(ശ്രീമദ്ഭാഗവത മഹാപുരാണേ പ്രഥമസ്കംധേ അഷ്ടമാധ്യായഃ)
കുംത്യുവാച ।
നമസ്യേ പുരുഷം ത്വാദ്യമീശ്വരം പ്രകൃതേഃ പരമ് ।
അലക്ഷ്യം സർവഭൂതാനാമംതര്ബഹിരവസ്ഥിതമ് ॥ 18 ॥
മായാജവനികാച്ഛന്നമജ്ഞാധോക്ഷജമവ്യയമ് ।
ന ലക്ഷ്യസേ മൂഢദൃശാ നടോ നാട്യധരോ യഥാ ॥ 19 ॥
തഥാ പരമഹംസാനാം മുനീനാമമലാത്മനാമ് ।
ഭക്തിയോഗവിധാനാര്ഥം കഥം പശ്യേമ ഹി സ്ത്രിയഃ ॥ 20 ॥
കൃഷ്ണായ വാസുദേവായ ദേവകീനംദനായ ച ।
നംദഗോപകുമാരായ ഗോവിംദായ നമോ നമഃ ॥ 21 ॥
നമഃ പംകജനാഭായ നമഃ പംകജമാലിനേ ।
നമഃ പംകജനേത്രായ നമസ്തേ പംകജാംഘ്രയേ ॥ 22 ॥
യഥാ ഹൃഷീകേശ ഖലേന ദേവകീ കംസേന രുദ്ധാതിചിരം ശുചാര്പിതാ ।
വിമോചിതാഹം ച സഹാത്മജാ വിഭോ ത്വയൈവ നാഥേന മുഹുർവിപദ്ഗണാത് ॥ 23 ॥
വിഷാന്മഹാഗ്നേഃ പുരുഷാദദര്ശനാദസത്സഭായാ വനവാസകൃച്ഛ്രതഃ ।
മൃധേ മൃധേഽനേകമഹാറഥാസ്ത്രതോ ദ്രൌണ്യസ്ത്രതശ്ചാസ്മ ഹരേഽഭിരക്ഷിതാഃ ॥ 24 ॥
വിപദഃ സംതു താഃ ശശ്വത്തത്ര തത്ര ജഗദ്ഗുരോ ।
ഭവതോ ദര്ശനം യത്സ്യാദപുനര്ഭവദര്ശനമ് ॥ 25 ॥
ജന്മൈശ്വര്യശ്രുതശ്രീഭിരേധമാനമദഃ പുമാന് ।
നൈവാര്ഹത്യഭിധാതും വൈ ത്വാമകിംചനഗോചരമ് ॥ 26 ॥
നമോഽകിംചനവിത്തായ നിവൃത്തഗുണവൃത്തയേ ।
ആത്മാരാമായ ശാംതായ കൈവല്യപതയേ നമഃ ॥ 27 ॥
മന്യേ ത്വാം കാലമീശാനമനാദിനിധനം വിഭുമ് ।
സമം ചരംതം സർവത്ര ഭൂതാനാം യന്മിഥഃ കലിഃ ॥ 28 ॥
ന വേദ കശ്ചിദ്ഭഗവംശ്ചികീര്ഷിതം തവേഹമാനസ്യ നൃണാം വിഡംബനമ് ।
ന യസ്യ കശ്ചിദ്ദയിതോഽസ്തി കര്ഹിചിദ്ദ്വേഷ്യശ്ച യസ്മിന്വിഷമാ മതിര്നൃണാമ് ॥ 29 ॥
ജന്മ കര്മ ച വിശ്വാത്മന്നജസ്യാകര്തുരാത്മനഃ ।
തിര്യംനൃഷിഷു യാദഃസു തദത്യംതവിഡംബനമ് ॥ 30 ॥
ഗോപ്യാദദേ ത്വയി കൃതാഗസി ദാമ താവദ്യാതേ ദശാശ്രുകലിലാംജനസംഭ്രമാക്ഷമ് ।
വക്ത്രം നിനീയ ഭയഭാവനയാ സ്ഥിതസ്യ സാ മാം വിമോഹയതി ഭീരപി യദ്ബിഭേതി ॥ 31 ॥
കേചിദാഹുരജം ജാതം പുണ്യശ്ലോകസ്യ കീര്തയേ ।
യദോഃ പ്രിയസ്യാന്വവായേ മലയസ്യേവ ചംദനമ് ॥ 32 ॥
അപരേ വസുദേവസ്യ ദേവക്യാം യാചിതോഽഭ്യഗാത് ।
അജസ്ത്വമസ്യ ക്ഷേമായ വധായ ച സുരദ്വിഷാമ് ॥ 33 ॥
ഭാരാവതാരണായാന്യേ ഭുവോ നാവ ഇവോദധൌ ।
സീദംത്യാ ഭൂരിഭാരേണ ജാതോ ഹ്യാത്മഭുവാര്ഥിതഃ ॥ 34 ॥
ഭവേസ്മിന്ക്ലിശ്യമാനാനാമവിദ്യാകാമകര്മഭിഃ ।
ശ്രവണസ്മരണാര്ഹാണി കരിഷ്യന്നിതി കേചന ॥ 35 ॥
ശൃണ്വംതി ഗായംതി ഗൃണംത്യഭീക്ഷ്ണശഃ സ്മരംതി നംദംതി തവേഹിതം ജനാഃ ।
ത ഏവ പശ്യംത്യചിരേണ താവകം ഭവപ്രവാഹോപരമം പദാംബുജമ് ॥ 36 ॥
അപ്യദ്യ നസ്ത്വം സ്വകൃതേഹിത പ്രഭോ ജിഹാസസി സ്വിത്സുഹൃദോഽനുജീവിനഃ ।
യേഷാം ന ചാന്യദ്ഭവതഃ പദാംബുജാത്പരായണം രാജസു യോജിതാംഹസാമ് ॥ 37 ॥
കേ വയം നാമരൂപാഭ്യാം യദുഭിഃ സഹ പാംഡവാഃ ।
ഭവതോഽദര്ശനം യര്ഹി ഹൃഷീകാണാമിവേശിതുഃ ॥ 38 ॥
നേയം ശോഭിഷ്യതേ തത്ര യഥേദാനീം ഗദാധര ।
ത്വത്പദൈരംകിതാ ഭാതി സ്വലക്ഷണവിലക്ഷിതൈഃ ॥ 39 ॥
ഇമേ ജനപദാഃ സ്വൃദ്ധാഃ സുപക്വൌഷധിവീരുധഃ ।
വനാദ്രിനദ്യുദന്വംതോ ഹ്യേധംതേ തവ വീക്ഷിതൈഃ ॥ 40 ॥
അഥ വിശ്വേശ വിശ്വാത്മന്വിശ്വമൂര്തേ സ്വകേഷു മേ ।
സ്നേഹപാശമിമം ഛിംധി ദൃഢം പാംഡുഷു വൃഷ്ണിഷു ॥ 41 ॥
ത്വയി മേഽനന്യവിഷയാ മതിര്മധുപതേഽസകൃത് ।
രതിമുദ്വഹതാദദ്ധാ ഗംഗേവൌഘമുദന്വതി ॥ 42 ॥
ശ്രീകൃഷ്ണ കൃഷ്ണസഖ വൃഷ്ണ്യൃഷഭാവനിദ്രുഗ്രാജന്യവംശദഹനാനപവര്ഗവീര്യ ।
ഗോവിംദ ഗോദ്വിജസുരാര്തിഹരാവതാര യോഗേശ്വരാഖിലഗുരോ ഭഗവന്നമസ്തേ ॥ 43 ॥
॥ ഇതി ശ്രീമദ്ഭാഗവതേ മഹാപുരാണേ പാരമഹംസ്യാം സംഹിതായാം പ്രഥമസ്കംധേ അഷ്ടമേഽധ്യായേ ശ്രീകുംതീകൃതകൃഷ്ണസ്തുതിഃ സംപൂര്ണാ ॥
