(śrīmadbhāgavata mahāpurāṇē prathamaskandhē aṣṭamādhyāyaḥ)
kuntyuvācha ।
namasyē puruṣaṃ tvādyamīśvaraṃ prakṛtēḥ param ।
alakṣyaṃ sarvabhūtānāmantarbahiravasthitam ॥ 18 ॥
māyājavanikāchChannamajñādhōkṣajamavyayam ।
na lakṣyasē mūḍhadṛśā naṭō nāṭyadharō yathā ॥ 19 ॥
tathā paramahaṃsānāṃ munīnāmamalātmanām ।
bhaktiyōgavidhānārthaṃ kathaṃ paśyēma hi striyaḥ ॥ 20 ॥
kṛṣṇāya vāsudēvāya dēvakīnandanāya cha ।
nandagōpakumārāya gōvindāya namō namaḥ ॥ 21 ॥
namaḥ paṅkajanābhāya namaḥ paṅkajamālinē ।
namaḥ paṅkajanētrāya namastē paṅkajāṅghrayē ॥ 22 ॥
yathā hṛṣīkēśa khalēna dēvakī kaṃsēna ruddhātichiraṃ śuchārpitā ।
vimōchitāhaṃ cha sahātmajā vibhō tvayaiva nāthēna muhurvipadgaṇāt ॥ 23 ॥
viṣānmahāgnēḥ puruṣādadarśanādasatsabhāyā vanavāsakṛchChrataḥ ।
mṛdhē mṛdhē'nēkamahāRathāstratō drauṇyastrataśchāsma harē'bhirakṣitāḥ ॥ 24 ॥
vipadaḥ santu tāḥ śaśvattatra tatra jagadgurō ।
bhavatō darśanaṃ yatsyādapunarbhavadarśanam ॥ 25 ॥
janmaiśvaryaśrutaśrībhirēdhamānamadaḥ pumān ।
naivārhatyabhidhātuṃ vai tvāmakiñchanagōcharam ॥ 26 ॥
namō'kiñchanavittāya nivṛttaguṇavṛttayē ।
ātmārāmāya śāntāya kaivalyapatayē namaḥ ॥ 27 ॥
manyē tvāṃ kālamīśānamanādinidhanaṃ vibhum ।
samaṃ charantaṃ sarvatra bhūtānāṃ yanmithaḥ kaliḥ ॥ 28 ॥
na vēda kaśchidbhagavaṃśchikīrṣitaṃ tavēhamānasya nṛṇāṃ viḍambanam ।
na yasya kaśchiddayitō'sti karhichiddvēṣyaścha yasminviṣamā matirnṛṇām ॥ 29 ॥
janma karma cha viśvātmannajasyākarturātmanaḥ ।
tiryannṛṣiṣu yādaḥsu tadatyantaviḍambanam ॥ 30 ॥
gōpyādadē tvayi kṛtāgasi dāma tāvadyātē daśāśrukalilāñjanasambhramākṣam ।
vaktraṃ ninīya bhayabhāvanayā sthitasya sā māṃ vimōhayati bhīrapi yadbibhēti ॥ 31 ॥
kēchidāhurajaṃ jātaṃ puṇyaślōkasya kīrtayē ।
yadōḥ priyasyānvavāyē malayasyēva chandanam ॥ 32 ॥
aparē vasudēvasya dēvakyāṃ yāchitō'bhyagāt ।
ajastvamasya kṣēmāya vadhāya cha suradviṣām ॥ 33 ॥
bhārāvatāraṇāyānyē bhuvō nāva ivōdadhau ।
sīdantyā bhūribhārēṇa jātō hyātmabhuvārthitaḥ ॥ 34 ॥
bhavēsminkliśyamānānāmavidyākāmakarmabhiḥ ।
śravaṇasmaraṇārhāṇi kariṣyanniti kēchana ॥ 35 ॥
śṛṇvanti gāyanti gṛṇantyabhīkṣṇaśaḥ smaranti nandanti tavēhitaṃ janāḥ ।
ta ēva paśyantyachirēṇa tāvakaṃ bhavapravāhōparamaṃ padāmbujam ॥ 36 ॥
apyadya nastvaṃ svakṛtēhita prabhō jihāsasi svitsuhṛdō'nujīvinaḥ ।
yēṣāṃ na chānyadbhavataḥ padāmbujātparāyaṇaṃ rājasu yōjitāṃhasām ॥ 37 ॥
kē vayaṃ nāmarūpābhyāṃ yadubhiḥ saha pāṇḍavāḥ ।
bhavatō'darśanaṃ yarhi hṛṣīkāṇāmivēśituḥ ॥ 38 ॥
nēyaṃ śōbhiṣyatē tatra yathēdānīṃ gadādhara ।
tvatpadairaṅkitā bhāti svalakṣaṇavilakṣitaiḥ ॥ 39 ॥
imē janapadāḥ svṛddhāḥ supakvauṣadhivīrudhaḥ ।
vanādrinadyudanvantō hyēdhantē tava vīkṣitaiḥ ॥ 40 ॥
atha viśvēśa viśvātmanviśvamūrtē svakēṣu mē ।
snēhapāśamimaṃ Chindhi dṛḍhaṃ pāṇḍuṣu vṛṣṇiṣu ॥ 41 ॥
tvayi mē'nanyaviṣayā matirmadhupatē'sakṛt ।
ratimudvahatādaddhā gaṅgēvaughamudanvati ॥ 42 ॥
śrīkṛṣṇa kṛṣṇasakha vṛṣṇyṛṣabhāvanidrugrājanyavaṃśadahanānapavargavīrya ।
gōvinda gōdvijasurārtiharāvatāra yōgēśvarākhilagurō bhagavannamastē ॥ 43 ॥
॥ iti śrīmadbhāgavatē mahāpurāṇē pāramahaṃsyāṃ saṃhitāyāṃ prathamaskandhē aṣṭamē'dhyāyē śrīkuntīkṛtakṛṣṇastutiḥ sampūrṇā ॥
