KYTB 3.5 Ishti Hautram - Krishna Yajurveda Taittiriya Brahmana Patha - Satyam Prapadye - English

sa̠tya-mprapa̍dyē । ṛ̠ta-mprapa̍dyē ।
a̠mṛta̠-mprapa̍dyē ।
pra̠jāpa̍tēḥ pri̠yā-nta̠nuva̠manā̎rtā̠-mprapa̍dyē ।
i̠dama̠ha-mpa̍ñchada̠śēna̠ vajrē̍ṇa ।
dvi̠ṣanta̠-mbhrātṛ̍vya̠mava̍krāmāmi ।
yō̎-'smā-ndvēṣṭi̍ । ya-ñcha̍ va̠ya-ndvi̠ṣmaḥ ।
bhūrbhuva̠-ssuva̍ḥ । him ॥ 1 ॥
(sa̠tya-ndaśa̍) (a. 1)

anuvākaṃ 2 - sāmidhēnīmranvāha
pra vō̠ vājā̍ a̠bhidya̍vaḥ । ha̠viṣma̍ntō ghṛ̠tāchyā̎ ।
dē̠vāñji̍gāti sumna̠yuḥ ॥ agna̠ āyā̍hi vī̠tayē̎ । gṛ̠ṇā̠nō ha̠vyadā̍tayē । ni hōtā̍ sathsi ba̠ra̠.hiṣi̍ ॥ ta-ntvā̍ sa̠midbhi̍raṅgiraḥ । ghṛ̠tēna̍ vardhayāmasi । bṛ̠hachChō̍chā yaviṣṭhya ॥ sa na̍ḥ pṛ̠thu śra̠vāyya̎m ॥ 2 ॥

achChā̍ dēva vivāsasi । bṛ̠hada̍gnē su̠vīrya̎m ॥
ī̠ḍēnyō̍ nama̠sya̍sti̠raḥ । tamāgṃ̍si darśa̠taḥ । sama̠gniri̍ddhyatē̠ vṛṣā̎ ॥ vṛṣō̍ a̠gni-ssami̍ddhyatē । aśvō̠ na dē̍va̠vāha̍naḥ ।
tagṃ ha̠viṣma̍nta īḍatē ॥ vṛṣa̍ṇa-ntvā va̠yaṃ vṛṣann̍ । vṛṣā̍ṇa̠-ssami̍dhīmahi ॥ 3 ॥
agnē̠ dīdya̍ta-mbṛ̠hat ॥ a̠gni-ndū̠taṃ vṛ̍ṇīmahē ।
hōtā̍raṃ vi̠śvavē̍dasam । a̠sya ya̠jñasya̍ su̠kratu̎m ॥ sa̠mi̠ddhyamā̍nō addhva̠rē । a̠gniḥ pā̍va̠ka īḍya̍ḥ । śō̠chiṣkē̍śa̠stamī̍mahē ॥ sami̍ddhō agna āhuta । dē̠vān. ya̍kṣi svaddhvara । tvagṃ hi ha̍vya̠vāḍasi̍ ॥
āju̍hōta duva̠syata̍ । a̠gni-mpra̍ya̠tya̍ddhva̠rē ।
vṛ̠ṇī̠ddhvagṃ ha̍vya̠vāha̍nam ॥
tvaṃ varu̍ṇa u̠ta mi̠trō a̍gnē । tvāṃ va̍rdhanti ma̠tibhi̠rvasi̍ṣṭhāḥ । tvē vasu̍ suṣaṇa̠nāni̍ santu । yū̠ya-mpā̍ta sva̠stibhi̠-ssadā̍ naḥ ॥ 4 ॥
(śra̠vāyya̍ - midhīma̠ - hyasi̍ sa̠pta cha̍) (a. 2)

anuvākaṃ 3 - praramuktvā nividō-'nūchya dēvatā āvāhayati
agnē̍ ma̠hāgṃ a̍si brāhmaṇa bhārata । asā̠vasau̎ ॥
dē̠vēddhō̠ manvi̍ddhaḥ । ṛṣi̍ṣṭutō̠ viprā̍numaditaḥ । ka̠vi̠śa̠stō brahma̍sagṃśitō ghṛ̠tāha̍vanaḥ ।
pra̠ṇī-rya̠jñānā̎m । ra̠thīra̍ddhva̠rāṇā̎m ।
a̠tūrtō̠ hōtā̎ । tūrṇi̍rhavya̠vāṭ ।
āspātra̍-ñju̠hū-rdē̠vānā̎m ॥ 5 ॥

cha̠ma̠sō dē̍va̠pāna̍ḥ । a̠rāgṃ i̍vāgnē nē̠mirdē̠vāgstva-mpa̍ri̠bhūra̍si । āva̍ha dē̠vān. yaja̍mānāya ॥ a̠gnima̍gna̠ āva̍ha । sōma̠māva̍ha ।
a̠gnimāva̍ha । pra̠jāpa̍ti̠māva̍ha । a̠gnīṣōmā̠vāva̍ha । i̠ndrā̠gnī āva̍ha । indra̠māva̍ha । ma̠hē̠ndramāva̍ha । dē̠vāgṃ ā̎jya̠pāgṃ āva̍ha ।
a̠gnigṃ hō̠trāyāva̍ha । sva-mma̍hi̠māna̠māva̍ha । ā chā̎gnē dē̠vān. vaha̍ । su̠yajā̍ cha yaja jātavēdaḥ ॥ 6 ॥
(dē̠vānā̠-mindra̠māva̍ha̠ ṣaṭcha̍) (a. 3)

anuvākaṃ 4 - sruchāvādāpayati
a̠gnir-hōtā̠ vētva̠gniḥ । hō̠traṃ vē̎ttu prāvi̠tram । smō va̠yam । sā̠dhu tē̍ yajamāna dē̠vatā̎ । ghṛ̠tava̍tī-maddhvaryō̠ srucha̠mā-'sya̍sva । dē̠vā̠yuva̍ṃ vi̠śvavā̍rām । īḍā̍mahai dē̠vāgṃ ī̠ḍēnyān̍ ।
na̠ma̠syāma̍ nama̠syān̍ । yajā̍ma ya̠jñiyān̍ ॥ 7 ॥
(a̠gnir-hōtā̠ nava̍) (a. 4)

anuvākaṃ 5 - prayājāḥ
sa̠midhō̍ agna̠ ājya̍sya viyantu । tanū̠napā̍dagna̠ ājya̍sya vētu । i̠ḍō a̍gna̠ ājya̍sya viyantu । ba̠r̠hira̍gna̠ ājya̍sya vētu । svāhā̠-'gnim । svāhā̠ sōma̎m । svāhā̠-'gnim । svāhā̎ pra̠jāpa̍tim ।
svāhā̠-'gnīṣōmau̎ । svāhē̎mdrā̠gnī । svāhēndra̎m ।
svāhā̍ mahē̠ndram । svāhā̍ dē̠vāgṃ ā̎jya̠pān । svāhā̠-'gnigṃ hō̠trājju̍ṣā̠ṇāḥ ।
agna̠ ājya̍sya viyantu ॥ 8 ॥
(i̠ndrā̠gnī pañcha̍ cha) (a. 5)

anuvākaṃ 6 - ajyabhāgayōḥ purōnuvākyē
a̠gni-rvṛ̠trāṇi̍ jaṅghanat । dra̠vi̠ṇa̠syu-rvi̍pa̠nyayā̎ ।
sami̍ddha-śśu̠kra āhu̍taḥ । ju̠ṣā̠ṇō a̠gnirājya̍sya vētu । tvagṃ sō̍māsi̠ satpa̍tiḥ । tvagṃ rājō̠ta vṛ̍tra̠hā ।
tva-mbha̠drō a̍si̠ kratu̍ḥ । ju̠ṣā̠ṇa-ssōma̠ ājya̍sya ha̠viṣō̍ vētu । a̠gniḥ pra̠tnēna̠ janma̍nā । śumbhā̍nasta̠nuva̠gg̠ svām ।
ka̠vi-rviprē̍ṇa vāvṛdhē । ju̠ṣā̠ṇō a̠gnirājya̍sya vētu ।
sōma̍ gī̠rbhiṣṭvā̍ va̠yam । va̠rdhayā̍mō vachō̠vida̍ḥ । su̠mṛ̠ḍī̠kō na̠ āvi̍śa ।
ju̠ṣā̠ṇa-ssōma̠ ājya̍sya ha̠viṣō̍ vētu ॥ 9 ॥
(svāgṃ ṣaṭcha̍) (a. 6)

anuvākaṃ 7 - haviṣāṃ yājyānuvākyāḥ
a̠gni-rmū̠rdhā di̠vaḥ ka̠kut । pati̍ḥ pṛthi̠vyā a̠yam ।
a̠pāgṃ rētāgṃ̍si jinvati । bhuvō̍ ya̠jñasya̠ raja̍saścha nē̠tā । yatrā̍ ni̠yudbhi̠-ssacha̍sē śi̠vābhi̍ḥ । di̠vi mū̠rdhāna̍-ndadhiṣē suva̠r̠ṣām ।
ji̠hvāma̍gnē chakṛṣē havya̠vāha̎m । prajā̍patē̠ na tvadē̠tānya̠nyaḥ । viśvā̍ jā̠tāni̠ pari̠ tā ba̍bhūva ।
yat-kā̍māstē juhu̠mastannō̍ astu ॥ 10 ॥

va̠yagg syā̍ma̠ pata̍yō rayī̠ṇām । sa vē̍da pu̠traḥ pi̠tara̠gṃ̠ sa mā̠tara̎m । sa sū̠nurbhu̍va̠thsa bhu̍va̠tpuna̍rmaghaḥ । sa dyāmaurṇō̍da̠ntari̍kṣa̠gṃ̠ sa suva̍ḥ । sa viśvā̠ bhuvō̍ abhava̠thsa ā-'bha̍vat । agnī̍ṣōmā̠ savē̍dasā । sahū̍tī vanata̠-ṅgira̍ḥ । sa-ndē̍va̠trā ba̍bhūvathuḥ । yu̠vamē̠tāni̍ di̠vi rō̍cha̠nāni̍ ।
a̠gniścha̍ sōma̠ sakra̍tū adhattam ॥ 11 ॥

yu̠vagṃ sindhūgṃ̍ ra̠bhiśa̍stē-rava̠dyāt । agnī̍ṣōmā̠-vamu̍ñchata-ṅgṛbhī̠tān ।
indrā̎gnī rōcha̠nā di̠vaḥ । pari̠ vājē̍ṣu bhūṣathaḥ ।
tadvā̎-ñchēti̠ pravī̠rya̎m । śnatha̍dvṛ̠tramu̠ta sa̍nōti̠ vāja̎m । indrā̠ yō a̠gnī sahu̍rī sapa̠ryāt ।
i̠ra̠jyantā̍ vasa̠vya̍sya̠ bhūrē̎ḥ । saha̍stamā̠ saha̍sā vāja̠yantā̎ । ēndra̍ sāna̠sigṃ ra̠yim ॥ 12 ॥
sa̠jitvā̍nagṃ sadā̠saha̎m । varṣi̍ṣṭhamū̠tayē̍ bhara । prasa̍sāhiṣē puruhūta̠ śatrūn̍ । jyēṣṭha̍stē̠ śuṣma̍ i̠ha rā̠tira̍stu । indrābha̍ra̠ dakṣi̍ṇēnā̠ vasū̍ni । pati̠-ssindhū̍nāmasi rē̠vatī̍nām । ma̠hāgṃ indrō̠ ya ōja̍sā । pa̠rjanyō̍ vṛṣṭi̠māgṃ i̍va ।
stōmai̎rva̠thsasya̍ vāvṛdhē ।
ma̠hāṃ indrō̍ nṛ̠vadācha̍rṣaṇi̠prāḥ ॥ 13 ॥

u̠ta dvi̠barhā̍ ami̠na-ssahō̍bhiḥ । a̠sma̠driya̍gvāvṛdhē vī̠ryā̍ya ।
u̠ruḥ pṛ̠thu-ssukṛ̍taḥ ka̠rtṛbhi̍rbhūt ।
pi̠prī̠hi dē̠vāgṃ u̍śa̠tō ya̍viṣṭha ।
vi̠dvāṃ ṛtūgṃr-ṛ̍tupatē yajē̠ha ।
yē daivyā̍ ṛ̠tvija̠stēbhi̍ragnē ।
tvagṃ hōtṝ̍ṇāma̠syāya̍jiṣṭhaḥ ॥
a̠gnigg svi̍ṣṭa̠kṛta̎m । ayā̍ḍa̠gnira̠gnēḥ pri̠yā dhāmā̍ni । ayā̠ṭthsōma̍sya pri̠yā dhāmā̍ni ॥ 14 ॥

ayā̍ḍa̠gnēḥ pri̠yā dhāmā̍ni । ayā̎ṭpra̠jāpa̍tēḥ pri̠yā dhāmā̍ni । ayā̍ḍa̠gnīṣōma̍yōḥ pri̠yā dhāmā̍ni । ayā̍ḍindrāgni̠yōḥ pri̠yā dhāmā̍ni ।
ayā̠ḍindra̍sya pri̠yā dhāmā̍ni । ayā̎ṇmahē̠ndrasya̍ pri̠yā dhāmā̍ni । ayā̎ḍdē̠vānā̍-mājya̠pānā̎-mpri̠yā dhāmā̍ni । yakṣa̍da̠gnēr-hōtu̍ḥ pri̠yā dhāmā̍ni । yakṣa̠thsva-mma̍hi̠māna̎m । āya̍jatā̠mējyā̠ iṣa̍ḥ । kṛ̠ṇōtu̠ sō a̍ddhva̠rā jā̠tavē̍dāḥ । ju̠ṣatāgṃ̍ ha̠viḥ । agnē̠ yada̠dya vi̠śō a̍ddhvarasya hōtaḥ ।
pāva̍ka śōchē̠ vēṣṭvagṃ hi yajvā̎ । ṛ̠tā ya̍jāsi mahi̠nā vi yadbhūḥ ।
ha̠vyā va̍ha yaviṣṭha̠ yā tē̍ a̠dya ॥ 15 ॥
(a̠stva̠ - dha̠tta̠gṃ - ra̠yiṃ - cha̍rṣaṇi̠prāḥ - sōma̍sya pri̠yā dhāmā̠ - nīṣa̠-ṣṣaṭcha̍) (a. 7)

anuvākaṃ 8 - iḍōpāhvānām
upa̍hūtagṃ rathanta̠ragṃ sa̠ha pṛ̍thi̠vyā ।
upa̍ mā rathanta̠ragṃ sa̠ha pṛ̍thi̠vyā hva̍yatām ।
upa̍hūtaṃ vāmadē̠vyagṃ sa̠hāntari̍kṣēṇa ।
upa̍ mā vāmadē̠vyagṃ sa̠hāntari̍kṣēṇa hvayatām ।
upa̍ hūta-mbṛ̠hathsa̠ha di̠vā । upa̍ mā bṛ̠hathsa̠ha di̠vā hva̍yatām । upa̍hūtā-ssa̠pta hōtrā̎ḥ ।
upa̍ mā sa̠pta hōtrā̎ hvayantām । upa̍hūtā dhē̠nu-ssa̠harṣa̍bhā । upa̍ mā dhē̠nu-ssa̠harṣa̍bhā hvayatām ॥ 16 ॥

upa̍hūtō bha̠kṣa-ssakhā̎ । upa̍ mā bha̠kṣa-ssakhā̎ hvayatām । upa̍hū̠tāँ(4) hō । iḍōpa̍hūtā । upa̍hū̠tēḍā̎ । upō̍ a̠smāgṃ iḍā̎ hvayatām । iḍōpa̍hūtā । upa̍hū̠tēḍā̎ । mā̠na̠vī ghṛ̠tapa̍dī maitrāvaru̠ṇī ।
brahma̍ dē̠vakṛ̍ta̠mupa̍hūtam ॥ 17 ॥

daivyā̍ addhva̠ryava̠ upa̍hūtāḥ । upa̍hūtā manu̠ṣyā̎ḥ । ya i̠maṃ ya̠jñamavān̍ । yē ya̠jñapa̍ti̠ṃ vardhān̍ । upa̍hūtē̠ dyāvā̍pṛthi̠vī ।
pū̠rva̠jē ṛ̠tāva̍rī । dē̠vī dē̠vapu̍trē । upa̍hūtō̠-'yaṃ yaja̍mānaḥ । utta̍rasyā-ndēvaya̠jyāyā̠-mupa̍hūtaḥ । bhūya̍si havi̠ṣkara̍ṇa̠ upa̍hūtaḥ ।
di̠vyē dhāma̠nnupa̍hūtaḥ ।
i̠da-mmē̍ dē̠vā ha̠virju̍ṣantā̠miti̠ tasmi̠nnupa̍hūtaḥ ।
viśva̍masya pri̠yamupa̍hūtam ।
viśva̍sya pri̠yasyōpa̍hūta̠syōpa̍hūtaḥ ॥ 18 ॥
(sa̠harṣa̍bhā hvayatā̠ - mupa̍hūtagṃ - havi̠ṣkara̍ṇa̠ upa̍hūtaścha̠tvāri̍ cha) (a. 8)

anuvākaṃ 9 - anūyājāḥ
dē̠va-mba̠r̠hiḥ । va̠su̠vanē̍ vasu̠dhēya̍sya vētu । dē̠vō narā̠śagṃ sa̍ḥ । va̠su̠vanē̍ vasu̠dhēya̍sya vētu । dē̠vō a̠gni-ssvi̍ṣṭa̠kṛt । su̠dravi̍ṇā ma̠ndraḥ ka̠viḥ । sa̠tyama̍nmā-''ya̠jī hōtā̎ । hōtu̍r-hōtu̠rāya̍jīyān । agnē̠ yān-dē̠vānayā̎ṭ । yāgṃ api̍prēḥ । yē tē̍ hō̠trē ama̍thsata । tāgṃ sa̍sa̠nuṣī̠gṃ̠ hōtrā̎-ndēva-ṅga̠mām । di̠vi dē̠vēṣu̍ ya̠jñamēra̍yē̠mam । svi̠ṣṭa̠kṛchchāgnē̠ hōtā-'bhū̎ḥ ।
va̠su̠vanē̍ vasu̠dhēya̍sya namōvā̠kē vīhi̍ ॥ 19 ॥
(api̍prē̠ḥ pañcha̍ cha) (a. 9)

anuvākaṃ 10 - sūktāvākaḥ
i̠da-ndyā̍vāpṛthivī bha̠drama̍bhūt ।
ārdhma̍ sūktavā̠kam । u̠ta na̍mōvā̠kam ।
ṛ̠ddhyāsma̍ sū̠ktōchya̍magnē । tvagṃ sū̎kta̠vāga̍si ।
upa̍śritō di̠vaḥ pṛ̍thi̠vyōḥ । ōma̍nvatī tē̠-'smin. ya̠jñē ya̍jamāna̠ dyāvā̍pṛthi̠vī stā̎m ।
śa̠gaṃ̠yē jī̠radā̍nū । atra̍snū̠ apra̍vēdē ।
u̠ruga̍vyūtī abhaya̠-ṅkṛtau̎ ॥ 20 ॥

vṛ̠ṣṭidyā̍vā rī̠tyā̍pā । śa̠mbhuvau̍ mayō̠bhuvau̎ ।
ūrja̍svatī cha̠ paya̍svatī cha । sū̠pa̠cha̠ra̠ṇā cha̍ svadhichara̠ṇā cha̍ । tayō̍rā̠vidi̍ ॥
a̠gniri̠dagṃ ha̠vira̍juṣata । avī̍vṛdhata̠ mahō̠ jyāyō̍-'kṛta । sōma̍ i̠dagṃ ha̠vira̍juṣata । avī̍vṛdhata̠ mahō̠ jyāyō̍-'kṛta ।
a̠gniri̠dagṃ ha̠vira̍juṣata ॥ 21 ॥

avī̍vṛdhata̠ mahō̠ jyāyō̍-'kṛta । pra̠jāpa̍tiri̠dagṃ ha̠vira̍juṣata । avī̍vṛdhata̠ mahō̠ jyāyō̍-'kṛta । a̠gnīṣōmā̍vi̠dagṃ ha̠vira̍juṣētām ।
avī̍vṛdhētā̠-mmahō̠ jyāyō̎-'krātām ।
i̠ndrā̠gnī i̠dagṃ ha̠vira̍juṣētām ।
avī̍vṛdhētā̠-mmahō̠ jyāyō̎-'krātām । indra̍ i̠dagṃ ha̠vira̍juṣata । avī̍vṛdhata̠ mahō̠ jyāyō̍-'kṛta । ma̠hē̠ndra i̠dagṃ ha̠vira̍juṣata ॥ 22 ॥

avī̍vṛdhata̠ mahō̠ jyāyō̍-'kṛta । dē̠vā ā̎jya̠pā ājya̍majuṣanta । avī̍vṛdhanta̠ mahō̠ jyāyō̎-'krata । a̠gnirhō̠trēṇē̠dagṃ ha̠vira̍juṣata ।
avī̍vṛdhata̠ mahō̠ jyāyō̍-'kṛta ।
a̠syāmṛdha̠-ddhōtrā̍yā-ndēvaṅga̠māyā̎m ।
āśā̎stē̠-'yaṃ yaja̍mānō̠-'sau ॥
āyu̠rāśā̎stē । su̠pra̠jā̠stva-māśā̎stē ।
sa̠jā̠ta̠va̠na̠syā-māśā̎stē ॥ 23 ॥

utta̍rā-ndēvaya̠jyā-māśā̎stē । bhūyō̍ havi̠ṣkara̍ṇa̠-māśā̎stē । di̠vya-ndhāmāśā̎stē । viśva̍-mpri̠yamāśā̎stē । yada̠nēna̍ ha̠viṣā ''śā̎stē । tada̍śyā̠t-tadṛ̍ddhyāt । tada̍smai dē̠vā rā̍santām । tada̠gni-rdē̠vō dē̠vēbhyō̠ vana̍tē । va̠yama̠gnē-rmānu̍ṣāḥ । i̠ṣṭa-ñcha̍ vī̠ta-ñcha̍ । u̠bhē cha̍ nō̠ dyāvā̍pṛthi̠vī agṃha̍saspātām ।
i̠ha gati̍-rvā̠masyē̠da-ñcha̍ । namō̍ dē̠vēbhya̍ḥ ॥ 24 ॥
(a̠bha̠ya̠ṅkṛtā̍vakṛ - tā̠gniri̠dagṃ ha̠vira̍juṣata - mahē̠ndra i̠dagṃ ha̠vira̍juṣata - sajātavana̠syāmāśā̎stē - vī̠ta-ñcha̠ trīṇi̍ cha) (a. 10)

anuvākaṃ 11 - śaṃyuvākaḥ
tachCha̠ṃ yōrā vṛ̍ṇīmahē । gā̠tuṃ ya̠jñāya̍ । gā̠tuṃ ya̠jñapa̍tayē । daivī̎ sva̠stira̍stu naḥ । sva̠sti-rmānu̍ṣēbhyaḥ । ū̠rdhva-ñji̍gātu bhēṣa̠jam ।
śa-nnō̍ astu dvi̠padē̎ । śa-ñchatu̍ṣpadē ॥ 25 ॥
(tachCha̠ṃ yōra̠ṣṭau) (a. 11)

anuvākaṃ 12 - patnīsaṃyājānāṃ yājyānuvākyāḥ
ā pyā̍yasva̠ samē̍tu tē vi̠śvata̍-ssōma̠ vṛṣṇi̍yam । bhavā̠ vāja̍sya saṅga̠thē ॥ sa-ntē̠ payāgṃ ̍si̠ samu̍ yantu̠ vājā̠-ssaṃ vṛṣṇi̍yā-nyabhimāti̠ṣāha̍ḥ । ā̠pyāya̍mānō a̠mṛtā̍ya sōma di̠vi śravāg̍syutta̠māni̍ dhiṣva ॥ ॥
i̠ha tvaṣṭā̍ramagri̠yaṃ vi̠śvarū̍pa̠mupa̍ hvayē । a̠smāka̍mastu̠ kēva̍laḥ ॥ tanna̍stu̠rīpa̠madha̍ pōṣayi̠tnu dēva̍ tvaṣṭa̠rvi ra̍rā̠ṇa-ssya̍sva । yatō̍ vī̠raḥ ka̍rma̠ṇya̍-ssu̠dakṣō̍ yu̠ktagrā̍vā̠ jāya̍tē dē̠vakā̍maḥ ॥ ॥
dē̠vānā̠-mpatnī̍ruśa̠tīra̍vantu naḥ । prāva̍ntu nastu̠jayē̠ vāja̍sātayē । yāḥ pārthi̍vāsō̠ yā a̠pāmapi̍ vra̠tē । tā nō̍ dēvī-ssuhavā̠-śśarma̍ yachChata ॥ u̠ta gnā vi̍yantu dē̠vapa̍tnīḥ । i̠ndrā̠ṇya̍gnāyya̠śvinī̠ rāṭ । ā rōda̍sī varuṇā̠nī śṛ̍ṇōtu ।
vi̠yantu̍ dē̠vīrya ṛ̠turjanī̍nām ॥ 26 ॥

a̠gnir-hōtā̍ gṛ̠hapa̍ti̠-ssa rājā̎ । viśvā̍ vēda̠ jani̍mā jā̠tavē̍dāḥ । dē̠vānā̍mu̠ta yō martyā̍nām । yaji̍ṣṭha̠-ssa praya̍jatāmṛ̠tāvā̎ ॥
va̠yamu̍ tvā gṛhapatē̠ janā̍nām । agnē̠ aka̍rma sa̠midhā̍ bṛ̠hanta̎m । a̠sthū̠riṇō̠ gārha̍patyāni santu । ti̠gmēna̍ na̠stēja̍sā̠ sagṃśi̍śādhi ॥ 27 ॥
(janī̍nā - +ma̠ṣṭau cha̍) (a. 12)
anuvākaṃ 13 - patnīsaṃyājē sōmāhvānam
upa̍hūtagṃ rathanta̠ragṃ sa̠ha pṛ̍thi̠vyā ।
upa̍ mā rathanta̠ragṃ sa̠ha pṛ̍thi̠vyā hva̍yatām ।
upa̍hūtaṃ vāmadē̠vyagṃ sa̠hāntari̍kṣēṇa ।
upa̍ mā vāmadē̠vyagṃ sa̠hāntari̍kṣēṇa hvayatām । upa̍hūta-mbṛ̠hathsa̠ha di̠vā । upa̍ mā bṛ̠hathsa̠ha di̠vā hva̍yatām । upa̍hūtā-ssa̠pta hōtrā̎ḥ ।
upa̍ mā sa̠pta hōtrā̎ hvayantām । upa̍hūtā dhē̠nu-ssa̠harṣa̍bhā । upa̍ mā dhē̠nu-ssa̠harṣa̍bhā hvayatām ॥ 28 ॥

daivyā̍ addhva̠ryava̠ upa̍hūtāḥ । upa̍hūtā manu̠ṣyā̎ḥ । ya i̠maṃ ya̠jñamavān̍ । yē ya̠jñapa̍tnī̠ṃ vardhān̍ । upa̍hūtē̠ dyāvā̍pṛthi̠vī । pū̠rva̠jē ṛ̠tāva̍rī । dē̠vī dē̠vapu̍trē । upa̍hūtē̠yaṃ yaja̍mānā । i̠ndrā̠ṇīvā̍vidha̠vā । adi̍tiriva supu̠trā । utta̍rasyā-ndēvaya̠jyāyā̠-mupa̍hūtā ।
bhūya̍si havi̠ṣkara̍ṇa̠ upa̍hūtā । di̠vyē dhāma̠nnupa̍hūtā । i̠da-mmē̍ dē̠vā ha̠vi-rju̍ṣantā̠miti̠ tasmi̠-nnupa̍hūtā । viśva̍masyāḥ pri̠yamupa̍hūtam ।
viśva̍sya pri̠yasyōpa̍hūta̠syōpa̍hūtā ॥ 30 ॥
(sa̠harṣa̍bhā hvayatā̠ - mupa̍hūtagṃ - supu̠trā ṣaṭcha̍) (a. 13)

(sa̠tyaṃ - pravō - 'gnē̍ ma̠hā - na̠gnir-hōtā̍ - sa̠midhō̠ - 'gni-rvṛ̠trāṇya̠ - gni-rmū̠rdhō - pa̍hūtaṃ - dē̠va-mba̠r̠hi - ri̠da-ndyā̍vāpṛthivī̠ -tachCha̠ṃyō- rā pyā̍ya̠svō - pa̍hūta̠-ntrayō̍daśa)

(sa̠tyaṃ - ँva̠yagg syā̍ma - vṛ̠ṣṭidyā̍vā tri̠gṃ̠śat)

(sa̠tya-mupa̍hūtā)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē tṛtīyāṣṭakē pañchama prapāṭhaka-ssamāptaḥ ॥

Browse Related Categories: