ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ದ್ವಿತೀಯಃ ಪ್ರಪಾಠಕಃ - ಹೋತೃಬ್ರಾಹ್ಮಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ದಶಹೋತೃಮನ್ತ್ರಸ್ಯ ಕ್ರತ್ವರ್ಥಪುರುಷಾರ್ಥಪ್ರಯೋಗೌ

ಪ್ರ॒ಜಾಪ॑ತಿರಕಾಮಯತ ಪ್ರ॒ಜಾ-ಸ್ಸೃ॑ಜೇ॒ಯೇತಿ॑ । ಸ ಏ॒ತ-ನ್ದಶ॑ಹೋತಾರ-ಮಪಶ್ಯತ್ । ತ-ಮ್ಮನ॑ಸಾ ಽನು॒ದ್ರುತ್ಯ॑ ದರ್ಭಸ್ತ॒ಮ್ಬೇ॑-ಽಜುಹೋತ್ । ತತೋ॒ ವೈ ಸ ಪ್ರ॒ಜಾ ಅ॑ಸೃಜತ । ತಾ ಅ॑ಸ್ಮಾಥ್ಸೃ॒ಷ್ಟಾ ಅಪಾ᳚ಕ್ರಾಮನ್ನ್ । ತಾ ಗ್ರಹೇ॑ಣಾಗೃಹ್ಣಾತ್ । ತದ್ಗ್ರಹ॑ಸ್ಯ ಗ್ರಹ॒ತ್ವಮ್ । ಯಃ ಕಾ॒ಮಯೇ॑ತ॒ ಪ್ರಜಾ॑ಯೇ॒ಯೇತಿ॑ । ಸ ದಶ॑ಹೋತಾರ॒-ಮ್ಮನ॑ಸಾ ಽನು॒ದ್ರುತ್ಯ॑ ದರ್ಭಸ್ತ॒ಮ್ಬೇ ಜು॑ಹುಯಾತ್ । ಪ್ರ॒ಜಾಪ॑ತಿ॒ರ್ವೈ ದಶ॑ಹೋತಾ ॥ 1 ॥

ಪ್ರ॒ಜಾಪ॑ತಿರೇ॒ವ ಭೂ॒ತ್ವಾ ಪ್ರ ಜಾ॑ಯತೇ ॥ ಮನ॑ಸಾ ಜುಹೋತಿ । ಮನ॑ ಇವ॒ ಹಿ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒ರಾಪ್ತ್ಯೈ᳚ ॥ ಪೂ॒ರ್ಣಯಾ॑ ಜುಹೋತಿ । ಪೂ॒ರ್ಣ ಇ॑ವ॒ ಹಿ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒ರಾಪ್ತ್ಯೈ᳚ ॥ ನ್ಯೂ॑ನಯಾ ಜುಹೋತಿ । ನ್ಯೂ॑ನಾ॒ದ್ಧಿ ಪ್ರ॒ಜಾಪ॑ತಿಃ ಪ್ರ॒ಜಾ ಅಸೃ॑ಜತ । ಪ್ರ॒ಜಾನಾ॒ಗ್ಂ॒ ಸೃಷ್ಟ್ಯೈ᳚ ॥ 2 ॥

ದ॒ರ್ಭ॒ಸ್ತ॒ಮ್ಬೇ ಜು॑ಹೋತಿ । ಏ॒ತಸ್ಮಾ॒ದ್ವೈ ಯೋನೇಃ᳚ ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ । ಯಸ್ಮಾ॑ದೇ॒ವ ಯೋನೇಃ᳚ ಪ್ರ॒ಜಾಪ॑ತಿಃ ಪ್ರ॒ಜಾ ಅಸೃ॑ಜತ । ತಸ್ಮಾ॑ದೇ॒ವ ಯೋನೇಃ॒ ಪ್ರ ಜಾ॑ಯತೇ ॥ ಬ್ರಾ॒ಹ್ಮ॒ಣೋ ದ॑ಖ್ಷಿಣ॒ತ ಉಪಾ᳚ಸ್ತೇ । ಬ್ರಾ॒ಹ್ಮ॒ಣೋ ವೈ ಪ್ರ॒ಜಾನಾ॑-ಮುಪದ್ರ॒ಷ್ಟಾ । ಉ॒ಪ॒ದ್ರ॒ಷ್ಟು॒ಮತ್ಯೇ॒ವ ಪ್ರ ಜಾ॑ಯತೇ ॥ ಗ್ರಹೋ॑ ಭವತಿ । ಪ್ರ॒ಜಾನಾಗ್ಂ॑ ಸೃ॒ಷ್ಟಾನಾ॒-ನ್ಧೃತ್ಯೈ᳚ ॥ ಯ-ಮ್ಬ್ರಾ᳚ಹ್ಮ॒ಣಂ-ವಿಁ॒ದ್ಯಾಂ-ವಿಁ॒ದ್ವಾಗ್ಂಸಂ॒-ಯಁಶೋ॒ ನರ್ಚ್ಛೇತ್ ॥ 3 ॥

ಸೋ-ಽರ॑ಣ್ಯ-ಮ್ಪ॒ರೇತ್ಯ॑ । ದ॒ರ್ಭ॒ಸ್ತ॒ಮ್ಬ-ಮು॒ದ್ಗ್ರತ್ಥ್ಯ॑ । ಬ್ರಾ॒ಹ್ಮ॒ಣ-ನ್ದ॑ಖ್ಷಿಣ॒ತೋ ನಿ॒ಷಾದ್ಯ॑ । ಚತು॑ರ್​ಹೋತೄ॒ನ್ ವ್ಯಾಚ॑ಖ್ಷೀತ । ಏ॒ತದ್ವೈ ದೇ॒ವಾನಾ᳚-ಮ್ಪರ॒ಮ-ಙ್ಗುಹ್ಯ॒-ಮ್ಬ್ರಹ್ಮ॑ । ಯಚ್ಚತು॑ರ್​ಹೋತಾರಃ । ತದೇ॒ವ ಪ್ರ॑ಕಾ॒ಶ-ಙ್ಗ॑ಮಯತಿ । ತದೇ॑ನ-ಮ್ಪ್ರಕಾ॒ಶ-ಙ್ಗ॒ತಮ್ । ಪ್ರ॒ಕಾ॒ಶ-ಮ್ಪ್ರ॒ಜಾನಾ᳚-ಙ್ಗಮಯತಿ ॥ ದ॒ರ್ಭ॒ಸ್ತ॒ಮ್ಬ-ಮು॒ದ್ಗ್ರತ್ಥ್ಯ॒ ವ್ಯಾಚ॑ಷ್ಟೇ ॥ 4 ॥

ಅ॒ಗ್ನಿ॒ವಾನ್. ವೈ ದ॑ರ್ಭಸ್ತ॒ಮ್ಬಃ । ಅ॒ಗ್ನಿ॒ವತ್ಯೇ॒ವ ವ್ಯಾಚ॑ಷ್ಟೇ ॥ ಬ್ರಾ॒ಹ್ಮ॒ಣೋ ದ॑ಖ್ಷಿಣ॒ತ ಉಪಾ᳚ಸ್ತೇ । ಬ್ರಾ॒ಹ್ಮ॒ಣೋ ವೈ ಪ್ರ॒ಜಾನಾ॑-ಮುಪದ್ರ॒ಷ್ಟಾ । ಉ॒ಪ॒ದ್ರ॒ಷ್ಟು॒-ಮತ್ಯೇ॒ವೈನಂ॒-ಯಁಶ॑ ಋಚ್ಛತಿ ॥ ಈ॒ಶ್ವ॒ರ-ನ್ತಂ-ಯಁಶೋ-ಽರ್ತೋ॒ರಿತ್ಯಾ॑ಹುಃ । ಯಸ್ಯಾನ್ತೇ᳚ ವ್ಯಾ॒ಚಷ್ಟ॒ ಇತಿ॑ । ವರ॒ಸ್ತಸ್ಮೈ॒ ದೇಯಃ॑ । ಯದೇ॒ವೈನ॒-ನ್ತತ್ರೋ॑ಪ॒ ನಮ॑ತಿ । ತದೇ॒ವಾವ॑ ರುನ್ಧೇ ॥ 5 ॥

ಅ॒ಗ್ನಿಮಾ॒ದಧಾ॑ನೋ॒ ದಶ॑ಹೋತ್ರಾ॒ ಽರಣಿ॒ಮವ॑ದದ್ಧ್ಯಾತ್ । ಪ್ರಜಾ॑ತಮೇ॒ವೈನ॒-ಮಾಧ॑ತ್ತೇ । ತೇನೈ॒ವೋದ್ದ್ರುತ್ಯಾ᳚ಗ್ನಿಹೋ॒ತ್ರ-ಞ್ಜು॑ಹುಯಾತ್ । ಪ್ರಜಾ॑ತಮೇ॒ವೈನ॑ಜ್ಜುಹೋತಿ । ಹ॒ವಿರ್ನಿ॑ರ್ವ॒ಫ್ಸ್ಯನ್-ದಶ॑ಹೋತಾರಂ॒-ವ್ಯಾಁಚ॑ಖ್ಷೀತ । ಪ್ರಜಾ॑ತಮೇ॒ವೈನ॒-ನ್ನಿರ್ವ॑ಪತಿ । ಸಾ॒ಮಿ॒ಧೇ॒ನೀ-ರ॑ನುವ॒ಖ್ಷ್ಯನ್-ದಶ॑ಹೋತಾರಂ॒-ವ್ಯಾಁಚ॑ಖ್ಷೀತ । ಸಾ॒ಮಿ॒ಧೇ॒ನೀರೇ॒ವ ಸೃ॒ಷ್ಟ್ವಾ-ಽಽರಭ್ಯ॒ ಪ್ರ ತ॑ನುತೇ । ಅಥೋ॑ ಯ॒ಜ್ಞೋ ವೈ ದಶ॑ಹೋತಾ । ಯ॒ಜ್ಞಮೇ॒ವ ತ॑ನುತೇ ॥ 6 ॥

ಅ॒ಭಿ॒ಚರ॒ನ್-ದಶ॑ಹೋತಾರ-ಞ್ಜುಹುಯಾತ್ । ನವ॒ ವೈ ಪುರು॑ಷೇ ಪ್ರಾ॒ಣಾಃ । ನಾಭಿ॑ರ್ದಶ॒ಮೀ । ಸಪ್ರಾ॑ಣಮೇ॒ವೈನ॑-ಮ॒ಭಿಚ॑ರತಿ । ಏ॒ತಾವ॒ದ್ವೈ ಪುರು॑ಷಸ್ಯ॒ ಸ್ವಮ್ । ಯಾವ॑-ತ್ಪ್ರಾ॒ಣಾಃ । ಯಾವ॑ದೇ॒ವಾಸ್ಯಾಸ್ತಿ॑ । ತದ॒ಭಿಚ॑ರತಿ ॥ ಸ್ವಕೃ॑ತ॒ ಇರಿ॑ಣೇ ಜುಹೋತಿ ಪ್ರದ॒ರೇ ವಾ᳚ । ಏ॒ತದ್ವಾ ಅ॒ಸ್ಯೈ ನಿರ್-ಋ॑ತಿಗೃಹೀತಮ್ । ನಿರ್-ಋ॑ತಿ ಗೃಹೀತ ಏ॒ವೈನ॒-ನ್ನಿರ್-ಋ॑ತ್ಯಾ ಗ್ರಾಹಯತಿ ॥ ಯ-ದ್ವಾ॒ಚಃ ಕ್ರೂ॒ರಮ್ । ತೇನ॒ ವಷ॑ಟ್ಕರೋತಿ । ವಾ॒ಚ ಏ॒ವೈನ॑-ಙ್ಕ್ರೂ॒ರೇಣ॒ ಪ್ರ ವೃ॑ಶ್ಚತಿ । ತಾ॒ಜಗಾರ್ತಿ॒ಮಾರ್ಚ್ಛ॑ತಿ ॥ 7 ॥
(ದಶ॑ಹೋತಾ॒ - ಸೃಷ್ಟ್ಯಾ॑ - ಋ॒ಚ್ಛೇ-ದ್- ವ್ಯಾಚ॑ಷ್ಟೇ - ರುನ್ಧ - ಏ॒ವ ತ॑ನುತೇ॒ - ನಿರ್-ಋ॑ತಿಗೃಹೀತ॒-ಮ್ಪಞ್ಚ॑ ಚ) (ಅ. 1)

ಅನುವಾಕಂ 2 - ಚತುರ್​ಹೋತ್ರಾದಿಮನ್ತ್ರಾಣಾ-ಙ್ಕ್ರತ್ವರ್ಥಪ್ರಯೋಗಃ
ಪ್ರ॒ಜಾಪ॑ತಿರಕಾಮಯತ ದರ್​ಶಪೂರ್ಣಮಾ॒ಸೌ ಸೃ॑ಜೇ॒ಯೇತಿ॑ । ಸ ಏ॒ತ-ಞ್ಚತು॑ರ್​ಹೋತಾರ-ಮಪಶ್ಯತ್ । ತ-ಮ್ಮನ॑ಸಾ-ಽನು॒ದ್ರುತ್ಯಾ॑ ಹವ॒ನೀಯೇ॑-ಽಜುಹೋತ್ । ತತೋ॒ ವೈ ಸ ದ॑ರ್​ಶಪೂರ್ಣಮಾ॒ಸಾವ॑ಸೃಜತ । ತಾವ॑ಸ್ಮಾ-ಥ್ಸೃ॒ಷ್ಟಾವಪಾ᳚ಕ್ರಾಮತಾಮ್ । ತೌ ಗ್ರಹೇ॑ಣಾ ಗೃಹ್ಣಾತ್ । ತದ್ಗ್ರಹ॑ಸ್ಯ ಗ್ರಹ॒ತ್ವಮ್ । ದ॒ರ್॒ಶ॒ಪೂ॒ರ್ಣ॒ಮಾ॒ಸಾ-ವಾ॒ಲಭ॑ಮಾನಃ । ಚತು॑ರ್​ಹೋತಾರ॒-ಮ್ಮನ॑ಸಾ-ಽನು॒ದ್ರುತ್ಯಾ॑-ಹವ॒ನೀಯೇ॑ ಜುಹುಯಾತ್ । ದ॒ರ್॒ಶ॒ಪೂ॒ರ್ಣ॒ಮಾ॒ಸಾವೇ॒ವ ಸೃ॒ಷ್ಟ್ವಾ-ಽಽರಭ್ಯ॒ ಪ್ರ ತ॑ನುತೇ ॥ 8 ॥

ಗ್ರಹೋ॑ ಭವತಿ । ದ॒ರ್॒ಶ॒ಪೂ॒ರ್ಣ॒ಮಾ॒ಸಯೋ᳚-ಸ್ಸೃ॒ಷ್ಟಯೋ॒ರ್ಧೃತ್ಯೈ᳚ ॥ ಸೋ॑-ಽಕಾಮಯತ ಚಾತುರ್ಮಾ॒ಸ್ಯಾನಿ॑ ಸೃಜೇ॒ಯೇತಿ॑ । ಸ ಏ॒ತ-ಮ್ಪಞ್ಚ॑ಹೋತಾರ-ಮಪಶ್ಯತ್ । ತ-ಮ್ಮನ॑ಸಾ-ಽನು॒ದ್ರುತ್ಯಾ॑ ಹವ॒ನೀಯೇ॑-ಽಜುಹೋತ್ । ತತೋ॒ ವೈ ಸ ಚಾ॑ತುರ್ಮಾ॒ಸ್ಯಾನ್ಯ॑ಸೃಜತ । ತಾನ್ಯ॑ಸ್ಮಾ-ಥ್ಸೃ॒ಷ್ಟಾನ್ಯಪಾ᳚ಕ್ರಾಮನ್ನ್ । ತಾನಿ॒ ಗ್ರಹೇ॑ಣಾಗೃಹ್ಣಾತ್ । ತದ್ಗ್ರಹ॑ಸ್ಯ ಗ್ರಹ॒ತ್ವಮ್ । ಚಾ॒ತು॒ರ್ಮಾ॒ಸ್ಯಾನ್ಯಾ॒ಲಭ॑ಮಾನಃ ॥ 9 ॥

ಪಞ್ಚ॑ಹೋತಾರ॒-ಮ್ಮನ॑ಸಾ-ಽನು॒ದ್ರುತ್ಯಾ॑ ಹವ॒ನೀಯೇ॑ ಜುಹುಯಾತ್ । ಚಾ॒ತು॒ರ್ಮಾ॒ಸ್ಯಾನ್ಯೇ॒ವ ಸೃ॒ಷ್ಟ್ವಾ-ಽಽರಭ್ಯ॒ ಪ್ರ ತ॑ನುತೇ । ಗ್ರಹೋ॑ ಭವತಿ । ಚಾ॒ತು॒ರ್ಮಾ॒ಸ್ಯಾನಾಗ್ಂ॑ ಸೃ॒ಷ್ಟಾನಾ॒-ನ್ಧೃತ್ಯೈ᳚ ॥ ಸೋ॑-ಽಕಾಮಯತ ಪಶುಬ॒ನ್ಧಗ್ಂ ಸೃ॑ಜೇ॒ಯೇತಿ॑ । ಸ ಏ॒ತಗ್ಂ ಷಡ್ಢೋ॑ತಾರ-ಮಪಶ್ಯತ್ । ತ-ಮ್ಮನ॑ಸಾ-ಽನು॒ದ್ರುತ್ಯಾ॑ ಹವ॒ನೀಯೇ॑-ಽಜುಹೋತ್ । ತತೋ॒ ವೈ ಸ ಪ॑ಶುಬ॒ನ್ಧಮ॑ಸೃಜತ । ಸೋ᳚-ಽಸ್ಮಾ-ಥ್ಸೃ॒ಷ್ಟೋ ಽಪಾ᳚ಕ್ರಾಮತ್ । ತ-ಙ್ಗ್ರಹೇ॑ಣಾಗೃಹ್ಣಾತ್ ॥ 10 ॥

ತದ್ಗ್ರಹ॑ಸ್ಯ ಗ್ರಹ॒ತ್ವಮ್ । ಪ॒ಶು॒ಬ॒ನ್ಧೇನ॑ ಯ॒ಖ್ಷ್ಯಮಾ॑ಣಃ । ಷಡ್ಢೋ॑ತಾರ॒-ಮ್ಮನ॑ಸಾ ಽನು॒ದ್ರುತ್ಯಾ॑ ಹವ॒ನೀಯೇ॑ ಜುಹುಯಾತ್ । ಪ॒ಶು॒ಬ॒ನ್ಧಮೇ॒ವ ಸೃ॒ಷ್ಟ್ವಾ-ಽಽರಭ್ಯ॒ ಪ್ರ ತ॑ನುತೇ । ಗ್ರಹೋ॑ ಭವತಿ । ಪ॒ಶು॒ಬ॒ನ್ಧಸ್ಯ॑ ಸೃ॒ಷ್ಟಸ್ಯ॒ ಧೃತ್ಯೈ᳚ ॥ ಸೋ॑-ಽಕಾಮಯತ ಸೌ॒ಮ್ಯ-ಮ॑ದ್ಧ್ವ॒ರಗ್ಂ ಸೃ॑ಜೇ॒ಯೇತಿ॑ । ಸ ಏ॒ತಗ್ಂ ಸ॒ಪ್ತಹೋ॑ತಾರ-ಮಪಶ್ಯತ್ । ತ-ಮ್ಮನ॑ಸಾ-ಽನು॒ದ್ರುತ್ಯಾ॑ ಹವ॒ನೀಯೇ॑ ಽಜುಹೋತ್ । ತತೋ॒ ವೈ ಸ ಸೌ॒ಮ್ಯ-ಮ॑ದ್ಧ್ವ॒ರ-ಮ॑ಸೃಜತ ॥ 11 ॥

ಸೋ᳚-ಽಸ್ಮಾ-ಥ್ಸೃ॒ಷ್ಟೋ-ಽಪಾ᳚ಕ್ರಾಮತ್ । ತ-ಙ್ಗ್ರಹೇ॑ಣಾಗೃಹ್ಣಾತ್ । ತದ್ಗ್ರಹ॑ಸ್ಯ ಗ್ರಹ॒ತ್ವಮ್ । ದೀ॒ಖ್ಷಿ॒ಷ್ಯಮಾ॑ಣಃ । ಸ॒ಪ್ತಹೋ॑ತಾರ॒-ಮ್ಮನ॑ಸಾ-ಽನು॒ದ್ರುತ್ಯಾ॑ ಹವ॒ನೀಯೇ॑ ಜುಹುಯಾತ್ । ಸೌ॒ಮ್ಯಮೇ॒ವಾದ್ಧ್ವ॒ರಗ್ಂ ಸೃ॒ಷ್ಟ್ವಾ-ಽಽರಭ್ಯ॒ ಪ್ರ ತ॑ನುತೇ । ಗ್ರಹೋ॑ ಭವತಿ । ಸೌ॒ಮ್ಯಸ್ಯಾ᳚-ದ್ಧ್ವ॒ರಸ್ಯ॑ ಸೃ॒ಷ್ಟಸ್ಯ॒ ಧೃತ್ಯೈ᳚ ॥ ದೇ॒ವೇಭ್ಯೋ॒ ವೈ ಯ॒ಜ್ಞೋ ನ ಪ್ರಾಭ॑ವತ್ । ತಮೇ॑ತಾವ॒ಚ್ಛ-ಸ್ಸಮ॑ಭರನ್ನ್ ॥ 12 ॥

ಯ-ಥ್ಸ॑ಭಾಂ॒ರಾಃ । ತತೋ॒ ವೈ ತೇಭ್ಯೋ॑ ಯ॒ಜ್ಞಃ ಪ್ರಾಭ॑ವತ್ । ಯ-ಥ್ಸ॑ಭಾಂ॒ರಾ ಭವ॑ನ್ತಿ । ಯ॒ಜ್ಞಸ್ಯ॒ ಪ್ರಭೂ᳚ತ್ಯೈ ॥ ಆ॒ತಿ॒ತ್ಥ್ಯಮಾ॒ಸಾದ್ಯ॒ ವ್ಯಾಚ॑ಷ್ಟೇ । ಯ॒ಜ್ಞ॒ಮು॒ಖಂ-ವಾಁ ಆ॑ತಿ॒ಥ್ಯಮ್ । ಮು॒ಖ॒ತ ಏ॒ವ ಯ॒ಜ್ಞಗ್ಂ ಸ॒ಭೃನ್ತ್ಯ॒ ಪ್ರ ತ॑ನುತೇ ॥ ಅಯ॑ಜ್ಞೋ॒ ವಾ ಏ॒ಷಃ । ಯೋ॑-ಽಪ॒ತ್ನೀಕಃ॑ । ನ ಪ್ರ॒ಜಾಃ ಪ್ರ ಜಾ॑ಯೇರನ್ನ್ । ಪತ್ನೀ॒ರ್ವ್ಯಾಚ॑ಷ್ಟೇ । ಯ॒ಜ್ಞಮೇ॒ವಾಕಃ॑ । ಪ್ರ॒ಜಾನಾ᳚-ಮ್ಪ್ರ॒ಜನ॑ನಾಯ ॥ ಉ॒ಪ॒ಸಥ್ಸು॒ ವ್ಯಾಚ॑ಷ್ಟೇ । ಏ॒ತದ್ವೈ ಪತ್ನೀ॑ನಾ-ಮಾ॒ಯತ॑ನಮ್ । ಸ್ವ ಏ॒ವೈನಾ॑ ಆ॒ಯತ॒ನೇ-ಽವ॑ ಕಲ್ಪಯತಿ ॥ 13 ॥
(ತ॒ನು॒ತ॒ - ಆ॒ಲಭ॑ಮಾನೋ - ಽಗೃಹ್ಣಾ - ದಸೃಜ - ತಾಭರ - ಞ್ಜಾಯೇರ॒ನ್-ಥ್ಷಟ್ಚ॑) (ಅ. 2)

ಅನುವಾಕಂ 3 - ಚತುರ್​ಹೋತೃಪಞ್ಚಹೋತೃಮನ್ತ್ರಗ್ರಹಭಾಗಯೋಃ ಪುರುಷಾರ್ಥ ಪ್ರಯೋಗಃ

ಪ್ರ॒ಜಾಪ॑ತಿ-ರಕಾಮಯತ॒ ಪ್ರ ಜಾ॑ಯೇ॒ಯೇತಿ॑ । ಸ ತಪೋ॑-ಽತಪ್ಯತ । ಸ ತ್ರಿ॒ವೃತ॒ಗ್ಗ್॒ ಸ್ತೋಮ॑-ಮಸೃಜತ । ತ-ಮ್ಪ॑ಞ್ಚದ॒ಶಸ್ತೋಮೋ॑ ಮದ್ಧ್ಯ॒ತ ಉದ॑ತೃಣತ್ । ತೌ ಪೂ᳚ರ್ವಪ॒ಖ್ಷಶ್ಚಾ॑ಪರಪ॒ಖ್ಷಶ್ಚಾ॑ಭವತಾಮ್ । ಪೂ॒ರ್ವ॒ಪ॒ಖ್ಷ-ನ್ದೇ॒ವಾ ಅನ್ವಸೃ॑ಜ್ಯನ್ತ । ಅ॒ಪ॒ರ॒ಪ॒ಖ್ಷ-ಮನ್ವಸು॑ರಾಃ । ತತೋ॑ ದೇ॒ವಾ ಅಭ॑ವನ್ನ್ । ಪರಾ-ಽಸು॑ರಾಃ । ಯ-ಙ್ಕಾ॒ಮಯೇ॑ತ॒ ವಸೀ॑ಯಾನ್-ಥ್ಸ್ಯಾ॒ದಿತಿ॑ ॥ 14 ॥

ತ-ಮ್ಪೂ᳚ರ್ವಪ॒ಖ್ಷೇ ಯಾ॑ಜಯೇತ್ । ವಸೀ॑ಯಾನೇ॒ವ ಭ॑ವತಿ । ಯ-ಙ್ಕಾ॒ಮಯೇ॑ತ॒ ಪಾಪೀ॑ಯಾನ್-ಥ್ಸ್ಯಾ॒ದಿತಿ॑ । ತಮ॑ಪರಪ॒ಖ್ಷೇ ಯಾ॑ಜಯೇತ್ । ಪಾಪೀ॑ಯಾನೇ॒ವ ಭ॑ವತಿ । ತಸ್ಮಾ᳚-ತ್ಪೂರ್ವಪ॒ಖ್ಷೋ॑ ¶ಪ॒ಖ್ಷಾತ್-ಕ॑ರು॒ಣ್ಯ॑ತರಃ ॥ ಪ್ರ॒ಜಾಪ॑ತಿ॒ರ್ವೈ ದಶ॑ಹೋತಾ । ಚತು॑ರ್​ಹೋತಾ॒ ಪಞ್ಚ॑ಹೋತಾ । ಷಡ್ಢೋ॑ತಾ ಸ॒ಪ್ತಹೋ॑ತಾ । ಋ॒ತವ॑-ಸ್ಸಂ​ವಁಥ್ಸ॒ರಃ ॥ 15 ॥

ಪ್ರ॒ಜಾಃ ಪ॒ಶವ॑ ಇ॒ಮೇ ಲೋ॒ಕಾಃ । ಯ ಏ॒ವ-ಮ್ಪ್ರ॒ಜಾಪ॑ತಿ-ಮ್ಬ॒ಹೋರ್ಭೂಯಾಗ್ಂ॑ಸಂ॒-ವೇಁದ॑ । ಬ॒ಹೋರೇ॒ವ ಭೂಯಾ᳚-ನ್ಭವತಿ ॥ ಪ್ರ॒ಜಾಪ॑ತಿ-ರ್ದೇವಾಸು॒ರಾನ॑ಸೃಜತ । ಸ ಇನ್ದ್ರ॒ಮಪಿ॒ ನಾಸೃ॑ಜತ । ತ-ನ್ದೇ॒ವಾ ಅ॑ಬ್ರುವನ್ನ್ । ಇನ್ದ್ರ॑-ನ್ನೋ ಜನ॒ಯೇತಿ॑ । ಸೋ᳚-ಽಬ್ರವೀತ್ । ಯಥಾ॒ ಽಹಂ-ಯುಁ॒ಷ್ಮಾಗ್​ ಸ್ತಪ॒ಸಾ ಽಸೃ॑ಖ್ಷಿ । ಏ॒ವಮಿನ್ದ್ರ॑-ಞ್ಜನಯದ್ಧ್ವ॒ಮಿತಿ॑ ॥ 16 ॥

ತೇ ತಪೋ॑-ಽತಪ್ಯನ್ತ । ತ ಆ॒ತ್ಮನ್ನಿನ್ದ್ರ॑-ಮಪಶ್ಯನ್ನ್ । ತಮ॑ಬ್ರುವನ್ನ್ । ಜಾಯ॒ಸ್ವೇತಿ॑ । ಸೋ᳚-ಽಬ್ರವೀತ್ । ಕಿ-ಮ್ಭಾ॑ಗ॒ಧೇಯ॑-ಮ॒ಭಿಜ॑ನಿಷ್ಯ॒ ಇತಿ॑ । ಋ॒ತೂನ್-ಥ್ಸಂ॑​ವಁಥ್ಸ॒ರಮ್ । ಪ್ರ॒ಜಾಃ ಪ॒ಶೂನ್ । ಇ॒ಮಾಲ್ ಁಲೋ॒ಕಾನಿತ್ಯ॑ಬ್ರುವನ್ನ್ । ತಂ-ವೈಁ ಮಾ-ಽಽಹು॑ತ್ಯಾ॒ ಪ್ರಜ॑ನಯ॒ತೇತ್ಯ॑ಬ್ರವೀತ್ ॥ 17 ॥

ತ-ಞ್ಚತು॑ರ್​ಹೋತ್ರಾ॒ ಪ್ರಾಜ॑ನಯನ್ನ್ ॥ ಯಃ ಕಾ॒ಮಯೇ॑ತ ವೀ॒ರೋ ಮ॒ ಆ ಜಾ॑ಯೇ॒ತೇತಿ॑ । ಸ ಚತು॑ರ್​ಹೋತಾರ-ಞ್ಜುಹುಯಾತ್ । ಪ್ರ॒ಜಾಪ॑ತಿ॒ರ್ವೈ ಚತು॑ರ್​ಹೋತಾ । ಪ್ರ॒ಜಾಪ॑ತಿರೇ॒ವ ಭೂ॒ತ್ವಾ ಪ್ರಜಾ॑ಯತೇ । ಜ॒ಜನ॒ದಿನ್ದ್ರ॑-ಮಿನ್ದ್ರಿ॒ಯಾಯ॒ ಸ್ವಾಹೇತಿ॒ ಗ್ರಹೇ॑ಣ ಜುಹೋತಿ । ಆ-ಽಸ್ಯ॑ ವೀ॒ರೋ ಜಾ॑ಯತೇ । ವೀ॒ರಗ್ಂ ಹಿ ದೇ॒ವಾ ಏ॒ತಯಾ ಽಽಹು॑ತ್ಯಾ॒ ಪ್ರಾಜ॑ನಯನ್ನ್ ॥ ಆ॒ದಿ॒ತ್ಯಾಶ್ಚಾಙ್ಗಿ॑ರಸಶ್ಚ ಸುವ॒ರ್ಗೇ ಲೋ॒ಕೇ᳚ ಽಸ್ಪರ್ಧನ್ತ । ವ॒ಯ-ಮ್ಪೂರ್ವೇ॑ ಸುವ॒ರ್ಗಂ-ಲೋಁ॒ಕಮಿ॑ಯಾಮ ವ॒ಯ-ಮ್ಪೂರ್ವ॒ ಇತಿ॑ ॥ 18 ॥

ತ ಆ॑ದಿ॒ತ್ಯಾ ಏ॒ತ-ಮ್ಪಞ್ಚ॑ಹೋತಾರ-ಮಪಶ್ಯನ್ನ್ । ತ-ಮ್ಪು॒ರಾ ಪ್ರಾ॑ತರನುವಾ॒ಕಾದಾಗ್ನೀ᳚ದ್ಧ್ರೇ ಽಜುಹವುಃ । ತತೋ॒ ವೈ ತೇ ಪೂರ್ವೇ॑ ಸುವ॒ರ್ಗಂ-ಲೋಁ॒ಕಮಾ॑ಯನ್ನ್ । ಯ-ಸ್ಸು॑ವ॒ರ್ಗಕಾ॑ಮ॒-ಸ್ಸ್ಯಾತ್ । ಸ ಪಞ್ಚ॑ಹೋತಾರ-ಮ್ಪು॒ರಾ ಪ್ರಾ॑ತರನುವಾ॒ಕಾದಾಗ್ನೀ᳚ದ್ಧ್ರೇ ಜುಹುಯಾತ್ । ಸಂ॒​ವಁ॒ಥ್ಸ॒ರೋ ವೈ ಪಞ್ಚ॑ಹೋತಾ । ಸಂ॒​ವಁ॒ಥ್ಸ॒ರ-ಸ್ಸು॑ವ॒ರ್ಗೋ ಲೋ॒ಕಃ । ಸಂ॒​ವಁ॒ಥ್ಸ॒ರ ಏ॒ವರ್ತುಷು॑ ಪ್ರತಿ॒ಷ್ಠಾಯ॑ । ಸು॒ವ॒ರ್ಗಂ-ಲೋಁ॒ಕಮೇ॑ತಿ ॥ ತೇ᳚ಬ್ರುವ॒-ನ್ನಙ್ಗಿ॑ರಸ ಆದಿ॒ತ್ಯಾನ್ ॥ 19 ॥

ಕ್ವ॑ ಸ್ಥ । ಕ್ವ॑ ವ-ಸ್ಸ॒ದ್ಭ್ಯೋ ಹ॒ವ್ಯಂ-ವಁ॑ಖ್ಷ್ಯಾಮ॒ ಇತಿ॑ । ಛನ್ದ॒-ಸ್ಸ್ವಿತ್ಯ॑ಬ್ರುವನ್ನ್ । ಗಾ॒ಯ॒ತ್ರಿ॒ಯಾ-ನ್ತ್ರಿ॒ಷ್ಟುಭಿ॒-ಜಗ॑ತ್ಯಾ॒ಮಿತಿ॑ । ತಸ್ಮಾ॒ಚ್ಛನ್ದ॑-ಸ್ಸು ಸ॒ದ್ಭ್ಯ ಆ॑ದಿ॒ತ್ಯೇಭ್ಯಃ॑ । ಆ॒ಙ್ಗೀ॒ರ॒ಸೀಃ ಪ್ರ॒ಜಾ ಹ॒ವ್ಯಂ-ವಁ॑ಹನ್ತಿ । ವಹ॑ನ್ತ್ಯಸ್ಮೈ ಪ್ರ॒ಜಾ ಬ॒ಲಿಮ್ । ಐನ॒ಮಪ್ರ॑ತಿಖ್ಯಾತ-ಙ್ಗಚ್ಛತಿ । ಯ ಏ॒ವಂ-ವೇಁದ॑ ॥ ದ್ವಾದ॑ಶ॒ ಮಾಸಾಃ॒ ಪಞ್ಚ॒ರ್ತವಃ॑ । ತ್ರಯ॑ ಇ॒ಮೇ ಲೋ॒ಕಾಃ । ಅ॒ಸಾವಾ॑ದಿ॒ತ್ಯ ಏ॑ಕವಿ॒ಗ್ಂ॒ಶಃ । ಏ॒ತಸ್ಮಿ॒ನ್ ವಾ ಏ॒ಷ ಶ್ರಿ॒ತಃ । ಏ॒ತಸ್ಮಿ॒ನ್-ಪ್ರತಿ॑ಷ್ಠಿತಃ । ಯ ಏ॒ವಮೇ॒ತಗ್ಗ್​ ಶ್ರಿ॒ತ-ಮ್ಪ್ರತಿ॑ಷ್ಠಿತಂ॒-ವೇಁದ॑ । ಪ್ರತ್ಯೇ॒ವ ತಿ॑ಷ್ಠತಿ ॥ 20 ॥
(ಸ್ಯಾ॒ದಿತಿ॑ - ಸಂ​ವಁಥ್ಸ॒ರೋ - ಜ॑ನಯದ್ಧ್ವ॒ಮಿತೀ - ತ್ಯ॑ಬ್ರವೀ॒ತ್ - ಪೂರ್ವ॒ ಇತ್ಯಾ॑ - ದಿ॒ತ್ಯಾನ್ - ಋ॒ತವ॒-ಷ್ಷಟ್ಚ॑) (ಅ. 3)

ಅನುವಾಕಂ 4 - ಜಗ-ಥ್ಸೃಷ್ಟಿಕಥನಮುಖೇನ ಹೋತೃಮನ್ತ್ರಪ್ರಶಂಸಾ
ಪ್ರ॒ಜಾಪ॑ತಿ-ರಕಾಮಯತ॒ ಪ್ರಜಾ॑ಯೇ॒ಯೇತಿ॑ । ಸ ಏ॒ತ-ನ್ದಶ॑ಹೋತಾರ-ಮಪಶ್ಯತ್ । ತೇನ॑ ದಶ॒ಧಾ ಽಽತ್ಮಾನಂ॑-ವಿಁ॒ಧಾಯ॑ । ದಶ॑ಹೋತ್ರಾ ಽತಪ್ಯತ । ತಸ್ಯ॒ ಚಿತ್ತಿ॒-ಸ್ಸ್ರುಗಾಸೀ᳚ತ್ । ಚಿ॒ತ್ತಮಾಜ್ಯ᳚ಮ್ । ತಸ್ಯೈ॒ತಾ॑ವತ್ಯೇ॒ವ ವಾಗಾಸೀ᳚ತ್ । ಏ॒ತಾವಾನ್॑. ಯಜ್ಞಕ್ರ॒ತುಃ ॥ ಸ ಚತು॑ರ್​ಹೋತಾರ-ಮಸೃಜತ । ಸೋ॑-ಽನನ್ದತ್ ॥ 21 ॥

ಅಸೃ॑ಖ್ಷಿ॒ ವಾ ಇ॒ಮಮಿತಿ॑ । ತಸ್ಯ॒ ಸೋಮೋ॑ ಹ॒ವಿರಾಸೀ᳚ತ್ । ಸ ಚತು॑ರ್​ಹೋತ್ರಾ ಽತಪ್ಯತ । ಸೋ॑-ಽತಾಮ್ಯತ್ । ಸ ಭೂರಿತಿ॒ ವ್ಯಾಹ॑ರತ್ । ಸ ಭೂಮಿ॑ಮಸೃಜತ । ಅ॒ಗ್ನಿ॒ಹೋ॒ತ್ರ-ನ್ದ॑ರ್​ಶಪೂರ್ಣಮಾ॒ಸೌ ಯಜೂಗ್ಂ॑ಷಿ । ಸ ದ್ವಿ॒ತೀಯ॑ಮತಪ್ಯತ । ಸೋ॑-ಽತಾಮ್ಯತ್ । ಸ ಭುವ॒ ಇತಿ॒ ವ್ಯಾಹ॑ರತ್ ॥ 22 ॥

ಸೋ᳚-ಽನ್ತರಿ॑ಖ್ಷ-ಮಸೃಜತ । ಚಾ॒ತು॒ರ್ಮಾ॒ಸ್ಯಾನಿ॒ ಸಾಮಾ॑ನಿ । ಸ ತೃ॒ತೀಯ॑ಮತಪ್ಯತ । ಸೋ॑-ಽತಾಮ್ಯತ್ । ಸ ಸುವ॒ರಿತಿ॒ ವ್ಯಾಹ॑ರತ್ । ಸ ದಿವ॑ಮಸೃಜತ । ಅ॒ಗ್ನಿ॒ಷ್ಟೋ॒ಮ-ಮು॒ಕ್ಥ್ಯ॑-ಮತಿರಾ॒ತ್ರಮೃಚಃ॑ । ಏ॒ತಾ ವೈ ವ್ಯಾಹೃ॑ತಯ ಇ॒ಮೇ ಲೋ॒ಕಾಃ । ಇ॒ಮಾ-ನ್ಖಲು॒ ವೈ ಲೋ॒ಕಾನನು॑ ಪ್ರ॒ಜಾಃ ಪ॒ಶವ॒ಶ್ಛನ್ದಾಗ್ಂ॑ಸಿ॒ ಪ್ರಾಜಾ॑ಯನ್ತ । ಯ ಏ॒ವಮೇ॒ತಾಃ ಪ್ರ॒ಜಾಪ॑ತೇಃ ಪ್ರಥ॒ಮಾ ವ್ಯಾಹೃ॑ತೀಃ॒ ಪ್ರಜಾ॑ತಾ॒ ವೇದ॑ ॥ 23 ॥

ಪ್ರ ಪ್ರ॒ಜಯಾ॑ ಪ॒ಶುಭಿ॑-ರ್ಮಿಥು॒ನೈ-ರ್ಜಾ॑ಯತೇ ॥ ಸ ಪಞ್ಚ॑ಹೋತಾರ-ಮಸೃಜತ । ಸ ಹ॒ವಿರ್ನಾ-ವಿ॑ನ್ದತ । ತಸ್ಮೈ॒ ಸೋಮ॑-ಸ್ತ॒ನುವ॒-ಮ್ಪ್ರಾಯ॑ಚ್ಛತ್ । ಏ॒ತ-ತ್ತೇ॑ ಹ॒ವಿರಿತಿ॑ । ಸ ಪಞ್ಚ॑ಹೋತ್ರಾ ಽತಪ್ಯತ । ಸೋ॑-ಽತಾಮ್ಯತ್ । ಸ ಪ್ರ॒ತ್ಯಙ್ಙ॑ಬಾಧತ । ಸೋ-ಽಸು॑ರಾ-ನಸೃಜತ । ತದ॒ಸ್ಯಾ ಪ್ರಿ॑ಯಮಾಸೀತ್ ॥ 24 ॥

ತ-ದ್ದು॒ರ್ವರ್ಣ॒ಗ್ಂ॒ ಹಿರ॑ಣ್ಯಮಭವತ್ । ತ-ದ್ದು॒ರ್ವರ್ಣ॑ಸ್ಯ॒ ಹಿರ॑ಣ್ಯಸ್ಯ॒ ಜನ್ಮ॑ । ಸ ದ್ವಿ॒ತೀಯ॑ಮತಪ್ಯತ । ಸೋ॑-ಽತಾಮ್ಯತ್ । ಸ ಪ್ರಾಂಅ॑ಬಾಧತ । ಸ ದೇ॒ವಾನ॑ಸೃಜತ । ತದ॑ಸ್ಯ ಪ್ರಿ॒ಯಮ॑ಸೀತ್ । ತ-ಥ್ಸು॒ವರ್ಣ॒ಗ್ಂ॒ ಹಿರ॑ಣ್ಯಮಭವತ್ । ತ-ಥ್ಸು॒ವರ್ಣ॑ಸ್ಯ॒ ಹಿರ॑ಣ್ಯಸ್ಯ॒ ಜನ್ಮ॑ । ಯ ಏ॒ವಗ್ಂ ಸು॒ವರ್ಣ॑ಸ್ಯ॒ ಹಿರ॑ಣ್ಯಸ್ಯ॒ ಜನ್ಮ॒ ವೇದ॑ ॥ 25 ॥

ಸು॒ವರ್ಣ॑ ಆ॒ತ್ಮನಾ॑ ಭವತಿ । ದು॒ರ್ವರ್ಣೋ᳚-ಽಸ್ಯ॒ ಭ್ರಾತೃ॑ವ್ಯಃ । ತಸ್ಮಾ᳚-ಥ್ಸು॒ವರ್ಣ॒ಗ್ಂ॒ ಹಿರ॑ಣ್ಯ-ಮ್ಭಾ॒ರ್ಯ᳚ಮ್ । ಸು॒ವರ್ಣ॑ ಏ॒ವ ಭ॑ವತಿ । ಐನ॑-ಮ್ಪ್ರಿ॒ಯ-ಙ್ಗ॑ಚ್ಛತಿ॒ ನಾಪ್ರಿ॑ಯಮ್ ॥ ಸ ಸ॒ಪ್ತಹೋ॑ತಾರ-ಮಸೃಜತ । ಸ ಸ॒ಪ್ತಹೋ᳚ತ್ರೈ॒ವ ಸು॑ವ॒ರ್ಗಂ-ಲೋಁ॒ಕಮೈ᳚ತ್ ॥ ತ್ರಿ॒ಣ॒ವೇನ॒ ಸ್ತೋಮೇ॑ನೈ॒ಭ್ಯೋ ಲೋ॒ಕೇಭ್ಯೋ-ಽಸು॑ರಾ॒-ನ್ಪ್ರಾಣು॑ದತ । ತ್ರ॒ಯ॒ಸ್ತ್ರಿ॒ಗ್ಂ॒ಶೇನ॒ ಪ್ರತ್ಯ॑ತಿಷ್ಠತ್ । ಏ॒ಕ॒ವಿ॒ಗ್ಂ॒ಶೇನ॒ ರುಚ॑ಮಧತ್ತ ॥ 26 ॥

ಸ॒ಪ್ತ॒ದ॒ಶೇನ॒ ಪ್ರಾಜಾ॑ಯತ । ಯ ಏ॒ವಂ-ವಿಁ॒ದ್ವಾನ್-ಥ್ಸೋಮೇ॑ನ॒ ಯಜ॑ತೇ । ಸ॒ಪ್ತಹೋ᳚ತ್ರೈ॒ವ ಸು॑ವ॒ರ್ಗಂ-ಲೋಁ॒ಕಮೇ॑ತಿ । ತ್ರಿ॒ಣ॒ವೇನ॒ ಸ್ತೋಮೇ॑ನೈ॒ಭ್ಯೋ ಲೋ॒ಕೇಭ್ಯೋ॒ ಭ್ರಾತೃ॑ವ್ಯಾ॒ನ್-ಪ್ರಣು॑ದತೇ । ತ್ರ॒ಯ॒ಸ್ತ್ರಿ॒ಗ್ಂ॒ಶೇನ॒ ಪ್ರತಿ॑ ತಿಷ್ಠತಿ । ಏ॒ಕ॒ವಿ॒ಗ್ಂ॒ಶೇನ॒ ರುಚ॑-ನ್ಧತ್ತೇ । ಸ॒ಪ್ತ॒ದ॒ಶೇನ॒ ಪ್ರಜಾ॑ಯತೇ । ತಸ್ಮಾ᳚-ಥ್ಸಪ್ತದ॒ಶ-ಸ್ಸ್ತೋಮೋ॒ ನ ನಿ॒ರ್॒ಹೃತ್ಯಃ॑ । ಪ್ರ॒ಜಾಪ॑ತಿ॒ ರ್ವೈ ಸ॑ಪ್ತದ॒ಶಃ । ಪ್ರ॒ಜಾಪ॑ತಿಮೇ॒ವ ಮ॑ದ್ಧ್ಯ॒ತೋ ಧ॑ತ್ತೇ॒ ಪ್ರಜಾ᳚ತ್ಯೈ ॥ 27 ॥
(ಅ॒ನ॒ನ್ದ॒-ದ್- ಭುವ॒ ಇತಿ॒ ವ್ಯಾಹ॑ರ॒-ದ್- ವೇದಾ॑ - ಸೀ॒-ದ್- ವೇದಾ॑ - ಧತ್ತ॒ - ಪ್ರಜಾ᳚ತ್ಯೈ) (ಅ. 4)

ಅನುವಾಕಂ 5 - ದಖ್ಷಿಣಾಪ್ರತಿಗ್ರಹಮನ್ತ್ರವ್ಯಾಖ್ಯಾನಂ
ದೇ॒ವಾ ವೈ ವರು॑ಣಮಯಾಜಯನ್ನ್ । ಸ ಯಸ್ಯೈ॑ ಯಸ್ಯೈ ದೇ॒ವತಾ॑ಯೈ॒ ದಖ್ಷಿ॑ಣಾ॒ಮನ॑ಯತ್ । ತಾಮ॑ವ್ಲೀನಾತ್ । ತೇ᳚-ಽಬ್ರುವನ್ನ್ । ವ್ಯಾ॒ವೃತ್ಯ॒ ಪ್ರತಿ॑ ಗೃಹ್ಣಾಮ । ತಥಾ॑ ನೋ॒ ದಖ್ಷಿ॑ಣಾ॒ ನ ವ್ಲೇ᳚ಷ್ಯ॒ತೀತಿ॑ । ತೇ ವ್ಯಾ॒ವೃತ್ಯ॒ ಪ್ರತ್ಯ॑ಗೃಹ್ಣನ್ನ್ । ತತೋ॒ ವೈ ತಾ-ನ್ದಖ್ಷಿ॑ಣಾ॒ ನಾವ್ಲೀ॑ನಾತ್ । ಯ ಏ॒ವಂ-ವಿಁ॒ದ್ವಾನ್ ವ್ಯಾ॒ವೃತ್ಯ॒ ದಖ್ಷಿ॑ಣಾ-ಮ್ಪ್ರತಿಗೃ॒ಹ್ಣಾತಿ॑ । ನೈನ॒-ನ್ದಖ್ಷಿ॑ಣಾ ವ್ಲೀನಾತಿ ॥ 28 ॥

ರಾಜಾ᳚ ತ್ವಾ॒ ವರು॑ಣೋ ನಯತು ದೇವಿ ದಖ್ಷಿಣೇ॒-ಽಗ್ನಯೇ॒ ಹಿರ॑ಣ್ಯ॒ಮಿತ್ಯಾ॑ಹ । ಆ॒ಗ್ನೇ॒ಯಂ-ವೈಁ ಹಿರ॑ಣ್ಯಮ್ । ಸ್ವಯೈ॒ವೈನ॑-ದ್ದೇ॒ವತ॑ಯಾ॒ ಪ್ರತಿ॑ ಗೃಹ್ಣಾತಿ । ಸೋಮಾ॑ಯ॒ ವಾಸ॒ ಇತ್ಯಾ॑ಹ । ಸೌ॒ಮ್ಯಂ-ವೈಁ ವಾಸಃ॑ । ಸ್ವಯೈ॒ವೈನ॑-ದ್ದೇ॒ವತ॑ಯಾ॒ ಪ್ರತಿ॑ ಗೃಹ್ಣಾತಿ । ರು॒ದ್ರಾಯ॒ ಗಾಮಿತ್ಯಾ॑ಹ । ರೌ॒ದ್ರೀ ವೈ ಗೌಃ । ಸ್ವಯೈ॒ವೈನಾ᳚-ನ್ದೇ॒ವತ॑ಯಾ॒ ಪ್ರತಿ॑ ಗೃಹ್ಣಾತಿ । ವರು॑ಣಾ॒ಯಾಶ್ವ॒ಮಿತ್ಯಾ॑ಹ ॥ 29 ॥

ವಾ॒ರು॒ಣೋ ವಾ ಅಶ್ವಃ॑ । ಸ್ವಯೈ॒ವೈನ॑-ನ್ದೇ॒ವತ॑ಯಾ॒ ಪ್ರತಿ॑ ಗೃಹ್ಣಾತಿ । ಪ್ರಾ॒ಜಾಪ॑ತಯೇ॒ ಪುರು॑ಷ॒ಮಿತ್ಯಾ॑ಹ । ಪ್ರಾ॒ಜಾ॒ಪ॒ತ್ಯೋ ವೈ ಪುರು॑ಷಃ । ಸ್ವಯೈ॒ವೈನ॑-ನ್ದೇ॒ವತ॑ಯಾ॒ ಪ್ರತಿ॑ ಗೃಹ್ಣಾತಿ । ಮನ॑ವೇ॒ ತಲ್ಪ॒ಮಿತ್ಯಾ॑ಹ । ಮಾ॒ನ॒ವೋ ವೈ ತಲ್ಪಃ॑ । ಸ್ವಯೈ॒ವೈನ॑-ನ್ದೇ॒ವತ॑ಯಾ॒ ಪ್ರತಿ॑ ಗೃಹ್ಣಾತಿ । ಉ॒ತ್ತಾ॒ನಾಯಾ᳚ಙ್ಗೀರ॒ಸಾಯಾನ॒ ಇತ್ಯಾ॑ಹ । ಇ॒ಯಂ-ವಾಁ ಉ॑ತ್ತಾ॒ನ ಆ᳚ಙ್ಗೀರ॒ಸಃ ॥ 30 ॥

ಅ॒ನಯೈ॒ವೈನ॒ತ್-ಪ್ರತಿ॑ ಗೃಹ್ಣಾತಿ ॥ ವೈ॒ಶ್ವಾ॒ನ॒ರ್ಯಾರ್ಚಾ ರಥ॒-ಮ್ಪ್ರತಿ॑ ಗೃಹ್ಣಾತಿ । ವೈ॒ಶ್ವಾ॒ನ॒ರೋ ವೈ ದೇ॒ವತ॑ಯಾ॒ ರಥಃ॑ । ಸ್ವಯೈ॒ವೈನ॑-ನ್ದೇ॒ವತ॑ಯಾ॒ ಪ್ರತಿ॑ ಗೃಹ್ಣಾತಿ ॥ ತೇನಾ॑ಮೃತ॒ತ್ವಮ॑ಶ್ಯಾ॒-ಮಿತ್ಯಾ॑ಹ । ಅ॒ಮೃತ॑ಮೇ॒ವಾತ್ಮನ್-ಧ॑ತ್ತೇ ॥ ವಯೋ॑ ದಾ॒ತ್ರ ಇತ್ಯಾ॑ಹ । ವಯ॑ ಏ॒ವೈನ॑-ಙ್ಕೃ॒ತ್ವಾ । ಸು॒ವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ ॥ ಮಯೋ॒ ಮಹ್ಯ॑ಮಸ್ತು ಪ್ರತಿಗ್ರಹೀ॒ತ್ರ ಇತ್ಯಾ॑ಹ ॥ 31 ॥

ಯದ್ವೈ ಶಿ॒ವಮ್ । ತನ್ಮಯಃ॑ । ಆ॒ತ್ಮನ॑ ಏ॒ವೈಷಾ ಪರೀ᳚ತ್ತಿಃ ॥ ಕ ಇ॒ದ-ಙ್ಕಸ್ಮಾ॑ ಅದಾ॒ದಿತ್ಯಾ॑ಹ । ಪ್ರ॒ಜಾಪ॑ತಿ॒ರ್ವೈ ಕಃ । ಸ ಪ್ರ॒ಜಾಪ॑ತಯೇ ದದಾತಿ ॥ ಕಾಮಃ॒ ಕಾಮಾ॒ಯೇತ್ಯಾ॑ಹ । ಕಾಮೇ॑ನ॒ ಹಿ ದದಾ॑ತಿ । ಕಾಮೇ॑ನ ಪ್ರತಿಗೃ॒ಹ್ಣಾತಿ॑ ॥ ಕಾಮೋ॑ ದಾ॒ತಾ ಕಾಮಃ॑ ಪ್ರತಿ ಗ್ರಹೀ॒ತೇತ್ಯಾ॑ಹ ॥ 32 ॥

ಕಾಮೋ॒ ಹಿ ದಾ॒ತಾ । ಕಾಮಃ॑ ಪ್ರತಿ ಗ್ರಹೀ॒ತಾ ॥ ಕಾಮಗ್ಂ॑ ಸಮು॒ದ್ರ-ಮಾವಿ॒ಶೇತ್ಯಾ॑ಹ । ಸ॒ಮು॒ದ್ರ ಇ॑ವ॒ ಹಿ ಕಾಮಃ॑ । ನೇವ॒ ಹಿ ಕಾಮ॒ಸ್ಯಾನ್ತೋ-ಽಸ್ತಿ॑ । ನ ಸ॑ಮು॒ದ್ರಸ್ಯ॑ ॥ ಕಾಮೇ॑ನ ತ್ವಾ॒ ಪ್ರತಿ॑ ಗೃಹ್ಣಾ॒ಮೀತ್ಯಾ॑ಹ । ಯೇನ॒ ಕಾಮೇ॑ನ ಪ್ರತಿ ಗೃ॒ಹ್ಣಾತಿ॑ । ಸ ಏ॒ವೈನ॑ಮ॒ಮುಷ್ಮಿ॑ಲ್ ಁಲೋ॒ಕೇ ಕಾಮ॒ ಆಗ॑ಚ್ಛತಿ ॥ ಕಾಮೈ॒ತತ್ತ॑ ಏ॒ಷಾ ತೇ॑ ಕಾಮ॒ ದಖ್ಷಿ॒ಣೇತ್ಯಾ॑ಹ । ಕಾಮ॑ ಏ॒ವ ತ-ದ್ಯಜ॑ಮಾನೋ॒-ಽಮುಷ್ಮಿ॑ಲ್ ಁಲೋ॒ಕೇ ದಖ್ಷಿ॑ಣಾಮಿಚ್ಛತಿ । ನ ಪ್ರ॑ತಿಗ್ರಹೀ॒ತರಿ॑ ॥ ಯ ಏ॒ವಂ-ವಿಁ॒ದ್ವಾನ್-ದಖ್ಷಿ॑ಣಾ-ಮ್ಪ್ರತಿಗೃ॒ಹ್ಣಾತಿ॑ । ಅ॒ನೃ॒ಣಾಮೇ॒ವೈನಾ॒-ಮ್ಪ್ರತಿ॑ ಗೃಹ್ಣಾತಿ ॥ 33 ॥
(ವ್ಲೀ॒ನಾ॒ತ್ಯ - ಶ್ವ॒ಮಿತ್ಯಾ॑ಹಾ - ಙ್ಗಿರ॒ಸಃ - ಪ್ರ॑ತಿಗ್ರಹೀ॒ತ್ರ ಇತ್ಯಾ॑ಹ - ಪ್ರತಿಗ್ರಹೀ॒ತೇತ್ಯಾ॑ಹ॒ - ದಖ್ಷಿ॒ಣೇತ್ಯಾ॑ಹ ಚ॒ತ್ವಾರಿ॑ ಚ) (ಅ. 5)

ಅನುವಾಕಂ 6 - ದ್ವಾದಶಾಹದಶಮೇ-ಽಹನಿ ಹೋತೃಮನ್ತ್ರಾಃ
ಅನ್ತೋ॒ ವಾ ಏ॒ಷ ಯ॒ಜ್ಞಸ್ಯ॑ । ಯ-ದ್ದ॑ಶ॒ಮಮಹಃ॑ । ದ॒ಶ॒ಮೇ-ಽಹ᳚ನ್-ಥ್ಸರ್ಪರಾ॒ಜ್ಞಿಯಾ॑ ಋ॒ಗ್ಭಿ-ಸ್ಸ್ತು॑ವನ್ತಿ । ಯ॒ಜ್ಞಸ್ಯೈ॒ವಾನ್ತ॑-ಙ್ಗ॒ತ್ವಾ । ಅ॒ನ್ನಾದ್ಯ॒ಮವ॑ರುನ್ಧತೇ ॥ ತಿ॒ಸೃಭಿ॑-ಸ್ಸ್ತುವನ್ತಿ । ತ್ರಯ॑ ಇ॒ಮೇ ಲೋ॒ಕಾಃ । ಏ॒ಭ್ಯ ಏ॒ವ ಲೋ॒ಕೇಭ್ಯೋ॒-ಽನ್ನಾದ್ಯ॒ಮವ॑ರುನ್ಧತೇ । ಪೃಶ್ನಿ॑ವತೀ-ರ್ಭವನ್ತಿ । ಅನ್ನಂ॒-ವೈಁ ಪೃಶ್ನಿ॑ ॥ 34 ॥

ಅನ್ನ॑ಮೇ॒ವಾವ॑-ರುನ್ಧತೇ ॥ ಮನ॑ಸಾ॒ ಪ್ರಸ್ತೌ॑ತಿ । ಮನ॒ಸೋದ್ಗಾ॑ಯತಿ । ಮನ॑ಸಾ॒ ಪ್ರತಿ॑ ಹರತಿ । ಮನ॑ ಇವ॒ ಹಿ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒ರಾಪ್ತ್ಯೈ᳚ ॥ ದೇ॒ವಾ ವೈ ಸ॒ರ್ಪಾಃ । ತೇಷಾ॑ಮಿ॒ಯಗ್ಂ ರಾಜ್ಞೀ᳚ । ಯ-ಥ್ಸ॑ರ್ಪರಾ॒ಜ್ಞಿಯಾ॑ ಋ॒ಗ್ಭಿ-ಸ್ಸ್ತು॒ವನ್ತಿ॑ । ಅ॒ಸ್ಯಾಮೇ॒ವ ಪ್ರತಿ॑ ತಿಷ್ಠನ್ತಿ ॥ 35 ॥

ಚತು॑ರ್​ಹೋತೄ॒ನ್॒. ಹೋತಾ॒ ವ್ಯಾಚ॑ಷ್ಟೇ । ಸ್ತು॒ತಮನು॑ಶಗ್ಂಸತಿ॒ ಶಾನ್ತ್ಯೈ᳚ ॥ ಅನ್ತೋ॒ ವಾ ಏ॒ಷ ಯ॒ಜ್ಞಸ್ಯ॑ । ಯ-ದ್ದ॑ಶ॒ಮಮಹಃ॑ । ಏ॒ತ-ತ್ಖಲು॒ ವೈ ದೇ॒ವಾನಾ᳚-ಮ್ಪರ॒ಮ-ಙ್ಗುಹ್ಯ॒-ಮ್ಬ್ರಹ್ಮ॑ । ಯಚ್ಚತು॑ರ್​ಹೋತಾರಃ । ದ॒ಶ॒ಮೇ-ಽಹ॒ಗ್ಗ್॒-ಶ್ಚತು॑ರ್​ಹೋತೄ॒ನ್ ವ್ಯಾಚ॑ಷ್ಟೇ । ಯ॒ಜ್ಞಸ್ಯೈ॒ವಾನ್ತ॑-ಙ್ಗ॒ತ್ವಾ । ಪ॒ರ॒ಮ-ನ್ದೇ॒ವಾನಾ॒-ಙ್ಗುಹ್ಯ॒-ಮ್ಬ್ರಹ್ಮಾವ॑ರುನ್ಧೇ । ತದೇ॒ವ ಪ್ರ॑ಕಾ॒ಶ-ಙ್ಗ॑ಮಯತಿ ॥ 36 ॥

ತದೇ॑ನ-ಮ್ಪ್ರಕಾ॒ಶ-ಙ್ಗ॒ತಮ್ । ಪ್ರ॒ಕಾ॒ಶ-ಮ್ಪ್ರ॒ಜಾನಾ᳚-ಙ್ಗಮಯತಿ ॥ ವಾಚಂ॑-ಯಁಚ್ಛತಿ । ಯ॒ಜ್ಞಸ್ಯ॒ ಧೃತ್ಯೈ᳚ ॥ ಯ॒ಜ॒ಮಾ॒ನ॒ದೇ॒ವ॒ತ್ಯಂ॑-ವಾಁ ಅಹಃ॑ । ಭ್ರಾ॒ತೃ॒ವ್ಯ॒ದೇ॒ವ॒ತ್ಯಾ॑ ರಾತ್ರಿಃ॑ । ಅಹ್ನಾ॒ ರಾತ್ರಿ॑-ನ್ಧ್ಯಾಯೇತ್ । ಭ್ರಾತೃ॑ವ್ಯಸ್ಯೈ॒ವ ತಲ್ಲೋ॒ಕಂ-ವೃಁ॑ಙ್ಕ್ತೇ । ಯದ್ದಿವಾ॒ ವಾಚಂ॑-ವಿಁಸೃ॒ಜೇತ್ । ಅಹ॒ರ್ಭ್ರಾತೃ॑ವ್ಯಾ॒ಯೋಚ್ಛಿಗ್ಂ॑ಷೇತ್ । ಯನ್ನಕ್ತಂ॑-ವಿಁಸೃ॒ಜೇತ್ । ರಾತ್ರಿ॒-ಮ್ಭ್ರಾತೃ॑ವ್ಯಾ॒ಯೋಚ್ಛಿಗ್ಂ॑ಷೇತ್ । ಅ॒ಧಿ॒ವೃ॒ಖ್ಷ॒ಸೂ॒ರ್ಯೇ ವಾಚಂ॒-ವಿಁಸೃ॑ಜತಿ । ಏ॒ತಾವ॑ನ್ತಮೇ॒ವಾಸ್ಮೈ॑ ಲೋ॒ಕಮುಚ್ಛಿಗ್ಂ॑ಷತಿ । ಯಾವ॑ದಾದಿ॒ತ್ಯೋ᳚-ಽಸ್ತ॒ಮೇತಿ॑ ॥ 37 ॥
(ಪೃಶ್ನಿ॑ - ತಿಷ್ಠನ್ತಿ - ಗಮಯತಿ - ಶಿಗ್ಂಷೇ॒-ತ್ಪಞ್ಚ॑ ಚ) (ಅ. 6)

ಅನುವಾಕಂ 7 - ಸಪ್ತಹೋತೃಮನ್ತ್ರಸಾಧ್ಯಯಜ್ಞಪ್ರಶಂಸಾ
ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ । ತಾ-ಸ್ಸೃ॒ಷ್ಟಾ-ಸ್ಸಮ॑ಶ್ಲಿಷ್ಯನ್ನ್ । ತಾ ರೂ॒ಪೇಣಾನು॒ ಪ್ರಾವಿ॑ಶತ್ । ತಸ್ಮಾ॑ದಾಹುಃ । ರೂ॒ಪಂ-ವೈಁ ಪ್ರ॒ಜಾಪ॑ತಿ॒ರಿತಿ॑ । ತಾ ನಾಮ್ನಾ-ಽನು॒ ಪ್ರಾವಿ॑ಶತ್ । ತಸ್ಮಾ॑ದಾಹುಃ । ನಾಮ॒ ವೈ ಪ್ರ॒ಜಾಪ॑ತಿ॒ರಿತಿ॑ । ತಸ್ಮಾ॒ದಪ್ಯಾ॑ ಽಮಿ॒ತ್ರೌ ಸ॒ಗನ್ತ್ಯ॑ । ನಾಮ್ನಾ॒ ಚೇದ್ಧ್ವಯೇ॑ತೇ ॥ 38 ॥

ಮಿ॒ತ್ರಮೇ॒ವ ಭ॑ವತಃ ॥ ಪ್ರ॒ಜಾಪ॑ತಿ-ರ್ದೇವಾಸು॒ರಾನ॑ಸೃಜತ । ಸ ಇನ್ದ್ರ॒ಮಪಿ॒ ನಾಸೃ॑ಜತ । ತ-ನ್ದೇ॒ವಾ ಅ॑ಬ್ರುವನ್ನ್ । ಇನ್ದ್ರ॑-ನ್ನೋ ಜನ॒ಯೇತಿ॑ । ಸ ಆ॒ತ್ಮ-ನ್ನಿನ್ದ್ರ॑-ಮಪಶ್ಯತ್ । ತಮ॑ಸೃಜತ । ತ-ನ್ತ್ರಿ॒ಷ್ಟುಗ್-ವೀ॒ರ್ಯ॑-ಮ್ಭೂ॒ತ್ವಾ-ಽನು॒ ಪ್ರಾವಿ॑ಶತ್ । ತಸ್ಯ॒ ವಜ್ರಃ॑ ಪಞ್ಚದ॒ಶೋ ಹಸ್ತ॒ ಆಪ॑ದ್ಯತ । ತೇನೋ॒ದಯ್ಯಾಸು॑ರಾನ॒ಭ್ಯ॑ ಭವತ್ ॥ 39 ॥

ಯ ಏ॒ವಂ-ವೇಁದ॑ । ಅ॒ಭಿ ಭ್ರಾತೃ॑ವ್ಯಾ-ನ್ಭವತಿ ॥ ತೇ ದೇ॒ವಾ ಅಸು॑ರೈ-ರ್ವಿ॒ಜಿತ್ಯ॑ । ಸು॒ವ॒ರ್ಗಂ-ಲೋಁ॒ಕಮಾ॑ಯನ್ನ್ । ತೇ॑-ಽಮುಷ್ಮಿ॑ಲ್ ಁಲೋ॒ಕೇ ವ್ಯ॑ಖ್ಷುದ್ಧ್ಯನ್ನ್ । ತೇ᳚-ಽಬ್ರುವನ್ನ್ । ಅ॒ಮುತಃ॑ ಪ್ರದಾನಂ॒-ವಾಁ ಉಪ॑ಜಿಜೀವಿ॒ಮೇತಿ॑ । ತೇ ಸ॒ಪ್ತಹೋ॑ತಾರಂ-ಯಁ॒ಜ್ಞಂ-ವಿಁ॒ಧಾಯಾ॒ಯಾಸ್ಯ᳚ಮ್ । ಆ॒ಙ್ಗೀ॒ರ॒ಸ-ಮ್ಪ್ರಾಹಿ॑ಣ್ವನ್ನ್ । ಏ॒ತೇನಾ॒ಮುತ್ರ॑ ಕಲ್ಪ॒ಯೇತಿ॑ ॥ 40 ॥

ತಸ್ಯ॒ ವಾ ಇ॒ಯ-ಙ್ಕ್ಲೃಪ್ತಿಃ॑ । ಯದಿ॒ದ-ಙ್ಕಿ-ಞ್ಚ॑ । ಯ ಏ॒ವಂ-ವೇಁದ॑ । ಕಲ್ಪ॑ತೇ-ಽಸ್ಮೈ । ಸ ವಾ ಅ॒ಯ-ಮ್ಮ॑ನು॒ಷ್ಯೇ॑ಷು ಯ॒ಜ್ಞ-ಸ್ಸ॒ಪ್ತಹೋ॑ತಾ । ಅ॒ಮುತ್ರ॑ ಸ॒ದ್ಭ್ಯೋ ದೇ॒ವೇಭ್ಯೋ॑ ಹ॒ವ್ಯಂ-ವಁ॑ಹತಿ । ಯ ಏ॒ವಂ-ವೇಁದ॑ । ಉಪೈ॑ನಂ-ಯಁ॒ಜ್ಞೋ ನ॑ಮತಿ ॥ ಸೋ॑-ಽಮನ್ಯತ । ಅ॒ಭಿ ವಾ ಇ॒ಮೇ᳚-ಽಸ್ಮಾ-ಲ್ಲೋ॒ಕಾದ॒ಮುಂ​ಲೋಁ॒ಕ-ಙ್ಕ॑ಮಿಷ್ಯನ್ತ॒ ಇತಿ॑ । ಸ ವಾಚ॑ಸ್ಪತೇ॒ ಹೃದಿತಿ॒ ವ್ಯಾಹ॑ರತ್ । ತಸ್ಮಾ᳚-ತ್ಪು॒ತ್ರೋ ಹೃದ॑ಯಮ್ । ತಸ್ಮಾ॑ದ॒ಸ್ಮಾ-ಲ್ಲೋ॒ಕಾದ॒ಮುಂ-ಲೋಁ॒ಕ-ನ್ನಾಭಿಕಾ॑ಮಯನ್ತೇ । ಪು॒ತ್ರೋ ಹಿ ಹೃದ॑ಯಮ್ ॥ 41 ॥
(ಹ್ವಯೇ॑ತ - ಅಭವತ್ - ಕಲ್ಪ॒ಯೇ - ತೀತಿ॑ ಚ॒ತ್ವಾರಿ॑ ಚ) (ಅ. 7)

ಅನುವಾಕಂ 8 - ಹೋತೃಮನ್ತ್ರಾಣಾಂ ಸೋಮಯಾಗಾಙ್ಗತ್ವಂ
ದೇ॒ವಾ ವೈ ಚತು॑ರ್​ಹೋತೃಭಿ-ರ್ಯ॒ಜ್ಞಮ॑ತನ್ವತ । ತೇ ವಿ ಪಾ॒ಪ್ಮನಾ॒ ಭ್ರಾತೃ॑ವ್ಯೇ॒ಣಾಜ॑ಯನ್ತ । ಅ॒ಭಿ ಸು॑ವ॒ರ್ಗಂ-ಲೋಁ॒ಕಮ॑ಜಯನ್ನ್ । ಯ ಏ॒ವಂ-ವಿಁ॒ದ್ವಾಗ್​-ಶ್ಚತು॑ರ್​ಹೋತೃಭಿರ್ಯ॒ಜ್ಞ-ನ್ತ॑ನು॒ತೇ । ವಿ ಪಾ॒ಪ್ಮನಾ॒ ಭ್ರಾತೃ॑ವ್ಯೇಣ ಜಯತೇ । ಅ॒ಭಿ ಸು॑ವ॒ರ್ಗಂ-ಲೋಁ॒ಕ-ಞ್ಜ॑ಯತಿ ॥ ಷಡ್ಢೋ᳚ತ್ರಾ ಪ್ರಾಯ॒ಣೀಯ॒ಮಾಸಾ॑ದಯತಿ । ಅ॒ಮುಷ್ಮೈ॒ ವೈ ಲೋ॒ಕಾಯ॒ ಷಡ್ಢೋ॑ತಾ । ಘ್ನನ್ತಿ॒ ಖಲು॒ ವಾ ಏ॒ತ-ಥ್ಸೋಮ᳚ಮ್ । ಯದ॑ಭಿಷು॒ಣ್ವನ್ತಿ॑ ॥ 42 ॥

ಋ॒ಜು॒ಧೈವೈನ॑ಮ॒ಮುಂ-ಲೋಁ॒ಕ-ಙ್ಗ॑ಮಯತಿ । ಚತು॑ರ್​ಹೋತ್ರಾ ಽಽತಿ॒ತ್ಥ್ಯಮ್ । ಯಶೋ॒ ವೈ ಚತು॑ರ್​ಹೋತಾ । ಯಶ॑ ಏ॒ವಾತ್ಮನ್-ಧ॑ತ್ತೇ । ಪಞ್ಚ॑ಹೋತ್ರಾ ಪ॒ಶುಮುಪ॑ ಸಾದಯತಿ । ಸು॒ವ॒ರ್ಗ್ಯೋ॑ ವೈ ಪಞ್ಚ॑ಹೋತಾ । ಯಜ॑ಮಾನಃ ಪ॒ಶುಃ । ಯಜ॑ಮಾನಮೇ॒ವ ಸು॑ವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ । ಗ್ರಹಾ᳚ನ್-ಗೃಹೀ॒ತ್ವಾ ಸ॒ಪ್ತಹೋ॑ತಾರ-ಞ್ಜುಹೋತಿ । ಇ॒ನ್ದ್ರಿ॒ಯಂ-ವೈಁ ಸ॒ಪ್ತಹೋ॑ತಾ ॥ 43 ॥

ಇ॒ನ್ದ್ರಿ॒ಯಮೇ॒ವಾತ್ಮನ್-ಧ॑ತ್ತೇ ॥ ಯೋ ವೈ ಚತು॑ರ್​ಹೋತೄ-ನನುಸವ॒ನ-ನ್ತ॒ರ್ಪಯ॑ತಿ । ತೃಪ್ಯ॑ತಿ ಪ್ರ॒ಜಯಾ॑ ಪ॒ಶುಭಿಃ॑ । ಉಪೈ॑ನಗ್ಂ ಸೋಮಪೀ॒ಥೋ ನ॑ಮತಿ । ಬ॒ಹಿ॒ಷ್ಪವ॒ಮಾ॒ನೇ ದಶ॑ಹೋತಾರಂ॒-ವ್ಯಾಁಚ॑ಖ್ಷೀತ । ಮಾದ್ಧ್ಯ॑ನ್ದಿನೇ॒ ಪವ॑ಮಾನೇ॒ ಚತು॑ರ್​ಹೋತಾರಮ್ । ಆರ್ಭ॑ವೇ॒ ಪವ॑ಮಾನೇ॒ ಪಞ್ಚ॑ಹೋತಾರಮ್ । ಪಿ॒ತೃ॒ಯ॒ಜ್ಞೇ ಷಡ್ಢೋ॑ತಾರಮ್ । ಯ॒ಜ್ಞಾ॒ಯ॒ಜ್ಞಿಯ॑ಸ್ಯ ಸ್ತೋ॒ತ್ರೇ ಸ॒ಪ್ತಹೋ॑ತಾರಮ್ । ಅ॒ನು॒ಸ॒ವ॒ನಮೇ॒ವೈನಾಗ್॑ ಸ್ತರ್ಪಯತಿ ॥ 44 ॥

ತೃಪ್ಯ॑ತಿ ಪ್ರ॒ಜಯಾ॑ ಪ॒ಶುಭಿಃ॑ । ಉಪೈ॑ನಗ್ಂ ಸೋಮಪೀ॒ಥೋ ನ॑ಮತಿ ॥ ದೇ॒ವಾ ವೈ ಚತು॑ರ್​ಹೋತೃಭಿ-ಸ್ಸ॒ತ್ರಮಾ॑ಸತ । ಋದ್ಧಿ॑ಪರಿಮಿತಂ॒-ಯಁಶ॑ಸ್ಕಾಮಾಃ । ತೇ᳚-ಽಬ್ರುವನ್ನ್ । ಯನ್ನಃ॑ ಪ್ರಥ॒ಮಂ-ಯಁಶ॑ ಋ॒ಚ್ಛಾತ್ । ಸರ್ವೇ॑ಷಾ-ನ್ನ॒ಸ್ತ-ಥ್ಸ॒ಹಾಸ॒ದಿತಿ॑ । ಸೋಮ॒ಶ್ಚತು॑ರ್​ಹೋತ್ರಾ । ಅ॒ಗ್ನಿಃ ಪಞ್ಚ॑ಹೋತ್ರಾ । ಧಾ॒ತಾ ಷಡ್ಢೋ᳚ತ್ರಾ ॥ 45 ॥

ಇನ್ದ್ರ॑-ಸ್ಸ॒ಪ್ತಹೋ᳚ತ್ರಾ । ಪ್ರ॒ಜಾಪ॑ತಿ॒-ರ್ದಶ॑ಹೋತ್ರಾ । ತೇಷಾ॒ಗ್ಂ॒ ಸೋಮ॒ಗ್ಂ॒ ರಾಜಾ॑ನಂ॒-ಯಁಶ॑ ಆರ್ಚ್ಛತ್ ॥ ತನ್ನ್ಯ॑ಕಾಮಯತ । ತೇನಾಪಾ᳚ಕ್ರಾಮತ್ । ತೇನ॑ ಪ್ರ॒ಲಾಯ॑ಮಚರತ್ । ತ-ನ್ದೇ॒ವಾಃ ಪ್ರೈ॒ಷೈಃ ಪ್ರೈಷ॑ಮೈಚ್ಛನ್ನ್ । ತತ್-ಪ್ರೈ॒ಷಾಣಾ᳚-ಮ್ಪ್ರೈಷ॒ತ್ವಮ್ । ನಿ॒ವಿದ್ಭಿ॒ರ್ನ್ಯ॑ವೇದಯನ್ನ್ । ತನ್ನಿ॒ವಿದಾ᳚-ನ್ನಿವಿ॒ತ್ತ್ವಮ್ ॥ 46 ॥

ಆ॒ಪ್ರೀಭಿ॑ರಾಪ್ನುವನ್ನ್ । ತದಾ॒ಪ್ರೀಣಾ॑ಮಾಪ್ರಿ॒ತ್ವಮ್ । ತಮ॑ಘ್ನನ್ನ್ । ತಸ್ಯ॒ ಯಶೋ॒ ವ್ಯ॑ಗೃಹ್ಣತ । ತೇ ಗ್ರಹಾ॑ ಅಭವನ್ನ್ । ತದ್ಗ್ರಹಾ॑ಣಾ-ಙ್ಗ್ರಹ॒ತ್ವಮ್ । ಯಸ್ಯೈ॒ವಂ-ವಿಁ॒ದುಷೋ॒ ಗ್ರಹಾ॑ ಗೃ॒ಹ್ಯನ್ತೇ᳚ । ತಸ್ಯ॒ ತ್ವೇ॑ವ ಗೃ॑ಹೀ॒ತಾಃ ॥ ತೇ᳚-ಽಬ್ರುವನ್ನ್ । ಯೋ ವೈ ನ॒-ಶ್ಶ್ರೇಷ್ಠೋ-ಽಭೂ᳚ತ್ ॥ 47 ॥

ತಮ॑ವಧಿಷ್ಮ । ಪುನ॑ರಿ॒ಮಗ್ಂ ಸು॑ವಾಮಹಾ॒ ಇತಿ॑ । ತ-ಞ್ಛನ್ದೋ॑ಭಿ-ರಸುವನ್ತ । ತಚ್ಛನ್ದ॑ಸಾ-ಞ್ಛನ್ದ॒ಸ್ತ್ವಮ್ । ಸಾಮ್ನಾ॒ ಸಮಾನ॑ಯನ್ನ್ । ತ-ಥ್ಸಾಮ್ನ॑-ಸ್ಸಾಮ॒ತ್ವಮ್ । ಉ॒ಕ್ಥೈ-ರುದ॑ಸ್ಥಾಪಯನ್ನ್ । ತದು॒ಕ್ಥಾನಾ॑-ಮುಕ್ಥ॒ತ್ವಮ್ । ಯ ಏ॒ವಂ-ವೇಁದ॑ । ಪ್ರತ್ಯೇ॒ವ ತಿ॑ಷ್ಠತಿ ॥ 48 ॥

ಸರ್ವ॒ಮಾಯು॑ರೇತಿ ॥ ಸೋಮೋ॒ ವೈ ಯಶಃ॑ । ಯ ಏ॒ವಂ-ವಿಁ॒ದ್ವಾನ್-ಥ್ಸೋಮ॑ಮಾ॒ಗಚ್ಛ॑ತಿ । ಯಶ॑ ಏ॒ವೈನ॑ಮೃಚ್ಛತಿ । ತಸ್ಮಾ॑ದಾಹುಃ । ಯಶ್ಚೈ॒ವಂ-ವೇಁದ॒ ಯಶ್ಚ॒ ನ । ತಾವು॒ಭೌ ಸೋಮ॒-ಮಾಗ॑ಚ್ಛತಃ । ಸೋಮೋ॒ ಹಿ ಯಶಃ॑ । ತ-ನ್ತ್ವಾ-ಽವ ಯಶ॑ ಋಚ್ಛ॒ತೀತ್ಯಾ॑ಹುಃ । ಯ-ಸ್ಸೋಮೇ॒ ಸೋಮ॒-ಮ್ಪ್ರಾಹೇತಿ॑ । ತಸ್ಮಾ॒-ಥ್ಸೋಮೇ॒ ಸೋಮಃ॒ ಪ್ರೋಚ್ಯಃ॑ । ಯಶ॑ ಏ॒ವೈನ॑ಮೃಚ್ಛತಿ ॥ 49 ॥
(ಅ॒ಭಿ॒ಷು॒ಣ್ವನ್ತಿ॑ - ಸ॒ಪ್ತಹೋ॑ತಾ - ತರ್ಪಯತಿ॒ - ಷಡ್ಢೋ᳚ತ್ರಾ - ನಿವಿ॒ತ್ತ್ವ - ಮಭೂ᳚ತ್ - ತಿಷ್ಠತಿ॒ - ಪ್ರಾಹೇತಿ॒ ದ್ವೇ ಚ॑) (ಅ. 8)

ಅನುವಾಕಂ 9 - ಹೋತೃಮನ್ತ್ರೋತ್ಪತ್ತಿಕಥನಪ್ರಸಙ್ಗೇನ ಜಗ-ಥ್ಸೃಷ್ಟಿಃ
ಇ॒ದಂ-ವಾಁ ಅಗ್ರೇ॒ ನೈವ ಕಿಞ್ಚ॒ನಾಸೀ᳚ತ್ । ನ ದ್ಯೌರಾ॑ಸೀತ್ । ನ ಪೃ॑ಥಿ॒ವೀ । ನಾನ್ತರಿ॑ಖ್ಷಮ್ । ತದಸ॑ದೇ॒ವ ಸನ್ಮನೋ॑ ಽಕುರುತ॒ ಸ್ಯಾಮಿತಿ॑ । ತದ॑ತಪ್ಯತ । ತಸ್ಮಾ᳚ತ್-ತೇಪಾ॒ನಾದ್ಧೂ॒ಮೋ॑-ಽಜಾಯತ । ತ-ದ್ಭೂಯೋ॑-ಽತಪ್ಯತ । ತಸ್ಮಾ᳚ತ್-ತೇಪಾ॒ನಾದ॒ಗ್ನಿ-ರ॑ಜಾಯತ । ತ-ದ್ಭೂಯೋ॑-ಽತಪ್ಯತ ॥ 50 ॥

ತಸ್ಮಾ᳚ತ್-ತೇಪಾ॒ನಾಜ್ಜ್ಯೋತಿ॑-ರಜಾಯತ । ತ-ದ್ಭೂಯೋ॑-ಽತಪ್ಯತ । ತಸ್ಮಾ᳚ತ್-ತೇಪಾ॒ನಾದ॒ರ್ಚಿ-ರ॑ಜಾಯತ । ತ-ದ್ಭೂಯೋ॑-ಽತಪ್ಯತ । ತಸ್ಮಾ᳚ತ್-ತೇಪಾ॒ನಾನ್ಮರೀ॑ಚಯೋ-ಽಜಾಯನ್ತ । ತ-ದ್ಭೂಯೋ॑-ಽತಪ್ಯತ । ತಸ್ಮಾ᳚ತ್-ತೇಪಾ॒ನಾದು॑ದಾ॒ರಾ ಅ॑ಜಾಯನ್ತ । ತ-ದ್ಭೂಯೋ॑-ಽತಪ್ಯತ । ತದ॒ಭ್ರಮಿ॑ವ॒ ಸಮ॑ಹನ್ಯತ ॥ ತ-ದ್ವ॒ಸ್ತಿಮ॑ಭಿನತ್ ॥ 51 ॥

ಸ ಸ॑ಮು॒ದ್ರೋ॑-ಽಭವತ್ । ತಸ್ಮಾ᳚-ಥ್ಸಮು॒ದ್ರಸ್ಯ॒ ನ ಪಿ॑ಬನ್ತಿ । ಪ್ರ॒ಜನ॑ನಮಿವ॒ ಹಿ ಮನ್ಯ॑ನ್ತೇ । ತಸ್ಮಾ᳚-ತ್ಪ॒ಶೋ-ರ್ಜಾಯ॑ಮಾನಾ॒ದಾಪಃ॑ ಪು॒ರಸ್ತಾ᳚-ದ್ಯನ್ತಿ ॥ ತ-ದ್ದಶ॑ಹೋ॒ತಾ-ಽನ್ವ॑ಸೃಜ್ಯತ । ಪ್ರ॒ಜಾಪ॑ತಿ॒ರ್ವೈ ದಶ॑ ಹೋತಾ ॥ ಯ ಏ॒ವ-ನ್ತಪ॑ಸೋ ವೀ॒ರ್ಯಂ॑-ವಿಁ॒ದ್ವಾಗ್​ಸ್ತಪ್ಯ॑ತೇ । ಭವ॑ತ್ಯೇ॒ವ ॥ ತದ್ವಾ ಇ॒ದಮಾಪ॑-ಸ್ಸಲಿ॒ಲ-ಮಾ॑ಸೀತ್ । ಸೋ॑-ಽರೋದೀತ್-ಪ್ರ॒ಜಾಪ॑ತಿಃ ॥ 52 ॥

ಸ ಕಸ್ಮಾ॑ ಅಜ್ಞಿ । ಯ-ದ್ಯ॒ಸ್ಯಾ ಅಪ್ರ॑ತಿಷ್ಠಾಯಾ॒ ಇತಿ॑ । ಯದ॒ಫ್ಸ್ವ॑-ವಾಪ॑ದ್ಯತ । ಸಾ ಪೃ॑ಥಿ॒ವ್ಯ॑ಭವತ್ । ಯದ್ವ್ಯಮೃ॑ಷ್ಟ । ತದ॒ನ್ತರಿ॑ಖ್ಷ-ಮಭವತ್ । ಯದೂ॒ರ್ಧ್ವ-ಮು॒ದಮೃ॑ಷ್ಟ । ಸಾ ದ್ಯೌರ॑ಭವತ್ । ಯದರೋ॑ದೀತ್ । ತದ॒ನಯೋ॑ ರೋದ॒ಸ್ತ್ವಮ್ ॥ 53 ॥

ಯ ಏ॒ವಂ-ವೇಁದ॑ । ನಾಸ್ಯ॑ ಗೃ॒ಹೇ ರು॑ದನ್ತಿ । ಏ॒ತದ್ವಾ ಏ॒ಷಾಂ-ಲೋಁ॒ಕಾನಾ॒-ಞ್ಜನ್ಮ॑ । ಯ ಏ॒ವಮೇ॒ಷಾಂ-ಲೋಁ॒ಕಾನಾ॒-ಞ್ಜನ್ಮ॒ ವೇದ॑ । ನೈಷು ಲೋ॒ಕೇ-ಷ್ವಾರ್ತಿ॒ಮಾರ್ಚ್ಛ॑ತಿ । ಸ ಇ॒ಮಾ-ಮ್ಪ್ರ॑ತಿ॒ಷ್ಠಾ-ಮ॑ವಿನ್ದತ ॥ ಸ ಇ॒ಮಾ-ಮ್ಪ್ರ॑ತಿ॒ಷ್ಠಾಂ-ವಿಁ॒ತ್ತ್ವಾ ಽಕಾ॑ಮಯತ॒ ಪ್ರಜಾ॑ಯೇ॒ಯೇತಿ॑ । ಸ ತಪೋ॑-ಽತಪ್ಯತ । ಸೋ᳚-ಽನ್ತರ್ವಾ॑ನಭವತ್ । ಸ ಜ॒ಘನಾ॒ದಸು॑ರಾ-ನಸೃಜತ ॥ 54 ॥

ತೇಭ್ಯೋ॑ ಮೃ॒ನ್ಮಯೇ॒ ಪಾತ್ರೇ-ಽನ್ನ॑ಮದುಹತ್ । ಯಾ-ಽಸ್ಯ॒ ಸಾ ತ॒ನೂರಾಸೀ᳚ತ್ । ತಾಮಪಾ॑ಹತ । ಸಾ ತಮಿ॑ಸ್ರಾ-ಽಭವತ್ ॥ ಸೋ॑-ಽಕಾಮಯತ॒ ಪ್ರಜಾ॑ಯೇ॒ಯೇತಿ॑ । ಸ ತಪೋ॑-ಽತಪ್ಯತ । ಸೋ᳚-ಽನ್ತರ್ವಾ॑-ನಭವತ್ । ಸ ಪ್ರ॒ಜನ॑ನಾದೇ॒ವ ಪ್ರ॒ಜಾ ಅ॑ಸೃಜತ । ತಸ್ಮಾ॑ದಿ॒ಮಾ ಭೂಯಿ॑ಷ್ಠಾಃ । ಪ್ರ॒ಜನ॑ನಾ॒ದ್ಧ್ಯೇ॑ನಾ॒ ಅಸೃ॑ಜತ ॥ 55 ॥

ತಾಭ್ಯೋ॑ ದಾರು॒ಮಯೇ॒ ಪಾತ್ರೇ॒ ಪಯೋ॑-ಽದುಹತ । ಯಾ-ಽಸ್ಯ॒ ಸಾ ತ॒ನೂರಾಸೀ᳚ತ್ । ತಾಮಪಾ॑ಹತ । ಸಾ ಜೋಥ್ಸ್ನಾ॑ ಽಭವತ್ ॥ ಸೋ॑-ಽಕಾಮಯತ॒ ಪ್ರಜಾ॑ಯೇ॒ಯೇತಿ॑ । ಸತಪೋ॑-ಽತಪ್ಯತ । ಸೋ᳚-ಽನ್ತರ್ವಾ॑-ನಭವತ್ । ಸ ಉ॑ಪಪ॒ಖ್ಷಾಭ್ಯಾ॑-ಮೇ॒ವರ್ತೂನ॑ಸೃಜತ । ತೇಭ್ಯೋ॑ ರಜ॒ತೇ ಪಾತ್ರೇ॑ ಘೃ॒ತಮ॑ದುಹತ್ । ಯಾ-ಽಸ್ಯ॒ ಸಾ ತ॒ನೂರಾಸೀ᳚ತ್ ॥ 56 ॥

ತಾಮಪಾ॑ಹತ । ಸೋ॑-ಽಹೋರಾ॒ತ್ರಯೋ᳚-ಸ್ಸ॒ನ್ಧಿ-ರ॑ಭವತ್ ॥ ಸೋ॑-ಽಕಾಮಯತ॒ ಪ್ರಜಾ॑ಯೇ॒ಯೇತಿ॑ । ಸ ತಪೋ॑-ಽತಪ್ಯತ । ಸೋ᳚-ಽನ್ತರ್ವಾ॑-ನಭವತ್ । ಸ ಮುಖಾ᳚-ದ್ದೇ॒ವಾ-ನ॑ಸೃಜತ । ತೇಭ್ಯೋ॒ ಹರಿ॑ತೇ॒ ಪಾತ್ರೇ॒ ಸೋಮ॑ಮದುಹತ್ । ಯಾ-ಽಸ್ಯ॒ ಸಾ ತ॒ನೂರಾಸೀ᳚ತ್ । ತಾಮಪಾ॑ಹತ । ತದಹ॑ರಭವತ್ ॥ 57 ॥

ಏ॒ತೇ ವೈ ಪ್ರ॒ಜಾಪ॑ತೇ॒ರ್ದೋಹಾಃ᳚ । ಯ ಏ॒ವಂ-ವೇಁದ॑ । ದು॒ಹ ಏ॒ವ ಪ್ರ॒ಜಾಃ ॥ ದಿವಾ॒ ವೈ ನೋ॑-ಽಭೂ॒ದಿತಿ॑ । ತ-ದ್ದೇ॒ವಾನಾ᳚-ನ್ದೇವ॒ತ್ವಮ್ । ಯ ಏ॒ವ-ನ್ದೇ॒ವಾನಾ᳚-ನ್ದೇವ॒ತ್ವಂ-ವೇಁದ॑ । ದೇ॒ವವಾ॑ನೇ॒ವ ಭ॑ವತಿ ॥ ಏ॒ತದ್ವಾ ಅ॑ಹೋರಾ॒ತ್ರಾಣಾ॒-ಞ್ಜನ್ಮ॑ । ಯ ಏ॒ವಮ॑ಹೋರಾ॒ತ್ರಾಣಾ॒-ಞ್ಜನ್ಮ॒ ವೇದ॑ । ನಾಹೋ॑ರಾ॒ತ್ರೇಷ್ವಾರ್ತಿ॒ಮಾರ್ಚ್ಛ॑ತಿ ॥ 58 ॥

ಅಸ॒ತೋ-ಽಧಿ॒ ಮನೋ॑-ಽಸೃಜ್ಯತ । ಮನಃ॑ ಪ್ರ॒ಜಾಪ॑ತಿ-ಮಸೃಜತ । ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ । ತದ್ವಾ ಇ॒ದ-ಮ್ಮನ॑ಸ್ಯೇ॒ವ ಪ॑ರ॒ಮ-ಮ್ಪ್ರತಿ॑ಷ್ಠಿತಮ್ । ಯದಿ॒ದ-ಙ್ಕಿಞ್ಚ॑ । ತದೇ॒ತಚ್ಛ್ವೋ॑ವಸ್ಯ॒ ಸನ್ನಾಮ॒ ಬ್ರಹ್ಮ॑ ॥ ವ್ಯು॒ಚ್ಛನ್ತೀ᳚ ವ್ಯುಚ್ಛನ್ತ್ಯಸ್ಮೈ॒ ವಸ್ಯ॑ಸೀ ವಸ್ಯಸೀ॒ ವ್ಯು॑ಚ್ಛತಿ । ಪ್ರಜಾ॑ಯತೇ ಪ್ರ॒ಜಯಾ॑ ಪ॒ಶುಭಿಃ॑ । ಪ್ರ ಪ॑ರಮೇ॒ಷ್ಠಿನೋ॒ ಮಾತ್ರಾ॑-ಮಾಪ್ನೋತಿ । ಯ ಏ॒ವಂ-ವೇಁದ॑ ॥ 59 ॥
(ಅ॒ಗ್ನಿರ॑ಜಾಯತ॒ ತದ್ಭೂಯೋ॑-ಽತಪ್ಯತಾ - ಭಿನದ - ರೋದೀ-ತ್ಪ್ರ॒ಜಾಪ॑ತೀ - ರೋದ॒ಸ್ತ್ವ - ಮ॑ಸೃಜ॒ - ತಾಸೃ॑ಜತ - ಘೃ॒ತಮ॑ದುಹ॒ದ್ಯಾ-ಽಸ್ಯ॒ ಸಾ ತ॒ನೂರಾಸೀ॒ - ದಹ॑ರಭವ-ದ್- ಋಚ್ಛತಿ॒ - ವೇದ॑) (ಅ. 9)

(ಇ॒ದ-ನ್ಧೂ॒ಮೋ᳚ ಽಗ್ನಿ-ರ್ಜ್ಯೋತಿ॑ ರ॒ರ್ಚಿ-ರ್ಮರೀ॑ಚಯ ಉದಾ॒ರಾ ಸ್ತದ॒ಭ್ರಗ್ಂ /
ಸ ಜ॒ಘನಾ॒-ಥ್ಸಾ ತಮಿ॑ಸ್ರಾ॒ ಸ ಪ್ರ॒ಜನ॑ನಾ॒-ಥ್ಸಾ ಜೋಥ್ಸ್ನಾ॒ ಸ ಉ॑ಪಪ॒ಖ್ಷಾಭ್ಯಾ॒ಗ್ಂ॒ ಸೋ॑ ಽಹೋರಾ॒ತ್ರಯೋ᳚-ಸ್ಸ॒ನ್ಧಿ-ಸ್ಸಮುಖಾ॒-ತ್ತದಹ॑-ರ್ದೇ॒ವವಾ᳚ನ್ / ಮೃ॒ನ್ಮಯೇ॑ ದಾರು॒ಮಯೇ॑ ರಜ॒ತೇ ಹರಿ॑ತೇ॒ ತೇಭ್ಯ॒ಸ್ತಾಭ್ಯೋ॒ ದ್ವೇ ತೇಭ್ಯೋ-ಽನ್ನ॒-ಮ್ಪಯೋ॑
ಘೃ॒ತಗ್ಂ ಸೋಮಂ᳚)

ಅನುವಾಕಂ 10 - ದೇವಸೃಷ್ಟಿಮಧ್ಯೇ-ಽವಸ್ಥಿತಸ್ಯೇನ್ದ್ರಸ್ಯ ದೇವತಾಧಿಪತಿತ್ವಂ
ಪ್ರ॒ಜಾಪ॑ತಿ॒-ರಿನ್ದ್ರ॑ಮಸೃಜ-ತಾನುಜಾವ॒ರ-ನ್ದೇ॒ವಾನಾ᳚ಮ್ । ತ-ಮ್ಪ್ರಾಹಿ॑ಣೋತ್ । ಪರೇ॑ಹಿ । ಏ॒ತೇಷಾ᳚-ನ್ದೇ॒ವಾನಾ॒-ಮಧಿ॑ಪತಿರೇ॒ಧೀತಿ॑ । ತ-ನ್ದೇ॒ವಾ ಅ॑ಬ್ರುವನ್ನ್ । ಕಸ್ತ್ವಮಸಿ॑ । ವ॒ಯಂ-ವೈಁ ತ್ವಚ್ಛ್ರೇಯಾಗ್ಂ॑ಸ-ಸ್ಸ್ಮ॒ ಇತಿ॑ । ಸೋ᳚-ಽಬ್ರವೀತ್ । ಕಸ್ತ್ವಮಸಿ॑ ವ॒ಯಂ-ವೈಁ ತ್ವಚ್ಛ್ರೇಯಾಗ್ಂ॑ಸ-ಸ್ಸ್ಮ॒ ಇತಿ॑ ಮಾ ದೇ॒ವಾ ಅ॑ವೋಚ॒ನ್ನಿತಿ॑ ॥ ಅಥ॒ ವಾ ಇ॒ದ-ನ್ತರ್​ಹಿ॑ ಪ್ರ॒ಜಾಪ॑ತೌ॒ ಹರ॑ ಆಸೀತ್ ॥ 60 ॥

ಯದ॒ಸ್ಮಿನ್ನಾ॑ದಿ॒ತ್ಯೇ । ತದೇ॑ನಮಬ್ರವೀತ್ । ಏ॒ತನ್ಮೇ॒ ಪ್ರಯ॑ಚ್ಛ । ಅಥಾ॒ಹಮೇ॒ತೇಷಾ᳚-ನ್ದೇ॒ವಾನಾ॒-ಮಧಿ॑ಪತಿ-ರ್ಭವಿಷ್ಯಾ॒ಮೀತಿ॑ । ಕೋ॑ಹಗ್ಗ್​-ಸ್ಯಾ॒ಮಿತ್ಯ॑ಬ್ರವೀತ್ । ಏ॒ತ-ತ್ಪ್ರ॒ದಾಯೇತಿ॑ । ಏ॒ತ-ಥ್ಸ್ಯಾ॒ ಇತ್ಯ॑ಬ್ರವೀತ್ । ಯದೇ॒ತದ್ಬ್ರವೀ॒ಷೀತಿ॑ । ಕೋ ಹ॒ ವೈ ನಾಮ॑ ಪ್ರ॒ಜಾಪ॑ತಿಃ । ಯ ಏ॒ವಂ-ವೇಁದ॑ ॥ 61 ॥

ವಿ॒ದುರೇ॑ನ॒-ನ್ನಾಮ್ನಾ᳚ । ತದ॑ಸ್ಮೈ ರು॒ಕ್ಮ-ಙ್ಕೃ॒ತ್ವಾ ಪ್ರತ್ಯ॑ಮುಞ್ಚತ್ । ತತೋ॒ ವಾ ಇನ್ದ್ರೋ॑ ದೇ॒ವಾನಾ॒-ಮಧಿ॑ಪತಿ-ರಭವತ್ । ಯ ಏ॒ವಂ-ವೇಁದ॑ । ಅಧಿ॑ಪತಿರೇ॒ವ ಸ॑ಮಾ॒ನಾನಾ᳚-ಮ್ಭವತಿ ॥ ಸೋ॑-ಽಮನ್ಯತ । ಕಿ-ಙ್ಕಿಂ॒-ವಾಁ ಅ॑ಕರ॒ಮಿತಿ॑ । ಸ ಚ॒ನ್ದ್ರ-ಮ್ಮ॒ ಆಹ॒ರೇತಿ॒ ಪ್ರಾಲ॑ಪತ್ । ತಚ್ಚ॒ನ್ದ್ರಮ॑ಸ-ಶ್ಚನ್ದ್ರಮ॒ಸ್ತ್ವಮ್ । ಯ ಏ॒ವಂ-ವೇಁದ॑ ॥ 62 ॥

ಚ॒ನ್ದ್ರವಾ॑ನೇ॒ವ ಭ॑ವತಿ ॥ ತ-ನ್ದೇ॒ವಾ ಅ॑ಬ್ರುವನ್ನ್ । ಸು॒ವೀರ್ಯೋ॑ ಽಮರ್ಯಾ॒ ಯಥಾ॑ ಗೋಪಾ॒ಯತ॒ ಇತಿ॑ । ತ-ಥ್ಸೂರ್ಯ॑ಸ್ಯ ಸೂರ್ಯ॒ತ್ವಮ್ । ಯ ಏ॒ವಂ-ವೇಁದ॑ । ನೈನ॑-ನ್ದಭ್ನೋತಿ ॥ ಕಶ್ಚ॒ ನಾಸ್ಮಿ॒ನ್ವಾ ಇ॒ದಮಿ॑ನ್ದ್ರಿ॒ಯ-ಮ್ಪ್ರತ್ಯ॑ಸ್ಥಾ॒ದಿತಿ॑ । ತದಿನ್ದ್ರ॑-ಸ್ಯೇನ್ದ್ರ॒ತ್ವಮ್ । ಯ ಏ॒ವಂ-ವೇಁದ॑ । ಇ॒ನ್ದ್ರಿ॒ಯಾ॒ವ್ಯೇ॑ವ ಭ॑ವತಿ ॥ 63 ॥

ಅ॒ಯಂ-ವಾಁ ಇ॒ದ-ಮ್ಪ॑ರ॒ಮೋ॑-ಽಭೂ॒ದಿತಿ॑ । ತತ್-ಪ॑ರಮೇ॒ಷ್ಠಿನಃ॑ ಪರಮೇಷ್ಠಿ॒ತ್ವಮ್ । ಯ ಏ॒ವಂ-ವೇಁದ॑ । ಪ॒ರ॒ಮಾಮೇ॒ವ ಕಾಷ್ಠಾ᳚-ಙ್ಗಚ್ಛತಿ ॥ ತ-ನ್ದೇ॒ವಾ-ಸ್ಸ॑ಮ॒ನ್ತ-ಮ್ಪರ್ಯ॑ವಿಶನ್ನ್ । ವಸ॑ವಃ ಪು॒ರಸ್ತಾ᳚ತ್ । ರು॒ದ್ರಾ ದ॑ಖ್ಷಿಣ॒ತಃ । ಆ॒ದಿ॒ತ್ಯಾಃ ಪ॒ಶ್ಚಾತ್ । ವಿಶ್ವೇ॑ ದೇ॒ವಾ ಉ॑ತ್ತರ॒ತಃ । ಅಙ್ಗಿ॑ರಸಃ ಪ್ರ॒ತ್ಯಞ್ಚ᳚ಮ್ ॥ 64 ॥

ಸಾ॒ದ್ಧ್ಯಾಃ ಪರಾ᳚ಞ್ಚಮ್ । ಯ ಏ॒ವಂ-ವೇಁದ॑ । ಉಪೈ॑ನಗ್ಂ ಸಮಾ॒ನಾ-ಸ್ಸಂ-ವಿಁ॑ಶನ್ತಿ ॥ ಸ ಪ್ರ॒ಜಾಪ॑ತಿರೇ॒ವ ಭೂ॒ತ್ವಾ ಪ್ರ॒ಜಾ ಆವ॑ಯತ್ । ತಾ ಅ॑ಸ್ಮೈ॒ ನಾತಿ॑ಷ್ಠನ್ತಾ॒ನ್ನಾದ್ಯಾ॑ಯ । ತಾ ಮುಖ॑-ಮ್ಪು॒ರಸ್ತಾ॒ತ್-ಪಶ್ಯ॑ನ್ತೀಃ । ದ॒ಖ್ಷಿ॒ಣ॒ತಃ ಪರ್ಯಾ॑ಯನ್ನ್ । ಸ ದ॑ಖ್ಷಿಣ॒ತಃ ಪರ್ಯ॑ವರ್ತಯತ । ತಾ ಮುಖ॑-ಮ್ಪು॒ರಸ್ತಾ॒ತ್-ಪಶ್ಯ॑ನ್ತೀಃ । ಮುಖ॑-ನ್ದಖ್ಷಿಣ॒ತಃ ॥ 65 ॥

ಪ॒ಶ್ಚಾತ್-ಪರ್ಯಾ॑ಯನ್ನ್ । ಸ ಪ॒ಶ್ಚಾತ್-ಪರ್ಯ॑ವರ್ತಯತ । ತಾ ಮುಖ॑-ಮ್ಪು॒ರಸ್ತಾ॒ತ್-ಪಶ್ಯ॑ನ್ತೀಃ । ಮುಖ॑-ನ್ದಖ್ಷಿಣ॒ತಃ । ಮುಖ॑-ಮ್ಪ॒ಶ್ಚಾತ್ । ಉ॒ತ್ತ॒ರ॒ತಃ ಪರ್ಯಾ॑ಯನ್ನ್ । ಸ ಉ॑ತ್ತರ॒ತಃ ಪರ್ಯ॑ವರ್ತಯತ । ತಾ ಮುಖ॑-ಮ್ಪು॒ರಸ್ತಾ॒ತ್-ಪಶ್ಯ॑ನ್ತೀಃ । ಮುಖ॑-ನ್ದಖ್ಷಿಣ॒ತಃ । ಮುಖ॑-ಮ್ಪ॒ಶ್ಚಾತ್ ॥ 66 ॥

ಮುಖ॑ಮುತ್ತರ॒ತಃ । ಊ॒ರ್ಧ್ವಾ ಉದಾ॑ಯನ್ನ್ । ಸ ಉ॒ಪರಿ॑ಷ್ಟಾ॒ನ್ನ್ಯ॑-ವರ್ತಯತ । ತಾ-ಸ್ಸ॒ರ್ವತೋ॑ಮುಖೋ ಭೂ॒ತ್ವಾ ಽಽವ॑ಯತ್ । ತತೋ॒ ವೈ ತಸ್ಮೈ᳚ ಪ್ರ॒ಜಾ ಅತಿ॑ಷ್ಠನ್ತಾ॒ನ್ನಾದ್ಯಾ॑ಯ ॥ ಯ ಏ॒ವಂ-ವಿಁ॒ದ್ವಾ-ನ್ಪರಿ॑ ಚ ವ॒ರ್ತಯ॑ತೇ॒ ನಿ ಚ॑ । ಪ್ರ॒ಜಾಪ॑ತಿರೇ॒ವ ಭು॒ತ್ವಾ ಪ್ರ॒ಜಾ ಅ॑ತ್ತಿ । ತಿಷ್ಠ॑ನ್ತೇ-ಽಸ್ಮೈ ಪ್ರ॒ಜಾ ಅ॒ನ್ನಾದ್ಯಾ॑ಯ । ಅ॒ನ್ನಾ॒ದ ಏ॒ವ ಭ॑ವತಿ ॥ 67 ॥
(ಆ॒ಸೀ॒-ದ್- ವೇದ॑ - ಚನ್ದ್ರಮ॒ಸ್ತ್ವಂ-ಯಁ ಏ॒ವಂ-ವೇಁದೇ᳚ - ನ್ದ್ರಿಯಾ॒ವ್ಯೇ॑ವ ಭ॑ವತಿ - ಪ್ರ॒ತ್ಯಞ್ಚ॒ - ಮುಖ॑-ನ್ದಖ್ಷಿಣ॒ತೋ - ಮುಖ॑-ಮ್ಪ॒ಶ್ಚಾನ್ - +ನವ॑ ಚ) (ಆ10 )

ಅನುವಾಕಂ 11 - ಹೋತೃಮನ್ತ್ರಾಣಾ-ಮ್ಪುರುಷಾರ್ಥಪ್ರಯೋಗಃ
ಪ್ರ॒ಜಾಪ॑ತಿ-ರಕಾಮಯತ ಬ॒ಹೋರ್ಭೂಯಾ᳚ನ್-ಥ್ಸ್ಯಾ॒ಮಿತಿ॑ । ಸ ಏ॒ತ-ನ್ದಶ॑ಹೋತಾರ-ಮಪಶ್ಯತ್ । ತ-ಮ್ಪ್ರಾಯು॑ಙ್ಕ್ತ । ತಸ್ಯ॒ ಪ್ರಯು॑ಕ್ತಿ ಬ॒ಹೋರ್ಭೂಯಾ॑ನಭವತ್ । ಯಃ ಕಾ॒ಮಯೇ॑ತ ಬ॒ಹೋರ್ಭೂಯಾ᳚ನ್-ಥ್ಸ್ಯಾ॒ಮಿತಿ॑ । ಸ ದಶ॑ಹೋತಾರ॒-ಮ್ಪ್ರಯು॑ಞ್ಜೀತ । ಬ॒ಹೋರೇ॒ವ ಭೂಯಾ᳚ನ್-ಭವತಿ ॥ ಸೋ॑-ಽಕಾಮಯತ ವೀ॒ರೋ ಮ॒ ಆಜಾ॑ಯೇ॒ತೇತಿ॑ । ಸ ದಶ॑ಹೋತು॒ಶ್ಚತು॑ರ್​ಹೋತಾರ॒-ನ್ನಿರ॑ಮಿಮೀತ । ತ-ಮ್ಪ್ರಾಯು॑ಙ್ಕ್ತ ॥ 68 ॥

ತಸ್ಯ॒ ಪ್ರಯು॒ಕ್ತೀನ್ದ್ರೋ॑ ಽಜಾಯತ । ಯಃ ಕಾ॒ಮಯೇ॑ತ ವೀ॒ರೋ ಮ॒ ಆಜಾ॑ಯೇ॒ತೇತಿ॑ । ಸ ಚತು॑ರ್​ಹೋತಾರ॒-ಮ್ಪ್ರಯು॑ಞ್ಜೀತ । ಆ-ಽಸ್ಯ॑ ವೀ॒ರೋ ಜಾ॑ಯತೇ ॥ ಸೋ॑-ಽಕಾಮಯತ ಪಶು॒ಮಾನ್-ಥ್ಸ್ಯಾ॒ಮಿತಿ॑ । ಸ ಚತು॑ರ್​ಹೋತುಃ॒ ಪಞ್ಚ॑ಹೋತಾರ॒-ನ್ನಿರ॑ಮಿಮೀತ । ತ-ಮ್ಪ್ರಾಯು॑ಙ್ಕ್ತ । ತಸ್ಯ॒ ಪ್ರಯು॑ಕ್ತಿ ಪಶು॒ಮಾನ॑ಭವತ್ । ಯಃ ಕಾ॒ಮಯೇ॑ತ ಪಶು॒ಮಾನ್-ಥ್ಸ್ಯಾ॒ಮಿತಿ॑ । ಸ ಪಞ್ಚ॑ಹೋತಾರ॒-ಮ್ಪ್ರಯು॑ಞ್ಜೀತ ॥ 69 ॥

ಪ॒ಶು॒ಮಾನೇ॒ವ ಭ॑ವತಿ ॥ ಸೋ॑-ಽಕಾಮಯತ॒ರ್ತವೋ॑ ಮೇ ಕಲ್ಪೇರ॒ನ್ನಿತಿ॑ । ಸ ಪಞ್ಚ॑ಹೋತು॒-ಷ್ಷಡ್ಢೋ॑ತಾರ॒-ನ್ನಿರ॑ಮಿಮೀತ । ತ-ಮ್ಪ್ರಾಯು॑ಙ್ಕ್ತ । ತಸ್ಯ॒ ಪ್ರಯು॑ಕ್ತ್ಯೃ॒ತವೋ᳚-ಽಸ್ಮಾ ಅಕಲ್ಪನ್ತ । ಯಃ ಕಾ॒ಮಯೇ॑ತ॒ರ್ತವೋ॑ ಮೇ ಕಲ್ಪೇರ॒ನ್ನಿತಿ॑ । ಸ ಷಡ್ಢೋ॑ತಾರ॒-ಮ್ಪ್ರಯು॑ಞ್ಜೀತ । ಕಲ್ಪ॑ನ್ತೇ-ಽಸ್ಮಾ ಋ॒ತವಃ॑ ॥ ಸೋ॑-ಽಕಾಮಯತ ಸೋಮ॒ಪ-ಸ್ಸೋ॑ಮಯಾ॒ಜೀ ಸ್ಯಾ᳚ಮ್ । ಆ ಮೇ॑ ಸೋಮ॒ಪ-ಸ್ಸೋ॑ಮಯಾ॒ಜೀ ಜಾ॑ಯೇ॒ತೇತಿ॑ ॥ 70 ॥

ಸ ಷಡ್ಢೋ॑ತು-ಸ್ಸ॒ಪ್ತಹೋ॑ತಾರ॒-ನ್ನಿರ॑ಮಿಮೀತ । ತ-ಮ್ಪ್ರಾಯು॑ಙ್ಕ್ತ । ತಸ್ಯ॒ ಪ್ರಯು॑ಕ್ತಿ ಸೋಮ॒ಪ-ಸ್ಸೋ॑ಮಯಾ॒ಜ್ಯ॑ಭವತ್ । ಆ-ಽಸ್ಯ॑ ಸೋಮ॒ಪ-ಸ್ಸೋ॑ಮಯಾ॒ಜ್ಯ॑ಜಾಯತ । ಯಃ ಕಾ॒ಮಯೇ॑ತ ಸೋಮ॒ಪ-ಸ್ಸೋ॑ಮಯಾ॒ಜೀ ಸ್ಯಾ᳚ಮ್ । ಆ ಮೇ॑ ಸೋಮ॒ಪ-ಸ್ಸೋ॑ಮಯಾ॒ಜೀ ಜಾ॑ಯೇ॒ತೇತಿ॑ । ಸ ಸ॒ಪ್ತಹೋ॑ತಾರ॒-ಮ್ಪ್ರಯು॑ಞ್ಜೀತ । ಸೋ॒ಮ॒ಪ ಏ॒ವ ಸೋ॑ಮಯಾ॒ಜೀ ಭ॑ವತಿ । ಆ-ಽಸ್ಯ॑ ಸೋಮ॒ಪ-ಸ್ಸೋ॑ಮಯಾ॒ಜೀ ಜಾ॑ಯತೇ ॥ ಸ ವಾ ಏ॒ಷ ಪ॒ಶುಃ ಪ॑ಞ್ಚ॒ಧಾ ಪ್ರತಿ॑ ತಿಷ್ಠತಿ ॥ 71 ॥

ಪ॒ದ್ಭಿರ್ಮುಖೇ॑ನ ॥ ತೇ ದೇ॒ವಾಃ ಪ॒ಶೂನ್. ವಿ॒ತ್ತ್ವಾ । ಸು॒ವ॒ರ್ಗಂ-ಲೋಁ॒ಕಮಾ॑ಯನ್ನ್ ॥ ತೇ॑-ಽಮುಷ್ಮಿ॑ಲ್ ಁಲೋ॒ಕೇ ವ್ಯ॑ಖ್ಷುದ್ಧ್ಯನ್ನ್ । ತೇ᳚-ಽಬ್ರುವನ್ನ್ । ಅ॒ಮುತಃ॑ ಪ್ರದಾನಂ॒-ವಾಁ ಉಪ॑ಜಿಜೀವಿ॒ಮೇತಿ॑ । ತೇ ಸ॒ಪ್ತಹೋ॑ತಾರಂ-ಯಁ॒ಜ್ಞಂ-ವಿಁ॒ಧಾಯಾ॒ಯಾಸ್ಯ᳚ಮ್ । ಆ॒ಙ್ಗೀ॒ರ॒ಸ-ಮ್ಪ್ರಾಹಿ॑ಣ್ವನ್ನ್ । ಏ॒ತೇನಾ॒ಮುತ್ರ॑ ಕಲ್ಪ॒ಯೇತಿ॑ । ತಸ್ಯ॒ ವಾ ಇ॒ಯ-ಙ್ಕ್ಲೃಪ್ತಿಃ॑ ॥ 72 ॥

ಯದಿ॒ದ-ಙ್ಕಿಞ್ಚ॑ । ಯ ಏ॒ವಂ-ವೇಁದ॑ । ಕಲ್ಪ॑ತೇ-ಽಸ್ಮೈ । ಸ ವಾ ಅ॒ಯ-ಮ್ಮ॑ನು॒ಷ್ಯೇ॑ಷು ಯ॒ಜ್ಞ-ಸ್ಸ॒ಪ್ತಹೋ॑ತಾ । ಅ॒ಮುತ್ರ॑ ಸ॒ದ್ಭ್ಯೋ ದೇ॒ವೇಭ್ಯೋ॑ ಹ॒ವ್ಯಂ-ವಁ॑ಹತಿ । ಯ ಏ॒ವಂ-ವೇಁದ॑ । ಉಪೈ॑ನಂ-ಯಁ॒ಜ್ಞೋ ನ॑ಮತಿ ॥ ಯೋ ವೈ ಚತು॑ರ್​ಹೋತೃಣಾ-ನ್ನಿ॒ದಾನಂ॒-ವೇಁದ॑ । ನಿ॒ದಾನ॑ವಾ-ನ್ಭವತಿ । ಅ॒ಗ್ನಿ॒ಹೋ॒ತ್ರಂ-ವೈಁ ದಶ॑ಹೋತುರ್ನಿ॒ದಾನ᳚ಮ್ । ದ॒ರ್॒ಶ॒ಪೂ॒ರ್ಣ॒ಮಾ॒ಸೌ ಚತು॑ರ್​ಹೋತುಃ । ಚಾ॒ತು॒ರ್ಮಾ॒ಸ್ಯಾನಿ॒ ಪಞ್ಚ॑ ಹೋತುಃ । ಪ॒ಶು॒ಬ॒ನ್ಧ-ಷ್ಷಡ್ಢೋ॑ತುಃ । ಸೌ॒ಮ್ಯೋ᳚-ಽದ್ಧ್ವ॒ರ-ಸ್ಸ॒ಪ್ತಹೋ॑ತುಃ । ಏ॒ತದ್ವೈ ಚತು॑ರ್​ಹೋತೃಣಾ-ನ್ನಿ॒ದಾನ᳚ಮ್ । ಯ ಏ॒ವಂ-ವೇಁದ॑ । ನಿ॒ದಾನ॑ವಾ-ನ್ಭವತಿ ॥ 73 ॥
(ಅ॒ಮಿ॒ಮೀ॒ತ॒ ತ-ಮ್ಪ್ರಾಯು॑ಙ್ಕ್ತ॒ - ಪಞ್ಚ॑ಹೋತಾರ॒-ಮ್ಪ್ರಯು॑ಞ್ಜಿತ - ಜಾಯೇ॒ತೇತಿ॑ - ತಿಷ್ಠತಿ॒ - ಕ್ಲೃಪ್ತಿ॒--ರ್ ದಶ॑ಹೋತು-ರ್ನಿ॒ದಾನಗ್ಂ॑ ಸ॒ಪ್ತ ಚ॑ ) (ಅ. 11)

(ಪ್ರ॒ಜಾಪ॑ತಿರಕಾಮಯತ ಪ್ರ॒ಜಾ-ಸ್ಸೃ॑ಜೇ॒ಯೇತಿ॑ - ಪ್ರ॒ಜಾಪ॑ತಿರಕಾಮಯತ ದರ್​ಶಪೂರ್ಣಮಾ॒ಸೌ ಸೃ॑ಜೇ॒ಯೇತಿ॑ - ಪ್ರ॒ಜಾಪ॑ತಿರಕಾಮಯತ॒ ಪ್ರಜಾ॑ಯೇ॒ಯೇತಿ॒ ಸ ತಪ॒-ಸ್ಸ ತ್ರಿ॒ವೃತಂ॑ - ಪ್ರ॒ಜಾಪ॑ತಿರಕಾಮಯತ॒ ದಶ॑ಹೋತಾರ॒-ನ್ತೇನ॑ ದಶ॒ಧಾ-ಽಽತ್ಮಾನಂ॑ - ದೇ॒ವಾ ವೈ ವರು॑ಣ॒ - ಮನ್ತೋ॒ ವೈ - ಪ್ರ॒ಜಾಪ॑ತಿ॒ಸ್ತಾ-ಸ್ಸೃ॒ಷ್ಟಾ-ಸ್ಸಮ॑ಶ್ಲಿಷ್ಯನ್ - ದೇ॒ವಾ ವೈ ಚತು॑ರ್​ಹೋತೃಭಿ - ರಿ॒ದಂ-ವಾಁ ಅಗ್ರೇ᳚ - ಪ್ರ॒ಜಾಪ॑ತಿ॒ರಿನ್ದ್ರಂ॑ - ಪ್ರ॒ಜಾಪ॑ತಿರಕಾಮಯತ ಬ॒ಹೋರ್ಭೂಯಾ॒ನೇಕಾ॑ದಶ)

(ಪ್ರ॒ಜಾಪ॑ತಿ॒ - ಸ್ತದ್ಗ್ರಹ॑ಸ್ಯ - ಪ್ರ॒ಜಾ॑ಪತಿರಕಾಮಯತಾ॒ - ನಯೈ॒ವೈನ॒ತ್ - ತಸ್ಯ॒ ವಾ ಇ॒ಯ-ಙ್ಕ್ಲೃಪ್ತಿ॒ - ಸ್ತಸ್ಮಾ᳚-ತ್ತೇಪಾ॒ನಾಜ್ಜ್ಯೋತಿ॒--ರ್ ಯದ॒ಸ್ಮಿನ್ನಾ॑ದಿ॒ತ್ಯೇ -ಸಷಡ್ಢೋ॑ತು-ಸ್ಸ॒ಪ್ತಹೋ॑ತಾರ॒-ನ್ತ್ರಿಸ॑ಪ್ತತಿಃ)

(ಪ್ರ॒ಜಾಪ॑ತಿರಕಾಮಯತ - ನಿ॒ದಾನ॑ವಾನ್ಭವತಿ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ದ್ವಿತೀಯಃ ಪ್ರಪಾಠಕ-ಸ್ಸಮಾಪ್ತಃ ॥