ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಅಷ್ಟಮಃ ಪ್ರಪಾಠಕಃ - ಕಾಮ್ಯಪಶುಯಾಜ್ಯಾನುವಾಕ್ಯಾ ಬ್ರಾಹ್ಮಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ವಾಯವ್ಯಾದಿಪಶೂನಾಂ ಸೂಕ್ತಾನಿ

ಪೀವೋ᳚ನ್ನಾಗ್ಂ ರಯಿ॒ವೃಧ॑-ಸ್ಸುಮೇ॒ಧಾಃ । ಶ್ವೇ॒ತ-ಸ್ಸಿ॑ಷಕ್ತಿ ನಿ॒ಯುತಾ॑ಮಭಿ॒ಶ್ರೀಃ । ತೇ ವಾ॒ಯವೇ॒ ಸಮ॑ನಸೋ॒ ವಿತ॑ಸ್ಥುಃ । ವಿಶ್ವೇನ್ನರ॑-ಸ್ಸ್ವಪ॒ತ್ಯಾನಿ॑ ಚಕ್ರುಃ ॥ ರಾ॒ಯೇ-ಽನು ಯ-ಞ್ಜ॒ಜ್ಞತೂ॒ ರೋದ॑ಸೀ ಉ॒ಭೇ । ರಾ॒ಯೇ ದೇ॒ವೀ ಧಿ॒ಷಣಾ॑ ಧಾತಿ ದೇ॒ವಮ್ । ಅಧಾ॑ ವಾ॒ಯು-ನ್ನಿ॒ಯುತ॑-ಸ್ಸಶ್ಚತ॒ ಸ್ವಾಃ । ಉ॒ತ ಶ್ವೇ॒ತಂ-ವಁಸು॑ಧಿತಿ-ನ್ನಿರೇ॒ಕೇ ॥ ಆ ವಾ॑ಯೋ ಭೂಷ ಶುಚಿಪಾ॒ ಉಪ॑ ನ-ಸ್ಸ॒ಹಸ್ರ॑-ನ್ತೇ ನಿ॒ಯುತೋ॑ ವಿಶ್ವವಾರ । ಉಪೋ॑ ತೇ॒ ಅನ್ಧೋ॒ ಮದ್ಯ॑ಮಯಾಮಿ॒ ಯಸ್ಯ॑ ದೇವ ದಧಿ॒ಷೇ ಪೂ᳚ರ್ವ॒ಪೇಯ᳚ಮ್ ॥ ಪ್ರ ಯಾಭಿ॒ರ್ಯಾಸಿ॑ ದಾ॒ಶ್ವಾಗ್ಂ ಸಮಚ್ಛಾ॑ ನಿ॒ಯುದ್ಭಿ॑-ರ್ವಾಯವಿ॒ಷ್ಟಯೇ॑ ದುರೋ॒ಣೇ । ನಿ ನೋ॑ ರ॒ಯಿಗ್ಂ ಸು॒ಭೋಜ॑ಸಂ-ಯುಁವೇ॒ಹ ನಿ ವೀ॒ರವ॒-ದ್ಗವ್ಯ॒ಮಶ್ವಿ॑ಯ-ಞ್ಚ॒ ರಾಧಃ॑ ॥॥ ಪ್ರ ವಾ॒ಯುಮಚ್ಛಾ॑ ಬೃಹ॒ತೀ ಮ॑ನೀ॒ಷಾ ॥ 1 ॥

ಬೃ॒ಹದ್ರ॑ಯಿಂ-ವಿಁ॒ಶ್ವವಾ॑ರಾಗ್ಂ ರಥ॒ಪ್ರಾಮ್ । ದ್ಯು॒ತದ್ಯಾ॑ಮಾ ನಿ॒ಯುತಃ॒ ಪತ್ಯ॑ಮಾನಃ । ಕ॒ವಿಃ ಕ॒ವಿಮಿ॑ಯಖ್ಷಸಿ ಪ್ರಯಜ್ಯೋ ॥ ಆ ನೋ॑ ನಿ॒ಯುದ್ಭಿ॑-ಶ್ಶ॒ತಿನೀ॑ಭಿ-ರದ್ಧ್ವ॒ರಮ್ । ಸ॒ಹ॒ಸ್ರಿಣೀ॑ಭಿ॒ರುಪ॑ ಯಾಹಿ ಯ॒ಜ್ಞಮ್ । ವಾಯೋ॑ ಅ॒ಸ್ಮಿನ್. ಹ॒ವಿಷಿ॑ ಮಾದಯಸ್ವ । ಯೂ॒ಯ-ಮ್ಪಾ॑ತ ಸ್ವ॒ಸ್ತಿಭಿ॒-ಸ್ಸದಾ॑ ನಃ ॥ ಪ್ರಜಾ॑ಪತೇ॒ ನ ತ್ವದೇ॒ತಾನ್ಯ॒ನ್ಯಃ । ವಿಶ್ವಾ॑ ಜಾ॒ತಾನಿ॒ ಪರಿ॒ ತಾ ಬ॑ಭೂವ । ಯ-ತ್ಕಾ॑ಮಾಸ್ತೇ ಜುಹು॒ಮಸ್ತನ್ನೋ॑ ಅಸ್ತು ॥ 2 ॥

ವ॒ಯಗ್ಗ್​ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ ರ॒ಯೀ॒ಣಾ-ಮ್ಪತಿಂ॑-ಯಁಜ॒ತ-ಮ್ಬೃ॒ಹನ್ತ᳚ಮ್ । ಅ॒ಸ್ಮಿನ್ಭರೇ॒ ನೃತ॑ಮಂ॒-ವಾಁಜ॑ಸಾತೌ । ಪ್ರ॒ಜಾಪ॑ತಿ-ಮ್ಪ್ರಥಮ॒ಜಾಮೃ॒ತಸ್ಯ॑ । ಯಜಾ॑ಮ ದೇ॒ವಮಧಿ॑ ನೋ ಬ್ರವೀತು ॥ ಪ್ರಜಾ॑ಪತೇ॒ ತ್ವ-ನ್ನಿ॑ಧಿ॒ಪಾಃ ಪು॑ರಾ॒ಣಃ । ದೇ॒ವಾನಾ᳚-ಮ್ಪಿ॒ತಾ ಜ॑ನಿ॒ತಾ ಪ್ರ॒ಜಾನಾ᳚ಮ್ । ಪತಿ॒-ರ್ವಿಶ್ವ॑ಸ್ಯ॒ ಜಗ॑ತಃ ಪರ॒ಸ್ಪಾಃ । ಹ॒ವಿರ್ನೋ॑ ದೇವ ವಿಹ॒ವೇ ಜು॑ಷಸ್ವ ॥ ತವೇ॒ಮೇ ಲೋ॒ಕಾಃ ಪ್ರ॒ದಿಶೋ॒ ದಿಶ॑ಶ್ಚ ॥ 3 ॥

ಪ॒ರಾ॒ವತೋ॑ ನಿ॒ವತ॑ ಉ॒ದ್ವತ॑ಶ್ಚ । ಪ್ರಜಾ॑ಪತೇ ವಿಶ್ವ॒ಸೃಜ್ಜೀ॒ವಧ॑ನ್ಯ ಇ॒ದ-ನ್ನೋ॑ ದೇವ । ಪ್ರತಿ॑ಹರ್ಯ ಹ॒ವ್ಯಮ್ ॥ ಪ್ರ॒ಜಾಪ॑ತಿ-ಮ್ಪ್ರಥ॒ಮಂ-ಯಁ॒ಜ್ಞಿಯಾ॑ನಾಮ್ । ದೇ॒ವಾನಾ॒ಮಗ್ರೇ॑ ಯಜ॒ತಂ-ಯಁ॑ಜದ್ಧ್ವಮ್ । ಸ ನೋ॑ ದದಾತು॒ ದ್ರವಿ॑ಣಗ್ಂ ಸು॒ವೀರ್ಯ᳚ಮ್ । ರಾ॒ಯಸ್ಪೋಷಂ॒-ವಿಁಷ್ಯ॑ತು॒ ನಾಭಿ॑ಮ॒ಸ್ಮೇ ॥ ಯೋ ರಾ॒ಯ ಈಶೇ॑ ಶತದಾ॒ಯ ಉ॒ಕ್ಥ್ಯಃ॑ । ಯಃ ಪ॑ಶೂ॒ನಾಗ್ಂ ರ॑ಖ್ಷಿ॒ತಾ ವಿಷ್ಠಿ॑ತಾನಾಮ್ । ಪ್ರ॒ಜಾಪ॑ತಿಃ ಪ್ರಥಮ॒ಜಾ ಋ॒ತಸ್ಯ॑ ॥ 4 ॥

ಸ॒ಹಸ್ರ॑ಧಾಮಾ ಜುಷತಾಗ್ಂ ಹ॒ವಿರ್ನಃ॑ ॥ ಸೋಮಾ॑ಪೂಷಣಾ॒ ಜನ॑ನಾ ರಯೀ॒ಣಾ-ಞ್ಜನ॑ನಾ ದಿ॒ವೋ ಜನ॑ನಾ ಪೃಥಿ॒ವ್ಯಾಃ । ಜಾ॒ತೌ ವಿಶ್ವ॑ಸ್ಯ॒ ಭುವ॑ನಸ್ಯ ಗೋ॒ಪೌ ದೇ॒ವಾ ಅ॑ಕೃಣ್ವನ್ನ॒ಮೃತ॑ಸ್ಯ॒ ನಾಭಿ᳚ಮ್ ॥ ಇ॒ಮೌ ದೇ॒ವೌ ಜಾಯ॑ಮಾನೌ ಜುಷನ್ತೇ॒ಮೌ ತಮಾಗ್ಂ॑ಸಿ ಗೂಹತಾ॒ಮಜು॑ಷ್ಟಾ । ಆ॒ಭ್ಯಾಮಿನ್ದ್ರಃ॑ ಪ॒ಕ್ವಮಾ॒ಮಾಸ್ವ॒ನ್ತ-ಸ್ಸೋ॑ಮಾಪೂ॒ಷಭ್ಯಾ᳚-ಞ್ಜನದು॒ಸ್ರಿಯಾ॑ಸು ॥ ॥ ಸೋಮಾ॑ಪೂಷಣಾ॒ ರಜ॑ಸೋ ವಿ॒ಮಾನ᳚ಮ್ । ಸ॒ಪ್ತಚ॑ಕ್ರ॒ಗ್ಂ॒ ರಥ॒ಮವಿ॑ಶ್ವಮಿನ್ವಮ್ । ವಿ॒ಷೂ॒ವೃತ॒-ಮ್ಮನ॑ಸಾ ಯು॒ಜ್ಯಮಾ॑ನಮ್ । ತ-ಞ್ಜಿ॑ನ್ವಥೋ ವೃಷಣಾ॒ ಪಞ್ಚ॑ರಶ್ಮಿಮ್ ॥ ದಿ॒ವ್ಯ॑ನ್ಯ-ಸ್ಸದ॑ನ-ಞ್ಚ॒ಕ್ರ ಉ॒ಚ್ಚಾ । ಪೃ॒ಥಿ॒ವ್ಯಾಮ॒ನ್ಯೋ ಅದ್ಧ್ಯ॒ನ್ತರಿ॑ಖ್ಷೇ । ತಾವ॒ಸ್ಮಭ್ಯ॑-ಮ್ಪುರು॒ವಾರ॑-ಮ್ಪುರು॒ಖ್ಷುಮ್ । ರಾ॒ಯಸ್ಪೋಷಂ॒-ವಿಁಷ್ಯ॑ತಾ॒-ನ್ನಾಭಿ॑ಮ॒ಸ್ಮೇ ॥ 5 ॥

ಧಿಯ॑-ಮ್ಪೂ॒ಷಾ ಜಿ॑ನ್ವತು ವಿಶ್ವಮಿ॒ನ್ವಃ । ರ॒ಯಿಗ್ಂ ಸೋಮೋ॑ ರಯಿ॒ಪತಿ॑-ರ್ದಧಾತು । ಅವ॑ತು ದೇ॒ವ್ಯದಿ॑ತಿರ-ನ॒ರ್ವಾ । ಬೃ॒ಹ-ದ್ವ॑ದೇಮ ವಿ॒ದಥೇ॑ ಸು॒ವೀರಾಃ᳚ ॥ ವಿಶ್ವಾ᳚ನ್ಯ॒ನ್ಯೋ ಭುವ॑ನಾ ಜ॒ಜಾನ॑ । ವಿಶ್ವ॑ಮ॒ನ್ಯೋ ಅ॑ಭಿ॒ಚಖ್ಷಾ॑ಣ ಏತಿ । ಸೋಮಾ॑ಪೂಷಣಾ॒-ವವ॑ತ॒-ನ್ಧಿಯ॑-ಮ್ಮೇ । ಯು॒ವಭ್ಯಾಂ॒-ವಿಁಶ್ವಾಃ॒ ಪೃತ॑ನಾ ಜಯೇಮ ॥ ಉದು॑ತ್ತ॒ಮಂ-ವಁ॑ರುಣ॒ ಪಾಶ॑ಮ॒ಸ್ಮದವಾ॑-ಽಧ॒ಮಂ-ವಿಁಮ॑ಧ್ಯ॒ಮಗ್ಗ್​ ಶ್ರ॑ಥಾಯ । ಅಥಾ॑ ವ॒ಯಮಾ॑ದಿತ್ಯ ವ್ರ॒ತೇ ತವಾ-ಽನಾ॑ಗಸೋ॒ ಅದಿ॑ತಯೇ ಸ್ಯಾಮ ಅಸ್ತ॑ಭ್ನಾ॒ದ್ಯಾಮೃ॑ಷ॒ಭೋ ಅ॒ನ್ತರಿ॑ಖ್ಷ॒ಮಮಿ॑ಮೀತ ವರಿ॒ಮಾಣ॑-ಮ್ಪೃಥಿ॒ವ್ಯಾ ಆ-ಽಸೀ॑ದ॒-ದ್ವಿಶ್ವಾ॒ ಭುವ॑ನಾನಿ ಸ॒ಮ್ರಾ-ಡ್ವಿಶ್ವೇತ್ತಾನಿ॒ ವರು॑ಣಸ್ಯ ವ್ರ॒ತಾನಿ॑ ॥ । ಯ-ತ್ಕಿಞ್ಚೇ॒ದಂ-ವಁ॑ರುಣ॒ ದೈವ್ಯೇ॒ ಜನೇ॑-ಽಭಿದ್ರೋ॒ಹ-ಮ್ಮ॑ನು॒ಷ್ಯಾ᳚ಶ್ಚರಾ॑ಮಸಿ । ಅಚಿ॑ತ್ತೀ॒ಯ-ತ್ತವ॒ ಧರ್ಮಾ॑ ಯುಯೋಪಿ॒ಮ ಮಾ ನ॒ಸ್ತಸ್ಮಾ॒ ದೇನ॑ಸೋ ದೇವ ರೀರಿಷಃ ॥ ಕಿ॒ತ॒ವಾಸೋ॒ ಯದ್ರಿ॑ ರಿ॒ಪುರ್ನ ದೀ॒ವಿ ಯದ್ವಾ॑ ಘಾ ಸ॒ತ್ಯ ಮು॒ತಯನ್ನ ವಿ॒ದ್ಮ । ಸರ್ವಾ॒ ತಾ ವಿಷ್ಯ॑ ಶಿಥಿ॒ರೇವ॑ ದೇ॒ವಾಥಾ॑ ತೇ ಸ್ಯಾಮ ವರುಣ ಪ್ರಿ॒ಯಾಸಃ॑ ॥( ) । ಅವ॑ ತೇ॒ ಹೇಡೋ॑ ವರುಣ॒ ನಮೋ॑ಭಿ॒ರವ॑ ಯ॒ಜ್ಞೇಭಿ॑ರೀಮಹೇ ಹ॒ವಿರ್ಭಿಃ॑ । ಖ್ಷಯ॑ನ್ನ॒ಸ್ಮಭ್ಯ॑ಮಸುರ ಪ್ರಚೇತೋ॒ ರಾಜ॒ನ್ನೇನಾಗ್ಂ॑ಸಿ ಶಿಶ್ರಥಃ ಕೃ॒ತಾನಿ॑ ॥, ತತ್ತ್ವಾ॑ ಯಾಮಿ॒ ಬ್ರಹ್ಮ॑ಣಾ॒ ವನ್ದ॑ಮಾನ॒ಸ್ತದಾ ಶಾ᳚ಸ್ತೇ॒ ಯಜ॑ಮಾನೋ ಹ॒ವಿರ್ಭಿಃ॑ । ಅಹೇ॑ಡಮಾನೋ ವರುಣೇ॒ಹ ಬೋ॒ಧ್ಯುರು॑ಶಗ್ಂಸ॒ ಮಾ ನ॒ ಆಯುಃ॒ ಪ್ರಮೋ॑ಷೀಃ ॥ ॥ ಆ॒ದಿ॒ತ್ಯಾನಾ॒ಮವ॑ಸಾ॒ ನೂತ॑ನೇನ ಸಖ್ಷೀ॒ಮಹಿ॒ ಶರ್ಮ॑ಣಾ॒ ಶನ್ತ॑ಮೇನ । ಅ॒ನಾ॒ಗಾ॒ಸ್ತ್ವೇ ಅ॑ದಿತಿ॒ತ್ವೇ ತು॒ರಾಸ॑ ಇ॒ಮಂ-ಯಁ॒ಜ್ಞ-ನ್ದ॑ಧತು॒ ಶ್ರೋಷ॑ಮಾಣಾಃ ॥, ನ ದ॑ಖ್ಷಿ॒ಣಾ ವಿಚಿ॑ಕಿತೇ॒ ನ ಸ॒ವ್ಯಾ ನ ಪ್ರಾ॒ಚೀನ॑ಮಾದಿತ್ಯಾ॒ ನೋತ ಪ॒ಶ್ಚಾ । ಪಾ॒ಕ್ಯಾ॑ ಚಿದ್ವಸವೋ ಧೀ॒ರ್ಯಾ॑ ಚಿ--ದ್ಯು॒ಷ್ಮಾನೀ॑ತೋ॒ ಅಭ॑ಯ॒-ಞ್ಜ್ಯೋತಿ॑ರಶ್ಯಾಮ್ ॥ । ಧಾ॒ರಯ॑ನ್ತ ಆದಿ॒ತ್ಯಾಸೋ॒ ಜಗ॒ಥ್ಸ್ಥಾ ದೇ॒ವಾ ವಿಶ್ವ॑ಸ್ಯ॒ ಭುವ॑ನಸ್ಯ ಗೋ॒ಪಾಃ । ದೀ॒ರ್ಘಾಧಿ॑ಯೋ॒ ರಖ್ಷ॑ಮಾಣಾ ಅಸು॒ರ್ಯ॑ಮೃ॒ತಾವಾ॑ನ॒-ಶ್ಚಯ॑ಮಾನಾ ಋ॒ಣಾನಿ॑ ॥, ತಿ॒ಸ್ರೋ ಭೂಮೀ᳚ರ್ಧಾರಯ॒-ನ್ತ್ರೀಗ್ಂ ರು॒ತ ದ್ಯೂ-ನ್ತ್ರೀಣಿ॑ ವ್ರ॒ತಾ ವಿ॒ದಥೇ॑ ಅ॒ನ್ತರೇ॑ಷಾಮ್ । ಋ॒ತೇನಾ॑-ಽಽದಿತ್ಯಾ॒ ಮಹಿ॑ ವೋ ಮಹಿ॒ತ್ವ-ನ್ತದ॑ರ್ಯಮನ್ ವರುಣ ಮಿತ್ರ॒ ಚಾರು॑ ॥ । ಯ॒ಜ್ಞೋ ದೇ॒ವಾನಾ॒-ಮ್ಪ್ರತ್ಯೇ॑ತಿ ಸು॒ಮ್ನಮಾದಿ॑ತ್ಯಾಸೋ॒ ಭವ॑ತಾ ಮೃಡ॒ಯನ್ತಃ॑ । ಆ ವೋ॒-ಽರ್ವಾಚೀ॑ ಸುಮ॒ತಿ ರ್ವ॑ವೃತ್ಯಾದ॒ಗ್ಂ॒ ಹೋಶ್ಚಿ॒ದ್ಯಾ ವ॑ರಿವೋ॒ವಿತ್ತ॒ರಾ-ಽಸ॑ತ್ ॥ ಶುಚಿ॑ರ॒ಪ-ಸ್ಸೂ॒ಯವ॑ಸಾ॒ ಅದ॑ಬ್ಧ॒ ಉಪ॑ ಖ್ಷೇತಿ ವೃ॒ದ್ಧವ॑ಯಾ-ಸ್ಸು॒ವೀರಃ॑ । ನಕಿ॒ಷ್ಟ-ಙ್ಘ್ನ॒ನ್ತ್ಯನ್ತಿ॑ತೋ॒ ನ ದೂ॒ರಾದ್ಯ ಆ॑ದಿ॒ತ್ಯಾನಾ॒-ಮ್ಭವ॑ತಿ॒ ಪ್ರಣೀ॑ತೌ ॥ ॥ 6 ॥
(ಮ॒ನೀ॒ಷಾ-ಽಸ್ತು॑-ಚ॒-ರ್ತ-ಸ್ಯಾ॒ಸ್ಮೇ-ಕಿ॑ತ॒ವಾಸ॑ ಶ್ಚ॒ತ್ವಾರಿ॑ ಚ ) (ಅ. 1)

ಅನುವಾಕಂ 2 - ವಶಾದೀನಾಂ ಸೂಕ್ತಾನಿ
ತೇ ಶು॒ಕ್ರಾಸ॒-ಶ್ಶುಚ॑ಯೋ ರಶ್ಮಿ॒ವನ್ತಃ॑ । ಸೀದ॑ನ್ನಾದಿ॒ತ್ಯಾ ಅಧಿ॑ ಬ॒ರ॒ಃಇಷಿ॑ ಪ್ರಿ॒ಯೇ । ಕಾಮೇ॑ನ ದೇ॒ವಾ-ಸ್ಸ॒ರಥ॑-ನ್ದಿ॒ವೋ ನಃ॑ । ಆಯಾ᳚ನ್ತು ಯ॒ಜ್ಞಮುಪ॑ ನೋ ಜುಷಾ॒ಣಾಃ ॥ ತೇ ಸೂ॒ನವೋ॒ ಅದಿ॑ತೇಃ ಪೀವ॒ಸಾಮಿಷ᳚ಮ್ । ಘೃ॒ತ-ಮ್ಪಿನ್ವ॒ತ್-ಪ್ರತಿ॑ಹರ್ಯನ್ನೃತೇ॒ಜಾಃ । ಪ್ರ ಯ॒ಜ್ಞಿಯಾ॒ ಯಜ॑ಮಾನಾಯ ಯೇಮುರೇ । ಆ॒ದಿ॒ತ್ಯಾಃ ಕಾಮ॑-ಮ್ಪಿತು॒ಮನ್ತ॑ಮ॒ಸ್ಮೇ ॥ ಆ ನಃ॑ ಪು॒ತ್ರಾ ಅದಿ॑ತೇರ್ಯಾನ್ತು ಯ॒ಜ್ಞಮ್ । ಆ॒ದಿ॒ತ್ಯಾಸಃ॑ ಪ॒ಥಿಭಿ॑-ರ್ದೇವ॒ಯಾನೈಃ᳚ ॥ 7 ॥

ಅ॒ಸ್ಮೇ ಕಾಮ॑-ನ್ದಾ॒ಶುಷೇ॑ ಸ॒ನ್ನಮ॑ನ್ತಃ । ಪು॒ರೋ॒ಡಾಶ॑-ಙ್ಘೃ॒ತವ॑ನ್ತ-ಞ್ಜುಷನ್ತಾಮ್ ॥ ಸ್ಕ॒ಭಾ॒ಯತ॒ ನಿರ್-ಋ॑ತಿ॒ಗ್ಂ॒ ಸೇಧ॒ತಾಮ॑ತಿಮ್ । ಪ್ರ ರ॒ಶ್ಮಿಭಿ॒-ರ್ಯತ॑ಮಾನಾ ಅಮೃದ್ಧ್ರಾಃ । ಆದಿ॑ತ್ಯಾಃ॒ ಕಾಮ॒ ಪ್ರಯ॑ತಾಂ॒-ವಁಷ॑ಟ್ಕೃತಿಮ್ । ಜು॒ಷದ್ಧ್ವ॑-ನ್ನೋ ಹ॒ವ್ಯದಾ॑ತಿಂ-ಯಁಜತ್ರಾಃ ॥ ಆ॒ದಿ॒ತ್ಯಾನ್-ಕಾಮ॒ಮವ॑ಸೇ ಹುವೇಮ । ಯೇ ಭೂ॒ತಾನಿ॑ ಜ॒ನಯ॑ನ್ತೋ ವಿಚಿ॒ಖ್ಯುಃ । ಸೀದ॑ನ್ತು ಪು॒ತ್ರಾ ಅದಿ॑ತೇರು॒ಪಸ್ಥ᳚ಮ್ । ಸ್ತೀ॒ರ್ಣ-ಮ್ಬ॒ರ॒ಃಇರ್​ಹ॑ವಿ॒ರದ್ಯಾ॑ಯ ದೇ॒ವಾಃ ॥ 8 ॥

ಸ್ತೀ॒ರ್ಣ-ಮ್ಬ॒ರ॒ಃಇ-ಸ್ಸೀ॑ದತಾ ಯ॒ಜ್ಞೇ ಅ॒ಸ್ಮಿನ್ನ್ । ಧ್ರಾ॒ಜಾ-ಸ್ಸೇಧ॑ನ್ತೋ॒ ಅಮ॑ತಿ-ನ್ದು॒ರೇವಾ᳚ಮ್ । ಅ॒ಸ್ಮಭ್ಯ॑-ಮ್ಪುತ್ರಾ ಅದಿತೇಃ॒ ಪ್ರಯಗ್ಂ॑ಸತ । ಆದಿ॑ತ್ಯಾಃ॒ ಕಾಮ॑ ಹ॒ವಿಷೋ॑ ಜುಷಾ॒ಣಾಃ ॥ ಅಗ್ನೇ॒ ನಯ॑ ಸು॒ಪಥಾ॑ ರಾ॒ಯೇ ಅ॒ಸ್ಮಾನ್ । ವಿಶ್ವಾ॑ನಿ ದೇವ ವ॒ಯುನಾ॑ನಿ ವಿ॒ದ್ವಾನ್ । ಯು॒ಯೋ॒ದ್ಧ್ಯ॑ಸ್ಮ-ಜ್ಜು॑ಹುರಾ॒ಣಮೇನಃ॑ । ಭೂಯಿ॑ಷ್ಠಾ-ನ್ತೇ॒ ನಮ॑ ಉಕ್ತಿಂ-ವಿಁಧೇಮ ॥ ಪ್ರವ॑-ಶ್ಶು॒ಕ್ರಾಯ॑ ಭಾ॒ನವೇ॑ ಭರದ್ಧ್ವಮ್ । ಹ॒ವ್ಯ-ಮ್ಮ॒ತಿ-ಞ್ಚಾ॒ಗ್ನಯೇ॒ ಸುಪೂ॑ತಮ್ ॥ 9 ॥

ಯೋ ದೈವ್ಯಾ॑ನಿ॒ ಮಾನು॑ಷಾ ಜ॒ನೂಗ್ಂಷಿ॑ । ಅ॒ನ್ತ-ರ್ವಿಶ್ವಾ॑ನಿ ವಿ॒ದ್ಮನಾ॒ ಜಿಗಾ॑ತಿ ॥ ಅಚ್ಛಾ॒ ಗಿರೋ॑ ಮ॒ತಯೋ॑ ದೇವ॒ಯನ್ತೀಃ᳚ । ಅ॒ಗ್ನಿಂ-ಯಁ॑ನ್ತಿ॒ ದ್ರವಿ॑ಣ॒-ಮ್ಭಿಖ್ಷ॑ಮಾಣಾಃ । ಸು॒ಸ॒ದೃಂಶಗ್ಂ॑ ಸು॒ಪ್ರತೀ॑ಕ॒ಗ್ಗ್॒ ಸ್ವಞ್ಚ᳚ಮ್ । ಹ॒ವ್ಯ॒ವಾಹ॑ಮರ॒ತಿ-ಮ್ಮಾನು॑ಷಾಣಾಮ್ ॥ ಅಗ್ನೇ॒ ತ್ವಮ॒ಸ್ಮ-ದ್ಯು॑ಯೋ॒ದ್ಧ್ಯಮೀ॑ವಾಃ । ಅನ॑ಗ್ನಿತ್ರಾ ಅ॒ಭ್ಯ॑ಮನ್ತ ಕೃ॒ಷ್ಟೀಃ । ಪುನ॑ರ॒ಸ್ಮಭ್ಯಗ್ಂ॑ ಸುವಿ॒ತಾಯ॑ ದೇವ । ಖ್ಷಾಂ-ವಿಁಶ್ವೇ॑ಭಿರ॒ಜರೇ॑ಭಿ-ರ್ಯಜತ್ರ ॥ 10 ॥

ಅಗ್ನೇ॒ ತ್ವ-ಮ್ಪಾ॑ರಯಾ॒ ನವ್ಯೋ॑ ಅ॒ಸ್ಮಾನ್ । ಸ್ವ॒ಸ್ತಿಭಿ॒ರತಿ॑ ದು॒ರ್ಗಾಣಿ॒ ವಿಶ್ವಾ᳚ । ಪೂಶ್ಚ॑ ಪೃ॒ಥ್ವೀ ಬ॑ಹು॒ಲಾ ನ॑ ಉ॒ರ್ವೀ । ಭವಾ॑ ತೋ॒ಕಾಯ॒ ತನ॑ಯಾಯ॒ ಶಂ-ಯೋಃ ಁ॥ ಪ್ರ ಕಾ॑ರವೋ ಮನ॒ನಾ ವ॒ಚ್ಯಮಾ॑ನಾಃ । ದೇ॒ವ॒ದ್ರೀಚೀ᳚-ನ್ನಯಥ ದೇವ॒ಯನ್ತಃ॑ । ದ॒ಖ್ಷಿ॒ಣಾ॒ವಾಡ್-ವಾ॒ಜಿನೀ॒ ಪ್ರಾಚ್ಯೇ॑ತಿ । ಹ॒ವಿರ್ಭರ॑ನ್ತ್ಯ॒ಗ್ನಯೇ॑ ಘೃ॒ತಾಚೀ᳚ ॥ ಇನ್ದ್ರ॒-ನ್ನರೋ॑ ನೇ॒ಮಧಿ॑ತಾ ಹವನ್ತೇ॒ ಯತ್ಪಾರ್ಯಾ॑ ಯು॒ನಜ॑ತೇ॒ ಧಿಯ॒ಸ್ತಾಃ । ಶೂರೋ॒ ನೃಷಾ॑ತಾ॒ ಶವ॑ಸಶ್ಚಕಾ॒ನ ಆ ಗೋಮ॑ತಿ ವ್ರ॒ಜೇ ಭ॑ಜಾ॒ ತ್ವನ್ನಃ॑ ॥ ಯು॒ಜೇ ರಥ॑-ಙ್ಗ॒ವೇಷ॑ಣ॒ಗ್ಂ॒ ಹರಿ॑ಭ್ಯಾಮ್ । ಉಪ॒ ಬ್ರಹ್ಮಾ॑ಣಿ ಜುಜುಷಾ॒ಣ-ಮ॑ಸ್ಥುಃ । ವಿಬಾ॑ಧಿಷ್ಟಾ॒ಸ್ಯ ರೋದ॑ಸೀ ಮಹಿ॒ತ್ವಾ । ಇನ್ದ್ರೋ॑ ವೃ॒ತ್ರಾಣ್ಯ॑ಪ್ರ॒ತೀ ಜ॑ಘ॒ನ್ವಾನ್ ॥ ॥ ಜ॒ಗೃ॒ಭ್ಣಾ ತೇ॒ ದಖ್ಷಿ॑ಣಾಮಿನ್ದ್ರ॒ ಹಸ್ತ᳚ಮ್ ॥ 11 ॥

ವ॒ಸೂ॒ಯವೋ॑ ವಸುಪತೇ॒ ವಸೂ॑ನಾಮ್ । ವಿ॒ದ್ಮಾ ಹಿ ತ್ವಾ॒ ಗೋಪ॑ತಿಗ್ಂ ಶೂರ॒ ಗೋನಾ᳚ಮ್ । ಅ॒ಸ್ಮಭ್ಯ॑-ಞ್ಚಿ॒ತ್ರಂ-ವೃಁಷ॑ಣಗ್ಂ ರ॒ಯಿ-ನ್ದಾಃ᳚ ॥ ತವೇ॒ದಂ-ವಿಁಶ್ವ॑ಮ॒ಭಿತಃ॑ ಪಶ॒ವ್ಯ᳚ಮ್ । ಯ-ತ್ಪಶ್ಯ॑ಸಿ॒ ಚಖ್ಷ॑ಸಾ॒ ಸೂರ್ಯ॑ಸ್ಯ । ಗವಾ॑ಮಸಿ॒ ಗೋಪ॑ತಿ॒ರೇಕ॑ ಇನ್ದ್ರ । ಭ॒ಖ್ಷೀ॒ಮಹಿ॑ ತೇ॒ ಪ್ರಯ॑ತಸ್ಯ॒ ವಸ್ವಃ॑ ॥ ಸಮಿ॑ನ್ದ್ರ ಣೋ॒ ಮನ॑ಸಾ ನೇಷಿ॒ ಗೋಭಿಃ॑ । ಸಗ್ಂ ಸೂ॒ರಿಭಿ॑-ರ್ಮಘವ॒ನ್-ಥ್ಸಗ್ಗ್​ ಸ್ವ॒ಸ್ತ್ಯಾ । ಸ-ಮ್ಬ್ರಹ್ಮ॑ಣಾ ದೇ॒ವಕೃ॑ತಂ॒-ಯಁದಸ್ತಿ॑ ॥ 12 ॥

ಸ-ನ್ದೇ॒ವಾನಾಗ್ಂ॑ ಸುಮ॒ತ್ಯಾ ಯ॒ಜ್ಞಿಯಾ॑ನಾಮ್ ॥ ಆ॒ರಾಚ್ಛತ್ರು॒-ಮಪ॑ಬಾಧಸ್ವ ದೂ॒ರಮ್ । ಉ॒ಗ್ರೋ ಯ-ಶ್ಶಮ್ಬಃ॑ ಪುರುಹೂತ॒ ತೇನ॑ । ಅ॒ಸ್ಮೇ ಧೇ॑ಹಿ॒ ಯವ॑ಮ॒ದ್ಗೋಮ॑ದಿನ್ದ್ರ । ಕೃ॒ಧೀ ಧಿಯ॑-ಞ್ಜರಿ॒ತ್ರೇ ವಾಜ॑ರತ್ನಾಮ್ ॥ ಆವೇ॒ಧಸ॒-ನ್ನೀಲ॑ಪೃಷ್ಠ-ಮ್ಬೃ॒ಹನ್ತ᳚ಮ್ । ಬೃಹ॒ಸ್ಪತಿ॒ಗ್ಂ॒ ಸದ॑ನೇ ಸಾದಯಧ್ವಮ್ । ಸಾ॒ದದ್ಯೋ॑ನಿ॒-ನ್ದಮ॒ ಆದೀ॑ದಿ॒ವಾಗ್ಂಸ᳚ಮ್ । ಹಿರ॑ಣ್ಯವರ್ಣಮರು॒ಷಗ್ಂ ಸ॑ಪೇಮ ॥ ಸ ಹಿ ಶುಚಿಃ॑ ॥ ಬೃಹ॒ಸ್ಪತಿಃ॑ ಪ್ರಥ॒ಮ-ಞ್ಜಾಯ॑ಮಾನಃ । ಮ॒ಹೋ ಜ್ಯೋತಿ॑ಷಃ ಪರ॒ಮೇ ವ್ಯೋ॑ಮನ್ನ್ । ಸ॒ಪ್ತಾಸ್ಯ॑ಸ್ತುವಿಜಾ॒ತೋ ರವೇ॑ಣ । ವಿ ಸ॒ಪ್ತರ॑ಶ್ಮಿರಧಮ॒ತ್ತಮಾಗ್ಂ॑ಸಿ ॥ 13 ॥

ಬೃಹ॒ಸ್ಪತಿ॒-ಸ್ಸಮ॑ಜಯ॒-ದ್ವಸೂ॑ನಿ । ಮ॒ಹೋ ವ್ರ॒ಜಾ-ನ್ಗೋಮ॑ತೋ ದೇ॒ವ ಏ॒ಷಃ । ಅ॒ಪ-ಸ್ಸಿಷಾ॑ಸ॒ನ್-ಥ್ಸುವ॒ರ ಪ್ರ॑ತೀತ್ತಃ । ಬೃಹ॒ಸ್ಪತಿ॒ರ॒ಃಅನ್ತ್ಯ॒ಮಿತ್ರ॑-ಮ॒ರ್ಕೈಃ ॥ ಬೃಹ॑ಸ್ಪತೇ॒ ಪರಿ॑ ದೀಯಾ॒ ರಥೇ॑ನ ರಖ್ಷೋ॒ಹಾ ಽಮಿತ್ರಾಗ್ಂ॑ ಅಪ॒ ಬಾಧ॑ಮಾನಃ । ಪ್ರ॒ಭ॒ಞ್ಜನ್-ಥ್ಸೇನಾಃ᳚ ಪ್ರಮೃ॒ಣೋ ಯು॒ಧಾ ಜಯ॑ನ್ನ॒ಸ್ಮಾಕ॑-ಮೇಧ್ಯವಿ॒ತಾ ರಥಾ॑ನಾಮ್ ॥ ಏ॒ವಾ ಪಿ॒ತ್ರೇ ವಿ॒ಶ್ವದೇ॑ವಾಯ॒ ವೃಷ್ಣೇ॑ ಯ॒ಜ್ಞೈರ್ವಿ॑ಧೇಮ॒ ನಮ॑ಸಾ ಹ॒ವಿರ್ಭಿಃ॑ । ಬೃಹ॑ಸ್ಪತೇ ಸುಪ್ರ॒ಜಾ ವೀ॒ರವ॑ನ್ತೋ ವ॒ಯಗ್ಗ್​ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ ॥ ಆ ನೋ॑ ದಿ॒ವೋ ಬೃ॑ಹ॒ತಃ ಪರ್ವ॑ತಾ॒ದಾ ಸರ॑ಸ್ವತೀ ಯಜ॒ತಾ ಗ॑ನ್ತು ಯ॒ಜ್ಞಮ್ । ಹವ॑-ನ್ದೇ॒ವೀ ಜು॑ಜುಷಾ॒ಣಾ ಘೃ॒ತಾಚೀ॑ ಶ॒ಗ್ಮಾ-ನ್ನೋ॒ ವಾಚ॑ಮುಶ॒ತೀ ಶೃ॑ಣೋತು ॥ಪಾವೀ॑ರವೀ ಕ॒ನ್ಯಾ॑ ಚಿ॒ತ್ರಾಯು॒-ಸ್ಸರ॑ಸ್ವತೀ ವೀ॒ರಪ॑ತ್ನೀ॒ ಧಿಯ॑-ನ್ಧಾತ್ । ಗ್ನಾಭಿ॒ರಚ್ಛಿ॑ದ್ರಗ್ಂ ಶರ॒ಣಗ್ಂ ಸ॒ಜೋಷಾ॑ ದುರಾ॒ಧರ್​ಷ॑-ಙ್ಗೃಣ॒ತೇ ಶರ್ಮ॑ ಯಗ್ಂಸತ್ ॥ । ಇ॒ಮಾ ಜುಹ್ವಾ॑ನಾ ಯು॒ಷ್ಮದಾ ನಮೋ॑ಭಿಃ । ಪ್ರತಿ॒ ಸ್ತೋಮಗ್ಂ॑ ಸರಸ್ವತಿ ಜುಷಸ್ವ । ತವ॒ ಶರ್ಮ॑-ನ್ಪ್ರಿ॒ಯತ॑ಮೇ॒ ದಧಾ॑ನಾಃ । ಉಪ॑ಸ್ಥೇಯಾಮ ಶರ॒ಣ-ನ್ನ ವೃ॒ಖ್ಷಮ್ ॥ ಯಸ್ತೇ॒ ಸ್ತನ॑ಶ್ಶಶ॒ಯ ಇತ್ಯಾ॑ಹ । ಸ್ತೌತ್ಯೇ॒ವೈನಾ᳚ಮ್ । ಉಸ್ರ॑ ಘ॒ರ್ಮಗ್ಂ ಶಿ॒ಗ್ಂ॒ಷೋಸ್ರ॑ ಘ॒ರ್ಮ-ಮ್ಪಾ॑ಹಿ ಘ॒ರ್ಮಾಯ॑ ಶಿ॒ಗ್ಂ॒ಷೇತ್ಯಾ॑ಹ । ಯಥಾ᳚ ಬ್ರೂ॒ಯಾದ॒ಮುಷ್ಮೈ॑ ದೇ॒ಹೀತಿ॑ । ತಾ॒ದೃಗೇ॒ವ ತತ್ । ಬೃಹ॒ಸ್ಪತಿ॒ಸ್ತ್ವೋಪ॑ ಸೀದ॒ತ್ವಿತ್ಯಾ॑ಹ । । ಸರ॑ಸ್ವತ್ಯ॒ಭಿ ನೋ॑ ನೇಷಿ॒ ವಸ್ಯಃ॑ । ಮಾ ಪ॑ಸ್ಫರೀಃ॒ ಪಯ॑ಸಾ॒ ಮಾ ನ॒ ಆ ಧ॑ಕ್ । ಜು॒ಷಸ್ವ॑ ನ-ಸ್ಸ॒ಖ್ಯಾ॑ ವೇ॒ಶ್ಯಾ॑ ಚ । ಮಾ ತ್ವತ್ಖ್ಷೇತ್ರಾ॒-ಣ್ಯರ॑ಣಾನಿ ಗನ್ಮ ॥ ॥ ಇ॒ಯಗ್ಂ ಶುಷ್ಮೇ॑ಭಿರ್ಬಿಸ॒ಖಾ ಇ॑ವಾರುಜತ್ । ಸಾನು॑ ಗಿರೀ॒ಣಾ-ನ್ತ॑ವಿ॒ಷೇಭಿ॑ರೂ॒ರ್ಮಿಭಿಃ॑ । ಪಾ॒ರಾ॒ವ॒ದ॒ಘ್ನೀಮವ॑ಸೇ ಸುವೃ॒ಕ್ತಿಭಿಃ॑ । ಸರ॑ಸ್ವತೀ॒-ಮಾವಿ॑ವಾಸೇಮ ಧೀ॒ತಿಭಿಃ॑ ॥ 14 ॥
(ದೇ॒ವ॒ಯಾನೈ᳚--ರ್ ದೇ॒ವಾಃ - ಸುಪೂ॑ತಂ​ಯಁಜತ್ರ॒-ಹಸ್ತ॒-ಮಸ್ತಿ॒-ತಮಾಗ್॑-ಸ್ಯೂ॒ರ್ಮಿಭಿ॒-ರ್ದ್ವೇ ಚ॑) (ಅ. 2)

ಅನುವಾಕಂ 3 - ಸೌಮ್ಯಾದೀನಾಂ ಸೂಕ್ತಾನಿ
ಸೋಮೋ॑ ಧೇ॒ನುಗ್ಂ ಸೋಮೋ॒ ಅರ್ವ॑ನ್ತಮಾ॒ಶುಮ್ । ಸೋಮೋ॑ ವೀ॒ರ-ಙ್ಕ॑ರ್ಮ॒ಣ್ಯ॑-ನ್ದದಾತು । ಸಾ॒ದ॒ನ್ಯಂ॑-ವಿಁದ॒ಥ್ಯಗ್ಂ॑ ಸ॒ಭೇಯ᳚ಮ್ । ಪಿ॒ತು॒-ಶ್ಶ್ರವ॑ಣಂ॒-ಯೋಁ ದದಾ॑ಶದಸ್ಮೈ ॥ ಅಷಾ॑ಢಂ-ಯುಁ॒ಥ್ಸು ಪೃತ॑ನಾಸು॒ ಪಪ್ರಿ᳚ಮ್ । ಸು॒ವ॒ರ್॒ಷಾಮ॒ಫ್ಸ್ವಾಂ-ವೃಁ॒ಜನ॑ಸ್ಯ ಗೋ॒ಪಾಮ್ । ಭ॒ರೇ॒ಷು॒ಜಾಗ್ಂ ಸು॑ಖ್ಷಿ॒ತಿಗ್ಂ ಸು॒ಶ್ರವ॑ಸಮ್ । ಜಯ॑ನ್ತ॒-ನ್ತ್ವಾಮನು॑ ಮದೇಮ ಸೋಮ ॥ ತ್ವಗ್ಂ ಸೋ॑ಮ॒ ಕ್ರತು॑ಭಿಃ ॥ ಯಾ ತೇ॒ ಧಾಮಾ॑ನಿ ಹ॒ವಿಷಾ॒ ಯಜ॑ನ್ತಿ॒ ತಾ ತೇ॒ ವಿಶ್ವಾ॑ ಪರಿ॒ಭೂರ॑ಸ್ತು ಯ॒ಜ್ಞ-ಙ್ಗ॑ಯ॒ಸ್ಫಾನಃ॑ ಪ್ರ॒ತರ॑ಣ-ಸ್ಸು॒ವೀರೋ-ಽವೀ॑ರಹಾ॒ ಪ್ರಚ॑ರಾ ಸೋಮ॒ ದುರ್ಯಾ॒ನ॥ ತ್ವಮಿ॒ಮಾ ಓಷ॑ಧೀ-ಸ್ಸೋಮ॒ ವಿಶ್ವಾಃ᳚ । ತ್ವಮ॒ಪೋ ಅ॑ಜನಯ॒ಸ್ತ್ವ-ಙ್ಗಾಃ । ತ್ವಮಾತ॑ತನ್ಥೋ॒ರ್ವ॑ನ್ತರಿ॑ಖ್ಷಮ್ । ತ್ವ-ಞ್ಜ್ಯೋತಿ॑ಷಾ॒ ವಿತಮೋ॑ ವವರ್ಥ ॥ 15 ॥

ಯಾ ತೇ॒ ಧಾಮಾ॑ನಿ ದಿ॒ವಿ ಯಾ ಪೃ॑ಥಿ॒ವ್ಯಾಮ್ । ಯಾ ಪರ್ವ॑ತೇ॒ಷ್ವೋಷ॑ಧೀಷ್ವ॒ಫ್ಸು । ತೇಭಿ॑ರ್ನೋ॒ ವಿಶ್ವೈ᳚-ಸ್ಸು॒ಮನಾ॒ ಅಹೇ॑ಡನ್ನ್ । ರಾಜನ್᳚-ಥ್ಸೋಮ॒ ಪ್ರತಿ॑ ಹ॒ವ್ಯಾ ಗೃ॑ಭಾಯ ॥ ವಿಷ್ಣೋ॒ರ್ನುಕಂ॑-ವೀಁ॒ರ್ಯಾ॑ಣಿ॒ ಪ್ರ ವೋ॑ಚಂ॒-ಯಃ ಁಪಾರ್ಥಿ॑ವಾನಿ ವಿಮ॒ಮೇ ರಜಾಗ್ಂ॑ಸಿ॒ ಯೋ ಅಸ್ಕ॑ಭಾಯ॒ದುತ್ತ॑ರಗ್ಂ ಸ॒ಧಸ್ಥಂ॑-ವಿಁಚಕ್ರಮಾ॒ಣ ಸ್ತ್ರೇ॒ಧೋರು॑ಗಾ॒ಯೋ ವಿಷ್ಣೋ॑ ರ॒ರಾಟ॑ಮಸಿ॒ ವಿಷ್ಣೋಃ᳚ ಪೃ॒ಷ್ಠಮ॑ಸಿ॒ ವಿಷ್ಣೋ॒-ಶ್ಶ್ನ್ಯಪ್ತ್ರೇ᳚ ಸ್ಥೋ॒ ವಿಷ್ಣೋ॒-ಸ್ಸ್ಯೂರ॑ಸಿ॒ ವಿಷ್ಣೋ᳚-ರ್ಧ್ರು॒ವಮ॑ಸಿ ವೈಷ್ಣ॒ವಮ॑ಸಿ॒ ವಿಷ್ಣ॑ವೇ ತ್ವಾ ॥ ತದ॑ಸ್ಯ ಪ್ರಿ॒ಯಮ॒ಭಿ ಪಾಥೋ॑ ಅಶ್ಯಾಮ್ । ನರೋ॒ ಯತ್ರ॑ ದೇವ॒ಯವೋ॒ ಮದ॑ನ್ತಿ । ಉ॒ರು॒ಕ್ರ॒ಮಸ್ಯ॒ ಸ ಹಿ ಬನ್ಧು॑ರಿ॒ತ್ಥಾ । ವಿಷ್ಣೋಃ᳚ ಪ॒ದೇ ಪ॑ರ॒ಮೇ ಮಧ್ವ॒ ಉಥ್ಸಃ॑ ॥ । ಪ್ರತ-ದ್ವಿಷ್ಣು॑-ಸ್ಸ್ತವತೇ ವೀ॒ರ್ಯಾ॑ಯ । ಮೃ॒ಗೋ ನ ಭೀ॒ಮಃ ಕು॑ಚ॒ರೋ ಗಿ॑ರಿ॒ಷ್ಠಾಃ । ಯಸ್ಯೋ॒ರುಷು॑ ತ್ರಿ॒ಷು ವಿ॒ಕ್ರಮ॑ಣೇಷು । ಅಧಿ॑ಖ್ಷಿ॒ಯನ್ತಿ॒ ಭುವ॑ನಾನಿ॒ ವಿಶ್ವಾ᳚ ॥ ॥ ಪ॒ರೋ ಮಾತ್ರ॑ಯಾ ತ॒ನುವಾ॑ ವೃಧಾನ । ನ ತೇ॑ ಮಹಿ॒ತ್ವ-ಮನ್ವ॑ಶ್ನುವನ್ತಿ । ಉ॒ಭೇ ತೇ॑ ವಿದ್ಮ॒ ರಜ॑ಸೀ ಪೃಥಿ॒ವ್ಯಾ ವಿಷ್ಣೋ॑ ದೇವ॒ ತ್ವಮ್ । ಪ॒ರ॒ಮಸ್ಯ॑ ವಿಥ್ಸೇ ॥ 16 ॥

ವಿಚ॑ಕ್ರಮೇ ಪೃಥಿ॒ವೀಮೇ॒ಷ ಏ॒ತಾಮ್ । ಖ್ಷೇತ್ರಾ॑ಯ॒ ವಿಷ್ಣು॒-ರ್ಮನು॑ಷೇ ದಶ॒ಸ್ಯನ್ನ್ । ಧ್ರು॒ವಾಸೋ॑ ಅಸ್ಯ ಕೀ॒ರಯೋ॒ ಜನಾ॑ಸಃ । ಉ॒ರು॒ಖ್ಷಿ॒ತಿಗ್ಂ ಸು॒ಜನಿ॑ಮಾ ಚಕಾರ ॥ ತ್ರಿರ್ದೇ॒ವಃ ಪೃ॑ಥಿ॒ವೀಮೇ॒ಷ ಏ॒ತಾಮ್ । ವಿಚ॑ಕ್ರಮೇ ಶ॒ತರ್ಚ॑ಸ-ಮ್ಮಹಿ॒ತ್ವಾ । ಪ್ರ ವಿಷ್ಣು॑-ರಸ್ತು ತ॒ವಸ॒ಸ್ತ ವೀ॑ಯಾನ್ । ತ್ವೇ॒ಷಗ್ಗ್​ ಹ್ಯ॑ಸ್ಯ॒ ಸ್ಥವಿ॑ರಸ್ಯ॒ ನಾಮ॑ ॥ ॥ ಆ ತೇ॑ ಮ॒ಹ ಇ॑ನ್ದ್ರೋ॒ತ್ಯು॑ಗ್ರ॒ ಸಮ॑ನ್ಯವೋ॒ ಯ-ಥ್ಸ॒ಮರ॑ನ್ತ॒ ಸೇನಾಃ᳚ । ಪತಾ॑ತಿ ದಿ॒ದ್ಯುನ್ನರ್ಯ॑ಸ್ಯ ಬಾಹು॒ವೋರ್ಮಾ ತೇ॒ ಮನೋ॑ ವಿಷ್ವ॒ದ್ರಿಯ॒ಗ್ವಿ ಚಾ॑ರೀತ್ ॥ ಯೋ ಜಾ॒ತ ಏ॒ವ ಪ್ರ॑ಥ॒ಮೋ ಮನ॑ಸ್ವಾ-ನ್ದೇ॒ವೋ ದೇ॒ವಾನ್ ಕ್ರತು॑ನಾ ಪ॒ರ್ಯಭೂ॑ಷತ್ । ಯಸ್ಯ॒ ಶುಷ್ಮಾ॒ದ್ರೋದ॑ಸೀ॒ ಅಭ್ಯ॑ಸೇತಾ-ನ್ನೃ॒ಮ್ಣಸ್ಯ॑ ಮ॒ಹ್ನಾ ಸ ಜ॑ನಾಸ॒ ಇನ್ದ್ರಃ॑ ॥ । ಅ॒ಭಿ ಗೋ॒ತ್ರಾಣಿ॒ ಸಹ॑ಸಾ॒ ಗಾಹ॑ಮಾನೋ-ಽದಾ॒ಯೋ ವೀ॒ರ-ಶ್ಶ॒ತಮ॑ನ್ಯು॒ರಿನ್ದ್ರಃ॑ । ದು॒ಶ್ಚ್ಯ॒ವ॒ನಃ ಪೃ॑ತನಾ॒ಷಾಡ॑ ಯು॒ಧ್ಯೋ᳚-ಸ್ಮಾಕ॒ಗ್ಂ॒ ಸೇನಾ॑ ಅವತು॒ ಪ್ರ ಯು॒ಥ್ಸು ॥ ॥ ಆಭಿ॒-ಸ್ಸ್ಪೃಧೋ॑ ಮಿಥ॒ತೀ- ರರಿ॑ಷಣ್ಯನ್ನ್ । ಅ॒ಮಿತ್ರ॑ಸ್ಯ ವ್ಯಥಯಾ ಮ॒ನ್ಯುಮಿ॑ನ್ದ್ರ । ಆಭಿ॒ರ್ವಿಶ್ವಾ॑ ಅಭಿ॒ಯುಜೋ॒ ವಿಷೂ॑ಚೀಃ । ಆರ್ಯಾ॑ಯ॒ ವಿಶೋ-ಽವ॑ತಾರೀ॒ರ್ದಾಸೀಃ᳚ ॥ ಅ॒ಯಗ್ಂ ಶೃ॑ಣ್ವೇ॒ ಅಧ॒ ಜಯ॑ನ್ನು॒ತ ಘ್ನನ್ನ್ । ಅ॒ಯಮು॒ತ ಪ್ರಕೃ॑ಣುತೇ ಯು॒ಧಾ ಗಾಃ । ಯ॒ದಾ ಸ॒ತ್ಯ-ಙ್ಕೃ॑ಣು॒ತೇ ಮ॒ನ್ಯುಮಿನ್ದ್ರಃ॑ ॥ 17 ॥

ವಿಶ್ವ॑-ನ್ದೃ॒ಢ-ಮ್ಭ॑ಯತ॒ ಏಜ॑ದಸ್ಮಾತ್ ॥ ಅನು॑ ಸ್ವ॒ಧಾ-ಮ॑ಖ್ಷರ॒ನ್ನಾಪೋ॑ ಅಸ್ಯ । ಅವ॑ರ್ಧತ॒ ಮದ್ಧ್ಯ॒ ಆ ನಾ॒ವ್ಯಾ॑ನಾಮ್ । ಸ॒ದ್ಧ್ರೀ॒ಚೀನೇ॑ನ॒ ಮನ॑ಸಾ॒ ತಮಿ॑ನ್ದ್ರ॒ ಓಜಿ॑ಷ್ಠೇನ । ಹನ್ಮ॑ನಾ-ಽಹನ್ನ॒ಭಿದ್ಯೂನ್ ॥ ಮ॒ರುತ್ವ॑ನ್ತಂ-ವೃಁಷ॒ಭಂ-ವಾಁ॑ವೃಧಾ॒ನಮ್ । ಅಕ॑ವಾರಿ-ನ್ದಿ॒ವ್ಯಗ್ಂ ಶಾ॒ಸಮಿನ್ದ್ರ᳚ಮ್ । ವಿ॒ಶ್ವಾ॒ಸಾಹ॒ಮವ॑ಸೇ॒ ನೂತ॑ನಾಯ । ಉ॒ಗ್ರಗ್ಂ ಸ॑ಹೋ॒ದಾಮಿ॒ಹ ತಗ್ಂ ಹು॑ವೇಮ ॥ ಜನಿ॑ಷ್ಠಾ ಉ॒ಗ್ರ-ಸ್ಸಹ॑ಸೇ ತು॒ರಾಯ॑ ॥ 18 ॥

ಮ॒ನ್ದ್ರ ಓಜಿ॑ಷ್ಠೋ ಬಹು॒ಲಾಭಿ॑ಮಾನಃ । ಅವ॑ರ್ಧ॒ನ್ನಿನ್ದ್ರ॑-ಮ್ಮ॒ರುತ॑ಶ್ಚಿ॒ದತ್ರ॑ । ಮಾ॒ತಾ ಯ-ದ್ವೀ॒ರ-ನ್ದ॒ಧನ॒ದ್ಧನಿ॑ಷ್ಠಾ ॥ ಕ್ವ॑ ಸ್ಯಾ ವೋ॑ ಮರುತ-ಸ್ಸ್ವ॒ಧಾ-ಽಽಸೀ᳚ತ್ । ಯ-ನ್ಮಾಮೇಕಗ್ಂ॑ ಸ॒ಮಧ॑ತ್ತಾಹಿ॒ಹತ್ಯೇ᳚ । ಅ॒ಹಗ್ಗ್​ ಹ್ಯು॑ಗ್ರಸ್ತ॑ವಿ॒ಷ-ಸ್ತುವಿ॑ಷ್ಮಾನ್ । ವಿಶ್ವ॑ಸ್ಯ॒ ಶತ್ರೋ॒ರನ॑ಮಂ-ವಁಧ॒ಸ್ನೈಃ ॥ ವೃ॒ತ್ರಸ್ಯ॑ ತ್ವಾ ಶ್ವ॒ಸಥಾ॒ದೀಷ॑ಮಾಣಾಃ । ವಿಶ್ವೇ॑ ದೇ॒ವಾ ಅ॑ಜಹು॒ರ್ಯೇ ಸಖಾ॑ಯಃ । ಮ॒ರುದ್ಭಿ॑ರಿನ್ದ್ರ ಸ॒ಖ್ಯ-ನ್ತೇ॑ ಅಸ್ತು ॥ 19 ॥

ಅಥೇ॒ಮಾ ವಿಶ್ವಾಃ॒ ಪೃತ॑ನಾ ಜಯಾಸಿ ॥ ವಧೀಂ᳚-ವೃಁ॒ತ್ರ-ಮ್ಮ॑ರುತ ಇನ್ದ್ರಿ॒ಯೇಣ॑ । ಸ್ವೇನ॒ ಭಾಮೇ॑ನ ತವಿ॒ಷೋ ಬ॑ಭೂ॒ವಾನ್ । ಅ॒ಹಮೇ॒ತಾ ಮನ॑ವೇ ವಿ॒ಶ್ವಶ್ಚ॑ನ್ದ್ರಾಃ । ಸು॒ಗಾ ಅ॒ಪಶ್ಚ॑ಕರ॒ ವಜ್ರ॑ಬಾಹುಃ ॥ ಸ ಯೋ ವೃಷಾ॒ ವೃಷ್ಣಿ॑ಯೇಭಿ॒-ಸ್ಸಮೋ॑ಕಾಃ । ಮ॒ಹೋ ದಿ॒ವಃ ಪೃ॑ಥಿ॒ವ್ಯಾಶ್ಚ॑ ಸ॒ಮ್ರಾಟ್ । ಸ॒ತೀ॒ನಸ॑ತ್ತ್ವಾ॒ ಹವ್ಯೋ॒ ಭರೇ॑ಷು । ಮ॒ರುತ್ವಾ᳚ನ್ನೋ ಭವ॒ತ್ವಿನ್ದ್ರ॑ ಊ॒ತೀ ॥ ಇನ್ದ್ರೋ॑ ವೃ॒ತ್ರಮ॑ತರ-ದ್ವೃತ್ರ॒ತೂರ್ಯೇ᳚ ॥ 20 ॥

ಅ॒ನಾ॒ಧೃ॒ಷ್ಯೋ ಮ॒ಘವಾ॒ ಶೂರ॒ ಇನ್ದ್ರಃ॑ । ಅನ್ವೇ॑ನಂ॒-ವಿಁಶೋ॑ ಅಮದನ್ತ ಪೂ॒ರ್ವೀಃ । ಅ॒ಯಗ್ಂ ರಾಜಾ॒ ಜಗ॑ತಶ್ಚರ್​ಷಣೀ॒ನಾಮ್ ॥ ಸ ಏ॒ವ ವೀ॒ರ-ಸ್ಸ ಉ॑ ವೀ॒ರ್ಯಾ॑ವಾನ್ । ಸ ಏ॑ಕರಾ॒ಜೋ ಜಗ॑ತಃ ಪರ॒ಸ್ಪಾಃ । ಯ॒ದಾ ವೃ॒ತ್ರಮತ॑ರ॒ಚ್ಛೂರ॒ ಇನ್ದ್ರಃ॑ । ಅಥಾ॑ ಭವದ್ದಮಿ॒ತಾ-ಽಭಿಕ್ರ॑ತೂನಾಮ್ ॥ ಇನ್ದ್ರೋ॑ ಯ॒ಜ್ಞಂ-ವಁ॒ರ್ಧಯ॑ನ್ ವಿ॒ಶ್ವವೇ॑ದಾಃ । ಪು॒ರೋ॒ಡಾಶ॑ಸ್ಯ ಜುಷತಾಗ್ಂ ಹ॒ವಿರ್ನಃ॑ । ವೃ॒ತ್ರ-ನ್ತೀ॒ರ್ತ್ವಾ ದಾ॑ನ॒ವಂ-ವಁಜ್ರ॑ಬಾಹುಃ ॥ 21 ॥

ದಿಶೋ॑-ಽದೃಗ್ಂ ಹದ್ದೃಗ್ಂಹಿ॒ತಾ ದೃಗ್ಂಹ॑ಣೇನ ॥ ಇ॒ಮಂ-ಯಁ॒ಜ್ಞಂ-ವಁ॒ರ್ಧಯ॑ನ್ ವಿ॒ಶ್ವವೇ॑ದಾಃ । ಪು॒ರೋ॒ಡಾಶ॒-ಮ್ಪ್ರತಿ॑ಗೃಭ್ಣಾ॒ತ್ವಿನ್ದ್ರಃ॑ । ಯ॒ದಾ ವೃ॒ತ್ರಮತ॑ರ॒ಚ್ಛೂರ॒ ಇನ್ದ್ರಃ॑ । ಅಥೈ॑ಕರಾ॒ಜೋ ಅ॑ಭವ॒ಜ್ಜನಾ॑ನಾಮ್ ॥ ಇನ್ದ್ರೋ॑ ದೇ॒ವಾಞ್ಛ॑ಮ್ಬರ॒ಹತ್ಯ॑ ಆವತ್ । ಇನ್ದ್ರೋ॑ ದೇ॒ವಾನಾ॑- ಮಭವ-ತ್ಪುರೋ॒ಗಾಃ । ಇನ್ದ್ರೋ॑ ಯ॒ಜ್ಞೇ ಹ॒ವಿಷಾ॑ ವಾವೃಧಾ॒ನಃ । ವೃ॒ತ್ರ॒ತೂರ್ಣೋ॒ ಅಭ॑ಯ॒ಗ್ಂ॒ ಶರ್ಮ॑ ಯಗ್ಂಸತ್ ॥ ಯ-ಸ್ಸ॒ಪ್ತ ಸಿನ್ಧೂ॒ಗ್ಂ॒ ರದ॑ಧಾತ್-ಪೃಥಿ॒ವ್ಯಾಮ್ । ಯ-ಸ್ಸ॒ಪ್ತ ಲೋ॒ಕಾನಕೃ॑ಣೋ॒-ದ್ದಿಶ॑ಶ್ಚ । ಇನ್ದ್ರೋ॑ ಹ॒ವಿಷ್ಮಾ॒ನ್-ಥ್ಸಗ॑ಣೋ ಮ॒ರುದ್ಭಿಃ॑ । ವೃ॒ತ್ರ॒ತೂರ್ಣೋ॑ ಯ॒ಜ್ಞಮಿ॒ಹೋಪ॑ಯಾಸತ್ ॥ 22 ॥
(ವ॒ವ॒ರ್ಥ॒ - ವಿ॒ಥ್ಸ॒ - ಇನ್ದ್ರ॑ - ಸ್ತು॒ರಾ - ಯಾ᳚ಸ್ತು॒ - ವೃತ್ರ॒ತೂರ್ಯೇ॒ - ವಜ್ರ॑ಬಾಹುಃ - ಪೃಥಿ॒ವ್ಯಾ-ನ್ತ್ರೀಣಿ॑ ಚ) (ಅ. 3)

ಅನುವಾಕಂ 4 - ಅಭಿಮಾತಿಹೈನ್ದ್ರಾದಿಪಶೂನಾಂ ಸೂಕ್ತಾನಿ
ಇನ್ದ್ರ॒-ಸ್ತರ॑ಸ್ವಾ-ನಭಿಮಾತಿ॒ಹೋಗ್ರಃ । ಹಿರ॑ಣ್ಯವಾಶೀ-ರಿಷಿ॒ರ-ಸ್ಸು॑ವ॒ರ॒.ಷಾಃ । ತಸ್ಯ॑ ವ॒ಯಗ್ಂ ಸು॑ಮ॒ತೌ ಯ॒ಜ್ಞಿಯ॑ಸ್ಯ । ಅಪಿ॑ ಭ॒ದ್ರೇ ಸೌ॑ಮನ॒ಸೇ ಸ್ಯಾ॑ಮ ॥ ಹಿರ॑ಣ್ಯವರ್ಣೋ॒ ಅಭ॑ಯ-ಙ್ಕೃಣೋತು । ಅ॒ಭಿ॒ಮಾ॒ತಿ॒ಹೇನ್ದ್ರಃ॒ ಪೃತ॑ನಾಸು ಜಿ॒ಷ್ಣುಃ । ಸ ನ॒-ಶ್ಶರ್ಮ॑ ತ್ರಿ॒ವರೂ॑ಥಂ॒-ವಿಁಯಗ್ಂ॑ಸತ್ । ಯೂ॒ಯ-ಮ್ಪಾ॑ತ ಸ್ವ॒ಸ್ತಿಭಿ॒-ಸ್ಸದಾ॑ ನಃ ॥ ಇನ್ದ್ರಗ್ಗ್॑ ಸ್ತುಹಿ ವ॒ಜ್ರಿಣ॒ಗ್ಗ್॒ ಸ್ತೋಮ॑ಪೃಷ್ಠಮ್ । ಪು॒ರೋ॒ಡಾಶ॑ಸ್ಯ ಜುಷತಾಗ್ಂ ಹ॒ವಿರ್ನಃ॑ ॥ 23 ॥

ಹ॒ತ್ವಾ-ಽಭಿಮಾ॑ತೀಃ॒ ಪೃತ॑ನಾ॒-ಸ್ಸಹ॑ಸ್ವಾನ್ । ಅಥಾಭಯ॑-ಙ್ಕೃಣುಹಿ ವಿ॒ಶ್ವತೋ॑ ನಃ ॥ ಸ್ತು॒ಹಿ ಶೂರಂ॑-ವಁ॒ಜ್ರಿಣ॒-ಮಪ್ರ॑ತೀತಂ (ಮಪ್ರ॑ತೀತ್ತಂ) । ಅ॒ಭಿ॒ಮಾ॒ತಿ॒ಹನ॑-ಮ್ಪುರುಹೂ॒ತಮಿನ್ದ್ರ᳚ಮ್ । ಯ ಏಕ॒ ಇಚ್ಛ॒ತಪ॑ತಿ॒ರ್ಜನೇ॑ಷು । ತಸ್ಮಾ॒ ಇನ್ದ್ರಾ॑ಯ ಹ॒ವಿರಾಜು॑ಹೋತ ॥ ಇನ್ದ್ರೋ॑ ದೇ॒ವಾನಾ॑ಮಧಿ॒ಪಾಃ ಪು॒ರೋಹಿ॑ತಃ । ದಿ॒ಶಾ-ಮ್ಪತಿ॑ರಭವ-ದ್ವಾ॒ಜಿನೀ॑ವಾನ್ । ಅ॒ಭಿ॒ಮಾ॒ತಿ॒ಹಾ ತ॑ವಿ॒ಷಸ್ತುವಿ॑ಷ್ಮಾನ್ । ಅ॒ಸ್ಮಭ್ಯ॑-ಞ್ಚಿ॒ತ್ರಂ-ವೃಁಷ॑ಣಗ್ಂ ರ॒ಯಿ-ನ್ದಾ᳚ತ್ ॥ 24 ॥

ಯ ಇ॒ಮೇ ದ್ಯಾವಾ॑ಪೃಥಿ॒ವೀ ಮ॑ಹಿ॒ತ್ವಾ । ಬಲೇ॒ನಾದೃಗ್ಂ॑ಹದಭಿಮಾತಿ॒ಹೇನ್ದ್ರಃ॑ । ಸ ನೋ॑ ಹ॒ವಿಃ ಪ್ರತಿ॑ಗೃಭ್ಣಾತು ರಾ॒ತಯೇ᳚ । ದೇ॒ವಾನಾ᳚-ನ್ದೇ॒ವೋ ನಿ॑ಧಿ॒ಪಾ ನೋ॑ ಅವ್ಯಾತ್ ॥ ಅನ॑ವಸ್ತೇ॒ ರಥ॒ಮಶ್ವಾ॑ಯ ತಖ್ಷ॒ನ್-ತ್ವಷ್ಟಾ॒ ವಜ್ರ॑-ಮ್ಪುರುಹೂತ ದ್ಯು॒ಮನ್ತ᳚ಮ್ । ಬ್ರ॒ಹ್ಮಾಣ॒ ಇನ್ದ್ರ॑-ಮ್ಮ॒ಹಯ॑ನ್ತೋ ಅ॒ರ್ಕೈರವ॑ರ್ಧಯ॒ನ್ನಹ॑ಯೇ॒ ಹನ್ತ॒ ವಾ ಉ॑ ॥ ವೃಷ್ಣೇ॒ ಯ-ತ್ತೇ॒ ವೃಷ॑ಣೋ ಅ॒ರ್ಕಮರ್ಚಾ॒ನಿನ್ದ್ರ॒ ಗ್ರಾವಾ॑ಣೋ॒ ಅದಿ॑ತಿ-ಸ್ಸ॒ಜೋಷಾಃ᳚ । ಅ॒ನ॒ಶ್ವಾಸೋ॒ ಯೇ ಪ॒ವಯೋ॑-ಽರ॒ಥಾ ಇನ್ದ್ರೇ॑ಷಿತಾ ಅ॒ಭ್ಯವ॑ರ್ತನ್ತ॒ ದಸ್ಯೂನ್॑ ॥ । ಇನ್ದ್ರ॑ಸ್ಯ॒ ನು ವೀ॒ರ್ಯಾ॑ಣಿ॒ ಪ್ರವೋ॑ಚಮ್ । ಯಾನಿ॑ ಚ॒ಕಾರ॑ ಪ್ರಥ॒ಮಾನಿ॑ ವ॒ಜ್ರೀ ॥ ಅಹ॒-ನ್ನಹಿ॒ಮನ್ವ॒ಪಸ್ತ॑ತರ್ದ । ಪ್ರ ವ॒ಖ್ಷಣಾ॑ ಅಭಿನ॒-ತ್ಪರ್ವ॑ತಾನಾಮ್ ॥ ॥ ಇನ್ದ್ರೋ॑ ಯಾ॒ತೋ-ಽವ॑ಸಿತಸ್ಯ॒ ರಾಜಾ᳚ । ಶಮ॑ಸ್ಯ ಚ ಶೃ॒ಙ್ಗಿಣೋ॒ ವಜ್ರ॑ಬಾಹುಃ । ಸೇದು॒ ರಾಜಾ᳚ ಖ್ಷೇತಿ ಚರ್​ಷಣೀ॒ನಾಮ್ । ಅ॒ರಾನ್ನ ನೇ॒ಮಿಃ ಪರಿ॒ತಾ ಬ॑ಭೂವ ॥ 25 ॥

ಅ॒ಭಿ ಸಿ॒ದ್ಧ್ಮೋ ಅ॑ಜಿಗಾದಸ್ಯ॒ ಶತ್ರೂನ್॑ । ವಿ ತಿ॒ಗ್ಮೇನ॑ ವೃಷ॒ಭೇಣಾ॒ ಪುರೋ॑-ಽಭೇತ್ । ಸಂ-ವಁಜ್ರೇ॑ಣಾಸೃಜ-ದ್ವೃ॒ತ್ರಮಿನ್ದ್ರಃ॑ । ಪ್ರ ಸ್ವಾ-ಮ್ಮ॒ತಿಮ॑ತಿರ॒ಚ್ಛಾಶ॑ದಾನಃ ॥ ವಿಷ್ಣು॑-ನ್ದೇ॒ವಂ-ವಁರು॑ಣಮೂ॒ತಯೇ॒ ಭಗ᳚ಮ್ । ಮೇದ॑ಸಾ ದೇ॒ವಾ ವ॒ಪಯಾ॑ ಯಜದ್ಧ್ವಮ್ । ತಾ ನೋ॑ ಯ॒ಜ್ಞಮಾಗ॑ತಂ-ವಿಁ॒ಶ್ವಧೇ॑ನಾ । ಪ್ರ॒ಜಾವ॑ದ॒ಸ್ಮೇ ದ್ರವಿ॑ಣೇ॒ಹ ಧ॑ತ್ತಮ್ ॥ ಮೇದ॑ಸಾ ದೇ॒ವಾ ವ॒ಪಯಾ॑ ಯಜದ್ಧ್ವಮ್ । ವಿಷ್ಣು॑-ಞ್ಚ ದೇ॒ವಂ-ವಁರು॑ಣ-ಞ್ಚ ರಾ॒ತಿಮ್ ॥ 26 ॥

ತಾ ನೋ॒ ಅಮೀ॑ವಾ ಅಪ॒ಬಾಧ॑ಮಾನೌ । ಇ॒ಮಂ-ಯಁ॒ಜ್ಞ-ಞ್ಜು॒ಷಮಾ॑ಣಾ॒ವುಪೇತ᳚ಮ್ ॥ ವಿಷ್ಣೂ॑ವರುಣಾ ಯು॒ವಮ॑ದ್ಧ್ವ॒ರಾಯ॑ ನಃ । ವಿ॒ಶೇ ಜನಾ॑ಯ॒ ಮಹಿ॒ ಶರ್ಮ॑ ಯಚ್ಛತಮ್ । ದೀ॒ರ್ಘಪ್ರ॑ಯಜ್ಯೂ ಹ॒ವಿಷಾ॑ ವೃಧಾ॒ನಾ । ಜ್ಯೋತಿ॒ಷಾ-ಽರಾ॑ತೀರ್ದಹತ॒-ನ್ತಮಾಗ್ಂ॑ಸಿ ॥ ಯಯೋ॒ರೋಜ॑ಸಾ ಸ್ಕಭಿ॒ತಾ ರಜಾಗ್ಂ॑ಸಿ । ವೀ॒ರ್ಯೇ॑ಭಿ-ರ್ವೀ॒ರತ॑ಮಾ॒ ಶವಿ॑ಷ್ಠಾ । ಯಾ ಪತ್ಯೇ॑ತೇ॒ ಅಪ್ರ॑ತೀತ್ತಾ॒ ಸಹೋ॑ಭಿಃ । ವಿಷ್ಣೂ॑ ಅಗ॒ನ್ವರು॑ಣಾ ಪೂ॒ರ್ವಹೂ॑ತೌ ॥ 27 ॥

ವಿಷ್ಣೂ॑ವರುಣಾ ವಭಿಶಸ್ತಿ॒ಪಾ ವಾ᳚ಮ್ । ದೇ॒ವಾ ಯ॑ಜನ್ತ ಹ॒ವಿಷಾ॑ ಘೃ॒ತೇನ॑ । ಅಪಾಮೀ॑ವಾಗ್ಂ ಸೇಧತಗ್ಂ ರ॒ಖ್ಷಸ॑ಶ್ಚ । ಅಥಾ॑ ಧತ್ತಂ॒-ಯಁಜ॑ಮಾನಾಯ॒ ಶಂ-ಯೋಃ ಁ॥ ಅ॒ಗ್ಂ॒ಹೋ॒ಮುಚಾ॑ ವೃಷ॒ಭಾ ಸು॒ಪ್ರತೂ᳚ರ್ತೀ । ದೇ॒ವಾನಾ᳚-ನ್ದೇ॒ವತ॑ಮಾ॒ ಶಚಿ॑ಷ್ಠಾ । ವಿಷ್ಣೂ॑ವರುಣಾ॒ ಪ್ರತಿ॑ಹರ್ಯತ-ನ್ನಃ । ಇ॒ದ-ನ್ನರಾ॒ ಪ್ರಯ॑ತಮೂ॒ತಯೇ॑ ಹ॒ವಿಃ ॥ ಮ॒ಹೀ ನು ದ್ಯಾವಾ॑ಪೃಥಿ॒ವೀ ಇ॒ಹ ಜ್ಯೇಷ್ಠೇ᳚ । ರು॒ಚಾ ಭ॑ವತಾಗ್ಂ ಶು॒ಚಯ॑ದ್ಭಿ-ರ॒ರ್ಕೈಃ ॥ 28 ॥

ಯಥ್ಸೀಂ॒-ವಁರಿ॑ಷ್ಠೇ ಬೃಹ॒ತೀ ವಿ॑ಮಿ॒ನ್ವನ್ನ್ । ನೃ॒ವದ್ಭ್ಯೋ॒-ಽಖ್ಷಾ ಪ॑ಪ್ರಥಾ॒ನೇಭಿ॒ರೇವೈಃ᳚ ॥ ಪ್ರ ಪೂ᳚ರ್ವ॒ಜೇ ಪಿ॒ತರಾ॒ ನವ್ಯ॑ಸೀಭಿಃ । ಗೀ॒ರ್ಭಿಃ ಕೃ॑ಣುದ್ಧ್ವ॒ಗ್ಂ॒ ಸದ॑ನೇ ಋ॒ತಸ್ಯ॑ । ಆ ನೋ᳚ ದ್ಯಾವಾಪೃಥಿವೀ॒ ದೈವ್ಯೇ॑ನ । ಜನೇ॑ನ ಯಾತ॒-ಮ್ಮಹಿ॑ ವಾಂ॒-ವಁರೂ॑ಥಮ್ ॥ ಸ ಇಥ್ಸ್ವಪಾ॒ ಭುವ॑ನೇಷ್ವಾಸ । ಯ ಇ॒ಮೇ ದ್ಯಾವಾ॑ಪೃಥಿ॒ವೀ ಜ॒ಜಾನ॑ । ಉ॒ರ್ವೀ ಗ॑ಭೀ॒ರೇ ರಜ॑ಸೀ ಸು॒ಮೇಕೇ᳚ । ಅ॒ವ॒ಗ್ಂ॒ಶೇ ಧೀರ॒-ಶ್ಶಚ್ಯಾ॒ ಸಮೈ॑ರತ್ ॥ 29 ॥

ಭೂರಿ॒-ನ್ದ್ವೇ ಅಚ॑ರನ್ತೀ॒ ಚರ॑ನ್ತಮ್ । ಪ॒ದ್ವನ್ತ॒-ಙ್ಗರ್ಭ॑ಮ॒ಪದೀ॑ ದಧಾತೇ । ನಿತ್ಯ॒-ನ್ನ ಸೂ॒ನು-ಮ್ಪಿ॒ತ್ರೋರು॒ಪಸ್ಥೇ᳚ । ತ-ಮ್ಪಿ॑ಪೃತಗ್ಂ ರೋದಸೀ ಸತ್ಯ॒ವಾಚ᳚ಮ್ ॥ ಇ॒ದ-ನ್ದ್ಯಾ॑ವಾಪೃಥಿವೀ ಸ॒ತ್ಯಮ॑ಸ್ತು । ಪಿತ॒-ರ್ಮಾತ॒-ರ್ಯದಿ॒ಹೋಪ॑ಬ್ರು॒ವೇ ವಾ᳚ಮ್ । ಭೂ॒ತ-ನ್ದೇ॒ವಾನಾ॑ಮವ॒ಮೇ ಅವೋ॑ಭಿಃ । ವಿದ್ಯಾಮೇ॒ಷಂ-ವೃಁ॒ಜನ॑-ಞ್ಜೀ॒ರದಾ॑ನುಮ್ ॥ ಉ॒ರ್ವೀ ಪೃ॒ಥ್ವೀ ಬ॑ಹು॒ಲೇ ದೂ॒ರೇ ಅ॑ನ್ತೇ । ಉಪ॑ಬ್ರುವೇ॒ ನಮ॑ಸಾ ಯ॒ಜ್ಞೇ ಅ॒ಸ್ಮಿನ್ನ್ । ದಧಾ॑ತೇ॒ ಯೇ ಸು॒ಭಗೇ॑ ಸು॒ಪ್ರತೂ᳚ರ್ತೀ । ದ್ಯಾವಾ॒ ರಖ್ಷ॑ತ-ಮ್ಪೃಥಿ॒ವೀ ನೋ॒ ಅಭ್ವಾ᳚ತ್ ॥ ಯಾ ಜಾ॒ತಾ ಓಷ॑ಧಯೋ ದೇ॒ವೇಭ್ಯ॑ಸ್ತ್ರಿಯು॒ಗ-ಮ್ಪು॒ರಾ । ಮನ್ದಾ॑ಮಿ ಬ॒ಭ್ರೂಣಾ॑ಮ॒ಹಗ್ಂ ಶ॒ತ-ನ್ಧಾಮಾ॑ನಿ ಸ॒ಪ್ತ ಚ॑ ॥, ಅತಿ॒ ವಿಶ್ವಾಃ᳚ ಪರಿ॒ಷ್ಠಾ-ಸ್ಸ್ತೇ॒ನ ಇ॑ವ ವ್ರ॒ಜಮ॑ಕ್ರಮುಃ । ಓಷ॑ಧಯಃ॒ ಪ್ರಾಚು॑ಚ್ಯವು॒ ರ್ಯ-ತ್ಕಿ-ಞ್ಚ॑ ತ॒ನುವಾ॒ಗ್ಂ॒ ರಪಃ॑ ॥ । ಯಾ ಓಷ॑ಧಯ॒-ಸ್ಸೋಮ॑ರಾಜ್ಞೀಃ॒ ಪ್ರವಿ॑ಷ್ಟಾಃ ಪೃಥಿ॒ವೀಮನು॑ । ತಾಸಾ॒-ನ್ತ್ವಮ॑ಸ್ಯುತ್ತ॒ಮಾ ಪ್ರಣೋ॑ ಜೀ॒ವಾತ॑-ವೇಸುವ ॥ ಅ॒ಶ್ವಾ॒ವ॒ತೀಗ್ಂ ಸೋ॑ಮವ॒ತೀ ಮೂ॒ರ್ಜಯ॑ನ್ತೀ॒ ಮುದೋ॑ಜಸಮ್ । ಆ ವಿ॑ಥ್ಸಿ॒ ಸರ್ವಾ॒ ಓಷ॑ಧೀರ॒ಸ್ಮಾ ಅ॑ರಿ॒ಷ್ಟತಾ॑ತಯೇ ॥ । ಓಷ॑ಧೀ॒ರಿತಿ॑ ಮಾತರ॒-ಸ್ತದ್ವೋ॑ ದೇವೀ॒-ರುಪ॑ ಬ್ರುವೇ । ರಪಾಗ್ಂ॑ಸಿ ವಿಘ್ನ॒ತೀರಿ॑ತ॒ ರಪ॑ಶ್ಚಾ॒ತಯ॑ಮಾನಾಃ ॥ ಅ॒ನ್ಯಾ ವೋ॑ ಅ॒ನ್ಯಾಮ॑ವ-ತ್ವ॒ನ್ಯಾ-ಽನ್ಯಸ್ಯಾ॒ ಉಪಾ॑ವತ । ತಾ-ಸ್ಸರ್ವಾ॒ ಓಷ॑ಧಯ-ಸ್ಸಂ​ವಿಁದಾ॒ನಾ ಇ॒ದ-ಮ್ಮೇ॒ ಪ್ರಾವ॑ತಾ॒ ವಚಃ॑ ॥ ॥ 30 ॥
(ಹ॒ವಿರ್ನೋ॑ - ದಾ-ದ್- ಬಭೂವ - ರಾ॒ತಿಂ - ಪೂ॒ರ್ವಹೂ॑ತಾ - ವ॒ರ್ಕೈ - ರೈ॑ರ - ದ॒ಸ್ಮಿ-ನ್ಪಞ್ಚ ಚ) (ಅ. 4)

ಅನುವಾಕಂ 5 - ಐನ್ದ್ರಾಗ್ನಪಶ್ವಾದೀನಾಂ ಸೂಕ್ತಾನಿ
ಶುಚಿ॒-ನ್ನು ಸ್ತೋಮ॒-ನ್ನವ॑ಜಾತ-ಮ॒ದ್ಯೇನ್ದ್ರಾ᳚ಗ್ನೀ ವೃತ್ರಹಣಾ ಜು॒ಷೇಥಾ᳚ಮ್ । ಉ॒ಭಾ ಹಿ ವಾಗ್ಂ॑ ಸು॒ಹವಾ॒ ಜೋಹ॑ವೀಮಿ॒ ತಾ ವಾಜಗ್ಂ॑ ಸ॒ದ್ಯ ಉ॑ಶ॒ತೇ ಧೇಷ್ಠಾ᳚ ॥, ಶ್ನಥ॑-ದ್ವೃ॒ತ್ರಮು॒ತ ಸ॑ನೋತಿ॒ ವಾಜ॒ಮಿನ್ದ್ರಾ॒ ಯೋ ಅ॒ಗ್ನೀ ಸಹು॑ರೀ ಸಪ॒ರ್ಯಾತ್ । ಇ॒ರ॒ಜ್ಯನ್ತಾ॑ ವಸ॒ವ್ಯ॑ಸ್ಯ॒ ಭೂರೇ॒-ಸ್ಸಹ॑ಸ್ತಮಾ॒ ಸಹ॑ಸಾ ವಾಜ॒ಯನ್ತಾ᳚ ॥ । ಉ॒ಭಾ ವಾ॑ಮಿನ್ದ್ರಾಗ್ನೀ ಆಹು॒ವಧ್ಯಾ॑ ಉ॒ಭಾ ರಾಧ॑ಸ-ಸ್ಸ॒ಹ ಮಾ॑ದ॒ಯಧ್ಯೈ᳚ । ಉ॒ಭಾ ದಾ॒ತಾರಾ॑ವಿ॒ಷಾಗ್ಂ ರ॑ಯೀ॒ಣಾಮು॒ಭಾ ವಾಜ॑ಸ್ಯ ಸಾ॒ತಯೇ॑ ಹುವೇ ವಾಮ್ ॥,ಪ್ರ ಚ॑ರ್​ಷ॒ಣಿಭ್ಯಃ॑ ಪೃತನಾ॒ ಹವೇ॑ಷು॒ ಪ್ರ ಪೃ॑ಥಿ॒ವ್ಯಾ ರಿ॑ರಿಚಾಥೇ ದಿ॒ವಶ್ಚ॑ । ಪ್ರ ಸಿನ್ಧು॑ಭ್ಯಃ॒ ಪ್ರಗಿ॒ರಿಭ್ಯೋ॑ ಮಹಿ॒ತ್ವಾ ಪ್ರೇನ್ದ್ರಾ᳚ಗ್ನೀ॒ ವಿಶ್ವಾ॒ ಭುವ॒ನಾ-ಽತ್ಯ॒ನ್ಯಾ ॥ । ಆ ವೃ॑ತ್ರಹಣಾ ವೃತ್ರ॒ಹಭಿ॒-ಶ್ಶುಷ್ಮೈಃ᳚ । ಇನ್ದ್ರ॑ ಯಾ॒ತ-ನ್ನಮೋ॑ಭಿರಗ್ನೇ ಅ॒ರ್ವಾಕ್ । ಯು॒ವಗ್ಂ ರಾಧೋ॑ಭಿ॒ರಕ॑ವೇಭಿರಿನ್ದ್ರ । ಅಗ್ನೇ॑ ಅ॒ಸ್ಮೇ ಭ॑ವತಮುತ್ತ॒ಮೇಭಿಃ॑ ॥ ಗೀ॒ರ್ಭಿ-ರ್ವಿಪ್ರಃ॒ ಪ್ರಮ॑ತಿಮಿ॒ಚ್ಛಮಾ॑ನಃ । ಈ॒॑ ರ॒ಯಿಂ-ಯಁ॒ಶಸ॑-ಮ್ಪೂರ್ವ॒ಭಾಜ᳚ಮ್ । ಇನ್ದ್ರಾ᳚ಗ್ನೀ ವೃತ್ರಹಣಾ ಸುವಜ್ರಾ । ಪ್ರಣೋ॒ ನವ್ಯೇ॑ಭಿಸ್ತಿರತ-ನ್ದೇ॒ಷ್ಣೈಃ ॥ ॥ ಬ್ರಹ್ಮ॑ಣಸ್ಪತೇ॒ ತ್ವಮ॒ಸ್ಯ ಯ॒ನ್ತಾ । ಸೂ॒ಕ್ತಸ್ಯ॑ ಬೋಧಿ॒ ತನ॑ಯ-ಞ್ಚ ಜಿನ್ವ । ವಿಶ್ವ॒-ನ್ತ-ದ್ಭ॒ದ್ರಂ-ಯಁದ॒ವನ್ತಿ॑ ದೇ॒ವಾಃ । ಬೃ॒ಹದ್ವ॑ದೇಮ ವಿ॒ದಥೇ॑ ಸು॒ವೀರಾಃ᳚ ॥ ಸ ಈಗ್ಂ॑ ಸ॒ತ್ಯೇಭಿ॒-ಸ್ಸಖಿ॑ಭಿ-ಶ್ಶು॒ಚದ್ಭಿಃ॑ । ಗೋಧಾ॑ಯಸಂ॒​ವಿಁ ಧ॑ನ॒ಸೈರ॑ತರ್ದತ್ । ಬ್ರಹ್ಮ॑ಣ॒ಸ್ಪತಿ॒-ರ್ವೃಷ॑ಭಿರ್ವ॒ರಾಹೈಃ᳚ ॥ 31 ॥

ಘ॒ರ್ಮಸ್ವೇ॑ದೇಭಿ॒-ರ್ದ್ರವಿ॑ಣಂ॒-ವ್ಯಾಁ॑ನಟ್ ॥ ಬ್ರಹ್ಮ॑ಣ॒ಸ್ಪತೇ॑-ರಭವದ್ಯಥಾ ವ॒ಶಮ್ । ಸ॒ತ್ಯೋ ಮ॒ನ್ಯುರ್ಮಹಿ॒ ಕರ್ಮಾ॑ ಕರಿಷ್ಯ॒ತಃ । ಯೋ ಗಾ ಉ॒ದಾಜ॒ಥ್ಸ ದಿ॒ವೇ ವಿ ಚಾ॑ಭಜತ್ । ಮ॒ಹೀವ॑ ರೀ॒ತಿ-ಶ್ಶವ॑ಸಾ ಸರ॒-ತ್ಪೃಥ॑ಕ್ ॥ ಇನ್ಧಾ॑ನೋ ಅ॒ಗ್ನಿಂ-ವಁ॑ನವದ್ವನುಷ್ಯ॒ತಃ । ಕೃ॒ತಬ್ರ॑ಹ್ಮಾ ಶೂಶುವ-ದ್ರಾ॒ತಹ॑ವ್ಯ॒ ಇತ್ । ಜಾ॒ತೇನ॑ ಜಾ॒ತಮತಿ॒ ಸೃ-ತ್ಪ್ರಸೃಗ್ಂ॑ಸತೇ । ಯಂ-ಯಁಂ॒-ಯುಁಜ॑-ಙ್ಕೃಣು॒ತೇ ಬ್ರಹ್ಮ॑ಣ॒ಸ್ಪತಿಃ॑ ॥ ಬ್ರಹ್ಮ॑ಣಸ್ಪತೇ ಸು॒ಯಮ॑ಸ್ಯ ವಿ॒ಶ್ವಹಾ᳚ ॥ 32 ॥

ರಾ॒ಯ-ಸ್ಸ್ಯಾ॑ಮ ರ॒ಥ್ಯೋ॑ ವಿವ॑ಸ್ವತಃ । ವೀ॒ರೇಷು॑ ವೀ॒ರಾಗ್ಂ ಉಪ॑ಪೃಙ್ಗ್ಧಿ ನ॒ಸ್ತ್ವಮ್ । ಯದೀಶಾ॑ನೋ॒ ಬ್ರಹ್ಮ॑ಣಾ॒ ವೇಷಿ॑ ಮೇ॒ ಹವ᳚ಮ್ ॥ ಸ ಇಜ್ಜನೇ॑ನ॒ ಸ ವಿ॒ಶಾ ಸ ಜನ್ಮ॑ನಾ । ಸ ಪು॒ತ್ರೈರ್ವಾಜ॑-ಮ್ಭರತೇ॒ ಧನಾ॒ ನೃಭಿಃ॑ । ದೇ॒ವಾನಾಂ॒-ಯಃ ಁಪಿ॒ತರ॑ಮಾ॒ವಿವಾ॑ಸತಿ । ಶ್ರ॒ದ್ಧಾಮ॑ನಾ ಹ॒ವಿಷಾ॒ ಬ್ರಹ್ಮ॑ಣ॒ಸ್ಪತಿ᳚ಮ್ ॥ ಯಾಸ್ತೇ॑ ಪೂಷ॒ನ್ನಾವೋ॑ ಅ॒ನ್ತ-ಸ್ಸ॑ಮು॒ದ್ರೇ । ಹಿ॒ರ॒ಣ್ಯಯೀ॑ರ॒ನ್ತರಿ॑ಖ್ಷೇ॒ ಚರ॑ನ್ತಿ । ಯಾಭಿ॑ರ್ಯಾಸಿ ದೂ॒ತ್ಯಾಗ್ಂ ಸೂರ್ಯ॑ಸ್ಯ । ಕಾಮೇ॑ನ ಕೃ॒ತ-ಶ್ಶ್ರವ॑ ಇ॒ಚ್ಛಮಾ॑ನಃ ॥ । ಶು॒ಕ್ರ-ನ್ತೇ॑ ಅ॒ನ್ಯದ್ಯ॑ಜ॒ತ-ನ್ತೇ॑ ಅ॒ನ್ಯದ್ವಿಷು॑ರೂಪೇ॒ ಅಹ॑ನೀ॒ ದ್ಯೌರಿ॑ವಾಸಿ । ವಿಶ್ವಾ॒ ಹಿ ಮಾ॒ಯಾ ಅವ॑ಸಿ ಸ್ವಧಾವೋ ಭ॒ದ್ರಾ ತೇ॑ ಪೂಷನ್ನಿ॒ಹ ರಾ॒ತಿರ॑ಸ್ತು ॥, ಪೂ॒ಷೇಮಾ ಆಶಾ॒ ಅನು॑ವೇದ॒ ಸರ್ವಾ᳚-ಸ್ಸೋ ಅ॒ಸ್ಮಾಗ್ಂ ಅಭ॑ಯತಮೇನ ನೇಷತ್ । ಸ್ವ॒ಸ್ತಿ॒ದಾ ಅಘೃ॑ಣಿ॒-ಸ್ಸರ್ವ॑ವೀರಃ । ಅಪ್ರ॑ಯುಚ್ಛ-ನ್ಪು॒ರ ಏ॑ತು॒ ಪ್ರಜಾ॒ನನ್ನ್ ॥ ॥ ಪ್ರಪ॑ಥೇ ಪ॒ಥಾಮ॑ಜನಿಷ್ಟ ಪೂ॒ಷಾ ॥ 33 ॥

ಪ್ರಪ॑ಥೇ ದಿ॒ವಃ ಪ್ರಪ॑ಥೇ ಪೃಥಿ॒ವ್ಯಾಃ । ಉ॒ಭೇ ಅ॒ಭಿ ಪ್ರಿ॒ಯತ॑ಮೇ ಸ॒ಧಸ್ಥೇ᳚ । ಆ ಚ॒ ಪರಾ॑ ಚ ಚರತಿ ಪ್ರಜಾ॒ನನ್ನ್ ॥ ಪೂ॒ಷಾ ಸು॒ಬನ್ಧು॑ರ್ದಿ॒ವ ಆ ಪೃ॑ಥಿ॒ವ್ಯಾಃ । ಇ॒ಡಸ್ಪತಿ॑-ರ್ಮ॒ಘವಾ॑ ದ॒ಸ್ಮವ॑ರ್ಚಾಃ । ತ-ನ್ದೇ॒ವಾಸೋ॒ ಅದ॑ದು-ಸ್ಸೂ॒ರ್ಯಾಯೈ᳚ । ಕಾಮೇ॑ನ ಕೃ॒ತ-ನ್ತ॒ವಸ॒ಗ್ಗ್॒ ಸ್ವಞ್ಚ᳚ಮ್ ॥ ಅ॒ಜಾಶ್ವಃ॑ ಪಶು॒ಪಾ ವಾಜ॑ವಸ್ತ್ಯಃ । ಧಿ॒ಯ॒ಜಿ॒ನ್ನ್ವೋ ವಿಶ್ವೇ॒ ಭುವ॑ನೇ॒ ಅರ್ಪಿ॑ತಃ । ಅಷ್ಟ್ರಾ᳚-ಮ್ಪೂ॒ಷಾ ಶಿ॑ಥಿ॒ರಾಮು॒ದ್ವರೀ॑ವೃಜತ್ ॥ 34 ॥

ಸ॒ಚಙ್ಖ್ಷಾ॑ಣೋ॒ ಭುವ॑ನಾ ದೇ॒ವ ಈ॑ಯತೇ ॥ ಶುಚೀ॑ ವೋ ಹ॒ವ್ಯಾ ಮ॑ರುತ॒-ಶ್ಶುಚೀ॑ನಾಮ್ । ಶುಚಿಗ್ಂ॑ ಹಿನೋಮ್ಯದ್ಧ್ವ॒ರಗ್ಂ ಶುಚಿ॑ಭ್ಯಃ । ಋ॒ತೇನ॑ ಸ॒ತ್ಯಮೃತ॒ಸಾಪ॑ ಆಯನ್ನ್ । ಶುಚಿ॑ಜನ್ಮಾನ॒-ಶ್ಶುಚ॑ಯಃ ಪಾವ॒ಕಾಃ ॥ ಪ್ರ ಚಿ॒ತ್ರಮ॒ರ್ಕ-ಙ್ಗೃ॑ಣ॒ತೇ ತು॒ರಾಯ॑ । ಮಾರು॑ತಾಯ॒ ಸ್ವತ॑ವಸೇ ಭರದ್ಧ್ವಮ್ । ಯೇ ಸಹಾಗ್ಂ॑ಸಿ॒ ಸಹ॑ಸಾ॒ ಸಹ॑ನ್ತೇ । ರೇಜ॑ತೇ ಅಗ್ನೇ ಪೃಥಿ॒ವೀ ಮ॒ಖೇಭ್ಯಃ॑ ॥ ಅಗ್ಂಸೇ॒ಷ್ವಾ ಮ॑ರುತಃ ಖಾ॒ದಯೋ॑ ವಃ ॥ 35 ॥

ವಖ್ಷ॑ಸ್ಸು ರು॒ಕ್ಮಾ ಉಪ॑ಶಿಶ್ರಿಯಾ॒ಣಾಃ । ವಿ ವಿ॒ದ್ಯುತೋ॒ ನ ವೃ॒ಷ್ಟಿಭೀ॑ ರುಚಾ॒ನಾಃ । ಅನು॑ ಸ್ವ॒ಧಾಮಾಯು॑ಧೈ॒-ರ್ಯಚ್ಛ॑ಮಾನಾಃ ॥ ಯಾ ವ॒-ಶ್ಶರ್ಮ॑ ಶಶಮಾ॒ನಾಯ॒ ಸನ್ತಿ॑ । ತ್ರಿ॒ಧಾತೂ॑ನಿ ದಾ॒ಶುಷೇ॑ ಯಚ್ಛ॒ತಾಧಿ॑ । ಅ॒ಸ್ಮಭ್ಯ॒-ನ್ತಾನಿ॑ ಮರುತೋ॒ ವಿಯ॑ನ್ತ । ರ॒ಯಿ-ನ್ನೋ॑ ಧತ್ತ ವೃಷಣ-ಸ್ಸು॒ವೀರ᳚ಮ್ ॥ ಇ॒ಮೇ ತು॒ರ-ಮ್ಮ॒ರುತೋ॑ ರಾಮಯನ್ತಿ । ಇ॒ಮೇ ಸ॒ಹ-ಸ್ಸಹ॑ಸ॒ ಆನ॑ಮನ್ತಿ । ಇ॒ಮೇ ಶಗ್ಂಸಂ॑-ವಁನುಷ್ಯ॒ತೋ ನಿಪಾ᳚ನ್ತಿ ॥ 36 ॥

ಗು॒ರುದ್ವೇಷೋ॒ ಅರ॑ರುಷೇ ದಧನ್ತಿ ॥ ಅ॒ರಾ ಇ॒ವೇದಚ॑ರಮಾ॒ ಅಹೇ॑ವ । ಪ್ರ ಪ್ರ॑ಜಾಯನ್ತೇ॒ ಅಕ॑ವಾ॒ ಮಹೋ॑ಭಿಃ । ಪೃಶ್ನೇಃ᳚ ಪು॒ತ್ರಾ ಉ॑ಪ॒ಮಾಸೋ॒ ರಭಿ॑ಷ್ಠಾಃ । ಸ್ವಯಾ॑ ಮ॒ತ್ಯಾ ಮ॒ರುತ॒-ಸ್ಸಮ್ಮಿ॑ಮಿಖ್ಷುಃ ॥ ಅನು॑ ತೇ ದಾಯಿ ಮ॒ಹ ಇ॑ನ್ದ್ರಿ॒ಯಾಯ॑ । ಸ॒ತ್ರಾ ತೇ॒ ವಿಶ್ವ॒ಮನು॑ ವೃತ್ರ॒ಹತ್ಯೇ᳚ । ಅನು॑ ಖ್ಷ॒ತ್ರಮನು॒ ಸಹೋ॑ ಯಜತ್ರ । ಇನ್ದ್ರ॑ ದೇ॒ವೇಭಿ॒ರನು॑ ತೇ ನೃ॒ಷಹ್ಯೇ᳚ ॥ ಯ ಇನ್ದ್ರ॒ ಶುಷ್ಮೋ॑ ಮಘವನ್ತೇ॒ ಅಸ್ತಿ॑ ॥ 37 ॥

ಶಿಖ್ಷಾ॒ ಸಖಿ॑ಭ್ಯಃ ಪುರುಹೂತ॒ ನೃಭ್ಯಃ॑ । ತ್ವಗ್ಂ ಹಿ ದೃ॒ಢಾ ಮ॑ಘವ॒ನ್ ವಿಚೇ॑ತಾಃ । ಅಪಾ॑ವೃಧಿ॒ ಪರಿ॑ವೃತಿ॒-ನ್ನ ರಾಧಃ॑ ॥ ಇನ್ದ್ರೋ॒ ರಾಜಾ॒ ಜಗ॑ತಶ್ಚರ್​ಷಣೀ॒ನಾಮ್ । ಅಧಿ॒ಖ್ಷಮಿ॒ ವಿಷು॑ರೂಪಂ॒-ಯಁದಸ್ತಿ॑ । ತತೋ॑ ದದಾತು ದಾ॒ಶುಷೇ॒ ವಸೂ॑ನಿ । ಚೋದ॒ದ್ರಾಧ॒ ಉಪ॑ಸ್ತುತಶ್ಚಿದ॒ರ್ವಾಕ್ ॥ ತಮು॑ ಷ್ಟುಹಿ॒ ಯೋ ಅ॒ಭಿಭೂ᳚ತ್ಯೋಜಾಃ । ವ॒ನ್ವನ್ನವಾ॑ತಃ ಪುರುಹೂ॒ತ ಇನ್ದ್ರಃ॑ । ಅಷಾ॑ಢಮು॒ಗ್ರಗ್ಂ ಸಹ॑ಮಾನಮಾ॒ಭಿಃ ॥ 38 ॥

ಗೀ॒ರ್ಭಿರ್ವ॑ರ್ಧ ವೃಷ॒ಭ-ಞ್ಚ॑ರ್​ಷಣೀ॒ನಾಮ್ ॥ ಸ್ಥೂ॒ರಸ್ಯ॑ ರಾ॒ಯೋ ಬೃ॑ಹ॒ತೋ ಯ ಈಶೇ᳚ । ತಮು॑ ಷ್ಟವಾಮ ವಿ॒ದಥೇ॒ಷ್ವಿನ್ದ್ರ᳚ಮ್ । ಯೋ ವಾ॒ಯುನಾ॒ ಜಯ॑ತಿ॒ ಗೋಮ॑ತೀಷು । ಪ್ರ ಧೃ॑ಷ್ಣು॒ಯಾ ನ॑ಯತಿ॒ ವಸ್ಯೋ॒ ಅಚ್ಛ॑ ॥ ಆ ತೇ॒ ಶುಷ್ಮೋ॑ ವೃಷ॒ಭ ಏತು॑ ಪ॒ಶ್ಚಾತ್ । ಓತ್ತ॒ರಾದ॑ಧ॒ರಾಗಾ ಪು॒ರಸ್ತಾ᳚ತ್ । ಆ ವಿ॒ಶ್ವತೋ॑ ಅ॒ಭಿ ಸಮೇ᳚ತ್ವ॒ರ್ವಾಮ್ । ಇನ್ದ್ರ॑ ದ್ಯು॒ಮ್ನಗ್ಂ ಸುವ॑ರ್ವದ್ಧೇಹ್ಯ॒ಸ್ಮೇ ॥ 39 ॥
(ವ॒ರಾಹೈ᳚--ರ್ ವಿ॒ಶ್ವಹಾ॑ - ಽಜನಿಷ್ಟ ಪೂ॒ಷೋ - ದ್ವರೀ॑ವೃಜತ್ - ಖಾ॒ದಯೋ॑ ವಃ - ಪಾ॒ನ್ - ತ್ಯಸ್ತ - ಯಾ॒ಭಿ--ರ್ + ನವ॑ ಚ) (ಅ. 5)

ಅನುವಾಕಂ 6 - ಸಾವಿತ್ರಾದಿಪಶೂನಾಂ ಸೂಕ್ತಾನಿ
ಆ ದೇ॒ವೋ ಯಾ॑ತು ಸವಿ॒ತಾ ಸು॒ರತ್ನಃ॑ । ಅ॒ನ್ತ॒ರಿ॒ಖ್ಷ॒ಪ್ರಾ ವಹ॑ಮಾನೋ॒ ಅಶ್ವೈಃ᳚ । ಹಸ್ತೇ॒ ದಧಾ॑ನೋ॒ ನರ್ಯಾ॑ ಪು॒ರೂಣಿ॑ । ನಿ॒ವೇ॒ಶಯ॑ನ್ ಚ ಪ್ರಸು॒ವನ್ ಚ॒ ಭೂಮ॑ ॥ ಅ॒ಭೀವೃ॑ತ॒-ಙ್ಕೃಶ॑ನೈ-ರ್ವಿ॒ಶ್ವರೂ॑ಪಮ್ ।
ಹಿರ॑ಣ್ಯಶಮ್ಯಂ-ಯಁಜ॒ತೋ ಬೃ॒ಹನ್ತ᳚ಮ್ । ಆಸ್ಥಾ॒-ದ್ರಥಗ್ಂ॑ ಸವಿ॒ತಾ ಚಿ॒ತ್ರಭಾ॑ನುಃ । ಕೃ॒ಷ್ಣಾ ರಜಾಗ್ಂ॑ಸಿ॒ ತವಿ॑ಷೀ॒-ನ್ದಧಾ॑ನಃ ॥ ಸಘಾ॑ ನೋ ದೇ॒ವ-ಸ್ಸ॑ವಿ॒ತಾ ಸ॒ವಾಯ॑ । ಆಸಾ॑ವಿಷ॒-ದ್ವಸು॑ಪತಿ॒-ರ್ವಸೂ॑ನಿ ॥ 40 ॥

ವಿ॒ಶ್ರಯ॑ಮಾಣೋ॒ ಅಮ॑ತಿಮುರೂ॒ಚೀಮ್ । ಮ॒ರ್ತ॒ಭೋಜ॑ನ॒ಮಧ॑ ರಾಸತೇ ನ ॥ ವಿ ಜನಾ᳚ಞ್ಛ್ಯಾ॒ವಾ-ಶ್ಶಿ॑ತಿ॒ಪಾದೋ॑ ಅಖ್ಯನ್ನ್ । ರಥ॒ಗ್ಂ॒ ಹಿರ॑ಣ್ಯ ಪ್ರ ಉಗಂ॒-ವಁಹ॑ನ್ತಃ । ಶಶ್ವ॒-ದ್ದಿಶ॑-ಸ್ಸವಿ॒ತು-ರ್ದೈವ್ಯ॑ಸ್ಯ । ಉ॒ಪಸ್ಥೇ॒ ವಿಶ್ವಾ॒ ಭುವ॑ನಾನಿ ತಸ್ಥುಃ ॥ ವಿ ಸು॑ಪ॒ರ್ಣೋ ಅ॒ನ್ತರಿ॑ಖ್ಷಾಣ್ಯಖ್ಯತ್ । ಗ॒ಭೀ॒ರವೇ॑ಪಾ॒ ಅಸು॑ರ-ಸ್ಸುನೀ॒ಥಃ । ಕ್ವೇ॑ದಾನೀ॒ಗ್ಂ॒ ಸೂರ್ಯಃ॒ ಕಶ್ಚಿ॑ಕೇತ । ಕ॒ತ॒ಮಾ-ನ್ದ್ಯಾಗ್ಂ ರ॒ಶ್ಮಿರ॒ಸ್ಯಾತ॑ತಾನ ॥ 41 ॥

ಭಗ॒-ನ್ಧಿಯಂ॑-ವಾಁ॒ಜಯ॑ನ್ತಃ॒ ಪುರ॑ನ್ಧಿಮ್ । ನರಾ॒ಶಗ್ಂಸೋ॒ ಗ್ನಾಸ್ಪತಿ॑ರ್ನೋ ಅವ್ಯಾತ್ । ಆ-ಽಯೇ ವಾ॒ಮಸ್ಯ॑ ಸಙ್ಗ॒ಥೇ ರ॑ಯೀ॒ಣಾಮ್ । ಪ್ರಿ॒ಯಾ ದೇ॒ವಸ್ಯ॑ ಸವಿ॒ತು-ಸ್ಸ್ಯಾ॑ಮ ॥ ಆ ನೋ॒ ವಿಶ್ವೇ॒ ಅಸ್ಕ್ರಾ॑ ಗಮನ್ತು ದೇ॒ವಾಃ । ಮಿ॒ತ್ರೋ ಅ॑ರ್ಯ॒ಮಾ ವರು॑ಣ-ಸ್ಸ॒ಜೋಷಾಃ᳚ । ಭುವ॒ನ್॒. ಯಥಾ॑ ನೋ॒ ವಿಶ್ವೇ॑ ವೃ॒ಧಾಸಃ॑ । ಕರ᳚ನ್-ಥ್ಸು॒ಷಹಾ॑ ವಿಥು॒ರ-ನ್ನ ಶವಃ॑ ॥ ಶ-ನ್ನೋ॑ ದೇ॒ವಾ ವಿ॒ಶ್ವದೇ॑ವಾ ಭವನ್ತು । ಶಗ್ಂ ಸರ॑ಸ್ವತೀ ಸ॒ಹ ಧೀ॒ಭಿರ॑ಸ್ತು ॥ 42 ॥

ಶಮ॑ಭಿ॒ಷಾಚ॒-ಶ್ಶಮು॑ ರಾತಿ॒ಷಾಚಃ॑ । ಶ-ನ್ನೋ॑ ದಿ॒ವ್ಯಾಃ ಪಾರ್ಥಿ॑ವಾ॒-ಶ್ಶ-ನ್ನೋ॒ ಅಪ್ಯಾಃ᳚ ॥ ಯೇ ಸ॑ವಿ॒ತು-ಸ್ಸ॒ತ್ಯಸ॑ವಸ್ಯ॒ ವಿಶ್ವೇ᳚ । ಮಿ॒ತ್ರಸ್ಯ॑ ವ್ರ॒ತೇ ವರು॑ಣಸ್ಯ ದೇ॒ವಾಃ । ತೇ ಸೌಭ॑ಗಂ-ವೀಁ॒ರವ॒ದ್ಗೋಮ॒ದಪ್ನಃ॑ । ದಧಾ॑ತನ॒ ದ್ರವಿ॑ಣ-ಞ್ಚಿ॒ತ್ರಮ॒ಸ್ಮೇ ॥ ಅಗ್ನೇ॑ ಯಾ॒ಹಿ ದೂ॒ತ್ಯಂ॑-ವಾಁರಿ॑ಷೇಣ್ಯಃ । ದೇ॒ವಾಂ ಅಚ್ಛಾ᳚ ಬ್ರಹ್ಮ॒ಕೃತಾ॑ ಗ॒ಣೇನ॑ । ಸರ॑ಸ್ವತೀ-ಮ್ಮ॒ರುತೋ॑ ಅ॒ಶ್ವಿನಾ-ಽ॒ಪಃ । ಯ॒ಖ್ಷಿ॒ ದೇ॒ವಾ-ನ್ರ॑ತ್ನ॒ಧೇಯಾ॑ಯ॒ ವಿಶ್ವಾನ್॑ ॥ 43 ॥

ದ್ಯೌಃ ಪಿ॑ತಃ॒ ಪೃಥಿ॑ವಿ॒ ಮಾತ॒ರದ್ಧ್ರು॑ಕ್ । ಅಗ್ನೇ᳚ ಭ್ರಾತರ್ವಸವೋ ಮೃ॒ಡತಾ॑ ನಃ । ವಿಶ್ವ॑ ಆದಿತ್ಯಾ ಆದಿತೇ ಸ॒ಜೋಷಾಃ᳚ । ಅ॒ಸ್ಮಭ್ಯ॒ಗ್ಂ॒ ಶರ್ಮ॑ ಬಹು॒ಲಂ-ವಿಁಯ॑ನ್ತ ॥ ವಿಶ್ವೇ॑ ದೇವಾ-ಶ್ಶೃಣು॒ತೇಮಗ್ಂ ಹವ॑-ಮ್ಮೇ । ಯೇ ಅ॒ನ್ತರಿ॑ಖ್ಷೇ॒ ಯ ಉಪ॒ ದ್ಯವಿ॒ ಷ್ಠ । ಯೇ ಅ॑ಗ್ನಿಜಿ॒ಹ್ವಾ ಉ॒ತ ವಾ॒ ಯಜ॑ತ್ರಾಃ । ಆ॒ಸ-ದ್ಯಾ॒ಸ್ಮಿ-ನ್ಬ॒ರ್॒ಹಿಷಿ॑ ಮಾದಯದ್ಧ್ವಮ್ ॥ ಆ ವಾ᳚-ಮ್ಮಿತ್ರಾವರುಣಾ ಹ॒ವ್ಯಜು॑ಷ್ಟಿಮ್ । ನಮ॑ಸಾ ದೇವಾ॒ ವವ॑ಸಾ-ಽಽವವೃತ್ಯಾಮ್ ॥ 44 ॥

ಅ॒ಸ್ಮಾಕ॒-ಮ್ಬ್ರಹ್ಮ॒ ಪೃತ॑ನಾಸು ಸಹ್ಯಾ ಅ॒ಸ್ಮಾಕ᳚ಮ್ । ವೃ॒ಷ್ಟಿ-ರ್ದಿ॒ವ್ಯಾ ಸು॑ಪಾ॒ರಾ ॥ ಯು॒ವಂ-ವಁಸ್ತ್ರಾ॑ಣಿ ಪೀವ॒ಸಾ ವ॑ಸಾಥೇ । ಯು॒ವೋರಚ್ಛಿ॑ದ್ರಾ॒ ಮನ್ತ॑ವೋ ಹ॒ ಸರ್ಗಾಃ᳚ । ಅವಾ॑ತಿರತ॒ಮನೃ॑ತಾನಿ॒ ವಿಶ್ವಾ᳚ । ಋ॒ತೇನ॑ ಮಿತ್ರಾವರುಣಾ ಸಚೇಥೇ ॥ ತಥ್ಸು ವಾ᳚-ಮ್ಮಿತ್ರಾವರುಣಾ ಮಹಿ॒ತ್ವಮ್ । ಈ॒ರ್ಮಾ ತ॒ಸ್ಥುಷೀ॒ರಹ॑ಭಿ-ರ್ದುದುಹ್ರೇ । ವಿಶ್ವಾಃ᳚ ಪಿನ್ವಥ॒ ಸ್ವಸ॑ರಸ್ಯ॒ ಧೇನಾಃ᳚ । ಅನು॑ ವಾ॒ಮೇಕಃ॑ ಪ॒ವಿರಾವ॑ವರ್ತಿ ॥ 45 ॥

ಯದ್ಬಗ್ಂಹಿ॑ಷ್ಠ॒-ನ್ನಾತಿ॒ವಿದೇ॑ ಸುದಾನೂ । ಅಚ್ಛಿ॑ದ್ರ॒ಗ್ಂ॒ ಶರ್ಮ॒ ಭುವ॑ನಸ್ಯ ಗೋಪಾ । ತತೋ॑ ನೋ ಮಿತ್ರಾವರುಣಾ-ವವೀಷ್ಟಮ್ । ಸಿಷಾ॑ಸನ್ತೋ ಜೀಗಿ॒ವಾಗ್ಂಸ॑-ಸ್ಸ್ಯಾಮ ॥ ಆ ನೋ॑ ಮಿತ್ರಾವರುಣಾ ಹ॒ವ್ಯದಾ॑ತಿಮ್ । ಘೃ॒ತೈ-ರ್ಗವ್ಯೂ॑ತಿಮುಖ್ಷತ॒ಮಿಡಾ॑ಭಿಃ । ಪ್ರತಿ॑ ವಾ॒ಮತ್ರ॒ ವರ॒ಮಾ ಜನಾ॑ಯ । ಪೃ॒ಣೀ॒ತಮು॒ದ್ಗೋ ದಿ॒ವ್ಯಸ್ಯ॒ ಚಾರೋಃ᳚ ॥ ಪ್ರ ಬಾ॒ಹವಾ॑ ಸಿಸೃತ-ಞ್ಜೀ॒ವಸೇ॑ ನಃ । ಆ ನೋ॒ ಗವ್ಯೂ॑ತಿಮುಖ್ಷತ-ಙ್ಘೃ॒ತೇನ॑ ॥ 46 ॥

ಆ ನೋ॒ ಜನೇ᳚ ಶ್ರವಯತಂ-ಯುಁವಾನಾ । ಶ್ರು॒ತ-ಮ್ಮೇ॑ ಮಿತ್ರಾವರುಣಾ॒ ಹವೇ॒ಮಾ ॥ ಇ॒ಮಾ ರು॒ದ್ರಾಯ॑ ಸ್ಥಿ॒ರಧ॑ನ್ವನೇ॒ ಗಿರಃ॑ । ಖ್ಷಿ॒ಪ್ರೇಷ॑ವೇ ದೇ॒ವಾಯ॑ ಸ್ವ॒ಧಾಮ್ನೇ᳚ । ಅಷಾ॑ಢಾಯ॒ ಸಹ॑ಮಾನಾಯ ಮೀ॒ಢುಷೇ᳚ । ತಿ॒ಗ್ಮಾಯು॑ಧಾಯ ಭರತಾ ಶೃ॒ಣೋತ॑ನ ॥ ತ್ವಾ ದ॑ತ್ತೇಭೀ ರುದ್ರ॒ ಶನ್ತ॑ಮೇಭಿಃ । ಶ॒ತಗ್ಂ ಹಿಮಾ॑ ಅಶೀಯ ಭೇಷ॒ಜೇಭಿಃ॑ । ವ್ಯ॑ಸ್ಮದ್ದ್ವೇಷೋ॑ ವಿತ॒ರಂ-ವ್ಯಁಗ್ಂಹಃ॑ । ವ್ಯಮೀ॑ವಾಗ್​ ಶ್ಚಾತಯಸ್ವಾ॒ ವಿಷೂ॑ಚೀಃ ॥ 47 ॥

ಅರ್​ಹ॑ನ್ಬಿಭರ್​ಷಿ॒ ಸಾಯ॑ಕಾನಿ॒ ಧನ್ವ॑ । ಅರ್​ಹ॑ನ್ನಿ॒ಷ್ಕಂ-ಯಁ॑ಜ॒ತಂ-ವಿಁ॒ಶ್ವರೂ॑ಪಮ್ । ಅರ್​ಹ॑ನ್ನಿ॒ದನ್ದ॑ಯಸೇ॒ ವಿಶ್ವ॒ಮಬ್ಭು॑ವಮ್ । ನ ವಾ ಓಜೀ॑ಯೋ ರುದ್ರ॒ ತ್ವದ॑ಸ್ತಿ ॥, ಮಾ ನ॑ಸ್ತೋ॒ಕೇ ತನ॑ಯೇ॒ ಮಾ ನ॒ ಆಯು॑ಷಿ॒ ಮಾ ನೋ॒ ಗೋಷು॒ ಮಾ ನೋ॒ ಅಶ್ವೇ॑ಷು ರೀರಿಷಃ । ವೀ॒ರಾ-ನ್ಮಾನೋ॑ ರುದ್ರ ಭಾಮಿ॒ತೋ ವ॑ಧೀರ್​ಹ॒ವಿಷ್ಮ॑ನ್ತೋ॒ ನಮ॑ಸಾ ವಿಧೇಮ ತೇ ॥॥ ಆ ತೇ॑ ಪಿತರ್ಮರುತಾಗ್ಂ ಸು॒ಮ್ನಮೇ॑ತು । ಮಾ ನ॒-ಸ್ಸೂರ್ಯ॑ಸ್ಯ ಸ॒ದೃಂಶೋ॑ ಯುಯೋಥಾಃ । ಅ॒ಭಿ ನೋ॑ ವೀ॒ರೋ ಅರ್ವ॑ತಿ ಖ್ಷಮೇತ । ಪ್ರಜಾ॑ಯೇಮಹಿ ರುದ್ರ ಪ್ರ॒ಜಾಭಿಃ॑ ॥ ಏ॒ವಾ ಬ॑ಭ್ರೋ ವೃಷಭ ಚೇಕಿತಾನ । ಯಥಾ॑ ದೇವ॒ ನ ಹೃ॑ಣೀ॒ಷೇ ನ ಹಗ್ಂಸಿ॑ । ಹಾ॒ವ॒ನ॒ಶ್ರೂರ್ನೋ॑ ರುದ್ರೇ॒ಹ ಬೋ॑ಧಿ । ಬೃ॒ಹದ್ವ॑ದೇಮ ವಿ॒ದಥೇ॑ ಸು॒ವೀರಾಃ᳚ ॥ ಪರಿ॑ಣೋ ರು॒ದ್ರಸ್ಯ॑ ಹೇ॒ತಿ ರ್ವೃ॑ಣಕ್ತು॒ ಪರಿ॑ತ್ವೇ॒ಷಸ್ಯ॑ ದುರ್ಮ॒ತಿರ॑ಘಾ॒ಯೋಃ । ಅವ॑ ಸ್ಥಿ॒ರಾ ಮ॒ಘವ॑ದ್ಭ್ಯ-ಸ್ತನುಷ್ವ॒ ಮೀಢ್ವ॑ಸ್ತೋ॒ಕಾಯ॒ ತನ॑ಯಾಯ ಮೃಡಯ ॥, ಸ್ತು॒ಹಿ ಶ್ರು॒ತ-ಙ್ಗ॑ರ್ತ॒ಸದಂ॒-ಯುಁವಾ॑ನ-ಮ್ಮೃ॒ಗ-ನ್ನ ಭೀ॒ಮ-ಮು॑ಪಹ॒ತ್ನು-ಮು॒ಗ್ರಮ್ । ಮೃ॒ಡಾ ಜ॑ರಿ॒ತ್ರೇ ರು॑ದ್ರ॒ ಸ್ತವಾ॑ನೋ ಅ॒ನ್ಯನ್ತೇ॑ ಅ॒ಸ್ಮನ್ನಿವ॑ಪನ್ತು॒ ಸೇನಾಃ᳚ ॥ । ಮೀಢು॑ಷ್ಟಮ॒ ಶಿವ॑ತಮ ಶಿ॒ವೋ ನ॑-ಸ್ಸು॒ಮನಾ॑ ಭವ ।ಪ॒ರ॒ಮೇ ವೃ॒ಖ್ಷ ಆಯು॑ಧ-ನ್ನಿ॒ಧಾಯ॒ ಕೃತ್ತಿಂ॒-ವಁಸಾ॑ನ॒ ಆಚ॑ರ॒ ಪಿನಾ॑ಕ॒ಮ್ಬಿಭ್ರ॒ದಾಗ॑ಹಿ ॥ ಅರ್​ಹ॑ನ್ಬಿಭರ್​ಷಿ॒ ಸಾಯ॑ಕಾನಿ॒ ಧನ್ವ॑ । ಅರ್​ಹ॑ನ್ನಿ॒ಷ್ಕಂ-ಯಁ॑ಜ॒ತಂ-ವಿಁ॒ಶ್ವರೂ॑ಪಮ್ । ಅರ್​ಹ॑ನ್ನಿ॒ದನ್ದ॑ಯಸೇ॒ ವಿಶ್ವ॒ಮಬ್ಭು॑ವಮ್ । ನ ವಾ ಓಜೀ॑ಯೋ ರುದ್ರ॒ ತ್ವದ॑ಸ್ತಿ ॥। ತ್ವಮ॑ಗ್ನೇ ರು॒ದ್ರೋ ಅಸು॑ರೋ ಮ॒ಹೋ ದಿ॒ವಸ್ತ್ವಗ್ಂ ಶರ್ಧೋ॒ ಮಾರು॑ತ-ಮ್ಪೃ॒ಖ್ಷ ಈ॑ಶಿಷೇ । ತ್ವಂ-ವಾಁತೈ॑ರರು॒ಣೈರ್ಯಾ॑ಸಿ ಶಙ್ಗ॒ಯಸ್ತ್ವ-ಮ್ಪೂ॒ಷಾ ವಿ॑ಧ॒ತಃ ಪಾ॑ಸಿ॒ ನುತ್ಮನಾ᳚ ॥, ಆ ವೋ॒ ರಾಜಾ॑ನಮಧ್ವ॒ರಸ್ಯ॑ ರು॒ದ್ರಗ್ಂ ಹೋತಾ॑ರಗ್ಂ ಸತ್ಯ॒ಯಜ॒ಗ್ಂ॒ ರೋದ॑ಸ್ಯೋಃ । ಅ॒ಗ್ನಿ-ಮ್ಪು॒ರಾ ತ॑ನಯಿ॒ತ್ನೋ ರ॒ಚಿತ್ತಾ॒-ದ್ಧಿರ॑ಣ್ಯರೂಪ॒ಮವ॑ಸೇ ಕೃಣುಧ್ವಮ್ ॥ ॥ 48 ॥
(ವಸೂ॑ನಿ - ತತಾ - ನಾಸ್ತು॒ - ವಿಶ್ವಾನ್॑.-ವವೃತ್ಯಾಂ​ವಁವರ್ತಿ-ಘೃ॒ತೇನ॒-ವಿಷೂ॑ಚೀಃ-ಶ್ರು॒ತ-ನ್ದ್ವೇ ಚ॑) (ಅ. 6)

ಅನುವಾಕಂ 7 - ಸೌರ್ಯಾದಿಪಶೂನಾಂ ಸೂಕ್ತಾನಿ
ಸೂರ್ಯೋ॑ ದೇ॒ವೀಮು॒ಷಸ॒ಗ್ಂ ರೋಚ॑ಮಾನಾ॒ ಮರ್ಯಃ॑ । ನ ಯೋಷಾ॑ಮ॒ಭ್ಯೇ॑ತಿ ಪ॒ಶ್ಚಾತ್ । ಯತ್ರಾ॒ ನರೋ॑ ದೇವ॒ಯನ್ತೋ॑ ಯು॒ಗಾನಿ॑ । ವಿ॒ತ॒ನ್ವತೇ॒ ಪ್ರತಿ॑ ಭ॒ದ್ರಾಯ॑ ಭ॒ದ್ರಮ್ ॥ ಭ॒ದ್ರಾ ಅಶ್ವಾ॑ ಹ॒ರಿತ॒-ಸ್ಸೂರ್ಯ॑ಸ್ಯ । ಚಿ॒ತ್ರಾ ಏದ॑ಗ್ವಾ ಅನು॒ಮಾದ್ಯಾ॑ಸಃ । ನ॒ಮ॒ಸ್ಯನ್ತೋ॑ ದಿ॒ವ ಆ ಪೃ॒ಷ್ಠಮ॑ಸ್ಥುಃ ।
ಪರಿ॒ ದ್ಯಾವಾ॑ಪೃಥಿ॒ವೀ ಯ॑ನ್ತಿ ಸ॒ದ್ಯಃ ॥ ತ-ಥ್ಸೂರ್ಯ॑ಸ್ಯ ದೇವ॒ತ್ವ-ನ್ತ-ನ್ಮ॑ಹಿ॒ತ್ವಮ್ । ಮ॒ದ್ಧ್ಯಾ ಕರ್ತೋ॒-ರ್ವಿತ॑ತ॒ಗ್ಂ॒ ಸಞ್ಜ॑ಭಾರ ॥ 49 ॥

ಯ॒ದೇದಯು॑ಕ್ತ ಹ॒ರಿತ॑-ಸ್ಸ॒ಧಸ್ಥಾ᳚ತ್ । ಆದ್ರಾತ್ರೀ॒ ವಾಸ॑ಸ್ತನುತೇ ಸಿ॒ಮಸ್ಮೈ᳚ ॥ ತ-ನ್ಮಿ॒ತ್ರಸ್ಯ॒ ವರು॑ಣಸ್ಯಾಭಿ॒ಚಖ್ಷೇ᳚ । ಸೂರ್ಯೋ॑ ರೂ॒ಪ-ಙ್ಕೃ॑ಣುತೇ॒ ದ್ಯೋರು॒ಪಸ್ಥೇ᳚ । ಅ॒ನ॒ನ್ತಮ॒ನ್ಯ-ದ್ರುಶ॑ದಸ್ಯ॒ ಪಾಜಃ॑ । ಕೃ॒ಷ್ಣಮ॒ನ್ಯದ್ಧ॒ರಿತ॒-ಸ್ಸಮ್ಭ॑ರನ್ತಿ ॥ ಅ॒ದ್ಯಾ ದೇ॑ವಾ॒ ಉದಿ॑ತಾ॒ ಸೂರ್ಯ॑ಸ್ಯ । ನಿರಗ್ಂಹ॑ಸಃ ಪಿಪೃ॒ತಾನ್ನಿರ॑ವ॒ದ್ಯಾತ್ । ತನ್ನೋ॑ ಮಿ॒ತ್ರೋ ವರು॑ಣೋ ಮಾಮಹನ್ತಾಮ್ । ಅದಿ॑ತಿ॒-ಸ್ಸಿನ್ಧುಃ॑ ಪೃಥಿ॒ವೀ ಉ॒ತ ದ್ಯೌಃ ॥ 50 ॥

ದಿ॒ವೋ ರು॒ಕ್ಮ ಉ॑ರು॒ಚಖ್ಷಾ॒ ಉದೇ॑ತಿ । ದೂ॒ರೇ ಅ॑ರ್ಥಸ್ತ॒ರಣಿ॒-ರ್ಭ್ರಾಜ॑ಮಾನಃ । ನೂ॒ನ-ಞ್ಜನಾ॒-ಸ್ಸೂರ್ಯೇ॑ಣ॒ ಪ್ರಸೂ॑ತಾಃ । ಆಯನ್ನರ್ಥಾ॑ನಿ ಕೃ॒ಣವ॒ನ್ನಪಾಗ್ಂ॑ಸಿ ॥ ಶ-ನ್ನೋ॑ ಭವ॒ ಚಖ್ಷ॑ಸಾ॒ ಶ-ನ್ನೋ॒ ಅಹ್ನಾ᳚ । ಶ-ಮ್ಭಾ॒ನುನಾ॒ ಶಗ್ಂ ಹಿ॒ಮಾ ಶ-ಙ್ಘೃ॒ಣೇನ॑ । ಯಥಾ॒ ಶಮ॒ಸ್ಮೈ ಶಮಸ॑-ದ್ದುರೋ॒ಣೇ । ತ-ಥ್ಸೂ᳚ರ್ಯ॒ ದ್ರವಿ॑ಣ-ನ್ಧೇ॒ಹಿ ಚಿ॒ತ್ರಮ್ ॥ ಚಿ॒ತ್ರ-ನ್ದೇ॒ವಾನಾ॒-ಮುದ॑ಗಾ॒ದನೀ॑ಕಮ್ । ಚಖ್ಷು॑ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒ಗ್ನೇಃ ॥ 51 ॥

ಆ-ಽಪ್ರಾ॒ ದ್ಯಾವಾ॑ಪೃಥಿ॒ವೀ ಅ॒ನ್ತರಿ॑ಖ್ಷಮ್ । ಸೂರ್ಯ॑ ಆ॒ತ್ಮಾ ಜಗ॑ತಸ್ತ॒ಸ್ಥುಷ॑ಶ್ಚ ॥ ತ್ವಷ್ಟಾ॒ ದಧ॒ದಿನ್ದ್ರಾ॑ಯ॒ ಶುಷ್ಮ᳚ಮ್ । ಅಪಾ॒ಕೋ-ಽಚಿ॑ಷ್ಟುರ್ಯ॒ಶಸೇ॑ ಪು॒ರೂಣಿ॑ । ವೃಷಾ॒ ಯಜ॒ನ್ ವೃಷ॑ಣ॒-ಮ್ಭೂರಿ॑ರೇತಾಃ । ಮೂ॒ರ್ಧನ್. ಯ॒ಜ್ಞಸ್ಯ॒ ಸಮ॑ನಕ್ತು ದೇ॒ವಾನ್ ॥, ತನ್ನ॑ಸ್ತು॒ರೀಪ॒ಮಧ॑ ಪೋಷಯಿ॒ತ್ನು ದೇವ॑ ತ್ವಷ್ಟ॒ರ್ವಿ ರ॑ರಾ॒ಣ-ಸ್ಸ್ಯ॑ಸ್ವ । ಯತೋ॑ ವೀ॒ರಃ ಕ॑ರ್ಮ॒ಣ್ಯ॑-ಸ್ಸು॒ದಖ್ಷೋ॑ ಯು॒ಕ್ತಗ್ರಾ॑ವಾ॒ ಜಾಯ॑ತೇ ದೇ॒ವಕಾ॑ಮಃ ॥ । ತ್ವಷ್ಟಾ॑ ವೀ॒ರ-ನ್ದೇ॒ವಕಾ॑ಮ-ಞ್ಜಜಾನ॒ ತ್ವಷ್ಟು॒ರರ್ವಾ॑ ಜಾಯತ ಆ॒ಶುರಶ್ವಃ॑ । ತ್ವಷ್ಟೇ॒ದಂ-ವಿಁಶ್ವ॒-ಮ್ಭುವ॑ನ-ಞ್ಜಜಾನ ಬ॒ಹೋಃ ಕ॒ರ್ತಾರ॑ಮಿ॒ಹ ಯ॑ಖ್ಷಿ ಹೋತಃ ॥ ಪಿ॒ಶಙ್ಗ॑ರೂಪ-ಸ್ಸು॒ಭರೋ॑ ವಯೋ॒ಧಾ-ಶ್ಶ್ರು॒ಷ್ಟೀ ವೀ॒ರೋ ಜಾ॑ಯತೇ ದೇ॒ವಕಾ॑ಮಃ । ಪ್ರ॒ಜಾ-ನ್ತ್ವಷ್ಟಾ॒ ವಿಷ್ಯ॑ತು॒ ನಾಭಿ॑ಮ॒ಸ್ಮೇ ಅಥಾ॑ ದೇ॒ವಾನಾ॒ಮಪ್ಯೇ॑ತು॒ ಪಾಥಃ॑ ॥ ॥ ದಶೇ॒ಮ-ನ್ತ್ವಷ್ಟು॑ರ್ಜನಯನ್ತ॒ ಗರ್ಭ᳚ಮ್ । ಅತ॑ನ್ದ್ರಾಸೋ ಯುವ॒ತಯೋ॒ ಬಿಭ॑ರ್ತ್ರಮ್ । ತಿ॒ಗ್ಮಾನೀ॑ಕ॒ಗ್ಗ್॒ ಸ್ವಯ॑ಶಸ॒-ಞ್ಜನೇ॑ಷು । ವಿ॒ರೋಚ॑ಮಾನ॒-ಮ್ಪರಿ॑ಷೀ-ನ್ನಯನ್ತಿ ॥ ಆವಿಷ್ಟ್ಯೋ॑ ವರ್ಧತೇ॒ ಚಾರು॑ರಾಸು । ಜಿ॒ಹ್ಮಾನಾ॑ಮೂ॒ರ್ಧ್ವ-ಸ್ಸ್ವಯ॑ಶಾ ಉ॒ಪಸ್ಥೇ᳚ ॥ 52 ॥

ಉ॒ಭೇ ತ್ವಷ್ಟು॑ರ್ಬಿಭ್ಯತು॒-ರ್ಜಾಯ॑ಮಾನಾತ್ । ಪ್ರ॒ತೀಚೀ॑ ಸಿ॒ಗ್ಂ॒ಹ-ಮ್ಪ್ರತಿ॑ಜೋಷಯೇತೇ ॥ ಮಿ॒ತ್ರೋ ಜನಾನ್॑ ಯಾತಯತಿ ಪ್ರಜಾ॒ನ-ನ್ಮಿ॒ತ್ರೋ ದಾ॑ಧಾರ ಪೃಥಿ॒ವೀಮು॒ತ ದ್ಯಾಮ್ । ಮಿ॒ತ್ರಃ ಕೃ॒ಷ್ಟೀರನಿ॑ಮಿಷಾ॒-ಽಭಿ ಚ॑ಷ್ಟೇ ಸ॒ತ್ಯಾಯ॑ ಹ॒ವ್ಯ-ಙ್ಘೃ॒ತವ॑-ದ್ವಿಧೇಮ ॥, ಪ್ರ ಸ ಮಿ॑ತ್ರ॒ ಮರ್ತೋ॑ ಅಸ್ತು॒ ಪ್ರಯ॑ಸ್ವಾ॒ನ್ ಯಸ್ತ॑ ಆದಿತ್ಯ॒ ಶಿಖ್ಷ॑ತಿ ವ್ರ॒ತೇನ॑ । ನ ಹ॑ನ್ಯತೇ॒ ನ ಜೀ॑ಯತೇ॒ ತ್ವೋತೋ॒ ನೈನ॒ಮಗ್ಂಹೋ॑ ಅಶ್ನೋ॒ತ್ಯನ್ತಿ॑ತೋ॒ ನ ದೂ॒ರಾತ್ ॥ ॥ ಅ॒ಯ-ಮ್ಮಿ॒ತ್ರೋ ನ॑ಮ॒ಸ್ಯ॑-ಸ್ಸು॒ಶೇವಃ॑ । ರಾಜಾ॑ ಸುಖ್ಷ॒ತ್ರೋ ಅ॑ಜನಿಷ್ಟ ವೇ॒ಧಾಃ । ತಸ್ಯ॑ ವ॒ಯಗ್ಂ ಸು॑ಮ॒ತೌ ಯ॒ಜ್ಞಿಯ॑ಸ್ಯ । ಅಪಿ॑ ಭ॒ದ್ರೇ ಸೌ॑ಮನ॒ಸೇ ಸ್ಯಾ॑ಮ ॥ ಅ॒ನ॒ಮೀ॒ವಾಸ॒ ಇಡ॑ಯಾ॒ ಮದ॑ನ್ತಃ । ಮಿ॒ತಜ್ಮ॑ವೋ॒ ವರಿ॑ಮ॒ನ್ನಾ ಪೃ॑ಥಿ॒ವ್ಯಾಃ । ಆ॒ದಿ॒ತ್ಯಸ್ಯ॑ ವ್ರ॒ತಮು॑ಪ॒ಖ್ಷ್ಯನ್ತಃ॑ ॥ 53 ॥

ವ॒ಯ-ಮ್ಮಿ॒ತ್ರಸ್ಯ॑ ಸುಮ॒ತೌ ಸ್ಯಾ॑ಮ ॥ ಮಿ॒ತ್ರ-ನ್ನ ಈಗ್ಂ ಶಿಮ್ಯಾ॒ ಗೋಷು॑ ಗ॒ವ್ಯವ॑ತ್ । ಸ್ವಾ॒ಧಿಯೋ॑ ವಿ॒ದಥೇ॑ ಅ॒ಫ್ಸ್ವಜೀ॑ಜನನ್ನ್ । ಅರೇ॑ಜಯತಾ॒ಗ್ಂ॒ ರೋದ॑ಸೀ॒ ಪಾಜ॑ಸಾ ಗಿ॒ರಾ । ಪ್ರತಿ॑ ಪ್ರಿ॒ಯಂ-ಯಁ॑ಜ॒ತ-ಞ್ಜ॒ನುಷಾ॒ಮವಃ॑ ॥ ಮ॒ಹಾಗ್ಂ ಆ॑ದಿ॒ತ್ಯೋ ನಮ॑ಸೋಪ॒ಸದ್ಯಃ॑ । ಯಾ॒ತ॒ಯಜ್ಜ॑ನೋ ಗೃಣ॒ತೇ ಸು॒ಶೇವಃ॑ । ತಸ್ಮಾ॑ ಏ॒ತ-ತ್ಪನ್ಯ॑ತಮಾಯ॒ ಜುಷ್ಟ᳚ಮ್ । ಅ॒ಗ್ನೌ ಮಿ॒ತ್ರಾಯ॑ ಹ॒ವಿರಾಜು॑ಹೋತ ॥ ಆವಾ॒ಗ್ಂ॒ ರಥೋ॒ ರೋದ॑ಸೀ ಬದ್ಬಧಾ॒ನಃ ॥ 54 ॥

ಹಿ॒ರ॒ಣ್ಯಯೋ॒ ವೃಷ॑ಭಿರ್ಯಾ॒ತ್ವಶ್ವೈಃ᳚ । ಘೃ॒ತವ॑ರ್ತನಿಃ ಪ॒ವಿಭೀ॑ ರುಚಾ॒ನಃ । ಇ॒ಷಾಂ-ವೋಁ॒ಢಾ ನೃ॒ಪತಿ॑ರ್ವಾ॒ಜಿನೀ॑ವಾನ್ ॥ ಸ ಪ॑ಪ್ರಥಾ॒ನೋ ಅ॒ಭಿ ಪಞ್ಚ॒ ಭೂಮ॑ । ತ್ರಿ॒ವ॒ನ್ಧು॒ರೋ ಮನ॒ಸಾ-ಽಽಯಾ॑ತು ಯು॒ಕ್ತಃ । ವಿಶೋ॒ ಯೇನ॒ ಗಚ್ಛ॑ಥೋ ದೇವ॒ಯನ್ತೀಃ᳚ । ಕುತ್ರಾ॑ ಚಿ॒ದ್ಯಾಮ॑ಮಶ್ವಿನಾ॒ ದಧಾ॑ನಾ ॥ ಸ್ವಶ್ವಾ॑ ಯ॒ಶಸಾ-ಽಽಯಾ॑ತಮ॒ರ್ವಾಕ್ । ದಸ್ರಾ॑ ನಿ॒ಧಿ-ಮ್ಮಧು॑ಮನ್ತ-ಮ್ಪಿಬಾಥಃ । ವಿ ವಾ॒ಗ್ಂ॒ ರಥೋ॑ ವ॒ದ್ಧ್ವಾ॑ ಯಾದ॑ಮಾನಃ ॥ 55 ॥

ಅನ್ತಾ᳚-ನ್ದಿ॒ವೋ ಬಾ॑ಧತೇ ವರ್ತ॒ನಿಭ್ಯಾ᳚ಮ್ ॥ ಯು॒ವೋ-ಶ್ಶ್ರಿಯ॒-ಮ್ಪರಿ॒ ಯೋಷಾ॑ ವೃಣೀತ । ಸೂರೋ॑ ದುಹಿ॒ತಾ ಪರಿ॑ತಕ್ಮಿಯಾಯಾಮ್ । ಯ-ದ್ದೇ॑ವ॒ಯನ್ತ॒ಮವ॑ಥ॒-ಶ್ಶಚೀ॑ಭಿಃ । ಪರಿ॑ಘ್ರ॒ಗ್ಂ॒ಸ ವಾ॒-ಮ್ಮನಾ॑ ವಾಂ॒-ವಁಯೋ॑ ಗಾಮ್ ॥ ಯೋ ಹ॒ ಸ್ಯ ವಾಗ್ಂ॑ ರಥಿರಾ॒ ವಸ್ತ॑ ಉ॒ಸ್ರಾಃ । ರಥೋ॑ ಯುಜಾ॒ನಃ ಪ॑ರಿ॒ಯಾತಿ॑ ವ॒ರ್ತಿಃ । ತೇನ॑ ನ॒-ಶ್ಶಂ-ಯೋಁರು॒ಷಸೋ॒ ವ್ಯು॑ಷ್ಟೌ । ನ್ಯ॑ಶ್ವಿನಾ ವಹತಂ-ಯಁ॒ಜ್ಞೇ ಅ॒ಸ್ಮಿನ್ನ್ ॥ ಯು॒ವ-ಮ್ಭು॒ಜ್ಯುಮವ॑ವಿದ್ಧಗ್ಂ ಸಮು॒ದ್ರೇ ॥ 56 ॥

ಉದೂ॑ಹಥು॒ರರ್ಣ॑ಸೋ॒ ಅಸ್ರಿ॑ಧಾನೈಃ । ಪ॒ತ॒ತ್ರಿಭಿ॑-ರಶ್ರ॒ಮೈ-ರ॑ವ್ಯ॒ಥಿಭಿಃ॑ । ದ॒ಗ್ಂ॒ಸನಾ॑ಭಿರಶ್ವಿನಾ ಪಾ॒ರಯ॑ನ್ತಾ ॥ ಅಗ್ನೀ॑ಷೋಮಾ॒ ಯೋ ಅ॒ದ್ಯ ವಾ᳚ಮ್ । ಇ॒ದಂ-ವಁಚ॑-ಸ್ಸಪ॒ರ್ಯತಿ॑ । ತಸ್ಮೈ॑ ಧತ್ತಗ್ಂ ಸು॒ವೀರ್ಯ᳚ಮ್ । ಗವಾ॒-ಮ್ಪೋಷ॒ಗ್ಗ್॒ ಸ್ವಶ್ವಿ॑ಯಮ್ ॥ ಯೋ ಅ॒ಗ್ನೀಷೋಮಾ॑ ಹ॒ವಿಷಾ॑ ಸಪ॒ರ್ಯಾತ್ । ದೇ॒ವ॒ದ್ರೀಚಾ॒ ಮನ॑ಸಾ॒ ಯೋ ಘೃ॒ತೇನ॑ । ತಸ್ಯ॑ ವ್ರ॒ತಗ್ಂ ರ॑ಖ್ಷತ-ಮ್ಪಾ॒ತಮಗ್ಂಹ॑ಸಃ ॥ 57 ॥

ವಿ॒ಶೇ ಜನಾ॑ಯ॒ ಮಹಿ॒ ಶರ್ಮ॑ ಯಚ್ಛತಮ್ ॥ ಅಗ್ನೀ॑ಷೋಮಾ॒ ಯ ಆಹು॑ತಿಮ್ । ಯೋ ವಾ॒-ನ್ದಾಶಾ᳚ದ್ಧ॒ವಿಷ್ಕೃ॑ತಿಮ್ । ಸ ಪ್ರ॒ಜಯಾ॑ ಸು॒ವೀರ್ಯ᳚ಮ್ । ವಿಶ್ವ॒ಮಾಯು॒-ರ್ವ್ಯ॑ಶ್ನವತ್ ॥ ಅಗ್ನೀ॑ಷೋಮಾ॒ ಚೇತಿ॒ ತ-ದ್ವೀ॒ರ್ಯಂ॑-ವಾಁಮ್ । ಯದಮು॑ಷ್ಣೀತಮವ॒ಸ-ಮ್ಪ॒ಣಿ-ಙ್ಗೋಃ । ಅವಾ॑ತಿರತ॒-ಮ್ಪ್ರಥ॑ಯಸ್ಯ॒ ಶೇಷಃ॑ । ಅವಿ॑ನ್ದತ॒-ಞ್ಜ್ಯೋತಿ॒ರೇಕ॑-ಮ್ಬ॒ಹುಭ್ಯಃ॑ ॥ ಅಗ್ನೀ॑ಷೋಮಾ ವಿ॒ಮಗ್ಂ ಸು ಮೇ॑ ಶೃಣು॒ತಂ-ವೃಁ॑ಷಣಾ॒ ಹವ᳚ಮ್ । ಪ್ರತಿ॑ ಸೂ॒ಕ್ತಾನಿ॑ ಹರ್ಯತ॒-ಮ್ಭವ॑ತ-ನ್ದಾ॒ಶುಷೇ॒ ಮಯಃ॑ ॥ ಅಗ್ನೀ॑ಷೋಮಾ ಹ॒ವಿಷಃ॒ ಪ್ರಸ್ಥಿ॑ತಸ್ಯ ವೀ॒ತಗ್ಂಹರ್ಯ॑ತಂ-ವೃಁಷಣಾ ಜು॒ಷೇಥಾ᳚ಮ್ । ಸು॒ಶರ್ಮಾ॑ಣಾ॒ ಸ್ವವ॑ಸಾ॒ ಹಿ ಭೂ॒ತಮಥಾ॑ ಧತ್ತಂ॒-ಯಁಜ॑ಮಾನಾಯ॒ ಶಂ-ಯೋಃ ಁ॥ ॥ 58 ॥
(ಜ॒ಭಾ॒ರ॒ - ದ್ಯೌ - ರ॒ಗ್ನೇ - ರು॒ಪಸ್ಥ॑ - ಉಪ॒ಖ್ಷ್ಯನ್ತೋ॑ - ಬದ್ಬಧಾ॒ನೋ-ಯಾದ॑ಮಾನಃ - ಸಮು॒ದ್ರೇ - ಽಗ್ಂಹ॑ಸಃ॒ - ಪ್ರಸ್ಥಿ॑ತಸ್ಯ) (ಅ. 7)

ಅನುವಾಕಂ 8 - ವೇಹದಾದಿಪಶೂನಾಂ ಸೂಕ್ತಾನಿ
ಅ॒ಹಮ॑ಸ್ಮಿ ಪ್ರಥಮ॒ಜಾ ಋ॒ತಸ್ಯ॑ । ಪೂರ್ವ॑-ನ್ದೇ॒ವೇಭ್ಯೋ॑ ಅ॒ಮೃತ॑ಸ್ಯ॒ ನಾಭಿಃ॑ । ಯೋ ಮಾ॒ ದದಾ॑ತಿ॒ ಸ ಇದೇ॒ವ ಮಾ ವಾಃ᳚ । ಅ॒ಹ-ಮನ್ನ॒-ಮನ್ನ॑-ಮ॒ದನ್ತ॑ಮದ್ಮಿ ॥ ಪೂರ್ವ॑-ಮ॒ಗ್ನೇರಪಿ॑ ದಹ॒ತ್ಯನ್ನ᳚ಮ್ । ಯ॒ತ್ತೌ ಹಾ॑-ಽಽಸಾತೇ ಅಹಮುತ್ತ॒ರೇಷು॑ । ವ್ಯಾತ್ತ॑ಮಸ್ಯ ಪ॒ಶವ॑-ಸ್ಸು॒ಜಮ್ಭ᳚ಮ್ । ಪಶ್ಯ॑ನ್ತಿ॒ ಧೀರಾಃ॒ ಪ್ರಚ॑ರನ್ತಿ॒ ಪಾಕಾಃ᳚ ॥ ಜಹಾ᳚ಮ್ಯ॒ನ್ಯ-ನ್ನ ಜ॑ಹಾಮ್ಯ॒ನ್ಯಮ್ । ಅ॒ಹಮನ್ನಂ॒-ವಁಶ॒ಮಿಚ್ಚ॑ರಾಮಿ ॥ 59 ॥

ಸ॒ಮಾ॒ನಮರ್ಥ॒-ಮ್ಪರ್ಯೇ॑ಮಿ ಭು॒ಞ್ಜತ್ । ಕೋ ಮಾಮನ್ನ॑-ಮ್ಮನು॒ಷ್ಯೋ॑ ದಯೇತ ॥ ಪರಾ॑ಕೇ॒ ಅನ್ನ॒-ನ್ನಿಹಿ॑ತಂ-ಲೋಁ॒ಕ ಏ॒ತತ್ । ವಿಶ್ವೈ᳚-ರ್ದೇ॒ವೈಃ ಪಿ॒ತೃಭಿ॑-ರ್ಗು॒ಪ್ತಮನ್ನ᳚ಮ್ । ಯದ॒ದ್ಯತೇ॑ ಲು॒ಪ್ಯತೇ॒ ಯ-ತ್ಪ॑ರೋ॒ಪ್ಯತೇ᳚ । ಶ॒ತ॒ತ॒ಮೀ ಸಾ ತ॒ನೂರ್ಮೇ॑ ಬಭೂವ ॥ ಮ॒ಹಾನ್ತೌ॑ ಚ॒ರೂ ಸ॑ಕೃ-ದ್ದು॒ಗ್ಧೇನ॑ ಪಪ್ರೌ । ದಿವ॑ಞ್ಚ॒ ಪೃಶ್ಞಿ॑ ಪೃಥಿ॒ವೀ-ಞ್ಚ॑ ಸಾ॒ಕಮ್ । ತ-ಥ್ಸ॒ಮ್ಪಿಬ॑ನ್ತೋ॒ ನ ಮಿ॑ನನ್ತಿ ವೇ॒ಧಸಃ॑ । ನೈತ-ದ್ಭೂಯೋ॒ ಭವ॑ತಿ॒ ನೋ ಕನೀ॑ಯಃ ॥ 60 ॥

ಅನ್ನ॑-ಮ್ಪ್ರಾ॒ಣ-ಮನ್ನ॑-ಮಪಾ॒ನ-ಮಾ॑ಹುಃ । ಅನ್ನ॑-ಮ್ಮೃ॒ತ್ಯು-ನ್ತಮು॑ ಜೀ॒ವಾತು॑ಮಾಹುಃ । ಅನ್ನ॑-ಮ್ಬ್ರ॒ಹ್ಮಾಣೋ॑ ಜ॒ರಸಂ॑-ವಁದನ್ತಿ । ಅನ್ನ॑ಮಾಹುಃ ಪ್ರ॒ಜನ॑ನ-ಮ್ಪ್ರ॒ಜಾನಾ᳚ಮ್ ॥ ಮೋಘ॒ಮನ್ನಂ॑-ವಿಁನ್ದತೇ॒ ಅಪ್ರ॑ಚೇತಾಃ । ಸ॒ತ್ಯ-ಮ್ಬ್ರ॑ವೀಮಿ ವ॒ಧ ಇಥ್ಸ ತಸ್ಯ॑ । ನಾರ್ಯ॒ಮಣ॒-ಮ್ಪುಷ್ಯ॑ತಿ॒ ನೋ ಸಖಾ॑ಯಮ್ । ಕೇವ॑ಲಾಘೋ ಭವತಿ ಕೇವಲಾ॒ದೀ ॥ ಅ॒ಹ-ಮ್ಮೇ॒ಘ-ಸ್ಸ್ತ॒ನಯ॒ನ್. ವರ್​ಷ॑ನ್ನಸ್ಮಿ । ಮಾಮ॑ದನ್ತ್ಯ॒ಹಮ॑ದ್ಮ್ಯ॒ನ್ಯಾನ್ ॥ 61 ॥

ಅ॒ಹಗ್ಂ ಸದ॒ಮೃತೋ॑ ಭವಾಮಿ । ಮದಾ॑ದಿ॒ತ್ಯಾ ಅಧಿ॒ ಸರ್ವೇ॑ ತಪನ್ತಿ ॥ ಸಾ ನೋ॑ ಮ॒ನ್ದ್ರೇಷ॒ಮೂರ್ಜ॒-ನ್ದುಹಾ॑ನಾ । ಧೇ॒ನುರ್ವಾಗ॒ಸ್ಮಾನುಪ॒ ಸುಷ್ಟು॒ತೈತು॑ ॥, ಯ-ದ್ವಾಗ್ವದ॑ನ್ತ್ಯ-ವಿಚೇತ॒ನಾನಿ॑ । ರಾಷ್ಟ್ರೀ॑ ದೇ॒ವಾನಾ᳚-ನ್ನಿಷ॒ಸಾದ॑ ಮ॒ನ್ದ್ರಾ । ಚತ॑ಸ್ರ॒ ಊರ್ಜ॑-ನ್ದುದುಹೇ॒ ಪಯಾಗ್ಂ॑ಸಿ । ಕ್ವ॑ ಸ್ವಿ ದಸ್ಯಾಃ ಪರ॒ಮ-ಞ್ಜ॑ಗಾಮ ॥ ॥ ಅ॒ನ॒ನ್ತಾ-ಮನ್ತಾ॒ದಧಿ॒ ನಿರ್ಮಿ॑ತಾ-ಮ್ಮ॒ಹೀಮ್ । ಯಸ್ಯಾ᳚-ನ್ದೇ॒ವಾ ಅ॑ದಧು॒-ರ್ಭೋಜ॑ನಾನಿ । ಏಕಾ᳚ಖ್ಷರಾ-ನ್ದ್ವಿ॒ಪದಾ॒ಗ್ಂ॒ ಷಟ್ಪ॑ದಾಞ್ಚ । ವಾಚ॑-ನ್ದೇ॒ವಾ ಉಪ॑ಜೀವನ್ತಿ॒ ವಿಶ್ವೇ᳚ ॥ ವಾಚ॑-ನ್ದೇ॒ವಾ ಉಪ॑ಜೀವನ್ತಿ॒ ವಿಶ್ವೇ᳚ । ವಾಚ॑-ಙ್ಗನ್ಧ॒ರ್ವಾಃ ಪ॒ಶವೋ॑ ಮನು॒ಷ್ಯಾಃ᳚ । ವಾ॒ಚೀಮಾ ವಿಶ್ವಾ॒ ಭುವ॑ನಾ॒ನ್ಯರ್ಪಿ॑ತಾ ॥ 62 ॥

ಸಾ ನೋ॒ ಹವ॑-ಞ್ಜುಷತಾ॒-ಮಿನ್ದ್ರ॑ಪತ್ನೀ ॥ ವಾಗ॒ಖ್ಷರ॑-ಮ್ಪ್ರಥಮ॒ಜಾ ಋ॒ತಸ್ಯ॑ । ವೇದಾ॑ನಾ-ಮ್ಮಾ॒ತಾ-ಽಮೃತ॑ಸ್ಯ॒ ನಾಭಿಃ॑ । ಸಾ ನೋ॑ ಜುಷಾ॒ಣೋಪ॑ ಯ॒ಜ್ಞಮಾಗಾ᳚ತ್ । ಅವ॑ನ್ತೀ ದೇ॒ವೀ ಸು॒ಹವಾ॑ ಮೇ ಅಸ್ತು ॥ ಯಾ ಮೃಷ॑ಯೋ ಮನ್ತ್ರ॒ಕೃತೋ॑ ಮನೀ॒ಷಿಣಃ॑ । ಅ॒ನ್ವೈಚ್ಛ॑-ನ್ದೇ॒ವಾ-ಸ್ತಪ॑ಸಾ॒ ಶ್ರಮೇ॑ಣ । ತಾ-ನ್ದೇ॒ವೀಂ-ವಾಁಚಗ್ಂ॑ ಹ॒ವಿಷಾ॑ ಯಜಾಮಹೇ । ಸಾ ನೋ॑ ದಧಾತು ಸುಕೃ॒ತಸ್ಯ॑ ಲೋ॒ಕೇ ॥ ಚ॒ತ್ವಾರಿ॒ ವಾ-ಕ್ಪರಿ॑ಮಿತಾ ಪ॒ದಾನಿ॑ ॥ 63 ॥

ತಾನಿ॑ ವಿದು-ರ್ಬ್ರಾಹ್ಮ॒ಣಾ ಯೇ ಮ॑ನೀ॒ಷಿಣಃ॑ । ಗುಹಾ॒ ತ್ರೀಣಿ॒ ನಿಹಿ॑ತಾ॒ ನೇಙ್ಗ॑ಯನ್ತಿ । ತು॒ರೀಯಂ॑-ವಾಁ॒ಚೋ ಮ॑ನು॒ಷ್ಯಾ॑ ವದನ್ತಿ ॥ ಶ್ರ॒ದ್ಧಯಾ॒-ಽಗ್ನಿ-ಸ್ಸಮಿ॑ದ್ಧ್ಯತೇ । ಶ್ರ॒ದ್ಧಯಾ॑ ವಿನ್ದತೇ ಹ॒ವಿಃ । ಶ್ರ॒ದ್ಧಾ-ಮ್ಭಗ॑ಸ್ಯ ಮೂ॒ರ್ಧನಿ॑ । ವಚ॒ಸಾ ಽಽವೇ॑ದಯಾಮಸಿ ॥ ಪ್ರಿ॒ಯಗ್ಗ್​ ಶ್ರ॑ದ್ಧೇ॒ ದದ॑ತಃ । ಪ್ರಿ॒ಯಗ್ಗ್​ ಶ್ರ॑ದ್ಧೇ॒ ದಿದಾ॑ಸತಃ । ಪ್ರಿ॒ಯ-ಮ್ಭೋ॒ಜೇಷು॒ ಯಜ್ವ॑ಸು ॥ 64 ॥

ಇ॒ದ-ಮ್ಮ॑ ಉದಿ॒ತ-ಙ್ಕೃ॑ಧಿ ॥ ಯಥಾ॑ ದೇ॒ವಾ ಅಸು॑ರೇಷು । ಶ್ರ॒ದ್ಧಾ-ಮು॒ಗ್ರೇಷು॑ ಚಕ್ರಿ॒ರೇ । ಏ॒ವ-ಮ್ಭೋ॒ಜೇಷು॒ ಯಜ್ವ॑ಸು । ಅ॒ಸ್ಮಾಕ॑-ಮುದಿ॒ತ-ಙ್ಕೃ॑ಧಿ ॥ ಶ್ರ॒ದ್ಧಾ-ನ್ದೇ॑ವಾ॒ ಯಜ॑ಮಾನಾಃ । ವಾ॒ಯುಗೋ॑ಪಾ॒ ಉಪಾ॑ಸತೇ । ಶ್ರ॒ದ್ಧಾಗ್ಂ ಹೃ॑ದ॒ಯ್ಯ॑ಯಾ-ಽಽಕೂ᳚ತ್ಯಾ । ಶ್ರ॒ದ್ಧಯಾ॑ ಹೂಯತೇ ಹ॒ವಿಃ ॥ ಶ್ರ॒ದ್ಧಾ-ಮ್ಪ್ರಾ॒ತರ್-ಹ॑ವಾಮಹೇ ॥ 65 ॥

ಶ್ರ॒ದ್ಧಾ-ಮ್ಮ॒ದ್ಧ್ಯನ್ದಿ॑ನ॒-ಮ್ಪರಿ॑ । ಶ್ರ॒ದ್ಧಾಗ್ಂ ಸೂರ್ಯ॑ಸ್ಯ ನಿ॒ಮ್ರುಚಿ॑ । ಶ್ರದ್ಧೇ॒ ಶ್ರದ್ಧಾ॑ಪಯೇ॒ಹ ಮಾ᳚ ॥ ಶ್ರ॒ದ್ಧಾ ದೇ॒ವಾ-ನಧಿ॑ವಸ್ತೇ । ಶ್ರ॒ದ್ಧಾ ವಿಶ್ವ॑ಮಿ॒ದ-ಞ್ಜಗ॑ತ್ । ಶ್ರ॒ದ್ಧಾ-ಙ್ಕಾಮ॑ಸ್ಯ ಮಾ॒ತರ᳚ಮ್ । ಹ॒ವಿಷಾ॑ ವರ್ಧಯಾಮಸಿ ॥ ಬ್ರಹ್ಮ॑ಜಜ್ಞಾ॒ನ-ಮ್ಪ್ರ॑ಥ॒ಮ-ಮ್ಪು॒ರಸ್ತಾ᳚ತ್ । ವಿ ಸೀ॑ಮ॒ತ-ಸ್ಸು॒ರುಚೋ॑ ವೇ॒ನ ಆ॑ವಃ । ಸ ಬು॒ದ್ಧ್ನಿಯಾ॑ ಉಪ॒ಮಾ ಅ॑ಸ್ಯ ವಿ॒ಷ್ಠಾಃ ॥ 66 ॥

ಸ॒ತಶ್ಚ॒ ಯೋನಿ॒-ಮಸ॑ತಶ್ಚ॒ ವಿವಃ॑ ॥ ಪಿ॒ತಾ ವಿ॒ರಾಜಾ॑ಮೃಷ॒ಭೋ ರ॑ಯೀ॒ಣಾಮ್ । ಅ॒ನ್ತರಿ॑ಖ್ಷಂ-ವಿಁ॒ಶ್ವರೂ॑ಪ॒ ಆವಿ॑ವೇಶ । ತಮ॒ರ್ಕೈ-ರ॒ಭ್ಯ॑ರ್ಚನ್ತಿ ವ॒ಥ್ಸಮ್ । ಬ್ರಹ್ಮ॒ ಸನ್ತ॒-ಮ್ಬ್ರಹ್ಮ॑ಣಾ ವ॒ರ್ಧಯ॑ನ್ತಃ ॥ ಬ್ರಹ್ಮ॑ ದೇ॒ವಾನ॑ಜನಯತ್ । ಬ್ರಹ್ಮ॒ ವಿಶ್ವ॑ಮಿ॒ದ-ಞ್ಜಗ॑ತ್ । ಬ್ರಹ್ಮ॑ಣಃ, ಖ್ಷ॒ತ್ರ-ನ್ನಿರ್ಮಿ॑ತಮ್ । ಬ್ರಹ್ಮ॑ ಬ್ರಾಹ್ಮ॒ಣ ಆ॒ತ್ಮನಾ᳚ ॥ ಅ॒ನ್ತರ॑ಸ್ಮಿ-ನ್ನಿ॒ಮೇ ಲೋ॒ಕಾಃ ॥ 67 ॥

ಅ॒ನ್ತ-ರ್ವಿಶ್ವ॑ಮಿ॒ದ-ಞ್ಜಗ॑ತ್ । ಬ್ರಹ್ಮೈ॒ವ ಭೂ॒ತಾನಾ॒-ಞ್ಜ್ಯೇಷ್ಠ᳚ಮ್ । ತೇನ॒ ಕೋ॑-ಽರ್​ಹತಿ॒ ಸ್ಪರ್ಧಿ॑ತುಮ್ ॥ ಬ್ರಹ್ಮ॑-ನ್ದೇ॒ವಾ-ಸ್ತ್ರಯ॑ಸ್ತ್ರಿಗ್ಂಶತ್ । ಬ್ರಹ್ಮ॑ನ್ನಿನ್ದ್ರ ಪ್ರಜಾಪ॒ತೀ । ಬ್ರಹ್ಮ॑ನ್. ಹ॒ ವಿಶ್ವಾ॑ ಭೂ॒ತಾನಿ॑ । ನಾ॒ವೀ ವಾ॒ನ್ತ-ಸ್ಸ॒ಮಾಹಿ॑ತಾ ॥ ಚತ॑ಸ್ರ॒ ಆಶಾಃ॒ ಪ್ರಚ॑ರನ್ತ್ವ॒-ಗ್ನಯಃ॑ । ಇ॒ಮನ್ನೋ॑ ಯ॒ಜ್ಞ-ನ್ನ॑ಯತು ಪ್ರಜಾ॒ನನ್ನ್ । ಘೃ॒ತ-ಮ್ಪಿನ್ವ॑ನ್ನ॒ಜರಗ್ಂ॑ ಸು॒ವೀರ᳚ಮ್ ॥ 68 ॥

ಬ್ರಹ್ಮ॑ ಸ॒ಮಿ-ದ್ಭ॑ವ॒ತ್ಯಾಹು॑ತೀನಾಮ್ ॥ ಆ ಗಾವೋ॑ ಅಗ್ಮನ್ನು॒ತ ಭ॒ದ್ರಮ॑ಕ್ರನ್ನ್ । ಸೀದ॑ನ್ತು ಗೋ॒ಷ್ಠೇ ರ॒ಣಯ॑ನ್ತ್ವ॒ಸ್ಮೇ । ಪ್ರ॒ಜಾವ॑ತೀಃ ಪುರು॒ರೂಪಾ॑ ಇ॒ಹ ಸ್ಯುಃ । ಇನ್ದ್ರಾ॑ಯ ಪೂ॒ರ್ವೀ ರು॒ಷಸೋ॒ ದುಹಾ॑ನಾಃ ॥ ಇನ್ದ್ರೋ॒ ಯಜ್ವ॑ನೇ ಪೃಣ॒ತೇ ಚ॑ ಶಿಖ್ಷತಿ । ಉಪೇದ್ದ॑ದಾತಿ॒ ನ ಸ್ವ-ಮ್ಮು॑ಷಾಯತಿ । ಭೂಯೋ॑ ಭೂಯೋ ರ॒ಯಿಮಿದ॑ಸ್ಯ ವ॒ರ್ಧಯನ್ನ್॑ । ಅಭಿ॑ನ್ನೇ ಖಿ॒ಲ್ಲೇ ನಿದ॑ಧಾತಿ ದೇವ॒ಯುಮ್ ॥ ನ ತಾ ನ॑ಶನ್ತಿ॒ ನ ದ॑ಭಾತಿ॒ ತಸ್ಕ॑ರಃ । ನೈನಾ॑ ಅಮಿ॒ತ್ರೋ ವ್ಯಥಿ॒ರಾದ॑ಧರ್​ಷತಿ । ದೇ॒ವಾಗ್​ಶ್ಚ॒ ಯಾಭಿ॒-ರ್ಯಜ॑ತೇ॒ ದದಾ॑ತಿ ಚ । ಜ್ಯೋಗಿತ್ತಾಭಿ॑-ಸ್ಸಚತೇ॒ ಗೋಪ॑ತಿ-ಸ್ಸ॒ಹ ॥, ನ ತಾ ಅರ್ವಾ॑ ರೇ॒ಣುಕ॑ಕಾಟೋ ಅಶ್ನುತೇ । ನ ಸಗ್ಗ್॑ ಸ್ಕೃತ॒ತ್ರ-ಮುಪ॑ಯನ್ತಿ॒ ತಾ ಅ॒ಭಿ । ಉ॒ರು॒ಗಾ॒ಯಮಭ॑ಯ॒-ನ್ತಸ್ಯ॒ ತಾ ಅನು॑ । ಗಾವೋ॒ ಮರ್ತ್ಯ॑ಸ್ಯ॒ ವಿಚ॑ರನ್ತಿ॒ ಯಜ್ವ॑ನಃ ॥ ॥ 69 ॥

ಗಾವೋ॒ ಭಗೋ॒ ಗಾವ॒ ಇನ್ದ್ರೋ॑ ಮೇ ಅಚ್ಛಾತ್ । ಗಾವ॒-ಸ್ಸೋಮ॑ಸ್ಯ ಪ್ರಥ॒ಮಸ್ಯ॑ ಭ॒ಖ್ಷಃ । ಇ॒ಮಾ ಯಾ ಗಾವ॒-ಸ್ಸಜ॑ನಾಸ॒ ಇನ್ದ್ರಃ॑ । ಇ॒ಚ್ಛಾಮೀದ್ಧೃ॒ದಾ ಮನ॑ಸಾ ಚಿ॒ದಿನ್ದ್ರ᳚ಮ್ ॥ ಯೂ॒ಯ-ಙ್ಗಾ॑ವೋ ಮೇದಯಥಾ ಕೃ॒ಶ-ಞ್ಚಿ॑ತ್ । ಅ॒ಶ್ಲೀ॒ಲ-ಞ್ಚಿ॑-ತ್ಕೃಣುಥಾ ಸು॒ಪ್ರತೀ॑ಕಮ್ । ಭ॒ದ್ರ-ಙ್ಗೃ॒ಹ-ಙ್ಕೃ॑ಣುಥ ಭದ್ರವಾಚಃ । ಬೃ॒ಹದ್ವೋ॒ ವಯ॑ ಉಚ್ಯತೇ ಸ॒ಭಾಸು॑ ॥ ಪ್ರ॒ಜಾವ॑ತೀ-ಸ್ಸೂ॒ಯವ॑ಸಗ್ಂ ರಿ॒ಶನ್ತೀಃ᳚ (ರು॒ಶನ್ತೀಃ᳚) । ಶು॒ದ್ಧಾ ಅ॒ಪ-ಸ್ಸು॑ಪ್ರಪಾ॒ಣೇ ಪಿಬ॑ನ್ತೀಃ । ಮಾ ವ॑-ಸ್ಸ್ತೇ॒ನ ಈ॑ಶತ॒ ಮಾ-ಽಘಶಗ್ಂ॑ಸಃ । ಪರಿ॑ವೋ ಹೇ॒ತೀ ರು॒ದ್ರಸ್ಯ॑ ವೃಞ್ಜ್ಯಾತ್ ॥ ಉಪೇ॒ದ-ಮು॑ಪ॒ಪರ್ಚ॑ನಮ್ । ಆ॒ಸು ಗೋಷೂಪ॑ಪೃಚ್ಯತಾಮ್ । ಉಪ॑ರ್​ಷ॒ಭಸ್ಯ॒ ರೇತ॑ಸಿ । ಉಪೇ᳚ನ್ದ್ರ॒ ತವ॑ ವೀ॒ರ್ಯೇ᳚ ॥ 70 ॥
(ಚ॒ರಾ॒ಮಿ॒ - ಕನೀ॑ಯೋ॒ - ಽನ್ಯಾ - ನರ್ಪಿ॑ತಾ - ಪ॒ದಾನಿ॒ - ಯಜ್ವ॑ಸು - ಹವಾಮಹೇ - ವಿ॒ಷ್ಠಾ - ಲೋ॒ಕಾಃ - ಸು॒ವೀರ॒ - ಮರ್ವಾ॒ - ಪಿಬ॑ನ್ತೀ॒-ಷ್ಷಟ್ಚ॑) (ಅ. 8)

ಅನುವಾಕಂ 9 - ಶುಕ್ಲಕೃಷ್ಣಪಶ್ವಾದೀನಾಂ ಸೂಕ್ತಾನಿ
ತಾ ಸೂ᳚ರ್ಯಾ ಚನ್ದ್ರ॒ಮಸಾ॑ ವಿಶ್ವ॒ಭೃತ್ತ॑ಮಾ ಮ॒ಹತ್ । ತೇಜೋ॒ ವಸು॑ಮ-ದ್ರಾಜತೋ ದಿ॒ವಿ । ಸಾಮಾ᳚ತ್ಮಾನಾ ಚರತ-ಸ್ಸಾಮಚಾ॒ರಿಣಾ᳚ । ಯಯೋ᳚ರ್ವ್ರ॒ತ-ನ್ನ ಮ॒ಮೇ ಜಾತು॑ ದೇ॒ವಯೋಃ᳚ ॥ ಉ॒ಭಾವನ್ತೌ॒ ಪರಿ॑ಯಾತ॒ ಅರ್ಮ್ಯಾ᳚ । ದಿ॒ವೋ ನ ರ॒ಶ್ಮೀಗ್​ ಸ್ತ॑ನು॒ತೋ-ವ್ಯ॑ರ್ಣ॒ವೇ । ಉ॒ಭಾ ಭು॑ವ॒ನ್ತೀ ಭುವ॑ನಾ ಕ॒ವಿಕ್ರ॑ತೂ । ಸೂರ್ಯಾ॒ ನ ಚ॒ನ್ದ್ರಾ ಚ॑ರತೋ ಹ॒ತಾಮ॑ತೀ ॥ ಪತೀ᳚ ದ್ಯು॒ಮ-ದ್ವಿ॑ಶ್ವ॒ವಿದಾ॑ ಉ॒ಭಾ ದಿ॒ವಃ । ಸೂರ್ಯಾ॑ ಉ॒ಭಾ ಚ॒ನ್ದ್ರಮ॑ಸಾ ವಿಚಖ್ಷ॒ಣಾ ॥ 71 ॥

ವಿ॒ಶ್ವವಾ॑ರಾ ವರಿವೋ॒ಭಾ ವರೇ᳚ಣ್ಯಾ । ತಾ ನೋ॑-ಽವತ-ಮ್ಮತಿ॒ಮನ್ತಾ॒ ಮಹಿ॑ವ್ರತಾ ॥ ವಿ॒ಶ್ವ॒ವಪ॑ರೀ ಪ್ರ॒ತರ॑ಣಾ ತರ॒ನ್ತಾ । ಸು॒ವ॒ರ್ವಿದಾ॑ ದೃ॒ಶಯೇ॒ ಭೂರಿ॑ರಶ್ಮೀ । ಸೂರ್ಯಾ॒ ಹಿ ಚ॒ನ್ದ್ರಾ ವಸು॑ತ್ವೇ॒ಷ-ದ॑ರ್​ಶತಾ । ಮ॒ನ॒ಸ್ವಿನೋ॒ಭಾ-ಽನು॑ ಚರ॒ತೋ ನು॒ ಸ-ನ್ದಿವ᳚ಮ್ ॥ ಅ॒ಸ್ಯ ಶ್ರವೋ॑ ನ॒ದ್ಯ॑-ಸ್ಸ॒ಪ್ತ ಬಿ॑ಭ್ರತಿ । ದ್ಯಾವಾ॒ ಖ್ಷಾಮಾ॑ ಪೃಥಿ॒ವೀ ದ॑ರ್​ಶ॒ತಂ-ವಁಪುಃ॑ । ಅ॒ಸ್ಮೇ ಸೂ᳚ರ್ಯಾ ಚನ್ದ್ರ॒ಮಸಾ॑-ಽಭಿ॒ಚಖ್ಷೇ᳚ । ಶ್ರ॒ದ್ಧೇ ಕಮಿ॑ನ್ದ್ರ ಚರತೋ ವಿಚರ್ತು॒ರಮ್ ॥ 72 ॥

ಪೂ॒ರ್ವಾ॒ಪ॒ರ-ಞ್ಚ॑ರತೋ ಮಾ॒ಯ ಯೈ॒ತೌ । ಶಿಶೂ॒ ಕ್ರೀಡ॑ನ್ತೌ॒ ಪರಿ॑ಯಾತೋ ಅದ್ಧ್ವ॒ರಮ್ । ವಿಶ್ವಾ᳚ನ್ಯ॒ನ್ಯೋ ಭುವ॑ನಾ ಽಭಿ॒ಚಷ್ಟೇ᳚ । ಋ॒ತೂನ॒ನ್ಯೋ ವಿ॒ದಧ॑ಜ್ಜಾಯತೇ॒ ಪುನಃ॑ ॥ ಹಿರ॑ಣ್ಯವರ್ಣಾ॒-ಶ್ಶುಚ॑ಯಃ ಪಾವ॒ಕಾ ಯಾಸು॑ ಜಾ॒ತಃ ಕ॒ಶ್ಯಪೋ॒ ಯಾಸ್ವಿನ್ದ್ರಃ॑ । ಅ॒ಗ್ನಿಂ-ಯಾಁ ಗರ್ಭ॑-ನ್ದಧಿ॒ರೇ ವಿರೂ॑ಪಾ॒ಸ್ತಾ ನ॒ ಆಪ॒-ಶ್ಶಗ್ಗ್​ ಸ್ಯೋ॒ನಾ ಭ॑ವನ್ತು ॥,
ಯಾಸಾ॒ಗ್ಂ॒ ರಾಜಾ॒ ವರು॑ಣೋ॒ ಯಾತಿ॒ ಮಧ್ಯೇ॑ ಸತ್ಯಾನೃ॒ತೇ ಅ॑ವ॒ಪಶ್ಯ॒ನ್ ಜನಾ॑ನಾಮ್ । ಮ॒ಧು॒ಶ್ಚುತ॒-ಶ್ಶುಚ॑ಯೋ॒ ಯಾಃ ಪಾ॑ವ॒ಕಾಸ್ತಾ ನ॒ ಆಪ॒-ಶ್ಶಗ್ಗ್​ ಸ್ಯೋ॒ನಾ ಭ॑ವನ್ತು ॥ । ಯಾಸಾ᳚-ನ್ದೇ॒ವಾ ದಿ॒ವಿ ಕೃ॒ಣ್ವನ್ತಿ॑ ಭ॒ಖ್ಷಂ-ಯಾಁ ಅ॒ನ್ತರಿ॑ಖ್ಷೇ ಬಹು॒ಧಾ ಭವ॑ನ್ತಿ । ಯಾಃ ಪೃ॑ಥಿ॒ವೀ-ಮ್ಪಯ॑ಸೋ॒ನ್ದನ್ತಿ॑ಶು॒ಕ್ರಾಸ್ತಾ ನ॒ ಆಪ॒-ಶ್ಶಗ್ಗ್​ ಸ್ಯೋ॒ನಾ ಭ॑ವನ್ತು ॥, ಶಿ॒ವೇನ॑ ಮಾ॒ ಚಖ್ಷು॑ಷಾ ಪಶ್ಯತಾ-ಽಽಪ-ಶ್ಶಿ॒ವಯಾ॑ ತ॒ನುವೋಪ॑ ಸ್ಪೃಶತ॒ ತ್ವಚ॑-ಮ್ಮೇ । ಸರ್ವಾಗ್ಂ॑ ಅ॒ಗ್ನೀಗ್ಂ ರ॑ಫ್ಸು॒ಷದೋ॑ ಹುವೇ ವೋ॒ ಮಯಿ॒ ವರ್ಚೋ॒ ಬಲ॒ಮೋಜೋ॒ ನಿ ಧ॑ತ್ತ ॥ । ಆಪೋ॑ ಭ॒ದ್ರಾ ಘೃ॒ತಮಿದಾಪ॑ ಆಸುರ॒ಗ್ನೀ-ಷೋಮೌ॑ ಬಿಭ್ರ॒ತ್ಯಾಪ॒ ಇ-ತ್ತಾಃ । ತೀ॒ವ್ರೋ ರಸೋ॑ ಮಧು॒ಪೃಚಾ॑ -ಮರಙ್ಗ॒ಮ ಆ ಮಾ᳚ ಪ್ರಾ॒ಣೇನ॑ ಸ॒ಹ ವರ್ಚ॑ಸಾ ಗನ್ನ್ ॥, ಆದಿ-ತ್ಪ॑ಶ್ಯಾಮ್ಯು॒ತ ವಾ॑ ಶೃಣೋ॒ಮ್ಯಾ ಮಾ॒ ಘೋಷೋ॑ ಗಚ್ಛತಿ॒ ವಾನ್ನ॑ ಆಸಾಮ್ । ಮನ್ಯೇ॑ ಭೇಜಾ॒ನೋ ಅ॒ಮೃತ॑ಸ್ಯ॒ ತರ್​ಹಿ॒ ಹಿರ॑ಣ್ಯವರ್ಣಾ॒ ಅತೃ॑ಪಂ-ಯಁ॒ದಾ ವಃ॑ ॥ ॥ ನಾಸ॑ದಾಸೀ॒ನ್ನೋ ಸದಾ॑ಸೀ-ತ್ತ॒ದಾನೀ᳚ಮ್ । ನಾಸೀ॒-ದ್ರಜೋ॒ ನೋ ವ್ಯೋ॑ಮಾಪ॒ರೋ ಯತ್ । ಕಿಮಾವ॑ರೀವಃ॒ ಕುಹ॒ ಕಸ್ಯ॒ ಶರ್ಮನ್ನ್॑ ॥ 73 ॥

ಅಮ್ಭಃ॒ ಕಿಮಾ॑ಸೀ॒-ದ್ಗಹ॑ನ-ಙ್ಗಭೀ॒ರಮ್ ॥ ನ ಮೃ॒ತ್ಯುರ॒ಮೃತ॒-ನ್ತರ್​ಹಿ॒ ನ । ರಾತ್ರಿ॑ಯಾ॒ ಅಹ್ನ॑ ಆಸೀ-ತ್ಪ್ರಕೇ॒ತಃ । ಆನೀ॑ದವಾ॒ತಗ್ಗ್​ ಸ್ವ॒ಧಯಾ॒ ತದೇಕ᳚ಮ್ । ತಸ್ಮಾ᳚-ದ್ಧಾ॒ನ್ಯ-ನ್ನ ಪ॒ರಃ (ಪ॒ರಂ) ಕಿಞ್ಚ॒ ನಾಸ॑ ॥ ತಮ॑ ಆಸೀ॒-ತ್ತಮ॑ಸಾ ಗೂ॒ಢಮಗ್ರೇ᳚ ಪ್ರಕೇ॒ತಮ್ । ಸ॒ಲಿ॒ಲಗ್ಂ ಸರ್ವ॑ಮಾ ಇ॒ದಮ್ । ತು॒ಚ್ಛೇ ನಾ॒ಭ್ವಪಿ॑ಹಿತQಂ-ಯಁದಾಸೀ᳚ತ್ । ತಮ॑ಸ॒ ಸ್ತನ್ಮ॑ಹಿ॒ನಾ ಜಾ॑ಯ॒ತೈಕ᳚ಮ್ ॥ ಕಾಮ॒ಸ್ತದಗ್ರೇ॒ ಸಮ॑ವರ್ತ॒ತಾಧಿ॑ ॥ 74 ॥

ಮನ॑ಸೋ॒ ರೇತಃ॑ ಪ್ರಥ॒ಮಂ-ಯಁದಾಸೀ᳚ತ್ । ಸ॒ ತೋ ಬನ್ಧು॒ಮಸ॑ತಿ॒ ನಿರ॑ವಿನ್ದನ್ನ್ (ನಿರ॑ವಿದನ್ನ್) । ಹೃ॒ದಿ ಪ್ರ॒ತೀಷ್ಯಾ॑ ಕ॒ವಯೋ॑ ಮನೀ॒ಷಾ ॥ ತಿ॒ರ॒ಶ್ಚೀನೋ॒ ವಿತ॑ತೋ ರ॒ಶ್ಮಿರೇ॑ಷಾಮ್ । ಅ॒ಧ-ಸ್ಸ್ವಿ॑ದಾ॒ಸೀ(3) ದು॒ಪರಿ॑ ಸ್ವಿದಾಸೀ(3)ತ್ । ರೇ॒ತೋ॒ಧಾ ಆ॑ಸ-ನ್ಮಹಿ॒ಮಾನ॑ ಆಸನ್ನ್ । ಸ್ವ॒ಧಾ ಅ॒ವಸ್ತಾ॒-ತ್ಪ್ರಯ॑ತಿಃ ಪ॒ರಸ್ತಾ᳚ತ್ ॥ ಕೋ ಅ॒ದ್ಧಾ ವೇ॑ದ॒ ಕ ಇ॒ಹ ಪ್ರವೋ॑ಚತ್ । ಕುತ॒ ಆಜಾ॑ತಾ॒ ಕುತ॑ ಇ॒ಯಂ-ವಿಁಸೃ॑ಷ್ಟಿಃ । ಅ॒ರ್ವಾಗ್ದೇ॒ವಾ ಅ॒ಸ್ಯ ವಿ॒ಸರ್ಜ॑ನಾಯ ॥ 75 ॥

ಅಥಾ॒ ಕೋ ವೇ॑ದ॒ ಯತ॑ ಆಬ॒ಭೂವ॑ ॥ ಇ॒ಯಂ-ವಿಁಸೃ॑ಷ್ಟಿ॒-ರ್ಯತ॑ ಆಬ॒ಭೂವ॑ । ಯದಿ॑ ವಾ ದ॒ಧೇ ಯದಿ॑ ವಾ॒ ನ । ಯೋ ಅ॒ಸ್ಯಾದ್ಧ್ಯ॑ಖ್ಷಃ ಪರ॒ಮೇ ವ್ಯೋ॑ಮನ್ನ್ । ಸೋ ಅ॒ಙ್ಗ ವೇ॑ದ॒ ಯದಿ॑ ವಾ॒ ನ ವೇದ॑ ॥ ಕಿಗ್ಗ್​ಸ್ವಿ॒ದ್ವನ॒-ಙ್ಕ ಉ॒ ಸ ವೃ॒ಖ್ಷ ಆ॑ಸೀತ್ । ಯತೋ॒ ದ್ಯಾವಾ॑ಪೃಥಿ॒ವೀ ನಿ॑ಷ್ಟತ॒ಖ್ಷುಃ । ಮನೀ॑ಷಿಣೋ॒ ಮನ॑ಸಾ ಪೃ॒ಚ್ಛತೇದು॒ ತತ್ । ಯದ॒ದ್ಧ್ಯತಿ॑ಷ್ಠ॒-ದ್ಭುವ॑ನಾನಿ ಧಾ॒ರಯನ್ನ್॑ ॥ ಬ್ರಹ್ಮ॒ ವನ॒-ಮ್ಬ್ರಹ್ಮ॒ ಸ ವೃ॒ಖ್ಷ ಆ॑ಸೀತ್ ॥ 76 ॥

ಯತೋ॒ ದ್ಯಾವಾ॑ಪೃಥಿ॒ವೀ ನಿ॑ಷ್ಟತ॒ಖ್ಷುಃ । ಮನೀ॑ಷಿಣೋ॒ ಮನ॑ಸಾ॒ ವಿಬ್ರ॑ವೀಮಿ ವಃ । ಬ್ರಹ್ಮಾ॒ದ್ಧ್ಯತಿ॑ಷ್ಠ॒-ದ್ಭುವ॑ನಾನಿ ಧಾ॒ರಯನ್ನ್॑ ॥ ಪ್ರಾ॒ತರ॒ಗ್ನಿ-ಮ್ಪ್ರಾ॒ತರಿನ್ದ್ರಗ್ಂ॑ ಹವಾಮಹೇ । ಪ್ರಾ॒ತ ರ್ಮಿ॒ತ್ರಾವರು॑ಣಾ ಪ್ರಾ॒ತರ॒ಶ್ವಿನಾ᳚ । ಪ್ರಾ॒ತ ರ್ಭಗ॑-ಮ್ಪೂ॒ಷಣ॒-ಮ್ಬ್ರಹ್ಮ॑ಣ॒ಸ್ಪತಿ᳚ಮ್ । ಪ್ರಾ॒ತಸ್ಸೋಮ॑ಮು॒ತ ರು॒ದ್ರಗ್ಂ ಹು॑ವೇಮ ॥ ಪ್ರಾ॒ತ॒ರ್ಜಿತ॒-ಮ್ಭಗ॑ಮು॒ಗ್ರಗ್ಂ ಹು॑ವೇಮ । ವ॒ಯ-ಮ್ಪು॒ತ್ರಮದಿ॑ತೇ॒ರ್ಯೋ ವಿ॑ಧ॒ರ್ತಾ । ಆ॒ದ್ಧ್ರಶ್ಚಿ॒ದ್ಯ-ಮ್ಮನ್ಯ॑ಮಾನ-ಸ್ತು॒ರಶ್ಚಿ॑ತ್ ॥ 77 ॥

ರಾಜಾ॑ ಚಿ॒ದ್ಯ-ಮ್ಭಗ॑-ಮ್ಭ॒ಖ್ಷೀತ್ಯಾಹ॑ ॥ ಭಗ॒ ಪ್ರಣೇ॑ತ॒ರ್ಭಗ॒ ಸತ್ಯ॑ರಾಧಃ । ಭಗೇ॒ಮಾ-ನ್ಧಿಯ॒ಮುದ॑ವ॒ ದದ॑ನ್ನಃ । ಭಗ॒ ಪ್ರಣೋ॑ ಜನಯ॒ ಗೋಭಿ॒ರಶ್ವೈಃ᳚ । ಭಗ॒ ಪ್ರನೃಭಿ॑-ರ್ನೃ॒ವನ್ತ॑-ಸ್ಸ್ಯಾಮ । ಉ॒ತೇದಾನೀ॒-ಮ್ಭಗ॑ವನ್ತ-ಸ್ಸ್ಯಾಮ ॥ ಉ॒ತ ಪ್ರಪಿ॒ತ್ವ ಉ॒ತ ಮದ್ಧ್ಯೇ॒ ಅಹ್ನಾ᳚ಮ್ । ಉ॒ತೋದಿ॑ತಾ ಮಘವ॒ನ್-ಥ್ಸೂರ್ಯ॑ಸ್ಯ । ವ॒ಯ-ನ್ದೇ॒ವಾನಾಗ್ಂ॑ ಸುಮ॒ತೌ ಸ್ಯಾ॑ಮ ॥ ಭಗ॑ ಏ॒ವ ಭಗ॑ವಾಗ್ಂ ಅಸ್ತು ದೇವಾಃ ॥ 78 ॥

ತೇನ॑ ವ॒ಯ-ಮ್ಭಗ॑ವನ್ತ-ಸ್ಸ್ಯಾಮ । ತ-ನ್ತ್ವಾ॑ ಭಗ॒ ಸರ್ವ॒ ಇಜ್ಜೋ॑ಹವೀಮಿ । ಸ ನೋ॑ ಭಗ ಪುರ ಏ॒ತಾ ಭ॑ವೇ॒ಹ ॥ ಸಮ॑ದ್ಧ್ವ॒ರಾಯೋ॒ಷಸೋ॑ ನಮನ್ತ । ದ॒ಧಿ॒ಕ್ರಾವೇ॑ವ॒ ಶುಚ॑ಯೇ ಪ॒ದಾಯ॑ । ಅ॒ರ್ವಾ॒ಚೀ॒ನಂ-ವಁ॑ಸು॒ವಿದ॒-ಮ್ಭಗ॑ನ್ನಃ । ರಥ॑ಮಿ॒ವಾಶ್ವಾ॑ ವಾ॒ಜಿನ॒ ಆವ॑ಹನ್ತು ॥ ಅಶ್ವಾ॑ವತೀ॒-ರ್ಗೋಮ॑ತೀ-ರ್ನ ಉ॒ಷಾಸಃ॑ । ವೀ॒ರವ॑ತೀ॒-ಸ್ಸದ॑ಮುಚ್ಛನ್ತು ಭ॒ದ್ರಾಃ । ಘೃ॒ತ-ನ್ದುಹಾ॑ನಾ ವಿ॒ಶ್ವತಃ॒ ಪ್ರಪೀ॑ನಾಃ । ಯೂ॒ಯ-ಮ್ಪಾ॑ತ ಸ್ವ॒ಸ್ತಿಭಿ॒-ಸ್ಸದಾ॑ ನಃ ॥ 79 ॥
(ವಿ॒ಚ॒ಖ್ಷ॒ಣಾ - ವಿ॑ಚರ್ತು॒ರಗ್ಂ - ಶರ್ಮ॒ - ನ್ನಧಿ॑ - ವಿ॒ಸರ್ಜ॑ನಾಯ॒ - ಬ್ರಹ್ಮ॒ ವನ॒-ಮ್ಬ್ರಹ್ಮ॒ ಸ ವೃ॒ಖ್ಷ ಆ॑ಸೀತ್- ತು॒ರಶ್ಚಿ॑-ದ್- ದೇವಾಃ॒ - ಪ್ರಪೀ॑ನಾ॒ ಏಕ॑-ಞ್ಚ) (ಅ. 9)

(ಪೀವೋ᳚-ಽನ್ನಾ॒ - ಮಗ್ನೇ॒ ತ್ವ-ಮ್ಪಾ॑ರ - ಯಾನಾಘೃ॒ಷ್ಯಃ - ಶುಚಿ॒-ನ್ನು ಸ್ತೋಮಂ॑ - ಁವಿ॒ಶ್ರಯ॑ಮಾಣೋ - ದಿ॒ವೋ ರು॒ಕ್ಮೋ - ಽನ್ನ॑-ಮ್ಪ್ರಾ॒ಣಂ - ತಾ ಸೂ᳚ರ್ಯಾಚನ್ದ್ರ॒ಮಸಾ॒ ನವ॑ಸಪ್ತತಿಃ)

(ಪೀವೋ᳚ನ್ನಾ - ಁಯೂ॒ಯ-ಮ್ಪಾ॑ತ ಸ್ವ॒ಸ್ತಿಭಿ॒-ಸ್ಸದಾ॑ನಃ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಅಷ್ಟಮಃ ಪ್ರಪಾಠಕ-ಸ್ಸಮಾಪ್ತಃ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕಂ ಸಮಾಪ್ತಮ್ ॥