అస్య శ్రీబగళాముఖీమహామన్త్రస్య
నారదో భగవాన్ ఋషిః
అతిజగతీఛన్దః
శ్రీ బగళాముఖీ దేవతా
లాం బీజం ఇం శక్తిః
లం కీలకం-మమ దూరస్థానాం సమీపస్థానాం గతి మతి వాక్త్సమ్భనార్థే జపే వినియోగః
ఓం హ్రీం అఙ్గుష్ఠాభ్యాం నమః
బగళాముఖీ తర్జనీభ్యాం నమః
సర్వదుష్టానాం మధ్యమాభ్యాం నమః
వాచం ముఖం పదం స్తమ్భయ అనామికాభ్యాం నమః
జిహ్వాం కీలయ బుద్ధిం వినాశయ కనిష్ఠికాభ్యాం నమః
హ్రీం ఓం స్వాహా కరతలకరపృష్టాభ్యాం నమః
ఓం హ్రీం హృదయాయ నమః
బగళాముఖీ శిరసే స్వాహా
సర్వదుష్టానాం శిఖాయై వషత్
వాచం ముఖం పదం స్తమ్భయ కవచా హుం
జిహ్వాం కీలయ బుద్ధిం వినాశయ నేత్రత్రయాయ వౌషట్
హ్రీం ఓం స్వాహా అస్త్రాయ ఫట్
భూర్భువస్సువరోమితి దిగ్బన్ధః ।
ధ్యానమ్ ।
పీతామ్బరాం త్రిణేత్రాం చ ద్విభుజాం దహనోజ్వలామ్ ।
శిలాపర్వతహస్తాం చ రిపుకమ్పాం మహోత్కటామ్ ॥ 1 ॥
గమ్భీరాం చ మదోన్మత్తాం స్వర్ణకాన్తిసమప్రభామ్ ।
వైరినిర్దళనార్థాయ స్మరేత్తాం బగళాముఖీమ్ ॥ 2 ॥
చతుర్భుజాం త్రిణయనాం కమలాసనసంస్థితామ్ ।
దక్షిణే ముద్గరం పాశం వామే జిహ్వాం చ వజ్రకమ్ ॥ 3 ॥
పీతామ్బరధరాం సాన్ద్రాం దృఢపీనయోధరామ్ ।
వైరివాక్త్సమ్భినీం దేవీం స్మరామి బగళాముఖీమ్ ॥ 4 ॥
హేమకుణ్డలభూషాఙ్గీం శీతచన్ద్రార్ధశేఖరీమ్ ।
పీతభూషణభూషాఢ్యాం స్వర్ణసింహాసనేస్థితామ్ ॥ 5 ॥
త్రిశూలధారిణీమమ్బాం సర్వసౌభాగ్యదాయినీమ్ ।
సర్వశృఙ్గారవేషాఢ్యాం భజేత్తాం బగళాముఖీమ్ ॥ 6 ॥
మధ్యే సుధాబ్ధిమణిమణ్టప రత్న వేద్యాం
సింహాసనోపరిగతాం పరిపీతవర్ణామ్ ।
పీతామ్బరాభరణమాల్యవిభూషితాఙ్గీం
దేవీం నమామి ధృత ముద్గరవైరి జిహ్వామ్ ॥ 7 ॥
చలత్కనకకుణ్డలోల్లసితచారుగణ్డస్థలాం
లసత్కనకచమ్పక ద్యుతిమదర్ధేన్దు బిమ్బాఞ్చితామ్ ।
సదాహితవిపక్షకాం దళితవైరి జిహ్వాఞ్చలాం
నమామి బగళాముఖీం ధీమతాం వాఙ్మనస్స్తమ్భినీమ్ ॥ 8 ॥
పీయూషో దధిమధ్యచారు విలసద్రత్నోజ్వలే మణ్టపే
యాసింహాసన మౌళిపాతితరిపు ప్రేతాసనాధ్యాసినీమ్ ।
స్వర్ణాభాం కరపీడితారిరశనాం భ్రామ్యద్గదాం బిభ్రతీం
యస్త్వాం పశ్యతి తస్య యాన్తి విలయం సద్యోహి సర్వాపదః ॥ 9 ॥
దేవి త్వచ్చరణామ్బుజార్చనకృతే యః పీతపుష్పాఞ్జలిం
ముద్రాం వామకరే నిధాయ చ పునర్మన్త్రీ మనోజ్ఞాక్షరీమ్ ।
పీఠధ్యానపరోపి కుమ్భకవశాద్బీజం స్మరేత్ప్రార్థితం
తస్యా మిత్రచయస్య సంసది ముఖ స్తమ్భో భవేత్తత్క్షణాత్ ॥ 10 ॥
(ఓం హ్రీం బగళాముఖి సర్వదుష్టానాం వాచం ముఖం పదం స్తమ్భయ జిహ్వాం కీలయ బుద్ధిం వినాశయ హ్రీం ఓం స్వాహా)
మన్త్రస్తావదయం విపక్షదళనే స్తోత్రం పవిత్రం చ తే
యన్త్రంవాదిని యన్త్రిణం త్రిజగతాం జైత్రం స చిత్రం చ తత్ ।
శ్రీమాతర్బగళేతి నామ లలితం యస్యాస్తి జన్తోర్ముఖే
తన్నామస్మరణేన వాగ్భవముఖ స్తమ్భోభవేత్తత్క్షణాత్ ॥ 11 ॥
దుష్టస్తమ్భనముగ్రవిఘ్నశమనం దారిద్ర్యవిద్రావణం
భూభృత్త్సమ్భనకారణం మృగదృశాం చేతస్సమాకర్షణమ్ ।
సౌభాగ్యైకనికేతనం మమ దృశాం కారుణ్యపూర్ణేక్షణే
మృత్యోర్మారణమావిరస్తు పురతో మాతస్త్వదీయం వపుః ॥ 12 ॥
సఙ్ఖ్యాగ్రే చోరదణ్డ ప్రహరణసమయే బన్ధనే వైరిమధ్యే
విద్యావాదే వివాదే ప్రకటితనృపతౌ యుద్ధకాలే నిశాయామ్ ।
వశ్యే చ స్తమ్భనే వా రిపువధసమయే ప్రాణబాధే రణే వా
గచ్ఛన్తీష్టం త్రికాలం తవ పఠనమిదం కారయేదాశు ధీరః ॥ 13 ॥
మాతర్భఞ్జయ మద్విపక్షవదనం జిహ్వాం చ సఙ్కీలయ
బ్రాహ్మీం ముద్రయ ముద్రయాశుధిషణామఙ్ఘ్ర్యోర్గతిం స్తమ్భయ ।
శత్రూన్ చూర్ణయ చూర్ణయాశు గదయా గౌరాఙ్గి పీతామ్బరే
విఘ్నౌఘం బగళే హర ప్రతిదినం కౌమారి వామేక్షణే ॥ 14 ॥
మాతర్భైరవి భద్రకాళి విజయే వారాహి విశ్వాశ్రయే
శ్రీనిత్యే బగళే మహేశి సమయే రామే సురామే రమే ।
మాతఙ్గి త్రిపురే పరాత్పరతరే స్వర్గాపవర్గప్రదే
వన్దేహం శరణాగతోస్మికృపయా విశ్వేశ్వరీ త్రాహి మామ్ ॥ 15 ॥
త్వం విద్యా పరమా త్రిలోకజననీ వ్యోషాననం ఛేదినీ
యోషాకర్షణకారిణీ చ సుమహాబన్ధైకసమ్భేదినీ ।
దుష్టోచ్చాటనకారిణీ రిపుమనస్సన్దోహసన్దాయినీ
జిహ్వాకీలనభైరవీ విజయతే బ్రహ్మాస్త్రసారాయణీ ॥ 16 ॥
యః కృతం జపసఙ్ఖ్యానాం చిన్తితం పరమేశ్వరీ ।
శత్రూణాం బుద్ధినాశాయ గృహాణ మదనుగ్రహాత్ ॥ 17 ॥
వైడూర్యహారపరిశోభితహేమమాలాం
మధ్యేతిపీన కుచయోర్ధృతపీతవస్త్రామ్ ।
వ్యాఘ్రాధిరూఢ పరిపూరిత రత్నశోభాం
నిత్యం స్మరామి బగళాం రిపువక్త్ర కీలామ్ ॥ 18 ॥
ఏకాగ్ర మానసో భూత్వా స్తోష్యత్యమ్బాం సుశోభనామ్ ।
రజన్యా రచితాం మాలాం కరే ధృత్వా జపేచ్ఛుచిః ॥ 19 ॥
వామే పాణౌ తు పాశం చ తస్యాధస్తాద్ధృఢం శుభమ్ ।
దక్షే కరేఽక్షసూత్రం చ అధఃపద్మం చ ధారిణీమ్ ॥ 20 ॥
చాముణ్డే చణ్డికోష్ట్రే హుతవహదయితే శ్యామలే శ్రీభుజఙ్గీ
దుర్గే ప్రత్యఙ్గిరాద్యే మురరిపుభగినీ భార్గవీవామనేత్రే ।
నానారూపప్రభేదే స్థితిలయజననం పాలయద్భర్గహృద్యే
విశ్వాద్యే విశ్వజైత్రీ త్రిపురః బగళే విశ్వవన్ద్యే త్వమేకా ॥ 21 ॥
చక్రం ఖడ్గం ముసలమభయం దక్షిణాభిశ్చ దోర్భిః
శఙ్ఖం ఖేటం హలమపి చ గదాం బిభ్రతీం వామదోర్భిః ।
సింహారూఢామయుగనయనాం శ్యామలాం కఞ్జవక్త్రాం
వన్దే దేవీం సకలవరదాం పఞ్చమీం మాతృమధ్యామ్ ॥ 22 ॥
ద్వాత్రింశదాయుతయుతైశ్చతురష్టహస్తై-
రష్టోత్తరైశ్శతకరైశ్చ సహస్రహస్తైః ।
సర్వాయుధైరయుత బాహుభిరన్వితాం తాం
దేవీం భజామి బగళాం రసనాగ్రహస్తామ్ ॥ 23 ॥
సర్వతశ్శుభకరాం ద్విభుజాం తాం
కమ్బుహేమ నవకుణ్డల కర్ణామ్ ।
శత్రునిర్దళనకారణకోపాం
చిన్తయామి బగళాం హృదయాబ్జే ॥ 24 ॥
జిహ్వాగ్రమాదాయ కరేణ దేవీం
వామేన శత్రూన్ పరిపీడయన్తీమ్ ।
గదాభిఘాతేన చ దక్షిణేన
పీతామ్బరాఢ్యాం ద్విభుజాం నమామి ॥ 25 ॥
వన్దే వారిజలోచనాం వసుకరాం పీతామ్బరాడమ్బరాం
పీతామ్భోరుహసంస్థితాం త్రినయనాం పీతాఙ్గరాగోజ్జ్వలామ్ ।
శబ్దబ్రహ్మమయీం మహాకవిజయీం త్రైలోక్యసమ్మోహనీం
విద్యుత్కోటి నిభాం ప్రసన్న బగళాం ప్రత్యర్థివాక్త్సమ్భినీమ్ ॥ 26 ॥
దుఃఖేన వా యది సుఖేన చ వా త్వదీయం
స్తుత్వాఽథ నామబగళే సముపైతి వశ్యమ్ ।
నిశ్చిత్య శత్రుమబలం విజయం త్వదఙ్ఘ్రి
పద్మార్చకస్య భవతీతి కిమత్ర చిత్రమ్ ॥ 27 ॥
విమోహితజగత్త్రయాం వశగతావనవల్లభాం
భజామి బగళాముఖీం భవసుఖైకసన్ధాయినీమ్ ।
గేహం నాతతి గర్వితః ప్రణమతి స్త్రీసఙ్గమో మోక్షతి
ద్వేషీ మిత్రతి పాపకృత్సుకృతతి క్ష్మావల్లభోధావతి ॥ 28 ॥
మృత్యుర్వైధృతిదూషణం సుగుణతి త్వత్పాదసంసేవనాత్
త్వాం వన్దే భవభీతిభఞ్జనకరీం గౌరీం గిరీశప్రియామ్ ।
నిత్యం యస్తు మనోహరం స్తవమిదం దివ్యం పఠేత్సాదరం
ధృత్వా యన్త్రమిదం తథైవ సమరే బాహ్వోః కరే వా గళే ॥ 29 ॥
రాజానో వరయోషితోథకరిణస్సర్వామృగేన్ద్రా వశాః
స్తోత్రైర్యాన్తి విమోహితా రిపుగణా లక్ష్మీః స్థిరా సిద్ధయః ।
నిర్నిద్రే బగళే సముద్రనిలయే రౌద్ర్యాది వాఙ్ముద్రికే
భద్రే రుద్రమనోహరే త్రిభువనత్రాణే దరిద్రాపహే ॥ 30 ॥
సద్రత్నాకర భూమిగోజ్వల కరీ నిస్తన్ద్రి చాన్ద్రాననే
నీహారాద్రిసుతే నిసర్గసరళే విద్యే సురాద్యే నమః ।
దేవీ తస్య నిరామయాత్మజముఖాన్యాయూంషి దద్యాదిదం
యే నిత్యం ప్రజపన్తి భక్తి భరితాస్తేభ్యస్స్తవం నిశ్చితమ్ ॥ 31 ॥
నూనం శ్రేయో వశ్యమారోగ్యతాం చ ప్రాప్తస్సర్వం భూతలే సాధకస్తు ।
భక్త్యా నిత్యం స్తోత్రమేతత్పఠన్వై విద్యాం కీర్తిం వంశవృద్ధిం చ విన్దేత్ ॥ 32 ॥
ఇతి శ్రీరుద్రయామళే శ్రీబగళాముఖీస్తోత్రమ్ ॥
