శ్రీమాన్ యస్యాః ప్రియస్సన్ సకలమపి జగజ్జఙ్గమస్థావరాద్యం
స్వర్భూపాతాలభేదం వివిధవిధమహాశిల్పసామర్థ్యసిద్ధమ్ ।
రఞ్జన్ బ్రహ్మామరేన్ద్రైస్త్రిభువనజనకః స్తూయతే భూరిశో యః
సా విష్ణోరేకపత్నీ త్రిభువనజననీ పాతు పద్మావతీ నః ॥ 1 ॥
శ్రీశృఙ్గారైకదేవీం విధిముఖసుమనఃకోటికోటీరజాగ్ర-
ద్రత్నజ్యోత్స్నాప్రసారప్రకటితచరణామ్భోజనీరాజితార్చామ్ ।
గీర్వాణస్త్రైణవాణీపరిఫణితమహాకీర్తిసౌభాగ్యభాగ్యాం
హేలానిర్దగ్ధదైన్యశ్రమవిషమమహారణ్యగణ్యాం నమామి ॥ 2 ॥
విద్యుత్కోటిప్రకాశాం వివిధమణిగణోన్నిద్రసుస్నిగ్ధశోభా-
సమ్పత్సమ్పూర్ణహారాద్యభినవవిభవాలఙ్క్రియోల్లాసికణ్ఠామ్ ।
ఆద్యాం విద్యోతమానస్మితరుచిరచితానల్పచన్ద్రప్రకాశాం
పద్మాం పద్మాయతాక్షీం పదనలిననమత్పద్మసద్మాం నమామి ॥ 3 ॥
శశ్వత్తస్యాః శ్రయేఽహం చరణసరసిజం శార్ఙ్గపాణేః పురన్ధ్ర్యాః
స్తోకం యస్యాః ప్రసాదః ప్రసరతి మనుజే క్రూరదారిద్ర్యదగ్ధే ।
సోఽయం సద్యోఽనవద్యస్థిరతరరుచిరశ్రేష్ఠభూయిష్ఠనవ్య-
స్తవ్యప్రాసాదపఙ్క్తిప్రసితబహువిధప్రాభవో బోభవీతి ॥ 4 ॥
సౌన్దర్యోద్వేలహేమామ్బుజమహితమహాసింహపీఠాశ్రయాఢ్యాం
పుష్యన్నీలారవిన్దప్రతిమవరకృపాపూరసమ్పూర్ణనేత్రామ్ ।
జ్యోత్స్నాపీయూషధారావహనవసుషమక్షౌమధామోజ్జ్వలాఙ్గీం
వన్దే సిద్ధేశచేతస్సరసిజనిలయాం చక్రిసౌభాగ్యఋద్ధిమ్ ॥ 5 ॥
సంసారక్లేశహన్త్రీం స్మితరుచిరముఖీం సారశృఙ్గారశోభాం
సర్వైశ్వర్యప్రదాత్రీం సరసిజనయనాం సంస్తుతాం సాధుబృన్దైః ।
సంసిద్ధస్నిగ్ధభావాం సురహితచరితాం సిన్ధురాజాత్మభూతాం
సేవే సమ్భావనీయానుపమితమహిమాం సచ్చిదానన్దరూపామ్ ॥ 6 ॥
సిద్ధస్వర్ణోపమానద్యుతిలసితతనుం స్నిగ్ధసమ్పూర్ణచన్ద్ర-
వ్రీడాసమ్పాదివక్త్రాం తిలసుమవిజయోద్యోగనిర్నిద్రనాసామ్ ।
తాదాత్వోత్ఫుల్లనీలామ్బుజహసనచణాత్మీయచక్షుః ప్రకాశాం
బాలశ్రీలప్రవాలప్రియసఖచరణద్వన్ద్వరమ్యాం భజేఽహమ్ ॥ 7 ॥
యాం దేవీం మౌనివర్యాః శ్రయదమరవధూమౌలిమాల్యార్చితాఙ్ఘ్రిం
సంసారాసారవారాన్నిధితరతరణే సర్వదా భావయన్తే ।
శ్రీకారోత్తుఙ్గరత్నప్రచురితకనకస్నిగ్ధశుద్ధాన్తలీలాం
తాం శశ్వత్పాదపద్మశ్రయదఖిలహృదాహ్లాదినీం హ్లాదయేఽహమ్ ॥ 8 ॥
ఆకాశాధీశపుత్రీం శ్రితజననివహాధీనచేతఃప్రవృత్తిం
వన్దే శ్రీవేఙ్కటేశప్రభువరమహిషీం దీనచిత్తప్రతోషామ్ ।
పుష్యత్పాదారవిన్దప్రసృమరసుమహశ్శామితస్వాశ్రితాన్త-
స్తామిస్రాం తత్త్వరూపాం శుకపురనిలయాం సర్వసౌభాగ్యదాత్రీమ్ ॥ 9 ॥
శ్రీశేషశర్మాభినవోపక్లుప్తా
ప్రియేణ భక్త్యా చ సమర్పితేయమ్ ।
పద్మావతీమఙ్గలకణ్ఠభూషా
విరాజతాం శ్రీనవరత్నమాలా ॥ 10 ॥
ఇతి శ్రీ పద్మావతీ నవరత్నమాలికా స్తుతిః ।
