ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಕಾಠಕೇ ಪ್ರಥಮಃ ಪ್ರಶ್ನಃ - ಸಾವಿತ್ರಚಯನಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಸ॒ಞ್ಜ್ಞಾನಂ॑-ವಿಁ॒ಜ್ಞಾನ॑-ಮ್ಪ್ರ॒ಜ್ಞಾನ॑-ಞ್ಜಾ॒ನದ॑ಭಿಜಾ॒ನತ್ । ಸ॒ಕಂ​ಲ್ಪಁ॑ಮಾನ-ಮ್ಪ್ರ॒ಕಲ್ಪ॑ಮಾನ-ಮುಪ॒ಕಲ್ಪ॑ಮಾನ॒-ಮುಪ॑ಕ್ಲೃಪ್ತ-ಙ್ಕ್ಲೃ॒ಪ್ತಮ್ ।
ಶ್ರೇಯೋ॒ ವಸೀ॑ಯ ಆ॒ಯಥ್ಸಮ್ಭೂ॑ತ-ಮ್ಭೂ॒ತಮ್ ॥
ಚಿ॒ತ್ರಃ ಕೇ॒ತುಃ ಪ್ರ॒ಭಾನಾ॒ಭಾನ್-ಥ್ಸ॒ಭಾನ್ನ್ ।
ಜ್ಯೋತಿ॑ಷ್ಮಾ॒ಗ್॒-ಸ್ತೇಜ॑ಸ್ವಾನಾ॒ತಪ॒ಗ್ಗ್॒-ಸ್ತಪ॑ನ್ನಭಿ॒ತಪನ್ನ್॑ ।
ರೋ॒ಚ॒ನೋ ರೋಚ॑ಮಾನಃ-ಶೋಭ॒ನಃ-ಶೋಭ॑ಮಾನಃ ಕ॒ಲ್ಯಾಣಃ॑ ॥ ದರ್​ಶಾ॑ ದೃ॒ಷ್ಟಾ ದ॑ರ್​ಶ॒ತಾ ವಿ॒ಶ್ವರೂ॑ಪಾ ಸುದರ್​ಶ॒ನಾ । ಆ॒ಪ್ಯಾಯ॑ಮಾನಾ॒ ಪ್ಯಾಯ॑ಮಾನಾ॒-ಪ್ಯಾಯಾ॑ ಸೂ॒ನೃತೇರಾ᳚ ।
ಆ॒ಪೂರ್ಯ॑ಮಾಣಾ॒ ಪೂರ್ಯ॑ಮಾಣಾ ಪೂ॒ರಯ॑ನ್ತೀ ಪೂ॒ರ್ಣಾ ಪೌ᳚ರ್ಣಮಾ॒ಸೀ ॥ ದಾ॒ತಾ ಪ್ರ॑ದಾ॒ತಾ-ಽಽನ॒ನ್ದೋ ಮೋದಃ॑ ಪ್ರಮೋ॒ದಃ ॥ 1 ॥

ಆ॒ವೇ॒ಶಯ॑-ನ್ನಿವೇ॒ಶಯನ್᳚ಥ್ಸಂ॒​ವೇಁಶ॑ನ॒-ಸ್ಸಗ್ಗ್​ಶಾ᳚ನ್ತ-ಶ್ಶಾ॒ನ್ತಃ । ಆ॒ಭವ॑-ನ್ಪ್ರ॒ಭವನ್᳚-ಥ್ಸ॒ಭಂ​ವಁ॒ನ್-ಥ್ಸಮ್ಭೂ॑ತೋ ಭೂ॒ತಃ ॥
ಪ್ರಸ್ತು॑ತಂ॒-ವಿಁಷ್ಟು॑ತ॒ಗ್ಂ॒ ಸಗ್ಗ್​ಸ್ತು॑ತ-ಙ್ಕ॒ಲ್ಯಾಣಂ॑-ವಿಁ॒ಶ್ವರೂ॑ಪಮ್ । ಶು॒ಕ್ರಮ॒ಮೃತ॑-ನ್ತೇಜ॒ಸ್ವಿ ತೇಜ॒-ಸ್ಸಮಿ॑ದ್ಧಮ್ । ಅ॒ರು॒ಣ-ಮ್ಭಾ॑ನು॒ಮ-ನ್ಮರೀ॑ಚಿಮದಭಿ॒ತಪ॒-ತ್ತಪ॑ಸ್ವತ್ ॥ ಸ॒ವಿ॒ತಾ ಪ್ರ॑ಸವಿ॒ತಾ ದೀ॒ಪ್ತೋ ದೀ॒ಪಯ॒-ನ್ದೀಪ್ಯ॑ಮಾನಃ । ಜ್ವಲ॑-ಞ್ಜ್ವಲಿ॒ತಾ ತಪ॑ನ್ ವಿ॒ತಪನ್᳚-ಥ್ಸ॒ನ್ತಪನ್ನ್॑ । ರೋ॒ಚ॒ನೋ ರೋಚ॑ಮಾನ-ಶ್ಶು॒ಭೂಂ-ಶ್ಶುಮ್ಭ॑ಮಾನೋ ವಾ॒ಮಃ ॥
ಸು॒ತಾ ಸು॑ನ್ವ॒ತೀ ಪ್ರಸು॑ತಾ ಸೂ॒ಯಮಾ॑ನಾ ಽಭಿಷೂ॒ಯಮಾ॑ಣಾ । ಪೀತೀ᳚ ಪ್ರ॒ಪಾ ಸ॒ಪಾ-ನ್ತೃಪ್ತಿ॑-ಸ್ತ॒ರ್ಪಯ॑ನ್ತೀ ॥ 2 ॥

ಕಾ॒ನ್ತಾ ಕಾ॒ಮ್ಯಾ ಕಾ॒ಮಜಾ॒ತಾ ಽಽಯು॑ಷ್ಮತೀ ಕಾಮ॒ದುಘಾ᳚ ॥ ಅ॒ಭಿ॒ಶಾ॒ಸ್ತಾ ಽನು॑ಮ॒ನ್ತಾ-ಽಽನ॒ನ್ದೋ ಮೋದಃ॑ ಪ್ರಮೋ॒ದಃ । ಆ॒ಸಾ॒ದಯ॑-ನ್ನಿಷಾ॒ದಯನ್᳚-ಥ್ಸ॒ಗ್ಂ॒ಸಾದ॑ನ॒-ಸ್ಸಗ್ಂಸ॑ನ್ನ-ಸ್ಸ॒ನ್ನಃ ।
ಆ॒ಭೂ ರ್ವಿ॒ಭೂಃ ಪ್ರ॒ಭೂ-ಶ್ಶ॒ಭೂಂ ರ್ಭುವಃ॑ ॥
ಪ॒ವಿತ್ರ॑-ಮ್ಪವಯಿ॒ಷ್ಯ-ನ್ಪೂ॒ತೋ ಮೇದ್ಧ್ಯಃ॑ ।
ಯಶೋ॒ ಯಶ॑ಸ್ವಾ-ನಾ॒ಯುರ॒ಮೃತಃ॑ । ಜೀ॒ವೋ ಜೀ॑ವಿ॒ಷ್ಯ-ನ್ಥ್ಸ್ವ॒ರ್ಗೋ ಲೋ॒ಕಃ ॥ ಸಹ॑ಸ್ವಾ॒-ನ್ಥ್ಸಹೀ॑ಯಾ॒-ನೋಜ॑ಸ್ವಾ॒-ನ್ಥ್ಸಹ॑ಮಾನಃ । ಜಯ॑ನ್ನ-ಭಿ॒ಜಯನ್᳚-ಥ್ಸು॒ದ್ರವಿ॑ಣೋ ದ್ರವಿಣೋ॒ದಾಃ । ಆ॒ರ್ದ್ರಪ॑ವಿತ್ರೋ॒ ಹರಿ॑ಕೇಶೋ॒ ಮೋದಃ॑ ಪ್ರಮೋ॒ದಃ ॥ 3 ॥

ಅ॒ರು॒ಣೋ॑ ಽರು॒ಣರ॑ಜಾಃ ಪು॒ಣ್ಡರೀ॑ಕೋ ವಿಶ್ವ॒ಜಿದ॑-ಭಿ॒ಜಿತ್ । ಆ॒ರ್ದ್ರಃ ಪಿನ್ವ॑ಮಾ॒ನೋ ಽನ್ನ॑ವಾ॒ನ್-ರಸ॑ವಾ॒-ನಿರಾ॑ವಾನ್ ।
ಸ॒ರ್ವೌ॒ಷ॒ಧ-ಸ್ಸ॑ಭಂ॒ರೋ ಮಹ॑ಸ್ವಾನ್ ॥ ಏ॒ಜ॒ತ್ಕಾ ಜೋ॑ವ॒ತ್ಕಾಃ । ಖ್ಷು॒ಲ್ಲ॒ಕಾ-ಶ್ಶಿ॑ಪಿವಿಷ್ಟ॒ಕಾಃ ।
ಸ॒ರಿ॒ಸ್ತ್ರ॒ರಾ-ಸ್ಸು॒ಶೇರ॑ವಃ । ಅ॒ಜಿ॒ರಾಸೋ॑ ಗಮಿ॒ಷ್ಣವಃ॑ ॥ ಇ॒ದಾನೀ᳚-ನ್ತ॒ದಾನೀ॑-ಮೇ॒ತರ್​ಹಿ॑ ಖ್ಷಿ॒ಪ್ರಮ॑ಜಿ॒ರಮ್ । ಆ॒ಶು ರ್ನಿ॑ಮೇ॒ಷಃ ಫ॒ಣೋ ದ್ರವ॑ನ್ನತಿ॒-ದ್ರವನ್ನ್॑ । ತ್ವರ॒ಗ್ಗ್॒ ಸ್ತ್ವರ॑ಮಾಣ ಆ॒ಶುರಾಶೀ॑ಯಾಞ್ಜ॒ವಃ {ಆ॒ಶುರಾಶೀ॑ಯಾನ್ ಜ॒ವಃ} ॥
ಅ॒ಗ್ನಿ॒ಷ್ಟೋ॒ಮ ಉ॒ಕ್ಥ್ಯೋ॑ ಽತಿರಾ॒ತ್ರೋ ದ್ವಿ॑ರಾ॒ತ್ರ-ಸ್ತ್ರಿ॑ರಾ॒ತ್ರ-ಶ್ಚ॑ತೂರಾ॒ತ್ರಃ । ಅ॒ಗ್ನಿರ್-ಋ॒ತು-ಸ್ಸೂರ್ಯ॑ ಋ॒ತುಶ್ಚ॒ನ್ದ್ರಮಾ॑ ಋ॒ತುಃ ॥ ಪ್ರ॒ಜಾಪ॑ತಿ-ಸ್ಸಂ​ವಁಥ್ಸ॒ರೋ ಮ॒ಹಾನ್ಕಃ ॥ 4 ॥
(ಪ್ರ॒ಮೋ॒ದ - ಸ್ತ॒ರ್ಪಯ॑ನ್ತೀ - ಪ್ರಮೋ॒ದೋ - ಜ॒ವಸ್ತ್ರೀಣಿ॑ ಚ) (ಅ. 1)

ಅನುವಾಕಂ 2 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ
ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಭೂರ॒ಗ್ನಿ-ಞ್ಚ॑ ಪೃಥಿ॒ವೀ-ಞ್ಚ॒ ಮಾ-ಞ್ಚ॑ ।
ತ್ರೀಗ್​ಶ್ಚ॑ ಲೋ॒ಕಾ-ನ್ಥ್ಸಂ॑​ವಁಥ್ಸ॒ರ-ಞ್ಚ॑ ।
ಪ್ರ॒ಜಾಪ॑ತಿಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥
ಭುವೋ॑ ವಾ॒ಯು-ಞ್ಚಾ॒ನ್ತರಿ॑ಖ್ಷ-ಞ್ಚ॒ ಮಾ-ಞ್ಚ॑ । ತ್ರೀಗ್​ಶ್ಚ॑ ಲೋ॒ಕಾ-ನ್ಥ್ಸಂ॑​ವಁಥ್ಸ॒ರ-ಞ್ಚ॑ ।
ಪ್ರ॒ಜಾಪ॑ತಿಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ-ಽ ಙ್ಗಿಂರ॒ಸ್ವ-ದ್ಧ್ರು॒ವಾ ಸೀ॑ದ । ಸ್ವ॑ರಾದಿ॒ತ್ಯ-ಞ್ಚ॒ ದಿವ॑-ಞ್ಚ॒ ಮಾ-ಞ್ಚ॑ । ತ್ರೀಗ್​ಶ್ಚ॑ ಲೋ॒ಕಾ-ನ್ಥ್ಸಂ॑​ವಁಥ್ಸ॒ರ-ಞ್ಚ॑ । ಪ್ರ॒ಜಾಪ॑ತಿಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ ಽಙ್ಗಿಂರ॒ಸ್ವ-ದ್ಧ್ರು॒ವಾ ಸೀ॑ದ । ಭೂರ್ಭುವ॒-ಸ್ಸ್ವ॑-ಶ್ಚ॒ನ್ದ್ರಮ॑ಸ-ಞ್ಚ॒ ದಿಶ॑ಶ್ಚ॒ ಮಾ-ಞ್ಚ॑ ।
ತ್ರೀಗ್​ಶ್ಚ॑ ಲೋ॒ಕಾ-ನ್ಥ್ಸ॑ವನ್​ಥ್ಸ॒ರ-ಞ್ಚ॑ । ಪ್ರ॒ಜಾಪ॑ತಿಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 5 ॥
(ಸಂ॒​ವಁ॒ಥ್ಸ॒ರ॒-ಞ್ಚ॒ ಷಟ್ ಚ॑)(ಆ2)

ಅನುವಾಕಂ 3 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ತ್ವಮೇ॒ವ ತ್ವಾಂ-ವೇಁ᳚ತ್ಥ॒ ಯೋ॑-ಽಸಿ॒ ಸೋ-ಽಸಿ॑ । ತ್ವಮೇ॒ವ ತ್ವಾಮ॑ಚೈಷೀಃ । ಚಿ॒ತಶ್ಚಾಸಿ॒ ಸಞ್ಚಿ॑ತ-ಶ್ಚಾಸ್ಯಗ್ನೇ । ಏ॒ತಾವಾ॒ಗ್॒ಶ್ಚಾಸಿ॒ ಭೂಯಾಗ್॑ಶ್ಚಾಸ್ಯಗ್ನೇ ।
ಯತ್ತೇ॑ ಅಗ್ನೇ॒ ನ್ಯೂ॑ನಂ॒-ಯಁದು॒ ತೇ-ಽತಿ॑ರಿಕ್ತಮ್ । ಆ॒ದಿ॒ತ್ಯಾ-ಸ್ತದಂಙ್ಗಿ॑ರಸ-ಶ್ಚಿನ್ವನ್ತು ।
ವಿಶ್ವೇ॑ ತೇ ದೇ॒ವಾಶ್ಚಿತಿ॒-ಮಾಪೂ॑ರಯನ್ತು । ಚಿ॒ತಶ್ಚಾಸಿ॒ ಸಞ್ಚಿ॑ತ-ಶ್ಚಾಸ್ಯಗ್ನೇ । ಏ॒ತಾವಾ॒ಗ್॒ಶ್ಚಾಸಿ॒ ಭೂಯಾಗ್॑ಶ್ಚಾಸ್ಯಗ್ನೇ । ಮಾ ತೇ॑ ಅಗ್ನೇ ಽಚ॒ಯೇನ॒ ಮಾ-ಽತಿ॑ ಚ॒ ಯೇನಾಯು॒ರಾವೃ॑ಖ್ಷಿ । ಸವ॑ರ್​ಷಾ॒-ಞ್ಜ್ಯೋತಿ॑ಷಾ॒-ಞ್ಜ್ಯೋತಿ॒ ರ್ಯದ॒ದಾವು॒ದೇತಿ॑ । ತಪ॑ಸೋ ಜಾ॒ತಮನಿ॑-ಭೃಷ್ಟ॒ಮೋಜಃ॑ । ತತ್ತೇ॒ ಜ್ಯೋತಿ॑ರಿಷ್ಟಕೇ । ತೇನ॑ ಮೇ ತಪ । ತೇನ॑ ಮೇ ಜ್ವಲ । ತೇನ॑ ಮೇ ದೀದಿಹಿ ।
ಯಾವ॑ದ್ದೇ॒ವಾಃ । ಯಾವ॒ದಸಾ॑ತಿ॒ ಸೂರ್ಯಃ॑ । ಯಾವ॑ದು॒ತಾಪಿ॒ ಬ್ರಹ್ಮ॑ ॥ 6 ॥
(ಆವೃ॑ಖ್ಷಿ॒ ನವ॑ ಚ) (ಅ. 3)

ಅನುವಾಕಂ 4 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಸಂ॒​ವಁ॒ಥ್ಸ॒ರೋ॑-ಽಸಿ ಪರಿವಥ್ಸ॒ರೋ॑-ಽಸಿ । ಇ॒ದಾ॒ವ॒ಥ್ಸ॒ರೋ॑-ಽಸೀ-ದುವಥ್ಸ॒ರೋ॑-ಽಸಿ ।
ಇ॒ದ್ವ॒ಥ್ಸ॒ರೋ॑-ಽಸಿ ವಥ್ಸ॒ರೋ॑-ಽಸಿ । ತಸ್ಯ॑ ತೇ ವಸ॒ನ್ತ-ಶ್ಶಿರಃ॑ । ಗ್ರೀ॒ಷ್ಮೋ ದಖ್ಷಿ॑ಣಃ ಪ॒ಖ್ಷಃ । ವ॒ರ॒.ಷಾಃ ಪುಚ್ಛ᳚ಮ್ । ಶ॒ರದುತ್ತ॑ರಃ ಪ॒ಖ್ಷಃ ।
ಹೇ॒ಮ॒ನ್ತೋ ಮದ್ಧ್ಯ᳚ಮ್ । ಪೂ॒ರ್ವ॒ಪ॒ಖ್ಷಾಶ್ಚಿತ॑ಯಃ । ಅ॒ಪ॒ರ॒ಪ॒ಖ್ಷಾಃ ಪುರೀ॑ಷಮ್ ॥ 7 ॥

ಅ॒ಹೋ॒ರಾ॒ತ್ರಾ-ಣೀಷ್ಟ॑ಕಾಃ । ಋ॒ಷ॒ಭೋ॑-ಽಸಿ ಸ್ವ॒ರ್ಗೋ ಲೋ॒ಕಃ । ಯಸ್ಯಾ᳚-ನ್ದಿ॒ಶಿ ಮ॒ಹೀಯ॑ಸೇ । ತತೋ॑ ನೋ॒ ಮಹ॒ ಆವ॑ಹ । ವಾ॒ಯು ರ್ಭೂ॒ತ್ವಾ ಸರ್ವಾ॒ ದಿಶ॒ ಆವಾ॑ಹಿ । ಸರ್ವಾ॒ ದಿಶೋ-ಽನು॒ ವಿವಾ॑ಹಿ । ಸರ್ವಾ॒ ದಿಶೋ-ಽನು॒ ಸಂ​ವಾಁ॑ಹಿ । ಚಿತ್ತ್ಯಾ॒ ಚಿತಿ॒-ಮಾಪೃ॑ಣ । ಅಚಿ॑ತ್ತ್ಯಾ॒ ಚಿತಿ॒-ಮಾಪೃ॑ಣ । ಚಿದ॑ಸಿ ಸಮು॒ದ್ರಯೋ॑ನಿಃ ॥ 8 ॥

ಇನ್ದು॒ ರ್ದಖ್ಷ॑-ಶ್ಶ್ಯೇ॒ನ ಋ॒ತಾವಾ᳚ । ಹಿರ॑ಣ್ಯಪಖ್ಷ-ಶ್ಶಕು॒ನೋ ಭು॑ರ॒ಣ್ಯುಃ । ಮ॒ಹಾ-ನ್ಥ್ಸ॒ಧಸ್ಥೇ᳚ ಧ್ರು॒ವ ಆನಿಷ॑ತ್ತಃ । ನಮ॑ಸ್ತೇ ಅಸ್ತು॒ ಮಾ ಮಾ॑ ಹಿಗ್ಂಸೀಃ । ಏತಿ॒ ಪ್ರೇತಿ॒ ವೀತಿ॒ ಸಮಿತ್ಯುದಿತಿ॑ । ದಿವ॑-ಮ್ಮೇ ಯಚ್ಛ । ಅ॒ನ್ತರಿ॑ಖ್ಷ-ಮ್ಮೇ ಯಚ್ಛ । ಪೃ॒ಥಿ॒ವೀ-ಮ್ಮೇ॑ ಯಚ್ಛ ।
ಪೃ॒ಥಿ॒ವೀ-ಮ್ಮೇ॑ ಯಚ್ಛ । ಅ॒ನ್ತರಿ॑ಖ್ಷ-ಮ್ಮೇ ಯಚ್ಛ । ದಿವ॑-ಮ್ಮೇ ಯಚ್ಛ । ಅಹ್ನಾ॒ ಪ್ರಸಾ॑ರಯ । ರಾತ್ರ್ಯಾ॒ ಸಮ॑ಚ । ರಾತ್ರ್ಯಾ॒ ಪ್ರಸಾ॑ರಯ । ಅಹ್ನಾ॒ ಸಮ॑ಚ ।
ಕಾಮ॒-ಮ್ಪ್ರಸಾ॑ರಯ । ಕಾಮ॒ಗ್ಂ॒ ಸಮ॑ಚ ॥ 9 ॥
(ಪುರೀ॑ಷಗ್ಂ - ಸಮು॒ದ್ರಯೋ॑ನಿಃ - ಪೃಥಿ॒ವೀ-ಮ್ಮೇ॑ ಯಚ್ಛಾ॒ನ್ತರಿ॑ಖ್ಷ-ಮ್ಮೇ ಯಚ್ಛ ಸ॒ಪ್ತ ಚ॑) (ಅ. 4)

ಅನುವಾಕಂ 5 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ
ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಭೂರ್ಭುವ॒-ಸ್ಸ್ವಃ॑ । ಓಜೋ॒ ಬಲ᳚ಮ್ । ಬ್ರಹ್ಮ॑ ಖ್ಷ॒ತ್ರಮ್ । ಯಶೋ॑ ಮ॒ಹತ್ । ಸ॒ತ್ಯ-ನ್ತಪೋ॒ ನಾಮ॑ । ರೂ॒ಪ-ಮ॒ಮೃತ᳚ಮ್ । ಚಖ್ಷು॒-ಶ್ಶ್ರೋತ್ರ᳚ಮ್ । ಮನ॒ ಆಯುಃ॑ ।
ವಿಶ್ವಂ॒-ಯಁಶೋ॑ ಮ॒ಹಃ । ಸ॒ಮ-ನ್ತಪೋ॒ ಹರೋ॒ ಭಾಃ । ಜಾ॒ತವೇ॑ದಾ॒ ಯದಿ॑ ವಾ ಪಾವ॒ಕೋ-ಽಸಿ॑ । ವೈ॒ಶ್ವಾ॒ನ॒ರೋ ಯದಿ॑ ವಾ ವೈದ್ಯು॒ತೋ-ಽಸಿ॑ । ಶ-ಮ್ಪ್ರ॒ಜಾಭ್ಯೋ॒ ಯಜ॑ಮಾನಾಯ ಲೋ॒ಕಮ್ । ಊರ್ಜ॒-ಮ್ಪುಷ್ಟಿ॒-ನ್ದದ॑-ದ॒ಭ್ಯಾವ॑ವೃಥ್ಸ್ವ ॥ 10 ॥
(ಭಾಶ್ಚ॒ತ್ವಾರಿ॑ ಚ) (ಅ. 5)

ಅನುವಾಕಂ 6 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ
ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ರಾಜ್ಞೀ॑ ವಿರಾಜ್ಞೀ᳚ । ಸ॒ಮ್ರಾಜ್ಞೀ᳚ ಸ್ವ॒ರಾಜ್ಞೀ᳚ । ಅ॒ರ್ಚಿ-ಶ್ಶೋ॒ಚಿಃ । ತಪೋ॒ ಹರೋ॒ ಭಾಃ । ಅ॒ಗ್ನಿ-ರಿನ್ದ್ರೋ॒ ಬೃಹ॒ಸ್ಪತಿಃ॑ । ವಿಶ್ವೇ॑ ದೇ॒ವಾ ಭುವ॑ನಸ್ಯ ಗೋ॒ಪಾಃ ।
ತೇ ಮಾ॒ ಸರ್ವೇ॒ ಯಶ॑ಸಾ॒ ಸಗ್ಂಸೃ॑ಜನ್ತು ॥ 11 ॥
(ರಾಜ್ಞೀನ್ದ್ರೋ॑ ಮಾ ಸ॒ಪ್ತ (ಅ. 6)

ಅನುವಾಕಂ 7 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಅಸ॑ವೇ॒ ಸ್ವಾಹಾ॒ ವಸ॑ವೇ॒ ಸ್ವಾಹಾ᳚ । ವಿಭು॑ವೇ॒ ಸ್ವಾಹಾ॒ ವಿವ॑ಸ್ವತೇ॒ ಸ್ವಾಹಾ᳚ । ಅ॒ಭಿ॒ಭುವೇ॒ ಸ್ವಾಹಾ-ಽಧಿ॑ಪತಯೇ॒ ಸ್ವಾಹಾ᳚ । ದಿ॒ವಾಮ್ಪತ॑ಯೇ॒ ಸ್ವಾಹಾ ಽಗ್ಂ॑ಹಸ್ಪ॒ತ್ಯಾಯ॒ ಸ್ವಾಹಾ᳚ । ಚಾ॒ಖ್ಷು॒ಷ್ಮ॒ತ್ಯಾಯ॒ ಸ್ವಾಹಾ᳚ ಜ್ಯೋತಿಷ್ಮ॒ತ್ಯಾಯ॒ ಸ್ವಾಹಾ᳚ । ರಾಜ್ಞೇ॒ ಸ್ವಾಹಾ॑ ವಿ॒ರಾಜ್ಞೇ॒ ಸ್ವಾಹಾ᳚ । ಸ॒ಮ್ರಾಜ್ಞೇ॒ ಸ್ವಾಹಾ᳚ ಸ್ವ॒ರಾಜ್ಞೇ॒ ಸ್ವಾಹಾ᳚ ।
ಶೂಷಾ॑ಯ॒ ಸ್ವಾಹಾ॒ ಸೂರ್ಯಾ॑ಯ॒ ಸ್ವಾಹಾ᳚ । ಚ॒ನ್ದ್ರಮ॑ಸೇ॒ ಸ್ವಾಹಾ॒ ಜ್ಯೋತಿ॑ಷೇ॒ ಸ್ವಾಹಾ᳚ ।
ಸ॒ಗ್ಂ॒ಸರ್ಪಾ॑ಯ॒ ಸ್ವಾಹಾ॑ ಕ॒ಲ್ಯಾಣಾ॑ಯ॒ ಸ್ವಾಹಾ᳚ ।
ಅರ್ಜು॑ನಾಯ॒ ಸ್ವಾಹಾ᳚ ॥ 12 ॥
(ಕ॒ಲ್ಯಾಣಾ॑ಯ॒ ಸ್ವಾಹೈಕ॑-ಞ್ಚ) (ಅ. 7)

ಅನುವಾಕಂ 8 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ವಿ॒ಪ॒ಶ್ಚಿತೇ॒ ಪವ॑ಮಾನಾಯ ಗಾಯತ । ಮ॒ಹೀ ನ ಧಾರಾ ಽತ್ಯನ್ಧೋ॑ ಅರ್​ಷತಿ । ಅಹಿ॑ರ್​ಹ ಜೀ॒ರ್ಣಾಮತಿ॑ಸರ್ಪತಿ॒ ತ್ವಚ᳚ಮ್ । ಅತ್ಯೋ॒ ನ ಕ್ರೀಡ॑ನ್ನ ಸರ॒ದ್ವೃಷಾ॒ ಹರಿಃ॑ ।
ಉ॒ಪ॒ಯಾ॒ಮಗೃ॑ಹೀತೋ-ಽಸಿ ಮೃ॒ತ್ಯವೇ᳚ ತ್ವಾ॒ ಜುಷ್ಟ॑-ಙ್ಗೃಹ್ಣಾಮಿ । ಏ॒ಷ ತೇ॒ ಯೋನಿ॑ರ್ಮೃ॒ತ್ಯವೇ᳚ ತ್ವಾ ॥ ಅಪ॑ ಮೃ॒ತ್ಯು-ಮಪ॒ಖ್ಷುಧ᳚ಮ್ । ಅಪೇ॒ತ-ಶ್ಶ॒ಪಥ॑-ಞ್ಜಹಿ ।
ಅಧಾ॑ ನೋ ಅಗ್ನ॒ ಆವ॑ಹ । ರಾ॒ಯಸ್ಪೋಷಗ್ಂ॑ ಸಹ॒ಸ್ರಿಣ᳚ಮ್ ॥ 13 ॥

ಯೇ ತೇ॑ ಸ॒ಹಸ್ರ॑ಮ॒ಯುತ॒-ಮ್ಪಾಶಾಃ᳚ । ಮೃತ್ಯೋ॒ ಮರ್ತ್ಯಾ॑ಯ॒ ಹನ್ತ॑ವೇ । ತಾನ್. ಯ॒ಜ್ಞಸ್ಯ॑ ಮಾ॒ಯಯಾ᳚ । ಸರ್ವಾ॒ನವ॑ ಯಜಾಮಹೇ ॥ ಭ॒ಖ್ಷೋ᳚ ಽಸ್ಯಮೃತ ಭ॒ಖ್ಷಃ । ತಸ್ಯ॑ ತೇ ಮೃ॒ತ್ಯು-ಪೀ॑ತಸ್ಯಾ॒-ಮೃತ॑ವತಃ ।
ಸ್ವ॒ಗಾ-ಕೃ॑ತಸ್ಯ॒ ಮಧು॑ಮತಃ ।
ಉಪ॑ಹೂತ॒ಸ್ಯೋ-ಪ॑ಹೂತೋ ಭಖ್ಷಯಾಮಿ ॥
ಮ॒ನ್ದ್ರಾ ಽಭಿಭೂ॑ತಿಃ ಕೇ॒ತು ರ್ಯ॒ಜ್ಞಾನಾಂ॒-ವಾಁಕ್ । ಅಸಾ॒ವೇಹಿ॑ ॥ 14 ॥

ಅ॒ನ್ಧೋ ಜಾಗೃ॑ವಿಃ ಪ್ರಾಣ । ಅಸಾ॒ವೇಹಿ॑ । ಬ॒ಧಿ॒ರ ಆ᳚ಕ್ರನ್ದಯಿತ-ರಪಾನ । ಅಸಾ॒ವೇಹಿ॑ । ಅ॒ಹ॒ಸ್ತೋಸ್ತ್ವಾ॒ ಚಖ್ಷುಃ॑ । ಅಸಾ॒ವೇಹಿ॑ । ಅ॒ಪಾ॒ದಾಶೋ॒ ಮನಃ॑ ।
ಅಸಾ॒ವೇಹಿ॑ । ಕವೇ॒ ವಿಪ್ರ॑ಚಿತ್ತೇ॒ ಶ್ರೋತ್ರ॑ । ಅಸಾ॒ವೇಹಿ॑ ॥ 15 ॥

ಸು॒ಹ॒ಸ್ತ-ಸ್ಸು॑ವಾ॒ಸಾಃ । ಶೂ॒ಷೋ ನಾಮಾ᳚ಸ್ಯ॒-ಮೃತೋ॒ ಮರ್ತ್ಯೇ॑ಷು । ತನ್ತ್ವಾ॒-ಽಹ-ನ್ತಥಾ॒ ವೇದ॑ । ಅಸಾ॒ವೇಹಿ॑ । ಅ॒ಗ್ನಿರ್ಮೇ॑ ವಾ॒ಚಿ ಶ್ರಿ॒ತಃ । ವಾಘೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ । ಅ॒ಮೃತ॒-ಮ್ಬ್ರಹ್ಮ॑ಣಿ । ವಾ॒ಯುರ್ಮೇ᳚ ಪ್ರಾ॒ಣೇ ಶ್ರಿ॒ತಃ ॥ 16 ॥

ಪ್ರಾ॒ಣೋ ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ । ಅ॒ಮೃತ॒-ಮ್ಬ್ರಹ್ಮ॑ಣಿ ।
ಸೂರ್ಯೋ॑ ಮೇ॒ ಚಖ್ಷು॑ಷಿ ಶ್ರಿ॒ತಃ ।
ಚಖ್ಷು॒ರ್॒ ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ । ಅ॒ಮೃತ॒-ಮ್ಬ್ರಹ್ಮ॑ಣಿ ।
ಚ॒ನ್ದ್ರಮಾ॑ ಮೇ॒ ಮನ॑ಸಿ ಶ್ರಿ॒ತಃ ॥ 17 ॥

ಮನೋ॒ ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ । ಅ॒ಮೃತ॒-ಮ್ಬ್ರಹ್ಮ॑ಣಿ ।
ದಿಶೋ॑ ಮೇ॒ ಶ್ರೋತ್ರೇ᳚ ಶ್ರಿ॒ತಾಃ । ಶ್ರೋತ್ರ॒ಗ್ಂ॒ ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ ।
ಅ॒ಮೃತ॒-ಮ್ಬ್ರಹ್ಮ॑ಣಿ । ಆಪೋ॑ ಮೇ॒ ರೇತ॑ಸಿ ಶ್ರಿ॒ತಾಃ ॥ 18 ॥

ರೇತೋ॒ ಹೃದ॑ಯೇ । ಹೃದ॑ಯ॒-ಮ್ಮಯಿ॑ ।
ಅ॒ಹಮ॒ಮೃತೇ᳚ । ಅ॒ಮೃತ॒-ಮ್ಬ್ರಹ್ಮ॑ಣಿ ।
ಪೃ॒ಥಿ॒ವೀ ಮೇ॒ ಶರೀ॑ರೇ ಶ್ರಿ॒ತಾ ।
ಶರೀ॑ರ॒ಗ್ಂ॒ ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ । ಅ॒ಮೃತ॒-ಮ್ಬ್ರಹ್ಮ॑ಣಿ । ಓ॒ಷ॒ಧಿ॒ವ॒ನ॒ಸ್ಪ॒ತಯೋ॑ ಮೇ॒ ಲೋಮ॑ಸು ಶ್ರಿ॒ತಾಃ ॥ 19 ॥

ಲೋಮಾ॑ನಿ॒ ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ । ಅ॒ಮೃತ॒-ಮ್ಬ್ರಹ್ಮ॑ಣಿ ।
ಇನ್ದ್ರೋ॑ ಮೇ॒ ಬಲೇ᳚ ಶ್ರಿ॒ತಃ । ಬಲ॒ಗ್ಂ॒ ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ ।
ಅ॒ಮೃತ॒-ಮ್ಬ್ರಹ್ಮ॑ಣಿ । ಪ॒ರ್ಜನ್ಯೋ॑ ಮೇ ಮೂ॒ರ್ಧ್ನಿ ಶ್ರಿ॒ತಃ ॥ 20 ॥

ಮೂ॒ದ್ರ್ಧಾ ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ । ಅ॒ಮೃತ॒-ಮ್ಬ್ರಹ್ಮ॑ಣಿ ।
ಈಶಾ॑ನೋ ಮೇ ಮ॒ನ್ಯೌ ಶ್ರಿ॒ತಃ । ಮ॒ನ್ಯುರ್-ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ ।
ಅ॒ಮೃತ॒-ಮ್ಬ್ರಹ್ಮ॑ಣಿ ।
ಆ॒ತ್ಮಾ ಮ॑ ಆ॒ತ್ಮನಿ॑ ಶ್ರಿ॒ತಃ( ) ॥ 21 ॥

ಆ॒ತ್ಮಾ ಹೃದ॑ಯೇ । ಹೃದ॑ಯ॒-ಮ್ಮಯಿ॑ । ಅ॒ಹಮ॒ಮೃತೇ᳚ । ಅ॒ಮೃತ॒-ಮ್ಬ್ರಹ್ಮ॑ಣಿ ।
ಪುನ॑ರ್ಮ ಆ॒ತ್ಮಾ ಪುನ॒ರಾಯು॒ರಾಗಾ᳚ತ್ । ಪುನಃ॑ ಪ್ರಾ॒ಣಃ ಪುನ॒ರಾಕೂ॑ತ॒-ಮಾಗಾ᳚ತ್ ।
ವೈ॒ಶ್ವಾ॒ನ॒ರೋ ರ॒ಶ್ಮಿಭಿ॑ ರ್ವಾವೃಧಾ॒ನಃ । ಅ॒ನ್ತಸ್ತಿ॑ಷ್ಠತ್ವ॒ಮೃತ॑ಸ್ಯ ಗೋ॒ಪಾಃ ॥ 22 ॥
(ಸ॒ಹ॒ಸ್ರಿಣ॑ - ಮಿಹಿ॒ - ಶ್ರೋತ್ರಾಸಾ॒ವೇಹಿ॑ - ಪ್ರಾ॒ಣೇ ಶ್ರಿ॒ತೋ - ಮನ॑ಸಿ ಶ್ರಿ॒ತೋ - ರೇತ॑ಸಿ ಶ್ರಿ॒ತಾ - ಲೋಮ॑ಸು ಶ್ರಿ॒ತಾ - ಮೂ॒ರ್ಧ್ನಿ ಶ್ರಿ॒ತ - ಆ॒ತ್ಮನಿ॑ ಶ್ರಿ॒ತೋ᳚ - +-ಽಷ್ಟೌ ಚ॑) (ಅ. 8)

(ಅ॒ಗ್ನಿ-ರ್ವಾ॒ಯು-ಸ್ಸೂರ್ಯ॑ ಶ್ಚ॒ನ್ದ್ರಮಾ॒ ದಿಶ॒ ಆಪಃ॑ ಪೃಥಿ॒ ವ್ಯೋ॑ಷಧಿವನಸ್ಪ॒ತಯ॒ ಇನ್ದ್ರಃ॑ ಪ॒ರ್ಜನ್ಯ॒ ಈಶಾ॑ನ ಆ॒ತ್ಮಾ ಪುನ॑ರ್ಮೇ॒ ತ್ರಯೋ॑ದಶ)

ಅನುವಾಕಂ 9 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಪ್ರ॒ಜಾಪ॑ತಿ ರ್ದೇ॒ವಾನ॑ಸೃಜತ । ತೇ ಪಾ॒ಪ್ಮನಾ॒ ಸನ್ದಿ॑ತಾ ಅಜಾಯನ್ತ । ತಾನ್ ವ್ಯ॑ದ್ಯತ್ । ಯ-ದ್ವ್ಯ॒ದ್ಯತ್ । ತಸ್ಮಾ᳚-ದ್ವಿ॒ದ್ಯುತ್ । ತಮ॑ವೃಶ್ಚತ್ । ಯದವೃ॑ಶ್ಚತ್ । ತಸ್ಮಾ॒-ದ್ವೃಷ್ಟಿಃ॑ । ತಸ್ಮಾ॒-ದ್ಯತ್ರೈ॒ತೇ ದೇ॒ವತೇ॑ ಅಭಿ॒ಪ್ರಾಪ್ನು॑ತಃ ।
ವಿಚ॑ ಹೈ॒ವಾಸ್ಯ॒ ತತ್ರ॑ ಪಾ॒ಪ್ಮಾನ॒ನ್ದ್ಯತಃ॑ ॥ 23 ॥

ವೃ॒ಶ್ಚತ॑ಶ್ಚ ॥ ಸೈಷಾ ಮೀ॑ಮಾ॒ಗ್ಂ॒ಸಾ-ಽಗ್ನಿ॑ಹೋ॒ತ್ರ ಏ॒ವ ಸ॑ಪನ್ನ್ನಾ । ಅಥೋ॑ ಆಹುಃ ।
ಸರ್ವೇ॑ಷು ಯಜ್ಞಕ್ರ॒ತುಷ್ವಿತಿ॑ ॥
ಹೋಷ್ಯ॑ನ್ನ॒ಪ ಉಪ॑ಸ್ಪೃಶೇತ್ ।
ವಿದ್ಯು॑ದಸಿ॒ ವಿದ್ಯ॑ಮೇ ಪಾ॒ಪ್ಮಾನ॒ಮಿತಿ॑ ।
ಅಥ॑ ಹು॒ತ್ವೋಪ॑ಸ್ಪೃಶೇತ್ ।
ವೃಷ್ಟಿ॑ರಸಿ॒ ವೃಶ್ಚ॑ ಮೇ ಪಾ॒ಪ್ಮಾನ॒ಮಿತಿ॑ ।
ಯ॒ಖ್ಷ್ಯಮಾ॑ಣೋ ವೇ॒ಷ್ಟ್ವಾ ವಾ᳚ । ವಿ ಚ॑ ಹೈ॒ವಾಸ್ಯೈ॒ತೇ ದೇ॒ವತೇ॑ ಪಾ॒ಪ್ಮಾನ॒-ನ್ದ್ಯತಃ॑ ॥ 24 ॥

ವೃ॒ಶ್ಚತ॑ಶ್ಚ ॥ ಅ॒ತ್ಯ॒ಗ್ಂ॒ಹೋ ಹಾರು॑ಣಿಃ । ಬ್ರ॒ಹ್ಮ॒ಚಾ॒ರಿಣೇ᳚ ಪ್ರ॒ಶ್ನಾ-ನ್ಪ್ರೋಚ್ಯ॒ ಪ್ರಜಿ॑ಘಾಯ ।
ಪರೇ॑ಹಿ । ಪ್ಲ॒ಖ್ಷ-ನ್ದೈಯಾಂ᳚ (ದೈಯ್ಯಾಂ᳚) ಪಾತಿ-ಮ್ಪೃಚ್ಛ । ವೇತ್ಥ॑ ಸಾವಿ॒ತ್ರಾಂ(3) ನ ವೇ॒ತ್ಥಾ(3) ಇತಿ॑ ।
ತಮಾ॒ಗತ್ಯ॑ ಪಪ್ರಚ್ಛ । ಆ॒ಚಾರ್ಯೋ॑ ಮಾ॒ ಪ್ರಾಹೈ॑ಷೀತ್ ।
ವೇತ್ಥ॑ ಸಾವಿ॒ತ್ರಾಂ(3) ನ ವೇ॒ತ್ಥಾ(3) ಇತಿ॑ । ಸಹೋ॑ವಾಚ॒ ವೇದೇತಿ॑ ॥ 25 ॥

ಸ ಕಸ್ಮಿ॒-ನ್ಪ್ರತಿ॑ಷ್ಠಿತ॒ ಇತಿ॑ । ಪ॒ರೋರ॑ಜ॒ಸೀತಿ॑ ।
ಕಸ್ತದ್ಯ-ತ್ಪ॒ರೋರ॑ಜಾ॒ ಇತಿ॑ । ಏ॒ಷ ವಾವ ಸ ಪ॒ರೋರ॑ಜಾ॒ ಇತಿ॑ ಹೋವಾಚ । ಯ ಏ॒ಷ ತಪ॑ತಿ ।
ಏ॒ಷೋ᳚ ಽರ್ವಾಗ್ರ॑ಜಾ॒ ಇತಿ॑ । ಸ ಕಸ್ಮಿ॑-ನ್ತ್ವೇ॒ಷ ಇತಿ॑ । ಸ॒ತ್ಯ ಇತಿ॑ । ಕಿ-ನ್ತಥ್ಸ॒ತ್ಯಮಿತಿ॑ । ತಪ॒ ಇತಿ॑ ॥ 26 ॥

ಕಸ್ಮಿ॒ನ್ನು ತಪ॒ ಇತಿ॑ । ಬಲ॒ ಇತಿ॑ ।
ಕಿ-ನ್ತ-ದ್ಬ॒ಲಮಿತಿ॑ । ಪ್ರಾ॒ಣ ಇತಿ॑ ।
ಮಾಸ್ಮ॑ ಪ್ರಾ॒ಣಮತಿ॑ ಪೃಚ್ಛ॒ ಇತಿ॑ ಮಾ-ಽಽಚಾ॒ರ್ಯೋ᳚ ಽಬ್ರವೀ॒ದಿತಿ॑ ಹೋವಾಚ ಬ್ರಹ್ಮಚಾ॒ರೀ ॥
ಸಹೋ॑ವಾಚ ಪ್ಲ॒ಖ್ಷೋ ದೈಯಾಂ᳚ (ದೈಯ್ಯಾಂ᳚) ಪಾತಿಃ ।
ಯದ್ವೈ ಬ್ರ॑ಹ್ಮಚಾರಿ-ನ್ಪ್ರಾ॒ಣಮತ್ಯ॑ಪ್ರಖ್ಷ್ಯಃ । ಮೂ॒ದ್ರ್ಧಾ ತೇ॒ ವ್ಯಪ॑ತಿಷ್ಯತ್ ।
ಅ॒ಹಮು॑ತ ಆಚಾ॒ರ್ಯಾ-ಚ್ಛ್ರೇಯಾ᳚-ನ್ಭವಿಷ್ಯಾಮಿ ।
ಯೋ ಮಾ॑ ಸಾವಿ॒ತ್ರೇ ಸ॒ಮವಾ॑ದಿ॒ಷ್ಟೇತಿ॑ ॥ 27 ॥

ತಸ್ಮಾ᳚-ಥ್ಸಾವಿ॒ತ್ರೇ ನ ಸಂ​ವಁ॑ದೇತ ॥
ಸ ಯೋ ಹ॒ವೈ ಸಾ॑ವಿ॒ತ್ರಂ-ವಿಁ॒ದುಷಾ॑ ಸಾವಿ॒ತ್ರೇ ಸಂ॒​ವಁದ॑ತೇ । ಸಹಾ᳚ಸ್ಮಿ॒-ಞ್ಛ್ರಿಯ॑-ನ್ದಧಾತಿ ।
ಅನು॑ ಹ॒ವಾ ಅ॑ಸ್ಮಾ ಅ॒ಸೌ ತಪ॒ಞ್ಛ್ರಿಯ॑-ಮ್ಮನ್ಯತೇ ।
ಅನ್ವ॑ಸ್ಮೈ॒ ಶ್ರೀಸ್ತಪೋ॑ ಮನ್ಯತೇ । ಅನ್ವ॑ಸ್ಮೈ॒ ತಪೋ॒ ಬಲ॑-ಮ್ಮನ್ಯತೇ । ಅನ್ವ॑ಸ್ಮೈ॒ ಬಲ॑-ಮ್ಪ್ರಾ॒ಣ-ಮ್ಮ॑ನ್ಯತೇ ॥ ಸ ಯದಾಹ॑ ।
ಸ॒ಜ್ಞಾನ್ನಂ॑-ವಿಁ॒ಜ್ಞಾನ॒-ನ್ದರ್​ಶಾ॑ ದೃ॒ಷ್ಟೇತಿ॑ । ಏ॒ಷ ಏ॒ವ ತತ್ ॥ 28 ॥

ಅಥ॒ ಯದಾಹ॑ । ಪ್ರಸ್ತು॑ತಂ॒-ವಿಁಷ್ಟು॑ತಗ್ಂ ಸು॒ತಾ ಸು॑ನ್ವ॒ತೀತಿ॑ । ಏ॒ಷ ಏ॒ವ ತತ್ ॥ ಏ॒ಷ ಹ್ಯೇ॑ವ ತಾನ್ಯಹಾ॑ನಿ । ಏ॒ಷ ರಾತ್ರ॑ಯಃ ॥ ಅಥ॒ ಯದಾಹ॑ ।
ಚಿ॒ತ್ರಃ ಕೇ॒ತು ರ್ದಾ॒ತಾ ಪ್ರ॑ದಾ॒ತಾ ಸ॑ವಿ॒ತಾ ಪ್ರ॑ಸವಿ॒ತಾ ಽಭಿ॑ಶಾ॒ಸ್ತಾ ಽನು॑ಮ॒ನ್ತೇತಿ॑ । ಏ॒ಷ ಏ॒ವ ತತ್ । ಏ॒ಷ ಹ್ಯೇ॑ವ ತೇ-ಽಹ್ನೋ॑ ಮುಹೂ॒ರ್ತಾಃ । ಏ॒ಷ ರಾತ್ರೇಃ᳚ ॥ 29 ॥

ಅಥ॒ ಯದಾಹ॑ । ಪ॒ವಿತ್ರ॑-ಮ್ಪವಯಿ॒ಷ್ಯನ್-ಥ್ಸಹ॑ಸ್ವಾ॒ನ್-ಥ್ಸಹೀ॑ಯಾನರು॒ಣೋ॑
-ಽರು॒ಣರ॑ಜಾ॒ ಇತಿ॑ । ಏ॒ಷ ಏ॒ವ ತತ್ । ಏ॒ಷ ಹ್ಯೇ॑ವ ತೇ᳚ ಽದ್ರ್ಧಮಾ॒ಸಾಃ । ಏ॒ಷ ಮಾಸಾಃ᳚ ॥ ಅಥ॒ ಯದಾಹ॑ ।
ಅ॒ಗ್ನಿ॒ಷ್ಟೋ॒ಮ ಉ॒ಕ್ಥ್ಯೋ᳚-ಽಗ್ನಿರ್-ಋ॒ತುಃ ಪ್ರ॒ಜಾಪ॑ತಿ-ಸ್ಸಂ​ವಁಥ್ಸ॒ರ ಇತಿ॑ । ಏ॒ಷ ಏ॒ವ ತತ್ । ಏ॒ಷ ಹ್ಯೇ॑ವ ತೇ ಯ॑ಜ್ಞಕ್ರ॒ತವಃ॑ । ಏ॒ಷ ಋ॒ತವಃ॑ ॥ 30 ॥

ಏ॒ಷ ಸಂ॑​ವಁಥ್ಸ॒ರಃ ॥ ಅಥ॒ ಯದಾಹ॑ । ಇ॒ದಾನೀ᳚-ನ್ತ॒ದಾನೀ॒ಮಿತಿ॑ । ಏ॒ಷ ಏ॒ವ ತತ್ । ಏ॒ಷ ಹ್ಯೇ॑ವ ತೇ ಮು॑ಹೂ॒ರ್ತಾನಾ᳚-ಮ್ಮುಹೂ॒ರ್ತಾಃ ॥ ಜ॒ನ॒ಕೋ ಹ॒ ವೈ ದೇ॑ಹಃ । ಅ॒ಹೋ॒ರಾ॒ತ್ರೈ-ಸ್ಸ॒ಮಾಜ॑ಗಾಮ । ತಗ್ಂ ಹೋ॑ಚುಃ । ಯೋ ವಾ ಅ॒ಸ್ಮಾನ್. ವೇದ॑ । ವಿ॒ಜಹ॑ತ್-ಪಾ॒ಪ್ಮಾನ॑ಮೇತಿ ॥ 31 ॥

ಸರ್ವ॒-ಮಾಯು॑ರೇತಿ । ಅ॒ಭಿ ಸ್ವ॒ರ್ಗಂ-ಲೋಁ॒ಕ-ಞ್ಜ॑ಯತಿ ।
ನಾಸ್ಯಾ॒-ಮುಷ್ಮಿ॑ನ್ ಁಲೋ॒ಕೇ-ಽನ್ನ॑-ಙ್ಖ್ಷೀಯತ॒ ಇತಿ॑ ॥ ವಿ॒ಜಹ॑ದ್ಧ॒ ವೈ ಪಾ॒ಪ್ಮಾನ॑ಮೇತಿ ।
ಸರ್ವ॒ಮಾಯು॑ರೇತಿ । ಅ॒ಭಿ ಸ್ವ॒ರ್ಗಂ-ಲೋಁ॒ಕ-ಞ್ಜ॑ಯತಿ ।
ನಾಸ್ಯಾ॒-ಮುಷ್ಮಿ॑ನ್ ಁಲೋ॒ಕೇ ಽನ್ನ॑-ಙ್ಖ್ಷೀಯತೇ ।
ಯ ಏ॒ವಂ-ವೇಁದ॑ ॥ ಅಹೀ॑ನಾ॒ ಹಾಶ್ವ॑ತ್ಥ್ಯಃ । ಸಾ॒ವಿ॒ತ್ರಂ-ವಿಁ॒ದಾ-ಞ್ಚ॑ಕಾರ ॥ 32 ॥

ಸ ಹ॑ ಹ॒ಗ್ಂ॒ಸೋ ಹಿ॑ರ॒ಣ್ಮಯೋ॑ ಭೂ॒ತ್ವಾ । ಸ್ವ॒ರ್ಗಂ-ಲೋಁ॒ಕಮಿ॑ಯಾಯ । ಆ॒ದಿ॒ತ್ಯಸ್ಯ॒ ಸಾಯು॑ಜ್ಯಮ್ ॥ ಹ॒ಗ್ಂ॒ಸೋ ಹ॒ವೈ ಹಿ॑ರ॒ಣ್ಮಯೋ॑ ಭೂ॒ತ್ವಾ ।
ಸ್ವ॒ರ್ಗಂ-ಲೋಁ॒ಕಮೇ॑ತಿ । ಆ॒ದಿ॒ತ್ಯಸ್ಯ॒ ಸಾಯು॑ಜ್ಯಮ್ । ಯ ಏ॒ವಂ-ವೇಁದ॑ ॥ ದೇ॒ವ॒ಭಾ॒ಗೋ ಹ॑ ಶ್ರೌತ॒ರ್॒ಷಃ । ಸಾ॒ವಿ॒ತ್ರಂ-ವಿಁ॒ದಾ-ಞ್ಚ॑ಕಾರ ।
ತಗ್ಂ ಹ॒ ವಾಗದೃ॑ಶ್ಯಮಾ॒ನಾ ಽಭ್ಯು॑ವಾಚ ॥ 33 ॥

ಸರ್ವ॑ಮ್ಬತ ಗೌತ॒ಮೋ ವೇ॑ದ । ಯ-ಸ್ಸಾ॑ವಿ॒ತ್ರಂ-ವೇಁದೇತಿ॑ । ಸ ಹೋ॑ವಾಚ । ಕೈಷಾ ವಾಗ॒ಸೀತಿ॑ । ಅ॒ಯಮ॒ಹಗ್ಂ ಸಾ॑ವಿ॒ತ್ರಃ । ದೇ॒ವಾನಾ॑-ಮುತ್ತ॒ಮೋ ಲೋ॒ಕಃ । ಗುಹ್ಯ॒-ಮ್ಮಹೋ॒ ಬಿಭ್ರ॒ದಿತಿ॑ । ಏ॒ತಾವ॑ತಿ ಹ ಗೌತ॒ಮಃ ।
ಯ॒ಜ್ಞೋ॒ಪ॒ವೀ॒ತ-ಙ್ಕೃ॒ತ್ವಾ-ಽಧೋ ನಿಪ॑ಪಾತ ।
ನಮೋ॒ ನಮ॒ ಇತಿ॑ ॥ 34 ॥

ಸ ಹೋ॑ವಾಚ । ಮಾ ಭೈ॑ಷೀ ರ್ಗೌತಮ । ಜಿ॒ತೋ ವೈ ತೇ॑ ಲೋ॒ಕ ಇತಿ॑ ॥ ತಸ್ಮಾ॒ದ್ಯೇ ಕೇ ಚ॑ ಸಾವಿ॒ತ್ರಂ-ವಿಁ॒ದುಃ । ಸರ್ವೇ॒ ತೇ ಜಿ॒ತಲೋ॑ಕಾಃ ॥ ಸ ಯೋ ಹ॒ವೈ ಸಾ॑ವಿ॒ತ್ರ-ಸ್ಯಾ॒ಷ್ಟಾಖ್ಷ॑ರ-ಮ್ಪ॒ದಗ್ಗ್​ ಶ್ರಿ॒ಯಾ ಽಭಿಷಿ॑ಕ್ತಂ॒-ವೇಁದ॑ । ಶ್ರಿ॒ಯಾ ಹೈ॒ವಾಭಿಷಿ॑ಚ್ಯತೇ । ಘೃಣಿ॒ರಿತಿ॒ ದ್ವೇ ಅ॒ಖ್ಷರೇ᳚ । ಸೂರ್ಯ॒ ಇತಿ॒ ತ್ರೀಣಿ॑ । ಆ॒ದಿ॒ತ್ಯ ಇತಿ॒ ತ್ರೀಣಿ॑ ॥ 35 ॥

ಏ॒ತದ್ವೈ ಸಾ॑ವಿ॒ತ್ರ-ಸ್ಯಾ॒ಷ್ಟಾಖ್ಷ॑ರ-ಮ್ಪ॒ದಗ್ಗ್​ ಶ್ರಿ॒ಯಾಭಿಷಿ॑ಕ್ತಮ್ । ಯ ಏ॒ವಂ-ವೇಁದ॑ ।
ಶ್ರಿ॒ಯಾ ಹೈ॒ವಾಭಿಷಿ॑ಚ್ಯತೇ ॥ ತದೇ॒-ತದೃ॒ಚಾ-ಽಭ್ಯು॑ಕ್ತಮ್ । ಋ॒ಚೋ ಅ॒ಖ್ಷರೇ॑ ಪರ॒ಮೇ ವ್ಯೋ॑ಮನ್ನ್ ।
ಯಸ್ಮಿ॑-ನ್ದೇ॒ವಾ ಅಧಿ॒ ವಿಶ್ವೇ॑ ನಿಷೇ॒ದುಃ ।
ಯಸ್ತನ್ನ ವೇದ॒ ಕಿಮೃ॒ಚಾ ಕ॑ರಿಷ್ಯತಿ । ಯ ಇ-ತ್ತದ್ವಿ॒ದುಸ್ತ ಇ॒ಮೇ ಸಮಾ॑ಸತ॒ ಇತಿ॑ ॥ ನ ಹ॒ವಾ ಏ॒ತಸ್ಯ॒ರ್ಚಾ ನ ಯಜು॑ಷಾ॒ ನ ಸಾಮ್ನಾ-ಽರ್ಥೋ᳚-ಽಸ್ತಿ ।
ಯ-ಸ್ಸಾ॑ವಿ॒ತ್ರಂ-ವೇಁದ॑ ॥ 36 ॥

ತದೇ॒ತ-ತ್ಪ॑ರಿ॒ ಯದ್ದೇ॑ವಚ॒ಕ್ರಮ್ ।
ಆ॒ರ್ದ್ರ-ಮ್ಪಿನ್ವ॑ಮಾನಗ್ಗ್​ ಸ್ವ॒ರ್ಗೇ ಲೋ॒ಕ ಏ॑ತಿ ।
ವಿ॒ಜಹ॒-ದ್ವಿಶ್ವಾ॑ ಭೂ॒ತಾನಿ॑ ಸ॒ಪಂಶ್ಯ॑ತ್ ॥
ಆ॒ರ್ದ್ರೋ ಹ॒ ವೈ ಪಿನ್ವ॑ಮಾನ-ಸ್ಸ್ವ॒ರ್ಗೇ ಲೋ॒ಕ ಏ॑ತಿ ।
ವಿ॒ಜಹ॒ನ್ ವಿಶ್ವಾ॑ ಭೂ॒ತಾನಿ॑ ಸ॒ಪಂಶ್ಯನ್ನ್॑ । ಯ ಏ॒ವಂ-ವೇಁದ॑ ॥ ಶೂ॒ಷೋ ಹ॒ವೈ ವಾ᳚ರ್​ಷ್ಣೇ॒ಯಃ । ಆ॒ದಿ॒ತ್ಯೇನ॑ ಸ॒ಮಾಜ॑ಗಾಮ । ತಗ್ಂ ಹೋ॑ವಾಚ ।
ಏಹಿ॑ ಸಾವಿ॒ತ್ರಂ-ವಿಁ॑ದ್ಧಿ । ಅ॒ಯಂ-ವೈಁ ಸ್ವ॒ರ್ಗ್ಯೋ᳚-ಽಗ್ನಿಃ ಪಾ॑ರಯಿ॒ಷ್ಣು-ರ॒ಮೃತಾ॒-ಥ್ಸಮ್ಭೂ॑ತ॒ ಇತಿ॑ । ಏ॒ಷ ವಾವ ಸ ಸಾ॑ವಿ॒ತ್ರಃ ।
ಯ ಏ॒ಷ ತಪ॑ತಿ । ಏಹಿ॒ ಮಾಂ-ವಿಁ॑ದ್ಧಿ । ಇತಿ॑ ಹೈ॒ವೈನ॒-ನ್ತದು॑ವಾಚ ॥ 37 ॥
(ದ್ಯತೋ॒ - ದ್ಯತೋ॒ - ವೇದೇತಿ॒ - ತಪ॒ ಇತಿ॑ - ಸ॒ಮವಾ॑ದಿ॒ಷ್ಟೇತಿ॒ - ತ-ದ್- ರಾತ್ರೇರ್॑. - ಋ॒ತವಃ॑ - ಏತಿ - ಚಕಾರೋ - ವಾಚ॒ - ನಮ॒ ಇತ್ಯಾ॑ - ದಿ॒ತ್ಯ ಇತಿ॒ ತ್ರೀಣಿ॑ - ಸಾವಿ॒ತ್ರಂ-ವೇಁದ॑ - ವಿದ್ಧಿ॒ ಪಞ್ಚ॑ ಚ) (ಅ. 9)

(ಪ್ರ॒ಜಾಪ॑ತಿರ್ದೇ॒ವಾನ್ ಸ॒ಜ್ಞಾನ್ನ॒-ಮ್ಪ್ರಸ್ತು॑ತ॒-ನ್ತಾನ್ಯಹಾ᳚ನ್ಯೇ॒ಷ ರಾತ್ರ॑ಯಾಸ್ಚಿ॒ತ್ರ ಕೇ॒ತುಸ್ತೇ-ಽಹ್ನೋ॑ ಮುಹೂ॒ರ್ತೋ ರಾತ್ರೇಃ᳚ ಪ॒ವಿತ್ರ॒-ನ್ತೇ᳚-ಽರ್ಧ ಮಾ॒ಸಾ ಅ॑ಗ್ನಿಷ್ಟೋ॒ಮೋ ಯ॑ಜ್ಞಕ್ರ॒ತವ॑ ಇ॒ದಾನೀ᳚-ಮ್ಮುಹೂ॒ರ್ತಾನಾ᳚-ಞ್ಜನ॒ಕೋ-ಽಹೀ॑ನಾ ದೇವಭಾ॒ಗಃ ಕೈಷಾ ವಾಮ್ಮ ಶೂ॒ಷೋ ಹ॒ ವೈ ಷೋಡ॑ಶ)

ಅನುವಾಕಂ 10 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ

ಇ॒ಯಂ-ವಾಁವ ಸ॒ರಘಾ᳚ । ತಸ್ಯಾ॑ ಅ॒ಗ್ನಿರೇ॒ವ ಸಾ॑ರ॒ಘ-ಮ್ಮಧು॑ । ಯಾ ಏ॒ತಾಃ ಪೂ᳚ರ್ವಪಖ್ಷಾ-ಪರಪ॒ಖ್ಷಯೋ॒ ರಾತ್ರ॑ಯಃ । ತಾ ಮ॑ಧು॒ಕೃತಃ॑ ।
ಯಾನ್ಯಹಾ॑ನಿ । ತೇ ಮ॑ಧುವೃ॒ಷಾಃ ।
ಸ ಯೋ ಹ॒ ವಾ ಏ॒ತಾ ಮ॑ಧು॒ಕೃತ॑ಶ್ಚ ಮಧುವೃ॒ಷಾಗ್​ಶ್ಚ॒ ವೇದ॑ ।
ಕು॒ರ್ವನ್ತಿ॑ ಹಾಸ್ಯೈ॒ತಾ ಅ॒ಗ್ನೌ ಮಧು॑ । ನಾಸ್ಯೇ᳚ಷ್ಟಾಪೂ॒ರ್ತ-ನ್ಧ॑ಯನ್ತಿ ॥
ಅಥ॒ ಯೋ ನ ವೇದ॑ ॥ 38 ॥
ನ ಹಾ᳚ಸ್ಯೈ॒ತಾ ಅ॒ಗ್ನೌ ಮಧು॑ ಕುರ್ವನ್ತಿ । ಧಯ॑ನ್ತ್ಯಸ್ಯೇಷ್ಟಾಪೂ॒ರ್ತಮ್ ॥
ಯೋ ಹ॒ ವಾ ಅ॑ಹೋರಾ॒ತ್ರಾಣಾ᳚-ನ್ನಾಮ॒ಧೇಯಾ॑ನಿ॒ ವೇದ॑ ।
ನಾಹೋ॑ರಾ॒ತ್ರೇಷ್ವಾ-ರ್ತಿ॒ಮಾರ್ಚ್ಛ॑ತಿ । ಸ॒ಜ್ಞಾನ್ನಂ॑-ವಿಁ॒ಜ್ಞಾನ॒-ನ್ದರ್​ಶಾ॑ ದೃ॒ಷ್ಟೇತಿ॑ ।
ಏ॒ತಾ-ವ॑ನುವಾ॒ಕೌ ಪೂ᳚ರ್ವಪ॒ಖ್ಷಸ್ಯಾ॑-ಹೋರಾ॒ತ್ರಾಣಾ᳚-ನ್ನಾಮ॒ಧೇಯಾ॑ನಿ । ಪ್ರಸ್ತು॑ತಂ॒-ವಿಁಷ್ಟು॑ತಗ್ಂ ಸು॒ತಾ ಸು॑ನ್ವ॒ತೀತಿ॑ । ಏ॒ತಾವ॑ನು-ವಾ॒ಕಾವ॑-ಪರಪ॒ಖ್ಷಸ್ಯಾ॑-ಹೋರಾ॒ತ್ರಾಣಾ᳚-ನ್ನಾಮ॒ಧೇಯಾ॑ನಿ ।
ನಾಹೋ॑ರಾ॒ತ್ರೇಷ್ವಾ-ರ್ತಿ॒ಮಾರ್ಚ್ಛ॑ತಿ । ಯ ಏ॒ವಂ-ವೇಁದ॑ ॥ 39 ॥

ಯೋ ಹ॒ ವೈ ಮು॑ಹೂ॒ರ್ತಾನಾ᳚-ನ್ನಾಮ॒ಧೇಯಾ॑ನಿ॒ ವೇದ॑ । ನ ಮು॑ಹೂ॒ರ್ತೇಷ್ವಾ-ರ್ತಿ॒ಮಾರ್ಚ್ಛ॑ತಿ । ಚಿ॒ತ್ರಃ ಕೇ॒ತು ರ್ದಾ॒ತಾ ಪ್ರ॑ದಾ॒ತಾ ಸ॑ವಿ॒ತಾ ಪ್ರ॑ಸವಿ॒ತಾ ಽಭಿ॑ಶಾ॒ಸ್ತಾ ಽನು॑ಮ॒ನ್ತೇತಿ॑ । ಏ॒ತೇ॑-ಽನುವಾ॒ಕಾ ಮು॑ಹೂ॒ರ್ತಾನಾ᳚-ನ್ನಾಮ॒ಧೇಯಾ॑ನಿ । ನ ಮು॑ಹೂ॒ರ್ತೇಷ್ವಾ-ರ್ತಿ॒ಮಾರ್ಚ್ಛ॑ತಿ । ಯ ಏ॒ವಂ-ವೇಁದ॑ ॥ ಯೋ ಹ॒ ವಾ ಅ॑ದ್ರ್ಧಮಾ॒ಸಾ-ನಾ᳚ಞ್ಚ॒ ಮಾಸಾ॑ನಾಞ್ಚ ನಾಮ॒ಧೇಯಾ॑ನಿ॒ ವೇದ॑ ।
ನಾದ್ರ್ಧ॑ಮಾ॒ಸೇಷು॒ ನ ಮಾಸೇ॒ಷ್ವಾ-ರ್ತಿ॒ಮಾರ್ಚ್ಛ॑ತಿ ।
ಪ॒ವಿತ್ರ॑-ಮ್ಪವಯಿ॒ಷ್ಯನ್-ಥ್ಸಹ॑ಸ್ವಾ॒ನ್-ಥ್ಸಹೀ॑ಯಾನರು॒ಣೋ॑ ಽರು॒ಣರ॑ಜಾ॒ ಇತಿ॑ ।
ಏ॒ತೇ॑-ಽನುವಾ॒ಕಾ ಅ॑ದ್ರ್ಧಮಾ॒ಸಾನಾ᳚ಞ್ಚ॒ ಮಾಸಾ॑ನಾಞ್ಚ ನಾಮ॒ಧೇಯಾ॑ನಿ ॥ 40 ॥

ನಾದ್ರ್ಧ॑ಮ॒ಸೇಷು॒ ನ ಮಾಸೇ॒ಷ್ವಾ-ರ್ತಿ॒ಮಾರ್ಚ್ಛ॑ತಿ । ಯ ಏ॒ವಂ-ವೇಁದ॑ ॥
ಯೋ ಹ॒ ವೈ ಯ॑ಜ್ಞಕ್ರತೂ॒ನಾ-ಞ್ಚ॑ರ್ತೂ॒ನಾ-ಞ್ಚ॑ ಸಂ​ವಁಥ್ಸ॒ರಸ್ಯ॑ ಚ ನಾಮ॒ಧೇಯಾ॑ನಿ॒ ವೇದ॑ ।
ನ ಯ॑ಜ್ಞಕ್ರ॒ತುಷು॒ ನರ್ತುಷು॒ ನ ಸಂ॑​ವಁಥ್ಸ॒ರ ಆರ್ತಿ॒ಮಾರ್ಚ್ಛ॑ತಿ । ಅ॒ಗ್ನಿ॒ಷ್ಟೋ॒ಮ ಉ॒ಕ್ಥ್ಯೋ᳚-ಽಗ್ನಿರ್-ಋ॒ತುಃ ಪ್ರ॒ಜಾಪ॑ತಿ-ಸ್ಸಂ​ವಁಥ್ಸ॒ರ ಇತಿ॑ ।
ಏ॒ತೇ॑ ಽನುವಾ॒ಕಾ ಯ॑ಜ್ಞಕ್ರತೂ॒ನಾ-ಞ್ಚ॑ರ್ತೂ॒ನಾ-ಞ್ಚ॑ ಸಂ​ವಁಥ್ಸ॒ರಸ್ಯ॑ ಚ ನಾಮ॒ಧೇಯಾ॑ನಿ ।
ನ ಯ॑ಜ್ಞಕ್ರ॒ತುಷು॒ ನರ್ತುಷು॒ ನ ಸಂ॑​ವಁಥ್ಸ॒ರ ಆರ್ತಿ॒ಮಾರ್ಚ್ಛ॑ತಿ । ಯ ಏ॒ವಂ-ವೇಁದ॑ ॥
ಯೋ ಹ॒ ವೈ ಮು॑ಹೂ॒ರ್ತಾನಾ᳚-ಮ್ಮುಹೂ॒ರ್ತಾನ್. ವೇದ॑ ।
ನ ಮು॑ಹೂ॒ರ್ತಾನಾ᳚-ಮ್ಮುಹೂ॒ರ್ತೇಷ್ವಾರ್ತಿ॒ ಮಾರ್ಚ್ಛ॑ತಿ ॥ 41 ॥

ಇ॒ದಾನೀ᳚-ನ್ತ॒ದಾನೀ॒ಮಿತಿ॑ । ಏ॒ತೇ ವೈ ಮು॑ಹೂ॒ರ್ತಾನಾ᳚-ಮ್ಮುಹೂ॒ರ್ತಾಃ । ನ ಮು॑ಹೂ॒ರ್ತಾನಾ᳚-ಮ್ಮುಹೂ॒ರ್ತೇಷ್ವಾರ್ತಿ॒-ಮಾರ್ಚ್ಛ॑ತಿ । ಯ ಏ॒ವಂ-ವೇಁದ॑ ॥
ಅಥೋ॒ ಯಥಾ᳚ ಖ್ಷೇತ್ರ॒ಜ್ಞೋ ಭೂ॒ತ್ವಾ ಽನು॑ ಪ್ರ॒ವಿಶ್ಯಾನ್ನ॒-ಮತ್ತಿ॑ । ಏ॒ವಮೇ॒ವೈತಾನ್ ಖ್ಷೇ᳚ತ್ರ॒ಜ್ಞೋ ಭೂ॒ತ್ವಾ ಽನು॑ ಪ್ರ॒ವಿಶ್ಯಾ-ನ್ನ॑ಮತ್ತಿ । ಸ ಏ॒ತೇಷಾ॑ಮೇ॒ವ ಸ॑ಲೋ॒ಕತಾ॒ಗ್ಂ॒ ಸಾಯು॑ಜ್ಯ-ಮಶ್ನುತೇ ।
ಅಪ॑ ಪುನರ್ಮೃ॒ತ್ಯು-ಞ್ಜ॑ಯತಿ । ಯ ಏ॒ವಂ-ವೇಁದ॑ ॥ 42 ॥
(ನ ವೇದೈ॒ - ವಂ-ವೇಁದಾ॑ - ನುವಾ॒ಕಾ ಅ॑ದ್ರ್ಧಮಾ॒ಸಾನಾ᳚-ಞ್ಚ॒ ಮಸಾ॑ನಾ-ಞ್ಚ ನಾಮ॒ಧೇಯಾ॑ನಿ - ಮುಹೂ॒ರ್ತೇಷ್ವಾರ್ತಿ॒ಮಾರ್ಚ್ಛ॑ತಿ॒ - +ನವ॑ ಚ) (ಅ. 10)

(ಇ॒ಯಮ॑ಹೋರಾ॒ತ್ರಾಣಾಗ್ಂ॑ ಸ॒ಜ್ಞಾನ್ನ॑-ಮ್ಪೂರ್ವಪ॒ಖ್ಷಸ್ಯ॒ ಪ್ರಸ್ತು॑ತಮಪರಪ॒ಖ್ಷಸ್ಯ॑ ಮುಹೂ॒ರ್ತಾನಾ᳚-ಞ್ಚಿ॒ತ್ರಃ ಕೇ॒ತುರ॑ದ್ರ್ಧಮಾ॒ಸಾನಾ᳚-ಮ್ಪ॒ವಿತ್ರಂ॑-ಯಁಜ್ಞಕ್ರತೂ॒ನಾಮ॑ಗ್ನಿಷ್ಟೋ॒ಮೋ ಯ॑ಜ್ಞಕ್ರತೂ॒ನಾಮಿ॒ದಾನೀ᳚-ಮ್ಮುಹೂ॒ರ್ತಾನಾ᳚-ಮ್ಮುಹೂ॒ರ್ತಾನ್. ವೇ॒ದೇದಾನೀ॒ಮಥೋ॒ ದ್ವಾದ॑ಶ)

ಅನುವಾಕಂ 11 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಕಶ್ಚಿ॑ದ್ಧ॒ವಾ ಅ॒ಸ್ಮಾ-ಲ್ಲೋ॒ಕಾ-ತ್ಪ್ರೇತ್ಯ॑ । ಆ॒ತ್ಮಾನಂ॑-ವೇಁದ । ಅ॒ಯ-ಮ॒ಹ-ಮ॒ಸ್ಮೀತಿ॑ । ಕಶ್ಚಿ॒ಥ್ಸ್ವಂ-ಲೋಁ॒ಕ-ನ್ನ ಪ್ರತಿ॒ ಪ್ರಜಾ॑ನಾತಿ ॥ ಅ॒ಗ್ನಿಮು॑ಗ್ಧೋ ಹೈ॒ವ ಧು॒ಮತಾ᳚ನ್ತಃ । ಸ್ವಂ-ಲೋಁ॒ಕ-ನ್ನ ಪ್ರತಿ॒ ಪ್ರಜಾ॑ನಾತಿ ।
ಅಥ॒ ಯೋ ಹೈ॒ವೈತ-ಮ॒ಗ್ನಿಗ್ಂ ಸಾ॑ವಿ॒ತ್ರಂ-ವೇಁದ॑ ।
ಸ ಏ॒ವಾಸ್ಮಾ ಲ್ಲೋ॒ಕಾ-ತ್ಪ್ರೇತ್ಯ॑ । ಆ॒ತ್ಮಾನಂ॑-ವೇಁದ ।
ಅ॒ಯ-ಮ॒ಹ-ಮ॒ಸ್ಮೀತಿ॑ ॥ 43 ॥

ಸ ಸ್ವಂ-ಲೋಁ॒ಕ-ಮ್ಪ್ರತಿ॒ ಪ್ರಜಾ॑ನಾತಿ ॥ ಏ॒ಷ ಉ॑ ವೇ॒ವೈನ॒-ನ್ತಥ್ಸಾ॑ವಿ॒ತ್ರಃ । ಸ್ವ॒ರ್ಗಂ-ಲೋಁ॒ಕ-ಮ॒ಭಿವ॑ಹತಿ ॥ ಅ॒ಹೋ॒ರಾ॒ತ್ರೈ ರ್ವಾ ಇದಗ್ಂ ಸ॒ಯುಗ್ಭಿಃ॑ ಕ್ರಿಯತೇ । ಇ॒ತಿ॒ ರಾ॒ತ್ರಾಯಾ॑ ದೀಖ್ಷಿಷತ । ಇ॒ತಿ॒ ರಾ॒ತ್ರಾಯ॑ ವ್ರ॒ತ-ಮುಪಾ॑ಗು॒ರಿತಿ॑ । ತಾನಿ॒ ಹಾನೇ॑ವಂ-ವಿಁ॒ದುಷಃ॑ । ಅ॒ಮುಷ್ಮಿ॑ನ್ ಁಲೋ॒ಕೇ ಶೇ॑ವ॒ಧಿ-ನ್ಧ॑ಯನ್ತಿ ।
ಧೀ॒ತಗ್ಂ ಹೈ॒ವ ಸ ಶೇ॑ವ॒ಧಿ-ಮನು॒ಪರೈ॑ತಿ ॥
ಅಥ॒ ಯೋ ಹೈ॒ವೈತಮ॒ಗ್ನಿಗ್ಂ ಸಾ॑ವಿ॒ತ್ರಂ-ವೇಁದ॑ ॥ 44 ॥

ತಸ್ಯ॑ ಹೈ॒ವಾ-ಹೋ॑ರಾ॒ತ್ರಾಣಿ॑ । ಅ॒ಮುಷ್ಮಿ॑ನ್ ಁಲೋ॒ಕೇ ಶೇ॑ವ॒ಧಿ-ನ್ನ ಧ॑ಯನ್ತಿ ।
ಅಧೀ॑ತಗ್ಂ ಹೈ॒ವ ಸ ಶೇ॑ವ॒ಧಿ-ಮನು॒ಪರೈ॑ತಿ ॥
ಭ॒ರದ್ವಾ॑ಜೋ ಹ ತ್ರಿ॒ಭಿರಾಯು॑ರ್ಭಿ ರ್ಬ್ರಹ್ಮ॒ಚರ್ಯ॑ಮುವಾಸ ।
ತಗ್ಂ ಹ॒ ಜೀರ್ಣಿ॒ಗ್ಗ್॒ ಸ್ಥವಿ॑ರ॒ಗ್ಂ॒ ಶಯಾ॑ನಮ್ ।
ಇನ್ದ್ರ॑ ಉಪ॒ವ್ರಜ್ಯೋ॑ ವಾಚ । ಭರ॑ದ್ವಾಜ । ಯತ್ತೇ॑ ಚತು॒ರ್ಥಮಾಯು॑ರ್ದ॒ದ್ಯಾಮ್ । ಕಿಮೇ॑ನೇನ ಕುರ್ಯಾ॒ ಇತಿ॑ । ಬ್ರ॒ಹ್ಮ॒ಚರ್ಯ॑ಮೇ॒ವೈನೇ॑ನ ಚರೇಯ॒ಮಿತಿ॑ ಹೋವಾಚ ॥ 45 ॥

ತಗ್ಂ ಹ॒ ತ್ರೀ-ನ್ಗಿ॒ರಿ-ರೂ॑ಪಾ॒ನ ವಿ॑ಜ್ಞಾತಾನಿವ ದರ್​ಶ॒ಯಾ-ಞ್ಚ॑ಕಾರ । ತೇಷಾ॒ಗ್ಂ॒ ಹೈಕೈ॑ಕಸ್ಮಾ-ನ್ಮು॒ಷ್ಟಿನಾ-ಽಽದ॑ದೇ । ಸ ಹೋ॑ವಾಚ ।
ಭರ॑ದ್ವಾ॒ಜೇತ್ಯಾ॒ಮನ್ತ್ರ್ಯ॑ । ವೇದಾ॒ ವಾ ಏ॒ತೇ । ಅ॒ನ॒ನ್ತಾ ವೈ ವೇದಾಃ᳚ । ಏ॒ತದ್ವಾ ಏ॒ತೈ ಸ್ತ್ರಿ॒ಭಿ-ರಾಯು॑ರ್ಭಿ॒-ರನ್ವ॑ವೋಚಥಾಃ । ಅಥ॑ ತ॒ ಇತ॑ರ॒-ದನ॑ನೂಕ್ತಮೇ॒ವ । ಏಹೀ॒ಮಂ-ವಿಁ॑ದ್ಧಿ । ಅ॒ಯಂ-ವೈಁ ಸ॑ರ್ವ ವಿ॒ದ್ಯೇತಿ॑ ॥ 46 ॥

ತಸ್ಮೈ॑ ಹೈ॒ತಮ॒ಗ್ನಿಗ್ಂ ಸಾ॑ವಿ॒ತ್ರಮು॑ವಾಚ । ತಗ್ಂ ಸ ವಿ॑ದಿ॒ತ್ವಾ । ಅ॒ಮೃತೋ॑ ಭೂ॒ತ್ವಾ । ಸ್ವ॒ರ್ಗಂ-ಲೋಁ॒ಕಮಿ॑ಯಾಯ । ಆ॒ದಿ॒ತ್ಯಸ್ಯ॒ ಸಾಯು॑ಜ್ಯಮ್ ॥
ಅ॒ಮೃತೋ॑ ಹೈ॒ವ ಭೂ॒ತ್ವಾ । ಸ್ವ॒ರ್ಗಂ-ಲೋಁ॒ಕಮೇ॑ತಿ । ಆ॒ದಿ॒ತ್ಯಸ್ಯ॒ ಸಾಯು॑ಜ್ಯಮ್ । ಯ ಏ॒ವಂ-ವೇಁದ॑ ॥ ಏ॒ಷೋ ಏ॒ವ ತ್ರಯೀ॑ ವಿ॒ದ್ಯಾ ॥ 47 ॥

ಯಾವ॑ನ್ತಗ್ಂ ಹ॒ ವೈ ತ್ರ॒ಯ್ಯಾ ವಿ॒ದ್ಯಯಾ॑ ಲೋ॒ಕ-ಞ್ಜ॑ಯತಿ । ತಾವ॑ನ್ತಂ-ಲೋಁ॒ಕ-ಞ್ಜ॑ಯತಿ । ಯ ಏ॒ವಂ-ವೇಁದ॑ ॥ ಅ॒ಗ್ನೇ ರ್ವಾ ಏ॒ತಾನಿ॑ ನಾಮ॒ಧೇಯಾ॑ನಿ ।
ಅ॒ಗ್ನೇರೇ॒ವ ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋತಿ ।
ಯ ಏ॒ವಂ-ವೇಁದ॑ । ವಾ॒ಯೋ ರ್ವಾ ಏ॒ತಾನಿ॑ ನಾಮ॒ಧೇಯಾ॑ನಿ । ವಾ॒ಯೋರೇ॒ವ ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋತಿ । ಯ ಏ॒ವಂ-ವೇಁದ॑ । ಇನ್ದ್ರ॑ಸ್ಯ॒ ವಾ ಏ॒ತಾನಿ॑ ನಾಮ॒ಧೇಯಾ॑ನಿ ॥ 48 ॥

ಇನ್ದ್ರ॑ಸ್ಯೈ॒ವ ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋತಿ । ಯ ಏ॒ವಂ-ವೇಁದ॑ ।
ಬೃಹ॒ಸ್ಪತೇ॒ ರ್ವಾ ಏ॒ತಾನಿ॑ ನಾಮ॒ಧೇಯಾ॑ನಿ ।
ಬೃಹ॒ಸ್ಪತೇ॑ರೇ॒ವ ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋತಿ ।
ಯ ಏ॒ವಂ-ವೇಁದ॑ । ಪ್ರ॒ಜಾಪ॑ತೇ॒ ರ್ವಾ ಏ॒ತಾನಿ॑ ನಾಮ॒ಧೇಯಾ॑ನಿ । ಪ್ರ॒ಜಾಪ॑ತೇರೇ॒ವ ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋತಿ । ಯ ಏ॒ವಂ-ವೇಁದ॑ ।
ಬ್ರಹ್ಮ॑ಣೋ॒ ವಾ ಏ॒ತಾನಿ॑ ನಾಮ॒ಧೇಯಾ॑ನಿ ।
ಬ್ರಹ್ಮ॑ಣ ಏ॒ವ ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋತಿ ।
ಯ ಏ॒ವಂ-ವೇಁದ॑ ॥ ಸ ವಾ ಏ॒ಷೋ᳚-ಽಗ್ನಿ-ರ॑ಪಖ್ಷಪು॒ಚ್ಛೋ ವಾ॒ಯುರೇ॒ವ ।
ತಸ್ಯಾ॒ಗ್ನಿ ರ್ಮುಖ᳚ಮ್ । ಅ॒ಸಾವಾ॑ದಿ॒ತ್ಯ-ಶ್ಶಿರಃ॑ ।
ಸ ಯದೇ॒ತೇ ದೇ॒ವತೇ॒ ಅನ್ತ॑ರೇಣ ।
ತಥ್ಸರ್ವಗ್ಂ॑ ಸೀವ್ಯತಿ । ತಸ್ಮಾ᳚-ಥ್ಸಾವಿ॒ತ್ರಃ ॥ 49 ॥
(ಅ॒ಯಮ॒ಹಮ॒ಸ್ಮೀತಿ॒ - ವೇದ॑ - ಹೋವಾಚ - ಸರ್ವವಿ॒ದ್ಯೇತಿ॑ - ವಿ॒ದ್ಯೇ - ನ್ದ್ರ॑ಸ್ಯ॒ ವಾ ಏ॒ತಾನಿ॑ ನಾಮ॒ಧೇಯಾ॑ನಿ॒ - ಬ್ರಹ್ಮ॑ಣ ಏ॒ವ ಸಾಯು॑ಜ್ಯಗ್ಂ ಸಲೋ॒ಕತಾ॑ಮಾಪ್ನೋತಿ ಸ॒ಪ್ತ ಚ॑) । (ಅ. 11)

(ಅ॒ಗ್ನೇರ್ವಾ॒ಯೋರಿನ್ದ್ರ॑ಸ್ಯ॒ ಬೃಹ॒ಸ್ಪತೇಃ᳚ ಪ್ರ॒ಜಾಪ॑ತೇ॒-ರ್ಬ್ರಹ್ಮ॑ಣ॒-ಸ್ಸ ವೈ ಸ॒ಪ್ತ)

(ಸ॒ಞ್ಜ್ಞಾನಂ॒ - ಭೂ - ಸ್ತ್ವಮೇ॒ವ - ಸಂ॑​ವಁಥ್ಸ॒ರೋ॑-ಽಸಿ॒ - ಭೂ - ರಾಜ್ಞ್ಯ - ಸ॑ವ-ವಿಪ॒ಶ್ಚಿತೇ᳚ - ಪ್ರ॒ಜಾಪ॑ತಿ-ರ್ದೇ॒ವಾ - ನಿ॒ಯಂ-ವಾಁವ ಸ॒ರಘಾ॒ - ಕಶ್ಚಿ॒ದ್ಧೈಕಾ॑ದಶ)

(ಸ॒ಞ್ಜ್ಞಾನ॒ಗ್ಂ॒ - ರಾಜ್ಞೀ॑ - ಮೂ॒ದ್ರ್ಧಾ ಹೃದ॑ಯ - ಏ॒ಷ ಸಂ॑​ವಁಥ್ಸ॒ರೋ - ನಾದ್ರ್ಧ॑ಮಾ॒ಸೇಷು॒ ನವ॑ಚತ್ವಾರಿಗ್ಂಶತ್)

(ಸ॒ಞ್ಜ್ಞಾನಗ್ಂ॑ - ಸಾವಿ॒ತ್ರಃ)

॥ ಹರಿಃ॑ ಓಮ್ ॥

॥ ಇತಿ ತೈತ್ತರೀಯ ಯಜುಬ್ರಾಹ್ಮಣೇ ಕಾಠಕೇ ಪ್ರಥಮಃ ಪ್ರಶ್ನ-ಸ್ಸಮಾಪ್ತಃ ॥
++++++++++++++++++++++++++++++++++++++++++