kṛṣṇa yajurvēdīya taittirīya brāhmaṇē prathamāṣṭakē saptamaḥ prapāṭhakaḥ - rājasūyānubrāhmaṇaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 - śunāsīrīyēndraturīyapañchāvattīyāpāmārgahōmāḥ

ē̠ta-dbrā̎hmaṇānyē̠va pañcha̍ ha̠vīgṃṣi̍ । athēndrā̍ya̠ śunā̠sīrā̍ya purō̠ḍāśa̠-ndvāda̍śakapāla̠-nnirva̍pati । sa̠ṃva̠thsa̠rō vā indrā̠ śunā̠sīra̍ḥ । sa̠ṃva̠thsa̠rēṇai̠vāsmā̠ anna̠mava̍ rundhē । vā̠ya̠vya̍-mpayō̍ bhavati । vā̠yurvai vṛṣṭyai̎ pradāpayi̠tā । sa ē̠vāsmai̠ vṛṣṭi̠-mpradā̍payati । sau̠rya̍ ēka̍kapālō bhavati । sūryē̍ṇa̠ vā a̠muṣmi̍ँllō̠kē vṛṣṭi̍rdhṛ̠tā । sa ē̠vāsmai̠ vṛṣṭi̠-nni ya̍chChati ॥ 1 ॥

dvā̠da̠śa̠ga̠vagṃ sīra̠-ndakṣi̍ṇā̠ samṛ̍ddhyai । dē̠vā̠su̠rā-ssaṃya̍ttā āsann । tē dē̠vā a̠gnima̍bruvann । tvayā̍ vī̠rēṇāsu̍rāna̠-bhibha̍vā̠mēti̍ । sō̎-'bravīt । trē̠dhā-'hamā̠tmāna̠ṃ vika̍riṣya̠ iti̍ । sa trē̠dhā ''tmāna̠ṃ vya̍kuruta । a̠gni-ntṛtī̍yam । ru̠dra-ntṛtī̍yam । varu̍ṇa̠-ntṛtī̍yam ॥ 2 ॥

sō̎-'bravīt । ka i̠da-ntu̠rīya̠miti̍ । a̠hamitīndrō̎-'bravīt ।
sa-ntu sṛ̍jāvahā̠ iti̍ । tau sama̍sṛjētām । sa indra̍stu̠rīya̍-mabhavat । yadindra̍-stu̠rīya̠-mabha̍vat । tadi̍ndra-turī̠yasyē̎mdra-turīya̠tvam । tatō̠ vai dē̠vā vya̍jayanta । yadi̍ndraturī̠ya-nni̍ru̠pyatē̠ viji̍tyai ॥ 3 ॥

va̠hinī̍ dhē̠nu-rdakṣi̍ṇā । ya-dva̠hinī̎ । tēnā̎gnē̠yī ।
ya-dgauḥ । tēna̍ rau̠drī । ya-ddhē̠nuḥ । tēnai̠ndrī । yathstrī sa̠tī dā̠ntā । tēna̍ vāru̠ṇī samṛ̍ddhyai । pra̠jāpa̍ti-rya̠jñama̍sṛjata ॥ 4 ॥

tagṃ sṛ̠ṣṭagṃ rakṣāg̍syajighāgṃsann । sa ē̠tāḥ pra̠jāpa̍ti-rā̠tmanō̍ dē̠vatā̠ nira̍mimīta । tābhi̠rvai sa di̠gbhyō rakṣāgṃ̍si̠ prāṇu̍data । ya-tpa̍ñchāva̠ttīya̍-ñju̠hōti̍ । di̠gbhya ē̠va ta-dyaja̍mānō̠ rakṣāgṃ̍si̠ praṇu̍datē । samū̍ḍha̠gṃ̠ rakṣa̠-ssanda̍gdha̠gṃ̠ rakṣa̠ ityā̍ha । rakṣāg̍syē̠va sanda̍hati । a̠gnayē̍ rakṣō̠ghnē svāhētyā̍ha । dē̠vatā̎bhya ē̠va vi̍jigyā̠nābhyō̍ bhāga̠dhēya̍-ṅkarōti । pra̠ṣṭi̠vā̠hī rathō̠ dakṣi̍ṇā̠ samṛ̍ddhyai ॥ 5 ॥

indrō̍ vṛ̠tragṃ ha̠tvā । asu̍rā-nparā̠bhāvya̍ । namu̍chimāsu̠ra-nnāla̍bhata । tagṃ śa̠chyā̍-'gṛhṇāt । tau sama̍labhētām । sō̎-'smā-da̠bhiśu̍natarō-'bhavat । sō̎-'bravīt । sa̠dhāṃgṃ sanda̍dhāvahai । atha̠ tvā-'va̍ srakṣyāmi । na mā̠ śuṣkē̍ṇa̠ nārdrēṇa̍ hanaḥ ॥ 6 ॥

na divā̠ na nakta̠miti̍ । sa ē̠tama̠pā-mphēna̍masiñchat । na vā ē̠ṣa śuṣkō̠ nārdrō vyu̍ṣṭā ''sīt । anu̍dita̠-ssūrya̍ḥ । na vā ē̠ta-ddivā̠ na nakta̎m । tasyai̠tasmi̍n ँlō̠kē । a̠pā-mphēnē̍na̠ śira̠ uda̍vartayat । tadē̍na̠manva̍vartata । mitra̍dru̠giti̍ ॥ 7 ॥

sa ē̠tāna̍pāmā̠rgāna̍janayat । tāna̍juhōt । tairvai sa rakṣā̠g̠syapā̍hata । yada̍pāmārga hō̠mō bhava̍ti । rakṣa̍sā̠-mapa̍hatyai । ē̠kō̠l mu̠kēna̍ yanti । taddhi rakṣa̍sā-mbhāga̠dhēya̎m । i̠mā-ndiśa̍ṃ yanti । ē̠ṣā vai rakṣa̍sā̠-ndik । svāyā̍mē̠va di̠śi rakṣāgṃ̍si hanti ॥ 8 ॥

svakṛ̍ta̠ iri̍ṇē juhōti prada̠rē vā̎ । ē̠ta-dvai rakṣa̍sāmā̠yata̍nam । sva ē̠vāyata̍nē̠ rakṣāgṃ̍si hanti । pa̠rṇa̠mayē̍na sru̠vēṇa̍ juhōti । brahma̠ vai pa̠rṇaḥ । brahma̍ṇai̠va rakṣāgṃ̍si hanti । dē̠vasya̍ tvā savi̠tuḥ pra̍sa̠va ityā̍ha । sa̠vi̠tṛpra̍sūta ē̠va rakṣāgṃ̍si hanti । ha̠tagṃ rakṣō 'va̍dhiṣma̠ rakṣa̠ ityā̍ha । rakṣa̍sā̠g̠ stṛtyai̎ । yadvastē̠ ta-ddakṣi̍ṇā ni̠rava̍ttyai । apra̍tīkṣa̠mā ya̍nti । rakṣa̍sā-ma̠ntar​hi̍tyai ॥ 9 ॥
(ya̠chCha̠ti̠ - varu̍ṇa̠-ntṛtī̍yaṃ̠ - ँviji̍tyā - asṛjata̠ - samṛ̍ddhyai - hanō̠ - mitra̍dru̠giti̍ - hanti̠ - stṛtyai̠ trīṇi̍ cha) (a. 1)

anuvākaṃ 2 - dēvikāvahavīṃṣi
dhā̠trē pu̍rō̠ḍāśa̠-ndvāda̍śakapāla̠-nnirva̍pati । sa̠ṃva̠thsa̠rō vai dhā̠tā । sa̠ṃva̠thsa̠rēṇai̠vāsmai̎ pra̠jāḥ praja̍nayati । anvē̠vāsmā̠ anu̍matirmanyatē । rā̠tē rā̠kā । pra si̍nīvā̠lī ja̍nayati । pra̠jāsvē̠va prajā̍tāsu ku̠hvā̍ vācha̍-ndadhāti । mi̠thu̠nau gāvau̠ dakṣi̍ṇā̠ samṛ̍ddhyai । ā̠gnā̠vai̠ṣṇa̠va-mēkā̍daśakapāla̠-nnirva̍pati । ai̠ndrā̠vai̠ṣṇa̠va-mēkā̍daśakapālam ॥ 10 ॥

vai̠ṣṇa̠va-ntri̍kapā̠lam । vī̠rya̍ṃ vā a̠gniḥ । vī̠rya̍mindra̍ḥ । vī̠rya̍ṃ viṣṇu̍ḥ । pra̠jā ē̠va prajā̍tā vī̠ryē̎ prati̍ṣṭhāpayati । tasmā̎-tpra̠jā vī̠ryā̍vatīḥ । vā̠ma̠na ṛ̍ṣa̠bhō va̠hī dakṣi̍ṇā । yadva̠hī । tēnā̎gnē̠yaḥ । yadṛ̍ṣa̠bhaḥ ॥ 11 ॥

tēnai̠ndraḥ । yadvā̍ma̠naḥ । tēna̍ vaiṣṇa̠va-ssamṛ̍ddhyai । a̠gnī̠ṣō̠mīya̠-mēkā̍daśakapāla̠-nnirva̍pati । i̠ndrā̠sō̠mīya̠-mēkā̍daśakapālam । sau̠mya-ñcha̠rum । sōmō̠ vai rē̍tō̠dhāḥ । a̠gniḥ pra̠jānā̎-mprajanayi̠tā । vṛ̠ddhānā̠mindra̍ḥ pradāpayi̠tā । sōma̍ ē̠vāsmai̠ rētō̠ dadhā̍ti ॥ 12 ॥

a̠gniḥ pra̠jā-mpraja̍nayati । vṛ̠ddhāmindra̠ḥ praya̍chChati । ba̠bhru-rdakṣi̍ṇā̠ samṛ̍ddhyai । sō̠mā̠pau̠ṣṇa-ñcha̠ru-nnirva̍pati । ai̠ndrā̠pau̠ṣṇa-ñcha̠rum । sōmō̠ vai rē̍tō̠dhāḥ । pū̠ṣā pa̍śū̠nā-mpra̍janayi̠tā । vṛ̠ddhānā̠mindra̍ḥ pradāpayi̠tā । sōma̍ ē̠vāsmai̠ rētō̠ dadhā̍ti । pū̠ṣā pa̠śū-npraja̍nayati ॥ 13 ॥

vṛ̠ddhānindra̠ḥ praya̍chChati । pau̠ṣṇaścha̠ru-rbha̍vati । i̠yaṃ vai pū̠ṣā । a̠syāmē̠va prati̍ tiṣṭhati । śyā̠mō dakṣi̍ṇā̠ samṛ̍ddhyai । ba̠hu vai puru̍ṣō-'mē̠ddhya-mupa̍gachChati । vai̠śvā̠na̠ra-ndvāda̍śakapāla̠-nnirva̍pati । sa̠ṃva̠thsa̠rō vā a̠gni-rvai̎śvāna̠raḥ । sa̠ṃva̠thsa̠rēṇai̠vainagg̍ svadayati । hira̍ṇya̠-ndakṣi̍ṇā ॥ 14 ॥

pa̠vitra̠ṃ vai hira̍ṇyam । pu̠nātyē̠vaina̎m । ba̠hu vai rā̍ja̠nyō 'nṛ̍ta-ṅkarōti । upa̍ jā̠myai hara̍tē । ji̠nāti̍ brāhma̠ṇam । vada̠tyanṛ̍tam । anṛ̍tē̠ khalu̠ vai kri̠yamā̍ṇē̠ varu̍ṇō gṛhṇāti । vā̠ru̠ṇaṃ ya̍va̠maya̍-ñcha̠ru-nnirva̍pati । va̠ru̠ṇa̠pā̠śādē̠vaina̍-mmuñchati । aśvō̠ dakṣi̍ṇā । vā̠ru̠ṇō hi dē̠vata̠yā-'śva̠-ssamṛ̍ddhyai ॥ 15 ॥
(ai̠ndrā̠vai̠ṣṇā̠vamēkā̍daśakapālaṃ̠-ँyadṛ̍ṣa̠bhō- dadhā̍ti-pū̠ṣā pa̠śū-npraja̍nayati̠-hira̍ṇyaṃ̠ dakṣi̍ṇā̠-dakṣi̠ṇaikaṃ̍ cha) (a. 2)

anuvākaṃ 3 - ratnināṃ havīṃṣi
ra̠tninā̍mē̠tāni̍ ha̠vīgṃṣi̍ bhavanti । ē̠tē vai rā̠ṣṭrasya̍ pradā̠tāra̍ḥ । ē̠tē̍-'pādā̠tāra̍ḥ । ya ē̠va rā̠ṣṭrasya̍ pradā̠tāra̍ḥ । yē̍-'pādā̠tāra̍ḥ । ta ē̠vāsmai̍ rā̠ṣṭra-mpraya̍chChanti । rā̠ṣṭramē̠va bha̍vati । ya-thsa̍mā̠hṛtya̍ ni̠rvapē̎t । ara̍tnina-ssyuḥ । ya̠thā̠ya̠tha-nnirva̍pati ratni̠tvāya̍ ॥ 16 ॥

ya-thsa̠dyō ni̠rvapē̎t । yāva̍tī̠mēkē̍na ha̠viṣā̠-''śiṣa̍mava ru̠ndhē । tāva̍tī̠mava̍ rundhīta । a̠nva̠ha-nnirva̍pati । bhūya̍sīmē̠vāśiṣa̠mava̍ rundhē । bhūya̍sō yajñakra̠tūnupai̍ti । bā̠r̠ha̠spa̠tya-ñcha̠ru-nnirva̍pati bra̠hmaṇō̍ gṛ̠hē । mu̠kha̠ta ē̠vāsmai̠ brahma̠ sagg​śya̍ti । athō̠ brahma̍nnē̠va kṣa̠tra-ma̠nvāra̍mbhayati । śi̠ti̠pṛ̠ṣṭhō dakṣi̍ṇā̠ samṛ̍ddhyai ॥ 17 ॥

ai̠ndra-mēkā̍daśakapālagṃ rāja̠nya̍sya gṛ̠hē । i̠ndri̠yamē̠vāva̍ rundhē । ṛ̠ṣa̠bhō dakṣi̍ṇā̠ samṛ̍ddhyai । ā̠di̠tya-ñcha̠ru-mmahi̍ṣyai gṛ̠hē । i̠yaṃ vā adi̍tiḥ । a̠syāmē̠va prati̍tiṣṭhati । dhē̠nu-rdakṣi̍ṇā̠ samṛ̍ddhyai । bhagā̍ya cha̠ruṃ vā̠vātā̍yai gṛ̠hē । bhaga̍mē̠vāsmi̍-ndadhāti । vichi̍ttagarbhā paṣṭhau̠hī dakṣi̍ṇā̠ samṛ̍ddhyai ॥ 18 ॥

nai̠r̠ṛ̠ta-ñcha̠ru-mpa̍rivṛ̠ktyai̍ gṛ̠hē kṛ̠ṣṇānā̎ṃ vrīhī̠ṇā-nna̠khani̍rbhinnam । pā̠pmāna̍mē̠va nir-ṛ̍ti-nni̠rava̍dayatē । kṛ̠ṣṇā kū̠ṭā dakṣi̍ṇā̠ samṛ̍ddhyai । ā̠gnē̠ya-ma̠ṣṭāka̍pālagṃ sēnā̠nyō̍ gṛ̠hē । sēnā̍mē̠vāsya̠ sagg​śya̍ti । hira̍ṇya̠-ndakṣi̍ṇā̠ samṛ̍ddhyai । vā̠ru̠ṇa-ndaśa̍kapālagṃ sū̠tasya̍ gṛ̠hē । va̠ru̠ṇa̠sa̠vamē̠vāva̍-rundhē । ma̠hāni̍raṣṭō̠ dakṣi̍ṇā̠ samṛ̍ddhyai । mā̠ru̠tagṃ sa̠ptaka̍pāla-ṅgrāma̠ṇyō̍ gṛ̠hē ॥ 19 ॥

anna̠ṃ vai ma̠ruta̍ḥ । anna̍mē̠vāva̍-rundhē । pṛśñi̠-rdakṣi̍ṇā̠ samṛ̍ddhyai । sā̠vi̠tra-ndvāda̍śakapāla-ṅkṣa̠tturgṛ̠hē prasū̎tyai । u̠pa̠ddhva̠stō dakṣi̍ṇā̠ samṛ̍ddhyai । ā̠śvi̠na-ndvi̍kapā̠lagṃ sa̍graṃhī̠turgṛ̠hē । a̠śvinau̠ vai dē̠vānā̎-mbhi̠ṣajau̎ । tābhyā̍mē̠vāsmai̍ bhēṣa̠ja-ṅka̍rōti । sa̠vā̠tyau̍ dakṣi̍ṇā̠ samṛ̍ddhyai । pau̠ṣṇa-ñcha̠ru-mbhā̍gadu̠ghasya̍ gṛ̠hē ॥ 20 ॥

anna̠ṃ vai pū̠ṣā । anna̍mē̠vāva̍ rundhē । śyā̠mō dakṣi̍ṇā̠ samṛ̍ddhyai । rau̠dra-ṅgā̍vīdhu̠ka-ñcha̠ruma̍kṣāvā̠pasya̍ gṛ̠hē । a̠nta̠ta ē̠va ru̠dra-nni̠rava̍dayatē । śa̠bala̠ udvā̍rō̠ dakṣi̍ṇā̠ samṛ̍ddhyai । dvāda̍śai̠tāni̍ ha̠vīgṃṣi̍ bhavanti । dvāda̍śa̠ māsā̎-ssaṃvathsa̠raḥ । sa̠ṃva̠thsa̠rēṇai̠vāsmai̍ rā̠ṣṭramava̍-rundhē । rā̠ṣṭramē̠va bha̍vati ॥ 21 ॥

yanna pra̍ti ni̠rvapē̎t । ra̠tnina̍ ā̠śiṣō-'va̍rundhīrann । prati̠ nirva̍pati । indrā̍ya su̠trāmṇē̍ purō̠ḍāśa̠-mēkā̍daśakapālam । indrā̍yāgṃhō̠muchē̎ । ā̠śiṣa̍ ē̠vāva̍rundhē । a̠ya-nnō̠ rājā̍ vṛtra̠hā rājā̍ bhū̠tvā vṛ̠traṃ va̍ddhyā̠dityā̍ha । ā̠śiṣa̍mē̠vaitāmāśā̎stē । mai̠trā̠-bā̠r̠ha̠spa̠tya-mbha̍vati । śvē̠tāyai̎ śvē̠tava̍thsāyai du̠gdhē ॥ 22 ॥

bā̠r̠ha̠spa̠tyē mai̠tramapi̍ dadhāti । brahma̍ chai̠vāsmai̎ kṣa̠tra-ñcha̍ sa̠mīchī̍ dadhāti । athō̠ brahma̍nnē̠va kṣa̠tra-mprati̍ṣṭhāpayati । bā̠r̠ha̠spa̠tyēna̠ pūrvē̍ṇa̠ pracha̍rati । mu̠kha̠ta ē̠vāsmai̠ brahma̠ sagg​śya̍ti । athō̠ brahma̍nnē̠va kṣa̠tra-ma̠nvāra̍mbhayati । sva̠ya̠-ṅkṛ̠tā vēdi̍rbhavati । sva̠ya̠di̠nna-mba̠r̠hiḥ । sva̠ya̠kṛ̠nta i̠ddhmaḥ । ana̍bhijitasyā̠-bhiji̍tyai । tasmā̠-drājñā̠mara̍ṇya-ma̠bhiji̍tam । saiva śvē̠tā śvē̠tava̍thsā̠ dakṣi̍ṇā̠ samṛ̍ddhyai ॥ 23 ॥
(ra̠tni̠tvāya̠ - samṛ̍ddhyai - paṣṭhau̠hi dakṣi̍ṇā̠ samṛ̍ddhyai - grāma̠ṇyō̍ gṛ̠hē - bhā̍gadu̠ghasya̍ gṛ̠hē-bha̍vati - du̠gdhē̍ - 'bhiji̍tyai̠ dvē cha̍) (a. 3)

anuvākaṃ 4 - dēvasuvāṃ havīṃṣi
dē̠va̠su̠vāmē̠tāni̍ ha̠vīgṃṣi̍ bhavanti । ē̠tāva̍ntō̠ vai dē̠vānāgṃ̍ sa̠vāḥ । ta ē̠vāsmai̍ sa̠vā-npraya̍chChanti । ta ē̍nagṃ suvantē । a̠gnirē̠vaina̍-ṅgṛ̠hapa̍tīnāgṃ suvatē । sōmō̠ vana̠spatī̍nām । ru̠draḥ pa̍śū̠nām । bṛha̠spati̍-rvā̠chām । indrō̎ jyē̠ṣṭhānā̎m । mi̠tra-ssa̠tyānā̎m ॥ 24 ॥

varu̍ṇō̠ dharma̍patīnām । ē̠tadē̠va sarva̍-mbhavati । sa̠vi̠tā tvā̎ prasa̠vānāgṃ̍ suvatā̠miti̠ hasta̍-ṅgṛhṇāti̠ prasū̎tyai । yē dē̍vā dēva̠suva̠-ssthētyā̍ha । ya̠thā̠ ya̠jurē̠vai tat । ma̠ha̠tē kṣa̠trāya̍ maha̠ta ādhi̍patyāya maha̠tē jāna̍rājyā̠yētyā̍ha । ā̠śiṣa̍mē̠vaitāmāśā̎stē । ē̠ṣa vō̍ bharatā̠ rājā̠ sōmō̠-'smāka̍-mbrāhma̠ṇānā̠gṃ̠ rājētyā̍ha । tasmā̠-thsōma̍rājānō brāhma̠ṇāḥ । prati̠ tyannāma̍ rā̠jyama̍dhā̠yītyā̍ha ॥ 25 ॥

rā̠jyamē̠vāsmi̠-nprati̍ dadhāti । svā-nta̠nuva̠ṃ varu̍ṇō aśiśrē̠dityā̍ha । va̠ru̠ṇa̠sa̠vamē̠vā-va̍rundhē । śuchē̎rmi̠trasya̠ vratyā̍ abhū̠mētyā̍ha । śuchi̍mē̠vaina̠ṃ vratya̍-ṅkarōti । ama̍nmahi maha̠ta ṛ̠tasya̠ nāmētyā̍ha । ma̠nu̠ta ē̠vaina̎m । sarvē̠ vrātā̠ varu̍ṇasyā bhūva̠nnityā̍ha । sarva̍vrātamē̠vaina̍-ṅkarōti । vi mi̠tra ēvai̠rarā̍ti-matārī̠dityā̍ha ॥ 26 ॥

arā̍timē̠vaina̍-ntārayati । asū̍ṣudanta ya̠jñiyā̍ ṛ̠tēnētyā̍ha । sva̠daya̍tyē̠vaina̎m । vyu̍ tri̠tō ja̍ri̠māṇa̍-nna āna̠ḍityā̍ha । āyu̍rē̠vāsmi̍-ndadhāti । dvābhyā̠ṃ vimṛ̍ṣṭē । dvi̠pā-dyaja̍māna̠ḥ prati̍ṣṭhityai । a̠gnī̠ṣō̠mīya̍sya̠ chaikā̍daśakapālasya dēvasu̠vā-ñcha̍ ha̠viṣā̍ma̠gnayē̎ sviṣṭa̠kṛtē̍ sa̠mava̍dyati । dē̠vatā̍bhirē̠vaina̍-mubha̠yata̠ḥ pari̍gṛhṇāti । vi̠ṣṇu̠kra̠mān kra̍matē( ) । viṣṇu̍rē̠va bhū̠tvēmāँllō̠kā-na̠bhija̍yati ॥ 27 ॥
(sa̠tyānā̍-madhā̠yītyā̍-hātārī̠dityā̍ha-kramata̠ ēka̍-ñcha) (a. 4)

anuvākaṃ 5 - abhiṣēkārthamapāṅgrahagrahaṇam
a̠rthēta̠-ssthēti̍ juhōti । āhu̍tyai̠vainā̍ ni̠ṣkrīya̍ gṛhṇāti । athō̍ ha̠viṣkṛ̍tānāmē̠vābhighṛ̍tānā-ṅgṛhṇāti । vaha̍ntīnā-ṅgṛhṇāti । ē̠tā vā a̠pāgṃ rā̠ṣṭram । rā̠ṣṭramē̠vāsmai̍ gṛhṇāti । athō̠ śriya̍mē̠vaina̍ma̠bhi va̍hanti । a̠pā-mpati̍ra̠sītyā̍ha । mi̠thu̠namē̠vāka̍ḥ । vṛṣā̎-'syū̠rmirityā̍ha ॥ 28 ॥

ū̠rmi̠manta̍mē̠vaina̍-ṅkarōti । vṛ̠ṣa̠sē̠nō̍-'sītyā̍ha । sēnā̍mē̠vāsya̠ sagg​śya̍ti । vra̠ja̠kṣita̠-ssthētyā̍ha । ē̠tā vā a̠pāṃ viśa̍ḥ । viśa̍mē̠vāsmai̠ paryū̍hati । ma̠rutā̠mōja̠-ssthētyā̍ha । anna̠ṃ vai ma̠ruta̍ḥ । anna̍mē̠vā va̍rundhē । sūrya̍varchasa̠-ssthētyā̍ha ॥ 29 ॥

rā̠ṣṭramē̠va va̍rcha̠svya̍kaḥ । sūrya̍tvachasa̠-ssthētyā̍ha । sa̠tyaṃ vā ē̠tat । ya-dvar​ṣa̍ti । anṛ̍ta̠ṃ yadā̠tapa̍ti̠ var​ṣa̍ti । sa̠tyā̠nṛ̠tē ē̠vāva̍rundhē । nainagṃ̍ satyānṛ̠tē u̍di̠tē higg̍staḥ । ya ē̠vaṃ vēda̍ । māndā̠-ssthētyā̍ha । rā̠ṣṭramē̠va bra̍hmavarcha̠sya̍kaḥ ॥ 30 ॥

vāśā̠-ssthētyā̍ha । rā̠ṣṭramē̠va va̠śya̍kaḥ । śakva̍rī̠-ssthētyā̍ha । pa̠śavō̠ vai śakva̍rīḥ । pa̠śūnē̠vāva̍ rundhē । vi̠śva̠bhṛta̠-ssthētyā̍ha । rā̠ṣṭramē̠va pa̍ya̠svya̍kaḥ । ja̠na̠bhṛta̠-ssthētyā̍ha । rā̠ṣṭramē̠vēndri̍yā̠vya̍kaḥ । a̠gnēstē̍ja̠syā̎-ssthētyā̍ha ॥ 31 ॥

rā̠ṣṭramē̠va tē̍ja̠svya̍kaḥ । a̠pāmōṣa̍dhīnā̠gṃ̠ rasa̠-ssthētyā̍ha । rā̠ṣṭramē̠va ma̍dha̠vya̍makaḥ । sā̠ra̠sva̠ta-ṅgraha̍-ṅgṛhṇāti । ē̠ṣā vā a̠pā-mpṛ̠ṣṭham । yathsara̍svatī । pṛ̠ṣṭhamē̠vainagṃ̍ samā̠nānā̎-ṅkarōti । ṣō̠ḍa̠śabhi̍-rgṛhṇāti । ṣōḍa̍śakalō̠ vai puru̍ṣaḥ । yāvā̍nē̠va puru̍ṣaḥ । tasmi̍n vī̠rya̍-ndadhāti । ṣō̠ḍa̠śabhi̍-rju̠hōti̍ ṣōḍa̠śabhi̍-rgṛhṇāti । dvātrigṃ̍śa̠-thsampa̍dyantē । dvātrigṃ̍śadakṣarā 'nu̠ṣṭuk । vāga̍nu̠ṣṭu-phsarvā̍ṇi̠ Chandāgṃ̍si । vā̠chaivaina̠gṃ̠ sarvē̍bhi̠-śChandō̍bhi-ra̠bhiṣi̍ñchati ॥ 32 ॥
(ū̠rmirityā̍ha̠ - sūrya̍varchasa̠-ssthētyā̍ha - brahmavarcha̠sya̍ka - stēja̠syā̎-ssthētyā̍hai̠va - puru̍ṣa̠-ṣṣaṭcha̍) (a. 5)

anuvākaṃ 6 - abhiṣēkārthajalasaṃskāraḥ
dēvī̍rāpa̠-ssa-mmadhu̍matī̠-rmadhu̍matībhi-ssṛjyaddhva̠mityā̍ha । brahma̍ṇai̠vainā̠-ssagṃ sṛ̍jati । anā̍dhṛṣṭā-ssīda̠tētyā̍ha । brahma̍ṇai̠vainā̎-ssādayati । a̠nta̠rā hōtu̍ścha̠ dhiṣṇi̍ya-mbrāhmaṇāchCha̠gṃ̠ sina̍ścha sādayati । ā̠gnē̠yō vai hōtā̎ । ai̠ndrō brā̎hmaṇāchCha̠gṃ̠sī । tēja̍sā chai̠vēndri̠yēṇa̍ chōbha̠yatō̍ rā̠ṣṭra-mpari̍gṛhṇāti । hira̍ṇyē̠nō-tpu̍nāti । āhu̍tyai̠ hi pa̠vitrā̎bhyāmutpu̠nanti̠ vyāvṛ̍ttyai ॥ 33 ॥

śa̠tamā̍na-mbhavati । śa̠tāyu̠ḥ puru̍ṣa-śśa̠tēndri̍yaḥ । āyu̍ṣyē̠vēndri̠yē prati̍tiṣṭhati । ani̍bhṛṣṭama̠sītyā̍ha । ani̍bhṛṣṭa̠gg̠ hyē̍tat । vā̠chō bandhu̠rityā̍ha । vā̠chō hyē̍ṣa bandhu̍ḥ । ta̠pō̠jā ityā̍ha । ta̠pō̠jā hyē̍tat । sōma̍sya dā̠trama̠sītyā̍ha ॥ 34 ॥

sōma̍sya̠ hyē̍taddā̠tram । śu̠krā va̍-śśu̠krēṇōtpu̍nā̠mītyā̍ha । śu̠krā hyāpa̍ḥ । śu̠kragṃ hira̍ṇyam । cha̠ndrāścha̠ndrēṇētyā̍ha । cha̠ndrā hyāpa̍ḥ । cha̠ndragṃ hira̍ṇyam । a̠mṛtā̍ a̠mṛtē̠nētyā̍ha । a̠mṛtā̠ hyāpa̍ḥ । a̠mṛta̠gṃ̠ hira̍ṇyam ॥ 35 ॥

svāhā̍ rāja̠sūyā̠yētyā̍ha । rā̠ja̠sūyā̍ya̠ hyē̍nā utpu̠nāti̍ । sa̠dha̠mādō̎ dyu̠mninī̠rūrja̍ ē̠tā iti̍ vāru̠ṇyarchā gṛ̍hṇāti । va̠ru̠ṇa̠sa̠vamē̠vā va̍rundhē । ēka̍yā gṛhṇāti । ē̠ka̠dhaiva yaja̍mānē vī̠rya̍-ndadhāti । kṣa̠trasyōlba̍masi kṣa̠trasya̠ yōni̍ra̠sīti̍ tā̠rpya-ñchō̠ṣṇīṣa̍-ñcha̠ praya̍chChati sayōni̠tvāya̍ । ēka̍śatēna darbhapuñjī̠laiḥ pa̍vayati । śa̠tāyu̠rvai puru̍ṣa-śśa̠tavī̎ryaḥ । ā̠tmaika̍śa̠taḥ ॥ 36 ॥

yāvā̍nē̠va puru̍ṣaḥ । tasmi̍n vī̠rya̍-ndadhāti । daddhyā̍śayati । i̠ndri̠yamē̠vā-va̍rundhē । u̠du̠mbara̍-māśayati । a̠nnādya̠syāva̍ ruddhyai । śaṣpā̎ṇyāśayati । surā̍bali-mē̠vaina̍-ṅkarōti । ā̠vida̍ ē̠tā bha̍vanti । ā̠vida̍mē̠vaina̍-ṅgamayanti ॥ 37 ॥

a̠gnirē̠vaina̠-ṅgār​ha̍patyēnāvati । indra̍ indri̠yēṇa̍ । pū̠ṣā pa̠śubhi̍ḥ । mi̠trāvaru̍ṇau prāṇāpā̠nābhyā̎m । indrō̍ vṛ̠trāya̠ vajra̠muda̍yachChat । sa diva̍malikhat । sō̎-'rya̠mṇaḥ panthā̍ abhavat । sa āvi̍nnē̠ dyāvā̍pṛthi̠vī dhṛ̠tavra̍tē̠ iti̠ dyāvā̍pṛthi̠vī upā̍dhāvat । sa ā̠bhyāmē̠va prasū̍ta̠ indrō̍ vṛ̠trāya̠ vajra̠-mprāha̍rat । āvi̍nnē̠ dyāvā̍pṛthi̠vī dhṛ̠tavra̍tē̠ iti̠ yadāha̍ ॥ 38 ॥

ā̠bhyāmē̠va prasū̍tō̠ yaja̍mānō̠ vajra̠-mbhrātṛ̍vyāya̠ praha̍rati । āvi̍nnā dē̠vyadi̍ti-rviśvarū̠pītyā̍ha । i̠yaṃ vai dē̠vyadi̍ti-rviśvarū̠pī । a̠syāmē̠va prati̍ tiṣṭhati । āvi̍nnō̠-'yama̠sāvā̍muṣyāya̠ṇō̎-'syāṃ vi̠śya̍smi-nrā̠ṣṭra ityā̍ha । vi̠śaivainagṃ̍ rā̠ṣṭrēṇa̠ sama̍rdhayati । ma̠ha̠tē kṣa̠trāya̍ maha̠ta ādhi̍patyāya maha̠tē jāna̍rājyā̠yētyā̍ha । ā̠śiṣa̍mē̠vaitāmāśā̎stē । ē̠ṣa vō̍ bharatā̠ rājā̠ sōmō̠-'smāka̍-mbrāhma̠ṇānā̠gṃ̠ rājētyā̍ha । tasmā̠-thsōma̍rājānō brāhma̠ṇāḥ ॥ 39 ॥

indra̍sya̠ vajrō̍-'si̠ vārtra̍ghna̠ iti̠ dhanu̠ḥ praya̍chChati̠ viji̍tyai । śa̠tru̠bādha̍nā̠-ssthētīṣūn̍ । śatrū̍nē̠vāsya̍ bādhantē । pā̠ta mā̎ pra̠tyañcha̍-mpā̠ta mā̍ ti̠ryañcha̍ma̠nvañcha̍-mmā pā̠tētyā̍ha । ti̠srō vai śa̍ra̠vyā̎ḥ । pra̠tīchī̍ ti̠raśchya̠nūchī̎ । tābhya̍ ē̠vaina̍-mpānti । di̠gbhyō mā̍ pā̠tētyā̍ha । di̠gbhya ē̠vaina̍-mpānti । viśvā̎bhyō mā nā̠ṣṭrābhya̍ḥ pā̠tētyā̍ha । apa̍rimitādē̠vaina̍-mpānti । hira̍ṇyavarṇāvu̠ṣasā̎ṃ virō̠ka iti̍ tri̠ṣṭubhā̍ bā̠hū u-dgṛ̍hṇāti । i̠ndri̠yaṃ vai vī̠rya̍-ntri̠ṣṭuk । i̠ndri̠yamē̠va vī̠rya̍-mu̠pari̍ṣṭādā̠tman-dha̍ttē ॥ 40 ॥
(vyāvṛ̍ttyai-dā̠trama̠sītyā̍hā̠-mṛta̠gṃ̠ hira̍ṇya-mēkaśa̠tō-ga̍maya̠n-tyāha̍-brāhmā̠ṇā-nā̠ṣṭrābhya̍ḥ pā̠tētyā̍ha cha̠tvāri̍ cha) (a. 6)

anuvākaṃ 7 - digvyāsthāpanam
diśō̠ vyāsthā̍payati । di̠śāma̠bhiji̍tyai । yada̍nu pra̠krāmē̎t । a̠bhi diśō̍ jayēt । uttu mā̎dyēt । mana̠sā-'nu̠ prakrā̍mati । a̠bhi diśō̍ jayati । nōnmā̎dyati । sa̠midha̠mā ti̠ṣṭhētyā̍ha । tēja̍ ē̠vāva̍rundhē ॥ 41 ॥

u̠grāmā ti̠ṣṭhētyā̍ha । i̠ndri̠yamē̠vāva̍ rundhē । vi̠rāja̠mā ti̠ṣṭhētyā̍ha । a̠nnādya̍mē̠vāva̍ rundhē । udī̍chī̠mā ti̠ṣṭhētyā̍ha । pa̠śūnē̠vāva̍ rundhē । ū̠rdhvāmā ti̠ṣṭhētyā̍ha । su̠va̠rgamē̠va lō̠ka-ma̠bhija̍yati । anūjji̍hītē । su̠va̠rgasya̍ lō̠kasya̠ sama̍ṣṭyai ॥ 42 ॥

mā̠ru̠ta ē̠ṣa bha̍vati । anna̠ṃ vai ma̠ruta̍ḥ । anna̍mē̠vāva̍ rundhē । ēka̍vigṃśatikapālō bhavati̠ prati̍ṣṭhityai । yō̍-'raṇyē 'nuvā̠kyō̍ ga̠ṇaḥ । ta-mma̍ddhya̠ta upa̍dadhāti । grā̠myairē̠va pa̠śubhi̍-rāra̠ṇyā-npa̠śū-npari̍gṛhṇāti । tasmā̎-dgrā̠myaiḥ pa̠śubhi̍rāra̠ṇyāḥ pa̠śava̠ḥ pari̍gṛhītāḥ । pṛthi̍rvai̠nyaḥ । a̠bhya̍ṣichyata ॥ 43 ॥

sa rā̠ṣṭra-nnābha̍vat । sa ē̠tāni̍ pā̠rthānya̍paśyat । tānya̍juhōt । tairvai sa rā̠ṣṭra-ma̍bhavat । yatpā̠rthāni̍ ju̠hōti̍ । rā̠ṣṭramē̠va bha̍vati । bā̠r̠ha̠spa̠tya-mpūrvē̍ṣāmutta̠ma-mbha̍vati । ai̠ndramutta̍rēṣā-mpratha̠mam । brahma̍ chai̠vāsmai̎ kṣa̠tra-ñcha̍ sa̠mīchī̍ dadhāti । athō̠ brahma̍nnē̠va kṣa̠tra-mprati̍ṣṭhāpayati ॥ 44 ॥

ṣaṭpu̠rastā̍-dabhiṣē̠kasya̍ juhōti । ṣaḍu̠pari̍ṣṭāt । dvāda̍śa̠ sa-mpa̍dyantē । dvāda̍śa̠ māsā̎-ssaṃvathsa̠raḥ । sa̠ṃva̠thsa̠raḥ khalu̠ vai dē̠vānā̠-mpūḥ । dē̠vānā̍mē̠va pura̍-mmaddhya̠tō vyava̍sarpati । tasya̠ na kuta̍ścha̠ nōpā̎vyā̠dhō bha̍vati । bhū̠tānā̠-mavē̎ṣṭī-rjuhōti । atrā̎tra̠ vai mṛ̠tyu-rjā̍yatē । yatra̍ yatrai̠va mṛ̠tyu-rjāya̍tē । tata̍ ē̠vaina̠mava̍yajatē । tasmā̎-drāja̠sūyē̍nējā̠na-ssarva̠māyu̍rēti । sarvē̠ hya̍sya mṛ̠tyavō-'vē̎ṣṭāḥ । tasmā̎-drāja̠sūyē̍nējā̠nō nābhicha̍rita̠vai । pra̠tyagē̍na-mabhichā̠ra-sstṛ̍ṇutē ॥ 45 ॥
(ru̠ndhē̠-sama̍ṣṭyā-asichyata-sthāpayati̠-jāya̍tē̠ pañcha̍ cha) (a. 7)

anuvākaṃ 8 - abhiṣēkaḥ
sōma̍sya̠ tviṣi̍rasi̠ tavē̍va mē̠ tviṣi̍rbhūyā̠diti̍ śārdūlacha̠rmōpa̍stṛṇāti । yaiva sōmē̠ tviṣi̍ḥ । yā śā̎rdū̠lē । tāmē̠vāva̍ rundhē । mṛ̠tyōrvā ē̠ṣa varṇa̍ḥ । yachChā̎rdū̠laḥ । a̠mṛta̠gṃ̠ hira̍ṇyam । a̠mṛta̍masi mṛ̠tyōrmā̍ pā̠hīti̠ hira̍ṇya̠-mupā̎syati । a̠mṛta̍mē̠va mṛ̠tyōra̠nta-rdha̍ttē । śa̠tamā̍na-mbhavati ॥ 46 ॥

śa̠tāyu̠ḥ puru̍ṣa-śśa̠tēndri̍yaḥ । āyu̍ṣyē̠vēndri̠yē prati̍ tiṣṭhati । di̠dyōnmā̍ pā̠hītyu̠pari̍ṣṭā̠dadhi̠ nida̍dhāti । u̠bha̠yata̍ ē̠vāsmai̠ śarma̍ dadhāti । avē̎ṣṭā danda̠śūkā̠ iti̍ klī̠bagṃ sīsē̍na viddhyati । da̠nda̠śūkā̍-nē̠vāva̍ yajatē । tasmā̎-tklī̠ba-nda̍nda̠śūkā̠ dagṃśu̍kāḥ । nira̍sta̠-nnamu̍chē̠-śśira̠ iti̍ lōhitāya̠sa-nnira̍syati । pā̠pmāna̍mē̠va namu̍chi-nni̠rava̍dayatē । prā̠ṇā ā̠tmana̠ḥ pūrvē̍-'bhi̠ṣichyā̠ ityā̍huḥ ॥ 47 ॥

sōmō̠ rājā̠ varu̍ṇaḥ । dē̠vā dha̍rma̠suva̍ścha̠ yē । tē tē̠ vāchagṃ̍ suvantā̠-ntē tē̎ prā̠ṇagṃ su̍vantā̠mityā̍ha । prā̠ṇānē̠vātmana̠ḥ pūrvā̍-na̠bhiṣi̍ñchati । ya-dbrū̠yāt । a̠gnēstvā̠ tēja̍sā̠ 'bhiṣi̍ñchā̠mīti̍ । tē̠ja̠svyē̍va syā̎t । du̠ścharmā̠ tu bha̍vēt । sōma̍sya tvā dyu̠mnēnā̠-bhiṣi̍ñchā̠mītyā̍ha । sau̠myō vai dē̠vata̍yā̠ puru̍ṣaḥ ॥ 48 ॥

svayai̠vaina̍-ndē̠vata̍yā̠-'bhiṣi̍ñchati । a̠gnē-stēja̠sētyā̍ha । tēja̍ ē̠vāsmi̍-ndadhāti । sūrya̍sya̠ varcha̠sētyā̍ha । varcha̍ ē̠vāsmi̍-ndadhāti । indra̍syē-ndri̠yēṇētyā̍ha । i̠ndri̠yamē̠vāsmi̍-ndadhāti । mi̠trāvaru̍ṇayō-rvī̠ryē̍ṇētyā̍ha । vī̠rya̍mē̠vāsmi̍-ndadhāti । ma̠rutā̠mōja̠sētyā̍ha ॥ 49 ॥

ōja̍ ē̠vāsmi̍-ndadhāti । kṣa̠trāṇā̎-ṅkṣa̠trapa̍tira̠sītyā̍ha । kṣa̠trāṇā̍mē̠vaina̍-ṅkṣa̠trapa̍ti-ṅkarōti । ati̍ di̠vaspā̠hītyā̍ha । atya̠nyā-npā̠hīti̠ vāvaitadā̍ha । sa̠māva̍vṛtranna-dha̠rāgudī̍chī̠-rityā̍ha । rā̠ṣṭramē̠vāsmi̍-ndhru̠vama̍kaḥ । u̠chChēṣa̍ṇēna juhōti । u̠chChēṣa̍ṇabhāgō̠ vai ru̠draḥ । bhā̠ga̠dhēyē̍nai̠va ru̠dra-nni̠rava̍dayatē ॥ 50 ॥

uda̍mpa̠rētyāgnī̎ddhrē juhōti । ē̠ṣā vai ru̠drasya̠ dik । svāyā̍mē̠va di̠śi ru̠dra-nni̠rava̍dayatē । rudra̠ yattē̠ krayī̠ para̠-nnāmētyā̍ha । yadvā a̍sya̠ krayī̠ para̠-nnāma̍ । tēna̠ vā ē̠ṣa hi̍nasti । yagṃ hi̠nasti̍ । tēnai̠vainagṃ̍ sa̠ha śa̍mayati । tasmai̍ hu̠tama̍si ya̠mēṣṭa̍ma̠sītyā̍ha । ya̠mādē̠vāsya̍ mṛ̠tyumava̍yajatē ॥ 51 ॥

prajā̍patē̠ na tvadē̠tānya̠nya iti̠ tasyai̍ gṛ̠hē ju̍huyāt । yā-ṅkā̠mayē̍ta rā̠ṣṭrama̍syai pra̠jā syā̠diti̍ । rā̠ṣṭramē̠vāsyai̎ pra̠jā bha̍vati । pa̠rṇa̠-mayē̍nā-ddhva̠ryu-ra̠bhiṣi̍ñchati । bra̠hma̠va̠rcha̠samē̠vāsmi̠n-tviṣi̍-ndadhāti । audu̍mbarēṇa rāja̠nya̍ḥ । ūrja̍mē̠vāsmi̍-nna̠nnādya̍-ndadhāti । āśva̍tthēna̠ vaiśya̍ḥ । viśa̍mē̠vāsmi̠-npuṣṭi̍-ndadhāti । naiya̍grōdhēna̠ janya̍ḥ( ) । mi̠trāṇyē̠vāsmai̍ kalpayati । athō̠ prati̍ṣṭhityai ॥ 52 ॥
(bha̠va̠ - tyā̠hu̠ḥ - puru̍ṣa̠ - ōja̠sētyā̍ha - ni̠rava̍dayatē - yajatē̠ - janyō̠ dvē cha̍) (a. 8)

anuvākaṃ 9 - sthārōhaṇam. vijayaḥ
indra̍sya̠ vajrō̍-'si̠ vārtra̍ghna̠ iti̠ ratha̍mu̠pāva̍harati̠ viji̍tyai । mi̠trāvaru̍ṇayōstvā praśā̠strōḥ pra̠śiṣā̍ yuna̠jmītyā̍ha । brahma̍ṇai̠vaina̍-ndē̠vatā̎bhyāṃ yunakti । pra̠ṣṭi̠vā̠hina̍ṃ yunakti । pra̠ṣṭi̠vā̠hī vai dē̍vara̠thaḥ । dē̠va̠ra̠tha-mē̠vāsmai̍ yunakti । trayō-'śvā̍ bhavanti । ratha̍śchatu̠rthaḥ । dvau sa̍vyēṣṭhasāra̠thī । ṣaṭ-thsampa̍dyantē ॥ 53 ॥

ṣaḍvā ṛ̠tava̍ḥ । ṛ̠tubhi̍rē̠vaina̍ṃ yunakti । vi̠ṣṇu̠kra̠mān-kra̍matē । viṣṇu̍rē̠va bhū̠tvēmān ँlō̠kāna̠bhija̍yati । yaḥ, kṣa̠triya̠ḥ prati̍hitaḥ । sō̎-'nvāra̍bhatē । rā̠ṣṭramē̠va bha̍vati । tri̠ṣṭubhā̠ 'nvāra̍bhatē । i̠ndri̠yaṃ vai tri̠ṣṭuk । i̠ndri̠yamē̠va yaja̍mānē dadhāti ॥ 54 ॥

ma̠rutā̎-mprasa̠vē jē̍ṣa̠mityā̍ha । ma̠rudbhi̍rē̠va prasū̍ta̠ ujja̍yati । ā̠pta-mmana̠ ityā̍ha । yadē̠va mana̠saiphsī̎t । tadā̍pat । rā̠ja̠nya̍-ñjināti । anā̎krānta ē̠vākra̍matē । vi vā ē̠ṣa i̍ndri̠yēṇa̍ vī̠ryē̍ṇardhyatē । yō rā̍ja̠nya̍-ñji̠nāti̍ । sama̠hami̍ndri̠yēṇa̍ vī̠ryē̍ṇētyā̍ha ॥ 55 ॥

i̠ndri̠yamē̠va vī̠rya̍mā̠tman-dha̍ttē । pa̠śū̠nā-mma̠nyura̍si̠ tavē̍va mē ma̠nyurbhū̍yā̠diti̠ vārā̍hī upā̠nahā̠vupa̍ muñchatē । pa̠śū̠nāṃ vā ē̠ṣa ma̠nyuḥ । ya-dva̍rā̠haḥ । tēnai̠va pa̍śū̠nā-mma̠nyumā̠tma-ndha̍ttē । a̠bhi vā i̠yagṃ su̍ṣuvā̠ṇa-ṅkā̍mayatē । tasyē̎śva̠rēndri̠yaṃ vī̠rya̍mādā̍tōḥ । vārā̍hī upā̠nahā̠vupa̍muñchatē । a̠syā ē̠vāntardha̍ttē । i̠ndri̠yasya̍ vī̠rya̍syānā̎ttyai ॥ 56 ॥

namō̍ mā̠trē pṛ̍thi̠vyā ityā̠hāhigṃ̍ sāyai । iya̍da̠syā-yu̍ra̠syāyu̍rmē dhē̠hītyā̍ha । āyurē̠vātman-dha̍ttē । ūrga̠syūrja̍-mmē dhē̠hītyā̍ha । ūrja̍ma̠vātma-ndha̍ttē । yuṅṅa̍si̠ varchō̍-'si̠ varchō̠ mayi̍ dhē̠hītyā̍ha । varcha̍ ē̠vātma-ndha̍ttē । ē̠ka̠dhā bra̠hmaṇa̠ upa̍ harati । ē̠ka̠dhaiva yaja̍māna̠ āyu̠rūrja̠ṃ varchō̍ dadhāti । ra̠tha̠vi̠mō̠cha̠nīyā̍ juhōti̠ prati̍ṣṭhityai ॥ 57 ॥

trayō-'śvā̍ bhavanti । ratha̍śchatu̠rthaḥ । tasmā̎-chcha̠turju̍hōti । yadu̠bhau sa̠hāva̠tiṣṭhē̍tām । sa̠mā̠naṃ lō̠kami̍yātām । sa̠ha sa̍graṃhī̠trā ra̍tha̠vāha̍nē̠ ratha̠māda̍dhāti । su̠va̠rgādē̠vaina̍ṃ lō̠kāda̠ntarda̍dhāti । ha̠gṃ̠sa-śśu̍chi̠ṣadityā da̍dhāti । brahma̍ṇai̠vaina̍-mupāva̠hara̍ti । brahma̠ṇā ''da̍dhāti । ati̍chChanda̠sā ''da̍dhāti । ati̍chChandā̠ vai sarvā̍ṇi̠ Chandāgṃ̍si । sarvē̍bhirē̠vaina̠-ñChandō̍bhi̠-rāda̍dhāti । var​ṣma̠ vā ē̠ṣā Chanda̍sām । yadati̍chChandāḥ । yadati̍chChandasā̠ dadhā̍ti । var​ṣmai̠vainagṃ̍ samā̠nānā̎-ṅkarōti ॥ 58 ॥
(pa̠dya̠ntē̠ - da̠dhā̠ti̠ - vī̠ryē̍ṇētyā̠hā - nā̎tyai̠ - prati̍ṣṭhityai̠ - brahma̠ṇā-''da̍dhāti sa̠pta cha̍) (a. 9)

anuvākaṃ 10 - āsanē samupavēśa-ssarvaissēvyatva-ñcha
mi̠trō̍-'si̠ varu̍ṇō̠-'sītyā̍ha । mai̠traṃ vā aha̍ḥ । vā̠ru̠ṇī rātri̍ḥ । a̠hō̠rā̠trābhyā̍-mē̠vaina̍-mu̠pāva̍harati । mi̠trō̍-'si̠ varu̍ṇō̠sītyā̍ha । mai̠trō vai dakṣi̍ṇaḥ । vā̠ru̠ṇa-ssa̠vyaḥ । vai̠śva̠dē̠vyā̍mikṣā̎ । svamē̠vainau̍ bhāga̠dhēya̍-mu̠pāva̍harati । sama̠haṃ viśvai̎rdē̠vai-rityā̍ha ॥ 59 ॥

vai̠śva̠dē̠vyō̍ vai pra̠jāḥ । tā ē̠vādyā̎ḥ kurutē । kṣa̠trasya̠ nābhi̍rasi kṣa̠trasya̠ yōni̍-ra̠sītya̍dhīvā̠samā-stṛ̍ṇāti sayōni̠tvāya̍ । syō̠nāmāsī̍da su̠ṣadā̠māsī̠dētyā̍ha । ya̠thā̠ ya̠jurē̠vai tat । mā tvā̍ higṃsī̠-nmā mā̍ higṃsī̠dityā̠hā-higṃ̍sāyai । niṣa̍sāda dhṛ̠tavra̍tō̠ varu̍ṇaḥ pa̠styā̎svā sāmrā̎jyāya su̠kratu̠rityā̍ha । sāmrā̎jyamē̠vainagṃ̍ su̠kratu̍-ṅkarōti । brahmā(3)ntvagṃ rā̍jan-bra̠hmā-'si̍ savi̠tā-'si̍ sa̠tyasa̍va̠ ityā̍ha । sa̠vi̠tāra̍-mē̠vainagṃ̍ sa̠tyasa̍va-ṅkarōti ॥ 60 ॥

brahmā(3)ntvagṃ rā̍jan-bra̠hmā-'sīndrō̍-'si sa̠tyaujā̠ ityā̍ha । indra̍mē̠vainagṃ̍ sa̠tyauja̍sa-ṅkarōti । brahmā(3)ntvagṃ rā̍jan-bra̠hmā-'si̍ mi̠trō̍-'si su̠śēva̠ ityā̍ha । mi̠tramē̠vainagṃ̍ su̠śēva̍-ṅkarōti । brahmā(3)ntvagṃ rā̍jan-bra̠hmā-'si̠ varu̍ṇō-'si sa̠tyadha̠rmētyā̍ha । varu̍ṇamē̠vainagṃ̍ sa̠tyadha̍rmāṇa-ṅkarōti । sa̠vi̠tā-'si̍ sa̠tyasa̍va̠ ityā̍ha । gā̠ya̠trī-mē̠vaitēnā̍bhi̠vyāha̍rati । indrō̍-'si sa̠tyaujā̠ ityā̍ha । tri̠ṣṭubha̍-mē̠vaitēnā̍bhi̠-vyāha̍rati ॥ 61 ॥

mi̠trō̍-'si su̠śēva̠ ityā̍ha । jaga̍tī-mē̠vaitēnā̍bhi̠vyāha̍rati । sa̠tyamē̠tā dē̠vatā̎ḥ । sa̠tyamē̠tāni̠ Chandāgṃ̍si । sa̠tyamē̠vāva̍ rundhē । varu̍ṇō-'si sa̠tyadha̠rmētyā̍ha । a̠nu̠ṣṭubha̍-mē̠vaitēnā̍bhi̠vyāha̍rati । sa̠tyā̠nṛ̠tē vā a̍nu̠ṣṭup । sa̠tyā̠nṛ̠tē varu̍ṇaḥ । sa̠tyā̠nṛ̠tē ē̠vāva̍rundhē ॥ 62 ॥

nainagṃ̍ satyānṛ̠tē u̍di̠tē higg̍staḥ । ya ē̠vaṃ vēda̍ । indra̍sya̠ vajrō̍-'si̠ vārtra̍ghna̠ iti̠ sphya-mpraya̍chChati । vajrō̠ vai sphyaḥ । vajrē̍ṇai̠vāsmā̍ avarapa̠ragṃ ra̍ndhayati । ē̠vagṃ hi tachChrēya̍ḥ । yada̍smā ē̠tē raddhyē̍yuḥ । diśō̠-'bhya̍yagṃ rājā̍ 'bhū̠diti̠ pañchā̠kṣān-praya̍chChati । ē̠tē vai sarvē-'yā̎ḥ । apa̍rājāyina-mē̠vaina̍-ṅkarōti ॥ 63 ॥

ō̠da̠namudbru̍vatē । pa̠ra̠mē̠ṣṭhī vā ē̠ṣaḥ । yadō̍da̠naḥ । pa̠ra̠māmē̠vaina̠gg̠ śriya̍-ṅgamayati । suślō̠kāँ(4) suma̍ṅga̠lāँ(4) satya̍rā̠jā(3)nityā̍ha । ā̠śiṣa̍mē̠vaitāmā śā̎stē । śau̠na̠-śśē̠pamākhyā̍payatē । va̠ru̠ṇa̠pā̠śā-dē̠vaina̍-mmuñchati । pa̠ra̠-śśa̠ta-mbha̍vati । śa̠tāyu̠ḥ puru̍ṣa-śśa̠tēndri̍yaḥ( ) । āyu̍ṣyē̠vēndri̠yē prati̍tiṣṭhati । mā̠ru̠tasya̠ chaika̍vigṃśatikapālasya vaiśvadē̠vyai chā̠mikṣā̍yā a̠gnayē̎ sviṣṭa̠kṛtē̍ sa̠mava̍dyati । dē̠vatā̍bhirē̠vaina̍-mubha̠yata̠ḥ pari̍gṛhṇāti । a̠pā-nnaptrē̠ svāhō̠rjō naptrē̠ svāhā̠-'gnayē̍ gṛ̠hapa̍tayē̠ svāhēti̍ ti̠sra āhu̍tī-rjuhōti । traya̍ i̠mē lō̠kāḥ । ē̠ṣvē̍va lō̠kēṣu̠ prati̍ tiṣṭhati ॥ 64 ॥
(dē̠vairityā̍ha - sa̠tyasa̍va-ṅkarōti - tri̠ṣṭubha̍mē̠vaitēnā̍bhi̠ vyāha̍rati- satyānṛ̠tē ē̠vāva̍rundhē - karōti - śa̠tēndri̍ya̠-ṣṣaṭcha̍) (a. 10)

(ē̠ta-dbrā̎hmaṇāni - dhā̠trē - rā̠tninā̎m - dēvasu̠vā - ma̠rthētō̠ - dēvī̠--r diśa̠ḥ - sōma̠syē - ndra̍sya - mi̠trō daśa̍)

(ē̠ta-dbrā̎hmaṇāni - vaiṣṇa̠va-ntri̍kapā̠la - manna̠ṃ vai pū̠ṣā - vāśā̠-ssthētyā̍ha̠ - diśō̠ vyāsthā̍paya̠ - tyuda̍mpa̠rētya̠ - brahmā(3)ntvagṃ rā̍ja̠-ñchatu̍ṣṣaṣṭiḥ

(ē̠ta-dbrā̎hmaṇāni̠ - prati̍ tiṣṭhati)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē prathamāṣṭakē saptamaḥ prapāṭhaka-ssamāptaḥ ॥