ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ಪಞ್ಚಮಃ ಪ್ರಪಾಠಕಃ - ಇಷ್ಟಿಹೌತ್ರಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಹೋತುರ್ಜಪಃ ಪುರಸ್ತಾ-ಥ್ಸಾಮಿಧೇನೀನಾಂ

ಸ॒ತ್ಯ-ಮ್ಪ್ರಪ॑ದ್ಯೇ । ಋ॒ತ-ಮ್ಪ್ರಪ॑ದ್ಯೇ ।
ಅ॒ಮೃತ॒-ಮ್ಪ್ರಪ॑ದ್ಯೇ ।
ಪ್ರ॒ಜಾಪ॑ತೇಃ ಪ್ರಿ॒ಯಾ-ನ್ತ॒ನುವ॒ಮನಾ᳚ರ್ತಾ॒-ಮ್ಪ್ರಪ॑ದ್ಯೇ ।
ಇ॒ದಮ॒ಹ-ಮ್ಪ॑ಞ್ಚದ॒ಶೇನ॒ ವಜ್ರೇ॑ಣ ।
ದ್ವಿ॒ಷನ್ತ॒-ಮ್ಭ್ರಾತೃ॑ವ್ಯ॒ಮವ॑ಕ್ರಾಮಾಮಿ ।
ಯೋ᳚-ಽಸ್ಮಾ-ನ್ದ್ವೇಷ್ಟಿ॑ । ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮಃ ।
ಭೂರ್ಭುವ॒-ಸ್ಸುವಃ॑ । ಹಿಮ್ ॥ 1 ॥
(ಸ॒ತ್ಯ-ನ್ದಶ॑) (ಅ. 1)

ಅನುವಾಕಂ 2 - ಸಾಮಿಧೇನೀಮ್ರನ್ವಾಹ
ಪ್ರ ವೋ॒ ವಾಜಾ॑ ಅ॒ಭಿದ್ಯ॑ವಃ । ಹ॒ವಿಷ್ಮ॑ನ್ತೋ ಘೃ॒ತಾಚ್ಯಾ᳚ ।
ದೇ॒ವಾಞ್ಜಿ॑ಗಾತಿ ಸುಮ್ನ॒ಯುಃ ॥ ಅಗ್ನ॒ ಆಯಾ॑ಹಿ ವೀ॒ತಯೇ᳚ । ಗೃ॒ಣಾ॒ನೋ ಹ॒ವ್ಯದಾ॑ತಯೇ । ನಿ ಹೋತಾ॑ ಸಥ್ಸಿ ಬ॒ರ॒ಃಇಷಿ॑ ॥ ತ-ನ್ತ್ವಾ॑ ಸ॒ಮಿದ್ಭಿ॑ರಙ್ಗಿರಃ । ಘೃ॒ತೇನ॑ ವರ್ಧಯಾಮಸಿ । ಬೃ॒ಹಚ್ಛೋ॑ಚಾ ಯವಿಷ್ಠ್ಯ ॥ ಸ ನಃ॑ ಪೃ॒ಥು ಶ್ರ॒ವಾಯ್ಯ᳚ಮ್ ॥ 2 ॥

ಅಚ್ಛಾ॑ ದೇವ ವಿವಾಸಸಿ । ಬೃ॒ಹದ॑ಗ್ನೇ ಸು॒ವೀರ್ಯ᳚ಮ್ ॥
ಈ॒ಡೇನ್ಯೋ॑ ನಮ॒ಸ್ಯ॑ಸ್ತಿ॒ರಃ । ತಮಾಗ್ಂ॑ಸಿ ದರ್​ಶ॒ತಃ । ಸಮ॒ಗ್ನಿರಿ॑ದ್ಧ್ಯತೇ॒ ವೃಷಾ᳚ ॥ ವೃಷೋ॑ ಅ॒ಗ್ನಿ-ಸ್ಸಮಿ॑ದ್ಧ್ಯತೇ । ಅಶ್ವೋ॒ ನ ದೇ॑ವ॒ವಾಹ॑ನಃ ।
ತಗ್ಂ ಹ॒ವಿಷ್ಮ॑ನ್ತ ಈಡತೇ ॥ ವೃಷ॑ಣ-ನ್ತ್ವಾ ವ॒ಯಂ-ವೃಁಷನ್ನ್॑ । ವೃಷಾ॑ಣ॒-ಸ್ಸಮಿ॑ಧೀಮಹಿ ॥ 3 ॥
ಅಗ್ನೇ॒ ದೀದ್ಯ॑ತ-ಮ್ಬೃ॒ಹತ್ ॥ ಅ॒ಗ್ನಿ-ನ್ದೂ॒ತಂ-ವೃಁ॑ಣೀಮಹೇ ।
ಹೋತಾ॑ರಂ-ವಿಁ॒ಶ್ವವೇ॑ದಸಮ್ । ಅ॒ಸ್ಯ ಯ॒ಜ್ಞಸ್ಯ॑ ಸು॒ಕ್ರತು᳚ಮ್ ॥ ಸ॒ಮಿ॒ದ್ಧ್ಯಮಾ॑ನೋ ಅದ್ಧ್ವ॒ರೇ । ಅ॒ಗ್ನಿಃ ಪಾ॑ವ॒ಕ ಈಡ್ಯಃ॑ । ಶೋ॒ಚಿಷ್ಕೇ॑ಶ॒ಸ್ತಮೀ॑ಮಹೇ ॥ ಸಮಿ॑ದ್ಧೋ ಅಗ್ನ ಆಹುತ । ದೇ॒ವಾನ್. ಯ॑ಖ್ಷಿ ಸ್ವದ್ಧ್ವರ । ತ್ವಗ್ಂ ಹಿ ಹ॑ವ್ಯ॒ವಾಡಸಿ॑ ॥
ಆಜು॑ಹೋತ ದುವ॒ಸ್ಯತ॑ । ಅ॒ಗ್ನಿ-ಮ್ಪ್ರ॑ಯ॒ತ್ಯ॑ದ್ಧ್ವ॒ರೇ ।
ವೃ॒ಣೀ॒ದ್ಧ್ವಗ್ಂ ಹ॑ವ್ಯ॒ವಾಹ॑ನಮ್ ॥
ತ್ವಂ-ವಁರು॑ಣ ಉ॒ತ ಮಿ॒ತ್ರೋ ಅ॑ಗ್ನೇ । ತ್ವಾಂ-ವಁ॑ರ್ಧನ್ತಿ ಮ॒ತಿಭಿ॒ರ್ವಸಿ॑ಷ್ಠಾಃ । ತ್ವೇ ವಸು॑ ಸುಷಣ॒ನಾನಿ॑ ಸನ್ತು । ಯೂ॒ಯ-ಮ್ಪಾ॑ತ ಸ್ವ॒ಸ್ತಿಭಿ॒-ಸ್ಸದಾ॑ ನಃ ॥ 4 ॥
(ಶ್ರ॒ವಾಯ್ಯ॑ - ಮಿಧೀಮ॒ - ಹ್ಯಸಿ॑ ಸ॒ಪ್ತ ಚ॑) (ಅ. 2)

ಅನುವಾಕಂ 3 - ಪ್ರರಮುಕ್ತ್ವಾ ನಿವಿದೋ-ಽನೂಚ್ಯ ದೇವತಾ ಆವಾಹಯತಿ
ಅಗ್ನೇ॑ ಮ॒ಹಾಗ್ಂ ಅ॑ಸಿ ಬ್ರಾಹ್ಮಣ ಭಾರತ । ಅಸಾ॒ವಸೌ᳚ ॥
ದೇ॒ವೇದ್ಧೋ॒ ಮನ್ವಿ॑ದ್ಧಃ । ಋಷಿ॑ಷ್ಟುತೋ॒ ವಿಪ್ರಾ॑ನುಮದಿತಃ । ಕ॒ವಿ॒ಶ॒ಸ್ತೋ ಬ್ರಹ್ಮ॑ಸಗ್ಂಶಿತೋ ಘೃ॒ತಾಹ॑ವನಃ ।
ಪ್ರ॒ಣೀ-ರ್ಯ॒ಜ್ಞಾನಾ᳚ಮ್ । ರ॒ಥೀರ॑ದ್ಧ್ವ॒ರಾಣಾ᳚ಮ್ ।
ಅ॒ತೂರ್ತೋ॒ ಹೋತಾ᳚ । ತೂರ್ಣಿ॑ರ್​ಹವ್ಯ॒ವಾಟ್ ।
ಆಸ್ಪಾತ್ರ॑-ಞ್ಜು॒ಹೂ-ರ್ದೇ॒ವಾನಾ᳚ಮ್ ॥ 5 ॥

ಚ॒ಮ॒ಸೋ ದೇ॑ವ॒ಪಾನಃ॑ । ಅ॒ರಾಗ್ಂ ಇ॑ವಾಗ್ನೇ ನೇ॒ಮಿರ್ದೇ॒ವಾಗ್​ಸ್ತ್ವ-ಮ್ಪ॑ರಿ॒ಭೂರ॑ಸಿ । ಆವ॑ಹ ದೇ॒ವಾನ್. ಯಜ॑ಮಾನಾಯ ॥ ಅ॒ಗ್ನಿಮ॑ಗ್ನ॒ ಆವ॑ಹ । ಸೋಮ॒ಮಾವ॑ಹ ।
ಅ॒ಗ್ನಿಮಾವ॑ಹ । ಪ್ರ॒ಜಾಪ॑ತಿ॒ಮಾವ॑ಹ । ಅ॒ಗ್ನೀಷೋಮಾ॒ವಾವ॑ಹ । ಇ॒ನ್ದ್ರಾ॒ಗ್ನೀ ಆವ॑ಹ । ಇನ್ದ್ರ॒ಮಾವ॑ಹ । ಮ॒ಹೇ॒ನ್ದ್ರಮಾವ॑ಹ । ದೇ॒ವಾಗ್ಂ ಆ᳚ಜ್ಯ॒ಪಾಗ್ಂ ಆವ॑ಹ ।
ಅ॒ಗ್ನಿಗ್ಂ ಹೋ॒ತ್ರಾಯಾವ॑ಹ । ಸ್ವ-ಮ್ಮ॑ಹಿ॒ಮಾನ॒ಮಾವ॑ಹ । ಆ ಚಾ᳚ಗ್ನೇ ದೇ॒ವಾನ್. ವಹ॑ । ಸು॒ಯಜಾ॑ ಚ ಯಜ ಜಾತವೇದಃ ॥ 6 ॥
(ದೇ॒ವಾನಾ॒-ಮಿನ್ದ್ರ॒ಮಾವ॑ಹ॒ ಷಟ್ಚ॑) (ಅ. 3)

ಅನುವಾಕಂ 4 - ಸ್ರುಚಾವಾದಾಪಯತಿ
ಅ॒ಗ್ನಿರ್-ಹೋತಾ॒ ವೇತ್ವ॒ಗ್ನಿಃ । ಹೋ॒ತ್ರಂ-ವೇಁ᳚ತ್ತು ಪ್ರಾವಿ॒ತ್ರಮ್ । ಸ್ಮೋ ವ॒ಯಮ್ । ಸಾ॒ಧು ತೇ॑ ಯಜಮಾನ ದೇ॒ವತಾ᳚ । ಘೃ॒ತವ॑ತೀ-ಮದ್ಧ್ವರ್ಯೋ॒ ಸ್ರುಚ॒ಮಾ-ಽಸ್ಯ॑ಸ್ವ । ದೇ॒ವಾ॒ಯುವಂ॑-ವಿಁ॒ಶ್ವವಾ॑ರಾಮ್ । ಈಡಾ॑ಮಹೈ ದೇ॒ವಾಗ್ಂ ಈ॒ಡೇನ್ಯಾನ್॑ ।
ನ॒ಮ॒ಸ್ಯಾಮ॑ ನಮ॒ಸ್ಯಾನ್॑ । ಯಜಾ॑ಮ ಯ॒ಜ್ಞಿಯಾನ್॑ ॥ 7 ॥
(ಅ॒ಗ್ನಿರ್-ಹೋತಾ॒ ನವ॑) (ಅ. 4)

ಅನುವಾಕಂ 5 - ಪ್ರಯಾಜಾಃ
ಸ॒ಮಿಧೋ॑ ಅಗ್ನ॒ ಆಜ್ಯ॑ಸ್ಯ ವಿಯನ್ತು । ತನೂ॒ನಪಾ॑ದಗ್ನ॒ ಆಜ್ಯ॑ಸ್ಯ ವೇತು । ಇ॒ಡೋ ಅ॑ಗ್ನ॒ ಆಜ್ಯ॑ಸ್ಯ ವಿಯನ್ತು । ಬ॒ರ್॒ಹಿರ॑ಗ್ನ॒ ಆಜ್ಯ॑ಸ್ಯ ವೇತು । ಸ್ವಾಹಾ॒-ಽಗ್ನಿಮ್ । ಸ್ವಾಹಾ॒ ಸೋಮ᳚ಮ್ । ಸ್ವಾಹಾ॒-ಽಗ್ನಿಮ್ । ಸ್ವಾಹಾ᳚ ಪ್ರ॒ಜಾಪ॑ತಿಮ್ ।
ಸ್ವಾಹಾ॒-ಽಗ್ನೀಷೋಮೌ᳚ । ಸ್ವಾಹೇ᳚ನ್ದ್ರಾ॒ಗ್ನೀ । ಸ್ವಾಹೇನ್ದ್ರ᳚ಮ್ ।
ಸ್ವಾಹಾ॑ ಮಹೇ॒ನ್ದ್ರಮ್ । ಸ್ವಾಹಾ॑ ದೇ॒ವಾಗ್ಂ ಆ᳚ಜ್ಯ॒ಪಾನ್ । ಸ್ವಾಹಾ॒-ಽಗ್ನಿಗ್ಂ ಹೋ॒ತ್ರಾಜ್ಜು॑ಷಾ॒ಣಾಃ ।
ಅಗ್ನ॒ ಆಜ್ಯ॑ಸ್ಯ ವಿಯನ್ತು ॥ 8 ॥
(ಇ॒ನ್ದ್ರಾ॒ಗ್ನೀ ಪಞ್ಚ॑ ಚ) (ಅ. 5)

ಅನುವಾಕಂ 6 - ಅಜ್ಯಭಾಗಯೋಃ ಪುರೋನುವಾಕ್ಯೇ
ಅ॒ಗ್ನಿ-ರ್ವೃ॒ತ್ರಾಣಿ॑ ಜಙ್ಘನತ್ । ದ್ರ॒ವಿ॒ಣ॒ಸ್ಯು-ರ್ವಿ॑ಪ॒ನ್ಯಯಾ᳚ ।
ಸಮಿ॑ದ್ಧ-ಶ್ಶು॒ಕ್ರ ಆಹು॑ತಃ । ಜು॒ಷಾ॒ಣೋ ಅ॒ಗ್ನಿರಾಜ್ಯ॑ಸ್ಯ ವೇತು । ತ್ವಗ್ಂ ಸೋ॑ಮಾಸಿ॒ ಸತ್ಪ॑ತಿಃ । ತ್ವಗ್ಂ ರಾಜೋ॒ತ ವೃ॑ತ್ರ॒ಹಾ ।
ತ್ವ-ಮ್ಭ॒ದ್ರೋ ಅ॑ಸಿ॒ ಕ್ರತುಃ॑ । ಜು॒ಷಾ॒ಣ-ಸ್ಸೋಮ॒ ಆಜ್ಯ॑ಸ್ಯ ಹ॒ವಿಷೋ॑ ವೇತು । ಅ॒ಗ್ನಿಃ ಪ್ರ॒ತ್ನೇನ॒ ಜನ್ಮ॑ನಾ । ಶುಮ್ಭಾ॑ನಸ್ತ॒ನುವ॒ಗ್ಗ್॒ ಸ್ವಾಮ್ ।
ಕ॒ವಿ-ರ್ವಿಪ್ರೇ॑ಣ ವಾವೃಧೇ । ಜು॒ಷಾ॒ಣೋ ಅ॒ಗ್ನಿರಾಜ್ಯ॑ಸ್ಯ ವೇತು ।
ಸೋಮ॑ ಗೀ॒ರ್ಭಿಷ್ಟ್ವಾ॑ ವ॒ಯಮ್ । ವ॒ರ್ಧಯಾ॑ಮೋ ವಚೋ॒ವಿದಃ॑ । ಸು॒ಮೃ॒ಡೀ॒ಕೋ ನ॒ ಆವಿ॑ಶ ।
ಜು॒ಷಾ॒ಣ-ಸ್ಸೋಮ॒ ಆಜ್ಯ॑ಸ್ಯ ಹ॒ವಿಷೋ॑ ವೇತು ॥ 9 ॥
(ಸ್ವಾಗ್ಂ ಷಟ್ಚ॑) (ಅ. 6)

ಅನುವಾಕಂ 7 - ಹವಿಷಾಂ-ಯಾಁಜ್ಯಾನುವಾಕ್ಯಾಃ
ಅ॒ಗ್ನಿ-ರ್ಮೂ॒ರ್ಧಾ ದಿ॒ವಃ ಕ॒ಕುತ್ । ಪತಿಃ॑ ಪೃಥಿ॒ವ್ಯಾ ಅ॒ಯಮ್ ।
ಅ॒ಪಾಗ್ಂ ರೇತಾಗ್ಂ॑ಸಿ ಜಿನ್ವತಿ । ಭುವೋ॑ ಯ॒ಜ್ಞಸ್ಯ॒ ರಜ॑ಸಶ್ಚ ನೇ॒ತಾ । ಯತ್ರಾ॑ ನಿ॒ಯುದ್ಭಿ॒-ಸ್ಸಚ॑ಸೇ ಶಿ॒ವಾಭಿಃ॑ । ದಿ॒ವಿ ಮೂ॒ರ್ಧಾನ॑-ನ್ದಧಿಷೇ ಸುವ॒ರ್॒ಷಾಮ್ ।
ಜಿ॒ಹ್ವಾಮ॑ಗ್ನೇ ಚಕೃಷೇ ಹವ್ಯ॒ವಾಹ᳚ಮ್ । ಪ್ರಜಾ॑ಪತೇ॒ ನ ತ್ವದೇ॒ತಾನ್ಯ॒ನ್ಯಃ । ವಿಶ್ವಾ॑ ಜಾ॒ತಾನಿ॒ ಪರಿ॒ ತಾ ಬ॑ಭೂವ ।
ಯತ್-ಕಾ॑ಮಾಸ್ತೇ ಜುಹು॒ಮಸ್ತನ್ನೋ॑ ಅಸ್ತು ॥ 10 ॥

ವ॒ಯಗ್ಗ್​ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ । ಸ ವೇ॑ದ ಪು॒ತ್ರಃ ಪಿ॒ತರ॒ಗ್ಂ॒ ಸ ಮಾ॒ತರ᳚ಮ್ । ಸ ಸೂ॒ನುರ್ಭು॑ವ॒ಥ್ಸ ಭು॑ವ॒ತ್ಪುನ॑ರ್ಮಘಃ । ಸ ದ್ಯಾಮೌರ್ಣೋ॑ದ॒ನ್ತರಿ॑ಖ್ಷ॒ಗ್ಂ॒ ಸ ಸುವಃ॑ । ಸ ವಿಶ್ವಾ॒ ಭುವೋ॑ ಅಭವ॒ಥ್ಸ ಆ-ಽಭ॑ವತ್ । ಅಗ್ನೀ॑ಷೋಮಾ॒ ಸವೇ॑ದಸಾ । ಸಹೂ॑ತೀ ವನತ॒-ಙ್ಗಿರಃ॑ । ಸ-ನ್ದೇ॑ವ॒ತ್ರಾ ಬ॑ಭೂವಥುಃ । ಯು॒ವಮೇ॒ತಾನಿ॑ ದಿ॒ವಿ ರೋ॑ಚ॒ನಾನಿ॑ ।
ಅ॒ಗ್ನಿಶ್ಚ॑ ಸೋಮ॒ ಸಕ್ರ॑ತೂ ಅಧತ್ತಮ್ ॥ 11 ॥

ಯು॒ವಗ್ಂ ಸಿನ್ಧೂಗ್ಂ॑ ರ॒ಭಿಶ॑ಸ್ತೇ-ರವ॒ದ್ಯಾತ್ । ಅಗ್ನೀ॑ಷೋಮಾ॒-ವಮು॑ಞ್ಚತ-ಙ್ಗೃಭೀ॒ತಾನ್ ।
ಇನ್ದ್ರಾ᳚ಗ್ನೀ ರೋಚ॒ನಾ ದಿ॒ವಃ । ಪರಿ॒ ವಾಜೇ॑ಷು ಭೂಷಥಃ ।
ತದ್ವಾ᳚-ಞ್ಚೇತಿ॒ ಪ್ರವೀ॒ರ್ಯ᳚ಮ್ । ಶ್ನಥ॑ದ್ವೃ॒ತ್ರಮು॒ತ ಸ॑ನೋತಿ॒ ವಾಜ᳚ಮ್ । ಇನ್ದ್ರಾ॒ ಯೋ ಅ॒ಗ್ನೀ ಸಹು॑ರೀ ಸಪ॒ರ್ಯಾತ್ ।
ಇ॒ರ॒ಜ್ಯನ್ತಾ॑ ವಸ॒ವ್ಯ॑ಸ್ಯ॒ ಭೂರೇಃ᳚ । ಸಹ॑ಸ್ತಮಾ॒ ಸಹ॑ಸಾ ವಾಜ॒ಯನ್ತಾ᳚ । ಏನ್ದ್ರ॑ ಸಾನ॒ಸಿಗ್ಂ ರ॒ಯಿಮ್ ॥ 12 ॥
ಸ॒ಜಿತ್ವಾ॑ನಗ್ಂ ಸದಾ॒ಸಹ᳚ಮ್ । ವರ್​ಷಿ॑ಷ್ಠಮೂ॒ತಯೇ॑ ಭರ । ಪ್ರಸ॑ಸಾಹಿಷೇ ಪುರುಹೂತ॒ ಶತ್ರೂನ್॑ । ಜ್ಯೇಷ್ಠ॑ಸ್ತೇ॒ ಶುಷ್ಮ॑ ಇ॒ಹ ರಾ॒ತಿರ॑ಸ್ತು । ಇನ್ದ್ರಾಭ॑ರ॒ ದಖ್ಷಿ॑ಣೇನಾ॒ ವಸೂ॑ನಿ । ಪತಿ॒-ಸ್ಸಿನ್ಧೂ॑ನಾಮಸಿ ರೇ॒ವತೀ॑ನಾಮ್ । ಮ॒ಹಾಗ್ಂ ಇನ್ದ್ರೋ॒ ಯ ಓಜ॑ಸಾ । ಪ॒ರ್ಜನ್ಯೋ॑ ವೃಷ್ಟಿ॒ಮಾಗ್ಂ ಇ॑ವ ।
ಸ್ತೋಮೈ᳚ರ್ವ॒ಥ್ಸಸ್ಯ॑ ವಾವೃಧೇ ।
ಮ॒ಹಾಂ ಇನ್ದ್ರೋ॑ ನೃ॒ವದಾಚ॑ರ್​ಷಣಿ॒ಪ್ರಾಃ ॥ 13 ॥

ಉ॒ತ ದ್ವಿ॒ಬರ್​ಹಾ॑ ಅಮಿ॒ನ-ಸ್ಸಹೋ॑ಭಿಃ । ಅ॒ಸ್ಮ॒ದ್ರಿಯ॑ಗ್ವಾವೃಧೇ ವೀ॒ರ್ಯಾ॑ಯ ।
ಉ॒ರುಃ ಪೃ॒ಥು-ಸ್ಸುಕೃ॑ತಃ ಕ॒ರ್ತೃಭಿ॑ರ್ಭೂತ್ ।
ಪಿ॒ಪ್ರೀ॒ಹಿ ದೇ॒ವಾಗ್ಂ ಉ॑ಶ॒ತೋ ಯ॑ವಿಷ್ಠ ।
ವಿ॒ದ್ವಾಂ ಋತೂಗ್ಂರ್-ಋ॑ತುಪತೇ ಯಜೇ॒ಹ ।
ಯೇ ದೈವ್ಯಾ॑ ಋ॒ತ್ವಿಜ॒ಸ್ತೇಭಿ॑ರಗ್ನೇ ।
ತ್ವಗ್ಂ ಹೋತೄ॑ಣಾಮ॒ಸ್ಯಾಯ॑ಜಿಷ್ಠಃ ॥
ಅ॒ಗ್ನಿಗ್ಗ್​ ಸ್ವಿ॑ಷ್ಟ॒ಕೃತ᳚ಮ್ । ಅಯಾ॑ಡ॒ಗ್ನಿರ॒ಗ್ನೇಃ ಪ್ರಿ॒ಯಾ ಧಾಮಾ॑ನಿ । ಅಯಾ॒ಟ್ಥ್ಸೋಮ॑ಸ್ಯ ಪ್ರಿ॒ಯಾ ಧಾಮಾ॑ನಿ ॥ 14 ॥

ಅಯಾ॑ಡ॒ಗ್ನೇಃ ಪ್ರಿ॒ಯಾ ಧಾಮಾ॑ನಿ । ಅಯಾ᳚ಟ್ಪ್ರ॒ಜಾಪ॑ತೇಃ ಪ್ರಿ॒ಯಾ ಧಾಮಾ॑ನಿ । ಅಯಾ॑ಡ॒ಗ್ನೀಷೋಮ॑ಯೋಃ ಪ್ರಿ॒ಯಾ ಧಾಮಾ॑ನಿ । ಅಯಾ॑ಡಿನ್ದ್ರಾಗ್ನಿ॒ಯೋಃ ಪ್ರಿ॒ಯಾ ಧಾಮಾ॑ನಿ ।
ಅಯಾ॒ಡಿನ್ದ್ರ॑ಸ್ಯ ಪ್ರಿ॒ಯಾ ಧಾಮಾ॑ನಿ । ಅಯಾ᳚ಣ್ಮಹೇ॒ನ್ದ್ರಸ್ಯ॑ ಪ್ರಿ॒ಯಾ ಧಾಮಾ॑ನಿ । ಅಯಾ᳚ಡ್ದೇ॒ವಾನಾ॑-ಮಾಜ್ಯ॒ಪಾನಾ᳚-ಮ್ಪ್ರಿ॒ಯಾ ಧಾಮಾ॑ನಿ । ಯಖ್ಷ॑ದ॒ಗ್ನೇರ್-ಹೋತುಃ॑ ಪ್ರಿ॒ಯಾ ಧಾಮಾ॑ನಿ । ಯಖ್ಷ॒ಥ್ಸ್ವ-ಮ್ಮ॑ಹಿ॒ಮಾನ᳚ಮ್ । ಆಯ॑ಜತಾ॒ಮೇಜ್ಯಾ॒ ಇಷಃ॑ । ಕೃ॒ಣೋತು॒ ಸೋ ಅ॑ದ್ಧ್ವ॒ರಾ ಜಾ॒ತವೇ॑ದಾಃ । ಜು॒ಷತಾಗ್ಂ॑ ಹ॒ವಿಃ । ಅಗ್ನೇ॒ ಯದ॒ದ್ಯ ವಿ॒ಶೋ ಅ॑ದ್ಧ್ವರಸ್ಯ ಹೋತಃ ।
ಪಾವ॑ಕ ಶೋಚೇ॒ ವೇಷ್ಟ್ವಗ್ಂ ಹಿ ಯಜ್ವಾ᳚ । ಋ॒ತಾ ಯ॑ಜಾಸಿ ಮಹಿ॒ನಾ ವಿ ಯದ್ಭೂಃ ।
ಹ॒ವ್ಯಾ ವ॑ಹ ಯವಿಷ್ಠ॒ ಯಾ ತೇ॑ ಅ॒ದ್ಯ ॥ 15 ॥
(ಅ॒ಸ್ತ್ವ॒ - ಧ॒ತ್ತ॒ಗ್ಂ - ರ॒ಯಿಂ - ಚ॑ರ್​ಷಣಿ॒ಪ್ರಾಃ - ಸೋಮ॑ಸ್ಯ ಪ್ರಿ॒ಯಾ ಧಾಮಾ॒ - ನೀಷ॒-ಷ್ಷಟ್ಚ॑) (ಅ. 7)

ಅನುವಾಕಂ 8 - ಇಡೋಪಾಹ್ವಾನಾಂ
ಉಪ॑ಹೂತಗ್ಂ ರಥನ್ತ॒ರಗ್ಂ ಸ॒ಹ ಪೃ॑ಥಿ॒ವ್ಯಾ ।
ಉಪ॑ ಮಾ ರಥನ್ತ॒ರಗ್ಂ ಸ॒ಹ ಪೃ॑ಥಿ॒ವ್ಯಾ ಹ್ವ॑ಯತಾಮ್ ।
ಉಪ॑ಹೂತಂ-ವಾಁಮದೇ॒ವ್ಯಗ್ಂ ಸ॒ಹಾನ್ತರಿ॑ಖ್ಷೇಣ ।
ಉಪ॑ ಮಾ ವಾಮದೇ॒ವ್ಯಗ್ಂ ಸ॒ಹಾನ್ತರಿ॑ಖ್ಷೇಣ ಹ್ವಯತಾಮ್ ।
ಉಪ॑ ಹೂತ-ಮ್ಬೃ॒ಹಥ್ಸ॒ಹ ದಿ॒ವಾ । ಉಪ॑ ಮಾ ಬೃ॒ಹಥ್ಸ॒ಹ ದಿ॒ವಾ ಹ್ವ॑ಯತಾಮ್ । ಉಪ॑ಹೂತಾ-ಸ್ಸ॒ಪ್ತ ಹೋತ್ರಾಃ᳚ ।
ಉಪ॑ ಮಾ ಸ॒ಪ್ತ ಹೋತ್ರಾ᳚ ಹ್ವಯನ್ತಾಮ್ । ಉಪ॑ಹೂತಾ ಧೇ॒ನು-ಸ್ಸ॒ಹರ್​ಷ॑ಭಾ । ಉಪ॑ ಮಾ ಧೇ॒ನು-ಸ್ಸ॒ಹರ್​ಷ॑ಭಾ ಹ್ವಯತಾಮ್ ॥ 16 ॥

ಉಪ॑ಹೂತೋ ಭ॒ಖ್ಷ-ಸ್ಸಖಾ᳚ । ಉಪ॑ ಮಾ ಭ॒ಖ್ಷ-ಸ್ಸಖಾ᳚ ಹ್ವಯತಾಮ್ । ಉಪ॑ಹೂ॒ತಾಁ(4) ಹೋ । ಇಡೋಪ॑ಹೂತಾ । ಉಪ॑ಹೂ॒ತೇಡಾ᳚ । ಉಪೋ॑ ಅ॒ಸ್ಮಾಗ್ಂ ಇಡಾ᳚ ಹ್ವಯತಾಮ್ । ಇಡೋಪ॑ಹೂತಾ । ಉಪ॑ಹೂ॒ತೇಡಾ᳚ । ಮಾ॒ನ॒ವೀ ಘೃ॒ತಪ॑ದೀ ಮೈತ್ರಾವರು॒ಣೀ ।
ಬ್ರಹ್ಮ॑ ದೇ॒ವಕೃ॑ತ॒ಮುಪ॑ಹೂತಮ್ ॥ 17 ॥

ದೈವ್ಯಾ॑ ಅದ್ಧ್ವ॒ರ್ಯವ॒ ಉಪ॑ಹೂತಾಃ । ಉಪ॑ಹೂತಾ ಮನು॒ಷ್ಯಾಃ᳚ । ಯ ಇ॒ಮಂ-ಯಁ॒ಜ್ಞಮವಾನ್॑ । ಯೇ ಯ॒ಜ್ಞಪ॑ತಿಂ॒-ವಁರ್ಧಾನ್॑ । ಉಪ॑ಹೂತೇ॒ ದ್ಯಾವಾ॑ಪೃಥಿ॒ವೀ ।
ಪೂ॒ರ್ವ॒ಜೇ ಋ॒ತಾವ॑ರೀ । ದೇ॒ವೀ ದೇ॒ವಪು॑ತ್ರೇ । ಉಪ॑ಹೂತೋ॒-ಽಯಂ-ಯಁಜ॑ಮಾನಃ । ಉತ್ತ॑ರಸ್ಯಾ-ನ್ದೇವಯ॒ಜ್ಯಾಯಾ॒-ಮುಪ॑ಹೂತಃ । ಭೂಯ॑ಸಿ ಹವಿ॒ಷ್ಕರ॑ಣ॒ ಉಪ॑ಹೂತಃ ।
ದಿ॒ವ್ಯೇ ಧಾಮ॒ನ್ನುಪ॑ಹೂತಃ ।
ಇ॒ದ-ಮ್ಮೇ॑ ದೇ॒ವಾ ಹ॒ವಿರ್ಜು॑ಷನ್ತಾ॒ಮಿತಿ॒ ತಸ್ಮಿ॒ನ್ನುಪ॑ಹೂತಃ ।
ವಿಶ್ವ॑ಮಸ್ಯ ಪ್ರಿ॒ಯಮುಪ॑ಹೂತಮ್ ।
ವಿಶ್ವ॑ಸ್ಯ ಪ್ರಿ॒ಯಸ್ಯೋಪ॑ಹೂತ॒ಸ್ಯೋಪ॑ಹೂತಃ ॥ 18 ॥
(ಸ॒ಹರ್​ಷ॑ಭಾ ಹ್ವಯತಾ॒ - ಮುಪ॑ಹೂತಗ್ಂ - ಹವಿ॒ಷ್ಕರ॑ಣ॒ ಉಪ॑ಹೂತಶ್ಚ॒ತ್ವಾರಿ॑ ಚ) (ಅ. 8)

ಅನುವಾಕಂ 9 - ಅನೂಯಾಜಾಃ
ದೇ॒ವ-ಮ್ಬ॒ರ್॒ಹಿಃ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು । ದೇ॒ವೋ ನರಾ॒ಶಗ್ಂ ಸಃ॑ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು । ದೇ॒ವೋ ಅ॒ಗ್ನಿ-ಸ್ಸ್ವಿ॑ಷ್ಟ॒ಕೃತ್ । ಸು॒ದ್ರವಿ॑ಣಾ ಮ॒ನ್ದ್ರಃ ಕ॒ವಿಃ । ಸ॒ತ್ಯಮ॑ನ್ಮಾ-ಽಽಯ॒ಜೀ ಹೋತಾ᳚ । ಹೋತು॑ರ್-ಹೋತು॒ರಾಯ॑ಜೀಯಾನ್ । ಅಗ್ನೇ॒ ಯಾನ್-ದೇ॒ವಾನಯಾ᳚ಟ್ । ಯಾಗ್ಂ ಅಪಿ॑ಪ್ರೇಃ । ಯೇ ತೇ॑ ಹೋ॒ತ್ರೇ ಅಮ॑ಥ್ಸತ । ತಾಗ್ಂ ಸ॑ಸ॒ನುಷೀ॒ಗ್ಂ॒ ಹೋತ್ರಾ᳚-ನ್ದೇವ-ಙ್ಗ॒ಮಾಮ್ । ದಿ॒ವಿ ದೇ॒ವೇಷು॑ ಯ॒ಜ್ಞಮೇರ॑ಯೇ॒ಮಮ್ । ಸ್ವಿ॒ಷ್ಟ॒ಕೃಚ್ಚಾಗ್ನೇ॒ ಹೋತಾ-ಽಭೂಃ᳚ ।
ವ॒ಸು॒ವನೇ॑ ವಸು॒ಧೇಯ॑ಸ್ಯ ನಮೋವಾ॒ಕೇ ವೀಹಿ॑ ॥ 19 ॥
(ಅಪಿ॑ಪ್ರೇಃ॒ ಪಞ್ಚ॑ ಚ) (ಅ. 9)

ಅನುವಾಕಂ 10 - ಸೂಕ್ತಾವಾಕಃ
ಇ॒ದ-ನ್ದ್ಯಾ॑ವಾಪೃಥಿವೀ ಭ॒ದ್ರಮ॑ಭೂತ್ ।
ಆರ್ಧ್ಮ॑ ಸೂಕ್ತವಾ॒ಕಮ್ । ಉ॒ತ ನ॑ಮೋವಾ॒ಕಮ್ ।
ಋ॒ದ್ಧ್ಯಾಸ್ಮ॑ ಸೂ॒ಕ್ತೋಚ್ಯ॑ಮಗ್ನೇ । ತ್ವಗ್ಂ ಸೂ᳚ಕ್ತ॒ವಾಗ॑ಸಿ ।
ಉಪ॑ಶ್ರಿತೋ ದಿ॒ವಃ ಪೃ॑ಥಿ॒ವ್ಯೋಃ । ಓಮ॑ನ್ವತೀ ತೇ॒-ಽಸ್ಮಿನ್. ಯ॒ಜ್ಞೇ ಯ॑ಜಮಾನ॒ ದ್ಯಾವಾ॑ಪೃಥಿ॒ವೀ ಸ್ತಾ᳚ಮ್ ।
ಶ॒ಗಂ॒ಯೇ ಜೀ॒ರದಾ॑ನೂ । ಅತ್ರ॑ಸ್ನೂ॒ ಅಪ್ರ॑ವೇದೇ ।
ಉ॒ರುಗ॑ವ್ಯೂತೀ ಅಭಯ॒-ಙ್ಕೃತೌ᳚ ॥ 20 ॥

ವೃ॒ಷ್ಟಿದ್ಯಾ॑ವಾ ರೀ॒ತ್ಯಾ॑ಪಾ । ಶ॒ಮ್ಭುವೌ॑ ಮಯೋ॒ಭುವೌ᳚ ।
ಊರ್ಜ॑ಸ್ವತೀ ಚ॒ ಪಯ॑ಸ್ವತೀ ಚ । ಸೂ॒ಪ॒ಚ॒ರ॒ಣಾ ಚ॑ ಸ್ವಧಿಚರ॒ಣಾ ಚ॑ । ತಯೋ॑ರಾ॒ವಿದಿ॑ ॥
ಅ॒ಗ್ನಿರಿ॒ದಗ್ಂ ಹ॒ವಿರ॑ಜುಷತ । ಅವೀ॑ವೃಧತ॒ ಮಹೋ॒ ಜ್ಯಾಯೋ॑-ಽಕೃತ । ಸೋಮ॑ ಇ॒ದಗ್ಂ ಹ॒ವಿರ॑ಜುಷತ । ಅವೀ॑ವೃಧತ॒ ಮಹೋ॒ ಜ್ಯಾಯೋ॑-ಽಕೃತ ।
ಅ॒ಗ್ನಿರಿ॒ದಗ್ಂ ಹ॒ವಿರ॑ಜುಷತ ॥ 21 ॥

ಅವೀ॑ವೃಧತ॒ ಮಹೋ॒ ಜ್ಯಾಯೋ॑-ಽಕೃತ । ಪ್ರ॒ಜಾಪ॑ತಿರಿ॒ದಗ್ಂ ಹ॒ವಿರ॑ಜುಷತ । ಅವೀ॑ವೃಧತ॒ ಮಹೋ॒ ಜ್ಯಾಯೋ॑-ಽಕೃತ । ಅ॒ಗ್ನೀಷೋಮಾ॑ವಿ॒ದಗ್ಂ ಹ॒ವಿರ॑ಜುಷೇತಾಮ್ ।
ಅವೀ॑ವೃಧೇತಾ॒-ಮ್ಮಹೋ॒ ಜ್ಯಾಯೋ᳚-ಽಕ್ರಾತಾಮ್ ।
ಇ॒ನ್ದ್ರಾ॒ಗ್ನೀ ಇ॒ದಗ್ಂ ಹ॒ವಿರ॑ಜುಷೇತಾಮ್ ।
ಅವೀ॑ವೃಧೇತಾ॒-ಮ್ಮಹೋ॒ ಜ್ಯಾಯೋ᳚-ಽಕ್ರಾತಾಮ್ । ಇನ್ದ್ರ॑ ಇ॒ದಗ್ಂ ಹ॒ವಿರ॑ಜುಷತ । ಅವೀ॑ವೃಧತ॒ ಮಹೋ॒ ಜ್ಯಾಯೋ॑-ಽಕೃತ । ಮ॒ಹೇ॒ನ್ದ್ರ ಇ॒ದಗ್ಂ ಹ॒ವಿರ॑ಜುಷತ ॥ 22 ॥

ಅವೀ॑ವೃಧತ॒ ಮಹೋ॒ ಜ್ಯಾಯೋ॑-ಽಕೃತ । ದೇ॒ವಾ ಆ᳚ಜ್ಯ॒ಪಾ ಆಜ್ಯ॑ಮಜುಷನ್ತ । ಅವೀ॑ವೃಧನ್ತ॒ ಮಹೋ॒ ಜ್ಯಾಯೋ᳚-ಽಕ್ರತ । ಅ॒ಗ್ನಿರ್​ಹೋ॒ತ್ರೇಣೇ॒ದಗ್ಂ ಹ॒ವಿರ॑ಜುಷತ ।
ಅವೀ॑ವೃಧತ॒ ಮಹೋ॒ ಜ್ಯಾಯೋ॑-ಽಕೃತ ।
ಅ॒ಸ್ಯಾಮೃಧ॒-ದ್ಧೋತ್ರಾ॑ಯಾ-ನ್ದೇವಙ್ಗ॒ಮಾಯಾ᳚ಮ್ ।
ಆಶಾ᳚ಸ್ತೇ॒-ಽಯಂ-ಯಁಜ॑ಮಾನೋ॒-ಽಸೌ ॥
ಆಯು॒ರಾಶಾ᳚ಸ್ತೇ । ಸು॒ಪ್ರ॒ಜಾ॒ಸ್ತ್ವ-ಮಾಶಾ᳚ಸ್ತೇ ।
ಸ॒ಜಾ॒ತ॒ವ॒ನ॒ಸ್ಯಾ-ಮಾಶಾ᳚ಸ್ತೇ ॥ 23 ॥

ಉತ್ತ॑ರಾ-ನ್ದೇವಯ॒ಜ್ಯಾ-ಮಾಶಾ᳚ಸ್ತೇ । ಭೂಯೋ॑ ಹವಿ॒ಷ್ಕರ॑ಣ॒-ಮಾಶಾ᳚ಸ್ತೇ । ದಿ॒ವ್ಯ-ನ್ಧಾಮಾಶಾ᳚ಸ್ತೇ । ವಿಶ್ವ॑-ಮ್ಪ್ರಿ॒ಯಮಾಶಾ᳚ಸ್ತೇ । ಯದ॒ನೇನ॑ ಹ॒ವಿಷಾ ಽಽಶಾ᳚ಸ್ತೇ । ತದ॑ಶ್ಯಾ॒ತ್-ತದೃ॑ದ್ಧ್ಯಾತ್ । ತದ॑ಸ್ಮೈ ದೇ॒ವಾ ರಾ॑ಸನ್ತಾಮ್ । ತದ॒ಗ್ನಿ-ರ್ದೇ॒ವೋ ದೇ॒ವೇಭ್ಯೋ॒ ವನ॑ತೇ । ವ॒ಯಮ॒ಗ್ನೇ-ರ್ಮಾನು॑ಷಾಃ । ಇ॒ಷ್ಟ-ಞ್ಚ॑ ವೀ॒ತ-ಞ್ಚ॑ । ಉ॒ಭೇ ಚ॑ ನೋ॒ ದ್ಯಾವಾ॑ಪೃಥಿ॒ವೀ ಅಗ್ಂಹ॑ಸಸ್ಪಾತಾಮ್ ।
ಇ॒ಹ ಗತಿ॑-ರ್ವಾ॒ಮಸ್ಯೇ॒ದ-ಞ್ಚ॑ । ನಮೋ॑ ದೇ॒ವೇಭ್ಯಃ॑ ॥ 24 ॥
(ಅ॒ಭ॒ಯ॒ಙ್ಕೃತಾ॑ವಕೃ - ತಾ॒ಗ್ನಿರಿ॒ದಗ್ಂ ಹ॒ವಿರ॑ಜುಷತ - ಮಹೇ॒ನ್ದ್ರ ಇ॒ದಗ್ಂ ಹ॒ವಿರ॑ಜುಷತ - ಸಜಾತವನ॒ಸ್ಯಾಮಾಶಾ᳚ಸ್ತೇ - ವೀ॒ತ-ಞ್ಚ॒ ತ್ರೀಣಿ॑ ಚ) (ಅ. 10)

ಅನುವಾಕಂ 11 - ಶಂ​ಯುಁವಾಕಃ
ತಚ್ಛಂ॒-ಯೋಁರಾ ವೃ॑ಣೀಮಹೇ । ಗಾ॒ತುಂ-ಯಁ॒ಜ್ಞಾಯ॑ । ಗಾ॒ತುಂ-ಯಁ॒ಜ್ಞಪ॑ತಯೇ । ದೈವೀ᳚ ಸ್ವ॒ಸ್ತಿರ॑ಸ್ತು ನಃ । ಸ್ವ॒ಸ್ತಿ-ರ್ಮಾನು॑ಷೇಭ್ಯಃ । ಊ॒ರ್ಧ್ವ-ಞ್ಜಿ॑ಗಾತು ಭೇಷ॒ಜಮ್ ।
ಶ-ನ್ನೋ॑ ಅಸ್ತು ದ್ವಿ॒ಪದೇ᳚ । ಶ-ಞ್ಚತು॑ಷ್ಪದೇ ॥ 25 ॥
(ತಚ್ಛಂ॒-ಯೋಁರ॒ಷ್ಟೌ) (ಅ. 11)

ಅನುವಾಕಂ 12 - ಪತ್ನೀಸಂ​ಯಾಁಜಾನಾಂ-ಯಾಁಜ್ಯಾನುವಾಕ್ಯಾಃ
ಆ ಪ್ಯಾ॑ಯಸ್ವ॒ ಸಮೇ॑ತು ತೇ ವಿ॒ಶ್ವತ॑-ಸ್ಸೋಮ॒ ವೃಷ್ಣಿ॑ಯಮ್ । ಭವಾ॒ ವಾಜ॑ಸ್ಯ ಸಙ್ಗ॒ಥೇ ॥ ಸ-ನ್ತೇ॒ ಪಯಾಗ್ಂ ॑ಸಿ॒ ಸಮು॑ ಯನ್ತು॒ ವಾಜಾ॒-ಸ್ಸಂ-ವೃಁಷ್ಣಿ॑ಯಾ-ನ್ಯಭಿಮಾತಿ॒ಷಾಹಃ॑ । ಆ॒ಪ್ಯಾಯ॑ಮಾನೋ ಅ॒ಮೃತಾ॑ಯ ಸೋಮ ದಿ॒ವಿ ಶ್ರವಾಗ್॑ಸ್ಯುತ್ತ॒ಮಾನಿ॑ ಧಿಷ್ವ ॥ ॥
ಇ॒ಹ ತ್ವಷ್ಟಾ॑ರಮಗ್ರಿ॒ಯಂ-ವಿಁ॒ಶ್ವರೂ॑ಪ॒ಮುಪ॑ ಹ್ವಯೇ । ಅ॒ಸ್ಮಾಕ॑ಮಸ್ತು॒ ಕೇವ॑ಲಃ ॥ ತನ್ನ॑ಸ್ತು॒ರೀಪ॒ಮಧ॑ ಪೋಷಯಿ॒ತ್ನು ದೇವ॑ ತ್ವಷ್ಟ॒ರ್ವಿ ರ॑ರಾ॒ಣ-ಸ್ಸ್ಯ॑ಸ್ವ । ಯತೋ॑ ವೀ॒ರಃ ಕ॑ರ್ಮ॒ಣ್ಯ॑-ಸ್ಸು॒ದಖ್ಷೋ॑ ಯು॒ಕ್ತಗ್ರಾ॑ವಾ॒ ಜಾಯ॑ತೇ ದೇ॒ವಕಾ॑ಮಃ ॥ ॥
ದೇ॒ವಾನಾ॒-ಮ್ಪತ್ನೀ॑ರುಶ॒ತೀರ॑ವನ್ತು ನಃ । ಪ್ರಾವ॑ನ್ತು ನಸ್ತು॒ಜಯೇ॒ ವಾಜ॑ಸಾತಯೇ । ಯಾಃ ಪಾರ್ಥಿ॑ವಾಸೋ॒ ಯಾ ಅ॒ಪಾಮಪಿ॑ ವ್ರ॒ತೇ । ತಾ ನೋ॑ ದೇವೀ-ಸ್ಸುಹವಾ॒-ಶ್ಶರ್ಮ॑ ಯಚ್ಛತ ॥ ಉ॒ತ ಗ್ನಾ ವಿ॑ಯನ್ತು ದೇ॒ವಪ॑ತ್ನೀಃ । ಇ॒ನ್ದ್ರಾ॒ಣ್ಯ॑ಗ್ನಾಯ್ಯ॒ಶ್ವಿನೀ॒ ರಾಟ್ । ಆ ರೋದ॑ಸೀ ವರುಣಾ॒ನೀ ಶೃ॑ಣೋತು ।
ವಿ॒ಯನ್ತು॑ ದೇ॒ವೀರ್ಯ ಋ॒ತುರ್ಜನೀ॑ನಾಮ್ ॥ 26 ॥

ಅ॒ಗ್ನಿರ್-ಹೋತಾ॑ ಗೃ॒ಹಪ॑ತಿ॒-ಸ್ಸ ರಾಜಾ᳚ । ವಿಶ್ವಾ॑ ವೇದ॒ ಜನಿ॑ಮಾ ಜಾ॒ತವೇ॑ದಾಃ । ದೇ॒ವಾನಾ॑ಮು॒ತ ಯೋ ಮರ್ತ್ಯಾ॑ನಾಮ್ । ಯಜಿ॑ಷ್ಠ॒-ಸ್ಸ ಪ್ರಯ॑ಜತಾಮೃ॒ತಾವಾ᳚ ॥
ವ॒ಯಮು॑ ತ್ವಾ ಗೃಹಪತೇ॒ ಜನಾ॑ನಾಮ್ । ಅಗ್ನೇ॒ ಅಕ॑ರ್ಮ ಸ॒ಮಿಧಾ॑ ಬೃ॒ಹನ್ತ᳚ಮ್ । ಅ॒ಸ್ಥೂ॒ರಿಣೋ॒ ಗಾರ್​ಹ॑ಪತ್ಯಾನಿ ಸನ್ತು । ತಿ॒ಗ್ಮೇನ॑ ನ॒ಸ್ತೇಜ॑ಸಾ॒ ಸಗ್ಂಶಿ॑ಶಾಧಿ ॥ 27 ॥
(ಜನೀ॑ನಾ - +ಮ॒ಷ್ಟೌ ಚ॑) (ಅ. 12)
ಅನುವಾಕಂ 13 - ಪತ್ನೀಸಂ​ಯಾಁಜೇ ಸೋಮಾಹ್ವಾನಂ
ಉಪ॑ಹೂತಗ್ಂ ರಥನ್ತ॒ರಗ್ಂ ಸ॒ಹ ಪೃ॑ಥಿ॒ವ್ಯಾ ।
ಉಪ॑ ಮಾ ರಥನ್ತ॒ರಗ್ಂ ಸ॒ಹ ಪೃ॑ಥಿ॒ವ್ಯಾ ಹ್ವ॑ಯತಾಮ್ ।
ಉಪ॑ಹೂತಂ-ವಾಁಮದೇ॒ವ್ಯಗ್ಂ ಸ॒ಹಾನ್ತರಿ॑ಖ್ಷೇಣ ।
ಉಪ॑ ಮಾ ವಾಮದೇ॒ವ್ಯಗ್ಂ ಸ॒ಹಾನ್ತರಿ॑ಖ್ಷೇಣ ಹ್ವಯತಾಮ್ । ಉಪ॑ಹೂತ-ಮ್ಬೃ॒ಹಥ್ಸ॒ಹ ದಿ॒ವಾ । ಉಪ॑ ಮಾ ಬೃ॒ಹಥ್ಸ॒ಹ ದಿ॒ವಾ ಹ್ವ॑ಯತಾಮ್ । ಉಪ॑ಹೂತಾ-ಸ್ಸ॒ಪ್ತ ಹೋತ್ರಾಃ᳚ ।
ಉಪ॑ ಮಾ ಸ॒ಪ್ತ ಹೋತ್ರಾ᳚ ಹ್ವಯನ್ತಾಮ್ । ಉಪ॑ಹೂತಾ ಧೇ॒ನು-ಸ್ಸ॒ಹರ್​ಷ॑ಭಾ । ಉಪ॑ ಮಾ ಧೇ॒ನು-ಸ್ಸ॒ಹರ್​ಷ॑ಭಾ ಹ್ವಯತಾಮ್ ॥ 28 ॥

ಉಪ॑ಹೂತೋ ಭ॒ಖ್ಷ-ಸ್ಸಖಾ᳚ । ಉಪ॑ ಮಾ ಭ॒ಖ್ಷ-ಸ್ಸಖಾ᳚ ಹ್ವಯತಾಮ್ । ಉಪ॑ಹೂ॒ತಾಁ(4) ಹೋ । ಇಡೋಪ॑ಹೂತಾ । ಉಪ॑ಹೂ॒ತೇಡಾ᳚ । ಉಪೋ॑ ಅ॒ಸ್ಮಾಗ್ಂ ಇಡಾ᳚ ಹ್ವಯತಾಮ್ । ಇಡೋಪ॑ಹೂತಾ । ಉಪ॑ಹೂ॒ತೇಡಾ᳚ । ಮಾ॒ನ॒ವೀ ಘೃ॒ತಪ॑ದೀ ಮೈತ್ರಾವರು॒ಣೀ ।
ಬ್ರಹ್ಮ॑ ದೇ॒ವಕೃ॑ತ॒ಮುಪ॑ಹೂತಮ್ ॥ 29 ॥

ದೈವ್ಯಾ॑ ಅದ್ಧ್ವ॒ರ್ಯವ॒ ಉಪ॑ಹೂತಾಃ । ಉಪ॑ಹೂತಾ ಮನು॒ಷ್ಯಾಃ᳚ । ಯ ಇ॒ಮಂ-ಯಁ॒ಜ್ಞಮವಾನ್॑ । ಯೇ ಯ॒ಜ್ಞಪ॑ತ್ನೀಂ॒-ವಁರ್ಧಾನ್॑ । ಉಪ॑ಹೂತೇ॒ ದ್ಯಾವಾ॑ಪೃಥಿ॒ವೀ । ಪೂ॒ರ್ವ॒ಜೇ ಋ॒ತಾವ॑ರೀ । ದೇ॒ವೀ ದೇ॒ವಪು॑ತ್ರೇ । ಉಪ॑ಹೂತೇ॒ಯಂ-ಯಁಜ॑ಮಾನಾ । ಇ॒ನ್ದ್ರಾ॒ಣೀವಾ॑ವಿಧ॒ವಾ । ಅದಿ॑ತಿರಿವ ಸುಪು॒ತ್ರಾ । ಉತ್ತ॑ರಸ್ಯಾ-ನ್ದೇವಯ॒ಜ್ಯಾಯಾ॒-ಮುಪ॑ಹೂತಾ ।
ಭೂಯ॑ಸಿ ಹವಿ॒ಷ್ಕರ॑ಣ॒ ಉಪ॑ಹೂತಾ । ದಿ॒ವ್ಯೇ ಧಾಮ॒ನ್ನುಪ॑ಹೂತಾ । ಇ॒ದ-ಮ್ಮೇ॑ ದೇ॒ವಾ ಹ॒ವಿ-ರ್ಜು॑ಷನ್ತಾ॒ಮಿತಿ॒ ತಸ್ಮಿ॒-ನ್ನುಪ॑ಹೂತಾ । ವಿಶ್ವ॑ಮಸ್ಯಾಃ ಪ್ರಿ॒ಯಮುಪ॑ಹೂತಮ್ ।
ವಿಶ್ವ॑ಸ್ಯ ಪ್ರಿ॒ಯಸ್ಯೋಪ॑ಹೂತ॒ಸ್ಯೋಪ॑ಹೂತಾ ॥ 30 ॥
(ಸ॒ಹರ್​ಷ॑ಭಾ ಹ್ವಯತಾ॒ - ಮುಪ॑ಹೂತಗ್ಂ - ಸುಪು॒ತ್ರಾ ಷಟ್ಚ॑) (ಅ. 13)

(ಸ॒ತ್ಯಂ - ಪ್ರವೋ - ಽಗ್ನೇ॑ ಮ॒ಹಾ - ನ॒ಗ್ನಿರ್-ಹೋತಾ॑ - ಸ॒ಮಿಧೋ॒ - ಽಗ್ನಿ-ರ್ವೃ॒ತ್ರಾಣ್ಯ॒ - ಗ್ನಿ-ರ್ಮೂ॒ರ್ಧೋ - ಪ॑ಹೂತಂ - ದೇ॒ವ-ಮ್ಬ॒ರ್॒ಹಿ - ರಿ॒ದ-ನ್ದ್ಯಾ॑ವಾಪೃಥಿವೀ॒ -ತಚ್ಛಂ॒​ಯೋಁ- ರಾ ಪ್ಯಾ॑ಯ॒ಸ್ವೋ - ಪ॑ಹೂತ॒-ನ್ತ್ರಯೋ॑ದಶ)

(ಸ॒ತ್ಯಂ - ಁವ॒ಯಗ್ಗ್​ ಸ್ಯಾ॑ಮ - ವೃ॒ಷ್ಟಿದ್ಯಾ॑ವಾ ತ್ರಿ॒ಗ್ಂ॒ಶತ್)

(ಸ॒ತ್ಯ-ಮುಪ॑ಹೂತಾ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ಪಞ್ಚಮ ಪ್ರಪಾಠಕ-ಸ್ಸಮಾಪ್ತಃ ॥