ఓం అస్య శ్రీబగళాముఖీస్తోత్రస్య
నారదృషిః
శ్రీ బగళాముఖీ దేవతా
మమ సన్నిహితానాం విరోధినాం వాఙ్ముఖ-పదబుద్ధీనాం స్తమ్భనార్థే స్తోత్రపాఠే వినియోగః
మధ్యేసుధాబ్ధి మణిమణ్టప రత్నవేది
సింహాసనోపరిగతాం పరిపీతవర్ణామ్ ।
పీతామ్బరాభరణ మాల్యవిభూషితాఙ్గీం
దేవీం భజామి ధృతముద్గరవైరి జిహ్వామ్ ॥ 1 ॥
జిహ్వాగ్రమాదాయ కరేణ దేవీం
వామేన శత్రూన్ పరిపీడయన్తీమ్ ।
గదాభిఘాతేన చ దక్షిణేన
పీతామ్బరాఢ్యాం ద్విభుజాం భజామి ॥ 2 ॥
చలత్కనకకుణ్డలోల్లసితచారుగణ్డస్థలాం
లసత్కనకచమ్పక ద్యుతిమదిన్దుబిమ్బాననామ్ ।
గదాహత విపక్షకాం కలితలోలజిహ్వాఞ్చలాం
స్మరామి బగళాముఖీం విముఖవాఙ్మనస్స్తమ్భినీమ్ ॥ 3 ॥
పీయూషో దధిమధ్యచారు విలస ద్రక్తోత్పలే మణ్టపే
సత్సింహాసన మౌళిపాతితరిపుం ప్రేతాసనాధ్యాసినీమ్ ।
స్వర్ణాభాం కరపీడితారిరసనాం భ్రామ్యద్గదాం విభ్రమాం
ఇత్థం ధ్యాయతి యాన్తి తస్య విలయం సద్యోథ సర్వాపదః ॥ 4 ॥
దేవిత్త్వచ్చరణామ్బుజార్చనకృతే యః పీత పుష్పాఞ్జలీన్
భక్త్యా వామకరే నిధాయ చ మనుం మన్త్రీ మనోజ్ఞాక్షరమ్ ।
పీఠధ్యానపరోఽథ కుమ్భకవశాద్బీజం స్మరేత్పార్థివ-
స్తస్యామిత్రముఖస్య వాచి హృదయే జాడ్యం భవేత్తత్క్షణాత్ ॥ 5 ॥
వాదీ మూకతి కఙ్కతి క్షితిపతిర్వైశ్వానరశ్శీతితి
క్రోధీశామ్యతి దుర్జనస్సుజనతి క్షిప్రానుగః ఖఞ్జతి ।
గర్వీ ఖర్వతి సర్వవిచ్చ జడతి త్వద్యన్త్రణా యన్త్రితః
శ్రీనిత్యే బగళాముఖి ప్రతిదినం కల్యాణి తుభ్యం నమః ॥ 6 ॥
మన్త్రస్తావదయం విపక్షదలనే స్తోత్రం పవిత్రం చ తే
యన్త్రం వాదినియన్త్రణం త్రిజగతాం జైత్రం చ చిత్రం చ తే ।
మాతః శ్రీబగళేతి నామ లలితం యస్యాస్తి జన్తోర్ముఖే
త్వన్నామగ్రహణేన సంసది ముఖ స్తమ్భో భవేద్వాదినామ్ ॥ 7 ॥
దుష్టస్తమ్భనముగ్రవిఘ్నశమనం దారిద్ర్యవిద్రావణం
భూభృద్భీశమనం చలన్మృగదృశాం చేతస్సమాకర్షణమ్ ।
సౌభాగ్యైకనికేతనం సమదృశః కారుణ్యపూర్ణామృతం
మృత్యోర్మారణమావిరస్తు పురతో మాతస్త్వదీయం వపుః ॥ 8 ॥
మాతర్భఞ్జయ మే విపక్షవదనాం జిహ్వాం చ సఙ్కీలయ
బ్రాహ్మీం ముద్రయ నాశయాశుధిషణాముగ్రాం గతిం స్తమ్భయ ।
శత్రూంశ్చూర్ణయ దేవి తీక్ష్ణగదయా గౌరాఙ్గి పీతామ్బరే
విఘ్నౌఘం బగళే హర ప్రణమతాం కారుణ్యపూర్ణేక్షణే ॥ 9 ॥
మాతర్భైరవి భద్రకాళి విజయే వారాహి విశ్వాశ్రయే
శ్రీవిద్యే సమయే మహేశి బగళే కామేశి రామే రమే ।
మాతఙ్గి త్రిపురే పరాత్పరతరే స్వర్గాపవర్గప్రదే
దాసోఽహం శరణాగతః కరుణయా విశ్వేశ్వరి త్రాహిమామ్ ॥ 10 ॥
సంరమ్భే సౌరసఙ్ఘే ప్రహరణసమయే బన్ధనేవారిమధ్యే
విద్యావాదేవివాదే ప్రతికృతినృపతౌ దివ్యకాలే నిశాయామ్ ।
వశ్యే వా స్తమ్భనే వా రిపువధసమయే నిర్జనే వా వనే వా
గచ్ఛంస్తిష్ఠంస్త్రికాలం యది పఠతి శివం ప్రాప్నుయాదాశు ధీరః ॥ 11 ॥
త్వం విద్యా పరమా త్రిలోకజననీ విఘ్నౌఘసఞ్ఛేదినీ
యోషాకర్షణకారిణీ త్రిజగతామానన్దసంవర్ధినీ ।
దుస్ఫోటోచ్చాటనకారిణీ జనమనస్సమ్మోహసన్దాయినీ
జిహ్వాకీలనభైరవీ విజయతే బ్రహ్మాస్త్రమన్త్రో యథా ॥ 12 ॥
విద్యాలక్ష్మీస్సర్వసౌభాగ్యమాయుః
పుత్రైః పౌత్రైః సర్వసామ్రాజ్యసిద్ధిః ।
మానో భోగో వశ్యమారోగ్యసౌఖ్యం
ప్రాప్తం తత్తద్భూతలేఽస్మిన్నరేణ ॥ 13 ॥
యత్కృతం చ జపం హోమం గదితం పరమేశ్వరీ ।
దుష్టానాం నిగ్రహార్థాయ తద్గృహాణ నమోఽస్తు తే ॥ 14 ॥
పీతామ్బరాం తాం ద్విభుజాం త్రినేత్రాం గాత్రగోజ్జ్వలామ్ ।
శిలాముద్గరహస్తాం చ స్మరేత్తాం బగళాముఖీమ్ ॥ 15 ॥
బ్రహ్మాస్త్రమితి విఖ్యాతం త్రిషు లోకేషు విశ్రుతమ్ ।
గురుభక్తాయ దాతవ్యం నదేయం యస్య కస్యచిత్ ॥ 16 ॥
నిత్యం స్తోత్రమిదం పవిత్రమిహ యో దేవ్యాః పఠత్యాదరాత్
ధృత్వాయన్త్రమిదం తథైవ సమరే బాహౌ కరే వా గళే ।
రాజానోఽప్యరయో మదాన్ధకరిణస్సర్పా మృగేన్ద్రాదికాః
తే వై యాన్తి విమోహితా రిపుగణా లక్ష్మీః స్థిరాస్సిద్ధయః ॥ 17 ॥
ఇతి శ్రీ రుద్రయామళే తన్త్రే శ్రీ బగళాముఖీ స్తోత్రమ్ ॥
