kṛṣṇa yajurvēdīya taittirīya brāhmaṇē prathamāṣṭakē pañchamaḥ prapāṭhakaḥ - nakṣatrēṣṭikāṇḍam

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 - nakṣatrēṣṭakāmantrāḥ, vikṛtirūpachayanagatāḥ

a̠gnēḥ kṛtti̍kāḥ । śu̠kra-mpa̠rastā̠-jjyōti̍-ra̠vastā̎t ॥ pra̠jāpa̍tē rōhi̠ṇī । āpa̍ḥ pa̠rastā̠dōṣa̍dhayō̠ 'vastā̎t ॥ sōma̍syēnva̠kā vita̍tāni । pa̠rastā̠dvaya̍ntō̠ 'vastā̎t ॥ ru̠drasya̍ bā̠hū । mṛ̠ga̠yava̍ḥ pa̠rastā̎dvikṣā̠rō̍-'vastā̎t ॥ adi̍tyai̠ puna̍rvasū । vāta̍ḥ pa̠rastā̍dā̠rdra-ma̠vastā̎t ॥ 1 ॥

bṛha̠spatē̎sti̠ṣya̍ḥ । juhva̍taḥ pa̠rastā̠-dyaja̍mānā a̠vastā̎t ॥ sa̠rpāṇā̍-māśrē̠ṣāḥ । a̠bhyā̠gachCha̍ntaḥ pa̠rastā̍dabhyā̠nṛtya̍ntō̠-'vastā̎t ॥ pi̠tṛ̠ṇā-mma̠ghāḥ । ru̠danta̍ḥ pa̠rastā̍dapabhra̠gṃ̠śō̍-'vastā̎t ॥ a̠rya̠mṇaḥ pūrvē̠ phalgu̍nī । jā̠yā pa̠rastā̍dṛṣa̠bhō̍-'vastā̎t ॥ bhaga̠syōtta̍rē । va̠ha̠tava̍ḥ pa̠rastā̠dvaha̍mānā a̠vastā̎t ॥ 2 ॥

dē̠vasya̍ savi̠tur-hasta̍ḥ । pra̠sa̠vaḥ pa̠rastā̎-thsa̠nira̠vastā̎t ॥ indra̍sya chi̠trā । ṛ̠ta-mpa̠rastā̎-thsa̠tya-ma̠vastā̎t ॥ vā̠yō-rniṣṭyā̎ vra̠tati̍ḥ । pa̠rastā̠-dasi̍ddhi-ra̠vastā̎t ॥ i̠ndrā̠gni̠yō-rviśā̍khē । yu̠gāni̍ pa̠rastā̎t-kṛ̠ṣamā̍ṇā a̠vastā̎t ॥ mi̠trasyā̍-nūrā̠dhāḥ । a̠bhyā̠rōha̍t-pa̠rastā̍-da̠bhyārū̍ḍha-ma̠vastā̎t ॥ 3 ॥

indra̍sya rōhi̠ṇī । śṛ̠ṇat-pa̠rastā̎t-pratiśṛ̠ṇa-da̠vastā̎t ॥ nir-ṛ̍tyai-mūla̠var​ha̍ṇī । pra̠ti̠bha̠ñjanta̍ḥ pa̠rastā̎t-pratiśṛ̠ṇantō̠-'vastā̎t ॥ a̠pā-mpūrvā̍ aṣā̠ḍhāḥ । varcha̍ḥ pa̠rastā̠-thsami̍ti-ra̠vastā̎t ॥ viśvē̍ṣā-ndē̠vānā̠-mutta̍rāḥ । a̠bhi̠jaya̍t-pa̠rastā̍-da̠bhiji̍ta-ma̠vastā̎t ॥ vi̠ṣṇō̎-śśrō̠ṇā pṛ̠chChamā̍nāḥ । pa̠rastā̠t-panthā̍ a̠vastā̎t ॥ 4 ॥

vasū̍nā̠g̠ śravi̍ṣṭhāḥ । bhū̠ta-mpa̠rastā̠-dbhūti̍ra̠vastā̎t ॥ indra̍sya-śa̠tabhi̍ṣak । vi̠śvavya̍chāḥ pa̠rastā̎-dvi̠śvakṣi̍ti-ra̠vastā̎t ॥ a̠jasyaika̍pada̠ḥ pūrvē̎ prōṣṭhapa̠dāḥ । vai̠śvā̠na̠ra-mpa̠rastā̎-dvaiśvāvasa̠va-ma̠vastā̎t ॥ ahē̎rbu̠dhniya̠-syōtta̍rē । a̠bhi̠ṣi̠ñchanta̍ḥ pa̠rastā̍-dabhiṣu̠ṇvantō̠-'vastā̎t ॥ pū̠ṣṇō rē̠vatī̎ । gāva̍ḥ pa̠rastā̎-dva̠thsā a̠vastā̎t ॥ a̠śvinō̍raśva̠yujau̎ । grāma̍ḥ pa̠rastā̠thsēnā̠ 'vastā̎t ॥ ya̠masyā̍pa̠bhara̍ṇīḥ । a̠pa̠kar​ṣa̍ntaḥ pa̠rastā̍-dapa̠vaha̍ntō̠-'vastā̎t ॥ pū̠rṇā pa̠śchādu̠ta pū̠rṇā pu̠rastā̠dunma̍dhya̠taḥ pau̎rṇamā̠sī ji̍gāya । tasyā̎-ndē̠vā adhi̍ sa̠ṃvasa̍nta utta̠mē nāka̍ i̠ha mā̍dayantām ॥, yattē̍ dē̠vā ada̍dhu rbhāga̠dhēya̠mamā̍vāsyē sa̠ṃvasa̍ntō mahi̠tvā । sānō̍ ya̠jña-mpi̍pṛhi viśvavārē ra̠yi-nnō̍ dhēhi subhagē su̠vīra̎m ॥ ॥ 5 ॥
(ā̠rdrama̠vastā̠-d- vaha̍mānā a̠vastā̍ - da̠bhyārū̍ḍhama̠vastā̠t - panthā̍ a̠vastā̎-d- va̠thsā a̠vastā̠-tpañcha̍ cha) (a. 1)

anuvākaṃ 2 - karmānuṣṭhānār​haḥ nakṣatrarūpaḥ puṇyakālaḥ
ya-tpuṇya̠-nnakṣa̍tram । ta-dba-ṭku̍rvītōpavyu̠ṣam । ya̠dā vai sūrya̍ u̠dēti̍ । atha̠ nakṣa̍tra̠-nnaiti̍ । yāva̍ti̠ tatra̠ sūryō̠ gachChē̎t । yatra̍ jagha̠nya̍-mpaśyē̎t । tāva̍ti kurvīta ya-tkā̠rī syāt । pu̠ṇyā̠ha ē̠va ku̍rutē । ē̠vagṃ ha̠ vai ya̠jñēṣu̍-ñcha śa̠tadyu̍mna-ñcha mā̠thsyō ni̍ravasāya̠yā-ñcha̍kāra ॥ 6 ॥

yō vai na̍kṣa̠triya̍-mpra̠jāpa̍ti̠ṃ vēda̍ । u̠bhayō̍rēnaṃ lō̠kayō̎rviduḥ । hasta̍ ē̠vāsya̠ hasta̍ḥ । chi̠trā śira̍ḥ । niṣṭyā̠ hṛda̍yam । ū̠rū viśā̍khē । pra̠ti̠ṣṭhā 'nū̍rā̠dhāḥ । ē̠ṣa vai na̍kṣa̠triya̍ḥ pra̠jāpa̍tiḥ । ya ē̠vaṃ vēda̍ । u̠bhayō̍rēnaṃ lō̠kayō̎rviduḥ ॥ 7 ॥

a̠smigg​śchā̠-muṣmigg̍ścha ॥ yā-ṅkā̠mayē̍ta duhi̠tara̍-mpri̠yā syā̠diti̍ । tā-nniṣṭyā̍yā-ndadyāt । pri̠yaiva bha̍vati । nēva̠ tu puna̠rāga̍chChati ॥ a̠bhi̠jinnāma̠ nakṣa̍tram । u̠pari̍ṣṭā-daṣā̠ḍhānā̎m । a̠vastā̎chChrō̠ṇāyai̎ । dē̠vā̠su̠rā-ssaṃya̍ttā āsann । tē dē̠vāstasmi̠-nnakṣa̍trē̠-'bhya̍jayann ॥ 8 ॥

yada̠bhyaja̍yann । tada̍bhi̠jitō̍-'bhiji̠ttvam । ya-ṅkā̠mayē̍tā-napaja̠yya-ñja̍yē̠diti̍ । tamē̠tasmi̠-nnakṣa̍trē yātayēt । a̠na̠pa̠ja̠yyamē̠va ja̍yati । pā̠papa̍rājitamiva̠ tu ॥ pra̠jāpa̍tiḥ pa̠śūna̍sṛjata । tē nakṣa̍tra-nnakṣatra̠-mupā̍tiṣṭhanta । tē sa̠māva̍nta ē̠vābha̍vann । tē rē̠vatī̠-mupā̍tiṣṭhanta ॥ 9 ॥

tē rē̠vatyā̠-mprābha̍vann । tasmā̎-drē̠vatyā̎-mpaśū̠nā-ṅku̍rvīta । ya-tkiñchā̎rvā̠chīna̠gṃ̠ sōmā̎t । praiva bha̍vanti ॥ sa̠li̠laṃ vā i̠dama̍nta̠rāsī̎t । yadata̍rann । ta-ttāra̍kāṇā-ntāraka̠tvam । yō vā i̠ha yaja̍tē । a̠mugṃ salō̠ka-nna̍kṣatē । tannakṣa̍trāṇā-nnakṣatra̠tvam ॥ 10 ॥

dē̠va̠gṛ̠hā vai nakṣa̍trāṇi । ya ē̠vaṃ vēda̍ । gṛ̠hyē̍va bha̍vati ॥ yāni̠ vā i̠māni̍ pṛthi̠vyāśchi̠trāṇi̍ । tāni̠ nakṣa̍trāṇi । tasmā̍-daślī̠lanā̍magg​-śchi̠trē । nāva̍syē̠nna ya̍jēta । yathā̍ pāpā̠hē ku̍ru̠tē । tā̠dṛgē̠va tat ॥ dē̠va̠na̠kṣa̠trāṇi̠ vā a̠nyāni̍ ॥ 11 ॥

ya̠ma̠na̠kṣa̠trāṇya̠nyāni̍ । kṛtti̍kāḥ pratha̠mam । viśā̍khē utta̠mam । tāni̍ dēvanakṣa̠trāṇi̍ । a̠nū̠rā̠dhāḥ pra̍tha̠mam । a̠pa̠bhara̍ṇī-rutta̠mam । tāni̍ yamanakṣa̠trāṇi̍ । yāni̍ dēvanakṣa̠trāṇi̍ । tāni̠ dakṣi̍ṇēna̠ pari̍yanti । yāni̍ yamanakṣa̠trāṇi̍ ॥ 12 ॥

tānyutta̍rēṇa ॥ anvē̍ṣāmarā̠thsmēti̍ । tada̍nūrā̠dhāḥ । jyē̠ṣṭhamē̍ṣā-mavadhi̠ṣmēti̍ । tajjyē̎ṣṭha̠ghnī । mūla̍mēṣāmavṛkṣā̠mēti̍ । ta-nmū̍la̠var​ha̍ṇī । yannāsa̍hanta । tada̍ṣā̠ḍhāḥ । yadaślō̍ṇat ॥ 13 ॥

tachChrō̠ṇā । yadaśṛ̍ṇōt । tachChravi̍ṣṭhāḥ । yachCha̠ta-mabhi̍ṣajyann । tachCha̠tabhi̍ṣak । prō̠ṣṭha̠pa̠dēṣūda̍yachChanta । rē̠vatyā̍maravanta । a̠śva̠yujō̍rayuñjata । a̠pa̠bhara̍ṇī̠ṣva pā̍vahann । tāni̠ vā ē̠tāni̍ yamanakṣa̠trāṇi̍ ॥ yānyē̠va dē̍vanakṣa̠trāṇi̍ । tēṣu̍ kurvīta yatkā̠rī syāt । pu̠ṇyā̠ha ē̠va ku̍rutē ॥ 14 ॥
(cha̠kā̠ - rai̠vaṃ vēdō̠bhayō̍ rēnaṃ lō̠kayō̎rvidu - rajayan - rē̠vatī̠mupā̍tiṣṭhanta - nakṣatra̠tva - ma̠nyāni̠ - yāni̍ yamanakṣa̠trā - ṇyaślō̍ṇa--dyamanakṣa̠trāṇi̠ trīṇi̍ cha) (a. 2)

anuvākaṃ 3 - karmānuṣṭhānār​haḥ divasabhāgarūpaḥ hēyōpādēyakāla vibhāgaḥ
dē̠vasya̍ savi̠tuḥ prā̠taḥ pra̍sa̠vaḥ prā̠ṇaḥ । varu̍ṇasya sā̠yamā̍sa̠vō̍-'pā̠naḥ ॥ ya-tpra̍tī̠chīna̍-mprāta̠stanā̎t । prā̠chīnagṃ̍ saṅga̠vāt । tatō̍ dē̠vā a̍gniṣṭō̠ma-nnira̍mimata । tat-tadātta̍vīrya-nnirmā̠rgaḥ ॥ mi̠trasya̍ saṅga̠vaḥ । tat-puṇya̍-ntēja̠svyaha̍ḥ ।
tasmā̠ttar​hi̍ pa̠śava̍-ssa̠māya̍nti ॥ ya-tpra̍tī̠chīnagṃ̍ saṅga̠vāt ॥ 15 ॥

prā̠chīna̍-mma̠ddhyandi̍nāt । tatō̍ dē̠vā u̠kthya̍-nnira̍mimata । tat-tadātta̍vīrya-nnirmā̠rgaḥ ॥ bṛha̠spatē̎-rma̠ddhyandi̍naḥ । tat-puṇya̍-ntēja̠svyaha̍ḥ । tasmā̠ttar​hi̠ tēkṣṇi̍ṣṭha-ntapati ॥ yat-pra̍tī̠chīna̍-mma̠ddhyandi̍nāt । prā̠chīna̍-maparā̠hṇāt । tatō̍ dē̠vā-ṣṣō̍ḍa̠śina̠-nnira̍mimata । tattadātta̍vīrya-nnirmā̠rgaḥ ॥ 16 ॥

bhaga̍syāparā̠hṇaḥ । tat-puṇya̍-ntēja̠svyaha̍ḥ । tasmā̍daparā̠hṇē ku̍mā̠ryō̍ bhaga̍mi̠chChamā̍nā-ścharanti ॥ yat-pra̍tī̠chīna̍maparā̠hṇāt । prā̠chīnagṃ̍ sā̠yāt । tatō̍ dē̠vā a̍tirā̠tra-nnira̍mimata । tattadātta̍vīrya-nnirmā̠rgaḥ ॥ varu̍ṇasya sā̠yam । tat-puṇya̍-ntēja̠svyaha̍ḥ । tasmā̠ttar​hi̠ nānṛ̍taṃ vadēt ॥ 17 ॥

brā̠hma̠ṇō vā a̍ṣṭāvi̠gṃ̠śō nakṣa̍trāṇām । sa̠mā̠nasyāhna̠ḥ pañcha̠ puṇyā̍ni̠ nakṣa̍trāṇi । cha̠tvārya̍ślī̠lāni̍ । tāni̠ nava̍ । yachcha̍ pa̠rastā̠nnakṣa̍trāṇā̠ṃ yachchā̠vastā̎t । tānyēkā̍daśa । brā̠hma̠ṇō dvā̍da̠śaḥ । ya ē̠vaṃ vi̠dvān-thsa̍ṃvathsa̠raṃ vra̠ta-ñchara̍ti । sa̠ṃva̠thsa̠rēṇai̠vāsya̍ vra̠ta-ṅgu̠pta-mbha̍vati ॥ sa̠mā̠nasyāhna̠ḥ pañcha̠ puṇyā̍ni̠ nakṣa̍trāṇi । cha̠tvārya̍ślī̠lāni̍ । tāni̠ nava̍ । ā̠gnē̠yī rātri̍ḥ । ai̠ndramaha̍ḥ । tānyēkā̍daśa । ā̠di̠tyō dvā̍da̠śaḥ । ya ē̠vaṃ vi̠dvān-thsa̍ṃvathsa̠raṃ vra̠ta-ñchara̍ti । sa̠ṃva̠thsa̠rēṇai̠vāsya̍ vra̠ta-ṅgu̠pta-mbha̍vati ॥ 18 ॥
(sa̠ṅga̠vāth - ṣō̍ḍa̠śina̠-nnira̍mimata̠ tattadātta̍vīrya-nnirmā̠gō - va̍dē-d- bhavati samā̠nasyāhna̠ḥ pañcha̠ puṇyā̍ni̠ nakṣa̍trāṇya̠ṣṭau cha̍) (a. 3)

anuvākaṃ 4 - sōmaśēṣabhūtā pātrastutiḥ.(ādhvarabrāhmaṇaśēṣaḥ)
bra̠hma̠vā̠dinō̍ vadanti । kati̠ pātrā̍ṇi ya̠jñaṃ va̍ha̠ntīti̍ । trayō̍da̠śēti̍ brūyāt । sa yadbrū̠yāt । kastāni̠ nira̍mimī̠tēti̍ । pra̠jāpa̍ti̠riti̍ brūyāt । sa yadbrū̠yāt । kuta̠stāni̠ nira̍mimī̠tēti̍ । ā̠tmana̠ iti̍ । prā̠ṇā̠pā̠nābhyā̍-mē̠vōpāg̍-śvantaryā̠mau nira̍mimīta ॥ 19 ॥

vyā̠nādu̍pāgṃśu̠ sava̍nam । vā̠cha ai̎mdravāya̠vam । da̠kṣa̠kra̠tubhyā̎-mmaitrāvaru̠ṇam । śrōtrā̍dāśvi̠nam । chakṣu̍ṣa-śśu̠krā ma̠nthinau̎ । ā̠tmana̍ āgraya̠ṇam । aṅgē̎bhya u̠kthya̎m । āyu̍ṣō dhru̠vam । pra̠ti̠ṣṭhāyā̍ ṛtupā̠trē ॥ ya̠jñaṃ vāva ta-mpra̠jāpa̍ti̠-rnira̍mimīta । sa nirmi̍tō̠ nāddhri̍yata̠ sama̍vlīyata । sa ē̠tā-npra̠jāpa̍ti-rapivā̠pāna̍-paśyat । tānnira̍vapat । tairvai sa ya̠jñamapya̍vapat । yada̍pivā̠pā bhava̍nti । ya̠jñasya̠ dhṛtyā̠ asa̍ṃvlayāya ॥ 20 ॥
(u̠pā̠g̠śva̠nta̠ryā̠mau nira̍mimītā- mimīta̠ ṣaṭ cha̍) (a. 4)

anuvākaṃ 5 - chāturmāsyaśēṣā vapanamantrāḥ, (rājasūyabrāhmaṇam)
ṛ̠tamē̠va pa̍ramē̠ṣṭhi । ṛ̠ta-nnātyē̍ti̠ ki-ñcha̠na । ṛ̠tē sa̍mu̠dra āhi̍taḥ । ṛ̠tē bhūmi̍ri̠yagg​ śri̠tā । a̠gnisti̠gmēna̍ śō̠chiṣā̎ । tapa̠ ākrā̎mta-mu̠ṣṇihā̎ । śira̠stapa̠syāhi̍tam । vai̠śvā̠na̠rasya̠ tēja̍sā । ṛ̠tēnā̎sya̠ niva̍rtayē । sa̠tyēna̠ pari̍vartayē ॥ 21 ॥

tapa̍sā̠-'syānu̍vartayē । śi̠vēnā̠syōpa̍vartayē । śa̠gmēnā̎syā̠-bhiva̍rtayē । tadṛ̠ta-nta-thsa̠tyam । ta-dvra̠ta-ntachCha̍kēyam । tēna̍ śakēya̠-ntēna̍ rāddhyāsam ॥ ya-dgha̠rmaḥ pa̠ryava̍rtayat । antā̎-npṛthi̠vyā di̠vaḥ । a̠gnirīśā̍na̠ ōja̍sā । varu̍ṇō dhī̠tibhi̍-ssa̠ha ॥ 22 ॥

indrō̍ ma̠rudbhi̠-ssakhi̍bhi-ssa̠ha ॥ a̠gnisti̠gmēna̍ śō̠chiṣā̎ । tapa̠ ākrā̎mta-mu̠ṣṇihā̎ । śira̠stapa̠syāhi̍tam । vai̠śvā̠na̠rasya̠ tēja̍sā । ṛ̠tēnā̎sya̠ niva̍rtayē । sa̠tyēna̠ pari̍vartayē । tapa̍sā̠ 'syānu̍vartayē । śi̠vēnā̠syōpa̍vartayē । śa̠gmēnā̎syā̠bhiva̍rtayē ॥ 23 ॥

tadṛ̠ta-nta-thsa̠tyam । ta-dvra̠ta-ntachCha̍kēyam । tēna̍ śakēya̠-ntēna̍ rāddhyāsam ॥ yō a̠syāḥ pṛ̍thi̠vyāstva̠chi । ni̠va̠rtaya̠tyōṣa̍dhīḥ । a̠gnirīśā̍na̠ ōja̍sā । varu̍ṇō dhī̠tibhi̍-ssa̠ha । indrō̍ ma̠rudbhi̠-ssakhi̍bhi-ssa̠ha ॥ a̠gnisti̠gmēna̍ śō̠chiṣā̎ । tapa̠ ākrā̎mta-mu̠ṣṇihā̎ ॥ 24 ॥

śira̠stapa̠syāhi̍tam । vai̠śvā̠na̠rasya̠ tēja̍sā । ṛ̠tēnā̎sya̠ niva̍rtayē । sa̠tyēna̠ pari̍vartayē । tapa̍sā̠ 'syānu̍vartayē । śi̠vēnā̠syōpa̍vartayē । śa̠gmēnā̎syā̠-bhiva̍rtayē । tadṛ̠ta-nta-thsa̠tyam । ta-dva̠ta-ntachCha̍kēyam । tēna̍ śakēya̠-ntēna̍ rāddhyāsam ॥ 25 ॥

ēka̠-mmāsa̠-muda̍sṛjat । pa̠ra̠mē̠ṣṭhī pra̠jābhya̍ḥ । tēnā̎bhyō̠ maha̠ āva̍hat । a̠mṛta̠-mmartyā̎bhyaḥ । pra̠jāmanu̠ prajā̍yasē । tadu̍ tē martyā̠mṛta̎m । yēna̠ māsā̍ ardhamā̠sāḥ । ṛ̠tava̍ḥ parivathsa̠rāḥ । yēna̠ tē tē̎ prajāpatē । ī̠jā̠nasya̠ nyava̍rtayann ॥ 26 ॥

tēnā̠hama̠sya brahma̍ṇā । niva̍rtayāmi jī̠vasē̎ ॥ a̠gnisti̠gmēna̍ śō̠chiṣā̎ । tapa̠ ākrā̎mta-mu̠ṣṇihā̎ । śira̠stapa̠syāhi̍tam । vai̠śvā̠na̠rasya̠ tēja̍sā । ṛ̠tēnā̎sya̠ niva̍rtayē । sa̠tyēna̠ pari̍vartayē । tapa̍sā̠ 'syānu̍vartayē । śi̠vēnā̠syōpa̍vartayē । śa̠gmēnā̎syā̠bhiva̍rtayē । tadṛ̠ta-nta-thsa̠tyam । ta-dvra̠ta-ntachCha̍kēyam । tēna̍ śakēya̠-ntēna̍ rāddhyāsam ॥ 27 ॥
(pari̍vartayē - sa̠hā - bhiva̍rtaya - u̠ṣṇihā̍ - rāddhyāsa̠ṃ - nyava̍rtaya̠n - nupa̍vartayē cha̠tvāri̍ cha) (a. 5)

anuvākaṃ 6 - chāturmāsyaśēṣā vapanavidhiḥ (rājasūyabrāhmaṇam)
dē̠vā vai ya-dya̠jñē 'ku̍rvata । tadasu̍rā akurvata । tē-'su̍rā ū̠rdhva-mpṛ̠ṣṭhēbhyō̠ nāpa̍śyann । tē kēśā̠nagrē̍-'vapanta । atha̠ śmaśrū̍ṇi । athō̍papa̠kṣau । tata̠stē-'vā̎mcha āyann । parā̍-'bhavann । yasyai̠vaṃ vapa̍nti । avā̍ṃēti ॥ 28 ॥

athō̠ parai̠va bha̍vati । atha̍ dē̠vā ū̠rdhva-mpṛ̠ṣṭhēbhyō̍-'paśyann । ta u̍papa̠kṣāvagrē̍-'vapanta । atha̠ śmaśrū̍ṇi । atha̠ kēśān̍ । tata̠stē̍-'bhavann । su̠va̠rgaṃ lō̠kamā̍yann । yasyai̠vaṃ vapa̍nti । bhava̍tyā̠tmanā̎ । athō̍ suva̠rgaṃ lō̠kamē̍ti ॥ 29 ॥

athai̠ta-nmanu̍-rva̠ptrē mi̍thu̠na-ma̍paśyat । sa śmaśrū̠ṇyagrē̍-'vapata । athō̍papa̠kṣau । atha̠ kēśān̍ । tatō̠ vai sa prājā̍yata pra̠jayā̍ pa̠śubhi̍ḥ । yasyai̠vaṃ vapa̍nti । pra pra̠jayā̍ pa̠śubhi̍-rmithu̠nai-rjā̍yatē ॥ dē̠vā̠su̠rā-ssaṃya̍ttā āsann । tē sa̍ṃvathsa̠rē vyāya̍chChanta । tā-ndē̠vāśchā̍tu-rmā̠syairē̠vābhi prāyu̍ñjata ॥ 30 ॥

vai̠śva̠dē̠vēna̍ cha̠turō̍ mā̠sō̍-'vṛñja̠tēndra̍rājānaḥ । tāñChī̠r̠ṣanni chāva̍rtayanta̠ pari̍ cha । va̠ru̠ṇa̠ pra̠ghā̠sai-ścha̠turō̍ mā̠sō̍-'vṛñjata̠ varu̍ṇarājānaḥ । tāñChī̠r̠ṣanni chāva̍rtayanta̠ pari̍ cha । sā̠ka̠mē̠dhaiścha̠turō̍ mā̠sō̍-'vṛñjata̠ sōma̍rājānaḥ । tāñChī̠ra̠.ṣanni chāva̍rtayanta̠ pari̍ cha । yā sa̍ṃvathsa̠ra u̍pajī̠vā ''sī̎t । tāmē̍ṣā-mavṛñjata । tatō̍ dē̠vā abha̍vann । parā-'su̍rāḥ ॥ 31 ॥

ya ē̠vaṃ vi̠dvāg​-śchā̍turmā̠syai-ryaja̍tē । bhrātṛ̍vyasyai̠va mā̠sō vṛ̠ktvā । śī̠r̠ṣanni cha̍ va̠rtaya̍tē̠ pari̍ cha । yaiṣā sa̍ṃvathsa̠ra u̍pajī̠vā । vṛ̠ṅktē tā-mbhrātṛ̍vyasya । kṣu̠dhā 'sya̠ bhrātṛ̍vya̠ḥ parā̍ bhavati ॥ lō̠hi̠tā̠ya̠sēna̠ niva̍rtayatē । yadvā i̠māma̠gnir-ṛ̠tāvāga̍tē niva̠rtaya̍ti । ē̠tadē̠vaināgṃ̍ rū̠pa-ṅkṛ̠tvā niva̍rtayati । sā tata̠-śśva-śśvō̠ bhūya̍sī̠ bhava̍ntyēti ॥ 32 ॥

prajā̍yatē । ya ē̠vaṃ vi̠dvāँllō̍hitāya̠sēna̍ niva̠rtaya̍tē । ē̠tadē̠va rū̠pa-ṅkṛ̠tvā niva̍rtayatē । sa tata̠-śśva-śśvō̠ bhūyā̠n-bhava̍nnēti । praiva jā̍yatē ॥ trē̠ṇyā śa̍la̠lyā niva̍rtayēta । trīṇi̍ trīṇi̠ vai dē̠vānā̍mṛ̠ddhāni̍ । trīṇi̠ Chandāgṃ̍si । trīṇi̠ sava̍nāni । traya̍ i̠mē lō̠kāḥ ॥ 33 ॥

ṛ̠ddhyāmē̠va ta-dvī̠rya̍ ē̠ṣu lō̠kēṣu̠ prati̍ tiṣṭhati ॥ yachchā̍turmāsyayā̠-jyā̎tmanō̠ nāva̠dyēt । dē̠vēbhya̠ āvṛ̍śchyēta । cha̠tṛ̠ṣu cha̍tṛṣu̠ māsē̍ṣu̠ niva̍rtayēta । pa̠rōkṣa̍mē̠va ta-ddē̠vēbhya̍ ā̠tmanō-'va̍dya̠tyanā̎ vraskāya ॥ dē̠vānā̠ṃ vā ē̠ṣa ānī̍taḥ । yaśchā̍turmāsyayā̠jī । ya ē̠vaṃ vi̠dvānni cha̍ va̠rtaya̍tē̠ pari̍ cha । dē̠vatā̍ ē̠vāpyē̍ti । nāsya̍ ru̠draḥ pra̠jā-mpa̠śū-na̠bhima̍nyatē ॥ 34 ॥
(ē̠tyē̠- tya̠ - yu̠ñja̠tā - su̍rā - ēti - lō̠kā - ma̍nyatē) (a. 6)

anuvākaṃ 7 - agnichayanaśēṣā iṣṭakōpadhānamantrāḥ, tatra santatyākhyēṣṭakāmantrāḥ
āyu̍ṣaḥ prā̠ṇagṃ santa̍nu । prā̠ṇāda̍pā̠nagṃ santa̍nu । a̠pā̠nā-dvyā̠nagṃ santa̍nu । vyā̠nāchchakṣu̠-ssanta̍nu । chakṣu̍ṣa̠-śśrōtra̠gṃ̠ santa̍nu । śrōtrā̠-nmana̠-ssanta̍nu । mana̍sō̠ vācha̠gṃ̠ santa̍nu । vā̠cha ā̠tmāna̠gṃ̠ santa̍nu । ā̠tmana̍ḥ pṛthi̠vīgṃ santa̍nu । pṛ̠thi̠vyā a̠ntari̍kṣa̠gṃ̠ santa̍nu । a̠ntari̍kṣā̠-ddiva̠gṃ̠ santa̍nu ।diva̠-ssuva̠-ssanta̍nu ॥ 35 ॥
(a̠ntari̍kṣa̠gṃ̠ santa̍nu̠ dvē cha̍) (a. 7)

anuvākaṃ 8 - agnichayanaśēṣā tharvaśirō-'bhidhānānāmiṣṭakānā-mmantrāḥ
indrō̍ dadhī̠chō a̠sthabhi̍ḥ । vṛ̠trāṇya pra̍tiṣkutaḥ । ja̠ghāna̍ nava̠ tīrnava̍ ॥ i̠chChannaśva̍sya̠ yachChira̍ḥ । parva̍tē̠ṣvapa̍ śritam । ta-dvi̍dachCharya̠ṇāva̍ti ॥ atrā ha ̠gōrama̍nvata । nāma̠ tvaṣṭu̍rapī̠chya̎m । i̠tthā cha̠ndrama̍sō gṛ̠hē ॥ indra̠midgā̠thinō̍ bṛ̠hat ॥ 36 ॥

indra̍ma̠rkēbhi̍ra̠rkiṇa̍ḥ । indra̠ṃ vāṇī̍ranūṣata ॥ indra̠ iddharyō̠-ssachā̎ । sammi̍śla̠ āva̍chō̠ yujā̎ । indrō̍ va̠jrī hi̍ra̠ṇyaya̍ḥ ॥ indrō̍ dī̠rghāya̠ chakṣa̍sē । ā sūryagṃ̍ rōhaya-ddi̠vi । vi gōbhi̠radri̍mairayat ॥ indra̠ vājē̍ṣu nō ava । sa̠hasra̍ pradhanēṣu cha ॥ 37 ॥

u̠gra u̠grābhi̍rū̠tibhi̍ḥ ॥ tamindra̍ṃ vājayāmasi । ma̠hē vṛ̠trāya̠ hanta̍vē । sa vṛṣā̍ vṛṣa̠bhō bhu̍vat ॥ indra̠-ssadāma̍nē kṛ̠taḥ । ōji̍ṣṭha̠-ssa balē̍ hi̠taḥ । dyu̠mnī ślō̠kī sa sau̠mya̍ḥ ॥ gi̠rā vajrō̠ na sambhṛ̍taḥ । saba̍lō̠ ana̍pachyutaḥ । va̠va̠kṣu-ru̠grō astṛ̍taḥ ॥ 38 ॥
(bṛ̠ha- chchā - stṛ̍taḥ) (a. 8)

anuvākaṃ 9 - sōmaśēṣabhūtā iṣṭayaḥ. (ādhvarabrāhmaṇam)
dē̠vā̠su̠rā-ssaṃya̍ttā āsann । sa pra̠jāpa̍ti̠rindra̍-ñjyē̠ṣṭha-mpu̠tramapa̠ nya̍dhatta । nēdē̍na̠masu̍rā̠ balī̍yāgṃ sō-'hana̠nniti̍ । pra̠hrādō̍ ha̠ vai kā̍yādha̠vaḥ । vi̠rōcha̍na̠gg̠ sva-mpu̠tramapa̠ nya̍dhatta । nēdē̍na-ndē̠vā a̍hana̠nniti̍ । tē dē̠vāḥ pra̠jāpa̍ti-mupasa̠mētyō̍chuḥ । nārā̠jaka̍sya yu̠ddhama̍sti । indra̠manvi̍chChā̠mēti̍ । taṃ ya̍jñakra̠tubhi̠-ranvai̎chChann ॥ 39 ॥

taṃ ya̍jñakra̠tubhi̠rnānva̍vindann । tamiṣṭi̍bhi̠-ranvai̎chChann । tamiṣṭi̍bhi̠-ranva̍vindann । tadiṣṭī̍nā-miṣṭi̠tvam । ēṣṭa̍yō ha̠ vai nāma̍ । tā iṣṭa̍ya̠ ityācha̍kṣatē pa̠rōkṣē̍ṇa । pa̠rōkṣa̍priyā iva̠ hi dē̠vāḥ ॥ tasmā̍ ē̠tamā̎gnāvaiṣṇa̠va-mēkā̍daśakapāla-ndīkṣa̠ṇīya̠-nnira̍vapann । tada̍pa̠drutyā̍tanvata । tānpa̍tnī saṃyā̠jānta̠ upā̍nayann ॥ 40 ॥

tē tada̍-ntamē̠va kṛ̠tvōda̍dravann ॥ tē prā̍ya̠ṇīya̍ma̠bhi sa̠mārō̍hann । tada̍pa̠drutyā̍tanvata । tāñCha̠ṃyva̍nta̠ upā̍nayann । tē tada̍tammē̠va kṛ̠tvōda̍dravann ॥ ta ā̍ti̠thyama̠bhi sa̠mārō̍hann । tada̍pa̠drutyā̍tanvata । tāniḍā̎mta̠ upā̍nayann । tē tada̍tammē̠va kṛ̠tvōda̍dravann । tasmā̍ dē̠tā ē̠tada̍ntā̠ iṣṭa̍ya̠-ssanti̍ṣṭhantē ॥ 41 ॥

ē̠vagṃ hi dē̠vā aku̍rvata । iti̍ dē̠vā a̍kurvata । ityu̠ vai ma̍nu̠ṣyā̎ḥ kurvatē ॥ tē dē̠vā ū̍chuḥ । yadvā i̠damu̠chchai-rya̠jñēna̠ charā̍ma । tannō-'su̍rāḥ pā̠pmā-'nu̍vindanti । u̠pā̠gṃ̠śū̍pa̠sadā̍ charāma । tathā̠ nō-'su̍rāḥ pā̠pmā nānu̍vēthsya̠ntīti̍ । ta u̍pā̠gṃ̠śū̍pa̠sada̍-matanvata । ti̠sra ē̠va sā̍midhē̠nīra̠nūchya̍ ॥ 42 ॥

sru̠vēṇā̍ghā̠ra-mā̠ghārya̍ । ti̠sraḥ parā̍chī̠-rāhu̍tīr-hu̠tvā । sru̠vēṇō̍pa̠sada̍-ñjuha̠vāñcha̍kruḥ । u̠graṃ vachō̠ apā̍vadhī-ntvē̠ṣaṃ vachō̠ apā̍vadhī̠g̠ svāhēti̍ । a̠śa̠na̠yā̠pi̠pā̠sē ha̠ vā u̠graṃ vacha̍ḥ । ēna̍ścha̠ vaira̍hatya-ñcha tvē̠ṣaṃ vacha̍ḥ । ē̠tagṃ ha̠ vāva tachcha̍turdhāvihi̠ta-mpā̠pmāna̍-ndē̠vā apa̍jaghnirē ॥ tathō̍ ē̠vaitadē̍va̠ṃ vidyaja̍mānaḥ । ti̠sra ē̠va sā̍midhē̠nīra̠nūchya̍ । sru̠vēṇā̍ghā̠ra-mā̠ghārya̍ ॥ 43 ॥

ti̠sraḥ parā̍chī̠rāhu̍tīr-hu̠tvā । sru̠vēṇō̍pa̠sada̍-ñjuhōti । u̠graṃ vachō̠ apā̍vadhī-ntvē̠ṣaṃ vachō̠ apā̍vadhī̠g̠ svāhēti̍ । a̠śa̠na̠yā̠pi̠pā̠sē ha̠ vā u̠graṃ vacha̍ḥ । ēna̍ścha̠ vaira̍hatya-ñcha tvē̠ṣaṃ vacha̍ḥ । ē̠tamē̠va tachcha̍turdhā-vihi̠ta-mpā̠pmāna̠ṃ yaja̍mā̠nō-'pa̍hatē ॥ tē̍-'bhi̠nīyai̠vāha̍ḥ pa̠śumā-'la̍bhanta । ahna̍ ē̠va ta-ddē̠vā ava̍rti-mpā̠pmāna̍-mmṛ̠tyumapa̍jaghnirē । tēnā̍bhi̠nīyē̍va̠ rātrē̠ḥ prācha̍rann । rātri̍yā ē̠va ta-ddē̠vā ava̍rti-mpā̠pmāna̍-mmṛ̠tyumapa̍jaghnirē ॥ 44 ॥

tasmā̍dabhi̠nīyai̠vāha̍ḥ pa̠śumāla̍bhēta । ahna̍ ē̠va ta-dyaja̍mā̠nō 'va̍rti-mpā̠pmāna̠-mbhrātṛ̍vyā̠napa̍nudatē । tēnā̍bhi̠nīyē̍va̠ rātrē̠ḥ pracha̍rēt । rātri̍yā ē̠va ta-dyaja̍mā̠nō 'va̍rti-mpā̠pmāna̠-mbhrātṛ̍vyā̠napa̍nudatē ॥ sa ē̠ṣa u̍pavasa̠thīyē 'ha̍n-dvidēva̠tya̍ḥ pa̠śurāla̍bhyatē । dva̠yaṃ vā a̠smin ँlō̠kē yaja̍mānaḥ । asthi̍ cha mā̠gṃ̠sa-ñcha̍ । asthi̍ chai̠va tēna̍ mā̠gṃ̠sa-ñcha̠ yaja̍māna̠-ssagg​ sku̍rutē ॥ tā vā ē̠tāḥ pañcha̍ dē̠vatā̎ḥ । a̠gnīṣōmā̍-va̠gni-rmi̠trāvaru̍ṇau ॥ 45 ॥

pa̠ñcha̠pa̠ñchī vai yaja̍mānaḥ । tvammā̠gṃ̠ sagg​ snāvāsthi̍ ma̠jjā । ē̠tamē̠va tatpa̍ñchadhā vihi̠tamā̠tmāna̍ṃ varuṇapā̠śā-nmu̍ñchati । bhē̠ṣa̠jatā̍yai nirvaruṇa̠tvāya̍ ॥ tagṃ sa̠ptabhi̠-śChandō̍bhiḥ prā̠tara̍hvayann । tasmā̎thsa̠pta cha̍turutta̠rāṇi̠ Chandāgṃ̍si prātaranuvā̠kē-'nū̎chyantē ॥ tamē̠tayō̍-pasa̠mētyō-pā̍sīdann । upā̎smai gāyatā nara̠ iti̍ । tasmā̍ dē̠tayā̍ bahiṣpavamā̠na u̍pa̠sadya̍ḥ ॥ 46 ॥
(ai̠chCha̠n - na̠na̠ya̠gg̠ - sti̠ṣṭha̠ntē̠ - 'nūchyā̠ - nūchya̍ sru̠vēṇā̍ghā̠ramā̠ghārya̠ - rātri̍yā ē̠va ta-ddē̠vā ava̍rti-mpā̠pmānaṃ̍ mṛ̠tyumapa̍jaghnirē - mi̠trāvaru̍ṇau̠ - +nava̍ cha ) (a. 9)

(dē̠vā yaja̍mānō dē̠vā dē̠vā yaja̍mānō̠ yaja̍mānō-'labhanta̠ prācha̍raँllabhēta̠ pracha̍rē̠dāla̍bha̠ntāla̍bhēta mṛ̠tyumapa̍jaghnirē̠ bhrātṛ̍vyān)

anuvākaṃ 10 - trivṛdādistōmarūpāṇi sōmaṅgāni. (ādhvarabrāhmaṇam)
sa sa̍mu̠dra u̍ttara̠taḥ prājva̍la-dbhūmya̠ntēna̍ । ē̠ṣa vāva sa sa̍mu̠draḥ । yachchātvā̍laḥ । ē̠ṣa u̍ vē̠va sa bhū̎mya̠ntaḥ । yadvē̎dya̠ntaḥ । tadē̠tat-tri̍śa̠la-ntri̍pūru̠ṣam । tasmā̠t-ta-ntri̍vita̠sta-ṅkha̍nanti ॥ sa su̍varṇaraja̠tābhyā̎-ṅku̠śībhyā̠-mpari̍gṛhīta āsīt । taṃ yada̠syā addhya̠jana̍yann । tasmā̍dādi̠tyaḥ ॥ 47 ॥

atha̠ ya-thsu̍varṇaraja̠tābhyā̎-ṅku̠śībhyā̠-mpari̍gṛhīta̠ āsī̎t । sā-'sya̍ kauśi̠katā̎ ॥ ta-ntri̠vṛtā̠-'bhi prāstu̍vata । ta-ntri̠vṛtā ''da̍data । ta-ntri̠vṛtā ''ha̍rann । yāva̍tī tri̠vṛtō̠ mātrā̎ ॥ ta-mpa̍ñchada̠śēnā̠bhi prāstu̍vata । ta-mpa̍ñchada̠śēnāda̍data । ta-mpa̍ñchada̠śēnāha̍rann । yāva̍tī pañchada̠śasya̠ mātrā̎ ॥ 48 ॥

tagṃ sa̍ptada̠śēnā̠bhi prāstu̍vata । tagṃ sa̍ptada̠śēnāda̍data । tagṃ sa̍ptada̠śēnāha̍rann । yāva̍tī saptada̠śasya̠ mātrā̎ । tasya̍ saptada̠śēna̍ hri̠yamā̍ṇasya̠ tējō̠ harō̍-'patat । tamē̍kavi̠gṃ̠ śēnā̠bhi prāstu̍vata । tamē̍kavi̠gṃ̠śēnāda̍data । tamē̍kavi̠gṃ̠śēnāha̍rann । yāva̍tyēkavi̠gṃ̠śasya̠ mātrā̎ ॥ tē yat-tri̠vṛtā̎ stu̠vatē̎ ॥ 49 ॥

tri̠vṛtai̠va ta-dyaja̍māna̠māda̍datē । ta-ntri̠vṛtai̠va ha̍ranti । yāva̍tī tri̠vṛtō̠ mātrā̎ । a̠gnirvai tri̠vṛt । yāva̠dvā a̠gnērdaha̍tō dhū̠ma u̠dētyānu̠vyēti̍ । tāva̍tī tri̠vṛtō̠ mātrā̎ । a̠gnērē̠vaina̠-ntat । mātrā̠gṃ̠ sāyu̍jyagṃ salō̠katā̎-ṅgamayanti ॥ atha̠ yatpa̍ñchada̠śēna̍ stu̠vatē̎ । pa̠ñcha̠da̠śēnai̠va ta-dyaja̍māna̠-māda̍datē ॥ 50 ॥

ta-mpa̍ñchada̠śēnai̠va ha̍ranti । yāva̍tī pañchada̠śasya̠ mātrā̎ । cha̠ndramā̠ vai pa̍ñchada̠śaḥ । ē̠ṣa hi pa̍ñchada̠śyāma̍pakṣī̠yatē̎ । pa̠ñcha̠daśyā-mā̍pū̠ryatē̎ । cha̠ndrama̍sa ē̠vaina̠-ntat । mātrā̠gṃ̠ sāyu̍jyagṃ salō̠katā̎-ṅgamayanti । atha̠ yathsa̍ptada̠śēna̍ stu̠vatē̎ । sa̠pta̠da̠śēnai̠va ta-dyaja̍māna̠māda̍datē । tagṃ sa̍ptada̠śēnai̠va ha̍ranti ॥ 51 ॥

yāva̍tī saptada̠śasya̠ mātrā̎ । pra̠jāpa̍ti̠rvai sa̍ptada̠śaḥ । pra̠jāpa̍tērē̠vaina̠-ntat । mātrā̠gṃ̠ sāyu̍jyagṃ salō̠katā̎-ṅgamayanti । atha̠ yadē̍kavi̠gṃ̠śēna̍ stu̠vatē̎ । ē̠ka̠vi̠gṃ̠śēnai̠va ta-dyaja̍māna̠-māda̍datē । tamē̍kavi̠gṃ̠śēnai̠va ha̍ranti । yāva̍tyēkavi̠gṃ̠śasya̠ mātrā̎ । a̠sau vā ā̍di̠tya ē̍kavi̠gṃ̠śaḥ । ā̠di̠tyasyai̠vaina̠-ntat ॥ 52 ॥

mātrā̠gṃ̠ sāyu̍jyagṃ salō̠katā̎-ṅgamayanti ॥ tē ku̠śyau̎ । vya̍ghnann । tē a̍hōrā̠trē a̍bhavatām । aha̍rē̠va su̠varṇā̍ 'bhavat । ra̠ja̠tā rātri̍ḥ । sa yadā̍di̠tya u̠dēti̍ । ē̠tāmē̠va tathsu̠varṇā̎-ṅku̠śīmanu̠ samē̍ti । atha̠ yada̍sta̠mēti̍ । ē̠tāmē̠va ta-dra̍ja̠tā-ṅku̠śīmanu̠ saṃvi̍śati ॥ pra̠hrādō̍ ha̠ vai kā̍yādha̠vaḥ । vi̠rōcha̍na̠gg̠ sva-mpu̠tramudā̎syat । sa pra̍da̠rō̍-'bhavat । tasmā̎-tprada̠rādu̍da̠ka-nnāchā̍mēt ॥ 53 ॥
(ā̠di̠tyaḥ - pa̍ñchada̠śasya̠ mātrā̎ - stu̠vatē̍ - pañchada̠śēnai̠va ta-dyaja̍māna̠māda̍datē - saptada̠śēnai̠va ha̍ran - tyādi̠tyasyai̠vaina̠nta-d̠ vi̍śati cha̠tvāri̍ cha) (a. 10)

anuvākaṃ 11 - savanīyapaśupurōḍāśāḥ (ādhvarabrāhmaṇam)
yē vai cha̠tvāra̠-sstōmā̎ḥ । kṛ̠ta-ntat । atha̠ yē pañcha̍ । kali̠-ssaḥ । tasmā̠chchatu̍ṣṭōmaḥ । tachchatu̍ṣṭōmasya chatuṣṭōma̠tvam ॥ tadā̍huḥ । ka̠ta̠māni̠ tāni̠ jyōtīgṃ̍ṣi । ya ē̠tasya̠ stōmā̠ iti̍ । tri̠vṛt-pa̍ñchada̠śa-ssa̍ptada̠śa ē̍kavi̠gṃ̠śaḥ ॥ 54 ॥

ē̠tāni̠ vāva tāni̠ jyōtīgṃ̍ṣi । ya ē̠tasya̠ stōmā̎ḥ ॥ sō̎-'bravīt । sa̠pta̠da̠śēna̍ hri̠yamā̍ṇō̠ vya̍lēśiṣi । bhi̠ṣajya̍ta̠ mēti̍ । tama̠śvinau̍ dhā̠nābhi̍-rabhiṣajyatām । pū̠ṣā ka̍ra̠mbhēṇa̍ । bhāra̍tī parivā̠pēṇa̍ । mi̠trāvaru̍ṇau paya̠sya̍yā ॥ tadā̍huḥ ॥ 55 ॥

yada̠śvibhyā̎-ndhā̠nāḥ । pū̠ṣṇaḥ ka̍ra̠mbhaḥ । bhāra̍tyai parivā̠paḥ । mi̠trāvaru̍ṇayōḥ paya̠syā-'tha̍ । kasmā̍dē̠tēṣāgṃ̍ ha̠viṣā̠mindra̍mē̠va ya̍ja̠ntīti̍ । ē̠tā hyē̍na-ndē̠vatā̠ iti̍ brūyāt । ē̠tair-ha̠virbhi̠-rabhi̍ṣajya̠gg̠-stasmā̠diti̍ ॥ taṃ vasa̍vō̠-'ṣṭāka̍pālēna prātassava̠nē̍-'bhiṣajyann । ru̠drā ēkā̍daśakapālēna̠ māddhya̍ndinē̠ sava̍nē । viśvē̍ dē̠vā dvāda̍śakapālēna tṛtīyasava̠nē ॥ 56 ॥

sa yada̠ṣṭāka̍pālā-nprātassava̠nē ku̠ryāt । ēkā̍daśakapālā̠-nmāddhya̍ndinē̠ sava̍nē । dvāda̍śakapālāg​ stṛtīya sava̠nē । vilō̍ma̠ ta-dya̠jñasya̍ kriyēta । ēkā̍daśakapālānē̠va prā̍tassava̠nē ku̍ryāt । ēkā̍daśakapālā̠-nmāddhya̍ndinē̠ sava̍nē । ēkā̍daśakapālāg​ stṛtīya sava̠nē । ya̠jñasya̍ salōma̠tvāya̍ ॥ tadā̍huḥ । ya-dvasū̍nā-mprātassava̠nam । ru̠drāṇā̠-mmāddhya̍ndina̠gṃ̠ sava̍nam । viśvē̍ṣā-ndē̠vānā̎-ntṛtīyasava̠nam । atha̠ kasmā̍dē̠tēṣāgṃ̍ ha̠viṣā̠mindra̍mē̠va ya̍ja̠ntīti̍ । ē̠tā hyē̍na-ndē̠vatā̠ iti̍ brūyāt । ē̠tair-ha̠virbhi̠rabhi̍ṣajya̠gg̠ stasmā̠diti̍ ॥ 57 ॥
(ē̠ka̠vi̠gṃ̠śa-ā̍hu-stṛtīyasava̠nē-prā̍tassava̠na-mpañcha̍ cha) (a. 11)

anuvākaṃ 12 - saptaChandāṃsi prapañchyantē (ādhvarabrāhmaṇam)
tasyāvā̍chō-'vapā̠dāda̍bibhayuḥ । tamē̠tēṣu̍ sa̠ptasu̠ Chanda̍-ssvaśrayann । yadaśra̍yann । tachChrā̍ya̠ntīya̍sya śrāyantīya̠tvam । yadavā̍rayann । ta-dvā̍rava̠ntīya̍sya vāravantīya̠tvam ॥ tasyāvā̍cha ē̠vāva̍pā̠dāda̍bibhayuḥ । tasmā̍ ē̠tāni̍ sa̠pta cha̍turutta̠rāṇi̠ Chandā̠g̠syupā̍dadhuḥ । tēṣā̠mati̠ trīṇya̍richyanta । na trīṇyuda̍bhavann ॥ 58 ॥

sa bṛ̍ha̠tīmē̠vā-spṛ̍śat । dvābhyā̍ma̠kṣarā̎bhyām । a̠hō̠rā̠trābhyā̍mē̠va ॥ tadā̍huḥ । ka̠ta̠mā sā dē̠vākṣa̍rā bṛha̠tī । yasyā̠-nta-tpra̠tyati̍ṣṭhat । dvāda̍śa paurṇamā̠sya̍ḥ । dvāda̠śāṣṭa̍kāḥ । dvāda̍śāmāvā̠syā̎ḥ । ē̠ṣā vāva sā dē̠vākṣa̍rā bṛha̠tī ॥ 59 ॥

yasyā̠-nta-tpra̠tyati̍ṣṭha̠diti̍ ॥ yāni̍ cha̠ Chandāg̍-sya̠tyari̍chyanta । yāni̍ cha̠ nōdabha̍vann । tāni̠ nirvī̎ryāṇi hī̠nānya̍manyanta । sā 'bra̍vī-dbṛha̠tī । māmē̠va bhū̠tvā । māmupa̠ sagg​ śra̍ya̠tēti̍ । cha̠turbhi̍ra̠kṣarai̍-ranu̠ṣṭug-bṛ̍ha̠tī-nnōda̍bhavat । cha̠turbhi̍ra̠kṣarai̎ḥ pa̠ṅkti-rbṛ̍ha̠tī-matya̍richyata । tasyā̍mē̠tāni̍ cha̠tvārya̠kṣarā̎ṇya-pa̠chChidyā̍-dadhāt ॥ 60 ॥

tē bṛ̍ha̠tī ē̠va bhū̠tvā । bṛ̠ha̠tīmupa̠ sama̍śrayatām ॥ a̠ṣṭā̠bhi-ra̠kṣarai̍ru̠ṣṇig-bṛ̍ha̠tī-nnōda̍bhavat । a̠ṣṭā̠bhira̠kṣarai̎stri̠ṣṭug-bṛ̍ha̠tī-matya̍richyata । tasyā̍mē̠tā-nya̠ṣṭāva̠kṣarā̎ṇya-pa̠chChidyā̍dadhāt । tē bṛ̍ha̠tī ē̠va bhū̠tvā । bṛ̠ha̠tīmupa̠ sama̍śrayatām । dvā̠da̠śabhi̍-ra̠kṣarai̎-rgāya̠trī-bṛ̍ha̠tī-nnōda̍bhavat । dvā̠da̠śabhi̍-ra̠kṣarai̠-rjaga̍tī-bṛha̠tī-matya̍richyata । tasyā̍mē̠tāni̠ dvāda̍śā̠kṣarā̎ṇya-pa̠chChidyā̍dadhāt ॥ 61 ॥

tē bṛ̍ha̠tī ē̠va bhū̠tvā । bṛ̠ha̠tīmupa̠ sama̍śrayatām ॥ sō̎-'bravīt-pra̠jāpa̍tiḥ । Chandāgṃ̍si̠ rathō̍ mē bhavata । yu̠ṣmābhi̍-ra̠hamē̠ta-maddhvā̍na̠manu̠ sañcha̍rā̠ṇīti̍ । tasya̍ gāya̠trī cha̠ jaga̍tī cha pa̠kṣāva̍bhavatām । u̠ṣṇikcha̍ tri̠ṣṭupcha̠ praṣṭyau̎ । a̠nu̠ṣṭupcha̍ pa̠ṅktiścha̠ dhuryau̎ । bṛ̠ha̠tyē̍vōddhira̍bhavat । sa ē̠ta-ñCha̍ndōra̠thamā̠sthāya̍ । ē̠tamaddhvā̍na̠manu̠ sama̍charat । ē̠tagṃ ha̠ vai Cha̍ndōra̠thamā̠sthāya̍ । ē̠tamaddhvā̍na̠manu̠ sañcha̍rati । yēnai̠ṣa ē̠ta-thsa̠chaṃra̍ti । ya ē̠vaṃ vi̠dvān-thsōmē̍na̠ yaja̍tē । ya u̍chainamē̠vaṃ vēda̍ ॥ 62 ॥
(a̠bha̠va̠n - vāva sā dē̠vākṣa̍rā bṛha̠ - tya̍dadhā̠-d- dvāda̍śā̠kṣarā̎ṇyapa̠chChidyā̍dadhā - dā̠sthāya̠ ṣaṭcha̍) (a. 12)

(a̠gnēḥ kṛtti̍kā̠ - ya-tpuṇya̍ṃ - dē̠vasya̍ savi̠tu--r bra̍hmavā̠dina̠ḥ ka - tyṛ̠tamē̠va - dē̠vā vā - āyu̍ṣaḥ prā̠ṇa - mindrō̍ dadhī̠chō -dē̍vāsu̠rā-ssa pra̠jāpa̍ti̠ḥ - sa sa̍mu̠drō - yē vai cha̠tvāra̠ - stasyāvā̍chō̠ dvāda̍śa)

(a̠gnēḥ kṛtti̍kā - dēvagṛ̠hā - ṛ̠tamē̠va - vai̎śvadē̠vēna̠ - tē tada̍nta̠ - ta-mpa̍ñchada̠śēna̠ - tē bṛ̍ha̠tī ē̠va dviṣa̍ṣṭiḥ)

(a̠gnēḥ kṛtti̍kā̠ - ya u ̍chainamē̠vaṃ vēda̍)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē prathamāṣṭakē pañchamaḥ prapāṭhaka-ssamāptaḥ ।