KYTA 6 Pitrumedha Mantrah - Krishna Yajurveda Taittiriya Aranyaka Patha - Pareyuvamsam Pravatah - English

anuvākaṃ 1
pa̠rē̠yu̠vāgṃsa̍-mpra̠vatō̍ ma̠hīranu̍ ba̠hubhya̠ḥ panthā̍manapaspaśā̠nam । vai̠va̠sva̠tagṃ sa̠ṅgama̍na̠-ñjanā̍nām ँya̠magṃ rājā̍nagṃ ha̠viṣā̍ duvasyata ॥ i̠da-ntvā̠ vastra̍-mpratha̠ma-nnvāga̠nnapai̠tadū̍ha̠ yadi̠hābi̍bhaḥ pu̠rā ।
i̠ṣṭā̠pū̠rtamanu̠ sampa̍śya̠ dakṣi̍ṇā̠m ँyathā̍ tē da̠tta-mba̍hu̠dhā vi ba̍ndhuṣu ॥
i̠mau yu̍najmi tē va̠hnī asu̍nīthāya vō̠ḍhavē̎ ।
yābhyā̎m ँya̠masya̠ sāda̍nagṃ su̠kṛtā̠-ñchāpi̍ gachChatāt ॥ pū̠ṣā tvē̠taśchyā̍vayatu̠ pravi̠dvā-nana̍ṣṭapaśu̠-rbhuva̍nasya gō̠pāḥ ।
sa tvai̠tēbhya̠ḥ pari̍dadā-tpi̠tṛbhyō̠-'gnirdē̠vēbhya̍-ssuvi̠datrē̎bhyaḥ ॥ pū̠ṣēmā āśā̠ anu̍vēda̠ sarvā̠-ssō a̠smāgṃ abha̍yatamēna nēṣat ।
sva̠sti̠dā aghṛ̍ṇi̠-ssarva̍vī̠rō-'pra̍yuchChanpu̠ra ē̍tu̠ pravi̠dvān ॥ 1 ॥

āyu̍-rvi̠śvāyu̠ḥ pari̍pāsati tvā pū̠ṣā tvā̍ pātu̠ prapa̍thē pu̠rastā̎t । yatrāsa̍tē su̠kṛtō̠ yatra̠ tē ya̠yustatra̍ tvā dē̠va-ssa̍vi̠tā da̍dhātu ॥
bhuva̍nasya pata i̠dagṃ ha̠viḥ ॥ a̠gnayē̍ rayi̠matē̠ svāhā̎ ॥ puru̍ṣasya sayāva̠ryapēda̠ghāni̍ mṛjmahē ।
yathā̍ nō̠ atra̠ nāpa̍raḥ pu̠rā ja̠rasa̠ āya̍ti ॥
puru̍ṣasya sayāvari̠ vi tē̎ prā̠ṇama̍si srasam ।
śarī̍rēṇa ma̠hīmihi̍ sva̠dhayēhi̍ pi̠tṝnupa̍ pra̠jayā̠-'smāni̠hāva̍ha ॥ maiva̍-mmā̠g̠stā pri̍yē̠-'ha-ndē̠vī sa̠tī pi̍tṛlō̠kam ँyadaiṣi̍ ।
vi̠śvavā̍rā̠ nabha̍sā̠ saṃvya̍yantyu̠bhau nō̍ lō̠kau
paya̍sā̠-'bhyāva̍vṛthsva ॥ 2 ॥

i̠ya-nnārī̍ patilō̠kam ँvṛ̍ṇā̠nā nipa̍dyata̠ upa̍ tvā martya̠ prēta̎m । viśva̍-mpurā̠ṇamanu̍ pā̠laya̍ntī̠ tasyai̎ pra̠jā-ndravi̍ṇa-ñchē̠ha dhē̍hi ॥ udī̎rṣva nārya̠bhi jī̍valō̠kami̠tāsu̍mē̠tamupa̍śēṣa̠ ēhi̍ ।
ha̠sta̠grā̠bhasya̍ didhi̠ṣōstvamē̠ta-tpatyu̍rjani̠tvama̠bhi samba̍bhūva ॥
su̠varṇa̠gṃ̠ hastā̍dā̠dadā̍nā mṛ̠tasya̍ śri̠yai brahma̍ṇē̠ tēja̍sē̠ balā̍ya । atrai̠va tvami̠ha va̠yagṃ su̠śēvā̠ viśvā̠-sspṛdhō̍ a̠bhimā̍tīrjayēma ॥
dhanu̠r̠ hastā̍dā̠dadā̍nā mṛ̠tasya̍ śri̠yai kṣa̠trāyauja̍sē̠ balā̍ya । atrai̠va tvami̠ha va̠yagṃ su̠śēvā̠ viśvā̠-sspṛdhō̍ a̠bhimā̍tīrjayēma ।
maṇi̠gṃ̠ hastā̍dā̠dadā̍nā mṛ̠tasya̍ śri̠yai vi̠śē puṣṭyai̠ balā̍ya । atrai̠va tvami̠ha va̠yagṃ su̠śēvā̠ viśvā̠-sspṛdhō̍ a̠bhimā̍tīrjayēma ॥ 3 ॥

i̠mama̍gnē chama̠sa-mmā vijī̎hvaraḥ pri̠yō dē̠vānā̍mu̠ta sō̠myānā̎m । ē̠ṣa yaścha̍ma̠sō dē̍va̠pāna̠stasmi̍-ndē̠vā a̠mṛtā̍ mādayantām ॥
a̠gnērvarma̠ pari̠ gōbhi̍rvyayasva̠ samprōrṇu̍ṣva̠ mēda̍sā̠ pīva̍sā cha । nēttvā̍ dhṛ̠ṣṇur-hara̍sā̠ jarhṛ̍ṣāṇō̠ dadha̍-dvidha̠kṣyan-parya̠ṅkhayā̍tai ॥
maina̍magnē̠ vida̍hō̠ mā-'bhiśō̍chō̠ mā-'sya̠ tvacha̍-ñchikṣipō̠ mā śarī̍ram । ya̠dā śṛ̠ta-ṅka̠ravō̍ jātavē̠dō-'thē̍mēna̠-mprahi̍ṇutā-tpi̠tṛbhya̍ḥ ॥
śṛ̠tam ँya̠dā ka̠rasi̍ jātavē̠dō-'thē̍mēna̠-mpari̍dattā-tpi̠tṛbhya̍ḥ । ya̠dā gachChā̠tyasu̍nītimē̠tāmathā̍ dē̠vānā̎m ँvaśa̠nīrbha̍vāti ॥ sūrya̍-ntē̠ chakṣu̍-rgachChatu̠ vāta̍mā̠tmā dyā-ñcha̠ gachCha̍ pṛthi̠vī-ñcha̠ dharma̍ṇā ।
a̠pō vā̍ gachCha̠ yadi̠ tatra̍ tē hi̠tamōṣa̍dhīṣu̠ prati̍tiṣṭhā̠ śarī̍raiḥ ॥ a̠jō bhā̠gastapa̍sā̠ ta-nta̍pasva̠ ta-ntē̍ śō̠chista̍patu̠ ta-ntē̍ a̠rchiḥ ।
yāstē̍ śi̠vāsta̠nuvō̍ jātavēda̠stābhi̍-rvahē̠magṃ su̠kṛtā̠m ँyatra̍ lō̠kāḥ ॥ a̠yam ँvai tvama̠smādadhi̠ tvamē̠tada̠yam ँvai tada̍sya̠ yōni̍rasi । vai̠śvā̠na̠raḥ pu̠traḥ pi̠trē lō̍ka̠kṛ-jjā̍tavēdō̠ vahē̍magṃ su̠kṛtā̠m ँyatra̍ lō̠kāḥ ॥ 4 ॥
(vi̠dvā-na̠bhyāva̍vṛthsvā̠ - bhimā̍tīrjayēma̠ - śarī̎raiścha̠tvāri̍ cha ) (a. 1)

anuvākaṃ 2
ya ē̠tasya̍ pa̠thō gō̠ptāra̠stēbhya̠-ssvāhā̠ ya ē̠tasya̍ pa̠thō ra̍kṣi̠tāra̠stēbhya̠-ssvāhā̠ ya ē̠tasya̍ pa̠thō̍-'bhira̍kṣi̠tāra̠stēbhya̠-ssvāhā̎-''khyā̠trē svāhā̍-'pākhyā̠trē svāhā̍-'bhi̠lāla̍patē̠ svāhā̍-'pa̠lāla̍patē̠ svāhā̠-'gnayē̍ karma̠kṛtē̠ svāhā̠ yamatra̠ nādhī̠mastasmai̠ svāhā̎ ॥
yasta̍ i̠ddhma-ñja̠bhara̍-thsiṣvidā̠nō mū̠rdhāna̍m ँvā ta̠tapa̍tē tvā̠yā । divō̠ viśva̍smā-thsīmaghāya̠ta u̍ruṣyaḥ ॥ a̠smāttvamadhi̍ jā̠tō̍-'si̠ tvada̠ya-ñjā̍yatā̠-mpuna̍ḥ । a̠gnayē̍ vaiśvāna̠rāya̍ suva̠rgāya̍ lō̠kāya̠ svāhā̎ ॥ 5 ॥
(ya ē̠tasya̠ tva-tpañcha̍ ) (a. 2)

anuvākaṃ 3
pra kē̠tunā̍ bṛha̠tā bhā̎tya̠gnirā̠vi-rviśvā̍ni vṛṣa̠bhō rō̍ravīti । di̠vaśchi̠dantā̠dupa̠ māmu̠dāna̍ḍa̠pāmu̠pasthē̍ mahi̠ṣō va̍vardha ॥
i̠danta̠ ēka̍-mpa̠ra ū̍ta̠ ēka̍-ntṛ̠tīyē̍na̠ jyōti̍ṣā̠ saṃvi̍śasva । sa̠ṃvēśa̍nasta̠nuvai̠ chāru̍rēdhi pri̠yō dē̠vānā̎-mpara̠mē sa̠dhasthē̎ ॥
nākē̍ supa̠rṇamupa̠ ya-tpata̍ntagṃ hṛ̠dā vēna̍ntō a̠bhyacha̍kṣata tvā । hira̍ṇyapakṣa̠m ँvaru̍ṇasya dū̠tam ँya̠masya̠ yōnau̍ śaku̠na-mbhu̍ra̠ṇyum ॥
ati̍drava sāramē̠yau śvānau̍ chatura̠kṣau śa̠balau̍ sā̠dhunā̍ pa̠thā । athā̍ pi̠tṝn-thsu̍vi̠datrā̠gṃ̠ apī̍hi ya̠mēna̠ yē sa̍dha̠māda̠-mmada̍nti ॥
yau tē̠ śvānau̍ yama rakṣi̠tārau̍ chatura̠kṣau pa̍thi̠rakṣī̍ nṛ̠chakṣa̍sā ।
tābhyāgṃ̍ rāja̠-npari̍ dēhyēnagg sva̠sti chā̎smā anamī̠va-ñcha̍ dhēhi ॥ 6 ॥

u̠ru̠ṇa̠sā-va̍su̠tṛpā̍-vulumba̠lau ya̠masya̍ dū̠tau cha̍ratō̠ vaśā̠gṃ̠ anu̍ । tāva̠smabhya̍-ndṛ̠śayē̠ sūryā̍ya̠ puna̍rda-ttā̠vasu̍ma̠dyēha bha̠dram ॥
sōma̠ ēkē̎bhyaḥ pavatē ghṛ̠tamēka̠ upā̍satē ।
yēbhyō̠ madhu̍ pra̠dhāva̍ti̠ tāg-śchi̍dē̠vāpi̍gachChatāt ॥
yē yuddhya̍ntē pra̠dhanē̍ṣu̠ śūrā̍sō̠ yē ta̍nu̠tyaja̍ḥ । yē vā̍ sa̠hasra̍dakṣiṇā̠stāg śchi̍dē̠vāpi̍gachChatāt ॥
tapa̍sā̠ yē a̍nādhṛ̠ṣyā-stapa̍sā̠ yē suva̍rga̠tāḥ ।
tapō̠ yē cha̍kri̠rē ma̠ha-ttāg-śchi̍dē̠vāpi̍gachChatāt ॥
aśma̍nvatī rēvatī̠-ssagṃra̍bhaddhva̠-mutti̍ṣṭhata̠ prata̍ratā sakhāyaḥ । atrā̍ jahāma̠ yē asa̠nnaśē̍vā-śśi̠vān. va̠yama̠bhi vājā̠nutta̍rēma ॥ 7 ॥

yadvai dē̠vasya̍ savi̠tuḥ pa̠vitragṃ̍ sa̠hasra̍dhāra̠m ँvita̍tama̠ntari̍kṣē । yēnāpu̍nā̠dindra̠manā̎rta̠-mārtyai̠ tēnā̠ha-mmāgṃ sa̠rvata̍nu-mpunāmi ॥
yā rā̠ṣṭrā-tpa̠nnādapa̠ yanti̠ śākhā̍ a̠bhimṛ̍tā nṛ̠pati̍mi̠chChamā̍nāḥ । dhā̠tustā-ssarvā̠ḥ pava̍nēna pū̠tāḥ pra̠jayā̠-'smān-ra̠yyā varcha̍sā̠ sagṃsṛ̍jātha ॥
udva̠ya-ntama̍sa̠spari̠ paśya̍ntō̠ jyōti̠rutta̍ram ।
dē̠va-ndē̍va̠trā sūrya̠maga̍nma̠ jyōti̍rutta̠mam ॥
dhā̠tā pu̍nātu savi̠tā pu̍nātu । a̠gnēstēja̍sā̠ sūrya̍sya̠ varcha̍sā ॥ 8 ॥
(dhē̠ - hyutta̍rē - mā̠ṣṭau cha̍) (a. 3)

anuvākaṃ 4
ya-ntē̍ a̠gnimama̍nthāma vṛṣa̠bhāyē̍va̠ pakta̍vē ।
i̠ma-ntagṃ śa̍mayāmasi kṣī̠rēṇa̍ chōda̠kēna̍ cha ॥
yantvama̍gnē sa̠mada̍ha̠stvamu̠ nirvā̍payā̠ puna̍ḥ ।
kyā̠mbūratra̍ jāyatā-mpākadū̠rvā vya̍lkaśā ॥
śīti̍kē̠ śīti̍kāvati̠ hlādu̍kē̠ hlādu̍kāvati ।
ma̠ṇḍū̠kyā̍ susaṅga̠mayē̠magg sva̍gnigṃ śa̠maya̍ ॥ śa-ntē̍ dhanva̠nyā āpa̠-śśamu̍ tē santvanū̠kyā̎ḥ । śa-ntē̍ samu̠driyā̠ āpa̠-śśamu̍ tē santu̠ varṣyā̎ḥ ॥
śa-ntē̠ srava̍ntī-sta̠nuvē̠ śamu̍ tē santu̠ kūpyā̎ḥ ।
śa-ntē̍ nīhā̠rō va̍rṣatu̠ śamu̠ pṛṣvā-'va̍śīyatām ॥ 9 ॥

ava̍ sṛja̠ puna̍ragnē pi̠tṛbhyō̠ yasta̠ āhu̍ta̠śchara̍ti sva̠dhābhi̍ḥ । āyu̠rvasā̍na̠ upa̍ yātu̠ śēṣa̠gṃ̠ saṅga̍chChatā-nta̠nuvā̍ jātavēdaḥ ॥
saṅga̍chChasva pi̠tṛbhi̠-ssagg sva̠dhābhi̠-ssami̍ṣṭāpū̠rtēna̍ para̠mē vyō̍mann ।
yatra̠ bhūmyai̍ vṛ̠ṇasē̠ tatra̍ gachCha̠ tatra̍ tvā dē̠va-ssa̍vi̠tā da̍dhātu ॥ yattē̍ kṛ̠ṣṇa-śśa̍ku̠na ā̍tu̠tōda̍ pipī̠la-ssa̠rpa u̠ta vā̠ śvāpa̍daḥ ।
a̠gniṣṭa-dviśvā̍danṛ̠ṇa-ṅkṛ̍ṇōtu̠ sōma̍ścha̠ yō brā̎hma̠ṇamā̍vi̠vēśa̍ ॥ utti̠ṣṭhāta̍-sta̠nuva̠gṃ̠ sambha̍rasva̠ mēha gātra̠mava̍hā̠ mā śarī̍ram ।
yatra̠ bhūmyai̍ vṛ̠ṇasē̠ tatra̍ gachCha̠ tatra̍ tvā dē̠va-ssa̍vi̠tā da̍dhātu ॥ i̠da-nta̠ ēka̍-mpa̠ra ū̍ta̠ ēka̍-ntṛ̠tīyē̍na̠ jyōti̍ṣā̠ saṃvi̍śasva ।
sa̠ṃvēśa̍na-sta̠nuvai̠ chāru̍rēdhi pri̠yō dē̠vānā̎-mpara̠mē sa̠dhasthē̎ ॥ utti̍ṣṭha̠ prēhi̠ pradra̠vauka̍ḥ kṛṇuṣva para̠mē vyō̍mann । ya̠mēna̠ tvam ँya̠myā̍ saṃvidā̠nōt-ta̠ma-nnāka̠madhi̍ rōhē̠mam ॥
aśma̍nvatī rēvatī̠-ssagṃ ra̍bhaddhva̠ mutti̍ṣṭhata̠ prata̍ratā sakhāyaḥ । atrā̍ jahāma̠ yē asa̠nnaśē̍vā-śśi̠vān va̠yama̠bhi vājā̠nutta̍rēma ॥ yadvai dē̠vasya̍ savi̠tuḥ pa̠vitragṃ̍ sa̠hasra̍dhāra̠m ँvita̍tama̠ntari̍kṣē । yēnāpu̍nā̠dindra̠manā̍rta̠-mārtyai̠ tēnā̠ha-mmāgṃ sa̠rvata̍nu-mpunāmi ॥ yā rā̠ṣṭrā-tpa̠nnādapa̠ yanti̠ śākhā̍ a̠bhimṛ̍tā nṛ̠pati̍mi̠chChamā̍nāḥ । dhā̠tustā-ssarvā̠ḥ pava̍nēna pū̠tāḥ pra̠jayā̠-'smān-ra̠yyā varcha̍sā̠ sagṃsṛ̍jātha ॥ yā rā̠ṣṭrā-tpa̠nnādapa̠ yanti̠ śākhā̍ a̠bhimṛ̍tā nṛ̠pati̍mi̠chChamā̍nāḥ । dhā̠tustā-ssarvā̠ḥ pava̍nēna pū̠tāḥ pra̠jayā̠-'smān-ra̠yyā varcha̍sā̠ sagṃsṛ̍jātha ॥ dhā̠tā pu̍nātu savi̠tā pu̍nātu । a̠gnēstēja̍sā̠ sūrya̍sya̠ varcha̍sā ॥
a̠smāttvamadhi̍ jā̠tō̎-'sya̠ya-ntvadadhi̍jāyatām ।
a̠gnayē̍ vaiśvāna̠rāya̍ suva̠rgāya̍ lō̠kāya̠ svāhā̎ ॥ 10 ॥
(ava̍śīyatāgṃ - sa̠dhasthē̠ pañcha̍ cha) (a. 4)

anuvākaṃ 5
āyā̍tu dē̠va-ssu̠manā̍bhi-rū̠tibhi̍-rya̠mō ha̍vē̠ha praya̍tābhira̠ktā । āsī̍datāgṃ supra̠yatē̍ha ba̠r̠hiṣyūrjā̍ya jā̠tyai mama̍ śatru̠hatyai̎ ॥
ya̠mē i̍va̠ yata̍mānē̠ yadaita̠-mpravā̎mbhara̠-nmānu̍ṣā dēva̠yanta̍ḥ । āsī̍data̠gg̠ svamu̍ lō̠kam ँvidā̍nē svāsa̠sthē bha̍vata̠minda̍vē naḥ ॥
ya̠māya̠ sōmagṃ̍ sunuta ya̠māya̍ juhutā ha̠viḥ ।
ya̠magṃ ha̍ ya̠jñō ga̍chChatya̠gnidū̍tō̠ ara̍ṅkṛtaḥ ॥
ya̠māya̍ ghṛ̠tava̍ddha̠virju̠hōta̠ pra cha̍ tiṣṭhata ।
sa nō̍ dē̠vēṣvāya̍ma-ddī̠rghamāyu̠ḥ pra jī̠vasē̎ ॥
ya̠māya̠ madhu̍mattama̠gṃ̠ rājñē̍ ha̠vya-ñju̍hōtana । i̠da-nnama̠ ṛṣi̍bhyaḥ pūrva̠jēbhya̠ḥ pūrvē̎bhyaḥ pathi̠kṛdbhya̍ḥ ॥ 11 ॥

yō-'sya̠ kauṣṭhya̠ jaga̍ta̠ḥ pārthi̍va̠syaika̍ idva̠śī ।
ya̠ma-mbha̍ṅgyaśra̠vō gā̍ya̠ yō rājā̍-'napa̠rōddhya̍ḥ ॥ ya̠ma-ṅgāya̍ bhaṅgya̠śravō̠ yō rājā̍-'napa̠rōddhya̍ḥ । yēnā̠pō na̠dyō̍ dhanvā̍ni̠ yēna̠ dyauḥ pṛ̍thi̠vī dṛ̠ḍhā ॥ hi̠ra̠ṇya̠ka̠kṣyān-thsu̠dhurān̍. hiraṇyā̠kṣā-na̍yaśśa̠phān । aśvā̍-na̠naśya̍tō dā̠na̠m ँya̠mō rā̍jā-'bhi̠tiṣṭha̍ti ॥ ya̠mō dā̍dhāra pṛthi̠vīṃ ya̠mō viśva̍mi̠da-ñjaga̍t । ya̠māya̠ sarva̠mitra̍sthē̠ ya-tprā̠ṇa-dvā̠yura̍kṣi̠tam ॥ yathā̠ pañcha̠ yathā̠ ṣaḍ ya̠thā pañcha̍ da̠śarṣa̍yaḥ । ya̠mam ँyō vi̍dyā̠thsa brū̍yādya̠thaika ṛṣi̍rvijāna̠tē ॥ 12 ॥

trika̍drukēbhi̠ḥ pata̍ti̠ ṣaḍu̠rvī-rēka̠mi-dbṛ̠hat ।
gā̠ya̠trī tri̠ṣṭupChandāgṃ̍si̠ sarvā̠ tā ya̠ma āhi̍tā ॥
aha̍raha̠rnaya̍mānō̠ gāmaśva̠-mpuru̍ṣa̠-ñjaga̍t ।
vaiva̍svatō̠ na tṛ̍pyati̠ pañcha̍bhi̠rmāna̍vairya̠maḥ ॥
vaiva̍svatē̠ vivi̍chyantē̠ yamē̠ rāja̍ni tē ja̠nāḥ ।
yē chē̠ha sa̠tyēnēchCha̍ntē̠ ya u̠ chānṛ̍tavādi̠naḥ ॥
tē rā̍janni̠ha vivi̍chyantē̠-'thā ya̍nti tvā̠mupa̍ ।
dē̠vāgścha̠ yē na̍ma̠syanti̠ brāhma̍ṇāgśchāpa̠chitya̍ti ॥
yasmi̍n vṛ̠kṣē su̍palā̠śē dē̠vai-ssa̠pimba̍tē ya̠maḥ ।
atrā̍ nō vi̠śpati̍ḥ pi̠tā pu̍rā̠ṇā anu̍vēnati ॥ 13 ॥
(pa̠thi̠kṛdbhyō̍ - vijāna̠tē - 'nu̍vēnati) (a. 5)

anuvākaṃ 6
vai̠śvā̠na̠rē ha̠viri̠da-ñju̍hōmi sāha̠sra-muthsagṃ̍ śa̠tadhā̍ramē̠tam । tasmi̍nnē̠ṣa pi̠tara̍-mpitāma̠ha-mprapi̍tāmaha-mbibhara̠-tpinva̍mānē ॥
dra̠phsaścha̍skanda pṛthi̠vīmanu̠ dyāmi̠mañcha̠ yōni̠manu̠ yaścha̠ pūrva̍ḥ ।
tṛ̠tīya̠m ँyōni̠manu̍ sa̠ñchara̍nta-ndra̠phsa-ñju̍hō̠myanu̍ sa̠pta hōtrā̎ḥ ॥
i̠magṃ sa̍mu̠dragṃ śa̠tadhā̍ra̠muthsa̍m ँvya̠chyamā̍na̠-mbhuva̍nasya̠ maddhyē̎ ।
ghṛ̠ta-nduhā̍nā̠madi̍ti̠-ñjanā̠yāgnē̠ mā higṃ̍sīḥ para̠mē vyō̍mann ॥ apē̍ta̠ vīta̠ vi cha̍ sarpa̠tātō̠ yē-'tra̠ stha pu̍rā̠ṇā yē cha̠ nūta̍nāḥ ।
ahō̍bhira̠dbhi-ra̠ktubhi̠-rvya̍ktam ँya̠mō da̍dā-tvava̠sāna̍masmai ॥ sa̠vi̠taitāni̠ śarī̍rāṇi pṛthi̠vyai mā̠turu̠pastha̠ āda̍dhē ।
tēbhi̍-ryujyantā-maghni̠yāḥ ॥ 14 ॥

śu̠nam ँvā̠hā-śśu̠na-nnā̠rā-śśu̠na-ṅkṛ̍ṣatu̠ lāṅga̍lam ।
śu̠nam ँva̍ra̠trā ba̍ddhyantāgṃ śu̠na-maṣṭrā̠-mudi̍ṅgaya̠ śunā̍sīrā śu̠nama̠smāsu̍ dhattam ॥
śunā̍sīrāvi̠mām ँvācha̠m ँya-ddi̠vi cha̍kra̠thuḥ paya̍ḥ । tēnē̠mā-mupa̍siñchatam ॥
sītē̠ vandā̍mahē tvā̠-'rvāchī̍ subhagē bhava ।
yathā̍ na-ssu̠bhagā sa̍si̠ yathā̍ na-ssu̠phalā sa̍si ॥
sa̠vi̠taitāni̠ śarī̍rāṇi pṛthi̠vyai mā̠turu̠pastha̠ āda̍dhē । tēbhi̍raditē̠ śa-mbha̍va ॥
vimu̍chyaddhva-maghni̠yā dē̍va̠yānā̠ atā̍riṣma̠ tama̍saspā̠rama̠sya ।
jyōti̍rāpāma̠ suva̍raganma ॥ 15 ॥

pra vātā̠ vānti̍ pa̠taya̍nti vi̠dyuta̠ udōṣa̍dhīrjihatē̠ pinva̍tē̠ suva̍ḥ । irā̠ viśva̍smai̠ bhuva̍nāya jāyatē̠ ya-tpa̠rjanya̍ḥ pṛthi̠vīgṃ rēta̠sā-'va̍ti ॥
yathā̍ ya̠māya̍ hā̠rmya-mava̍pa̠-npañcha̍māna̠vāḥ ।
ē̠vam ँva̍pāmi hā̠rmyam ँyathā-'sā̍ma jīvalō̠kē bhūra̍yaḥ ॥ chita̍-sstha pari̠chita̍ ūrdhva̠chita̍-śśrayaddhva-mpi̠tarō̍ dē̠vatā̎ ।
pra̠jāpa̍tirva-ssādayatu̠ tayā̍ dē̠vata̍yā ॥
ā pyā̍yasva̠ same̍tu tē vi̠śvata̍-ssōma̠ vṛṣṇi̍yam । bhavā̠ vāja̍sya saṅga̠thē ॥ sa-ntē̠ payāgṃ̍si̠ samu̍ yantu̠ vājā̠-ssaṃ vṛṣṇi̍yā-nyabhimāti̠ṣāha̍ḥ । ā̠pyāya̍mānō a̠mṛtā̍ya sōma di̠vi śravāg̍syutta̠māni̍ dhiṣva ॥ 16 ॥
(a̠ghni̠yā - a̍ganma - +sa̠pta cha̍) (a. 6)

anuvākaṃ 7
uttē̍ tabhnōmi pṛthi̠vī-ntvatparī̠mam ँlō̠ka-nni̠dadha̠nmō a̠hagṃ ri̍ṣam । ē̠tāg sthūṇā̎-mpi̠tarō̍ dhārayantu̠ tē-'trā̍ ya̠ma-ssāda̍nāttē minōtu ॥
upa̍sarpa mā̠tara̠-mbhūmi̍mē̠tā-mu̍ru̠vyacha̍sa-mpṛthi̠vīgṃ su̠śēvā̎m । ūrṇa̍mradā yuva̠ti-rdakṣi̍ṇāvatyē̠ṣā tvā̍ pātu̠ nir-ṛ̍tyā u̠pasthē̎ ॥
uchChma̍ñchasva pṛthivi̠ mā vibā̍dhithā-ssūpāya̠nā-'smai̍ bhava sūpavañcha̠nā । mā̠tā pu̠tram ँyathā̍ si̠chā-'bhyē̍na-mbhūmi vṛṇu ॥ u̠chChmañcha̍mānā pṛthi̠vī hi tiṣṭha̍si sa̠hasra̠mmita̠ upa̠ hi śraya̍ntām ।
tē gṛ̠hāsō̍ madhu̠śchutō̠ viśvāhā̎smai śara̠ṇā-ssa̠ntvatra̍ ॥ ēṇī̎rdhā̠nā hari̍ṇī̠rarju̍nī-ssantu dhē̠nava̍ḥ । tila̍vathsā̠ ūrja̍masmai̠ duhā̍nā̠ viśvāhā̍ sa̠ntvana̍pasphurantīḥ ॥ 17 ॥

ē̠ṣā tē̍ yama̠sāda̍nē sva̠dhā nidhī̍yatē gṛ̠hē । akṣi̍ti̠rnāma̍ tē asau ॥ i̠da-mpi̠tṛbhya̠ḥ prabha̍rēma ba̠r̠hi-rdē̠vēbhyō̠ jīva̍nta̠ utta̍ra-mbharēma ।
tattva̍mārō̠hāsō̠ mēghyō̠ bhava̍m ँya̠mēna̠ tvam ँya̠myā̍ saṃvidā̠naḥ ॥ mā tvā̍ vṛ̠kṣau sambā̍dhiṣṭā̠-mmā mā̠tā pṛ̍thivi̠ tvam ।
pi̠tṝn. hi yatra̠ gachChā̠syēdhā̍sam ँyama̠rājyē̎ ॥
mā tvā̍ vṛ̠kṣau sambā̍dhēthā̠-mmā mā̠tā pṛ̍thi̠vī ma̠hī । vai̠va̠sva̠tagṃ hi gachChā̍si yama̠rājyē̠ virā̍jasi ॥
na̠ḻa-mpla̠vamārō̍hai̠ta-nna̠ḻēna̍ pa̠thō-'nvi̍hi ।
sa tva̍-nna̠ḻapla̍vō bhū̠tvā̠ santa̍ra̠ prata̠rōtta̍ra ॥ 18 ॥

sa̠vi̠taitāni̠ śarī̍rāṇi pṛthi̠vyai mā̠turu̠pastha̠ āda̍dhē । tēbhya̍ḥ pṛthivi̠ śa-mbha̍va ॥
ṣaḍḍhō̍tā̠ sūrya̍-ntē̠ chakṣu̍-rgachChatu̠ vāta̍mā̠tmā dyā-ñcha̠ gachCha̍ pṛthi̠vī-ñcha̠ dharma̍ṇā ।
a̠pō vā̍ gachCha̠ yadi̠ tatra̍ tē hi̠tamōṣa̍dhīṣu̠ prati̍tiṣṭhā̠ śarī̍raiḥ ॥ para̍-mmṛtyō̠ anu̠ parē̍hi̠ panthā̠m ँyastē̠ sva ita̍rō dēva̠yānā̎t ।
chakṣu̍ṣmatē śṛṇva̠tē tē̎ bravīmi̠ mā na̍ḥ pra̠jāgṃ rī̍riṣō̠ mōta vī̠rān ॥
śam ँvāta̠-śśagṃ hi tē̠ ghṛṇi̠-śśamu̍ tē sa̠ntvōṣa̍dhīḥ । kalpa̍ntā-mmē̠ diśa̍-śśa̠gmāḥ ॥
pṛ̠thi̠vyāstvā̍ lō̠kē sā̍dayāmya̠muṣya̠ śarmā̍si pi̠tarō̍ dē̠vātā̎ । pra̠jāpa̍tistvā sādayatu̠ tayā̍ dē̠vata̍yā ॥ a̠ntari̍kṣasya tvā di̠vastvā̍ di̠śā-ntvā̠ nāka̍sya tvā pṛ̠ṣṭhē bra̠ddhnasya̍ tvā vi̠ṣṭapē̍ sādayāmya̠muṣya̠ śarmā̍si pi̠tarō̍ dē̠vatā̎ ।
pra̠jāpa̍tistvā sādayatu̠ tayā̍ dē̠vata̍yā ॥ 19 ॥
(ana̍pasphurantī̠ - rutta̍ra - dē̠vata̍yā̠ dvē cha̍) (a. 7)

anuvākaṃ 8
a̠pū̠pavā̎-nghṛ̠tavāg̍ścha̠rurēha sī̍datūttabhnu̠va-npṛ̍thi̠vī-ndyāmu̠tōpari̍ । yō̠ni̠kṛta̍ḥ pathi̠kṛta̍-ssaparyata̠ yē dē̠vānā̎-ṅghṛ̠tabhā̍gā i̠ha stha ।
ē̠ṣā tē yama̠sāda̍nē sva̠dhā nidhī̍yatē gṛ̠hē̍-'sau ।
daśā̎kṣarā̠ tāgṃ ra̍kṣasva̠ tā-ṅgō̍pāyasva̠ tā-ntē̠ pari̍ dadāmi̠ tasyā̎-ntvā̠ mā da̍bha-npi̠tarō̍ dē̠vatā̎ ।
pra̠jāpa̍tistvā sādayatu̠ tayā̍ dē̠vata̍yā ॥
a̠pū̠pavā̎-ñChṛ̠tavā̎n-kṣī̠ravā̠n-dadhi̍vā̠-nmadhu̍māg-ścha̠rurēha sī̍datūttabhnu̠van-pṛ̍thi̠vī-ndyāmu̠tōpari̍ । yō̠ni̠kṛta̍ḥ pathi̠kṛta̍-ssaparyata̠ yē dē̠vānāgṃ̍ śṛ̠tabhā̍gāḥ, kṣī̠rabhā̍gā̠ dadhi̍bhāgā̠ madhu̍bhāgā i̠ha stha । ē̠ṣā tē̍ yama̠sāda̍nē sva̠dhā nidhī̍yatē gṛ̠hē̍-'sau । śa̠tākṣa̍rā sa̠hasrā̎kṣarā̠-'yutā̎kṣa̠rā-'chyu̍tākṣarā̠ tāgṃ ra̍kṣasva̠ tā-ṅgō̍pāyasva̠ tā-ntē̠ pari̍dadāmi̠ tasyā̎-ntvā̠ mā da̍bha-npi̠tarō̍ dē̠vatā̎ । pra̠jāpa̍tistvā sādayatu̠ tayā̍ dē̠vata̍yā ॥ 20 ॥
(a̠pū̠pavā̍nasau̠ daśa̍) (a. 8)

anuvākaṃ 9
ē̠tāstē̎ sva̠dhā a̠mṛtā̎ḥ karōmi̠ yāstē̍ dhā̠nāḥ pa̍ri̠kirā̠myatra̍ । tāstē̍ ya̠maḥ pi̠tṛbhi̍-ssaṃvidā̠nō-'tra̍ dhē̠nūḥ kā̍ma̠dughā̎ḥ karōtu ॥
tvāmarju̠nauṣa̍dhīnā̠-mpayō̎ bra̠hmāṇa̠ idvi̍duḥ ।
tāsā̎-ntvā̠ maddhyā̠dāda̍dē cha̠rubhyō̠ api̍dhātavē ॥
dū̠rvāṇāg̍ sta̠mbamāha̍rai̠tā-mpri̠yata̍mā̠-mmama̍ । i̠mā-ndiśa̍-mmanu̠ṣyā̍ṇā̠-mbhūyi̠ṣṭhā-'nu̠ vi rō̍hatu ॥ kāśā̍nāg sta̠mbamāha̍ra̠ rakṣa̍sā̠mapa̍hatyai ।
ya ē̠tasyai̍ di̠śaḥ pa̠rābha̍vannaghā̠yavō̠ yathā̠ tē nābha̍vā̠-npuna̍ḥ ॥ da̠rbhāṇāg̍ sta̠mbamāha̍ra pitṛ̠ṇāmōṣa̍dhī-mpri̠yām । anvasyai̠ mūla̍-ñjīvā̠danu̠ kāṇḍa̠mathō̠ phala̎m ॥ 21 ॥

lō̠ka-mpṛ̍ṇa Chi̠dra-mpṛ̠ṇāthō̍ sīda śi̠vā tvam । i̠ndrā̠gnī tvā̠ bṛha̠spati̍ra̠smin yōnā̍vasīṣa̠dann ॥ tā a̍sya̠ sūda̍dōhasa̠-ssōmagg̍ śrīṇanti̠ pṛśna̍yaḥ । janma̍-ndē̠vānā̠ṃ viśa̍stri̠ṣvā rō̍cha̠nē di̠vaḥ ॥
śam ँvāta̠-śśagṃhi tē̠ ghṛṇi̠-śśamu̍ tē sa̠ntvōṣa̍dhīḥ । kalpa̍ntā-ntē̠ diśa̠-ssarvā̎ḥ ॥ i̠damē̠va mētō-'pa̍rā̠mārti̍mārāma̠ kāñcha̠na ।
tathā̠ tada̠śvibhyā̎-ṅkṛ̠ta-mmi̠trēṇa̠ varu̍ṇēna cha ॥
va̠ra̠ṇō vā̍rayādi̠da-ndē̠vō vana̠spati̍ḥ ।
ārtyai̠ nir-ṛ̍tyai̠ dvēṣā̎chcha̠ vana̠spati̍ḥ ॥
vidhṛ̍tirasi̠ vidhā̍rayā̠smada̠ghā dvēṣāgṃ̍si śa̠mi śa̠mayā̠smada̠ghā dvēṣāgṃ̍si ya̠va ya̠vayā̠smada̠ghā dvēṣāgṃ̍si ॥
pṛ̠thi̠vī-ṅga̍chChā̠ntari̍kṣa-ṅgachCha̠ diva̍-ṅgachCha̠ diśō̍ gachCha̠ suva̍rgachCha̠ suva̍rgachCha̠ diśō̍ gachCha̠ diva̍-ṅgachChā̠ntari̍kṣa-ṅgachCha pṛthi̠vī-ṅga̍chChā̠pō vā̍ gachCha̠ yadi̠ tatra̍ tē hi̠tamōṣa̍dhīṣu̠ prati̍tiṣṭhā̠ śarī̍raiḥ ॥ lō̠ka-mpṛ̍ṇa Chi̠dra-mpṛ̠ṇāthō̍ sīda śi̠vā tvam । i̠ndrā̠gnī tvā̠ bṛha̠spati̍ra̠smin yōnā̍vasīṣa̠dann ॥ tā a̍sya̠ sūda̍dōhasa̠-ssōmagg̍ śrīṇanti̠ pṛśna̍yaḥ । janma̍-ndē̠vānā̠ṃ viśa̍stri̠ṣvā rō̍cha̠nē di̠vaḥ ॥
aśma̍nvatī rēvatī̠-ssagṃ ra̍bhaddhva̠ mutti̍ṣṭhata̠ prata̍ratā sakhāyaḥ । atrā̍ jahāma̠ yē asa̠nnaśē̍vā-śśi̠vān va̠yama̠bhi vājā̠nutta̍rēma ॥ yadvai dē̠vasya̍ savi̠tuḥ pa̠vitragṃ̍ sa̠hasra̍dhāra̠m ँvita̍tama̠ntari̍kṣē । yēnāpu̍nā̠dindra̠manā̍rta̠-mārtyai̠ tēnā̠ha-mmāgṃ sa̠rvata̍nu-mpunāmi ॥
dhā̠tā yā rā̠ṣṭrā-tpa̠nnādapa̠ yanti̠ śākhā̍ a̠bhimṛ̍tā nṛ̠pati̍mi̠chChamā̍nāḥ । dhā̠tustā-ssarvā̠ḥ pava̍nēna pū̠tāḥ pra̠jayā̠-'smān-ra̠yyā varcha̍sā̠ sagṃsṛ̍jātha ॥( ) ॥ 22 ॥
(athō̠ phala̍m - dhā̠tā pu̍nātu) (a. 9)

anuvākaṃ 10
ārō̍ha̠tāyu̍-rja̠rasa̍-ṅgṛṇā̠nā a̍nupū̠rvam ँyata̍mānā̠ yati̠ṣṭa । i̠ha tvaṣṭā̍ su̠jani̍mā su̠ratnō̍ dī̠rghamāyu̍ḥ karatu jī̠vasē̍ vaḥ ॥
yathā-'hā̎nyanupū̠rva-mbhava̍nti̠ yatha̠rtava̍ ṛ̠tubhi̠-ryanti̍ klṛ̠ptāḥ । yathā̠ na pūrva̠mapa̍rō̠ jahā̎tyē̠vā dhā̍ta̠rāyūgṃ̍ṣi kalpayaiṣām ॥
na hi̍ tē agnē ta̠nuvai̎ krū̠ra-ñcha̠kāra̠ martya̍ḥ ।
ka̠pi-rba̍bhasti̠ tēja̍na̠-mpuna̍rja̠rāyu̠ gauri̍va ।
apa̍ na̠-śśōśu̍chada̠ghamagnē̍ śuśu̠ddhyā ra̠yim ।
apa̍ na̠-śśōśu̍chada̠gha-mmṛ̠tyavē̠ svāhā̎ ॥
a̠na̠ḍvāha̍-ma̠nvāra̍bhāmahē sva̠stayē̎ ।
sa na̠ indra̍ iva dē̠vēbhyō̠ vahni̍-ssa̠pāṃra̍ṇō bhava ॥ 23 ॥

i̠mē jī̠vā vi̍mṛ̠tairāva̍va-rti̠nnabhū̎-dbha̠drā dē̠vahū̍ti-nnō a̠dya । prāñjō̍-'gāmā nṛ̠tayē̠ hasā̍ya̠ drāghī̍ya̠ āyu̍ḥ prata̠rā-ndadhā̍nāḥ ॥
mṛ̠tyōḥ pa̠dam ँyōpaya̍ntō̠ yadaima̠ drāghī̍ya̠ āyu̍ḥ prata̠rā-ndadhā̍nāḥ । ā̠pyāya̍mānāḥ pra̠jayā̠ dhanē̍na śu̠ddhāḥ pū̠tā bha̍vatha yajñiyāsaḥ ॥
i̠ma-ñjī̠vēbhya̍ḥ pari̠dhi-nda̍dhāmi̠ mā nō nu̍ gā̠dapa̍rō̠ ardha̍mē̠tam ।
śa̠ta-ñjī̍vantu śa̠rada̍ḥ purū̠chīsti̠rō mṛ̠tyu-nda̍dmahē̠ parva̍tēna ॥ i̠mā nārī̍ravidha̠vā-ssu̠patnī̠rāñja̍nēna sa̠rpiṣā̠ sammṛ̍śantām ।
a̠na̠śravō̍ anamī̠vā-ssu̠śēvā̠ ārō̍hantu̠ jana̍yō̠ yōni̠magrē̎ ॥ yadāñja̍na-ntraikaku̠da-ñjā̠tagṃ hi̠mava̍ta̠spari̍ ।
tēnā̠mṛta̍sya̠ mūlē̠nārā̍tī-rjambhayāmasi ॥
yathā̠ tva-mu̍dbhi̠na-thsyō̍ṣadhē pṛthi̠vyā adhi̍ ।
ē̠vami̠ma udbhi̍ndantu kī̠rtyā yaśa̍sā brahmavarcha̠sēna̍ ॥ a̠jō̎-'syajā̠smada̠ghā dvēṣāgṃ̍si ya̠vō̍-'si ya̠vayā̠smada̠ghā dvēṣāgṃ̍si ॥ 24 ॥
(bha̠va̠ - ja̠mbha̠yā̠ma̠si̠ trīṇi̍ cha) (a. 10)

anuvākaṃ 11
apa̍ na̠-śśōśu̍chada̠ghamagnē̍ śuśu̠ddhyā ra̠yim । apa̍ na̠-śśōśu̍chada̠gham ॥ su̠kṣē̠tri̠yā su̍gātu̠yā va̍sū̠yā cha̍ yajāmahē । apa̍ na̠-śśōśu̍chada̠gham ॥
pra ya-dbhandi̍ṣṭha ēṣā̠-mprāsmākā̍saścha sū̠raya̍ḥ । apa̍ na̠-śśōśu̍chada̠gham ॥ prayada̠gnē-ssaha̍svatō vi̠śvatō̠ yanti̍ sū̠raya̍ḥ । apa̍ na̠-śśōśu̍chada̠gham ॥
prayattē̍ agnē sū̠rayō̠ jāyē̍mahi̠ pra tē̍ va̠yam ।
apa̍ na̠-śśōśu̍chada̠gham ॥ 25 ॥

tvagṃ hi vi̍śvatōmukha vi̠śvata̍ḥ pari̠bhūrasi̍ । apa̍ na̠-śśōśu̍chada̠gham ॥ dviṣō̍ nō viśvatōmu̠khāti̍ nā̠vēva̍ pāraya । apa̍ na̠-śśōśu̍chada̠gham ॥ sa na̠-ssindhu̍miva nā̠vayā-'ti̍ parṣā sva̠stayē̎ । apa̍ na̠-śśōśu̍chada̠gham ॥ āpa̍ḥ prava̠ṇādi̍va ya̠tī-rapā̠sma-thsya̍ndatāma̠gham । apa̍ na̠-śśōśu̍chada̠gham ॥ u̠dva̠nā-du̍da̠kānī̠vāpā̠sma-thsya̍ndatāma̠gham ।
apa̍ na̠-śśōśu̍chada̠gham ॥ ā̠na̠ndāya̍ pramō̠dāya̠ puna̠rāgā̠g̠ svāngṛ̠hān । apa̍ na̠-śśōśu̍chada̠gham ॥ na vai tatra̠ pramī̍yatē̠ gauraśva̠ḥ puru̍ṣaḥ pa̠śuḥ ।
yatrē̠da-mbrahma̍ kri̠yatē̍ pari̠dhirjīva̍nāya̠ kamapa̍ na̠-śśōśu̍chada̠gham ॥ 26 ॥
(a̠gha - ma̠gha-ñcha̠tvāri̍ cha) (a. 11)

anuvākaṃ 12
apa̍śyāma yuva̠ti-mā̠chara̍ntī-mmṛ̠tāya̍ jī̠vā-mpa̍riṇī̠yamā̍nām । a̠ndhēna̠ yā tama̍sā̠ prāvṛ̍tā-'si̠ prāchī̠mavā̍chī̠-mava̠ya-nnari̍ṣṭyai ॥
mayai̠tā-mmā̠g̠stā-mbhri̠yamā̍ṇā dē̠vī sa̠tī pi̍tṛlō̠kam ँyadaiṣi̍ । vi̠śvavā̍rā̠ nabha̍sā̠ saṃvya̍yantyu̠bhau nō̍ lō̠kau paya̠sā-''vṛ̍ṇīhi ॥
rayi̍ṣṭhāma̠gni-mmadhu̍mantamū̠rmiṇa̠mūrja̍-ssanta-ntvā̠ paya̠sōpa̠ sagṃsa̍dēma ।
sagṃ ra̠yyā samu̠ varcha̍sā̠ sacha̍svā na-ssva̠stayē̎ ॥
yē jī̠vā yē cha̍ mṛ̠tā yē jā̠tā yē cha̠ jantyā̎ḥ ।
tēbhyō̍ ghṛ̠tasya̍ dhārayitu̠-mmadhu̍dhārā vyunda̠tī ॥
mā̠tā ru̠drāṇā̎-nduhi̠tā vasū̍nā̠g̠ svasā̍-''di̠tyānā̍ma̠-mṛta̍sya̠ nābhi̍ḥ ।
praṇu̠vōcha̍-ñchiki̠tuṣē̠ janā̍ya̠ mā gāmanā̍gā̠madi̍tim ँvadhiṣṭa ॥
piba̍tūda̠ka-ntṛṇā̎nyattu । ōmu-thsṛ̠jata ॥ 27 ॥
(va̠dhi̠ṣṭa̠ dvē cha̍) (a. 12)

(pa̠rē̠yu̠vāgṃsa̠-mpra vi̠dvā-nbhuva̍nasyā̠bhyāva̍ vṛthsvā̠ jō bhā̠gō̍-'yam ँvai chatuśchatvārigṃśat ।
ya ē̠tasya̠ tva-tpañcha̍ । prakē̠tunē̠dantē̠ nākē̍ supa̠rṇam ँyau tē̠ yē yuddhya̍ntē̠ tapa̠sā-'śma̍nvatī rēvatī̠-ssagṃra̍bhaddhvama̠ṣṭāvigṃ̍śatiḥ । ya-ntē̠ yatta̠ uttiṣṭhā̠ta̍ i̠danta̠ utti̍ṣṭha̠
prēhyaśma̠n̠. yadvā udva̠yama̠ya-mpañcha̍vigṃśatiḥ । āyā̍tu tri̠gṃ̠śat । vai̠śvā̠na̠rē tasmi̍-ndra̠phsa i̠mamapē̠tāhō̍bhi-ryujyantāmaghni̠yā a̍ditē pā̠ram ँva̠ ā pyā̍yasva sa̠ptavigṃ̍śatiḥ । uttē̍ gṛhē-'khāṣi̍ti̠stēbhya̍ḥ pṛ̍thi̠vyā a̠ntari̍kṣasya̠ dvātrigṃ̍śat । a̠pū̠pavā̍nasau̠ daśa̍ śa̠ta da̍śa । ē̠tāstē̍ tē̠ diśa̠-ssarvā̍ i̠damaśma̍n vigṃśa̠tiḥ । ō̍rōhata ta̠nuvai̎ krū̠ra-ñcha̠kāra̠ puna̍rmṛ̠tyavē̠ mā nō nu̍ gā-ddadmaha i̠mā nārī̠ḥ pari̠ trayō̍vigṃśatiḥ ।
apa̍ na-ssukṣētri̠yā pra yadbha-ndi̍ṣṭha̠ḥ pra yada̠gnēḥ pra yattē̍ agnē̠ tvagṃ hi dviṣa̠-ssa na̠-ssindhu̠māpa̍ḥ prava̠ṇādu̍-dva̠nādā̍na̠ndāya̠ na vai tatra̠ yatrē̠da-ñchatu̍rvigṃśati̠ḥ । apa̍śyā̠māvṛ̍ṇīhi̠ dvāda̍śa dvādaśa ।)

(pa̠rē̠yu̠vāgṃsa̠ - māyā̎ - tvē̠tāstē̍ sa̠ptavigṃ̍śatiḥ )

(pa̠rē̠yu̠vāgṃsa̠ - mōmuthsṛ̠jata )

॥ hari̍ḥ ōm ॥

॥ kṛṣṇa yajurvēdīya taittirīya āraṇyakē ṣaṣṭhaḥ prapāṭhaka-ssamāptaḥ ॥

Browse Related Categories: