ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ಸಪ್ತಮಃ ಪ್ರಪಾಠಕಃ - ರಾಜಸೂಯಾನುಬ್ರಾಹ್ಮಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಶುನಾಸೀರೀಯೇನ್ದ್ರತುರೀಯಪಞ್ಚಾವತ್ತೀಯಾಪಾಮಾರ್ಗಹೋಮಾಃ

ಏ॒ತ-ದ್ಬ್ರಾ᳚ಹ್ಮಣಾನ್ಯೇ॒ವ ಪಞ್ಚ॑ ಹ॒ವೀಗ್ಂಷಿ॑ । ಅಥೇನ್ದ್ರಾ॑ಯ॒ ಶುನಾ॒ಸೀರಾ॑ಯ ಪುರೋ॒ಡಾಶ॒-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪತಿ । ಸಂ॒​ವಁ॒ಥ್ಸ॒ರೋ ವಾ ಇನ್ದ್ರಾ॒ ಶುನಾ॒ಸೀರಃ॑ । ಸಂ॒​ವಁ॒ಥ್ಸ॒ರೇಣೈ॒ವಾಸ್ಮಾ॒ ಅನ್ನ॒ಮವ॑ ರುನ್ಧೇ । ವಾ॒ಯ॒ವ್ಯ॑-ಮ್ಪಯೋ॑ ಭವತಿ । ವಾ॒ಯುರ್ವೈ ವೃಷ್ಟ್ಯೈ᳚ ಪ್ರದಾಪಯಿ॒ತಾ । ಸ ಏ॒ವಾಸ್ಮೈ॒ ವೃಷ್ಟಿ॒-ಮ್ಪ್ರದಾ॑ಪಯತಿ । ಸೌ॒ರ್ಯ॑ ಏಕ॑ಕಪಾಲೋ ಭವತಿ । ಸೂರ್ಯೇ॑ಣ॒ ವಾ ಅ॒ಮುಷ್ಮಿ॑ಁಲ್ಲೋ॒ಕೇ ವೃಷ್ಟಿ॑ರ್ಧೃ॒ತಾ । ಸ ಏ॒ವಾಸ್ಮೈ॒ ವೃಷ್ಟಿ॒-ನ್ನಿ ಯ॑ಚ್ಛತಿ ॥ 1 ॥

ದ್ವಾ॒ದ॒ಶ॒ಗ॒ವಗ್ಂ ಸೀರ॒-ನ್ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ದೇ॒ವಾ॒ಸು॒ರಾ-ಸ್ಸಂ​ಯಁ॑ತ್ತಾ ಆಸನ್ನ್ । ತೇ ದೇ॒ವಾ ಅ॒ಗ್ನಿಮ॑ಬ್ರುವನ್ನ್ । ತ್ವಯಾ॑ ವೀ॒ರೇಣಾಸು॑ರಾನ॒-ಭಿಭ॑ವಾ॒ಮೇತಿ॑ । ಸೋ᳚-ಽಬ್ರವೀತ್ । ತ್ರೇ॒ಧಾ-ಽಹಮಾ॒ತ್ಮಾನಂ॒-ವಿಁಕ॑ರಿಷ್ಯ॒ ಇತಿ॑ । ಸ ತ್ರೇ॒ಧಾ ಽಽತ್ಮಾನಂ॒-ವ್ಯಁ॑ಕುರುತ । ಅ॒ಗ್ನಿ-ನ್ತೃತೀ॑ಯಮ್ । ರು॒ದ್ರ-ನ್ತೃತೀ॑ಯಮ್ । ವರು॑ಣ॒-ನ್ತೃತೀ॑ಯಮ್ ॥ 2 ॥

ಸೋ᳚-ಽಬ್ರವೀತ್ । ಕ ಇ॒ದ-ನ್ತು॒ರೀಯ॒ಮಿತಿ॑ । ಅ॒ಹಮಿತೀನ್ದ್ರೋ᳚-ಽಬ್ರವೀತ್ ।
ಸ-ನ್ತು ಸೃ॑ಜಾವಹಾ॒ ಇತಿ॑ । ತೌ ಸಮ॑ಸೃಜೇತಾಮ್ । ಸ ಇನ್ದ್ರ॑ಸ್ತು॒ರೀಯ॑-ಮಭವತ್ । ಯದಿನ್ದ್ರ॑-ಸ್ತು॒ರೀಯ॒-ಮಭ॑ವತ್ । ತದಿ॑ನ್ದ್ರ-ತುರೀ॒ಯಸ್ಯೇ᳚ನ್ದ್ರ-ತುರೀಯ॒ತ್ವಮ್ । ತತೋ॒ ವೈ ದೇ॒ವಾ ವ್ಯ॑ಜಯನ್ತ । ಯದಿ॑ನ್ದ್ರತುರೀ॒ಯ-ನ್ನಿ॑ರು॒ಪ್ಯತೇ॒ ವಿಜಿ॑ತ್ಯೈ ॥ 3 ॥

ವ॒ಹಿನೀ॑ ಧೇ॒ನು-ರ್ದಖ್ಷಿ॑ಣಾ । ಯ-ದ್ವ॒ಹಿನೀ᳚ । ತೇನಾ᳚ಗ್ನೇ॒ಯೀ ।
ಯ-ದ್ಗೌಃ । ತೇನ॑ ರೌ॒ದ್ರೀ । ಯ-ದ್ಧೇ॒ನುಃ । ತೇನೈ॒ನ್ದ್ರೀ । ಯಥ್ಸ್ತ್ರೀ ಸ॒ತೀ ದಾ॒ನ್ತಾ । ತೇನ॑ ವಾರು॒ಣೀ ಸಮೃ॑ದ್ಧ್ಯೈ । ಪ್ರ॒ಜಾಪ॑ತಿ-ರ್ಯ॒ಜ್ಞಮ॑ಸೃಜತ ॥ 4 ॥

ತಗ್ಂ ಸೃ॒ಷ್ಟಗ್ಂ ರಖ್ಷಾಗ್॑ಸ್ಯಜಿಘಾಗ್ಂಸನ್ನ್ । ಸ ಏ॒ತಾಃ ಪ್ರ॒ಜಾಪ॑ತಿ-ರಾ॒ತ್ಮನೋ॑ ದೇ॒ವತಾ॒ ನಿರ॑ಮಿಮೀತ । ತಾಭಿ॒ರ್ವೈ ಸ ದಿ॒ಗ್ಭ್ಯೋ ರಖ್ಷಾಗ್ಂ॑ಸಿ॒ ಪ್ರಾಣು॑ದತ । ಯ-ತ್ಪ॑ಞ್ಚಾವ॒ತ್ತೀಯ॑-ಞ್ಜು॒ಹೋತಿ॑ । ದಿ॒ಗ್ಭ್ಯ ಏ॒ವ ತ-ದ್ಯಜ॑ಮಾನೋ॒ ರಖ್ಷಾಗ್ಂ॑ಸಿ॒ ಪ್ರಣು॑ದತೇ । ಸಮೂ॑ಢ॒ಗ್ಂ॒ ರಖ್ಷ॒-ಸ್ಸನ್ದ॑ಗ್ಧ॒ಗ್ಂ॒ ರಖ್ಷ॒ ಇತ್ಯಾ॑ಹ । ರಖ್ಷಾಗ್॑ಸ್ಯೇ॒ವ ಸನ್ದ॑ಹತಿ । ಅ॒ಗ್ನಯೇ॑ ರಖ್ಷೋ॒ಘ್ನೇ ಸ್ವಾಹೇತ್ಯಾ॑ಹ । ದೇ॒ವತಾ᳚ಭ್ಯ ಏ॒ವ ವಿ॑ಜಿಗ್ಯಾ॒ನಾಭ್ಯೋ॑ ಭಾಗ॒ಧೇಯ॑-ಙ್ಕರೋತಿ । ಪ್ರ॒ಷ್ಟಿ॒ವಾ॒ಹೀ ರಥೋ॒ ದಖ್ಷಿ॑ಣಾ॒ ಸಮೃ॑ದ್ಧ್ಯೈ ॥ 5 ॥

ಇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ । ಅಸು॑ರಾ-ನ್ಪರಾ॒ಭಾವ್ಯ॑ । ನಮು॑ಚಿಮಾಸು॒ರ-ನ್ನಾಲ॑ಭತ । ತಗ್ಂ ಶ॒ಚ್ಯಾ॑-ಽಗೃಹ್ಣಾತ್ । ತೌ ಸಮ॑ಲಭೇತಾಮ್ । ಸೋ᳚-ಽಸ್ಮಾ-ದ॒ಭಿಶು॑ನತರೋ-ಽಭವತ್ । ಸೋ᳚-ಽಬ್ರವೀತ್ । ಸ॒ಧಾಂಗ್ಂ ಸನ್ದ॑ಧಾವಹೈ । ಅಥ॒ ತ್ವಾ-ಽವ॑ ಸ್ರಖ್ಷ್ಯಾಮಿ । ನ ಮಾ॒ ಶುಷ್ಕೇ॑ಣ॒ ನಾರ್ದ್ರೇಣ॑ ಹನಃ ॥ 6 ॥

ನ ದಿವಾ॒ ನ ನಕ್ತ॒ಮಿತಿ॑ । ಸ ಏ॒ತಮ॒ಪಾ-ಮ್ಫೇನ॑ಮಸಿಞ್ಚತ್ । ನ ವಾ ಏ॒ಷ ಶುಷ್ಕೋ॒ ನಾರ್ದ್ರೋ ವ್ಯು॑ಷ್ಟಾ ಽಽಸೀತ್ । ಅನು॑ದಿತ॒-ಸ್ಸೂರ್ಯಃ॑ । ನ ವಾ ಏ॒ತ-ದ್ದಿವಾ॒ ನ ನಕ್ತ᳚ಮ್ । ತಸ್ಯೈ॒ತಸ್ಮಿ॑ನ್ ಁಲೋ॒ಕೇ । ಅ॒ಪಾ-ಮ್ಫೇನೇ॑ನ॒ ಶಿರ॒ ಉದ॑ವರ್ತಯತ್ । ತದೇ॑ನ॒ಮನ್ವ॑ವರ್ತತ । ಮಿತ್ರ॑ದ್ರು॒ಗಿತಿ॑ ॥ 7 ॥

ಸ ಏ॒ತಾನ॑ಪಾಮಾ॒ರ್ಗಾನ॑ಜನಯತ್ । ತಾನ॑ಜುಹೋತ್ । ತೈರ್ವೈ ಸ ರಖ್ಷಾ॒ಗ್॒ಸ್ಯಪಾ॑ಹತ । ಯದ॑ಪಾಮಾರ್ಗ ಹೋ॒ಮೋ ಭವ॑ತಿ । ರಖ್ಷ॑ಸಾ॒-ಮಪ॑ಹತ್ಯೈ । ಏ॒ಕೋ॒ಲ್ ಮು॒ಕೇನ॑ ಯನ್ತಿ । ತದ್ಧಿ ರಖ್ಷ॑ಸಾ-ಮ್ಭಾಗ॒ಧೇಯ᳚ಮ್ । ಇ॒ಮಾ-ನ್ದಿಶಂ॑-ಯಁನ್ತಿ । ಏ॒ಷಾ ವೈ ರಖ್ಷ॑ಸಾ॒-ನ್ದಿಕ್ । ಸ್ವಾಯಾ॑ಮೇ॒ವ ದಿ॒ಶಿ ರಖ್ಷಾಗ್ಂ॑ಸಿ ಹನ್ತಿ ॥ 8 ॥

ಸ್ವಕೃ॑ತ॒ ಇರಿ॑ಣೇ ಜುಹೋತಿ ಪ್ರದ॒ರೇ ವಾ᳚ । ಏ॒ತ-ದ್ವೈ ರಖ್ಷ॑ಸಾಮಾ॒ಯತ॑ನಮ್ । ಸ್ವ ಏ॒ವಾಯತ॑ನೇ॒ ರಖ್ಷಾಗ್ಂ॑ಸಿ ಹನ್ತಿ । ಪ॒ರ್ಣ॒ಮಯೇ॑ನ ಸ್ರು॒ವೇಣ॑ ಜುಹೋತಿ । ಬ್ರಹ್ಮ॒ ವೈ ಪ॒ರ್ಣಃ । ಬ್ರಹ್ಮ॑ಣೈ॒ವ ರಖ್ಷಾಗ್ಂ॑ಸಿ ಹನ್ತಿ । ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತ್ಯಾ॑ಹ । ಸ॒ವಿ॒ತೃಪ್ರ॑ಸೂತ ಏ॒ವ ರಖ್ಷಾಗ್ಂ॑ಸಿ ಹನ್ತಿ । ಹ॒ತಗ್ಂ ರಖ್ಷೋ ಽವ॑ಧಿಷ್ಮ॒ ರಖ್ಷ॒ ಇತ್ಯಾ॑ಹ । ರಖ್ಷ॑ಸಾ॒ಗ್॒ ಸ್ತೃತ್ಯೈ᳚ । ಯದ್ವಸ್ತೇ॒ ತ-ದ್ದಖ್ಷಿ॑ಣಾ ನಿ॒ರವ॑ತ್ತ್ಯೈ । ಅಪ್ರ॑ತೀಖ್ಷ॒ಮಾ ಯ॑ನ್ತಿ । ರಖ್ಷ॑ಸಾ-ಮ॒ನ್ತರ್​ಹಿ॑ತ್ಯೈ ॥ 9 ॥
(ಯ॒ಚ್ಛ॒ತಿ॒ - ವರು॑ಣ॒-ನ್ತೃತೀ॑ಯಂ॒ - ಁವಿಜಿ॑ತ್ಯಾ - ಅಸೃಜತ॒ - ಸಮೃ॑ದ್ಧ್ಯೈ - ಹನೋ॒ - ಮಿತ್ರ॑ದ್ರು॒ಗಿತಿ॑ - ಹನ್ತಿ॒ - ಸ್ತೃತ್ಯೈ॒ ತ್ರೀಣಿ॑ ಚ) (ಅ. 1)

ಅನುವಾಕಂ 2 - ದೇವಿಕಾವಹವೀಂಷಿ
ಧಾ॒ತ್ರೇ ಪು॑ರೋ॒ಡಾಶ॒-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪತಿ । ಸಂ॒​ವಁ॒ಥ್ಸ॒ರೋ ವೈ ಧಾ॒ತಾ । ಸಂ॒​ವಁ॒ಥ್ಸ॒ರೇಣೈ॒ವಾಸ್ಮೈ᳚ ಪ್ರ॒ಜಾಃ ಪ್ರಜ॑ನಯತಿ । ಅನ್ವೇ॒ವಾಸ್ಮಾ॒ ಅನು॑ಮತಿರ್ಮನ್ಯತೇ । ರಾ॒ತೇ ರಾ॒ಕಾ । ಪ್ರ ಸಿ॑ನೀವಾ॒ಲೀ ಜ॑ನಯತಿ । ಪ್ರ॒ಜಾಸ್ವೇ॒ವ ಪ್ರಜಾ॑ತಾಸು ಕು॒ಹ್ವಾ॑ ವಾಚ॑-ನ್ದಧಾತಿ । ಮಿ॒ಥು॒ನೌ ಗಾವೌ॒ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಆ॒ಗ್ನಾ॒ವೈ॒ಷ್ಣ॒ವ-ಮೇಕಾ॑ದಶಕಪಾಲ॒-ನ್ನಿರ್ವ॑ಪತಿ । ಐ॒ನ್ದ್ರಾ॒ವೈ॒ಷ್ಣ॒ವ-ಮೇಕಾ॑ದಶಕಪಾಲಮ್ ॥ 10 ॥

ವೈ॒ಷ್ಣ॒ವ-ನ್ತ್ರಿ॑ಕಪಾ॒ಲಮ್ । ವೀ॒ರ್ಯಂ॑-ವಾಁ ಅ॒ಗ್ನಿಃ । ವೀ॒ರ್ಯ॑ಮಿನ್ದ್ರಃ॑ । ವೀ॒ರ್ಯಂ॑-ವಿಁಷ್ಣುಃ॑ । ಪ್ರ॒ಜಾ ಏ॒ವ ಪ್ರಜಾ॑ತಾ ವೀ॒ರ್ಯೇ᳚ ಪ್ರತಿ॑ಷ್ಠಾಪಯತಿ । ತಸ್ಮಾ᳚-ತ್ಪ್ರ॒ಜಾ ವೀ॒ರ್ಯಾ॑ವತೀಃ । ವಾ॒ಮ॒ನ ಋ॑ಷ॒ಭೋ ವ॒ಹೀ ದಖ್ಷಿ॑ಣಾ । ಯದ್ವ॒ಹೀ । ತೇನಾ᳚ಗ್ನೇ॒ಯಃ । ಯದೃ॑ಷ॒ಭಃ ॥ 11 ॥

ತೇನೈ॒ನ್ದ್ರಃ । ಯದ್ವಾ॑ಮ॒ನಃ । ತೇನ॑ ವೈಷ್ಣ॒ವ-ಸ್ಸಮೃ॑ದ್ಧ್ಯೈ । ಅ॒ಗ್ನೀ॒ಷೋ॒ಮೀಯ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪತಿ । ಇ॒ನ್ದ್ರಾ॒ಸೋ॒ಮೀಯ॒-ಮೇಕಾ॑ದಶಕಪಾಲಮ್ । ಸೌ॒ಮ್ಯ-ಞ್ಚ॒ರುಮ್ । ಸೋಮೋ॒ ವೈ ರೇ॑ತೋ॒ಧಾಃ । ಅ॒ಗ್ನಿಃ ಪ್ರ॒ಜಾನಾ᳚-ಮ್ಪ್ರಜನಯಿ॒ತಾ । ವೃ॒ದ್ಧಾನಾ॒ಮಿನ್ದ್ರಃ॑ ಪ್ರದಾಪಯಿ॒ತಾ । ಸೋಮ॑ ಏ॒ವಾಸ್ಮೈ॒ ರೇತೋ॒ ದಧಾ॑ತಿ ॥ 12 ॥

ಅ॒ಗ್ನಿಃ ಪ್ರ॒ಜಾ-ಮ್ಪ್ರಜ॑ನಯತಿ । ವೃ॒ದ್ಧಾಮಿನ್ದ್ರಃ॒ ಪ್ರಯ॑ಚ್ಛತಿ । ಬ॒ಭ್ರು-ರ್ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಸೋ॒ಮಾ॒ಪೌ॒ಷ್ಣ-ಞ್ಚ॒ರು-ನ್ನಿರ್ವ॑ಪತಿ । ಐ॒ನ್ದ್ರಾ॒ಪೌ॒ಷ್ಣ-ಞ್ಚ॒ರುಮ್ । ಸೋಮೋ॒ ವೈ ರೇ॑ತೋ॒ಧಾಃ । ಪೂ॒ಷಾ ಪ॑ಶೂ॒ನಾ-ಮ್ಪ್ರ॑ಜನಯಿ॒ತಾ । ವೃ॒ದ್ಧಾನಾ॒ಮಿನ್ದ್ರಃ॑ ಪ್ರದಾಪಯಿ॒ತಾ । ಸೋಮ॑ ಏ॒ವಾಸ್ಮೈ॒ ರೇತೋ॒ ದಧಾ॑ತಿ । ಪೂ॒ಷಾ ಪ॒ಶೂ-ನ್ಪ್ರಜ॑ನಯತಿ ॥ 13 ॥

ವೃ॒ದ್ಧಾನಿನ್ದ್ರಃ॒ ಪ್ರಯ॑ಚ್ಛತಿ । ಪೌ॒ಷ್ಣಶ್ಚ॒ರು-ರ್ಭ॑ವತಿ । ಇ॒ಯಂ-ವೈಁ ಪೂ॒ಷಾ । ಅ॒ಸ್ಯಾಮೇ॒ವ ಪ್ರತಿ॑ ತಿಷ್ಠತಿ । ಶ್ಯಾ॒ಮೋ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಬ॒ಹು ವೈ ಪುರು॑ಷೋ-ಽಮೇ॒ದ್ಧ್ಯ-ಮುಪ॑ಗಚ್ಛತಿ । ವೈ॒ಶ್ವಾ॒ನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪತಿ । ಸಂ॒​ವಁ॒ಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರಃ । ಸಂ॒​ವಁ॒ಥ್ಸ॒ರೇಣೈ॒ವೈನಗ್ಗ್॑ ಸ್ವದಯತಿ । ಹಿರ॑ಣ್ಯ॒-ನ್ದಖ್ಷಿ॑ಣಾ ॥ 14 ॥

ಪ॒ವಿತ್ರಂ॒-ವೈಁ ಹಿರ॑ಣ್ಯಮ್ । ಪು॒ನಾತ್ಯೇ॒ವೈನ᳚ಮ್ । ಬ॒ಹು ವೈ ರಾ॑ಜ॒ನ್ಯೋ ಽನೃ॑ತ-ಙ್ಕರೋತಿ । ಉಪ॑ ಜಾ॒ಮ್ಯೈ ಹರ॑ತೇ । ಜಿ॒ನಾತಿ॑ ಬ್ರಾಹ್ಮ॒ಣಮ್ । ವದ॒ತ್ಯನೃ॑ತಮ್ । ಅನೃ॑ತೇ॒ ಖಲು॒ ವೈ ಕ್ರಿ॒ಯಮಾ॑ಣೇ॒ ವರು॑ಣೋ ಗೃಹ್ಣಾತಿ । ವಾ॒ರು॒ಣಂ-ಯಁ॑ವ॒ಮಯ॑-ಞ್ಚ॒ರು-ನ್ನಿರ್ವ॑ಪತಿ । ವ॒ರು॒ಣ॒ಪಾ॒ಶಾದೇ॒ವೈನ॑-ಮ್ಮುಞ್ಚತಿ । ಅಶ್ವೋ॒ ದಖ್ಷಿ॑ಣಾ । ವಾ॒ರು॒ಣೋ ಹಿ ದೇ॒ವತ॒ಯಾ-ಽಶ್ವ॒-ಸ್ಸಮೃ॑ದ್ಧ್ಯೈ ॥ 15 ॥
(ಐ॒ನ್ದ್ರಾ॒ವೈ॒ಷ್ಣಾ॒ವಮೇಕಾ॑ದಶಕಪಾಲಂ॒-ಁಯದೃ॑ಷ॒ಭೋ- ದಧಾ॑ತಿ-ಪೂ॒ಷಾ ಪ॒ಶೂ-ನ್ಪ್ರಜ॑ನಯತಿ॒-ಹಿರ॑ಣ್ಯಂ॒ ದಖ್ಷಿ॑ಣಾ॒-ದಖ್ಷಿ॒ಣೈಕಂ॑ ಚ) (ಅ. 2)

ಅನುವಾಕಂ 3 - ರತ್ನಿನಾಂ ಹವೀಂಷಿ
ರ॒ತ್ನಿನಾ॑ಮೇ॒ತಾನಿ॑ ಹ॒ವೀಗ್ಂಷಿ॑ ಭವನ್ತಿ । ಏ॒ತೇ ವೈ ರಾ॒ಷ್ಟ್ರಸ್ಯ॑ ಪ್ರದಾ॒ತಾರಃ॑ । ಏ॒ತೇ॑-ಽಪಾದಾ॒ತಾರಃ॑ । ಯ ಏ॒ವ ರಾ॒ಷ್ಟ್ರಸ್ಯ॑ ಪ್ರದಾ॒ತಾರಃ॑ । ಯೇ॑-ಽಪಾದಾ॒ತಾರಃ॑ । ತ ಏ॒ವಾಸ್ಮೈ॑ ರಾ॒ಷ್ಟ್ರ-ಮ್ಪ್ರಯ॑ಚ್ಛನ್ತಿ । ರಾ॒ಷ್ಟ್ರಮೇ॒ವ ಭ॑ವತಿ । ಯ-ಥ್ಸ॑ಮಾ॒ಹೃತ್ಯ॑ ನಿ॒ರ್ವಪೇ᳚ತ್ । ಅರ॑ತ್ನಿನ-ಸ್ಸ್ಯುಃ । ಯ॒ಥಾ॒ಯ॒ಥ-ನ್ನಿರ್ವ॑ಪತಿ ರತ್ನಿ॒ತ್ವಾಯ॑ ॥ 16 ॥

ಯ-ಥ್ಸ॒ದ್ಯೋ ನಿ॒ರ್ವಪೇ᳚ತ್ । ಯಾವ॑ತೀ॒ಮೇಕೇ॑ನ ಹ॒ವಿಷಾ॒-ಽಽಶಿಷ॑ಮವ ರು॒ನ್ಧೇ । ತಾವ॑ತೀ॒ಮವ॑ ರುನ್ಧೀತ । ಅ॒ನ್ವ॒ಹ-ನ್ನಿರ್ವ॑ಪತಿ । ಭೂಯ॑ಸೀಮೇ॒ವಾಶಿಷ॒ಮವ॑ ರುನ್ಧೇ । ಭೂಯ॑ಸೋ ಯಜ್ಞಕ್ರ॒ತೂನುಪೈ॑ತಿ । ಬಾ॒ರ್॒ಹ॒ಸ್ಪ॒ತ್ಯ-ಞ್ಚ॒ರು-ನ್ನಿರ್ವ॑ಪತಿ ಬ್ರ॒ಹ್ಮಣೋ॑ ಗೃ॒ಹೇ । ಮು॒ಖ॒ತ ಏ॒ವಾಸ್ಮೈ॒ ಬ್ರಹ್ಮ॒ ಸಗ್ಗ್​ಶ್ಯ॑ತಿ । ಅಥೋ॒ ಬ್ರಹ್ಮ॑ನ್ನೇ॒ವ ಖ್ಷ॒ತ್ರ-ಮ॒ನ್ವಾರ॑ಮ್ಭಯತಿ । ಶಿ॒ತಿ॒ಪೃ॒ಷ್ಠೋ ದಖ್ಷಿ॑ಣಾ॒ ಸಮೃ॑ದ್ಧ್ಯೈ ॥ 17 ॥

ಐ॒ನ್ದ್ರ-ಮೇಕಾ॑ದಶಕಪಾಲಗ್ಂ ರಾಜ॒ನ್ಯ॑ಸ್ಯ ಗೃ॒ಹೇ । ಇ॒ನ್ದ್ರಿ॒ಯಮೇ॒ವಾವ॑ ರುನ್ಧೇ । ಋ॒ಷ॒ಭೋ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಆ॒ದಿ॒ತ್ಯ-ಞ್ಚ॒ರು-ಮ್ಮಹಿ॑ಷ್ಯೈ ಗೃ॒ಹೇ । ಇ॒ಯಂ-ವಾಁ ಅದಿ॑ತಿಃ । ಅ॒ಸ್ಯಾಮೇ॒ವ ಪ್ರತಿ॑ತಿಷ್ಠತಿ । ಧೇ॒ನು-ರ್ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಭಗಾ॑ಯ ಚ॒ರುಂ-ವಾಁ॒ವಾತಾ॑ಯೈ ಗೃ॒ಹೇ । ಭಗ॑ಮೇ॒ವಾಸ್ಮಿ॑-ನ್ದಧಾತಿ । ವಿಚಿ॑ತ್ತಗರ್ಭಾ ಪಷ್ಠೌ॒ಹೀ ದಖ್ಷಿ॑ಣಾ॒ ಸಮೃ॑ದ್ಧ್ಯೈ ॥ 18 ॥

ನೈ॒ರ್॒ಋ॒ತ-ಞ್ಚ॒ರು-ಮ್ಪ॑ರಿವೃ॒ಕ್ತ್ಯೈ॑ ಗೃ॒ಹೇ ಕೃ॒ಷ್ಣಾನಾಂ᳚-ವ್ರೀಁಹೀ॒ಣಾ-ನ್ನ॒ಖನಿ॑ರ್ಭಿನ್ನಮ್ । ಪಾ॒ಪ್ಮಾನ॑ಮೇ॒ವ ನಿರ್-ಋ॑ತಿ-ನ್ನಿ॒ರವ॑ದಯತೇ । ಕೃ॒ಷ್ಣಾ ಕೂ॒ಟಾ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಆ॒ಗ್ನೇ॒ಯ-ಮ॒ಷ್ಟಾಕ॑ಪಾಲಗ್ಂ ಸೇನಾ॒ನ್ಯೋ॑ ಗೃ॒ಹೇ । ಸೇನಾ॑ಮೇ॒ವಾಸ್ಯ॒ ಸಗ್ಗ್​ಶ್ಯ॑ತಿ । ಹಿರ॑ಣ್ಯ॒-ನ್ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ವಾ॒ರು॒ಣ-ನ್ದಶ॑ಕಪಾಲಗ್ಂ ಸೂ॒ತಸ್ಯ॑ ಗೃ॒ಹೇ । ವ॒ರು॒ಣ॒ಸ॒ವಮೇ॒ವಾವ॑-ರುನ್ಧೇ । ಮ॒ಹಾನಿ॑ರಷ್ಟೋ॒ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಮಾ॒ರು॒ತಗ್ಂ ಸ॒ಪ್ತಕ॑ಪಾಲ-ಙ್ಗ್ರಾಮ॒ಣ್ಯೋ॑ ಗೃ॒ಹೇ ॥ 19 ॥

ಅನ್ನಂ॒-ವೈಁ ಮ॒ರುತಃ॑ । ಅನ್ನ॑ಮೇ॒ವಾವ॑-ರುನ್ಧೇ । ಪೃಶ್ಞಿ॒-ರ್ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಸಾ॒ವಿ॒ತ್ರ-ನ್ದ್ವಾದ॑ಶಕಪಾಲ-ಙ್ಖ್ಷ॒ತ್ತುರ್ಗೃ॒ಹೇ ಪ್ರಸೂ᳚ತ್ಯೈ । ಉ॒ಪ॒ದ್ಧ್ವ॒ಸ್ತೋ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಆ॒ಶ್ವಿ॒ನ-ನ್ದ್ವಿ॑ಕಪಾ॒ಲಗ್ಂ ಸ॑ಗ್ರಂಹೀ॒ತುರ್ಗೃ॒ಹೇ । ಅ॒ಶ್ವಿನೌ॒ ವೈ ದೇ॒ವಾನಾ᳚-ಮ್ಭಿ॒ಷಜೌ᳚ । ತಾಭ್ಯಾ॑ಮೇ॒ವಾಸ್ಮೈ॑ ಭೇಷ॒ಜ-ಙ್ಕ॑ರೋತಿ । ಸ॒ವಾ॒ತ್ಯೌ॑ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಪೌ॒ಷ್ಣ-ಞ್ಚ॒ರು-ಮ್ಭಾ॑ಗದು॒ಘಸ್ಯ॑ ಗೃ॒ಹೇ ॥ 20 ॥

ಅನ್ನಂ॒-ವೈಁ ಪೂ॒ಷಾ । ಅನ್ನ॑ಮೇ॒ವಾವ॑ ರುನ್ಧೇ । ಶ್ಯಾ॒ಮೋ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ರೌ॒ದ್ರ-ಙ್ಗಾ॑ವೀಧು॒ಕ-ಞ್ಚ॒ರುಮ॑ಖ್ಷಾವಾ॒ಪಸ್ಯ॑ ಗೃ॒ಹೇ । ಅ॒ನ್ತ॒ತ ಏ॒ವ ರು॒ದ್ರ-ನ್ನಿ॒ರವ॑ದಯತೇ । ಶ॒ಬಲ॒ ಉದ್ವಾ॑ರೋ॒ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ದ್ವಾದ॑ಶೈ॒ತಾನಿ॑ ಹ॒ವೀಗ್ಂಷಿ॑ ಭವನ್ತಿ । ದ್ವಾದ॑ಶ॒ ಮಾಸಾ᳚-ಸ್ಸಂ​ವಁಥ್ಸ॒ರಃ । ಸಂ॒​ವಁ॒ಥ್ಸ॒ರೇಣೈ॒ವಾಸ್ಮೈ॑ ರಾ॒ಷ್ಟ್ರಮವ॑-ರುನ್ಧೇ । ರಾ॒ಷ್ಟ್ರಮೇ॒ವ ಭ॑ವತಿ ॥ 21 ॥

ಯನ್ನ ಪ್ರ॑ತಿ ನಿ॒ರ್ವಪೇ᳚ತ್ । ರ॒ತ್ನಿನ॑ ಆ॒ಶಿಷೋ-ಽವ॑ರುನ್ಧೀರನ್ನ್ । ಪ್ರತಿ॒ ನಿರ್ವ॑ಪತಿ । ಇನ್ದ್ರಾ॑ಯ ಸು॒ತ್ರಾಮ್ಣೇ॑ ಪುರೋ॒ಡಾಶ॒-ಮೇಕಾ॑ದಶಕಪಾಲಮ್ । ಇನ್ದ್ರಾ॑ಯಾಗ್ಂಹೋ॒ಮುಚೇ᳚ । ಆ॒ಶಿಷ॑ ಏ॒ವಾವ॑ರುನ್ಧೇ । ಅ॒ಯ-ನ್ನೋ॒ ರಾಜಾ॑ ವೃತ್ರ॒ಹಾ ರಾಜಾ॑ ಭೂ॒ತ್ವಾ ವೃ॒ತ್ರಂ-ವಁ॑ದ್ಧ್ಯಾ॒ದಿತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ । ಮೈ॒ತ್ರಾ॒-ಬಾ॒ರ್॒ಹ॒ಸ್ಪ॒ತ್ಯ-ಮ್ಭ॑ವತಿ । ಶ್ವೇ॒ತಾಯೈ᳚ ಶ್ವೇ॒ತವ॑ಥ್ಸಾಯೈ ದು॒ಗ್ಧೇ ॥ 22 ॥

ಬಾ॒ರ್॒ಹ॒ಸ್ಪ॒ತ್ಯೇ ಮೈ॒ತ್ರಮಪಿ॑ ದಧಾತಿ । ಬ್ರಹ್ಮ॑ ಚೈ॒ವಾಸ್ಮೈ᳚ ಖ್ಷ॒ತ್ರ-ಞ್ಚ॑ ಸ॒ಮೀಚೀ॑ ದಧಾತಿ । ಅಥೋ॒ ಬ್ರಹ್ಮ॑ನ್ನೇ॒ವ ಖ್ಷ॒ತ್ರ-ಮ್ಪ್ರತಿ॑ಷ್ಠಾಪಯತಿ । ಬಾ॒ರ್॒ಹ॒ಸ್ಪ॒ತ್ಯೇನ॒ ಪೂರ್ವೇ॑ಣ॒ ಪ್ರಚ॑ರತಿ । ಮು॒ಖ॒ತ ಏ॒ವಾಸ್ಮೈ॒ ಬ್ರಹ್ಮ॒ ಸಗ್ಗ್​ಶ್ಯ॑ತಿ । ಅಥೋ॒ ಬ್ರಹ್ಮ॑ನ್ನೇ॒ವ ಖ್ಷ॒ತ್ರ-ಮ॒ನ್ವಾರ॑ಮ್ಭಯತಿ । ಸ್ವ॒ಯ॒-ಙ್ಕೃ॒ತಾ ವೇದಿ॑ರ್ಭವತಿ । ಸ್ವ॒ಯ॒ದಿ॒ನ್ನ-ಮ್ಬ॒ರ್॒ಹಿಃ । ಸ್ವ॒ಯ॒ಕೃ॒ನ್ತ ಇ॒ದ್ಧ್ಮಃ । ಅನ॑ಭಿಜಿತಸ್ಯಾ॒-ಭಿಜಿ॑ತ್ಯೈ । ತಸ್ಮಾ॒-ದ್ರಾಜ್ಞಾ॒ಮರ॑ಣ್ಯ-ಮ॒ಭಿಜಿ॑ತಮ್ । ಸೈವ ಶ್ವೇ॒ತಾ ಶ್ವೇ॒ತವ॑ಥ್ಸಾ॒ ದಖ್ಷಿ॑ಣಾ॒ ಸಮೃ॑ದ್ಧ್ಯೈ ॥ 23 ॥
(ರ॒ತ್ನಿ॒ತ್ವಾಯ॒ - ಸಮೃ॑ದ್ಧ್ಯೈ - ಪಷ್ಠೌ॒ಹಿ ದಖ್ಷಿ॑ಣಾ॒ ಸಮೃ॑ದ್ಧ್ಯೈ - ಗ್ರಾಮ॒ಣ್ಯೋ॑ ಗೃ॒ಹೇ - ಭಾ॑ಗದು॒ಘಸ್ಯ॑ ಗೃ॒ಹೇ-ಭ॑ವತಿ - ದು॒ಗ್ಧೇ॑ - ಽಭಿಜಿ॑ತ್ಯೈ॒ ದ್ವೇ ಚ॑) (ಅ. 3)

ಅನುವಾಕಂ 4 - ದೇವಸುವಾಂ ಹವೀಂಷಿ
ದೇ॒ವ॒ಸು॒ವಾಮೇ॒ತಾನಿ॑ ಹ॒ವೀಗ್ಂಷಿ॑ ಭವನ್ತಿ । ಏ॒ತಾವ॑ನ್ತೋ॒ ವೈ ದೇ॒ವಾನಾಗ್ಂ॑ ಸ॒ವಾಃ । ತ ಏ॒ವಾಸ್ಮೈ॑ ಸ॒ವಾ-ನ್ಪ್ರಯ॑ಚ್ಛನ್ತಿ । ತ ಏ॑ನಗ್ಂ ಸುವನ್ತೇ । ಅ॒ಗ್ನಿರೇ॒ವೈನ॑-ಙ್ಗೃ॒ಹಪ॑ತೀನಾಗ್ಂ ಸುವತೇ । ಸೋಮೋ॒ ವನ॒ಸ್ಪತೀ॑ನಾಮ್ । ರು॒ದ್ರಃ ಪ॑ಶೂ॒ನಾಮ್ । ಬೃಹ॒ಸ್ಪತಿ॑-ರ್ವಾ॒ಚಾಮ್ । ಇನ್ದ್ರೋ᳚ ಜ್ಯೇ॒ಷ್ಠಾನಾ᳚ಮ್ । ಮಿ॒ತ್ರ-ಸ್ಸ॒ತ್ಯಾನಾ᳚ಮ್ ॥ 24 ॥

ವರು॑ಣೋ॒ ಧರ್ಮ॑ಪತೀನಾಮ್ । ಏ॒ತದೇ॒ವ ಸರ್ವ॑-ಮ್ಭವತಿ । ಸ॒ವಿ॒ತಾ ತ್ವಾ᳚ ಪ್ರಸ॒ವಾನಾಗ್ಂ॑ ಸುವತಾ॒ಮಿತಿ॒ ಹಸ್ತ॑-ಙ್ಗೃಹ್ಣಾತಿ॒ ಪ್ರಸೂ᳚ತ್ಯೈ । ಯೇ ದೇ॑ವಾ ದೇವ॒ಸುವ॒-ಸ್ಸ್ಥೇತ್ಯಾ॑ಹ । ಯ॒ಥಾ॒ ಯ॒ಜುರೇ॒ವೈ ತತ್ । ಮ॒ಹ॒ತೇ ಖ್ಷ॒ತ್ರಾಯ॑ ಮಹ॒ತ ಆಧಿ॑ಪತ್ಯಾಯ ಮಹ॒ತೇ ಜಾನ॑ರಾಜ್ಯಾ॒ಯೇತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ । ಏ॒ಷ ವೋ॑ ಭರತಾ॒ ರಾಜಾ॒ ಸೋಮೋ॒-ಽಸ್ಮಾಕ॑-ಮ್ಬ್ರಾಹ್ಮ॒ಣಾನಾ॒ಗ್ಂ॒ ರಾಜೇತ್ಯಾ॑ಹ । ತಸ್ಮಾ॒-ಥ್ಸೋಮ॑ರಾಜಾನೋ ಬ್ರಾಹ್ಮ॒ಣಾಃ । ಪ್ರತಿ॒ ತ್ಯನ್ನಾಮ॑ ರಾ॒ಜ್ಯಮ॑ಧಾ॒ಯೀತ್ಯಾ॑ಹ ॥ 25 ॥

ರಾ॒ಜ್ಯಮೇ॒ವಾಸ್ಮಿ॒-ನ್ಪ್ರತಿ॑ ದಧಾತಿ । ಸ್ವಾ-ನ್ತ॒ನುವಂ॒-ವಁರು॑ಣೋ ಅಶಿಶ್ರೇ॒ದಿತ್ಯಾ॑ಹ । ವ॒ರು॒ಣ॒ಸ॒ವಮೇ॒ವಾ-ವ॑ರುನ್ಧೇ । ಶುಚೇ᳚ರ್ಮಿ॒ತ್ರಸ್ಯ॒ ವ್ರತ್ಯಾ॑ ಅಭೂ॒ಮೇತ್ಯಾ॑ಹ । ಶುಚಿ॑ಮೇ॒ವೈನಂ॒-ವ್ರಁತ್ಯ॑-ಙ್ಕರೋತಿ । ಅಮ॑ನ್ಮಹಿ ಮಹ॒ತ ಋ॒ತಸ್ಯ॒ ನಾಮೇತ್ಯಾ॑ಹ । ಮ॒ನು॒ತ ಏ॒ವೈನ᳚ಮ್ । ಸರ್ವೇ॒ ವ್ರಾತಾ॒ ವರು॑ಣಸ್ಯಾ ಭೂವ॒ನ್ನಿತ್ಯಾ॑ಹ । ಸರ್ವ॑ವ್ರಾತಮೇ॒ವೈನ॑-ಙ್ಕರೋತಿ । ವಿ ಮಿ॒ತ್ರ ಏವೈ॒ರರಾ॑ತಿ-ಮತಾರೀ॒ದಿತ್ಯಾ॑ಹ ॥ 26 ॥

ಅರಾ॑ತಿಮೇ॒ವೈನ॑-ನ್ತಾರಯತಿ । ಅಸೂ॑ಷುದನ್ತ ಯ॒ಜ್ಞಿಯಾ॑ ಋ॒ತೇನೇತ್ಯಾ॑ಹ । ಸ್ವ॒ದಯ॑ತ್ಯೇ॒ವೈನ᳚ಮ್ । ವ್ಯು॑ ತ್ರಿ॒ತೋ ಜ॑ರಿ॒ಮಾಣ॑-ನ್ನ ಆನ॒ಡಿತ್ಯಾ॑ಹ । ಆಯು॑ರೇ॒ವಾಸ್ಮಿ॑-ನ್ದಧಾತಿ । ದ್ವಾಭ್ಯಾಂ॒-ವಿಁಮೃ॑ಷ್ಟೇ । ದ್ವಿ॒ಪಾ-ದ್ಯಜ॑ಮಾನಃ॒ ಪ್ರತಿ॑ಷ್ಠಿತ್ಯೈ । ಅ॒ಗ್ನೀ॒ಷೋ॒ಮೀಯ॑ಸ್ಯ॒ ಚೈಕಾ॑ದಶಕಪಾಲಸ್ಯ ದೇವಸು॒ವಾ-ಞ್ಚ॑ ಹ॒ವಿಷಾ॑ಮ॒ಗ್ನಯೇ᳚ ಸ್ವಿಷ್ಟ॒ಕೃತೇ॑ ಸ॒ಮವ॑ದ್ಯತಿ । ದೇ॒ವತಾ॑ಭಿರೇ॒ವೈನ॑-ಮುಭ॒ಯತಃ॒ ಪರಿ॑ಗೃಹ್ಣಾತಿ । ವಿ॒ಷ್ಣು॒ಕ್ರ॒ಮಾನ್ ಕ್ರ॑ಮತೇ( ) । ವಿಷ್ಣು॑ರೇ॒ವ ಭೂ॒ತ್ವೇಮಾಁಲ್ಲೋ॒ಕಾ-ನ॒ಭಿಜ॑ಯತಿ ॥ 27 ॥
(ಸ॒ತ್ಯಾನಾ॑-ಮಧಾ॒ಯೀತ್ಯಾ॑-ಹಾತಾರೀ॒ದಿತ್ಯಾ॑ಹ-ಕ್ರಮತ॒ ಏಕ॑-ಞ್ಚ) (ಅ. 4)

ಅನುವಾಕಂ 5 - ಅಭಿಷೇಕಾರ್ಥಮಪಾಙ್ಗ್ರಹಗ್ರಹಣಂ
ಅ॒ರ್ಥೇತ॒-ಸ್ಸ್ಥೇತಿ॑ ಜುಹೋತಿ । ಆಹು॑ತ್ಯೈ॒ವೈನಾ॑ ನಿ॒ಷ್ಕ್ರೀಯ॑ ಗೃಹ್ಣಾತಿ । ಅಥೋ॑ ಹ॒ವಿಷ್ಕೃ॑ತಾನಾಮೇ॒ವಾಭಿಘೃ॑ತಾನಾ-ಙ್ಗೃಹ್ಣಾತಿ । ವಹ॑ನ್ತೀನಾ-ಙ್ಗೃಹ್ಣಾತಿ । ಏ॒ತಾ ವಾ ಅ॒ಪಾಗ್ಂ ರಾ॒ಷ್ಟ್ರಮ್ । ರಾ॒ಷ್ಟ್ರಮೇ॒ವಾಸ್ಮೈ॑ ಗೃಹ್ಣಾತಿ । ಅಥೋ॒ ಶ್ರಿಯ॑ಮೇ॒ವೈನ॑ಮ॒ಭಿ ವ॑ಹನ್ತಿ । ಅ॒ಪಾ-ಮ್ಪತಿ॑ರ॒ಸೀತ್ಯಾ॑ಹ । ಮಿ॒ಥು॒ನಮೇ॒ವಾಕಃ॑ । ವೃಷಾ᳚-ಽಸ್ಯೂ॒ರ್ಮಿರಿತ್ಯಾ॑ಹ ॥ 28 ॥

ಊ॒ರ್ಮಿ॒ಮನ್ತ॑ಮೇ॒ವೈನ॑-ಙ್ಕರೋತಿ । ವೃ॒ಷ॒ಸೇ॒ನೋ॑-ಽಸೀತ್ಯಾ॑ಹ । ಸೇನಾ॑ಮೇ॒ವಾಸ್ಯ॒ ಸಗ್ಗ್​ಶ್ಯ॑ತಿ । ವ್ರ॒ಜ॒ಖ್ಷಿತ॒-ಸ್ಸ್ಥೇತ್ಯಾ॑ಹ । ಏ॒ತಾ ವಾ ಅ॒ಪಾಂ-ವಿಁಶಃ॑ । ವಿಶ॑ಮೇ॒ವಾಸ್ಮೈ॒ ಪರ್ಯೂ॑ಹತಿ । ಮ॒ರುತಾ॒ಮೋಜ॒-ಸ್ಸ್ಥೇತ್ಯಾ॑ಹ । ಅನ್ನಂ॒-ವೈಁ ಮ॒ರುತಃ॑ । ಅನ್ನ॑ಮೇ॒ವಾ ವ॑ರುನ್ಧೇ । ಸೂರ್ಯ॑ವರ್ಚಸ॒-ಸ್ಸ್ಥೇತ್ಯಾ॑ಹ ॥ 29 ॥

ರಾ॒ಷ್ಟ್ರಮೇ॒ವ ವ॑ರ್ಚ॒ಸ್ವ್ಯ॑ಕಃ । ಸೂರ್ಯ॑ತ್ವಚಸ॒-ಸ್ಸ್ಥೇತ್ಯಾ॑ಹ । ಸ॒ತ್ಯಂ-ವಾಁ ಏ॒ತತ್ । ಯ-ದ್ವರ್​ಷ॑ತಿ । ಅನೃ॑ತಂ॒-ಯಁದಾ॒ತಪ॑ತಿ॒ ವರ್​ಷ॑ತಿ । ಸ॒ತ್ಯಾ॒ನೃ॒ತೇ ಏ॒ವಾವ॑ರುನ್ಧೇ । ನೈನಗ್ಂ॑ ಸತ್ಯಾನೃ॒ತೇ ಉ॑ದಿ॒ತೇ ಹಿಗ್ಗ್॑ಸ್ತಃ । ಯ ಏ॒ವಂ-ವೇಁದ॑ । ಮಾನ್ದಾ॒-ಸ್ಸ್ಥೇತ್ಯಾ॑ಹ । ರಾ॒ಷ್ಟ್ರಮೇ॒ವ ಬ್ರ॑ಹ್ಮವರ್ಚ॒ಸ್ಯ॑ಕಃ ॥ 30 ॥

ವಾಶಾ॒-ಸ್ಸ್ಥೇತ್ಯಾ॑ಹ । ರಾ॒ಷ್ಟ್ರಮೇ॒ವ ವ॒ಶ್ಯ॑ಕಃ । ಶಕ್ವ॑ರೀ॒-ಸ್ಸ್ಥೇತ್ಯಾ॑ಹ । ಪ॒ಶವೋ॒ ವೈ ಶಕ್ವ॑ರೀಃ । ಪ॒ಶೂನೇ॒ವಾವ॑ ರುನ್ಧೇ । ವಿ॒ಶ್ವ॒ಭೃತ॒-ಸ್ಸ್ಥೇತ್ಯಾ॑ಹ । ರಾ॒ಷ್ಟ್ರಮೇ॒ವ ಪ॑ಯ॒ಸ್ವ್ಯ॑ಕಃ । ಜ॒ನ॒ಭೃತ॒-ಸ್ಸ್ಥೇತ್ಯಾ॑ಹ । ರಾ॒ಷ್ಟ್ರಮೇ॒ವೇನ್ದ್ರಿ॑ಯಾ॒ವ್ಯ॑ಕಃ । ಅ॒ಗ್ನೇಸ್ತೇ॑ಜ॒ಸ್ಯಾ᳚-ಸ್ಸ್ಥೇತ್ಯಾ॑ಹ ॥ 31 ॥

ರಾ॒ಷ್ಟ್ರಮೇ॒ವ ತೇ॑ಜ॒ಸ್ವ್ಯ॑ಕಃ । ಅ॒ಪಾಮೋಷ॑ಧೀನಾ॒ಗ್ಂ॒ ರಸ॒-ಸ್ಸ್ಥೇತ್ಯಾ॑ಹ । ರಾ॒ಷ್ಟ್ರಮೇ॒ವ ಮ॑ಧ॒ವ್ಯ॑ಮಕಃ । ಸಾ॒ರ॒ಸ್ವ॒ತ-ಙ್ಗ್ರಹ॑-ಙ್ಗೃಹ್ಣಾತಿ । ಏ॒ಷಾ ವಾ ಅ॒ಪಾ-ಮ್ಪೃ॒ಷ್ಠಮ್ । ಯಥ್ಸರ॑ಸ್ವತೀ । ಪೃ॒ಷ್ಠಮೇ॒ವೈನಗ್ಂ॑ ಸಮಾ॒ನಾನಾ᳚-ಙ್ಕರೋತಿ । ಷೋ॒ಡ॒ಶಭಿ॑-ರ್ಗೃಹ್ಣಾತಿ । ಷೋಡ॑ಶಕಲೋ॒ ವೈ ಪುರು॑ಷಃ । ಯಾವಾ॑ನೇ॒ವ ಪುರು॑ಷಃ । ತಸ್ಮಿ॑ನ್ ವೀ॒ರ್ಯ॑-ನ್ದಧಾತಿ । ಷೋ॒ಡ॒ಶಭಿ॑-ರ್ಜು॒ಹೋತಿ॑ ಷೋಡ॒ಶಭಿ॑-ರ್ಗೃಹ್ಣಾತಿ । ದ್ವಾತ್ರಿಗ್ಂ॑ಶ॒-ಥ್ಸಮ್ಪ॑ದ್ಯನ್ತೇ । ದ್ವಾತ್ರಿಗ್ಂ॑ಶದಖ್ಷರಾ ಽನು॒ಷ್ಟುಕ್ । ವಾಗ॑ನು॒ಷ್ಟು-ಫ್ಸರ್ವಾ॑ಣಿ॒ ಛನ್ದಾಗ್ಂ॑ಸಿ । ವಾ॒ಚೈವೈನ॒ಗ್ಂ॒ ಸರ್ವೇ॑ಭಿ॒-ಶ್ಛನ್ದೋ॑ಭಿ-ರ॒ಭಿಷಿ॑ಞ್ಚತಿ ॥ 32 ॥
(ಊ॒ರ್ಮಿರಿತ್ಯಾ॑ಹ॒ - ಸೂರ್ಯ॑ವರ್ಚಸ॒-ಸ್ಸ್ಥೇತ್ಯಾ॑ಹ - ಬ್ರಹ್ಮವರ್ಚ॒ಸ್ಯ॑ಕ - ಸ್ತೇಜ॒ಸ್ಯಾ᳚-ಸ್ಸ್ಥೇತ್ಯಾ॑ಹೈ॒ವ - ಪುರು॑ಷ॒-ಷ್ಷಟ್ಚ॑) (ಅ. 5)

ಅನುವಾಕಂ 6 - ಅಭಿಷೇಕಾರ್ಥಜಲಸಂಸ್ಕಾರಃ
ದೇವೀ॑ರಾಪ॒-ಸ್ಸ-ಮ್ಮಧು॑ಮತೀ॒-ರ್ಮಧು॑ಮತೀಭಿ-ಸ್ಸೃಜ್ಯದ್ಧ್ವ॒ಮಿತ್ಯಾ॑ಹ । ಬ್ರಹ್ಮ॑ಣೈ॒ವೈನಾ॒-ಸ್ಸಗ್ಂ ಸೃ॑ಜತಿ । ಅನಾ॑ಧೃಷ್ಟಾ-ಸ್ಸೀದ॒ತೇತ್ಯಾ॑ಹ । ಬ್ರಹ್ಮ॑ಣೈ॒ವೈನಾ᳚-ಸ್ಸಾದಯತಿ । ಅ॒ನ್ತ॒ರಾ ಹೋತು॑ಶ್ಚ॒ ಧಿಷ್ಣಿ॑ಯ-ಮ್ಬ್ರಾಹ್ಮಣಾಚ್ಛ॒ಗ್ಂ॒ ಸಿನ॑ಶ್ಚ ಸಾದಯತಿ । ಆ॒ಗ್ನೇ॒ಯೋ ವೈ ಹೋತಾ᳚ । ಐ॒ನ್ದ್ರೋ ಬ್ರಾ᳚ಹ್ಮಣಾಚ್ಛ॒ಗ್ಂ॒ಸೀ । ತೇಜ॑ಸಾ ಚೈ॒ವೇನ್ದ್ರಿ॒ಯೇಣ॑ ಚೋಭ॒ಯತೋ॑ ರಾ॒ಷ್ಟ್ರ-ಮ್ಪರಿ॑ಗೃಹ್ಣಾತಿ । ಹಿರ॑ಣ್ಯೇ॒ನೋ-ತ್ಪು॑ನಾತಿ । ಆಹು॑ತ್ಯೈ॒ ಹಿ ಪ॒ವಿತ್ರಾ᳚ಭ್ಯಾಮುತ್ಪು॒ನನ್ತಿ॒ ವ್ಯಾವೃ॑ತ್ತ್ಯೈ ॥ 33 ॥

ಶ॒ತಮಾ॑ನ-ಮ್ಭವತಿ । ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯಃ । ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ತಿಷ್ಠತಿ । ಅನಿ॑ಭೃಷ್ಟಮ॒ಸೀತ್ಯಾ॑ಹ । ಅನಿ॑ಭೃಷ್ಟ॒ಗ್ಗ್॒ ಹ್ಯೇ॑ತತ್ । ವಾ॒ಚೋ ಬನ್ಧು॒ರಿತ್ಯಾ॑ಹ । ವಾ॒ಚೋ ಹ್ಯೇ॑ಷ ಬನ್ಧುಃ॑ । ತ॒ಪೋ॒ಜಾ ಇತ್ಯಾ॑ಹ । ತ॒ಪೋ॒ಜಾ ಹ್ಯೇ॑ತತ್ । ಸೋಮ॑ಸ್ಯ ದಾ॒ತ್ರಮ॒ಸೀತ್ಯಾ॑ಹ ॥ 34 ॥

ಸೋಮ॑ಸ್ಯ॒ ಹ್ಯೇ॑ತದ್ದಾ॒ತ್ರಮ್ । ಶು॒ಕ್ರಾ ವ॑-ಶ್ಶು॒ಕ್ರೇಣೋತ್ಪು॑ನಾ॒ಮೀತ್ಯಾ॑ಹ । ಶು॒ಕ್ರಾ ಹ್ಯಾಪಃ॑ । ಶು॒ಕ್ರಗ್ಂ ಹಿರ॑ಣ್ಯಮ್ । ಚ॒ನ್ದ್ರಾಶ್ಚ॒ನ್ದ್ರೇಣೇತ್ಯಾ॑ಹ । ಚ॒ನ್ದ್ರಾ ಹ್ಯಾಪಃ॑ । ಚ॒ನ್ದ್ರಗ್ಂ ಹಿರ॑ಣ್ಯಮ್ । ಅ॒ಮೃತಾ॑ ಅ॒ಮೃತೇ॒ನೇತ್ಯಾ॑ಹ । ಅ॒ಮೃತಾ॒ ಹ್ಯಾಪಃ॑ । ಅ॒ಮೃತ॒ಗ್ಂ॒ ಹಿರ॑ಣ್ಯಮ್ ॥ 35 ॥

ಸ್ವಾಹಾ॑ ರಾಜ॒ಸೂಯಾ॒ಯೇತ್ಯಾ॑ಹ । ರಾ॒ಜ॒ಸೂಯಾ॑ಯ॒ ಹ್ಯೇ॑ನಾ ಉತ್ಪು॒ನಾತಿ॑ । ಸ॒ಧ॒ಮಾದೋ᳚ ದ್ಯು॒ಮ್ನಿನೀ॒ರೂರ್ಜ॑ ಏ॒ತಾ ಇತಿ॑ ವಾರು॒ಣ್ಯರ್ಚಾ ಗೃ॑ಹ್ಣಾತಿ । ವ॒ರು॒ಣ॒ಸ॒ವಮೇ॒ವಾ ವ॑ರುನ್ಧೇ । ಏಕ॑ಯಾ ಗೃಹ್ಣಾತಿ । ಏ॒ಕ॒ಧೈವ ಯಜ॑ಮಾನೇ ವೀ॒ರ್ಯ॑-ನ್ದಧಾತಿ । ಖ್ಷ॒ತ್ರಸ್ಯೋಲ್ಬ॑ಮಸಿ ಖ್ಷ॒ತ್ರಸ್ಯ॒ ಯೋನಿ॑ರ॒ಸೀತಿ॑ ತಾ॒ರ್ಪ್ಯ-ಞ್ಚೋ॒ಷ್ಣೀಷ॑-ಞ್ಚ॒ ಪ್ರಯ॑ಚ್ಛತಿ ಸಯೋನಿ॒ತ್ವಾಯ॑ । ಏಕ॑ಶತೇನ ದರ್ಭಪುಞ್ಜೀ॒ಲೈಃ ಪ॑ವಯತಿ । ಶ॒ತಾಯು॒ರ್ವೈ ಪುರು॑ಷ-ಶ್ಶ॒ತವೀ᳚ರ್ಯಃ । ಆ॒ತ್ಮೈಕ॑ಶ॒ತಃ ॥ 36 ॥

ಯಾವಾ॑ನೇ॒ವ ಪುರು॑ಷಃ । ತಸ್ಮಿ॑ನ್ ವೀ॒ರ್ಯ॑-ನ್ದಧಾತಿ । ದದ್ಧ್ಯಾ॑ಶಯತಿ । ಇ॒ನ್ದ್ರಿ॒ಯಮೇ॒ವಾ-ವ॑ರುನ್ಧೇ । ಉ॒ದು॒ಮ್ಬರ॑-ಮಾಶಯತಿ । ಅ॒ನ್ನಾದ್ಯ॒ಸ್ಯಾವ॑ ರುದ್ಧ್ಯೈ । ಶಷ್ಪಾ᳚ಣ್ಯಾಶಯತಿ । ಸುರಾ॑ಬಲಿ-ಮೇ॒ವೈನ॑-ಙ್ಕರೋತಿ । ಆ॒ವಿದ॑ ಏ॒ತಾ ಭ॑ವನ್ತಿ । ಆ॒ವಿದ॑ಮೇ॒ವೈನ॑-ಙ್ಗಮಯನ್ತಿ ॥ 37 ॥

ಅ॒ಗ್ನಿರೇ॒ವೈನ॒-ಙ್ಗಾರ್​ಹ॑ಪತ್ಯೇನಾವತಿ । ಇನ್ದ್ರ॑ ಇನ್ದ್ರಿ॒ಯೇಣ॑ । ಪೂ॒ಷಾ ಪ॒ಶುಭಿಃ॑ । ಮಿ॒ತ್ರಾವರು॑ಣೌ ಪ್ರಾಣಾಪಾ॒ನಾಭ್ಯಾ᳚ಮ್ । ಇನ್ದ್ರೋ॑ ವೃ॒ತ್ರಾಯ॒ ವಜ್ರ॒ಮುದ॑ಯಚ್ಛತ್ । ಸ ದಿವ॑ಮಲಿಖತ್ । ಸೋ᳚-ಽರ್ಯ॒ಮ್ಣಃ ಪನ್ಥಾ॑ ಅಭವತ್ । ಸ ಆವಿ॑ನ್ನೇ॒ ದ್ಯಾವಾ॑ಪೃಥಿ॒ವೀ ಧೃ॒ತವ್ರ॑ತೇ॒ ಇತಿ॒ ದ್ಯಾವಾ॑ಪೃಥಿ॒ವೀ ಉಪಾ॑ಧಾವತ್ । ಸ ಆ॒ಭ್ಯಾಮೇ॒ವ ಪ್ರಸೂ॑ತ॒ ಇನ್ದ್ರೋ॑ ವೃ॒ತ್ರಾಯ॒ ವಜ್ರ॒-ಮ್ಪ್ರಾಹ॑ರತ್ । ಆವಿ॑ನ್ನೇ॒ ದ್ಯಾವಾ॑ಪೃಥಿ॒ವೀ ಧೃ॒ತವ್ರ॑ತೇ॒ ಇತಿ॒ ಯದಾಹ॑ ॥ 38 ॥

ಆ॒ಭ್ಯಾಮೇ॒ವ ಪ್ರಸೂ॑ತೋ॒ ಯಜ॑ಮಾನೋ॒ ವಜ್ರ॒-ಮ್ಭ್ರಾತೃ॑ವ್ಯಾಯ॒ ಪ್ರಹ॑ರತಿ । ಆವಿ॑ನ್ನಾ ದೇ॒ವ್ಯದಿ॑ತಿ-ರ್ವಿಶ್ವರೂ॒ಪೀತ್ಯಾ॑ಹ । ಇ॒ಯಂ-ವೈಁ ದೇ॒ವ್ಯದಿ॑ತಿ-ರ್ವಿಶ್ವರೂ॒ಪೀ । ಅ॒ಸ್ಯಾಮೇ॒ವ ಪ್ರತಿ॑ ತಿಷ್ಠತಿ । ಆವಿ॑ನ್ನೋ॒-ಽಯಮ॒ಸಾವಾ॑ಮುಷ್ಯಾಯ॒ಣೋ᳚-ಽಸ್ಯಾಂ-ವಿಁ॒ಶ್ಯ॑ಸ್ಮಿ-ನ್ರಾ॒ಷ್ಟ್ರ ಇತ್ಯಾ॑ಹ । ವಿ॒ಶೈವೈನಗ್ಂ॑ ರಾ॒ಷ್ಟ್ರೇಣ॒ ಸಮ॑ರ್ಧಯತಿ । ಮ॒ಹ॒ತೇ ಖ್ಷ॒ತ್ರಾಯ॑ ಮಹ॒ತ ಆಧಿ॑ಪತ್ಯಾಯ ಮಹ॒ತೇ ಜಾನ॑ರಾಜ್ಯಾ॒ಯೇತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ । ಏ॒ಷ ವೋ॑ ಭರತಾ॒ ರಾಜಾ॒ ಸೋಮೋ॒-ಽಸ್ಮಾಕ॑-ಮ್ಬ್ರಾಹ್ಮ॒ಣಾನಾ॒ಗ್ಂ॒ ರಾಜೇತ್ಯಾ॑ಹ । ತಸ್ಮಾ॒-ಥ್ಸೋಮ॑ರಾಜಾನೋ ಬ್ರಾಹ್ಮ॒ಣಾಃ ॥ 39 ॥

ಇನ್ದ್ರ॑ಸ್ಯ॒ ವಜ್ರೋ॑-ಽಸಿ॒ ವಾರ್ತ್ರ॑ಘ್ನ॒ ಇತಿ॒ ಧನುಃ॒ ಪ್ರಯ॑ಚ್ಛತಿ॒ ವಿಜಿ॑ತ್ಯೈ । ಶ॒ತ್ರು॒ಬಾಧ॑ನಾ॒-ಸ್ಸ್ಥೇತೀಷೂನ್॑ । ಶತ್ರೂ॑ನೇ॒ವಾಸ್ಯ॑ ಬಾಧನ್ತೇ । ಪಾ॒ತ ಮಾ᳚ ಪ್ರ॒ತ್ಯಞ್ಚ॑-ಮ್ಪಾ॒ತ ಮಾ॑ ತಿ॒ರ್ಯಞ್ಚ॑ಮ॒ನ್ವಞ್ಚ॑-ಮ್ಮಾ ಪಾ॒ತೇತ್ಯಾ॑ಹ । ತಿ॒ಸ್ರೋ ವೈ ಶ॑ರ॒ವ್ಯಾಃ᳚ । ಪ್ರ॒ತೀಚೀ॑ ತಿ॒ರಶ್ಚ್ಯ॒ನೂಚೀ᳚ । ತಾಭ್ಯ॑ ಏ॒ವೈನ॑-ಮ್ಪಾನ್ತಿ । ದಿ॒ಗ್ಭ್ಯೋ ಮಾ॑ ಪಾ॒ತೇತ್ಯಾ॑ಹ । ದಿ॒ಗ್ಭ್ಯ ಏ॒ವೈನ॑-ಮ್ಪಾನ್ತಿ । ವಿಶ್ವಾ᳚ಭ್ಯೋ ಮಾ ನಾ॒ಷ್ಟ್ರಾಭ್ಯಃ॑ ಪಾ॒ತೇತ್ಯಾ॑ಹ । ಅಪ॑ರಿಮಿತಾದೇ॒ವೈನ॑-ಮ್ಪಾನ್ತಿ । ಹಿರ॑ಣ್ಯವರ್ಣಾವು॒ಷಸಾಂ᳚-ವಿಁರೋ॒ಕ ಇತಿ॑ ತ್ರಿ॒ಷ್ಟುಭಾ॑ ಬಾ॒ಹೂ ಉ-ದ್ಗೃ॑ಹ್ಣಾತಿ । ಇ॒ನ್ದ್ರಿ॒ಯಂ-ವೈಁ ವೀ॒ರ್ಯ॑-ನ್ತ್ರಿ॒ಷ್ಟುಕ್ । ಇ॒ನ್ದ್ರಿ॒ಯಮೇ॒ವ ವೀ॒ರ್ಯ॑-ಮು॒ಪರಿ॑ಷ್ಟಾದಾ॒ತ್ಮನ್-ಧ॑ತ್ತೇ ॥ 40 ॥
(ವ್ಯಾವೃ॑ತ್ತ್ಯೈ-ದಾ॒ತ್ರಮ॒ಸೀತ್ಯಾ॑ಹಾ॒-ಮೃತ॒ಗ್ಂ॒ ಹಿರ॑ಣ್ಯ-ಮೇಕಶ॒ತೋ-ಗ॑ಮಯ॒ನ್-ತ್ಯಾಹ॑-ಬ್ರಾಹ್ಮಾ॒ಣಾ-ನಾ॒ಷ್ಟ್ರಾಭ್ಯಃ॑ ಪಾ॒ತೇತ್ಯಾ॑ಹ ಚ॒ತ್ವಾರಿ॑ ಚ) (ಅ. 6)

ಅನುವಾಕಂ 7 - ದಿಗ್ವ್ಯಾಸ್ಥಾಪನಂ
ದಿಶೋ॒ ವ್ಯಾಸ್ಥಾ॑ಪಯತಿ । ದಿ॒ಶಾಮ॒ಭಿಜಿ॑ತ್ಯೈ । ಯದ॑ನು ಪ್ರ॒ಕ್ರಾಮೇ᳚ತ್ । ಅ॒ಭಿ ದಿಶೋ॑ ಜಯೇತ್ । ಉತ್ತು ಮಾ᳚ದ್ಯೇತ್ । ಮನ॒ಸಾ-ಽನು॒ ಪ್ರಕ್ರಾ॑ಮತಿ । ಅ॒ಭಿ ದಿಶೋ॑ ಜಯತಿ । ನೋನ್ಮಾ᳚ದ್ಯತಿ । ಸ॒ಮಿಧ॒ಮಾ ತಿ॒ಷ್ಠೇತ್ಯಾ॑ಹ । ತೇಜ॑ ಏ॒ವಾವ॑ರುನ್ಧೇ ॥ 41 ॥

ಉ॒ಗ್ರಾಮಾ ತಿ॒ಷ್ಠೇತ್ಯಾ॑ಹ । ಇ॒ನ್ದ್ರಿ॒ಯಮೇ॒ವಾವ॑ ರುನ್ಧೇ । ವಿ॒ರಾಜ॒ಮಾ ತಿ॒ಷ್ಠೇತ್ಯಾ॑ಹ । ಅ॒ನ್ನಾದ್ಯ॑ಮೇ॒ವಾವ॑ ರುನ್ಧೇ । ಉದೀ॑ಚೀ॒ಮಾ ತಿ॒ಷ್ಠೇತ್ಯಾ॑ಹ । ಪ॒ಶೂನೇ॒ವಾವ॑ ರುನ್ಧೇ । ಊ॒ರ್ಧ್ವಾಮಾ ತಿ॒ಷ್ಠೇತ್ಯಾ॑ಹ । ಸು॒ವ॒ರ್ಗಮೇ॒ವ ಲೋ॒ಕ-ಮ॒ಭಿಜ॑ಯತಿ । ಅನೂಜ್ಜಿ॑ಹೀತೇ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ 42 ॥

ಮಾ॒ರು॒ತ ಏ॒ಷ ಭ॑ವತಿ । ಅನ್ನಂ॒-ವೈಁ ಮ॒ರುತಃ॑ । ಅನ್ನ॑ಮೇ॒ವಾವ॑ ರುನ್ಧೇ । ಏಕ॑ವಿಗ್ಂಶತಿಕಪಾಲೋ ಭವತಿ॒ ಪ್ರತಿ॑ಷ್ಠಿತ್ಯೈ । ಯೋ॑-ಽರಣ್ಯೇ ಽನುವಾ॒ಕ್ಯೋ॑ ಗ॒ಣಃ । ತ-ಮ್ಮ॑ದ್ಧ್ಯ॒ತ ಉಪ॑ದಧಾತಿ । ಗ್ರಾ॒ಮ್ಯೈರೇ॒ವ ಪ॒ಶುಭಿ॑-ರಾರ॒ಣ್ಯಾ-ನ್ಪ॒ಶೂ-ನ್ಪರಿ॑ಗೃಹ್ಣಾತಿ । ತಸ್ಮಾ᳚-ದ್ಗ್ರಾ॒ಮ್ಯೈಃ ಪ॒ಶುಭಿ॑ರಾರ॒ಣ್ಯಾಃ ಪ॒ಶವಃ॒ ಪರಿ॑ಗೃಹೀತಾಃ । ಪೃಥಿ॑ರ್ವೈ॒ನ್ಯಃ । ಅ॒ಭ್ಯ॑ಷಿಚ್ಯತ ॥ 43 ॥

ಸ ರಾ॒ಷ್ಟ್ರ-ನ್ನಾಭ॑ವತ್ । ಸ ಏ॒ತಾನಿ॑ ಪಾ॒ರ್ಥಾನ್ಯ॑ಪಶ್ಯತ್ । ತಾನ್ಯ॑ಜುಹೋತ್ । ತೈರ್ವೈ ಸ ರಾ॒ಷ್ಟ್ರ-ಮ॑ಭವತ್ । ಯತ್ಪಾ॒ರ್ಥಾನಿ॑ ಜು॒ಹೋತಿ॑ । ರಾ॒ಷ್ಟ್ರಮೇ॒ವ ಭ॑ವತಿ । ಬಾ॒ರ್॒ಹ॒ಸ್ಪ॒ತ್ಯ-ಮ್ಪೂರ್ವೇ॑ಷಾಮುತ್ತ॒ಮ-ಮ್ಭ॑ವತಿ । ಐ॒ನ್ದ್ರಮುತ್ತ॑ರೇಷಾ-ಮ್ಪ್ರಥ॒ಮಮ್ । ಬ್ರಹ್ಮ॑ ಚೈ॒ವಾಸ್ಮೈ᳚ ಖ್ಷ॒ತ್ರ-ಞ್ಚ॑ ಸ॒ಮೀಚೀ॑ ದಧಾತಿ । ಅಥೋ॒ ಬ್ರಹ್ಮ॑ನ್ನೇ॒ವ ಖ್ಷ॒ತ್ರ-ಮ್ಪ್ರತಿ॑ಷ್ಠಾಪಯತಿ ॥ 44 ॥

ಷಟ್ಪು॒ರಸ್ತಾ॑-ದಭಿಷೇ॒ಕಸ್ಯ॑ ಜುಹೋತಿ । ಷಡು॒ಪರಿ॑ಷ್ಟಾತ್ । ದ್ವಾದ॑ಶ॒ ಸ-ಮ್ಪ॑ದ್ಯನ್ತೇ । ದ್ವಾದ॑ಶ॒ ಮಾಸಾ᳚-ಸ್ಸಂ​ವಁಥ್ಸ॒ರಃ । ಸಂ॒​ವಁ॒ಥ್ಸ॒ರಃ ಖಲು॒ ವೈ ದೇ॒ವಾನಾ॒-ಮ್ಪೂಃ । ದೇ॒ವಾನಾ॑ಮೇ॒ವ ಪುರ॑-ಮ್ಮದ್ಧ್ಯ॒ತೋ ವ್ಯವ॑ಸರ್ಪತಿ । ತಸ್ಯ॒ ನ ಕುತ॑ಶ್ಚ॒ ನೋಪಾ᳚ವ್ಯಾ॒ಧೋ ಭ॑ವತಿ । ಭೂ॒ತಾನಾ॒-ಮವೇ᳚ಷ್ಟೀ-ರ್ಜುಹೋತಿ । ಅತ್ರಾ᳚ತ್ರ॒ ವೈ ಮೃ॒ತ್ಯು-ರ್ಜಾ॑ಯತೇ । ಯತ್ರ॑ ಯತ್ರೈ॒ವ ಮೃ॒ತ್ಯು-ರ್ಜಾಯ॑ತೇ । ತತ॑ ಏ॒ವೈನ॒ಮವ॑ಯಜತೇ । ತಸ್ಮಾ᳚-ದ್ರಾಜ॒ಸೂಯೇ॑ನೇಜಾ॒ನ-ಸ್ಸರ್ವ॒ಮಾಯು॑ರೇತಿ । ಸರ್ವೇ॒ ಹ್ಯ॑ಸ್ಯ ಮೃ॒ತ್ಯವೋ-ಽವೇ᳚ಷ್ಟಾಃ । ತಸ್ಮಾ᳚-ದ್ರಾಜ॒ಸೂಯೇ॑ನೇಜಾ॒ನೋ ನಾಭಿಚ॑ರಿತ॒ವೈ । ಪ್ರ॒ತ್ಯಗೇ॑ನ-ಮಭಿಚಾ॒ರ-ಸ್ಸ್ತೃ॑ಣುತೇ ॥ 45 ॥
(ರು॒ನ್ಧೇ॒-ಸಮ॑ಷ್ಟ್ಯಾ-ಅಸಿಚ್ಯತ-ಸ್ಥಾಪಯತಿ॒-ಜಾಯ॑ತೇ॒ ಪಞ್ಚ॑ ಚ) (ಅ. 7)

ಅನುವಾಕಂ 8 - ಅಭಿಷೇಕಃ
ಸೋಮ॑ಸ್ಯ॒ ತ್ವಿಷಿ॑ರಸಿ॒ ತವೇ॑ವ ಮೇ॒ ತ್ವಿಷಿ॑ರ್ಭೂಯಾ॒ದಿತಿ॑ ಶಾರ್ದೂಲಚ॒ರ್ಮೋಪ॑ಸ್ತೃಣಾತಿ । ಯೈವ ಸೋಮೇ॒ ತ್ವಿಷಿಃ॑ । ಯಾ ಶಾ᳚ರ್ದೂ॒ಲೇ । ತಾಮೇ॒ವಾವ॑ ರುನ್ಧೇ । ಮೃ॒ತ್ಯೋರ್ವಾ ಏ॒ಷ ವರ್ಣಃ॑ । ಯಚ್ಛಾ᳚ರ್ದೂ॒ಲಃ । ಅ॒ಮೃತ॒ಗ್ಂ॒ ಹಿರ॑ಣ್ಯಮ್ । ಅ॒ಮೃತ॑ಮಸಿ ಮೃ॒ತ್ಯೋರ್ಮಾ॑ ಪಾ॒ಹೀತಿ॒ ಹಿರ॑ಣ್ಯ॒-ಮುಪಾ᳚ಸ್ಯತಿ । ಅ॒ಮೃತ॑ಮೇ॒ವ ಮೃ॒ತ್ಯೋರ॒ನ್ತ-ರ್ಧ॑ತ್ತೇ । ಶ॒ತಮಾ॑ನ-ಮ್ಭವತಿ ॥ 46 ॥

ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯಃ । ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ ತಿಷ್ಠತಿ । ದಿ॒ದ್ಯೋನ್ಮಾ॑ ಪಾ॒ಹೀತ್ಯು॒ಪರಿ॑ಷ್ಟಾ॒ದಧಿ॒ ನಿದ॑ಧಾತಿ । ಉ॒ಭ॒ಯತ॑ ಏ॒ವಾಸ್ಮೈ॒ ಶರ್ಮ॑ ದಧಾತಿ । ಅವೇ᳚ಷ್ಟಾ ದನ್ದ॒ಶೂಕಾ॒ ಇತಿ॑ ಕ್ಲೀ॒ಬಗ್ಂ ಸೀಸೇ॑ನ ವಿದ್ಧ್ಯತಿ । ದ॒ನ್ದ॒ಶೂಕಾ॑-ನೇ॒ವಾವ॑ ಯಜತೇ । ತಸ್ಮಾ᳚-ತ್ಕ್ಲೀ॒ಬ-ನ್ದ॑ನ್ದ॒ಶೂಕಾ॒ ದಗ್ಂಶು॑ಕಾಃ । ನಿರ॑ಸ್ತ॒-ನ್ನಮು॑ಚೇ॒-ಶ್ಶಿರ॒ ಇತಿ॑ ಲೋಹಿತಾಯ॒ಸ-ನ್ನಿರ॑ಸ್ಯತಿ । ಪಾ॒ಪ್ಮಾನ॑ಮೇ॒ವ ನಮು॑ಚಿ-ನ್ನಿ॒ರವ॑ದಯತೇ । ಪ್ರಾ॒ಣಾ ಆ॒ತ್ಮನಃ॒ ಪೂರ್ವೇ॑-ಽಭಿ॒ಷಿಚ್ಯಾ॒ ಇತ್ಯಾ॑ಹುಃ ॥ 47 ॥

ಸೋಮೋ॒ ರಾಜಾ॒ ವರು॑ಣಃ । ದೇ॒ವಾ ಧ॑ರ್ಮ॒ಸುವ॑ಶ್ಚ॒ ಯೇ । ತೇ ತೇ॒ ವಾಚಗ್ಂ॑ ಸುವನ್ತಾ॒-ನ್ತೇ ತೇ᳚ ಪ್ರಾ॒ಣಗ್ಂ ಸು॑ವನ್ತಾ॒ಮಿತ್ಯಾ॑ಹ । ಪ್ರಾ॒ಣಾನೇ॒ವಾತ್ಮನಃ॒ ಪೂರ್ವಾ॑-ನ॒ಭಿಷಿ॑ಞ್ಚತಿ । ಯ-ದ್ಬ್ರೂ॒ಯಾತ್ । ಅ॒ಗ್ನೇಸ್ತ್ವಾ॒ ತೇಜ॑ಸಾ॒ ಽಭಿಷಿ॑ಞ್ಚಾ॒ಮೀತಿ॑ । ತೇ॒ಜ॒ಸ್ವ್ಯೇ॑ವ ಸ್ಯಾ᳚ತ್ । ದು॒ಶ್ಚರ್ಮಾ॒ ತು ಭ॑ವೇತ್ । ಸೋಮ॑ಸ್ಯ ತ್ವಾ ದ್ಯು॒ಮ್ನೇನಾ॒-ಭಿಷಿ॑ಞ್ಚಾ॒ಮೀತ್ಯಾ॑ಹ । ಸೌ॒ಮ್ಯೋ ವೈ ದೇ॒ವತ॑ಯಾ॒ ಪುರು॑ಷಃ ॥ 48 ॥

ಸ್ವಯೈ॒ವೈನ॑-ನ್ದೇ॒ವತ॑ಯಾ॒-ಽಭಿಷಿ॑ಞ್ಚತಿ । ಅ॒ಗ್ನೇ-ಸ್ತೇಜ॒ಸೇತ್ಯಾ॑ಹ । ತೇಜ॑ ಏ॒ವಾಸ್ಮಿ॑-ನ್ದಧಾತಿ । ಸೂರ್ಯ॑ಸ್ಯ॒ ವರ್ಚ॒ಸೇತ್ಯಾ॑ಹ । ವರ್ಚ॑ ಏ॒ವಾಸ್ಮಿ॑-ನ್ದಧಾತಿ । ಇನ್ದ್ರ॑ಸ್ಯೇ-ನ್ದ್ರಿ॒ಯೇಣೇತ್ಯಾ॑ಹ । ಇ॒ನ್ದ್ರಿ॒ಯಮೇ॒ವಾಸ್ಮಿ॑-ನ್ದಧಾತಿ । ಮಿ॒ತ್ರಾವರು॑ಣಯೋ-ರ್ವೀ॒ರ್ಯೇ॑ಣೇತ್ಯಾ॑ಹ । ವೀ॒ರ್ಯ॑ಮೇ॒ವಾಸ್ಮಿ॑-ನ್ದಧಾತಿ । ಮ॒ರುತಾ॒ಮೋಜ॒ಸೇತ್ಯಾ॑ಹ ॥ 49 ॥

ಓಜ॑ ಏ॒ವಾಸ್ಮಿ॑-ನ್ದಧಾತಿ । ಖ್ಷ॒ತ್ರಾಣಾ᳚-ಙ್ಖ್ಷ॒ತ್ರಪ॑ತಿರ॒ಸೀತ್ಯಾ॑ಹ । ಖ್ಷ॒ತ್ರಾಣಾ॑ಮೇ॒ವೈನ॑-ಙ್ಖ್ಷ॒ತ್ರಪ॑ತಿ-ಙ್ಕರೋತಿ । ಅತಿ॑ ದಿ॒ವಸ್ಪಾ॒ಹೀತ್ಯಾ॑ಹ । ಅತ್ಯ॒ನ್ಯಾ-ನ್ಪಾ॒ಹೀತಿ॒ ವಾವೈತದಾ॑ಹ । ಸ॒ಮಾವ॑ವೃತ್ರನ್ನ-ಧ॒ರಾಗುದೀ॑ಚೀ॒-ರಿತ್ಯಾ॑ಹ । ರಾ॒ಷ್ಟ್ರಮೇ॒ವಾಸ್ಮಿ॑-ನ್ಧ್ರು॒ವಮ॑ಕಃ । ಉ॒ಚ್ಛೇಷ॑ಣೇನ ಜುಹೋತಿ । ಉ॒ಚ್ಛೇಷ॑ಣಭಾಗೋ॒ ವೈ ರು॒ದ್ರಃ । ಭಾ॒ಗ॒ಧೇಯೇ॑ನೈ॒ವ ರು॒ದ್ರ-ನ್ನಿ॒ರವ॑ದಯತೇ ॥ 50 ॥

ಉದ॑ಮ್ಪ॒ರೇತ್ಯಾಗ್ನೀ᳚ದ್ಧ್ರೇ ಜುಹೋತಿ । ಏ॒ಷಾ ವೈ ರು॒ದ್ರಸ್ಯ॒ ದಿಕ್ । ಸ್ವಾಯಾ॑ಮೇ॒ವ ದಿ॒ಶಿ ರು॒ದ್ರ-ನ್ನಿ॒ರವ॑ದಯತೇ । ರುದ್ರ॒ ಯತ್ತೇ॒ ಕ್ರಯೀ॒ ಪರ॒-ನ್ನಾಮೇತ್ಯಾ॑ಹ । ಯದ್ವಾ ಅ॑ಸ್ಯ॒ ಕ್ರಯೀ॒ ಪರ॒-ನ್ನಾಮ॑ । ತೇನ॒ ವಾ ಏ॒ಷ ಹಿ॑ನಸ್ತಿ । ಯಗ್ಂ ಹಿ॒ನಸ್ತಿ॑ । ತೇನೈ॒ವೈನಗ್ಂ॑ ಸ॒ಹ ಶ॑ಮಯತಿ । ತಸ್ಮೈ॑ ಹು॒ತಮ॑ಸಿ ಯ॒ಮೇಷ್ಟ॑ಮ॒ಸೀತ್ಯಾ॑ಹ । ಯ॒ಮಾದೇ॒ವಾಸ್ಯ॑ ಮೃ॒ತ್ಯುಮವ॑ಯಜತೇ ॥ 51 ॥

ಪ್ರಜಾ॑ಪತೇ॒ ನ ತ್ವದೇ॒ತಾನ್ಯ॒ನ್ಯ ಇತಿ॒ ತಸ್ಯೈ॑ ಗೃ॒ಹೇ ಜು॑ಹುಯಾತ್ । ಯಾ-ಙ್ಕಾ॒ಮಯೇ॑ತ ರಾ॒ಷ್ಟ್ರಮ॑ಸ್ಯೈ ಪ್ರ॒ಜಾ ಸ್ಯಾ॒ದಿತಿ॑ । ರಾ॒ಷ್ಟ್ರಮೇ॒ವಾಸ್ಯೈ᳚ ಪ್ರ॒ಜಾ ಭ॑ವತಿ । ಪ॒ರ್ಣ॒-ಮಯೇ॑ನಾ-ದ್ಧ್ವ॒ರ್ಯು-ರ॒ಭಿಷಿ॑ಞ್ಚತಿ । ಬ್ರ॒ಹ್ಮ॒ವ॒ರ್ಚ॒ಸಮೇ॒ವಾಸ್ಮಿ॒ನ್-ತ್ವಿಷಿ॑-ನ್ದಧಾತಿ । ಔದು॑ಮ್ಬರೇಣ ರಾಜ॒ನ್ಯಃ॑ । ಊರ್ಜ॑ಮೇ॒ವಾಸ್ಮಿ॑-ನ್ನ॒ನ್ನಾದ್ಯ॑-ನ್ದಧಾತಿ । ಆಶ್ವ॑ತ್ಥೇನ॒ ವೈಶ್ಯಃ॑ । ವಿಶ॑ಮೇ॒ವಾಸ್ಮಿ॒-ನ್ಪುಷ್ಟಿ॑-ನ್ದಧಾತಿ । ನೈಯ॑ಗ್ರೋಧೇನ॒ ಜನ್ಯಃ॑( ) । ಮಿ॒ತ್ರಾಣ್ಯೇ॒ವಾಸ್ಮೈ॑ ಕಲ್ಪಯತಿ । ಅಥೋ॒ ಪ್ರತಿ॑ಷ್ಠಿತ್ಯೈ ॥ 52 ॥
(ಭ॒ವ॒ - ತ್ಯಾ॒ಹುಃ॒ - ಪುರು॑ಷ॒ - ಓಜ॒ಸೇತ್ಯಾ॑ಹ - ನಿ॒ರವ॑ದಯತೇ - ಯಜತೇ॒ - ಜನ್ಯೋ॒ ದ್ವೇ ಚ॑) (ಅ. 8)

ಅನುವಾಕಂ 9 - ಸ್ಥಾರೋಹಣಮ್. ವಿಜಯಃ
ಇನ್ದ್ರ॑ಸ್ಯ॒ ವಜ್ರೋ॑-ಽಸಿ॒ ವಾರ್ತ್ರ॑ಘ್ನ॒ ಇತಿ॒ ರಥ॑ಮು॒ಪಾವ॑ಹರತಿ॒ ವಿಜಿ॑ತ್ಯೈ । ಮಿ॒ತ್ರಾವರು॑ಣಯೋಸ್ತ್ವಾ ಪ್ರಶಾ॒ಸ್ತ್ರೋಃ ಪ್ರ॒ಶಿಷಾ॑ ಯುನ॒ಜ್ಮೀತ್ಯಾ॑ಹ । ಬ್ರಹ್ಮ॑ಣೈ॒ವೈನ॑-ನ್ದೇ॒ವತಾ᳚ಭ್ಯಾಂ-ಯುಁನಕ್ತಿ । ಪ್ರ॒ಷ್ಟಿ॒ವಾ॒ಹಿನಂ॑-ಯುಁನಕ್ತಿ । ಪ್ರ॒ಷ್ಟಿ॒ವಾ॒ಹೀ ವೈ ದೇ॑ವರ॒ಥಃ । ದೇ॒ವ॒ರ॒ಥ-ಮೇ॒ವಾಸ್ಮೈ॑ ಯುನಕ್ತಿ । ತ್ರಯೋ-ಽಶ್ವಾ॑ ಭವನ್ತಿ । ರಥ॑ಶ್ಚತು॒ರ್ಥಃ । ದ್ವೌ ಸ॑ವ್ಯೇಷ್ಠಸಾರ॒ಥೀ । ಷಟ್-ಥ್ಸಮ್ಪ॑ದ್ಯನ್ತೇ ॥ 53 ॥

ಷಡ್ವಾ ಋ॒ತವಃ॑ । ಋ॒ತುಭಿ॑ರೇ॒ವೈನಂ॑-ಯುಁನಕ್ತಿ । ವಿ॒ಷ್ಣು॒ಕ್ರ॒ಮಾನ್-ಕ್ರ॑ಮತೇ । ವಿಷ್ಣು॑ರೇ॒ವ ಭೂ॒ತ್ವೇಮಾನ್ ಁಲೋ॒ಕಾನ॒ಭಿಜ॑ಯತಿ । ಯಃ, ಖ್ಷ॒ತ್ರಿಯಃ॒ ಪ್ರತಿ॑ಹಿತಃ । ಸೋ᳚-ಽನ್ವಾರ॑ಭತೇ । ರಾ॒ಷ್ಟ್ರಮೇ॒ವ ಭ॑ವತಿ । ತ್ರಿ॒ಷ್ಟುಭಾ॒ ಽನ್ವಾರ॑ಭತೇ । ಇ॒ನ್ದ್ರಿ॒ಯಂ-ವೈಁ ತ್ರಿ॒ಷ್ಟುಕ್ । ಇ॒ನ್ದ್ರಿ॒ಯಮೇ॒ವ ಯಜ॑ಮಾನೇ ದಧಾತಿ ॥ 54 ॥

ಮ॒ರುತಾ᳚-ಮ್ಪ್ರಸ॒ವೇ ಜೇ॑ಷ॒ಮಿತ್ಯಾ॑ಹ । ಮ॒ರುದ್ಭಿ॑ರೇ॒ವ ಪ್ರಸೂ॑ತ॒ ಉಜ್ಜ॑ಯತಿ । ಆ॒ಪ್ತ-ಮ್ಮನ॒ ಇತ್ಯಾ॑ಹ । ಯದೇ॒ವ ಮನ॒ಸೈಫ್ಸೀ᳚ತ್ । ತದಾ॑ಪತ್ । ರಾ॒ಜ॒ನ್ಯ॑-ಞ್ಜಿನಾತಿ । ಅನಾ᳚ಕ್ರಾನ್ತ ಏ॒ವಾಕ್ರ॑ಮತೇ । ವಿ ವಾ ಏ॒ಷ ಇ॑ನ್ದ್ರಿ॒ಯೇಣ॑ ವೀ॒ರ್ಯೇ॑ಣರ್ಧ್ಯತೇ । ಯೋ ರಾ॑ಜ॒ನ್ಯ॑-ಞ್ಜಿ॒ನಾತಿ॑ । ಸಮ॒ಹಮಿ॑ನ್ದ್ರಿ॒ಯೇಣ॑ ವೀ॒ರ್ಯೇ॑ಣೇತ್ಯಾ॑ಹ ॥ 55 ॥

ಇ॒ನ್ದ್ರಿ॒ಯಮೇ॒ವ ವೀ॒ರ್ಯ॑ಮಾ॒ತ್ಮನ್-ಧ॑ತ್ತೇ । ಪ॒ಶೂ॒ನಾ-ಮ್ಮ॒ನ್ಯುರ॑ಸಿ॒ ತವೇ॑ವ ಮೇ ಮ॒ನ್ಯುರ್ಭೂ॑ಯಾ॒ದಿತಿ॒ ವಾರಾ॑ಹೀ ಉಪಾ॒ನಹಾ॒ವುಪ॑ ಮುಞ್ಚತೇ । ಪ॒ಶೂ॒ನಾಂ-ವಾಁ ಏ॒ಷ ಮ॒ನ್ಯುಃ । ಯ-ದ್ವ॑ರಾ॒ಹಃ । ತೇನೈ॒ವ ಪ॑ಶೂ॒ನಾ-ಮ್ಮ॒ನ್ಯುಮಾ॒ತ್ಮ-ನ್ಧ॑ತ್ತೇ । ಅ॒ಭಿ ವಾ ಇ॒ಯಗ್ಂ ಸು॑ಷುವಾ॒ಣ-ಙ್ಕಾ॑ಮಯತೇ । ತಸ್ಯೇ᳚ಶ್ವ॒ರೇನ್ದ್ರಿ॒ಯಂ-ವೀಁ॒ರ್ಯ॑ಮಾದಾ॑ತೋಃ । ವಾರಾ॑ಹೀ ಉಪಾ॒ನಹಾ॒ವುಪ॑ಮುಞ್ಚತೇ । ಅ॒ಸ್ಯಾ ಏ॒ವಾನ್ತರ್ಧ॑ತ್ತೇ । ಇ॒ನ್ದ್ರಿ॒ಯಸ್ಯ॑ ವೀ॒ರ್ಯ॑ಸ್ಯಾನಾ᳚ತ್ತ್ಯೈ ॥ 56 ॥

ನಮೋ॑ ಮಾ॒ತ್ರೇ ಪೃ॑ಥಿ॒ವ್ಯಾ ಇತ್ಯಾ॒ಹಾಹಿಗ್ಂ॑ ಸಾಯೈ । ಇಯ॑ದ॒ಸ್ಯಾ-ಯು॑ರ॒ಸ್ಯಾಯು॑ರ್ಮೇ ಧೇ॒ಹೀತ್ಯಾ॑ಹ । ಆಯುರೇ॒ವಾತ್ಮನ್-ಧ॑ತ್ತೇ । ಊರ್ಗ॒ಸ್ಯೂರ್ಜ॑-ಮ್ಮೇ ಧೇ॒ಹೀತ್ಯಾ॑ಹ । ಊರ್ಜ॑ಮ॒ವಾತ್ಮ-ನ್ಧ॑ತ್ತೇ । ಯುಙ್ಙ॑ಸಿ॒ ವರ್ಚೋ॑-ಽಸಿ॒ ವರ್ಚೋ॒ ಮಯಿ॑ ಧೇ॒ಹೀತ್ಯಾ॑ಹ । ವರ್ಚ॑ ಏ॒ವಾತ್ಮ-ನ್ಧ॑ತ್ತೇ । ಏ॒ಕ॒ಧಾ ಬ್ರ॒ಹ್ಮಣ॒ ಉಪ॑ ಹರತಿ । ಏ॒ಕ॒ಧೈವ ಯಜ॑ಮಾನ॒ ಆಯು॒ರೂರ್ಜಂ॒-ವಁರ್ಚೋ॑ ದಧಾತಿ । ರ॒ಥ॒ವಿ॒ಮೋ॒ಚ॒ನೀಯಾ॑ ಜುಹೋತಿ॒ ಪ್ರತಿ॑ಷ್ಠಿತ್ಯೈ ॥ 57 ॥

ತ್ರಯೋ-ಽಶ್ವಾ॑ ಭವನ್ತಿ । ರಥ॑ಶ್ಚತು॒ರ್ಥಃ । ತಸ್ಮಾ᳚-ಚ್ಚ॒ತುರ್ಜು॑ಹೋತಿ । ಯದು॒ಭೌ ಸ॒ಹಾವ॒ತಿಷ್ಠೇ॑ತಾಮ್ । ಸ॒ಮಾ॒ನಂ-ಲೋಁ॒ಕಮಿ॑ಯಾತಾಮ್ । ಸ॒ಹ ಸ॑ಗ್ರಂಹೀ॒ತ್ರಾ ರ॑ಥ॒ವಾಹ॑ನೇ॒ ರಥ॒ಮಾದ॑ಧಾತಿ । ಸು॒ವ॒ರ್ಗಾದೇ॒ವೈನಂ॑-ಲೋಁ॒ಕಾದ॒ನ್ತರ್ದ॑ಧಾತಿ । ಹ॒ಗ್ಂ॒ಸ-ಶ್ಶು॑ಚಿ॒ಷದಿತ್ಯಾ ದ॑ಧಾತಿ । ಬ್ರಹ್ಮ॑ಣೈ॒ವೈನ॑-ಮುಪಾವ॒ಹರ॑ತಿ । ಬ್ರಹ್ಮ॒ಣಾ ಽಽದ॑ಧಾತಿ । ಅತಿ॑ಚ್ಛನ್ದ॒ಸಾ ಽಽದ॑ಧಾತಿ । ಅತಿ॑ಚ್ಛನ್ದಾ॒ ವೈ ಸರ್ವಾ॑ಣಿ॒ ಛನ್ದಾಗ್ಂ॑ಸಿ । ಸರ್ವೇ॑ಭಿರೇ॒ವೈನ॒-ಞ್ಛನ್ದೋ॑ಭಿ॒-ರಾದ॑ಧಾತಿ । ವರ್​ಷ್ಮ॒ ವಾ ಏ॒ಷಾ ಛನ್ದ॑ಸಾಮ್ । ಯದತಿ॑ಚ್ಛನ್ದಾಃ । ಯದತಿ॑ಚ್ಛನ್ದಸಾ॒ ದಧಾ॑ತಿ । ವರ್​ಷ್ಮೈ॒ವೈನಗ್ಂ॑ ಸಮಾ॒ನಾನಾ᳚-ಙ್ಕರೋತಿ ॥ 58 ॥
(ಪ॒ದ್ಯ॒ನ್ತೇ॒ - ದ॒ಧಾ॒ತಿ॒ - ವೀ॒ರ್ಯೇ॑ಣೇತ್ಯಾ॒ಹಾ - ನಾ᳚ತ್ಯೈ॒ - ಪ್ರತಿ॑ಷ್ಠಿತ್ಯೈ॒ - ಬ್ರಹ್ಮ॒ಣಾ-ಽಽದ॑ಧಾತಿ ಸ॒ಪ್ತ ಚ॑) (ಅ. 9)

ಅನುವಾಕಂ 10 - ಆಸನೇ ಸಮುಪವೇಶ-ಸ್ಸರ್ವೈಸ್ಸೇವ್ಯತ್ವ-ಞ್ಚ
ಮಿ॒ತ್ರೋ॑-ಽಸಿ॒ ವರು॑ಣೋ॒-ಽಸೀತ್ಯಾ॑ಹ । ಮೈ॒ತ್ರಂ-ವಾಁ ಅಹಃ॑ । ವಾ॒ರು॒ಣೀ ರಾತ್ರಿಃ॑ । ಅ॒ಹೋ॒ರಾ॒ತ್ರಾಭ್ಯಾ॑-ಮೇ॒ವೈನ॑-ಮು॒ಪಾವ॑ಹರತಿ । ಮಿ॒ತ್ರೋ॑-ಽಸಿ॒ ವರು॑ಣೋ॒ಸೀತ್ಯಾ॑ಹ । ಮೈ॒ತ್ರೋ ವೈ ದಖ್ಷಿ॑ಣಃ । ವಾ॒ರು॒ಣ-ಸ್ಸ॒ವ್ಯಃ । ವೈ॒ಶ್ವ॒ದೇ॒ವ್ಯಾ॑ಮಿಖ್ಷಾ᳚ । ಸ್ವಮೇ॒ವೈನೌ॑ ಭಾಗ॒ಧೇಯ॑-ಮು॒ಪಾವ॑ಹರತಿ । ಸಮ॒ಹಂ-ವಿಁಶ್ವೈ᳚ರ್ದೇ॒ವೈ-ರಿತ್ಯಾ॑ಹ ॥ 59 ॥

ವೈ॒ಶ್ವ॒ದೇ॒ವ್ಯೋ॑ ವೈ ಪ್ರ॒ಜಾಃ । ತಾ ಏ॒ವಾದ್ಯಾಃ᳚ ಕುರುತೇ । ಖ್ಷ॒ತ್ರಸ್ಯ॒ ನಾಭಿ॑ರಸಿ ಖ್ಷ॒ತ್ರಸ್ಯ॒ ಯೋನಿ॑-ರ॒ಸೀತ್ಯ॑ಧೀವಾ॒ಸಮಾ-ಸ್ತೃ॑ಣಾತಿ ಸಯೋನಿ॒ತ್ವಾಯ॑ । ಸ್ಯೋ॒ನಾಮಾಸೀ॑ದ ಸು॒ಷದಾ॒ಮಾಸೀ॒ದೇತ್ಯಾ॑ಹ । ಯ॒ಥಾ॒ ಯ॒ಜುರೇ॒ವೈ ತತ್ । ಮಾ ತ್ವಾ॑ ಹಿಗ್ಂಸೀ॒-ನ್ಮಾ ಮಾ॑ ಹಿಗ್ಂಸೀ॒ದಿತ್ಯಾ॒ಹಾ-ಹಿಗ್ಂ॑ಸಾಯೈ । ನಿಷ॑ಸಾದ ಧೃ॒ತವ್ರ॑ತೋ॒ ವರು॑ಣಃ ಪ॒ಸ್ತ್ಯಾ᳚ಸ್ವಾ ಸಾಮ್ರಾ᳚ಜ್ಯಾಯ ಸು॒ಕ್ರತು॒ರಿತ್ಯಾ॑ಹ । ಸಾಮ್ರಾ᳚ಜ್ಯಮೇ॒ವೈನಗ್ಂ॑ ಸು॒ಕ್ರತು॑-ಙ್ಕರೋತಿ । ಬ್ರಹ್ಮಾ(3)ನ್ತ್ವಗ್ಂ ರಾ॑ಜನ್-ಬ್ರ॒ಹ್ಮಾ-ಽಸಿ॑ ಸವಿ॒ತಾ-ಽಸಿ॑ ಸ॒ತ್ಯಸ॑ವ॒ ಇತ್ಯಾ॑ಹ । ಸ॒ವಿ॒ತಾರ॑-ಮೇ॒ವೈನಗ್ಂ॑ ಸ॒ತ್ಯಸ॑ವ-ಙ್ಕರೋತಿ ॥ 60 ॥

ಬ್ರಹ್ಮಾ(3)ನ್ತ್ವಗ್ಂ ರಾ॑ಜನ್-ಬ್ರ॒ಹ್ಮಾ-ಽಸೀನ್ದ್ರೋ॑-ಽಸಿ ಸ॒ತ್ಯೌಜಾ॒ ಇತ್ಯಾ॑ಹ । ಇನ್ದ್ರ॑ಮೇ॒ವೈನಗ್ಂ॑ ಸ॒ತ್ಯೌಜ॑ಸ-ಙ್ಕರೋತಿ । ಬ್ರಹ್ಮಾ(3)ನ್ತ್ವಗ್ಂ ರಾ॑ಜನ್-ಬ್ರ॒ಹ್ಮಾ-ಽಸಿ॑ ಮಿ॒ತ್ರೋ॑-ಽಸಿ ಸು॒ಶೇವ॒ ಇತ್ಯಾ॑ಹ । ಮಿ॒ತ್ರಮೇ॒ವೈನಗ್ಂ॑ ಸು॒ಶೇವ॑-ಙ್ಕರೋತಿ । ಬ್ರಹ್ಮಾ(3)ನ್ತ್ವಗ್ಂ ರಾ॑ಜನ್-ಬ್ರ॒ಹ್ಮಾ-ಽಸಿ॒ ವರು॑ಣೋ-ಽಸಿ ಸ॒ತ್ಯಧ॒ರ್ಮೇತ್ಯಾ॑ಹ । ವರು॑ಣಮೇ॒ವೈನಗ್ಂ॑ ಸ॒ತ್ಯಧ॑ರ್ಮಾಣ-ಙ್ಕರೋತಿ । ಸ॒ವಿ॒ತಾ-ಽಸಿ॑ ಸ॒ತ್ಯಸ॑ವ॒ ಇತ್ಯಾ॑ಹ । ಗಾ॒ಯ॒ತ್ರೀ-ಮೇ॒ವೈತೇನಾ॑ಭಿ॒ವ್ಯಾಹ॑ರತಿ । ಇನ್ದ್ರೋ॑-ಽಸಿ ಸ॒ತ್ಯೌಜಾ॒ ಇತ್ಯಾ॑ಹ । ತ್ರಿ॒ಷ್ಟುಭ॑-ಮೇ॒ವೈತೇನಾ॑ಭಿ॒-ವ್ಯಾಹ॑ರತಿ ॥ 61 ॥

ಮಿ॒ತ್ರೋ॑-ಽಸಿ ಸು॒ಶೇವ॒ ಇತ್ಯಾ॑ಹ । ಜಗ॑ತೀ-ಮೇ॒ವೈತೇನಾ॑ಭಿ॒ವ್ಯಾಹ॑ರತಿ । ಸ॒ತ್ಯಮೇ॒ತಾ ದೇ॒ವತಾಃ᳚ । ಸ॒ತ್ಯಮೇ॒ತಾನಿ॒ ಛನ್ದಾಗ್ಂ॑ಸಿ । ಸ॒ತ್ಯಮೇ॒ವಾವ॑ ರುನ್ಧೇ । ವರು॑ಣೋ-ಽಸಿ ಸ॒ತ್ಯಧ॒ರ್ಮೇತ್ಯಾ॑ಹ । ಅ॒ನು॒ಷ್ಟುಭ॑-ಮೇ॒ವೈತೇನಾ॑ಭಿ॒ವ್ಯಾಹ॑ರತಿ । ಸ॒ತ್ಯಾ॒ನೃ॒ತೇ ವಾ ಅ॑ನು॒ಷ್ಟುಪ್ । ಸ॒ತ್ಯಾ॒ನೃ॒ತೇ ವರು॑ಣಃ । ಸ॒ತ್ಯಾ॒ನೃ॒ತೇ ಏ॒ವಾವ॑ರುನ್ಧೇ ॥ 62 ॥

ನೈನಗ್ಂ॑ ಸತ್ಯಾನೃ॒ತೇ ಉ॑ದಿ॒ತೇ ಹಿಗ್ಗ್॑ಸ್ತಃ । ಯ ಏ॒ವಂ-ವೇಁದ॑ । ಇನ್ದ್ರ॑ಸ್ಯ॒ ವಜ್ರೋ॑-ಽಸಿ॒ ವಾರ್ತ್ರ॑ಘ್ನ॒ ಇತಿ॒ ಸ್ಫ್ಯ-ಮ್ಪ್ರಯ॑ಚ್ಛತಿ । ವಜ್ರೋ॒ ವೈ ಸ್ಫ್ಯಃ । ವಜ್ರೇ॑ಣೈ॒ವಾಸ್ಮಾ॑ ಅವರಪ॒ರಗ್ಂ ರ॑ನ್ಧಯತಿ । ಏ॒ವಗ್ಂ ಹಿ ತಚ್ಛ್ರೇಯಃ॑ । ಯದ॑ಸ್ಮಾ ಏ॒ತೇ ರದ್ಧ್ಯೇ॑ಯುಃ । ದಿಶೋ॒-ಽಭ್ಯ॑ಯಗ್ಂ ರಾಜಾ॑ ಽಭೂ॒ದಿತಿ॒ ಪಞ್ಚಾ॒ಖ್ಷಾನ್-ಪ್ರಯ॑ಚ್ಛತಿ । ಏ॒ತೇ ವೈ ಸರ್ವೇ-ಽಯಾಃ᳚ । ಅಪ॑ರಾಜಾಯಿನ-ಮೇ॒ವೈನ॑-ಙ್ಕರೋತಿ ॥ 63 ॥

ಓ॒ದ॒ನಮುದ್ಬ್ರು॑ವತೇ । ಪ॒ರ॒ಮೇ॒ಷ್ಠೀ ವಾ ಏ॒ಷಃ । ಯದೋ॑ದ॒ನಃ । ಪ॒ರ॒ಮಾಮೇ॒ವೈನ॒ಗ್ಗ್॒ ಶ್ರಿಯ॑-ಙ್ಗಮಯತಿ । ಸುಶ್ಲೋ॒ಕಾಁ(4) ಸುಮ॑ಙ್ಗ॒ಲಾಁ(4) ಸತ್ಯ॑ರಾ॒ಜಾ(3)ನಿತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾ ಶಾ᳚ಸ್ತೇ । ಶೌ॒ನ॒-ಶ್ಶೇ॒ಪಮಾಖ್ಯಾ॑ಪಯತೇ । ವ॒ರು॒ಣ॒ಪಾ॒ಶಾ-ದೇ॒ವೈನ॑-ಮ್ಮುಞ್ಚತಿ । ಪ॒ರ॒-ಶ್ಶ॒ತ-ಮ್ಭ॑ವತಿ । ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯಃ( ) । ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ತಿಷ್ಠತಿ । ಮಾ॒ರು॒ತಸ್ಯ॒ ಚೈಕ॑ವಿಗ್ಂಶತಿಕಪಾಲಸ್ಯ ವೈಶ್ವದೇ॒ವ್ಯೈ ಚಾ॒ಮಿಖ್ಷಾ॑ಯಾ ಅ॒ಗ್ನಯೇ᳚ ಸ್ವಿಷ್ಟ॒ಕೃತೇ॑ ಸ॒ಮವ॑ದ್ಯತಿ । ದೇ॒ವತಾ॑ಭಿರೇ॒ವೈನ॑-ಮುಭ॒ಯತಃ॒ ಪರಿ॑ಗೃಹ್ಣಾತಿ । ಅ॒ಪಾ-ನ್ನಪ್ತ್ರೇ॒ ಸ್ವಾಹೋ॒ರ್ಜೋ ನಪ್ತ್ರೇ॒ ಸ್ವಾಹಾ॒-ಽಗ್ನಯೇ॑ ಗೃ॒ಹಪ॑ತಯೇ॒ ಸ್ವಾಹೇತಿ॑ ತಿ॒ಸ್ರ ಆಹು॑ತೀ-ರ್ಜುಹೋತಿ । ತ್ರಯ॑ ಇ॒ಮೇ ಲೋ॒ಕಾಃ । ಏ॒ಷ್ವೇ॑ವ ಲೋ॒ಕೇಷು॒ ಪ್ರತಿ॑ ತಿಷ್ಠತಿ ॥ 64 ॥
(ದೇ॒ವೈರಿತ್ಯಾ॑ಹ - ಸ॒ತ್ಯಸ॑ವ-ಙ್ಕರೋತಿ - ತ್ರಿ॒ಷ್ಟುಭ॑ಮೇ॒ವೈತೇನಾ॑ಭಿ॒ ವ್ಯಾಹ॑ರತಿ- ಸತ್ಯಾನೃ॒ತೇ ಏ॒ವಾವ॑ರುನ್ಧೇ - ಕರೋತಿ - ಶ॒ತೇನ್ದ್ರಿ॑ಯ॒-ಷ್ಷಟ್ಚ॑) (ಅ. 10)

(ಏ॒ತ-ದ್ಬ್ರಾ᳚ಹ್ಮಣಾನಿ - ಧಾ॒ತ್ರೇ - ರಾ॒ತ್ನಿನಾಂ᳚ - ದೇವಸು॒ವಾ - ಮ॒ರ್ಥೇತೋ॒ - ದೇವೀ॒--ರ್ ದಿಶಃ॒ - ಸೋಮ॒ಸ್ಯೇ - ನ್ದ್ರ॑ಸ್ಯ - ಮಿ॒ತ್ರೋ ದಶ॑)

(ಏ॒ತ-ದ್ಬ್ರಾ᳚ಹ್ಮಣಾನಿ - ವೈಷ್ಣ॒ವ-ನ್ತ್ರಿ॑ಕಪಾ॒ಲ - ಮನ್ನಂ॒-ವೈಁ ಪೂ॒ಷಾ - ವಾಶಾ॒-ಸ್ಸ್ಥೇತ್ಯಾ॑ಹ॒ - ದಿಶೋ॒ ವ್ಯಾಸ್ಥಾ॑ಪಯ॒ - ತ್ಯುದ॑ಮ್ಪ॒ರೇತ್ಯ॒ - ಬ್ರಹ್ಮಾ(3)ನ್ತ್ವಗ್ಂ ರಾ॑ಜ॒-ಞ್ಚತು॑ಷ್ಷಷ್ಟಿಃ

(ಏ॒ತ-ದ್ಬ್ರಾ᳚ಹ್ಮಣಾನಿ॒ - ಪ್ರತಿ॑ ತಿಷ್ಠತಿ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ಸಪ್ತಮಃ ಪ್ರಪಾಠಕ-ಸ್ಸಮಾಪ್ತಃ ॥