କୃଷ୍ଣ ୟଜୁର୍ଵେଦୀୟ ତୈତ୍ତିରୀୟ ବ୍ରାହ୍ମଣେ ପ୍ରଥମାଷ୍ଟକେ ସପ୍ତମଃ ପ୍ରପାଠକଃ - ରାଜସୂୟାନୁବ୍ରାହ୍ମଣଂ

ଓ-ନ୍ନମଃ ପରମାତ୍ମନେ, ଶ୍ରୀ ମହାଗଣପତୟେ ନମଃ,
ଶ୍ରୀ ଗୁରୁଭ୍ୟୋ ନମଃ । ହ॒ରିଃ॒ ଓମ୍ ॥

ଅନୁଵାକଂ 1 - ଶୁନାସୀରୀୟେନ୍ଦ୍ରତୁରୀୟପଞ୍ଚାଵତ୍ତୀୟାପାମାର୍ଗହୋମାଃ

ଏ॒ତ-ଦ୍ବ୍ରା᳚ହ୍ମଣାନ୍ୟେ॒ଵ ପଞ୍ଚ॑ ହ॒ଵୀଗ୍​ମ୍ଷି॑ । ଅଥେନ୍ଦ୍ରା॑ୟ॒ ଶୁନା॒ସୀରା॑ୟ ପୁରୋ॒ଡାଶ॒-ନ୍ଦ୍ଵାଦ॑ଶକପାଲ॒-ନ୍ନିର୍ଵ॑ପତି । ସଂ॒​ଵଁ॒ଥ୍ସ॒ରୋ ଵା ଇନ୍ଦ୍ରା॒ ଶୁନା॒ସୀରଃ॑ । ସଂ॒​ଵଁ॒ଥ୍ସ॒ରେଣୈ॒ଵାସ୍ମା॒ ଅନ୍ନ॒ମଵ॑ ରୁନ୍ଧେ । ଵା॒ୟ॒ଵ୍ୟ॑-ମ୍ପୟୋ॑ ଭଵତି । ଵା॒ୟୁର୍ଵୈ ଵୃଷ୍ଟ୍ୟୈ᳚ ପ୍ରଦାପୟି॒ତା । ସ ଏ॒ଵାସ୍ମୈ॒ ଵୃଷ୍ଟି॒-ମ୍ପ୍ରଦା॑ପୟତି । ସୌ॒ର୍ୟ॑ ଏକ॑କପାଲୋ ଭଵତି । ସୂର୍ୟେ॑ଣ॒ ଵା ଅ॒ମୁଷ୍ମି॑ଁଲ୍ଲୋ॒କେ ଵୃଷ୍ଟି॑ର୍ଧୃ॒ତା । ସ ଏ॒ଵାସ୍ମୈ॒ ଵୃଷ୍ଟି॒-ନ୍ନି ୟ॑ଚ୍ଛତି ॥ 1 ॥

ଦ୍ଵା॒ଦ॒ଶ॒ଗ॒ଵଗ୍​ମ୍ ସୀର॒-ନ୍ଦକ୍ଷି॑ଣା॒ ସମୃ॑ଦ୍ଧ୍ୟୈ । ଦେ॒ଵା॒ସୁ॒ରା-ସ୍ସଂ​ୟଁ॑ତ୍ତା ଆସନ୍ନ୍ । ତେ ଦେ॒ଵା ଅ॒ଗ୍ନିମ॑ବ୍ରୁଵନ୍ନ୍ । ତ୍ଵୟା॑ ଵୀ॒ରେଣାସୁ॑ରାନ॒-ଭିଭ॑ଵା॒ମେତି॑ । ସୋ᳚-ଽବ୍ରଵୀତ୍ । ତ୍ରେ॒ଧା-ଽହମା॒ତ୍ମାନଂ॒-ଵିଁକ॑ରିଷ୍ୟ॒ ଇତି॑ । ସ ତ୍ରେ॒ଧା ଽଽତ୍ମାନଂ॒-ଵ୍ୟଁ॑କୁରୁତ । ଅ॒ଗ୍ନି-ନ୍ତୃତୀ॑ୟମ୍ । ରୁ॒ଦ୍ର-ନ୍ତୃତୀ॑ୟମ୍ । ଵରୁ॑ଣ॒-ନ୍ତୃତୀ॑ୟମ୍ ॥ 2 ॥

ସୋ᳚-ଽବ୍ରଵୀତ୍ । କ ଇ॒ଦ-ନ୍ତୁ॒ରୀୟ॒ମିତି॑ । ଅ॒ହମିତୀନ୍ଦ୍ରୋ᳚-ଽବ୍ରଵୀତ୍ ।
ସ-ନ୍ତୁ ସୃ॑ଜାଵହା॒ ଇତି॑ । ତୌ ସମ॑ସୃଜେତାମ୍ । ସ ଇନ୍ଦ୍ର॑ସ୍ତୁ॒ରୀୟ॑-ମଭଵତ୍ । ୟଦିନ୍ଦ୍ର॑-ସ୍ତୁ॒ରୀୟ॒-ମଭ॑ଵତ୍ । ତଦି॑ନ୍ଦ୍ର-ତୁରୀ॒ୟସ୍ୟେ᳚ନ୍ଦ୍ର-ତୁରୀୟ॒ତ୍ଵମ୍ । ତତୋ॒ ଵୈ ଦେ॒ଵା ଵ୍ୟ॑ଜୟନ୍ତ । ୟଦି॑ନ୍ଦ୍ରତୁରୀ॒ୟ-ନ୍ନି॑ରୁ॒ପ୍ୟତେ॒ ଵିଜି॑ତ୍ୟୈ ॥ 3 ॥

ଵ॒ହିନୀ॑ ଧେ॒ନୁ-ର୍ଦକ୍ଷି॑ଣା । ୟ-ଦ୍ଵ॒ହିନୀ᳚ । ତେନା᳚ଗ୍ନେ॒ୟୀ ।
ୟ-ଦ୍ଗୌଃ । ତେନ॑ ରୌ॒ଦ୍ରୀ । ୟ-ଦ୍ଧେ॒ନୁଃ । ତେନୈ॒ନ୍ଦ୍ରୀ । ୟଥ୍ସ୍ତ୍ରୀ ସ॒ତୀ ଦା॒ନ୍ତା । ତେନ॑ ଵାରୁ॒ଣୀ ସମୃ॑ଦ୍ଧ୍ୟୈ । ପ୍ର॒ଜାପ॑ତି-ର୍ୟ॒ଜ୍ଞମ॑ସୃଜତ ॥ 4 ॥

ତଗ୍​ମ୍ ସୃ॒ଷ୍ଟଗ୍​ମ୍ ରକ୍ଷାଗ୍॑ସ୍ୟଜିଘାଗ୍​ମ୍ସନ୍ନ୍ । ସ ଏ॒ତାଃ ପ୍ର॒ଜାପ॑ତି-ରା॒ତ୍ମନୋ॑ ଦେ॒ଵତା॒ ନିର॑ମିମୀତ । ତାଭି॒ର୍ଵୈ ସ ଦି॒ଗ୍ଭ୍ୟୋ ରକ୍ଷାଗ୍​ମ୍॑ସି॒ ପ୍ରାଣୁ॑ଦତ । ୟ-ତ୍ପ॑ଞ୍ଚାଵ॒ତ୍ତୀୟ॑-ଞ୍ଜୁ॒ହୋତି॑ । ଦି॒ଗ୍ଭ୍ୟ ଏ॒ଵ ତ-ଦ୍ୟଜ॑ମାନୋ॒ ରକ୍ଷାଗ୍​ମ୍॑ସି॒ ପ୍ରଣୁ॑ଦତେ । ସମୂ॑ଢ॒ଗ୍​ମ୍॒ ରକ୍ଷ॒-ସ୍ସନ୍ଦ॑ଗ୍ଧ॒ଗ୍​ମ୍॒ ରକ୍ଷ॒ ଇତ୍ୟା॑ହ । ରକ୍ଷାଗ୍॑ସ୍ୟେ॒ଵ ସନ୍ଦ॑ହତି । ଅ॒ଗ୍ନୟେ॑ ରକ୍ଷୋ॒ଘ୍ନେ ସ୍ଵାହେତ୍ୟା॑ହ । ଦେ॒ଵତା᳚ଭ୍ୟ ଏ॒ଵ ଵି॑ଜିଗ୍ୟା॒ନାଭ୍ୟୋ॑ ଭାଗ॒ଧେୟ॑-ଙ୍କରୋତି । ପ୍ର॒ଷ୍ଟି॒ଵା॒ହୀ ରଥୋ॒ ଦକ୍ଷି॑ଣା॒ ସମୃ॑ଦ୍ଧ୍ୟୈ ॥ 5 ॥

ଇନ୍ଦ୍ରୋ॑ ଵୃ॒ତ୍ରଗ୍​ମ୍ ହ॒ତ୍ଵା । ଅସୁ॑ରା-ନ୍ପରା॒ଭାଵ୍ୟ॑ । ନମୁ॑ଚିମାସୁ॒ର-ନ୍ନାଲ॑ଭତ । ତଗ୍​ମ୍ ଶ॒ଚ୍ୟା॑-ଽଗୃହ୍ଣାତ୍ । ତୌ ସମ॑ଲଭେତାମ୍ । ସୋ᳚-ଽସ୍ମା-ଦ॒ଭିଶୁ॑ନତରୋ-ଽଭଵତ୍ । ସୋ᳚-ଽବ୍ରଵୀତ୍ । ସ॒ଧାଂଗ୍​ମ୍ ସନ୍ଦ॑ଧାଵହୈ । ଅଥ॒ ତ୍ଵା-ଽଵ॑ ସ୍ରକ୍ଷ୍ୟାମି । ନ ମା॒ ଶୁଷ୍କେ॑ଣ॒ ନାର୍ଦ୍ରେଣ॑ ହନଃ ॥ 6 ॥

ନ ଦିଵା॒ ନ ନକ୍ତ॒ମିତି॑ । ସ ଏ॒ତମ॒ପା-ମ୍ଫେନ॑ମସିଞ୍ଚତ୍ । ନ ଵା ଏ॒ଷ ଶୁଷ୍କୋ॒ ନାର୍ଦ୍ରୋ ଵ୍ୟୁ॑ଷ୍ଟା ଽଽସୀତ୍ । ଅନୁ॑ଦିତ॒-ସ୍ସୂର୍ୟଃ॑ । ନ ଵା ଏ॒ତ-ଦ୍ଦିଵା॒ ନ ନକ୍ତ᳚ମ୍ । ତସ୍ୟୈ॒ତସ୍ମି॑ନ୍ ଁଲୋ॒କେ । ଅ॒ପା-ମ୍ଫେନେ॑ନ॒ ଶିର॒ ଉଦ॑ଵର୍ତୟତ୍ । ତଦେ॑ନ॒ମନ୍ଵ॑ଵର୍ତତ । ମିତ୍ର॑ଦ୍ରୁ॒ଗିତି॑ ॥ 7 ॥

ସ ଏ॒ତାନ॑ପାମା॒ର୍ଗାନ॑ଜନୟତ୍ । ତାନ॑ଜୁହୋତ୍ । ତୈର୍ଵୈ ସ ରକ୍ଷା॒ଗ୍॒ସ୍ୟପା॑ହତ । ୟଦ॑ପାମାର୍ଗ ହୋ॒ମୋ ଭଵ॑ତି । ରକ୍ଷ॑ସା॒-ମପ॑ହତ୍ୟୈ । ଏ॒କୋ॒ଲ୍ ମୁ॒କେନ॑ ୟନ୍ତି । ତଦ୍ଧି ରକ୍ଷ॑ସା-ମ୍ଭାଗ॒ଧେୟ᳚ମ୍ । ଇ॒ମା-ନ୍ଦିଶଂ॑-ୟଁନ୍ତି । ଏ॒ଷା ଵୈ ରକ୍ଷ॑ସା॒-ନ୍ଦିକ୍ । ସ୍ଵାୟା॑ମେ॒ଵ ଦି॒ଶି ରକ୍ଷାଗ୍​ମ୍॑ସି ହନ୍ତି ॥ 8 ॥

ସ୍ଵକୃ॑ତ॒ ଇରି॑ଣେ ଜୁହୋତି ପ୍ରଦ॒ରେ ଵା᳚ । ଏ॒ତ-ଦ୍ଵୈ ରକ୍ଷ॑ସାମା॒ୟତ॑ନମ୍ । ସ୍ଵ ଏ॒ଵାୟତ॑ନେ॒ ରକ୍ଷାଗ୍​ମ୍॑ସି ହନ୍ତି । ପ॒ର୍ଣ॒ମୟେ॑ନ ସ୍ରୁ॒ଵେଣ॑ ଜୁହୋତି । ବ୍ରହ୍ମ॒ ଵୈ ପ॒ର୍ଣଃ । ବ୍ରହ୍ମ॑ଣୈ॒ଵ ରକ୍ଷାଗ୍​ମ୍॑ସି ହନ୍ତି । ଦେ॒ଵସ୍ୟ॑ ତ୍ଵା ସଵି॒ତୁଃ ପ୍ର॑ସ॒ଵ ଇତ୍ୟା॑ହ । ସ॒ଵି॒ତୃପ୍ର॑ସୂତ ଏ॒ଵ ରକ୍ଷାଗ୍​ମ୍॑ସି ହନ୍ତି । ହ॒ତଗ୍​ମ୍ ରକ୍ଷୋ ଽଵ॑ଧିଷ୍ମ॒ ରକ୍ଷ॒ ଇତ୍ୟା॑ହ । ରକ୍ଷ॑ସା॒ଗ୍॒ ସ୍ତୃତ୍ୟୈ᳚ । ୟଦ୍ଵସ୍ତେ॒ ତ-ଦ୍ଦକ୍ଷି॑ଣା ନି॒ରଵ॑ତ୍ତ୍ୟୈ । ଅପ୍ର॑ତୀକ୍ଷ॒ମା ୟ॑ନ୍ତି । ରକ୍ଷ॑ସା-ମ॒ନ୍ତର୍​ହି॑ତ୍ୟୈ ॥ 9 ॥
(ୟ॒ଚ୍ଛ॒ତି॒ - ଵରୁ॑ଣ॒-ନ୍ତୃତୀ॑ୟଂ॒ - ଁଵିଜି॑ତ୍ୟା - ଅସୃଜତ॒ - ସମୃ॑ଦ୍ଧ୍ୟୈ - ହନୋ॒ - ମିତ୍ର॑ଦ୍ରୁ॒ଗିତି॑ - ହନ୍ତି॒ - ସ୍ତୃତ୍ୟୈ॒ ତ୍ରୀଣି॑ ଚ) (ଅ. 1)

ଅନୁଵାକଂ 2 - ଦେଵିକାଵହଵୀଂଷି
ଧା॒ତ୍ରେ ପୁ॑ରୋ॒ଡାଶ॒-ନ୍ଦ୍ଵାଦ॑ଶକପାଲ॒-ନ୍ନିର୍ଵ॑ପତି । ସଂ॒​ଵଁ॒ଥ୍ସ॒ରୋ ଵୈ ଧା॒ତା । ସଂ॒​ଵଁ॒ଥ୍ସ॒ରେଣୈ॒ଵାସ୍ମୈ᳚ ପ୍ର॒ଜାଃ ପ୍ରଜ॑ନୟତି । ଅନ୍ଵେ॒ଵାସ୍ମା॒ ଅନୁ॑ମତିର୍ମନ୍ୟତେ । ରା॒ତେ ରା॒କା । ପ୍ର ସି॑ନୀଵା॒ଲୀ ଜ॑ନୟତି । ପ୍ର॒ଜାସ୍ଵେ॒ଵ ପ୍ରଜା॑ତାସୁ କୁ॒ହ୍ଵା॑ ଵାଚ॑-ନ୍ଦଧାତି । ମି॒ଥୁ॒ନୌ ଗାଵୌ॒ ଦକ୍ଷି॑ଣା॒ ସମୃ॑ଦ୍ଧ୍ୟୈ । ଆ॒ଗ୍ନା॒ଵୈ॒ଷ୍ଣ॒ଵ-ମେକା॑ଦଶକପାଲ॒-ନ୍ନିର୍ଵ॑ପତି । ଐ॒ନ୍ଦ୍ରା॒ଵୈ॒ଷ୍ଣ॒ଵ-ମେକା॑ଦଶକପାଲମ୍ ॥ 10 ॥

ଵୈ॒ଷ୍ଣ॒ଵ-ନ୍ତ୍ରି॑କପା॒ଲମ୍ । ଵୀ॒ର୍ୟଂ॑-ଵାଁ ଅ॒ଗ୍ନିଃ । ଵୀ॒ର୍ୟ॑ମିନ୍ଦ୍ରଃ॑ । ଵୀ॒ର୍ୟଂ॑-ଵିଁଷ୍ଣୁଃ॑ । ପ୍ର॒ଜା ଏ॒ଵ ପ୍ରଜା॑ତା ଵୀ॒ର୍ୟେ᳚ ପ୍ରତି॑ଷ୍ଠାପୟତି । ତସ୍ମା᳚-ତ୍ପ୍ର॒ଜା ଵୀ॒ର୍ୟା॑ଵତୀଃ । ଵା॒ମ॒ନ ଋ॑ଷ॒ଭୋ ଵ॒ହୀ ଦକ୍ଷି॑ଣା । ୟଦ୍ଵ॒ହୀ । ତେନା᳚ଗ୍ନେ॒ୟଃ । ୟଦୃ॑ଷ॒ଭଃ ॥ 11 ॥

ତେନୈ॒ନ୍ଦ୍ରଃ । ୟଦ୍ଵା॑ମ॒ନଃ । ତେନ॑ ଵୈଷ୍ଣ॒ଵ-ସ୍ସମୃ॑ଦ୍ଧ୍ୟୈ । ଅ॒ଗ୍ନୀ॒ଷୋ॒ମୀୟ॒-ମେକା॑ଦଶକପାଲ॒-ନ୍ନିର୍ଵ॑ପତି । ଇ॒ନ୍ଦ୍ରା॒ସୋ॒ମୀୟ॒-ମେକା॑ଦଶକପାଲମ୍ । ସୌ॒ମ୍ୟ-ଞ୍ଚ॒ରୁମ୍ । ସୋମୋ॒ ଵୈ ରେ॑ତୋ॒ଧାଃ । ଅ॒ଗ୍ନିଃ ପ୍ର॒ଜାନା᳚-ମ୍ପ୍ରଜନୟି॒ତା । ଵୃ॒ଦ୍ଧାନା॒ମିନ୍ଦ୍ରଃ॑ ପ୍ରଦାପୟି॒ତା । ସୋମ॑ ଏ॒ଵାସ୍ମୈ॒ ରେତୋ॒ ଦଧା॑ତି ॥ 12 ॥

ଅ॒ଗ୍ନିଃ ପ୍ର॒ଜା-ମ୍ପ୍ରଜ॑ନୟତି । ଵୃ॒ଦ୍ଧାମିନ୍ଦ୍ରଃ॒ ପ୍ରୟ॑ଚ୍ଛତି । ବ॒ଭ୍ରୁ-ର୍ଦକ୍ଷି॑ଣା॒ ସମୃ॑ଦ୍ଧ୍ୟୈ । ସୋ॒ମା॒ପୌ॒ଷ୍ଣ-ଞ୍ଚ॒ରୁ-ନ୍ନିର୍ଵ॑ପତି । ଐ॒ନ୍ଦ୍ରା॒ପୌ॒ଷ୍ଣ-ଞ୍ଚ॒ରୁମ୍ । ସୋମୋ॒ ଵୈ ରେ॑ତୋ॒ଧାଃ । ପୂ॒ଷା ପ॑ଶୂ॒ନା-ମ୍ପ୍ର॑ଜନୟି॒ତା । ଵୃ॒ଦ୍ଧାନା॒ମିନ୍ଦ୍ରଃ॑ ପ୍ରଦାପୟି॒ତା । ସୋମ॑ ଏ॒ଵାସ୍ମୈ॒ ରେତୋ॒ ଦଧା॑ତି । ପୂ॒ଷା ପ॒ଶୂ-ନ୍ପ୍ରଜ॑ନୟତି ॥ 13 ॥

ଵୃ॒ଦ୍ଧାନିନ୍ଦ୍ରଃ॒ ପ୍ରୟ॑ଚ୍ଛତି । ପୌ॒ଷ୍ଣଶ୍ଚ॒ରୁ-ର୍ଭ॑ଵତି । ଇ॒ୟଂ-ଵୈଁ ପୂ॒ଷା । ଅ॒ସ୍ୟାମେ॒ଵ ପ୍ରତି॑ ତିଷ୍ଠତି । ଶ୍ୟା॒ମୋ ଦକ୍ଷି॑ଣା॒ ସମୃ॑ଦ୍ଧ୍ୟୈ । ବ॒ହୁ ଵୈ ପୁରୁ॑ଷୋ-ଽମେ॒ଦ୍ଧ୍ୟ-ମୁପ॑ଗଚ୍ଛତି । ଵୈ॒ଶ୍ଵା॒ନ॒ର-ନ୍ଦ୍ଵାଦ॑ଶକପାଲ॒-ନ୍ନିର୍ଵ॑ପତି । ସଂ॒​ଵଁ॒ଥ୍ସ॒ରୋ ଵା ଅ॒ଗ୍ନି-ର୍ଵୈ᳚ଶ୍ଵାନ॒ରଃ । ସଂ॒​ଵଁ॒ଥ୍ସ॒ରେଣୈ॒ଵୈନଗ୍ଗ୍॑ ସ୍ଵଦୟତି । ହିର॑ଣ୍ୟ॒-ନ୍ଦକ୍ଷି॑ଣା ॥ 14 ॥

ପ॒ଵିତ୍ରଂ॒-ଵୈଁ ହିର॑ଣ୍ୟମ୍ । ପୁ॒ନାତ୍ୟେ॒ଵୈନ᳚ମ୍ । ବ॒ହୁ ଵୈ ରା॑ଜ॒ନ୍ୟୋ ଽନୃ॑ତ-ଙ୍କରୋତି । ଉପ॑ ଜା॒ମ୍ୟୈ ହର॑ତେ । ଜି॒ନାତି॑ ବ୍ରାହ୍ମ॒ଣମ୍ । ଵଦ॒ତ୍ୟନୃ॑ତମ୍ । ଅନୃ॑ତେ॒ ଖଲୁ॒ ଵୈ କ୍ରି॒ୟମା॑ଣେ॒ ଵରୁ॑ଣୋ ଗୃହ୍ଣାତି । ଵା॒ରୁ॒ଣଂ-ୟଁ॑ଵ॒ମୟ॑-ଞ୍ଚ॒ରୁ-ନ୍ନିର୍ଵ॑ପତି । ଵ॒ରୁ॒ଣ॒ପା॒ଶାଦେ॒ଵୈନ॑-ମ୍ମୁଞ୍ଚତି । ଅଶ୍ଵୋ॒ ଦକ୍ଷି॑ଣା । ଵା॒ରୁ॒ଣୋ ହି ଦେ॒ଵତ॒ୟା-ଽଶ୍ଵ॒-ସ୍ସମୃ॑ଦ୍ଧ୍ୟୈ ॥ 15 ॥
(ଐ॒ନ୍ଦ୍ରା॒ଵୈ॒ଷ୍ଣା॒ଵମେକା॑ଦଶକପାଲଂ॒-ଁୟଦୃ॑ଷ॒ଭୋ- ଦଧା॑ତି-ପୂ॒ଷା ପ॒ଶୂ-ନ୍ପ୍ରଜ॑ନୟତି॒-ହିର॑ଣ୍ୟଂ॒ ଦକ୍ଷି॑ଣା॒-ଦକ୍ଷି॒ଣୈକଂ॑ ଚ) (ଅ. 2)

ଅନୁଵାକଂ 3 - ରତ୍ନିନାଂ ହଵୀଂଷି
ର॒ତ୍ନିନା॑ମେ॒ତାନି॑ ହ॒ଵୀଗ୍​ମ୍ଷି॑ ଭଵନ୍ତି । ଏ॒ତେ ଵୈ ରା॒ଷ୍ଟ୍ରସ୍ୟ॑ ପ୍ରଦା॒ତାରଃ॑ । ଏ॒ତେ॑-ଽପାଦା॒ତାରଃ॑ । ୟ ଏ॒ଵ ରା॒ଷ୍ଟ୍ରସ୍ୟ॑ ପ୍ରଦା॒ତାରଃ॑ । ୟେ॑-ଽପାଦା॒ତାରଃ॑ । ତ ଏ॒ଵାସ୍ମୈ॑ ରା॒ଷ୍ଟ୍ର-ମ୍ପ୍ରୟ॑ଚ୍ଛନ୍ତି । ରା॒ଷ୍ଟ୍ରମେ॒ଵ ଭ॑ଵତି । ୟ-ଥ୍ସ॑ମା॒ହୃତ୍ୟ॑ ନି॒ର୍ଵପେ᳚ତ୍ । ଅର॑ତ୍ନିନ-ସ୍ସ୍ୟୁଃ । ୟ॒ଥା॒ୟ॒ଥ-ନ୍ନିର୍ଵ॑ପତି ରତ୍ନି॒ତ୍ଵାୟ॑ ॥ 16 ॥

ୟ-ଥ୍ସ॒ଦ୍ୟୋ ନି॒ର୍ଵପେ᳚ତ୍ । ୟାଵ॑ତୀ॒ମେକେ॑ନ ହ॒ଵିଷା॒-ଽଽଶିଷ॑ମଵ ରୁ॒ନ୍ଧେ । ତାଵ॑ତୀ॒ମଵ॑ ରୁନ୍ଧୀତ । ଅ॒ନ୍ଵ॒ହ-ନ୍ନିର୍ଵ॑ପତି । ଭୂୟ॑ସୀମେ॒ଵାଶିଷ॒ମଵ॑ ରୁନ୍ଧେ । ଭୂୟ॑ସୋ ୟଜ୍ଞକ୍ର॒ତୂନୁପୈ॑ତି । ବା॒ର୍॒ହ॒ସ୍ପ॒ତ୍ୟ-ଞ୍ଚ॒ରୁ-ନ୍ନିର୍ଵ॑ପତି ବ୍ର॒ହ୍ମଣୋ॑ ଗୃ॒ହେ । ମୁ॒ଖ॒ତ ଏ॒ଵାସ୍ମୈ॒ ବ୍ରହ୍ମ॒ ସଗ୍ଗ୍​ଶ୍ୟ॑ତି । ଅଥୋ॒ ବ୍ରହ୍ମ॑ନ୍ନେ॒ଵ କ୍ଷ॒ତ୍ର-ମ॒ନ୍ଵାର॑ମ୍ଭୟତି । ଶି॒ତି॒ପୃ॒ଷ୍ଠୋ ଦକ୍ଷି॑ଣା॒ ସମୃ॑ଦ୍ଧ୍ୟୈ ॥ 17 ॥

ଐ॒ନ୍ଦ୍ର-ମେକା॑ଦଶକପାଲଗ୍​ମ୍ ରାଜ॒ନ୍ୟ॑ସ୍ୟ ଗୃ॒ହେ । ଇ॒ନ୍ଦ୍ରି॒ୟମେ॒ଵାଵ॑ ରୁନ୍ଧେ । ଋ॒ଷ॒ଭୋ ଦକ୍ଷି॑ଣା॒ ସମୃ॑ଦ୍ଧ୍ୟୈ । ଆ॒ଦି॒ତ୍ୟ-ଞ୍ଚ॒ରୁ-ମ୍ମହି॑ଷ୍ୟୈ ଗୃ॒ହେ । ଇ॒ୟଂ-ଵାଁ ଅଦି॑ତିଃ । ଅ॒ସ୍ୟାମେ॒ଵ ପ୍ରତି॑ତିଷ୍ଠତି । ଧେ॒ନୁ-ର୍ଦକ୍ଷି॑ଣା॒ ସମୃ॑ଦ୍ଧ୍ୟୈ । ଭଗା॑ୟ ଚ॒ରୁଂ-ଵାଁ॒ଵାତା॑ୟୈ ଗୃ॒ହେ । ଭଗ॑ମେ॒ଵାସ୍ମି॑-ନ୍ଦଧାତି । ଵିଚି॑ତ୍ତଗର୍ଭା ପଷ୍ଠୌ॒ହୀ ଦକ୍ଷି॑ଣା॒ ସମୃ॑ଦ୍ଧ୍ୟୈ ॥ 18 ॥

ନୈ॒ର୍॒ଋ॒ତ-ଞ୍ଚ॒ରୁ-ମ୍ପ॑ରିଵୃ॒କ୍ତ୍ୟୈ॑ ଗୃ॒ହେ କୃ॒ଷ୍ଣାନାଂ᳚-ଵ୍ରୀଁହୀ॒ଣା-ନ୍ନ॒ଖନି॑ର୍ଭିନ୍ନମ୍ । ପା॒ପ୍ମାନ॑ମେ॒ଵ ନିର୍-ଋ॑ତି-ନ୍ନି॒ରଵ॑ଦୟତେ । କୃ॒ଷ୍ଣା କୂ॒ଟା ଦକ୍ଷି॑ଣା॒ ସମୃ॑ଦ୍ଧ୍ୟୈ । ଆ॒ଗ୍ନେ॒ୟ-ମ॒ଷ୍ଟାକ॑ପାଲଗ୍​ମ୍ ସେନା॒ନ୍ୟୋ॑ ଗୃ॒ହେ । ସେନା॑ମେ॒ଵାସ୍ୟ॒ ସଗ୍ଗ୍​ଶ୍ୟ॑ତି । ହିର॑ଣ୍ୟ॒-ନ୍ଦକ୍ଷି॑ଣା॒ ସମୃ॑ଦ୍ଧ୍ୟୈ । ଵା॒ରୁ॒ଣ-ନ୍ଦଶ॑କପାଲଗ୍​ମ୍ ସୂ॒ତସ୍ୟ॑ ଗୃ॒ହେ । ଵ॒ରୁ॒ଣ॒ସ॒ଵମେ॒ଵାଵ॑-ରୁନ୍ଧେ । ମ॒ହାନି॑ରଷ୍ଟୋ॒ ଦକ୍ଷି॑ଣା॒ ସମୃ॑ଦ୍ଧ୍ୟୈ । ମା॒ରୁ॒ତଗ୍​ମ୍ ସ॒ପ୍ତକ॑ପାଲ-ଙ୍ଗ୍ରାମ॒ଣ୍ୟୋ॑ ଗୃ॒ହେ ॥ 19 ॥

ଅନ୍ନଂ॒-ଵୈଁ ମ॒ରୁତଃ॑ । ଅନ୍ନ॑ମେ॒ଵାଵ॑-ରୁନ୍ଧେ । ପୃଶ୍ଞି॒-ର୍ଦକ୍ଷି॑ଣା॒ ସମୃ॑ଦ୍ଧ୍ୟୈ । ସା॒ଵି॒ତ୍ର-ନ୍ଦ୍ଵାଦ॑ଶକପାଲ-ଙ୍କ୍ଷ॒ତ୍ତୁର୍ଗୃ॒ହେ ପ୍ରସୂ᳚ତ୍ୟୈ । ଉ॒ପ॒ଦ୍ଧ୍ଵ॒ସ୍ତୋ ଦକ୍ଷି॑ଣା॒ ସମୃ॑ଦ୍ଧ୍ୟୈ । ଆ॒ଶ୍ଵି॒ନ-ନ୍ଦ୍ଵି॑କପା॒ଲଗ୍​ମ୍ ସ॑ଗ୍ରଂହୀ॒ତୁର୍ଗୃ॒ହେ । ଅ॒ଶ୍ଵିନୌ॒ ଵୈ ଦେ॒ଵାନା᳚-ମ୍ଭି॒ଷଜୌ᳚ । ତାଭ୍ୟା॑ମେ॒ଵାସ୍ମୈ॑ ଭେଷ॒ଜ-ଙ୍କ॑ରୋତି । ସ॒ଵା॒ତ୍ୟୌ॑ ଦକ୍ଷି॑ଣା॒ ସମୃ॑ଦ୍ଧ୍ୟୈ । ପୌ॒ଷ୍ଣ-ଞ୍ଚ॒ରୁ-ମ୍ଭା॑ଗଦୁ॒ଘସ୍ୟ॑ ଗୃ॒ହେ ॥ 20 ॥

ଅନ୍ନଂ॒-ଵୈଁ ପୂ॒ଷା । ଅନ୍ନ॑ମେ॒ଵାଵ॑ ରୁନ୍ଧେ । ଶ୍ୟା॒ମୋ ଦକ୍ଷି॑ଣା॒ ସମୃ॑ଦ୍ଧ୍ୟୈ । ରୌ॒ଦ୍ର-ଙ୍ଗା॑ଵୀଧୁ॒କ-ଞ୍ଚ॒ରୁମ॑କ୍ଷାଵା॒ପସ୍ୟ॑ ଗୃ॒ହେ । ଅ॒ନ୍ତ॒ତ ଏ॒ଵ ରୁ॒ଦ୍ର-ନ୍ନି॒ରଵ॑ଦୟତେ । ଶ॒ବଲ॒ ଉଦ୍ଵା॑ରୋ॒ ଦକ୍ଷି॑ଣା॒ ସମୃ॑ଦ୍ଧ୍ୟୈ । ଦ୍ଵାଦ॑ଶୈ॒ତାନି॑ ହ॒ଵୀଗ୍​ମ୍ଷି॑ ଭଵନ୍ତି । ଦ୍ଵାଦ॑ଶ॒ ମାସା᳚-ସ୍ସଂ​ଵଁଥ୍ସ॒ରଃ । ସଂ॒​ଵଁ॒ଥ୍ସ॒ରେଣୈ॒ଵାସ୍ମୈ॑ ରା॒ଷ୍ଟ୍ରମଵ॑-ରୁନ୍ଧେ । ରା॒ଷ୍ଟ୍ରମେ॒ଵ ଭ॑ଵତି ॥ 21 ॥

ୟନ୍ନ ପ୍ର॑ତି ନି॒ର୍ଵପେ᳚ତ୍ । ର॒ତ୍ନିନ॑ ଆ॒ଶିଷୋ-ଽଵ॑ରୁନ୍ଧୀରନ୍ନ୍ । ପ୍ରତି॒ ନିର୍ଵ॑ପତି । ଇନ୍ଦ୍ରା॑ୟ ସୁ॒ତ୍ରାମ୍ଣେ॑ ପୁରୋ॒ଡାଶ॒-ମେକା॑ଦଶକପାଲମ୍ । ଇନ୍ଦ୍ରା॑ୟାଗ୍​ମ୍ହୋ॒ମୁଚେ᳚ । ଆ॒ଶିଷ॑ ଏ॒ଵାଵ॑ରୁନ୍ଧେ । ଅ॒ୟ-ନ୍ନୋ॒ ରାଜା॑ ଵୃତ୍ର॒ହା ରାଜା॑ ଭୂ॒ତ୍ଵା ଵୃ॒ତ୍ରଂ-ଵଁ॑ଦ୍ଧ୍ୟା॒ଦିତ୍ୟା॑ହ । ଆ॒ଶିଷ॑ମେ॒ଵୈତାମାଶା᳚ସ୍ତେ । ମୈ॒ତ୍ରା॒-ବା॒ର୍॒ହ॒ସ୍ପ॒ତ୍ୟ-ମ୍ଭ॑ଵତି । ଶ୍ଵେ॒ତାୟୈ᳚ ଶ୍ଵେ॒ତଵ॑ଥ୍ସାୟୈ ଦୁ॒ଗ୍ଧେ ॥ 22 ॥

ବା॒ର୍॒ହ॒ସ୍ପ॒ତ୍ୟେ ମୈ॒ତ୍ରମପି॑ ଦଧାତି । ବ୍ରହ୍ମ॑ ଚୈ॒ଵାସ୍ମୈ᳚ କ୍ଷ॒ତ୍ର-ଞ୍ଚ॑ ସ॒ମୀଚୀ॑ ଦଧାତି । ଅଥୋ॒ ବ୍ରହ୍ମ॑ନ୍ନେ॒ଵ କ୍ଷ॒ତ୍ର-ମ୍ପ୍ରତି॑ଷ୍ଠାପୟତି । ବା॒ର୍॒ହ॒ସ୍ପ॒ତ୍ୟେନ॒ ପୂର୍ଵେ॑ଣ॒ ପ୍ରଚ॑ରତି । ମୁ॒ଖ॒ତ ଏ॒ଵାସ୍ମୈ॒ ବ୍ରହ୍ମ॒ ସଗ୍ଗ୍​ଶ୍ୟ॑ତି । ଅଥୋ॒ ବ୍ରହ୍ମ॑ନ୍ନେ॒ଵ କ୍ଷ॒ତ୍ର-ମ॒ନ୍ଵାର॑ମ୍ଭୟତି । ସ୍ଵ॒ୟ॒-ଙ୍କୃ॒ତା ଵେଦି॑ର୍ଭଵତି । ସ୍ଵ॒ୟ॒ଦି॒ନ୍ନ-ମ୍ବ॒ର୍॒ହିଃ । ସ୍ଵ॒ୟ॒କୃ॒ନ୍ତ ଇ॒ଦ୍ଧ୍ମଃ । ଅନ॑ଭିଜିତସ୍ୟା॒-ଭିଜି॑ତ୍ୟୈ । ତସ୍ମା॒-ଦ୍ରାଜ୍ଞା॒ମର॑ଣ୍ୟ-ମ॒ଭିଜି॑ତମ୍ । ସୈଵ ଶ୍ଵେ॒ତା ଶ୍ଵେ॒ତଵ॑ଥ୍ସା॒ ଦକ୍ଷି॑ଣା॒ ସମୃ॑ଦ୍ଧ୍ୟୈ ॥ 23 ॥
(ର॒ତ୍ନି॒ତ୍ଵାୟ॒ - ସମୃ॑ଦ୍ଧ୍ୟୈ - ପଷ୍ଠୌ॒ହି ଦକ୍ଷି॑ଣା॒ ସମୃ॑ଦ୍ଧ୍ୟୈ - ଗ୍ରାମ॒ଣ୍ୟୋ॑ ଗୃ॒ହେ - ଭା॑ଗଦୁ॒ଘସ୍ୟ॑ ଗୃ॒ହେ-ଭ॑ଵତି - ଦୁ॒ଗ୍ଧେ॑ - ଽଭିଜି॑ତ୍ୟୈ॒ ଦ୍ଵେ ଚ॑) (ଅ. 3)

ଅନୁଵାକଂ 4 - ଦେଵସୁଵାଂ ହଵୀଂଷି
ଦେ॒ଵ॒ସୁ॒ଵାମେ॒ତାନି॑ ହ॒ଵୀଗ୍​ମ୍ଷି॑ ଭଵନ୍ତି । ଏ॒ତାଵ॑ନ୍ତୋ॒ ଵୈ ଦେ॒ଵାନାଗ୍​ମ୍॑ ସ॒ଵାଃ । ତ ଏ॒ଵାସ୍ମୈ॑ ସ॒ଵା-ନ୍ପ୍ରୟ॑ଚ୍ଛନ୍ତି । ତ ଏ॑ନଗ୍​ମ୍ ସୁଵନ୍ତେ । ଅ॒ଗ୍ନିରେ॒ଵୈନ॑-ଙ୍ଗୃ॒ହପ॑ତୀନାଗ୍​ମ୍ ସୁଵତେ । ସୋମୋ॒ ଵନ॒ସ୍ପତୀ॑ନାମ୍ । ରୁ॒ଦ୍ରଃ ପ॑ଶୂ॒ନାମ୍ । ବୃହ॒ସ୍ପତି॑-ର୍ଵା॒ଚାମ୍ । ଇନ୍ଦ୍ରୋ᳚ ଜ୍ୟେ॒ଷ୍ଠାନା᳚ମ୍ । ମି॒ତ୍ର-ସ୍ସ॒ତ୍ୟାନା᳚ମ୍ ॥ 24 ॥

ଵରୁ॑ଣୋ॒ ଧର୍ମ॑ପତୀନାମ୍ । ଏ॒ତଦେ॒ଵ ସର୍ଵ॑-ମ୍ଭଵତି । ସ॒ଵି॒ତା ତ୍ଵା᳚ ପ୍ରସ॒ଵାନାଗ୍​ମ୍॑ ସୁଵତା॒ମିତି॒ ହସ୍ତ॑-ଙ୍ଗୃହ୍ଣାତି॒ ପ୍ରସୂ᳚ତ୍ୟୈ । ୟେ ଦେ॑ଵା ଦେଵ॒ସୁଵ॒-ସ୍ସ୍ଥେତ୍ୟା॑ହ । ୟ॒ଥା॒ ୟ॒ଜୁରେ॒ଵୈ ତତ୍ । ମ॒ହ॒ତେ କ୍ଷ॒ତ୍ରାୟ॑ ମହ॒ତ ଆଧି॑ପତ୍ୟାୟ ମହ॒ତେ ଜାନ॑ରାଜ୍ୟା॒ୟେତ୍ୟା॑ହ । ଆ॒ଶିଷ॑ମେ॒ଵୈତାମାଶା᳚ସ୍ତେ । ଏ॒ଷ ଵୋ॑ ଭରତା॒ ରାଜା॒ ସୋମୋ॒-ଽସ୍ମାକ॑-ମ୍ବ୍ରାହ୍ମ॒ଣାନା॒ଗ୍​ମ୍॒ ରାଜେତ୍ୟା॑ହ । ତସ୍ମା॒-ଥ୍ସୋମ॑ରାଜାନୋ ବ୍ରାହ୍ମ॒ଣାଃ । ପ୍ରତି॒ ତ୍ୟନ୍ନାମ॑ ରା॒ଜ୍ୟମ॑ଧା॒ୟୀତ୍ୟା॑ହ ॥ 25 ॥

ରା॒ଜ୍ୟମେ॒ଵାସ୍ମି॒-ନ୍ପ୍ରତି॑ ଦଧାତି । ସ୍ଵା-ନ୍ତ॒ନୁଵଂ॒-ଵଁରୁ॑ଣୋ ଅଶିଶ୍ରେ॒ଦିତ୍ୟା॑ହ । ଵ॒ରୁ॒ଣ॒ସ॒ଵମେ॒ଵା-ଵ॑ରୁନ୍ଧେ । ଶୁଚେ᳚ର୍ମି॒ତ୍ରସ୍ୟ॒ ଵ୍ରତ୍ୟା॑ ଅଭୂ॒ମେତ୍ୟା॑ହ । ଶୁଚି॑ମେ॒ଵୈନଂ॒-ଵ୍ରଁତ୍ୟ॑-ଙ୍କରୋତି । ଅମ॑ନ୍ମହି ମହ॒ତ ଋ॒ତସ୍ୟ॒ ନାମେତ୍ୟା॑ହ । ମ॒ନୁ॒ତ ଏ॒ଵୈନ᳚ମ୍ । ସର୍ଵେ॒ ଵ୍ରାତା॒ ଵରୁ॑ଣସ୍ୟା ଭୂଵ॒ନ୍ନିତ୍ୟା॑ହ । ସର୍ଵ॑ଵ୍ରାତମେ॒ଵୈନ॑-ଙ୍କରୋତି । ଵି ମି॒ତ୍ର ଏଵୈ॒ରରା॑ତି-ମତାରୀ॒ଦିତ୍ୟା॑ହ ॥ 26 ॥

ଅରା॑ତିମେ॒ଵୈନ॑-ନ୍ତାରୟତି । ଅସୂ॑ଷୁଦନ୍ତ ୟ॒ଜ୍ଞିୟା॑ ଋ॒ତେନେତ୍ୟା॑ହ । ସ୍ଵ॒ଦୟ॑ତ୍ୟେ॒ଵୈନ᳚ମ୍ । ଵ୍ୟୁ॑ ତ୍ରି॒ତୋ ଜ॑ରି॒ମାଣ॑-ନ୍ନ ଆନ॒ଡିତ୍ୟା॑ହ । ଆୟୁ॑ରେ॒ଵାସ୍ମି॑-ନ୍ଦଧାତି । ଦ୍ଵାଭ୍ୟାଂ॒-ଵିଁମୃ॑ଷ୍ଟେ । ଦ୍ଵି॒ପା-ଦ୍ୟଜ॑ମାନଃ॒ ପ୍ରତି॑ଷ୍ଠିତ୍ୟୈ । ଅ॒ଗ୍ନୀ॒ଷୋ॒ମୀୟ॑ସ୍ୟ॒ ଚୈକା॑ଦଶକପାଲସ୍ୟ ଦେଵସୁ॒ଵା-ଞ୍ଚ॑ ହ॒ଵିଷା॑ମ॒ଗ୍ନୟେ᳚ ସ୍ଵିଷ୍ଟ॒କୃତେ॑ ସ॒ମଵ॑ଦ୍ୟତି । ଦେ॒ଵତା॑ଭିରେ॒ଵୈନ॑-ମୁଭ॒ୟତଃ॒ ପରି॑ଗୃହ୍ଣାତି । ଵି॒ଷ୍ଣୁ॒କ୍ର॒ମାନ୍ କ୍ର॑ମତେ( ) । ଵିଷ୍ଣୁ॑ରେ॒ଵ ଭୂ॒ତ୍ଵେମାଁଲ୍ଲୋ॒କା-ନ॒ଭିଜ॑ୟତି ॥ 27 ॥
(ସ॒ତ୍ୟାନା॑-ମଧା॒ୟୀତ୍ୟା॑-ହାତାରୀ॒ଦିତ୍ୟା॑ହ-କ୍ରମତ॒ ଏକ॑-ଞ୍ଚ) (ଅ. 4)

ଅନୁଵାକଂ 5 - ଅଭିଷେକାର୍ଥମପାଙ୍ଗ୍ରହଗ୍ରହଣମ୍
ଅ॒ର୍ଥେତ॒-ସ୍ସ୍ଥେତି॑ ଜୁହୋତି । ଆହୁ॑ତ୍ୟୈ॒ଵୈନା॑ ନି॒ଷ୍କ୍ରୀୟ॑ ଗୃହ୍ଣାତି । ଅଥୋ॑ ହ॒ଵିଷ୍କୃ॑ତାନାମେ॒ଵାଭିଘୃ॑ତାନା-ଙ୍ଗୃହ୍ଣାତି । ଵହ॑ନ୍ତୀନା-ଙ୍ଗୃହ୍ଣାତି । ଏ॒ତା ଵା ଅ॒ପାଗ୍​ମ୍ ରା॒ଷ୍ଟ୍ରମ୍ । ରା॒ଷ୍ଟ୍ରମେ॒ଵାସ୍ମୈ॑ ଗୃହ୍ଣାତି । ଅଥୋ॒ ଶ୍ରିୟ॑ମେ॒ଵୈନ॑ମ॒ଭି ଵ॑ହନ୍ତି । ଅ॒ପା-ମ୍ପତି॑ର॒ସୀତ୍ୟା॑ହ । ମି॒ଥୁ॒ନମେ॒ଵାକଃ॑ । ଵୃଷା᳚-ଽସ୍ୟୂ॒ର୍ମିରିତ୍ୟା॑ହ ॥ 28 ॥

ଊ॒ର୍ମି॒ମନ୍ତ॑ମେ॒ଵୈନ॑-ଙ୍କରୋତି । ଵୃ॒ଷ॒ସେ॒ନୋ॑-ଽସୀତ୍ୟା॑ହ । ସେନା॑ମେ॒ଵାସ୍ୟ॒ ସଗ୍ଗ୍​ଶ୍ୟ॑ତି । ଵ୍ର॒ଜ॒କ୍ଷିତ॒-ସ୍ସ୍ଥେତ୍ୟା॑ହ । ଏ॒ତା ଵା ଅ॒ପାଂ-ଵିଁଶଃ॑ । ଵିଶ॑ମେ॒ଵାସ୍ମୈ॒ ପର୍ୟୂ॑ହତି । ମ॒ରୁତା॒ମୋଜ॒-ସ୍ସ୍ଥେତ୍ୟା॑ହ । ଅନ୍ନଂ॒-ଵୈଁ ମ॒ରୁତଃ॑ । ଅନ୍ନ॑ମେ॒ଵା ଵ॑ରୁନ୍ଧେ । ସୂର୍ୟ॑ଵର୍ଚସ॒-ସ୍ସ୍ଥେତ୍ୟା॑ହ ॥ 29 ॥

ରା॒ଷ୍ଟ୍ରମେ॒ଵ ଵ॑ର୍ଚ॒ସ୍ଵ୍ୟ॑କଃ । ସୂର୍ୟ॑ତ୍ଵଚସ॒-ସ୍ସ୍ଥେତ୍ୟା॑ହ । ସ॒ତ୍ୟଂ-ଵାଁ ଏ॒ତତ୍ । ୟ-ଦ୍ଵର୍​ଷ॑ତି । ଅନୃ॑ତଂ॒-ୟଁଦା॒ତପ॑ତି॒ ଵର୍​ଷ॑ତି । ସ॒ତ୍ୟା॒ନୃ॒ତେ ଏ॒ଵାଵ॑ରୁନ୍ଧେ । ନୈନଗ୍​ମ୍॑ ସତ୍ୟାନୃ॒ତେ ଉ॑ଦି॒ତେ ହିଗ୍ଗ୍॑ସ୍ତଃ । ୟ ଏ॒ଵଂ-ଵେଁଦ॑ । ମାନ୍ଦା॒-ସ୍ସ୍ଥେତ୍ୟା॑ହ । ରା॒ଷ୍ଟ୍ରମେ॒ଵ ବ୍ର॑ହ୍ମଵର୍ଚ॒ସ୍ୟ॑କଃ ॥ 30 ॥

ଵାଶା॒-ସ୍ସ୍ଥେତ୍ୟା॑ହ । ରା॒ଷ୍ଟ୍ରମେ॒ଵ ଵ॒ଶ୍ୟ॑କଃ । ଶକ୍ଵ॑ରୀ॒-ସ୍ସ୍ଥେତ୍ୟା॑ହ । ପ॒ଶଵୋ॒ ଵୈ ଶକ୍ଵ॑ରୀଃ । ପ॒ଶୂନେ॒ଵାଵ॑ ରୁନ୍ଧେ । ଵି॒ଶ୍ଵ॒ଭୃତ॒-ସ୍ସ୍ଥେତ୍ୟା॑ହ । ରା॒ଷ୍ଟ୍ରମେ॒ଵ ପ॑ୟ॒ସ୍ଵ୍ୟ॑କଃ । ଜ॒ନ॒ଭୃତ॒-ସ୍ସ୍ଥେତ୍ୟା॑ହ । ରା॒ଷ୍ଟ୍ରମେ॒ଵେନ୍ଦ୍ରି॑ୟା॒ଵ୍ୟ॑କଃ । ଅ॒ଗ୍ନେସ୍ତେ॑ଜ॒ସ୍ୟା᳚-ସ୍ସ୍ଥେତ୍ୟା॑ହ ॥ 31 ॥

ରା॒ଷ୍ଟ୍ରମେ॒ଵ ତେ॑ଜ॒ସ୍ଵ୍ୟ॑କଃ । ଅ॒ପାମୋଷ॑ଧୀନା॒ଗ୍​ମ୍॒ ରସ॒-ସ୍ସ୍ଥେତ୍ୟା॑ହ । ରା॒ଷ୍ଟ୍ରମେ॒ଵ ମ॑ଧ॒ଵ୍ୟ॑ମକଃ । ସା॒ର॒ସ୍ଵ॒ତ-ଙ୍ଗ୍ରହ॑-ଙ୍ଗୃହ୍ଣାତି । ଏ॒ଷା ଵା ଅ॒ପା-ମ୍ପୃ॒ଷ୍ଠମ୍ । ୟଥ୍ସର॑ସ୍ଵତୀ । ପୃ॒ଷ୍ଠମେ॒ଵୈନଗ୍​ମ୍॑ ସମା॒ନାନା᳚-ଙ୍କରୋତି । ଷୋ॒ଡ॒ଶଭି॑-ର୍ଗୃହ୍ଣାତି । ଷୋଡ॑ଶକଲୋ॒ ଵୈ ପୁରୁ॑ଷଃ । ୟାଵା॑ନେ॒ଵ ପୁରୁ॑ଷଃ । ତସ୍ମି॑ନ୍ ଵୀ॒ର୍ୟ॑-ନ୍ଦଧାତି । ଷୋ॒ଡ॒ଶଭି॑-ର୍ଜୁ॒ହୋତି॑ ଷୋଡ॒ଶଭି॑-ର୍ଗୃହ୍ଣାତି । ଦ୍ଵାତ୍ରିଗ୍​ମ୍॑ଶ॒-ଥ୍ସମ୍ପ॑ଦ୍ୟନ୍ତେ । ଦ୍ଵାତ୍ରିଗ୍​ମ୍॑ଶଦକ୍ଷରା ଽନୁ॒ଷ୍ଟୁକ୍ । ଵାଗ॑ନୁ॒ଷ୍ଟୁ-ଫ୍ସର୍ଵା॑ଣି॒ ଛନ୍ଦାଗ୍​ମ୍॑ସି । ଵା॒ଚୈଵୈନ॒ଗ୍​ମ୍॒ ସର୍ଵେ॑ଭି॒-ଶ୍ଛନ୍ଦୋ॑ଭି-ର॒ଭିଷି॑ଞ୍ଚତି ॥ 32 ॥
(ଊ॒ର୍ମିରିତ୍ୟା॑ହ॒ - ସୂର୍ୟ॑ଵର୍ଚସ॒-ସ୍ସ୍ଥେତ୍ୟା॑ହ - ବ୍ରହ୍ମଵର୍ଚ॒ସ୍ୟ॑କ - ସ୍ତେଜ॒ସ୍ୟା᳚-ସ୍ସ୍ଥେତ୍ୟା॑ହୈ॒ଵ - ପୁରୁ॑ଷ॒-ଷ୍ଷଟ୍ଚ॑) (ଅ. 5)

ଅନୁଵାକଂ 6 - ଅଭିଷେକାର୍ଥଜଲସଂସ୍କାରଃ
ଦେଵୀ॑ରାପ॒-ସ୍ସ-ମ୍ମଧୁ॑ମତୀ॒-ର୍ମଧୁ॑ମତୀଭି-ସ୍ସୃଜ୍ୟଦ୍ଧ୍ଵ॒ମିତ୍ୟା॑ହ । ବ୍ରହ୍ମ॑ଣୈ॒ଵୈନା॒-ସ୍ସଗ୍​ମ୍ ସୃ॑ଜତି । ଅନା॑ଧୃଷ୍ଟା-ସ୍ସୀଦ॒ତେତ୍ୟା॑ହ । ବ୍ରହ୍ମ॑ଣୈ॒ଵୈନା᳚-ସ୍ସାଦୟତି । ଅ॒ନ୍ତ॒ରା ହୋତୁ॑ଶ୍ଚ॒ ଧିଷ୍ଣି॑ୟ-ମ୍ବ୍ରାହ୍ମଣାଚ୍ଛ॒ଗ୍​ମ୍॒ ସିନ॑ଶ୍ଚ ସାଦୟତି । ଆ॒ଗ୍ନେ॒ୟୋ ଵୈ ହୋତା᳚ । ଐ॒ନ୍ଦ୍ରୋ ବ୍ରା᳚ହ୍ମଣାଚ୍ଛ॒ଗ୍​ମ୍॒ସୀ । ତେଜ॑ସା ଚୈ॒ଵେନ୍ଦ୍ରି॒ୟେଣ॑ ଚୋଭ॒ୟତୋ॑ ରା॒ଷ୍ଟ୍ର-ମ୍ପରି॑ଗୃହ୍ଣାତି । ହିର॑ଣ୍ୟେ॒ନୋ-ତ୍ପୁ॑ନାତି । ଆହୁ॑ତ୍ୟୈ॒ ହି ପ॒ଵିତ୍ରା᳚ଭ୍ୟାମୁତ୍ପୁ॒ନନ୍ତି॒ ଵ୍ୟାଵୃ॑ତ୍ତ୍ୟୈ ॥ 33 ॥

ଶ॒ତମା॑ନ-ମ୍ଭଵତି । ଶ॒ତାୟୁଃ॒ ପୁରୁ॑ଷ-ଶ୍ଶ॒ତେନ୍ଦ୍ରି॑ୟଃ । ଆୟୁ॑ଷ୍ୟେ॒ଵେନ୍ଦ୍ରି॒ୟେ ପ୍ରତି॑ତିଷ୍ଠତି । ଅନି॑ଭୃଷ୍ଟମ॒ସୀତ୍ୟା॑ହ । ଅନି॑ଭୃଷ୍ଟ॒ଗ୍ଗ୍॒ ହ୍ୟେ॑ତତ୍ । ଵା॒ଚୋ ବନ୍ଧୁ॒ରିତ୍ୟା॑ହ । ଵା॒ଚୋ ହ୍ୟେ॑ଷ ବନ୍ଧୁଃ॑ । ତ॒ପୋ॒ଜା ଇତ୍ୟା॑ହ । ତ॒ପୋ॒ଜା ହ୍ୟେ॑ତତ୍ । ସୋମ॑ସ୍ୟ ଦା॒ତ୍ରମ॒ସୀତ୍ୟା॑ହ ॥ 34 ॥

ସୋମ॑ସ୍ୟ॒ ହ୍ୟେ॑ତଦ୍ଦା॒ତ୍ରମ୍ । ଶୁ॒କ୍ରା ଵ॑-ଶ୍ଶୁ॒କ୍ରେଣୋତ୍ପୁ॑ନା॒ମୀତ୍ୟା॑ହ । ଶୁ॒କ୍ରା ହ୍ୟାପଃ॑ । ଶୁ॒କ୍ରଗ୍​ମ୍ ହିର॑ଣ୍ୟମ୍ । ଚ॒ନ୍ଦ୍ରାଶ୍ଚ॒ନ୍ଦ୍ରେଣେତ୍ୟା॑ହ । ଚ॒ନ୍ଦ୍ରା ହ୍ୟାପଃ॑ । ଚ॒ନ୍ଦ୍ରଗ୍​ମ୍ ହିର॑ଣ୍ୟମ୍ । ଅ॒ମୃତା॑ ଅ॒ମୃତେ॒ନେତ୍ୟା॑ହ । ଅ॒ମୃତା॒ ହ୍ୟାପଃ॑ । ଅ॒ମୃତ॒ଗ୍​ମ୍॒ ହିର॑ଣ୍ୟମ୍ ॥ 35 ॥

ସ୍ଵାହା॑ ରାଜ॒ସୂୟା॒ୟେତ୍ୟା॑ହ । ରା॒ଜ॒ସୂୟା॑ୟ॒ ହ୍ୟେ॑ନା ଉତ୍ପୁ॒ନାତି॑ । ସ॒ଧ॒ମାଦୋ᳚ ଦ୍ୟୁ॒ମ୍ନିନୀ॒ରୂର୍ଜ॑ ଏ॒ତା ଇତି॑ ଵାରୁ॒ଣ୍ୟର୍ଚା ଗୃ॑ହ୍ଣାତି । ଵ॒ରୁ॒ଣ॒ସ॒ଵମେ॒ଵା ଵ॑ରୁନ୍ଧେ । ଏକ॑ୟା ଗୃହ୍ଣାତି । ଏ॒କ॒ଧୈଵ ୟଜ॑ମାନେ ଵୀ॒ର୍ୟ॑-ନ୍ଦଧାତି । କ୍ଷ॒ତ୍ରସ୍ୟୋଲ୍ବ॑ମସି କ୍ଷ॒ତ୍ରସ୍ୟ॒ ୟୋନି॑ର॒ସୀତି॑ ତା॒ର୍ପ୍ୟ-ଞ୍ଚୋ॒ଷ୍ଣୀଷ॑-ଞ୍ଚ॒ ପ୍ରୟ॑ଚ୍ଛତି ସୟୋନି॒ତ୍ଵାୟ॑ । ଏକ॑ଶତେନ ଦର୍ଭପୁଞ୍ଜୀ॒ଲୈଃ ପ॑ଵୟତି । ଶ॒ତାୟୁ॒ର୍ଵୈ ପୁରୁ॑ଷ-ଶ୍ଶ॒ତଵୀ᳚ର୍ୟଃ । ଆ॒ତ୍ମୈକ॑ଶ॒ତଃ ॥ 36 ॥

ୟାଵା॑ନେ॒ଵ ପୁରୁ॑ଷଃ । ତସ୍ମି॑ନ୍ ଵୀ॒ର୍ୟ॑-ନ୍ଦଧାତି । ଦଦ୍ଧ୍ୟା॑ଶୟତି । ଇ॒ନ୍ଦ୍ରି॒ୟମେ॒ଵା-ଵ॑ରୁନ୍ଧେ । ଉ॒ଦୁ॒ମ୍ବର॑-ମାଶୟତି । ଅ॒ନ୍ନାଦ୍ୟ॒ସ୍ୟାଵ॑ ରୁଦ୍ଧ୍ୟୈ । ଶଷ୍ପା᳚ଣ୍ୟାଶୟତି । ସୁରା॑ବଲି-ମେ॒ଵୈନ॑-ଙ୍କରୋତି । ଆ॒ଵିଦ॑ ଏ॒ତା ଭ॑ଵନ୍ତି । ଆ॒ଵିଦ॑ମେ॒ଵୈନ॑-ଙ୍ଗମୟନ୍ତି ॥ 37 ॥

ଅ॒ଗ୍ନିରେ॒ଵୈନ॒-ଙ୍ଗାର୍​ହ॑ପତ୍ୟେନାଵତି । ଇନ୍ଦ୍ର॑ ଇନ୍ଦ୍ରି॒ୟେଣ॑ । ପୂ॒ଷା ପ॒ଶୁଭିଃ॑ । ମି॒ତ୍ରାଵରୁ॑ଣୌ ପ୍ରାଣାପା॒ନାଭ୍ୟା᳚ମ୍ । ଇନ୍ଦ୍ରୋ॑ ଵୃ॒ତ୍ରାୟ॒ ଵଜ୍ର॒ମୁଦ॑ୟଚ୍ଛତ୍ । ସ ଦିଵ॑ମଲିଖତ୍ । ସୋ᳚-ଽର୍ୟ॒ମ୍ଣଃ ପନ୍ଥା॑ ଅଭଵତ୍ । ସ ଆଵି॑ନ୍ନେ॒ ଦ୍ୟାଵା॑ପୃଥି॒ଵୀ ଧୃ॒ତଵ୍ର॑ତେ॒ ଇତି॒ ଦ୍ୟାଵା॑ପୃଥି॒ଵୀ ଉପା॑ଧାଵତ୍ । ସ ଆ॒ଭ୍ୟାମେ॒ଵ ପ୍ରସୂ॑ତ॒ ଇନ୍ଦ୍ରୋ॑ ଵୃ॒ତ୍ରାୟ॒ ଵଜ୍ର॒-ମ୍ପ୍ରାହ॑ରତ୍ । ଆଵି॑ନ୍ନେ॒ ଦ୍ୟାଵା॑ପୃଥି॒ଵୀ ଧୃ॒ତଵ୍ର॑ତେ॒ ଇତି॒ ୟଦାହ॑ ॥ 38 ॥

ଆ॒ଭ୍ୟାମେ॒ଵ ପ୍ରସୂ॑ତୋ॒ ୟଜ॑ମାନୋ॒ ଵଜ୍ର॒-ମ୍ଭ୍ରାତୃ॑ଵ୍ୟାୟ॒ ପ୍ରହ॑ରତି । ଆଵି॑ନ୍ନା ଦେ॒ଵ୍ୟଦି॑ତି-ର୍ଵିଶ୍ଵରୂ॒ପୀତ୍ୟା॑ହ । ଇ॒ୟଂ-ଵୈଁ ଦେ॒ଵ୍ୟଦି॑ତି-ର୍ଵିଶ୍ଵରୂ॒ପୀ । ଅ॒ସ୍ୟାମେ॒ଵ ପ୍ରତି॑ ତିଷ୍ଠତି । ଆଵି॑ନ୍ନୋ॒-ଽୟମ॒ସାଵା॑ମୁଷ୍ୟାୟ॒ଣୋ᳚-ଽସ୍ୟାଂ-ଵିଁ॒ଶ୍ୟ॑ସ୍ମି-ନ୍ରା॒ଷ୍ଟ୍ର ଇତ୍ୟା॑ହ । ଵି॒ଶୈଵୈନଗ୍​ମ୍॑ ରା॒ଷ୍ଟ୍ରେଣ॒ ସମ॑ର୍ଧୟତି । ମ॒ହ॒ତେ କ୍ଷ॒ତ୍ରାୟ॑ ମହ॒ତ ଆଧି॑ପତ୍ୟାୟ ମହ॒ତେ ଜାନ॑ରାଜ୍ୟା॒ୟେତ୍ୟା॑ହ । ଆ॒ଶିଷ॑ମେ॒ଵୈତାମାଶା᳚ସ୍ତେ । ଏ॒ଷ ଵୋ॑ ଭରତା॒ ରାଜା॒ ସୋମୋ॒-ଽସ୍ମାକ॑-ମ୍ବ୍ରାହ୍ମ॒ଣାନା॒ଗ୍​ମ୍॒ ରାଜେତ୍ୟା॑ହ । ତସ୍ମା॒-ଥ୍ସୋମ॑ରାଜାନୋ ବ୍ରାହ୍ମ॒ଣାଃ ॥ 39 ॥

ଇନ୍ଦ୍ର॑ସ୍ୟ॒ ଵଜ୍ରୋ॑-ଽସି॒ ଵାର୍ତ୍ର॑ଘ୍ନ॒ ଇତି॒ ଧନୁଃ॒ ପ୍ରୟ॑ଚ୍ଛତି॒ ଵିଜି॑ତ୍ୟୈ । ଶ॒ତ୍ରୁ॒ବାଧ॑ନା॒-ସ୍ସ୍ଥେତୀଷୂନ୍॑ । ଶତ୍ରୂ॑ନେ॒ଵାସ୍ୟ॑ ବାଧନ୍ତେ । ପା॒ତ ମା᳚ ପ୍ର॒ତ୍ୟଞ୍ଚ॑-ମ୍ପା॒ତ ମା॑ ତି॒ର୍ୟଞ୍ଚ॑ମ॒ନ୍ଵଞ୍ଚ॑-ମ୍ମା ପା॒ତେତ୍ୟା॑ହ । ତି॒ସ୍ରୋ ଵୈ ଶ॑ର॒ଵ୍ୟାଃ᳚ । ପ୍ର॒ତୀଚୀ॑ ତି॒ରଶ୍ଚ୍ୟ॒ନୂଚୀ᳚ । ତାଭ୍ୟ॑ ଏ॒ଵୈନ॑-ମ୍ପାନ୍ତି । ଦି॒ଗ୍ଭ୍ୟୋ ମା॑ ପା॒ତେତ୍ୟା॑ହ । ଦି॒ଗ୍ଭ୍ୟ ଏ॒ଵୈନ॑-ମ୍ପାନ୍ତି । ଵିଶ୍ଵା᳚ଭ୍ୟୋ ମା ନା॒ଷ୍ଟ୍ରାଭ୍ୟଃ॑ ପା॒ତେତ୍ୟା॑ହ । ଅପ॑ରିମିତାଦେ॒ଵୈନ॑-ମ୍ପାନ୍ତି । ହିର॑ଣ୍ୟଵର୍ଣାଵୁ॒ଷସାଂ᳚-ଵିଁରୋ॒କ ଇତି॑ ତ୍ରି॒ଷ୍ଟୁଭା॑ ବା॒ହୂ ଉ-ଦ୍ଗୃ॑ହ୍ଣାତି । ଇ॒ନ୍ଦ୍ରି॒ୟଂ-ଵୈଁ ଵୀ॒ର୍ୟ॑-ନ୍ତ୍ରି॒ଷ୍ଟୁକ୍ । ଇ॒ନ୍ଦ୍ରି॒ୟମେ॒ଵ ଵୀ॒ର୍ୟ॑-ମୁ॒ପରି॑ଷ୍ଟାଦା॒ତ୍ମନ୍-ଧ॑ତ୍ତେ ॥ 40 ॥
(ଵ୍ୟାଵୃ॑ତ୍ତ୍ୟୈ-ଦା॒ତ୍ରମ॒ସୀତ୍ୟା॑ହା॒-ମୃତ॒ଗ୍​ମ୍॒ ହିର॑ଣ୍ୟ-ମେକଶ॒ତୋ-ଗ॑ମୟ॒ନ୍-ତ୍ୟାହ॑-ବ୍ରାହ୍ମା॒ଣା-ନା॒ଷ୍ଟ୍ରାଭ୍ୟଃ॑ ପା॒ତେତ୍ୟା॑ହ ଚ॒ତ୍ଵାରି॑ ଚ) (ଅ. 6)

ଅନୁଵାକଂ 7 - ଦିଗ୍ଵ୍ୟାସ୍ଥାପନମ୍
ଦିଶୋ॒ ଵ୍ୟାସ୍ଥା॑ପୟତି । ଦି॒ଶାମ॒ଭିଜି॑ତ୍ୟୈ । ୟଦ॑ନୁ ପ୍ର॒କ୍ରାମେ᳚ତ୍ । ଅ॒ଭି ଦିଶୋ॑ ଜୟେତ୍ । ଉତ୍ତୁ ମା᳚ଦ୍ୟେତ୍ । ମନ॒ସା-ଽନୁ॒ ପ୍ରକ୍ରା॑ମତି । ଅ॒ଭି ଦିଶୋ॑ ଜୟତି । ନୋନ୍ମା᳚ଦ୍ୟତି । ସ॒ମିଧ॒ମା ତି॒ଷ୍ଠେତ୍ୟା॑ହ । ତେଜ॑ ଏ॒ଵାଵ॑ରୁନ୍ଧେ ॥ 41 ॥

ଉ॒ଗ୍ରାମା ତି॒ଷ୍ଠେତ୍ୟା॑ହ । ଇ॒ନ୍ଦ୍ରି॒ୟମେ॒ଵାଵ॑ ରୁନ୍ଧେ । ଵି॒ରାଜ॒ମା ତି॒ଷ୍ଠେତ୍ୟା॑ହ । ଅ॒ନ୍ନାଦ୍ୟ॑ମେ॒ଵାଵ॑ ରୁନ୍ଧେ । ଉଦୀ॑ଚୀ॒ମା ତି॒ଷ୍ଠେତ୍ୟା॑ହ । ପ॒ଶୂନେ॒ଵାଵ॑ ରୁନ୍ଧେ । ଊ॒ର୍ଧ୍ଵାମା ତି॒ଷ୍ଠେତ୍ୟା॑ହ । ସୁ॒ଵ॒ର୍ଗମେ॒ଵ ଲୋ॒କ-ମ॒ଭିଜ॑ୟତି । ଅନୂଜ୍ଜି॑ହୀତେ । ସୁ॒ଵ॒ର୍ଗସ୍ୟ॑ ଲୋ॒କସ୍ୟ॒ ସମ॑ଷ୍ଟ୍ୟୈ ॥ 42 ॥

ମା॒ରୁ॒ତ ଏ॒ଷ ଭ॑ଵତି । ଅନ୍ନଂ॒-ଵୈଁ ମ॒ରୁତଃ॑ । ଅନ୍ନ॑ମେ॒ଵାଵ॑ ରୁନ୍ଧେ । ଏକ॑ଵିଗ୍​ମ୍ଶତିକପାଲୋ ଭଵତି॒ ପ୍ରତି॑ଷ୍ଠିତ୍ୟୈ । ୟୋ॑-ଽରଣ୍ୟେ ଽନୁଵା॒କ୍ୟୋ॑ ଗ॒ଣଃ । ତ-ମ୍ମ॑ଦ୍ଧ୍ୟ॒ତ ଉପ॑ଦଧାତି । ଗ୍ରା॒ମ୍ୟୈରେ॒ଵ ପ॒ଶୁଭି॑-ରାର॒ଣ୍ୟା-ନ୍ପ॒ଶୂ-ନ୍ପରି॑ଗୃହ୍ଣାତି । ତସ୍ମା᳚-ଦ୍ଗ୍ରା॒ମ୍ୟୈଃ ପ॒ଶୁଭି॑ରାର॒ଣ୍ୟାଃ ପ॒ଶଵଃ॒ ପରି॑ଗୃହୀତାଃ । ପୃଥି॑ର୍ଵୈ॒ନ୍ୟଃ । ଅ॒ଭ୍ୟ॑ଷିଚ୍ୟତ ॥ 43 ॥

ସ ରା॒ଷ୍ଟ୍ର-ନ୍ନାଭ॑ଵତ୍ । ସ ଏ॒ତାନି॑ ପା॒ର୍ଥାନ୍ୟ॑ପଶ୍ୟତ୍ । ତାନ୍ୟ॑ଜୁହୋତ୍ । ତୈର୍ଵୈ ସ ରା॒ଷ୍ଟ୍ର-ମ॑ଭଵତ୍ । ୟତ୍ପା॒ର୍ଥାନି॑ ଜୁ॒ହୋତି॑ । ରା॒ଷ୍ଟ୍ରମେ॒ଵ ଭ॑ଵତି । ବା॒ର୍॒ହ॒ସ୍ପ॒ତ୍ୟ-ମ୍ପୂର୍ଵେ॑ଷାମୁତ୍ତ॒ମ-ମ୍ଭ॑ଵତି । ଐ॒ନ୍ଦ୍ରମୁତ୍ତ॑ରେଷା-ମ୍ପ୍ରଥ॒ମମ୍ । ବ୍ରହ୍ମ॑ ଚୈ॒ଵାସ୍ମୈ᳚ କ୍ଷ॒ତ୍ର-ଞ୍ଚ॑ ସ॒ମୀଚୀ॑ ଦଧାତି । ଅଥୋ॒ ବ୍ରହ୍ମ॑ନ୍ନେ॒ଵ କ୍ଷ॒ତ୍ର-ମ୍ପ୍ରତି॑ଷ୍ଠାପୟତି ॥ 44 ॥

ଷଟ୍ପୁ॒ରସ୍ତା॑-ଦଭିଷେ॒କସ୍ୟ॑ ଜୁହୋତି । ଷଡୁ॒ପରି॑ଷ୍ଟାତ୍ । ଦ୍ଵାଦ॑ଶ॒ ସ-ମ୍ପ॑ଦ୍ୟନ୍ତେ । ଦ୍ଵାଦ॑ଶ॒ ମାସା᳚-ସ୍ସଂ​ଵଁଥ୍ସ॒ରଃ । ସଂ॒​ଵଁ॒ଥ୍ସ॒ରଃ ଖଲୁ॒ ଵୈ ଦେ॒ଵାନା॒-ମ୍ପୂଃ । ଦେ॒ଵାନା॑ମେ॒ଵ ପୁର॑-ମ୍ମଦ୍ଧ୍ୟ॒ତୋ ଵ୍ୟଵ॑ସର୍ପତି । ତସ୍ୟ॒ ନ କୁତ॑ଶ୍ଚ॒ ନୋପା᳚ଵ୍ୟା॒ଧୋ ଭ॑ଵତି । ଭୂ॒ତାନା॒-ମଵେ᳚ଷ୍ଟୀ-ର୍ଜୁହୋତି । ଅତ୍ରା᳚ତ୍ର॒ ଵୈ ମୃ॒ତ୍ୟୁ-ର୍ଜା॑ୟତେ । ୟତ୍ର॑ ୟତ୍ରୈ॒ଵ ମୃ॒ତ୍ୟୁ-ର୍ଜାୟ॑ତେ । ତତ॑ ଏ॒ଵୈନ॒ମଵ॑ୟଜତେ । ତସ୍ମା᳚-ଦ୍ରାଜ॒ସୂୟେ॑ନେଜା॒ନ-ସ୍ସର୍ଵ॒ମାୟୁ॑ରେତି । ସର୍ଵେ॒ ହ୍ୟ॑ସ୍ୟ ମୃ॒ତ୍ୟଵୋ-ଽଵେ᳚ଷ୍ଟାଃ । ତସ୍ମା᳚-ଦ୍ରାଜ॒ସୂୟେ॑ନେଜା॒ନୋ ନାଭିଚ॑ରିତ॒ଵୈ । ପ୍ର॒ତ୍ୟଗେ॑ନ-ମଭିଚା॒ର-ସ୍ସ୍ତୃ॑ଣୁତେ ॥ 45 ॥
(ରୁ॒ନ୍ଧେ॒-ସମ॑ଷ୍ଟ୍ୟା-ଅସିଚ୍ୟତ-ସ୍ଥାପୟତି॒-ଜାୟ॑ତେ॒ ପଞ୍ଚ॑ ଚ) (ଅ. 7)

ଅନୁଵାକଂ 8 - ଅଭିଷେକଃ
ସୋମ॑ସ୍ୟ॒ ତ୍ଵିଷି॑ରସି॒ ତଵେ॑ଵ ମେ॒ ତ୍ଵିଷି॑ର୍ଭୂୟା॒ଦିତି॑ ଶାର୍ଦୂଲଚ॒ର୍ମୋପ॑ସ୍ତୃଣାତି । ୟୈଵ ସୋମେ॒ ତ୍ଵିଷିଃ॑ । ୟା ଶା᳚ର୍ଦୂ॒ଲେ । ତାମେ॒ଵାଵ॑ ରୁନ୍ଧେ । ମୃ॒ତ୍ୟୋର୍ଵା ଏ॒ଷ ଵର୍ଣଃ॑ । ୟଚ୍ଛା᳚ର୍ଦୂ॒ଲଃ । ଅ॒ମୃତ॒ଗ୍​ମ୍॒ ହିର॑ଣ୍ୟମ୍ । ଅ॒ମୃତ॑ମସି ମୃ॒ତ୍ୟୋର୍ମା॑ ପା॒ହୀତି॒ ହିର॑ଣ୍ୟ॒-ମୁପା᳚ସ୍ୟତି । ଅ॒ମୃତ॑ମେ॒ଵ ମୃ॒ତ୍ୟୋର॒ନ୍ତ-ର୍ଧ॑ତ୍ତେ । ଶ॒ତମା॑ନ-ମ୍ଭଵତି ॥ 46 ॥

ଶ॒ତାୟୁଃ॒ ପୁରୁ॑ଷ-ଶ୍ଶ॒ତେନ୍ଦ୍ରି॑ୟଃ । ଆୟୁ॑ଷ୍ୟେ॒ଵେନ୍ଦ୍ରି॒ୟେ ପ୍ରତି॑ ତିଷ୍ଠତି । ଦି॒ଦ୍ୟୋନ୍ମା॑ ପା॒ହୀତ୍ୟୁ॒ପରି॑ଷ୍ଟା॒ଦଧି॒ ନିଦ॑ଧାତି । ଉ॒ଭ॒ୟତ॑ ଏ॒ଵାସ୍ମୈ॒ ଶର୍ମ॑ ଦଧାତି । ଅଵେ᳚ଷ୍ଟା ଦନ୍ଦ॒ଶୂକା॒ ଇତି॑ କ୍ଲୀ॒ବଗ୍​ମ୍ ସୀସେ॑ନ ଵିଦ୍ଧ୍ୟତି । ଦ॒ନ୍ଦ॒ଶୂକା॑-ନେ॒ଵାଵ॑ ୟଜତେ । ତସ୍ମା᳚-ତ୍କ୍ଲୀ॒ବ-ନ୍ଦ॑ନ୍ଦ॒ଶୂକା॒ ଦଗ୍​ମ୍ଶୁ॑କାଃ । ନିର॑ସ୍ତ॒-ନ୍ନମୁ॑ଚେ॒-ଶ୍ଶିର॒ ଇତି॑ ଲୋହିତାୟ॒ସ-ନ୍ନିର॑ସ୍ୟତି । ପା॒ପ୍ମାନ॑ମେ॒ଵ ନମୁ॑ଚି-ନ୍ନି॒ରଵ॑ଦୟତେ । ପ୍ରା॒ଣା ଆ॒ତ୍ମନଃ॒ ପୂର୍ଵେ॑-ଽଭି॒ଷିଚ୍ୟା॒ ଇତ୍ୟା॑ହୁଃ ॥ 47 ॥

ସୋମୋ॒ ରାଜା॒ ଵରୁ॑ଣଃ । ଦେ॒ଵା ଧ॑ର୍ମ॒ସୁଵ॑ଶ୍ଚ॒ ୟେ । ତେ ତେ॒ ଵାଚଗ୍​ମ୍॑ ସୁଵନ୍ତା॒-ନ୍ତେ ତେ᳚ ପ୍ରା॒ଣଗ୍​ମ୍ ସୁ॑ଵନ୍ତା॒ମିତ୍ୟା॑ହ । ପ୍ରା॒ଣାନେ॒ଵାତ୍ମନଃ॒ ପୂର୍ଵା॑-ନ॒ଭିଷି॑ଞ୍ଚତି । ୟ-ଦ୍ବ୍ରୂ॒ୟାତ୍ । ଅ॒ଗ୍ନେସ୍ତ୍ଵା॒ ତେଜ॑ସା॒ ଽଭିଷି॑ଞ୍ଚା॒ମୀତି॑ । ତେ॒ଜ॒ସ୍ଵ୍ୟେ॑ଵ ସ୍ୟା᳚ତ୍ । ଦୁ॒ଶ୍ଚର୍ମା॒ ତୁ ଭ॑ଵେତ୍ । ସୋମ॑ସ୍ୟ ତ୍ଵା ଦ୍ୟୁ॒ମ୍ନେନା॒-ଭିଷି॑ଞ୍ଚା॒ମୀତ୍ୟା॑ହ । ସୌ॒ମ୍ୟୋ ଵୈ ଦେ॒ଵତ॑ୟା॒ ପୁରୁ॑ଷଃ ॥ 48 ॥

ସ୍ଵୟୈ॒ଵୈନ॑-ନ୍ଦେ॒ଵତ॑ୟା॒-ଽଭିଷି॑ଞ୍ଚତି । ଅ॒ଗ୍ନେ-ସ୍ତେଜ॒ସେତ୍ୟା॑ହ । ତେଜ॑ ଏ॒ଵାସ୍ମି॑-ନ୍ଦଧାତି । ସୂର୍ୟ॑ସ୍ୟ॒ ଵର୍ଚ॒ସେତ୍ୟା॑ହ । ଵର୍ଚ॑ ଏ॒ଵାସ୍ମି॑-ନ୍ଦଧାତି । ଇନ୍ଦ୍ର॑ସ୍ୟେ-ନ୍ଦ୍ରି॒ୟେଣେତ୍ୟା॑ହ । ଇ॒ନ୍ଦ୍ରି॒ୟମେ॒ଵାସ୍ମି॑-ନ୍ଦଧାତି । ମି॒ତ୍ରାଵରୁ॑ଣୟୋ-ର୍ଵୀ॒ର୍ୟେ॑ଣେତ୍ୟା॑ହ । ଵୀ॒ର୍ୟ॑ମେ॒ଵାସ୍ମି॑-ନ୍ଦଧାତି । ମ॒ରୁତା॒ମୋଜ॒ସେତ୍ୟା॑ହ ॥ 49 ॥

ଓଜ॑ ଏ॒ଵାସ୍ମି॑-ନ୍ଦଧାତି । କ୍ଷ॒ତ୍ରାଣା᳚-ଙ୍କ୍ଷ॒ତ୍ରପ॑ତିର॒ସୀତ୍ୟା॑ହ । କ୍ଷ॒ତ୍ରାଣା॑ମେ॒ଵୈନ॑-ଙ୍କ୍ଷ॒ତ୍ରପ॑ତି-ଙ୍କରୋତି । ଅତି॑ ଦି॒ଵସ୍ପା॒ହୀତ୍ୟା॑ହ । ଅତ୍ୟ॒ନ୍ୟା-ନ୍ପା॒ହୀତି॒ ଵାଵୈତଦା॑ହ । ସ॒ମାଵ॑ଵୃତ୍ରନ୍ନ-ଧ॒ରାଗୁଦୀ॑ଚୀ॒-ରିତ୍ୟା॑ହ । ରା॒ଷ୍ଟ୍ରମେ॒ଵାସ୍ମି॑-ନ୍ଧ୍ରୁ॒ଵମ॑କଃ । ଉ॒ଚ୍ଛେଷ॑ଣେନ ଜୁହୋତି । ଉ॒ଚ୍ଛେଷ॑ଣଭାଗୋ॒ ଵୈ ରୁ॒ଦ୍ରଃ । ଭା॒ଗ॒ଧେୟେ॑ନୈ॒ଵ ରୁ॒ଦ୍ର-ନ୍ନି॒ରଵ॑ଦୟତେ ॥ 50 ॥

ଉଦ॑ମ୍ପ॒ରେତ୍ୟାଗ୍ନୀ᳚ଦ୍ଧ୍ରେ ଜୁହୋତି । ଏ॒ଷା ଵୈ ରୁ॒ଦ୍ରସ୍ୟ॒ ଦିକ୍ । ସ୍ଵାୟା॑ମେ॒ଵ ଦି॒ଶି ରୁ॒ଦ୍ର-ନ୍ନି॒ରଵ॑ଦୟତେ । ରୁଦ୍ର॒ ୟତ୍ତେ॒ କ୍ରୟୀ॒ ପର॒-ନ୍ନାମେତ୍ୟା॑ହ । ୟଦ୍ଵା ଅ॑ସ୍ୟ॒ କ୍ରୟୀ॒ ପର॒-ନ୍ନାମ॑ । ତେନ॒ ଵା ଏ॒ଷ ହି॑ନସ୍ତି । ୟଗ୍​ମ୍ ହି॒ନସ୍ତି॑ । ତେନୈ॒ଵୈନଗ୍​ମ୍॑ ସ॒ହ ଶ॑ମୟତି । ତସ୍ମୈ॑ ହୁ॒ତମ॑ସି ୟ॒ମେଷ୍ଟ॑ମ॒ସୀତ୍ୟା॑ହ । ୟ॒ମାଦେ॒ଵାସ୍ୟ॑ ମୃ॒ତ୍ୟୁମଵ॑ୟଜତେ ॥ 51 ॥

ପ୍ରଜା॑ପତେ॒ ନ ତ୍ଵଦେ॒ତାନ୍ୟ॒ନ୍ୟ ଇତି॒ ତସ୍ୟୈ॑ ଗୃ॒ହେ ଜୁ॑ହୁୟାତ୍ । ୟା-ଙ୍କା॒ମୟେ॑ତ ରା॒ଷ୍ଟ୍ରମ॑ସ୍ୟୈ ପ୍ର॒ଜା ସ୍ୟା॒ଦିତି॑ । ରା॒ଷ୍ଟ୍ରମେ॒ଵାସ୍ୟୈ᳚ ପ୍ର॒ଜା ଭ॑ଵତି । ପ॒ର୍ଣ॒-ମୟେ॑ନା-ଦ୍ଧ୍ଵ॒ର୍ୟୁ-ର॒ଭିଷି॑ଞ୍ଚତି । ବ୍ର॒ହ୍ମ॒ଵ॒ର୍ଚ॒ସମେ॒ଵାସ୍ମି॒ନ୍-ତ୍ଵିଷି॑-ନ୍ଦଧାତି । ଔଦୁ॑ମ୍ବରେଣ ରାଜ॒ନ୍ୟଃ॑ । ଊର୍ଜ॑ମେ॒ଵାସ୍ମି॑-ନ୍ନ॒ନ୍ନାଦ୍ୟ॑-ନ୍ଦଧାତି । ଆଶ୍ଵ॑ତ୍ଥେନ॒ ଵୈଶ୍ୟଃ॑ । ଵିଶ॑ମେ॒ଵାସ୍ମି॒-ନ୍ପୁଷ୍ଟି॑-ନ୍ଦଧାତି । ନୈୟ॑ଗ୍ରୋଧେନ॒ ଜନ୍ୟଃ॑( ) । ମି॒ତ୍ରାଣ୍ୟେ॒ଵାସ୍ମୈ॑ କଲ୍ପୟତି । ଅଥୋ॒ ପ୍ରତି॑ଷ୍ଠିତ୍ୟୈ ॥ 52 ॥
(ଭ॒ଵ॒ - ତ୍ୟା॒ହୁଃ॒ - ପୁରୁ॑ଷ॒ - ଓଜ॒ସେତ୍ୟା॑ହ - ନି॒ରଵ॑ଦୟତେ - ୟଜତେ॒ - ଜନ୍ୟୋ॒ ଦ୍ଵେ ଚ॑) (ଅ. 8)

ଅନୁଵାକଂ 9 - ସ୍ଥାରୋହଣମ୍. ଵିଜୟଃ
ଇନ୍ଦ୍ର॑ସ୍ୟ॒ ଵଜ୍ରୋ॑-ଽସି॒ ଵାର୍ତ୍ର॑ଘ୍ନ॒ ଇତି॒ ରଥ॑ମୁ॒ପାଵ॑ହରତି॒ ଵିଜି॑ତ୍ୟୈ । ମି॒ତ୍ରାଵରୁ॑ଣୟୋସ୍ତ୍ଵା ପ୍ରଶା॒ସ୍ତ୍ରୋଃ ପ୍ର॒ଶିଷା॑ ୟୁନ॒ଜ୍ମୀତ୍ୟା॑ହ । ବ୍ରହ୍ମ॑ଣୈ॒ଵୈନ॑-ନ୍ଦେ॒ଵତା᳚ଭ୍ୟାଂ-ୟୁଁନକ୍ତି । ପ୍ର॒ଷ୍ଟି॒ଵା॒ହିନଂ॑-ୟୁଁନକ୍ତି । ପ୍ର॒ଷ୍ଟି॒ଵା॒ହୀ ଵୈ ଦେ॑ଵର॒ଥଃ । ଦେ॒ଵ॒ର॒ଥ-ମେ॒ଵାସ୍ମୈ॑ ୟୁନକ୍ତି । ତ୍ରୟୋ-ଽଶ୍ଵା॑ ଭଵନ୍ତି । ରଥ॑ଶ୍ଚତୁ॒ର୍ଥଃ । ଦ୍ଵୌ ସ॑ଵ୍ୟେଷ୍ଠସାର॒ଥୀ । ଷଟ୍-ଥ୍ସମ୍ପ॑ଦ୍ୟନ୍ତେ ॥ 53 ॥

ଷଡ୍ଵା ଋ॒ତଵଃ॑ । ଋ॒ତୁଭି॑ରେ॒ଵୈନଂ॑-ୟୁଁନକ୍ତି । ଵି॒ଷ୍ଣୁ॒କ୍ର॒ମାନ୍-କ୍ର॑ମତେ । ଵିଷ୍ଣୁ॑ରେ॒ଵ ଭୂ॒ତ୍ଵେମାନ୍ ଁଲୋ॒କାନ॒ଭିଜ॑ୟତି । ୟଃ, କ୍ଷ॒ତ୍ରିୟଃ॒ ପ୍ରତି॑ହିତଃ । ସୋ᳚-ଽନ୍ଵାର॑ଭତେ । ରା॒ଷ୍ଟ୍ରମେ॒ଵ ଭ॑ଵତି । ତ୍ରି॒ଷ୍ଟୁଭା॒ ଽନ୍ଵାର॑ଭତେ । ଇ॒ନ୍ଦ୍ରି॒ୟଂ-ଵୈଁ ତ୍ରି॒ଷ୍ଟୁକ୍ । ଇ॒ନ୍ଦ୍ରି॒ୟମେ॒ଵ ୟଜ॑ମାନେ ଦଧାତି ॥ 54 ॥

ମ॒ରୁତା᳚-ମ୍ପ୍ରସ॒ଵେ ଜେ॑ଷ॒ମିତ୍ୟା॑ହ । ମ॒ରୁଦ୍ଭି॑ରେ॒ଵ ପ୍ରସୂ॑ତ॒ ଉଜ୍ଜ॑ୟତି । ଆ॒ପ୍ତ-ମ୍ମନ॒ ଇତ୍ୟା॑ହ । ୟଦେ॒ଵ ମନ॒ସୈଫ୍ସୀ᳚ତ୍ । ତଦା॑ପତ୍ । ରା॒ଜ॒ନ୍ୟ॑-ଞ୍ଜିନାତି । ଅନା᳚କ୍ରାନ୍ତ ଏ॒ଵାକ୍ର॑ମତେ । ଵି ଵା ଏ॒ଷ ଇ॑ନ୍ଦ୍ରି॒ୟେଣ॑ ଵୀ॒ର୍ୟେ॑ଣର୍ଧ୍ୟତେ । ୟୋ ରା॑ଜ॒ନ୍ୟ॑-ଞ୍ଜି॒ନାତି॑ । ସମ॒ହମି॑ନ୍ଦ୍ରି॒ୟେଣ॑ ଵୀ॒ର୍ୟେ॑ଣେତ୍ୟା॑ହ ॥ 55 ॥

ଇ॒ନ୍ଦ୍ରି॒ୟମେ॒ଵ ଵୀ॒ର୍ୟ॑ମା॒ତ୍ମନ୍-ଧ॑ତ୍ତେ । ପ॒ଶୂ॒ନା-ମ୍ମ॒ନ୍ୟୁର॑ସି॒ ତଵେ॑ଵ ମେ ମ॒ନ୍ୟୁର୍ଭୂ॑ୟା॒ଦିତି॒ ଵାରା॑ହୀ ଉପା॒ନହା॒ଵୁପ॑ ମୁଞ୍ଚତେ । ପ॒ଶୂ॒ନାଂ-ଵାଁ ଏ॒ଷ ମ॒ନ୍ୟୁଃ । ୟ-ଦ୍ଵ॑ରା॒ହଃ । ତେନୈ॒ଵ ପ॑ଶୂ॒ନା-ମ୍ମ॒ନ୍ୟୁମା॒ତ୍ମ-ନ୍ଧ॑ତ୍ତେ । ଅ॒ଭି ଵା ଇ॒ୟଗ୍​ମ୍ ସୁ॑ଷୁଵା॒ଣ-ଙ୍କା॑ମୟତେ । ତସ୍ୟେ᳚ଶ୍ଵ॒ରେନ୍ଦ୍ରି॒ୟଂ-ଵୀଁ॒ର୍ୟ॑ମାଦା॑ତୋଃ । ଵାରା॑ହୀ ଉପା॒ନହା॒ଵୁପ॑ମୁଞ୍ଚତେ । ଅ॒ସ୍ୟା ଏ॒ଵାନ୍ତର୍ଧ॑ତ୍ତେ । ଇ॒ନ୍ଦ୍ରି॒ୟସ୍ୟ॑ ଵୀ॒ର୍ୟ॑ସ୍ୟାନା᳚ତ୍ତ୍ୟୈ ॥ 56 ॥

ନମୋ॑ ମା॒ତ୍ରେ ପୃ॑ଥି॒ଵ୍ୟା ଇତ୍ୟା॒ହାହିଗ୍​ମ୍॑ ସାୟୈ । ଇୟ॑ଦ॒ସ୍ୟା-ୟୁ॑ର॒ସ୍ୟାୟୁ॑ର୍ମେ ଧେ॒ହୀତ୍ୟା॑ହ । ଆୟୁରେ॒ଵାତ୍ମନ୍-ଧ॑ତ୍ତେ । ଊର୍ଗ॒ସ୍ୟୂର୍ଜ॑-ମ୍ମେ ଧେ॒ହୀତ୍ୟା॑ହ । ଊର୍ଜ॑ମ॒ଵାତ୍ମ-ନ୍ଧ॑ତ୍ତେ । ୟୁଙ୍ଙ॑ସି॒ ଵର୍ଚୋ॑-ଽସି॒ ଵର୍ଚୋ॒ ମୟି॑ ଧେ॒ହୀତ୍ୟା॑ହ । ଵର୍ଚ॑ ଏ॒ଵାତ୍ମ-ନ୍ଧ॑ତ୍ତେ । ଏ॒କ॒ଧା ବ୍ର॒ହ୍ମଣ॒ ଉପ॑ ହରତି । ଏ॒କ॒ଧୈଵ ୟଜ॑ମାନ॒ ଆୟୁ॒ରୂର୍ଜଂ॒-ଵଁର୍ଚୋ॑ ଦଧାତି । ର॒ଥ॒ଵି॒ମୋ॒ଚ॒ନୀୟା॑ ଜୁହୋତି॒ ପ୍ରତି॑ଷ୍ଠିତ୍ୟୈ ॥ 57 ॥

ତ୍ରୟୋ-ଽଶ୍ଵା॑ ଭଵନ୍ତି । ରଥ॑ଶ୍ଚତୁ॒ର୍ଥଃ । ତସ୍ମା᳚-ଚ୍ଚ॒ତୁର୍ଜୁ॑ହୋତି । ୟଦୁ॒ଭୌ ସ॒ହାଵ॒ତିଷ୍ଠେ॑ତାମ୍ । ସ॒ମା॒ନଂ-ଲୋଁ॒କମି॑ୟାତାମ୍ । ସ॒ହ ସ॑ଗ୍ରଂହୀ॒ତ୍ରା ର॑ଥ॒ଵାହ॑ନେ॒ ରଥ॒ମାଦ॑ଧାତି । ସୁ॒ଵ॒ର୍ଗାଦେ॒ଵୈନଂ॑-ଲୋଁ॒କାଦ॒ନ୍ତର୍ଦ॑ଧାତି । ହ॒ଗ୍​ମ୍॒ସ-ଶ୍ଶୁ॑ଚି॒ଷଦିତ୍ୟା ଦ॑ଧାତି । ବ୍ରହ୍ମ॑ଣୈ॒ଵୈନ॑-ମୁପାଵ॒ହର॑ତି । ବ୍ରହ୍ମ॒ଣା ଽଽଦ॑ଧାତି । ଅତି॑ଚ୍ଛନ୍ଦ॒ସା ଽଽଦ॑ଧାତି । ଅତି॑ଚ୍ଛନ୍ଦା॒ ଵୈ ସର୍ଵା॑ଣି॒ ଛନ୍ଦାଗ୍​ମ୍॑ସି । ସର୍ଵେ॑ଭିରେ॒ଵୈନ॒-ଞ୍ଛନ୍ଦୋ॑ଭି॒-ରାଦ॑ଧାତି । ଵର୍​ଷ୍ମ॒ ଵା ଏ॒ଷା ଛନ୍ଦ॑ସାମ୍ । ୟଦତି॑ଚ୍ଛନ୍ଦାଃ । ୟଦତି॑ଚ୍ଛନ୍ଦସା॒ ଦଧା॑ତି । ଵର୍​ଷ୍ମୈ॒ଵୈନଗ୍​ମ୍॑ ସମା॒ନାନା᳚-ଙ୍କରୋତି ॥ 58 ॥
(ପ॒ଦ୍ୟ॒ନ୍ତେ॒ - ଦ॒ଧା॒ତି॒ - ଵୀ॒ର୍ୟେ॑ଣେତ୍ୟା॒ହା - ନା᳚ତ୍ୟୈ॒ - ପ୍ରତି॑ଷ୍ଠିତ୍ୟୈ॒ - ବ୍ରହ୍ମ॒ଣା-ଽଽଦ॑ଧାତି ସ॒ପ୍ତ ଚ॑) (ଅ. 9)

ଅନୁଵାକଂ 10 - ଆସନେ ସମୁପଵେଶ-ସ୍ସର୍ଵୈସ୍ସେଵ୍ୟତ୍ଵ-ଞ୍ଚ
ମି॒ତ୍ରୋ॑-ଽସି॒ ଵରୁ॑ଣୋ॒-ଽସୀତ୍ୟା॑ହ । ମୈ॒ତ୍ରଂ-ଵାଁ ଅହଃ॑ । ଵା॒ରୁ॒ଣୀ ରାତ୍ରିଃ॑ । ଅ॒ହୋ॒ରା॒ତ୍ରାଭ୍ୟା॑-ମେ॒ଵୈନ॑-ମୁ॒ପାଵ॑ହରତି । ମି॒ତ୍ରୋ॑-ଽସି॒ ଵରୁ॑ଣୋ॒ସୀତ୍ୟା॑ହ । ମୈ॒ତ୍ରୋ ଵୈ ଦକ୍ଷି॑ଣଃ । ଵା॒ରୁ॒ଣ-ସ୍ସ॒ଵ୍ୟଃ । ଵୈ॒ଶ୍ଵ॒ଦେ॒ଵ୍ୟା॑ମିକ୍ଷା᳚ । ସ୍ଵମେ॒ଵୈନୌ॑ ଭାଗ॒ଧେୟ॑-ମୁ॒ପାଵ॑ହରତି । ସମ॒ହଂ-ଵିଁଶ୍ଵୈ᳚ର୍ଦେ॒ଵୈ-ରିତ୍ୟା॑ହ ॥ 59 ॥

ଵୈ॒ଶ୍ଵ॒ଦେ॒ଵ୍ୟୋ॑ ଵୈ ପ୍ର॒ଜାଃ । ତା ଏ॒ଵାଦ୍ୟାଃ᳚ କୁରୁତେ । କ୍ଷ॒ତ୍ରସ୍ୟ॒ ନାଭି॑ରସି କ୍ଷ॒ତ୍ରସ୍ୟ॒ ୟୋନି॑-ର॒ସୀତ୍ୟ॑ଧୀଵା॒ସମା-ସ୍ତୃ॑ଣାତି ସୟୋନି॒ତ୍ଵାୟ॑ । ସ୍ୟୋ॒ନାମାସୀ॑ଦ ସୁ॒ଷଦା॒ମାସୀ॒ଦେତ୍ୟା॑ହ । ୟ॒ଥା॒ ୟ॒ଜୁରେ॒ଵୈ ତତ୍ । ମା ତ୍ଵା॑ ହିଗ୍​ମ୍ସୀ॒-ନ୍ମା ମା॑ ହିଗ୍​ମ୍ସୀ॒ଦିତ୍ୟା॒ହା-ହିଗ୍​ମ୍॑ସାୟୈ । ନିଷ॑ସାଦ ଧୃ॒ତଵ୍ର॑ତୋ॒ ଵରୁ॑ଣଃ ପ॒ସ୍ତ୍ୟା᳚ସ୍ଵା ସାମ୍ରା᳚ଜ୍ୟାୟ ସୁ॒କ୍ରତୁ॒ରିତ୍ୟା॑ହ । ସାମ୍ରା᳚ଜ୍ୟମେ॒ଵୈନଗ୍​ମ୍॑ ସୁ॒କ୍ରତୁ॑-ଙ୍କରୋତି । ବ୍ରହ୍ମା(3)ନ୍ତ୍ଵଗ୍​ମ୍ ରା॑ଜନ୍-ବ୍ର॒ହ୍ମା-ଽସି॑ ସଵି॒ତା-ଽସି॑ ସ॒ତ୍ୟସ॑ଵ॒ ଇତ୍ୟା॑ହ । ସ॒ଵି॒ତାର॑-ମେ॒ଵୈନଗ୍​ମ୍॑ ସ॒ତ୍ୟସ॑ଵ-ଙ୍କରୋତି ॥ 60 ॥

ବ୍ରହ୍ମା(3)ନ୍ତ୍ଵଗ୍​ମ୍ ରା॑ଜନ୍-ବ୍ର॒ହ୍ମା-ଽସୀନ୍ଦ୍ରୋ॑-ଽସି ସ॒ତ୍ୟୌଜା॒ ଇତ୍ୟା॑ହ । ଇନ୍ଦ୍ର॑ମେ॒ଵୈନଗ୍​ମ୍॑ ସ॒ତ୍ୟୌଜ॑ସ-ଙ୍କରୋତି । ବ୍ରହ୍ମା(3)ନ୍ତ୍ଵଗ୍​ମ୍ ରା॑ଜନ୍-ବ୍ର॒ହ୍ମା-ଽସି॑ ମି॒ତ୍ରୋ॑-ଽସି ସୁ॒ଶେଵ॒ ଇତ୍ୟା॑ହ । ମି॒ତ୍ରମେ॒ଵୈନଗ୍​ମ୍॑ ସୁ॒ଶେଵ॑-ଙ୍କରୋତି । ବ୍ରହ୍ମା(3)ନ୍ତ୍ଵଗ୍​ମ୍ ରା॑ଜନ୍-ବ୍ର॒ହ୍ମା-ଽସି॒ ଵରୁ॑ଣୋ-ଽସି ସ॒ତ୍ୟଧ॒ର୍ମେତ୍ୟା॑ହ । ଵରୁ॑ଣମେ॒ଵୈନଗ୍​ମ୍॑ ସ॒ତ୍ୟଧ॑ର୍ମାଣ-ଙ୍କରୋତି । ସ॒ଵି॒ତା-ଽସି॑ ସ॒ତ୍ୟସ॑ଵ॒ ଇତ୍ୟା॑ହ । ଗା॒ୟ॒ତ୍ରୀ-ମେ॒ଵୈତେନା॑ଭି॒ଵ୍ୟାହ॑ରତି । ଇନ୍ଦ୍ରୋ॑-ଽସି ସ॒ତ୍ୟୌଜା॒ ଇତ୍ୟା॑ହ । ତ୍ରି॒ଷ୍ଟୁଭ॑-ମେ॒ଵୈତେନା॑ଭି॒-ଵ୍ୟାହ॑ରତି ॥ 61 ॥

ମି॒ତ୍ରୋ॑-ଽସି ସୁ॒ଶେଵ॒ ଇତ୍ୟା॑ହ । ଜଗ॑ତୀ-ମେ॒ଵୈତେନା॑ଭି॒ଵ୍ୟାହ॑ରତି । ସ॒ତ୍ୟମେ॒ତା ଦେ॒ଵତାଃ᳚ । ସ॒ତ୍ୟମେ॒ତାନି॒ ଛନ୍ଦାଗ୍​ମ୍॑ସି । ସ॒ତ୍ୟମେ॒ଵାଵ॑ ରୁନ୍ଧେ । ଵରୁ॑ଣୋ-ଽସି ସ॒ତ୍ୟଧ॒ର୍ମେତ୍ୟା॑ହ । ଅ॒ନୁ॒ଷ୍ଟୁଭ॑-ମେ॒ଵୈତେନା॑ଭି॒ଵ୍ୟାହ॑ରତି । ସ॒ତ୍ୟା॒ନୃ॒ତେ ଵା ଅ॑ନୁ॒ଷ୍ଟୁପ୍ । ସ॒ତ୍ୟା॒ନୃ॒ତେ ଵରୁ॑ଣଃ । ସ॒ତ୍ୟା॒ନୃ॒ତେ ଏ॒ଵାଵ॑ରୁନ୍ଧେ ॥ 62 ॥

ନୈନଗ୍​ମ୍॑ ସତ୍ୟାନୃ॒ତେ ଉ॑ଦି॒ତେ ହିଗ୍ଗ୍॑ସ୍ତଃ । ୟ ଏ॒ଵଂ-ଵେଁଦ॑ । ଇନ୍ଦ୍ର॑ସ୍ୟ॒ ଵଜ୍ରୋ॑-ଽସି॒ ଵାର୍ତ୍ର॑ଘ୍ନ॒ ଇତି॒ ସ୍ଫ୍ୟ-ମ୍ପ୍ରୟ॑ଚ୍ଛତି । ଵଜ୍ରୋ॒ ଵୈ ସ୍ଫ୍ୟଃ । ଵଜ୍ରେ॑ଣୈ॒ଵାସ୍ମା॑ ଅଵରପ॒ରଗ୍​ମ୍ ର॑ନ୍ଧୟତି । ଏ॒ଵଗ୍​ମ୍ ହି ତଚ୍ଛ୍ରେୟଃ॑ । ୟଦ॑ସ୍ମା ଏ॒ତେ ରଦ୍ଧ୍ୟେ॑ୟୁଃ । ଦିଶୋ॒-ଽଭ୍ୟ॑ୟଗ୍​ମ୍ ରାଜା॑ ଽଭୂ॒ଦିତି॒ ପଞ୍ଚା॒କ୍ଷାନ୍-ପ୍ରୟ॑ଚ୍ଛତି । ଏ॒ତେ ଵୈ ସର୍ଵେ-ଽୟାଃ᳚ । ଅପ॑ରାଜାୟିନ-ମେ॒ଵୈନ॑-ଙ୍କରୋତି ॥ 63 ॥

ଓ॒ଦ॒ନମୁଦ୍ବ୍ରୁ॑ଵତେ । ପ॒ର॒ମେ॒ଷ୍ଠୀ ଵା ଏ॒ଷଃ । ୟଦୋ॑ଦ॒ନଃ । ପ॒ର॒ମାମେ॒ଵୈନ॒ଗ୍ଗ୍॒ ଶ୍ରିୟ॑-ଙ୍ଗମୟତି । ସୁଶ୍ଲୋ॒କାଁ(4) ସୁମ॑ଙ୍ଗ॒ଲାଁ(4) ସତ୍ୟ॑ରା॒ଜା(3)ନିତ୍ୟା॑ହ । ଆ॒ଶିଷ॑ମେ॒ଵୈତାମା ଶା᳚ସ୍ତେ । ଶୌ॒ନ॒-ଶ୍ଶେ॒ପମାଖ୍ୟା॑ପୟତେ । ଵ॒ରୁ॒ଣ॒ପା॒ଶା-ଦେ॒ଵୈନ॑-ମ୍ମୁଞ୍ଚତି । ପ॒ର॒-ଶ୍ଶ॒ତ-ମ୍ଭ॑ଵତି । ଶ॒ତାୟୁଃ॒ ପୁରୁ॑ଷ-ଶ୍ଶ॒ତେନ୍ଦ୍ରି॑ୟଃ( ) । ଆୟୁ॑ଷ୍ୟେ॒ଵେନ୍ଦ୍ରି॒ୟେ ପ୍ରତି॑ତିଷ୍ଠତି । ମା॒ରୁ॒ତସ୍ୟ॒ ଚୈକ॑ଵିଗ୍​ମ୍ଶତିକପାଲସ୍ୟ ଵୈଶ୍ଵଦେ॒ଵ୍ୟୈ ଚା॒ମିକ୍ଷା॑ୟା ଅ॒ଗ୍ନୟେ᳚ ସ୍ଵିଷ୍ଟ॒କୃତେ॑ ସ॒ମଵ॑ଦ୍ୟତି । ଦେ॒ଵତା॑ଭିରେ॒ଵୈନ॑-ମୁଭ॒ୟତଃ॒ ପରି॑ଗୃହ୍ଣାତି । ଅ॒ପା-ନ୍ନପ୍ତ୍ରେ॒ ସ୍ଵାହୋ॒ର୍ଜୋ ନପ୍ତ୍ରେ॒ ସ୍ଵାହା॒-ଽଗ୍ନୟେ॑ ଗୃ॒ହପ॑ତୟେ॒ ସ୍ଵାହେତି॑ ତି॒ସ୍ର ଆହୁ॑ତୀ-ର୍ଜୁହୋତି । ତ୍ରୟ॑ ଇ॒ମେ ଲୋ॒କାଃ । ଏ॒ଷ୍ଵେ॑ଵ ଲୋ॒କେଷୁ॒ ପ୍ରତି॑ ତିଷ୍ଠତି ॥ 64 ॥
(ଦେ॒ଵୈରିତ୍ୟା॑ହ - ସ॒ତ୍ୟସ॑ଵ-ଙ୍କରୋତି - ତ୍ରି॒ଷ୍ଟୁଭ॑ମେ॒ଵୈତେନା॑ଭି॒ ଵ୍ୟାହ॑ରତି- ସତ୍ୟାନୃ॒ତେ ଏ॒ଵାଵ॑ରୁନ୍ଧେ - କରୋତି - ଶ॒ତେନ୍ଦ୍ରି॑ୟ॒-ଷ୍ଷଟ୍ଚ॑) (ଅ. 10)

(ଏ॒ତ-ଦ୍ବ୍ରା᳚ହ୍ମଣାନି - ଧା॒ତ୍ରେ - ରା॒ତ୍ନିନାଂ᳚ - ଦେଵସୁ॒ଵା - ମ॒ର୍ଥେତୋ॒ - ଦେଵୀ॒--ର୍ ଦିଶଃ॒ - ସୋମ॒ସ୍ୟେ - ନ୍ଦ୍ର॑ସ୍ୟ - ମି॒ତ୍ରୋ ଦଶ॑)

(ଏ॒ତ-ଦ୍ବ୍ରା᳚ହ୍ମଣାନି - ଵୈଷ୍ଣ॒ଵ-ନ୍ତ୍ରି॑କପା॒ଲ - ମନ୍ନଂ॒-ଵୈଁ ପୂ॒ଷା - ଵାଶା॒-ସ୍ସ୍ଥେତ୍ୟା॑ହ॒ - ଦିଶୋ॒ ଵ୍ୟାସ୍ଥା॑ପୟ॒ - ତ୍ୟୁଦ॑ମ୍ପ॒ରେତ୍ୟ॒ - ବ୍ରହ୍ମା(3)ନ୍ତ୍ଵଗ୍​ମ୍ ରା॑ଜ॒-ଞ୍ଚତୁ॑ଷ୍ଷଷ୍ଟିଃ

(ଏ॒ତ-ଦ୍ବ୍ରା᳚ହ୍ମଣାନି॒ - ପ୍ରତି॑ ତିଷ୍ଠତି)

॥ ହରିଃ॑ ଓମ୍ ॥

॥ କୃଷ୍ଣ ୟଜୁର୍ଵେଦୀୟ ତୈତ୍ତିରୀୟ ବ୍ରାହ୍ମଣେ ପ୍ରଥମାଷ୍ଟକେ ସପ୍ତମଃ ପ୍ରପାଠକ-ସ୍ସମାପ୍ତଃ ॥