kṛṣṇa yajurvēdīya taittirīya brāhmaṇē dvitīyāṣṭakē chaturthaḥ prapāṭhakaḥ - upahōmāḥ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 - upahōmāḥ
juṣṭō̠ damū̍nā̠ ati̍thirdurō̠ṇē । i̠ma-nnō̍ ya̠jñamupa̍ yāhi vi̠dvān । viśvā̍ agnē-'bhi̠ yujō̍ vi̠hatya̍ । śa̠trū̠ya̠tāmābha̍rā̠ bhōja̍nāni ॥ agnē̠ śardha̍ maha̠tē saubha̍gāya । tava̍ dyu̠mnānyu̍tta̠māni̍ santu । sa-ñjā̎spa̠tyagṃ su̠yama̠mā kṛ̍ṇuṣva । śa̠trū̠ya̠tāma̠bhiti̍ṣṭhā̠ mahāgṃ̍si ॥ agnē̠ yō nō̠-'bhitō̠ jana̍ḥ । vṛkō̠ vārō̠ jighāgṃ̍sati ॥ 1 ॥

tāg​stvaṃ vṛ̍trahañjahi । vasva̠smabhya̠-mābha̍ra ॥ agnē̠ yō nō̍-'bhi̠dāsa̍ti । sa̠mā̠nō yaścha̠ niṣṭya̍ḥ । i̠ddhmasyē̍va pra̠kṣāya̍taḥ । mā tasyōchChē̍ṣi̠ kiñcha̠na ॥ tvami̍ndrābhi̠bhūra̍si । dē̠vō vijñā̍tavīryaḥ । vṛ̠tra̠hā pu̍ru̠chēta̍naḥ ॥ apa̠ prācha̍ indra̠ viśvāgṃ̍ a̠mitrān̍ ॥ 2 ॥

apāpā̍chō abhibhūtē nudasva । apōdī̍chō̠ apa̍ śūradha̠rācha̍ ū̠rau । yathā̠ tava̠ śarma̠nmadē̍ma ॥ tamindra̍ṃ vājayāmasi । ma̠hē vṛ̠trāya̠ hanta̍vē । sa vṛṣā̍ vṛṣa̠bhō bhu̍vat ॥ yu̠jē ratha̍-ṅga̠vēṣa̍ṇa̠gṃ̠ hari̍bhyām । upa̠ brahmā̍ṇi jujuṣā̠ṇa-ma̍sthuḥ । vibā̍dhiṣṭā̠sya rōda̍sī mahi̠tvā । indrō̍ vṛ̠trāṇya̍pra̠tī ja̍gha̠nvān ॥ 3 ॥

ha̠vya̠vāha̍-mabhimāti̠ṣā-'ha̎m । ra̠kṣō̠haṇa̠-mpṛta̍nāsu ji̠ṣṇum । jyōti̍ṣmanta̠-ndīdya̍ta̠-mpura̍ndhim । a̠gnigg​ svi̍ṣṭa̠kṛta̠mā hu̍vēma ॥ svi̍ṣṭamagnē a̠bhi ta-tpṛ̍ṇāhi । viśvā̍ dēva̠ pṛta̍nā a̠bhiṣya । u̠ru-nna̠ḥ panthā̎-mpradi̠śanvi bhā̍hi । jyōti̍ṣmaddhēhya̠jara̍-nna̠ āyu̍ḥ ॥ tvāma̍gnē ha̠viṣma̍ntaḥ । dē̠va-mmartā̍sa īḍatē ॥ 4 ॥

manyē̎ tvā jā̠tavē̍dasam । sa ha̠vyā va̍kṣyā-'nu̠ṣak ॥ viśvā̍ni nō du̠rgahā̍ jātavēdaḥ । sindhu̠-nna nā̠vā du̍ri̠tā-'ti̍par​ṣi । agnē̍ atri̠va-nmana̍sā gṛṇā̠naḥ । a̠smāka̍-mbōddhyavi̠tā ta̠nūnā̎m ॥ pū̠ṣā gā anvē̍tu naḥ । pū̠ṣā ra̍kṣa̠tvarva̍taḥ । pū̠ṣā vājagṃ̍ sanōtu naḥ ॥ pū̠ṣēmā āśā̠ anu̍vēda̠ sarvā̎ḥ ॥ 5 ॥

sō a̠smāgṃ abha̍yatamēna nēṣat । sva̠sti̠dā aghṛ̍ṇi̠-ssarva̍vīraḥ । apra̍yuchCha-npu̠ra ē̍tu̠ prajā̠nann ॥ tvama̍gnē sa̠prathā̍ asi । juṣṭō̠ hōtā̠ varē̎ṇyaḥ । tvayā̍ ya̠jñaṃ vita̍nvatē ॥ a̠gnī rakṣāgṃ̍si sēdhati । śu̠kraśō̍chi̠rama̍rtyaḥ । śuchi̍ḥ pāva̠ka īḍya̍ḥ ॥ agnē̠ rakṣā̍ṇō̠ agṃha̍saḥ ॥ 6 ॥

prati̍ṣma dēva̠ rīṣa̍taḥ । tapi̍ṣṭhaira̠jarō̍ daha ॥ agnē̠ hagṃsi̠ nya̍triṇa̎m । dīdya̠-nmartyē̠ṣvā । svē kṣayē̍ śuchivrata ॥ ā vā̍ta vāhi bhēṣa̠jam । vi vā̍ta vāhi̠ yadrapa̍ḥ । tvagṃhi vi̠śva bhē̍ṣajaḥ । dē̠vānā̎-ndū̠ta īya̍sē ॥ dvāvi̠mau vātā̍ vātaḥ ॥ 7 ॥

ā sindhō̠rā pa̍rā̠vata̍ḥ । dakṣa̍-mmē a̠nya ā̠vātu̍ । parā̠-'nyō vā̍tu̠ yadrapa̍ḥ ॥ yada̠dō vā̍ta tē gṛ̠hē । a̠mṛta̍sya ni̠dhir​hi̠taḥ । tatō̍ nō dēhi jī̠vasē̎ । tatō̍ nō dhēhi bhēṣa̠jam । tatō̍ nō̠ maha̠ āva̍ha ॥ vāta̠ āvā̍tu bhēṣa̠jam । śa̠mbhū-rma̍yō̠ bhūrnō̍ hṛ̠dē ॥ 8 ॥

praṇa̠ āyūgṃ̍ṣi tāriṣat ॥ tvama̍gnē a̠yā-'si̍ । a̠yā sanmana̍sā hi̠taḥ । a̠yā san.ha̠vyamū̍hiṣē । a̠yā nō̍ dhēhi bhēṣa̠jam ॥ i̠ṣṭō a̠gnirāhu̍taḥ । svāhā̍kṛtaḥ pipartu naḥ । sva̠gā dē̠vēbhya̍ i̠da-nnama̍ḥ ॥ kāmō̍ bhū̠tasya̠ bhavya̍sya । sa̠mrāḍēkō̠ virā̍jati ॥ 9 ॥

sa i̠da-mprati̍ paprathē । ṛ̠tūnu-thsṛ̍jatē va̠śī ॥ kāma̠stadagrē̠ sama̍varta̠tādhi̍ । mana̍sō̠ rēta̍ḥ pratha̠maṃ yadāsī̎t । sa̠tō bandhu̠masa̍ti̠ nira̍vindann । hṛ̠di pra̠tīṣyā̍ ka̠vayō̍ manī̠ṣā ॥ tvayā̍ manyō sa̠ratha̍-māru̠janta̍ḥ । har​ṣa̍māṇāsō dhṛṣa̠tā ma̍rutvaḥ । ti̠gmēṣa̍va̠ āyu̍dhā sa̠gṃ̠śiśā̍nāḥ । upa̠praya̍nti̠ narō̍ a̠gnirū̍pāḥ ॥ 10 ॥

ma̠nyurbhagō̍ ma̠nyurē̠vāsa̍ dē̠vaḥ । ma̠nyur-hōtā̠ varu̍ṇō vi̠śvavē̍dāḥ । ma̠nyuṃ viśa̍ īḍatē dēva̠yantī̎ḥ । pā̠hi nō̍ manyō̠ tapa̍sā̠ śramē̍ṇa ॥ tvama̍gnē vrata̠bhṛchChuchi̍ḥ । dē̠vāgṃ āsā̍dayā i̠ha । agnē̍ ha̠vyāya̠ vōḍha̍vē ॥ vra̠tā nu bibhra̍dvrata̠pā adā̎bhyaḥ । yajā̍ nō dē̠vāgṃ a̠jara̍-ssu̠vīra̍ḥ । dadha̠-dratnā̍ni suvidā̠nō a̍gnē । gō̠pā̠ya nō̍ jī̠vasē̍ jātavēdaḥ ॥ 11 ॥
(jighāgṃ̍sa - tya̠mitrā̎ - ñjagha̠nvā - nī̍ḍatē̠ - sarvā̠ - agṃha̍sō - vātō - hṛ̠dē - rā̍ja - tya̠gnirū̍pāḥ - suvidā̠nō a̍gna̠ ēka̍-ñcha ) (a. 1)

anuvākaṃ 2 - upahōmāḥ
chakṣu̍ṣō hētē̠ mana̍sō hētē । vāchō̍ hētē̠ brahma̍ṇō hētē । yō mā̍-'ghā̠yu-ra̍bhi̠dāsa̍ti । tama̍gnē mē̠nyā-'mē̠ni-ṅkṛ̍ṇu ॥ yō mā̠ chakṣu̍ṣā̠ yō mana̍sā । yō vā̠chā brahma̍ṇā 'ghā̠yu-ra̍bhi̠dāsa̍ti । tayā̎-'gnē̠ tva-mmē̠nyā । a̠muma̍mē̠ni-ṅkṛ̍ṇu ॥ ya-tkiñchā̠sau mana̍sā̠ yachcha̍ vā̠chā । ya̠jñai-rju̠hōti̠ yaju̍ṣā ha̠virbhi̍ḥ ॥ 12 ॥

ta-nmṛ̠tyu-rnir-ṛ̍tyā saṃvidā̠naḥ । pu̠rā-''di̠ṣṭādāhu̍tīrasya hantu ॥ yā̠tu̠dhānā̠ nir-ṛ̍ti̠rādu̠ rakṣa̍ḥ । tē a̍syaghna̠-ntvanṛ̍tēna sa̠tyam । indrē̍ṣitā̠ ājya̍masya mathnantu । māta-thsamṛ̍ddhi̠ yada̠sau ka̠rōti̍ ॥ hanmi̍ tē̠-'ha-ṅkṛ̠tagṃ ha̠viḥ । yō mē̍ ghō̠ramachī̍ kṛtaḥ । apā̎mchau ta u̠bhau bā̠hū । apa̍nahyāmyā̠sya̎m ॥ 13 ॥

apa̍nahyāmi tē bā̠hū । apa̍nahyāmyā̠sya̎m । a̠gnē-rdē̠vasya̠ brahma̍ṇā । sarva̍-ntē-'vadhiṣa-ṅkṛ̠tam ॥ pu̠rā 'muṣya̍ vaṣaṭkā̠rāt । ya̠jña-ndē̠vēṣu̍ naskṛdhi । svi̍ṣṭama̠smāka̍-mbhūyāt । mā-'smā-nprāpa̠-nnarā̍tayaḥ ॥ anti̍ dū̠rē sa̠tō a̍gnē । bhrātṛ̍vyasyā 'bhi̠dāsa̍taḥ ॥ 14 ॥

va̠ṣa̠ṭkā̠rēṇa̠ vajrē̍ṇa । kṛ̠tyāgṃ ha̍nmi kṛ̠tāma̠ham ॥ yō mā̠ nakta̠-ndivā̍ sā̠yam । prā̠taśchāhnō̍ ni̠pīya̍ti । a̠dyā tami̍ndra̠ vajrē̍ṇa । bhrātṛ̍vya-mpādayāmasi ॥ indra̍sya gṛ̠hō̍-'si̠ ta-ntvā̎ । prapa̍dyē̠ sagu̠-ssāśva̍ḥ । sa̠ha yanmē̠ asti̠ tēna̍ ॥ īḍē̍ a̠gniṃ vi̍pa̠śchita̎m ॥ 15 ॥

gi̠rā ya̠jñasya̠ sādha̍nam । śru̠ṣṭī̠vāna̍-ndhi̠tāvā̍nam ॥ agnē̍ śa̠kēma̍ tē va̠yam । yama̍-ndē̠vasya̍ vā̠jina̍ḥ । ati̠ dvēṣāgṃ̍si tarēma ॥ ava̍ta-mmā̠ sama̍nasau̠ samō̍kasau । sachē̍tasau̠ sarē̍tasau । u̠bhau māma̍vata-ñjātavēdasau । śi̠vau bha̍vatama̠dya na̍ḥ ॥ sva̠ya-ṅkṛ̍ṇvā̠na-ssu̠gamapra̍yāvam ॥ 16 ॥

ti̠gmaśṛ̍ṅgō vṛṣa̠bha-śśōśu̍chānaḥ । pra̠tnagṃ sa̠dhastha̠-manu̠paśya̍mānaḥ । ā tantu̍ma̠gni-rdi̠vya-nta̍tāna ॥ tva-nna̠stantu̍ru̠ta sētu̍ragnē । tva-mpanthā̍ bhavasi dēva̠yāna̍ḥ । tvayā̎ 'gnē pṛ̠ṣṭhaṃ va̠yamāru̍hēma । athā̍ dē̠vai-ssa̍dha̠māda̍-mmadēma ॥ udu̍tta̠ma-mmu̍mugdhi naḥ । vi pāśa̍-mmaddhya̠ma-ñchṛ̍ta । avā̍dha̠māni̍ jī̠vasē̎ ॥ 17 ॥

va̠yagṃ sō̍ma vra̠tē tava̍ । mana̍sta̠nūṣu̠ bibhra̍taḥ । pra̠jā va̍ntō aśīmahi ॥ i̠ndrā̠ṇī dē̠vī su̠bhagā̍ su̠patnī̎ । udagṃśē̍na pati̠vidyē̍ jigāya । tri̠gṃ̠śada̍syā ja̠ghana̠ṃ yōja̍nāni । u̠pastha̠ indra̠gg̠ sthavi̍ra-mbibharti ॥ sēnā̍ ha̠ nāma̍ pṛthi̠vī dha̍nañja̠yā । vi̠śvavya̍chā̠ adi̍ti̠-ssūrya̍tvak । i̠ndrā̠ṇī dē̠vī prā̠sahā̠ dadā̍nā ॥ 18 ॥

sā nō̍ dē̠vī su̠havā̠ śarma̍ yachChatu ॥ ā tvā̍ 'hār​ṣama̠ntara̍bhūḥ । dhru̠vasti̠ṣṭhāvi̍chāchaliḥ । viśa̍stvā̠ sarvā̍ vāñChantu । mā tva-drā̠ṣṭra-madhi̍bhraśat ॥ dhru̠vā dyau-rdhru̠vā pṛ̍thi̠vī । dhru̠vaṃ viśva̍mi̠da-ñjaga̍t । dhru̠vā ha̠ parva̍tā i̠mē । dhru̠vō rājā̍ vi̠śāma̠yam ॥ i̠haivaidhi̠ mā vya̍thiṣṭhāḥ ॥ 19 ॥

parva̍ta i̠vā vi̍chāchaliḥ । indra̍ ivē̠ha dhru̠vasti̍ṣṭha । i̠ha rā̠ṣṭra-mu̍dhāraya ॥ a̠bhiti̍ṣṭha pṛtanya̠taḥ । adha̍rē santu̠ śatra̍vaḥ । indra̍ iva vṛtra̠hāti̍ṣṭha । a̠paḥ, kṣētrā̍ṇi sa̠jaṃyann̍ ॥ indra̍ ēṇamadīdharat । dhru̠va-ndhru̠vēṇa̍ ha̠viṣā̎ । tasmai̍ dē̠vā adhi̍bravann । a̠ya-ñcha̠ brahma̍ṇa̠spati̍ḥ ॥ 20 ॥
(ha̠virbhi̍ - rā̠sya̍ - mabhi̠ dāsa̍tō - vipa̠śchita̠ - mapra̍yāvaṃ - jī̠vasē̠ - dadā̍nā - vyathiṣṭhā - brava̠nnēka̍-ñcha) (a. 2)

anuvākaṃ 3 - upahōmāḥ
juṣṭī̍ narō̠ brahma̍ṇā vaḥ pitṛ̠ṇām । akṣa̍mavyaya̠-nna kilā̍ riṣātha । yachChakva̍rīṣu bṛha̠tā ravē̍ṇa । indrē̠ śuṣma̠mada̍dhāthā vasiṣṭhāḥ ॥ pā̠va̠kā na̠-ssara̍svatī । vājē̍bhi-rvā̠jinī̍vatī । ya̠jñaṃ va̍ṣṭu dhi̠yā va̍suḥ ॥ sara̍svatya̠bhi nō̍ nēṣi̠ vasya̍ḥ । mā pa̍spharī̠ḥ paya̍sā̠ mā na̠ ā dha̍k । ju̠ṣasva̍ na-ssa̠khyā̍ vē̠śyā̍ cha ॥ 21 ॥

mā tvatkṣētrā̠-ṇyara̍ṇāni ganma ॥ vṛ̠ñjē ha̠virnama̍sā ba̠r̠hira̠gnau । ayā̍mi̠ srug ghṛ̠tava̍tī suvṛ̠ktiḥ । amya̍kṣi̠ sadma̠ sada̍nē pṛthi̠vyāḥ । aśrā̍yi ya̠jña-ssūryē̠ na chakṣu̍ḥ ॥ i̠hārvāñcha̠mati̍hvayē । indra̠-ñjaitrā̍ya̠ jēta̍vē । a̠smāka̍mastu̠ kēva̍laḥ ॥ a̠rvāñcha̠mindra̍ma̠mutō̍ havāmahē । yō gō̠ji-ddha̍na̠ji-da̍śva̠jidyaḥ ॥ 22 ॥

i̠ma-nnō̍ ya̠jñaṃ vi̍ha̠vē ju̍ṣasva । a̠sya ku̍rmō harivō mē̠dina̍-ntvā ॥ asa̍mṛṃṣṭō jāyasē mātṛ̠vō-śśuchi̍ḥ । ma̠ndraḥ ka̠viruda̍tiṣṭhō̠ viva̍svataḥ । ghṛ̠tēna̍ tvā 'vardhayannagna āhuta । dhū̠mastē̍ kē̠tura̍bhava-ddi̠vi śri̠taḥ ॥ a̠gniragrē̎ pratha̠mō dē̠vatā̍nām । saṃyā̍tānā-mutta̠mō viṣṇu̍rāsīt । yaja̍mānāya pari̠gṛhya̍ dē̠vān । dī̠kṣayē̠dagṃ ha̠virāga̍chChata-nnaḥ ॥ 23 ॥

a̠gniścha̍ viṣṇō̠ tapa̍ utta̠ma-mma̠haḥ । dī̠kṣā̠pā̠lēbhyō̠ vana̍ta̠gṃ̠ hi śa̍krā । viśvai̎-rdē̠vai-rya̠jñiyai̎-ssaṃvidā̠nau । dī̠kṣāma̠smai yaja̍mānāya dhattam ॥ prata-dviṣṇu̍-sstavatē vī̠ryā̍ya । mṛ̠gō na bhī̠maḥ ku̍cha̠rō gi̍ri̠ṣṭhāḥ । yasyō̠ruṣu̍ tri̠ṣu vi̠krama̍ṇēṣu । adhi̍kṣi̠yanti̠ bhuva̍nāni̠ viśvā̎ ॥ nū martō̍ dayatē sani̠ṣyan. yaḥ । viṣṇa̍va urugā̠yāya̠ dāśa̍t ॥ 24 ॥

pra ya-ssa̠trāchā̠ mana̍sā̠ yajā̍ tai । ē̠tāva̍nta̠-nnarya̍mā̠vivā̍sāt ॥ vicha̍kramē pṛthi̠vīmē̠ṣa ē̠tām । kṣētrā̍ya̠ viṣṇu̠-rmanu̍ṣē daśa̠syann । dhru̠vāsō̍ asya kī̠rayō̠ janā̍saḥ । u̠ru̠kṣi̠tigṃ su̠jani̍mā chakāra ॥ trirdē̠vaḥ pṛ̍thi̠vīmē̠ṣa ē̠tām । vicha̍kramē śa̠tarcha̍sa-mmahi̠tvā । pra viṣṇu̍-rastu ta̠vasa̠sta vī̍yān । tvē̠ṣagg​ hya̍sya̠ sthavi̍rasya̠ nāma̍ ॥ 25 ॥

hōtā̍ra-ñchi̠trara̍tha-maddhva̠rasya̍ । ya̠jñasya̍ yajñasya kē̠tugṃ ruśa̍ntam । pratya̍rdhi-ndē̠vasya̍ dēvasya ma̠hnā । śri̠yā tva̍-'gnimati̍thi̠-ñjanā̍nām ॥ ā nō̠ viśvā̍bhirū̠tibhi̍-ssa̠jōṣā̎ḥ । brahma̍ juṣā̠ṇō ha̍ryaśva yāhi । varī̍vṛja̠-thsthavi̍rēbhi-ssuśipra । a̠smē dadha̠-dvṛṣa̍ṇa̠gṃ̠ śuṣma̍mindra ॥ indra̍-ssuva̠r̠ṣā ja̠naya̠nnahā̍ni । ji̠gāyō̠śigbhi̠ḥ pṛta̍nā abhi̠śrīḥ ॥ 26 ॥

prārō̍chaya̠nmana̍vē kē̠tumahnā̎m । avi̍nda̠jjyōti̍-rbṛha̠tē raṇā̍ya ॥ aśvi̍nā̠vava̍sē̠ nihva̍yē vām । ā nū̠naṃ yā̍tagṃ sukṛ̠tāya̍ viprā । prā̠ta̠ryu̠ktēna̍ su̠vṛtā̠ rathē̍na । u̠pāga̍chChata̠mava̠sā ''ga̍ta-nnaḥ ॥ a̠vi̠ṣṭa-ndhī̠ṣvaśvi̍nā na ā̠su । pra̠jāva̠-drētō̠ ahra̍ya-nnō astu । āvā̎-ntō̠kē tana̍yē̠ tūtu̍jānāḥ । su̠ratnā̍sō dē̠vavī̍ti-ṅgamēma ॥ 27 ॥

tvagṃ sō̍ma̠ kratu̍bhi-ssu̠kratu̍rbhūḥ । tva-ndakṣai̎-ssu̠dakṣō̍ vi̠śvavē̍dāḥ । tvaṃ vṛṣā̍ vṛṣa̠tvēbhi̍-rmahi̠tvā । dyu̠mnēbhi̍-rdyu̠mnya̍bhavō nṛ̠chakṣā̎ḥ ॥ aṣā̍ḍhaṃ yu̠thsu pṛta̍nāsu̠ papri̎m । su̠va̠ra̠.ṣāma̠phsvāṃ vṛ̠jana̍sya gō̠pām । bha̠rē̠ṣu̠jāgṃ su̍kṣi̠tigṃ su̠śrava̍sam । jaya̍nta̠-ntvāmanu̍ madēma sōma ॥ bhavā̍ mi̠trō na śēvyō̍ ghṛ̠tāsu̍tiḥ । vibhū̍tadyumna ēva̠yā u̍ sa̠prathā̎ḥ ॥ 28 ॥

adhā̍ tē viṣṇō vi̠duṣā̍chi̠dṛdhya̍ḥ । stōmō̍ ya̠jñasya̠ rāddhyō̍ ha̠viṣma̍taḥ ॥ yaḥ pū̠rvyāya̍ vē̠dhasē̠ navī̍yasē । su̠majjā̍nayē̠ viṣṇa̍vē̠ dadā̍śati । yō jā̠tama̠sya ma̍ha̠tō ma̠hi bravā̎t । sēdu̠-śśravō̍bhi-ryu̠jya̍-ñchida̠bhya̍sat ॥ tamu̍ stōtāraḥ pū̠rvyaṃ yathā̍ vi̠da ṛ̠tasya̍ । garbhagṃ̍ ha̠viṣā̍ pipartana । ā-'sya̍ jā̠nantō̠ nāma̍ chidvivaktana । bṛ̠hattē̍ viṣṇō suma̠ti-mbha̍jāmahē ॥ 29 ॥

i̠mā dhā̠nā ghṛ̍ta̠snuva̍ḥ । harī̍ i̠hōpa̍vakṣataḥ । indragṃ̍ su̠khata̍mē̠ rathē̎ ॥ ē̠ṣa bra̠hmā ya ṛ̠tviya̍ḥ । indrō̠ nāma̍ śru̠tō ga̠ṇē ॥, pra tē̍ ma̠hē । vi̠dathē̍ śa̠gṃsiṣa̠gṃ̠ harī̎ । ya ṛ̠tviya̠ḥ pra tē̍ vanvē । va̠nuṣō̍ harya̠ta-mmada̎m । indrō̠ nāma̍ ghṛ̠ta-nna yaḥ । hari̍bhi̠śchāru̠ sēcha̍tē । śru̠tō ga̠ṇa ā tvā̍ viśantu ॥ 30 ॥

hari̍varpasa̠-ṅgira̍ḥ ॥ ācha̍r​ṣaṇi̠prā vṛ̍ṣa̠bhō janā̍nām । rājā̍ kṛṣṭī̠nā-mpu̍ruhū̠ta indra̍ḥ । stu̠ta-śśra̍va̠syannava̠sōpa̍ma̠drik । yu̠ktvā harī̠ vṛṣa̠ṇā ''yā̎hya̠rvām ॥ pra ya-thsindha̍vaḥ prasa̠vaṃ yadāyann̍ । āpa̍-ssamu̠dragṃ ra̠tthyē̍va jagmuḥ । ata̍śchi̠dindra̠-ssada̍sō̠ varī̍yān । yadī̠gṃ̠ sōma̍ḥ pṛ̠ṇāti̍ du̠gdhō a̠gṃ̠śuḥ ॥ hvayā̍masi̠ tvēndra̍ yā̠hya̍rvām ॥ 31 ॥

ara̍-ntē̠ sōma̍sta̠nuvē̍ bhavāti । śata̍kratō mā̠daya̍svā su̠tēṣu̍ । prāsmāgṃ a̍va̠ pṛta̍nāsu̠ pra yu̠thsu ॥ indrā̍ya̠ sōmā̎ḥ pra̠divō̠ vidā̍nāḥ । ṛ̠bhu-ryēbhi̠-rvṛṣa̍parvā̠-vihā̍yāḥ । pra̠ya̠myamā̍ṇā̠-nprati̠ ṣūgṛ̍bhāya । indra̠ piba̠ vṛṣa̍dhūtasya̠ vṛṣṇa̍ḥ ॥ ahē̍ḍamāna̠ upa̍yāhi ya̠jñam । tubhya̍-mpavanta̠ inda̍va-ssu̠tāsa̍ḥ । gāvō̠ na va̍jrin-thsva̠mōkō̠ achCha̍ ॥ 32 ॥

indrāga̍hi pratha̠mō yajñiyā̍nām ॥ yā tē̍ kā̠ku-thsukṛ̍tā̠ yā vari̍ṣṭhā । yayā̠ śaśva̠tpiba̍si̠ maddhva̍ ū̠rmim । tayā̍ pāhi̠ pra tē̍ addhva̠ryura̍sthāt । sa-ntē̠ vajrō̍ vartatāmindra ga̠vyuḥ ॥ prā̠ta̠ryujā̠ vibō̍dhaya । aśvi̍nā̠vēha ga̍chChatam । a̠sya sōma̍sya pī̠tayē̎ ॥ prā̠ta̠ryāvā̍ṇā pratha̠mā ya̍jaddhvam । pu̠rā gṛddhrā̠dara̍ruṣaḥ pibāthaḥ । prā̠tar​hi ya̠jñama̠śvinā̠ dadhā̍tē । praśagṃ̍ santi ka̠vaya̍ḥ pūrva̠bhāja̍ḥ ॥ prā̠tarya̍jaddhvama̠śvinā̍ hinōta । na sā̠yama̍sti dēva̠yā aju̍ṣṭam । u̠tānyō a̠sma-dya̍jatē̠ vichā̍yaḥ । pūrva̍ḥ pūrvō̠ yaja̍mānō̠ vanī̍yān ॥ 33 ॥
(chā̠ - śva̠jidyō-ga̍chChata-nnō̠ - dāśa̠n - nāmā̍ - bhi̠śrī--r ga̍mēma - sa̠prathā̍ - bhajāmahē - viśantu - yā̠hya̍rvāṃ - chCha̍ - pibātha̠-ṣṣaṭcha̍) (a. 3)

anuvākaṃ 4 - upahōmāḥ
na̠kta̠-ñjā̠tā-'syō̍ṣadhē । rāmē̠ kṛṣṇē̠ asi̍kni cha । i̠dagṃ ra̍jani rajaya । ki̠lāsa̍-mpali̠ta-ñcha̠ yat ॥ ki̠lāsa̍-ñcha pali̠ta-ñcha̍ । niri̠tō nā̍śayā̠ pṛṣa̍t । ā na̠-ssvō a̍śnutā̠ṃ varṇa̍ḥ । parā̎ śvē̠tāni̍ pātaya ॥ asi̍ta-ntē ni̠laya̍nam । ā̠sthāna̠masi̍ta̠-ntava̍ ॥ 34 ॥

asi̍kniyasyōṣadhē । niri̠tō nā̍śayā̠ pṛṣa̍t ॥ a̠sthi̠jasya̍ ki̠lāsa̍sya । ta̠nū̠jasya̍ cha̠ yattva̠chi । kṛ̠tyayā̍ kṛ̠tasya̠ brahma̍ṇā । lakṣma̍ śvē̠tama̍nīnaśam ॥ sarū̍pā̠ nāma̍ tē mā̠tā । sarū̍pō̠ nāma̍ tē pi̠tā । sarū̍pā 'syōṣadhē̠ sā । sarū̍pami̠da-ṅkṛ̍dhi ॥ 35 ॥

śu̠nagṃ hu̍vēma ma̠ghavā̍na̠mindra̎m । a̠sminbharē̠ nṛta̍ma̠ṃ vāja̍sātau । śṛ̠ṇvanta̍-mu̠gramū̠tayē̍ sa̠mathsu̍ । ghnanta̍ṃ vṛ̠trāṇi̍ sa̠jinta̠-ndhanā̍nām ॥ dhū̠nu̠tha dyā-mparva̍tāndā̠śuṣē̠ vasu̍ । ni vō̠ vanā̍ jihatē̠ yāma̍nō bhi̠yā । kō̠paya̍tha pṛthi̠vī-mpṛ̍śnimātaraḥ । yu̠dhē yadu̍grā̠ḥ pṛṣa̍tī̠-rayu̍gdhvam ॥ pravē̍payanti̠ parva̍tān । vivi̍ñchanti̠ vana̠spatīn̍ ॥ 36 ॥

prōvā̍rata marutō du̠rmadā̍ iva । dēvā̍sa̠-ssarva̍yā vi̠śā ॥ pu̠ru̠trā hi sa̠dṛṅṅasi̍ । viśō̠ viśvā̠ anu̍ pra̠bhu । sa̠mathsu̍ tvā havāmahē ॥ sa̠mathsva̠gni-mava̍sē । vā̠ja̠yantō̍ havāmahē । vājē̍ṣu chi̠trarā̍dhasam ॥ saṅga̍chChaddhva̠gṃ̠ saṃva̍daddhvam । saṃ vō̠ manāgṃ̍si jānatām ॥ 37 ॥

dē̠vā bhā̠gaṃ yathā̠ pūrvē̎ । sa̠jā̠nnā̠nā u̠pāsa̍ta ॥ sa̠mā̠nō mantra̠-ssami̍ti-ssamā̠nī । sa̠mā̠na-mmana̍-ssa̠ha chi̠ttamē̍ṣām । sa̠mā̠na-ṅkētō̍ a̠bhi-sagṃra̍bhaddhvam । sa̠jñānnē̍na vō ha̠viṣā̍ yajāmaḥ ॥ sa̠mā̠nī va̠ ākū̍tiḥ । sa̠mā̠nā hṛda̍yāni vaḥ । sa̠mā̠nama̍stu vō̠ mana̍ḥ । yathā̍ va̠-ssusa̠hā-'sa̍ti ॥ 38 ॥

sa̠jñānna̍-nna̠-ssvaiḥ । sa̠jñānna̠mara̍ṇaiḥ । sa̠jñānna̍maśvinā yu̠vam । i̠hāsmāsu̠ niya̍chChatam ॥ sa̠jñānna̍-mmē̠ bṛha̠spati̍ḥ । sa̠jñānnagṃ̍ savi̠tā ka̍rat । sa̠jñānna̍maśvinā yu̠vam । i̠ha mahya̠-nniya̍chChatam ॥ upa̍chChā̠yāmi̍va̠ ghṛṇē̎ḥ । aga̍nma̠ śarma̍ tē va̠yam ॥ 39 ॥

agnē̠ hira̍ṇyasandṛśaḥ ॥ ada̍bdhēbhi-ssavitaḥ pā̠yubhi̠ṣṭvam । śi̠vēbhi̍ra̠dya pari̍pāhi nō̠ gaya̎m । hira̍ṇyajihva-ssuvi̠tāya̠ navya̍sē । rakṣā̠māki̍rnō a̠ghaśagṃ̍sa īśata ॥ madē̍madē̠ hi nō̍ da̠duḥ । yū̠thā gavā̍mṛju̠kratu̍ḥ । saṅgṛ̍bhāya pu̠rū śa̠tā । u̠bha̠yā ha̠styā vasu̍ । śi̠śī̠hi rā̠ya ābha̍ra ॥ 40 ॥

śipri̍n vājānā-mpatē । śachī̍va̠stava̍ da̠gṃ̠sanā̎ । ā tū na̍ indra bhājaya । gōṣvaśvē̍ṣu śu̠bhruṣu̍ । sa̠hasrē̍ṣu tuvīmagha ॥ ya-ddē̍vā dēva̠ hēḍa̍nam । dēvā̍saśchakṛ̠mā va̠yam । ādi̍tyā̠stasmā̎nmā yū̠yam । ṛ̠tasya̠rtēna̍ muñchata ॥ ṛ̠tasya̠rtē-nā̍dityāḥ ॥ 41 ॥

yaja̍trā mu̠ñchatē̠ha mā̎ । ya̠jñairvō̍ yajñavāhasaḥ । ā̠śikṣa̍ntō̠ na śē̍kima ॥ mēda̍svatā̠ yaja̍mānāḥ । sru̠chā-''jyē̍na̠ juhva̍taḥ । a̠kā̠mā vō̍ viśvē dēvāḥ । śikṣa̍ntō̠ nōpa̍ śēkima ॥ yadi̠ divā̠ yadi̠ nakta̎m । ēna̍ ēna̠syō-'ka̍rat । bhū̠ta-mmā̠ tasmā̠dbhavya̍-ñcha ॥ 42 ॥

dru̠pa̠dādi̍va muñchatu ॥ dru̠pa̠dādi̠vē-nmu̍muchā̠naḥ । svi̠nna-ssnā̠tvī malā̍diva । pū̠ta-mpa̠vitrē̍ṇē̠ vājya̎m । viśvē̍ muñchantu̠ maina̍saḥ ॥ udva̠ya-ntama̍sa̠spari̍ । paśya̍ntō̠ jyōti̠rutta̍ram । dē̠va-ndē̍va̠trā sūrya̎m । aga̍nma̠ jyōti̍rutta̠mam ॥ 43 ॥
(tava̍ - kṛdhi̠ - vana̠spatī̎ - ñjānatā̠ - masa̍ti - va̠yaṃ - bha̍rā - dityā - ścha̠ - +nava̍ cha) (a. 4)

anuvākaṃ 5 - upahōmāḥ
vṛṣā̠ sō a̠gṃ̠śuḥ pa̍vatē ha̠viṣmā̠n-thsōma̍ḥ । indra̍sya bhā̠ga ṛ̍ta̠yu-śśa̠tāyu̍ḥ । sa mā̠ vṛṣā̍ṇaṃ vṛṣa̠bha-ṅkṛ̍ṇōtu । pri̠yaṃ vi̠śāgṃ sarva̍vīragṃ su̠vīra̎m ॥ kasya̠ vṛṣā̍ su̠tē sachā̎ । ni̠yutvā̎n vṛṣa̠bhō ra̍ṇat । vṛ̠tra̠hā sōma̍pītayē ॥ yastē̍ śṛṅga vṛṣō napāt । praṇa̍pā-tkuṇḍa̠pāyya̍ḥ । nya̍smindaddhra̠ ā mana̍ḥ ॥ 44 ॥

tagṃ sa̠ddhrīchī̍rū̠tayō̠ vṛṣṇi̍yāni । paugg​syā̍ni ni̠yuta̍-ssaśchu̠rindra̎m । sa̠mu̠dra-nna sindha̍va u̠kthaśu̍ṣmāḥ । u̠ru̠vyacha̍sa̠-ṅgira̠ āvi̍śanti ॥ indrā̍ya̠ girō̠ ani̍śitasargāḥ । a̠paḥ praira̍ya̠n-thsaga̍rasya bu̠ddadhnāt । yō akṣē̍ṇēva cha̠kriyā̠ śachī̍bhiḥ । viṣva̍kta̠stambha̍ pṛthi̠vīmu̠ta dyām ॥ akṣō̍daya̠chChava̍sā̠ kṣāma̍ bu̠ddhnam । vārṇavā̍ta̠stavi̍ṣībhi̠rindra̍ḥ ॥ 45 ॥

dṛ̠ḍhānyau̎ghnādu̠śamā̍na̠ ōja̍ḥ । avā̍bhinatka̠kubha̠ḥ parva̍tānām ॥ ā nō̍ agnē sukē̠tunā̎ । ra̠yiṃ vi̠śvāyu̍pōṣasam । mā̠rḍī̠ka-ndhē̍hi jī̠vasē̎ ॥ tvagṃ sō̍ma ma̠hē bhaga̎m । tvaṃ yūna̍ ṛtāya̠tē । dakṣa̍-ndadhāsi jī̠vasē̎ ॥ ratha̍ṃ yuñjatē ma̠ruta̍-śśu̠bhē sa̠gam । sūrō̠ na mi̍trāvaruṇā̠ gavi̍ṣṭiṣu ॥ 46 ॥

rajāgṃ̍si chi̠trā vi cha̍ranti ta̠nyava̍ḥ । di̠va-ssa̍mrājā̠ paya̍sā na ukṣatam ॥ vācha̠gṃ̠ su mi̍trāvaruṇā̠virā̍vatīm । pa̠rjanya̍śchi̠trāṃ va̍dati̠ tviṣī̍matīm । a̠bhrā va̍sata maruta-ssu mā̠yayā̎ । dyāṃ va̍r​ṣayata-maru̠ṇāma̍rē̠pasa̎m ॥ ayu̍kta sa̠pta śu̠ndhyuva̍ḥ । sūrō̠ ratha̍sya na̠ptriya̍ḥ । tābhi̍ryāti̠ svayu̍ktibhiḥ ॥ vahi̍ṣṭhēbhirvi̠hara̍n. yāsi̠ tantu̎m ॥ 47 ॥

a̠va̠vyaya̠nnasi̍ta-ndēva̠ vasva̍ḥ । davi̍ddhvatō ra̠śmaya̠-ssūrya̍sya । charmē̠vāvā̍dhu̠stamō̍ a̠phsva̍ntaḥ ॥ pa̠rjanyā̍ya̠ pragā̍yata । di̠vaspu̠trāya̍ mī̠ḍhuṣē̎ । sa nō̍ ya̠vasa̍michChatu ॥ achChā̍ vada ta̠vasa̍-ṅgī̠rbhirā̠bhiḥ । stu̠hi pa̠rjanya̠-nnama̠sā vi̍vāsa । kani̍krada-dvṛṣa̠bhō jī̠radā̍nuḥ । rētō̍ dadhā̠tvōṣa̍dhīṣu̠ garbha̎m ॥ 48 ॥

yō garbha̠mōṣa̍dhīnām । gavā̎-ṅkṛ̠ṇōtyarva̍tām । pa̠rjanya̍ḥ puru̠ṣīṇā̎m ॥ tasmā̠ idā̠syē̍ ha̠viḥ । ju̠hōtā̠ madhu̍mattamam । iḍā̎-nna-ssa̠ṃyata̍-ṅkarat ॥ ti̠srō yada̍gnē śa̠rada̠stvāmit । śuchi̍-ṅghṛ̠tēna̠ śucha̍ya-ssapa̠ryann । nāmā̍ni chiddadhirē ya̠jñiyā̍ni । asū̍dayanta ta̠nuva̠-ssujā̍tāḥ ॥ 49 ॥

indra̍ścha na-śśunāsīrau । i̠maṃ ya̠jña-mmi̍mikṣatam । garbha̍-ndhattagg​ sva̠stayē̎ ॥ yayō̍ri̠daṃ viśva̠-mbhuva̍na-māvi̠vēśa̍ । yayō̍rāna̠ndō nihi̍tō̠ maha̍ścha । śunā̍sīrāvṛ̠tubhi̍-ssaṃvidā̠nau । indra̍vantau ha̠viri̠da-ñju̍ṣēthām ॥ ā ghā̠ yē a̠gnimi̍ndha̠tē । stṛ̠ṇanti̍ ba̠r̠hirā̍nu̠ṣak । yēṣā̠mindrō̠ yuvā̠ sakhā̎ ॥ agna̠ indra̍ścha mē̠dinā̎ । ha̠thō vṛ̠trāṇya̍pra̠ti । yu̠vagṃ hi vṛ̍tra̠hanta̍mā ॥ yābhyā̠gṃ̠ suva̠raja̍ya̠nnagra̍ ē̠va । yāvā̍tastha̠tu-rbhuva̍nasya̠ maddhyē̎ । pracha̍r​ṣa̠ṇī vṛ̍ṣaṇā̠ vajra̍bāhū । a̠gnī indrā̍ vṛtra̠haṇā̍ huvē vām ॥ 50 ॥
(mana̠ - indrō̠ - gāvi̍ṣṭiṣu̠ - tantu̠ṃ - garbha̠gṃ̠ - sujā̍tā̠ḥ - sakhā̍ sa̠pta cha̍) (a. 5)

anuvākaṃ 6 - upahōmāḥ
u̠ta na̍ḥ pri̠yā pri̠yāsu̍ । sa̠ptasvasā̠ suju̍ṣṭā । sara̍svatī̠ stōmyā̍ 'bhūt ॥ i̠mā juhvā̍nā yu̠ṣmadā namō̍bhiḥ । prati̠ stōmagṃ̍ sarasvati juṣasva । tava̠ śarma̍-npri̠yata̍mē̠ dadhā̍nāḥ । upa̍sthēyāma śara̠ṇa-nna vṛ̠kṣam ॥ trīṇi̍ pa̠dā vicha̍kramē । viṣṇu̍rgō̠pā adā̎bhyaḥ । tatō̠ dharmā̍ṇi dhā̠rayann̍ ॥ 51 ॥

tada̍sya pri̠yama̠bhi pāthō̍ aśyām । narō̠ yatra̍ dēva̠yavō̠ mada̍nti । u̠ru̠kra̠masya̠ sa hi bandhu̍ri̠tthā । viṣṇō̎ḥ pa̠dē pa̍ra̠mē maddhva̠ uthsa̍ḥ ॥ kra̠tvā̠ dā a̍sthu̠ śrēṣṭha̍ḥ । a̠dya tvā̍ va̠nvan-thsu̠rēkṇā̎ḥ । marta̍ ānāśa suvṛ̠ktim ॥ i̠mā bra̍hma brahmavāha । pri̠yā ta̠ ā ba̠ra̠.hi-ssī̍da । vī̠hi sū̍ra purō̠ḍāśa̎m ॥ 52 ॥

upa̍ na-ssū̠navō̠ gira̍ḥ । śṛ̠ṇvantva̠mṛtasya̠ yē । su̠mṛ̠ḍī̠kā bha̍vantu naḥ ॥ a̠dyā nō̍ dēva savitaḥ । pra̠jāva̍-thsāvī̠-ssaubha̍gam । parā̍ du̠sṣvapni̍yagṃ suva ॥ viśvā̍ni dēva savitaḥ । du̠ri̠tāni̠ parā̍suva । ya-dbha̠dra-ntanma̠ āsu̍va ॥ śuchi̍ma̠rkai-rbṛha̠spati̎m ॥ 53 ॥

a̠ddhva̠rēṣu̍ namasyata । a̠nā̠myōja̠ ācha̍kē ॥ yā dhā̠raya̍nta dē̠vā su̠dakṣā̠ dakṣa̍pitārā । a̠su̠ryā̍ya̠ prama̍hasā ॥ sa itkṣēti̠ sudhi̍ta̠ ōka̍si̠ svē । tasmā̠ iḍā̍ pinvatē viśva̠dānī̎ । tasmai̠ viśa̍-ssva̠yamē̠vāna̍manti । yasmi̍-nbra̠hmā rāja̍ni̠ pūrva̠ ēti̍ ॥ sakū̍timindra̠ sachyu̍tim । sachyu̍ti-ñja̠ghana̍chyutim ॥ 54 ॥

ka̠nātkā̠bhā-nna̠ ābha̍ra । pra̠ya̠phsyanni̍va sa̠kthyau̎ ॥ vina̍ indra̠ mṛdhō̍ jahi । kanī̍khunadiva sā̠payann̍ । a̠bhi na̠-ssuṣṭu̍ti-nnaya ॥ pra̠jāpa̍ti-sstri̠yāṃ yaśa̍ḥ । mu̠ṣkayō̍radadhā̠-thsapa̎m । kāma̍sya̠ tṛpti̍māna̠ndam । tasyā̎gnē bhājayē̠ha mā̎ ॥ mōda̍ḥ pramō̠da ā̍na̠ndaḥ ॥ 55 ॥

mu̠ṣkayō̠rnihi̍ta̠-ssapa̍ḥ । sṛ̠tvēva̠ kāma̍sya tṛpyāṇi । dakṣi̍ṇānā-mpratigra̠hē ॥ mana̍saśchi̠tta-mākū̍tim । vā̠cha-ssa̠tya-ma̍śīmahi । pa̠śū̠nāgṃ rū̠pamanna̍sya । yaśa̠-śśrī-śśra̍yatā̠-mmayi̍ ॥ yathā̠ 'hama̠syā atṛ̍pagg​ stri̠yai pumān̍ । yathā̠ strī tṛpya̍ti pu̠gṃ̠si pri̠yē pri̠yā । ē̠va-mbhaga̍sya tṛpyāṇi ॥ 56 ॥

ya̠jñasya̠ kāmya̍ḥ pri̠yaḥ ॥ dadā̠mītya̠gnirva̍dati । tathēti̍ vā̠yurā̍ha̠ tat । hantēti̍ sa̠tya-ñcha̠ndramā̎ḥ । ā̠di̠tya-ssa̠tyamōmiti̍ ॥ āpa̠sta-thsa̠tyamābha̍rann । yaśō̍ ya̠jñasya̠ dakṣi̍ṇām । a̠sau mē̠ kāma̠-ssamṛ̍ddhyatām ॥ na hi spaśa̠mavi̍da-nna̠nyama̠smāt । vai̠śvā̠na̠rā-tpu̍ra ē̠tāra̍ma̠gnēḥ ॥ 57 ॥

athē̍mamanthanna̠mṛta̠mamū̍rāḥ । vai̠śvā̠na̠ra-ṅkṣē̎tra̠jityā̍ya dē̠vāḥ ॥ yēṣā̍mi̠mē pūrvē̠ armā̍sa̠ āsann̍ । a̠yū̠pā-ssadma̠ vibhṛ̍tā pu̠rūṇi̍ । vaiśvā̍nara̠ tvayā̠ tē nu̠ttāḥ । pṛ̠thi̠vī-ma̠nyāma̠bhita̍sthu̠-rjanā̍saḥ ॥ pṛ̠thi̠vī-mmā̠tara̍-mma̠hīm । a̠ntari̍kṣa̠-mupa̍bruvē । bṛ̠ha̠tīmū̠tayē̠ diva̎m ॥ viśva̍-mbibharti pṛthi̠vī ॥ 58 ॥

a̠ntari̍kṣa̠ṃ vipa̍prathē । du̠hē dyau-rbṛ̍ha̠tī paya̍ḥ ॥ na tā na̍śanti̠ na da̍bhāti̠ taska̍raḥ । nainā̍ ami̠trō vyathi̠rāda̍dhar​ṣati । dē̠vāg​ścha̠ yābhi̠-ryaja̍tē̠ dadā̍ti cha । jyōgittābhi̍-ssachatē̠ gōpa̍ti-ssa̠ha ॥ na tā arvā̍ rē̠ṇuka̍kāṭō aśnutē । na sagg̍ skṛta̠tra-mupa̍yanti̠ tā a̠bhi । u̠ru̠gā̠yamabha̍ya̠-ntasya̠ tā anu̍ । gāvō̠ martya̍sya̠ vicha̍ranti̠ yajva̍naḥ ॥ 59 ॥

rātrī̠ vya̍khyadāya̠tī । pu̠ru̠trā dē̠vya̍kṣabhi̍ḥ । viśvā̠ adhi̠ śriyō̍-'dhita ॥ upa̍ tē̠ gā i̠vāka̍ram । vṛ̠ṇī̠ṣva du̍hita-rdivaḥ । rātrī̠ stōma̠-nna ji̠gyuṣī̎ ॥ dē̠vīṃ vācha̍majanayanta dē̠vāḥ । tāṃ vi̠śvarū̍pāḥ pa̠śavō̍ vadanti । sā nō̍ ma̠ndrēṣa̠mūrja̠-nduhā̍nā । dhē̠nurvāga̠smānupa̠ suṣṭu̠taitu̍ ॥ 60 ॥

ya-dvāgvada̍ntya-vichēta̠nāni̍ । rāṣṭrī̍ dē̠vānā̎-nniṣa̠sāda̍ ma̠ndrā । chata̍sra̠ ūrja̍-nduduhē̠ payāgṃ̍si । kva̍ svi dasyāḥ para̠ma-ñja̍gāma ॥ gau̠rī mi̍māya sali̠lāni̠ takṣa̍tī । ēka̍padī dvi̠padī̠ sā chatu̍ṣpadī । a̠ṣṭāpa̍dī̠ nava̍padī babhū̠vuṣī̎ । sa̠hasrā̎kṣarā para̠mē vyō̍mann ॥ tasyāgṃ̍ samu̠drā adhi̠ vi kṣa̍ranti । tēna̍ jīvanti pra̠diśa̠śchata̍sraḥ ॥ 61 ॥

tata̍ḥ, kṣaratya̠kṣara̎m । ta-dviśva̠-mupa̍jīvati ॥ indrā̠ sūrā̍ ja̠naya̍n-vi̠śvaka̍rmā । ma̠rutvāgṃ̍ astu ga̠ṇavā̎m-thsajā̠tavān̍ । a̠sya snu̠ṣā-śvaśu̍rasya̠ praśi̍ṣṭim । sa̠patnā̠ vācha̠-mmana̍sā̠ upā̍satām ॥ indra̠-ssūrō̍ atara̠-drajāgṃ̍si । snu̠ṣā sa̠patnā̠-śśvaśu̍rō̠-'yama̍stu । a̠yagṃ śatrū̎mjayatu̠ jar​hṛ̍ṣāṇaḥ । a̠yaṃ vāja̍-ñjayatu̠ vāja̍sātau ॥ a̠gniḥ, kṣa̍tra̠bhṛdani̍bhṛṣṭa̠mōja̍ḥ । sa̠ha̠sriyō̍ dīpyatā̠-mapra̍yuchChann । vi̠bhrāja̍māna-ssamidhā̠na u̠graḥ । ā-'ntari̍kṣamaruha̠da-ga̠ndyām ॥ 62 ॥
(dhā̠raya̍n - purō̠ḍāśa̠ṃ - bṛha̠spati̍ṃ - ja̠ghana̍chyuti - māna̠ndō - bhaga̍sya tṛpyā - ṇya̠gnēḥ - pṛ̍thi̠vī - yajva̍na - ētu - pra̠diśa̠śchata̍srō̠ - vāja̍sātau cha̠tvāri̍ cha) (a. 6)

anuvākaṃ 7 - upahōmāḥ
vṛṣā̎ 'sya̠gṃ̠śu-rvṛ̍ṣa̠bhāya̍ gṛhyasē । vṛṣā̠-'yamu̠grō nṛ̠chakṣa̍sē । di̠vyaḥ ka̍rma̠ṇyō̍ hi̠tō bṛ̠hannāma̍ । vṛ̠ṣa̠bhasya̠ yā ka̠kut ॥ vi̠ṣū̠vān. vi̍ṣṇō bhavatu । a̠yaṃ yō mā̍ma̠kō vṛṣā̎ । athō̠ indra̍ iva dē̠vēbhya̍ḥ । vibra̍vītu̠ janē̎bhyaḥ ॥ āyu̍ṣmanta̠ṃ varcha̍svantam । athō̠ adhi̍patiṃ vi̠śām ॥ 63 ॥

a̠syāḥ pṛ̍thi̠vyā addhya̍kṣam । i̠mami̍ndra vṛṣa̠bha-ṅkṛ̍ṇu ॥ ya-ssu̠śṛṅga̍-ssuvṛṣa̠bhaḥ । ka̠lyāṇō̠ drōṇa̠ āhi̍taḥ । kār​ṣī̍valapragāṇēna । vṛ̠ṣa̠bhēṇa̍ yajāmahē ॥ vṛ̠ṣa̠bhēṇa̠ yaja̍mānāḥ । akrū̍rēṇēva sa̠rpiṣā̎ । mṛdha̍ścha̠ sarvā̠ indrē̍ṇa । pṛta̍nāścha jayāmasi ॥ 64 ॥

yasyā̠yamṛ̍ṣa̠bhō ha̠viḥ । indrā̍ya pariṇī̠yatē̎ । jayā̍ti̠ śatru̍mā̠yanta̎m । athō̍ hanti pṛtanya̠taḥ ॥ nṛ̠ṇāmaha̍ pra̠ṇīrasa̍t । agra̍ udbhinda̠tāma̍sat ॥ indra̠ śuṣma̍-nta̠nuvā̠ mēra̍yasva । nī̠chā viśvā̍ a̠bhiti̍ṣṭhā̠bhimā̍tīḥ । ni śṛ̍ṇīhyābā̠dhaṃ yō nō̠ asti̍ । u̠ru-nnō̍ lō̠ka-ṅkṛ̍ṇuhi jīradānō ॥ 65 ॥

prēhya̠bhiprēhi̠ prabha̍rā̠ saha̍sva । mā vivē̍nō̠ vi śṛ̍ṇuṣvā̠ janē̍ṣu । udī̍ḍi̠tō vṛ̍ṣabha̠ tiṣṭha̠ śuṣmai̎ḥ । indra̠ śatrū̎-npu̠rō a̠smāka̍ yuddhya ॥ agnē̠ jētā̠ tva-ñja̍ya । śatrū̎m-thsahasa̠ ōja̍sā । vi śatrū̠n̠. vimṛdhō̍ nuda ॥ ē̠ta-ntē̠ stōma̍-ntuvijāta̠ vipra̍ḥ । ratha̠-nna dhīra̠-ssvapā̍ atakṣam । yadīda̍gnē̠ prati̠ tva-ndē̍va̠ haryā̎ḥ ॥ 66 ॥

suva̍rvatīra̠pa ē̍nā jayēma ॥ yō ghṛ̠tēnā̠bhimā̍nitaḥ । indra̠ jaitrā̍ya jajñiṣē । sa na̠-ssaṅkā̍su pāraya । pṛ̠ta̠nā̠sāhyē̍ṣu cha ॥ indrō̍ jigāya pṛthi̠vīm । a̠ntari̍kṣa̠gṃ̠ suva̍rma̠hat । vṛ̠tra̠hā pu̍ru̠chēta̍naḥ ॥ indrō̍ jigāya̠ saha̍sā̠ sahāgṃ̍si । indrō̍ jigāya̠ pṛta̍nāni̠ viśvā̎ ॥ 67 ॥

indrō̍ jā̠tō vi purō̍ rurōja । sa na̍ḥ para̠spā vari̍vaḥ kṛṇōtu ॥ a̠ya-ṅkṛ̠tnuragṛ̍bhītaḥ । vi̠śva̠ji-du̠dbhidi-thsōma̍ḥ । ṛṣi̠-rvipra̠ḥ kāvyē̍na ॥ vā̠yura̍grē̠gā ya̍jña̠prīḥ । sā̠ka-ṅga̠nmana̍sā ya̠jñam । śi̠vō ni̠yudbhi̍-śśi̠vābhi̍ḥ ॥ vāyō̍ śu̠krō a̍yāmi tē । maddhvō̠ agra̠-ndivi̍ṣṭiṣu ॥ 68 ॥

āyā̍ hi̠ sōma̍pītayē । svā̠ru̠hō dē̍va ni̠yutva̍tā ॥ i̠mami̍ndra vardhaya kṣa̠triyā̍ṇām । a̠yaṃ vi̠śāṃ vi̠śpati̍rastu̠ rājā̎ । a̠smā i̍ndra̠ mahi̠ varchāgṃ̍si dhēhi । a̠va̠rchasa̍-ṅkṛṇuhi̠ śatru̍masya ॥ i̠mamābha̍ja̠ grāmē̠ aśvē̍ṣu̠ gōṣu̍ । nira̠mu-mbha̍ja̠ yō̍-'mitrō̍ asya । var​ṣma̍n kṣa̠trasya̍ ka̠kubhi̍ śrayasva । tatō̍ na u̠grō vibha̍jā̠ vasū̍ni ॥ 69 ॥

a̠smē dyā̍vāpṛthivī̠ bhūri̍ vā̠mam । sa-ndu̍hāthā-ṅgharma̠dughē̍va dhē̠nuḥ । a̠yagṃ rājā̎ pri̠ya indra̍sya bhūyāt । pri̠yō gavā̠mōṣa̍dhīnā-mu̠tāpām ॥ yu̠najmi̍ ta utta̠rāva̍nta̠-mindra̎m । yēna̠ jayā̍si̠ na parā̠jayā̍sai । sa tvā̍ 'karēkavṛṣa̠bhagg​ svānā̎m । athō̍ rājannutta̠ma-mmā̍na̠vānā̎m ॥ utta̍ra̠stvamadha̍rē tē sa̠patnā̎ḥ । ēka̍vṛṣā̠ indra̍sakhā jigī̠vān ॥ 70 ॥

viśvā̠ āśā̠ḥ pṛta̍nā-ssa̠jaṃya̠ñjayann̍ । a̠bhiti̍ṣṭha śatrūya̠ta-ssa̍hasva ॥ tubhya̍-mbharanti kṣi̠tayō̍ yaviṣṭha । ba̠lima̍gnē̠ anti̍ ta̠ ōta dū̠rāt । ā bhandi̍ṣṭhasya suma̠ti-ñchi̍kiddhi । bṛ̠hattē̍ agnē̠ mahi̠ śarma̍ bha̠dram ॥ yō dē̠hyō ana̍mayadvadha̠snaiḥ । yō arya̍patnī-ru̠ṣasa̍ścha̠kāra̍ । sa ni̠ruddhyā̠ nahu̍ṣō ya̠hvō a̠gniḥ । viśa̍śchakrē bali̠hṛta̠-ssahō̍bhiḥ ॥ 71 ॥

pra sa̠dyō a̍gnē̠ atya̎ṣya̠nyān । ā̠viryasmai̠ chāru̍tarō ba̠bhūtha̍ । ī̠ḍēnyō̍ vapu̠ṣyō̍ vi̠bhāvā̎ । pri̠yō vi̠śāmati̍thi̠-rmānu̍ṣīṇām ॥ brahma̍ jyēṣṭhā vī̠ryā̍ sambhṛ̍tāni । brahmāgrē̠ jyēṣṭha̠-ndiva̠māta̍tāna । ṛ̠tasya̠ brahma̍ pratha̠mōta ja̍jñē । tēnā̍r​hati̠ brahma̍ṇā̠ spardhi̍tu̠-ṅkaḥ ॥ brahma̠ sruchō̍ ghṛ̠tava̍tīḥ । brahma̍ṇā̠ svara̍vō mi̠tāḥ ॥ 72 ॥

brahma̍ ya̠jñasya̠ tanta̍vaḥ । ṛ̠tvijō̠ yē ha̍vi̠ṣkṛta̍ḥ ॥ śṛṅgā̍ṇī̠vēchChṛ̠ṅgiṇā̠gṃ̠ sanda̍dṛśrirē । cha̠ṣāla̍vanta̠-ssvara̍vaḥ pṛthi̠vyām । tē dē̠vāsa̠-ssvara̍vastasthi̠vāgṃsa̍ḥ । nama̠-ssakhi̍bhya-ssa̠nnānmā 'va̍gāta ॥ a̠bhi̠bhūra̠gnira̍tara̠-drajāgṃ̍si । spṛdhō̍ vi̠hatya̠ pṛta̍nā abhi̠śrīḥ । ju̠ṣā̠ṇō ma̠ āhu̍ti-mmā mahiṣṭa । ha̠tvā sa̠patnā̠n̠. vari̍vaskarannaḥ ॥ īśā̍na-ntvā̠ bhuva̍nānā-mabhi̠śriya̎m । staumya̍gna uru̠kṛtagṃ̍ su̠vīra̎m । ha̠vi-rju̍ṣā̠ṇa-ssa̠patnāgṃ̍ abhi̠bhūra̍si । ja̠hi śatrū̠gṃ̠rapa̠ mṛdhō̍ nudasva ॥ 73 ॥
(vi̠śāṃ - ja̍yāmasi - jīradānō̠ - haryā̠ - viśvā̠ - divi̍ṣṭiṣu̠ - vasū̍ni - jigī̠vānth - sahō̍bhi--r mi̠tā - na̍ ścha̠tvāri̍ cha) (a. 7)

anuvākaṃ 8 - upahōmāḥ
sa pra̍tna̠vannavī̍yasā । agnē̎ dyu̠mnēna̍ sa̠ṃyatā̎ । bṛ̠ha-ttatantha bhā̠nunā̎ ॥ nava̠-nnu stōma̍ma̠gnayē̎ । di̠va-śśyē̠nāya̍ jījanam । vasō̎ḥ ku̠vidva̠nāti̍ naḥ ॥ svā̠ru̠hā yasya̠ śriyō̍ dṛ̠śē । ra̠yirvī̠rava̍tō yathā । agrē̍ ya̠jñasya̠ chēta̍taḥ ॥ adā̎bhyaḥ pura ē̠tā ॥ 74 ॥

a̠gnirvi̠śā-mmānu̍ṣīṇām । tūrṇī̠ ratha̠-ssadā̠ nava̍ḥ ॥ nava̠gṃ̠ sōmā̍ya vā̠jinē̎ । ājya̠-mpaya̍sō-'jani । juṣṭa̠gṃ̠ śuchi̍tama̠ṃ vasu̍ ॥ navagṃ̍ sōma juṣasva naḥ । pī̠yūṣa̍syē̠ha tṛ̍pṇuhi । yastē̍ bhā̠ga ṛ̠tāva̠yam ॥ nava̍sya sōma tē va̠yam । ā su̍ma̠tiṃ vṛ̍ṇīmahē ॥ 75 ॥

sa nō̍ rāsva saha̠sriṇa̍ḥ ॥ navagṃ̍ ha̠virju̍ṣasva naḥ । ṛ̠tubhi̍-ssōma̠ bhūta̍mam । tada̠ṅga prati̍harya naḥ । rājana̎-thsōma sva̠stayē̎ ॥ nava̠gg̠ stōma̠-nnavagṃ̍ ha̠viḥ । i̠ndrā̠gnibhyā̠-nnivē̍daya । tajju̍ṣētā̠gṃ̠ sachē̍tasā ॥ śuchi̠-nnu stōma̠-nnava̍jātama̠dya । indrā̎gnī vṛtrahaṇā ju̠ṣēthā̎m ॥ 76 ॥

u̠bhā hi vāgṃ̍ su̠havā̠ jōha̍vīmi । tā vājagṃ̍ sa̠dya u̍śa̠tē dhēṣṭhā̎ ॥ a̠gnirindrō̠ nava̍sya naḥ । a̠sya ha̠vyasya̍ tṛpyatām । i̠ha dē̠vau sa̍ha̠sriṇau̎ ॥ ya̠jña-nna̠ ā hi gachCha̍tām । vasu̍mantagṃ suva̠rvida̎m । a̠sya ha̠vyasya̍ tṛpyatām । a̠gnirindrō̠ nava̍sya naḥ ॥ viśvā̎-ndē̠vāg​ sta̍rpayata ॥ 77 ॥

ha̠viṣō̠-'sya nava̍sya naḥ । su̠va̠rvidō̠ hi ja̍jñi̠rē ॥ ēda-mba̠r̠hi-ssu̠ṣṭarī̍mā̠ navē̍na । a̠yaṃ ya̠jñō yaja̍mānasya bhā̠gaḥ । a̠ya-mba̍bhūva̠ bhuva̍nasya̠ garbha̍ḥ । viśvē̍ dē̠vā i̠dama̠dyāga̍miṣṭhāḥ ॥ i̠mē nu dyāvā̍pṛthi̠vī sa̠mīchī̎ । ta̠nvā̠nē ya̠jña-mpu̍ru̠pēśa̍sa-ndhi̠yā । ā-'smai̍ pṛṇītā̠-mbhuva̍nāni̠ viśvā̎ । pra̠jā-mpuṣṭi̍ma̠mṛta̠-nnavē̍na ॥ 78 ॥

i̠mē dhē̠nū a̠mṛta̠ṃ yē du̠hātē̎ । paya̍sva-tyutta̠rāmē̍tu̠ puṣṭi̍ḥ । i̠maṃ ya̠jña-ñju̠ṣamā̍ṇē̠ navē̍na । sa̠mīchī̠ dyāvā̍pṛthi̠vī ghṛ̠tāchī̎ ॥ yavi̍ṣṭhō havya̠vāha̍naḥ । chi̠trabhā̍nu-rghṛ̠tāsu̍tiḥ । nava̍jātō̠ virō̍chasē । agnē̠ tattē̍ mahitva̠nam ॥ tvama̍gnē dē̠vatā̎bhyaḥ । bhā̠gē dē̍va̠ na mī̍yasē ॥ 79 ॥

sa ē̍nā vi̠dvān. ya̍kṣyasi । nava̠gg̠ stōma̍-ñjuṣasva naḥ ॥ a̠gniḥ pra̍tha̠maḥ prāśñā̍tu । sa hi vēda̠ yathā̍ ha̠viḥ । śi̠vā a̠smabhya̠-mōṣa̍dhīḥ । kṛ̠ṇōtu̍ vi̠śvacha̍r​ṣaṇiḥ ॥ bha̠drānna̠-śśrēya̠-ssama̍naiṣṭa dēvāḥ । tvayā̍-'va̠sēna̠ sama̍śīmahi tvā । sa nō̍ mayō̠bhūḥ pi̍tō̠ āvi̍śasva । śa-ntō̠kāya̍ ta̠nuvē̎ syō̠naḥ ॥ ē̠tamu̠ tya-mmadhu̍nā̠ saṃyu̍ta̠ṃ yava̎m । sara̍svatyā̠ adhi̍ma̠nāva̍charkṛṣuḥ । indra̍ āsī̠-thsīra̍pati-śśa̠takra̍tuḥ । kī̠nāśā̍ āsa-nma̠ruta̍-ssu̠dāna̍vaḥ ॥ 80 ॥
(pu̠ra̠ ē̠tā - vṛ̍ṇīmahē - ju̠ṣēthā̎m-tarpaya-tā̠mṛta̠-nnavē̍na-mīyasē-syō̠na ścha̠tvāri̍ cha) (a. 8)

(juṣṭa̠ - śchakṣu̍ṣō̠ - juṣṭī̍ narō - nakta-ñjā̠tā - vṛṣā̠ sa - u̠ta nō̠ - vṛṣā̎-'sya̠gṃ̠śuḥ - sa pra̍tna̠vada̠ṣṭau)

(juṣṭō̍ - ma̠nyu-rbhagō̠ - juṣṭī̍ narō̠ - hari̍varpasa̠-ṅgira̠ḥ - śipri̍n vājānā - mu̠ta nō̠ - ya-dvāgvada̍ntī̠ - viśvā̠ āśā̠ aśī̍tiḥ )

(juṣṭa̍ḥ - su̠dāna̍vaḥ )

॥ hari̍ḥ ōm ।

॥ kṛṣṇa yajurvēdīya taittirīya brāhmaṇē dvitīyāṣṭakē chaturthaḥ prapāṭhaka-ssamāptaḥ ॥