ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ಸಪ್ತಮಃ ಪ್ರಪಾಠಕಃ - ಅಚ್ಛಿದ್ರ-ಙ್ಕಾಣ್ಡ-ಮ್ಪ್ರಾಯಶ್ಚಿತ್ತಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅಚ್ಛಿದ್ರ-ಙ್ಕಾಣ್ಡ-ಮ್ಪ್ರಾಯಶ್ಚಿತ್ತೇನ ಮನ್ತ್ರೈಶ್ಚ ಯಜ್ಞಚ್ಛಿದ್ರಪೂರಣಾದಚ್ಛಿದ್ರಮುಚ್ಯತೇ

ಅನುವಾಕಂ 1 - ದರ್​ಶಪೂರ್ಣಮಾಸೇಷ್ಟಿವಿಷಯಾಣಿ ಕಾನಿ ಚಿತ್ಪ್ರಾಯಶ್ಚಿತ್ತಾನಿ

ಸರ್ವಾ॒ನ್॒. ವಾ ಏ॒ಷೋ᳚-ಽಗ್ನೌ ಕಾಮಾ॒-ನ್ಪ್ರವೇ॑ಶಯತಿ ।
ಯೋ᳚-ಽಗ್ನೀನ॑ನ್ವಾ॒ಧಾಯ॑ ವ್ರ॒ತಮು॒ಪೈತಿ॑ ।
ಸ ಯದನಿ॑ಷ್ಟ್ವಾ ಪ್ರಯಾ॒ಯಾತ್ । ಅಕಾ॑ಮಪ್ರೀತಾ ಏನ॒-ಙ್ಕಾಮಾ॒ ನಾನು॒ ಪ್ರಯಾ॑ಯುಃ । ಅ॒ತೇ॒ಜಾ ಅ॑ವೀ॒ರ್ಯ॑-ಸ್ಸ್ಯಾತ್ ।
ಸ ಜು॑ಹುಯಾತ್ । ತುಭ್ಯ॒-ನ್ತಾ ಅ॑ಙ್ಗಿರಸ್ತಮ ।
ವಿಶ್ವಾ᳚-ಸ್ಸುಖ್ಷಿ॒ತಯಃ॒ ಪೃಥ॑ಕ್ ।
ಅಗ್ನೇ॒ ಕಾಮಾ॑ಯ ಯೇಮಿರ॒ ಇತಿ॑ ।
ಕಾಮಾ॑ನೇ॒ವಾಸ್ಮಿ॑-ನ್ದಧಾತಿ ॥ 1 ॥

ಕಾಮ॑ಪ್ರೀತಾ ಏನ॒-ಙ್ಕಾಮಾ॒ ಅನು॒ಪ್ರಯಾ᳚ನ್ತಿ ।
ತೇ॒ಜ॒ಸ್ವೀ ವೀ॒ರ್ಯಾ॑ವಾ-ನ್ಭವತಿ ॥
ಸನ್ತ॑ತಿ॒ರ್ವಾ ಏ॒ಷಾ ಯ॒ಜ್ಞಸ್ಯ॑ ।
ಯೋ᳚-ಽಗ್ನೀನ॑ನ್ವಾ॒ಧಾಯ॑ ವ್ರ॒ತಮು॒ಪೈತಿ॑ ।
ಸ ಯದು॒ದ್ವಾಯ॑ತಿ । ವಿಚ್ಛಿ॑ತ್ತಿ-ರೇ॒ವಾಸ್ಯ॒ ಸಾ ॥
ತ-ಮ್ಪ್ರಾಞ್ಚ॑ಮು॒ದ್ಧೃತ್ಯ॑ ।
ಮನ॒ಸೋಪ॑ತಿಷ್ಠೇತ । ಮನೋ॒ ವೈ ಪ್ರ॒ಜಾಪ॑ತಿಃ ।
ಪ್ರಾ॒ಜಾ॒ಪ॒ತ್ಯೋ ಯ॒ಜ್ಞಃ ॥ 2 ॥

ಮನ॑ಸೈ॒ವ ಯ॒ಜ್ಞಗ್ಂ ಸನ್ತ॑ನೋತಿ । ಭೂರಿತ್ಯಾ॑ಹ । ಭೂ॒ತೋ ವೈ ಪ್ರ॒ಜಾಪ॑ತಿಃ । ಭೂತಿ॑ಮೇ॒ವೋಪೈ॑ತಿ ॥
ವಿ ವಾ ಏ॒ಷ ಇ॑ನ್ದ್ರಿ॒ಯೇಣ॑ ವೀ॒ರ್ಯೇ॑ಣರ್ಧ್ಯತೇ ।
ಯಸ್ಯಾ-ಹಿ॑ತಾಗ್ನೇ-ರ॒ಗ್ನಿರ॑ಪ॒ಖ್ಷಾಯ॑ತಿ । ಯಾವ॒ಚ್ಛಮ್ಯ॑ಯಾ ಪ್ರ॒ವಿದ್ಧ್ಯೇ᳚ತ್ ।
ಯದಿ॒ ತಾವ॑ದಪ॒ಖ್ಷಾಯೇ᳚ತ್ । ತಗ್ಂ ಸಮ್ಭ॑ರೇತ್ ।
ಇ॒ದ-ನ್ತ॒ ಏಕ॑-ಮ್ಪ॒ರ ಉ॑ತ॒ ಏಕ᳚ಮ್ ॥ 3 ॥

ತೃ॒ತೀಯೇ॑ನ॒ ಜ್ಯೋತಿ॑ಷಾ॒ ಸಂ​ವಿಁ॑ಶಸ್ವ । ಸಂ॒​ವೇಁಶ॑ನಸ್ತ॒ನುವೈ॒ ಚಾರು॑ರೇಧಿ ।
ಪ್ರಿ॒ಯೇ ದೇ॒ವಾನಾ᳚-ಮ್ಪರ॒ಮೇ ಜ॒ನಿತ್ರ॒ ಇತಿ॑ । ಬ್ರಹ್ಮ॑ಣೈ॒ವೈನ॒ಗ್ಂ॒ ಸಮ್ಭ॑ರತಿ ।
ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ । ಯದಿ॑ ಪರಸ್ತ॒-ರಾಮ॑ಪ॒ಖ್ಷಾಯೇ᳚ತ್ । ಅ॒ನು॒ ಪ್ರ॒ಯಾಯಾವ॑ಸ್ಯೇತ್ ।
ಸೋ ಏ॒ವ ತತಃ॒ ಪ್ರಾಯ॑ಶ್ಚಿತ್ತಿಃ ॥
ಓಷ॑ಧೀ॒ರ್ವಾ ಏ॒ತಸ್ಯ॑ ಪ॒ಶೂ-ನ್ಪಯಃ॒ ಪ್ರವಿ॑ಶತಿ ।
ಯಸ್ಯ॑ ಹ॒ವಿಷೇ॑ ವ॒ಥ್ಸಾ ಅ॒ಪಾಕೃ॑ತಾ॒ ಧಯ॑ನ್ತಿ ॥ 4 ॥

ತಾನ್. ಯದ್ದು॒ಹ್ಯಾತ್ । ಯಾ॒ತಯಾ᳚ಮ್ನಾ ಹ॒ವಿಷಾ॑ ಯಜೇತ । ಯನ್ನ ದು॒ಹ್ಯಾತ್ । ಯ॒ಜ್ಞ॒ಪ॒ರು-ರ॒ನ್ತರಿ॑ಯಾತ್ । ವಾ॒ಯ॒ವ್ಯಾಂ᳚-ಯಁವಾ॒ಗೂ-ನ್ನಿರ್ವ॑ಪೇತ್ ।
ವಾ॒ಯುರ್ವೈ ಪಯ॑ಸಃ ಪ್ರದಾಪಯಿ॒ತಾ । ಸ ಏ॒ವಾಸ್ಮೈ॒ ಪಯಃ॒ ಪ್ರದಾ॑ಪಯತಿ । ಪಯೋ॒ ವಾ ಓಷ॑ಧಯಃ ।
ಪಯಃ॒ ಪಯಃ॑ ।
ಪಯ॑ಸೈ॒ವಾಸ್ಮೈ॒ ಪಯೋ-ಽವ॑ರುನ್ಧೇ ॥ 5 ॥

ಅಥೋತ್ತ॑ರಸ್ಮೈ ಹ॒ವಿಷೇ॑ ವ॒ಥ್ಸಾನ॒ಪಾ ಕು॑ರ್ಯಾತ್ ।
ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥ ಅ॒ನ್ಯ॒ತ॒ರಾನ್. ವಾ ಏ॒ಷ ದೇ॒ವಾ-ನ್ಭಾ॑ಗ॒ಧೇಯೇ॑ನ॒ ವ್ಯ॑ರ್ಧಯತಿ ।
ಯೇ ಯಜ॑ಮಾನಸ್ಯ ಸಾ॒ಯ-ಙ್ಗೃ॒ಹಮಾ॒-ಗಚ್ಛ॑ನ್ತಿ ।
ಯಸ್ಯ॑ ಸಾಯ-ನ್ದು॒ಗ್ಧಗ್ಂ ಹ॒ವಿರಾರ್ತಿ॑-ಮಾ॒ರ್ಚ್ಛತಿ॑ ।
ಇನ್ದ್ರಾ॑ಯ ವ್ರೀ॒ಹೀನ್ನಿ॒-ರುಪ್ಯೋ-ಪ॑ವಸೇತ್ । ಪಯೋ॒ ವಾ ಓಷ॑ಧಯಃ । ಪಯ॑ ಏ॒ವಾರಭ್ಯ॑ ಗೃಹೀ॒ತ್ವೋ-ಪ॑ವಸತಿ । ಯತ್ಪ್ರಾ॒ತ-ಸ್ಸ್ಯಾತ್ । ತಚ್ಛೃ॒ತ-ಙ್ಕು॑ರ್ಯಾತ್ ॥ 6 ॥

ಅಥೇತ॑ರ ಐ॒ನ್ದ್ರಃ ಪು॑ರೋ॒ಡಾಶ॑-ಸ್ಸ್ಯಾತ್ ।
ಇ॒ನ್ದ್ರಿ॒ಯೇ ಏ॒ವಾಸ್ಮೈ॑ ಸ॒ಮೀಚೀ॑ ದಧಾತಿ ।
ಪಯೋ॒ ವಾ ಓಷ॑ಧಯಃ । ಪಯಃ॒ ಪಯಃ॑ । ಪಯ॑ಸೈ॒ವಾಸ್ಮೈ॒ ಪಯೋ-ಽವ॑ರುನ್ಧೇ ।
ಅಥೋತ್ತ॑ರಸ್ಮೈ ಹ॒ವಿಷೇ॑ ವ॒ಥ್ಸಾನ॒ಪಾ ಕು॑ರ್ಯಾತ್ ।
ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥ ಉ॒ಭಯಾ॒ನ್॒. ವಾ ಏ॒ಷ ದೇ॒ವಾ-ನ್ಭಾ॑ಗ॒ಧೇಯೇ॑ನ॒ ವ್ಯ॑ರ್ಧಯತಿ ।
ಯೇ ಯಜ॑ಮಾನಸ್ಯ ಸಾ॒ಯ-ಞ್ಚ॑ ಪ್ರಾ॒ತಶ್ಚ॑ ಗೃ॒ಹಮಾ॒-ಗಚ್ಛ॑ನ್ತಿ । ಯಸ್ಯೋ॒ಭಯಗ್ಂ॑ ಹ॒ವಿರಾರ್ತಿ॑-ಮಾ॒ರ್ಚ್ಛತಿ॑ ॥ 7 ॥

ಐ॒ನ್ದ್ರ-ಮ್ಪಞ್ಚ॑ಶರಾವ-ಮೋದ॒ನ-ನ್ನಿರ್ವ॑ಪೇತ್ ।
ಅ॒ಗ್ನಿ-ನ್ದೇ॒ವತಾ॑ನಾ-ಮ್ಪ್ರಥ॒ಮಂ-ಯಁ॑ಜೇತ್ ।
ಅ॒ಗ್ನಿಮು॑ಖಾ ಏ॒ವ ದೇ॒ವತಾಃ᳚ ಪ್ರೀಣಾತಿ ।
ಅ॒ಗ್ನಿಂ-ವಾಁ ಅನ್ವ॒ನ್ಯಾ ದೇ॒ವತಾಃ᳚ ।
ಇನ್ದ್ರ॒ಮನ್ವ॒ನ್ಯಾಃ । ತಾ ಏ॒ವೋಭಯೀಃ᳚ ಪ್ರೀಣಾತಿ ।
ಪಯೋ॒ ವಾ ಓಷ॑ಧಯಃ ।
ಪಯಃ॒ ಪಯಃ॑ । ಪಯ॑ಸೈ॒ವಾಸ್ಮೈ॒ ಪಯೋ-ಽವ॑ರುನ್ಧೇ ।
ಅಥೋತ್ತ॑ರಸ್ಮೈ ಹ॒ವಿಷೇ॑ ವ॒ಥ್ಸಾನ॒ಪಾ ಕು॑ರ್ಯಾತ್ ॥ 8 ॥

ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥ ಅ॒ರ್ಧೋ ವಾ ಏ॒ತಸ್ಯ॑ ಯ॒ಜ್ಞಸ್ಯ॑ ಮೀಯತೇ ।
ಯಸ್ಯ॒ ವ್ರತ್ಯೇ-ಽಹ॒-ನ್ಪತ್ನ್ಯ॑ನಾ-ಲಮ್ಭು॒ಕಾ ಭವ॑ತಿ । ತಾಮ॑ಪ॒ರುದ್ಧ್ಯ॑ ಯಜೇತ ।
ಸರ್ವೇ॑ಣೈ॒ವ ಯ॒ಜ್ಞೇನ॑ ಯಜತೇ ।
ತಾಮಿ॒ಷ್ಟ್ವೋ-ಪ॑ಹ್ವಯೇತ । ಅಮೂ॒ಹಮ॑ಸ್ಮಿ ।
ಸಾ ತ್ವಮ್ । ದ್ಯೌರ॒ಹಮ್ । ಪೃ॒ಥಿ॒ವೀ ತ್ವಮ್ । ಸಾಮಾ॒ಹಮ್ । ಋಕ್ತ್ವಮ್ । ತಾವೇಹಿ॒ ಸಮ್ಭ॑ವಾವ । ಸ॒ಹ ರೇತೋ॑ ದಧಾವಹೈ । ಪು॒ಗ್ಂ॒ಸೇ ಪು॒ತ್ರಾಯ॒ ವೇತ್ತ॑ವೈ ।
ರಾ॒ಯಸ್ಪೋಷಾ॑ಯ ಸುಪ್ರಜಾ॒ಸ್ತ್ವಾಯ॑ ಸು॒ವೀರ್ಯಾ॒ಯೇತಿ॑ ।
ಅ॒ರ್ಧ ಏ॒ವೈನಾ॒ಮು-ಪ॑ಹ್ವಯತೇ ।
ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥ 9 ॥
(ದ॒ಧಾ॒ತಿ॒ - ಯ॒ಜ್ಞ - ಉ॑ತ॒ ಏಕಂ॒ - ಧಯ॑ನ್ತಿ - ರುನ್ಧೇ - ಕುರ್ಯಾ - ದಾ॒ರ್ಛ - ತ್ಯ॒ಪಾಕು॑ರ್ಯಾತ್ - ಪೃಥಿ॒ವೀ ತ್ವಮ॒ಷ್ಟೌ ಚ॑) (ಅ. 1)

(ಸರ್ವಾ॒ನ್॒. ವಿ ವೈ ಯದಿ॑ ಪರಸ್ತ॒ರಾಮೋಷ॑ಧೀರನ್ ಯತ॒ರಾನು॒ಭಯಾ॑ನ॒ರ್ಧೋ ವೈ )

ಅನುವಾಕಂ 2 - ಅಗ್ನಿಹೋತ್ರಸಾಮ್ನಾಯ್ಯಸಾಧಾರಣಾನಿ ಪ್ರಾಯಶ್ಚಿತ್ತಾನಿ
3.7.2.1
ಯದ್ವಿ-ಷ್ಷ॑ಣ್ಣೇನ ಜುಹು॒ಯಾತ್ ।
ಅಪ್ರ॑ಜಾ ಅಪ॒ಶುರ್ಯಜ॑ಮಾನ-ಸ್ಸ್ಯಾತ್ ।
ಯದನಾ॑ಯತನೇ ನಿ॒ನಯೇ᳚ತ್ । ಅ॒ನಾ॒ಯ॒ತ॒ನ-ಸ್ಸ್ಯಾ᳚ತ್ ।
ಪ್ರಾ॒ಜಾ॒ಪ॒ತ್ಯಯ॒ರ್ಚಾ ವ॑ಲ್ಮೀಕ-ವ॒ಪಾಯಾ॒ಮ-ವ॑ನಯೇತ್ । ಪ್ರಾ॒ಜಾ॒ಪ॒ತ್ಯೋ ವೈ ವ॒ಲ್ಮೀಕಃ॑ । ಯ॒ಜ್ಞಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತಾವೇ॒ವ ಯ॒ಜ್ಞ-ಮ್ಪ್ರತಿ॑ಷ್ಠಾಪಯತಿ ।
ಭೂರಿತ್ಯಾ॑ಹ । ಭೂ॒ತೋ ವೈ ಪ್ರ॒ಜಾಪ॑ತಿಃ ॥ 10 ॥

ಭೂತಿ॑ಮೇ॒ವೋಪೈ॑ತಿ । ತ-ತ್ಕೃ॒ತ್ವಾ । ಅ॒ನ್ಯಾ-ನ್ದು॒ಗ್ಧ್ವಾ ಪುನ॑ರ್-ಹೋತ॒ವ್ಯ᳚ಮ್ । ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥ ಯತ್ಕೀ॒ಟಾ-ವ॑ಪನ್ನೇನ ಜುಹು॒ಯಾತ್ ।
ಅಪ್ರ॑ಜಾ ಅಪ॒ಶು-ರ್ಯಜ॑ಮಾನ-ಸ್ಸ್ಯಾತ್ ।
ಯದನಾ॑ಯತನೇ ನಿ॒ನಯೇ᳚ತ್ । ಅ॒ನಾ॒ಯ॒ತ॒ನ-ಸ್ಸ್ಯಾ᳚ತ್ ।
ಮ॒ದ್ಧ್ಯ॒ಮೇನ॑ ಪ॒ರ್ಣೇನ॑ ದ್ಯಾವಾ-ಪೃಥಿ॒ವ್ಯ॑-ಯ॒ರ್ಚಾ-ಽನ್ತಃ॑ ಪರಿ॒ಧಿ ನಿನ॑ಯೇತ್ ।
ದ್ಯಾವಾ॑ಪೃಥಿ॒ವ್ಯೋ-ರೇ॒ವೈನ॒ತ್-ಪ್ರತಿ॑ಷ್ಠಾಪಯತಿ ॥ 11 ॥

ತತ್ಕೃ॒ತ್ವಾ । ಅ॒ನ್ಯಾ-ನ್ದು॒ಗ್ಧ್ವಾ ಪುನ॑ರ್-ಹೋತ॒ವ್ಯ᳚ಮ್ । ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥ ಯದವ॑ವೃಷ್ಟೇನ ಜುಹು॒ಯಾತ್ । ಅಪ॑ರೂಪ-ಮಸ್ಯಾ॒ತ್ಮ-ಞ್ಜಾ॑ಯೇತ ।
ಕಿ॒ಲಾಸೋ॑ ವಾ॒ ಸ್ಯಾದ॑ರ್​ಶ॒ಸೋ ವಾ᳚ । ಯ-ತ್ಪ್ರತ್ಯೇ॒ಯಾತ್ । ಯ॒ಜ್ಞಂ-ವಿಁಚ್ಛಿ॑ನ್ದ್ಯಾತ್ । ಸ ಜು॑ಹುಯಾತ್ ।
ಮಿ॒ತ್ರೋ ಜನಾ᳚ನ್ ಕಲ್ಪಯತಿ ಪ್ರಜಾ॒ನನ್ನ್ ॥ 12 ॥

ಮಿ॒ತ್ರೋ ದಾ॑ಧಾರ ಪೃಥಿ॒ವೀಮು॒ತ ದ್ಯಾಮ್ । ಮಿ॒ತ್ರಃ ಕೃ॒ಷ್ಟೀರ-ನಿ॑ಮಿಷಾ॒ ಽಭಿಚ॑ಷ್ಟೇ ।
ಸ॒ತ್ಯಾಯ॑ ಹ॒ವ್ಯ-ಙ್ಘೃ॒ತವ॑-ಜ್ಜುಹೋ॒ತೇತಿ॑ । ಮಿ॒ತ್ರೇಣೈ॒ವೈನ॑-ತ್ಕಲ್ಪಯತಿ । ತತ್ಕೃ॒ತ್ವಾ । ಅ॒ನ್ಯಾ-ನ್ದು॒ಗ್ಧ್ವಾ ಪುನ॑ರ್​ಹೋತ॒ವ್ಯ᳚ಮ್ ।
ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥
ಯ-ತ್ಪೂರ್ವ॑ಸ್ಯಾ॒-ಮಾಹು॑ತ್ಯಾಗ್ಂ ಹು॒ತಾಯಾ॒-ಮುತ್ತ॒ರಾ-ಽಽಹು॑ತಿ॒-ಸ್ಸ್ಕನ್ದೇ᳚ತ್ ।
ದ್ವಿ॒ಪಾದ್ಭಿಃ॑ ಪ॒ಶುಭಿ॒-ರ್ಯಜ॑ಮಾನೋ॒ ವ್ಯೃ॑॑ದ್ಧ್ಯೇತ ।
ಯದುತ್ತ॑ರಯಾ॒ ಽಭಿಜು॑ಹು॒ಯಾತ್ ॥ 13 ॥

ಚತು॑ಷ್ಪಾದ್ಭಿಃ ಪ॒ಶುಭಿ॒-ರ್ಯಜ॑ಮಾನೋ॒ ವ್ಯೃ॑ದ್ಧ್ಯೇತ ।
ಯತ್ರ॒ ವೇತ್ಥ॑ ವನಸ್ಪತೇ ದೇ॒ವಾನಾ॒-ಙ್ಗುಹ್ಯಾ॒ ನಾಮಾ॑ನಿ ।
ತತ್ರ॑ ಹ॒ವ್ಯಾನಿ॑ ಗಾಮ॒ಯೇತಿ॑ ವಾನಸ್ಪ॒ತ್ಯ-ಯ॒ರ್ಚಾ ಸ॒ಮಿಧ॑-ಮಾ॒ಧಾಯ॑ । ತೂ॒ಷ್ಣೀಮೇ॒ವ ಪುನ॑-ರ್ಜುಹುಯಾತ್ ।
ವನ॒ಸ್ಪತಿ॑ನೈ॒ವ ಯ॒ಜ್ಞಸ್ಯಾರ್ತಾ॒-ಞ್ಚಾನಾ᳚ರ್ತಾ॒-ಞ್ಚಾಹು॑ತೀ॒ ವಿದಾ॑ಧಾರ । ತತ್ಕೃ॒ತ್ವಾ । ಅ॒ನ್ಯಾ-ನ್ದು॒ಗ್ಧ್ವಾ ಪುನ॑ರ್-ಹೋತ॒ವ್ಯ᳚ಮ್ । ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥
ಯತ್ಪು॒ರಾ ಪ್ರ॑ಯಾ॒ಜೇಭ್ಯಃ॒ ಪ್ರಾಂಅಙ್ಗಾ॑ರ॒-ಸ್ಸ್ಕನ್ದೇ᳚ತ್ ।
ಅ॒ದ್ಧ್ವ॒ರ್ಯವೇ॑ ಚ॒ ಯಜ॑ಮಾನಾಯ॒ ಚಾಕಗ್ಗ್॑ ಸ್ಯಾತ್ ॥ 14 ॥

ಯ-ದ್ದ॑ಖ್ಷಿ॒ಣಾ । ಬ್ರ॒ಹ್ಮಣೇ॑ ಚ॒ ಯಜ॑ಮಾನಾಯ॒ ಚಾಕಗ್ಗ್॑ ಸ್ಯಾತ್ । ಯ-ತ್ಪ್ರ॒ತ್ಯಕ್ ।
ಹೋತ್ರೇ॑ ಚ॒ ಪತ್ನಿ॑ಯೈ ಚ॒ ಯಜ॑ಮಾನಾಯ॒ ಚಾಕಗ್ಗ್॑ ಸ್ಯಾತ್ ।
ಯದುದಂ॑ । ಅ॒ಗ್ನೀಧೇ॑ ಚ ಪ॒ಶುಭ್ಯ॑ಶ್ಚ॒ ಯಜ॑ಮಾನಾಯ॒ ಚಾಕಗ್ಗ್॑ ಸ್ಯಾತ್ । ಯದ॑ಭಿಜುಹು॒ಯಾತ್ । ರು॒ದ್ರೋ᳚-ಽಸ್ಯ ಪ॒ಶೂ-ನ್ಘಾತು॑ಕ-ಸ್ಸ್ಯಾತ್ ।
ಯನ್ನಾಭಿ॑ ಜುಹು॒ಯಾತ್ । ಅಶಾ᳚ನ್ತಃ॒ ಪ್ರಹ್ರಿ॑ಯೇತ ॥ 15 ॥

ಸ್ರು॒ವಸ್ಯ॒ ಬುದ್ಧ್ನೇ॑ನಾಭಿ॒ ನಿದ॑ದ್ಧ್ಯಾತ್ ।
ಮಾ ತ॑ಮೋ॒ ಮಾ ಯ॒ಜ್ಞಸ್ತ॑ಮ॒ನ್ಮಾ ಯಜ॑ಮಾನ-ಸ್ತಮತ್ ।
ನಮ॑ಸ್ತೇ ಅಸ್ತ್ವಾಯ॒ತೇ । ನಮೋ॑ ರುದ್ರ ಪರಾಯ॒ತೇ ।
ನಮೋ॒ ಯತ್ರ॑ ನಿ॒ಷೀದ॑ಸಿ ।
ಅ॒ಮು-ಮ್ಮಾ ಹಿಗ್ಂ॑ಸೀರ॒ಮು-ಮ್ಮಾ ಹಿಗ್ಂ॑ಸೀ॒ರಿತಿ॒ ಯೇನ॒ ಸ್ಕನ್ದೇ᳚ತ್ ॥ ತ-ಮ್ಪ್ರಹ॑ರೇತ್ ।
ಸ॒ಹಸ್ರ॑ಶೃಙ್ಗೋ ವೃಷ॒ಭೋ ಜಾ॒ತವೇ॑ದಾಃ । ಸ್ತೋಮ॑ಪೃಷ್ಠೋ ಘೃ॒ತವಾ᳚ನ್-ಥ್ಸು॒ಪ್ರತೀ॑ಕಃ ।
ಮಾ ನೋ॑ ಹಾಸೀನ್ಮೇತ್ಥಿ॒ತೋ (ಹಾಸೀರ್ಮೇತ್ಥಿ॒ತೋ) ನೇತ್ತ್ವಾ॒ ಜಹಾ॑ಮ ।
ಗೋ॒ಪೋ॒ಷ-ನ್ನೋ॑ ವೀರಪೋ॒ಷ-ಞ್ಚ॑ ಯ॒ಚ್ಛೇತಿ॑ ।
ಬ್ರಹ್ಮ॑ಣೈ॒ವೈನ॒-ಮ್ಪ್ರಹ॑ರತಿ । ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥ 16 ॥
(ವೈ ಪ್ರ॒ಜಾಪ॑ತಿಃ - ಸ್ಥಾಪಯತಿ - ಪ್ರಜಾ॒ನನ್ - ನ॒ಭಿಜು॑ಹು॒ಯಾಥ್ - ಸ್ಯಾ᳚-ದ್- ಧ್ರಿಯೇತ॒ - ಜಹಾ॑ಮ॒ ತ್ರಿಣಿ॑ ಚ) (ಅ. 2)

(ಯದ್ವಿಸ್ಷ॑ಣ್ಣೇನ ಪ್ರಾಜಾಪ॒ತ್ಯಯಾ॒ ಯ-ತ್ಕೀ॒ಟಾ ಮ॑ದ್ಧ್ಯ॒ಮೇನ॒ ಯದವ॑ವೃಷ್ಟೇನ॒ ಯ-ತ್ಪೂರ್ವ॑ಸ್ಯಾಂ॒-ಯಁ-ತ್ಪು॒ರಾ ಪ್ರ॑ಯಾ॒ಜೇಭ್ಯ॒ ಪ್ರಂಙ್ಗಾ॑ರೋ॒ ಯ-ದ್ದ॑ಖ್ಷಿ॒ಣಾ ಯ-ತ್ಪ್ರ॒ತ್ಯಗ್ಯದುದಙ್ಙ್॑)

ಅನುವಾಕಂ 3 - ಮುಖ್ಯಾಗ್ನ್ಯಸಮ್ಭವೇ-ಽನುಕಲ್ಪಾಃ ಹೋಮಾಧಾರಾಃ
ವಿ ವಾ ಏ॒ಷ ಇ॑ನ್ದ್ರಿ॒ಯೇಣ॑ ವೀ॒ರ್ಯೇ॑ಣರ್ಧ್ಯತೇ ।
ಯಸ್ಯಾ-ಹಿ॑ತಾಗ್ನೇ-ರ॒ಗ್ನಿ-ರ್ಮ॒ಥ್ಯಮಾ॑ನೋ॒ ನ ಜಾಯ॑ತೇ । ಯತ್ರಾ॒ನ್ಯ-ಮ್ಪಶ್ಯೇ᳚ತ್ । ತತ॑ ಆ॒ಹೃತ್ಯ॑ ಹೋತ॒ವ್ಯ᳚ಮ್ ।
ಅ॒ಗ್ನಾ-ವೇ॒ವಾಸ್ಯಾ᳚-ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥
ಯದ್ಯ॒ನ್ಯ-ನ್ನ ವಿ॒ನ್ದೇತ್ । ಅ॒ಜಾಯಾಗ್ಂ॑ ಹೋತ॒ವ್ಯ᳚ಮ್ । ಆ॒ಗ್ನೇ॒ಯೀ ವಾ ಏ॒ಷಾ । ಯದ॒ಜಾ । ಅ॒ಗ್ನಾ-ವೇ॒ವಾಸ್ಯಾ᳚-ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥ 17 ॥

ಅ॒ಜಸ್ಯ॒ ತು ನಾಶ್ಞೀ॑ಯಾತ್ । ಯದ॒ಜಸ್ಯಾ᳚-ಶ್ಞೀ॒ಯಾತ್ ।
ಯಾಮೇ॒ವಾಗ್ನಾ-ವಾಹು॑ತಿ-ಞ್ಜುಹು॒ಯಾತ್ । ತಾಮ॑ದ್ಯಾತ್ । ತಸ್ಮಾ॑ದ॒ಜಸ್ಯ॒ ನಾಶ್ಯ᳚ಮ್ ॥ ಯದ್ಯ॒ಜಾ-ನ್ನ ವಿ॒ನ್ದೇತ್ । ಬ್ರಾ॒ಹ್ಮ॒ಣಸ್ಯ॒ ದಖ್ಷಿ॑ಣೇ॒ ಹಸ್ತೇ॑ ಹೋತ॒ವ್ಯ᳚ಮ್ ।
ಏ॒ಷ ವಾ ಅ॒ಗ್ನಿ ರ್ವೈ᳚ಶ್ವಾನ॒ರಃ । ಯದ್ಬ್ರಾ᳚ಹ್ಮ॒ಣಃ ।
ಅ॒ಗ್ನಾ-ವೇ॒ವಾಸ್ಯಾ᳚-ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ॥ 18 ॥

ಬ್ರಾ॒ಹ್ಮ॒ಣ-ನ್ತು ವ॑ಸ॒ತ್ಯೈ॑ ನಾಪ॑ರುನ್ಧ್ಯಾತ್ । ಯದ್ಬ್ರಾ᳚ಹ್ಮ॒ಣಂ-ವಁ॑ಸ॒ತ್ಯಾ ಅ॑ಪರು॒ನ್ಧ್ಯಾತ್ ।
ಯಸ್ಮಿ॑ನ್ನೇ॒-ವಾಗ್ನಾವಾಹು॑ತಿ-ಞ್ಜುಹು॒ಯಾತ್ । ತ-ಮ್ಭಾ॑ಗ॒ಧೇಯೇ॑ನ॒ ವ್ಯ॑ರ್ಧಯೇತ್ ।
ತಸ್ಮಾ᳚-ದ್ಬ್ರಾಹ್ಮ॒ಣೋ ವ॑ಸ॒ತ್ಯೈ॑ ನಾಪ॒ರುದ್ಧ್ಯಃ॑ ॥ ಯದಿ॑ ಬ್ರಾಹ್ಮ॒ಣ-ನ್ನ ವಿ॒ನ್ದೇತ್ ।
ದ॒ರ್ಭ॒ಸ್ತ॒ಬೇಂ ಹೋ॑ತ॒ವ್ಯ᳚ಮ್ ।
ಅ॒ಗ್ನಿ॒ವಾನ್. ವೈ ದ॑ರ್ಭಸ್ತ॒ಬಂಃ ।
ಅ॒ಗ್ನಾವೇ॒-ವಾಸ್ಯಾ᳚-ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ।
ದ॒ರ್ಭಾಗ್​ಸ್ತು ನಾದ್ಧ್ಯಾ॑ಸೀತ ॥ 19 ॥

ಯದ್ದ॒ರ್ಭಾನ॒ದ್ಧ್ಯಾಸೀ॑ತ । ಯಾಮೇ॒ವಾಗ್ನಾ-ವಾಹು॑ತಿ-ಞ್ಜುಹು॒ಯಾತ್ । ತಾಮದ್ಧ್ಯಾ॑ಸೀತ ।
ತಸ್ಮಾ᳚-ದ್ದ॒ರ್ಭಾ ನಾದ್ಧ್ಯಾ॑ಸಿತ॒ವ್ಯಾಃ᳚ ॥
ಯದಿ॑ ದ॒ರ್ಭಾನ್ನ ವಿ॒ನ್ದೇತ್ । ಅ॒ಫ್ಸು ಹೋ॑ತ॒ವ್ಯ᳚ಮ್ ।
ಆಪೋ॒ ವೈ ಸರ್ವಾ॑ ದೇ॒ವತಾಃ᳚ ।
ದೇ॒ವತಾ᳚ಸ್ವೇ॒ ವಾಸ್ಯಾ᳚-ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ ।
ಆಪ॒ಸ್ತು ನ ಪರಿ॑ಚಖ್ಷೀತ । ಯದಾಪಃ॑ ಪರಿ॒ಚಖ್ಷೀ॑ತ ॥ 20 ॥

ಯಾ ಮೇ॒ವಾಫ್ಸ್ವಾಹು॑ತಿ-ಞ್ಜುಹು॒ಯಾತ್ । ತಾ-ಮ್ಪರಿ॑ಚಖ್ಷೀತ ।
ತಸ್ಮಾ॒ದಾಪೋ॒ ನ ಪ॑ರಿ॒ಚಖ್ಷ್ಯಾಃ᳚ ॥
ಮೇದ್ಧ್ಯಾ॑ ಚ॒ ವಾ ಏ॒ತಸ್ಯಾ॑ಮೇ॒ದ್ಧ್ಯಾ ಚ॑ ತ॒ನುವೌ॒ ಸಗ್ಂಸೃ॑ಜ್ಯೇತೇ । ಯಸ್ಯಾ-ಹಿ॑ತಾಗ್ನೇ-ರ॒ನ್ಯೈರ॒ಗ್ನಿಭಿ॑-ರ॒ಗ್ನಯ॑-ಸ್ಸಗ್ಂಸೃ॒ಜ್ಯನ್ತೇ᳚ । ಅ॒ಗ್ನಯೇ॒ ವಿವಿ॑ಚಯೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇತ್ ।
ಮೇದ್ಧ್ಯಾ᳚-ಞ್ಚೈ॒ವಾಸ್ಯಾ॑-ಮೇ॒ದ್ಧ್ಯಾ-ಞ್ಚ॑ ತ॒ನುವೌ॒ ವ್ಯಾವ॑ರ್ತಯತಿ ॥ ಅ॒ಗ್ನಯೇ᳚ ವ್ರ॒ತಪ॑ತಯೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇತ್ । ಅ॒ಗ್ನಿಮೇ॒ವ ವ್ರ॒ತಪ॑ತಿ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒-ನೋಪ॑ಧಾವತಿ ।
ಸ ಏ॒ವೈನಂ॑-ವ್ರಁ॒ತಮಾ-ಲ॑ಭಂ​ಯಁತಿ ॥ 21 ॥

ಗರ್ಭ॒ಗ್ಗ್॒ ಸ್ರವ॑ನ್ತಮಗ॒ದಮ॑ಕಃ । ಅ॒ಗ್ನಿ-ರಿನ್ದ್ರ॒-ಸ್ತ್ವಷ್ಟಾ॒ ಬೃಹ॒ಸ್ಪತಿಃ॑ । ಪೃ॒ಥಿ॒ವ್ಯಾ-ಮವ॑ಚುಶ್ಚೋ-ತೈ॒ತತ್ । ನಾಭಿ-ಪ್ರಾಪ್ನೋ॑ತಿ॒ ನಿರ್-ಋ॑ತಿ-ಮ್ಪರಾ॒ಚೈಃ ॥
ರೇತೋ॒ ವಾ ಏ॒ತದ್ವಾಜಿ॑ನ॒-ಮಾಹಿ॑ತಾಗ್ನೇಃ । ಯದ॑ಗ್ನಿಹೋ॒ತ್ರಮ್ । ತದ್ಯಥ್ಸ್ರವೇ᳚ತ್ ।
ರೇತೋ᳚-ಽಸ್ಯ॒ ವಾಜಿ॑ನಗ್ಗ್​ ಸ್ರವೇತ್ । ಗರ್ಭ॒ಗ್ಗ್॒ ಸ್ರವ॑ನ್ತಮ-ಗ॒ದಮ॑ಕ॒-ರಿತ್ಯಾ॑ಹ ।
ರೇತ॑ ಏ॒ವಾಸ್ಮಿ॒ನ್ ವಾಜಿ॑ನ-ನ್ದಧಾತಿ ॥ 22 ॥

ಅ॒ಗ್ನಿರಿತ್ಯಾ॑ಹ । ಅ॒ಗ್ನಿರ್ವೈ ರೇ॑ತೋ॒ಧಾಃ । ರೇತ॑ ಏ॒ವ ತದ್ದ॑ಧಾತಿ । ಇನ್ದ್ರ॒ ಇತ್ಯಾ॑ಹ । ಇ॒ನ್ದ್ರಿ॒ಯ-ಮೇ॒ವಾಸ್ಮಿ॑ನ್-ದಧಾತಿ । ತ್ವಷ್ಟೇತ್ಯಾ॑ಹ । ತ್ವಷ್ಟಾ॒ ವೈ ಪ॑ಶೂ॒ನಾ-ಮ್ಮಿ॑ಥು॒ನಾನಾಗ್ಂ॑ ರೂಪ॒ಕೃತ್ । ರೂ॒ಪಮ॒ವ ಪ॒ಶುಷು॑ ದಧಾತಿ । ಬೃಹ॒ಸ್ಪತಿ॒ರಿತ್ಯಾ॑ಹ ।
ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿಃ॑ । ಬ್ರಹ್ಮ॑ಣೈ॒ವಾಸ್ಮೈ᳚ ಪ್ರ॒ಜಾಃ ಪ್ರಜ॑ನಯತಿ ॥
ಪೃ॒ಥಿ॒ವ್ಯಾ-ಮವ॑ಚುಶ್ಚೋತೈ॒ತ-ದಿತ್ಯಾ॑ಹ ।
ಅ॒ಸ್ಯಾ-ಮೇ॒ವೈನ॒-ತ್ಪ್ರತಿ॑ಷ್ಠಾಪಯತಿ ॥
ನಾಭಿ ಪ್ರಾಪ್ನೋ॑ತಿ॒ ನಿರ್-ಋ॑ತಿ-ಮ್ಪರಾ॒ಚೈರಿತ್ಯಾ॑ಹ ।
ರಖ್ಷ॑ಸಾ॒ಮಪ॑ಹತ್ಯೈ ॥ 23 ॥
(ಅ॒ಜಾ-ಽಗ್ನಾವೇ॒ವಾಸ್ಯಾ᳚ಗ್ನಿಹೋ॒ತ್ರಗ್ಂ ಹು॒ತ-ಮ್ಭ॑ವತಿ - ಭವ - ತ್ಯಾಸೀತ - ಪರಿ॒ಚಖ್ಷೀ॑ತ - ಲಮ್ಭಯತಿ - ದಧಾತಿ - ದೇ॒ವಾನಾ॒-ಮ್ಬೃಹ॒ಸ್ಪತಿಃ॒ ಪಞ್ಚ॑ ಚ) (ಅ. 3)

(ವಿ ವೈ ಯ-ದ್ಯ॒ನ್ಯಮ॒ಜಾಯಾ᳚-ಮ್ಬ್ರಾಹ್ಮ॒ಣಸ್ಯ॑ ದರ್ಭಸ್ತ॒ಮ್ಬೇ᳚-ಽಫ್ಸು ಹೋ॑ತ॒ವ್ಯಂ᳚)

ಅನುವಾಕಂ 4 - ಐಷ್ಟಿಕಯಾಜಮಾನಮನ್ತ್ರಾಃ
ಯಾಃ ಪು॒ರಸ್ತಾ᳚-ತ್ಪ್ರ॒ಸ್ರವ॑ನ್ತಿ । ಉ॒ಪರಿ॑ಷ್ಟಾ-ಥ್ಸ॒ರ್ವತ॑ಶ್ಚ॒ ಯಾಃ । ತಾಭೀ॑ ರ॒ಶ್ಮಿಪ॑ವಿತ್ರಾಭಿಃ । ಶ್ರ॒ದ್ಧಾಂ-ಯಁ॒ಜ್ಞಮಾರ॑ಭೇ ॥ ದೇವಾ॑ ಗಾತುವಿದಃ ।
ಗಾ॒ತುಂ-ಯಁ॒ಜ್ಞಾಯ॑ ವಿನ್ದತ । ಮನ॑ಸ॒ಸ್ಪತಿ॑ನಾ ದೇ॒ವೇನ॑ । ವಾತಾ᳚-ದ್ಯ॒ಜ್ಞಃ ಪ್ರಯು॑ಜ್ಯತಾಮ್ ॥ ತೃ॒ತೀಯ॑ಸ್ಯೈ ದಿ॒ವಃ । ಗಾ॒ಯ॒ತ್ರಿ॒ಯಾ ಸೋಮ॒ ಆಭೃ॑ತಃ ॥ 24 ॥

ಸೋ॒ಮ॒ಪೀ॒ಥಾಯ॒ ಸನ್ನ॑ಯಿತುಮ್ । ವಕ॑ಲ॒-ಮನ್ತ॑ರ॒ಮಾದ॑ದೇ ॥ ಆಪೋ॑ ದೇವೀ-ಶ್ಶು॒ದ್ಧಾ-ಸ್ಸ್ಥ॑ । ಇ॒ಮಾ ಪಾತ್ರಾ॑ಣಿ ಶುನ್ಧತ । ಉ॒ಪಾ॒ತ॒ಙ್ಕ್ಯಾ॑ಯ ದೇ॒ವಾನಾ᳚ಮ್ । ಪ॒ರ್ಣ॒ವ॒ಲ್ಕಮು॒ತ ಶು॑ನ್ಧತ ॥
ಪಯೋ॑ ಗೃ॒ಹೇಷು॒ ಪಯೋ॑ ಅಘ್ನಿ॒ಯಾಸು॑ ।
ಪಯೋ॑ ವ॒ಥ್ಸೇಷು॒ ಪಯ॒ ಇನ್ದ್ರಾ॑ಯ ಹ॒ವಿಷೇ᳚ ಧ್ರಿಯಸ್ವ । ಗಾ॒ಯ॒ತ್ರೀ ಪ॑ರ್ಣವ॒ಲ್ಕೇನ॑ । ಪಯ-ಸ್ಸೋಮ॑-ಙ್ಕರೋತ್ವಿ॒ಮಮ್ ॥ 25 ॥
ಅ॒ಗ್ನಿ-ಙ್ಗೃ॑ಹ್ಣಾಮಿ ಸು॒ರಥಂ॒-ಯೋಁ ಮ॑ಯೋ॒ ಭೂಃ ।
ಯ ಉ॒ದ್ಯನ್ತ॑ಮಾ॒ ರೋಹ॑ತಿ॒ ಸೂರ್ಯ॒ಮಹ್ನೇ᳚ ।
ಆ॒ದಿ॒ತ್ಯ-ಞ್ಜ್ಯೋತಿ॑ಷಾ॒-ಞ್ಜ್ಯೋತಿ॑ರುತ್ತ॒ಮಮ್ ।
ಶ್ವೋ ಯ॒ಜ್ಞಾಯ॑ ರಮತಾ-ನ್ದೇ॒ವತಾ᳚ಭ್ಯಃ ॥
ವಸೂ᳚-ನ್ರು॒ದ್ರಾನಾ॑ದಿ॒ತ್ಯಾನ್ । ಇನ್ದ್ರೇ॑ಣ ಸ॒ಹ ದೇ॒ವತಾಃ᳚ । ತಾಃ ಪೂರ್ವಃ॒ ಪರಿ॑ಗೃಹ್ಣಾಮಿ । ಸ್ವ ಆ॒ಯತ॑ನೇ ಮನೀ॒ಷಯಾ᳚ ॥ ಇ॒ಮಾಮೂರ್ಜ॑-ಮ್ಪಞ್ಚದ॒ಶೀಂ-ಯೇಁ ಪ್ರವಿ॑ಷ್ಟಾಃ । ತಾನ್ದೇ॒ವಾ-ನ್ಪರಿ॑ಗೃಹ್ಣಾಮಿ॒ ಪೂರ್ವಃ॑ ॥ 26 ॥

ಅ॒ಗ್ನಿರ್-ಹ॑ವ್ಯ॒ವಾಡಿ॒ಹ ತಾನಾವ॑ಹತು । ಪೌ॒ರ್ಣ॒ಮಾ॒ಸಗ್ಂ ಹ॒ವಿರಿ॒ದಮೇ॑ಷಾ॒-ಮ್ಮಯಿ॑ ।
ಆ॒ಮಾ॒ವಾ॒ಸ್ಯಗ್ಂ॑ ಹ॒ವಿರಿ॒ದಮೇ॑ಷಾ॒-ಮ್ಮಯಿ॑ ॥ ಅ॒ನ್ತ॒ರಾ-ಽಗ್ನೀ ಪ॒ಶವಃ॑ । ದೇ॒ವ॒ಸ॒ಗ್ಂ॒ ಸದ॒ಮಾಗ॑ಮನ್ನ್ । ತಾ-ನ್ಪೂರ್ವಃ॒ ಪರಿ॑ಗೃಹ್ಣಾಮಿ ।
ಸ್ವ ಆ॒ಯತ॑ನೇ ಮನೀ॒ಷಯಾ᳚ ॥ ಇ॒ಹ ಪ್ರ॒ಜಾ ವಿ॒ಶ್ವರೂ॑ಪಾ ರಮನ್ತಾಮ್ । ಅ॒ಗ್ನಿ-ಙ್ಗೃ॒ಹಪ॑ತಿಮ॒ಭಿ ಸಂ॒​ವಁಸಾ॑ನಾಃ । ತಾಃ ಪೂರ್ವಃ॒ ಪರಿ॑ಗೃಹ್ಣಾಮಿ ॥ 27 ॥

ಸ್ವ ಆ॒ಯತ॑ನೇ ಮನೀ॒ಷಯಾ᳚ ॥
ಇ॒ಹ ಪ॒ಶವೋ॑ ವಿ॒ಶ್ವರೂ॑ಪಾ ರಮನ್ತಾಮ್ ।
ಅ॒ಗ್ನಿ-ಙ್ಗೃ॒ಹಪ॑ತಿಮ॒ಭಿ ಸಂ॒​ವಁಸಾ॑ನಾಃ ।
ತಾ-ನ್ಪೂರ್ವಃ॒ ಪರಿ॑ಗೃಹ್ಣಾಮಿ । ಸ್ವ ಆ॒ಯತ॑ನೇ ಮನೀ॒ಷಯಾ᳚ ॥ ಅ॒ಯ-ಮ್ಪಿ॑ತೃ॒ಣಾಮ॒ಗ್ನಿಃ ।
ಅವಾ᳚ಡ್ಢ॒ವ್ಯಾ ಪಿ॒ತೃಭ್ಯ॒ ಆ । ತ-ಮ್ಪೂರ್ವಃ॒ ಪರಿ॑ಗೃಹ್ಣಾಮಿ । ಅವಿ॑ಷ-ನ್ನಃ ಪಿ॒ತು-ಙ್ಕ॑ರತ್ ॥ ಅಜ॑ಸ್ರ॒-ನ್ತ್ವಾಗ್ಂ ಸ॑ಭಾಪಾ॒ಲಾಃ ॥ 28 ॥
ವಿ॒ಜ॒ಯಭಾ॑ಗ॒ಗ್ಂ॒ ಸಮಿ॑ನ್ಧತಾಮ್ । ಅಗ್ನೇ॑ ದೀ॒ದಾಯ॑ ಮೇ ಸಭ್ಯ । ವಿಜಿ॑ತ್ಯೈ ಶ॒ರದ॑-ಶ್ಶ॒ತಮ್ ॥ ಅನ್ನ॑ಮಾವಸ॒ಥೀಯ᳚ಮ್ । ಅ॒ಭಿಹ॑ರಾಣಿ ಶ॒ರದ॑-ಶ್ಶ॒ತಮ್ । ಆ॒ವ॒ಸ॒ಥೇ ಶ್ರಿಯ॒-ಮ್ಮನ್ತ್ರ᳚ಮ್ । ಅಹಿ॑ರ್ಬು॒ದ್ಧ್ನಿಯೋ॒ ನಿಯ॑ಚ್ಛತು ॥ ಇ॒ದಮ॒ಹ-ಮ॒ಗ್ನಿ ಜ್ಯೇ᳚ಷ್ಠೇಭ್ಯಃ । ವಸು॑ಭ್ಯೋ ಯ॒ಜ್ಞ-ಮ್ಪ್ರಬ್ರ॑ವೀಮಿ ।
ಇ॒ದಮ॒ಹ-ಮಿನ್ದ್ರ॑ ಜ್ಯೇಷ್ಠೇಭ್ಯಃ ॥ 29 ॥

ರು॒ದ್ರೇಭ್ಯೋ॑ ಯ॒ಜ್ಞ-ಮ್ಪ್ರಬ್ರ॑ವೀಮಿ । ಇ॒ದಮ॒ಹಂ-ವಁರು॑ಣ-ಜ್ಯೇಷ್ಠೇಭ್ಯಃ । ಆ॒ದಿ॒ತ್ಯೇಭ್ಯೋ॑ ಯ॒ಜ್ಞ-ಮ್ಪ್ರಬ್ರ॑ವೀಮಿ ॥ ಪಯ॑ಸ್ವತೀ॒-ರೋಷ॑ಧಯಃ ।
ಪಯ॑ಸ್ವದ್ವೀ॒ರುಧಾ॒-ಮ್ಪಯಃ॑ । ಅ॒ಪಾ-ಮ್ಪಯ॑ಸೋ॒ ಯತ್ಪಯಃ॑ । ತೇನ॒ ಮಾಮಿ॑ನ್ದ್ರ॒ ಸಗ್ಂಸೃ॑ಜ ॥
ಅಗ್ನೇ᳚ ವ್ರತಪತೇ ವ್ರ॒ತ-ಞ್ಚ॑ರಿಷ್ಯಾಮಿ ।
ತಚ್ಛ॑ಕೇಯ॒-ನ್ತನ್ಮೇ॑ ರಾದ್ಧ್ಯತಾಮ್ ।
ವಾಯೋ᳚ ವ್ರತಪತ॒ ಆದಿ॑ತ್ಯ ವ್ರತಪತೇ ॥ 30 ॥

ವ್ರ॒ತಾನಾಂ᳚-ವ್ರಁತಪತೇ ವ್ರ॒ತ-ಞ್ಚ॑ರಿಷ್ಯಾಮಿ । ತಚ್ಛ॑ಕೇಯ॒-ನ್ತನ್ಮೇ॑ ರಾದ್ಧ್ಯತಾಮ್ ॥
ಇ॒ಮಾ-ಮ್ಪ್ರಾಚೀ॒ಮುದೀ॑ಚೀಮ್ । ಇಷ॒ಮೂರ್ಜ॑ಮ॒ಭಿ ಸಗ್ಗ್​ಸ್ಕೃ॑ತಾಮ್ । ಬ॒ಹು॒ಪ॒ರ್ಣಾಮಶು॑ಷ್ಕಾಗ್ರಾಮ್ ।
ಹರಾ॑ಮಿ ಪಶು॒ಪಾಮ॒ಹಮ್ ॥ ಯತ್ಕೃಷ್ಣೋ॑ ರೂ॒ಪ-ಙ್ಕೃ॒ತ್ವಾ । ಪ್ರಾವಿ॑ಶ॒ಸ್ತ್ವಂ-ವಁನ॒ಸ್ಪತೀನ್॑ ।
ತತ॒ಸ್ತ್ವಾಮೇ॑ಕವಿಗ್ಂಶತಿ॒ಧಾ । ಸಮ್ಭ॑ರಾಮಿ ಸುಸ॒ಮ್ಭೃತಾ᳚ ॥ 31 ॥

ತ್ರೀ-ನ್ಪ॑ರಿ॒ಧೀಗ್​ಸ್ತಿ॒ಸ್ರ-ಸ್ಸ॒ಮಿಧಃ॑ । ಯ॒ಜ್ಞಾಯು॑ರನುಸಞ್ಚ॒ರಾನ್ ।
ಉ॒ಪ॒ವೇ॒ಷ-ಮ್ಮೇಖ್ಷ॑ಣ॒-ನ್ಧೃಷ್ಟಿ᳚ಮ್ । ಸಮ್ಭ॑ರಾಮಿ ಸುಸ॒ಭೃನ್ತಾ᳚ ॥ ಯಾ ಜಾ॒ತಾ ಓಷ॑ಧಯಃ । ದೇ॒ವೇಭ್ಯ॑ ಸ್ತ್ರಿಯು॒ಗ-ಮ್ಪು॒ರಾ । ತಾಸಾ॒-ಮ್ಪರ್ವ॑ ರಾದ್ಧ್ಯಾಸಮ್ । ಪ॒ರಿ॒ಸ್ತ॒ರ-ಮಾ॒ಹರನ್ನ್॑ ॥
ಅ॒ಪಾ-ಮ್ಮೇದ್ಧ್ಯಂ॑-ಯಁ॒ಜ್ಞಿಯ᳚ಮ್ ।
ಸದೇ॑ವಗ್ಂ ಶಿ॒ವಮ॑ಸ್ತು ಮೇ ॥ 32 ॥

ಆ॒ಚ್ಛೇ॒ತ್ತಾ ವೋ॒ ಮಾ ರಿ॑ಷಮ್ । ಜೀವಾ॑ನಿ ಶ॒ರದ॑-ಶ್ಶ॒ತಮ್ ॥ ಅಪ॑ರಿಮಿತಾನಾ॒-ಮ್ಪರಿ॑ಮಿತಾಃ । ಸನ್ನ॑ಹ್ಯೇ ಸುಕೃ॒ತಾಯ॒ಕಮ್ । ಏನೋ॒ ಮಾ ನಿಗಾ᳚-ಙ್ಕತ॒ಮಚ್ಚ॒ ನಾಹಮ್ । ಪುನ॑ರು॒ತ್ಥಾಯ॑ ಬಹು॒ಲಾ ಭ॑ವನ್ತು ॥ ಸ॒ಕೃ॒ದಾ॒ಚ್ಛಿ॒ನ್ನ-ಮ್ಬ॒ರ್॒ಹಿರೂರ್ಣಾ॑ಮೃದು ।
ಸ್ಯೋ॒ನ-ಮ್ಪಿ॒ತೃಭ್ಯ॑ಸ್ತ್ವಾ ಭರಾಮ್ಯ॒ಹಮ್ । ಅ॒ಸ್ಮಿ-ನ್ಥ್ಸೀ॑ದನ್ತು ಮೇ ಪಿ॒ತರ॑-ಸ್ಸೋ॒ಮ್ಯಾಃ ।
ಪಿ॒ತಾ॒ಮ॒ಹಾಃ ಪ್ರಪಿ॑ತಾಮಹಾಶ್ಚಾನು॒ಗೈ-ಸ್ಸ॒ಹ ॥ 33 ॥

ತ್ರಿ॒ವೃ-ತ್ಪ॑ಲಾ॒ಶೇ ದ॒ರ್ಭಃ । ಇಯಾ᳚-ನ್ಪ್ರಾದೇ॒ಶ ಸ॑ಮಿನ್ತಃ । ಯ॒ಜ್ಞೇ ಪ॒ವಿತ್ರ॒-ಮ್ಪೋತೃ॑ತಮಮ್ । ಪಯೋ॑ ಹ॒ವ್ಯ-ಙ್ಕ॑ರೋತು ಮೇ ॥ ಇ॒ಮೌ ಪ್ರಾ॑ಣಾಪಾ॒ನೌ ।
ಯ॒ಜ್ಞಸ್ಯಾಙ್ಗಾ॑ನಿ ಸರ್ವ॒ಶಃ । ಆ॒ಪ್ಯಾ॒ಯಯ॑ನ್ತೌ॒ ಸಞ್ಚ॑ರತಾಮ್ । ಪ॒ವಿತ್ರೇ॑ ಹವ್ಯ॒ಶೋಧ॑ನೇ ॥
ಪ॒ವಿತ್ರೇ᳚ ಸ್ಥೋ ವೈಷ್ಣ॒ವೀ । ವಾ॒ಯುರ್ವಾ॒-ಮ್ಮನ॑ಸಾ ಪುನಾತು ॥ 34 ॥

ಅ॒ಯ-ಮ್ಪ್ರಾ॒ಣಶ್ಚಾ॑ಪಾ॒ನಶ್ಚ॑ । ಯಜ॑ಮಾನ॒-ಮಪಿ॑ಗಚ್ಛತಾಮ್ । ಯ॒ಜ್ಞೇ ಹ್ಯಭೂ॑ತಾ॒-ಮ್ಪೋತಾ॑ರೌ ।
ಪ॒ವಿತ್ರೇ॑ ಹವ್ಯ॒ಶೋಧ॑ನೇ ॥ ತ್ವಯಾ॒ ವೇದಿಂ॑-ವಿಁವಿದುಃ ಪೃಥಿ॒ವೀಮ್ । ತ್ವಯಾ॑ ಯ॒ಜ್ಞೋ ಜಾ॑ಯತೇ ವಿಶ್ವ॒ದಾನಿಃ॑ । ಅಚ್ಛಿ॑ದ್ರಂ-ಯಁ॒ಜ್ಞಮನ್ವೇ॑ಷಿ ವಿ॒ದ್ವಾನ್ ।
ತ್ವಯಾ॒ ಹೋತಾ॒ ಸನ್ತ॑ನೋತ್ಯರ್ಧಮಾ॒ಸಾನ್ ॥ ತ್ರ॒ಯ॒ಸ್ತ್ರಿ॒ಗ್ಂ॒ಶೋ॑-ಽಸಿ॒ ತನ್ತೂ॑ನಾಮ್ ।
ಪ॒ವಿತ್ರೇ॑ಣ ಸ॒ಹಾಗ॑ಹಿ ॥ 35 ॥

ಶಿ॒ವೇಯಗ್ಂ ರಜ್ಜು॑ರಭಿ॒ಧಾನೀ᳚ । ಅ॒ಘ್ನಿ॒ಯಾ-ಮುಪ॑ಸೇವತಾಮ್ ॥ ಅಪ್ರ॑ಸ್ರಗ್ಂಸಾಯ ಯ॒ಜ್ಞಸ್ಯ॑ ।
ಉ॒ಖೇ ಉಪ॑ದಧಾಮ್ಯ॒ಹಮ್ । ಪ॒ಶುಭಿ॒-ಸ್ಸನ್ನೀ॑ತ-ಮ್ಬಿಭೃತಾಮ್ । ಇನ್ದ್ರಾ॑ಯ ಶೃ॒ತ-ನ್ದಧಿ॑ ॥
ಉ॒ಪ॒ವೇ॒ಷೋ॑-ಽಸಿ ಯ॒ಜ್ಞಾಯ॑ । ತ್ವಾ-ಮ್ಪ॑ರಿವೇ॒ಷ-ಮ॑ಧಾರಯನ್ನ್ । ಇನ್ದ್ರಾ॑ಯ ಹ॒ವಿಃ ಕೃ॒ಣ್ವನ್ತಃ॑ ।
ಶಿ॒ವ-ಶ್ಶ॒ಗ್ಮೋ ಭ॑ವಾಸಿ ನಃ ॥ 36 ॥

ಅಮೃ॑ನ್ಮಯ-ನ್ದೇವಪಾ॒ತ್ರಮ್ । ಯ॒ಜ್ಞಸ್ಯಾಯು॑ಷಿ॒ ಪ್ರಯು॑ಜ್ಯತಾಮ್ । ತಿ॒ರಃ॒ ಪ॒ವಿ॒ತ್ರಮತಿ॑ನೀತಾಃ ।
ಆಪೋ॑ ಧಾರಯ॒ ಮಾ-ಽತಿ॑ಗುಃ ॥ ದೇ॒ವೇನ॑ ಸವಿ॒ತ್ರೋತ್ಪೂ॑ತಾಃ । ವಸೋ॒-ಸ್ಸೂರ್ಯ॑ಸ್ಯ ರ॒ಶ್ಮಿಭಿಃ॑ । ಗಾ-ನ್ದೋ॑ಹಪವಿ॒ತ್ರೇ ರಜ್ಜು᳚ಮ್ । ಸರ್ವಾ॒ ಪಾತ್ರಾ॑ಣಿ ಶುನ್ಧತ ॥ ಏ॒ತಾ ಆಚ॑ರನ್ತಿ॒ ಮಧು॑ಮ॒ದ್ದುಹಾ॑ನಾಃ ।
ಪ್ರ॒ಜಾವ॑ತೀ-ರ್ಯ॒ಶಸೋ॑ ವಿ॒ಶ್ವರೂ॑ಪಾಃ ॥ 37 ॥

ಬ॒ಹ್ವೀ ರ್ಭವ॑ನ್ತೀ॒ರುಪ॒ ಜಾಯ॑ಮಾನಾಃ । ಇ॒ಹ ವ॒ ಇನ್ದ್ರೋ॑ ರಮಯತು ಗಾವಃ ॥ ಪೂ॒ಷಾ ಸ್ಥ॑ ॥ ಅ॒ಯ॒ಖ್ಷ್ಮಾ ವಃ॑ ಪ್ರ॒ಜಯಾ॒ ಸಗ್ಂಸೃ॑ಜಾಮಿ ।
ರಾ॒ಯಸ್ಪೋಷೇ॑ಣ ಬಹು॒ಲಾ ಭವ॑ನ್ತೀಃ । ಊರ್ಜ॒-ಮ್ಪಯಃ॒ ಪಿನ್ವ॑ಮಾನಾ ಘೃ॒ತ-ಞ್ಚ॑ ।
ಜೀ॒ವೋ ಜೀವ॑ನ್ತೀ॒ರುಪ॑ ವ-ಸ್ಸದೇಯಮ್ ॥ ದ್ಯೌಶ್ಚೇ॒ಮಂ-ಯಁ॒ಜ್ಞ-ಮ್ಪೃ॑ಥಿ॒ವೀ ಚ॒ ಸನ್ದು॑ಹಾತಾಮ್ ।
ಧಾ॒ತಾ ಸೋಮೇ॑ನ ಸ॒ಹ ವಾತೇ॑ನ ವಾ॒ಯುಃ । ಯಜ॑ಮಾನಾಯ॒ ದ್ರವಿ॑ಣ-ನ್ದಧಾತು ॥ 38 ॥

ಉಥ್ಸ॑-ನ್ದುಹನ್ತಿ ಕ॒ಲಶ॒-ಞ್ಚತು॑ರ್ಬಿಲಮ್ । ಇಡಾ᳚-ನ್ದೇ॒ವೀ-ಮ್ಮಧು॑ಮತೀಗ್ಂ ಸುವ॒ರ್ವಿದ᳚ಮ್ ।
ತದಿ॑ನ್ದ್ರಾ॒ಗ್ನೀ ಜಿ॑ನ್ವತಗ್ಂ ಸೂ॒ನೃತಾ॑ವತ್ । ತ-ದ್ಯಜ॑ಮಾನ-ಮಮೃತ॒ತ್ವೇ ದ॑ಧಾತು ॥
ಕಾಮ॑ಧುಖ್ಷಃ॒ ಪ್ರಣೋ᳚ ಬ್ರೂಹಿ । ಇನ್ದ್ರಾ॑ಯ ಹ॒ವಿರಿ॑ನ್ದ್ರಿ॒ಯಮ್ ॥ ಅ॒ಮೂಂ-ಯಁಸ್ಯಾ᳚-ನ್ದೇ॒ವಾನಾ᳚ಮ್ ।
ಮ॒ನು॒ಷ್ಯಾ॑ಣಾ॒-ಮ್ಪಯೋ॑ ಹಿ॒ತಮ್ ॥ ಬ॒ಹು ದು॒ಗ್ಧೀನ್ದ್ರಾ॑ಯ ದೇ॒ವೇಭ್ಯಃ॑ ।
ಹ॒ವ್ಯ-ಮಾಪ್ಯಾ॑ಯತಾ॒-ಮ್ಪುನಃ॑ ॥ 39 ॥

ವ॒ಥ್ಸೇಭ್ಯೋ॑ ಮನು॒ಷ್ಯೇ᳚ಭ್ಯಃ । ಪು॒ನ॒ರ್ದೋ॒ಹಾಯ॑ ಕಲ್ಪತಾಮ್ ॥ ಯ॒ಜ್ಞಸ್ಯ॒ ಸನ್ತ॑ತಿರಸಿ ।
ಯ॒ಜ್ಞಸ್ಯ॑ ತ್ವಾ॒ ಸನ್ತ॑ತಿ॒ಮನು॒ಸನ್ತ॑ನೋಮಿ ॥ ಅದ॑ಸ್ತಮಸಿ॒ ವಿಷ್ಣ॑ವೇ ತ್ವಾ ।
ಯ॒ಜ್ಞಾಯಾಪಿ॑ ದಧಾಮ್ಯ॒ಹಮ್ । ಅ॒ದ್ಭಿರರಿ॑ಕ್ತೇನ॒ ಪಾತ್ರೇ॑ಣ । ಯಾಃ ಪೂ॒ತಾಃ ಪ॑ರಿ॒ಶೇರ॑ತೇ ॥
ಅ॒ಯ-ಮ್ಪಯ॒-ಸ್ಸೋಮ॑-ಙ್ಕೃ॒ತ್ವಾ । ಸ್ವಾಂ-ಯೋಁನಿ॒-ಮಪಿ॑ಗಚ್ಛತು ॥ 40 ॥

ಪ॒ರ್ಣ॒ವ॒ಲ್ಕಃ ಪ॒ವಿತ್ರ᳚ಮ್ । ಸೌ॒ಮ್ಯ-ಸ್ಸೋಮಾ॒ದ್ಧಿ ನಿರ್ಮಿ॑ತಃ ॥ ಇ॒ಮೌ ಪ॒ರ್ಣ-ಞ್ಚ॑ ದ॒ರ್ಭ-ಞ್ಚ॑ ।
ದೇ॒ವಾನಾಗ್ಂ॑ ಹವ್ಯ॒ಶೋಧ॑ನೌ । ಪ್ರಾ॒ತ॒ರ್ವೇ॒ಷಾಯ॑ ಗೋಪಾಯ । ವಿಷ್ಣೋ॑ ಹ॒ವ್ಯಗ್ಂ ಹಿ ರಖ್ಷ॑ಸಿ ॥
ಉ॒ಭಾವ॒ಗ್ನೀ ಉ॑ಪಸ್ತೃಣ॒ತೇ । ದೇ॒ವತಾ॒ ಉಪ॑ವಸನ್ತು ಮೇ । ಅ॒ಹ-ಙ್ಗ್ರಾ॒ಮ್ಯಾ-ನುಪ॑ವಸಾಮಿ ।
ಮಹ್ಯ॒-ಙ್ಗೋಪ॑ತಯೇ ಪ॒ಶೂನ್ ॥ 41 ॥
[ಆಭೃ॑ತ - ಇ॒ಮಂ - ಗೃ॑ಹ್ಣಾಮಿ॒ ಪೂರ್ವ॒ - ಸ್ತಾಃ ಪುರ್ವಃ॒ ಪರಿ॑ಗೃಹ್ಣಾಮಿ - ಸಭಾಪಾ॒ಲಾ - ಇನ್ದ್ರ॑ಜ್ಯೇಷ್ಠೇಭ್ಯ॒-ಆದಿ॑ತ್ಯ ವ್ರತಪತೇ-ಸುಸ॒ಭ್ರುನ್ತಾ॑ - ಮೇ - ಸ॒ಹ - ಪು॑ನಾತು - ಗಹಿ - ನೋ - ವಿ॒ಶ್ವರೂ॑ಪಾ - ದಧಾತು॒ - ಪುನ॑--ರ್ ಗಚ್ಛತು - ಪ॒ಶುನ್ ] (ಅ. 4)

ಯಾಃ ಪು॒ರಸ್ತಾ॑ದಿ॒ಮಾಮೂರ್ಜ॑ಮಿ॒ಹ ಪ್ರ॒ಜಾ ಇ॒ಹ ಪ॒ಶವೋ॒-ಽಯ-ಮ್ಪಿ॑ತೃ॒ಣಾಮ॒ಗ್ನಿಃ

ಅನುವಾಕಂ 5 - ಐಷ್ಟಿಕಯಾಜಮಾನಮನ್ತ್ರಾಃ
ದೇವಾ॑ ದೇ॒ವೇಷು॒ ಪರಾ᳚ಕ್ರಮದ್ಧ್ವಮ್ । ಪ್ರಥ॑ಮಾ ದ್ವಿ॒ತೀಯೇ॑ಷು । ದ್ವಿತೀ॑ಯಾ-ಸ್ತೃ॒ತೀಯೇ॑ಷು ।
ತ್ರಿರೇ॑ಕಾದಶಾ ಇ॒ಹ ಮಾ॑-ಽವತ । ಇ॒ದಗ್ಂ ಶ॑ಕೇಯಂ॒-ಯಁದಿ॒ದ-ಙ್ಕ॒ರೋಮಿ॑ ।
ಆ॒ತ್ಮಾ ಕ॑ರೋತ್ವಾ॒ತ್ಮನೇ᳚ । ಇ॒ದ-ಙ್ಕ॑ರಿಷ್ಯೇ ಭೇಷ॒ಜಮ್ । ಇ॒ದ-ಮ್ಮೇ॑ ವಿಶ್ವಭೇಷಜಾ ।
ಅಶ್ವಿ॑ನಾ॒ ಪ್ರಾವ॑ತಂ-ಯುಁ॒ವಮ್ ॥ ಇ॒ದಮ॒ಹಗ್ಂ ಸೇನಾ॑ಯಾ ಅ॒ಭೀತ್ವ॑ರ್ಯೈ ॥ 42 ॥

ಮುಖ॒ಮಪೋ॑ಹಾಮಿ ॥ ಸೂರ್ಯ॑ಜ್ಯೋತಿ॒ ರ್ವಿಭಾ॑ಹಿ । ಮ॒ಹ॒ತ ಇ॑ನ್ದ್ರಿ॒ಯಾಯ॑ ॥ ಆಪ್ಯಾ॑ಯತಾ-ಙ್ಘೃ॒ತಯೋ॑ನಿಃ । ಅ॒ಗ್ನಿರ್-ಹ॒ವ್ಯಾ-ಽನು॑ಮನ್ಯತಾಮ್ ।
ಖಮ॑ಙ್ಖ್ಷ್ವ॒ ತ್ವಚ॑ಮಙ್ಖ್ಷ್ವ । ಸು॒ರೂ॒ಪ-ನ್ತ್ವಾ॑ ವಸು॒ವಿದ᳚ಮ್ । ಪ॒ಶೂ॒ನಾ-ನ್ತೇಜ॑ಸಾ ।
ಅ॒ಗ್ನಯೇ॒ ಜುಷ್ಟ॑-ಮ॒ಭಿಘಾ॑ರಯಾಮಿ ॥ ಸ್ಯೋ॒ನ-ನ್ತೇ॒ ಸದ॑ನ-ಙ್ಕರೋಮಿ ॥ 43 ॥

ಘೃ॒ತಸ್ಯ॒ ಧಾರ॑ಯಾ ಸು॒ಶೇವ॑-ಙ್ಕಲ್ಪಯಾಮಿ ॥
ತಸ್ಮಿ᳚ನ್-ಥ್ಸೀದಾ॒ಮೃತೇ॒ ಪ್ರತಿ॑ತಿಷ್ಠ ।
ವ್ರೀ॒ಹೀ॒ಣಾ-ಮ್ಮೇ॑ಧ ಸುಮನ॒ಸ್ಯಮಾ॑ನಃ ॥
ಆ॒ರ್ದ್ರಃ ಪ್ರ॑ಥಸ್ನು॒-ರ್ಭುವ॑ನಸ್ಯ ಗೋ॒ಪಾಃ ।
ಶೃ॒ತ ಉಥ್ಸ್ನಾ॑ತಿ ಜನಿ॒ತಾ ಮ॑ತೀ॒ನಾಮ್ ॥
ಯಸ್ತ॑ ಆ॒ತ್ಮಾ ಪ॒ಶುಷು॒ ಪ್ರವಿ॑ಷ್ಟಃ ।
ದೇ॒ವಾನಾಂ᳚-ವಿಁ॒ಷ್ಠಾಮನು॒ ಯೋ ವಿ॑ತ॒ಸ್ಥೇ ।
ಆ॒ತ್ಮ॒ನ್ವಾ-ನ್ಥ್ಸೋ॑ಮ ಘೃ॒ತವಾ॒ನ್॒. ಹಿ ಭೂ॒ತ್ವಾ ।
ದೇ॒ವಾ-ನ್ಗ॑ಚ್ಛ॒ ಸುವ॑ರ್ವಿನ್ದ॒ ಯಜ॑ಮಾನಾಯ॒ ಮಹ್ಯ᳚ಮ್ ॥ ಇರಾ॒ ಭೂತಿಃ॑ ಪೃಥಿ॒ವ್ಯೈ ರಸೋ॒ ಮೋತ್ಕ್ರ॑ಮೀತ್ ॥ 44 ॥

ದೇವಾಃ᳚ ಪಿತರಃ॒ ಪಿತ॑ರೋ ದೇವಾಃ । ಯೋ॑-ಽಹಮ॑ಸ್ಮಿ॒ ಸ ಸನ್. ಯ॑ಜೇ । ಯಸ್ಯಾ᳚ಸ್ಮಿ॒ ನ ತಮ॒ನ್ತರೇ॑ಮಿ । ಸ್ವ-ಮ್ಮ॑ ಇ॒ಷ್ಟಗ್ಗ್​ ಸ್ವ-ನ್ದ॒ತ್ತಮ್ । ಸ್ವ-ಮ್ಪೂ॒ರ್ತಗ್ಗ್​ ಸ್ವಗ್ಗ್​ ಶ್ರಾ॒ನ್ತಮ್ । ಸ್ವಗ್ಂ ಹು॒ತಮ್ । ತಸ್ಯ॑ ಮೇ॒-ಽಗ್ನಿ-ರು॑ಪದ್ರ॒ಷ್ಟಾ । ವಾ॒ಯುರು॑ಪಶ್ರೋ॒ತಾ ।
ಆ॒ದಿ॒ತ್ಯೋ॑-ಽನುಖ್ಯಾ॒ತಾ । ದ್ಯೌಃ ಪಿ॒ತಾ ॥ 45 ॥

ಪೃ॒ಥಿ॒ವೀ ಮಾ॒ತಾ । ಪ್ರ॒ಜಾಪ॑ತಿ॒ ರ್ಬನ್ಧುಃ॑ ।
ಯ ಏ॒ವಾಸ್ಮಿ॒ ಸ ಸನ್. ಯ॑ಜೇ ॥ ಮಾ ಭೇರ್ಮಾ ಸಂ​ವಿಁ॑ಕ್ಥಾ॒ ಮಾ ತ್ವಾ॑ ಹಿಗ್ಂಸಿಷಮ್ । ಮಾ ತೇ॒ ತೇಜೋ-ಽಪ॑ಕ್ರಮೀತ್ ।
ಭ॒ರ॒ತಮುದ್ಧ॑ರೇ॒ ಮನು॑ಷಿಞ್ಚ । ಅ॒ವ॒ದಾನಾ॑ನಿ ತೇ ಪ್ರ॒ತ್ಯವ॑ದಾಸ್ಯಾಮಿ ।
ನಮ॑ಸ್ತೇ ಅಸ್ತು॒ ಮಾ ಮಾ॑ ಹಿಗ್ಂಸೀಃ ॥ ಯದ॑ವ॒ದಾನಾ॑ನಿ ತೇ-ಽವ॒ದ್ಯನ್ನ್ । ವಿಲೋ॒ಮಾಕಾ॑ರ್​ಷಮಾ॒ತ್ಮನಃ॑ ॥ 46 ॥

ಆಜ್ಯೇ॑ನ॒ ಪ್ರತ್ಯ॑ನಜ್ಮ್ಯೇನತ್ । ತತ್ತ॒ ಆಪ್ಯಾ॑ಯತಾ॒-ಮ್ಪುನಃ॑ ॥ ಅಜ್ಯಾ॑ಯೋ ಯವಮಾ॒ತ್ರಾತ್ ।
ಆ॒ವ್ಯಾ॒ಧಾ-ತ್ಕೃ॑ತ್ಯತಾಮಿ॒ದಮ್ । ಮಾ ರೂ॑ರುಪಾಮ ಯ॒ಜ್ಞಸ್ಯ॑ । ಶು॒ದ್ಧಗ್ಗ್​ ಸ್ವಿ॑ಷ್ಟಮಿ॒ದಗ್ಂ ಹ॒ವಿಃ ॥ ಮನು॑ನಾ ದೃ॒ಷ್ಟಾ-ಙ್ಘೃ॒ತಪ॑ದೀಮ್ । ಮಿ॒ತ್ರಾವರು॑ಣಸಮೀರಿತಾಮ್ । ದ॒ಖ್ಷಿ॒ಣಾ॒ರ್ಧಾದಸ॑ಭಿನ್ನ್ದನ್ನ್ । ಅವ॑ದ್ಯಾ-ಮ್ಯೇಕ॒ತೋ ಮು॑ಖಾಮ್ ॥ 47 ॥

ಇಡೇ॑ ಭಾ॒ಗ-ಞ್ಜು॑ಷಸ್ವ ನಃ । ಜಿನ್ವ॒ ಗಾ ಜಿನ್ವಾರ್ವ॑ತಃ । ತಸ್ಯಾ᳚ಸ್ತೇ ಭಖ್ಷಿ॒ವಾಣ॑-ಸ್ಸ್ಯಾಮ । ಸ॒ರ್ವಾತ್ಮಾ॑ನ-ಸ್ಸ॒ರ್ವಗ॑ಣಾಃ ॥ ಬ್ರದ್ಧ್ನ॒ ಪಿನ್ವ॑ಸ್ವ ।
ದದ॑ತೋ ಮೇ॒ ಮಾ ಖ್ಷಾ॑ಯಿ । ಕು॒ರ್ವ॒ತೋ ಮೇ॒ ಮೋಪ॑ದಸತ್ । ದಿ॒ಶಾ-ಙ್ಕ್ಲೃಪ್ತಿ॑ರಸಿ । ದಿಶೋ॑ ಮೇ ಕಲ್ಪನ್ತಾಮ್ । ಕಲ್ಪ॑ನ್ತಾ-ಮ್ಮೇ॒ ದಿಶಃ॑ ॥ 48 ॥

ದೈವೀ᳚ಶ್ಚ॒ ಮಾನು॑ಷೀಶ್ಚ । ಅ॒ಹೋ॒ರಾ॒ತ್ರೇ ಮೇ॑ ಕಲ್ಪೇತಾಮ್ । ಅ॒ರ್ಧ॒ಮಾ॒ಸಾ ಮೇ॑ ಕಲ್ಪನ್ತಾಮ್ । ಮಾಸಾ॑ ಮೇ ಕಲ್ಪನ್ತಾಮ್ । ಋ॒ತವೋ॑ ಮೇ ಕಲ್ಪನ್ತಾಮ್ । ಸಂ॒​ವಁ॒ಥ್ಸ॒ರೋ ಮೇ॑ ಕಲ್ಪತಾಮ್ ।
ಕ್ಲೃಪ್ತಿ॑ರಸಿ॒ ಕಲ್ಪ॑ತಾ-ಮ್ಮೇ ॥
ಆಶಾ॑ನಾ-ನ್ತ್ವಾ-ಽಽಶಾಪಾ॒ಲೇಭ್ಯಃ॑ ।
ಚ॒ತುರ್ಭ್ಯೋ॑ ಅ॒ಮೃತೇ᳚ಭ್ಯಃ ।
ಇ॒ದ-ಮ್ಭೂ॒ತಸ್ಯಾ-ದ್ಧ್ಯ॑ಖ್ಷೇಭ್ಯಃ ॥ 49 ॥

ವಿ॒ಧೇಮ॑ ಹ॒ವಿಷಾ॑ ವ॒ಯಮ್ । ಭಜ॑ತಾ-ಮ್ಭಾ॒ಗೀ ಭಾ॒ಗಮ್ । ಮಾ-ಽಭಾ॒ಗೋ-ಽಭ॑ಕ್ತ ।
ನಿರ॑ಭಾ॒ಗ-ಮ್ಭ॑ಜಾಮಃ । ಅ॒ಪಸ್ಪಿ॑ನ್ವ । ಓಷ॑ಧೀರ್ಜಿನ್ವ । ದ್ವಿ॒ಪಾತ್ಪಾ॑ಹಿ । ಚತು॑ಷ್ಪಾದವ । ದಿ॒ವೋ ವೃಷ್ಟಿ॒ಮೇರ॑ಯ । ಬ್ರಾ॒ಹ್ಮ॒ಣಾನಾ॑-ಮಿ॒ದಗ್ಂ ಹ॒ವಿಃ ॥ 50 ॥

ಸೋ॒ಮ್ಯಾನಾಗ್ಂ॑ ಸೋಮಪೀ॒ಥಿನಾ᳚ಮ್ । ನಿರ್ಭ॒ಕ್ತೋ ಬ್ರಾ᳚ಹ್ಮಣಃ । ನೇಹಾ-ಬ್ರಾ᳚ಹ್ಮಣಸ್ಯಾಸ್ತಿ ॥
ಸಮ॑ಙ್ಕ್ತಾ-ಮ್ಬ॒ರ॒ಃಇರ್-ಹ॒ವಿಷಾ॑ ಘೃ॒ತೇನ॑ । ಸಮಾ॑ದಿ॒ತ್ಯೈ ರ್ವಸು॑ಭಿ॒-ಸ್ಸ-ಮ್ಮ॒ರುದ್ಭಿಃ॑ ।
ಸಮಿನ್ದ್ರೇ॑ಣ॒ ವಿಶ್ವೇ॑ಭಿ ರ್ದೇ॒ವೇಭಿ॑ರಙ್ಕ್ತಾಮ್ ।
ದಿ॒ವ್ಯ-ನ್ನಭೋ॑ ಗಚ್ಛತು॒ ಯ-ಥ್ಸ್ವಾಹಾ᳚ ॥
ಇ॒ನ್ದ್ರಾ॒ಣೀ ವಾ॑ ವಿಧ॒ವಾ ಭೂ॑ಯಾಸಮ್ । ಅದಿ॑ತಿರಿವ ಸುಪು॒ತ್ರಾ ।
ಅ॒ಸ್ಥೂ॒ರಿ ತ್ವಾ॑ ಗಾರ್​ಹಪತ್ಯ ॥ 51 ॥

ಉಪ॒ನಿಷ॑ದೇ ಸುಪ್ರಜಾ॒ಸ್ತ್ವಾಯ॑ ॥
ಸ-ಮ್ಪತ್ನೀ॒ ಪತ್ಯಾ॑ ಸುಕೃ॒ತೇನ॑ ಗಚ್ಛತಾಮ್ ।
ಯ॒ಜ್ಞಸ್ಯ॑ ಯು॒ಕ್ತೌ ಧುರ್ಯಾ॑ವಭೂತಾಮ್ ।
ಸ॒ಜಾ॒ನ್ನಾ॒ನೌ ವಿಜ॑ಹತಾ॒-ಮರಾ॑ತೀಃ ।
ದಿ॒ವಿ ಜ್ಯೋತಿ॑ರ॒ಜ-ರ॒ಮಾರ॑ಭೇತಾಮ್ ॥
ದಶ॑ ತೇ ತ॒ನುವೋ॑ ಯಜ್ಞ ಯ॒ಜ್ಞಿಯಾಃ᳚ ।
ತಾಃ ಪ್ರೀ॑ಣಾತು॒ ಯಜ॑ಮಾನೋ ಘೃ॒ತೇನ॑ । ನಾ॒ರಿ॒ಷ್ಠಯೋಃ᳚ ಪ್ರ॒ಶಿಷ॒ಮೀಡ॑ಮಾನಃ ।
ದೇ॒ವಾನಾ॒-ನ್ದೈವ್ಯೇ-ಽಪಿ॒ ಯಜ॑ಮಾನೋ॒-ಽಮೃತೋ॑-ಽಭೂತ್ ॥
ಯಂ-ವಾಁ᳚-ನ್ದೇ॒ವಾ ಅ॑ಕಲ್ಪಯನ್ನ್ ॥ 52 ॥

ಊ॒ರ್ಜೋ ಭಾ॒ಗಗ್ಂ ಶ॑ತಕ್ರತೂ । ಏ॒ತದ್ವಾ॒-ನ್ತೇನ॑ ಪ್ರೀಣಾನಿ । ತೇನ॑ ತೃಪ್ಯತಮಗ್ಂಹಹೌ ॥ ಅ॒ಹ-ನ್ದೇ॒ವಾನಾಗ್ಂ॑ ಸು॒ಕೃತಾ॑ಮಸ್ಮಿ ಲೋ॒ಕೇ ।
ಮಮೇ॒ದಮಿ॒ಷ್ಟ-ನ್ನ ಮಿಥು॑ ರ್ಭವಾತಿ । ಅ॒ಹ-ನ್ನಾ॑ರಿ॒ಷ್ಠಾ-ವನು॑ಯಜಾಮಿ ವಿ॒ದ್ವಾನ್ ।
ಯದಾ᳚ಭ್ಯಾ॒-ಮಿನ್ದ್ರೋ॒ ಅದ॑ಧಾ-ದ್ಭಾಗ॒ಧೇಯ᳚ಮ್ ॥ ಅದಾ॑ರಸೃದ್ಭವತ ದೇವ ಸೋಮ ।
ಅ॒ಸ್ಮಿನ್. ಯ॒ಜ್ಞೇ ಮ॑ರುತೋ ಮೃಡತಾ ನಃ ।
ಮಾ ನೋ॑ ವಿದದ॒ಭಿ ಭಾ॒ಮೋ ಅಶ॑ಸ್ತಿಃ ॥ 53 ॥

ಮಾ ನೋ॑ ವಿದ-ದ್ವ॒ಜನಾ॒ ದ್ವೇಷ್ಯಾ॒ ಯಾ ॥
ಋ॒ಷ॒ಭಂ-ವಾಁ॒ಜಿನಂ॑-ವಁ॒ಯಮ್ ।
ಪೂ॒ರ್ಣಮಾ॑ಸಂ-ಯಁಜಾಮಹೇ । ಸ ನೋ॑ ದೋಹತಾಗ್ಂ ಸು॒ವೀರ್ಯ᳚ಮ್ । ರಾ॒ಯಸ್ಪೋಷಗ್ಂ॑ ಸಹ॒ಸ್ರಿಣ᳚ಮ್ । ಪ್ರಾ॒ಣಾಯ॑ ಸು॒ರಾಧ॑ಸೇ । ಪೂ॒ರ್ಣಮಾ॑ಸಾಯ॒ ಸ್ವಾಹಾ᳚ ॥
ಅ॒ಮಾ॒ವಾ॒ಸ್ಯಾ॑ ಸು॒ಭಗಾ॑ ಸು॒ಶೇವಾ᳚ । ಧೇ॒ನುರಿ॑ವ॒ ಭೂಯ॑ ಆ॒ಪ್ಯಾಯ॑ಮಾನಾ । ಸಾ ನೋ॑ ದೋಹತಾಗ್ಂ ಸು॒ವೀರ್ಯ᳚ಮ್ । ರಾ॒ಯಸ್ಪೋಷಗ್ಂ॑ ಸಹ॒ಸ್ರಿಣ᳚ಮ್ ।
ಅ॒ಪಾ॒ನಾಯ॑ ಸು॒ರಾಧ॑ಸೇ । ಅ॒ಮಾ॒ವಾ॒ಸ್ಯಾ॑ಯೈ॒ ಸ್ವಾಹಾ᳚ ॥ ಅ॒ಭಿಸ್ತೃ॑ಣೀಹಿ॒ ಪರಿ॑ಧೇಹಿ॒ ವೇದಿ᳚ಮ್ ।
ಜಾ॒ಮಿ-ಮ್ಮಾ ಹಿಗ್ಂ॑ಸೀರಮು॒ಯಾ ಶಯಾ॑ನಾ ।
ಹೋ॒ತೃ॒ಷದ॑ನಾ॒ ಹರಿ॑ತಾ-ಸ್ಸು॒ವರ್ಣಾಃ᳚ । ನಿ॒ಷ್ಕಾ ಇ॒ಮೇ ಯಜ॑ಮಾನಸ್ಯ ಬ್ರ॒ದ್ಧ್ನೇ ॥ 54 ॥
(ಅ॒ಭೀತ್ವ॑ರ್ಯೈ - ಕರೋಮಿ - ಕ್ರಮೀತ್ - ಪಿ॒ತಾ - ಽಽತ್ಮನ॑ - ಏಕ॒ತೋಮು॑ಖಾಂ - ಮೇ॒ ದಿಶೋ - ಽಧ್ಯ॑ಖ್ಷೇಭ್ಯೋ - ಹ॒ವಿ--ರ್ ಗಾ॑ರ್​ಹಪತ್ಯಾ - ಕಲ್ಪಯ॒ - ನ್ನಶ॑ಸ್ತಿಃ॒ - ಸಾ ನೋ॑ ದೋಹತಾಗ್ಂ ಸು॒ವೀರ್ಯಗ್ಂ॑ ಸ॒ಪ್ತ ಚ॑) (ಅ. 5)

ಅನುವಾಕಂ 6 - ಐಷ್ಟಿಕಯಾಜಮಾನಮನ್ತ್ರಾಃ
ಪರಿ॑ಸ್ತೃಣೀತ॒ ಪರಿ॑ಧತ್ತಾ॒ಗ್ನಿಮ್ । ಪರಿ॑ಹಿತೋ॒-ಽಗ್ನಿ ರ್ಯಜ॑ಮಾನ-ಮ್ಭುನಕ್ತು । ಅ॒ಪಾಗ್ಂ ರಸ॒ ಓಷ॑ಧೀನಾಗ್ಂ ಸು॒ವರ್ಣಃ॑ । ನಿ॒ಷ್ಕಾ ಇ॒ಮೇ ಯಜ॑ಮಾನಸ್ಯ ಸನ್ತು ಕಾಮ॒ದುಘಾಃ᳚ । ಅ॒ಮುತ್ರಾ॒ಮುಷ್ಮಿ॑ನ್ ಁಲೋ॒ಕೇ ॥
ಭೂಪ॑ತೇ॒ ಭುವ॑ನಪತೇ । ಮ॒ಹ॒ತೋ ಭೂ॒ತಸ್ಯ॑ ಪತೇ । ಬ್ರ॒ಹ್ಮಾಣ॑-ನ್ತ್ವಾ ವೃಣೀಮಹೇ ॥
ಅ॒ಹ-ಮ್ಭೂಪ॑ತಿರ॒ಹ-ಮ್ಭುವ॑ನಪತಿಃ ।
ಅ॒ಹ-ಮ್ಮ॑ಹ॒ತೋ ಭೂ॒ತಸ್ಯ॒ ಪತಿಃ॑ ॥ 55 ॥

ದೇ॒ವೇನ॑ ಸವಿ॒ತ್ರಾ ಪ್ರಸೂ॑ತ॒ ಆರ್ತ್ವಿ॑ಜ್ಯ-ಙ್ಕರಿಷ್ಯಾಮಿ । ದೇವ॑ ಸವಿತರೇ॒ತ-ನ್ತ್ವಾ॑ ವೃಣತೇ ।
ಬೃಹ॒ಸ್ಪತಿ॒-ನ್ದೈವ್ಯ॑-ಮ್ಬ್ರ॒ಹ್ಮಾಣ᳚ಮ್ । ತದ॒ಹ-ಮ್ಮನ॑ಸೇ॒ ಪ್ರಬ್ರ॑ವೀಮಿ । ಮನೋ॑ ಗಾಯತ್ರಿ॒ಯೈ ।
ಗಾ॒ಯ॒ತ್ರೀ ತ್ರಿ॒ಷ್ಟುಭೇ᳚ । ತ್ರಿ॒ಷ್ಟು-ಬ್ಜಗ॑ತ್ಯೈ । ಜಗ॑ತ್ಯನು॒ಷ್ಟುಭೇ᳚ । ಅ॒ನು॒ಷ್ಟು-ಕ್ಪ॒ಙ್ಕ್ತ್ಯೈ । ಪ॒ಙ್ಕ್ತಿಃ ಪ್ರ॒ಜಾಪ॑ತಯೇ ॥ 56 ॥

ಪ್ರ॒ಜಾಪ॑ತಿ॒ ರ್ವಿಶ್ವೇ᳚ಭ್ಯೋ ದೇ॒ವೇಭ್ಯಃ॑ । ವಿಶ್ವೇ॑ ದೇ॒ವಾ ಬೃಹ॒ಸ್ಪತ॑ಯೇ । ಬೃಹ॒ಸ್ಪತಿ॒-ರ್ಬ್ರಹ್ಮ॑ಣೇ ।
ಬ್ರಹ್ಮ॒ ಭೂರ್ಭುವ॒-ಸ್ಸುವಃ॑ । ಬೃಹ॒ಸ್ಪತಿ॑ ರ್ದೇ॒ವಾನಾ᳚-ಮ್ಬ್ರ॒ಹ್ಮಾ । ಅ॒ಹ-ಮ್ಮ॑ನು॒ಷ್ಯಾ॑ಣಾಮ್ । ಬೃಹ॑ಸ್ಪತೇ ಯ॒ಜ್ಞ-ಙ್ಗೋ॑ಪಾಯ ॥ ಇ॒ದ-ನ್ತಸ್ಮೈ॑ ಹ॒ರ್ಮ್ಯ-ಙ್ಕ॑ರೋಮಿ । ಯೋ ವೋ॑ ದೇವಾ॒ಶ್ಚರ॑ತಿ ಬ್ರಹ್ಮ॒ಚರ್ಯ᳚ಮ್ । ಮೇ॒ಧಾ॒ವೀ ದಿ॒ಖ್ಷು ಮನ॑ಸಾ ತಪ॒ಸ್ವೀ ॥ 57 ॥

ಅ॒ನ್ತರ್ದೂ॒ತಶ್ಚ॑ರತಿ॒ ಮಾನು॑ಷೀಷು ॥
ಚತು॑-ಶ್ಶಿಖಣ್ಡಾ ಯುವ॒ತಿ-ಸ್ಸು॒ಪೇಶಾಃ᳚ ।
ಘೃ॒ತಪ್ರ॑ತೀಕಾ॒ ಭುವ॑ನಸ್ಯ॒ ಮದ್ಧ್ಯೇ᳚ । ಮ॒ರ್ಮೃ॒ಜ್ಯಮಾ॑ನಾ ಮಹ॒ತೇ ಸೌಭ॑ಗಾಯ ।
ಮಹ್ಯ॑-ನ್ಧುಖ್ಷ್ವ॒ ಯಜ॑ಮಾನಾಯ॒ ಕಾಮಾನ್॑ ॥
ಭೂಮಿ॑ ರ್ಭೂ॒ತ್ವಾ ಮ॑ಹಿ॒ಮಾನ॑-ಮ್ಪುಪೋಷ ।
ತತೋ॑ ದೇ॒ವೀ ವ॑ರ್ಧಯತೇ॒ ಪಯಾಗ್ಂ॑ಸಿ ।
ಯ॒ಜ್ಞಿಯಾ॑ ಯ॒ಜ್ಞಂ-ವಿಁಚ॒ಯನ್ತಿ॒ ಶಞ್ಚ॑ ।
ಓಷ॑ಧೀ॒ರಾಪ॑ ಇ॒ಹ ಶಕ್ವ॑ರೀಶ್ಚ ॥
ಯೋ ಮಾ॑ ಹೃ॒ದಾ ಮನ॑ಸಾ॒ ಯಶ್ಚ॑ ವಾ॒ಚಾ ॥ 58 ॥

ಯೋ ಬ್ರಹ್ಮ॑ಣಾ॒ ಕರ್ಮ॑ಣಾ॒ ದ್ವೇಷ್ಟಿ॑ ದೇವಾಃ ।
ಯ-ಶ್ಶ್ರು॒ತೇನ॒ ಹೃದ॑ಯೇನೇಷ್ಣ॒ತಾ ಚ॑ ।
ತಸ್ಯೇ᳚ನ್ದ್ರ॒ ವಜ್ರೇ॑ಣ॒ ಶಿರ॑ಶ್ಛಿನದ್ಮಿ ॥
ಊರ್ಣಾ॑ಮೃದು॒ ಪ್ರಥ॑ಮಾನಗ್ಗ್​ ಸ್ಯೋ॒ನಮ್ ।
ದೇ॒ವೇಭ್ಯೋ॒ ಜುಷ್ಟ॒ಗ್ಂ॒ ಸದ॑ನಾಯ ಬ॒ರ್॒ಹಿಃ । ಸು॒ವ॒ರ್ಗೇ ಲೋ॒ಕೇ ಯಜ॑ಮಾನ॒ಗ್ಂ॒ ಹಿ ಧೇ॒ಹಿ ।
ಮಾ-ನ್ನಾಕ॑ಸ್ಯ ಪೃ॒ಷ್ಠೇ ಪ॑ರ॒ಮೇ ವ್ಯೋ॑ಮನ್ನ್ ॥ ಚತು॑-ಶ್ಶಿಖಣ್ಡಾ ಯುವ॒ತಿ-ಸ್ಸು॒ಪೇಶಾಃ᳚ ।
ಘೃ॒ತಪ್ರ॑ತೀಕಾ ವ॒ಯುನಾ॑ನಿ ವಸ್ತೇ ।
ಸಾ ಸ್ತೀ॒ರ್ಯಮಾ॑ಣಾ ಮಹ॒ತೇ ಸೌಭ॑ಗಾಯ ॥ 59 ॥

ಸಾ ಮೇ॑ ಧುಖ್ಷ್ವ॒ ಯಜ॑ಮಾನಾಯ॒ ಕಾಮಾನ್॑ ।
ಶಿ॒ವಾ ಚ॑ ಮೇ ಶ॒ಗ್ಮಾ ಚೈ॑ಧಿ ।
ಸ್ಯೋ॒ನಾ ಚ॑ ಮೇ ಸು॒ಷದಾ॑ ಚೈಧಿ ।
ಊರ್ಜ॑ಸ್ವತೀ ಚ ಮೇ॒ ಪಯ॑ಸ್ವತೀ ಚೈಧಿ ।
ಇಷ॒ಮೂರ್ಜ॑-ಮ್ಮೇ ಪಿನ್ವಸ್ವ । ಬ್ರಹ್ಮ॒ ತೇಜೋ॑ ಮೇ ಪಿನ್ವಸ್ವ । ಖ್ಷ॒ತ್ರಮೋಜೋ॑ ಮೇ ಪಿನ್ವಸ್ವ ।
ವಿಶ॒-ಮ್ಪುಷ್ಟಿ॑-ಮ್ಮೇ ಪಿನ್ವಸ್ವ ।
ಆಯು॑ರ॒ನ್ನಾದ್ಯ॑-ಮ್ಮೇ ಪಿನ್ವಸ್ವ ।
ಪ್ರ॒ಜಾ-ಮ್ಪ॒ಶೂ-ನ್ಮೇ॑ ಪಿನ್ವಸ್ವ ॥ 60 ॥

ಅ॒ಸ್ಮಿನ್. ಯ॒ಜ್ಞ ಉಪ॒ ಭೂಯ॒ ಇನ್ನು ಮೇ᳚ ।
ಅವಿ॑ಖ್ಷೋಭಾಯ ಪರಿ॒ಧೀನ್ದ॑ಧಾಮಿ ।
ಧ॒ರ್ತಾ ಧ॒ರುಣೋ॒ ಧರೀ॑ಯಾನ್ ।
ಅ॒ಗ್ನಿ ರ್ದ್ವೇಷಾಗ್ಂ॑ಸಿ॒ ನಿರಿ॒ತೋ ನು॑ದಾತೈ ॥
ವಿಚ್ಛಿ॑ನದ್ಮಿ॒ ವಿಧೃ॑ತೀಭ್ಯಾಗ್ಂ ಸ॒ಪತ್ನಾನ್॑ ।
ಜಾ॒ತಾ-ನ್ಭ್ರಾತೃ॑ವ್ಯಾ॒ನ್॒. ಯೇ ಚ॑ ಜನಿ॒ಷ್ಯಮಾ॑ಣಾಃ ।
ವಿ॒ಶೋ ಯ॒ನ್ತ್ರಾಭ್ಯಾಂ॒-ವಿಁಧ॑ಮಾಮ್ಯೇನಾನ್ । ಅ॒ಹಗ್ಗ್​ಸ್ವಾನಾ॑-ಮುತ್ತ॒ಮೋ॑-ಽಸಾನಿ ದೇವಾಃ ।
ವಿ॒ಶೋ ಯ॒ನ್ತ್ರೇ ನು॒ದಮಾ॑ನೇ॒ ಅರಾ॑ತಿಮ್ । ವಿಶ್ವ॑-ಮ್ಪಾ॒ಪ್ಮಾನ॒ಮಮ॑ತಿ-ನ್ದುರ್ಮರಾ॒ಯುಮ್ ॥ 61 ॥

ಸೀದ॑ನ್ತೀ ದೇ॒ವೀ ಸು॑ಕೃ॒ತಸ್ಯ॑ ಲೋ॒ಕೇ ।
ಧೃತೀ᳚ ಸ್ಥೋ॒ ವಿಧೃ॑ತೀ॒ ಸ್ವಧೃ॑ತೀ ।
ಪ್ರಾ॒ಣಾನ್ಮಯಿ॑ ಧಾರಯತಮ್ । ಪ್ರ॒ಜಾ-ಮ್ಮಯಿ॑ ಧಾರಯತಮ್ । ಪ॒ಶೂನ್ಮಯಿ॑ ಧಾರಯತಮ್ ॥
ಅ॒ಯ-ಮ್ಪ್ರ॑ಸ್ತ॒ರ ಉ॒ಭಯ॑ಸ್ಯ ಧ॒ರ್ತಾ ।
ಧ॒ರ್ತಾ ಪ್ರ॑ಯಾ॒ಜಾನಾ॑-ಮು॒ತಾನೂ॑ಯಾ॒ಜಾನಾ᳚ಮ್ ।
ಸ ದಾ॑ಧಾರ ಸ॒ಮಿಧೋ॑ ವಿ॒ಶ್ವರೂ॑ಪಾಃ ।
ತಸ್ಮಿ॒ನ್-ಥ್ಸ್ರುಚೋ॒ ಅದ್ಧ್ಯಾಸಾ॑ದಯಾಮಿ ॥
ಆರೋ॑ಹ ಪ॒ಥೋ ಜು॑ಹು ದೇವ॒ಯಾನಾನ್॑ ॥ 62 ॥

ಯತ್ರರ್​ಷ॑ಯಃ ಪ್ರಥಮ॒ಜಾ ಯೇ ಪು॑ರಾ॒ಣಾಃ । ಹಿರ॑ಣ್ಯಪಖ್ಷಾ-ಽಜಿ॒ರಾ ಸಮ್ಭೃ॑ತಾಙ್ಗಾ ।
ವಹಾ॑ಸಿ ಮಾ ಸು॒ಕೃತಾಂ॒-ಯಁತ್ರ॑ ಲೋ॒ಕಾಃ ॥
ಅವಾ॒ಹ-ಮ್ಬಾ॑ಧ ಉಪ॒ಭೃತಾ॑ ಸ॒ಪತ್ನಾನ್॑ ।
ಜಾ॒ತಾ-ನ್ಭ್ರಾತೃ॑ವ್ಯಾ॒ನ್॒. ಯೇ ಚ॑ ಜನಿ॒ಷ್ಯಮಾ॑ಣಾಃ । ದೋಹೈ॑ ಯ॒ಜ್ಞಗ್ಂ ಸು॒ದುಘಾ॑ಮಿವ ಧೇ॒ನುಮ್ ।
ಅ॒ಹಮುತ್ತ॑ರೋ ಭೂಯಾಸಮ್ । ಅಧ॑ರೇ॒ ಮಥ್ಸ॒ಪತ್ನಾಃ᳚ ॥
ಯೋ ಮಾ॑ ವಾ॒ಚಾ ಮನ॑ಸಾ ದುರ್ಮರಾ॒ಯುಃ ।
ಹೃ॒ದಾ-ಽರಾ॑ತೀ॒ಯಾ-ದ॑ಭಿ॒ದಾಸ॑-ದಗ್ನೇ ॥ 63 ॥

ಇ॒ದಮ॑ಸ್ಯ ಚಿ॒ತ್ತಮಧ॑ರ-ನ್ಧ್ರು॒ವಾಯಾಃ᳚ । ಅ॒ಹಮುತ್ತ॑ರೋ ಭೂಯಾಸಮ್ । ಅಧ॑ರೇ॒ ಮಥ್ಸ॒ಪತ್ನಾಃ᳚ ॥
ಋ॒ಷ॒ಭೋ॑-ಽಸಿ ಶಾಕ್ವ॒ರಃ । ಘೃ॒ತಾಚೀ॑ನಾಗ್ಂ ಸೂ॒ನುಃ । ಪ್ರಿ॒ಯೇಣ॒ ನಾಮ್ನಾ᳚ ಪ್ರಿ॒ಯೇ ಸದ॑ಸಿ ಸೀದ ॥
ಸ್ಯೋ॒ನೋ ಮೇ॑ ಸೀದ ಸು॒ಷದಃ॑ ಪೃಥಿ॒ವ್ಯಾಮ್ ।
ಪ್ರಥ॑ಯಿ ಪ್ರ॒ಜಯಾ॑ ಪ॒ಶುಭಿ॑-ಸ್ಸುವ॒ರ್ಗೇ ಲೋ॒ಕೇ ।
ದಿ॒ವಿ ಸೀ॑ದ ಪೃಥಿ॒ವ್ಯಾ-ಮ॒ನ್ತರಿ॑ಖ್ಷೇ ।
ಅ॒ಹಮುತ್ತ॑ರೋ ಭೂಯಾಸಮ್ ॥ 64 ॥

ಅಧ॑ರೇ॒ ಮಥ್ಸ॒ಪತ್ನಾಃ᳚ ॥
ಇ॒ಯಗ್ಗ್​ ಸ್ಥಾ॒ಲೀ ಘೃ॒ತಸ್ಯ॑ ಪೂ॒ರ್ಣಾ ।
ಅಚ್ಛಿ॑ನ್ನಪಯಾ-ಶ್ಶ॒ತಧಾ॑ರ॒ ಉಥ್ಸಃ॑ ।
ಮಾ॒ರು॒ತೇನ॒ ಶರ್ಮ॑ಣಾ॒ ದೈವ್ಯೇ॑ನ ॥
ಯ॒ಜ್ಞೋ॑-ಽಸಿ ಸ॒ರ್ವತ॑-ಶ್ಶ್ರಿ॒ತಃ । ಸ॒ರ್ವತೋ॒ ಮಾ-ಮ್ಭೂ॒ತ-ಮ್ಭ॑ವಿ॒ಷ್ಯ-ಚ್ಛ್ರ॑ಯತಾಮ್ । ಶ॒ತ-ಮ್ಮೇ॑ ಸನ್ತ್ವಾ॒ಶಿಷಃ॑ । ಸ॒ಹಸ್ರ॑-ಮ್ಮೇ ಸನ್ತು ಸೂ॒ನೃತಾಃ᳚ । ಇರಾ॑ವತೀಃ ಪಶು॒ಮತೀಃ᳚ । ಪ್ರ॒ಜಾಪ॑ತಿರಸಿ ಸ॒ರ್ವತ॑-ಶ್ಶ್ರಿ॒ತಃ ॥ 65 ॥
ಸ॒ರ್ವತೋ॒ ಮಾ-ಮ್ಭೂ॒ತ-ಮ್ಭ॑ವಿ॒ಷ್ಯ-ಚ್ಛ್ರ॑ಯತಾಮ್ । ಶ॒ತ-ಮ್ಮೇ॑ ಸನ್ತ್ವಾ॒ಶಿಷಃ॑ ।
ಸ॒ಹಸ್ರ॑-ಮ್ಮೇ ಸನ್ತು ಸೂ॒ನೃತಾಃ᳚ । ಇರಾ॑ವತೀಃ ಪಶು॒ಮತೀಃ᳚ ॥ ಇ॒ದಮಿ॑ನ್ದ್ರಿ॒ಯ-ಮ॒ಮೃತಂ॑-ವೀಁ॒ರ್ಯ᳚ಮ್ । ಅ॒ನೇನೇನ್ದ್ರಾ॑ಯ ಪ॒ಶವೋ॑-ಽಚಿಕಿಥ್ಸನ್ನ್ ।
ತೇನ॑ ದೇವಾ ಅವ॒ತೋಪ॒ ಮಾಮ್ । ಇ॒ಹೇಷ॒ಮೂರ್ಜಂ॒-ಯಁಶ॒-ಸ್ಸಹ॒ ಓಜ॑-ಸ್ಸನೇಯಮ್ । ಶೃ॒ತ-ಮ್ಮಯಿ॑ ಶ್ರಯತಾಮ್ ॥ ಯ-ತ್ಪೃ॑ಥಿ॒ವೀ-ಮಚ॑ರ॒ತ್ತತ್-ಪ್ರವಿ॑ಷ್ಟಮ್ ॥ 66 ॥

ಯೇನಾಸಿ॑ಞ್ಚ॒-ದ್ಬಲ॒ಮಿನ್ದ್ರೇ᳚ ಪ್ರ॒ಜಾಪ॑ತಿಃ ।
ಇ॒ದ-ನ್ತಚ್ಛು॒ಕ್ರ-ಮ್ಮಧು॑ ವಾ॒ಜಿನೀ॑ವತ್ ।
ಯೇನೋ॒-ಪರಿ॑ಷ್ಟಾ॒ದಧಿ॑ನೋ-ನ್ಮಹೇ॒ನ್ದ್ರಮ್ ।
ದಧಿ॒ ಮಾ-ನ್ಧಿ॑ನೋತು ॥
ಅ॒ಯಂ-ವೇಁ॒ದಃ ಪೃ॑ಥಿ॒ವೀ-ಮನ್ವ॑ವಿನ್ದತ್ ।
ಗುಹಾ॑ ಸ॒ತೀ-ಙ್ಗಹ॑ನೇ॒ ಗಹ್ವ॑ರೇಷು ।
ಸ ವಿ॑ನ್ದತು॒ ಯಜ॑ಮಾನಾಯ ಲೋ॒ಕಮ್ ।
ಅಚ್ಛಿ॑ದ್ರಂ-ಯಁ॒ಜ್ಞ-ಮ್ಭೂರಿ॑ಕರ್ಮಾ ಕರೋತು ॥
ಅ॒ಯಂ-ಯಁ॒ಜ್ಞ-ಸ್ಸಮ॑ಸದದ್ಧ॒ವಿಷ್ಮಾನ್॑ ।
ಋ॒ಚಾ ಸಾಮ್ನಾ॒ ಯಜು॑ಷಾ ದೇ॒ವತಾ॑ಭಿಃ ॥ 67 ॥

ತೇನ॑ ಲೋ॒ಕಾನ್-ಥ್ಸೂರ್ಯ॑ವತೋ ಜಯೇಮ ।
ಇನ್ದ್ರ॑ಸ್ಯ ಸ॒ಖ್ಯ-ಮ॑ಮೃತ॒ತ್ವ-ಮ॑ಶ್ಯಾಮ್ ॥
ಯೋ ನಃ॒ ಕನೀ॑ಯ ಇ॒ಹ ಕಾ॒ಮಯಾ॑ತೈ ।
ಅ॒ಸ್ಮಿನ್. ಯ॒ಜ್ಞೇ ಯಜ॑ಮಾನಾಯ॒ ಮಹ್ಯ᳚ಮ್ ।
ಅಪ॒ ತಮಿ॑ನ್ದ್ರಾ॒ಗ್ನೀ ಭುವ॑ನಾನ್ನುದೇತಾಮ್ ।
ಅ॒ಹ-ಮ್ಪ್ರ॒ಜಾಂ-ವೀಁ॒ರವ॑ತೀಂ-ವಿಁದೇಯ ॥
ಅಗ್ನೇ॑ ವಾಜಜಿತ್ । ವಾಜ॑-ನ್ತ್ವಾ ಸರಿ॒ಷ್ಯನ್ತ᳚ಮ್ ।
ವಾಜ॑-ಞ್ಜೇ॒ಷ್ಯನ್ತ᳚ಮ್ । ವಾ॒ಜಿನಂ॑-ವಾಁಜ॒ಜಿತ᳚ಮ್ ॥ 68 ॥

ವಾ॒ಜ॒ಜಿ॒ತ್ಯಾಯೈ॒ ಸಮ್ಮಾ᳚ರ್ಜ್ಮಿ । ಅ॒ಗ್ನಿಮ॑ನ್ನಾ॒-ದಮ॒ನ್ನಾದ್ಯಾ॑ಯ ॥ ಉಪ॑ಹೂತೋ॒ ದ್ಯೌಃ ಪಿ॒ತಾ ।
ಉಪ॒ ಮಾ-ನ್ದ್ಯೌಃ ಪಿ॒ತಾ ಹ್ವ॑ಯತಾಮ್ । ಅ॒ಗ್ನಿ-ರಾಗ್ನೀ᳚ದ್ಧ್ರಾತ್ । ಆಯು॑ಷೇ॒ ವರ್ಚ॑ಸೇ । ಜೀ॒ವಾತ್ವೈ ಪುಣ್ಯಾ॑ಯ । ಉಪ॑ಹೂತಾ ಪೃಥಿ॒ವೀ ಮಾ॒ತಾ । ಉಪ॒ ಮಾ-ಮ್ಮಾ॒ತಾ ಪೃ॑ಥಿ॒ವೀ ಹ್ವ॑ಯತಾಮ್ । ಅ॒ಗ್ನಿ-ರಾಗ್ನೀ᳚ದ್ಧ್ರಾತ್ ॥ 69 ॥

ಆಯು॑ಷೇ॒ ವರ್ಚ॑ಸೇ । ಜೀ॒ವಾತ್ವೈ ಪುಣ್ಯಾ॑ಯ ॥
ಮನೋ॒ ಜ್ಯೋತಿ॑ ರ್ಜುಷತಾ॒ಮಾಜ್ಯ᳚ಮ್ ।
ವಿಚ್ಛಿ॑ನ್ನಂ-ಯಁ॒ಜ್ಞಗ್ಂ ಸಮಿ॒ಮ-ನ್ದ॑ಧಾತು । ಬೃಹ॒ಸ್ಪತಿ॑-ಸ್ತನುತಾಮಿ॒ಮ-ನ್ನಃ॑ ।
ವಿಶ್ವೇ॑ ದೇ॒ವಾ ಇ॒ಹ ಮಾ॑ದಯನ್ತಾಮ್ ॥
ಯ-ನ್ತೇ॑ ಅಗ್ನ ಆವೃ॒ಶ್ಚಾಮಿ॑ । ಅ॒ಹಂ-ವಾಁ᳚ ಖ್ಷಿಪಿ॒ತಶ್ಚರನ್ನ್॑ । ಪ್ರ॒ಜಾ-ಞ್ಚ॒ ತಸ್ಯ॒ ಮೂಲ॑-ಞ್ಚ ।
ನೀ॒ಚೈರ್ದೇ॑ವಾ॒ ನಿವೃ॑ಶ್ಚತ ॥ 70 ॥

ಅಗ್ನೇ॒ ಯೋ ನೋ॑-ಽಭಿ॒ದಾಸ॑ತಿ । ಸ॒ಮಾ॒ನೋ ಯಶ್ಚ॒ ನಿಷ್ಟ್ಯಃ॑ । ಇ॒ದ್ಧ್ಮಸ್ಯೇ॑ವ ಪ್ರ॒ಖ್ಷಾಯ॑ತಃ ।
ಮಾ ತಸ್ಯೋಚ್ಛೇ॑ಷಿ॒ ಕಿಞ್ಚ॒ನ । ಯೋ ಮಾ-ನ್ದ್ವೇಷ್ಟಿ॑ ಜಾತವೇದಃ । ಯ-ಞ್ಚಾ॒ಹ-ನ್ದ್ವೇಷ್ಮಿ॒ ಯಶ್ಚ॒ ಮಾಮ್ । ಸರ್ವಾ॒ಗ್॒ಸ್ತಾನ॑ಗ್ನೇ॒ ಸನ್ದ॑ಹ ।
ಯಾಗ್​ಶ್ಚಾ॒ಹ-ನ್ದ್ವೇಷ್ಮಿ॒ ಯೇ ಚ॒ ಮಾಮ್ ॥ ಅಗ್ನೇ॑ ವಾಜಜಿತ್ ।
ವಾಜ॑-ನ್ತ್ವಾ ಸಸೃ॒ವಾಗ್ಂಸ᳚ಮ್ ॥ 71 ॥

ವಾಜ॑-ಞ್ಜಿಗಿ॒ವಾಗ್ಂಸ᳚ಮ್ । ವಾ॒ಜಿನಂ॑-ವಾಁಜ॒ಜಿತ᳚ಮ್ । ವಾ॒ಜ॒ಜಿ॒ತ್ಯಾಯೈ॒ ಸಮ್ಮಾ᳚ರ್ಜ್ಮಿ । ಅ॒ಗ್ನಿ-ಮ॑ನ್ನಾ॒ದ-ಮ॒ನ್ನಾದ್ಯಾ॑ಯ ॥ ವೇದಿ॑ ರ್ಬ॒ರ॒ಃಇ-ಶ್ಶೃ॒ತಗ್ಂ ಹ॒ವಿಃ ।
ಇ॒ದ್ಧ್ಮಃ ಪ॑ರಿ॒ಧಯ॒-ಸ್ಸ್ರುಚಃ॑ । ಆಜ್ಯಂ॑-ಯಁ॒ಜ್ಞ ಋಚೋ॒ ಯಜುಃ॑ । ಯಾ॒ಜ್ಯಾ᳚ಶ್ಚ ವಷಟ್ಕಾ॒ರಾಃ । ಸ-ಮ್ಮೇ॒ ಸನ್ನ॑ತಯೋ ನಮನ್ತಾಮ್ ।
ಇ॒ದ್ಧ್ಮ॒ಸಂ॒-ನಹ॑ನೇ ಹು॒ತೇ ॥ 72 ॥

ದಿ॒ವಃ ಖೀಲೋ-ಽವ॑ತತಃ । ಪೃ॒ಥಿ॒ವ್ಯಾ ಅದ್ಧ್ಯುತ್ಥಿ॑ತಃ । ತೇನಾ॑ ಸ॒ಹಸ್ರ॑ಕಾಣ್ಡೇನ । ದ್ವಿ॒ಷನ್ತಗ್ಂ॑ ಶೋಚಯಾಮಸಿ । ದ್ವಿ॒ಷನ್ಮೇ॑ ಬ॒ಹು ಶೋ॑ಚತು ।
ಓಷ॑ಧೇ॒ ಮೋ ಅ॒ಹಗ್ಂ ಶು॑ಚಮ್ ॥ ಯಜ್ಞ॒ ನಮ॑ಸ್ತೇ ಯಜ್ಞ । ನಮೋ॒ ನಮ॑ಶ್ಚ ತೇ ಯಜ್ಞ । ಶಿ॒ವೇನ॑ ಮೇ॒ ಸನ್ತಿ॑ಷ್ಠಸ್ವ । ಸ್ಯೋ॒ನೇನ॑ ಮೇ॒ ಸನ್ತಿ॑ಷ್ಠಸ್ವ ॥ 73 ॥

ಸು॒ಭೂ॒ತೇನ॑ ಮೇ॒ ಸನ್ತಿ॑ಷ್ಠಸ್ವ । ಬ್ರ॒ಹ್ಮ॒ವ॒ರ್ಚ॒ಸೇನ॑ ಮೇ॒ ಸನ್ತಿ॑ಷ್ಠಸ್ವ ।
ಯ॒ಜ್ಞಸ್ಯರ್ಧಿ॒ಮನು॒ ಸನ್ತಿ॑ಷ್ಠಸ್ವ । ಉಪ॑ ತೇ ಯಜ್ಞ॒ ನಮಃ॑ । ಉಪ॑ ತೇ॒ ನಮಃ॑ ।
ಉಪ॑ ತೇ॒ ನಮಃ॑ ॥ ತ್ರಿಷ್ಫ॒ಲೀ ಕ್ರಿ॒ಯಮಾ॑ಣಾನಾಮ್ । ಯೋ ನ್ಯ॒ಙ್ಗೋ ಅ॑ವ॒ಶಿಷ್ಯ॑ತೇ ।
ರಖ್ಷ॑ಸಾ-ಮ್ಭಾಗ॒ಧೇಯ᳚ಮ್ । ಆಪ॒ಸ್ತ-ತ್ಪ್ರವ॑ಹತಾದಿ॒ತಃ ॥ 74 ॥

ಉ॒ಲೂಖ॑ಲೇ॒ ಮುಸ॑ಲೇ॒ ಯಚ್ಚ॒ ಶೂರ್ಪೇ᳚ ।
ಆ॒ಶಿ॒ಶ್ಲೇಷ॑ ದೃ॒ಷದಿ॒ ಯತ್ಕ॒ಪಾಲೇ᳚ ।
ಅ॒ವ॒ಪ್ರುಷೋ॑ ವಿ॒ಪ್ರುಷ॒-ಸ್ಸಂ​ಯಁ॑ಜಾಮಿ ।
ವಿಶ್ವೇ॑ ದೇ॒ವಾ ಹ॒ವಿರಿ॒ದ-ಞ್ಜು॑ಷನ್ತಾಮ್ ।
ಯ॒ಜ್ಞೇ ಯಾ ವಿ॒ಪ್ರುಷ॒-ಸ್ಸನ್ತಿ॑ ಬ॒ಹ್ವೀಃ ।
ಅ॒ಗ್ನೌ ತಾ-ಸ್ಸರ್ವಾ॒-ಸ್ಸ್ವಿ॑ಷ್ಟಾ॒-ಸ್ಸುಹು॑ತಾ ಜುಹೋಮಿ ॥ ಉ॒ದ್ಯನ್ನ॒ದ್ಯ ಮಿ॑ತ್ರಮಹಃ ।
ಸ॒ಪತ್ನಾ᳚ನ್ಮೇ ಅನೀನಶಃ । ದಿವೈ॑ನಾನ್. ವಿ॒ದ್ಯುತಾ॑ ಜಹಿ ।
ನಿ॒ಮ್ರೋಚ॒ನ್ನಧ॑ರಾನ್ ಕೃಧಿ ॥ 75 ॥

ಉ॒ದ್ಯನ್ನ॒ದ್ಯ ವಿ ನೋ॑ ಭಜ । ಪಿ॒ತಾ ಪು॒ತ್ರೇಭ್ಯೋ॒ ಯಥಾ᳚ । ದೀ॒ರ್ಘಾ॒ಯು॒ತ್ವಸ್ಯ॑ ಹೇಶಿಷೇ । ತಸ್ಯ॑ ನೋ ದೇಹಿ ಸೂರ್ಯ ॥ ಉ॒ದ್ಯನ್ನ॒ದ್ಯ ಮಿ॑ತ್ರಮಹಃ । ಆ॒ರೋಹ॒ನ್ನುತ್ತ॑ರಾ॒-ನ್ದಿವ᳚ಮ್ । ಹೃ॒ದ್ರೋ॒ಗ-ಮ್ಮಮ॑ ಸೂರ್ಯ । ಹ॒ರಿ॒ಮಾಣ॑-ಞ್ಚ ನಾಶಯ ॥ ಶುಕೇ॑ಷು ಮೇ ಹರಿ॒ಮಾಣ᳚ಮ್ ।
ರೋ॒ಪ॒ಣಾಕಾ॑ಸು ದದ್ಧ್ಮಸಿ ॥ 76 ॥

ಅಥೋ॑ ಹಾರಿದ್ರ॒ವೇಷು॑ ಮೇ । ಹ॒ರಿ॒ಮಾಣ॒-ನ್ನಿದ॑ದ್ಧ್ಮಸಿ ॥ ಉದ॑ಗಾದ॒ಯ-ಮಾ॑ದಿ॒ತ್ಯಃ ।
ವಿಶ್ವೇ॑ನ॒ ಸಹ॑ಸಾ ಸ॒ಹ । ದ್ವಿ॒ಷನ್ತ॒-ಮ್ಮಮ॑ ರ॒ನ್ಧಯನ್ನ್॑ । ಮೋ ಅ॒ಹ-ನ್ದ್ವಿ॑ಷ॒ತೋ ರ॑ಧಮ್ ॥
ಯೋ ನ॒-ಶ್ಶಪಾ॒ದಶ॑ಪತಃ । ಯಶ್ಚ॑ ನ॒-ಶ್ಶಪ॑ತ॒-ಶ್ಶಪಾ᳚ತ್ । ಉ॒ಷಾಶ್ಚ॒ ತಸ್ಮೈ॑ ನಿ॒ಮ್ರುಕ್ಚ॑ । ಸರ್ವ॑-ಮ್ಪಾ॒ಪಗ್ಂ ಸಮೂ॑ಹತಾಮ್ ॥ 77 ॥

ಯೋ ನ॑-ಸ್ಸ॒ಪತ್ನೋ॒ ಯೋ ರಣಃ॑ । ಮರ್ತೋ॑-ಽಭಿ॒ದಾಸ॑ತಿ ದೇವಾಃ। ಇ॒ದ್ಧ್ಮಸ್ಯೇ॑ವ ಪ್ರ॒ಖ್ಷಾಯ॑ತಃ ।
ಮಾ ತಸ್ಯೋಚ್ಛೇ॑ಷಿ॒ ಕಿಞ್ಚ॒ನ ॥ ಅವ॑ಸೃಷ್ಟಃ॒ ಪರಾ॑ಪತ । ಶ॒ರೋ ಬ್ರಹ್ಮ॑ಸಗ್ಂಶಿತಃ ।
ಗಚ್ಛಾ॒-ಽಮಿತ್ರಾ॒-ನ್ಪ್ರವಿ॑ಶ । ಮೈಷಾ॒-ಙ್ಕಞ್ಚ॒ನೋಚ್ಛಿ॑ಷಃ ॥ 78 ॥
(ಪತಿಃ॑ - ಪ್ರ॒ಜಾಪ॑ತಯೇ - ತಪ॒ಸ್ವೀ - ವಾ॒ಚಾ - ಸೌಭ॑ಗಾಯ - ಪ॒ಶೂನ್ಮೇ॑ ಪಿನ್ವಸ್ವ - ದುರ್ಮರಾ॒ಯುಂ - ದೇ॑ವ॒ಯಾನಾ॑ - ನಗ್ನೇ॒ - ಽನ್ತರಿ॑ಖ್ಷೇ॒-ಽಹಮುತ್ತ॑ರೋ ಭೂಯಾಸಂ -ಪ್ರ॒ಜಾಪ॑ತಿರಸಿ ಸ॒ರ್ವತ॑-ಶ್ಶ್ರಿ॒ತಃ - ಪ್ರವಿ॑ಷ್ಟಂ - ದೇ॒ವತಾ॑ಭಿ--ರ್ ವಾಜ॒ಜಿತಂ॑ -
ಪೃಥಿ॒ವೀ ಹ್ವ॑ಯತಾಮ॒ಗ್ನಿರಾಗ್ನೀ᳚ದ್ಧ್ರಾ-ದ್- ವೃಶ್ಚತ - ಸಸೃ॒ವಾಗ್ಂಸಗ್ಂ॑ - ಹು॒ತೇ - ಸ್ಯೋ॒ನೇನ॑ ಮೇ॒ ಸಮ್ತಿ॑ಷ್ಠಸ್ವೇ॒ - ತಃ - ಕೃ॑ಧಿ- ದಧ್ಮ - ಸ್ಯೂಹತಾ - +ಮ॒ಷ್ಟೌ ಚ॑) (ಅ. 6)

ಅನುವಾಕಂ 7 - ಸೋಮಾಙ್ಗ.ಭೂತೇಷು ಮನ್ತ್ರೇಷು-ದೀಖ್ಷಾಮಾರಭ್ಯಾಗ್ನೀಷೋಮಯಿ ಪಶುಪರ್ಯನ್ತೇ ಪ್ರಯೋಗೇ ಶೇಷಭೂತಾ ಮನ್ತ್ರಾಃ
ಸಖ್ಷೇ॒ದ-ಮ್ಪ॑ಶ್ಯ । ವಿಧ॑ರ್ತರಿ॒ದ-ಮ್ಪ॑ಶ್ಯ । ನಾಕೇ॒ದ-ಮ್ಪ॑ಶ್ಯ । ರ॒ಮತಿಃ॒ ಪನಿ॑ಷ್ಠಾ ।
ಋ॒ತಂ-ವಁರ್​ಷಿ॑ಷ್ಠಮ್ । ಅ॒ಮೃತಾ॒ ಯಾನ್ಯಾ॒ಹುಃ । ಸೂರ್ಯೋ॒ ವರಿ॑ಷ್ಠೋ ಅ॒ಖ್ಷಭಿ॒ರ್ವಿಭಾ॑ತಿ ।
ಅನ॒ ದ್ಯಾವಾ॑ಪೃಥಿ॒ವೀ ದೇ॒ವಪು॑ತ್ರೇ ॥ ದೀ॒ಖ್ಷಾ-ಽಸಿ॒ ತಪ॑ಸೋ॒ ಯೋನಿಃ॑ । ತಪೋ॑-ಽಸಿ॒ ಬ್ರಹ್ಮ॑ಣೋ॒ ಯೋನಿಃ॑ ॥ 79 ॥

ಬ್ರಹ್ಮಾ॑ಸಿ ಖ್ಷ॒ತ್ರಸ್ಯ॒ ಯೋನಿಃ॑ । ಖ್ಷ॒ತ್ರಮ॑ಸ್ಯೃ॒ತಸ್ಯ॒ ಯೋನಿಃ॑ ।
ಋ॒ತಮ॑ಸಿ॒ ಭೂರಾರ॑ಭೇ । ಶ್ರ॒ದ್ಧಾ-ಮ್ಮನ॑ಸಾ । ದೀ॒ಖ್ಷಾ-ನ್ತಪ॑ಸಾ । ವಿಶ್ವ॑ಸ್ಯ॒ ಭುವ॑ನ॒ಸ್ಯಾಧಿ॑ಪತ್ನೀಮ್ । ಸರ್ವೇ॒ ಕಾಮಾ॒ ಯಜ॑ಮಾನಸ್ಯ ಸನ್ತು ॥
ವಾತ॑-ಮ್ಪ್ರಾ॒ಣ-ಮ್ಮನ॑ಸಾ॒-ಽನ್ವಾರ॑ಭಾಮಹೇ । ಪ್ರ॒ಜಾಪ॑ತಿಂ॒-ಯೋಁ ಭುವ॑ನಸ್ಯ ಗೋ॒ಪಾಃ ।
ಸ ನೋ॑ ಮೃ॒ತ್ಯೋಸ್ತ್ರಾ॑ಯತಾ॒-ಮ್ಪಾತ್ವಗ್ಂಹ॑ಸಃ ॥ 80 ॥

ಜ್ಯೋಗ್ಜೀ॒ವಾ ಜ॒ರಾಮ॑ಶೀಮಹಿ ॥ ಇನ್ದ್ರ॑ ಶಾಕ್ವರ ಗಾಯ॒ತ್ರೀ-ಮ್ಪ್ರಪ॑ದ್ಯೇ । ತಾ-ನ್ತೇ॑ ಯುನಜ್ಮಿ । ಇನ್ದ್ರ॑ ಶಾಕ್ವರ ತ್ರಿ॒ಷ್ಟುಭ॒-ಮ್ಪ್ರಪ॑ದ್ಯೇ । ತಾ-ನ್ತೇ॑ ಯುನಜ್ಮಿ ।
ಇನ್ದ್ರ॑ ಶಾಕ್ವರ॒ ಜಗ॑ತೀ॒-ಮ್ಪ್ರಪ॑ದ್ಯೇ । ತಾ-ನ್ತೇ॑ ಯುನಜ್ಮಿ ।
ಇನ್ದ್ರ॑ ಶಾಕ್ವರಾನು॒ಷ್ಟುಭ॒-ಮ್ಪ್ರಪ॑ದ್ಯೇ । ತಾ-ನ್ತೇ॑ ಯುನಜ್ಮಿ । ಇನ್ದ್ರ॑ ಶಾಕ್ವರ ಪ॒ಙ್ಕ್ತಿ-ಮ್ಪ್ರಪ॑ದ್ಯೇ ॥ 81 ॥

ತಾ-ನ್ತೇ॑ ಯುನಜ್ಮಿ ॥ ಆ-ಽಹ-ನ್ದೀ॒ಖ್ಷಾಮ॑ರುಹ-ಮೃ॒ತಸ್ಯ॒ ಪತ್ನೀ᳚ಮ್ । ಗಾ॒ಯ॒ತ್ರೇಣ॒ ಛನ್ದ॑ಸಾ॒ ಬ್ರಹ್ಮ॑ಣಾ ಚ । ಋ॒ತಗ್ಂ ಸ॒ತ್ಯೇ॑-ಽಧಾಯಿ । ಸ॒ತ್ಯಮೃ॒ತೇ॑-ಽಧಾಯಿ ।
ಋ॒ತ-ಞ್ಚ॑ ಮೇ ಸ॒ತ್ಯ-ಞ್ಚಾ॑ಭೂತಾಮ್ । ಜ್ಯೋತಿ॑ರಭೂವ॒ಗ್ಂ॒ ಸುವ॑ರಗಮಮ್ ।
ಸು॒ವ॒ರ್ಗಂ-ಲೋಁ॒ಕ-ನ್ನಾಕ॑ಸ್ಯ ಪೃ॒ಷ್ಠಮ್ । ಬ್ರ॒ದ್ಧ್ನಸ್ಯ॑ ವಿ॒ಷ್ಟಪ॑ಮಗಮಮ್ ॥
ಪೃ॒ಥಿ॒ವೀ ದೀ॒ಖ್ಷಾ ॥ 82 ॥

ತಯಾ॒-ಽಗ್ನಿ ರ್ದೀ॒ಖ್ಷಯಾ॑ ದೀಖ್ಷಿ॒ತಃ । ಯಯಾ॒-ಽಗ್ನಿ ರ್ದೀ॒ಖ್ಷಯಾ॑ ದೀಖ್ಷಿ॒ತಃ । ತಯಾ᳚ ತ್ವಾ ದೀ॒ಖ್ಷಯಾ॑ ದೀಖ್ಷಯಾಮಿ । ಅ॒ನ್ತರಿ॑ಖ್ಷ-ನ್ದೀ॒ಖ್ಷಾ ।
ತಯಾ॑ ವಾ॒ಯು ರ್ದೀ॒ಖ್ಷಯಾ॑ ದೀಖ್ಷಿ॒ತಃ ।
ಯಯಾ॑ ವಾ॒ಯು ರ್ದೀ॒ಖ್ಷಯಾ॑ ದೀಖ್ಷಿ॒ತಃ ।
ತಯಾ᳚ ತ್ವಾ ದೀ॒ಖ್ಷಯಾ॑ ದೀಖ್ಷಯಾಮಿ । ದ್ಯೌ ರ್ದೀ॒ಖ್ಷಾ ।
ತಯಾ॑-ಽಽದಿ॒ತ್ಯೋ ದೀ॒ಖ್ಷಯಾ॑ ದೀಖ್ಷಿ॒ತಃ ।
ಯಯಾ॑-ಽಽದಿ॒ತ್ಯೋ ದೀ॒ಖ್ಷಯಾ॑ ದೀಖ್ಷಿ॒ತಃ ॥ 83 ॥

ತಯಾ᳚ ತ್ವಾ ದೀ॒ಖ್ಷಯಾ॑ ದೀಖ್ಷಯಾಮಿ । ದಿಶೋ॑ ದೀ॒ಖ್ಷಾ ।
ತಯಾ॑ ಚ॒ನ್ದ್ರಮಾ॑ ದೀ॒ಖ್ಷಯಾ॑ ದೀಖ್ಷಿ॒ತಃ ।
ಯಯಾ॑ ಚ॒ನ್ದ್ರಮಾ॑ ದೀ॒ಖ್ಷಯಾ॑ ದೀಖ್ಷಿ॒ತಃ ।
ತಯಾ᳚ ತ್ವಾ ದೀ॒ಖ್ಷಯಾ॑ ದೀಖ್ಷಯಾಮಿ ।
ಆಪೋ॑ ದೀ॒ಖ್ಷಾ । ತಯಾ॒ ವರು॑ಣೋ॒ ರಾಜಾ॑ ದೀ॒ಖ್ಷಯಾ॑ ದೀಖ್ಷಿ॒ತಃ । ಯಯಾ॒ ವರು॑ಣೋ॒ ರಾಜಾ॑ ದೀ॒ಖ್ಷಯಾ॑ ದೀಖ್ಷಿ॒ತಃ । ತಯಾ᳚ ತ್ವಾ ದೀ॒ಖ್ಷಯಾ॑ ದೀಖ್ಷಯಾಮಿ ।
ಓಷ॑ಧಯೋ ದೀ॒ಖ್ಷಾ ॥ 84 ॥

ತಯಾ॒ ಸೋಮೋ॒ ರಾಜಾ॑ ದೀ॒ಖ್ಷಯಾ॑ ದೀಖ್ಷಿ॒ತಃ। ಯಯಾ॒ ಸೋಮೋ॒ ರಾಜಾ॑ ದೀ॒ಖ್ಷಯಾ॑ ದೀಖ್ಷಿ॒ತಃ ।
ತಯಾ᳚ ತ್ವಾ ದೀ॒ಖ್ಷಯಾ॑ ದೀಖ್ಷಯಾಮಿ । ವಾಗ್ ದೀ॒ಖ್ಷಾ ।
ತಯಾ᳚ ಪ್ರಾ॒ಣೋ ದೀ॒ಖ್ಷಯಾ॑ ದೀಖ್ಷಿ॒ತಃ ।
ಯಯಾ᳚ ಪ್ರಾ॒ಣೋ ದೀ॒ಖ್ಷಯಾ॑ ದೀಖ್ಷಿ॒ತಃ ।
ತಯಾ᳚ ತ್ವಾ ದೀ॒ಖ್ಷಯಾ॑ ದೀಖ್ಷಯಾಮಿ । ಪೃ॒ಥಿ॒ವೀ ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷತಾಮ್ ।
ಅ॒ನ್ತರಿ॑ಖ್ಷ-ನ್ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷತಾಮ್ ।
ದ್ಯೌಸ್ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷತಾಮ್ ॥ 85 ॥

ದಿಶ॑ಸ್ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷನ್ತಾಮ್ । ಆಪ॑ಸ್ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷನ್ತಾಮ್ ।
ಓಷ॑ಧಯಸ್ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷನ್ತಾಮ್ । ವಾಕ್ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷತಾಮ್ ।
ಋಚ॑ಸ್ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷನ್ತಾಮ್ । ಸಾಮಾ॑ನಿ ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷನ್ತಾಮ್ ।
ಯಜೂಗ್ಂ॑ಷಿ ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷನ್ತಾಮ್ । ಅಹ॑ಶ್ಚ॒ ರಾತ್ರಿ॑ಶ್ಚ । ಕೃ॒ಷಿಶ್ಚ॒ ವೃಷ್ಟಿ॑ಶ್ಚ । ತ್ವಿಷಿ॒ಶ್ಚಾ-ಪ॑ಚಿತಿಶ್ಚ ॥ 86 ॥

ಆಪ॒ಶ್ಚೌಷ॑ಧಯಶ್ಚ । ಊರ್ಕ್ಚ॑ ಸೂ॒ನೃತಾ॑ ಚ । ತಾಸ್ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷನ್ತಾಮ್ ॥
ಸ್ವೇ ದಖ್ಷೇ॒ ದಖ್ಷ॑ಪಿತೇ॒ಹ ಸೀ॑ದ । ದೇ॒ವಾನಾಗ್ಂ॑ ಸು॒ಮ್ನೋ ಮ॑ಹ॒ತೇ ರಣಾ॑ಯ । ಸ್ವಾ॒ಸ॒ಸ್ಥ-ಸ್ತ॒ನುವಾ॒ ಸಂ​ವಿಁ॑ಶಸ್ವ । ಪಿ॒ತೇವೈ॑ಧಿ ಸೂ॒ನವ॒ ಆ ಸು॒ಶೇವಃ॑ ।
ಶಿ॒ವೋ ಮಾ॑ ಶಿ॒ವಮಾವಿ॑ಶ । ಸ॒ತ್ಯ-ಮ್ಮ॑ ಆ॒ತ್ಮಾ । ಶ್ರ॒ದ್ಧಾ ಮೇ ಽಖ್ಷಿ॑ತಿಃ ॥ 87 ॥

ತಪೋ॑ ಮೇ ಪ್ರತಿ॒ಷ್ಠಾ । ಸ॒ವಿ॒ತೃ-ಪ್ರ॑ಸೂತಾ ಮಾ॒ ದಿಶೋ॑ ದೀಖ್ಷಯನ್ತು । ಸ॒ತ್ಯಮ॑ಸ್ಮಿ ॥ ಅ॒ಹ-ನ್ತ್ವದ॑ಸ್ಮಿ॒ ಮದ॑ಸಿ॒ ತ್ವಮೇ॒ತತ್ । ಮಮಾ॑ಸಿ॒ ಯೋನಿ॒ಸ್ತವ॒ ಯೋನಿ॑ರಸ್ಮಿ । ಮಮೈ॒ವ ಸನ್ವಹ॑ ಹ॒ವ್ಯಾನ್ಯ॑ಗ್ನೇ ।
ಪು॒ತ್ರಃ ಪಿ॒ತ್ರೇ ಲೋ॑ಕ॒ಕೃ-ಜ್ಜಾ॑ತವೇದಃ ॥
ಆ॒ಜುಹ್ವಾ॑ನ-ಸ್ಸು॒ಪ್ರತೀ॑ಕಃ ಪು॒ರಸ್ತಾ᳚ತ್ ।
ಅಗ್ನೇ॒ ಸ್ವಾಂ-ಯೋಁನಿ॒ಮಾಸೀ॑ದ ಸಾ॒ದ್ಧ್ಯಾ ।
ಅ॒ಸ್ಮಿನ್-ಥ್ಸ॒ಧಸ್ಥೇ॒ ಅದ್ಧ್ಯುತ್ತ॑ರಸ್ಮಿನ್ನ್ ॥ 88 ॥

ವಿಶ್ವೇ॑ ದೇವಾ॒ ಯಜ॑ಮಾನಶ್ಚ ಸೀದತ ॥
ಏಕ॑ಮಿ॒ಷೇ ವಿಷ್ಣು॒ಸ್ತ್ವಾ-ಽನ್ವೇ॑ತು ।
ದ್ವೇ ಊ॒ರ್ಜೇ ವಿಷ್ಣು॒ಸ್ತ್ವಾ-ಽನ್ವೇ॑ತು ।
ತ್ರೀಣಿ॑ ವ್ರ॒ತಾಯ॒ ವಿಷ್ಣು॒ಸ್ತ್ವಾ-ಽನ್ವೇ॑ತು ।
ಚ॒ತ್ವಾರಿ॒ ಮಾಯೋ॑ ಭವಾಯ॒ ವಿಷ್ಣು॒ಸ್ತ್ವಾ-ಽನ್ವೇ॑ತು ।
ಪಞ್ಚ॑ ಪ॒ಶುಭ್ಯೋ॒ ವಿಷ್ಣು॒ಸ್ತ್ವಾ-ಽನ್ವೇ॑ತು । ಷಡ್ರಾ॒ಯಸ್ಪೋಷಾ॑ಯ॒ ವಿಷ್ಣು॒ಸ್ತ್ವಾ-ಽನ್ವೇ॑ತು ।
ಸ॒ಪ್ತ ಸ॒ಪ್ತಭ್ಯೋ॒ ಹೋತ್ರಾ᳚ಭ್ಯೋ॒ ವಿಷ್ಣು॒ಸ್ತ್ವಾ-ಽನ್ವೇ॑ತು ॥
ಸಖಾ॑ಯ-ಸ್ಸ॒ಪ್ತಪ॑ದಾ ಅಭೂಮ । ಸ॒ಖ್ಯ-ನ್ತೇ॑ ಗಮೇಯಮ್ ॥ 89 ॥

ಸ॒ಖ್ಯಾತ್ತೇ॒ ಮಾ ಯೋ॑ಷಮ್ । ಸ॒ಖ್ಯಾನ್ಮೇ॒ ಮಾ ಯೋ᳚ಷ್ಠಾಃ ॥ ಸಾ-ಽಸಿ॑ ಸುಬ್ರಹ್ಮಣ್ಯೇ ।
ತಸ್ಯಾ᳚ಸ್ತೇ ಪೃಥಿ॒ವೀ ಪಾದಃ॑ । ಸಾ-ಽಸಿ॑ ಸುಬ್ರಹ್ಮಣ್ಯೇ । ತಸ್ಯಾ᳚ಸ್ತೇ॒-ಽನ್ತರಿ॑ಖ್ಷ॒-ಮ್ಪಾದಃ॑ ।
ಸಾ-ಽಸಿ॑ ಸುಬ್ರಹ್ಮಣ್ಯೇ । ತಸ್ಯಾ᳚ಸ್ತೇ॒ ದ್ಯೌಃ ಪಾದಃ॑ । ಸಾ-ಽಸಿ॑ ಸುಬ್ರಹ್ಮಣ್ಯೇ । ತಸ್ಯಾ᳚ಸ್ತೇ॒ ದಿಶಃ॒ ಪಾದಃ॑ ॥ 90 ॥

ಪ॒ರೋ ರ॑ಜಾಸ್ತೇ ಪಞ್ಚ॒ಮಃ ಪಾದಃ॑ । ಸಾ ನ॒ ಇಷ॒ಮೂರ್ಜ॑-ನ್ಧುಖ್ಷ್ವ । ತೇಜ॑ ಇನ್ದ್ರಿ॒ಯಮ್ । ಬ್ರ॒ಹ್ಮ॒ವ॒ರ್ಚ॒ಸ-ಮ॒ನ್ನಾದ್ಯ᳚ಮ್ ॥ ವಿಮಿ॑ಮೇ ತ್ವಾ॒ ಪಯ॑ಸ್ವತೀಮ್ । ದೇ॒ವಾನಾ᳚-ನ್ಧೇ॒ನುಗ್ಂ ಸು॒ದುಘಾ॒-ಮನ॑ಪ-ಸ್ಫುರನ್ತೀಮ್ । ಇನ್ದ್ರ॒-ಸ್ಸೋಮ॑-ಮ್ಪಿಬತು ।
ಖ್ಷೇಮೋ॑ ಅಸ್ತು ನಃ ॥ ಇ॒ಮಾ-ನ್ನ॑ರಾಃ ಕೃಣುತ॒ ವೇದಿ॒ಮೇತ್ಯ॑ । ವಸು॑ಮತೀಗ್ಂ ರು॒ದ್ರವ॑ತೀ-ಮಾದಿ॒ತ್ಯವ॑ತೀಮ್ ॥ 91 ॥

ವರ್​ಷ್ಮ॑ನ್ದಿ॒ವಃ । ನಾಭಾ॑ ಪೃಥಿ॒ವ್ಯಾಃ ।
ಯಥಾ॒-ಽಯಂ-ಯಁಜ॑ಮಾನೋ॒ ನ ರಿಷ್ಯೇ᳚ತ್ ।
ದೇ॒ವಸ್ಯ॑ ಸವಿ॒ತು-ಸ್ಸ॒ವೇ ॥
ಚತು॑-ಶ್ಶಿಖಣ್ಡಾ ಯುವ॒ತಿ-ಸ್ಸು॒ಪೇಶಾಃ᳚ ।
ಘೃ॒ತಪ್ರ॑ತೀಕಾ॒ ಭುವ॑ನಸ್ಯ॒ ಮದ್ಧ್ಯೇ᳚ ।
ತಸ್ಯಾಗ್ಂ॑ ಸುಪ॒ರ್ಣಾವಧಿ॒ ಯೌ ನಿವಿ॑ಷ್ಟೌ ।
ತಯೋ᳚ ರ್ದೇ॒ವಾನಾ॒ಮಧಿ॑ ಭಾಗ॒ಧೇಯ᳚ಮ್ ॥
ಅಪ॒ ಜನ್ಯ॑-ಮ್ಭ॒ಯ-ನ್ನು॑ದ । ಅಪ ಚ॒ಕ್ರಾಣಿ॑ ವರ್ತಯ । ಗೃ॒ಹಗ್ಂ ಸೋಮ॑ಸ್ಯ ಗಚ್ಛತಮ್ ॥
ನ ವಾ ಉ॑ವೇ॒ತನ್ಮ್ರಿ॑ಯಸೇ॒ ನ ರಿ॑ಷ್ಯಸಿ ।
ದೇ॒ವಾಗ್ಂ ಇದೇ॑ಷಿ ಪ॒ಥಿಭಿ॑-ಸ್ಸು॒ಗೇಭಿಃ॑ ।
ಯತ್ರ॒ ಯನ್ತಿ॑ ಸು॒ಕೃತೋ॒ ನಾಪಿ॑ ದು॒ಷ್ಕೃತಃ॑ ।
ತತ್ರ॑ ತ್ವಾ ದೇ॒ವ-ಸ್ಸ॑ವಿ॒ತಾ ದ॑ಧಾತು ॥ 92 ॥
(ಬ್ರಹ್ಮ॑ಣೋ॒ ಯೋನಿ॒ - ರಗ್ಂಹ॑ಸಃ - ಪ॒ಙ್ಕ್ತಿ-ಮ್ಪ್ರಪ॑ದ್ಯೇ - ದೀ॒ಖ್ಷಾ - ಯಯೋ॑-ಽಽದಿ॒ತ್ಯೋ ದೀ॒ಖ್ಷಯಾ॑ ದೀಖ್ಷಿ॒ತ - ಸ್ತಯಾ᳚ ತ್ವಾ ದೀ॒ಖ್ಷಯಾ॑ ದೀಖ್ಷಯಾ॒ಮ್ಯೋಷ॑ಧಯೋ ದೀ॒ಖ್ಷಾ - ದ್ಯೌಸ್ತ್ವಾ॒ ದೀಖ್ಷ॑ಮಾಣ॒ಮನು॑ ದೀಖ್ಷತಾ॒ - ಮಪ॑ಚಿತಿ॒ಶ್ಚಾ - ಖ್ಷಿ॑ತಿ॒ - ರುತ್ತ॑ರಸ್ಮಿನ್ - ಗಮೇಯಂ॒ - ದಿಶಃ॒ ಪಾದ॑ - ಆದಿ॒ತ್ಯವ॑ತೀಂ - ಁವರ್ತಯ॒ ಪಞ್ಚ॑ ಚ) (ಅ. 7)

ಅನುವಾಕಂ 8 - ಪಶುವಿಷಯಾ ಅಚ್ಛಿದ್ರಮನ್ತ್ರಾಃ
ಯದ॒ಸ್ಯ ಪಾ॒ರೇ ರಜ॑ಸಃ । ಶು॒ಕ್ರ-ಞ್ಜ್ಯೋತಿ॒-ರಜಾ॑ಯತ । ತನ್ನಃ॑ ಪರ್​ಷ॒ದತಿ॒ ದ್ವಿಷಃ॑ ।
ಅಗ್ನೇ॑ ವೈಶ್ವಾನರ॒ ಸ್ವಾಹಾ᳚ ॥ ಯಸ್ಮಾ᳚ದ್ಭೀ॒ಷಾ-ಽವಾ॑ಶಿಷ್ಠಾಃ । ತತೋ॑ ನೋ॒ ಅಭ॑ಯ-ಙ್ಕೃಧಿ ।
ಪ್ರ॒ಜಾಭ್ಯ॒-ಸ್ಸರ್ವಾ᳚ಭ್ಯೋ ಮೃಡ । ನಮೋ॑ ರು॒ದ್ರಾಯ॑ ಮೀ॒ಢುಷೇ᳚ ॥ ಯಸ್ಮಾ᳚ದ್ಭೀ॒ಷಾ ನ್ಯಷ॑ದಃ ।
ತತೋ॑ ನೋ॒ ಅಭ॑ಯ-ಙ್ಕೃಧಿ ॥ 93 ॥

ಪ್ರ॒ಜಾಭ್ಯ॒-ಸ್ಸರ್ವಾ᳚ಭ್ಯೋ ಮೃಡ । ನಮೋ॑ ರು॒ದ್ರಾಯ॑ ಮೀ॒ಢುಷೇ᳚ ॥ ಉದು॑ಸ್ರ ತಿಷ್ಠ॒ ಪ್ರತಿ॑ತಿಷ್ಠ॒ ಮಾ ರಿ॑ಷಃ । ಮೇಮಂ-ಯಁ॒ಜ್ಞಂ-ಯಁಜ॑ಮಾನ-ಞ್ಚ ರೀರಿಷಃ । ಸು॒ವ॒ರ್ಗೇ ಲೋ॒ಕೇ ಯಜ॑ಮಾನ॒ಗ್ಂ॒ ಹಿ ಧೇ॒ಹಿ । ಶ-ನ್ನ॑ ಏಧಿ ದ್ವಿ॒ಪದೇ॒ ಶ-ಞ್ಚತು॑ಷ್ಪದೇ ॥
ಯಸ್ಮಾ᳚ದ್ಭೀ॒ಷಾ-ಽವೇ॑ಪಿಷ್ಠಾಃ ಪ॒ಲಾಯಿ॑ಷ್ಠಾ-ಸ್ಸ॒ಮಜ್ಞಾ᳚ಸ್ಥಾಃ । ತತೋ॑ ನೋ॒ ಅಭ॑ಯ-ಙ್ಕೃಧಿ ।
ಪ್ರ॒ಜಾಭ್ಯ॒-ಸ್ಸರ್ವಾ᳚ಭ್ಯೋ ಮೃಡ । ನಮೋ॑ ರು॒ದ್ರಾಯ॑ ಮೀ॒ಢುಷೇ᳚ ॥ 94 ॥

ಯ ಇ॒ದಮಕಃ॑ । ತಸ್ಮೈ॒ ನಮಃ॑ । ತಸ್ಮೈ॒ ಸ್ವಾಹಾ᳚ ॥
ನ ವಾ ಉ॑ವೇ॒ತನ್ಮ್ರಿ॑ಯಸೇ॒ ನ ರಿ॑ಷ್ಯಸಿ ದೇ॒ವಾಗ್ಂ ಇದೇ॑ಷಿ ಪ॒ಥಿಭಿ॑-ಸ್ಸು॒ಗೇಭಿಃ॑ । ಹರೀ॑ ತೇ॒ ಯುಞ್ಜಾ॒ ಪೃಷ॑ತೀ ಅಭೂತಾ॒ಮುಪಾ᳚ಸ್ಥಾ-ದ್ವಾ॒ಜೀ ಧು॒ರಿ ರಾಸ॑ಭಸ್ಯ ॥ । ಆಶಾ॑ನಾ-ನ್ತ್ವಾ ಽಽಶಾಪಾ॒ಲೇಭ್ಯಃ॑ । ಚ॒ತುರ್ಭ್ಯೋ॑ ಅ॒ಮೃತೇ᳚ಭ್ಯಃ । ಇ॒ದ-ಮ್ಭೂ॒ತಸ್ಯಾಧ್ಯ॑ಖ್ಷೇಭ್ಯಃ । ವಿ॒ಧೇಮ॑ ಹ॒ವಿಷಾ॑ ವ॒ಯಮ್ ॥
ವಿಶ್ವಾ॒ ಆಶಾ॒ ಮಧು॑ನಾ॒ ಸಗ್ಂಸೃ॑ಜಾಮಿ । ಅ॒ನ॒ಮೀ॒ವಾ ಆಪ॒ ಓಷ॑ಧಯೋ ಭವನ್ತು । ಅ॒ಯಂ-ಯಁಜ॑ಮಾನೋ॒ ಮೃಧೋ॒ ವ್ಯ॑ಸ್ಯತಾಮ್ । ಅಗೃ॑ಭೀತಾಃ ಪ॒ಶವ॑-ಸ್ಸನ್ತು॒ ಸರ್ವೇ᳚ ॥ ॥ ಯ॒ಜ್ಞಸ್ಯ॒ ಹಿ ಸ್ಥ ಋ॒ತ್ವಿಯೌ᳚ ।
ಇನ್ದ್ರಾ᳚ಗ್ನೀ॒ ಚೇತ॑ನಸ್ಯ ಚ । ಹು॒ತಾ॒ಹು॒ತಸ್ಯ॑ ತೃಪ್ಯತಮ್ । ಅಹು॑ತಸ್ಯ ಹು॒ತಸ್ಯ॑ ಚ । ಹು॒ತಸ್ಯ॒ ಚಾಹು॑ತಸ್ಯ ಚ । ಅಹು॑ತಸ್ಯ ಹು॒ತಸ್ಯ॑ ಚ । ಇನ್ದ್ರಾ᳚ಗ್ನೀ ಅ॒ಸ್ಯ ಸೋಮ॑ಸ್ಯ । ವೀ॒ತ-ಮ್ಪಿ॑ಬತ-ಞ್ಜು॒ಷೇಥಾ᳚ಮ್ ॥
ಮಾ ಯಜ॑ಮಾನ॒-ನ್ತಮೋ॑ ವಿದತ್ । ಮರ್ತ್ವಿಜೋ॒ ಮೋ ಇ॒ಮಾಃ ಪ್ರ॒ಜಾಃ । ಮಾ ಯ-ಸ್ಸೋಮ॑ಮಿ॒ಮ-ಮ್ಪಿಬಾ᳚ತ್ । ಸಗ್ಂಸೃ॑ಷ್ಟಮು॒ಭಯ॑-ಙ್ಕೃ॒ತಮ್ ॥ 95 ॥
(ಕೃ॒ಧಿ॒ - ಮೀ॒ಢುಷೇ - ಽಹು॑ತಸ್ಯ ಚ ಸ॒ಪ್ತ ಚ॑) (ಅ. 8)

ಅನುವಾಕಂ 9 - ಉಪಾಂಶ್ವಭಿಷವಾ ಮನ್ತ್ರಾಃ
ಅ॒ನಾ॒ಗಸ॑ಸ್ತ್ವಾ ವ॒ಯಮ್ । ಇನ್ದ್ರೇ॑ಣ॒ ಪ್ರೇಷಿ॑ತಾ॒ ಉಪ॑ । ವಾ॒ಯುಷ್ಟೇ॑ ಅಸ್ತ್ವಗ್ಂಶ॒ಭೂಃ । ಮಿ॒ತ್ರಸ್ತೇ॑ ಅಸ್ತ್ವಗ್ಂಶ॒ಭೂಃ । ವರು॑ಣಸ್ತೇ ಅಸ್ತ್ವಗ್ಂಶ॒ಭೂಃ ॥
ಅಪಾ᳚-ಙ್ಖ್ಷಯಾ॒ ಋತ॑ಸ್ಯ ಗರ್ಭಾಃ । ಭುವ॑ನಸ್ಯ ಗೋಪಾ॒-ಶ್ಶ್ಯೇನಾ॑ ಅತಿಥಯಃ । ಪರ್ವ॑ತಾನಾ-ಙ್ಕಕುಭಃ ಪ್ರ॒ಯುತೋ॑ ನಪಾತಾರಃ । ವ॒ಗ್ನುನೇನ್ದ್ರಗ್ಗ್॑ ಹ್ವಯತ ।
ಘೋಷೇ॒ಣಾಮೀ॑-ವಾಗ್​ಶ್ಚಾತಯತ ॥ 96 ॥

ಯು॒ಕ್ತಾ-ಸ್ಸ್ಥ॒ ವಹ॑ತ ॥ ದೇ॒ವಾ ಗ್ರಾವಾ॑ಣ॒ ಇನ್ದು॒ರಿನ್ದ್ರ॒ ಇತ್ಯ॑ವಾದಿಷುಃ । ಏನ್ದ್ರ॑ಮಚುಚ್ಯವುಃ ಪರ॒ಮಸ್ಯಾಃ᳚ ಪರಾ॒ವತಃ॑ । ಆ-ಽಸ್ಮಾ-ಥ್ಸ॒ಧಸ್ಥಾ᳚ತ್ ।
ಓರೋರ॒ನ್ತರಿ॑ಖ್ಷಾತ್ । ಆ ಸು॑ಭೂ॒ತಮ॑ಸುಷವುಃ । ಬ್ರ॒ಹ್ಮ॒ವ॒ರ್ಚ॒ಸ-ಮ್ಮ॒ ಆ-ಽಸು॑ಷವುಃ ।
ಸ॒ಮ॒ರೇ ರಖ್ಷಾಗ್॑ಸ್ಯವಧಿಷುಃ । ಅಪ॑ಹತ-ಮ್ಬ್ರಹ್ಮ॒ಜ್ಯಸ್ಯ॑ ॥ ವಾಕ್ಚ॑ ತ್ವಾ॒ ಮನ॑ಶ್ಚ ಶ್ರಿಣೀತಾಮ್ ॥ 97 ॥

ಪ್ರಾ॒ಣಶ್ಚ॑ ತ್ವಾ-ಽಪಾ॒ನಶ್ಚ॑ ಶ್ರೀಣೀತಾಮ್ ।
ಚಖ್ಷು॑ಶ್ಚ ತ್ವಾ॒ ಶ್ರೋತ್ರ॑-ಞ್ಚ ಶ್ರೀಣೀತಾಮ್ ।
ದಖ್ಷ॑ಶ್ಚ ತ್ವಾ॒ ಬಲ॑-ಞ್ಚ ಶ್ರೀಣೀತಾಮ್ । ಓಜ॑ಶ್ಚ ತ್ವಾ॒ ಸಹ॑ಶ್ಚ ಶ್ರೀಣೀತಾಮ್ । ಆಯು॑ಶ್ಚ ತ್ವಾ ಜ॒ರಾ ಚ॑ ಶ್ರೀಣೀತಾಮ್ । ಆ॒ತ್ಮಾ ಚ॑ ತ್ವಾ ತ॒ನೂಶ್ಚ॑ ಶ್ರೀಣೀತಾಮ್ । ಶೃ॒ತೋ॑-ಽಸಿ ಶೃ॒ತ-ಙ್ಕೃ॑ತಃ । ಶೃ॒ತಾಯ॑ ತ್ವಾ ಶೃ॒ತೇಭ್ಯ॑ಸ್ತ್ವಾ ॥
ಯಮಿನ್ದ್ರ॑ಮಾ॒ಹು ರ್ವರು॑ಣಂ॒-ಯಁಮಾ॒ಹುಃ । ಯ-ಮ್ಮಿ॒ತ್ರಮಾ॒ಹು-ರ್ಯಮು॑ ಸ॒ತ್ಯಮಾ॒ಹುಃ ॥ 98 ॥

ಯೋ ದೇ॒ವಾನಾ᳚-ನ್ದೇ॒ವತ॑ಮಸ್ತಪೋ॒ಜಾಃ । ತಸ್ಮೈ᳚ ತ್ವಾ॒ ತೇಭ್ಯ॑ಸ್ತ್ವಾ ॥ ಮಯಿ॒ ತ್ಯದಿ॑ನ್ದ್ರಿ॒ಯ-ಮ್ಮ॒ಹತ್ । ಮಯಿ॒ ದಖ್ಷೋ॒ ಮಯಿ॒ ಕ್ರತುಃ॑ । ಮಯಿ॑ ಧಾಯಿ ಸು॒ವೀರ್ಯ᳚ಮ್ । ತ್ರಿಶು॑ಗ್ಘ॒ರ್ಮೋ ವಿಭಾ॑ತು ಮೇ । ಆಕೂ᳚ತ್ಯಾ॒ ಮನ॑ಸಾ ಸ॒ಹ ।
ವಿ॒ರಾಜಾ॒ ಜ್ಯೋತಿ॑ಷಾ ಸ॒ಹ । ಯ॒ಜ್ಞೇನ॒ ಪಯ॑ಸಾ ಸ॒ಹ ।
ತಸ್ಯ॒ ದೋಹ॑ಮಶೀಮಹಿ ॥ 99 ॥

ತಸ್ಯ॑ ಸು॒ಮ್ನಮ॑ಶೀಮಹಿ । ತಸ್ಯ॑ ಭ॒ಖ್ಷಮ॑ಶೀಮಹಿ ।
ವಾಗ್ಜು॑ಷಾ॒ಣಾ ಸೋಮ॑ಸ್ಯ ತೃಪ್ಯತು ॥ ಮಿ॒ತ್ರೋ ಜನಾನ್॑ ಯಾತಯತಿ ಪ್ರಜಾ॒ನ-ನ್ಮಿ॒ತ್ರೋ ದಾ॑ಧಾರ ಪೃಥಿ॒ವೀಮು॒ತ ದ್ಯಾಮ್ । ಮಿ॒ತ್ರಃ ಕೃ॒ಷ್ಟೀರನಿ॑ಮಿಷಾ॒-ಽಭಿ ಚ॑ಷ್ಟೇ ಸ॒ತ್ಯಾಯ॑ ಹ॒ವ್ಯ-ಙ್ಘೃ॒ತವ॑-ದ್ವಿಧೇಮ ॥ ಪ್ರ ಸ ಮಿ॑ತ್ರ॒ ಮರ್ತೋ॑ ಅಸ್ತು॒ ಪ್ರಯ॑ಸ್ವಾ॒ನ್. ಯಸ್ತ॑ ಆದಿತ್ಯ॒ ಶಿಖ್ಷ॑ತಿ ವ್ರ॒ತೇನ॑ । ನ ಹ॑ನ್ಯತೇ॒ ನ ಜೀ॑ಯತೇ॒ ತ್ವೋತೋ॒ ನೈನ॒ಮಗ್ಂಹೋ॑ ಅಶ್ನೋ॒ತ್ಯನ್ತಿ॑ತೋ॒ ನ ದೂ॒ರಾತ್ ॥ ॥ ಯಸ್ಮಾ॒ನ್ನ ಜಾ॒ತಃ ಪರೋ॑ ಅ॒ನ್ಯೋ ಅಸ್ತಿ॑ । ಯ ಆ॑ವಿ॒ವೇಶ॒ ಭುವ॑ನಾನಿ॒ ವಿಶ್ವಾ᳚ ।
ಪ್ರ॒ಜಾಪ॑ತಿಃ ಪ್ರ॒ಜಯಾ॑ ಸಂ​ವಿಁದಾ॒ನಃ ।
ತ್ರೀಣಿ॒ ಜ್ಯೋತೀಗ್ಂ॑ಷಿ ಸಚತೇ॒ ಸ ಷೋ॑ಡ॒ಶೀ ॥
ಏ॒ಷ ಬ್ರ॒ಹ್ಮಾ ಯ ಋ॒ತ್ವಿಯಃ॑ ।
ಇನ್ದ್ರೋ॒ ನಾಮ॑ ಶ್ರು॒ತೋ ಗ॒ಣೇ ॥ 100 ॥

ಪ್ರ ತೇ॑ ಮ॒ಹೇ ವಿ॒ದಥೇ॑ ಽಶಗ್ಂಸಿಷ॒ಗ್ಂ॒ ಹರೀ᳚ । ಯ ಋ॒ತ್ವಿಯಃ॒ ಪ್ರ ತೇ॑ ವನ್ವೇ ।
ವ॒ನುಷೋ॑ ಹರ್ಯ॒ತ-ಮ್ಮದ᳚ಮ್ ॥ ಇನ್ದ್ರೋ॒ ನಾಮ॑ ಘೃ॒ತ-ನ್ನ ಯಃ । ಹರಿ॑ಭಿ॒ಶ್ಚಾರು॒ ಸೇಚ॑ತೇ ।
ಶ್ರು॒ತೋ ಗ॒ಣ ಆ ತ್ವಾ॑ ವಿಶನ್ತು । ಹರಿ॑ವರ್ಪಸ॒ಗಿಂರಃ॑ ॥
ಇನ್ದ್ರಾಧಿ॑ಪ॒ತೇ-ಽಧಿ॑ಪತಿ॒ಸ್ತ್ವ-ನ್ದೇ॒ವಾನಾ॑ಮಸಿ । ಅಧಿ॑ಪತಿ॒-ಮ್ಮಾಮ್ । ಆಯು॑ಷ್ಮನ್ತಂ॒-ವಁರ್ಚ॑ಸ್ವನ್ತ-ಮ್ಮನು॒ಷ್ಯೇ॑ಷು ಕುರು ॥ 101 ॥

ಇನ್ದ್ರ॑ಶ್ಚ ಸ॒ಮ್ರಾ-ಡ್ವರು॑ಣಶ್ಚ॒ ರಾಜಾ᳚ ।
ತೌ ತೇ॑ ಭ॒ಖ್ಷ-ಞ್ಚ॑ಕ್ರತು॒ರಗ್ರ॑ ಏ॒ತಮ್ ।
ತಯೋ॒ರನು॑ ಭ॒ಖ್ಷ-ಮ್ಭ॑ಖ್ಷಯಾಮಿ ।
ವಾಗ್ಜು॑ಷಾ॒ಣಾ ಸೋಮ॑ಸ್ಯ ತೃಪ್ಯತು ॥
ಪ್ರ॒ಜಾಪ॑ತಿ ರ್ವಿ॒ಶ್ವಕ॑ರ್ಮಾ । ತಸ್ಯ॒ ಮನೋ॑ ದೇ॒ವಂ-ಯಁ॒ಜ್ಞೇನ॑ ರಾದ್ಧ್ಯಾಸಮ್ । ಅ॒ರ್ಥೇ॒ ಗಾ ಅ॒ಸ್ಯ ಜ॑ಹಿತಃ । ಅ॒ವ॒ಸಾನ॑ಪತೇ-ಽವ॒ಸಾನ॑-ಮ್ಮೇ ವಿನ್ದ ॥
ನಮೋ॑ ರು॒ದ್ರಾಯ॑ ವಾಸ್ತೋ॒ಷ್ಪತ॑ಯೇ ।
ಆಯ॑ನೇ ವಿ॒ದ್ರವ॑ಣೇ ॥ 102 ॥

ಉ॒ದ್ಯಾನೇ॒ ಯತ್ಪ॒ರಾಯ॑ಣೇ । ಆ॒ವರ್ತ॑ನೇ ವಿ॒ವರ್ತ॑ನೇ ।
ಯೋ ಗೋ॑ಪಾ॒ಯತಿ॒ ತಗ್ಂ ಹು॑ವೇ ॥
ಯಾನ್ಯ॑ಪಾ॒ಮಿತ್ಯಾ॒-ನ್ಯಪ್ರ॑ತೀತ್ತಾ॒-ನ್ಯಸ್ಮಿ॑ ।
ಯ॒ಮಸ್ಯ॑ ಬ॒ಲಿನಾ॒ ಚರಾ॑ಮಿ ।
ಇ॒ಹೈವ ಸನ್ತಃ॒ ಪ್ರತಿ॒ ತದ್ಯಾ॑ತಯಾಮಃ ।
ಜೀ॒ವಾ ಜೀ॒ವೇಭ್ಯೋ॒ ನಿಹ॑ರಾಮ ಏನತ್ ॥
ಅ॒ನೃ॒ಣಾ ಅ॒ಸ್ಮಿನ್ನ॑-ನೃ॒ಣಾಃ ಪರ॑ಸ್ಮಿನ್ನ್ ।
ತೃ॒ತೀಯೇ॑ ಲೋ॒ಕೇ ಅ॑ನೃ॒ಣಾ-ಸ್ಸ್ಯಾ॑ಮ ।
ಯೇ ದೇ॑ವ॒ಯಾನಾ॑ ಉ॒ತ ಪಿ॑ತೃ॒ಯಾಣಾಃ᳚ ॥ 103 ॥

ಸರ್ವಾ᳚-ನ್ಪ॒ಥೋ ಅ॑ನೃ॒ಣಾ ಆಖ್ಷೀ॑ಯೇಮ ॥
ಇ॒ದಮೂ॒ ನು ಶ್ರೇಯೋ॑-ಽವ॒ಸಾನ॒-ಮಾಗ॑ನ್ಮ ।
ಶಿ॒ವೇ ನೋ॒ ದ್ಯಾವಾ॑ಪೃಥಿ॒ವೀ ಉ॒ಭೇ ಇ॒ಮೇ । ಗೋಮ॒ದ್ಧನ॑-ವ॒ದಶ್ವ॑ವ॒-ದೂರ್ಜ॑ಸ್ವತ್ ।
ಸು॒ವೀರಾ॑ ವೀ॒ರೈರನು॒ ಸಞ್ಚ॑ರೇಮ ॥ ಅ॒ರ್ಕಃ ಪ॒ವಿತ್ರ॒ಗ್ಂ॒ ರಜ॑ಸೋ ವಿ॒ಮಾನಃ॑ ।
ಪು॒ನಾತಿ॑ ದೇ॒ವಾನಾ॒-ಮ್ಭುವ॑ನಾನಿ॒ ವಿಶ್ವಾ᳚ । ದ್ಯಾವಾ॑ಪೃಥಿ॒ವೀ ಪಯ॑ಸಾ ಸಂ​ವಿಁದಾ॒ನೇ ।
ಘೃ॒ತ-ನ್ದು॑ಹಾತೇ ಅ॒ಮೃತ॒-ಮ್ಪ್ರಪೀ॑ನೇ ॥ ಪ॒ವಿತ್ರ॑ಮ॒ರ್ಕೋ ರಜ॑ಸೋ ವಿ॒ಮಾನಃ॑ ।
ಪು॒ನಾತಿ॑ ದೇ॒ವಾನಾ॒-ಮ್ಭುವ॑ನಾನಿ॒ ವಿಶ್ವಾ᳚ ।
ಸುವ॒ ರ್ಜ್ಯೋತಿ॒ ರ್ಯಶೋ॑ ಮ॒ಹತ್ ।
ಅ॒ಶೀ॒ಮಹಿ॑ ಗಾ॒ಧಮು॒ತ ಪ್ರ॑ತಿ॒ಷ್ಠಾಮ್ ॥ 104 ॥
(ಚಾ॒ತ॒ಯ॒ತ॒ - ಶ್ರೀ॒ಣೀ॒ತಾ॒ಗ್ಂ॒ - ಸ॒ತ್ಯಮಾ॒ಹು - ರ॑ಶೀಮಹಿ - ಗ॒ಣೇ - ಕು॑ರು - ವಿ॒ದ್ರವ॑ಣೇ - ಪಿತೃ॒ಯಾಣಾ॑ - ಅ॒ರ್ಕೋ ರಜ॑ಸೋ ವಿ॒ಮಾನ॒ಸ್ತ್ರೀಣಿ॑ ಚ) (ಅ. 9)

ಅನುವಾಕಂ 10 - ಸೌಮಿಕಪ್ರಾಯಾಶ್ಚಿತ್ತಮನ್ತ್ರಾಃ
ಉದ॑ಸ್ತಾಮ್ಫ್ಸೀ-ಥ್ಸವಿ॒ತಾ ಮಿ॒ತ್ರೋ ಅ॑ರ್ಯ॒ಮಾ ।
ಸರ್ವಾ॑-ನ॒ಮಿತ್ರಾ॑-ನವಧೀದ್ಯು॒ಗೇನ॑ ।
ಬೃ॒ಹನ್ತ॒-ಮ್ಮಾಮ॑ಕರ-ದ್ವೀ॒ರವ॑ನ್ತಮ್ । ರ॒ಥ॒ನ್ತ॒ರೇ ಶ್ರ॑ಯಸ್ವ॒ ಸ್ವಾಹಾ॑ ಪೃಥಿ॒ವ್ಯಾಮ್ ।
ವಾ॒ಮ॒ದೇ॒ವ್ಯೇ ಶ್ರ॑ಯಸ್ವ॒ ಸ್ವಾಹಾ॒-ಽನ್ತರಿ॑ಖ್ಷೇ । ಬೃ॒ಹ॒ತಿ ಶ್ರ॑ಯಸ್ವ॒ ಸ್ವಾಹಾ॑ ದಿ॒ವಿ ।
ಬೃ॒ಹ॒ತಾ ತ್ವೋಪ॑ಸ್ತಭ್ನೋಮಿ ॥
ಆ ತ್ವಾ॑ ದದೇ॒ ಯಶ॑ಸೇ ವೀ॒ರ್ಯಾ॑ಯ ಚ ।
ಅ॒ಸ್ಮಾಸ್ವ॑-ಘ್ನಿಯಾ ಯೂ॒ಯ-ನ್ದ॑ಧಾಥೇನ್ದ್ರಿ॒ಯ-ಮ್ಪಯಃ॑ ॥ ಯಸ್ತೇ᳚ ದ್ರ॒ಫ್ಸೋ ಯಸ್ತ॑ ಉದ॒ರ್॒ಷಃ ॥ 105 ॥

ದೈವ್ಯಃ॑ ಕೇ॒ತು ರ್ವಿಶ್ವ॒-ಮ್ಭುವ॑ನ-ಮಾವಿ॒ವೇಶ॑ ।
ಸ ನಃ॑ ಪಾ॒ಹ್ಯರಿ॑ಷ್ಟ್ಯೈ॒ ಸ್ವಾಹಾ᳚ ॥
ಅನು॑ ಮಾ॒ ಸರ್ವೋ॑ ಯ॒ಜ್ಞೋ॑-ಽಯಮೇ॑ತು ।
ವಿಶ್ವೇ॑ ದೇ॒ವಾ ಮ॒ರುತ॒-ಸ್ಸಾಮಾ॒ರ್ಕಃ ।
ಆ॒ಪ್ರಿಯ॒ ॑007ಆ;ಛನ್ದಾಗ್ಂ॑ಸಿ ನಿ॒ವಿದೋ॒ ಯಜೂಗ್ಂ॑ಷಿ । ಅ॒ಸ್ಯೈ ಪೃ॑ಥಿ॒ವ್ಯೈ ಯದ್ಯ॒ಜ್ಞಿಯ᳚ಮ್ ॥
ಪ್ರ॒ಜಾಪ॑ತೇ ರ್ವರ್ತ॒ನಿಮನು॑ ವರ್ತಸ್ವ ।
ಅನು॑ ವೀ॒ರೈರನು॑ ರಾದ್ಧ್ಯಾಮ॒ ಗೋಭಿಃ॑ ।
ಅನ್ವಶ್ವೈ॒ರನು॒ ಸರ್ವೈ॑ರು ಪು॒ಷ್ಟೈಃ ।
ಅನು॑ ಪ್ರ॒ಜಯಾ-ಽನ್ವಿ॑ನ್ದ್ರಿ॒ಯೇಣ॑ ॥ 106 ॥

ದೇ॒ವಾ ನೋ॑ ಯ॒ಜ್ಞ-ಮೃ॑ಜು॒ಧಾ ನ॑ಯನ್ತು ॥
ಪ್ರತಿ॑ ಖ್ಷ॒ತ್ರೇ ಪ್ರತಿ॑ ತಿಷ್ಠಾಮಿ ರಾ॒ಷ್ಟ್ರೇ ।
ಪ್ರತ್ಯಶ್ವೇ॑ಷು॒ ಪ್ರತಿ॑ತಿಷ್ಠಾಮಿ॒ ಗೋಷು॑ ।
ಪ್ರತಿ॑ ಪ್ರ॒ಜಾಯಾ॒-ಮ್ಪ್ರತಿ॑ ತಿಷ್ಠಾಮಿ॒ ಭವ್ಯೇ᳚ ।
ವಿಶ್ವ॑ಮ॒ನ್ಯಾ-ಽಭಿ॑ ವಾವೃ॒ಧೇ । ತದ॒ನ್ಯಸ್ಯಾ॒-ಮಧಿ॑ಶ್ರಿ॒ತಮ್ । ದಿ॒ವೇ ಚ॑ ವಿ॒ಶ್ವಕ॑ರ್ಮಣೇ ।
ಪೃ॒ಥಿ॒ವ್ಯೈ ಚಾ॑ಕರ॒-ನ್ನಮಃ॑ ॥ ಅಸ್ಕಾ॒ನ್ದ್ಯೌಃ ಪೃ॑ಥಿ॒ವೀಮ್ । ಅಸ್ಕಾ॑ನೃಷ॒ಭೋ ಯುವಾ॒ ಗಾಃ ॥ 107 ॥

ಸ್ಕ॒ನ್ನೇಮಾ ವಿಶ್ವಾ॒ ಭುವ॑ನಾ । ಸ್ಕ॒ನ್ನೋ ಯ॒ಜ್ಞಃ ಪ್ರಜ॑ನಯತು । ಅಸ್ಕಾ॒ನಜ॑ನಿ॒ ಪ್ರಾಜ॑ನಿ ।
ಆ ಸ್ಕ॒ನ್ನಾಜ್ಜಾ॑ಯತೇ॒ ವೃಷಾ᳚ । ಸ್ಕ॒ನ್ನಾ-ತ್ಪ್ರಜ॑ನಿಷೀಮಹಿ ॥ ಯೇ ದೇ॒ವಾ ಯೇಷಾ॑ಮಿ॒ದ-ಮ್ಭಾ॑ಗ॒ಧೇಯ॑-ಮ್ಬ॒ಭೂವ॑ । ಯೇಷಾ᳚-ಮ್ಪ್ರಯಾ॒ಜಾ ಉ॒ತಾನೂ॑ಯಾ॒ಜಾಃ । ಇನ್ದ್ರ॑ಜ್ಯೇಷ್ಠೇಭ್ಯೋ॒ ವರು॑ಣರಾಜಭ್ಯಃ । ಅ॒ಗ್ನಿಹೋ॑ತೃಭ್ಯೋ ದೇ॒ವೇಭ್ಯ॒-ಸ್ಸ್ವಾಹಾ᳚ ॥ ಉ॒ತ ತ್ಯಾ ನೋ॒ ದಿವಾ॑ ಮ॒ತಿಃ ॥ 108 ॥

ಅದಿ॑ತಿರೂ॒ತ್ಯಾ-ಽಽಗ॑ಮತ್ । ಸಾ ಶನ್ತಾ॑ಚೀ॒ ಮಯ॑ಸ್ಕರತ್ । ಅಪ॒ ಸ್ರಿಧಃ॑ ॥ ಉ॒ತ ತ್ಯಾ ದೈವ್ಯಾ॑ ಭಿ॒ಷಜಾ᳚ । ಶ-ನ್ನ॑ಸ್ಕರತೋ ಅ॒ಶ್ವಿನಾ᳚ । ಯೂ॒ಯಾತಾ॑-ಮ॒ಸ್ಮದ್ರಪಃ॑ ।
ಅಪ॒ ಸ್ರಿಧಃ॑ ॥ ಶಮ॒ಗ್ನಿ-ರ॒ಗ್ನಿಭಿ॑ಸ್ಕರತ್ । ಶ-ನ್ನ॑ಸ್ತಪತು॒ ಸೂರ್ಯಃ॑ । ಶಂ-ವಾಁತೋ॑ ವಾತ್ವರ॒ಪಾಃ ॥ 109 ॥

ಅಪ॒ ಸ್ರಿಧಃ॑ ॥ ತದಿತ್ಪ॒ದ-ನ್ನ ವಿಚಿ॑ಕೇತ ವಿ॒ದ್ವಾನ್ ।
ಯನ್ಮೃ॒ತಃ ಪುನ॑ರ॒ಪ್ಯೇತಿ॑ ಜೀ॒ವಾನ್ । ತ್ರಿ॒ವೃದ್ಯ-ದ್ಭುವ॑ನಸ್ಯ ರಥ॒ವೃತ್ । ಜೀ॒ವೋ ಗರ್ಭೋ॒ ನ ಮೃ॒ತ-ಸ್ಸ ಜೀ॑ವಾತ್ ॥ ಪ್ರತ್ಯ॑ಸ್ಮೈ॒ ಪಿಪೀ॑ಷತೇ । ವಿ॒ಶ್ವಾ॑ನಿ ವಿ॒ದುಷೇ॑ ಭರ । ಅ॒ರ॒-ಙ್ಗ॒ಮಾಯ॒ ಜಗ್ಮ॑ವೇ ।
ಅಪ॑ಶ್ಚಾದ್ದಧ್ವನೇ॒ ನರೇ᳚ (ಓ-ರಪ॑ಶ್ಚಾದ್ದಘ್ವನೇ॒ ನರೇ᳚) ॥ ಇನ್ದು॒ರಿನ್ದು॒ಮ-ವಾ॑ಗಾತ್ ।
ಇನ್ದೋ॒ರಿನ್ದ್ರೋ॑-ಽಪಾತ್ । ತಸ್ಯ॑ ತ ಇನ್ದ॒ವಿನ್ದ್ರ॑-ಪೀತಸ್ಯ॒ ಮಧು॑ಮತಃ । ಉಪ॑ಹೂತ॒ಸ್ಯೋಪ॑ಹೂತೋ ಭಖ್ಷಯಾಮಿ ॥ 110 ॥
(ಉ॒ದ॒ರ್॒ಷ - ಇ॑ನ್ದ್ರಿ॒ಯೇಣ॒ - ಗಾ - ಮ॒ತಿ - ರ॑ರ॒ಪಾ - ಅ॑ಗಾ॒ತ್ರೀಣಿ॑ ಚ) (ಅ. 10)

ಅನುವಾಕಂ 11 - ದರ್​ಶಪೂರ್ಣಮಾಸಪ್ರಾಯಶ್ಚಿತ್ತಮನ್ತ್ರಾಃ
ಬ್ರಹ್ಮ॑ ಪ್ರತಿ॒ಷ್ಠಾ ಮನ॑ಸೋ॒ ಬ್ರಹ್ಮ॑ ವಾ॒ಚಃ । ಬ್ರಹ್ಮ॑ ಯ॒ಜ್ಞಾನಾಗ್ಂ॑ ಹ॒ವಿಷಾ॒-ಮಾಜ್ಯ॑ಸ್ಯ ।
ಅತಿ॑ರಿಕ್ತ॒-ಙ್ಕರ್ಮ॑ಣೋ॒ ಯಚ್ಚ॑ ಹೀ॒ನಮ್ । ಯ॒ಜ್ಞಃ ಪರ್ವಾ॑ಣಿ ಪ್ರತಿ॒ರನ್ನೇ॑ತಿ ಕ॒ಲ್ಪಯನ್ನ್॑ ।
ಸ್ವಾಹಾ॑ಕೃ॒ತಾ-ಽಽಹು॑ತಿರೇತು ದೇ॒ವಾನ್ ॥ ಆಶ್ರಾ॑ವಿತಮ॒ತ್ಯಾಶ್ರಾ॑ವಿತಮ್ ।
ವಷ॑ಟ್ಕೃತ-ಮ॒ತ್ಯನೂ᳚ಕ್ತ-ಞ್ಚ ಯ॒ಜ್ಞೇ ।
ಅತಿ॑ರಿಕ್ತ॒-ಙ್ಕರ್ಮ॑ಣೋ॒ ಯಚ್ಚ॑ ಹೀ॒ನಮ್ ।
ಯ॒ಜ್ಞಃ ಪರ್ವಾ॑ಣಿ ಪ್ರತಿ॒ರನ್ನೇ॑ತಿ ಕ॒ಲ್ಪಯನ್ನ್॑ ।
ಸ್ವಾಹಾ॑ಕೃ॒ತಾ-ಽಽಹು॑ತಿರೇತು ದೇ॒ವಾನ್ ॥ 111 ॥

ಯದ್ವೋ॑ ದೇವಾ ಅತಿಪಾ॒ದಯಾ॑ನಿ । ವಾ॒ಚಾ ಚಿ॒ತ್ಪ್ರಯ॑ತ-ನ್ದೇವ॒ ಹೇಡ॑ನಮ್ । ಅ॒ರಾ॒ಯೋ ಅ॒ಸ್ಮಾಗ್ಂ ಅ॒ಭಿ-ದು॑ಚ್ಛುನಾ॒ಯತೇ᳚। ಅ॒ನ್ಯತ್ರಾ॒ಸ್ಮ-ನ್ಮ॑ರುತ॒ಸ್ತ-ನ್ನಿಧೇ॑ತನ ॥ ತ॒ತ-ಮ್ಮ॒ ಆಪ॒ಸ್ತದು॑ ತಾಯತ॒ ಪುನಃ॑ । ಸ್ವಾದಿ॑ಷ್ಠಾ ಧೀ॒ತಿರು॒ಚಥಾ॑ಯ ಶಸ್ಯತೇ ।
ಅ॒ಯಗ್ಂ ಸ॑ಮು॒ದ್ರ ಉ॒ತ ವಿ॒ಶ್ವಭೇ॑ಷಜಃ ।
ಸ್ವಾಹಾ॑-ಕೃತಸ್ಯ॒ ಸಮು॑ತೃಪ್ಣುತ ರ್ಭುವಃ ॥
ಉದ್ವ॒ಯ-ನ್ತಮ॑ಸ॒ಸ್ಪರಿ॒ ಪಶ್ಯ॑ನ್ತೋ॒ ಜ್ಯೋತಿ॒ರುತ್ತ॑ರಮ್ । ದೇ॒ವ-ನ್ದೇ॑ವ॒ತ್ರಾ ಸೂರ್ಯ॒ಮಗ॑ನ್ಮ॒ ಜ್ಯೋತಿ॑ರುತ್ತ॒ಮಮ್ ॥ ।
ಉದು॒ ತ್ಯ-ಞ್ಜಾ॒ತವೇ॑ದಸ-ನ್ದೇ॒ವಂ-ವಁ॑ಹನ್ತಿ ಕೇ॒ತವಃ॑ । ದೃ॒ಶೇ ವಿಶ್ವಾ॑ಯ॒ ಸೂರ್ಯ᳚ಮ್ ॥ ಚಿ॒ತ್ರ-ನ್ದೇ॒ವಾನಾ॒-ಮುದ॑ಗಾ॒ದನೀ॑ಕ॒-ಞ್ಚಖ್ಷು॑-ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒-ಽಗ್ನೇಃ । ಆ-ಽ ಪ್ರಾ॒ ದ್ಯಾವಾ॑ಪೃಥಿ॒ವೀ ಅ॒ನ್ತರಿ॑ಖ್ಷ॒ಗ್ಂ॒ ಸೂರ್ಯ॑ ಆ॒ತ್ಮಾ ಜಗ॑ತಸ್ತ॒ಸ್ಥುಷ॑ಶ್ಚ ॥ ॥ 112 ॥

ಇ॒ಮ-ಮ್ಮೇ॑ ವರುಣ ಶ್ರುಧೀ॒ ಹವ॑ಮ॒ದ್ಯಾ ಚ॑ ಮೃಡಯ । ತ್ವಾಮ॑ವ॒ಸ್ಯುರಾ ಚ॑ಕೇ ॥ ತತ್ತ್ವಾ॑ ಯಾಮಿ॒ ಬ್ರಹ್ಮ॑ಣಾ॒ ವನ್ದ॑ಮಾನ॒-ಸ್ತದಾ ಶಾ᳚ಸ್ತೇ॒ ಯಜ॑ಮಾನೋ ಹ॒ವಿರ್ಭಿಃ॑ । ಅಹೇ॑ಡಮಾನೋ ವರುಣೇ॒ಹ ಬೋ॒ಧ್ಯುರು॑ಶಗ್ಂಸ॒ ಮಾ ನ॒ ಆಯುಃ॒ ಪ್ರಮೋ॑ಷೀಃ ॥ ।
ತ್ವ-ನ್ನೋ॑ ಅಗ್ನೇ॒ ವರು॑ಣಸ್ಯ ವಿ॒ದ್ವಾ-ನ್ದೇ॒ವಸ್ಯ॒ ಹೇಡೋ-ಽವ॑ ಯಾಸಿ ಸೀಷ್ಠಾಃ । ಯಜಿ॑ಷ್ಠೋ॒ ವಹ್ನಿ॑ ತಮ॒-ಶ್ಶೋಶು॑ಚಾನೋ॒ ವಿಶ್ವಾ॒ ದ್ವೇಷಾಗ್ಂ॑ಸಿ॒ ಪ್ರಮು॑ಮುಗ್ಧ್ಯ॒ಸ್ಮತ್ ॥
ಸ ತ್ವನ್ನೋ॑ ಅಗ್ನೇ-ಽವ॒ಮೋ ಭ॑ವೋ॒ತೀ ನೇದಿ॑ಷ್ಠೋ ಅ॒ಸ್ಯಾ ಉ॒ಷಸೋ॒ ವ್ಯು॑ಷ್ಟೌ । ಅವ॑ ಯಖ್ಷ್ವ ನೋ॒ ವರು॑ಣ॒ಗ್ಂ॒ ರರಾ॑ಣೋ ವೀ॒ಹಿ ಮೃ॑ಡೀ॒ಕಗ್ಂ ಸು॒ಹವೋ॑ ನ ಏಧಿ ॥ । ತ್ವಮ॑ಗ್ನೇ ಅ॒ಯಾ-ಽಸಿ॑ । ಅ॒ಯಾ ಸನ್ಮನ॑ಸಾ ಹಿ॒ತಃ । ಅ॒ಯಾ ಸನಃಅ॒ವ್ಯಮೂ॑ಹಿಷೇ । ಅ॒ಯಾ ನೋ॑ ಧೇಹಿ ಭೇಷ॒ಜಮ್ । ಇ॒ಷ್ಟೋ ಅ॒ಗ್ನಿರಾಹು॑ತಃ । ಸ್ವಾಹಾ॑ಕೃತಃ ಪಿಪರ್ತು ನಃ । ಸ್ವ॒ಗಾ ದೇ॒ವೇಭ್ಯ॑ ಇ॒ದ-ನ್ನಮಃ॑ ॥ ಪ್ರಜಾ॑ಪತೇ॒ ನ ತ್ವದೇ॒ತಾನ್ಯ॒ನ್ಯೋ ವಿಶ್ವಾ॑ ಜಾ॒ತಾನಿ॒ ಪರಿ॒ ತಾ ಬ॑ಭೂವ । ಯತ್ಕಾ॑ಮಾಸ್ತೇ ಜುಹು॒ಮಸ್ತನ್ನೋ॑ ಅಸ್ತು ವ॒ಯಗ್ಗ್​ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ ॥ ಇ॒ಮ-ಞ್ಜೀ॒ವೇಭ್ಯಃ॑ ಪರಿ॒ಧಿ-ನ್ದ॑ಧಾಮಿ । ಮೈಷಾ-ನ್ನು॑ ಗಾ॒ದಪ॑ರೋ॒ ಅರ್ಧ॑ಮೇ॒ತಮ್ । ಶ॒ತ-ಞ್ಜೀ॑ವನ್ತು ಶ॒ರದಃ॑ ಪುರೂ॒ಚೀಃ । ತಿ॒ರೋ ಮೃ॒ತ್ಯು-ನ್ದ॑ಧತಾ॒-ಮ್ಪರ್ವ॑ತೇನ ॥
ಇ॒ಷ್ಟೇಭ್ಯ॒-ಸ್ಸ್ವಾಹಾ॒ ವಷ॒ಡನಿ॑ಷ್ಟೇಭ್ಯ॒-ಸ್ಸ್ವಾಹಾ᳚ । ಭೇ॒ಷ॒ಜ-ನ್ದುರಿ॑ಷ್ಟ್ಯೈ॒ ಸ್ವಾಹಾ॒ ನಿಷ್ಕೃ॑ತ್ಯೈ॒ ಸ್ವಾಹಾ᳚ । ದೌರಾ᳚ರ್ಧ್ಯೈ॒ ಸ್ವಾಹಾ॒ ದೈವೀ᳚ಭ್ಯ-ಸ್ತ॒ನೂಭ್ಯ॒-ಸ್ಸ್ವಾಹಾ᳚ ॥ 113 ॥

ಋದ್ಧ್ಯೈ॒ ಸ್ವಾಹಾ॒ ಸಮೃ॑ದ್ಧ್ಯೈ॒ ಸ್ವಾಹಾ᳚ ॥
ಯತ॑ ಇನ್ದ್ರ॒ ಭಯಾ॑ಮಹೇ ।
ತತೋ॑ ನೋ॒ ಅಭ॑ಯ-ಙ್ಕೃಧಿ । ಮಘ॑ವಞ್ಛ॒ಗ್ಧಿ ತವ॒ ತನ್ನ॑ ಊ॒ತಯೇ᳚ । ವಿ ದ್ವಿಷೋ॒ ವಿ ಮೃಧೋ॑ ಜಹಿ ॥ ಸ್ವ॒ಸ್ತಿ॒ದಾ ವಿ॒ಶಸ್ಪತಿಃ॑ । ವೃ॒ತ್ರ॒ಹಾ ವಿಮೃಧೋ॑ ವ॒ಶೀ । ವೃಷೇನ್ದ್ರಃ॑ ಪು॒ರ ಏ॑ತು ನಃ । ಸ್ವ॒ಸ್ತಿ॒ದಾ ಅ॑ಭಯ-ಙ್ಕ॒ರಃ ॥ ಆ॒ಭಿ ರ್ಗೀ॒ರ್ಭಿ ರ್ಯದತೋ॑ ನ ಊ॒ನಮ್ ॥ 114 ॥

ಆಪ್ಯಾ॑ಯಯ ಹರಿವೋ॒ ವರ್ಧ॑ಮಾನಃ ।
ಯ॒ದಾ ಸ್ತೋ॒ತೃಭ್ಯೋ॒ ಮಹಿ॑ ಗೋ॒ತ್ರಾ ರು॒ಜಾಸಿ॑ ।
ಭೂ॒ಯಿ॒ಷ್ಠ॒ಭಾಜೋ॒ ಅಧ॑ ತೇ ಸ್ಯಾಮ ॥ ಅನಾ᳚ಜ್ಞಾತಂ॒-ಯಁದಾಜ್ಞಾ॑ತಮ್ । ಯ॒ಜ್ಞಸ್ಯ॑ ಕ್ರಿ॒ಯತೇ॒ ಮಿಥು॑ । ಅಗ್ನೇ॒ ತದ॑ಸ್ಯ ಕಲ್ಪಯ । ತ್ವಗ್ಂ ಹಿ ವೇತ್ಥ॑ ಯಥಾತ॒ಥಮ್ ॥ ಪುರು॑ಷ ಸಮ್ಮಿತೋ ಯ॒ಜ್ಞಃ । ಯ॒ಜ್ಞಃ ಪುರು॑ಷ ಸಮ್ಮಿತಃ । ಅಗ್ನೇ॒ ತದ॑ಸ್ಯ ಕಲ್ಪಯ ।
ತ್ವಗ್ಂ ಹಿ ವೇತ್ಥ॑ ಯಥಾತ॒ಥಮ್ ॥ ಯ-ತ್ಪಾ॑ಕ॒ತ್ರಾ ಮನ॑ಸಾ ದೀ॒ನದ॑ಖ್ಷಾ॒ ನ । ಯ॒ಜ್ಞಸ್ಯ॑ ಮ॒ನ್ವತೇ॒ ಮರ್ತಾ॑ಸಃ । ಅ॒ಗ್ನಿಷ್ಟದ್ಧೋತಾ᳚ ಕೃತು॒ವಿದ್ವಿ॑ಜಾ॒ನನ್ನ್ ।
ಯಜಿ॑ಷ್ಠೋ ದೇ॒ವಾಗ್ಂ ಋ॑ತು॒ಶೋ ಯ॑ಜಾತಿ ॥ 115 ॥
(ದೇ॒ವಾಗ್​ - ಶ್ಚಿ॒ತ್ರಂ - ತ॒ನೂಭ್ಯ॒-ಸ್ಸ್ವಾಹೋ॒ - ನಂ - ಪುರು॑ಷಸಮ್ಮಿ॒ತೋ-ಽಗ್ನೇ॒ ತದ॑ಸ್ಯ ಕಲ್ಪಯ॒ ಪಞ್ಚ॑ ಚ) (ಅ. 11)

ಅನುವಾಕಂ 12 - ಅಗ್ನಿಷ್ಟೋಮಾದೌ ಯಜಮಾನಜಪ್ಯಾ ಮನ್ತ್ರವಿಶೇಷಾಃ
ಯದ್ದೇ॑ವಾ ದೇವ॒ಹೇಡ॑ನಮ್ । ದೇವಾ॑ಸಶ್ಚಕೃ॒ಮಾ ವ॒ಯಮ್ । ಆದಿ॑ತ್ಯಾ॒-ಸ್ತಸ್ಮಾ᳚ನ್ಮಾ ಮುಞ್ಚತ ।
ಋ॒ತಸ್ಯ॒ರ್ತೇನ॒ ಮಾಮು॒ತ ॥ ದೇವಾ॑ ಜೀವನಕಾ॒ಮ್ಯಾ ಯತ್ । ವಾ॒ಚಾ-ಽನೃ॑ತಮೂದಿ॒ಮ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ । ಗಾರ್​ಹ॑ಪತ್ಯಃ॒ ಪ್ರಮು॑ಞ್ಚತು । ದು॒ರಿ॒ತಾ ಯಾನಿ॑ ಚಕೃ॒ಮ । ಕ॒ರೋತು॒ ಮಾಮ॑ನೇ॒ ನಸ᳚ಮ್ ॥ 116 ॥
ಋ॒ತೇನ॑ ದ್ಯಾವಾಪೃಥಿವೀ । ಋ॒ತೇನ॒ ತ್ವಗ್ಂ ಸ॑ರಸ್ವತಿ । ಋ॒ತಾನ್ಮಾ॑ ಮುಞ್ಚ॒ತಾಗ್ಂಹ॑ಸಃ । ಯದ॒ನ್ಯ ಕೃ॑ತಮಾರಿ॒ಮ ॥ ಸ॒ಜಾ॒ತ॒ಶ॒ಗ್ಂ॒ಸಾದು॒ತ ವಾ॑ ಜಾಮಿಶ॒ಗ್ಂ॒ಸಾತ್ । ಜ್ಯಾಯ॑ಸ॒-ಶ್ಶಗ್ಂಸಾ॑ದು॒ತ ವಾ॒ ಕನೀ॑ಯಸಃ । ಅನಾ᳚ಜ್ಞಾತ-ನ್ದೇ॒ವಕೃ॑ತಂ॒-ಯಁದೇನಃ॑ । ತಸ್ಮಾ॒ತ್ತ್ವಮ॒ಸ್ಮಾ-ಞ್ಜಾ॑ತವೇದೋ ಮುಮುಗ್ಧಿ ॥ ಯದ್ವಾ॒ಚಾ ಯನ್ಮನ॑ಸಾ । ಬಾ॒ಹುಭ್ಯಾ॑-ಮೂ॒ರುಭ್ಯಾ॑-ಮಷ್ಠೀ॒ವದ್ಭ್ಯಾ᳚ಮ್ ॥ 117 ॥

ಶಿ॒ಶ್ಞೈ ರ್ಯದನೃ॑ತ-ಞ್ಚಕೃ॒ಮಾ ವ॒ಯಮ್ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥ ಯದ್ಧಸ್ತಾ᳚ಭ್ಯಾ-ಞ್ಚ॒ಕರ॒ ಕಿಲ್ಬಿ॑ಷಾಣಿ । ಅ॒ಖ್ಷಾಣಾಂ᳚-ವಁ॒ಗ್ನುಮು॑ಪ॒ ಜಿಘ್ನ॑ಮಾನಃ । ದೂ॒ರೇ॒ಪ॒ಶ್ಯಾ ಚ॑ ರಾಷ್ಟ್ರ॒ಭೃಚ್ಚ॑ । ತಾನ್ಯ॑ಫ್ಸ॒ರಸಾ॒-ವನು॑ದತ್ತಾ-ಮೃ॒ಣಾನಿ॑ ॥
ಅದೀ᳚ವ್ಯನ್ನೃ॒ಣಂ-ಯಁದ॒ಹ-ಞ್ಚ॒ಕಾರ॑ । ಯದ್ವಾ-ಽದಾ᳚ಸ್ಯನ್-ಥ್ಸಞ್ಜ॒ಗಾರಾ॒ ಜನೇ᳚ಭ್ಯಃ ।
ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥ ಯನ್ಮಯಿ॑ ಮಾ॒ತಾ ಗರ್ಭೇ॑ ಸ॒ತಿ ॥ 118 ॥

ಏನ॑ಶ್ಚ॒ಕಾರ॒ ಯತ್ಪಿ॒ತಾ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥ ಯದಾ॑ ಪಿ॒ಪೇಷ॑ ಮಾ॒ತರ॑-ಮ್ಪಿ॒ತರ᳚ಮ್ ।
ಪು॒ತ್ರಃ ಪ್ರಮು॑ದಿತೋ॒ ಧಯನ್ನ್॑ । ಅಹಿಗ್ಂ॑ಸಿತೌ ಪಿ॒ತರೌ॒ ಮಯಾ॒ ತತ್ । ತದ॑ಗ್ನೇ ಅನೃ॒ಣೋ ಭ॑ವಾಮಿ ॥ ಯದ॒ನ್ತರಿ॑ಖ್ಷ-ಮ್ಪೃಥಿ॒ವೀಮು॒ತ ದ್ಯಾಮ್ ।
ಯನ್ಮಾ॒ತರ॑-ಮ್ಪಿ॒ತರಂ॑-ವಾಁ ಜಿಹಿಗ್ಂಸಿ॒ಮ ।
ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥ ಯದಾ॒ಶಸಾ॑ ನಿ॒ಶಸಾ॒ ಯತ್ಪ॑ರಾ॒ಶಸಾ᳚ ॥ 119 ॥

ಯದೇನ॑ಶ್ಚ ಕೃ॒ಮಾ ನೂತ॑ನಂ॒-ಯಁತ್ಪು॑ರಾ॒ಣಮ್ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥ ಅತಿ॑ಕ್ರಾಮಾಮಿ ದುರಿ॒ತಂ-ಯಁದೇನಃ॑ । ಜಹಾ॑ಮಿ ರಿ॒ಪ್ರ-ಮ್ಪ॑ರ॒ಮೇ ಸ॒ಧಸ್ಥೇ᳚ ।
ಯತ್ರ॒ ಯನ್ತಿ॑ ಸು॒ಕೃತೋ॒ ನಾಪಿ॑ ದು॒ಷ್ಕೃತಃ॑ । ತಮಾರೋ॑ಹಾಮಿ ಸು॒ಕೃತಾ॒-ನ್ನು ಲೋ॒ಕಮ್ ॥
ತ್ರಿ॒ತೇ ದೇ॒ವಾ ಅ॑ಮೃಜತೈ॒-ತದೇನಃ॑ ।
ತ್ರಿ॒ತ ಏ॒ತನ್ಮ॑ನು॒ಷ್ಯೇ॑ಷು ಮಾಮೃಜೇ ।
ತತೋ॑ ಮಾ॒ ಯದಿ॒ ಕಿಞ್ಚಿ॑ದಾನ॒ಶೇ ।
ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ ॥ 120 ॥

ಗಾರ್​ಹ॑ಪತ್ಯಃ॒ ಪ್ರಮು॑ಞ್ಚತು । ದು॒ರಿ॒ತಾ ಯಾನಿ॑ ಚಕೃ॒ಮ । ಕ॒ರೋತು॒ ಮಾಮ॑ನೇ॒ನಸ᳚ಮ್ ॥ ದಿ॒ವಿ ಜಾ॒ತಾ ಅ॒ಫ್ಸು ಜಾ॒ತಾಃ । ಯಾ ಜಾ॒ತಾ ಓಷ॑ಧೀಭ್ಯಃ । ಅಥೋ॒ ಯಾ ಅ॑ಗ್ನಿ॒ಜಾ ಆಪಃ॑ । ತಾ ನ॑-ಶ್ಶುನ್ಧನ್ತು॒ ಶುನ್ಧ॑ನೀಃ ॥
ಯದಾಪೋ॒ ನಕ್ತ॑-ನ್ದುರಿ॒ತ-ಞ್ಚರಾ॑ಮ ।
ಯದ್ವಾ॒ ದಿವಾ॒ ನೂತ॑ನಂ॒-ಯಁತ್ಪು॑ರಾ॒ಣಮ್ ।
ಹಿರ॑ಣ್ಯ-ವರ್ಣಾ॒ಸ್ತತ॒ ಉತ್ಪು॑ನೀತ ನಃ ॥
ಇ॒ಮ-ಮ್ಮೇ॑ ವರುಣ ಶ್ರುಧೀ॒ ಹವ॑ಮ॒ದ್ಯಾ ಚ॑ ಮೃಡಯ । ತ್ವಾಮ॑ವ॒ಸ್ಯುರಾ ಚ॑ಕೇ ॥
ತತ್ತ್ವಾ॑ ಯಾಮಿ॒ ಬ್ರಹ್ಮ॑ಣಾ॒ ವನ್ದ॑ಮಾನ॒-ಸ್ತದಾ ಶಾ᳚ಸ್ತೇ॒ ಯಜ॑ಮಾನೋ ಹ॒ವಿರ್ಭಿಃ॑ । ಅಹೇ॑ಡಮಾನೋ ವರುಣೇ॒ಹ ಬೋ॒ಧ್ಯುರು॑ಶಗ್ಂಸ॒ ಮಾ ನ॒ ಆಯುಃ॒ ಪ್ರಮೋ॑ಷೀಃ ॥ । ತ್ವ-ನ್ನೋ॑ ಅಗ್ನೇ॒ ವರು॑ಣಸ್ಯ ವಿ॒ದ್ವಾ-ನ್ದೇ॒ವಸ್ಯ॒ ಹೇಡೋ-ಽವ॑ ಯಾಸಿ ಸೀಷ್ಠಾಃ । ಯಜಿ॑ಷ್ಠೋ॒ ವಹ್ನಿ॑ ತಮ॒-ಶ್ಶೋಶು॑ಚಾನೋ॒ ವಿಶ್ವಾ॒ ದ್ವೇಷಾಗ್ಂ॑ಸಿ॒ ಪ್ರಮು॑ಮುಗ್ಧ್ಯ॒ಸ್ಮತ್ ॥ ಸ ತ್ವನ್ನೋ॑ ಅಗ್ನೇ-ಽವ॒ಮೋ ಭ॑ವೋ॒ತೀ ನೇದಿ॑ಷ್ಠೋ ಅ॒ಸ್ಯಾ ಉ॒ಷಸೋ॒ ವ್ಯು॑ಷ್ಟೌ । ಅವ॑ ಯಖ್ಷ್ವ ನೋ॒ ವರು॑ಣ॒ಗ್ಂ॒ ರರಾ॑ಣೋ ವೀ॒ಹಿ ಮೃ॑ಡೀ॒ಕಗ್ಂ ಸು॒ಹವೋ॑ ನ ಏಧಿ ॥ । ತ್ವಮ॑ಗ್ನೇ ಅ॒ಯಾ-ಽಸಿ॑ । ಅ॒ಯಾ ಸನ್ಮನ॑ಸಾ ಹಿ॒ತಃ । ಅ॒ಯಾ ಸನಃಅ॒ವ್ಯಮೂ॑ಹಿಷೇ । ಅ॒ಯಾ ನೋ॑ ಧೇಹಿ ಭೇಷ॒ಜಮ್ । ಇ॒ಷ್ಟೋ ಅ॒ಗ್ನಿರಾಹು॑ತಃ । ಸ್ವಾಹಾ॑ಕೃತಃ ಪಿಪರ್ತು ನಃ । ಸ್ವ॒ಗಾ ದೇ॒ವೇಭ್ಯ॑ ಇ॒ದ-ನ್ನಮಃ॑ ॥ ॥ 121 ॥
(ಅ॒ನೇ॒ನಸ॑ - ಮಷ್ಠೀ॒ವದ್ಭ್ಯಾಗ್ಂ॑ - ಸ॒ತಿ - ಪ॑ರಾ॒ಶಸಾ॑-ಽಽನ॒ಶೇ᳚ - ಽಗ್ನಿರ್ಮಾ॒ ತಸ್ಮಾ॒ದೇನ॑ಸಃ - ಪುನೀತ ನ॒ಸ್ತ್ರೀಣಿ॑ ಚ) (ಅ. 12)

(ಯ-ದ್ದೇ॑ವಾ॒ ಗಾರ್​ಹ॑ಪತ್ಯೋ॒ ಯದ್ಧಸ್ತಾ᳚ಭ್ಯಾಂ॒-ಯಁನ್ಮಯಿ॑ ಮಾ॒ತಾ ಯದಾ॑ಪಿ॒ಪೇಷ॒
ಁಯದ॒ನ್ತರಿ॑ಖ್ಷಂ॒-ಯಁದಾ॒ಶಸಾ-ಽತಿ॑ಕ್ರಾಮಾಮಿ ತ್ರಿ॒ತೇ ದೇ॒ವಾ ದಿ॒ವಿ ಜಾ॒ತಾ ಅ॒ಫ್ಸು ಜಾ॒ತಾ ಯದಾಪ॑ ಇ॒ಮ-ಮ್ಮೇ॑ ವರುಣಾ॒ ತತ್ತ್ವಾ॑ ಯಾಮಿ॒ ತ್ವ-ನ್ನೋ॑ ಅಗ್ನೇ॒ ಸ ತ್ವ-ನ್ನೋ॑ ಅಗ್ನೇ॒ ತ್ವಮ॑ಗ್ನೇ ಅ॒ಯಾ-ಽಸಿ॑)

ಅನುವಾಕಂ 13 - ಅವಭೃಥೇ ಕರ್ಮಣಿ ಋಜೀಷಪ್ರೋಖ್ಷಣಮನ್ತ್ರಾಃ
ಯತ್ತೇ॒ ಗ್ರಾವ್.ಣ್ಣಾ॑ ಚಿಚ್ಛಿ॒ದು-ಸ್ಸೋ॑ಮ ರಾಜನ್ನ್ ।
ಪ್ರಿ॒ಯಾಣ್ಯಙ್ಗಾ॑ನಿ॒ ಸ್ವಧಿ॑ತಾ॒ ಪರೂಗ್ಂ॑ಷಿ । ತಥ್ಸನ್ಧ॒-ಥ್ಸ್ವಾಜ್ಯೇ॑ನೋ॒ತ ವ॑ರ್ಧಯಸ್ವ ।
ಅ॒ನಾ॒ಗಸೋ॒ ಅಧ॒ಮಿಥ್ಸ॒ಖ್ಷಂ​ಯೇಁ॑ಮ ॥ ಯತ್ತೇ॒ ಗ್ರಾವಾ॑ ಬಾ॒ಹುಚ್ಯು॑ತೋ॒ ಅಚು॑ಚ್ಯವುಃ ।
ನರೋ॒ ಯತ್ತೇ॑ ದುದು॒ಹು ರ್ದಖ್ಷಿ॑ಣೇನ ।
ತತ್ತ॒ ಆಪ್ಯಾ॑ಯತಾ॒-ನ್ತತ್ತೇ᳚ । ನಿಷ್ಟ್ಯಾ॑ಯತಾ-ನ್ದೇವ
ಸೋಮ ॥ ಯತ್ತೇ॒ ತ್ವಚ॑-ಮ್ಬಿಭಿ॒ದುರ್ಯಚ್ಚ॒ ಯೋನಿ᳚ಮ್ ।
ಯದಾ॒ಸ್ಥಾನಾ॒-ತ್ಪ್ರಚ್ಯು॑ತೋ॒ ವೇನ॑ಸಿ॒ ತ್ಮನಾ᳚ ॥ 122 ॥

ತ್ವಯಾ॒ ತಥ್ಸೋ॑ಮ ಗು॒ಪ್ತಮ॑ಸ್ತು ನಃ ।
ಸಾ ನ॑-ಸ್ಸ॒ಧಾಂ-ಽಸ॑ತ್ಪರ॒ಮೇ ವ್ಯೋ॑ಮನ್ನ್ ॥
ಅಹಾ॒ಚ್ಛರೀ॑ರ॒-ಮ್ಪಯ॑ಸಾ ಸ॒ಮೇತ್ಯ॑ । ಅ॒ನ್ಯೋ᳚-ಽನ್ಯೋ ಭವತಿ॒ ವರ್ಣೋ॑ ಅಸ್ಯ । ತಸ್ಮಿ॑ನ್ ವ॒ಯಮುಪ॑ಹೂತಾ॒ಸ್ತವ॑ ಸ್ಮಃ । ಆ ನೋ॑ ಭಜ॒ ಸದ॑ಸಿ ವಿ॒ಶ್ವರೂ॑ಪೇ ॥
ನೃ॒ಚಖ್ಷಾ॒-ಸ್ಸೋಮ॑ ಉ॒ತ ಶು॒ಶ್ರುಗ॑ಸ್ತು ।
ಮಾ ನೋ॒ ವಿಹಾ॑ಸೀ॒ದ್ಗಿರ॑ ಆವೃಣಾ॒ನಃ ।
ಅನಾ॑ಗಾ-ಸ್ತ॒ನುವೋ॑ ವಾವೃಧಾ॒ನಃ ।
ಆ ನೋ॑ ರೂ॒ಪಂ-ವಁ॑ಹತು॒ ಜಾಯ॑ಮಾನಃ ॥ 123 ॥

ಉಪ॑ಖ್ಷರನ್ತಿ ಜು॒ಹ್ವೋ॑ ಘೃ॒ತೇನ॑ । ಪ್ರಿ॒ಯಾಣ್ಯಙ್ಗಾ॑ನಿ॒ ತವ॑ ವ॒ರ್ಧಯ॑ನ್ತೀಃ । ತಸ್ಮೈ॑ ತೇ ಸೋಮ॒ ನಮ॒ ಇದ್ವಷ॑ಟ್ಚ । ಉಪ॑ ಮಾ ರಾಜನ್-ಥ್ಸುಕೃ॒ತೇ ಹ್ವ॑ಯಸ್ವ ॥
ಸ-ಮ್ಪ್ರಾ॑ಣಾಪಾ॒ನಾಭ್ಯಾ॒ಗ್ಂ॒ ಸಮು॒ ಚಖ್ಷು॑ಷಾ॒ ತ್ವಮ್ । ಸಗ್ಗ್​ ಶ್ರೋತ್ರೇ॑ಣ ಗಚ್ಛಸ್ವ ಸೋಮ ರಾಜನ್ನ್ ।
ಯತ್ತ॒ ಆಸ್ಥಿ॑ತ॒ಗ್ಂ॒ ಶಮು॒ ತತ್ತೇ॑ ಅಸ್ತು । ಜಾ॒ನೀ॒ತಾನ್ನ॑-ಸ್ಸ॒ಗಮ್ಮ॑ನೇ ಪಥೀ॒ನಾಮ್ ॥ ಏ॒ತ-ಞ್ಜಾ॑ನೀತಾತ್ಪರ॒ಮೇ ವ್ಯೋ॑ಮನ್ನ್ । ವೃಕಾ᳚-ಸ್ಸಧಸ್ಥಾ ವಿ॒ದ ರೂ॒ಪಮ॑ಸ್ಯ ॥ 124 ॥

ಯದಾ॒ಗಚ್ಛಾ᳚-ತ್ಪ॒ಥಿಭಿ॑ ರ್ದೇವ॒ಯಾನೈಃ᳚ । ಇ॒ಷ್ಟಾ॒ಪೂ॒ರ್ತೇ ಕೃ॑ಣುತಾ-ದಾ॒ವಿರ॑ಸ್ಮೈ ॥
ಅರಿ॑ಷ್ಟೋ ರಾಜನ್ನಗ॒ದಃ ಪರೇ॑ಹಿ । ನಮ॑ಸ್ತೇ ಅಸ್ತು॒ ಚಖ್ಷ॑ಸೇ ರಘೂಯ॒ತೇ । ನಾಕ॒ಮಾರೋ॑ಹ ಸ॒ಹ ಯಜ॑ಮಾನೇನ । ಸೂರ್ಯ॑-ಙ್ಗಚ್ಛತಾತ್ಪರ॒ಮೇ ವ್ಯೋ॑ಮನ್ನ್ ॥
ಅಭೂ᳚ದ್ದೇ॒ವ-ಸ್ಸ॑ವಿ॒ತಾ ವನ್ದ್ಯೋ॒ ನು ನಃ॑ । ಇ॒ದಾನೀ॒ಮಹ್ನ॑ ಉಪ॒ವಾಚ್ಯೋ॒ ನೃಭಿಃ॑ ।
ವಿ ಯೋ ರತ್ನಾ॒ ಭಜ॑ತಿ ಮಾನ॒ವೇಭ್ಯಃ॑ । ಶ್ರೇಷ್ಠ॑-ನ್ನೋ॒ ಅತ್ರ॒ ದ್ರವಿ॑ಣಂ॒-ಯಁಥಾ॒ ದಧ॑ತ್ ॥
ಉಪ॑ ನೋ ಮಿತ್ರಾವರುಣಾ-ವಿ॒ಹಾವ॑ತಮ್ । ಅ॒ನ್ವಾದೀ᳚ದ್ಧ್ಯಾ-ಥಾಮಿ॒ಹ ನ॑-ಸ್ಸಖಾಯಾ । ಆ॒ದಿ॒ತ್ಯಾನಾ॒-ಮ್ಪ್ರಸಿ॑ತಿರ್-ಹೇ॒ತಿಃ । ಉ॒ಗ್ರಾ ಶ॒ತಾಪಾ᳚ಷ್ಠಾ ಘ॒ವಿಷಾ॒ ಪರಿ॑ಣೋ ವೃಣಕ್ತು ॥
ಆ ಪ್ಯಾ॑ಯಸ್ವ॒ ಸಮೆ॑ತು ತೇ ವಿ॒ಶ್ವತ॑-ಸ್ಸೋಮ॒ ವೃಷ್ಣಿ॑ಯಮ್ । ಭವಾ॒ ವಾಜ॑ಸ್ಯ ಸಙ್ಗ॒ಥೇ ॥ ಸ-ನ್ತೇ॒ ಪಯಾಗ್ಂ॑ಸಿ॒ ಸಮು॑ ಯನ್ತು॒ ವಾಜಾ॒-ಸ್ಸಂ-ವೃಁಷ್ಣಿ॑ಯಾ-ನ್ಯಭಿಮಾತಿ॒ಷಾಹಃ॑ । ಆ॒ಪ್ಯಾಯ॑ಮಾನೋ ಅ॒ಮೃತಾ॑ಯ ಸೋಮ ದಿ॒ವಿ ಶ್ರವಾಗ್॑ಸ್ಯುತ್ತ॒ಮಾನಿ॑ ಧಿಷ್ವ ॥ ॥ 125 ॥
(ತ್ಮನಾ॒ - ಜಾಯ॑ಮಾನೋ - ಽಸ್ಯ॒ - ದಧ॒-ತ್ಪಞ್ಚ॑ ಚ) (ಅ. 13)

ಅನುವಾಕಂ 14 - ಅವಭೃಥೇ ಕರ್ಮಣಿ ಸೇಚನಾದಿಮನ್ತ್ರಾಃ
ಯದ್ದಿ॑ದೀ॒ಖ್ಷೇ ಮನ॑ಸಾ॒ ಯಚ್ಚ॑ ವಾ॒ಚಾ । ಯದ್ವಾ᳚ ಪ್ರಾ॒ಣೈಶ್ಚಖ್ಷು॑ಷಾ॒ ಯಚ್ಚ॒ ಶ್ರೋತ್ರೇ॑ಣ ।
ಯದ್ರೇತ॑ಸಾ ಮಿಥು॒ನೇನಾ-ಪ್ಯಾ॒ತ್ಮನಾ᳚ ।
ಅ॒ದ್ಭ್ಯೋ ಲೋ॒ಕಾ ದ॑ಧಿ॒ರೇ ತೇಜ॑ ಇನ್ದ್ರಿ॒ಯಮ್ ।
ಶು॒ಕ್ರಾ ದೀ॒ಖ್ಷಾಯೈ॒ ತಪ॑ಸೋ ವಿ॒ಮೋಚ॑ನೀಃ ।
ಆಪೋ॑ ವಿಮೋ॒ಕ್ತ್ರೀ ರ್ಮಯಿ॒ ತೇಜ॑ ಇನ್ದ್ರಿ॒ಯಮ್ ॥
ಯದೃ॒ಚಾ ಸಾಮ್ನಾ॒ ಯಜು॑ಷಾ । ಪ॒ಶೂ॒ನಾ-ಞ್ಚರ್ಮ॑ನ್. ಹ॒ವಿಷಾ॑ ದಿದೀ॒ಖ್ಷೇ ।
ಯಚ್ಛನ್ದೋ॑ಭಿ॒-ರೋಷ॑ಧೀಭಿ॒-ರ್ವನ॒ಸ್ಪತೌ᳚ ।
ಅ॒ದ್ಭ್ಯೋ ಲೋ॒ಕಾ ದ॑ಧಿ॒ರೇ (ದ॑ಧಿರೇ॒) ತೇಜ॑ ಇನ್ದ್ರಿ॒ಯಮ್ ॥ 126 ॥

ಶು॒ಕ್ರಾ ದೀ॒ಖ್ಷಾಯೈ॒ ತಪ॑ಸೋ ವಿ॒ಮೋಚ॑ನೀಃ ।
ಆಪೋ॑ ವಿಮೋ॒ಕ್ತ್ರೀ ರ್ಮಯಿ॒ ತೇಜ॑ ಇನ್ದ್ರಿ॒ಯಮ್ ॥
ಯೇನ॒ ಬ್ರಹ್ಮ॒ ಯೇನ॑ ಖ್ಷ॒ತ್ರಮ್ । ಯೇನೇ᳚ನ್ದ್ರಾ॒ಗ್ನೀ ಪ್ರ॒ಜಾಪ॑ತಿ॒-ಸ್ಸೋಮೋ॒ ವರು॑ಣೋ॒ ಯೇನ॒ ರಾಜಾ᳚ ।
ವಿಶ್ವೇ॑ ದೇ॒ವಾ ಋಷ॑ಯೋ॒ ಯೇನ॑ ಪ್ರಾ॒ಣಾಃ ।
ಅ॒ದ್ಭ್ಯೋ ಲೋ॒ಕಾ ದ॑ಧಿರೇ॒ ತೇಜ॑ ಇನ್ದ್ರಿ॒ಯಮ್ ।
ಶು॒ಕ್ರಾ ದೀ॒ಖ್ಷಾಯೈ॒ ತಪ॑ಸೋ ವಿ॒ಮೋಚ॑ನೀಃ ।
ಆಪೋ॑ ವಿಮೋ॒ಕ್ತ್ರೀ ರ್ಮಯಿ॒ ತೇಜ॑ ಇನ್ದ್ರಿ॒ಯಮ್ ॥
ಅ॒ಪಾ-ಮ್ಪುಷ್ಪ॑ಮ॒ಸ್ಯೋ-ಷ॑ಧೀನಾ॒ಗ್ಂ॒ ರಸಃ॑ । ಸೋಮ॑ಸ್ಯ ಪ್ರಿ॒ಯ-ನ್ಧಾಮ॑ ॥ 127 ॥

ಅ॒ಗ್ನೇಃ ಪ್ರಿ॒ಯತ॑ಮಗ್ಂ ಹ॒ವಿ-ಸ್ಸ್ವಾಹಾ᳚ ॥ ಅ॒ಪಾ-ಮ್ಪುಷ್ಪ॑-ಮ॒ಸ್ಯೋಷ॑ಧೀನಾ॒ಗ್ಂ॒ ರಸಃ॑ ।
ಸೋಮ॑ಸ್ಯ ಪ್ರಿ॒ಯ-ನ್ಧಾಮ॑ । ಇನ್ದ್ರ॑ಸ್ಯ ಪ್ರಿ॒ಯತ॑ಮಗ್ಂ ಹ॒ವಿ-ಸ್ಸ್ವಾಹಾ᳚ । ಅ॒ಪಾ-ಮ್ಪುಷ್ಪ॑ಮ॒ಸ್ಯೋ-ಷ॑ಧೀನಾ॒ಗ್ಂ॒ ರಸಃ॑ । ಸೋಮ॑ಸ್ಯ ಪ್ರಿ॒ಯ-ನ್ಧಾಮ॑ ।
ವಿಶ್ವೇ॑ಷಾ-ನ್ದೇ॒ವಾನಾ᳚-ಮ್ಪ್ರಿ॒ಯತ॑ಮಗ್ಂ ಹ॒ವಿ-ಸ್ಸ್ವಾಹಾ᳚ ॥ ವ॒ಯಗ್ಂ ಸೋ॑ಮ ವ್ರ॒ತೇ ತವ॑ ।
ಮನ॑ಸ್ತ॒ನೂಷು॒ ಪಿಪ್ರ॑ತಃ । ಪ್ರ॒ಜಾವ॑ನ್ತೋ ಅಶೀಮಹಿ ॥ 128 ॥

ದೇ॒ವೇಭ್ಯಃ॑ ಪಿ॒ತೃಭ್ಯ॒-ಸ್ಸ್ವಾಹಾ᳚ । ಸೋ॒ಮ್ಯೇಭ್ಯಃ॑ ಪಿ॒ತೃಭ್ಯ॒-ಸ್ಸ್ವಾಹಾ᳚ । ಕ॒ವ್ಯೇಭ್ಯಃ॑ ಪಿ॒ತೃಭ್ಯ॒-ಸ್ಸ್ವಾಹಾ᳚ ॥ ದೇವಾ॑ಸ ಇ॒ಹ ಮಾ॑ದಯದ್ಧ್ವಮ್ ।
ಸೋಮ್ಯಾ॑ಸ ಇ॒ಹ ಮಾ॑ದಯದ್ಧ್ವಮ್ । ಕವ್ಯಾ॑ಸ ಇ॒ಹ ಮಾ॑ದಯದ್ಧ್ವಮ್ ॥ ಅನ॑ನ್ತರಿತಾಃ ಪಿ॒ತರ॑-ಸ್ಸೋ॒ಮ್ಯಾ-ಸ್ಸೋ॑ಮಪೀ॒ಥಾತ್ ॥ ಅಪೈ॑ತು ಮೃ॒ತ್ಯುರ॒ಮೃತ॑-ನ್ನ॒ ಆಗನ್ನ್॑ । ವೈ॒ವ॒ಸ್ವ॒ತೋ ನೋ॒ ಅಭ॑ಯ-ಙ್ಕೃಣೋತು ।
ಪ॒ರ್ಣಂ-ವಁನ॒ಸ್ಪತೇ॑ರಿವ ॥ 129 ॥

ಅ॒ಭಿ ನ॑-ಶ್ಶೀಯತಾಗ್ಂ ರ॒ಯಿಃ । ಸಚ॑ತಾ-ನ್ನ॒-ಶ್ಶಚೀ॒ಪತಿಃ॑ ॥ ಪರ॑-ಮ್ಮೃತ್ಯೋ॒ ಅನು॒ಪರೇ॑ಹಿ॒ ಪನ್ಥಾ᳚ಮ್ । ಯಸ್ತೇ॒ ಸ್ವ ಇತ॑ರೋ ದೇವ॒ಯಾನಾ᳚ತ್ । ಚಖ್ಷು॑ಷ್ಮತೇ ಶೃಣ್ವ॒ತೇ ತೇ᳚ ಬ್ರವೀಮಿ । ಮಾ ನಃ॑ ಪ್ರ॒ಜಾಗ್ಂ ರೀ॑ರಿಷೋ॒ ಮೋತ ವೀ॒ರಾನ್ ॥ ಇ॒ದಮೂ॒ ನು ಶ್ರೇಯೋ॑-ಽವ॒ಸಾನ॒-ಮಾಗ॑ನ್ಮ । ಯದ್ಗೋ॒ಜಿ-ದ್ಧ॑ನ॒ಜಿ-ದ॑ಶ್ವ॒ಜಿದ್ಯತ್ ।
ಪ॒ರ್ಣಂ-ವಁನ॒ಸ್ಪತೇ॑ರಿವ । ಅ॒ಭಿ ನ॑-ಶ್ಶೀಯತಾಗ್ಂ ರ॒ಯಿಃ । ಸಚ॑ತಾ-ನ್ನ॒-ಶ್ಶಚೀ॒ಪತಿಃ॑ ॥ 130 ॥
(ವನ॒ಸ್ಪತಾ॑ವ॒ದ್ಭ್ಯೋ ಲೋ॒ಕಾ ದ॑ಧಿರೇ॒ ತೇಜ॑ ಇನ್ದ್ರಿ॒ಯ-ನ್ಧಾಮಾ॑ - ಶೀಮಹೀ - ವಾ॒ - ಭಿ ನ॑-ಶ್ಶೀಯತಾಗ್ಂ ರ॒ಯಿರೇಕ॑-ಞ್ಚ) (ಅ. 14)

(ಸರ್ವಾ॒ನ್॒. - ಯ-ದ್ವಿಷ್ಷ॑ಣ್ಣೇನ॒ - ವಿ ವೈ - ಯಾಃ ಪು॒ರಸ್ತಾ॒-ದ್- ದೇವಾ॑ ದೇ॒ವೇಷು॒ - ಪರಿ॑ಸ್ತಣಿತ॒ - ಸಖ್ಷೇ॒ದಂ - ಁಯದ॒ಸ್ಯ ಪಾ॒ರೇ॑ - ಽನಾ॒ಗಸ॒ - ಉದ॑ಸ್ತಾ-ಮ್ಫ್ಸೀ॒-ದ್- ಬ್ರಹ್ಮ॑ ಪ್ರತಿ॒ಷ್ಠಾ - ಯ-ದ್ದೇ॑ವ॒ - ಯತ್ತೇ॒ ಗ್ರಾವ.ಣ್ಣಾ॒ - ಯ-ದ್ದಿ॑ದೀ॒ಖ್ಷೇ ಚತು॑ರ್ದಶ)

(ಸರ್ವಾ॒ನ್ - ಭೂತಿ॑ಮೇ॒ವ - ಯಾಮೇ॒ವಾಫ್ಸ್ವಾಹು॑ತಿಂ - ಁವ್ರ॒ತಾನಾಂ᳚ - ಪರ್ಣವ॒ಲ್ಕಃ - ಸೋ॒ಮ್ಯಾನಾ॑ - ಮ॒ಸ್ಮಿನ್. ಯ॒ಜ್ಞೇ - ಽಗ್ನೇ॒ ಯೋ ನೋ॒ - ಜ್ಯೋಗ್ಜೀ॒ವಾಃ - ಪ॒ರೋರ॑ಜಾಸ್ತೇ॒ - ಪ್ರ ತೇ॑ ಮ॒ಹೇ - ಬ್ರಹ್ಮ॑ ಪ್ರತಿ॒ಷ್ಠಾ - ಗಾರ್​ಹ॑ಪತ್ಯಾ ಸ್ತ್ರಿ॒ಗ್ಂ॒ಶದು॑ತ್ತರಶ॒ತಂ)

(ಸರ್ವಾ॒ನ್॒. ವೈ - ಶಚೀ॒ಪತಿಃ॑)

॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ಸಪ್ತಮಃ ಪ್ರಪಾಠಕ-ಸ್ಸಮಾಪ್ತಃ ॥