కృష్ణ యజుర్వేదీయ తైత్తిరీయ బ్రాహ్మణే ద్వితీయాష్టకే సప్తమః ప్రపాఠకః - సవా ఏకాహవిశేషాః

ఓ-న్నమః పరమాత్మనే, శ్రీ మహాగణపతయే నమః,
శ్రీ గురుభ్యో నమః । హ॒రిః॒ ఓమ్ ॥

2.7.1 అనువాకం - బృహస్పతిసవః

త్రి॒వృ-థ్స్తోమో॑ భవతి । బ్ర॒హ్మ॒వ॒ర్చ॒సం-వైఀ త్రి॒వృత్ । బ్ర॒హ్మ॒వ॒ర్చ॒సమే॒వావ॑రున్ధే ॥ అ॒గ్ని॒ష్టో॒మ-స్సోమో॑ భవతి । బ్ర॒హ్మ॒వ॒ర్చ॒సం-వాఀ అ॑గ్నిష్టో॒మః । బ్ర॒హ్మ॒వ॒ర్చ॒సమే॒వావ॑రున్ధే ॥ ర॒థ॒తంర॒గ్ం సామ॑ భవతి । బ్ర॒హ్మ॒వ॒ర్చ॒సం-వైఀ ర॑థన్త॒రమ్ । బ్ర॒హ్మ॒వ॒ర్చ॒సమే॒వావ॑రున్ధే ॥ ప॒రి॒స్ర॒జీ హోతా॑ భవతి ॥ 1 ॥

అ॒రు॒ణో మి॑ర్మి॒రస్త్రిశు॑క్రః । ఏ॒త-ద్వై బ్ర॑హ్మవర్చ॒సస్య॑ రూ॒పమ్ । రూ॒పేణై॒వ బ్ర॑హ్మవర్చ॒సమవ॑రున్ధే ॥ బృహ॒స్పతి॑-రకామయత దే॒వానా᳚-మ్పురో॒ధా-ఙ్గ॑చ్ఛేయ॒మితి॑ । స ఏ॒త-మ్బృ॑హస్పతిస॒వమ॑పశ్యత్ । తమా-ఽహ॑రత్ । తేనా॑యజత । తతో॒ వై స దే॒వానా᳚-మ్పురో॒ధా-మ॑గచ్ఛత్ । యః పు॑రో॒ధాకా॑మ॒-స్స్యాత్ । స బృ॑హస్పతిస॒వేన॑ యజేత ॥ 2 ॥

పు॒రో॒ధామే॒వ గ॑చ్ఛతి ॥ తస్య॑ ప్రాతస్సవ॒నే స॒న్నేషు॑ నారాశ॒గ్ం॒సేషు॑ । ఏకా॑దశ॒ దఖ్షి॑ణా నీయన్తే । ఏకా॑దశ॒ మాద్ధ్య॑దిన్నే॒ సవ॑నే స॒న్నేషు॑ నారాశ॒గ్ం॒సేషు॑ । ఏకా॑దశ తృతీయసవ॒నే స॒న్నేషు॑ నారాశ॒గ్ం॒సేషు॑ । త్రయ॑స్త్రిగ్ంశ॒-థ్సమ్ప॑ద్యన్తే । త్రయ॑స్త్రిగ్ంశ॒-ద్వై దే॒వతాః᳚ । దే॒వతా॑ ఏ॒వావ॑రున్ధే ॥ అశ్వ॑శ్చతుస్త్రి॒గ్ం॒శః । ప్రా॒జా॒ప॒త్యో వా అశ్వః॑ ॥ 3 ॥

ప్ర॒జాప॑తి-శ్చతుస్త్రి॒గ్ం॒శో దే॒వతా॑నామ్ । యావ॑తీరే॒వ దే॒వతాః᳚ । తా ఏ॒వావ॑రున్ధే ॥ కృ॒ష్ణా॒జి॒నే॑ ఽభిషి॑ఞ్చతి । బ్రహ్మ॑ణో॒ వా ఏ॒త-ద్రూ॒పమ్ । య-త్కృ॑ష్ణాజి॒నమ్ । బ్ర॒హ్మ॒వ॒ర్చ॒సేనై॒వైన॒గ్ం॒ సమ॑ర్ధయతి ॥ ఆజ్యే॑నా॒భిషి॑ఞ్చతి । తేజో॒ వా ఆజ్య᳚మ్ । తేజ॑ ఏ॒వాస్మి॑-న్దధాతి ॥ 4 ॥
(హోతా॑ భవతి - యజేత॒ - వా అశ్వో॑ - దధాతి) (అ. 1)

2.7.2 అనువాకం - వైశ్యసవః
యదా᳚గ్నే॒యో భవ॑తి । అ॒గ్నిము॑ఖా॒ హ్యృద్ధిః॑ ॥ అథ॒ య-త్పౌ॒ష్ణః । పుష్టి॒ర్వై పూ॒షా । పుష్టి॒-ర్వైశ్య॑స్య । పుష్టి॑మే॒వావ॑రున్ధే ॥ ప్ర॒స॒వాయ॑ సావి॒త్రః ॥ అథ॒ య-త్త్వా॒ష్ట్రః । త్వష్టా॒ హి రూ॒పాణి॑ విక॒రోతి॑ ॥ ని॒ర్వ॒రు॒ణ॒త్వాయ॑ వారు॒ణః ॥ 5 ॥

అథో॒ య ఏ॒వ కశ్చ॒ సన్​థ్సూ॒యతే᳚ । స హి వా॑రు॒ణః ॥ అథ॒ య-ద్వై᳚శ్వదే॒వః । వై॒శ్వ॒దే॒వో హి వైశ్యః॑ ॥ అథ॒ య-న్మా॑రు॒తః । మా॒రు॒తో హి వైశ్యః॑ ॥ స॒ప్తైతాని॑ హ॒వీగ్ంషి॑ భవన్తి । స॒ప్తగ॑ణా॒ వై మ॒రుతః॑ ॥ పృశ్నిః॑ పష్ఠౌ॒హీ మా॑రు॒త్యాల॑భ్యతే । విడ్వై మ॒రుతః॑ ॥ విశ॑ ఏ॒వైత-న్మ॑ద్ధ్య॒తో॑-ఽభిషి॑చ్యతే । తస్మా॒-ద్వా ఏ॒ష వి॒శః ప్రి॒యః । వి॒శో హి మ॑ద్ధ్య॒తో॑-ఽభిషి॒చ్యతే᳚ ॥ ఋ॒ష॒భ॒చ॒ర్మే-ఽద్ధ్య॒భిషి॑ఞ్చతి । స హి ప్ర॑జనయి॒తా ॥ ద॒ద్ధ్నా-ఽభిషి॑ఞ్చతి । ఊర్గ్వా అ॒న్నాద్య॒-న్దధి॑ । ఊ॒ర్జైవైన॑-మ॒న్నాద్యే॑న॒ సమ॑ర్ధయతి ॥ 6 ॥
(వా॒రు॒ణో - విడ్వై మ॒రుతో॒-ఽష్టౌ చ॑) (అ. 2)

అనువాకం 3 - బ్రాహ్మణసవః
యదా᳚గ్నే॒యో భవ॑తి । ఆ॒గ్నే॒యో వై బ్రా᳚హ్మ॒ణః ॥ అథ॒ య-థ్సౌ॒మ్యః । సౌ॒మ్యో హి బ్రా᳚హ్మ॒ణః ॥ ప్ర॒స॒వాయై॒వ సా॑వి॒త్రః ॥ అథ॒ య-ద్బా॑ర్​హస్ప॒త్యః । ఏ॒తద్వై బ్రా᳚హ్మ॒ణస్య॑ వాక్ప॒తీయ᳚మ్ ॥ అథ॒ యద॑గ్నీషో॒మీయః॑ । ఆ॒గ్నే॒యో వై బ్రా᳚హ్మ॒ణః । తౌ య॒దా స॒గఞ్చ్ఛే॑తే ॥ 7 ॥

అథ॑ వీ॒ర్యా॑వత్తరో భవతి ॥ అథ॒ య-థ్సా॑రస్వ॒తః । ఏ॒తద్ధి ప్ర॒త్యఖ్ష॑-మ్బ్రాహ్మ॒ణస్య॑ వాక్ప॒తీయ᳚మ్ ॥ ని॒ర్వ॒రు॒ణ॒త్వాయై॒వ వా॑రు॒ణః । అథో॒ య ఏ॒వ కశ్చ॒ సన్​థ్సూ॒యతే᳚ । స హి వా॑రు॒ణః ॥ అథ॒ య-ద్ద్యా॑వాపృథి॒వ్యః॑ । ఇన్ద్రో॑ వృ॒త్రాయ॒ వజ్ర॒ముద॑యచ్ఛత్ । త-న్ద్యావా॑పృథి॒వీ నాన్వ॑మన్యేతామ్ । తమే॒తేనై॒వ భా॑గ॒ధేయే॒నా-న్వ॑మన్యేతామ్ ॥ 8 ॥

వజ్ర॑స్య॒ వా ఏ॒షో॑-ఽనుమా॒నాయ॑ । అను॑మతవజ్ర-స్సూయాతా॒ ఇతి॑ ॥ అ॒ష్టావే॒తాని॑ హ॒వీగ్ంషి॑ భవన్తి । అ॒ష్టాఖ్ష॑రా గాయ॒త్రీ । గా॒య॒త్రీ బ్ర॑హ్మవర్చ॒సమ్ । గా॒య॒త్రి॒యైవ బ్ర॑హ్మవర్చ॒సమవ॑రున్ధే ॥ హిర॑ణ్యేన ఘృ॒తము-త్పు॑నాతి । తేజ॑స ఏ॒వ రు॒చే ॥ కృ॒ష్ణా॒జి॒నే॑-ఽభిషి॑ఞ్చతి । బ్రహ్మ॑ణో॒ వా ఏ॒తదృ॑ఖ్సా॒మయో॑ రూ॒పమ్ । య-త్కృ॑ష్ణాజి॒నమ్ । బ్రహ్మ॑న్నే॒వైన॑-మృఖ్సా॒మయో॒-రద్ధ్య॒భిషి॑ఞ్చతి ॥ ఘృ॒తేనా॒-భిషి॑ఞ్చతి । తథా॑ వీ॒ర్యా॑వత్తరో భవతి ॥ 9 ॥
(స॒గఞ్చ్ఛే॑తే - భాగ॒ధేయే॒నాన్వ॑మన్యేతాగ్ం - రూ॒ప-ఞ్చ॒త్వారి॑ చ) (అ. 3)

అనువాకం 4 - సోమసవః
న వై సోమే॑న॒ సోమ॑స్య స॒వో᳚-ఽస్తి । హ॒తో హ్యే॑షః । అ॒భిషు॑తో॒ హ్యే॑షః । న హి హ॒త-స్సూ॒యతే᳚ । సౌ॒మీగ్ం సూ॒తవ॑శా॒మాల॑భతే । సోమో॒ వై రే॑తో॒ధాః । రేత॑ ఏ॒వ త-ద్ద॑ధాతి ॥ సౌ॒మ్యర్చా ఽభిషి॑ఞ్చతి । రే॒తో॒ధా హ్య॑షా । రేత॒-స్సోమః॑ । రేత॑ ఏ॒వాస్మి॑-న్దధాతి ॥ య-త్కిఞ్చ రాజ॒సూయ॑మృ॒తే సోమ᳚మ్ । త-థ్సర్వ॑-మ్భవతి ॥ అషా॑ఢం-యుఀ॒థ్సు పృత॑నాసు॒ పప్రి᳚మ్ । సు॒వ॒ర॒.షామ॒ఫ్స్వాం-వృఀ॒జన॑స్య గో॒పామ్ । భ॒రే॒షు॒జాగ్ం సు॑ఖ్షి॒తిగ్ం సు॒శ్రవ॑సమ్ । జయ॑న్త॒-న్త్వామను॑ మదేమ సోమ ॥ 10 ॥
(రేత॒-స్సోమ॑-స్స॒ప్త చ॑ ) (అ. 4)

అనువాకం 5 - పృథిసవః
యో వై సోమే॑న సూ॒యతే᳚ । స దే॑వస॒వః । యః ప॒శునా॑ సూ॒యతే᳚ । స దే॑వస॒వః । య ఇష్ట్యా॑ సూ॒యతే᳚ । స మ॑నుష్యస॒వః । ఏ॒తం-వైఀ పృథ॑యే దే॒వాః ప్రాయ॑చ్ఛన్న్ । తతో॒ వై సో-ఽప్యా॑ర॒ణ్యానా᳚-మ్పశూ॒నామ॑సూయత । యావ॑తీః॒ కియ॑తీశ్చ ప్ర॒జా వాచం॒-వఀద॑న్తి । తాసా॒గ్ం॒ సర్వా॑సాగ్ం సూయతే ॥ 11 ॥

య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ నా॒రా॒శ॒గ్గ్॒స్యర్చా ఽభిషి॑ఞ్చతి । మ॒ను॒ష్యా॑ వై నరా॒శగ్ంసః॑ । ని॒హ్నుత్య॒ వావైతత్ । అథా॒భిషి॑ఞ్చతి ॥ య-త్కిఞ్చ॑ రాజ॒సూయ॑-మనుత్తరవే॒దీక᳚మ్ । త-థ్సర్వ॑-మ్భవతి ॥ యే మే॑ పఞ్చా॒శత॑-న్ద॒దుః । అశ్వా॑నాగ్ం స॒ధస్తు॑తిః । ద్యు॒మద॑గ్నే॒ మహి॒ శ్రవః॑ । బృ॒హ-త్కృ॑ధి మ॒ఘోనా᳚మ్ । నృ॒వద॑మృత నృ॒ణామ్ ॥ 12 ॥
(సూ॒య॒తే॒ - స॒ధస్తు॑తి॒స్త్రీణి॑ చ) (అ. 5)

అనువాకం 6 - గోసవః
ఏ॒ష గో॑స॒వః । ష॒ట్త్రి॒గ్ం॒శ ఉ॒క్థ్యో॑ బృ॒హ-థ్సా॑మా । పవ॑మానే కణ్వరథన్త॒ర-మ్భ॑వతి ॥ యో వై వా॑జ॒పేయః॑ । స స॑మ్రాట్థ్స॒వః । యో రా॑జ॒సూయః॑ । స వ॑రుణస॒వః । ప్ర॒జాప॑తి॒-స్స్వారా᳚జ్య-మ్పరమే॒ష్ఠీ । స్వారా᳚జ్య॒-ఙ్గౌరే॒వ ॥ గౌరి॑వ భవతి ॥ 13 ॥

య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ ఉ॒భే బృ॑హ-ద్రథన్త॒రే భ॑వతః । తద్ధి స్వారా᳚జ్యమ్ ॥ అ॒యుత॒-న్దఖ్షి॑ణాః । తద్ధి స్వారా᳚జ్యమ్ ॥ ప్ర॒తి॒ధుషా॒ ఽభిషి॑ఞ్చతి । తద్ధి స్వారా᳚జ్యమ్ ॥ అను॑ద్ధతే॒ వేద్యై॑ దఖ్షిణ॒త ఆ॑హవ॒నీయ॑స్య బృహ॒త-స్స్తో॒త్ర-మ్ప్రత్య॒భిషి॑ఞ్చతి । ఇ॒యం-వాఀవ ర॑థన్త॒రమ్ ॥ 14 ॥

అ॒సౌ బృ॒హత్ । అ॒నయో॑రే॒వైన॒-మన॑న్తర్​హిత-మ॒భిషి॑ఞ్చతి ॥ ప॒శు॒స్తో॒మో వా ఏ॒షః । తేన॑ గోస॒వః । ష॒ట్త్రి॒గ్ం॒శ-స్సర్వః॑ ॥ రే॒వజ్జా॒త-స్సహ॑సా వృ॒ద్ధః । ఖ్ష॒త్రాణా᳚-ఙ్ఖ్షత్ర॒భృత్త॑మో వయో॒ధాః । మ॒హా-న్మ॑హి॒త్వే త॑స్తభా॒నః । ఖ్ష॒త్రే రా॒ష్ట్రే చ॑ జాగృహి । ప్ర॒జాప॑తేస్త్వా పరమే॒ష్ఠిన॒-స్స్వారా᳚జ్యేనా॒భిషి॑ఞ్చా॒-మీత్యా॑హ ॥ స్వారా᳚జ్య-మే॒వైన॑-ఙ్గమయతి ॥ 15 ॥
(ఇ॒వ॒ భ॒వ॒తి॒ - ర॒థ॒న్త॒ర - మా॒హైక॑-ఞ్చ) (అ. 6)

అనువాకం 7 - ఓదనసవమన్త్రాః
సి॒గ్ం॒హే వ్యా॒ఘ్ర ఉ॒త యా పృదా॑కౌ । త్విషి॑ర॒గ్నౌ బ్రా᳚హ్మ॒ణే సూర్యే॒ యా । ఇన్ద్రం॒-యాఀ దే॒వీ సు॒భగా॑ జ॒జాన॑ । సా న॒ ఆగ॒న్ వర్చ॑సా సం​విఀదా॒నా ॥ యా రా॑జ॒న్యే॑ దున్దు॒భావాయ॑తాయామ్ । అశ్వ॑స్య॒ క్రన్ద్యే॒ పురు॑షస్య మా॒యౌ । ఇన్ద్రం॒-యాఀ దే॒వీ సు॒భగా॑ జ॒జాన॑ । సా న॒ ఆగ॒న్ వర్చ॑సా సం​విఀదా॒నా ॥ యా హ॒స్తిని॑ ద్వీ॒పిని॒ యా హిర॑ణ్యే । త్విషి॒-రశ్వే॑షు॒ పురు॑షేషు॒ గోషు॑ ॥ 16 ॥

ఇన్ద్రం॒-యాఀ దే॒వీ సు॒భగా॑ జ॒జాన॑ । సా న॒ ఆగ॒న్ వర్చ॑సా సం​విఀదా॒నా ॥ రథే॑ అ॒ఖ్షేషు॑ వృష॒భస్య॒ వాజే᳚ । వాతే॑ ప॒ర్జన్యే॒ వరు॑ణస్య॒ శుష్మే᳚ । ఇన్ద్రం॒-యాఀ దే॒వీ సు॒భగా॑ జ॒జాన॑ । సా న॒ ఆగ॒న్ వర్చ॑సా సం​విఀదా॒నా ॥ రాడ॑సి వి॒రాడ॑సి । స॒మ్రాడ॑సి స్వ॒రాడ॑సి ॥ ఇన్ద్రా॑య త్వా॒ తేజ॑స్వతే॒ తేజ॑స్వన్తగ్గ్​ శ్రీణామి । ఇన్ద్రా॑య॒ త్వౌజ॑స్వత॒ ఓజ॑సవన్తగ్గ్​ శ్రీణామి ॥ 17 ॥

ఇన్ద్రా॑య త్వా॒ పయ॑స్వతే॒ పయ॑స్వన్తగ్గ్​ శ్రీణామి । ఇన్ద్రా॑య॒ త్వా-ఽఽయు॑ష్మత॒ ఆయు॑ష్మన్తగ్గ్​ శ్రీణామి ॥ తేజో॑-ఽసి । త-త్తే॒ ప్రయ॑చ్ఛామి । తేజ॑స్వదస్తు మే॒ ముఖ᳚మ్ । తేజ॑స్వ॒చ్ఛిరో॑ అస్తు మే । తేజ॑స్వాన్. వి॒శ్వతః॑ ప్ర॒త్యమ్ । తేజ॑సా॒ సమ్పి॑పృగ్ధి మా ॥ ఓజో॑-ఽసి । త-త్తే॒ ప్రయ॑చ్ఛామి ॥ 18 ॥

ఓజ॑స్వదస్తు మే॒ ముఖ᳚మ్ । ఓజ॑స్వ॒చ్ఛిరో॑ అస్తు మే । ఓజ॑స్వాన్. వి॒శ్వతః॑ ప్ర॒త్యమ్ । ఓజ॑సా॒ సమ్పి॑పృగ్ధి మా ॥ పయో॑-ఽసి । తత్తే॒ ప్రయ॑చ్ఛామి । పయ॑స్వదస్తు మే॒ ముఖ᳚మ్ । పయ॑స్వ॒చ్ఛిరో॑ అస్తు మే । పయ॑స్వాన్. వి॒శ్వతః॑ ప్ర॒త్యమ్ । పయ॑సా॒ సమ్పి॑పృగ్ధి మా ॥ 19 ॥

ఆయు॑రసి । త-త్తే॒ ప్రయ॑చ్ఛామి । ఆయు॑ష్మదస్తు మే॒ ముఖ᳚మ్ । ఆయు॑ష్మ॒చ్ఛిరో॑ అస్తు మే । ఆయు॑ష్మాన్. వి॒శ్వతః॑ ప్ర॒త్యమ్ । ఆయు॑షా॒ సమ్పి॑పృగ్ధి మా ॥ ఇ॒మమ॑గ్న॒ ఆయు॑షే॒ వర్చ॑సే కృధి । ప్రి॒యగ్ం రేతో॑ వరుణ సోమ రాజన్న్ । మా॒తేవా᳚స్మా అదితే॒ శర్మ॑ యచ్ఛ । విశ్వే॑ దేవా॒ జర॑దష్టి॒ర్యథా ఽస॑త్ ॥ 20 ॥

ఆయు॑రసి వి॒శ్వాయు॑రసి । స॒ర్వాయు॑రసి॒ సర్వ॒మాయు॑రసి ॥ యతో॒ వాతో॒ మనో॑ జవాః । యతః॒, ఖ్షర॑న్తి॒ సిన్ధ॑వః । తాసా᳚-న్త్వా॒ సర్వా॑సాగ్ం రు॒చా । అ॒భిషి॑ఞ్చామి॒ వర్చ॑సా ॥ స॒ము॒ద్ర ఇ॑వాసి గ॒హ్మనా᳚ । సోమ॑ ఇవా॒స్యదా᳚భ్యః । అ॒గ్నిరి॑వ వి॒శ్వతః॑ ప్ర॒త్యమ్ । సూర్య॑ ఇవ॒ జ్యోతి॑షా వి॒భూః ॥ 21 ॥

అ॒పాం-యోఀ ద్రవ॑ణే॒ రసః॑ । తమ॒హమ॒స్మా ఆ॑ముష్యాయ॒ణాయ॑ । తేజ॑సే బ్రహ్మవర్చ॒సాయ॑ గృహ్ణామి । అ॒పాం-యఀ ఊ॒ర్మౌ రసః॑ । తమ॒హమ॒స్మా ఆ॑ముష్యాయ॒ణాయ॑ । ఓజ॑సే వీ॒ర్యా॑య గృహ్ణామి । అ॒పాం-యోఀ మ॑ద్ధ్య॒తో రసః॑ । తమ॒హమ॒స్మా ఆ॑ముష్యాయ॒ణాయ॑ । పుష్ట్యై᳚ ప్ర॒జన॑నాయ గృహ్ణామి । అ॒పాం-యోఀ య॒జ్ఞియో॒ రసః॑ । తమ॒హమ॒స్మా ఆ॑ముష్యాయ॒ణాయ॑ । ఆయు॑షే దీర్ఘాయు॒త్వాయ॑ గృహ్ణామి ॥ 22 ॥
(గోష్ - వోజ॑స్వన్తగ్గ్​ శ్రీణా॒ - మ్యోజో॑-ఽసి॒ తత్తే॒ ప్రయ॑చ్ఛామి॒ - పయ॑సా॒ సమ్పి॑పృగ్ధి॒ మా-స॑-ద్- వి॒భూ--ర్ య॒జ్ఞియో॒ రసో॒ ద్వే చ॑) (అ. 7)

అనువాకం 8 - ఓదనసవగతా స్థారోహణమన్త్రాః
అ॒భిప్రేహి॑ వీ॒రయ॑స్వ । ఉ॒గ్రశ్చేత్తా॑ సపత్న॒హా ॥ ఆతి॑ష్ఠ మిత్ర॒వర్ధ॑నః । తుభ్య॑-న్దే॒వా అధి॑బ్రవన్న్ ॥ అ॒ఙ్కౌన్య॒ఙ్కా వ॒భితో॒ రథం॒-యౌఀ ధ్వా॒న్తం-వాఀ ॑తా॒గ్రమను॑ స॒చంర॑న్తౌ దూ॒రే హే॑తిరిన్ద్రి॒యావా᳚-న్పత॒త్రీ తే నో॒-ఽగ్నయః॒ పప్ర॑యః పారయన్తు ॥ శమే అస్ ఇతే-న్నో. ॥ ఆ॒తిష్ఠ॑న్త॒-మ్పరి॒ విశ్వే॑ అభూషన్న్ । శ్రియం॒-వఀసా॑నశ్చరతి॒ స్వరో॑చాః । మ॒హత్-తద॒స్యాసు॑రస్య॒ నామ॑ । ఆ వి॒శ్వరూ॑పో అ॒మృతా॑ని తస్థౌ ॥ అను॒ త్వేన్ద్రో॑ మద॒త్వను॒ బృహ॒స్పతిః॑ ॥ 23 ॥

అను॒ సోమో॒ అన్వ॒గ్నిరా॑వీత్ । అను॑ త్వా॒ విశ్వే॑ దే॒వా అ॑వన్తు । అను॑ స॒ప్త రాజా॑నో॒ య ఉ॒తాభిషి॑క్తాః ॥ అను॑ త్వా మి॒త్రావరు॑ణావి॒హావ॑తమ్ । అను॒ ద్యావా॑పృథి॒వీ వి॒శ్వశ॑భూమ్ । సూర్యో॒ అహో॑భి॒రను॑ త్వా-ఽవతు । చ॒న్ద్రమా॒ నఖ్ష॑త్రై॒రను॑ త్వా-ఽవతు ॥ ద్యౌశ్చ॑ త్వా పృథి॒వీ చ॒ ప్రచే॑తసా । శు॒క్రో బృ॒హ-ద్దఖ్షి॑ణా త్వా పిపర్తు । అను॑ స్వ॒ధా చి॑కితా॒గ్ం॒ సోమో॑ అ॒గ్నిః । ఆ-ఽయ-మ్పృ॑ణక్తు॒ రజ॑సీ ఉ॒పస్థ᳚మ్ ॥ 24 ॥
(బృహ॒స్పతిః॒ - సోమో॑ అ॒గ్నిరేక॑-ఞ్చ) (అ. 8)

అనువాకం 9 - ఓదనసవః
ప్ర॒జాప॑తిః ప్ర॒జా అ॑సృజత । తా అ॑స్మా-థ్సృ॒ష్టాః పరా॑చీరాయన్న్ । స ఏ॒త-మ్ప్ర॒జాప॑తిరోద॒న-మ॑పశ్యత్ । సో-ఽన్న॑-మ్భూ॒తో॑-ఽతిష్ఠత్ । తా అ॒న్యత్రా॒న్నాద్య॒మవి॑త్త్వా । ప్ర॒జాప॑తి-మ్ప్ర॒జా ఉ॒పావ॑ర్తన్త । అన్న॑మే॒వైన॑-మ్భూ॒త-మ్పశ్య॑న్తీః ప్ర॒జా ఉ॒పావ॑ర్తన్తే । య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ సర్వా॒ణ్యన్నా॑ని భవన్తి ॥ 25 ॥

సర్వే॒ పురు॑షాః । సర్వా᳚ణ్యే॒వాన్నా॒న్యవ॑రున్ధే । సర్వా॒-న్పురు॑షాన్ ॥ రాడ॑సి వి॒రాడ॒సీత్యా॑హ । స్వారా᳚జ్యమే॒వైన॑-ఙ్గమయతి ॥ యద్ధిర॑ణ్య॒-న్దదా॑తి । తేజ॒స్తేనావ॑రున్ధే । యత్తి॑సృధ॒న్వమ్ । వీ॒ర్య॑-న్తేన॑ । యదష్ట్రా᳚మ్ ॥ 26 ॥

పుష్టి॒-న్తేన॑ । యత్-క॑మ॒ణ్డలు᳚మ్ । ఆయు॒ష్టేన॑ ॥ యద్ధిర॑ణ్యమాబ॒ద్ధ్నాతి॑ । జ్యోతి॒ర్వై హిర॑ణ్యమ్ । జ్యోతి॑రే॒వాస్మి॑న్-దధాతి । అథో॒ తేజో॒ వై హిర॑ణ్యమ్ । తేజ॑ ఏ॒వాత్మ-న్ధ॑త్తే ॥ యదో॑ద॒న-మ్ప్రా॒శ్నాతి॑ । ఏ॒తదే॒వ సర్వ॑మవ॒రుద్ధ్య॑ ॥ 27 ॥

తద॑స్మి-న్నేక॒ధా-ఽధా᳚త్ ॥ రో॒హి॒ణ్యా-ఙ్కా॒ర్యః॑ । యద్బ్రా᳚హ్మ॒ణ ఏ॒వ రో॑హి॒ణీ । తస్మా॑దే॒వ । అథో॒ వర్​ష్మై॒వైనగ్ం॑ సమా॒నానా᳚-ఙ్కరోతి ॥ ఉ॒ద్య॒తా సూర్యే॑ణ కా॒ర్యః॑ । ఉ॒ద్యన్తం॒-వాఀ ఏ॒తగ్ం సర్వాః᳚ ప్ర॒జాః ప్రతి॑నన్దన్తి ॥ ది॒దృ॒ఖ్షేణ్యో॑ దర్​శ॒నీయో॑ భవతి । య ఏ॒వం-వేఀద॑ ॥ బ్ర॒హ్మ॒వా॒దినో॑ వదన్తి ॥ 28 ॥

అ॒వేత్యో॑-ఽవభృ॒థా(3) నా(3) ఇతి॑ । య-ద్ద॑ర్భపుఞ్జీ॒లైః ప॒వయ॑తి । త-థ్స్వి॑దే॒వావై॑తి । తన్నావై॑తి ॥ త్రి॒భిః ప॑వయతి । త్రయ॑ ఇ॒మే లో॒కాః । ఏ॒భిరే॒వైనం॑-లోఀ॒కైః ప॑వయతి । అథో॑ అ॒పాం-వాఀ ఏ॒త-త్తేజో॒ వర్చః॑ । య-ద్ద॒ర్భాః । య-ద్ద॑ర్భపుఞ్జీ॒లైః ప॒వయ॑తి । అ॒పామే॒వైన॒-న్తేజ॑సా॒ వర్చ॑సా॒-ఽభిషి॑ఞ్చతి ॥ 29 ॥
(భ॒వ॒ - న్త్యష్ట్రా॑ - మవ॒రుద్ధ్య॑ - వదన్తి - ద॒ర్భా య-ద్ద॑ర్భపుఞ్జీ॒లైః ప॒వయ॒త్యేక॑-ఞ్చ ) (అ. 9)

అనువాకం 10 - పఞ్చశారదీయవిధిః
ప్ర॒జాప॑తిరకామయత బ॒హోర్భూయా᳚న్-థ్స్యా॒మితి॑ । స ఏ॒త-మ్ప॑ఞ్చశార॒దీయ॑-మపశ్యత్ । తమా-ఽహ॑రత్ । తేనా॑యజత । తతో॒ వై స బ॒హోర్భూయా॑-నభవత్ । యః కా॒మయే॑త బ॒హోర్భూయా᳚న్-థ్స్యా॒మితి॑ । స ప॑ఞ్చశార॒దీయే॑న యజేత । బ॒హోరే॒వ భూయా᳚-న్భవతి ॥ మ॒రు॒-థ్స్తో॒మో వా ఏ॒షః । మ॒రుతో॒ హి దే॒వానా॒-మ్భూయి॑ష్ఠాః ॥ 30 ॥

బ॒హుర్భ॑వతి । య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ ప॒ఞ్చ॒శా॒ర॒దీయో॑ భవతి । పఞ్చ॒ వా ఋ॒తవ॑-స్సం​వఀథ్స॒రః । ఋ॒తుష్వే॒వ సం॑​వఀథ్స॒రే ప్రతి॑తిష్ఠతి । అథో॒ పఞ్చా᳚ఖ్షరా ప॒ఙ్క్తిః । పాఙ్క్తో॑ య॒జ్ఞః । య॒జ్ఞమే॒వావ॑రున్ధే ॥ స॒ప్త॒ద॒శగ్గ్​ స్తోమా॒ నాతి॑యన్తి । స॒ప్త॒ద॒శః ప్ర॒జాప॑తిః । ప్ర॒జాప॑తే॒రాప్త్యై᳚ ॥ 31 ॥
(భూయి॑ష్ఠా - యన్తి॒ ద్వే చ॑) (అ. 10)

అనువాకం 11 - పఞ్చశారదీయగతపశువిధిః
అ॒గస్యో॑ మ॒రుద్భ్య॑ ఉ॒ఖ్ష్ణః ప్రౌఖ్ష॑త్ । తానిన్ద్ర॒ ఆద॑త్త । త ఏ॑నం॒-వఀజ్ర॑ము॒ద్యత్యా॒భ్యా॑యన్త । తాన॒గస్త్య॑శ్చై॒వేన్ద్ర॑శ్చ కయాశు॒భీయే॑నాశమయతామ్ । తాఞ్ఛా॒-న్తానుపా᳚హ్వయత । య-త్క॑యాశు॒భీయ॒-మ్భవ॑తి॒ శాన్త్యై᳚ ॥ తస్మా॑దే॒త ఐ᳚న్ద్రా మారు॒తా ఉ॒ఖ్షాణ॑-స్సవ॒నీయా॑ భవన్తి । త్రయః॑ ప్రథ॒మే-ఽహ॒న్నాల॑భ్యన్తే । ఏ॒వ-న్ద్వి॒తీయే᳚ । ఏ॒వ-న్తృ॒తీయే᳚ ॥ 32 ॥

ఏ॒వ-ఞ్చ॑తు॒ర్థే । పఞ్చో᳚త్త॒మే-ఽహ॒న్నాల॑భ్యన్తే । వర్​షి॑ష్ఠమివ॒ హ్యే॑తదహః॑ ॥ వర్​షి॑ష్ఠ-స్సమా॒నానా᳚-మ్భవతి । య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ స్వారా᳚జ్యం॒-వాఀ ఏ॒ష య॒జ్ఞః । ఏ॒తేన॒ వా ఏక॒యావా॑ కాన్ద॒మ-స్స్వారా᳚జ్య-మగచ్ఛత్ ॥ స్వారా᳚జ్య-ఙ్గచ్ఛతి । య ఏ॒తేన॒ యజ॑తే ॥ 33 ॥

య ఉ॑ చైనమే॒వం-వేఀద॑ ॥ మా॒రు॒తో వా ఏ॒ష స్తోమః॑ । ఏ॒తేన॒ వై మ॒రుతో॑ దే॒వానా॒-మ్భూయి॑ష్ఠా అభవన్న్ । భూయి॑ష్ఠ-స్సమా॒నానా᳚-మ్భవతి । య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ ప॒ఞ్చ॒శా॒ర॒దీయో॒ వా ఏ॒ష య॒జ్ఞః । ఆ ప॑ఞ్చ॒మాత్-పురు॑షా॒దన్న॑మత్తి । య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ స॒ప్త॒ద॒శగ్గ్​ స్తోమా॒ నాతి॑యన్తి । స॒ప్త॒ద॒శః ప్ర॒జాప॑తిః । ప్ర॒జాప॑తేరే॒వ నైతి॑ ॥ 34 ॥
(తృ॒తీయే॑ - గచ్ఛతి॒ య ఏ॒తేన॒ యజ॑తే - ఽత్తి॒ య ఏ॒తేన॒ యజ॑తే॒ య ఉ॑ చైనమే॒వం-వేఀద॒ త్రీణి॑ చ) (అ. 11)

(అ॒గస్త్య॒-స్స్వారా᳚జ్య-మ్మారు॒తః ప॑ఞ్చశార॒దీయో॒ వా ఏ॒ష య॒జ్ఞ-స్స॑ప్తద॒శం
ప్ర॒జాప॑తేరే॒వ నైతి॑)

అనువాకం 12 - అగ్నిష్టుద్యాగే గ్రహాణా-మ్పురోరుచః
అ॒స్యాజరా॑సో ద॒మా మ॒రిత్రాః᳚ । అ॒ర్చద్ధూ॑మాసో అ॒గ్నయః॑ పావ॒కాః । శ్వి॒చీ॒చయ॑-శ్శ్వా॒త్రాసో॑ భుర॒ణ్యవః॑ । వ॒న॒ర॒.షదో॑ వా॒యవో॒ న సోమాః᳚ ॥ యజా॑ నో మి॒త్రావరు॑ణా । యజా॑ దే॒వాగ్ం ఋ॒త-మ్బృ॒హత్ । అగ్నే॒ యఖ్షి॒ స్వ-న్దమ᳚మ్ ॥ అశ్వి॑నా॒ పిబ॑తగ్ం సు॒తమ్ । దీద్య॑గ్నీ శుచి వ్రతా । ఋ॒తునా॑ యజ్ఞవాహసా ॥ 35 ॥

ద్వే విరూ॑పే చరత॒-స్స్వర్థే᳚ । అ॒న్యా-ఽన్యా॑ వ॒థ్సముప॑ధాపయేతే । హరి॑ర॒న్యస్యా॒-మ్భవ॑తి స్వ॒ధావాన్॑ । శు॒క్రో అ॒న్యస్యా᳚-న్దదృశే సు॒వర్చాః᳚ ॥ పూ॒ర్వా॒ప॒ర-ఞ్చ॑రతో మా॒యయై॒తౌ । శిశూ॒ క్రీడ॑న్తౌ॒ పరి॑యాతో అద్ధ్వ॒రమ్ । విశ్వా᳚న్య॒న్యో భువ॑నా-ఽభి॒చష్టే᳚ । ఋ॒తూన॒న్యో వి॒దధ॑జ్జాయతే॒ పునః॑ ॥ త్రీణి॑ శ॒తా త్రీష॒హస్రా᳚ణ్య॒గ్నిమ్ । త్రి॒గ్ం॒శచ్చ॑ దే॒వా నవ॑ చాసపర్యన్న్ ॥ 36 ॥

ఔఖ్ష॑న్-ఘృ॒తైరాస్తృ॑ణన్-బ॒ర్॒హిర॑స్మై । ఆదిద్ధోతా॑ర॒-న్న్య॑షాదయన్త ॥ అ॒గ్నినా॒-ఽగ్ని-స్సమి॑ద్ధ్యతే । క॒వి-ర్గృ॒హప॑తి॒ర్యువా᳚ । హ॒వ్య॒వాడ్-జు॒హ్వా᳚స్యః ॥ అ॒గ్ని-ర్దే॒వానా᳚-ఞ్జ॒ఠర᳚మ్ । పూ॒తద॑ఖ్షః క॒విక్ర॑తుః । దే॒వో దే॒వేభి॒రాగ॑మత్ ॥ అ॒గ్ని॒శ్రియో॑ మ॒రుతో॑ వి॒శ్వకృ॑ష్టయః । ఆ త్వే॒షము॒గ్రమవ॑ ఈమహే వ॒యమ్ ॥ 37 ॥

తే స్వా॒నినో॑ రు॒ద్రియా॑ వ॒ర॒.షని॑ర్ణిజః । సి॒గ్ం॒హా న హే॒షక్ర॑తవ-స్సు॒దాన॑వః ॥ యదు॑త్త॒మే మ॑రుతో మద్ధ్య॒మే వా᳚ । యద్వా॑-ఽవ॒మే సు॑భగాసో ది॒విష్ఠ । తతో॑ నో రుద్రా ఉ॒త వా॒-ఽన్వస్య॑ । అగ్నే॑ వి॒త్తాద్ధ॒విషో॒ యద్యజా॑మః ॥ ఈడే॑ అ॒గ్నిగ్గ్​ స్వవ॑స॒-న్నమో॑భిః । ఇ॒హ ప్ర॑స॒ప్తో విచ॑యత్కృ॒త-న్నః॑ । రథై॑రివ॒ ప్రభ॑రే వాజ॒యద్భిః॑ । ప్ర॒ద॒ఖ్షి॒ణి-న్మ॒రుతా॒గ్॒ స్తోమ॑మృద్ధ్యామ్ ॥ 38 ॥

శ్రు॒ధి శ్రు॑త్కర్ణ॒ వహ్ని॑భిః । దే॒వైర॑గ్నే స॒యావ॑భిః । ఆసీ॑దన్తు బ॒ర॒ఃఇషి॑ । మి॒త్రో వరు॑ణో అర్య॒మా । ప్రా॒త॒ర్యావా॑ణో అద్ధ్వ॒రమ్ ॥ విశ్వే॑షా॒-మది॑తి-ర్య॒జ్ఞియా॑నామ్ । విశ్వ॑షా॒-మతి॑థి॒-ర్మాను॑షాణామ్ । అ॒గ్ని-ర్దే॒వానా॒మవ॑ ఆవృణా॒నః । సు॒మృ॒డీ॒కో భ॑వతు వి॒శ్వవే॑దాః ॥ త్వే అ॑గ్నే సుమ॒తి-మ్భిఖ్ష॑మాణాః ॥ 39 ॥

ది॒వి శ్రవో॑ దధిరే య॒జ్ఞియా॑సః । నక్తా॑ చ చ॒క్రురు॒షసా॒ విరూ॑పే । కృ॒ష్ణ-ఞ్చ॒ వర్ణ॑మరు॒ణ-ఞ్చ॒ సన్ధుః॑ ॥ త్వామ॑గ్న ఆది॒త్యాస॑ ఆ॒స్య᳚మ్ । త్వా-ఞ్జి॒హ్వాగ్ం శుచ॑యశ్చక్రిరే కవే । త్వాగ్ం రా॑తి॒షాచో॑ అద్ధ్వ॒రేషు॑ సశ్చిరే । త్వే దే॒వా హ॒విర॑ద॒న్త్యాహు॑తమ్ ॥ ని త్వా॑ య॒జ్ఞస్య॒ సాధ॑నమ్ । అగ్నే॒ హోతా॑ర-మృ॒త్విజ᳚మ్ । వ॒ను॒ష్వ-ద్దే॑వ ధీమహి॒ ప్రచే॑తసమ్ । జీ॒ర-న్దూ॒తమమ॑ర్త్యమ్ ॥ 40 ॥
(య॒జ్ఞ॒వా॒హ॒సా॒ - ఽస॒ప॒ర్య॒న్ - వ॒య - మృ॑ద్ధ్యాం॒ - భిఖ్ష॑మాణాః॒ - ప్రచే॑తస॒మేక॑-ఞ్చ) (అ. 12)

అనువాకం 13 - ఇన్ద్రస్తుద్యాగే గ్రహాణా-మ్పురోరుచః
తిష్ఠా॒ హరీ॒ రథ॒ ఆ యు॒జ్యమా॑నా యా॒హి । వా॒యుర్న ని॒యుతో॑ నో॒ అచ్ఛ॑ । పిబా॒స్యన్ధో॑ అ॒భిసృ॑ష్టో అ॒స్మే । ఇన్ద్ర॒ స్వాహా॑ రరి॒మా తే॒ మదా॑య ॥ కస్య॒ వృషా॑ సు॒తే సచా᳚ । ని॒యుత్వా᳚న్ వృష॒భో ర॑ణత్ । వృ॒త్ర॒హా సోమ॑పీతయే ॥ ఇన్ద్రం॑-వఀ॒య-మ్మ॑హాధ॒నే । ఇన్ద్ర॒మర్భే॑ హవామహే । యుజం॑-వృఀ॒త్రేషు॑ వ॒జ్రిణ᳚మ్ ॥ 41 ॥

ద్వి॒తాయో వృ॑త్ర॒హన్త॑మః । వి॒ద ఇన్ద్ర॑-శ్శ॒తక్ర॑తుః । ఉప॑ నో॒ హరి॑భి-స్సు॒తమ్ ॥ స సూర॒ ఆజ॒నయ॒ఞ్జ్యోతి॒రిన్ద్ర᳚మ్ । అ॒యా ధి॒యా త॒రణి॒రద్రి॑బర్​హాః । ఋ॒తేన॑ శు॒ష్మీనవ॑మానో అ॒ర్కైః । వ్యు॑స్రిధో॑ అ॒స్రో అద్రి॑ర్బిభేద ॥ ఉ॒త త్యదా॒శ్వశ్వి॑యమ్ । యది॑న్ద్ర॒ నాహు॑షీ॒ష్వా । అగ్రే॑ వి॒ఖ్షు ప్రతీద॑యత్ ॥ 42 ॥

భరే॒ష్విన్ద్రగ్ం॑ సు॒హవగ్ం॑ హవామహే । అ॒గ్ం॒హో॒ముచగ్ం॑ సు॒కృత॒-న్దైవ్య॒ఞ్జన᳚మ్ । అ॒గ్ని-మ్మి॒త్రం-వఀరు॑ణగ్ం సా॒తయే॒ భగ᳚మ్ । ద్యావా॑పృథి॒వీ మ॒రుత॑-స్స్వ॒స్తయే᳚ ॥ మ॒హి ఖ్షేత్ర॑-మ్పు॒రుశ్చ॒న్ద్రం-విఀవి॒ద్వాన్ । ఆది-థ్సఖి॑భ్యశ్చ॒ రథ॒గ్ం॒ సమై॑రత్ । ఇన్ద్రో॒ నృభి॑రజన॒-ద్దీద్యా॑న-స్సా॒కమ్ । సూర్య॑ము॒షస॑-ఙ్గా॒తుమ॒గ్నిమ్ ॥ ఉ॒రు-న్నో॑ లో॒కమను॑నేషి వి॒ద్వాన్ । సువ॑ర్వ॒-జ్జ్యోతి॒రభ॑యగ్గ్​ స్వ॒స్తి ॥ 43 ॥

ఋ॒ష్వా త॑ ఇన్ద్ర॒ స్థవి॑రస్య బా॒హూ । ఉప॑స్థేయామ శర॒ణా బృ॒హన్తా᳚ ॥ ఆ నో॒ విశ్వా॑భిరూ॒తిభి॑-స్స॒జోషాః᳚ । బ్రహ్మ॑ జుషా॒ణో హ॑ర్యశ్వ యాహి । వరీ॑వృజ॒-థ్స్థవి॑రేభి-స్సుశిప్ర । అ॒స్మే దధ॒-ద్వృష॑ణ॒గ్ం॒ శుష్మ॑మిన్ద్ర ॥ ఇన్ద్రా॑య॒ గావ॑ ఆ॒శిర᳚మ్ । దు॒దు॒హ్రే వ॒జ్రిణే॒ మధు॑ । య-థ్సీ॑ముపహ్వ॒రే-ఽవి॒దత్ ॥ తాస్తే॑ వజ్రి-న్ధే॒నవో॑ జోజయుర్నః ॥ 44 ॥

గభ॑స్తయో ని॒యుతో॑ వి॒శ్వవా॑రాః । అహ॑రహ॒ర్భూయ॒ ఇజ్జోగు॑వానాః । పూ॒ర్ణా ఇ॑న్ద్ర ఖ్షు॒మతో॒ భోజ॑నస్య ॥ ఇ॒మా-న్తే॒ ధియ॒-మ్ప్రభ॑రే మ॒హో మ॒హీమ్ । అ॒స్య స్తో॒త్రే ధి॒షణా॒ యత్త॑ ఆన॒జే । తము॑థ్స॒వే చ॑ ప్రస॒వే చ॑ సాస॒హిమ్ । ఇన్ద్ర॑-న్దే॒వాస॒-శ్శవ॑సా మద॒న్నను॑ ॥ 45 ॥
(వ॒జ్రిణ॑ - మయథ్ - స్వ॒స్తి - జో॑జయుర్నః - +స॒ప్త చ॑) (అ. 13)

అనువాకం 14 - అప్తోర్యామావిధిః
ప్ర॒జాప॑తిః ప॒శూన॑సృజత । తే᳚-ఽస్మా-థ్సృ॒ష్టాః పరా᳚ఞ్చ ఆయన్న్ । తాన॑గ్నిష్టో॒మేన॒ నాప్నో᳚త్ । తాను॒క్థ్యే॑న॒ నాప్నో᳚త్ । తాన్-థ్షో॑డ॒శినా॒ నాప్నో᳚త్ । తాన్రాత్రి॑యా॒ నాప్నో᳚త్ । తాన్-థ్స॒న్ధినా॒ నాప్నో᳚త్ । సో᳚-ఽగ్నిమ॑బ్రవీత్ । ఇ॒మాన్మ॑ ఈ॒ఫ్సేతి॑ । తాన॒గ్నిస్త్రి॒వృతా॒ స్తోమే॑న॒ నాప్నో᳚త్ ॥ 46 ॥

స ఇన్ద్ర॑మబ్రవీత్ । ఇ॒మాన్మ॑ ఈ॒ఫ్సేతి॑ । తానిన్ద్రః॑ పఞ్చద॒శేన॒ స్తోమే॑న॒ నాప్నో᳚త్ । స విశ్వా᳚-న్దే॒వా-న॑బ్రవీత్ । ఇ॒మాన్మ॑ ఈఫ్స॒తేతి॑ । తాన్. విశ్వే॑ దే॒వా-స్స॑ప్తద॒శేన॒ స్తోమే॑న॒ నాప్ను॑వన్న్ । స విష్ణు॑మబ్రవీత్ । ఇ॒మాన్మ॑ ఈ॒ఫ్సేతి॑ । తాన్. విష్ణు॑రేకవి॒గ్ం॒శేన॒ స్తోమే॑నాప్నోత్ । వా॒ర॒వ॒న్తీయే॑నావారయత ॥ 47 ॥

ఇ॒దం-విఀష్ణు॒-ర్విచ॑క్రమ॒ ఇతి॒ వ్య॑క్రమత ॥ యస్మా᳚-త్ప॒శవః॒ ప్ర ప్రేవ॒ భ్రగ్ంశే॑రన్న్ । స ఏ॒తేన॑ యజేత ॥ యదాప్నో᳚త్ । తద॒ప్తోర్యామ॑స్యాప్తోర్యామ॒త్వమ్ ॥ ఏ॒తేన॒ వై దే॒వా జైత్వా॑ని జి॒త్వా । య-ఙ్కామ॒-మకా॑మయన్త॒ తమా᳚ప్నువన్న్ । య-ఙ్కామ॑-ఙ్కా॒మయ॑తే । తమే॒తేనా᳚ప్నోతి ॥ 48 ॥
(స్తోమే॑న॒ నాప్నో॑ - దవారయత॒ - +నవ॑ చ) (అ. 14)

అనువాకం 15 - రాజాభిషేకః
వ్యా॒ఘ్రో॑-ఽయమ॒గ్నౌ చ॑రతి॒ ప్రవి॑ష్టః । ఋషీ॑ణా-మ్పు॒త్రో అ॑భిశస్తి॒పా అ॒యమ్ । న॒మ॒స్కా॒రేణ॒ నమ॑సా తే జుహోమి । మా దే॒వానా᳚-మ్మిథు॒యా క॑ర్మ భా॒గమ్ ॥ సావీ॒ర॒ఃఇ దే॑వ ప్రస॒వాయ॑ పిత్రే । వ॒ర్​ష్మాణ॑మస్మై వరి॒మాణ॑మస్మై । అథా॒స్మభ్యగ్ం॑ సవిత-స్స॒ర్వతా॑తా । ది॒వే ది॑వ॒ ఆసు॑వా॒ భూరి॑ప॒శ్వః ॥ భూ॒తో భూ॒తేషు॑ చరతి॒ ప్రవి॑ష్టః । స భూ॒తానా॒-మధి॑పతి-ర్బభూవ ॥ 49 ॥

తస్య॑ మృ॒త్యౌ చ॑రతి రాజ॒సూయ᳚మ్ । స రాజా॑ రా॒జ్య-మను॑మన్యతామి॒దమ్ ॥ యేభి॒-శ్శిల్పైః᳚ పప్రథా॒నామదృగ్ం॑హత్ । యేభి॒ద్ర్యామ॒భ్యపిగ్ం॑శత్-ప్ర॒జాప॑తిః । యేభి॒ర్వాచం॑-విఀ॒శ్వరూ॑పాగ్ం స॒మవ్య॑యత్ । తేనే॒మమ॑గ్న ఇ॒హ వర్చ॑సా॒ సమ॑ఙ్గ్ధి ॥ యేభి॑రాది॒త్యస్తప॑తి॒ ప్రకే॒తుభిః॑ । యేభి॒-స్సూర్యో॑ దదృ॒శే చి॒త్రభా॑నుః । యేభి॒ర్వాచ॑-మ్పుష్క॒లేభి॒రవ్య॑యత్ । తేనే॒మమ॑గ్న ఇ॒హ వర్చ॑సా॒ సమ॑ఙ్గ్ధి ॥ 50 ॥

ఆ-ఽయ-మ్భా॑తు॒ శవ॑సా॒ పఞ్చ॑ కృ॒ష్టీః । ఇన్ద్ర॑ ఇవ జ్యే॒ష్ఠో భ॑వతు ప్ర॒జావాన్॑ । అ॒స్మా అ॑స్తు పుష్క॒ల-ఞ్చి॒త్రభా॑ను । ఆ-ఽయ-మ్పృ॑ణక్తు॒ రజ॑సీ ఉ॒పస్థ᳚మ్ ॥ యత్తే॒ శిల్ప॑-ఙ్కశ్యప రోచ॒నావ॑త్ । ఇ॒న్ద్రి॒యావ॑త్-పుష్క॒ల-ఞ్చి॒త్రభా॑ను । యస్మి॒న్-థ్సూర్యా॒ అర్పి॑తా-స్స॒ప్త సా॒కమ్ । తస్మి॒న్-రాజా॑న॒-మధి॒విశ్ర॑యే॒మమ్ ॥ ద్యౌర॑సి పృథి॒వ్య॑సి ॥ వ్యా॒ఘ్రో వైయా॒ఘ్రే-ఽధి॑ ॥ 51 ॥

విశ్ర॑యస్వ॒ దిశో॑ మ॒హీః । విశ॑స్త్వా॒ సర్వా॑ వాఞ్ఛన్తు । మా త్వ-ద్రా॒ష్ట్రమధి॑భ్రశత్ ॥ యా ది॒వ్యా ఆపః॒ పయ॑సా సమ్బభూ॒వుః । యా అ॒న్తరి॑ఖ్ష ఉ॒త పార్థి॑వీ॒ర్యాః । తా సా᳚-న్త్వా॒ సర్వా॑సాగ్ం రు॒చా । అ॒భిషి॑ఞ్చామి॒ వర్చ॑సా । అ॒భి త్వా॒ వర్చ॑సా సిచ-న్ది॒వ్యేన॑ । పయ॑సా స॒హ । యథా-ఽఽసా॑ రాష్ట్ర॒వర్ధ॑నః ॥ 52 ॥

తథా᳚ త్వా సవి॒తా క॑రత్ । ఇన్ద్రం॒-విఀశ్వా॑ అవీవృధన్న్ । స॒ము॒ద్ర వ్య॑చస॒-ఙ్గిరః॑ । ర॒థీత॑మగ్ం రథీ॒నామ్ । వాజా॑నా॒గ్ం॒ స-త్ప॑తి॒-మ్పతి᳚మ్ । వస॑వస్త్వా పు॒రస్తా॑ద॒భిషి॑ఞ్చన్తు గాయ॒త్రేణ॒ ఛన్ద॑సా । రు॒ద్రాస్త్వా॑ దఖ్షిణ॒తో॑-ఽభిషి॑ఞ్చన్తు॒ త్రైష్టు॑భేన॒ ఛన్ద॑సా । ఆ॒ది॒త్యాస్త్వా॑ ప॒శ్చాద॒భిషి॑ఞ్చన్తు॒ జాగ॑తేన॒ ఛన్ద॑సా । విశ్వే᳚ త్వా దే॒వా ఉ॑త్తర॒తో॑-ఽభిషి॑ఞ్చ॒న్-త్వాను॑ష్టుభేన॒ ఛన్ద॑సా । బృహ॒స్పతి॑-స్త్వో॒పరి॑ష్టా-ద॒భిషి॑ఞ్చతు॒ పాఙ్క్తే॑న॒ ఛన్ద॑సా ॥ 53 ॥

అ॒రు॒ణ-న్త్వా॒ వృక॑ము॒గ్ర-ఙ్ఖ॑జ-ఙ్క॒రమ్ । రోచ॑మాన-మ్మ॒రుతా॒మగ్రే॑ అ॒ర్చిషః॑ । సూర్య॑వన్త-మ్మ॒ఘవా॑నం-విఀషాస॒హిమ్ । ఇన్ద్ర॑ము॒క్థ్యేషు॑ నామ॒హూత॑మగ్ం హువేమ ॥ ప్ర బా॒హవా॑ సిసృత-ఞ్జీ॒వసే॑ నః । ఆ నో॒ గవ్యూ॑తిముఖ్షత-ఙ్ఘృ॒తేన॑ । ఆ నో॒ జనే᳚ శ్రవయతం-యుఀవానా । శ్రు॒త-మ్మే॑ మిత్రావరుణా॒ హవే॒మా ॥ ఇన్ద్ర॑స్య తే వీర్య॒కృతః॑ । బా॒హూ ఉ॒పావ॑హరామి ॥ 54 ॥
(బ॒భూ॒ - వావ్య॑య॒-త్తేనే॒మమ॑గ్న ఇ॒హ వర్చ॑సా॒ సమ॑ఙ్గ్ధి॒ - వైయా॒ఘ్రే-ఽధి॑ - రాష్ట్ర॒వర్ధ॑నః॒ - పాఙ్క్తే॑న॒ ఛన్ద॑సో॒ - పావ॑హరామి) (అ. 15)

అనువాకం 16 - రాజాభిషేకాఙ్గం రథారోహణమ్
అ॒భి ప్రేహి॑ వీ॒రయ॑స్వ । ఉ॒గ్రశ్చేత్తా॑ సపత్న॒హా ॥ ఆతి॑ష్ఠ వృత్ర॒హన్త॑మః । తుభ్య॑-న్దే॒వా అధి॑బ్రవన్న్ ॥ అ॒ఙ్కౌ న్య॒ఙ్కావ॒భితో॒ రథం॒-యౌఀ । ధ్వా॒న్తం-వాఀ ॑తా॒గ్రమను॑స॒-ఞ్చర॑న్తౌ । దూ॒రే హే॑తి-రిన్ద్రి॒యావా᳚-న్పత॒త్రీ । తే నో॒-ఽగ్నయః॒ పప్ర॑యః పారయన్తు ॥ నమ॑స్త ఋషే గద । అవ్య॑థాయై (అవ్య॑ధాయై) త్వా స్వ॒ధాయై᳚ త్వా ॥ 55 ॥

మా న॑ ఇన్ద్రా॒భిత॒స్త్వ-దృ॒ష్వారి॑ష్టాసః । ఏ॒వా బ్ర॑హ్మ॒న్తవేద॑స్తు ॥ తిష్ఠా॒ రథే॒ అధి॒ య-ద్వజ్ర॑హస్తః ॥ ఆ ర॒శ్మీన్దే॑వ యువసే॒ స్వశ్వః॑ ॥ అబోవే, ఆ॒తిష్ఠ॑న్త॒-మ్పరి॒ విశ్వే॑ అభూషన్న్ । శ్రియం॒-వఀసా॑నశ్చరతి॒ స్వరో॑చాః । మ॒హత్-తద॒స్యాసు॑రస్య॒ నామ॑ । ఆ వి॒శ్వరూ॑పో అ॒మృతా॑ని తస్థౌ ॥ । అను॒ త్వేన్ద్రో॑ మద॒త్వను॒ బృహ॒స్పతిః॑ । అను॒ సోమో॒ అన్వ॒గ్నిరా॑వీత్ । అను॑ త్వా॒ విశ్వే॑ దే॒వా అ॑వన్తు । అను॑ స॒ప్త రాజా॑నో॒ య ఉ॒తాభిషి॑క్తాః ॥. అను॑త్వా మి॒త్రావరు॑ణావి॒హావ॑తమ్ । అను॒ ద్యావా॑పృథి॒వీ వి॒శ్వశ॑భూమ్ । సూర్యో॒ అహో॑భి॒రను॑ త్వా-ఽవతు । చ॒న్ద్రమా॒ నఖ్ష॑త్రై॒రను॑ త్వా ఽవతు ॥ ॥ ద్యౌశ్చ॑ త్వా పృథి॒వీ చ॒ ప్రచే॑తసా । శు॒క్రో బృ॒హ-ద్దఖ్షి॑ణా త్వా పిపర్తు । అను॑ స్వ॒ధా చికితా॒గ్ం॒ సోమో॑ అ॒గ్నిః । అను॑ త్వా-ఽవతు సవి॒తా స॒వేన॑ ॥ 56 ॥

ఇన్ద్రం॒-విఀశ్వా॑ అవీవృధన్న్ । స॒ము॒ద్ర వ్య॑చస॒-ఙ్గిరః॑ । ర॒థీత॑మగ్ం రథీ॒నామ్ । వాజా॑నా॒గ్ం॒ స-త్ప॑తి॒-మ్పతి᳚మ్ ॥ పరి॑ మా సే॒న్యా ఘోషాః᳚ । జ్యానాం᳚-వృఀఞ్జన్తు గృ॒ద్ధ్నవః॑ । మే॒థి॒ష్ఠాః పిన్వ॑మానా ఇ॒హ । మా-ఙ్గోప॑తిమ॒భి సం​విఀ ॑శన్తు ॥ తన్మే-ఽను॑మతి॒-రను॑మన్యతామ్ । తన్మా॒తా పృ॑థి॒వీ త-త్పి॒తా ద్యౌః ॥ 57 ॥

తద్గ్రావా॑ణ-స్సోమ॒సుతో॑ మయో॒భువః॑ । తద॑శ్వినా శృణుతగ్ం సౌభగా యు॒వమ్ ॥ అవ॑ తే॒ హేడో॑ వరుణ॒ నమో॑భి॒రవ॑ య॒జ్ఞేభి॑రీమహే హ॒విర్భిః॑ । ఖ్షయ॑న్న॒స్మభ్య॑మసుర ప్రచేతో॒ రాజ॒న్నేనాగ్ం॑సి శిశ్రథః కృ॒తాని॑ ॥, ఉదు॑త్త॒మం-వఀ ॑రుణ॒ పాశ॑మ॒స్మదవా॑-ఽధ॒మం-విఀమ॑ధ్య॒మగ్గ్​ శ్ర॑థాయ । అథా॑ వ॒యమా॑దిత్య వ్ర॒తే తవా-ఽనా॑గసో॒ అది॑తయే స్యామ ॥ ॥ ఏ॒నా వ్యా॒ఘ్ర-మ్ప॑రిషస్వజా॒నాః । సి॒గ్ం॒హగ్ం హి॑న్వన్తి మహ॒తే సౌభ॑గాయ । స॒ము॒ద్ర-న్న సు॒హవ॑-న్తస్థి॒వాగ్ంస᳚మ్ । మ॒ర్మృ॒జ్యన్తే᳚ ద్వీ॒పిన॑మ॒ఫ్స్వ॑న్తః ॥ ఉద॒సావే॑తు॒ సూర్యః॑ । ఉది॒ద-మ్మా॑మ॒కం-వఀచః॑ । ఉది॑హి దేవ సూర్య । స॒హ వ॒గ్నునా॒ మమ॑ । అ॒హం-వాఀ॒చో వి॒వాచ॑నమ్ । మయి॒ వాగ॑స్తు ధర్ణ॒సిః । యన్తు॑ న॒దయో॒ వర్​ష॑న్తు ప॒ర్జన్యాః᳚ । సు॒పి॒ప్ప॒లా ఓష॑ధయో భవన్తు ॥ అన్న॑వతామోద॒నవ॑తామా॒మిఖ్ష॑వతామ్ । ఏ॒షాగ్ం రాజా॑ భూయాసమ్ ॥ 58 ॥
(స్వ॒ధాయై᳚ త్వా - స॒వేన॒ - ద్యౌః - సు᳚ర్య స॒ప్త చ॑) (అ. 16)

అనువాకం 17 - రాజాభిషేకాఙ్గం-వఀపనమ్
యే కే॒శినః॑ ప్రథ॒మా-స్స॒త్రమాస॑త । యేభి॒రాభృ॑తం॒-యఀది॒దం-విఀ॒రోచ॑తే । తేభ్యో॑ జుహోమి బహు॒ధా ఘృ॒తేన॑ । రా॒యస్పోషే॑ణే॒మం-వఀర్చ॑సా॒ సగ్ంసృ॑జాథ ॥ నర్తే బ్రహ్మ॑ణ॒స్తప॑సో విమో॒కః । ద్వి॒నామ్నీ॑ దీ॒ఖ్షా వ॒శినీ॒ హ్యు॑గ్రా । ప్రకేశా᳚-స్సు॒వతే॑ కా॒ణ్డినో॑ భవన్తి । తేషా᳚-మ్బ్ర॒హ్మేదీశే॒ వప॑నస్య॒ నాన్యః ॥ ఆరో॑హ॒ ప్రోష్ఠం॒-విఀష॑హస్వ॒ శత్రూన్॑ । అవా᳚స్రాగ్దీ॒ఖ్షా వ॒శినీ॒ హ్యు॑గ్రా ॥ 59 ॥

దే॒హి దఖ్షి॑ణా॒-మ్ప్రతి॑ర॒స్వాయుః॑ । అథా॑ ముచ్యస్వ॒ వరు॑ణస్య॒ పాశా᳚త్ ॥ యేనావ॑ప-థ్సవి॒తా ఖ్షు॒రేణ॑ । సోమ॑స్య॒ రాజ్ఞో॒ వరు॑ణస్య వి॒ద్వాన్ । తేన॑ బ్రహ్మాణో వపతే॒దమ॒స్యోర్జేమమ్ । ర॒య్యా వర్చ॑సా॒ సగ్ంసృ॑జాథ ॥ మా తే॒ కేశా॒నను॑ గా॒ద్వర్చ॑ ఏ॒తత్ । తథా॑ ధా॒తా క॑రోతు తే । తుభ్య॒మిన్ద్రో॒ బృహ॒స్పతిః॑ । స॒వి॒తా వర్చ॒ ఆద॑ధాత్ ॥ 60 ॥

తేభ్యో॑ ని॒ధాన॑-మ్బహు॒ధా వ్యైచ్ఛన్న్॑ । అ॒న్త॒రా ద్యావా॑పృథి॒వీ అ॒ప-స్సువః॑ । ద॒ర్భ॒స్త॒మ్బే వీ॒ర్య॑కృతే ని॒ధాయ॑ । పౌగ్గ్​స్యే॑నే॒మం-వఀర్చ॑సా॒ సగ్ంసృ॑జాథ ॥ బల॑-న్తే బాహు॒వో-స్స॑వి॒తా ద॑ధాతు । సోమ॑స్త్వా-ఽనక్తు॒ పయ॑సా ఘృ॒తేన॑ । స్త్రీ॒షు రూ॒పమ॑శ్వినై॒త-న్నిధ॑త్తమ్ । పౌగ్గ్​స్యే॑నే॒మం-వఀర్చ॑సా॒ సగ్ంసృ॑జాథ ॥ య-థ్సీ॒మన్త॒-ఙ్కఙ్క॑తస్తే లి॒లేఖ॑ । యద్వా᳚ ఖ్షు॒రః ప॑రివ॒వర్జ॒ వపగ్గ్॑స్తే । స్త్రీ॒షు రూ॒పమ॑శ్వినై॒త-న్నిధ॑త్తమ్ । పౌగ్గ్​స్యే॑నే॒మగ్ం సగ్ంసృ॑జాథో వీ॒ర్యే॑ణ ॥ 61 ॥
(అవా᳚స్రాగ్దీ॒ఖ్షా వా॒శినీ॒ హ్యు॑గ్రా-ఽఽద॑ధా-ద్వ॒వర్జ॒ వపగ్గ్॑స్తే॒ ద్వే చ॑ ) (అ. 17)

(యే కే॒శినో॒ నర్తే మా తే॒ బలం॒-యఀ-థ్సీ॒మన్త॒-మ్పఞ్చ॑)

అనువాకం 18 - విద్యనాఖ్య ఏకాహవిశేషః
ఇన్ద్రం॒-వైఀ స్వా విశో॑ మ॒రుతో॒ నాపా॑చాయన్న్ । సో-ఽన॑పచాయ్యమాన ఏ॒తం-విఀ ॑ఘ॒నమ॑పశ్యత్ । తమా-ఽహ॑రత్ । తేనా॑యజత । తేనై॒వాసా॒-న్తగ్ం సగ్గ్॑స్త॒మ్భం-వ్యఀ ॑హన్న్ । య-ద్వ్యహన్న్॑ । త-ద్వి॑ఘ॒నస్య॑ విఘన॒త్వమ్ ॥ వి పా॒ప్మాన॒-మ్భ్రాతృ॑వ్యగ్ం హతే । య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ 62 ॥

యగ్ం రాజా॑నం॒-విఀశో॒ నాప॒చాయే॑యుః । యో వా᳚ బ్రాహ్మ॒ణస్తమ॑సా పా॒ప్మనా॒ ప్రావృ॑త॒-స్స్యాత్ । స ఏ॒తేన॑ యజేత । వి॒ఘ॒నేనై॒వైన॑-ద్వి॒హత్య॑ । వి॒శామాధి॑పత్య-ఙ్గచ్ఛతి ॥ తస్య॒ ద్వే ద్వా॑ద॒శే స్తో॒త్రే భవ॑తః । ద్వే చ॑తుర్వి॒గ్ం॒శే । ఔద్భి॑ద్యమే॒వ తత్ । ఏ॒తద్వై ఖ్ష॒త్రస్యౌద్భి॑ద్యమ్ । యద॑స్మై॒ స్వా విశో॑ బ॒లిగ్ం హర॑న్తి ॥ 63 ॥

హర॑న్త్యస్మై॒ విశో॑ బ॒లిమ్ । ఐన॒మప్ర॑తిఖ్యాత-ఙ్గచ్ఛతి । య ఏ॒వం-వేఀద॑ ॥ ప్ర॒బాహు॒గ్వా అగ్రే᳚ ఖ్ష॒త్రాణ్యాతే॑పుః । తేషా॒మిన్ద్రః॑, ఖ్ష॒త్రాణ్యాద॑త్త । న వా ఇ॒మాని॑ ఖ్ష॒త్రాణ్య॑ భూవ॒న్నితి॑ । తన్నఖ్ష॑త్రాణా-న్నఖ్షత్ర॒త్వమ్ । ఆ శ్రేయ॑సో॒ భ్రాతృ॑వ్యస్య॒ తేజ॑ ఇన్ద్రి॒య-న్ద॑త్తే । య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ 64 ॥

త-ద్యథా॑ హ॒ వై స॑చా॒క్రిణౌ॒ కప్ల॑కావు॒పా-వ॑హితౌ॒ స్యాతా᳚మ్ । ఏ॒వమే॒తౌ యు॒గ్మన్తౌ॒ స్తోమౌ᳚ । అ॒యుఖ్షు॒ స్తోమే॑షు క్రియేతే । పా॒ప్మనో-ఽప॑హత్యై ॥ అప॑ పా॒ప్మాన॒-మ్భ్రాతృ॑వ్యగ్ం హతే । య ఏ॒తేన॒ యజ॑తే । య ఉ॑ చైనమే॒వం-వేఀద॑ ॥ త-ద్యథా॑ హ॒ వై సూ॑తగ్రామ॒ణ్యః॑ । ఏ॒వ-ఞ్ఛన్దాగ్ం॑సి । తేష్వ॒సావా॑ది॒త్యో బృ॑హ॒తీర॒భ్యూ॑ఢః ॥ 65 ॥

స॒తోబృ॑హతీషు స్తువతే స॒తో బృ॑హన్న్ । ప్ర॒జయా॑ ప॒శుభి॑-రసా॒నీత్యే॒వ ॥ వ్యతి॑షక్తాభి-స్స్తువతే । వ్యతి॑షక్తం॒-వైఀ ఖ్ష॒త్రం-విఀ॒శా । వి॒శైవైన॑-ఙ్ఖ్ష॒త్రేణ॒ వ్యతి॑షజతి ॥ వ్యతి॑షక్తాభి-స్స్తువతే । వ్యతి॑షక్తో॒ వై గ్రా॑మ॒ణీ-స్స॑జా॒తైః । స॒జా॒తైరే॒వైనం॒-వ్యఀతి॑షజతి ॥ వ్యతి॑షక్తాభి-స్స్తువతే । వ్యతి॑షక్తో॒ వై పురు॑షః పా॒ప్మభిః॑ । వ్యతి॑షక్తా-భిరే॒వాస్య॑ పా॒ప్మనో॑ నుదతే ॥ 66 ॥
(వేద॒ - హర॑న్ - త్యేనమే॒వం-వేఀదా॒ - భ్యూ॑ఢః - పా॒ప్మభి॒రేక॑-ఞ్చ) (అ. 18)

(త్రి॒వృ--ద్యదా᳚గ్నే॒యో᳚-ఽగ్నిము॑ఖా॒ హ్యృద్ధి॒--ర్ యదా᳚గ్నే॒య ఆ᳚గ్నే॒యో - న వై సోమే॑న॒ - యో వై సోమే॑ - నై॒ష గో॑స॒వః - సి॒గ్ం॒హే॑ - ఽభిప్రేహి॑ మిత్ర॒వర్ధ॑నః - ప్ర॒జాప॑తి॒స్తా ఓ॑ద॒నం - ప్ర॒జాప॑తిరకామయత బ॒హో-ర్భూయా॑ - న॒గస్త్యో॒ - ఽస్యాజరా॑స॒ - స్తిష్ఠా॒ హరీ᳚ - ప్ర॒జాప॑తిః ప॒శూన్ - వ్యా॒ఘ్రో॑-ఽయమ॒ - భిప్రేహి॑ వృత్ర॒హన్త॑మో॒ - యే కే॒శిన॒ - ఇన్ద్రం॒-వాఀ అ॒ష్టాద॑శ )

(త్రి॒వృ--ద్యో వై సోమే॒ - నాయు॑రసి వి॒శ్వాయు॑--ర్ బ॒హు-ర్భ॑వతి॒ - తిష్ఠా॒ హరీ॒ రథ॒ - ఆ-ఽయ-మ్భా॑తు॒ - తేభ్యో॑ ని॒ధాన॒గ్ం॒ షట్థ్ష॑ష్టిః)

(త్రి॒వృత్ - పా॒ప్మనో॑ నుదతే)

॥ హరిః॑ ఓమ్ ॥

॥ కృష్ణ యజుర్వేదీయ తైత్తిరీయ బ్రాహ్మణే ద్వితీయాష్టకే సప్తమః ప్రపాఠక-స్సమాప్తః ॥