞೇನ॒ ಚರಾ॑ಮ । ತನ್ನೋ-ಽಸು॑ರಾಃ ಪಾ॒ಪ್ಮಾ-ಽನು॑ವಿನ್ದನ್ತಿ । ಉ॒ಪಾ॒ಗ್ಂ॒ಶೂ॑ಪ॒ಸದಾ॑ ಚರಾಮ । ತಥಾ॒ ನೋ-ಽಸು॑ರಾಃ ಪಾ॒ಪ್ಮಾ ನಾನು॑ವೇಥ್ಸ್ಯ॒ನ್ತೀತಿ॑ । ತ ಉ॑ಪಾ॒ಗ್ಂ॒ಶೂ॑ಪ॒ಸದ॑-ಮತನ್ವತ । ತಿ॒ಸ್ರ ಏ॒ವ ಸಾ॑ಮಿಧೇ॒ನೀರ॒ನೂಚ್ಯ॑ ॥ 42 ॥

ಸ್ರು॒ವೇಣಾ॑ಘಾ॒ರ-ಮಾ॒ಘಾರ್ಯ॑ । ತಿ॒ಸ್ರಃ ಪರಾ॑ಚೀ॒-ರಾಹು॑ತೀರ್-ಹು॒ತ್ವಾ । ಸ್ರು॒ವೇಣೋ॑ಪ॒ಸದ॑-ಞ್ಜುಹ॒ವಾಞ್ಚ॑ಕ್ರುಃ । ಉ॒ಗ್ರಂ-ವಁಚೋ॒ ಅಪಾ॑ವಧೀ-ನ್ತ್ವೇ॒ಷಂ-ವಁಚೋ॒ ಅಪಾ॑ವಧೀ॒ಗ್॒ ಸ್ವಾಹೇತಿ॑ । ಅ॒ಶ॒ನ॒ಯಾ॒ಪಿ॒ಪಾ॒ಸೇ ಹ॒ ವಾ ಉ॒ಗ್ರಂ-ವಁಚಃ॑ । ಏನ॑ಶ್ಚ॒ ವೈರ॑ಹತ್ಯ-ಞ್ಚ ತ್ವೇ॒ಷಂ-ವಁಚಃ॑ । ಏ॒ತಗ್ಂ ಹ॒ ವಾವ ತಚ್ಚ॑ತುರ್ಧಾವಿಹಿ॒ತ-ಮ್ಪಾ॒ಪ್ಮಾನ॑-ನ್ದೇ॒ವಾ ಅಪ॑ಜಘ್ನಿರೇ ॥ ತಥೋ॑ ಏ॒ವೈತದೇ॑ವಂ॒-ವಿಁದ್ಯಜ॑ಮಾನಃ । ತಿ॒ಸ್ರ ಏ॒ವ ಸಾ॑ಮಿಧೇ॒ನೀರ॒ನೂಚ್ಯ॑ । ಸ್ರು॒ವೇಣಾ॑ಘಾ॒ರ-ಮಾ॒ಘಾರ್ಯ॑ ॥ 43 ॥

ತಿ॒ಸ್ರಃ ಪರಾ॑ಚೀ॒ರಾಹು॑ತೀರ್-ಹು॒ತ್ವಾ । ಸ್ರು॒ವೇಣೋ॑ಪ॒ಸದ॑-ಞ್ಜುಹೋತಿ । ಉ॒ಗ್ರಂ-ವಁಚೋ॒ ಅಪಾ॑ವಧೀ-ನ್ತ್ವೇ॒ಷಂ-ವಁಚೋ॒ ಅಪಾ॑ವಧೀ॒ಗ್॒ ಸ್ವಾಹೇತಿ॑ । ಅ॒ಶ॒ನ॒ಯಾ॒ಪಿ॒ಪಾ॒ಸೇ ಹ॒ ವಾ ಉ॒ಗ್ರಂ-ವಁಚಃ॑ । ಏನ॑ಶ್ಚ॒ ವೈರ॑ಹತ್ಯ-ಞ್ಚ ತ್ವೇ॒ಷಂ-ವಁಚಃ॑ । ಏ॒ತಮೇ॒ವ ತಚ್ಚ॑ತುರ್ಧಾ-ವಿಹಿ॒ತ-ಮ್ಪಾ॒ಪ್ಮಾನಂ॒-ಯಁಜ॑ಮಾ॒ನೋ-ಽಪ॑ಹತೇ ॥ ತೇ॑-ಽಭಿ॒ನೀಯೈ॒ವಾಹಃ॑ ಪ॒ಶುಮಾ-ಽಲ॑ಭನ್ತ । ಅಹ್ನ॑ ಏ॒ವ ತ-ದ್ದೇ॒ವಾ ಅವ॑ರ್ತಿ-ಮ್ಪಾ॒ಪ್ಮಾನ॑-ಮ್ಮೃ॒ತ್ಯುಮಪ॑ಜಘ್ನಿರೇ । ತೇನಾ॑ಭಿ॒ನೀಯೇ॑ವ॒ ರಾತ್ರೇಃ॒ ಪ್ರಾಚ॑ರನ್ನ್ । ರಾತ್ರಿ॑ಯಾ ಏ॒ವ ತ-ದ್ದೇ॒ವಾ ಅವ॑ರ್ತಿ-ಮ್ಪಾ॒ಪ್ಮಾನ॑-ಮ್ಮೃ॒ತ್ಯುಮಪ॑ಜಘ್ನಿರೇ ॥ 44 ॥

ತಸ್ಮಾ॑ದಭಿ॒ನೀಯೈ॒ವಾಹಃ॑ ಪ॒ಶುಮಾಲ॑ಭೇತ । ಅಹ್ನ॑ ಏ॒ವ ತ-ದ್ಯಜ॑ಮಾ॒ನೋ ಽವ॑ರ್ತಿ-ಮ್ಪಾ॒ಪ್ಮಾನ॒-ಮ್ಭ್ರಾತೃ॑ವ್ಯಾ॒ನಪ॑ನುದತೇ । ತೇನಾ॑ಭಿ॒ನೀಯೇ॑ವ॒ ರಾತ್ರೇಃ॒ ಪ್ರಚ॑ರೇತ್ । ರಾತ್ರಿ॑ಯಾ ಏ॒ವ ತ-ದ್ಯಜ॑ಮಾ॒ನೋ ಽವ॑ರ್ತಿ-ಮ್ಪಾ॒ಪ್ಮಾನ॒-ಮ್ಭ್ರಾತೃ॑ವ್ಯಾ॒ನಪ॑ನುದತೇ ॥ ಸ ಏ॒ಷ ಉ॑ಪವಸ॒ಥೀಯೇ ಽಹ॑ನ್-ದ್ವಿದೇವ॒ತ್ಯಃ॑ ಪ॒ಶುರಾಲ॑ಭ್ಯತೇ । ದ್ವ॒ಯಂ-ವಾಁ ಅ॒ಸ್ಮಿನ್ ಁಲೋ॒ಕೇ ಯಜ॑ಮಾನಃ । ಅಸ್ಥಿ॑ ಚ ಮಾ॒ಗ್ಂ॒ಸ-ಞ್ಚ॑ । ಅಸ್ಥಿ॑ ಚೈ॒ವ ತೇನ॑ ಮಾ॒ಗ್ಂ॒ಸ-ಞ್ಚ॒ ಯಜ॑ಮಾನ॒-ಸ್ಸಗ್ಗ್​ ಸ್ಕು॑ರುತೇ ॥ ತಾ ವಾ ಏ॒ತಾಃ ಪಞ್ಚ॑ ದೇ॒ವತಾಃ᳚ । ಅ॒ಗ್ನೀಷೋಮಾ॑-ವ॒ಗ್ನಿ-ರ್ಮಿ॒ತ್ರಾವರು॑ಣೌ ॥ 45 ॥

ಪ॒ಞ್ಚ॒ಪ॒ಞ್ಚೀ ವೈ ಯಜ॑ಮಾನಃ । ತ್ವಮ್ಮಾ॒ಗ್ಂ॒ ಸಗ್ಗ್​ ಸ್ನಾವಾಸ್ಥಿ॑ ಮ॒ಜ್ಜಾ । ಏ॒ತಮೇ॒ವ ತತ್ಪ॑ಞ್ಚಧಾ ವಿಹಿ॒ತಮಾ॒ತ್ಮಾನಂ॑-ವಁರುಣಪಾ॒ಶಾ-ನ್ಮು॑ಞ್ಚತಿ । ಭೇ॒ಷ॒ಜತಾ॑ಯೈ ನಿರ್ವರುಣ॒ತ್ವಾಯ॑ ॥ ತಗ್ಂ ಸ॒ಪ್ತಭಿ॒-ಶ್ಛನ್ದೋ॑ಭಿಃ ಪ್ರಾ॒ತರ॑ಹ್ವಯನ್ನ್ । ತಸ್ಮಾ᳚ಥ್ಸ॒ಪ್ತ ಚ॑ತುರುತ್ತ॒ರಾಣಿ॒ ಛನ್ದಾಗ್ಂ॑ಸಿ ಪ್ರಾತರನುವಾ॒ಕೇ-ಽನೂ᳚ಚ್ಯನ್ತೇ ॥ ತಮೇ॒ತಯೋ॑-ಪಸ॒ಮೇತ್ಯೋ-ಪಾ॑ಸೀದನ್ನ್ । ಉಪಾ᳚ಸ್ಮೈ ಗಾಯತಾ ನರ॒ ಇತಿ॑ । ತಸ್ಮಾ॑ ದೇ॒ತಯಾ॑ ಬಹಿಷ್ಪವಮಾ॒ನ ಉ॑ಪ॒ಸದ್ಯಃ॑ ॥ 46 ॥
(ಐ॒ಚ್ಛ॒ನ್ - ನ॒ನ॒ಯ॒ಗ್ಗ್॒ - ಸ್ತಿ॒ಷ್ಠ॒ನ್ತೇ॒ - ಽನೂಚ್ಯಾ॒ - ನೂಚ್ಯ॑ ಸ್ರು॒ವೇಣಾ॑ಘಾ॒ರಮಾ॒ಘಾರ್ಯ॒ - ರಾತ್ರಿ॑ಯಾ ಏ॒ವ ತ-ದ್ದೇ॒ವಾ ಅವ॑ರ್ತಿ-ಮ್ಪಾ॒ಪ್ಮಾನಂ॑ ಮೃ॒ತ್ಯುಮಪ॑ಜಘ್ನಿರೇ - ಮಿ॒ತ್ರಾವರು॑ಣೌ॒ - +ನವ॑ ಚ ) (ಅ. 9)

(ದೇ॒ವಾ ಯಜ॑ಮಾನೋ ದೇ॒ವಾ ದೇ॒ವಾ ಯಜ॑ಮಾನೋ॒ ಯಜ॑ಮಾನೋ-ಽಲಭನ್ತ॒ ಪ್ರಾಚ॑ರಁಲ್ಲಭೇತ॒ ಪ್ರಚ॑ರೇ॒ದಾಲ॑ಭ॒ನ್ತಾಲ॑ಭೇತ ಮೃ॒ತ್ಯುಮಪ॑ಜಘ್ನಿರೇ॒ ಭ್ರಾತೃ॑ವ್ಯಾನ್)

ಅನುವಾಕಂ 10 - ತ್ರಿವೃದಾದಿಸ್ತೋಮರೂಪಾಣಿ ಸೋಮಙ್ಗಾನಿ. (ಆಧ್ವರಬ್ರಾಹ್ಮಣಂ)
ಸ ಸ॑ಮು॒ದ್ರ ಉ॑ತ್ತರ॒ತಃ ಪ್ರಾಜ್ವ॑ಲ-ದ್ಭೂಮ್ಯ॒ನ್ತೇನ॑ । ಏ॒ಷ ವಾವ ಸ ಸ॑ಮು॒ದ್ರಃ । ಯಚ್ಚಾತ್ವಾ॑ಲಃ । ಏ॒ಷ ಉ॑ ವೇ॒ವ ಸ ಭೂ᳚ಮ್ಯ॒ನ್ತಃ । ಯದ್ವೇ᳚ದ್ಯ॒ನ್ತಃ । ತದೇ॒ತತ್-ತ್ರಿ॑ಶ॒ಲ-ನ್ತ್ರಿ॑ಪೂರು॒ಷಮ್ । ತಸ್ಮಾ॒ತ್-ತ-ನ್ತ್ರಿ॑ವಿತ॒ಸ್ತ-ಙ್ಖ॑ನನ್ತಿ ॥ ಸ ಸು॑ವರ್ಣರಜ॒ತಾಭ್ಯಾ᳚-ಙ್ಕು॒ಶೀಭ್ಯಾ॒-ಮ್ಪರಿ॑ಗೃಹೀತ ಆಸೀತ್ । ತಂ-ಯಁದ॒ಸ್ಯಾ ಅದ್ಧ್ಯ॒ಜನ॑ಯನ್ನ್ । ತಸ್ಮಾ॑ದಾದಿ॒ತ್ಯಃ ॥ 47 ॥

ಅಥ॒ ಯ-ಥ್ಸು॑ವರ್ಣರಜ॒ತಾಭ್ಯಾ᳚-ಙ್ಕು॒ಶೀಭ್ಯಾ॒-ಮ್ಪರಿ॑ಗೃಹೀತ॒ ಆಸೀ᳚ತ್ । ಸಾ-ಽಸ್ಯ॑ ಕೌಶಿ॒ಕತಾ᳚ ॥ ತ-ನ್ತ್ರಿ॒ವೃತಾ॒-ಽಭಿ ಪ್ರಾಸ್ತು॑ವತ । ತ-ನ್ತ್ರಿ॒ವೃತಾ ಽಽದ॑ದತ । ತ-ನ್ತ್ರಿ॒ವೃತಾ ಽಽಹ॑ರನ್ನ್ । ಯಾವ॑ತೀ ತ್ರಿ॒ವೃತೋ॒ ಮಾತ್ರಾ᳚ ॥ ತ-ಮ್ಪ॑ಞ್ಚದ॒ಶೇನಾ॒ಭಿ ಪ್ರಾಸ್ತು॑ವತ । ತ-ಮ್ಪ॑ಞ್ಚದ॒ಶೇನಾದ॑ದತ । ತ-ಮ್ಪ॑ಞ್ಚದ॒ಶೇನಾಹ॑ರನ್ನ್ । ಯಾವ॑ತೀ ಪಞ್ಚದ॒ಶಸ್ಯ॒ ಮಾತ್ರಾ᳚ ॥ 48 ॥

ತಗ್ಂ ಸ॑ಪ್ತದ॒ಶೇನಾ॒ಭಿ ಪ್ರಾಸ್ತು॑ವತ । ತಗ್ಂ ಸ॑ಪ್ತದ॒ಶೇನಾದ॑ದತ । ತಗ್ಂ ಸ॑ಪ್ತದ॒ಶೇನಾಹ॑ರನ್ನ್ । ಯಾವ॑ತೀ ಸಪ್ತದ॒ಶಸ್ಯ॒ ಮಾತ್ರಾ᳚ । ತಸ್ಯ॑ ಸಪ್ತದ॒ಶೇನ॑ ಹ್ರಿ॒ಯಮಾ॑ಣಸ್ಯ॒ ತೇಜೋ॒ ಹರೋ॑-ಽಪತತ್ । ತಮೇ॑ಕವಿ॒ಗ್ಂ॒ ಶೇನಾ॒ಭಿ ಪ್ರಾಸ್ತು॑ವತ । ತಮೇ॑ಕವಿ॒ಗ್ಂ॒ಶೇನಾದ॑ದತ । ತಮೇ॑ಕವಿ॒ಗ್ಂ॒ಶೇನಾಹ॑ರನ್ನ್ । ಯಾವ॑ತ್ಯೇಕವಿ॒ಗ್ಂ॒ಶಸ್ಯ॒ ಮಾತ್ರಾ᳚ ॥ ತೇ ಯತ್-ತ್ರಿ॒ವೃತಾ᳚ ಸ್ತು॒ವತೇ᳚ ॥ 49 ॥

ತ್ರಿ॒ವೃತೈ॒ವ ತ-ದ್ಯಜ॑ಮಾನ॒ಮಾದ॑ದತೇ । ತ-ನ್ತ್ರಿ॒ವೃತೈ॒ವ ಹ॑ರನ್ತಿ । ಯಾವ॑ತೀ ತ್ರಿ॒ವೃತೋ॒ ಮಾತ್ರಾ᳚ । ಅ॒ಗ್ನಿರ್ವೈ ತ್ರಿ॒ವೃತ್ । ಯಾವ॒ದ್ವಾ ಅ॒ಗ್ನೇರ್ದಹ॑ತೋ ಧೂ॒ಮ ಉ॒ದೇತ್ಯಾನು॒ವ್ಯೇತಿ॑ । ತಾವ॑ತೀ ತ್ರಿ॒ವೃತೋ॒ ಮಾತ್ರಾ᳚ । ಅ॒ಗ್ನೇರೇ॒ವೈನ॒-ನ್ತತ್ । ಮಾತ್ರಾ॒ಗ್ಂ॒ ಸಾಯು॑ಜ್ಯಗ್ಂ ಸಲೋ॒ಕತಾ᳚-ಙ್ಗಮಯನ್ತಿ ॥ ಅಥ॒ ಯತ್ಪ॑ಞ್ಚದ॒ಶೇನ॑ ಸ್ತು॒ವತೇ᳚ । ಪ॒ಞ್ಚ॒ದ॒ಶೇನೈ॒ವ ತ-ದ್ಯಜ॑ಮಾನ॒-ಮಾದ॑ದತೇ ॥ 50 ॥

ತ-ಮ್ಪ॑ಞ್ಚದ॒ಶೇನೈ॒ವ ಹ॑ರನ್ತಿ । ಯಾವ॑ತೀ ಪಞ್ಚದ॒ಶಸ್ಯ॒ ಮಾತ್ರಾ᳚ । ಚ॒ನ್ದ್ರಮಾ॒ ವೈ ಪ॑ಞ್ಚದ॒ಶಃ । ಏ॒ಷ ಹಿ ಪ॑ಞ್ಚದ॒ಶ್ಯಾಮ॑ಪಖ್ಷೀ॒ಯತೇ᳚ । ಪ॒ಞ್ಚ॒ದಶ್ಯಾ-ಮಾ॑ಪೂ॒ರ್ಯತೇ᳚ । ಚ॒ನ್ದ್ರಮ॑ಸ ಏ॒ವೈನ॒-ನ್ತತ್ । ಮಾತ್ರಾ॒ಗ್ಂ॒ ಸಾಯು॑ಜ್ಯಗ್ಂ ಸಲೋ॒ಕತಾ᳚-ಙ್ಗಮಯನ್ತಿ । ಅಥ॒ ಯಥ್ಸ॑ಪ್ತದ॒ಶೇನ॑ ಸ್ತು॒ವತೇ᳚ । ಸ॒ಪ್ತ॒ದ॒ಶೇನೈ॒ವ ತ-ದ್ಯಜ॑ಮಾನ॒ಮಾದ॑ದತೇ । ತಗ್ಂ ಸ॑ಪ್ತದ॒ಶೇನೈ॒ವ ಹ॑ರನ್ತಿ ॥ 51 ॥

ಯಾವ॑ತೀ ಸಪ್ತದ॒ಶಸ್ಯ॒ ಮಾತ್ರಾ᳚ । ಪ್ರ॒ಜಾಪ॑ತಿ॒ರ್ವೈ ಸ॑ಪ್ತದ॒ಶಃ । ಪ್ರ॒ಜಾಪ॑ತೇರೇ॒ವೈನ॒-ನ್ತತ್ । ಮಾತ್ರಾ॒ಗ್ಂ॒ ಸಾಯು॑ಜ್ಯಗ್ಂ ಸಲೋ॒ಕತಾ᳚-ಙ್ಗಮಯನ್ತಿ । ಅಥ॒ ಯದೇ॑ಕವಿ॒ಗ್ಂ॒ಶೇನ॑ ಸ್ತು॒ವತೇ᳚ । ಏ॒ಕ॒ವಿ॒ಗ್ಂ॒ಶೇನೈ॒ವ ತ-ದ್ಯಜ॑ಮಾನ॒-ಮಾದ॑ದತೇ । ತಮೇ॑ಕವಿ॒ಗ್ಂ॒ಶೇನೈ॒ವ ಹ॑ರನ್ತಿ । ಯಾವ॑ತ್ಯೇಕವಿ॒ಗ್ಂ॒ಶಸ್ಯ॒ ಮಾತ್ರಾ᳚ । ಅ॒ಸೌ ವಾ ಆ॑ದಿ॒ತ್ಯ ಏ॑ಕವಿ॒ಗ್ಂ॒ಶಃ । ಆ॒ದಿ॒ತ್ಯಸ್ಯೈ॒ವೈನ॒-ನ್ತತ್ ॥ 52 ॥

ಮಾತ್ರಾ॒ಗ್ಂ॒ ಸಾಯು॑ಜ್ಯಗ್ಂ ಸಲೋ॒ಕತಾ᳚-ಙ್ಗಮಯನ್ತಿ ॥ ತೇ ಕು॒ಶ್ಯೌ᳚ । ವ್ಯ॑ಘ್ನನ್ನ್ । ತೇ ಅ॑ಹೋರಾ॒ತ್ರೇ ಅ॑ಭವತಾಮ್ । ಅಹ॑ರೇ॒ವ ಸು॒ವರ್ಣಾ॑ ಽಭವತ್ । ರ॒ಜ॒ತಾ ರಾತ್ರಿಃ॑ । ಸ ಯದಾ॑ದಿ॒ತ್ಯ ಉ॒ದೇತಿ॑ । ಏ॒ತಾಮೇ॒ವ ತಥ್ಸು॒ವರ್ಣಾ᳚-ಙ್ಕು॒ಶೀಮನು॒ ಸಮೇ॑ತಿ । ಅಥ॒ ಯದ॑ಸ್ತ॒ಮೇತಿ॑ । ಏ॒ತಾಮೇ॒ವ ತ-ದ್ರ॑ಜ॒ತಾ-ಙ್ಕು॒ಶೀಮನು॒ ಸಂ​ವಿಁ॑ಶತಿ ॥ ಪ್ರ॒ಹ್ರಾದೋ॑ ಹ॒ ವೈ ಕಾ॑ಯಾಧ॒ವಃ । ವಿ॒ರೋಚ॑ನ॒ಗ್ಗ್॒ ಸ್ವ-ಮ್ಪು॒ತ್ರಮುದಾ᳚ಸ್ಯತ್ । ಸ ಪ್ರ॑ದ॒ರೋ॑-ಽಭವತ್ । ತಸ್ಮಾ᳚-ತ್ಪ್ರದ॒ರಾದು॑ದ॒ಕ-ನ್ನಾಚಾ॑ಮೇತ್ ॥ 53 ॥
(ಆ॒ದಿ॒ತ್ಯಃ - ಪ॑ಞ್ಚದ॒ಶಸ್ಯ॒ ಮಾತ್ರಾ᳚ - ಸ್ತು॒ವತೇ॑ - ಪಞ್ಚದ॒ಶೇನೈ॒ವ ತ-ದ್ಯಜ॑ಮಾನ॒ಮಾದ॑ದತೇ - ಸಪ್ತದ॒ಶೇನೈ॒ವ ಹ॑ರನ್ - ತ್ಯಾದಿ॒ತ್ಯಸ್ಯೈ॒ವೈನ॒ನ್ತ-ದ್॒ ವಿ॑ಶತಿ ಚ॒ತ್ವಾರಿ॑ ಚ) (ಅ. 10)

ಅನುವಾಕಂ 11 - ಸವನೀಯಪಶುಪುರೋಡಾಶಾಃ (ಆಧ್ವರಬ್ರಾಹ್ಮಣಂ)
ಯೇ ವೈ ಚ॒ತ್ವಾರ॒-ಸ್ಸ್ತೋಮಾಃ᳚ । ಕೃ॒ತ-ನ್ತತ್ । ಅಥ॒ ಯೇ ಪಞ್ಚ॑ । ಕಲಿ॒-ಸ್ಸಃ । ತಸ್ಮಾ॒ಚ್ಚತು॑ಷ್ಟೋಮಃ । ತಚ್ಚತು॑ಷ್ಟೋಮಸ್ಯ ಚತುಷ್ಟೋಮ॒ತ್ವಮ್ ॥ ತದಾ॑ಹುಃ । ಕ॒ತ॒ಮಾನಿ॒ ತಾನಿ॒ ಜ್ಯೋತೀಗ್ಂ॑ಷಿ । ಯ ಏ॒ತಸ್ಯ॒ ಸ್ತೋಮಾ॒ ಇತಿ॑ । ತ್ರಿ॒ವೃತ್-ಪ॑ಞ್ಚದ॒ಶ-ಸ್ಸ॑ಪ್ತದ॒ಶ ಏ॑ಕವಿ॒ಗ್ಂ॒ಶಃ ॥ 54 ॥

ಏ॒ತಾನಿ॒ ವಾವ ತಾನಿ॒ ಜ್ಯೋತೀಗ್ಂ॑ಷಿ । ಯ ಏ॒ತಸ್ಯ॒ ಸ್ತೋಮಾಃ᳚ ॥ ಸೋ᳚-ಽಬ್ರವೀತ್ । ಸ॒ಪ್ತ॒ದ॒ಶೇನ॑ ಹ್ರಿ॒ಯಮಾ॑ಣೋ॒ ವ್ಯ॑ಲೇಶಿಷಿ । ಭಿ॒ಷಜ್ಯ॑ತ॒ ಮೇತಿ॑ । ತಮ॒ಶ್ವಿನೌ॑ ಧಾ॒ನಾಭಿ॑-ರಭಿಷಜ್ಯತಾಮ್ । ಪೂ॒ಷಾ ಕ॑ರ॒ಮ್ಭೇಣ॑ । ಭಾರ॑ತೀ ಪರಿವಾ॒ಪೇಣ॑ । ಮಿ॒ತ್ರಾವರು॑ಣೌ ಪಯ॒ಸ್ಯ॑ಯಾ ॥ ತದಾ॑ಹುಃ ॥ 55 ॥

ಯದ॒ಶ್ವಿಭ್ಯಾ᳚-ನ್ಧಾ॒ನಾಃ । ಪೂ॒ಷ್ಣಃ ಕ॑ರ॒ಮ್ಭಃ । ಭಾರ॑ತ್ಯೈ ಪರಿವಾ॒ಪಃ । ಮಿ॒ತ್ರಾವರು॑ಣಯೋಃ ಪಯ॒ಸ್ಯಾ-ಽಥ॑ । ಕಸ್ಮಾ॑ದೇ॒ತೇಷಾಗ್ಂ॑ ಹ॒ವಿಷಾ॒ಮಿನ್ದ್ರ॑ಮೇ॒ವ ಯ॑ಜ॒ನ್ತೀತಿ॑ । ಏ॒ತಾ ಹ್ಯೇ॑ನ-ನ್ದೇ॒ವತಾ॒ ಇತಿ॑ ಬ್ರೂಯಾತ್ । ಏ॒ತೈರ್-ಹ॒ವಿರ್ಭಿ॒-ರಭಿ॑ಷಜ್ಯ॒ಗ್ಗ್॒-ಸ್ತಸ್ಮಾ॒ದಿತಿ॑ ॥ ತಂ-ವಁಸ॑ವೋ॒-ಽಷ್ಟಾಕ॑ಪಾಲೇನ ಪ್ರಾತಸ್ಸವ॒ನೇ॑-ಽಭಿಷಜ್ಯನ್ನ್ । ರು॒ದ್ರಾ ಏಕಾ॑ದಶಕಪಾಲೇನ॒ ಮಾದ್ಧ್ಯ॑ನ್ದಿನೇ॒ ಸವ॑ನೇ । ವಿಶ್ವೇ॑ ದೇ॒ವಾ ದ್ವಾದ॑ಶಕಪಾಲೇನ ತೃತೀಯಸವ॒ನೇ ॥ 56 ॥

ಸ ಯದ॒ಷ್ಟಾಕ॑ಪಾಲಾ-ನ್ಪ್ರಾತಸ್ಸವ॒ನೇ ಕು॒ರ್ಯಾತ್ । ಏಕಾ॑ದಶಕಪಾಲಾ॒-ನ್ಮಾದ್ಧ್ಯ॑ನ್ದಿನೇ॒ ಸವ॑ನೇ । ದ್ವಾದ॑ಶಕಪಾಲಾಗ್​ ಸ್ತೃತೀಯ ಸವ॒ನೇ । ವಿಲೋ॑ಮ॒ ತ-ದ್ಯ॒ಜ್ಞಸ್ಯ॑ ಕ್ರಿಯೇತ । ಏಕಾ॑ದಶಕಪಾಲಾನೇ॒ವ ಪ್ರಾ॑ತಸ್ಸವ॒ನೇ ಕು॑ರ್ಯಾತ್ । ಏಕಾ॑ದಶಕಪಾಲಾ॒-ನ್ಮಾದ್ಧ್ಯ॑ನ್ದಿನೇ॒ ಸವ॑ನೇ । ಏಕಾ॑ದಶಕಪಾಲಾಗ್​ ಸ್ತೃತೀಯ ಸವ॒ನೇ । ಯ॒ಜ್ಞಸ್ಯ॑ ಸಲೋಮ॒ತ್ವಾಯ॑ ॥ ತದಾ॑ಹುಃ । ಯ-ದ್ವಸೂ॑ನಾ-ಮ್ಪ್ರಾತಸ್ಸವ॒ನಮ್ । ರು॒ದ್ರಾಣಾ॒-ಮ್ಮಾದ್ಧ್ಯ॑ನ್ದಿನ॒ಗ್ಂ॒ ಸವ॑ನಮ್ । ವಿಶ್ವೇ॑ಷಾ-ನ್ದೇ॒ವಾನಾ᳚-ನ್ತೃತೀಯಸವ॒ನಮ್ । ಅಥ॒ ಕಸ್ಮಾ॑ದೇ॒ತೇಷಾಗ್ಂ॑ ಹ॒ವಿಷಾ॒ಮಿನ್ದ್ರ॑ಮೇ॒ವ ಯ॑ಜ॒ನ್ತೀತಿ॑ । ಏ॒ತಾ ಹ್ಯೇ॑ನ-ನ್ದೇ॒ವತಾ॒ ಇತಿ॑ ಬ್ರೂಯಾತ್ । ಏ॒ತೈರ್-ಹ॒ವಿರ್ಭಿ॒ರಭಿ॑ಷಜ್ಯ॒ಗ್ಗ್॒ ಸ್ತಸ್ಮಾ॒ದಿತಿ॑ ॥ 57 ॥
(ಏ॒ಕ॒ವಿ॒ಗ್ಂ॒ಶ-ಆ॑ಹು-ಸ್ತೃತೀಯಸವ॒ನೇ-ಪ್ರಾ॑ತಸ್ಸವ॒ನ-ಮ್ಪಞ್ಚ॑ ಚ) (ಅ. 11)

ಅನುವಾಕಂ 12 - ಸಪ್ತಛನ್ದಾಂಸಿ ಪ್ರಪಞ್ಚ್ಯನ್ತೇ (ಆಧ್ವರಬ್ರಾಹ್ಮಣಂ)
ತಸ್ಯಾವಾ॑ಚೋ-ಽವಪಾ॒ದಾದ॑ಬಿಭಯುಃ । ತಮೇ॒ತೇಷು॑ ಸ॒ಪ್ತಸು॒ ಛನ್ದ॑-ಸ್ಸ್ವಶ್ರಯನ್ನ್ । ಯದಶ್ರ॑ಯನ್ನ್ । ತಚ್ಛ್ರಾ॑ಯ॒ನ್ತೀಯ॑ಸ್ಯ ಶ್ರಾಯನ್ತೀಯ॒ತ್ವಮ್ । ಯದವಾ॑ರಯನ್ನ್ । ತ-ದ್ವಾ॑ರವ॒ನ್ತೀಯ॑ಸ್ಯ ವಾರವನ್ತೀಯ॒ತ್ವಮ್ ॥ ತಸ್ಯಾವಾ॑ಚ ಏ॒ವಾವ॑ಪಾ॒ದಾದ॑ಬಿಭಯುಃ । ತಸ್ಮಾ॑ ಏ॒ತಾನಿ॑ ಸ॒ಪ್ತ ಚ॑ತುರುತ್ತ॒ರಾಣಿ॒ ಛನ್ದಾ॒ಗ್॒ಸ್ಯುಪಾ॑ದಧುಃ । ತೇಷಾ॒ಮತಿ॒ ತ್ರೀಣ್ಯ॑ರಿಚ್ಯನ್ತ । ನ ತ್ರೀಣ್ಯುದ॑ಭವನ್ನ್ ॥ 58 ॥

ಸ ಬೃ॑ಹ॒ತೀಮೇ॒ವಾ-ಸ್ಪೃ॑ಶತ್ । ದ್ವಾಭ್ಯಾ॑ಮ॒ಖ್ಷರಾ᳚ಭ್ಯಾಮ್ । ಅ॒ಹೋ॒ರಾ॒ತ್ರಾಭ್ಯಾ॑ಮೇ॒ವ ॥ ತದಾ॑ಹುಃ । ಕ॒ತ॒ಮಾ ಸಾ ದೇ॒ವಾಖ್ಷ॑ರಾ ಬೃಹ॒ತೀ । ಯಸ್ಯಾ॒-ನ್ತ-ತ್ಪ್ರ॒ತ್ಯತಿ॑ಷ್ಠತ್ । ದ್ವಾದ॑ಶ ಪೌರ್ಣಮಾ॒ಸ್ಯಃ॑ । ದ್ವಾದ॒ಶಾಷ್ಟ॑ಕಾಃ । ದ್ವಾದ॑ಶಾಮಾವಾ॒ಸ್ಯಾಃ᳚ । ಏ॒ಷಾ ವಾವ ಸಾ ದೇ॒ವಾಖ್ಷ॑ರಾ ಬೃಹ॒ತೀ ॥ 59 ॥

ಯಸ್ಯಾ॒-ನ್ತ-ತ್ಪ್ರ॒ತ್ಯತಿ॑ಷ್ಠ॒ದಿತಿ॑ ॥ ಯಾನಿ॑ ಚ॒ ಛನ್ದಾಗ್॑-ಸ್ಯ॒ತ್ಯರಿ॑ಚ್ಯನ್ತ । ಯಾನಿ॑ ಚ॒ ನೋದಭ॑ವನ್ನ್ । ತಾನಿ॒ ನಿರ್ವೀ᳚ರ್ಯಾಣಿ ಹೀ॒ನಾನ್ಯ॑ಮನ್ಯನ್ತ । ಸಾ ಽಬ್ರ॑ವೀ-ದ್ಬೃಹ॒ತೀ । ಮಾಮೇ॒ವ ಭೂ॒ತ್ವಾ । ಮಾಮುಪ॒ ಸಗ್ಗ್​ ಶ್ರ॑ಯ॒ತೇತಿ॑ । ಚ॒ತುರ್ಭಿ॑ರ॒ಖ್ಷರೈ॑-ರನು॒ಷ್ಟುಗ್-ಬೃ॑ಹ॒ತೀ-ನ್ನೋದ॑ಭವತ್ । ಚ॒ತುರ್ಭಿ॑ರ॒ಖ್ಷರೈಃ᳚ ಪ॒ಙ್ಕ್ತಿ-ರ್ಬೃ॑ಹ॒ತೀ-ಮತ್ಯ॑ರಿಚ್ಯತ । ತಸ್ಯಾ॑ಮೇ॒ತಾನಿ॑ ಚ॒ತ್ವಾರ್ಯ॒ಖ್ಷರಾ᳚ಣ್ಯ-ಪ॒ಚ್ಛಿದ್ಯಾ॑-ದಧಾತ್ ॥ 60 ॥

ತೇ ಬೃ॑ಹ॒ತೀ ಏ॒ವ ಭೂ॒ತ್ವಾ । ಬೃ॒ಹ॒ತೀಮುಪ॒ ಸಮ॑ಶ್ರಯತಾಮ್ ॥ ಅ॒ಷ್ಟಾ॒ಭಿ-ರ॒ಖ್ಷರೈ॑ರು॒ಷ್ಣಿಗ್-ಬೃ॑ಹ॒ತೀ-ನ್ನೋದ॑ಭವತ್ । ಅ॒ಷ್ಟಾ॒ಭಿರ॒ಖ್ಷರೈ᳚ಸ್ತ್ರಿ॒ಷ್ಟುಗ್-ಬೃ॑ಹ॒ತೀ-ಮತ್ಯ॑ರಿಚ್ಯತ । ತಸ್ಯಾ॑ಮೇ॒ತಾ-ನ್ಯ॒ಷ್ಟಾವ॒ಖ್ಷರಾ᳚ಣ್ಯ-ಪ॒ಚ್ಛಿದ್ಯಾ॑ದಧಾತ್ । ತೇ ಬೃ॑ಹ॒ತೀ ಏ॒ವ ಭೂ॒ತ್ವಾ । ಬೃ॒ಹ॒ತೀಮುಪ॒ ಸಮ॑ಶ್ರಯತಾಮ್ । ದ್ವಾ॒ದ॒ಶಭಿ॑-ರ॒ಖ್ಷರೈ᳚-ರ್ಗಾಯ॒ತ್ರೀ-ಬೃ॑ಹ॒ತೀ-ನ್ನೋದ॑ಭವತ್ । ದ್ವಾ॒ದ॒ಶಭಿ॑-ರ॒ಖ್ಷರೈ॒-ರ್ಜಗ॑ತೀ-ಬೃಹ॒ತೀ-ಮತ್ಯ॑ರಿಚ್ಯತ । ತಸ್ಯಾ॑ಮೇ॒ತಾನಿ॒ ದ್ವಾದ॑ಶಾ॒ಖ್ಷರಾ᳚ಣ್ಯ-ಪ॒ಚ್ಛಿದ್ಯಾ॑ದಧಾತ್ ॥ 61 ॥

ತೇ ಬೃ॑ಹ॒ತೀ ಏ॒ವ ಭೂ॒ತ್ವಾ । ಬೃ॒ಹ॒ತೀಮುಪ॒ ಸಮ॑ಶ್ರಯತಾಮ್ ॥ ಸೋ᳚-ಽಬ್ರವೀತ್-ಪ್ರ॒ಜಾಪ॑ತಿಃ । ಛನ್ದಾಗ್ಂ॑ಸಿ॒ ರಥೋ॑ ಮೇ ಭವತ । ಯು॒ಷ್ಮಾಭಿ॑-ರ॒ಹಮೇ॒ತ-ಮದ್ಧ್ವಾ॑ನ॒ಮನು॒ ಸಞ್ಚ॑ರಾ॒ಣೀತಿ॑ । ತಸ್ಯ॑ ಗಾಯ॒ತ್ರೀ ಚ॒ ಜಗ॑ತೀ ಚ ಪ॒ಖ್ಷಾವ॑ಭವತಾಮ್ । ಉ॒ಷ್ಣಿಕ್ಚ॑ ತ್ರಿ॒ಷ್ಟುಪ್ಚ॒ ಪ್ರಷ್ಟ್ಯೌ᳚ । ಅ॒ನು॒ಷ್ಟುಪ್ಚ॑ ಪ॒ಙ್ಕ್ತಿಶ್ಚ॒ ಧುರ್ಯೌ᳚ । ಬೃ॒ಹ॒ತ್ಯೇ॑ವೋದ್ಧಿರ॑ಭವತ್ । ಸ ಏ॒ತ-ಞ್ಛ॑ನ್ದೋರ॒ಥಮಾ॒ಸ್ಥಾಯ॑ । ಏ॒ತಮದ್ಧ್ವಾ॑ನ॒ಮನು॒ ಸಮ॑ಚರತ್ । ಏ॒ತಗ್ಂ ಹ॒ ವೈ ಛ॑ನ್ದೋರ॒ಥಮಾ॒ಸ್ಥಾಯ॑ । ಏ॒ತಮದ್ಧ್ವಾ॑ನ॒ಮನು॒ ಸಞ್ಚ॑ರತಿ । ಯೇನೈ॒ಷ ಏ॒ತ-ಥ್ಸ॒ಚಂರ॑ತಿ । ಯ ಏ॒ವಂ-ವಿಁ॒ದ್ವಾನ್-ಥ್ಸೋಮೇ॑ನ॒ ಯಜ॑ತೇ । ಯ ಉ॑ಚೈನಮೇ॒ವಂ-ವೇಁದ॑ ॥ 62 ॥
(ಅ॒ಭ॒ವ॒ನ್ - ವಾವ ಸಾ ದೇ॒ವಾಖ್ಷ॑ರಾ ಬೃಹ॒ - ತ್ಯ॑ದಧಾ॒-ದ್- ದ್ವಾದ॑ಶಾ॒ಖ್ಷರಾ᳚ಣ್ಯಪ॒ಚ್ಛಿದ್ಯಾ॑ದಧಾ - ದಾ॒ಸ್ಥಾಯ॒ ಷಟ್ಚ॑) (ಅ. 12)

(ಅ॒ಗ್ನೇಃ ಕೃತ್ತಿ॑ಕಾ॒ - ಯ-ತ್ಪುಣ್ಯಂ॑ - ದೇ॒ವಸ್ಯ॑ ಸವಿ॒ತು--ರ್ ಬ್ರ॑ಹ್ಮವಾ॒ದಿನಃ॒ ಕ - ತ್ಯೃ॒ತಮೇ॒ವ - ದೇ॒ವಾ ವಾ - ಆಯು॑ಷಃ ಪ್ರಾ॒ಣ - ಮಿನ್ದ್ರೋ॑ ದಧೀ॒ಚೋ -ದೇ॑ವಾಸು॒ರಾ-ಸ್ಸ ಪ್ರ॒ಜಾಪ॑ತಿಃ॒ - ಸ ಸ॑ಮು॒ದ್ರೋ - ಯೇ ವೈ ಚ॒ತ್ವಾರ॒ - ಸ್ತಸ್ಯಾವಾ॑ಚೋ॒ ದ್ವಾದ॑ಶ)

(ಅ॒ಗ್ನೇಃ ಕೃತ್ತಿ॑ಕಾ - ದೇವಗೃ॒ಹಾ - ಋ॒ತಮೇ॒ವ - ವೈ᳚ಶ್ವದೇ॒ವೇನ॒ - ತೇ ತದ॑ನ್ತ॒ - ತ-ಮ್ಪ॑ಞ್ಚದ॒ಶೇನ॒ - ತೇ ಬೃ॑ಹ॒ತೀ ಏ॒ವ ದ್ವಿಷ॑ಷ್ಟಿಃ)

(ಅ॒ಗ್ನೇಃ ಕೃತ್ತಿ॑ಕಾ॒ - ಯ ಉ ॑ಚೈನಮೇ॒ವಂ-ವೇಁದ॑)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ಪಞ್ಚಮಃ ಪ್ರಪಾಠಕ-ಸ್ಸಮಾಪ್ತಃ ।