(𑌶𑍍𑌰𑍀𑌮𑌦𑍍𑌭𑌾𑌗𑌵𑌤 𑌮𑌹𑌾𑌪𑍁𑌰𑌾𑌣𑍇 𑌪𑍍𑌰𑌥𑌮𑌸𑍍𑌕𑌂𑌧𑍇 𑌅𑌷𑍍𑌟𑌮𑌾𑌧𑍍𑌯𑌾𑌯𑌃)
𑌕𑍁𑌂𑌤𑍍𑌯𑍁𑌵𑌾𑌚 ।
𑌨𑌮𑌸𑍍𑌯𑍇 𑌪𑍁𑌰𑍁𑌷𑌂 𑌤𑍍𑌵𑌾𑌦𑍍𑌯𑌮𑍀𑌶𑍍𑌵𑌰𑌂 𑌪𑍍𑌰𑌕𑍃𑌤𑍇𑌃 𑌪𑌰𑌮𑍍 ।
𑌅𑌲𑌕𑍍𑌷𑍍𑌯𑌂 𑌸𑌰𑍍𑌵𑌭𑍂𑌤𑌾𑌨𑌾𑌮𑌂𑌤𑌰𑍍𑌬𑌹𑌿𑌰𑌵𑌸𑍍𑌥𑌿𑌤𑌮𑍍 ॥ 1 ॥
𑌮𑌾𑌯𑌾𑌜𑌵𑌨𑌿𑌕𑌾𑌚𑍍𑌛𑌨𑍍𑌨𑌮𑌜𑍍𑌞𑌾𑌧𑍋𑌕𑍍𑌷𑌜𑌮𑌵𑍍𑌯𑌯𑌮𑍍 ।
𑌨 𑌲𑌕𑍍𑌷𑍍𑌯𑌸𑍇 𑌮𑍂𑌢𑌦𑍃𑌶𑌾 𑌨𑌟𑍋 𑌨𑌾𑌟𑍍𑌯𑌧𑌰𑍋 𑌯𑌥𑌾 ॥ 1 ॥
𑌤𑌥𑌾 𑌪𑌰𑌮𑌹𑌂𑌸𑌾𑌨𑌾𑌂 𑌮𑍁𑌨𑍀𑌨𑌾𑌮𑌮𑌲𑌾𑌤𑍍𑌮𑌨𑌾𑌮𑍍 ।
𑌭𑌕𑍍𑌤𑌿𑌯𑍋𑌗𑌵𑌿𑌧𑌾𑌨𑌾𑌰𑍍𑌥𑌂 𑌕𑌥𑌂 𑌪𑌶𑍍𑌯𑍇𑌮 𑌹𑌿 𑌸𑍍𑌤𑍍𑌰𑌿𑌯𑌃 ॥ 20 ॥
𑌕𑍃𑌷𑍍𑌣𑌾𑌯 𑌵𑌾𑌸𑍁𑌦𑍇𑌵𑌾𑌯 𑌦𑍇𑌵𑌕𑍀𑌨𑌂𑌦𑌨𑌾𑌯 𑌚 ।
𑌨𑌂𑌦𑌗𑍋𑌪𑌕𑍁𑌮𑌾𑌰𑌾𑌯 𑌗𑍋𑌵𑌿𑌂𑌦𑌾𑌯 𑌨𑌮𑍋 𑌨𑌮𑌃 ॥ 21 ॥
𑌨𑌮𑌃 𑌪𑌂𑌕𑌜𑌨𑌾𑌭𑌾𑌯 𑌨𑌮𑌃 𑌪𑌂𑌕𑌜𑌮𑌾𑌲𑌿𑌨𑍇 ।
𑌨𑌮𑌃 𑌪𑌂𑌕𑌜𑌨𑍇𑌤𑍍𑌰𑌾𑌯 𑌨𑌮𑌸𑍍𑌤𑍇 𑌪𑌂𑌕𑌜𑌾𑌂𑌘𑍍𑌰𑌯𑍇 ॥ 22 ॥
𑌯𑌥𑌾 𑌹𑍃𑌷𑍀𑌕𑍇𑌶 𑌖𑌲𑍇𑌨 𑌦𑍇𑌵𑌕𑍀 𑌕𑌂𑌸𑍇𑌨 𑌰𑍁𑌦𑍍𑌧𑌾𑌤𑌿𑌚𑌿𑌰𑌂 𑌶𑍁𑌚𑌾𑌰𑍍𑌪𑌿𑌤𑌾 ।
𑌵𑌿𑌮𑍋𑌚𑌿𑌤𑌾𑌹𑌂 𑌚 𑌸𑌹𑌾𑌤𑍍𑌮𑌜𑌾 𑌵𑌿𑌭𑍋 𑌤𑍍𑌵𑌯𑍈𑌵 𑌨𑌾𑌥𑍇𑌨 𑌮𑍁𑌹𑍁𑌰𑍍𑌵𑌿𑌪𑌦𑍍𑌗𑌣𑌾𑌤𑍍 ॥ 23 ॥
𑌵𑌿𑌷𑌾𑌨𑍍𑌮𑌹𑌾𑌗𑍍𑌨𑍇𑌃 𑌪𑍁𑌰𑍁𑌷𑌾𑌦𑌦𑌰𑍍𑌶𑌨𑌾𑌦𑌸𑌤𑍍𑌸𑌭𑌾𑌯𑌾 𑌵𑌨𑌵𑌾𑌸𑌕𑍃𑌚𑍍𑌛𑍍𑌰𑌤𑌃 ।
𑌮𑍃𑌧𑍇 𑌮𑍃𑌧𑍇𑌽𑌨𑍇𑌕𑌮𑌹𑌾𑌥𑌾𑌸𑍍𑌤𑍍𑌰𑌤𑍋 𑌦𑍍𑌰𑍌𑌣𑍍𑌯𑌸𑍍𑌤𑍍𑌰𑌤𑌶𑍍𑌚𑌾𑌸𑍍𑌮 𑌹𑌰𑍇𑌽𑌭𑌿𑌰𑌕𑍍𑌷𑌿𑌤𑌾𑌃 ॥ 24 ॥
𑌵𑌿𑌪𑌦𑌃 𑌸𑌂𑌤𑍁 𑌤𑌾𑌃 𑌶𑌶𑍍𑌵𑌤𑍍𑌤𑌤𑍍𑌰 𑌤𑌤𑍍𑌰 𑌜𑌗𑌦𑍍𑌗𑍁𑌰𑍋 ।
𑌭𑌵𑌤𑍋 𑌦𑌰𑍍𑌶𑌨𑌂 𑌯𑌤𑍍𑌸𑍍𑌯𑌾𑌦𑌪𑍁𑌨𑌰𑍍𑌭𑌵𑌦𑌰𑍍𑌶𑌨𑌮𑍍 ॥ 25 ॥
𑌜𑌨𑍍𑌮𑍈𑌶𑍍𑌵𑌰𑍍𑌯𑌶𑍍𑌰𑍁𑌤𑌶𑍍𑌰𑍀𑌭𑌿𑌰𑍇𑌧𑌮𑌾𑌨𑌮𑌦𑌃 𑌪𑍁𑌮𑌾𑌨𑍍 ।
𑌨𑍈𑌵𑌾𑌰𑍍𑌹𑌤𑍍𑌯𑌭𑌿𑌧𑌾𑌤𑍁𑌂 𑌵𑍈 𑌤𑍍𑌵𑌾𑌮𑌕𑌿𑌂𑌚𑌨𑌗𑍋𑌚𑌰𑌮𑍍 ॥ 26 ॥
𑌨𑌮𑍋𑌽𑌕𑌿𑌂𑌚𑌨𑌵𑌿𑌤𑍍𑌤𑌾𑌯 𑌨𑌿𑌵𑍃𑌤𑍍𑌤𑌗𑍁𑌣𑌵𑍃𑌤𑍍𑌤𑌯𑍇 ।
𑌆𑌤𑍍𑌮𑌾𑌰𑌾𑌮𑌾𑌯 𑌶𑌾𑌂𑌤𑌾𑌯 𑌕𑍈𑌵𑌲𑍍𑌯𑌪𑌤𑌯𑍇 𑌨𑌮𑌃 ॥ 2 ॥
𑌮𑌨𑍍𑌯𑍇 𑌤𑍍𑌵𑌾𑌂 𑌕𑌾𑌲𑌮𑍀𑌶𑌾𑌨𑌮𑌨𑌾𑌦𑌿𑌨𑌿𑌧𑌨𑌂 𑌵𑌿𑌭𑍁𑌮𑍍 ।
𑌸𑌮𑌂 𑌚𑌰𑌂𑌤𑌂 𑌸𑌰𑍍𑌵𑌤𑍍𑌰 𑌭𑍂𑌤𑌾𑌨𑌾𑌂 𑌯𑌨𑍍𑌮𑌿𑌥𑌃 𑌕𑌲𑌿𑌃 ॥ 2 ॥
𑌨 𑌵𑍇𑌦 𑌕𑌶𑍍𑌚𑌿𑌦𑍍𑌭𑌗𑌵𑌂𑌶𑍍𑌚𑌿𑌕𑍀𑌰𑍍𑌷𑌿𑌤𑌂 𑌤𑌵𑍇𑌹𑌮𑌾𑌨𑌸𑍍𑌯 𑌨𑍃𑌣𑌾𑌂 𑌵𑌿𑌡𑌂𑌬𑌨𑌮𑍍 ।
𑌨 𑌯𑌸𑍍𑌯 𑌕𑌶𑍍𑌚𑌿𑌦𑍍𑌦𑌯𑌿𑌤𑍋𑌽𑌸𑍍𑌤𑌿 𑌕𑌰𑍍𑌹𑌿𑌚𑌿𑌦𑍍𑌦𑍍𑌵𑍇𑌷𑍍𑌯𑌶𑍍𑌚 𑌯𑌸𑍍𑌮𑌿𑌨𑍍𑌵𑌿𑌷𑌮𑌾 𑌮𑌤𑌿𑌰𑍍𑌨𑍃𑌣𑌾𑌮𑍍 ॥ 2 ॥
𑌜𑌨𑍍𑌮 𑌕𑌰𑍍𑌮 𑌚 𑌵𑌿𑌶𑍍𑌵𑌾𑌤𑍍𑌮𑌨𑍍𑌨𑌜𑌸𑍍𑌯𑌾𑌕𑌰𑍍𑌤𑍁𑌰𑌾𑌤𑍍𑌮𑌨𑌃 ।
𑌤𑌿𑌰𑍍𑌯𑌂𑌨𑍃𑌷𑌿𑌷𑍁 𑌯𑌾𑌦𑌃𑌸𑍁 𑌤𑌦𑌤𑍍𑌯𑌂𑌤𑌵𑌿𑌡𑌂𑌬𑌨𑌮𑍍 ॥ 30 ॥
𑌗𑍋𑌪𑍍𑌯𑌾𑌦𑌦𑍇 𑌤𑍍𑌵𑌯𑌿 𑌕𑍃𑌤𑌾𑌗𑌸𑌿 𑌦𑌾𑌮 𑌤𑌾𑌵𑌦𑍍𑌯𑌾𑌤𑍇 𑌦𑌶𑌾𑌶𑍍𑌰𑍁𑌕𑌲𑌿𑌲𑌾𑌂𑌜𑌨𑌸𑌂𑌭𑍍𑌰𑌮𑌾𑌕𑍍𑌷𑌮𑍍 ।
𑌵𑌕𑍍𑌤𑍍𑌰𑌂 𑌨𑌿𑌨𑍀𑌯 𑌭𑌯𑌭𑌾𑌵𑌨𑌯𑌾 𑌸𑍍𑌥𑌿𑌤𑌸𑍍𑌯 𑌸𑌾 𑌮𑌾𑌂 𑌵𑌿𑌮𑍋𑌹𑌯𑌤𑌿 𑌭𑍀𑌰𑌪𑌿 𑌯𑌦𑍍𑌬𑌿𑌭𑍇𑌤𑌿 ॥ 31 ॥
𑌕𑍇𑌚𑌿𑌦𑌾𑌹𑍁𑌰𑌜𑌂 𑌜𑌾𑌤𑌂 𑌪𑍁𑌣𑍍𑌯𑌶𑍍𑌲𑍋𑌕𑌸𑍍𑌯 𑌕𑍀𑌰𑍍𑌤𑌯𑍇 ।
𑌯𑌦𑍋𑌃 𑌪𑍍𑌰𑌿𑌯𑌸𑍍𑌯𑌾𑌨𑍍𑌵𑌵𑌾𑌯𑍇 𑌮𑌲𑌯𑌸𑍍𑌯𑍇𑌵 𑌚𑌂𑌦𑌨𑌮𑍍 ॥ 32 ॥
𑌅𑌪𑌰𑍇 𑌵𑌸𑍁𑌦𑍇𑌵𑌸𑍍𑌯 𑌦𑍇𑌵𑌕𑍍𑌯𑌾𑌂 𑌯𑌾𑌚𑌿𑌤𑍋𑌽𑌭𑍍𑌯𑌗𑌾𑌤𑍍 ।
𑌅𑌜𑌸𑍍𑌤𑍍𑌵𑌮𑌸𑍍𑌯 𑌕𑍍𑌷𑍇𑌮𑌾𑌯 𑌵𑌧𑌾𑌯 𑌚 𑌸𑍁𑌰𑌦𑍍𑌵𑌿𑌷𑌾𑌮𑍍 ॥ 33 ॥
𑌭𑌾𑌰𑌾𑌵𑌤𑌾𑌰𑌣𑌾𑌯𑌾𑌨𑍍𑌯𑍇 𑌭𑍁𑌵𑍋 𑌨𑌾𑌵 𑌇𑌵𑍋𑌦𑌧𑍌 ।
𑌸𑍀𑌦𑌂𑌤𑍍𑌯𑌾 𑌭𑍂𑌰𑌿𑌭𑌾𑌰𑍇𑌣 𑌜𑌾𑌤𑍋 𑌹𑍍𑌯𑌾𑌤𑍍𑌮𑌭𑍁𑌵𑌾𑌰𑍍𑌥𑌿𑌤𑌃 ॥ 34 ॥
𑌭𑌵𑍇𑌸𑍍𑌮𑌿𑌨𑍍𑌕𑍍𑌲𑌿𑌶𑍍𑌯𑌮𑌾𑌨𑌾𑌨𑌾𑌮𑌵𑌿𑌦𑍍𑌯𑌾𑌕𑌾𑌮𑌕𑌰𑍍𑌮𑌭𑌿𑌃 ।
𑌶𑍍𑌰𑌵𑌣𑌸𑍍𑌮𑌰𑌣𑌾𑌰𑍍𑌹𑌾𑌣𑌿 𑌕𑌰𑌿𑌷𑍍𑌯𑌨𑍍𑌨𑌿𑌤𑌿 𑌕𑍇𑌚𑌨 ॥ 35 ॥
𑌶𑍃𑌣𑍍𑌵𑌂𑌤𑌿 𑌗𑌾𑌯𑌂𑌤𑌿 𑌗𑍃𑌣𑌂𑌤𑍍𑌯𑌭𑍀𑌕𑍍𑌷𑍍𑌣𑌶𑌃 𑌸𑍍𑌮𑌰𑌂𑌤𑌿 𑌨𑌂𑌦𑌂𑌤𑌿 𑌤𑌵𑍇𑌹𑌿𑌤𑌂 𑌜𑌨𑌾𑌃 ।
𑌤 𑌏𑌵 𑌪𑌶𑍍𑌯𑌂𑌤𑍍𑌯𑌚𑌿𑌰𑍇𑌣 𑌤𑌾𑌵𑌕𑌂 𑌭𑌵𑌪𑍍𑌰𑌵𑌾𑌹𑍋𑌪𑌰𑌮𑌂 𑌪𑌦𑌾𑌂𑌬𑍁𑌜𑌮𑍍 ॥ 36 ॥
𑌅𑌪𑍍𑌯𑌦𑍍𑌯 𑌨𑌸𑍍𑌤𑍍𑌵𑌂 𑌸𑍍𑌵𑌕𑍃𑌤𑍇𑌹𑌿𑌤 𑌪𑍍𑌰𑌭𑍋 𑌜𑌿𑌹𑌾𑌸𑌸𑌿 𑌸𑍍𑌵𑌿𑌤𑍍𑌸𑍁𑌹𑍃𑌦𑍋𑌽𑌨𑍁𑌜𑍀𑌵𑌿𑌨𑌃 ।
𑌯𑍇𑌷𑌾𑌂 𑌨 𑌚𑌾𑌨𑍍𑌯𑌦𑍍𑌭𑌵𑌤𑌃 𑌪𑌦𑌾𑌂𑌬𑍁𑌜𑌾𑌤𑍍𑌪𑌰𑌾𑌯𑌣𑌂 𑌰𑌾𑌜𑌸𑍁 𑌯𑍋𑌜𑌿𑌤𑌾𑌂𑌹𑌸𑌾𑌮𑍍 ॥ 3 ॥
𑌕𑍇 𑌵𑌯𑌂 𑌨𑌾𑌮𑌰𑍂𑌪𑌾𑌭𑍍𑌯𑌾𑌂 𑌯𑌦𑍁𑌭𑌿𑌃 𑌸𑌹 𑌪𑌾𑌂𑌡𑌵𑌾𑌃 ।
𑌭𑌵𑌤𑍋𑌽𑌦𑌰𑍍𑌶𑌨𑌂 𑌯𑌰𑍍𑌹𑌿 𑌹𑍃𑌷𑍀𑌕𑌾𑌣𑌾𑌮𑌿𑌵𑍇𑌶𑌿𑌤𑍁𑌃 ॥ 3 ॥
𑌨𑍇𑌯𑌂 𑌶𑍋𑌭𑌿𑌷𑍍𑌯𑌤𑍇 𑌤𑌤𑍍𑌰 𑌯𑌥𑍇𑌦𑌾𑌨𑍀𑌂 𑌗𑌦𑌾𑌧𑌰 ।
𑌤𑍍𑌵𑌤𑍍𑌪𑌦𑍈𑌰𑌂𑌕𑌿𑌤𑌾 𑌭𑌾𑌤𑌿 𑌸𑍍𑌵𑌲𑌕𑍍𑌷𑌣𑌵𑌿𑌲𑌕𑍍𑌷𑌿𑌤𑍈𑌃 ॥ 3 ॥
𑌇𑌮𑍇 𑌜𑌨𑌪𑌦𑌾𑌃 𑌸𑍍𑌵𑍃𑌦𑍍𑌧𑌾𑌃 𑌸𑍁𑌪𑌕𑍍𑌵𑍌𑌷𑌧𑌿𑌵𑍀𑌰𑍁𑌧𑌃 ।
𑌵𑌨𑌾𑌦𑍍𑌰𑌿𑌨𑌦𑍍𑌯𑍁𑌦𑌨𑍍𑌵𑌂𑌤𑍋 𑌹𑍍𑌯𑍇𑌧𑌂𑌤𑍇 𑌤𑌵 𑌵𑍀𑌕𑍍𑌷𑌿𑌤𑍈𑌃 ॥ 40 ॥
𑌅𑌥 𑌵𑌿𑌶𑍍𑌵𑍇𑌶 𑌵𑌿𑌶𑍍𑌵𑌾𑌤𑍍𑌮𑌨𑍍𑌵𑌿𑌶𑍍𑌵𑌮𑍂𑌰𑍍𑌤𑍇 𑌸𑍍𑌵𑌕𑍇𑌷𑍁 𑌮𑍇 ।
𑌸𑍍𑌨𑍇𑌹𑌪𑌾𑌶𑌮𑌿𑌮𑌂 𑌛𑌿𑌂𑌧𑌿 𑌦𑍃𑌢𑌂 𑌪𑌾𑌂𑌡𑍁𑌷𑍁 𑌵𑍃𑌷𑍍𑌣𑌿𑌷𑍁 ॥ 41 ॥
𑌤𑍍𑌵𑌯𑌿 𑌮𑍇𑌽𑌨𑌨𑍍𑌯𑌵𑌿𑌷𑌯𑌾 𑌮𑌤𑌿𑌰𑍍𑌮𑌧𑍁𑌪𑌤𑍇𑌽𑌸𑌕𑍃𑌤𑍍 ।
𑌰𑌤𑌿𑌮𑍁𑌦𑍍𑌵𑌹𑌤𑌾𑌦𑌦𑍍𑌧𑌾 𑌗𑌂𑌗𑍇𑌵𑍌𑌘𑌮𑍁𑌦𑌨𑍍𑌵𑌤𑌿 ॥ 42 ॥
𑌶𑍍𑌰𑍀𑌕𑍃𑌷𑍍𑌣 𑌕𑍃𑌷𑍍𑌣𑌸𑌖 𑌵𑍃𑌷𑍍𑌣𑍍𑌯𑍃𑌷𑌭𑌾𑌵𑌨𑌿𑌦𑍍𑌰𑍁𑌗𑍍𑌰𑌾𑌜𑌨𑍍𑌯𑌵𑌂𑌶𑌦𑌹𑌨𑌾𑌨𑌪𑌵𑌰𑍍𑌗𑌵𑍀𑌰𑍍𑌯 ।
𑌗𑍋𑌵𑌿𑌂𑌦 𑌗𑍋𑌦𑍍𑌵𑌿𑌜𑌸𑍁𑌰𑌾𑌰𑍍𑌤𑌿𑌹𑌰𑌾𑌵𑌤𑌾𑌰 𑌯𑍋𑌗𑍇𑌶𑍍𑌵𑌰𑌾𑌖𑌿𑌲𑌗𑍁𑌰𑍋 𑌭𑌗𑌵𑌨𑍍𑌨𑌮𑌸𑍍𑌤𑍇 ॥ 43 ॥
॥ 𑌇𑌤𑌿 𑌶𑍍𑌰𑍀𑌮𑌦𑍍𑌭𑌾𑌗𑌵𑌤𑍇 𑌮𑌹𑌾𑌪𑍁𑌰𑌾𑌣𑍇 𑌪𑌾𑌰𑌮𑌹𑌂𑌸𑍍𑌯𑌾𑌂 𑌸𑌂𑌹𑌿𑌤𑌾𑌯𑌾𑌂 𑌪𑍍𑌰𑌥𑌮𑌸𑍍𑌕𑌂𑌧𑍇 𑌅𑌷𑍍𑌟𑌮𑍇𑌽𑌧𑍍𑌯𑌾𑌯𑍇 𑌶𑍍𑌰𑍀𑌕𑍁𑌂𑌤𑍀𑌕𑍃𑌤𑌕𑍃𑌷𑍍𑌣𑌸𑍍𑌤𑍁𑌤𑌿𑌃 𑌸𑌂𑌪𑍂𑌰𑍍𑌣𑌾 ॥
