ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ದ್ವಿತೀಯಃ ಪ್ರಪಾಠಕಃ - ಗವಾಮಯನಬ್ರಾಹ್ಮಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಆಧಾನಮನ್ತ್ರಾಃ ಪೂರ್ವಪ್ರಪಾಠಕಶೇಷಭೂತಾಃ

ಉ॒ದ್ಧ॒ನ್ಯಮಾ॑ನ-ಮ॒ಸ್ಯಾ ಅ॑ಮೇ॒ದ್ಧ್ಯಮ್ । ಅಪ॑ ಪಾ॒ಪ್ಮಾನಂ॒-ಯಁಜ॑ಮಾನಸ್ಯ ಹನ್ತು । ಶಿ॒ವಾ ನ॑-ಸ್ಸನ್ತು ಪ್ರ॒ದಿಶ॒ಶ್ಚತ॑ಸ್ರಃ । ಶ-ನ್ನೋ॑ ಮಾ॒ತಾ ಪೃ॑ಥಿ॒ವೀ ತೋಕ॑ಸಾತಾ ॥ ಶ-ನ್ನೋ॑ ದೇ॒ವೀರ॒ಭಿಷ್ಟ॑ಯೇ । ಆಪೋ॑ ಭವನ್ತು ಪೀ॒ತಯೇ᳚ । ಶಂ-ಯೋಁರ॒ಭಿ ಸ್ರ॑ವನ್ತು ನಃ ॥ ವೈ॒ಶ್ವಾ॒ನ॒ರಸ್ಯ॑ ರೂ॒ಪಮ್ । ಪೃ॒ಥಿ॒ವ್ಯಾ-ಮ್ಪ॑ರಿ॒ಸ್ರಸಾ᳚ । ಸ್ಯೋ॒ನ-ಮಾವಿ॑ಶನ್ತು ನಃ ॥ 1 ॥

ಯದಿ॒ದ-ನ್ದಿ॒ವೋ ಯದ॒ದಃ ಪೃ॑ಥಿ॒ವ್ಯಾಃ । ಸ॒ಜ॒ಞ್ಜ್ಞಾ॒ನೇ ರೋದ॑ಸೀ ಸಮ್ಬಭೂ॒ವತುಃ॑ । ಊಷಾ᳚ನ್ ಕೃ॒ಷ್ಣಮ॑ವತು ಕೃ॒ಷ್ಣಮೂಷಾಃ᳚ । ಇ॒ಹೋಭಯೋ᳚-ರ್ಯ॒ಜ್ಞಿಯ॒-ಮಾಗ॑ಮಿಷ್ಠಾಃ ॥ ಊ॒ತೀಃ ಕು॑ರ್ವಾ॒ಣೋ ಯ-ತ್ಪೃ॑ಥಿ॒ವೀಮಚ॑ರಃ । ಗು॒ಹಾ॒ಕಾರ॑-ಮಾಖುರೂ॒ಪ-ಮ್ಪ್ರ॒ತೀತ್ಯ॑ । ತ-ತ್ತೇ॒ ನ್ಯ॑ಕ್ತಮಿ॒ಹ ಸ॒ಭಂರ॑ನ್ತಃ । ಶ॒ತ-ಞ್ಜೀ॑ವೇಮ ಶ॒ರದ॒-ಸ್ಸವೀ॑ರಾಃ ॥ ಊರ್ಜ॑-ಮ್ಪೃಥಿ॒ವ್ಯಾ ರಸ॑-ಮಾ॒ಭರ॑ನ್ತಃ । ಶ॒ತ-ಞ್ಜೀ॑ವೇಮ ಶ॒ರದಃ॑ ಪುರೂ॒ಚೀಃ ॥ 2 ॥

ವ॒ಮ್ರೀಭಿ॒-ರನು॑ವಿತ್ತ॒-ಙ್ಗುಹಾ॑ಸು । ಶ್ರೋತ್ರ॑-ನ್ತ ಉ॒ರ್ವ್ಯಬ॑ಧಿರಾ ಭವಾಮಃ ॥ ಪ್ರ॒ಜಾಪ॑ತಿ ಸೃಷ್ಟಾನಾ-ಮ್ಪ್ರ॒ಜಾನಾ᳚ಮ್ । ಖ್ಷು॒ಧೋಪ॑ಹತ್ಯೈ ಸುವಿ॒ತ-ನ್ನೋ॑ ಅಸ್ತು । ಉಪ॒ಪ್ರಭಿ॑ನ್ನ॒ಮಿಷ॒-ಮೂರ್ಜ॑-ಮ್ಪ್ರ॒ಜಾಭ್ಯಃ॑ । ಸೂದ॑-ಙ್ಗೃ॒ಹೇಭ್ಯೋ॒ ರಸ॒ಮಾಭ॑ರಾಮಿ ॥ ಯಸ್ಯ॑ ರೂ॒ಪ-ಮ್ಬಿಭ್ರ॑ದಿ॒ಮಾ-ಮವಿ॑ನ್ದತ್ । ಗುಹಾ॒ ಪ್ರವಿ॑ಷ್ಟಾಗ್ಂ ಸರಿ॒ರಸ್ಯ॒ ಮದ್ಧ್ಯೇ᳚ । ತಸ್ಯೇ॒ದಂ-ವಿಁಹ॑ತ-ಮಾ॒ಭರ॑ನ್ತಃ । ಅಛ॑ಮ್ಬಟ್ಕಾರಮ॒ಸ್ಯಾಂ-ವಿಁ॑ಧೇಮ ॥ 3 ॥

ಯ-ತ್ಪ॒ರ್ಯಪ॑ಶ್ಯ-ಥ್ಸರಿ॒ರಸ್ಯ॒ ಮದ್ಧ್ಯೇ᳚ । ಉ॒ರ್ವೀಮಪ॑ಶ್ಯ॒-ಜ್ಜಗ॑ತಃ ಪ್ರತಿ॒ಷ್ಠಾಮ್ । ತ-ತ್ಪುಷ್ಕ॑ರಸ್ಯಾ॒ಯತ॑ನಾ॒ದ್ಧಿ ಜಾ॒ತಮ್ । ಪ॒ರ್ಣ-ಮ್ಪೃ॑ಥಿ॒ವ್ಯಾಃ ಪ್ರಥ॑ನಗ್ಂ ಹರಾಮಿ ॥ ಯಾಭಿ॒ರದೃಗ್ಂ॑ಹ॒ಜ್ಜಗ॑ತಃ ಪ್ರತಿ॒ಷ್ಠಾಮ್ । ಉ॒ರ್ವೀಮಿ॒ಮಾಂ-ವಿಁ॑ಶ್ವಜ॒ನಸ್ಯ॑ ಭ॒ರ್ತ್ರೀಮ್ । ತಾ ನ॑-ಶ್ಶಿ॒ವಾ-ಶ್ಶರ್ಕ॑ರಾ-ಸ್ಸನ್ತು॒ ಸರ್ವಾಃ᳚ ॥ ಅ॒ಗ್ನೇ ರೇತ॑ಶ್ಚ॒ನ್ದ್ರಗ್ಂ ಹಿರ॑ಣ್ಯಮ್ । ಅ॒ದ್ಭ್ಯ-ಸ್ಸಮ್ಭೂ॑ತ-ಮ॒ಮೃತ॑-ಮ್ಪ್ರ॒ಜಾಸು॑ । ತ-ಥ್ಸ॒ಭಂರ॑ನ್ನುತ್ತರ॒ತೋ ನಿ॒ಧಾಯ॑ ॥ 4 ॥

ಅ॒ತಿ॒ ಪ್ರ॒ಯಚ್ಛ॒-ನ್ದುರಿ॑ತಿ-ನ್ತರೇಯಮ್ ॥ ಅಶ್ವೋ॑ ರೂ॒ಪ-ಙ್ಕೃ॒ತ್ವಾ ಯದ॑ಶ್ವ॒ತ್ಥೇ ಽತಿ॑ಷ್ಠಃ । ಸಂ॒​ವಁ॒ಥ್ಸ॒ರ-ನ್ದೇ॒ವೇಭ್ಯೋ॑ ನಿ॒ಲಾಯ॑ । ತತ್ತೇ॒ ನ್ಯ॑ಕ್ತಮಿ॒ಹ ಸ॒ಭಂರ॑ನ್ತಃ । ಶ॒ತ-ಞ್ಜೀ॑ವೇಮ ಶ॒ರದ॒-ಸ್ಸವೀ॑ರಾಃ ॥ ಊ॒ರ್ಜಃ ಪೃ॑ಥಿ॒ವ್ಯಾ ಅದ್ಧ್ಯುತ್ಥಿ॑ತೋ-ಽಸಿ । ವನ॑ಸ್ಪತೇ ಶ॒ತವ॑ಲ್​ಶೋ॒ ವಿರೋ॑ಹ । ತ್ವಯಾ॑ ವ॒ಯಮಿಷ॒ಮೂರ್ಜ॒-ಮ್ಮದ॑ನ್ತಃ । ರಾ॒ಯಸ್ಪೋಷೇ॑ಣ॒ ಸಮಿ॒ಷಾ ಮ॑ದೇಮ ॥ ಗಾ॒ಯ॒ತ್ರಿ॒ಯಾ ಹ್ರಿ॒ಯಮಾ॑ಣಸ್ಯ॒ ಯತ್ತೇ᳚ ॥ 5 ॥

ಪ॒ರ್ಣಮಪ॑ತ-ತ್ತೃ॒ತೀಯ॑ಸ್ಯೈ ದಿ॒ವೋ-ಽಧಿ॑ । ಸೋ॑-ಽಯ-ಮ್ಪ॒ರ್ಣ-ಸ್ಸೋ॑ಮಪ॒ರ್ಣಾದ್ಧಿ ಜಾ॒ತಃ । ತತೋ॑ ಹರಾಮಿ ಸೋಮಪೀ॒ಥಸ್ಯಾವ॑-ರುದ್ಧ್ಯೈ । ದೇ॒ವಾನಾ᳚-ಮ್ಬ್ರಹ್ಮವಾ॒ದಂ-ವಁದ॑ತಾಂ॒-ಯಁತ್ । ಉ॒ಪಾಶೃ॑ಣೋ-ಸ್ಸು॒ಶ್ರವಾ॒ ವೈ ಶ್ರು॒ತೋ॑-ಽಸಿ । ತತೋ॒ ಮಾಮಾವಿ॑ಶತು ಬ್ರಹ್ಮವರ್ಚ॒ಸಮ್ । ತ-ಥ್ಸ॒ಭಂರ॒ಗ್ಗ್॒ ಸ್ತದವ॑ರುನ್ಧೀಯ ಸಾ॒ಖ್ಷಾತ್ ॥ ಯಯಾ॑ ತೇ ಸೃ॒ಷ್ಟಸ್ಯಾ॒ಗ್ನೇಃ । ಹೇ॒ತಿಮಶ॑ಮಯ-ತ್ಪ್ರ॒ಜಾಪ॑ತಿಃ । ತಾಮಿ॒ಮಾಮ ಪ್ರ॑ದಾಹಾಯ ॥ 6 ॥

ಶ॒ಮೀಗ್ಂ ಶಾನ್ತ್ಯೈ॑ ಹರಾಮ್ಯ॒ಹಮ್ ॥ ಯತ್ತೇ॑ ಸೃ॒ಷ್ಟಸ್ಯ॑ ಯ॒ತಃ । ವಿಕ॑ಙ್ಕತ॒-ಮ್ಭಾ ಆ᳚ರ್ಛಜ್ಜಾತವೇದಃ । ತಯಾ॑ ಭಾ॒ಸಾ ಸಮ್ಮಿ॑ತಃ । ಉ॒ರು-ನ್ನೋ॑ ಲೋ॒ಕಮನು॒ ಪ್ರಭಾ॑ಹಿ ॥ ಯತ್ತೇ॑ ತಾ॒ನ್ತಸ್ಯ॒ ಹೃದ॑ಯ॒ಮಾಚ್ಛಿ॑ನ್ದನ್ ಜಾತವೇದಃ । ಮ॒ರುತೋ॒-ಽದ್ಭಿಸ್ತ॑ಮಯಿ॒ತ್ವಾ । ಏ॒ತತ್ತೇ॒ ತದ॑ಶ॒ನೇ-ಸ್ಸಮ್ಭ॑ರಾಮಿ । ಸಾತ್ಮಾ॑ ಅಗ್ನೇ॒ ಸಹೃ॑ದಯೋ ಭವೇ॒ಹ ॥ ಚಿತ್ರಿ॑ಯಾದಶ್ವ॒ತ್ಥಾ-ಥ್ಸಮ್ಭೃ॑ತಾ ಬೃಹ॒ತ್ಯಃ॑ ॥ 7 ॥

ಶರೀ॑ರಮ॒ಭಿ ಸಗ್ಗ್​ ಸ್ಕೃ॑ತಾ-ಸ್ಸ್ಥ । ಪ್ರ॒ಜಾಪ॑ತಿನಾ ಯಜ್ಞಮು॒ಖೇನ॒ ಸಮ್ಮಿ॑ತಾಃ । ತಿ॒ಸ್ರಸ್ ತ್ರಿ॒ವೃದ್ಭಿ॑-ರ್ಮಿಥು॒ನಾಃ ಪ್ರಜಾ᳚ತ್ಯೈ ॥ ಅ॒ಶ್ವ॒ತ್ಥಾ-ದ್ಧ॑ವ್ಯವಾ॒ಹಾ-ದ್ಧಿ ಜಾ॒ತಾಮ್ । ಅ॒ಗ್ನೇ ಸ್ತ॒ನೂಂ-ಯಁ॒ಜ್ಞಿಯಾ॒ಗ್ಂ॒ ಸಮ್ಭ॑ರಾಮಿ । ಶಾ॒ನ್ತಯೋ॑ನಿಗ್ಂ ಶಮೀಗ॒ರ್ಭಮ್ । ಅ॒ಗ್ನಯೇ॒ ಪ್ರಜ॑ನಯಿ॒ತವೇ᳚ ॥ ಯೋ ಅ॑ಶ್ವ॒ತ್ಥ-ಶ್ಶ॑ಮೀಗ॒ರ್ಭಃ । ಆ॒ರು॒ರೋಹ॒ ತ್ವೇ ಸಚಾ᳚ । ತ-ನ್ತೇ॑ ಹರಾಮಿ॒ ಬ್ರಹ್ಮ॑ಣಾ ॥ 8 ॥

ಯ॒ಜ್ಞಿಯೈಃ᳚ ಕೇ॒ತುಭಿ॑-ಸ್ಸ॒ಹ ॥ ಯ-ನ್ತ್ವಾ॑ ಸ॒ಮಭ॑ರನ್-ಜಾತವೇದಃ । ಯ॒ಥಾ॒ ಶ॒ರೀ॒ರ-ಮ್ಭೂ॒ತೇಷು॒ ನ್ಯ॑ಕ್ತಮ್ । ಸ ಸಮ್ಭೃ॑ತ-ಸ್ಸೀದ ಶಿ॒ವಃ ಪ್ರ॒ಜಾಭ್ಯಃ॑ । ಉ॒ರು-ನ್ನೋ॑ ಲೋ॒ಕಮನು॑ನೇಷಿ ವಿ॒ದ್ವಾನ್ ॥ ಪ್ರ ವೇ॒ಧಸೇ॑ ಕ॒ವಯೇ॒ ಮೇದ್ಧ್ಯಾ॑ಯ । ವಚೋ॑ ವ॒ನ್ದಾರು॑ ವೃಷ॒ಭಾಯ॒ ವೃಷ್ಣೇ᳚ । ಯತೋ॑ ಭ॒ಯಮಭ॑ಯ॒-ನ್ತನ್ನೋ॑ ಅಸ್ತು । ಅವ॑ ದೇ॒ವಾನ್. ಯ॑ಜೇ॒ ಹೇಡ್ಯಾನ್॑ ॥ ಸ॒ಮಿಧಾ॒-ಽಗ್ನಿ-ನ್ದು॑ವಸ್ಯತ ॥ 9 ॥

ಘೃ॒ತೈ-ರ್ಬೋ॑ಧಯ॒ತಾತಿ॑ಥಿಮ್ । ಆ-ಽಸ್ಮಿ॑ನ್. ಹ॒ವ್ಯಾ ಜು॑ಹೋತನ ॥ ಉಪ॑ ತ್ವಾ-ಽಗ್ನೇ ಹ॒ವಿಷ್ಮ॑ತೀಃ । ಘೃ॒ತಾಚೀ᳚ರ್ಯನ್ತು ಹರ್ಯತ । ಜು॒ಷಸ್ವ॑ ಸ॒ಮಿಧೋ॒ ಮಮ॑ ॥ ತ-ನ್ತ್ವಾ॑ ಸ॒ಮಿದ್ಭಿ॑ರಙ್ಗಿರಃ । ಘೃ॒ತೇನ॑ ವರ್ಧಯಾಮಸಿ । ಬೃ॒ಹಚ್ಛೋ॑ಚಾ ಯವಿಷ್ಠ್ಯ ॥ ಸ॒ಮಿ॒ದ್ಧ್ಯಮಾ॑ನಃ ಪ್ರಥ॒ಮೋ ನು ಧರ್ಮಃ॑ । ಸಮ॒ಕ್ತುಭಿ॑ರಜ್ಯತೇ ವಿ॒ಶ್ವವಾ॑ರಃ ॥ 10 ॥

ಶೋ॒ಚಿಷ್ಕೇ॑ಶೋ ಘೃ॒ತನಿ॑ರ್ಣಿಕ್-ಪಾವ॒ಕಃ । ಸು॒ಯ॒ಜ್ಞೋ ಅ॒ಗ್ನಿ-ರ್ಯ॒ಜಥಾ॑ಯ ದೇ॒ವಾನ್ ॥ ಘೃ॒ತಪ್ರ॑ತೀಕೋ ಘೃ॒ತಯೋ॑ನಿರ॒ಗ್ನಿಃ । ಘೃ॒ತೈ-ಸ್ಸಮಿ॑ದ್ಧೋ ಘೃ॒ತಮ॒ಸ್ಯಾನ್ನ᳚ಮ್ । ಘೃ॒ತ॒ಪ್ರುಷ॑ಸ್ತ್ವಾ ಸ॒ರಿತೋ॑ ವಹನ್ತಿ । ಘೃ॒ತ-ಮ್ಪಿಬನ್᳚-ಥ್ಸು॒ಯಜಾ॑ ಯಖ್ಷಿ ದೇ॒ವಾನ್ ॥ ಆ॒ಯು॒ರ್ದಾ ಅ॑ಗ್ನೇ ಹ॒ವಿಷೋ॑ ಜುಷಾ॒ಣಃ । ಘೃ॒ತ ಪ್ರ॑ತೀಕೋ ಘೃ॒ತಯೋ॑ನಿರೇಧಿ । ಘೃ॒ತ-ಮ್ಪೀ॒ತ್ವಾ ಮಧು॒ಚಾರು॒ ಗವ್ಯ᳚ಮ್ । ಪಿ॒ತೇವ॑ ಪು॒ತ್ರಮ॒ಭಿ ರ॑ಖ್ಷತಾದಿ॒ಮಮ್ ॥ 11 ॥

ತ್ವಾಮ॑ಗ್ನೇ ಸಮಿಧಾ॒ನಂ-ಯಁ॑ವಿಷ್ಠ । ದೇ॒ವಾ ದೂ॒ತ-ಞ್ಚ॑ಕ್ರಿರೇ ಹವ್ಯ॒ವಾಹ᳚ಮ್ । ಉ॒ರು॒ಜ್ರಯ॑ಸ-ಙ್ಘೃ॒ತಯೋ॑ನಿ॒-ಮಾಹು॑ತಮ್ । ತ್ವೇ॒ಷ-ಞ್ಚಖ್ಷು॑ರ್ದಧಿರೇ ಚೋದ॒ಯನ್ವ॑ತಿ ॥ ತ್ವಾಮ॑ಗ್ನೇ ಪ್ರ॒ದಿವ॒ ಆಹು॑ತ-ಙ್ಘೃ॒ತೇನ॑ । ಸು॒ಮ್ನಾ॒ಯವ॑-ಸ್ಸುಷ॒ಮಿಧಾ॒ ಸಮೀ॑ಧಿರೇ । ಸ ವಾ॑ವೃಧಾ॒ನ ಓಷ॑ಧೀಭಿರುಖ್ಷಿ॒ತಃ । ಉ॒ರುಜ್ರಯಾಗ್ಂ॑ಸಿ॒ ಪಾರ್ಥಿ॑ವಾ॒ ವಿತಿ॑ಷ್ಠಸೇ ॥ ಘೃ॒ತ ಪ್ರ॑ತೀಕಂ-ವಁ ಋ॒ತಸ್ಯ॑ ಧೂ॒ರ್॒ಷದಂ᳚ (ಧೂರ್॒ಷದಂ᳚) । ಅ॒ಗ್ನಿ-ಮ್ಮಿ॒ತ್ರನ್ನ ಸ॑ಮಿಧಾ॒ನ ಋ॑ಞ್ಜತೇ ॥ 12 ॥

ಇನ್ಧಾ॑ನೋ ಅ॒ಕ್ರೋ ವಿ॒ದಥೇ॑ಷು॒ ದೀದ್ಯ॑ತ್ । ಶು॒ಕ್ರವ॑ರ್ಣಾ॒ಮುದು॑ ನೋ ಯಗ್ಂಸತೇ॒ ಧಿಯ᳚ಮ್ ॥ ಪ್ರ॒ಜಾ ಅ॑ಗ್ನೇ॒ ಸಂ​ವಾಁ॑ಸಯ । ಆಶಾ᳚ಶ್ಚ ಪ॒ಶುಭಿ॑-ಸ್ಸ॒ಹ । ರಾ॒ಷ್ಟ್ರಾಣ್ಯ॑ಸ್ಮಾ॒ ಆಧೇ॑ಹಿ । ಯಾನ್ಯಾಸ᳚ನ್-ಥ್ಸವಿ॒ತು-ಸ್ಸ॒ವೇ ॥ ಮ॒ಹೀ ವಿ॒ಶ್ಪತ್ನೀ॒ ಸದ॑ನೇ ಋ॒ತಸ್ಯ॑ । ಅ॒ರ್ವಾಚೀ॒ ಏತ॑-ನ್ಧರುಣೇ ರಯೀ॒ಣಾಮ್ । ಅ॒ನ್ತರ್ವ॑ತ್ನೀ॒ ಜನ್ಯ॑-ಞ್ಜಾ॒ತವೇ॑ದಸಮ್ । ಅ॒ದ್ಧ್ವ॒ರಾಣಾ᳚-ಞ್ಜನಯಥಃ ಪುರೋ॒ಗಾಮ್ ॥ 13 ॥

ಆರೋ॑ಹತ-ನ್ದ॒ಶತ॒ಗ್ಂ॒ ಶಕ್ವ॑ರೀ॒-ರ್ಮಮ॑ । ಋ॒ತೇನಾ᳚ಗ್ನ॒ ಆಯು॑ಷಾ॒ ವರ್ಚ॑ಸಾ ಸ॒ಹ । ಜ್ಯೋಗ್ ಜೀವ॑ನ್ತ॒ ಉತ್ತ॑ರಾಮುತ್ತರಾ॒ಗ್ಂ॒ ಸಮಾ᳚ಮ್ । ದರ್​ಶ॑ಮ॒ಹ-ಮ್ಪೂ॒ರ್ಣಮಾ॑ಸಂ-ಯಁ॒ಜ್ಞಂ-ಯಁಥಾ॒ ಯಜೈ᳚ ॥ ಋತ್ವಿ॑ಯವತೀ ಸ್ಥೋ ಅ॒ಗ್ನಿರೇ॑ತಸೌ । ಗರ್ಭ॑-ನ್ದಧಾಥಾ॒-ನ್ತೇ ವಾ॑ಮ॒ಹ-ನ್ದ॑ದೇ । ತ-ಥ್ಸ॒ತ್ಯಂ-ಯಁ-ದ್ವೀ॒ರ-ಮ್ಬಿ॑ಭೃಥಃ । ವೀ॒ರ-ಞ್ಜ॑ನಯಿ॒ಷ್ಯಥಃ॑ । ತೇ ಮ-ತ್ಪ್ರಾ॒ತಃ ಪ್ರಜ॑ನಿಷ್ಯೇಥೇ । ತೇ ಮಾ॒ ಪ್ರಜಾ॑ತೇ॒ ಪ್ರಜ॑ನಯಿ॒ಷ್ಯಥಃ॑ ॥ 14 ॥

ಪ್ರ॒ಜಯಾ॑ ಪ॒ಶುಭಿ॑-ರ್ಬ್ರಹ್ಮವರ್ಚ॒ಸೇನ॑ ಸುವ॒ರ್ಗೇ ಲೋ॒ಕೇ ॥ ಅನೃ॑ತಾ-ಥ್ಸ॒ತ್ಯಮುಪೈ॑ಮಿ । ಮಾ॒ನು॒ಷಾ-ದ್ದೈವ್ಯ॒-ಮುಪೈ॑ಮಿ । ದೈವೀಂ॒-ವಾಁಚಂ॑-ಯಁಚ್ಛಾಮಿ ॥ ಶಲ್ಕೈ॑ರ॒ಗ್ನಿಮಿ॑ನ್ಧಾ॒ನಃ । ಉ॒ಭೌ ಲೋ॒ಕೌ ಸ॑ನೇಮ॒ಹಮ್ । ಉ॒ಭಯೋ᳚-ರ್ಲೋ॒ಕಯೋರ್॑. ಋ॒ದ್ಧ್ವಾ । ಅತಿ॑ ಮೃ॒ತ್ಯು-ನ್ತ॑ರಾಮ್ಯ॒ಹಮ್ ॥ ಜಾತ॑ವೇದೋ॒ ಭುವ॑ನಸ್ಯ॒ ರೇತಃ॑ । ಇ॒ಹ ಸಿ॑ಞ್ಚ॒ ತಪ॑ಸೋ॒ ಯಜ್ಜ॑ನಿ॒ಷ್ಯತೇ᳚ ॥ 15 ॥

ಅ॒ಗ್ನಿಮ॑ಶ್ವ॒ತ್ಥಾದಧಿ॑ ಹವ್ಯ॒ವಾಹ᳚ಮ್ । ಶ॒ಮೀ॒ಗ॒ರ್ಭಾ-ಜ್ಜ॒ನಯ॒ನ॒.ಯೋ ಮ॑ಯೋ॒ ಭೂಃ ॥ ಅ॒ಯ-ನ್ತೇ॒ ಯೋನಿ॑ರ್-ಋ॒ತ್ವಿಯಃ॑ । ಯತೋ॑ ಜಾ॒ತೋ ಅರೋ॑ಚಥಾಃ । ತ-ಞ್ಜಾ॒ನನ್ನ॑ಗ್ನ॒ ಆರೋ॑ಹ । ಅಥಾ॑ ನೋ ವರ್ಧಯಾ ರ॒ಯಿಮ್ ॥ ಅಪೇ॑ತ॒ ವೀತ॒ ವಿ ಚ॑ ಸರ್ಪ॒ತಾತಃ॑ । ಯೇ-ಽತ್ರ॒ ಸ್ಥ ಪು॑ರಾ॒ಣಾ ಯೇ ಚ॒ ನೂತ॑ನಾಃ । ಅದಾ॑ದಿ॒ದಂ-ಯಁ॒ಮೋ॑-ಽವ॒ಸಾನ॑-ಮ್ಪೃಥಿ॒ವ್ಯಾಃ । ಅಕ್ರ॑ನ್ನಿ॒ಮ-ಮ್ಪಿ॒ತರೋ॑ ಲೋ॒ಕಮ॑ಸ್ಮೈ ॥ 16 ॥

ಅ॒ಗ್ನೇರ್ಭಸ್ಮಾ᳚ಸ್ಯ॒ಗ್ನೇಃ ಪುರೀ॑ಷಮಸಿ ॥ ಸ॒ಜ್ಞಾನ್ನ॑ಮಸಿ ಕಾಮ॒ಧರ॑ಣಮ್ । ಮಯಿ॑ ತೇ ಕಾಮ॒ಧರ॑ಣ-ಮ್ಭೂಯಾತ್ ॥ ಸಂ-ವಁ॑-ಸ್ಸೃಜಾಮಿ॒ ಹೃದ॑ಯಾನಿ । ಸಗ್ಂ ಸೃ॑ಷ್ಟ॒-ಮ್ಮನೋ॑ ಅಸ್ತು ವಃ । ಸಗ್ಂ ಸೃ॑ಷ್ಟಃ ಪ್ರಾ॒ಣೋ ಅ॑ಸ್ತು ವಃ ॥ ಸಂ-ಯಾಁ ವಃ॑ ಪ್ರಿ॒ಯಾಸ್ತ॒ನುವಃ॑ । ಸಮ್ಪ್ರಿ॒ಯಾ ಹೃದ॑ಯಾನಿ ವಃ । ಆ॒ತ್ಮಾ ವೋ॑ ಅಸ್ತು॒ ಸಮ್ಪ್ರಿ॑ಯಃ । ಸಮ್ಪ್ರಿ॑ಯಾ-ಸ್ತ॒ನುವೋ॒ ಮಮ॑ ॥ 17 ॥

ಕಲ್ಪೇ॑ತಾ॒-ನ್ದ್ಯಾವಾ॑ಪೃಥಿ॒ವೀ । ಕಲ್ಪ॑ನ್ತಾ॒ಮಾಪ॒ ಓಷ॑ಧೀಃ । ಕಲ್ಪ॑ನ್ತಾಮ॒ಗ್ನಯಃ॒ ಪೃಥ॑ಕ್ । ಮಮ॒ ಜ್ಯೈಷ್ಠ್ಯಾ॑ಯ॒ ಸವ್ರ॑ತಾಃ ॥ ಯೇ᳚-ಽಗ್ನಯ॒-ಸ್ಸಮ॑ನಸಃ । ಅ॒ನ್ತ॒ರಾ ದ್ಯಾವಾ॑ಪೃಥಿ॒ವೀ । ವಾಸ॑ನ್ತಿಕಾವೃ॒ತೂ ಅ॒ಭಿ ಕಲ್ಪ॑ಮಾನಾಃ । ಇನ್ದ್ರ॑ಮಿವ ದೇ॒ವಾ ಅ॒ಭಿ ಸಂ​ವಿಁ॑ಶನ್ತು ॥ ದಿ॒ವಸ್ತ್ವಾ॑ ವೀ॒ರ್ಯೇ॑ಣ । ಪೃ॒ಥಿ॒ವ್ಯೈ-ಮ॑ಹಿ॒ಮ್ನಾ ॥ 18 ॥

ಅ॒ನ್ತರಿ॑ಖ್ಷಸ್ಯ॒ ಪೋಷೇ॑ಣ । ಸ॒ರ್ವಪ॑ಶು॒-ಮಾದ॑ಧೇ ॥ ಅಜೀ॑ಜನ-ನ್ನ॒ಮೃತ॒-ಮ್ಮರ್ತ್ಯಾ॑ಸಃ । ಅ॒ಸ್ರೇ॒ಮಾಣ॑-ನ್ತ॒ರಣಿಂ॑-ವೀಁ॒ಡುಜ॑ಮ್ಭಮ್ । ದಶ॒ ಸ್ವಸಾ॑ರೋ ಅ॒ಗ್ರುವ॑-ಸ್ಸಮೀ॒ಚೀಃ । ಪುಮಾಗ್ಂ॑ಸ-ಞ್ಜಾ॒ತಮ॒ಭಿ ಸಗ್ಂರ॑ಭನ್ತಾಮ್ ॥ ಪ್ರ॒ಜಾಪ॑ತೇಸ್ತ್ವಾ ಪ್ರಾ॒ಣೇನಾಭಿ॒ ಪ್ರಾಣಿ॑ಮಿ । ಪೂ॒ಷ್ಣಃ ಪೋಷೇ॑ಣ॒ ಮಹ್ಯ᳚ಮ್ । ದೀ॒ರ್ಘಾ॒ಯು॒ತ್ವಾಯ॑ ಶ॒ತಶಾ॑ರದಾಯ । ಶ॒ತಗ್ಂ ಶ॒ರದ್ಭ್ಯ॒ ಆಯು॑ಷೇ॒ ವರ್ಚ॑ಸೇ ॥ 19 ॥

ಜೀ॒ವಾತ್ವೈ ಪುಣ್ಯಾ॑ಯ ॥ ಅ॒ಹ-ನ್ತ್ವದ॑ಸ್ಮಿ॒ ಮದ॑ಸಿ॒ ತ್ವಮೇ॒ತತ್ । ಮಮಾ॑ಸಿ॒ ಯೋನಿ॒ಸ್ತವ॒ ಯೋನಿ॑ರಸ್ಮಿ । ಮಮೈ॒ವ ಸನ್ವಹ॑ ಹ॒ವ್ಯಾನ್ಯ॑ಗ್ನೇ । ಪು॒ತ್ರಃ ಪಿ॒ತ್ರೇ ಲೋ॑ಕ॒ಕೃ-ಜ್ಜಾ॑ತವೇದಃ ॥ ಪ್ರಾ॒ಣೇ ತ್ವಾ॒ ಽಮೃತ॒ಮಾದ॑ಧಾಮಿ । ಅ॒ನ್ನಾ॒ದಮ॒ನ್ನಾದ್ಯಾ॑ಯ । ಗೋ॒ಪ್ತಾರ॒-ಙ್ಗುಪ್ತ್ಯೈ᳚ ॥ ಸು॒ಗಾ॒ರ್॒ಹ॒ಪ॒ತ್ಯೋ ವಿ॒ದಹ॒ನ್ನರಾ॑ತೀಃ । ಉ॒ಷಸ॒-ಶ್ಶ್ರೇಯ॑ಸೀ-ಶ್ಶ್ರೇಯಸೀ॒-ರ್ದಧ॑ತ್ ॥ 20 ॥

ಅಗ್ನೇ॑ ಸ॒ಪತ್ನಾಗ್ಂ॑ ಅಪ॒ ಬಾಧ॑ಮಾನಃ । ರಾ॒ಯಸ್ಪೋಷ॒-ಮಿಷ॒ಮೂರ್ಜ॑-ಮ॒ಸ್ಮಾಸು॑ ಧೇಹಿ ॥ ಇ॒ಮಾ ಉ॒ ಮಾಮುಪ॑ತಿಷ್ಠನ್ತು॒ ರಾಯಃ॑ । ಆ॒ಭಿಃ ಪ್ರ॒ಜಾಭಿ॑ರಿ॒ಹ ಸಂ-ವಁ॑ಸೇಯ । ಇ॒ಹೋ ಇಡಾ॑ ತಿಷ್ಠತು ವಿಶ್ವರೂ॒ಪೀ । ಮದ್ಧ್ಯೇ॒ ವಸೋ᳚-ರ್ದೀದಿಹಿ ಜಾತವೇದಃ ॥ ಓಜ॑ಸೇ॒ ಬಲಾ॑ಯ॒ ತ್ವೋದ್ಯ॑ಚ್ಛೇ । ವೃಷ॑ಣೇ॒ ಶುಷ್ಮಾ॒ಯಾಯು॑ಷೇ॒ ವರ್ಚ॑ಸೇ । ಸ॒ಪ॒ತ್ನ॒ತೂರ॑ಸಿ ವೃತ್ರ॒ತೂಃ । ಯಸ್ತೇ॑ ದೇ॒ವೇಷು॑ ಮಹಿ॒ಮಾ ಸು॑ವ॒ರ್ಗಃ ॥ 21 ॥

ಯಸ್ತ॑ ಆ॒ತ್ಮಾ ಪ॒ಶುಷು॒ ಪ್ರವಿ॑ಷ್ಟಃ । ಪುಷ್ಟಿ॒ರ್ಯಾ ತೇ॑ ಮನು॒ಷ್ಯೇ॑ಷು ಪಪ್ರ॒ಥೇ । ತಯಾ॑ ನೋ ಅಗ್ನೇ ಜು॒ಷಮಾ॑ಣ॒ ಏಹಿ॑ ॥ ದಿ॒ವಃ ಪೃ॑ಥಿ॒ವ್ಯಾಃ ಪರ್ಯ॒ನ್ತರಿ॑ಖ್ಷಾತ್ । ವಾತಾ᳚-ತ್ಪ॒ಶುಭ್ಯೋ॒ ಅದ್ಧ್ಯೋಷ॑ಧೀಭ್ಯಃ । ಯತ್ರ॑ಯತ್ರ ಜಾತವೇದ-ಸ್ಸ-ಮ್ಬ॒ಭೂಥ॑ । ತತೋ॑ ನೋ ಅಗ್ನೇ ಜು॒ಷಮಾ॑ಣ॒ ಏಹಿ॑ ॥ ಪ್ರಾಚೀ॒ಮನು॑ ಪ್ರ॒ದಿಶ॒-ಮ್ಪ್ರೇಹಿ॑ ವಿ॒ದ್ವಾನ್ । ಅ॒ಗ್ನೇರ॑ಗ್ನೇ ಪು॒ರೋ ಅ॑ಗ್ನಿ-ರ್ಭವೇ॒ಹ । ವಿಶ್ವಾ॒ ಆಶಾ॒ ದೀದ್ಯಾ॑ನೋ॒ ವಿ ಭಾ॑ಹಿ ॥ 22 ॥

ಊರ್ಜ॑-ನ್ನೋ ಧೇಹಿ ದ್ವಿ॒ಪದೇ॒ ಚತು॑ಷ್ಪದೇ ॥ ಅನ್ವ॒ಗ್ನಿರು॒ಷಸಾ॒-ಮಗ್ರ॑-ಮಖ್ಯತ್ । ಅನ್ವಹಾ॑ನಿ ಪ್ರಥ॒ಮೋ ಜಾ॒ತವೇ॑ದಾಃ । ಅನು॒ ಸೂರ್ಯ॑ಸ್ಯ ಪುರು॒ತ್ರಾ ಚ॑ ರ॒ಶ್ಮೀನ್ । ಅನು॒ ದ್ಯಾವಾ॑ಪೃಥಿ॒ವೀ ಆತ॑ತಾನ ॥ ವಿಕ್ರ॑ಮಸ್ವ ಮ॒ಹಾಗ್ಂ ಅ॑ಸಿ । ವೇ॒ದಿ॒ಷ-ನ್ಮಾನು॑ಷೇಭ್ಯಃ । ತ್ರಿ॒ಷು ಲೋ॒ಕೇಷು॑ ಜಾಗೃಹಿ ॥ ಯದಿ॒ದ-ನ್ದಿ॒ವೋ ಯದ॒ದಃ ಪೃ॑ಥಿ॒ವ್ಯಾಃ । ಸಂ॒-ವಿಁ॒ದಾ॒ನೇ ರೋದ॑ಸೀ ಸ-ಮ್ಬಭೂ॒ವತುಃ॑ ॥ 23 ॥

ತಯೋಃ᳚ ಪೃ॒ಷ್ಠೇ ಸೀ॑ದತು ಜಾ॒ತವೇ॑ದಾಃ । ಶ॒ಭೂಂಃ ಪ್ರ॒ಜಾಭ್ಯ॑-ಸ್ತ॒ನುವೇ᳚ ಸ್ಯೋ॒ನಃ ॥ ಪ್ರಾ॒ಣ-ನ್ತ್ವಾ॒-ಽಮೃತ॒ ಆದ॑ಧಾಮಿ । ಅ॒ನ್ನಾ॒ದಮ॒ನ್ನಾದ್ಯಾ॑ಯ । ಗೋ॒ಪ್ತಾರ॒-ಙ್ಗುಪ್ತ್ಯೈ᳚ । ಯತ್ತೇ॑ ಶುಕ್ರ ಶು॒ಕ್ರಂ-ವಁರ್ಚ॑-ಶ್ಶು॒ಕ್ರಾ ತ॒ನೂಃ । ಶು॒ಕ್ರ-ಞ್ಜ್ಯೋತಿ॒-ರಜ॑ಸ್ರಮ್ । ತೇನ॑ ಮೇ ದೀದಿಹಿ॒ ತೇನ॒ ತ್ವಾ-ಽಽದ॑ಧೇ । ಅ॒ಗ್ನಿನಾ᳚-ಽಽಗ್ನೇ॒ ಬ್ರಹ್ಮ॑ಣಾ । ಆ॒ನ॒ಶೇ ವ್ಯಾ॑ನಶೇ॒ ಸರ್ವ॒ಮಾಯು॒-ರ್ವ್ಯಾ॑ನಶೇ ॥ 24 ॥

ನರ್ಯ॑ ಪ್ರ॒ಜಾ-ಮ್ಮೇ॑ ಗೋಪಾಯ । ಅ॒ಮೃ॒ತ॒ತ್ವಾಯ॑ ಜೀ॒ವಸೇ᳚ । ಜಾ॒ತಾ-ಞ್ಜ॑ನಿ॒ಷ್ಯಮಾ॑ಣಾ-ಞ್ಚ । ಅ॒ಮೃತೇ॑ ಸ॒ತ್ಯೇ ಪ್ರತಿ॑ಷ್ಠಿತಾಮ್ ॥ ಅಥ॑ರ್ವ ಪಿ॒ತು-ಮ್ಮೇ॑ ಗೋಪಾಯ । ರಸ॒ಮನ್ನ॑ಮಿ॒ಹಾಯು॑ಷೇ । ಅದ॑ಬ್ಧಾ॒ಯೋ-ಽಶೀ॑ತತನೋ । ಅವಿ॑ಷ-ನ್ನಃ ಪಿ॒ತು-ಙ್ಕೃ॑ಣು ॥ ಶಗ್ಗ್​ಸ್ಯ॑ ಪ॒ಶೂ-ನ್ಮೇ॑ ಗೋಪಾಯ । ದ್ವಿ॒ಪಾದೋ॒ ಯೇ ಚತು॑ಷ್ಪದಃ ॥ 25 ॥

ಅ॒ಷ್ಟಾಶ॑ಫಾಶ್ಚ॒ ಯ ಇ॒ಹಾಗ್ನೇ᳚ । ಯೇ ಚೈಕ॑ಶಫಾ ಆಶು॒ಗಾಃ ॥ ಸಪ್ರ॑ಥ ಸ॒ಭಾ-ಮ್ಮೇ॑ ಗೋಪಾಯ । ಯೇ ಚ॒ ಸಭ್ಯಾ᳚-ಸ್ಸಭಾ॒ಸದಃ॑ । ತಾನಿ॑ನ್ದ್ರಿ॒ಯಾವ॑ತಃ ಕುರು । ಸರ್ವ॒ಮಾಯು॒-ರುಪಾ॑ಸತಾಮ್ ॥ ಅಹೇ॑ಬುದ್ಧ್ನಿಯ॒ ಮನ್ತ್ರ॑-ಮ್ಮೇ ಗೋಪಾಯ । ಯಮೃಷ॑ಯಸ್ತ್ರೈವಿ॒ದಾ ವಿ॒ದುಃ । ಋಚ॒-ಸ್ಸಾಮಾ॑ನಿ॒ ಯಜೂಗ್ಂ॑ಷಿ । ಸಾ ಹಿ ಶ್ರೀರ॒ಮೃತಾ॑ ಸ॒ತಾಮ್ ॥ 26 ॥

ಚತು॑-ಶ್ಶಿಖಣ್ಡಾ ಯುವ॒ತಿ-ಸ್ಸು॒ಪೇಶಾಃ᳚ । ಘೃ॒ತಪ್ರ॑ತೀಕಾ॒ ಭುವ॑ನಸ್ಯ॒ ಮದ್ಧ್ಯೇ᳚ । ಮ॒ರ್ಮೃ॒ಜ್ಯಮಾ॑ನಾ ಮಹ॒ತೇ ಸೌಭ॑ಗಾಯ । ಮಹ್ಯ॑-ನ್ಧುಖ್ಷ್ವ॒ ಯಜ॑ಮಾನಾಯ॒ ಕಾಮಾನ್॑ ॥ ಇ॒ಹೈವ ಸನ್ತತ್ರ॑ ಸ॒ತೋ ವೋ॑ ಅಗ್ನಯಃ । ಪ್ರಾ॒ಣೇನ॑ ವಾ॒ಚಾ ಮನ॑ಸಾ ಬಿಭರ್ಮಿ । ತಿ॒ರೋ ಮಾ॒ ಸನ್ತ॒ಮಾಯು॒ರ್ಮಾ ಪ್ರಹಾ॑ಸೀತ್ । ಜ್ಯೋತಿ॑ಷಾ ವೋ ವೈಶ್ವಾನ॒ರೇ-ಣೋಪ॑ತಿಷ್ಠೇ ॥ ಪ॒ಞ್ಚ॒ಧಾ-ಽಗ್ನೀನ್-ವ್ಯ॑ಕ್ರಾಮತ್ । ವಿ॒ರಾಟ್-ಥ್ಸೃ॒ಷ್ಟಾ ಪ್ರ॒ಜಾಪ॑ತೇಃ । ಊ॒ರ್ಧ್ವಾ-ಽಽರೋ॑ಹ-ದ್ರೋಹಿ॒ಣೀ । ಯೋನಿ॑ರ॒ಗ್ನೇಃ ಪ್ರತಿ॑ಷ್ಠಿತಿಃ ॥ 27 ॥
(ವಿ॒ಶ॒ನ್ತು॒ ನಃ॒ - ಪು॒ರು॒ಚೀ--ರ್ ವಿ॑ಧೇಮ - ನಿ॒ಧಾಯ॒ - ಯ-ತ್ತೇ - ಽಪ್ರ॑ದಾಹಾಯ - ಬೃಹ॒ತ್ಯೋ᳚ - ಬ್ರಹ್ಮ॑ಣಾ - ದುವಸ್ಯತ - ವಿ॒ಶ್ವವಾ॑ರ - ಇ॒ಮ - ಮೃ॑ಞ್ಜತೇ - ಪುರೋ॒ಗಾಂ - ಪ್ರಜ॑ನಯಿ॒ಷ್ಯಥೋ॑ - ಜನಿ॒ಷ್ಯತೇ᳚-ಽ - ಸ್ಮೈ॒ - ಮಮ॑ - ಮಹಿ॒ಮ್ನಾ - ವರ್ಚ॑ಸೇ॒ - ದಧ॑ಥ್ - ಸುವ॒ರ್ಗಾ - ಭಾ॑ಹಿ - ಸಮ್ಬಭೂ॒ವತು॒ - ರಾಯು॒-ರ್ವ್ಯಾ॑ನಶೇ॒ - ಚತು॑ಷ್ಪದಃ - ಸ॒ತಾಂ - ಪ್ರ॒ಜಾಪ॑ತೇ॒-ರ್ದ್ವೇ ಚ॑) (ಅ. 1)

ಅನುವಾಕಂ 2 - ವಿಷೂವನ್ನಾಮಕ-ಮ್ಮುಖ್ಯಮಹ, ತದುಭಯಪಾರ್​ಶ್ವವರ್ತೀನಿ ಚತ್ವಾರ್ಯಹಾನಿ ಚೋಚ್ಯನ್ತೇ
ನವೈ॒ತಾನ್ಯಹಾ॑ನಿ ಭವನ್ತಿ । ನವ॒ ವೈ ಸು॑ವ॒ರ್ಗಾ ಲೋ॒ಕಾಃ । ಯದೇ॒ತಾನ್ಯಹಾ᳚-ನ್ಯುಪ॒ಯನ್ತಿ॑ । ನ॒ವಸ್ವೇ॒ವ ತ-ಥ್ಸು॑ವ॒ರ್ಗೇಷು॑ ಲೋ॒ಕೇಷು॑ ಸ॒ತ್ರಿಣಃ॑ ಪ್ರತಿ॒ತಿಷ್ಠ॑ನ್ತೋ ಯನ್ತಿ ॥ ಅ॒ಗ್ನಿ॒ಷ್ಟೋ॒ಮಾಃ ಪರ॑-ಸ್ಸಾಮಾನಃ ಕಾ॒ರ್ಯಾ॑ ಇತ್ಯಾ॑ಹುಃ । ಅ॒ಗ್ನಿ॒ಷ್ಟೋ॒ಮಸ॑ಮಿನ್ತ-ಸ್ಸುವ॒ರ್ಗೋ ಲೋ॒ಕ ಇತಿ॑ । ದ್ವಾದ॑ಶಾ-ಗ್ನಿಷ್ಟೋ॒ಮಸ್ಯ॑ ಸ್ತೋ॒ತ್ರಾಣಿ॑ । ದ್ವಾದ॑ಶ॒ ಮಾಸಾ᳚-ಸ್ಸಂ​ವಁಥ್ಸ॒ರಃ ॥ ತ-ತ್ತನ್ನ ಸೂರ್ಖ್ಷ್ಯ᳚ಮ್ । ಉ॒ಕ್ಥ್ಯಾ॑ ಏ॒ವ ಸ॑ಪ್ತದ॒ಶಾಃ ಪರ॑-ಸ್ಸಾಮಾನಃ ಕಾ॒ರ್ಯಾಃ᳚ ॥ 28 ॥

ಪ॒ಶವೋ॒ ವಾ ಉ॒ಕ್ಥಾನಿ॑ । ಪ॒ಶೂ॒ನಾಮವ॑-ರುದ್ಧ್ಯೈ ॥ ವಿ॒ಶ್ವ॒ಜಿ॒ದ॒ಭಿ॒ಜಿತಾ॑-ವಗ್ನಿಷ್ಟೋ॒ಮೌ ॥ ಉ॒ಕ್ಥ್ಯಾ᳚-ಸ್ಸಪ್ತದ॒ಶಾಃ ಪರ॑-ಸ್ಸಾಮಾನಃ । ತೇ ಸಗ್ಗ್​ಸ್ತು॑ತಾ ವಿ॒ರಾಜ॑ಮ॒ಭಿ ಸಮ್ಪ॑ದ್ಯನ್ತೇ । ದ್ವೇ ಚರ್ಚಾ॒ವತಿ॑ ರಿಚ್ಯೇತೇ । ಏಕ॑ಯಾ॒ ಗೌರತಿ॑ರಿಕ್ತಃ । ಏಕ॒ಯಾ-ಽಽಯು॑ರೂ॒ನಃ । ಸು॒ವ॒ರ್ಗೋ ವೈ ಲೋ॒ಕೋ ಜ್ಯೋತಿಃ॑ । ಊರ್ಗ್ ವಿ॒ರಾಟ್ ॥ 29 ॥

ಸು॒ವ॒ರ್ಗಮೇ॒ವ ತೇನ॑ ಲೋ॒ಕಮ॒ಭಿ ಜ॑ಯನ್ತಿ ॥ ಯ-ತ್ಪರ॒ಗ್ಂ॒ ರಾಥ॑ನ್ತರಮ್ । ತ-ತ್ಪ್ರ॑ಥ॒ಮೇ-ಽಹ॑ನ್-ಕಾ॒ರ್ಯ᳚ಮ್ । ಬೃ॒ಹ-ದ್ದ್ವಿ॒ತೀಯೇ᳚ । ವೈ॒ರೂ॒ಪ-ನ್ತೃ॒ತೀಯೇ᳚ । ವೈ॒ರಾ॒ಜ-ಞ್ಚ॑ತು॒ರ್ಥೇ । ಶಾ॒ಕ್ವ॒ರ-ಮ್ಪ॑ಞ್ಚ॒ಮೇ । ರೈ॒ವ॒ತಗ್ಂ ಷ॒ಷ್ಠೇ । ತದು॑ ಪೃ॒ಷ್ಠೇಭ್ಯೋ॒ ನಯ॑ನ್ತಿ ॥ ಸ॒ತನ್ನ॑ಯ ಏ॒ತೇ ಗ್ರಹಾ॑ ಗೃಹ್ಯನ್ತೇ ॥ 30 ॥

ಅ॒ತಿ॒ಗ್ರಾ॒ಹ್ಯಾಃ᳚ ಪರ॑-ಸ್ಸಾಮಸು । ಇ॒ಮಾನೇ॒ವೈತೈ-ರ್ಲೋ॒ಕಾನ್-ಥ್ಸನ್ತ॑ನ್ವನ್ತಿ ॥ ಮಿ॒ಥು॒ನಾ ಏ॒ತೇ ಗ್ರಹಾ॑ ಗೃಹ್ಯನ್ತೇ । ಅ॒ತಿ॒ಗ್ರಾ॒ಹ್ಯಾಃ᳚ ಪರ॑-ಸ್ಸಾಮಸು । ಮಿ॒ಥು॒ನಮೇ॒ವ ತೈ-ರ್ಯಜ॑ಮಾನಾ॒ ಅವ॑ರುನ್ಧತೇ ॥ ಬೃ॒ಹ-ತ್ಪೃ॒ಷ್ಠ-ಮ್ಭ॑ವತಿ । ಬೃ॒ಹ-ದ್ವೈ ಸು॑ವ॒ರ್ಗೋ ಲೋ॒ಕಃ । ಬೃ॒ಹ॒ತೈವ ಸು॑ವ॒ರ್ಗಂ-ಲೋಁ॒ಕಂ-ಯಁ॑ನ್ತಿ ॥ ತ್ರ॒ಯ॒ಸ್ತ್ರಿ॒ಗ್ಂ॒ಶಿ ನಾಮ॒ ಸಾಮ॑ । ಮಾದ್ಧ್ಯ॑ನ್ದಿನೇ॒ ಪವ॑ಮಾನೇ ಭವತಿ ॥ 31 ॥

ತ್ರಯ॑ಸ್ತ್ರಿಗ್ಂಶ॒ದ್ವೈ ದೇ॒ವತಾಃ᳚ । ದೇ॒ವತಾ॑ ಏ॒ವಾವ॑ರುನ್ಧತೇ ॥ ಯೇ ವಾ ಇ॒ತಃ ಪರಾ᳚ಞ್ಚಗ್ಂ ಸಂ​ವಁಥ್ಸ॒ರ-ಮು॑ಪ॒ ಯನ್ತಿ॑ । ನ ಹೈ॑ನ॒-ನ್ತೇ ಸ್ವ॒ಸ್ತಿ ಸಮ॑ಶ್ಞುವತೇ । ಅಥ॒ ಯೇ॑-ಽಮುತೋ॒-ಽರ್ವಾಞ್ಚ॑ಮುಪ॒ ಯನ್ತಿ॑ । ತೇ ಹೈ॑ನಗ್ಗ್​ ಸ್ವ॒ಸ್ತಿ ಸಮ॑ಶ್ಞುವತೇ । ಏ॒ತದ್ವಾ ಅ॒ಮುತೋ॒-ಽರ್ವಾಞ್ಚ॒ಮುಪ॑ ಯನ್ತಿ । ಯದೇ॒ವಮ್ । ಯೋ ಹ॒ ಖಲು॒ ವಾವ ಪ್ರ॒ಜಾಪ॑ತಿಃ । ಸ ಉ॑ ವೇ॒ವೇನ್ದ್ರಃ॑ । ತದು॑ ದೇ॒ವೇಭ್ಯೋ॒ ನಯ॑ನ್ತಿ ॥ 32 ॥
(ಕಾ॒ರ್ಯಾ॑-ವಿ॒ರಾಡ್ - ಗೃ॑ಹ್ಯನ್ತೇ॒ - ಪವ॑ಮಾನೇ ಭವ॒ತೀ - ನ್ದ್ರ॒ ಏಕಂ॑ ಚ) (ಅ. 2)

ಅನುವಾಕಂ 3 - ವಿಷುವದ್ದಿನೇ-ಽತಿಗ್ರಾಹ್ಯವಿಶೇಷಾಃ
ಸನ್ತ॑ತಿ॒ರ್ವಾ ಏ॒ತೇ ಗ್ರಹಾಃ᳚ । ಯ-ತ್ಪರ॑-ಸ್ಸಾಮಾನಃ । ವಿ॒ಷೂ॒ವಾನ್-ದಿ॑ವಾಕೀ॒ರ್ತ್ಯ᳚ಮ್ । ಯಥಾ॒ ಶಾಲಾ॑ಯೈ॒ ಪಖ್ಷ॑ಸೀ । ಏ॒ವಗ್ಂ ಸಂ॑​ವಁಥ್ಸ॒ರಸ್ಯ॒ ಪಖ್ಷ॑ಸೀ । ಯದೇ॒ತೇನ ಗೃ॒ಹ್ಯೇರನ್ನ್॑ । ವಿಷೂ॑ಚೀ ಸಂ​ವಁಥ್ಸ॒ರಸ್ಯ॒ ಪಖ್ಷ॑ಸೀ॒ ವ್ಯವ॑ಸ್ರಗ್ಂ ಸೇಯಾತಾಮ್ । ಆರ್ತಿ॒ಮಾರ್ಚ್ಛೇ॑ಯುಃ । ಯದೇ॒ತೇ ಗೃ॒ಹ್ಯನ್ತೇ᳚ । ಯಥಾ॒ ಶಾಲಾ॑ಯೈ॒ ಪಖ್ಷ॑ಸೀ ಮದ್ಧ್ಯ॒ಮಂ​ವಁ॒ಗ್ಂ॒ಶಮ॒ಭಿ ಸ॑ಮಾ॒ಯಚ್ಛ॑ತಿ ॥ 33 ॥

ಏ॒ವಗ್ಂ ಸಂ॑​ವಁಥ್ಸ॒ರಸ್ಯ॒ ಪಖ್ಷ॑ಸೀ ದಿವಾಕೀ॒ರ್ತ್ಯ॑ಮ॒ಭಿ ಸನ್ತ॑ನ್ವನ್ತಿ । ನಾರ್ತಿ॒ಮಾರ್ಚ್ಛ॑ನ್ತಿ ॥ ಏ॒ಕ॒ವಿ॒ಗ್ಂ॒ಶ-ಮಹ॑ರ್ಭವತಿ । ಶು॒ಕ್ರಾಗ್ರಾ॒ ಗ್ರಹಾ॑ ಗೃಹ್ಯನ್ತೇ । ಪ್ರತ್ಯುತ್ತ॑ಬ್ಧ್ಯೈ ಸಯ॒ತ್ವಾಯ॑ ॥ ಸೌ॒ರ್ಯ॑ ಏ॒ತದಹಃ॑ ಪ॒ಶುರಾಲ॑ಭ್ಯತೇ । ಸೌ॒ರ್ಯೋ॑-ಽತಿಗ್ರಾ॒ಹ್ಯೋ॑ ಗೃಹ್ಯತೇ । ಅಹ॑ರೇ॒ವ ರೂ॒ಪೇಣ॒ ಸಮ॑ರ್ಧಯನ್ತಿ । ಅಥೋ॒ ಅಹ್ನ॑ ಏ॒ವೈಷ ಬ॒ಲಿರ್-ಹ್ರಿ॑ಯತೇ ॥ ಸ॒ಪ್ತೈ-ತದಹ॑ರತಿ-ಗ್ರಾ॒ಹ್ಯಾ॑ ಗೃಹ್ಯನ್ತೇ ॥ 34 ॥

ಸ॒ಪ್ತ ವೈ ಶೀ॑ರ್​ಷ॒ಣ್ಯಾಃ᳚ ಪ್ರಾ॒ಣಾಃ । ಅ॒ಸಾವಾ॑ದಿ॒ತ್ಯ-ಶ್ಶಿರಃ॑ ಪ್ರ॒ಜಾನಾ᳚ಮ್ । ಶೀ॒ರ್॒ಷನ್ನೇ॒ವ ಪ್ರ॒ಜಾನಾ᳚-ಮ್ಪ್ರಾ॒ಣಾ-ನ್ದ॑ಧಾತಿ । ತಸ್ಮಾ᳚ಥ್ಸ॒ಪ್ತ ಶೀ॒ರ್॒ಷ-ನ್ಪ್ರಾ॒ಣಾಃ ॥ ಇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ । ಅಸು॑ರಾ-ನ್ಪರಾ॒ಭಾವ್ಯ॑ । ಸ ಇ॒ಮಾಁಲ್ಲೋ॒ಕಾ-ನ॒ಭ್ಯ॑ಜಯತ್ । ತಸ್ಯಾ॒ಸೌ ಲೋ॒ಕೋ-ಽನ॑ಭಿಜಿತ ಆಸೀತ್ । ತಂ-ವಿಁ॒ಶ್ವಕ॑ರ್ಮಾ ಭೂ॒ತ್ವಾ-ಽಭ್ಯ॑ಜಯತ್ । ಯ-ದ್ವೈ᳚ಶ್ವಕರ್ಮ॒ಣೋ ಗೃ॒ಹ್ಯತೇ᳚ ॥ 35 ॥

ಸು॒ವ॒ರ್ಗಸ್ಯ॑ ಲೋ॒ಕಸ್ಯಾ॒-ಭಿಜಿ॑ತ್ಯೈ ॥ ಪ್ರ ವಾ ಏ॒ತೇ᳚-ಽಸ್ಮಾ-ಲ್ಲೋ॒ಕಾ-ಚ್ಚ್ಯ॑ವನ್ತೇ । ಯೇ ವೈ᳚ಶ್ವಕರ್ಮ॒ಣ-ಙ್ಗೃ॒ಹ್ಣತೇ᳚ । ಆ॒ದಿ॒ತ್ಯಶ್ಶ್ವೋ ಗೃ॑ಹ್ಯತೇ । ಇ॒ಯಂ-ವಾಁ ಅದಿ॑ತಿಃ । ಅ॒ಸ್ಯಾಮೇ॒ವ ಪ್ರತಿ॑ತಿಷ್ಠನ್ತಿ ॥ ಅ॒ನ್ಯೋ᳚ನ್ಯೋ ಗೃಹ್ಯೇತೇ । ವಿಶ್ವಾ᳚ನ್ಯೇ॒ವಾನ್ಯೇನ॒ ಕರ್ಮಾ॑ಣಿ ಕುರ್ವಾ॒ಣಾ ಯ॑ನ್ತಿ । ಅ॒ಸ್ಯಾಮ॒ನ್ಯೇನ॒ ಪ್ರತಿ॑ ತಿಷ್ಠನ್ತಿ ॥ ತಾವಾ-ಽಪ॑ರಾ॒ರ್ಧಾ-ಥ್ಸಂ॑​ವಁಥ್ಸ॒ರಸ್ಯಾ॒-ನ್ಯೋ᳚ನ್ಯೋ ಗೃಹ್ಯೇತೇ ॥ ತಾವು॒ಭೌ ಸ॒ಹ ಮ॑ಹಾವ್ರ॒ತೇ ಗೃ॑ಹ್ಯೇತೇ । ಯ॒ಜ್ಞಸ್ಯೈ॒ವಾನ್ತ॑-ಙ್ಗ॒ತ್ವಾ । ಉ॒ಭಯೋ᳚-ರ್ಲೋ॒ಕಯೋಃ॒ ಪ್ರತಿ॑ ತಿಷ್ಠನ್ತಿ ॥ ಅ॒ರ್ಕ್ಯ॑ಮು॒ಕ್ಥ-ಮ್ಭ॑ವತಿ ।
ಅ॒ನ್ನಾದ್ಯ॒ಸ್ಯಾ-ವ॑ರುದ್ಧ್ಯೈ ॥ 36 ॥
(ಸ॒ಮಾ॒ಯಚ್ಛ॑ - ತ್ಯತಿಗ್ರಾ॒ಹ್ಯಾ॑ ಗೃಹ್ಯನ್ತೇ - ಗೃ॒ಹ್ಯತೇ॑ - ಸಂ​ವಁಥ್ಸ॒ರಸ್ಥಾ॒ನ್ಯೋ᳚ನ್ಯೋ ಗೃಹ್ಯೇತೇ॒ ಪಞ್ಚ॑ ಚ ) (ಅ. 3)

ಅನುವಾಕಂ 4 - ತಸ್ಮಿನ್ನೇವ ದಿನೇ ದಿವಾಕೀರ್ತ್ಯನಾಮಾನಿ ಸಾಮಾನಿ
ಏ॒ಕ॒ವಿ॒ಗ್ಂ॒ಶ ಏ॒ಷ ಭ॑ವತಿ । ಏ॒ತೇನ॒ ವೈ ದೇ॒ವಾ ಏ॑ಕವಿ॒ಗ್ಂ॒ಶೇನ॑ । ಆ॒ದಿ॒ತ್ಯಮಿ॒ತ ಉ॑ತ್ತ॒ಮಗ್ಂ ಸು॑ವ॒ರ್ಗಂ-ಲೋಁ॒ಕ-ಮಾರೋ॑ಹಯನ್ನ್ । ಸ ವಾ ಏ॒ಷ ಇ॒ತ ಏ॑ಕವಿ॒ಗ್ಂ॒ಶಃ । ತಸ್ಯ॒ ದಶಾ॒ವಸ್ತಾ॒ದಹಾ॑ನಿ । ದಶ॑ ಪ॒ರಸ್ತಾ᳚ತ್ । ಸ ವಾ ಏ॒ಷ ವಿ॒ರಾಜ್ಯು॑ಭ॒ಯತಃ॒ ಪ್ರತಿ॑ಷ್ಠಿತಃ । ವಿ॒ರಾಜಿ॒ ಹಿ ವಾ ಏ॒ಷ ಉ॑ಭ॒ಯತಃ॒ ಪ್ರತಿ॑ಷ್ಠಿತಃ । ತಸ್ಮಾ॑ದನ್ತ॒ರೇಮೌ ಲೋ॒ಕೌ ಯನ್ನ್ । ಸರ್ವೇ॑ಷು ಸುವ॒ರ್ಗೇಷು॑ ಲೋ॒ಕೇ-ಷ್ವ॑ಭಿ॒ತಪ॑ನ್ನೇತಿ ॥ 37 ॥

ದೇ॒ವಾ ವಾ ಆ॑ದಿ॒ತ್ಯಸ್ಯ॑ ಸುವ॒ರ್ಗಸ್ಯ॑ ಲೋ॒ಕಸ್ಯ॑ । ಪರಾ॑ಚೋ-ಽತಿಪಾ॒ದಾದ॑ಬಿಭಯುಃ । ತ-ಞ್ಛನ್ದೋ॑ಭಿರದೃಗ್ಂ ಹ॒ನ್ಧೃತ್ಯೈ᳚ । ದೇ॒ವಾ ವಾ ಆ॑ದಿ॒ತ್ಯಸ್ಯ॑ ಸುವ॒ರ್ಗಸ್ಯ॑ ಲೋ॒ಕಸ್ಯ॑ । ಅವಾ॑ಚೋ-ಽವಪಾ॒ದಾದ॑ಬಿಭಯುಃ । ತ-ಮ್ಪ॒ಞ್ಚಭೀ॑ ರ॒ಶ್ಮಿಭಿ॒-ರುದ॑ವಯನ್ನ್ । ತಸ್ಮಾ॑ದೇಕವಿ॒ಗ್ಂ॒ಶೇ ಽಹ॒-ನ್ಪಞ್ಚ॑ ದಿವಾಕೀ॒ರ್ತ್ಯಾ॑ನಿ ಕ್ರಿಯನ್ತೇ । ರ॒ಶ್ಮಯೋ॒ ವೈ ದಿ॑ವಾಕೀ॒ರ್ತ್ಯಾ॑ನಿ ॥ ಯೇ ಗಾ॑ಯ॒ತ್ರೇ । ತೇ ಗಾ॑ಯ॒ತ್ರೀಷೂತ್ತ॑ರಯೋಃ॒ ಪವ॑ಮಾನಯೋಃ ॥ 38 ॥

ಮ॒ಹಾದಿ॑ವಾಕೀರ್ತ್ಯ॒ಗ್ಂ॒ ಹೋತುಃ॑ ಪೃ॒ಷ್ಠಮ್ । ವಿ॒ಕ॒ರ್ಣ-ಮ್ಬ್ರ॑ಹ್ಮಸಾ॒ಮಮ್ । ಭಾ॒ಸೋ᳚-ಽಗ್ನಿಷ್ಟೋ॒ಮಃ ॥ ಅಥೈ॒ತಾನಿ॒ ಪರಾ॑ಣಿ । ಪರೈ॒ರ್ವೈ ದೇ॒ವಾ ಆ॑ದಿ॒ತ್ಯಗ್ಂ ಸು॑ವ॒ರ್ಗಂ-ಲೋಁ॒ಕಮ॑ಪಾರಯನ್ನ್ । ಯದಪಾ॑ರಯನ್ನ್ । ತ-ತ್ಪರಾ॑ಣಾ-ಮ್ಪರ॒ತ್ವಮ್ । ಪಾ॒ರಯ॑ನ್ತ್ಯೇನ॒-ಮ್ಪರಾ॑ಣಿ । ಯ ಏ॒ವಂ-ವೇಁದ॑ । ಅಥೈ॒ತಾನಿ॒ ಸ್ಪರಾ॑ಣಿ । ಸ್ಪರೈ॒ರ್ವೈ ದೇ॒ವಾ ಆ॑ದಿ॒ತ್ಯಗ್ಂ ಸು॑ವ॒ರ್ಗಂ-ಲೋಁ॒ಕಮ॑ಸ್ಪಾರಯನ್ನ್ । ಯದಸ್ಪಾ॑ರಯನ್ನ್ । ತ-ಥ್ಸ್ಪರಾ॑ಣಾಗ್​ ಸ್ಪರ॒ತ್ವಮ್ । ಸ್ಪಾ॒ರಯ॑ನ್ತ್ಯೇನ॒ಗ್ಗ್॒ ಸ್ಪರಾ॑ಣಿ । ಯ ಏ॒ವಂ-ವೇಁದ॑ ॥ 39 ॥
(ಏ॒ತಿ॒-ಪವ॑ಮಾನಯೋಃ॒-ಸ್ಪರಾ॑ಣೀ॒ ಪಞ್ಚ॑ ಚ) (ಅ. 4)

ಅನುವಾಕಂ 5 - ಪಶವಃ ವೈಷ್ಣವಾದ್ಯಾ ನವ
ಅಪ್ರ॑ತಿಷ್ಠಾಂ॒-ವಾಁ ಏ॒ತೇ ಗ॑ಚ್ಛನ್ತಿ । ಯೇಷಾಗ್ಂ॑ ಸಂ​ವಁಥ್ಸ॒ರೇ-ಽನಾ॒ಪ್ತೇ-ಽಥ॑ । ಏ॒ಕಾ॒ದ॒ಶಿನ್ಯಾ॒ಪ್ಯತೇ᳚ ॥ ವೈ॒ಷ್ಣ॒ವಂ-ವಾಁ॑ಮ॒ನ-ಮಾಲ॑ಭನ್ತೇ । ಯ॒ಜ್ಞೋ ವೈ ವಿಷ್ಣುಃ॑ । ಯ॒ಜ್ಞಮೇ॒ವಾಲ॑ಭನ್ತೇ॒ ಪ್ರತಿ॑ಷ್ಠಿತ್ಯೈ । ಐ॒ನ್ದ್ರಾ॒ಗ್ನ-ಮಾಲ॑ಭನ್ತೇ । ಇ॒ನ್ದ್ರಾ॒ಗ್ನೀ ವೈ ದೇ॒ವಾನಾ॒-ಮಯಾ॑ತಯಾಮಾನೌ । ಯೇ ಏ॒ವ ದೇ॒ವತೇ॒ ಅಯಾ॑ತಯಾಮ್ನೀ । ತೇ ಏ॒ವಾಲ॑ಭನ್ತೇ ॥ 40 ॥

ವೈ॒ಶ್ವ॒ದೇ॒ವ-ಮಾಲ॑ಭನ್ತೇ । ದೇ॒ವತಾ॑ ಏ॒ವಾವ॑-ರುನ್ಧತೇ । ದ್ಯಾ॒ವಾ॒ಪೃ॒ಥಿ॒ವ್ಯಾ᳚-ನ್ಧೇ॒ನು-ಮಾಲ॑ಭನ್ತೇ । ದ್ಯಾವಾ॑ಪೃಥಿ॒ವ್ಯೋರೇ॒ವ ಪ್ರತಿ॑ ತಿಷ್ಠನ್ತಿ । ವಾ॒ಯ॒ವ್ಯಂ॑-ವಁ॒ಥ್ಸಮಾಲ॑ಭನ್ತೇ । ವಾ॒ಯುರೇ॒ವೈಭ್ಯೋ॑ ಯಥಾ-ಽಽಯತ॒ನಾ-ದ್ದೇ॒ವತಾ॒ ಅವ॑ರುನ್ಧೇ । ಆ॒ದಿ॒ತ್ಯಾಮವಿಂ॑-ವಁ॒ಶಾ-ಮಾಲ॑ಭನ್ತೇ । ಇ॒ಯಂ-ವಾಁ ಅದಿ॑ತಿಃ । ಅ॒ಸ್ಯಾಮೇ॒ವ ಪ್ರತಿ॑ ತಿಷ್ಠನ್ತಿ । ಮೈ॒ತ್ರಾ॒ವ॒ರು॒ಣೀ-ಮಾಲ॑ಭನ್ತೇ ॥ 41 ॥

ಮಿ॒ತ್ರೇಣೈ॒ವ ಯ॒ಜ್ಞಸ್ಯ॒ ಸ್ವಿ॑ಷ್ಟಗ್ಂ ಶಮಯನ್ತಿ । ವರು॑ಣೇನ॒ ದುರಿ॑ಷ್ಟಮ್ । ಪ್ರಾ॒ಜಾ॒ಪ॒ತ್ಯ-ನ್ತೂ॑ಪ॒ರ-ಮ್ಮ॑ಹಾವ್ರ॒ತ ಆಲ॑ಭನ್ತೇ । ಪ್ರಾ॒ಜಾ॒ಪ॒ತ್ಯೋ॑-ಽತಿಗ್ರಾ॒ಹ್ಯೋ॑ ಗೃಹ್ಯತೇ । ಅಹ॑ರೇ॒ವ ರೂ॒ಪೇಣ॒ ಸಮ॑ರ್ಧಯನ್ತಿ । ಅಥೋ॒ ಅಹ್ನ॑ ಏ॒ವೈಷ ಬ॒ಲಿರ್-ಹ್ರಿ॑ಯತೇ । ಆ॒ಗ್ನೇ॒ಯಮಾಲ॑ಭನ್ತೇ॒ ಪ್ರತಿ॒ ಪ್ರಜ್ಞಾ᳚ತ್ಯೈ ॥ ಅ॒ಜ॒ಪೇ॒ತ್ವಾನ್. ವಾ ಏ॒ತೇ ಪೂರ್ವೈ॒ರ್ಮಾಸೈ॒ರ-ವ॑ರುನ್ಧತೇ । ಯದೇ॒ತೇ ಗ॒ವ್ಯಾಃ ಪ॒ಶವ॑ ಆಲ॒ಭ್ಯನ್ತೇ᳚ । ಉ॒ಭಯೇ॑ಷಾ-ಮ್ಪಶೂ॒ನಾ-ಮವ॑ರುದ್ಧ್ಯೈ ॥ 42 ॥

ಯದತಿ॑ರಿಕ್ತಾ-ಮೇಕಾದ॒ಶಿನೀ॑-ಮಾ॒ಲಭೇ॑ರನ್ನ್ । ಅಪ್ರಿ॑ಯ॒-ಮ್ಭ್ರಾತೃ॑ವ್ಯ-ಮ॒ಭ್ಯತಿ॑ರಿಚ್ಯೇತ । ಯ-ದ್ದ್ವೌದ್ವೌ॑ ಪ॒ಶೂ ಸ॒ಮಸ್ಯೇ॑ಯುಃ । ಕನೀ॑ಯ॒ ಆಯುಃ॑ ಕುರ್ವೀರನ್ನ್ । ಯದೇ॒ತೇ ಬ್ರಾಹ್ಮ॑ಣವನ್ತಃ ಪ॒ಶವ॑ ಆಲ॒ಭ್ಯನ್ತೇ᳚ । ನಾಪ್ರಿ॑ಯ॒-ಮ್ಭ್ರಾತೃ॑ವ್ಯ-ಮ॒ಭ್ಯ॑ತಿ॒ರಿಚ್ಯ॑ತೇ । ನ ಕನೀ॑ಯ॒ ಆಯುಃ॑ ಕುರ್ವತೇ ॥ 43 ॥
(ತೇ-ಏ॒ವಾಲ॑ಭನ್ತೇ-ಮೈತ್ರಾವರು॒ಣೀಮಾಲ॑ಭ॒ನ್ತೇ-ಽವ॑ರುದ್ಧ್ಯೈ-+ಸ॒ಪ್ತ ಚ॑) (ಅ. 5)

ಅನುವಾಕಂ 6 - ಮಹಾವ್ರತಂ
ಪ್ರ॒ಜಾಪ॑ತಿಃ ಪ್ರ॒ಜಾ-ಸ್ಸೃ॒ಷ್ಟ್ವಾ ವೃ॒ತ್ತೋ॑-ಽಶಯತ್ । ತ-ನ್ದೇ॒ವಾ ಭೂ॒ತಾನಾ॒ಗ್ಂ॒ ರಸ॒-ನ್ತೇಜ॑-ಸ್ಸ॒ಭೃನ್ತ್ಯ॑ । ತೇನೈ॑ನಮಭಿಷಜ್ಯನ್ನ್ । ಮ॒ಹಾನ॑ವವ॒ರ್ತೀತಿ॑ । ತ-ನ್ಮ॑ಹಾವ್ರ॒ತಸ್ಯ॑ ಮಹಾವ್ರತ॒ತ್ವಮ್ । ಮ॒ಹ-ದ್ವ್ರ॒ತಮಿತಿ॑ । ತ-ನ್ಮ॑ಹಾವ್ರ॒ತಸ್ಯ॑ ಮಹಾವ್ರತ॒ತ್ವಮ್ । ಮ॒ಹ॒ತೋ ವ್ರ॒ತಮಿತಿ॑ । ತ-ನ್ಮ॑ಹಾವ್ರ॒ತಸ್ಯ॑ ಮಹಾವ್ರತ॒ತ್ವಮ್ ॥ ಪ॒ಞ್ಚ॒ವಿ॒ಗ್ಂ॒ಶ-ಸ್ಸ್ತೋಮೋ॑ ಭವತಿ ॥ 44 ॥

ಚತು॑ರ್ವಿಗ್ಂಶ-ತ್ಯರ್ಧಮಾಸ-ಸ್ಸಂ​ವಁಥ್ಸ॒ರಃ । ಯ-ದ್ವಾ ಏ॒ತಸ್ಮಿನ್᳚-ಥ್ಸಂ​ವಁಥ್ಸ॒ರೇ ಽಧಿ॒ಪ್ರಾಜಾ॑ಯತ । ತದನ್ನ॑-ಮ್ಪಞ್ಚವಿ॒ಗ್ಂ॒ಶ-ಮ॑ಭವತ್ ॥ ಮ॒ದ್ಧ್ಯ॒ತಃ ಕ್ರಿ॑ಯತೇ । ಮ॒ದ್ಧ್ಯ॒ತೋ ಹ್ಯನ್ನ॑ಮಶಿ॒ತ-ನ್ಧಿ॒ನೋತಿ॑ । ಅಥೋ॑ ಮದ್ಧ್ಯ॒ತ ಏ॒ವ ಪ್ರ॒ಜಾನಾ॒ಮೂರ್ಗ್ಧೀ॑ಯತೇ ॥ ಅಥ॒ ಯದ್ವಾ ಇ॒ದಮ॑ನ್ತ॒ತಃ ಕ್ರಿ॒ಯತೇ᳚ । ತಸ್ಮಾ॑ದುದ॒ನ್ತೇ ಪ್ರ॒ಜಾ-ಸ್ಸಮೇ॑ಧನ್ತೇ । ಅ॒ನ್ತ॒ತಃ ಕ್ರಿ॑ಯತೇ ಪ್ರ॒ಜನ॑ನಾಯೈ॒ವ ॥ ತ್ರಿ॒ವೃಚ್ಛಿರೋ॑ ಭವತಿ ॥ 45 ॥

ತ್ರೇ॒ಧಾ॒ ವಿ॒ಹಿ॒ತಗ್ಂ ಹಿ ಶಿರಃ॑ । ಲೋಮ॑ ಛ॒ವೀರಸ್ಥಿ॑ ॥ ಪರಾ॑ಚಾ ಸ್ತುವನ್ತಿ । ತಸ್ಮಾ॒-ತ್ತ-ಥ್ಸ॒ದೃಗೇ॒ವ । ನ ಮೇದ್ಯ॒ತೋ-ಽನು॑ ಮೇದ್ಯತಿ । ನ ಕೃಶ್ಯ॒ತೋ-ಽನು॑ ಕೃಶ್ಯತಿ ॥ ಪ॒ಞ್ಚ॒ದ॒ಶೋ᳚-ಽನ್ಯಃ ಪ॒ಖ್ಷೋ ಭ॑ವತಿ । ಸ॒ಪ್ತ॒ದ॒ಶೋ᳚-ಽನ್ಯಃ । ತಸ್ಮಾ॒-ದ್ವಯಾಗ್॑ಸ್ಯ-ನ್ಯತ॒ರಮ॒ರ್ಧಮ॒ಭಿ ಪ॒ರ್ಯಾವ॑ರ್ತನ್ತೇ । ಅ॒ನ್ಯ॒ತ॒ರತೋ॒ ಹಿ ತ-ದ್ಗರೀ॑ಯಃ ಕ್ರಿ॒ಯತೇ᳚ ॥ 46 ॥

ಪ॒ಞ್ಚ॒ವಿ॒ಗ್ಂ॒ಶ ಆ॒ತ್ಮಾ ಭ॑ವತಿ । ತಸ್ಮಾ᳚-ನ್ಮದ್ಧ್ಯ॒ತಃ ಪ॒ಶವೋ॒ ವರಿ॑ಷ್ಠಾಃ ॥ ಏ॒ಕ॒ವಿ॒ಗ್ಂ॒ಶ-ಮ್ಪುಚ್ಛ᳚ಮ್ । ದ್ವಿ॒ಪದಾ॑ಸು ಸ್ತುವನ್ತಿ॒ ಪ್ರತಿ॑ಷ್ಠಿತ್ಯೈ ॥ ಸರ್ವೇ॑ಣ ಸ॒ಹ ಸ್ತು॑ವನ್ತಿ । ಸರ್ವೇ॑ಣ॒ ಹ್ಯಾ᳚ತ್ಮನಾ᳚-ಽಽತ್ಮ॒ನ್ವೀ । ಸ॒ಹೋತ್ಪತ॑ನ್ತಿ ॥ ಏಕೈ॑ಕಾ॒-ಮುಚ್ಛಿಗ್ಂ॑ಷನ್ತಿ । ಆ॒ತ್ಮನ್ನ್. ಹ್ಯಙ್ಗಾ॑ನಿ ಬ॒ದ್ಧಾನಿ॑ ॥ ನ ವಾ ಏ॒ತೇನ॒ ಸರ್ವಃ॒ ಪುರು॑ಷಃ ॥ 47 ॥

ಯದಿ॒ತ ಇ॑ತೋ॒ ಲೋಮಾ॑ನಿ ದ॒ತೋ ನ॒ಖಾನ್ । ಪ॒ರಿ॒ಮಾದಃ॑ ಕ್ರಿಯನ್ತೇ । ತಾನ್ಯೇ॒ವ ತೇನ॒ ಪ್ರತ್ಯು॑ಪ್ಯನ್ತೇ ॥ ಔದು॑ಮ್ಬರ॒ಸ್ತಲ್ಪೋ॑ ಭವತಿ । ಊರ್ಗ್ವಾ ಅನ್ನ॑ಮುದು॒ಮ್ಬರಃ॑ । ಊ॒ರ್ಜ ಏ॒ವಾನ್ನಾದ್ಯ॒ಸ್ಯಾ-ವ॑ರುದ್ಧ್ಯೈ ॥ ಯಸ್ಯ॑ ತಲ್ಪ॒ಸದ್ಯ॒-ಮನ॑ಭಿಜಿತ॒ಗ್ಗ್॒ ಸ್ಯಾತ್ । ಸ ದೇ॒ವಾನಾ॒ಗ್ಂ॒ ಸಾಮ್ಯ॑ಖ್ಷೇ । ತ॒ಲ್ಪ॒ಸದ್ಯ॑-ಮ॒ಭಿಜ॑ಯಾ॒ನೀತಿ॒ ತಲ್ಪ॑ಮಾ॒-ರುಹ್ಯೋ-ದ್ಗಾ॑ಯೇತ್ । ತ॒ಲ್ಪ॒ಸದ್ಯ॑-ಮೇ॒ವಾಭಿಜ॑ಯತಿ ॥ 48 ॥

ಯಸ್ಯ॑ ತಲ್ಪ॒ಸದ್ಯ॑-ಮ॒ಭಿಜಿ॑ತ॒ಗ್ಗ್॒ ಸ್ಯಾತ್ । ಸ ದೇ॒ವಾನಾ॒ಗ್ಂ॒ ಸಾಮ್ಯ॑ಖ್ಷೇ । ತ॒ಲ್ಪ॒ಸದ್ಯ॒-ಮ್ಮಾ ಪರಾ॑ಜೇ॒ಷೀತಿ॒ ತಲ್ಪ॑-ಮಾ॒ರುಹ್ಯೋ-ದ್ಗಾ॑ಯೇತ್ । ನ ತ॑ಲ್ಪ॒ಸದ್ಯ॒-ಮ್ಪರಾ॑ಜಯತೇ ॥ ಪ್ಲೇ॒ಙ್ಖೇ ಶಗ್ಂ॑ಸತಿ । ಮಹೋ॒ ವೈ ಪ್ಲೇ॒ಙ್ಖಃ । ಮಹ॑ಸ ಏ॒ವಾನ್ನಾದ್ಯ॒ಸ್ಯಾ-ವ॑ರುದ್ಧ್ಯೈ ॥ ದೇ॒ವಾ॒ಸು॒ರಾ-ಸ್ಸಂ​ಯಁ॑ತ್ತಾ ಆಸನ್ನ್ । ತ ಆ॑ದಿ॒ತ್ಯೇ ವ್ಯಾಯ॑ಚ್ಛನ್ತ । ತ-ನ್ದೇ॒ವಾ-ಸ್ಸಮ॑ಜಯನ್ನ್ ॥ 49 ॥

ಬ್ರಾ॒ಹ್ಮ॒ಣಶ್ಚ॑ ಶೂ॒ದ್ರಶ್ಚ॑ ಚರ್ಮಕ॒ರ್ತೇ ವ್ಯಾಯ॑ಚ್ಛೇತೇ । ದೈವ್ಯೋ॒ ವೈ ವರ್ಣೋ᳚ ಬ್ರಾಹ್ಮ॒ಣಃ । ಅ॒ಸ॒ರ್ಯ॑-ಶ್ಶೂ॒ದ್ರಃ । ಇ॒ಮೇ॑-ಽರಾ-ಥ್ಸುರಿ॒ಮೇ ಸು॑ಭೂ॒ತ-ಮ॑ಕ್ರ॒-ನ್ನಿತ್ಯ॑ನ್ಯತ॒ರೋ ಬ್ರೂ॑ಯಾತ್ । ಇ॒ಮ ಉ॑ದ್ವಾಸೀಕಾ॒ರಿಣ॑ ಇ॒ಮೇ ದು॑ರ್ಭೂ॒ತ-ಮ॑ಕ್ರ॒ನ್ನಿತ್ಯ॑ನ್ಯತ॒ರಃ । ಯದೇ॒ವೈಷಾಗ್ಂ॑ ಸುಕೃ॒ತಂ-ಯಾಁ ರಾದ್ಧಿಃ॑ । ತದ॑ನ್ಯತ॒ರೋ॑-ಽಭಿಶ್ರೀ॑ಣಾತಿ । ಯದೇ॒ವೈಷಾ᳚-ನ್ದುಷ್ಕೃ॒ತಂ-ಯಾಁ-ಽರಾ᳚ದ್ಧಿಃ । ತದ॑ನ್ಯತ॒ರೋ-ಽಪ॑ಹನ್ತಿ । ಬ್ರಾ॒ಹ್ಮ॒ಣ-ಸ್ಸ-ಞ್ಜ॑ಯತಿ । ಅ॒ಮುಮೇ॒ವಾದಿ॒ತ್ಯ-ಮ್ಭ್ರಾತೃ॑ವ್ಯಸ್ಯ॒ ಸಂ​ವಿಁ॑ನ್ದನ್ತೇ ॥ 50 ॥
(ಭ॒ವ॒ತಿ॒ - ಭ॒ವ॒ತಿ॒ - ಕ್ರಿ॒ಯತೇ॒ - ಪುರು॑ಷೋ - ಜಯತ್ಯ - ಜಯ - ಞ್ಜಯ॒ತ್ಯೇಕ॑-ಞ್ಚ) (ಅ. 6)

(ಉ॒ದ್ಧ್ಯ॒ನ್ಯಮಾ॑ನಂ॒ - ನವೈ॒ತಾನಿ॒ - ಸನ್ತ॑ತಿ - ರೇಕವಿ॒ಗ್ಂ॒ಶ ಏ॒ಷೋ - ಽಪ್ರ॑ತಿಷ್ಠಾಂ - ಪ್ರ॒ಜಾಪ॑ತಿ-ರ್ವೃ॒ತ್ತ-ಷ್ಷಟ್ )

(ಉ॒ದ್ಧ॒ನ್ಯಮಾ॑ನಗ್ಂ - ಶೋ॒ಚಿಷ್ಕೇ॒ಶೋ - ಽಗ್ನೇ॑ ಸ॒ಪತ್ನಾ॑ - ನತಿಗ್ರಾ॒ಹ್ಯಾ॑ - ವೈಶ್ವದೇ॒ವಮಾಲ॑ಭನ್ತೇ ಪಞ್ಚಾ॒ಶತ್ )

(ಉ॒ದ್ಧ॒ನ್ಯಮಾ॑ನ॒ಗ್ಂ॒ - ಸಂ​ವಿಁ॑ನ್ದನ್ತೇ )

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ದ್ವಿದೀಯಃ ಪ್ರಪಾಠಕ-ಸ್ಸಮಾಪ್ತಃ ॥