ധ്യാനമ്
ഗലദ്രക്തമുംഡാവലീകംഠമാലാ
മഹാഘോരരാവാ സുദംഷ്ട്രാ കരാലാ ।
വിവസ്ത്രാ ശ്മശാനാലയാ മുക്തകേശീ
മഹാകാലകാമാകുലാ കാലികേയമ് ॥ 1 ॥
ഭുജേ വാമയുഗ്മേ ശിരോഽസിം ദധാനാ
വരം ദക്ഷയുഗ്മേഽഭയം വൈ തഥൈവ ।
സുമധ്യാഽപി തുംഗസ്തനാ ഭാരനമ്രാ
ലസദ്രക്തസൃക്കദ്വയാ സുസ്മിതാസ്യാ ॥ 2 ॥
ശവദ്വംദ്വകര്ണാവതംസാ സുകേശീ
ലസത്പ്രേതപാണിം പ്രയുക്തൈകകാംചീ ।
ശവാകാരമംചാധിരൂഢാ ശിവാഭിഃ
ചതുര്ദിക്ഷുശബ്ദായമാനാഽഭിരേജേ ॥ 3 ॥
സ്തുതിഃ
വിരംച്യാദിദേവാസ്ത്രയസ്തേ ഗുണാസ്ത്രീന്
സമാരാധ്യ കാലീം പ്രധാനാ ബഭൂവുഃ ।
അനാദിം സുരാദിം മഖാദിം ഭവാദിം
സ്വരൂപം ത്വദീയം ന വിംദംതി ദേവാഃ ॥ 1 ॥
ജഗന്മോഹിനീയം തു വാഗ്വാദിനീയം
സുഹൃത്പോഷിണീ ശത്രുസംഹാരണീയമ് ।
വചസ്തംഭനീയം കിമുച്ചാടനീയം
സ്വരൂപം ത്വദീയം ന വിംദംതി ദേവാഃ ॥ 2 ॥
ഇയം സ്വര്ഗദാത്രീ പുനഃ കല്പവല്ലീ
മനോജാസ്തു കാമാന് യഥാര്ഥം പ്രകുര്യാത് ।
തഥാ തേ കൃതാര്ഥാ ഭവംതീതി നിത്യം
സ്വരൂപം ത്വദീയം ന വിംദംതി ദേവാഃ ॥ 3 ॥
സുരാപാനമത്താ സുഭക്താനുരക്താ
ലസത്പൂതചിത്തേ സദാവിര്ഭവത്തേ ।
ജപധ്യാനപൂജാസുധാധൌതപംകാ
സ്വരൂപം ത്വദീയം ന വിംദംതി ദേവാഃ ॥ 4 ॥
ചിദാനംദകംദം ഹസന്മംദമംദം
ശരച്ചംദ്രകോടിപ്രഭാപുംജബിംബമ് ।
മുനീനാം കവീനാം ഹൃദി ദ്യോതയംതം
സ്വരൂപം ത്വദീയം ന വിംദംതി ദേവാഃ ॥ 5 ॥
മഹാമേഘകാലീ സുരക്താപി ശുഭ്രാ
കദാചിദ്വിചിത്രാകൃതിര്യോഗമായാ ।
ന ബാലാ ന വൃദ്ധാ ന കാമാതുരാപി
സ്വരൂപം ത്വദീയം ന വിംദംതി ദേവാഃ ॥ 6 ॥
ക്ഷമസ്വാപരാധം മഹാഗുപ്തഭാവം
മയാ ലോകമധ്യേ പ്രകാശീകൃതം യത് ।
തവ ധ്യാനപൂതേന ചാപല്യഭാവാത്
സ്വരൂപം ത്വദീയം ന വിംദംതി ദേവാഃ ॥ 7 ॥
യദി ധ്യാനയുക്തം പഠേദ്യോ മനുഷ്യഃ
തദാ സർവലോകേ വിശാലോ ഭവേച്ച ।
ഗൃഹേ ചാഷ്ടസിദ്ധിര്മൃതേ ചാപി മുക്തിഃ
സ്വരൂപം ത്വദീയം ന വിംദംതി ദേവാഃ ॥ 8 ॥
ഇതി ശ്രീമച്ഛംകരാചാര്യവിരചിതം ശ്രീകാലികാഷ്ടകമ് ।
