(શ્રીમદ્ભાગવત મહાપુરાણે પ્રથમસ્કંધે અષ્ટમાધ્યાયઃ)
કુંત્યુવાચ ।
નમસ્યે પુરુષં ત્વાદ્યમીશ્વરં પ્રકૃતેઃ પરમ્ ।
અલક્ષ્યં સર્વભૂતાનામંતર્બહિરવસ્થિતમ્ ॥ 18 ॥
માયાજવનિકાચ્છન્નમજ્ઞાધોક્ષજમવ્યયમ્ ।
ન લક્ષ્યસે મૂઢદૃશા નટો નાટ્યધરો યથા ॥ 19 ॥
તથા પરમહંસાનાં મુનીનામમલાત્મનામ્ ।
ભક્તિયોગવિધાનાર્થં કથં પશ્યેમ હિ સ્ત્રિયઃ ॥ 20 ॥
કૃષ્ણાય વાસુદેવાય દેવકીનંદનાય ચ ।
નંદગોપકુમારાય ગોવિંદાય નમો નમઃ ॥ 21 ॥
નમઃ પંકજનાભાય નમઃ પંકજમાલિને ।
નમઃ પંકજનેત્રાય નમસ્તે પંકજાંઘ્રયે ॥ 22 ॥
યથા હૃષીકેશ ખલેન દેવકી કંસેન રુદ્ધાતિચિરં શુચાર્પિતા ।
વિમોચિતાહં ચ સહાત્મજા વિભો ત્વયૈવ નાથેન મુહુર્વિપદ્ગણાત્ ॥ 23 ॥
વિષાન્મહાગ્નેઃ પુરુષાદદર્શનાદસત્સભાયા વનવાસકૃચ્છ્રતઃ ।
મૃધે મૃધેઽનેકમહાથાસ્ત્રતો દ્રૌણ્યસ્ત્રતશ્ચાસ્મ હરેઽભિરક્ષિતાઃ ॥ 24 ॥
વિપદઃ સંતુ તાઃ શશ્વત્તત્ર તત્ર જગદ્ગુરો ।
ભવતો દર્શનં યત્સ્યાદપુનર્ભવદર્શનમ્ ॥ 25 ॥
જન્મૈશ્વર્યશ્રુતશ્રીભિરેધમાનમદઃ પુમાન્ ।
નૈવાર્હત્યભિધાતું વૈ ત્વામકિંચનગોચરમ્ ॥ 26 ॥
નમોઽકિંચનવિત્તાય નિવૃત્તગુણવૃત્તયે ।
આત્મારામાય શાંતાય કૈવલ્યપતયે નમઃ ॥ 27 ॥
મન્યે ત્વાં કાલમીશાનમનાદિનિધનં વિભુમ્ ।
સમં ચરંતં સર્વત્ર ભૂતાનાં યન્મિથઃ કલિઃ ॥ 28 ॥
ન વેદ કશ્ચિદ્ભગવંશ્ચિકીર્ષિતં તવેહમાનસ્ય નૃણાં વિડંબનમ્ ।
ન યસ્ય કશ્ચિદ્દયિતોઽસ્તિ કર્હિચિદ્દ્વેષ્યશ્ચ યસ્મિન્વિષમા મતિર્નૃણામ્ ॥ 29 ॥
જન્મ કર્મ ચ વિશ્વાત્મન્નજસ્યાકર્તુરાત્મનઃ ।
તિર્યંનૃષિષુ યાદઃસુ તદત્યંતવિડંબનમ્ ॥ 30 ॥
ગોપ્યાદદે ત્વયિ કૃતાગસિ દામ તાવદ્યાતે દશાશ્રુકલિલાંજનસંભ્રમાક્ષમ્ ।
વક્ત્રં નિનીય ભયભાવનયા સ્થિતસ્ય સા માં વિમોહયતિ ભીરપિ યદ્બિભેતિ ॥ 31 ॥
કેચિદાહુરજં જાતં પુણ્યશ્લોકસ્ય કીર્તયે ।
યદોઃ પ્રિયસ્યાન્વવાયે મલયસ્યેવ ચંદનમ્ ॥ 32 ॥
અપરે વસુદેવસ્ય દેવક્યાં યાચિતોઽભ્યગાત્ ।
અજસ્ત્વમસ્ય ક્ષેમાય વધાય ચ સુરદ્વિષામ્ ॥ 33 ॥
ભારાવતારણાયાન્યે ભુવો નાવ ઇવોદધૌ ।
સીદંત્યા ભૂરિભારેણ જાતો હ્યાત્મભુવાર્થિતઃ ॥ 34 ॥
ભવેસ્મિન્ક્લિશ્યમાનાનામવિદ્યાકામકર્મભિઃ ।
શ્રવણસ્મરણાર્હાણિ કરિષ્યન્નિતિ કેચન ॥ 35 ॥
શૃણ્વંતિ ગાયંતિ ગૃણંત્યભીક્ષ્ણશઃ સ્મરંતિ નંદંતિ તવેહિતં જનાઃ ।
ત એવ પશ્યંત્યચિરેણ તાવકં ભવપ્રવાહોપરમં પદાંબુજમ્ ॥ 36 ॥
અપ્યદ્ય નસ્ત્વં સ્વકૃતેહિત પ્રભો જિહાસસિ સ્વિત્સુહૃદોઽનુજીવિનઃ ।
યેષાં ન ચાન્યદ્ભવતઃ પદાંબુજાત્પરાયણં રાજસુ યોજિતાંહસામ્ ॥ 37 ॥
કે વયં નામરૂપાભ્યાં યદુભિઃ સહ પાંડવાઃ ।
ભવતોઽદર્શનં યર્હિ હૃષીકાણામિવેશિતુઃ ॥ 38 ॥
નેયં શોભિષ્યતે તત્ર યથેદાનીં ગદાધર ।
ત્વત્પદૈરંકિતા ભાતિ સ્વલક્ષણવિલક્ષિતૈઃ ॥ 39 ॥
ઇમે જનપદાઃ સ્વૃદ્ધાઃ સુપક્વૌષધિવીરુધઃ ।
વનાદ્રિનદ્યુદન્વંતો હ્યેધંતે તવ વીક્ષિતૈઃ ॥ 40 ॥
અથ વિશ્વેશ વિશ્વાત્મન્વિશ્વમૂર્તે સ્વકેષુ મે ।
સ્નેહપાશમિમં છિંધિ દૃઢં પાંડુષુ વૃષ્ણિષુ ॥ 41 ॥
ત્વયિ મેઽનન્યવિષયા મતિર્મધુપતેઽસકૃત્ ।
રતિમુદ્વહતાદદ્ધા ગંગેવૌઘમુદન્વતિ ॥ 42 ॥
શ્રીકૃષ્ણ કૃષ્ણસખ વૃષ્ણ્યૃષભાવનિદ્રુગ્રાજન્યવંશદહનાનપવર્ગવીર્ય ।
ગોવિંદ ગોદ્વિજસુરાર્તિહરાવતાર યોગેશ્વરાખિલગુરો ભગવન્નમસ્તે ॥ 43 ॥
॥ ઇતિ શ્રીમદ્ભાગવતે મહાપુરાણે પારમહંસ્યાં સંહિતાયાં પ્રથમસ્કંધે અષ્ટમેઽધ્યાયે શ્રીકુંતીકૃતકૃષ્ણસ્તુતિઃ સંપૂર્ણા ॥
