কৃষ্ণ যজুর্বেদীয় তৈত্তিরীয় আরণ্যকে ষষ্ঠঃ প্রপাঠকঃ - পিতৃমেধমন্ত্রাঃ

ও-ন্নমঃ পরমাত্মনে, শ্রী মহাগণপতয়ে নমঃ,
শ্রী গুরুভ্য়ো নমঃ । হ॒রিঃ॒ ওম্ ॥

অনুবাকং 1
প॒রে॒য়ু॒বাগ্​ম্স॑-ম্প্র॒বতো॑ ম॒হীরনু॑ ব॒হুভ্য়ঃ॒ পন্থা॑মনপস্পশা॒নম্ । বৈ॒ব॒স্ব॒তগ্​ম্ স॒ঙ্গম॑ন॒-ঞ্জনা॑নাম্ ঁয়॒মগ্​ম্ রাজা॑নগ্​ম্ হ॒বিষা॑ দুবস্যত ॥ ই॒দ-ন্ত্বা॒ বস্ত্র॑-ম্প্রথ॒ম-ন্ন্বাগ॒ন্নপৈ॒তদূ॑হ॒ যদি॒হাবি॑ভঃ পু॒রা ।
ই॒ষ্টা॒পূ॒র্তমনু॒ সম্প॑শ্য়॒ দক্ষি॑ণা॒ম্ ঁযথা॑ তে দ॒ত্ত-ম্ব॑হু॒ধা বি ব॑ন্ধুষু ॥
ই॒মৌ যু॑নজ্মি তে ব॒হ্নী অসু॑নীথায় বো॒ঢবে᳚ ।
যাভ্য়া᳚ম্ ঁয়॒মস্য়॒ সাদ॑নগ্​ম্ সু॒কৃতা॒-ঞ্চাপি॑ গচ্ছতাত্ ॥ পূ॒ষা ত্বে॒তশ্চ্য়া॑বযতু॒ প্রবি॒দ্বা-নন॑ষ্টপশু॒-র্ভুব॑নস্য় গো॒পাঃ ।
স ত্বৈ॒তেভ্য়ঃ॒ পরি॑দদা-ত্পি॒তৃভ্য়ো॒-ঽগ্নির্দে॒বেভ্য়॑-স্সুবি॒দত্রে᳚ভ্য়ঃ ॥ পূ॒ষেমা আশা॒ অনু॑বেদ॒ সর্বা॒-স্সো অ॒স্মাগ্​ম্ অভ॑যতমেন নেষত্ ।
স্ব॒স্তি॒দা অঘৃ॑ণি॒-স্সর্ব॑বী॒রো-ঽপ্র॑য়ুচ্ছন্পু॒র এ॑তু॒ প্রবি॒দ্বান্ ॥ 1 ॥

আয়ু॑-র্বি॒শ্বায়ুঃ॒ পরি॑পাসতি ত্বা পূ॒ষা ত্বা॑ পাতু॒ প্রপ॑থে পু॒রস্তা᳚ত্ । যত্রাস॑তে সু॒কৃতো॒ যত্র॒ তে য॒য়ুস্তত্র॑ ত্বা দে॒ব-স্স॑বি॒তা দ॑ধাতু ॥
ভুব॑নস্য় পত ই॒দগ্​ম্ হ॒বিঃ ॥ অ॒গ্নয়ে॑ রয়ি॒মতে॒ স্বাহা᳚ ॥ পুরু॑ষস্য় সয়াব॒র্যপেদ॒ঘানি॑ মৃজ্মহে ।
যথা॑ নো॒ অত্র॒ নাপ॑রঃ পু॒রা জ॒রস॒ আয়॑তি ॥
পুরু॑ষস্য় সয়াবরি॒ বি তে᳚ প্রা॒ণম॑সি স্রসম্ ।
শরী॑রেণ ম॒হীমিহি॑ স্ব॒ধয়েহি॑ পি॒তৄনুপ॑ প্র॒জয়া॒-ঽস্মানি॒হাব॑হ ॥ মৈব॑-ম্মা॒গ্॒স্তা প্রি॑য়ে॒-ঽহ-ন্দে॒বী স॒তী পি॑তৃলো॒কম্ ঁযদৈষি॑ ।
বি॒শ্ববা॑রা॒ নভ॑সা॒ সং​ব্য়ঁ॑যন্ত্য়ু॒ভৌ নো॑ লো॒কৌ
পয়॑সা॒-ঽভ্য়াব॑বৃথ্স্ব ॥ 2 ॥

ই॒য়-ন্নারী॑ পতিলো॒কম্ ঁবৃ॑ণা॒না নিপ॑দ্যত॒ উপ॑ ত্বা মর্ত্য়॒ প্রেত᳚ম্ । বিশ্ব॑-ম্পুরা॒ণমনু॑ পা॒লয়॑ন্তী॒ তস্য়ৈ᳚ প্র॒জা-ন্দ্রবি॑ণ-ঞ্চে॒হ ধে॑হি ॥ উদী᳚র্​ষ্ব নার্য়॒ভি জী॑বলো॒কমি॒তাসু॑মে॒তমুপ॑শেষ॒ এহি॑ ।
হ॒স্ত॒গ্রা॒ভস্য়॑ দিধি॒ষোস্ত্বমে॒ত-ত্পত্য়ু॑র্জনি॒ত্বম॒ভি সম্ব॑ভূব ॥
সু॒বর্ণ॒গ্​ম্॒ হস্তা॑দা॒দদা॑না মৃ॒তস্য়॑ শ্রি॒য়ৈ ব্রহ্ম॑ণে॒ তেজ॑সে॒ বলা॑য় । অত্রৈ॒ব ত্বমি॒হ ব॒য়গ্​ম্ সু॒শেবা॒ বিশ্বা॒-স্স্পৃধো॑ অ॒ভিমা॑তীর্জয়েম ॥
ধনু॒র্॒ হস্তা॑দা॒দদা॑না মৃ॒তস্য়॑ শ্রি॒য়ৈ ক্ষ॒ত্রায়ৌজ॑সে॒ বলা॑য় । অত্রৈ॒ব ত্বমি॒হ ব॒য়গ্​ম্ সু॒শেবা॒ বিশ্বা॒-স্স্পৃধো॑ অ॒ভিমা॑তীর্জয়েম ।
মণি॒গ্​ম্॒ হস্তা॑দা॒দদা॑না মৃ॒তস্য়॑ শ্রি॒য়ৈ বি॒শে পুষ্ট্য়ৈ॒ বলা॑য় । অত্রৈ॒ব ত্বমি॒হ ব॒য়গ্​ম্ সু॒শেবা॒ বিশ্বা॒-স্স্পৃধো॑ অ॒ভিমা॑তীর্জয়েম ॥ 3 ॥

ই॒মম॑গ্নে চম॒স-ম্মা বিজী᳚হ্বরঃ প্রি॒য়ো দে॒বানা॑মু॒ত সো॒ম্য়ানা᳚ম্ । এ॒ষ যশ্চ॑ম॒সো দে॑ব॒পান॒স্তস্মি॑-ন্দে॒বা অ॒মৃতা॑ মাদযন্তাম্ ॥
অ॒গ্নের্বর্ম॒ পরি॒ গোভি॑র্ব্যযস্ব॒ সম্প্রোর্ণু॑ষ্ব॒ মেদ॑সা॒ পীব॑সা চ । নেত্ত্বা॑ ধৃ॒ষ্ণুর্-হর॑সা॒ জর্​হৃ॑ষাণো॒ দধ॑-দ্বিধ॒ক্ষ্যন্-পর্য়॒ঙ্খয়া॑তৈ ॥
মৈন॑মগ্নে॒ বিদ॑হো॒ মা-ঽভিশো॑চো॒ মা-ঽস্য়॒ ত্বচ॑-ঞ্চিক্ষিপো॒ মা শরী॑রম্ । য॒দা শৃ॒ত-ঙ্ক॒রবো॑ জাতবে॒দো-ঽথে॑মেন॒-ম্প্রহি॑ণুতা-ত্পি॒তৃভ্য়ঃ॑ ॥
শৃ॒তম্ ঁয়॒দা ক॒রসি॑ জাতবে॒দো-ঽথে॑মেন॒-ম্পরি॑দত্তা-ত্পি॒তৃভ্য়ঃ॑ । য॒দা গচ্ছা॒ত্যসু॑নীতিমে॒তামথা॑ দে॒বানা᳚ম্ ঁবশ॒নীর্ভ॑বাতি ॥ সূর্য়॑-ন্তে॒ চক্ষু॑-র্গচ্ছতু॒ বাত॑মা॒ত্মা দ্য়া-ঞ্চ॒ গচ্ছ॑ পৃথি॒বী-ঞ্চ॒ ধর্ম॑ণা ।
অ॒পো বা॑ গচ্ছ॒ যদি॒ তত্র॑ তে হি॒তমোষ॑ধীষু॒ প্রতি॑তিষ্ঠা॒ শরী॑রৈঃ ॥ অ॒জো ভা॒গস্তপ॑সা॒ ত-ন্ত॑পস্ব॒ ত-ন্তে॑ শো॒চিস্ত॑পতু॒ ত-ন্তে॑ অ॒র্চিঃ ।
যাস্তে॑ শি॒বাস্ত॒নুবো॑ জাতবেদ॒স্তাভি॑-র্বহে॒মগ্​ম্ সু॒কৃতা॒ম্ ঁযত্র॑ লো॒কাঃ ॥ অ॒যম্ ঁবৈ ত্বম॒স্মাদধি॒ ত্বমে॒তদ॒যম্ ঁবৈ তদ॑স্য়॒ যোনি॑রসি । বৈ॒শ্বা॒ন॒রঃ পু॒ত্রঃ পি॒ত্রে লো॑ক॒কৃ-জ্জা॑তবেদো॒ বহে॑মগ্​ম্ সু॒কৃতা॒ম্ ঁযত্র॑ লো॒কাঃ ॥ 4 ॥
(বি॒দ্বা-ন॒ভ্য়াব॑বৃথ্স্বা॒ - ভিমা॑তীর্জয়েম॒ - শরী᳚রৈশ্চ॒ত্বারি॑ চ ) (অ. 1)

অনুবাকং 2
য এ॒তস্য়॑ প॒থো গো॒প্তার॒স্তেভ্য়॒-স্স্বাহা॒ য এ॒তস্য়॑ প॒থো র॑ক্ষি॒তার॒স্তেভ্য়॒-স্স্বাহা॒ য এ॒তস্য়॑ প॒থো॑-ঽভির॑ক্ষি॒তার॒স্তেভ্য়॒-স্স্বাহা᳚-ঽঽখ্য়া॒ত্রে স্বাহা॑-ঽপাখ্য়া॒ত্রে স্বাহা॑-ঽভি॒লাল॑পতে॒ স্বাহা॑-ঽপ॒লাল॑পতে॒ স্বাহা॒-ঽগ্নয়ে॑ কর্ম॒কৃতে॒ স্বাহা॒ যমত্র॒ নাধী॒মস্তস্মৈ॒ স্বাহা᳚ ॥
যস্ত॑ ই॒দ্ধ্ম-ঞ্জ॒ভর॑-থ্সিষ্বিদা॒নো মূ॒র্ধান॑ম্ ঁবা ত॒তপ॑তে ত্বা॒য়া । দিবো॒ বিশ্ব॑স্মা-থ্সীমঘায়॒ত উ॑রুষ্য়ঃ ॥ অ॒স্মাত্ত্বমধি॑ জা॒তো॑-ঽসি॒ ত্বদ॒য়-ঞ্জা॑যতা॒-ম্পুনঃ॑ । অ॒গ্নয়ে॑ বৈশ্বান॒রায়॑ সুব॒র্গায়॑ লো॒কায়॒ স্বাহা᳚ ॥ 5 ॥
(য় এ॒তস্য়॒ ত্ব-ত্পঞ্চ॑ ) (অ. 2)

অনুবাকং 3
প্র কে॒তুনা॑ বৃহ॒তা ভা᳚ত্য়॒গ্নিরা॒বি-র্বিশ্বা॑নি বৃষ॒ভো রো॑রবীতি । দি॒বশ্চি॒দন্তা॒দুপ॒ মামু॒দান॑ড॒পামু॒পস্থে॑ মহি॒ষো ব॑বর্ধ ॥
ই॒দন্ত॒ এক॑-ম্প॒র ঊ॑ত॒ এক॑-ন্তৃ॒তীয়ে॑ন॒ জ্য়োতি॑ষা॒ সং​বিঁ॑শস্ব । সং॒​বেঁশ॑নস্ত॒নুবৈ॒ চারু॑রেধি প্রি॒য়ো দে॒বানা᳚-ম্পর॒মে স॒ধস্থে᳚ ॥
নাকে॑ সুপ॒র্ণমুপ॒ য-ত্পত॑ন্তগ্​ম্ হৃ॒দা বেন॑ন্তো অ॒ভ্যচ॑ক্ষত ত্বা । হির॑ণ্যপক্ষ॒ম্ ঁবরু॑ণস্য় দূ॒তম্ ঁয়॒মস্য়॒ যোনৌ॑ শকু॒ন-ম্ভু॑র॒ণ্য়ুম্ ॥
অতি॑দ্রব সারমে॒য়ৌ শ্বানৌ॑ চতুর॒ক্ষৌ শ॒বলৌ॑ সা॒ধুনা॑ প॒থা । অথা॑ পি॒তৄন্-থ্সু॑বি॒দত্রা॒গ্​ম্॒ অপী॑হি য॒মেন॒ যে স॑ধ॒মাদ॒-ম্মদ॑ন্তি ॥
যৌ তে॒ শ্বানৌ॑ যম রক্ষি॒তারৌ॑ চতুর॒ক্ষৌ প॑থি॒রক্ষী॑ নৃ॒চক্ষ॑সা ।
তাভ্য়াগ্​ম্॑ রাজ॒-ন্পরি॑ দেহ্য়েনগ্গ্​ স্ব॒স্তি চা᳚স্মা অনমী॒ব-ঞ্চ॑ ধেহি ॥ 6 ॥

উ॒রু॒ণ॒সা-ব॑সু॒তৃপা॑-বুলুম্ব॒লৌ য॒মস্য়॑ দূ॒তৌ চ॑রতো॒ বশা॒গ্​ম্॒ অনু॑ । তাব॒স্মভ্য়॑-ন্দৃ॒শয়ে॒ সূর্য়া॑য়॒ পুন॑র্দ-ত্তা॒বসু॑ম॒দ্য়েহ ভ॒দ্রম্ ॥
সোম॒ একে᳚ভ্য়ঃ পবতে ঘৃ॒তমেক॒ উপা॑সতে ।
যেভ্য়ো॒ মধু॑ প্র॒ধাব॑তি॒ তাগ্​-শ্চি॑দে॒বাপি॑গচ্ছতাত্ ॥
যে যুদ্ধ্য়॑ন্তে প্র॒ধনে॑ষু॒ শূরা॑সো॒ যে ত॑নু॒ত্যজঃ॑ । যে বা॑ স॒হস্র॑দক্ষিণা॒স্তাগ্​ শ্চি॑দে॒বাপি॑গচ্ছতাত্ ॥
তপ॑সা॒ যে অ॑নাধৃ॒ষ্য়া-স্তপ॑সা॒ যে সুব॑র্গ॒তাঃ ।
তপো॒ যে চ॑ক্রি॒রে ম॒হ-ত্তাগ্​-শ্চি॑দে॒বাপি॑গচ্ছতাত্ ॥
অশ্ম॑ন্বতী রেবতী॒-স্সগ্​ম্র॑ভদ্ধ্ব॒-মুত্তি॑ষ্ঠত॒ প্রত॑রতা সখায়ঃ । অত্রা॑ জহাম॒ যে অস॒ন্নশে॑বা-শ্শি॒বান্. ব॒যম॒ভি বাজা॒নুত্ত॑রেম ॥ 7 ॥

যদ্বৈ দে॒বস্য়॑ সবি॒তুঃ প॒বিত্রগ্​ম্॑ স॒হস্র॑ধার॒ম্ ঁবিত॑তম॒ন্তরি॑ক্ষে । যেনাপু॑না॒দিন্দ্র॒মনা᳚র্ত॒-মার্ত্য়ৈ॒ তেনা॒হ-ম্মাগ্​ম্ স॒র্বত॑নু-ম্পুনামি ॥
যা রা॒ষ্ট্রা-ত্প॒ন্নাদপ॒ যন্তি॒ শাখা॑ অ॒ভিমৃ॑তা নৃ॒পতি॑মি॒চ্ছমা॑নাঃ । ধা॒তুস্তা-স্সর্বাঃ॒ পব॑নেন পূ॒তাঃ প্র॒জয়া॒-ঽস্মান্-র॒য়্য়া বর্চ॑সা॒ সগ্​ম্সৃ॑জাথ ॥
উদ্ব॒য়-ন্তম॑স॒স্পরি॒ পশ্য়॑ন্তো॒ জ্য়োতি॒রুত্ত॑রম্ ।
দে॒ব-ন্দে॑ব॒ত্রা সূর্য়॒মগ॑ন্ম॒ জ্য়োতি॑রুত্ত॒মম্ ॥
ধা॒তা পু॑নাতু সবি॒তা পু॑নাতু । অ॒গ্নেস্তেজ॑সা॒ সূর্য়॑স্য়॒ বর্চ॑সা ॥ 8 ॥
(ধে॒ - হ্য়ুত্ত॑রে - মা॒ষ্টৌ চ॑) (অ. 3)

অনুবাকং 4
য-ন্তে॑ অ॒গ্নিমম॑ন্থাম বৃষ॒ভায়ে॑ব॒ পক্ত॑বে ।
ই॒ম-ন্তগ্​ম্ শ॑ময়ামসি ক্ষী॒রেণ॑ চোদ॒কেন॑ চ ॥
যন্ত্বম॑গ্নে স॒মদ॑হ॒স্ত্বমু॒ নির্বা॑পয়া॒ পুনঃ॑ ।
ক্য়া॒ম্বূরত্র॑ জাযতা-ম্পাকদূ॒র্বা ব্য়॑ল্কশা ॥
শীতি॑কে॒ শীতি॑কাবতি॒ হ্লাদু॑কে॒ হ্লাদু॑কাবতি ।
ম॒ণ্ডূ॒ক্য়া॑ সুসঙ্গ॒ময়ে॒মগ্গ্​ স্ব॑গ্নিগ্​ম্ শ॒ময়॑ ॥ শ-ন্তে॑ ধন্ব॒ন্য়া আপ॒-শ্শমু॑ তে সন্ত্বনূ॒ক্য়াঃ᳚ । শ-ন্তে॑ সমু॒দ্রিয়া॒ আপ॒-শ্শমু॑ তে সন্তু॒ বর্​ষ্য়াঃ᳚ ॥
শ-ন্তে॒ স্রব॑ন্তী-স্ত॒নুবে॒ শমু॑ তে সন্তু॒ কূপ্য়াঃ᳚ ।
শ-ন্তে॑ নীহা॒রো ব॑র্​ষতু॒ শমু॒ পৃষ্বা-ঽব॑শীযতাম্ ॥ 9 ॥

অব॑ সৃজ॒ পুন॑রগ্নে পি॒তৃভ্য়ো॒ যস্ত॒ আহু॑ত॒শ্চর॑তি স্ব॒ধাভিঃ॑ । আয়ু॒র্বসা॑ন॒ উপ॑ যাতু॒ শেষ॒গ্​ম্॒ সঙ্গ॑চ্ছতা-ন্ত॒নুবা॑ জাতবেদঃ ॥
সঙ্গ॑চ্ছস্ব পি॒তৃভি॒-স্সগ্গ্​ স্ব॒ধাভি॒-স্সমি॑ষ্টাপূ॒র্তেন॑ পর॒মে ব্য়ো॑মন্ন্ ।
যত্র॒ ভূম্য়ৈ॑ বৃ॒ণসে॒ তত্র॑ গচ্ছ॒ তত্র॑ ত্বা দে॒ব-স্স॑বি॒তা দ॑ধাতু ॥ যত্তে॑ কৃ॒ষ্ণ-শ্শ॑কু॒ন আ॑তু॒তোদ॑ পিপী॒ল-স্স॒র্প উ॒ত বা॒ শ্বাপ॑দঃ ।
অ॒গ্নিষ্ট-দ্বিশ্বা॑দনৃ॒ণ-ঙ্কৃ॑ণোতু॒ সোম॑শ্চ॒ যো ব্রা᳚হ্ম॒ণমা॑বি॒বেশ॑ ॥ উত্তি॒ষ্ঠাত॑-স্ত॒নুব॒গ্​ম্॒ সম্ভ॑রস্ব॒ মেহ গাত্র॒মব॑হা॒ মা শরী॑রম্ ।
যত্র॒ ভূম্য়ৈ॑ বৃ॒ণসে॒ তত্র॑ গচ্ছ॒ তত্র॑ ত্বা দে॒ব-স্স॑বি॒তা দ॑ধাতু ॥ ই॒দ-ন্ত॒ এক॑-ম্প॒র ঊ॑ত॒ এক॑-ন্তৃ॒তীয়ে॑ন॒ জ্য়োতি॑ষা॒ সং​বিঁ॑শস্ব ।
সং॒​বেঁশ॑ন-স্ত॒নুবৈ॒ চারু॑রেধি প্রি॒য়ো দে॒বানা᳚-ম্পর॒মে স॒ধস্থে᳚ ॥ উত্তি॑ষ্ঠ॒ প্রেহি॒ প্রদ্র॒বৌকঃ॑ কৃণুষ্ব পর॒মে ব্য়ো॑মন্ন্ । য॒মেন॒ ত্বম্ ঁয়॒ম্য়া॑ সং​বিঁদা॒নোত্-ত॒ম-ন্নাক॒মধি॑ রোহে॒মম্ ॥
অশ্ম॑ন্বতী রেবতী॒-স্সগ্​ম্ র॑ভদ্ধ্ব॒ মুত্তি॑ষ্ঠত॒ প্রত॑রতা সখায়ঃ । অত্রা॑ জহাম॒ যে অস॒ন্নশে॑বা-শ্শি॒বান্ ব॒যম॒ভি বাজা॒নুত্ত॑রেম ॥ যদ্বৈ দে॒বস্য়॑ সবি॒তুঃ প॒বিত্রগ্​ম্॑ স॒হস্র॑ধার॒ম্ ঁবিত॑তম॒ন্তরি॑ক্ষে । যেনাপু॑না॒দিন্দ্র॒মনা॑র্ত॒-মার্ত্য়ৈ॒ তেনা॒হ-ম্মাগ্​ম্ স॒র্বত॑নু-ম্পুনামি ॥ যা রা॒ষ্ট্রা-ত্প॒ন্নাদপ॒ যন্তি॒ শাখা॑ অ॒ভিমৃ॑তা নৃ॒পতি॑মি॒চ্ছমা॑নাঃ । ধা॒তুস্তা-স্সর্বাঃ॒ পব॑নেন পূ॒তাঃ প্র॒জয়া॒-ঽস্মান্-র॒য়্য়া বর্চ॑সা॒ সগ্​ম্সৃ॑জাথ ॥ যা রা॒ষ্ট্রা-ত্প॒ন্নাদপ॒ যন্তি॒ শাখা॑ অ॒ভিমৃ॑তা নৃ॒পতি॑মি॒চ্ছমা॑নাঃ । ধা॒তুস্তা-স্সর্বাঃ॒ পব॑নেন পূ॒তাঃ প্র॒জয়া॒-ঽস্মান্-র॒য়্য়া বর্চ॑সা॒ সগ্​ম্সৃ॑জাথ ॥ ধা॒তা পু॑নাতু সবি॒তা পু॑নাতু । অ॒গ্নেস্তেজ॑সা॒ সূর্য়॑স্য়॒ বর্চ॑সা ॥
অ॒স্মাত্ত্বমধি॑ জা॒তো᳚-ঽস্য়॒য়-ন্ত্বদধি॑জাযতাম্ ।
অ॒গ্নয়ে॑ বৈশ্বান॒রায়॑ সুব॒র্গায়॑ লো॒কায়॒ স্বাহা᳚ ॥ 10 ॥
(অব॑শীযতাগ্​ম্ - স॒ধস্থে॒ পঞ্চ॑ চ) (অ. 4)

অনুবাকং 5
আয়া॑তু দে॒ব-স্সু॒মনা॑ভি-রূ॒তিভি॑-র্য়॒মো হ॑বে॒হ প্রয়॑তাভির॒ক্তা । আসী॑দতাগ্​ম্ সুপ্র॒যতে॑হ ব॒র্॒হিষ্য়ূর্জা॑য় জা॒ত্য়ৈ মম॑ শত্রু॒হত্য়ৈ᳚ ॥
য॒মে ই॑ব॒ যত॑মানে॒ যদৈত॒-ম্প্রবা᳚ম্ভর॒-ন্মানু॑ষা দেব॒যন্তঃ॑ । আসী॑দত॒গ্গ্॒ স্বমু॑ লো॒কম্ ঁবিদা॑নে স্বাস॒স্থে ভ॑বত॒মিন্দ॑বে নঃ ॥
য॒মায়॒ সোমগ্​ম্॑ সুনুত য॒মায়॑ জুহুতা হ॒বিঃ ।
য॒মগ্​ম্ হ॑ য॒জ্ঞো গ॑চ্ছত্য়॒গ্নিদূ॑তো॒ অর॑ঙ্কৃতঃ ॥
য॒মায়॑ ঘৃ॒তব॑দ্ধ॒বির্জু॒হোত॒ প্র চ॑ তিষ্ঠত ।
স নো॑ দে॒বেষ্বায়॑ম-দ্দী॒র্ঘমায়ুঃ॒ প্র জী॒বসে᳚ ॥
য॒মায়॒ মধু॑মত্তম॒গ্​ম্॒ রাজ্ঞে॑ হ॒ব্য়-ঞ্জু॑হোতন । ই॒দ-ন্নম॒ ঋষি॑ভ্য়ঃ পূর্ব॒জেভ্য়ঃ॒ পূর্বে᳚ভ্য়ঃ পথি॒কৃদ্ভ্য়ঃ॑ ॥ 11 ॥

যো-ঽস্য়॒ কৌষ্ঠ্য়॒ জগ॑তঃ॒ পার্থি॑ব॒স্য়ৈক॑ ইদ্ব॒শী ।
য॒ম-ম্ভ॑ঙ্গ্যশ্র॒বো গা॑য়॒ যো রাজা॑-ঽনপ॒রোদ্ধ্য়ঃ॑ ॥ য॒ম-ঙ্গায়॑ ভঙ্গ্য়॒শ্রবো॒ যো রাজা॑-ঽনপ॒রোদ্ধ্য়ঃ॑ । যেনা॒পো ন॒দ্য়ো॑ ধন্বা॑নি॒ যেন॒ দ্য়ৌঃ পৃ॑থি॒বী দৃ॒ঢা ॥ হি॒র॒ণ্য়॒ক॒ক্ষ্য়ান্-থ্সু॒ধুরান্॑. হিরণ্য়া॒ক্ষা-ন॑যশ্শ॒ফান্ । অশ্বা॑-ন॒নশ্য়॑তো দা॒ন॒ম্ ঁয়॒মো রা॑জা-ঽভি॒তিষ্ঠ॑তি ॥ য॒মো দা॑ধার পৃথি॒বীং-য়ঁ॒মো বিশ্ব॑মি॒দ-ঞ্জগ॑ত্ । য॒মায়॒ সর্ব॒মিত্র॑স্থে॒ য-ত্প্রা॒ণ-দ্বা॒য়ুর॑ক্ষি॒তম্ ॥ যথা॒ পঞ্চ॒ যথা॒ ষড্ য॒থা পঞ্চ॑ দ॒শর্​ষ॑য়ঃ । য॒মম্ ঁয়ো বি॑দ্য়া॒থ্স ব্রূ॑য়াদ্য়॒থৈক ঋষি॑র্বিজান॒তে ॥ 12 ॥

ত্রিক॑দ্রুকেভিঃ॒ পত॑তি॒ ষডু॒র্বী-রেক॒মি-দ্বৃ॒হত্ ।
গা॒য়॒ত্রী ত্রি॒ষ্টুপ্ছন্দাগ্​ম্॑সি॒ সর্বা॒ তা য॒ম আহি॑তা ॥
অহ॑রহ॒র্নয়॑মানো॒ গামশ্ব॒-ম্পুরু॑ষ॒-ঞ্জগ॑ত্ ।
বৈব॑স্বতো॒ ন তৃ॑প্যতি॒ পঞ্চ॑ভি॒র্মান॑বৈর্য়॒মঃ ॥
বৈব॑স্বতে॒ বিবি॑চ্যন্তে॒ যমে॒ রাজ॑নি তে জ॒নাঃ ।
যে চে॒হ স॒ত্য়েনেচ্ছ॑ন্তে॒ য উ॒ চানৃ॑তবাদি॒নঃ ॥
তে রা॑জন্নি॒হ বিবি॑চ্যন্তে॒-ঽথা য॑ন্তি ত্বা॒মুপ॑ ।
দে॒বাগ্​শ্চ॒ যে ন॑ম॒স্যন্তি॒ ব্রাহ্ম॑ণাগ্​শ্চাপ॒চিত্য়॑তি ॥
যস্মি॑ন্ বৃ॒ক্ষে সু॑পলা॒শে দে॒বৈ-স্স॒পিম্ব॑তে য॒মঃ ।
অত্রা॑ নো বি॒শ্পতিঃ॑ পি॒তা পু॑রা॒ণা অনু॑বেনতি ॥ 13 ॥
(প॒থি॒কৃদ্ভ্য়ো॑ - বিজান॒তে - ঽনু॑বেনতি) (অ. 5)

অনুবাকং 6
বৈ॒শ্বা॒ন॒রে হ॒বিরি॒দ-ঞ্জু॑হোমি সাহ॒স্র-মুথ্সগ্​ম্॑ শ॒তধা॑রমে॒তম্ । তস্মি॑ন্নে॒ষ পি॒তর॑-ম্পিতাম॒হ-ম্প্রপি॑তামহ-ম্বিভর॒-ত্পিন্ব॑মানে ॥
দ্র॒ফ্সশ্চ॑স্কন্দ পৃথি॒বীমনু॒ দ্য়ামি॒মঞ্চ॒ যোনি॒মনু॒ যশ্চ॒ পূর্বঃ॑ ।
তৃ॒তীয়॒ম্ ঁয়োনি॒মনু॑ স॒ঞ্চর॑ন্ত-ন্দ্র॒ফ্স-ঞ্জু॑হো॒ম্যনু॑ স॒প্ত হোত্রাঃ᳚ ॥
ই॒মগ্​ম্ স॑মু॒দ্রগ্​ম্ শ॒তধা॑র॒মুথ্স॑ম্ ঁব্য়॒চ্যমা॑ন॒-ম্ভুব॑নস্য়॒ মদ্ধ্য়ে᳚ ।
ঘৃ॒ত-ন্দুহা॑না॒মদি॑তি॒-ঞ্জনা॒য়াগ্নে॒ মা হিগ্​ম্॑সীঃ পর॒মে ব্য়ো॑মন্ন্ ॥ অপে॑ত॒ বীত॒ বি চ॑ সর্প॒তাতো॒ যে-ঽত্র॒ স্থ পু॑রা॒ণা যে চ॒ নূত॑নাঃ ।
অহো॑ভির॒দ্ভি-র॒ক্তুভি॒-র্ব্য়॑ক্তম্ ঁয়॒মো দ॑দা-ত্বব॒সান॑মস্মৈ ॥ স॒বি॒তৈতানি॒ শরী॑রাণি পৃথি॒ব্য়ৈ মা॒তুরু॒পস্থ॒ আদ॑ধে ।
তেভি॑-র্য়ুজ্যন্তা-মঘ্নি॒য়াঃ ॥ 14 ॥

শু॒নম্ ঁবা॒হা-শ্শু॒ন-ন্না॒রা-শ্শু॒ন-ঙ্কৃ॑ষতু॒ লাঙ্গ॑লম্ ।
শু॒নম্ ঁব॑র॒ত্রা ব॑দ্ধ্যন্তাগ্​ম্ শু॒ন-মষ্ট্রা॒-মুদি॑ঙ্গয়॒ শুনা॑সীরা শু॒নম॒স্মাসু॑ ধত্তম্ ॥
শুনা॑সীরাবি॒মাম্ ঁবাচ॒ম্ ঁয়-দ্দি॒বি চ॑ক্র॒থুঃ পয়ঃ॑ । তেনে॒মা-মুপ॑সিঞ্চতম্ ॥
সীতে॒ বন্দা॑মহে ত্বা॒-ঽর্বাচী॑ সুভগে ভব ।
যথা॑ ন-স্সু॒ভগা স॑সি॒ যথা॑ ন-স্সু॒ফলা স॑সি ॥
স॒বি॒তৈতানি॒ শরী॑রাণি পৃথি॒ব্য়ৈ মা॒তুরু॒পস্থ॒ আদ॑ধে । তেভি॑রদিতে॒ শ-ম্ভ॑ব ॥
বিমু॑চ্যদ্ধ্ব-মঘ্নি॒য়া দে॑ব॒য়ানা॒ অতা॑রিষ্ম॒ তম॑সস্পা॒রম॒স্য় ।
জ্য়োতি॑রাপাম॒ সুব॑রগন্ম ॥ 15 ॥

প্র বাতা॒ বান্তি॑ প॒তয়॑ন্তি বি॒দ্য়ুত॒ উদোষ॑ধীর্জিহতে॒ পিন্ব॑তে॒ সুবঃ॑ । ইরা॒ বিশ্ব॑স্মৈ॒ ভুব॑নায় জাযতে॒ য-ত্প॒র্জন্য়ঃ॑ পৃথি॒বীগ্​ম্ রেত॒সা-ঽব॑তি ॥
যথা॑ য॒মায়॑ হা॒র্ম্য়-মব॑প॒-ন্পঞ্চ॑মান॒বাঃ ।
এ॒বম্ ঁব॑পামি হা॒র্ম্যম্ ঁযথা-ঽসা॑ম জীবলো॒কে ভূর॑য়ঃ ॥ চিত॑-স্স্থ পরি॒চিত॑ ঊর্ধ্ব॒চিত॑-শ্শ্রযদ্ধ্ব-ম্পি॒তরো॑ দে॒বতা᳚ ।
প্র॒জাপ॑তির্ব-স্সাদযতু॒ তয়া॑ দে॒বত॑য়া ॥
আ প্য়া॑যস্ব॒ সমে॑তু তে বি॒শ্বত॑-স্সোম॒ বৃষ্ণি॑যম্ । ভবা॒ বাজ॑স্য় সঙ্গ॒থে ॥ স-ন্তে॒ পয়াগ্​ম্॑সি॒ সমু॑ যন্তু॒ বাজা॒-স্সং-বৃঁষ্ণি॑য়া-ন্যভিমাতি॒ষাহঃ॑ । আ॒প্য়ায়॑মানো অ॒মৃতা॑য় সোম দি॒বি শ্রবাগ্॑স্য়ুত্ত॒মানি॑ ধিষ্ব ॥ 16 ॥
(অ॒ঘ্নি॒য়া - অ॑গন্ম - +স॒প্ত চ॑) (অ. 6)

অনুবাকং 7
উত্তে॑ তভ্নোমি পৃথি॒বী-ন্ত্বত্পরী॒মম্ ঁলো॒ক-ন্নি॒দধ॒ন্মো অ॒হগ্​ম্ রি॑ষম্ । এ॒তাগ্​ স্থূণা᳚-ম্পি॒তরো॑ ধারযন্তু॒ তে-ঽত্রা॑ য॒ম-স্সাদ॑নাত্তে মিনোতু ॥
উপ॑সর্প মা॒তর॒-ম্ভূমি॑মে॒তা-মু॑রু॒ব্যচ॑স-ম্পৃথি॒বীগ্​ম্ সু॒শেবা᳚ম্ । ঊর্ণ॑ম্রদা যুব॒তি-র্দক্ষি॑ণাবত্য়ে॒ষা ত্বা॑ পাতু॒ নির্-ঋ॑ত্য়া উ॒পস্থে᳚ ॥
উচ্ছ্ম॑ঞ্চস্ব পৃথিবি॒ মা বিবা॑ধিথা-স্সূপায়॒না-ঽস্মৈ॑ ভব সূপবঞ্চ॒না । মা॒তা পু॒ত্রম্ ঁযথা॑ সি॒চা-ঽভ্য়ে॑ন-ম্ভূমি বৃণু ॥ উ॒চ্ছ্মঞ্চ॑মানা পৃথি॒বী হি তিষ্ঠ॑সি স॒হস্র॒ম্মিত॒ উপ॒ হি শ্রয়॑ন্তাম্ ।
তে গৃ॒হাসো॑ মধু॒শ্চুতো॒ বিশ্বাহা᳚স্মৈ শর॒ণা-স্স॒ন্ত্বত্র॑ ॥ এণী᳚র্ধা॒না হরি॑ণী॒রর্জু॑নী-স্সন্তু ধে॒নবঃ॑ । তিল॑বথ্সা॒ ঊর্জ॑মস্মৈ॒ দুহা॑না॒ বিশ্বাহা॑ স॒ন্ত্বন॑পস্ফুরন্তীঃ ॥ 17 ॥

এ॒ষা তে॑ যম॒সাদ॑নে স্ব॒ধা নিধী॑যতে গৃ॒হে । অক্ষি॑তি॒র্নাম॑ তে অসৌ ॥ ই॒দ-ম্পি॒তৃভ্য়ঃ॒ প্রভ॑রেম ব॒র্॒হি-র্দে॒বেভ্য়ো॒ জীব॑ন্ত॒ উত্ত॑র-ম্ভরেম ।
তত্ত্ব॑মারো॒হাসো॒ মেঘ্য়ো॒ ভব॑ম্ ঁয়॒মেন॒ ত্বম্ ঁয়॒ম্য়া॑ সং​বিঁদা॒নঃ ॥ মা ত্বা॑ বৃ॒ক্ষৌ সম্বা॑ধিষ্টা॒-ম্মা মা॒তা পৃ॑থিবি॒ ত্বম্ ।
পি॒তৄন্. হি যত্র॒ গচ্ছা॒স্য়েধা॑সম্ ঁযম॒রাজ্য়ে᳚ ॥
মা ত্বা॑ বৃ॒ক্ষৌ সম্বা॑ধেথা॒-ম্মা মা॒তা পৃ॑থি॒বী ম॒হী । বৈ॒ব॒স্ব॒তগ্​ম্ হি গচ্ছা॑সি যম॒রাজ্য়ে॒ বিরা॑জসি ॥
ন॒ল-ম্প্ল॒বমারো॑হৈ॒ত-ন্ন॒লেন॑ প॒থো-ঽন্বি॑হি ।
স ত্ব॑-ন্ন॒লপ্ল॑বো ভূ॒ত্বা॒ সন্ত॑র॒ প্রত॒রোত্ত॑র ॥ 18 ॥

স॒বি॒তৈতানি॒ শরী॑রাণি পৃথি॒ব্য়ৈ মা॒তুরু॒পস্থ॒ আদ॑ধে । তেভ্য়ঃ॑ পৃথিবি॒ শ-ম্ভ॑ব ॥
ষড্ঢো॑তা॒ সূর্য়॑-ন্তে॒ চক্ষু॑-র্গচ্ছতু॒ বাত॑মা॒ত্মা দ্য়া-ঞ্চ॒ গচ্ছ॑ পৃথি॒বী-ঞ্চ॒ ধর্ম॑ণা ।
অ॒পো বা॑ গচ্ছ॒ যদি॒ তত্র॑ তে হি॒তমোষ॑ধীষু॒ প্রতি॑তিষ্ঠা॒ শরী॑রৈঃ ॥ পর॑-ম্মৃত্য়ো॒ অনু॒ পরে॑হি॒ পন্থা॒ম্ ঁযস্তে॒ স্ব ইত॑রো দেব॒য়ানা᳚ত্ ।
চক্ষু॑ষ্মতে শৃণ্ব॒তে তে᳚ ব্রবীমি॒ মা নঃ॑ প্র॒জাগ্​ম্ রী॑রিষো॒ মোত বী॒রান্ ॥
শম্ ঁবাত॒-শ্শগ্​ম্ হি তে॒ ঘৃণি॒-শ্শমু॑ তে স॒ন্ত্বোষ॑ধীঃ । কল্প॑ন্তা-ম্মে॒ দিশ॑-শ্শ॒গ্মাঃ ॥
পৃ॒থি॒ব্য়াস্ত্বা॑ লো॒কে সা॑দয়াম্য়॒মুষ্য়॒ শর্মা॑সি পি॒তরো॑ দে॒বাতা᳚ । প্র॒জাপ॑তিস্ত্বা সাদযতু॒ তয়া॑ দে॒বত॑য়া ॥ অ॒ন্তরি॑ক্ষস্য় ত্বা দি॒বস্ত্বা॑ দি॒শা-ন্ত্বা॒ নাক॑স্য় ত্বা পৃ॒ষ্ঠে ব্র॒দ্ধ্নস্য়॑ ত্বা বি॒ষ্টপে॑ সাদয়াম্য়॒মুষ্য়॒ শর্মা॑সি পি॒তরো॑ দে॒বতা᳚ ।
প্র॒জাপ॑তিস্ত্বা সাদযতু॒ তয়া॑ দে॒বত॑য়া ॥ 19 ॥
(অন॑পস্ফুরন্তী॒ - রুত্ত॑র - দে॒বত॑য়া॒ দ্বে চ॑) (অ. 7)

অনুবাকং 8
অ॒পূ॒পবা᳚-ন্ঘৃ॒তবাগ্॑শ্চ॒রুরেহ সী॑দতূত্তভ্নু॒ব-ন্পৃ॑থি॒বী-ন্দ্য়ামু॒তোপরি॑ । যো॒নি॒কৃতঃ॑ পথি॒কৃত॑-স্সপর্যত॒ যে দে॒বানা᳚-ঙ্ঘৃ॒তভা॑গা ই॒হ স্থ ।
এ॒ষা তে যম॒সাদ॑নে স্ব॒ধা নিধী॑যতে গৃ॒হে॑-ঽসৌ ।
দশা᳚ক্ষরা॒ তাগ্​ম্ র॑ক্ষস্ব॒ তা-ঙ্গো॑পাযস্ব॒ তা-ন্তে॒ পরি॑ দদামি॒ তস্য়া᳚-ন্ত্বা॒ মা দ॑ভ-ন্পি॒তরো॑ দে॒বতা᳚ ।
প্র॒জাপ॑তিস্ত্বা সাদযতু॒ তয়া॑ দে॒বত॑য়া ॥
অ॒পূ॒পবা᳚-ঞ্ছৃ॒তবা᳚ন্-ক্ষী॒রবা॒ন্-দধি॑বা॒-ন্মধু॑মাগ্​-শ্চ॒রুরেহ সী॑দতূত্তভ্নু॒বন্-পৃ॑থি॒বী-ন্দ্য়ামু॒তোপরি॑ । যো॒নি॒কৃতঃ॑ পথি॒কৃত॑-স্সপর্যত॒ যে দে॒বানাগ্​ম্॑ শৃ॒তভা॑গাঃ, ক্ষী॒রভা॑গা॒ দধি॑ভাগা॒ মধু॑ভাগা ই॒হ স্থ । এ॒ষা তে॑ যম॒সাদ॑নে স্ব॒ধা নিধী॑যতে গৃ॒হে॑-ঽসৌ । শ॒তাক্ষ॑রা স॒হস্রা᳚ক্ষরা॒-ঽয়ুতা᳚ক্ষ॒রা-ঽচ্য়ু॑তাক্ষরা॒ তাগ্​ম্ র॑ক্ষস্ব॒ তা-ঙ্গো॑পাযস্ব॒ তা-ন্তে॒ পরি॑দদামি॒ তস্য়া᳚-ন্ত্বা॒ মা দ॑ভ-ন্পি॒তরো॑ দে॒বতা᳚ । প্র॒জাপ॑তিস্ত্বা সাদযতু॒ তয়া॑ দে॒বত॑য়া ॥ 20 ॥
(অ॒পূ॒পবা॑নসৌ॒ দশ॑) (অ. 8)

অনুবাকং 9
এ॒তাস্তে᳚ স্ব॒ধা অ॒মৃতাঃ᳚ করোমি॒ যাস্তে॑ ধা॒নাঃ প॑রি॒কিরা॒ম্যত্র॑ । তাস্তে॑ য॒মঃ পি॒তৃভি॑-স্সং​বিঁদা॒নো-ঽত্র॑ ধে॒নূঃ কা॑ম॒দুঘাঃ᳚ করোতু ॥
ত্বামর্জু॒নৌষ॑ধীনা॒-ম্পয়ো᳚ ব্র॒হ্মাণ॒ ইদ্বি॑দুঃ ।
তাসা᳚-ন্ত্বা॒ মদ্ধ্য়া॒দাদ॑দে চ॒রুভ্য়ো॒ অপি॑ধাতবে ॥
দূ॒র্বাণাগ্॑ স্ত॒ম্বমাহ॑রৈ॒তা-ম্প্রি॒যত॑মা॒-ম্মম॑ । ই॒মা-ন্দিশ॑-ম্মনু॒ষ্য়া॑ণা॒-ম্ভূয়ি॒ষ্ঠা-ঽনু॒ বি রো॑হতু ॥ কাশা॑নাগ্​ স্ত॒ম্বমাহ॑র॒ রক্ষ॑সা॒মপ॑হত্য়ৈ ।
য এ॒তস্য়ৈ॑ দি॒শঃ প॒রাভ॑বন্নঘা॒যবো॒ যথা॒ তে নাভ॑বা॒-ন্পুনঃ॑ ॥ দ॒র্ভাণাগ্॑ স্ত॒ম্বমাহ॑র পিতৃ॒ণামোষ॑ধী-ম্প্রি॒য়াম্ । অন্বস্য়ৈ॒ মূল॑-ঞ্জীবা॒দনু॒ কাণ্ড॒মথো॒ ফল᳚ম্ ॥ 21 ॥

লো॒ক-ম্পৃ॑ণ ছি॒দ্র-ম্পৃ॒ণাথো॑ সীদ শি॒বা ত্বম্ । ই॒ন্দ্রা॒গ্নী ত্বা॒ বৃহ॒স্পতি॑র॒স্মিন্ যোনা॑বসীষ॒দন্ন্ ॥ তা অ॑স্য়॒ সূদ॑দোহস॒-স্সোমগ্গ্॑ শ্রীণন্তি॒ পৃশ্ন॑য়ঃ । জন্ম॑-ন্দে॒বানাং॒-বিঁশ॑স্ত্রি॒ষ্বা রো॑চ॒নে দি॒বঃ ॥
শম্ ঁবাত॒-শ্শগ্​ম্হি তে॒ ঘৃণি॒-শ্শমু॑ তে স॒ন্ত্বোষ॑ধীঃ । কল্প॑ন্তা-ন্তে॒ দিশ॒-স্সর্বাঃ᳚ ॥ ই॒দমে॒ব মেতো-ঽপ॑রা॒মার্তি॑মারাম॒ কাঞ্চ॒ন ।
তথা॒ তদ॒শ্বিভ্য়া᳚-ঙ্কৃ॒ত-ম্মি॒ত্রেণ॒ বরু॑ণেন চ ॥
ব॒র॒ণো বা॑রয়াদি॒দ-ন্দে॒বো বন॒স্পতিঃ॑ ।
আর্ত্য়ৈ॒ নির্-ঋ॑ত্য়ৈ॒ দ্বেষা᳚চ্চ॒ বন॒স্পতিঃ॑ ॥
বিধৃ॑তিরসি॒ বিধা॑রয়া॒স্মদ॒ঘা দ্বেষাগ্​ম্॑সি শ॒মি শ॒ময়া॒স্মদ॒ঘা দ্বেষাগ্​ম্॑সি য॒ব য॒বয়া॒স্মদ॒ঘা দ্বেষাগ্​ম্॑সি ॥
পৃ॒থি॒বী-ঙ্গ॑চ্ছা॒ন্তরি॑ক্ষ-ঙ্গচ্ছ॒ দিব॑-ঙ্গচ্ছ॒ দিশো॑ গচ্ছ॒ সুব॑র্গচ্ছ॒ সুব॑র্গচ্ছ॒ দিশো॑ গচ্ছ॒ দিব॑-ঙ্গচ্ছা॒ন্তরি॑ক্ষ-ঙ্গচ্ছ পৃথি॒বী-ঙ্গ॑চ্ছা॒পো বা॑ গচ্ছ॒ যদি॒ তত্র॑ তে হি॒তমোষ॑ধীষু॒ প্রতি॑তিষ্ঠা॒ শরী॑রৈঃ ॥ লো॒ক-ম্পৃ॑ণ ছি॒দ্র-ম্পৃ॒ণাথো॑ সীদ শি॒বা ত্বম্ । ই॒ন্দ্রা॒গ্নী ত্বা॒ বৃহ॒স্পতি॑র॒স্মিন্ যোনা॑বসীষ॒দন্ন্ ॥ তা অ॑স্য়॒ সূদ॑দোহস॒-স্সোমগ্গ্॑ শ্রীণন্তি॒ পৃশ্ন॑য়ঃ । জন্ম॑-ন্দে॒বানাং॒-বিঁশ॑স্ত্রি॒ষ্বা রো॑চ॒নে দি॒বঃ ॥
অশ্ম॑ন্বতী রেবতী॒-স্সগ্​ম্ র॑ভদ্ধ্ব॒ মুত্তি॑ষ্ঠত॒ প্রত॑রতা সখায়ঃ । অত্রা॑ জহাম॒ যে অস॒ন্নশে॑বা-শ্শি॒বান্ ব॒যম॒ভি বাজা॒নুত্ত॑রেম ॥ যদ্বৈ দে॒বস্য়॑ সবি॒তুঃ প॒বিত্রগ্​ম্॑ স॒হস্র॑ধার॒ম্ ঁবিত॑তম॒ন্তরি॑ক্ষে । যেনাপু॑না॒দিন্দ্র॒মনা॑র্ত॒-মার্ত্য়ৈ॒ তেনা॒হ-ম্মাগ্​ম্ স॒র্বত॑নু-ম্পুনামি ॥
ধা॒তা যা রা॒ষ্ট্রা-ত্প॒ন্নাদপ॒ যন্তি॒ শাখা॑ অ॒ভিমৃ॑তা নৃ॒পতি॑মি॒চ্ছমা॑নাঃ । ধা॒তুস্তা-স্সর্বাঃ॒ পব॑নেন পূ॒তাঃ প্র॒জয়া॒-ঽস্মান্-র॒য়্য়া বর্চ॑সা॒ সগ্​ম্সৃ॑জাথ ॥( ) ॥ 22 ॥
(অথো॒ ফল॑ম্ - ধা॒তা পু॑নাতু) (অ. 9)

অনুবাকং 10
আরো॑হ॒তায়ু॑-র্জ॒রস॑-ঙ্গৃণা॒না অ॑নুপূ॒র্বম্ ঁযত॑মানা॒ যতি॒ষ্ট । ই॒হ ত্বষ্টা॑ সু॒জনি॑মা সু॒রত্নো॑ দী॒র্ঘমায়ুঃ॑ করতু জী॒বসে॑ বঃ ॥
যথা-ঽহা᳚ন্যনুপূ॒র্ব-ম্ভব॑ন্তি॒ যথ॒র্তব॑ ঋ॒তুভি॒-র্যন্তি॑ ক্লৃ॒প্তাঃ । যথা॒ ন পূর্ব॒মপ॑রো॒ জহা᳚ত্য়ে॒বা ধা॑ত॒রায়ূগ্​ম্॑ষি কল্পয়ৈষাম্ ॥
ন হি॑ তে অগ্নে ত॒নুবৈ᳚ ক্রূ॒র-ঞ্চ॒কার॒ মর্ত্য়ঃ॑ ।
ক॒পি-র্ব॑ভস্তি॒ তেজ॑ন॒-ম্পুন॑র্জ॒রায়ু॒ গৌরি॑ব ।
অপ॑ ন॒-শ্শোশু॑চদ॒ঘমগ্নে॑ শুশু॒দ্ধ্য়া র॒য়িম্ ।
অপ॑ ন॒-শ্শোশু॑চদ॒ঘ-ম্মৃ॒ত্যবে॒ স্বাহা᳚ ॥
অ॒ন॒ড্বাহ॑-ম॒ন্বার॑ভামহে স্ব॒স্তয়ে᳚ ।
স ন॒ ইন্দ্র॑ ইব দে॒বেভ্য়ো॒ বহ্নি॑-স্স॒পাংর॑ণো ভব ॥ 23 ॥

ই॒মে জী॒বা বি॑মৃ॒তৈরাব॑ব-র্তি॒ন্নভূ᳚-দ্ভ॒দ্রা দে॒বহূ॑তি-ন্নো অ॒দ্য় । প্রাঞ্জো॑-ঽগামা নৃ॒তয়ে॒ হসা॑য়॒ দ্রাঘী॑য়॒ আয়ুঃ॑ প্রত॒রা-ন্দধা॑নাঃ ॥
মৃ॒ত্য়োঃ প॒দম্ ঁয়োপয়॑ন্তো॒ যদৈম॒ দ্রাঘী॑য়॒ আয়ুঃ॑ প্রত॒রা-ন্দধা॑নাঃ । আ॒প্য়ায়॑মানাঃ প্র॒জয়া॒ ধনে॑ন শু॒দ্ধাঃ পূ॒তা ভ॑বথ যজ্ঞিয়াসঃ ॥
ই॒ম-ঞ্জী॒বেভ্য়ঃ॑ পরি॒ধি-ন্দ॑ধামি॒ মা নো নু॑ গা॒দপ॑রো॒ অর্ধ॑মে॒তম্ ।
শ॒ত-ঞ্জী॑বন্তু শ॒রদঃ॑ পুরূ॒চীস্তি॒রো মৃ॒ত্য়ু-ন্দ॑দ্মহে॒ পর্ব॑তেন ॥ ই॒মা নারী॑রবিধ॒বা-স্সু॒পত্নী॒রাঞ্জ॑নেন স॒র্পিষা॒ সম্মৃ॑শন্তাম্ ।
অ॒ন॒শ্রবো॑ অনমী॒বা-স্সু॒শেবা॒ আরো॑হন্তু॒ জন॑য়ো॒ যোনি॒মগ্রে᳚ ॥ যদাঞ্জ॑ন-ন্ত্রৈককু॒দ-ঞ্জা॒তগ্​ম্ হি॒মব॑ত॒স্পরি॑ ।
তেনা॒মৃত॑স্য়॒ মূলে॒নারা॑তী-র্জম্ভয়ামসি ॥
যথা॒ ত্ব-মু॑দ্ভি॒ন-থ্স্য়ো॑ষধে পৃথি॒ব্য়া অধি॑ ।
এ॒বমি॒ম উদ্ভি॑ন্দন্তু কী॒র্ত্য়া যশ॑সা ব্রহ্মবর্চ॒সেন॑ ॥ অ॒জো᳚-ঽস্যজা॒স্মদ॒ঘা দ্বেষাগ্​ম্॑সি য॒বো॑-ঽসি য॒বয়া॒স্মদ॒ঘা দ্বেষাগ্​ম্॑সি ॥ 24 ॥
(ভ॒ব॒ - জ॒ম্ভ॒য়া॒ম॒সি॒ ত্রীণি॑ চ) (অ. 10)

অনুবাকং 11
অপ॑ ন॒-শ্শোশু॑চদ॒ঘমগ্নে॑ শুশু॒দ্ধ্য়া র॒য়িম্ । অপ॑ ন॒-শ্শোশু॑চদ॒ঘম্ ॥ সু॒ক্ষে॒ত্রি॒য়া সু॑গাতু॒য়া ব॑সূ॒য়া চ॑ যজামহে । অপ॑ ন॒-শ্শোশু॑চদ॒ঘম্ ॥
প্র য-দ্ভন্দি॑ষ্ঠ এষা॒-ম্প্রাস্মাকা॑সশ্চ সূ॒রয়ঃ॑ । অপ॑ ন॒-শ্শোশু॑চদ॒ঘম্ ॥ প্রযদ॒গ্নে-স্সহ॑স্বতো বি॒শ্বতো॒ যন্তি॑ সূ॒রয়ঃ॑ । অপ॑ ন॒-শ্শোশু॑চদ॒ঘম্ ॥
প্রযত্তে॑ অগ্নে সূ॒রয়ো॒ জায়ে॑মহি॒ প্র তে॑ ব॒যম্ ।
অপ॑ ন॒-শ্শোশু॑চদ॒ঘম্ ॥ 25 ॥

ত্বগ্​ম্ হি বি॑শ্বতোমুখ বি॒শ্বতঃ॑ পরি॒ভূরসি॑ । অপ॑ ন॒-শ্শোশু॑চদ॒ঘম্ ॥ দ্বিষো॑ নো বিশ্বতোমু॒খাতি॑ না॒বেব॑ পারয় । অপ॑ ন॒-শ্শোশু॑চদ॒ঘম্ ॥ স ন॒-স্সিন্ধু॑মিব না॒বয়া-ঽতি॑ পর্​ষা স্ব॒স্তয়ে᳚ । অপ॑ ন॒-শ্শোশু॑চদ॒ঘম্ ॥ আপঃ॑ প্রব॒ণাদি॑ব য॒তী-রপা॒স্ম-থ্স্য়॑ন্দতাম॒ঘম্ । অপ॑ ন॒-শ্শোশু॑চদ॒ঘম্ ॥ উ॒দ্ব॒না-দু॑দ॒কানী॒বাপা॒স্ম-থ্স্য়॑ন্দতাম॒ঘম্ ।
অপ॑ ন॒-শ্শোশু॑চদ॒ঘম্ ॥ আ॒ন॒ন্দায়॑ প্রমো॒দায়॒ পুন॒রাগা॒গ্॒ স্বান্গৃ॒হান্ । অপ॑ ন॒-শ্শোশু॑চদ॒ঘম্ ॥ ন বৈ তত্র॒ প্রমী॑যতে॒ গৌরশ্বঃ॒ পুরু॑ষঃ প॒শুঃ ।
যত্রে॒দ-ম্ব্রহ্ম॑ ক্রি॒যতে॑ পরি॒ধির্জীব॑নায়॒ কমপ॑ ন॒-শ্শোশু॑চদ॒ঘম্ ॥ 26 ॥
(অ॒ঘ - ম॒ঘ-ঞ্চ॒ত্বারি॑ চ) (অ. 11)

অনুবাকং 12
অপ॑শ্য়াম যুব॒তি-মা॒চর॑ন্তী-ম্মৃ॒তায়॑ জী॒বা-ম্প॑রিণী॒যমা॑নাম্ । অ॒ন্ধেন॒ যা তম॑সা॒ প্রাবৃ॑তা-ঽসি॒ প্রাচী॒মবা॑চী॒-মব॒য়-ন্নরি॑ষ্ট্য়ৈ ॥
ময়ৈ॒তা-ম্মা॒গ্॒স্তা-ম্ভ্রি॒যমা॑ণা দে॒বী স॒তী পি॑তৃলো॒কম্ ঁযদৈষি॑ । বি॒শ্ববা॑রা॒ নভ॑সা॒ সং​ব্য়ঁ॑যন্ত্য়ু॒ভৌ নো॑ লো॒কৌ পয়॒সা-ঽঽবৃ॑ণীহি ॥
রয়ি॑ষ্ঠাম॒গ্নি-ম্মধু॑মন্তমূ॒র্মিণ॒মূর্জ॑-স্সন্ত-ন্ত্বা॒ পয়॒সোপ॒ সগ্​ম্স॑দেম ।
সগ্​ম্ র॒য়্য়া সমু॒ বর্চ॑সা॒ সচ॑স্বা ন-স্স্ব॒স্তয়ে᳚ ॥
যে জী॒বা যে চ॑ মৃ॒তা যে জা॒তা যে চ॒ জন্ত্য়াঃ᳚ ।
তেভ্য়ো॑ ঘৃ॒তস্য়॑ ধারয়িতু॒-ম্মধু॑ধারা ব্য়ুন্দ॒তী ॥
মা॒তা রু॒দ্রাণা᳚-ন্দুহি॒তা বসূ॑না॒গ্॒ স্বসা॑-ঽঽদি॒ত্য়ানা॑ম॒-মৃত॑স্য়॒ নাভিঃ॑ ।
প্রণু॒বোচ॑-ঞ্চিকি॒তুষে॒ জনা॑য়॒ মা গামনা॑গা॒মদি॑তিম্ ঁবধিষ্ট ॥
পিব॑তূদ॒ক-ন্তৃণা᳚ন্যত্তু । ওমু-থ্সৃ॒জত ॥ 27 ॥
(ব॒ধি॒ষ্ট॒ দ্বে চ॑) (অ. 12)

(প॒রে॒য়ু॒বাগ্​ম্স॒-ম্প্র বি॒দ্বা-ন্ভুব॑নস্য়া॒ভ্য়াব॑ বৃথ্স্বা॒ জো ভা॒গো॑-ঽযম্ ঁবৈ চতুশ্চত্বারিগ্​ম্শত্ ।
য এ॒তস্য়॒ ত্ব-ত্পঞ্চ॑ । প্রকে॒তুনে॒দন্তে॒ নাকে॑ সুপ॒র্ণম্ ঁয়ৌ তে॒ যে যুদ্ধ্য়॑ন্তে॒ তপ॒সা-ঽশ্ম॑ন্বতী রেবতী॒-স্সগ্​ম্র॑ভদ্ধ্বম॒ষ্টাবিগ্​ম্॑শতিঃ । য-ন্তে॒ যত্ত॒ উত্তিষ্ঠা॒ত॑ ই॒দন্ত॒ উত্তি॑ষ্ঠ॒
প্রেহ্যশ্ম॒ন্॒. যদ্বা উদ্ব॒যম॒য়-ম্পঞ্চ॑বিগ্​ম্শতিঃ । আয়া॑তু ত্রি॒গ্​ম্॒শত্ । বৈ॒শ্বা॒ন॒রে তস্মি॑-ন্দ্র॒ফ্স ই॒মমপে॒তাহো॑ভি-র্য়ুজ্যন্তামঘ্নি॒য়া অ॑দিতে পা॒রম্ ঁব॒ আ প্য়া॑যস্ব স॒প্তবিগ্​ম্॑শতিঃ । উত্তে॑ গৃহে-ঽখাষি॑তি॒স্তেভ্য়ঃ॑ পৃ॑থি॒ব্য়া অ॒ন্তরি॑ক্ষস্য়॒ দ্বাত্রিগ্​ম্॑শত্ । অ॒পূ॒পবা॑নসৌ॒ দশ॑ শ॒ত দ॑শ । এ॒তাস্তে॑ তে॒ দিশ॒-স্সর্বা॑ ই॒দমশ্ম॑ন্ বিগ্​ম্শ॒তিঃ । ও॑রোহত ত॒নুবৈ᳚ ক্রূ॒র-ঞ্চ॒কার॒ পুন॑র্মৃ॒ত্যবে॒ মা নো নু॑ গা-দ্দদ্মহ ই॒মা নারীঃ॒ পরি॒ ত্রয়ো॑বিগ্​ম্শতিঃ ।
অপ॑ ন-স্সুক্ষেত্রি॒য়া প্র যদ্ভ-ন্দি॑ষ্ঠঃ॒ প্র যদ॒গ্নেঃ প্র যত্তে॑ অগ্নে॒ ত্বগ্​ম্ হি দ্বিষ॒-স্স ন॒-স্সিন্ধু॒মাপঃ॑ প্রব॒ণাদু॑-দ্ব॒নাদা॑ন॒ন্দায়॒ ন বৈ তত্র॒ যত্রে॒দ-ঞ্চতু॑র্বিগ্​ম্শতিঃ॒ । অপ॑শ্য়া॒মাবৃ॑ণীহি॒ দ্বাদ॑শ দ্বাদশ ।)

(প॒রে॒য়ু॒বাগ্​ম্স॒ - মায়া᳚ - ত্বে॒তাস্তে॑ স॒প্তবিগ্​ম্॑শতিঃ )

(প॒রে॒য়ু॒বাগ্​ম্স॒ - মোমুথ্সৃ॒জত )

॥ হরিঃ॑ ওম্ ॥

॥ কৃষ্ণ যজুর্বেদীয় তৈত্তিরীয় আরণ্যকে ষষ্ঠঃ প্রপাঠক-স্সমাপ্তঃ ॥