න භූමිර්න තෝයං න තේජෝ න වායුඃ
න ඛං නේංද්රියං වා න තේෂාං සමූහඃ
අනේකාංතිකත්වාත්සුෂුප්ත්යේකසිද්ධඃ
තදේකෝऽවශිෂ්ටඃ ශිවඃ කේවලෝऽහම් ॥ 1 ॥
න වර්ණා න වර්ණාශ්රමාචාරධර්මා
න මේ ධාරණාධ්යානයෝගාදයෝපි
අනාත්මාශ්රයාහං මමාධ්යාසහානා-
තදේකෝऽවශිෂ්ටඃ ශිවඃ කේවලෝऽහම් ॥ 2 ॥
න මාතා පිතා වා න දේවා න ලෝකා
න වේදා න යජ්ඤා න තීර්ථ බ්රුවංති
සුෂුප්තෞ නිරස්තාතිශූන්යාත්මකත්වා-
තදේකෝऽවශිෂ්ටඃ ශිවඃ කේවලෝऽහම් ॥ 3 ॥
න සාංඛ්යං න ශෛවං න තත්පාංචරාත්රං
න ජෛනං න මීමාංසකාදේර්මතං වා
විශිෂ්ටානුභූත්යා විශුද්ධාත්මකත්වා-
තදේකෝऽවශිෂ්ටඃ ශිවඃ කේවලෝऽහම් ॥ 4 ॥
න චෝර්ධ්වං න චාධෝ න චාංතර්න බාහ්යං
න මධ්යං න තිර්යන්න පූර්වාऽපරා දික්
වියද්ව්යාපකත්වාදඛංඩෛකරූපඃ
තදේකෝऽවශිෂ්ටඃ ශිවඃ කේවලෝऽහම් ॥ 5 ॥
න ශුක්ලං න කෘෂ්ණං න රක්තං න පීතං
න කුබ්ජං න පීනං න හ්රස්වං න දීර්ඝං
අරූපං තථා ජ්යෝතිරාකාරකත්වා-
තදේකෝऽවශිෂ්ටඃ ශිවඃ කේවලෝऽහම් ॥ 6 ॥
න ශාස්තා න ශාස්ත්රං න ශිෂ්යෝ න ශික්ෂා
න ච ත්වං න චාහං න චායං ප්රපංචඃ
ස්වරූපාවබෝධී විකල්පාසහිෂ්ණුඃ
තදේකෝऽවශිෂ්ටඃ ශිවඃ කේවලෝऽහම් ॥ 7 ॥
න ජාග්රන්න මේ ස්වප්නකෝ වා සුෂුප්තිඃ
න විශ්වෝ න වා තෛජසඃ පාජ්ඤකෝ වා
අවිද්යාත්මකත්වාත්ත්රයාණං තුරීයඃ
තදේකෝऽවශිෂ්ටඃ ශිවඃ කේවලෝऽහම් ॥ 8 ॥
අපි ව්යාපකත්වාද්ධිතත්වප්රයෝගා-
ත්ස්වතඃ සිද්ධභාවාදනන්යාශ්රයත්වාත්
ජගත්තුච්ඡමේතත්සමස්තං තදන්ය-
තදේකෝऽවශිෂ්ටඃ ශිවඃ කේවලෝऽහම් ॥ 9 ॥
න චෛකං තදන්යද්ද්විතීයං කුතඃ ස්යාත්
න කේවලත්වං න චාකේවලත්වං
න ශූන්යං න චාශූන්යමද්වෛතකත්වා-
කථං සර්වවේදාංතසිද්ධිං බ්රවීමි ॥ 10 ॥
