કૃષ્ણ યજુર્વેદીય તૈત્તિરીય બ્રાહ્મણે પ્રથમાષ્ટકે સપ્તમઃ પ્રપાઠકઃ - રાજસૂયાનુબ્રાહ્મણં

ઓ-ન્નમઃ પરમાત્મને, શ્રી મહાગણપતયે નમઃ,
શ્રી ગુરુભ્યો નમઃ । હ॒રિઃ॒ ઓમ્ ॥

અનુવાકં 1 - શુનાસીરીયેન્દ્રતુરીયપઞ્ચાવત્તીયાપામાર્ગહોમાઃ

એ॒ત-દ્બ્રા᳚હ્મણાન્યે॒વ પઞ્ચ॑ હ॒વીગ્​મ્ષિ॑ । અથેન્દ્રા॑ય॒ શુના॒સીરા॑ય પુરો॒ડાશ॒-ન્દ્વાદ॑શકપાલ॒-ન્નિર્વ॑પતિ । સં॒​વઁ॒થ્સ॒રો વા ઇન્દ્રા॒ શુના॒સીરઃ॑ । સં॒​વઁ॒થ્સ॒રેણૈ॒વાસ્મા॒ અન્ન॒મવ॑ રુન્ધે । વા॒ય॒વ્ય॑-મ્પયો॑ ભવતિ । વા॒યુર્વૈ વૃષ્ટ્યૈ᳚ પ્રદાપયિ॒તા । સ એ॒વાસ્મૈ॒ વૃષ્ટિ॒-મ્પ્રદા॑પયતિ । સૌ॒ર્ય॑ એક॑કપાલો ભવતિ । સૂર્યે॑ણ॒ વા અ॒મુષ્મિ॑ઁલ્લો॒કે વૃષ્ટિ॑ર્ધૃ॒તા । સ એ॒વાસ્મૈ॒ વૃષ્ટિ॒-ન્નિ ય॑ચ્છતિ ॥ 1 ॥

દ્વા॒દ॒શ॒ગ॒વગ્​મ્ સીર॒-ન્દક્ષિ॑ણા॒ સમૃ॑દ્ધ્યૈ । દે॒વા॒સુ॒રા-સ્સં​યઁ॑ત્તા આસન્ન્ । તે દે॒વા અ॒ગ્નિમ॑બ્રુવન્ન્ । ત્વયા॑ વી॒રેણાસુ॑રાન॒-ભિભ॑વા॒મેતિ॑ । સો᳚-ઽબ્રવીત્ । ત્રે॒ધા-ઽહમા॒ત્માનં॒-વિઁક॑રિષ્ય॒ ઇતિ॑ । સ ત્રે॒ધા ઽઽત્માનં॒-વ્યઁ॑કુરુત । અ॒ગ્નિ-ન્તૃતી॑યમ્ । રુ॒દ્ર-ન્તૃતી॑યમ્ । વરુ॑ણ॒-ન્તૃતી॑યમ્ ॥ 2 ॥

સો᳚-ઽબ્રવીત્ । ક ઇ॒દ-ન્તુ॒રીય॒મિતિ॑ । અ॒હમિતીન્દ્રો᳚-ઽબ્રવીત્ ।
સ-ન્તુ સૃ॑જાવહા॒ ઇતિ॑ । તૌ સમ॑સૃજેતામ્ । સ ઇન્દ્ર॑સ્તુ॒રીય॑-મભવત્ । યદિન્દ્ર॑-સ્તુ॒રીય॒-મભ॑વત્ । તદિ॑ન્દ્ર-તુરી॒યસ્યે᳚ન્દ્ર-તુરીય॒ત્વમ્ । તતો॒ વૈ દે॒વા વ્ય॑જયન્ત । યદિ॑ન્દ્રતુરી॒ય-ન્નિ॑રુ॒પ્યતે॒ વિજિ॑ત્યૈ ॥ 3 ॥

વ॒હિની॑ ધે॒નુ-ર્દક્ષિ॑ણા । ય-દ્વ॒હિની᳚ । તેના᳚ગ્ને॒યી ।
ય-દ્ગૌઃ । તેન॑ રૌ॒દ્રી । ય-દ્ધે॒નુઃ । તેનૈ॒ન્દ્રી । યથ્સ્ત્રી સ॒તી દા॒ન્તા । તેન॑ વારુ॒ણી સમૃ॑દ્ધ્યૈ । પ્ર॒જાપ॑તિ-ર્ય॒જ્ઞમ॑સૃજત ॥ 4 ॥

તગ્​મ્ સૃ॒ષ્ટગ્​મ્ રક્ષાગ્॑સ્યજિઘાગ્​મ્સન્ન્ । સ એ॒તાઃ પ્ર॒જાપ॑તિ-રા॒ત્મનો॑ દે॒વતા॒ નિર॑મિમીત । તાભિ॒ર્વૈ સ દિ॒ગ્ભ્યો રક્ષાગ્​મ્॑સિ॒ પ્રાણુ॑દત । ય-ત્પ॑ઞ્ચાવ॒ત્તીય॑-ઞ્જુ॒હોતિ॑ । દિ॒ગ્ભ્ય એ॒વ ત-દ્યજ॑માનો॒ રક્ષાગ્​મ્॑સિ॒ પ્રણુ॑દતે । સમૂ॑ઢ॒ગ્​મ્॒ રક્ષ॒-સ્સન્દ॑ગ્ધ॒ગ્​મ્॒ રક્ષ॒ ઇત્યા॑હ । રક્ષાગ્॑સ્યે॒વ સન્દ॑હતિ । અ॒ગ્નયે॑ રક્ષો॒ઘ્ને સ્વાહેત્યા॑હ । દે॒વતા᳚ભ્ય એ॒વ વિ॑જિગ્યા॒નાભ્યો॑ ભાગ॒ધેય॑-ઙ્કરોતિ । પ્ર॒ષ્ટિ॒વા॒હી રથો॒ દક્ષિ॑ણા॒ સમૃ॑દ્ધ્યૈ ॥ 5 ॥

ઇન્દ્રો॑ વૃ॒ત્રગ્​મ્ હ॒ત્વા । અસુ॑રા-ન્પરા॒ભાવ્ય॑ । નમુ॑ચિમાસુ॒ર-ન્નાલ॑ભત । તગ્​મ્ શ॒ચ્યા॑-ઽગૃહ્ણાત્ । તૌ સમ॑લભેતામ્ । સો᳚-ઽસ્મા-દ॒ભિશુ॑નતરો-ઽભવત્ । સો᳚-ઽબ્રવીત્ । સ॒ધાંગ્​મ્ સન્દ॑ધાવહૈ । અથ॒ ત્વા-ઽવ॑ સ્રક્ષ્યામિ । ન મા॒ શુષ્કે॑ણ॒ નાર્દ્રેણ॑ હનઃ ॥ 6 ॥

ન દિવા॒ ન નક્ત॒મિતિ॑ । સ એ॒તમ॒પા-મ્ફેન॑મસિઞ્ચત્ । ન વા એ॒ષ શુષ્કો॒ નાર્દ્રો વ્યુ॑ષ્ટા ઽઽસીત્ । અનુ॑દિત॒-સ્સૂર્યઃ॑ । ન વા એ॒ત-દ્દિવા॒ ન નક્ત᳚મ્ । તસ્યૈ॒તસ્મિ॑ન્ ઁલો॒કે । અ॒પા-મ્ફેને॑ન॒ શિર॒ ઉદ॑વર્તયત્ । તદે॑ન॒મન્વ॑વર્તત । મિત્ર॑દ્રુ॒ગિતિ॑ ॥ 7 ॥

સ એ॒તાન॑પામા॒ર્ગાન॑જનયત્ । તાન॑જુહોત્ । તૈર્વૈ સ રક્ષા॒ગ્॒સ્યપા॑હત । યદ॑પામાર્ગ હો॒મો ભવ॑તિ । રક્ષ॑સા॒-મપ॑હત્યૈ । એ॒કો॒લ્ મુ॒કેન॑ યન્તિ । તદ્ધિ રક્ષ॑સા-મ્ભાગ॒ધેય᳚મ્ । ઇ॒મા-ન્દિશં॑-યઁન્તિ । એ॒ષા વૈ રક્ષ॑સા॒-ન્દિક્ । સ્વાયા॑મે॒વ દિ॒શિ રક્ષાગ્​મ્॑સિ હન્તિ ॥ 8 ॥

સ્વકૃ॑ત॒ ઇરિ॑ણે જુહોતિ પ્રદ॒રે વા᳚ । એ॒ત-દ્વૈ રક્ષ॑સામા॒યત॑નમ્ । સ્વ એ॒વાયત॑ને॒ રક્ષાગ્​મ્॑સિ હન્તિ । પ॒ર્ણ॒મયે॑ન સ્રુ॒વેણ॑ જુહોતિ । બ્રહ્મ॒ વૈ પ॒ર્ણઃ । બ્રહ્મ॑ણૈ॒વ રક્ષાગ્​મ્॑સિ હન્તિ । દે॒વસ્ય॑ ત્વા સવિ॒તુઃ પ્ર॑સ॒વ ઇત્યા॑હ । સ॒વિ॒તૃપ્ર॑સૂત એ॒વ રક્ષાગ્​મ્॑સિ હન્તિ । હ॒તગ્​મ્ રક્ષો ઽવ॑ધિષ્મ॒ રક્ષ॒ ઇત્યા॑હ । રક્ષ॑સા॒ગ્॒ સ્તૃત્યૈ᳚ । યદ્વસ્તે॒ ત-દ્દક્ષિ॑ણા નિ॒રવ॑ત્ત્યૈ । અપ્ર॑તીક્ષ॒મા ય॑ન્તિ । રક્ષ॑સા-મ॒ન્તર્​હિ॑ત્યૈ ॥ 9 ॥
(ય॒ચ્છ॒તિ॒ - વરુ॑ણ॒-ન્તૃતી॑યં॒ - ઁવિજિ॑ત્યા - અસૃજત॒ - સમૃ॑દ્ધ્યૈ - હનો॒ - મિત્ર॑દ્રુ॒ગિતિ॑ - હન્તિ॒ - સ્તૃત્યૈ॒ ત્રીણિ॑ ચ) (અ. 1)

અનુવાકં 2 - દેવિકાવહવીંષિ
ધા॒ત્રે પુ॑રો॒ડાશ॒-ન્દ્વાદ॑શકપાલ॒-ન્નિર્વ॑પતિ । સં॒​વઁ॒થ્સ॒રો વૈ ધા॒તા । સં॒​વઁ॒થ્સ॒રેણૈ॒વાસ્મૈ᳚ પ્ર॒જાઃ પ્રજ॑નયતિ । અન્વે॒વાસ્મા॒ અનુ॑મતિર્મન્યતે । રા॒તે રા॒કા । પ્ર સિ॑નીવા॒લી જ॑નયતિ । પ્ર॒જાસ્વે॒વ પ્રજા॑તાસુ કુ॒હ્વા॑ વાચ॑-ન્દધાતિ । મિ॒થુ॒નૌ ગાવૌ॒ દક્ષિ॑ણા॒ સમૃ॑દ્ધ્યૈ । આ॒ગ્ના॒વૈ॒ષ્ણ॒વ-મેકા॑દશકપાલ॒-ન્નિર્વ॑પતિ । ઐ॒ન્દ્રા॒વૈ॒ષ્ણ॒વ-મેકા॑દશકપાલમ્ ॥ 10 ॥

વૈ॒ષ્ણ॒વ-ન્ત્રિ॑કપા॒લમ્ । વી॒ર્યં॑-વાઁ અ॒ગ્નિઃ । વી॒ર્ય॑મિન્દ્રઃ॑ । વી॒ર્યં॑-વિઁષ્ણુઃ॑ । પ્ર॒જા એ॒વ પ્રજા॑તા વી॒ર્યે᳚ પ્રતિ॑ષ્ઠાપયતિ । તસ્મા᳚-ત્પ્ર॒જા વી॒ર્યા॑વતીઃ । વા॒મ॒ન ઋ॑ષ॒ભો વ॒હી દક્ષિ॑ણા । યદ્વ॒હી । તેના᳚ગ્ને॒યઃ । યદૃ॑ષ॒ભઃ ॥ 11 ॥

તેનૈ॒ન્દ્રઃ । યદ્વા॑મ॒નઃ । તેન॑ વૈષ્ણ॒વ-સ્સમૃ॑દ્ધ્યૈ । અ॒ગ્ની॒ષો॒મીય॒-મેકા॑દશકપાલ॒-ન્નિર્વ॑પતિ । ઇ॒ન્દ્રા॒સો॒મીય॒-મેકા॑દશકપાલમ્ । સૌ॒મ્ય-ઞ્ચ॒રુમ્ । સોમો॒ વૈ રે॑તો॒ધાઃ । અ॒ગ્નિઃ પ્ર॒જાના᳚-મ્પ્રજનયિ॒તા । વૃ॒દ્ધાના॒મિન્દ્રઃ॑ પ્રદાપયિ॒તા । સોમ॑ એ॒વાસ્મૈ॒ રેતો॒ દધા॑તિ ॥ 12 ॥

અ॒ગ્નિઃ પ્ર॒જા-મ્પ્રજ॑નયતિ । વૃ॒દ્ધામિન્દ્રઃ॒ પ્રય॑ચ્છતિ । બ॒ભ્રુ-ર્દક્ષિ॑ણા॒ સમૃ॑દ્ધ્યૈ । સો॒મા॒પૌ॒ષ્ણ-ઞ્ચ॒રુ-ન્નિર્વ॑પતિ । ઐ॒ન્દ્રા॒પૌ॒ષ્ણ-ઞ્ચ॒રુમ્ । સોમો॒ વૈ રે॑તો॒ધાઃ । પૂ॒ષા પ॑શૂ॒ના-મ્પ્ર॑જનયિ॒તા । વૃ॒દ્ધાના॒મિન્દ્રઃ॑ પ્રદાપયિ॒તા । સોમ॑ એ॒વાસ્મૈ॒ રેતો॒ દધા॑તિ । પૂ॒ષા પ॒શૂ-ન્પ્રજ॑નયતિ ॥ 13 ॥

વૃ॒દ્ધાનિન્દ્રઃ॒ પ્રય॑ચ્છતિ । પૌ॒ષ્ણશ્ચ॒રુ-ર્ભ॑વતિ । ઇ॒યં-વૈઁ પૂ॒ષા । અ॒સ્યામે॒વ પ્રતિ॑ તિષ્ઠતિ । શ્યા॒મો દક્ષિ॑ણા॒ સમૃ॑દ્ધ્યૈ । બ॒હુ વૈ પુરુ॑ષો-ઽમે॒દ્ધ્ય-મુપ॑ગચ્છતિ । વૈ॒શ્વા॒ન॒ર-ન્દ્વાદ॑શકપાલ॒-ન્નિર્વ॑પતિ । સં॒​વઁ॒થ્સ॒રો વા અ॒ગ્નિ-ર્વૈ᳚શ્વાન॒રઃ । સં॒​વઁ॒થ્સ॒રેણૈ॒વૈનગ્ગ્॑ સ્વદયતિ । હિર॑ણ્ય॒-ન્દક્ષિ॑ણા ॥ 14 ॥

પ॒વિત્રં॒-વૈઁ હિર॑ણ્યમ્ । પુ॒નાત્યે॒વૈન᳚મ્ । બ॒હુ વૈ રા॑જ॒ન્યો ઽનૃ॑ત-ઙ્કરોતિ । ઉપ॑ જા॒મ્યૈ હર॑તે । જિ॒નાતિ॑ બ્રાહ્મ॒ણમ્ । વદ॒ત્યનૃ॑તમ્ । અનૃ॑તે॒ ખલુ॒ વૈ ક્રિ॒યમા॑ણે॒ વરુ॑ણો ગૃહ્ણાતિ । વા॒રુ॒ણં-યઁ॑વ॒મય॑-ઞ્ચ॒રુ-ન્નિર્વ॑પતિ । વ॒રુ॒ણ॒પા॒શાદે॒વૈન॑-મ્મુઞ્ચતિ । અશ્વો॒ દક્ષિ॑ણા । વા॒રુ॒ણો હિ દે॒વત॒યા-ઽશ્વ॒-સ્સમૃ॑દ્ધ્યૈ ॥ 15 ॥
(ઐ॒ન્દ્રા॒વૈ॒ષ્ણા॒વમેકા॑દશકપાલં॒-ઁયદૃ॑ષ॒ભો- દધા॑તિ-પૂ॒ષા પ॒શૂ-ન્પ્રજ॑નયતિ॒-હિર॑ણ્યં॒ દક્ષિ॑ણા॒-દક્ષિ॒ણૈકં॑ ચ) (અ. 2)

અનુવાકં 3 - રત્નિનાં હવીંષિ
ર॒ત્નિના॑મે॒તાનિ॑ હ॒વીગ્​મ્ષિ॑ ભવન્તિ । એ॒તે વૈ રા॒ષ્ટ્રસ્ય॑ પ્રદા॒તારઃ॑ । એ॒તે॑-ઽપાદા॒તારઃ॑ । ય એ॒વ રા॒ષ્ટ્રસ્ય॑ પ્રદા॒તારઃ॑ । યે॑-ઽપાદા॒તારઃ॑ । ત એ॒વાસ્મૈ॑ રા॒ષ્ટ્ર-મ્પ્રય॑ચ્છન્તિ । રા॒ષ્ટ્રમે॒વ ભ॑વતિ । ય-થ્સ॑મા॒હૃત્ય॑ નિ॒ર્વપે᳚ત્ । અર॑ત્નિન-સ્સ્યુઃ । ય॒થા॒ય॒થ-ન્નિર્વ॑પતિ રત્નિ॒ત્વાય॑ ॥ 16 ॥

ય-થ્સ॒દ્યો નિ॒ર્વપે᳚ત્ । યાવ॑તી॒મેકે॑ન હ॒વિષા॒-ઽઽશિષ॑મવ રુ॒ન્ધે । તાવ॑તી॒મવ॑ રુન્ધીત । અ॒ન્વ॒હ-ન્નિર્વ॑પતિ । ભૂય॑સીમે॒વાશિષ॒મવ॑ રુન્ધે । ભૂય॑સો યજ્ઞક્ર॒તૂનુપૈ॑તિ । બા॒ર્॒હ॒સ્પ॒ત્ય-ઞ્ચ॒રુ-ન્નિર્વ॑પતિ બ્ર॒હ્મણો॑ ગૃ॒હે । મુ॒ખ॒ત એ॒વાસ્મૈ॒ બ્રહ્મ॒ સગ્ગ્​શ્ય॑તિ । અથો॒ બ્રહ્મ॑ન્ને॒વ ક્ષ॒ત્ર-મ॒ન્વાર॑મ્ભયતિ । શિ॒તિ॒પૃ॒ષ્ઠો દક્ષિ॑ણા॒ સમૃ॑દ્ધ્યૈ ॥ 17 ॥

ઐ॒ન્દ્ર-મેકા॑દશકપાલગ્​મ્ રાજ॒ન્ય॑સ્ય ગૃ॒હે । ઇ॒ન્દ્રિ॒યમે॒વાવ॑ રુન્ધે । ઋ॒ષ॒ભો દક્ષિ॑ણા॒ સમૃ॑દ્ધ્યૈ । આ॒દિ॒ત્ય-ઞ્ચ॒રુ-મ્મહિ॑ષ્યૈ ગૃ॒હે । ઇ॒યં-વાઁ અદિ॑તિઃ । અ॒સ્યામે॒વ પ્રતિ॑તિષ્ઠતિ । ધે॒નુ-ર્દક્ષિ॑ણા॒ સમૃ॑દ્ધ્યૈ । ભગા॑ય ચ॒રું-વાઁ॒વાતા॑યૈ ગૃ॒હે । ભગ॑મે॒વાસ્મિ॑-ન્દધાતિ । વિચિ॑ત્તગર્ભા પષ્ઠૌ॒હી દક્ષિ॑ણા॒ સમૃ॑દ્ધ્યૈ ॥ 18 ॥

નૈ॒ર્॒ઋ॒ત-ઞ્ચ॒રુ-મ્પ॑રિવૃ॒ક્ત્યૈ॑ ગૃ॒હે કૃ॒ષ્ણાનાં᳚-વ્રીઁહી॒ણા-ન્ન॒ખનિ॑ર્ભિન્નમ્ । પા॒પ્માન॑મે॒વ નિર્-ઋ॑તિ-ન્નિ॒રવ॑દયતે । કૃ॒ષ્ણા કૂ॒ટા દક્ષિ॑ણા॒ સમૃ॑દ્ધ્યૈ । આ॒ગ્ને॒ય-મ॒ષ્ટાક॑પાલગ્​મ્ સેના॒ન્યો॑ ગૃ॒હે । સેના॑મે॒વાસ્ય॒ સગ્ગ્​શ્ય॑તિ । હિર॑ણ્ય॒-ન્દક્ષિ॑ણા॒ સમૃ॑દ્ધ્યૈ । વા॒રુ॒ણ-ન્દશ॑કપાલગ્​મ્ સૂ॒તસ્ય॑ ગૃ॒હે । વ॒રુ॒ણ॒સ॒વમે॒વાવ॑-રુન્ધે । મ॒હાનિ॑રષ્ટો॒ દક્ષિ॑ણા॒ સમૃ॑દ્ધ્યૈ । મા॒રુ॒તગ્​મ્ સ॒પ્તક॑પાલ-ઙ્ગ્રામ॒ણ્યો॑ ગૃ॒હે ॥ 19 ॥

અન્નં॒-વૈઁ મ॒રુતઃ॑ । અન્ન॑મે॒વાવ॑-રુન્ધે । પૃશ્ઞિ॒-ર્દક્ષિ॑ણા॒ સમૃ॑દ્ધ્યૈ । સા॒વિ॒ત્ર-ન્દ્વાદ॑શકપાલ-ઙ્ક્ષ॒ત્તુર્ગૃ॒હે પ્રસૂ᳚ત્યૈ । ઉ॒પ॒દ્ધ્વ॒સ્તો દક્ષિ॑ણા॒ સમૃ॑દ્ધ્યૈ । આ॒શ્વિ॒ન-ન્દ્વિ॑કપા॒લગ્​મ્ સ॑ગ્રંહી॒તુર્ગૃ॒હે । અ॒શ્વિનૌ॒ વૈ દે॒વાના᳚-મ્ભિ॒ષજૌ᳚ । તાભ્યા॑મે॒વાસ્મૈ॑ ભેષ॒જ-ઙ્ક॑રોતિ । સ॒વા॒ત્યૌ॑ દક્ષિ॑ણા॒ સમૃ॑દ્ધ્યૈ । પૌ॒ષ્ણ-ઞ્ચ॒રુ-મ્ભા॑ગદુ॒ઘસ્ય॑ ગૃ॒હે ॥ 20 ॥

અન્નં॒-વૈઁ પૂ॒ષા । અન્ન॑મે॒વાવ॑ રુન્ધે । શ્યા॒મો દક્ષિ॑ણા॒ સમૃ॑દ્ધ્યૈ । રૌ॒દ્ર-ઙ્ગા॑વીધુ॒ક-ઞ્ચ॒રુમ॑ક્ષાવા॒પસ્ય॑ ગૃ॒હે । અ॒ન્ત॒ત એ॒વ રુ॒દ્ર-ન્નિ॒રવ॑દયતે । શ॒બલ॒ ઉદ્વા॑રો॒ દક્ષિ॑ણા॒ સમૃ॑દ્ધ્યૈ । દ્વાદ॑શૈ॒તાનિ॑ હ॒વીગ્​મ્ષિ॑ ભવન્તિ । દ્વાદ॑શ॒ માસા᳚-સ્સં​વઁથ્સ॒રઃ । સં॒​વઁ॒થ્સ॒રેણૈ॒વાસ્મૈ॑ રા॒ષ્ટ્રમવ॑-રુન્ધે । રા॒ષ્ટ્રમે॒વ ભ॑વતિ ॥ 21 ॥

યન્ન પ્ર॑તિ નિ॒ર્વપે᳚ત્ । ર॒ત્નિન॑ આ॒શિષો-ઽવ॑રુન્ધીરન્ન્ । પ્રતિ॒ નિર્વ॑પતિ । ઇન્દ્રા॑ય સુ॒ત્રામ્ણે॑ પુરો॒ડાશ॒-મેકા॑દશકપાલમ્ । ઇન્દ્રા॑યાગ્​મ્હો॒મુચે᳚ । આ॒શિષ॑ એ॒વાવ॑રુન્ધે । અ॒ય-ન્નો॒ રાજા॑ વૃત્ર॒હા રાજા॑ ભૂ॒ત્વા વૃ॒ત્રં-વઁ॑દ્ધ્યા॒દિત્યા॑હ । આ॒શિષ॑મે॒વૈતામાશા᳚સ્તે । મૈ॒ત્રા॒-બા॒ર્॒હ॒સ્પ॒ત્ય-મ્ભ॑વતિ । શ્વે॒તાયૈ᳚ શ્વે॒તવ॑થ્સાયૈ દુ॒ગ્ધે ॥ 22 ॥

બા॒ર્॒હ॒સ્પ॒ત્યે મૈ॒ત્રમપિ॑ દધાતિ । બ્રહ્મ॑ ચૈ॒વાસ્મૈ᳚ ક્ષ॒ત્ર-ઞ્ચ॑ સ॒મીચી॑ દધાતિ । અથો॒ બ્રહ્મ॑ન્ને॒વ ક્ષ॒ત્ર-મ્પ્રતિ॑ષ્ઠાપયતિ । બા॒ર્॒હ॒સ્પ॒ત્યેન॒ પૂર્વે॑ણ॒ પ્રચ॑રતિ । મુ॒ખ॒ત એ॒વાસ્મૈ॒ બ્રહ્મ॒ સગ્ગ્​શ્ય॑તિ । અથો॒ બ્રહ્મ॑ન્ને॒વ ક્ષ॒ત્ર-મ॒ન્વાર॑મ્ભયતિ । સ્વ॒ય॒-ઙ્કૃ॒તા વેદિ॑ર્ભવતિ । સ્વ॒ય॒દિ॒ન્ન-મ્બ॒ર્॒હિઃ । સ્વ॒ય॒કૃ॒ન્ત ઇ॒દ્ધ્મઃ । અન॑ભિજિતસ્યા॒-ભિજિ॑ત્યૈ । તસ્મા॒-દ્રાજ્ઞા॒મર॑ણ્ય-મ॒ભિજિ॑તમ્ । સૈવ શ્વે॒તા શ્વે॒તવ॑થ્સા॒ દક્ષિ॑ણા॒ સમૃ॑દ્ધ્યૈ ॥ 23 ॥
(ર॒ત્નિ॒ત્વાય॒ - સમૃ॑દ્ધ્યૈ - પષ્ઠૌ॒હિ દક્ષિ॑ણા॒ સમૃ॑દ્ધ્યૈ - ગ્રામ॒ણ્યો॑ ગૃ॒હે - ભા॑ગદુ॒ઘસ્ય॑ ગૃ॒હે-ભ॑વતિ - દુ॒ગ્ધે॑ - ઽભિજિ॑ત્યૈ॒ દ્વે ચ॑) (અ. 3)

અનુવાકં 4 - દેવસુવાં હવીંષિ
દે॒વ॒સુ॒વામે॒તાનિ॑ હ॒વીગ્​મ્ષિ॑ ભવન્તિ । એ॒તાવ॑ન્તો॒ વૈ દે॒વાનાગ્​મ્॑ સ॒વાઃ । ત એ॒વાસ્મૈ॑ સ॒વા-ન્પ્રય॑ચ્છન્તિ । ત એ॑નગ્​મ્ સુવન્તે । અ॒ગ્નિરે॒વૈન॑-ઙ્ગૃ॒હપ॑તીનાગ્​મ્ સુવતે । સોમો॒ વન॒સ્પતી॑નામ્ । રુ॒દ્રઃ પ॑શૂ॒નામ્ । બૃહ॒સ્પતિ॑-ર્વા॒ચામ્ । ઇન્દ્રો᳚ જ્યે॒ષ્ઠાના᳚મ્ । મિ॒ત્ર-સ્સ॒ત્યાના᳚મ્ ॥ 24 ॥

વરુ॑ણો॒ ધર્મ॑પતીનામ્ । એ॒તદે॒વ સર્વ॑-મ્ભવતિ । સ॒વિ॒તા ત્વા᳚ પ્રસ॒વાનાગ્​મ્॑ સુવતા॒મિતિ॒ હસ્ત॑-ઙ્ગૃહ્ણાતિ॒ પ્રસૂ᳚ત્યૈ । યે દે॑વા દેવ॒સુવ॒-સ્સ્થેત્યા॑હ । ય॒થા॒ ય॒જુરે॒વૈ તત્ । મ॒હ॒તે ક્ષ॒ત્રાય॑ મહ॒ત આધિ॑પત્યાય મહ॒તે જાન॑રાજ્યા॒યેત્યા॑હ । આ॒શિષ॑મે॒વૈતામાશા᳚સ્તે । એ॒ષ વો॑ ભરતા॒ રાજા॒ સોમો॒-ઽસ્માક॑-મ્બ્રાહ્મ॒ણાના॒ગ્​મ્॒ રાજેત્યા॑હ । તસ્મા॒-થ્સોમ॑રાજાનો બ્રાહ્મ॒ણાઃ । પ્રતિ॒ ત્યન્નામ॑ રા॒જ્યમ॑ધા॒યીત્યા॑હ ॥ 25 ॥

રા॒જ્યમે॒વાસ્મિ॒-ન્પ્રતિ॑ દધાતિ । સ્વા-ન્ત॒નુવં॒-વઁરુ॑ણો અશિશ્રે॒દિત્યા॑હ । વ॒રુ॒ણ॒સ॒વમે॒વા-વ॑રુન્ધે । શુચે᳚ર્મિ॒ત્રસ્ય॒ વ્રત્યા॑ અભૂ॒મેત્યા॑હ । શુચિ॑મે॒વૈનં॒-વ્રઁત્ય॑-ઙ્કરોતિ । અમ॑ન્મહિ મહ॒ત ઋ॒તસ્ય॒ નામેત્યા॑હ । મ॒નુ॒ત એ॒વૈન᳚મ્ । સર્વે॒ વ્રાતા॒ વરુ॑ણસ્યા ભૂવ॒ન્નિત્યા॑હ । સર્વ॑વ્રાતમે॒વૈન॑-ઙ્કરોતિ । વિ મિ॒ત્ર એવૈ॒રરા॑તિ-મતારી॒દિત્યા॑હ ॥ 26 ॥

અરા॑તિમે॒વૈન॑-ન્તારયતિ । અસૂ॑ષુદન્ત ય॒જ્ઞિયા॑ ઋ॒તેનેત્યા॑હ । સ્વ॒દય॑ત્યે॒વૈન᳚મ્ । વ્યુ॑ ત્રિ॒તો જ॑રિ॒માણ॑-ન્ન આન॒ડિત્યા॑હ । આયુ॑રે॒વાસ્મિ॑-ન્દધાતિ । દ્વાભ્યાં॒-વિઁમૃ॑ષ્ટે । દ્વિ॒પા-દ્યજ॑માનઃ॒ પ્રતિ॑ષ્ઠિત્યૈ । અ॒ગ્ની॒ષો॒મીય॑સ્ય॒ ચૈકા॑દશકપાલસ્ય દેવસુ॒વા-ઞ્ચ॑ હ॒વિષા॑મ॒ગ્નયે᳚ સ્વિષ્ટ॒કૃતે॑ સ॒મવ॑દ્યતિ । દે॒વતા॑ભિરે॒વૈન॑-મુભ॒યતઃ॒ પરિ॑ગૃહ્ણાતિ । વિ॒ષ્ણુ॒ક્ર॒માન્ ક્ર॑મતે( ) । વિષ્ણુ॑રે॒વ ભૂ॒ત્વેમાઁલ્લો॒કા-ન॒ભિજ॑યતિ ॥ 27 ॥
(સ॒ત્યાના॑-મધા॒યીત્યા॑-હાતારી॒દિત્યા॑હ-ક્રમત॒ એક॑-ઞ્ચ) (અ. 4)

અનુવાકં 5 - અભિષેકાર્થમપાઙ્ગ્રહગ્રહણમ્
અ॒ર્થેત॒-સ્સ્થેતિ॑ જુહોતિ । આહુ॑ત્યૈ॒વૈના॑ નિ॒ષ્ક્રીય॑ ગૃહ્ણાતિ । અથો॑ હ॒વિષ્કૃ॑તાનામે॒વાભિઘૃ॑તાના-ઙ્ગૃહ્ણાતિ । વહ॑ન્તીના-ઙ્ગૃહ્ણાતિ । એ॒તા વા અ॒પાગ્​મ્ રા॒ષ્ટ્રમ્ । રા॒ષ્ટ્રમે॒વાસ્મૈ॑ ગૃહ્ણાતિ । અથો॒ શ્રિય॑મે॒વૈન॑મ॒ભિ વ॑હન્તિ । અ॒પા-મ્પતિ॑ર॒સીત્યા॑હ । મિ॒થુ॒નમે॒વાકઃ॑ । વૃષા᳚-ઽસ્યૂ॒ર્મિરિત્યા॑હ ॥ 28 ॥

ઊ॒ર્મિ॒મન્ત॑મે॒વૈન॑-ઙ્કરોતિ । વૃ॒ષ॒સે॒નો॑-ઽસીત્યા॑હ । સેના॑મે॒વાસ્ય॒ સગ્ગ્​શ્ય॑તિ । વ્ર॒જ॒ક્ષિત॒-સ્સ્થેત્યા॑હ । એ॒તા વા અ॒પાં-વિઁશઃ॑ । વિશ॑મે॒વાસ્મૈ॒ પર્યૂ॑હતિ । મ॒રુતા॒મોજ॒-સ્સ્થેત્યા॑હ । અન્નં॒-વૈઁ મ॒રુતઃ॑ । અન્ન॑મે॒વા વ॑રુન્ધે । સૂર્ય॑વર્ચસ॒-સ્સ્થેત્યા॑હ ॥ 29 ॥

રા॒ષ્ટ્રમે॒વ વ॑ર્ચ॒સ્વ્ય॑કઃ । સૂર્ય॑ત્વચસ॒-સ્સ્થેત્યા॑હ । સ॒ત્યં-વાઁ એ॒તત્ । ય-દ્વર્​ષ॑તિ । અનૃ॑તં॒-યઁદા॒તપ॑તિ॒ વર્​ષ॑તિ । સ॒ત્યા॒નૃ॒તે એ॒વાવ॑રુન્ધે । નૈનગ્​મ્॑ સત્યાનૃ॒તે ઉ॑દિ॒તે હિગ્ગ્॑સ્તઃ । ય એ॒વં-વેઁદ॑ । માન્દા॒-સ્સ્થેત્યા॑હ । રા॒ષ્ટ્રમે॒વ બ્ર॑હ્મવર્ચ॒સ્ય॑કઃ ॥ 30 ॥

વાશા॒-સ્સ્થેત્યા॑હ । રા॒ષ્ટ્રમે॒વ વ॒શ્ય॑કઃ । શક્વ॑રી॒-સ્સ્થેત્યા॑હ । પ॒શવો॒ વૈ શક્વ॑રીઃ । પ॒શૂને॒વાવ॑ રુન્ધે । વિ॒શ્વ॒ભૃત॒-સ્સ્થેત્યા॑હ । રા॒ષ્ટ્રમે॒વ પ॑ય॒સ્વ્ય॑કઃ । જ॒ન॒ભૃત॒-સ્સ્થેત્યા॑હ । રા॒ષ્ટ્રમે॒વેન્દ્રિ॑યા॒વ્ય॑કઃ । અ॒ગ્નેસ્તે॑જ॒સ્યા᳚-સ્સ્થેત્યા॑હ ॥ 31 ॥

રા॒ષ્ટ્રમે॒વ તે॑જ॒સ્વ્ય॑કઃ । અ॒પામોષ॑ધીના॒ગ્​મ્॒ રસ॒-સ્સ્થેત્યા॑હ । રા॒ષ્ટ્રમે॒વ મ॑ધ॒વ્ય॑મકઃ । સા॒ર॒સ્વ॒ત-ઙ્ગ્રહ॑-ઙ્ગૃહ્ણાતિ । એ॒ષા વા અ॒પા-મ્પૃ॒ષ્ઠમ્ । યથ્સર॑સ્વતી । પૃ॒ષ્ઠમે॒વૈનગ્​મ્॑ સમા॒નાના᳚-ઙ્કરોતિ । ષો॒ડ॒શભિ॑-ર્ગૃહ્ણાતિ । ષોડ॑શકલો॒ વૈ પુરુ॑ષઃ । યાવા॑ને॒વ પુરુ॑ષઃ । તસ્મિ॑ન્ વી॒ર્ય॑-ન્દધાતિ । ષો॒ડ॒શભિ॑-ર્જુ॒હોતિ॑ ષોડ॒શભિ॑-ર્ગૃહ્ણાતિ । દ્વાત્રિગ્​મ્॑શ॒-થ્સમ્પ॑દ્યન્તે । દ્વાત્રિગ્​મ્॑શદક્ષરા ઽનુ॒ષ્ટુક્ । વાગ॑નુ॒ષ્ટુ-ફ્સર્વા॑ણિ॒ છન્દાગ્​મ્॑સિ । વા॒ચૈવૈન॒ગ્​મ્॒ સર્વે॑ભિ॒-શ્છન્દો॑ભિ-ર॒ભિષિ॑ઞ્ચતિ ॥ 32 ॥
(ઊ॒ર્મિરિત્યા॑હ॒ - સૂર્ય॑વર્ચસ॒-સ્સ્થેત્યા॑હ - બ્રહ્મવર્ચ॒સ્ય॑ક - સ્તેજ॒સ્યા᳚-સ્સ્થેત્યા॑હૈ॒વ - પુરુ॑ષ॒-ષ્ષટ્ચ॑) (અ. 5)

અનુવાકં 6 - અભિષેકાર્થજલસંસ્કારઃ
દેવી॑રાપ॒-સ્સ-મ્મધુ॑મતી॒-ર્મધુ॑મતીભિ-સ્સૃજ્યદ્ધ્વ॒મિત્યા॑હ । બ્રહ્મ॑ણૈ॒વૈના॒-સ્સગ્​મ્ સૃ॑જતિ । અના॑ધૃષ્ટા-સ્સીદ॒તેત્યા॑હ । બ્રહ્મ॑ણૈ॒વૈના᳚-સ્સાદયતિ । અ॒ન્ત॒રા હોતુ॑શ્ચ॒ ધિષ્ણિ॑ય-મ્બ્રાહ્મણાચ્છ॒ગ્​મ્॒ સિન॑શ્ચ સાદયતિ । આ॒ગ્ને॒યો વૈ હોતા᳚ । ઐ॒ન્દ્રો બ્રા᳚હ્મણાચ્છ॒ગ્​મ્॒સી । તેજ॑સા ચૈ॒વેન્દ્રિ॒યેણ॑ ચોભ॒યતો॑ રા॒ષ્ટ્ર-મ્પરિ॑ગૃહ્ણાતિ । હિર॑ણ્યે॒નો-ત્પુ॑નાતિ । આહુ॑ત્યૈ॒ હિ પ॒વિત્રા᳚ભ્યામુત્પુ॒નન્તિ॒ વ્યાવૃ॑ત્ત્યૈ ॥ 33 ॥

શ॒તમા॑ન-મ્ભવતિ । શ॒તાયુઃ॒ પુરુ॑ષ-શ્શ॒તેન્દ્રિ॑યઃ । આયુ॑ષ્યે॒વેન્દ્રિ॒યે પ્રતિ॑તિષ્ઠતિ । અનિ॑ભૃષ્ટમ॒સીત્યા॑હ । અનિ॑ભૃષ્ટ॒ગ્ગ્॒ હ્યે॑તત્ । વા॒ચો બન્ધુ॒રિત્યા॑હ । વા॒ચો હ્યે॑ષ બન્ધુઃ॑ । ત॒પો॒જા ઇત્યા॑હ । ત॒પો॒જા હ્યે॑તત્ । સોમ॑સ્ય દા॒ત્રમ॒સીત્યા॑હ ॥ 34 ॥

સોમ॑સ્ય॒ હ્યે॑તદ્દા॒ત્રમ્ । શુ॒ક્રા વ॑-શ્શુ॒ક્રેણોત્પુ॑ના॒મીત્યા॑હ । શુ॒ક્રા હ્યાપઃ॑ । શુ॒ક્રગ્​મ્ હિર॑ણ્યમ્ । ચ॒ન્દ્રાશ્ચ॒ન્દ્રેણેત્યા॑હ । ચ॒ન્દ્રા હ્યાપઃ॑ । ચ॒ન્દ્રગ્​મ્ હિર॑ણ્યમ્ । અ॒મૃતા॑ અ॒મૃતે॒નેત્યા॑હ । અ॒મૃતા॒ હ્યાપઃ॑ । અ॒મૃત॒ગ્​મ્॒ હિર॑ણ્યમ્ ॥ 35 ॥

સ્વાહા॑ રાજ॒સૂયા॒યેત્યા॑હ । રા॒જ॒સૂયા॑ય॒ હ્યે॑ના ઉત્પુ॒નાતિ॑ । સ॒ધ॒માદો᳚ દ્યુ॒મ્નિની॒રૂર્જ॑ એ॒તા ઇતિ॑ વારુ॒ણ્યર્ચા ગૃ॑હ્ણાતિ । વ॒રુ॒ણ॒સ॒વમે॒વા વ॑રુન્ધે । એક॑યા ગૃહ્ણાતિ । એ॒ક॒ધૈવ યજ॑માને વી॒ર્ય॑-ન્દધાતિ । ક્ષ॒ત્રસ્યોલ્બ॑મસિ ક્ષ॒ત્રસ્ય॒ યોનિ॑ર॒સીતિ॑ તા॒ર્પ્ય-ઞ્ચો॒ષ્ણીષ॑-ઞ્ચ॒ પ્રય॑ચ્છતિ સયોનિ॒ત્વાય॑ । એક॑શતેન દર્ભપુઞ્જી॒લૈઃ પ॑વયતિ । શ॒તાયુ॒ર્વૈ પુરુ॑ષ-શ્શ॒તવી᳚ર્યઃ । આ॒ત્મૈક॑શ॒તઃ ॥ 36 ॥

યાવા॑ને॒વ પુરુ॑ષઃ । તસ્મિ॑ન્ વી॒ર્ય॑-ન્દધાતિ । દદ્ધ્યા॑શયતિ । ઇ॒ન્દ્રિ॒યમે॒વા-વ॑રુન્ધે । ઉ॒દુ॒મ્બર॑-માશયતિ । અ॒ન્નાદ્ય॒સ્યાવ॑ રુદ્ધ્યૈ । શષ્પા᳚ણ્યાશયતિ । સુરા॑બલિ-મે॒વૈન॑-ઙ્કરોતિ । આ॒વિદ॑ એ॒તા ભ॑વન્તિ । આ॒વિદ॑મે॒વૈન॑-ઙ્ગમયન્તિ ॥ 37 ॥

અ॒ગ્નિરે॒વૈન॒-ઙ્ગાર્​હ॑પત્યેનાવતિ । ઇન્દ્ર॑ ઇન્દ્રિ॒યેણ॑ । પૂ॒ષા પ॒શુભિઃ॑ । મિ॒ત્રાવરુ॑ણૌ પ્રાણાપા॒નાભ્યા᳚મ્ । ઇન્દ્રો॑ વૃ॒ત્રાય॒ વજ્ર॒મુદ॑યચ્છત્ । સ દિવ॑મલિખત્ । સો᳚-ઽર્ય॒મ્ણઃ પન્થા॑ અભવત્ । સ આવિ॑ન્ને॒ દ્યાવા॑પૃથિ॒વી ધૃ॒તવ્ર॑તે॒ ઇતિ॒ દ્યાવા॑પૃથિ॒વી ઉપા॑ધાવત્ । સ આ॒ભ્યામે॒વ પ્રસૂ॑ત॒ ઇન્દ્રો॑ વૃ॒ત્રાય॒ વજ્ર॒-મ્પ્રાહ॑રત્ । આવિ॑ન્ને॒ દ્યાવા॑પૃથિ॒વી ધૃ॒તવ્ર॑તે॒ ઇતિ॒ યદાહ॑ ॥ 38 ॥

આ॒ભ્યામે॒વ પ્રસૂ॑તો॒ યજ॑માનો॒ વજ્ર॒-મ્ભ્રાતૃ॑વ્યાય॒ પ્રહ॑રતિ । આવિ॑ન્ના દે॒વ્યદિ॑તિ-ર્વિશ્વરૂ॒પીત્યા॑હ । ઇ॒યં-વૈઁ દે॒વ્યદિ॑તિ-ર્વિશ્વરૂ॒પી । અ॒સ્યામે॒વ પ્રતિ॑ તિષ્ઠતિ । આવિ॑ન્નો॒-ઽયમ॒સાવા॑મુષ્યાય॒ણો᳚-ઽસ્યાં-વિઁ॒શ્ય॑સ્મિ-ન્રા॒ષ્ટ્ર ઇત્યા॑હ । વિ॒શૈવૈનગ્​મ્॑ રા॒ષ્ટ્રેણ॒ સમ॑ર્ધયતિ । મ॒હ॒તે ક્ષ॒ત્રાય॑ મહ॒ત આધિ॑પત્યાય મહ॒તે જાન॑રાજ્યા॒યેત્યા॑હ । આ॒શિષ॑મે॒વૈતામાશા᳚સ્તે । એ॒ષ વો॑ ભરતા॒ રાજા॒ સોમો॒-ઽસ્માક॑-મ્બ્રાહ્મ॒ણાના॒ગ્​મ્॒ રાજેત્યા॑હ । તસ્મા॒-થ્સોમ॑રાજાનો બ્રાહ્મ॒ણાઃ ॥ 39 ॥

ઇન્દ્ર॑સ્ય॒ વજ્રો॑-ઽસિ॒ વાર્ત્ર॑ઘ્ન॒ ઇતિ॒ ધનુઃ॒ પ્રય॑ચ્છતિ॒ વિજિ॑ત્યૈ । શ॒ત્રુ॒બાધ॑ના॒-સ્સ્થેતીષૂન્॑ । શત્રૂ॑ને॒વાસ્ય॑ બાધન્તે । પા॒ત મા᳚ પ્ર॒ત્યઞ્ચ॑-મ્પા॒ત મા॑ તિ॒ર્યઞ્ચ॑મ॒ન્વઞ્ચ॑-મ્મા પા॒તેત્યા॑હ । તિ॒સ્રો વૈ શ॑ર॒વ્યાઃ᳚ । પ્ર॒તીચી॑ તિ॒રશ્ચ્ય॒નૂચી᳚ । તાભ્ય॑ એ॒વૈન॑-મ્પાન્તિ । દિ॒ગ્ભ્યો મા॑ પા॒તેત્યા॑હ । દિ॒ગ્ભ્ય એ॒વૈન॑-મ્પાન્તિ । વિશ્વા᳚ભ્યો મા ના॒ષ્ટ્રાભ્યઃ॑ પા॒તેત્યા॑હ । અપ॑રિમિતાદે॒વૈન॑-મ્પાન્તિ । હિર॑ણ્યવર્ણાવુ॒ષસાં᳚-વિઁરો॒ક ઇતિ॑ ત્રિ॒ષ્ટુભા॑ બા॒હૂ ઉ-દ્ગૃ॑હ્ણાતિ । ઇ॒ન્દ્રિ॒યં-વૈઁ વી॒ર્ય॑-ન્ત્રિ॒ષ્ટુક્ । ઇ॒ન્દ્રિ॒યમે॒વ વી॒ર્ય॑-મુ॒પરિ॑ષ્ટાદા॒ત્મન્-ધ॑ત્તે ॥ 40 ॥
(વ્યાવૃ॑ત્ત્યૈ-દા॒ત્રમ॒સીત્યા॑હા॒-મૃત॒ગ્​મ્॒ હિર॑ણ્ય-મેકશ॒તો-ગ॑મય॒ન્-ત્યાહ॑-બ્રાહ્મા॒ણા-ના॒ષ્ટ્રાભ્યઃ॑ પા॒તેત્યા॑હ ચ॒ત્વારિ॑ ચ) (અ. 6)

અનુવાકં 7 - દિગ્વ્યાસ્થાપનમ્
દિશો॒ વ્યાસ્થા॑પયતિ । દિ॒શામ॒ભિજિ॑ત્યૈ । યદ॑નુ પ્ર॒ક્રામે᳚ત્ । અ॒ભિ દિશો॑ જયેત્ । ઉત્તુ મા᳚દ્યેત્ । મન॒સા-ઽનુ॒ પ્રક્રા॑મતિ । અ॒ભિ દિશો॑ જયતિ । નોન્મા᳚દ્યતિ । સ॒મિધ॒મા તિ॒ષ્ઠેત્યા॑હ । તેજ॑ એ॒વાવ॑રુન્ધે ॥ 41 ॥

ઉ॒ગ્રામા તિ॒ષ્ઠેત્યા॑હ । ઇ॒ન્દ્રિ॒યમે॒વાવ॑ રુન્ધે । વિ॒રાજ॒મા તિ॒ષ્ઠેત્યા॑હ । અ॒ન્નાદ્ય॑મે॒વાવ॑ રુન્ધે । ઉદી॑ચી॒મા તિ॒ષ્ઠેત્યા॑હ । પ॒શૂને॒વાવ॑ રુન્ધે । ઊ॒ર્ધ્વામા તિ॒ષ્ઠેત્યા॑હ । સુ॒વ॒ર્ગમે॒વ લો॒ક-મ॒ભિજ॑યતિ । અનૂજ્જિ॑હીતે । સુ॒વ॒ર્ગસ્ય॑ લો॒કસ્ય॒ સમ॑ષ્ટ્યૈ ॥ 42 ॥

મા॒રુ॒ત એ॒ષ ભ॑વતિ । અન્નં॒-વૈઁ મ॒રુતઃ॑ । અન્ન॑મે॒વાવ॑ રુન્ધે । એક॑વિગ્​મ્શતિકપાલો ભવતિ॒ પ્રતિ॑ષ્ઠિત્યૈ । યો॑-ઽરણ્યે ઽનુવા॒ક્યો॑ ગ॒ણઃ । ત-મ્મ॑દ્ધ્ય॒ત ઉપ॑દધાતિ । ગ્રા॒મ્યૈરે॒વ પ॒શુભિ॑-રાર॒ણ્યા-ન્પ॒શૂ-ન્પરિ॑ગૃહ્ણાતિ । તસ્મા᳚-દ્ગ્રા॒મ્યૈઃ પ॒શુભિ॑રાર॒ણ્યાઃ પ॒શવઃ॒ પરિ॑ગૃહીતાઃ । પૃથિ॑ર્વૈ॒ન્યઃ । અ॒ભ્ય॑ષિચ્યત ॥ 43 ॥

સ રા॒ષ્ટ્ર-ન્નાભ॑વત્ । સ એ॒તાનિ॑ પા॒ર્થાન્ય॑પશ્યત્ । તાન્ય॑જુહોત્ । તૈર્વૈ સ રા॒ષ્ટ્ર-મ॑ભવત્ । યત્પા॒ર્થાનિ॑ જુ॒હોતિ॑ । રા॒ષ્ટ્રમે॒વ ભ॑વતિ । બા॒ર્॒હ॒સ્પ॒ત્ય-મ્પૂર્વે॑ષામુત્ત॒મ-મ્ભ॑વતિ । ઐ॒ન્દ્રમુત્ત॑રેષા-મ્પ્રથ॒મમ્ । બ્રહ્મ॑ ચૈ॒વાસ્મૈ᳚ ક્ષ॒ત્ર-ઞ્ચ॑ સ॒મીચી॑ દધાતિ । અથો॒ બ્રહ્મ॑ન્ને॒વ ક્ષ॒ત્ર-મ્પ્રતિ॑ષ્ઠાપયતિ ॥ 44 ॥

ષટ્પુ॒રસ્તા॑-દભિષે॒કસ્ય॑ જુહોતિ । ષડુ॒પરિ॑ષ્ટાત્ । દ્વાદ॑શ॒ સ-મ્પ॑દ્યન્તે । દ્વાદ॑શ॒ માસા᳚-સ્સં​વઁથ્સ॒રઃ । સં॒​વઁ॒થ્સ॒રઃ ખલુ॒ વૈ દે॒વાના॒-મ્પૂઃ । દે॒વાના॑મે॒વ પુર॑-મ્મદ્ધ્ય॒તો વ્યવ॑સર્પતિ । તસ્ય॒ ન કુત॑શ્ચ॒ નોપા᳚વ્યા॒ધો ભ॑વતિ । ભૂ॒તાના॒-મવે᳚ષ્ટી-ર્જુહોતિ । અત્રા᳚ત્ર॒ વૈ મૃ॒ત્યુ-ર્જા॑યતે । યત્ર॑ યત્રૈ॒વ મૃ॒ત્યુ-ર્જાય॑તે । તત॑ એ॒વૈન॒મવ॑યજતે । તસ્મા᳚-દ્રાજ॒સૂયે॑નેજા॒ન-સ્સર્વ॒માયુ॑રેતિ । સર્વે॒ હ્ય॑સ્ય મૃ॒ત્યવો-ઽવે᳚ષ્ટાઃ । તસ્મા᳚-દ્રાજ॒સૂયે॑નેજા॒નો નાભિચ॑રિત॒વૈ । પ્ર॒ત્યગે॑ન-મભિચા॒ર-સ્સ્તૃ॑ણુતે ॥ 45 ॥
(રુ॒ન્ધે॒-સમ॑ષ્ટ્યા-અસિચ્યત-સ્થાપયતિ॒-જાય॑તે॒ પઞ્ચ॑ ચ) (અ. 7)

અનુવાકં 8 - અભિષેકઃ
સોમ॑સ્ય॒ ત્વિષિ॑રસિ॒ તવે॑વ મે॒ ત્વિષિ॑ર્ભૂયા॒દિતિ॑ શાર્દૂલચ॒ર્મોપ॑સ્તૃણાતિ । યૈવ સોમે॒ ત્વિષિઃ॑ । યા શા᳚ર્દૂ॒લે । તામે॒વાવ॑ રુન્ધે । મૃ॒ત્યોર્વા એ॒ષ વર્ણઃ॑ । યચ્છા᳚ર્દૂ॒લઃ । અ॒મૃત॒ગ્​મ્॒ હિર॑ણ્યમ્ । અ॒મૃત॑મસિ મૃ॒ત્યોર્મા॑ પા॒હીતિ॒ હિર॑ણ્ય॒-મુપા᳚સ્યતિ । અ॒મૃત॑મે॒વ મૃ॒ત્યોર॒ન્ત-ર્ધ॑ત્તે । શ॒તમા॑ન-મ્ભવતિ ॥ 46 ॥

શ॒તાયુઃ॒ પુરુ॑ષ-શ્શ॒તેન્દ્રિ॑યઃ । આયુ॑ષ્યે॒વેન્દ્રિ॒યે પ્રતિ॑ તિષ્ઠતિ । દિ॒દ્યોન્મા॑ પા॒હીત્યુ॒પરિ॑ષ્ટા॒દધિ॒ નિદ॑ધાતિ । ઉ॒ભ॒યત॑ એ॒વાસ્મૈ॒ શર્મ॑ દધાતિ । અવે᳚ષ્ટા દન્દ॒શૂકા॒ ઇતિ॑ ક્લી॒બગ્​મ્ સીસે॑ન વિદ્ધ્યતિ । દ॒ન્દ॒શૂકા॑-ને॒વાવ॑ યજતે । તસ્મા᳚-ત્ક્લી॒બ-ન્દ॑ન્દ॒શૂકા॒ દગ્​મ્શુ॑કાઃ । નિર॑સ્ત॒-ન્નમુ॑ચે॒-શ્શિર॒ ઇતિ॑ લોહિતાય॒સ-ન્નિર॑સ્યતિ । પા॒પ્માન॑મે॒વ નમુ॑ચિ-ન્નિ॒રવ॑દયતે । પ્રા॒ણા આ॒ત્મનઃ॒ પૂર્વે॑-ઽભિ॒ષિચ્યા॒ ઇત્યા॑હુઃ ॥ 47 ॥

સોમો॒ રાજા॒ વરુ॑ણઃ । દે॒વા ધ॑ર્મ॒સુવ॑શ્ચ॒ યે । તે તે॒ વાચગ્​મ્॑ સુવન્તા॒-ન્તે તે᳚ પ્રા॒ણગ્​મ્ સુ॑વન્તા॒મિત્યા॑હ । પ્રા॒ણાને॒વાત્મનઃ॒ પૂર્વા॑-ન॒ભિષિ॑ઞ્ચતિ । ય-દ્બ્રૂ॒યાત્ । અ॒ગ્નેસ્ત્વા॒ તેજ॑સા॒ ઽભિષિ॑ઞ્ચા॒મીતિ॑ । તે॒જ॒સ્વ્યે॑વ સ્યા᳚ત્ । દુ॒શ્ચર્મા॒ તુ ભ॑વેત્ । સોમ॑સ્ય ત્વા દ્યુ॒મ્નેના॒-ભિષિ॑ઞ્ચા॒મીત્યા॑હ । સૌ॒મ્યો વૈ દે॒વત॑યા॒ પુરુ॑ષઃ ॥ 48 ॥

સ્વયૈ॒વૈન॑-ન્દે॒વત॑યા॒-ઽભિષિ॑ઞ્ચતિ । અ॒ગ્ને-સ્તેજ॒સેત્યા॑હ । તેજ॑ એ॒વાસ્મિ॑-ન્દધાતિ । સૂર્ય॑સ્ય॒ વર્ચ॒સેત્યા॑હ । વર્ચ॑ એ॒વાસ્મિ॑-ન્દધાતિ । ઇન્દ્ર॑સ્યે-ન્દ્રિ॒યેણેત્યા॑હ । ઇ॒ન્દ્રિ॒યમે॒વાસ્મિ॑-ન્દધાતિ । મિ॒ત્રાવરુ॑ણયો-ર્વી॒ર્યે॑ણેત્યા॑હ । વી॒ર્ય॑મે॒વાસ્મિ॑-ન્દધાતિ । મ॒રુતા॒મોજ॒સેત્યા॑હ ॥ 49 ॥

ઓજ॑ એ॒વાસ્મિ॑-ન્દધાતિ । ક્ષ॒ત્રાણા᳚-ઙ્ક્ષ॒ત્રપ॑તિર॒સીત્યા॑હ । ક્ષ॒ત્રાણા॑મે॒વૈન॑-ઙ્ક્ષ॒ત્રપ॑તિ-ઙ્કરોતિ । અતિ॑ દિ॒વસ્પા॒હીત્યા॑હ । અત્ય॒ન્યા-ન્પા॒હીતિ॒ વાવૈતદા॑હ । સ॒માવ॑વૃત્રન્ન-ધ॒રાગુદી॑ચી॒-રિત્યા॑હ । રા॒ષ્ટ્રમે॒વાસ્મિ॑-ન્ધ્રુ॒વમ॑કઃ । ઉ॒ચ્છેષ॑ણેન જુહોતિ । ઉ॒ચ્છેષ॑ણભાગો॒ વૈ રુ॒દ્રઃ । ભા॒ગ॒ધેયે॑નૈ॒વ રુ॒દ્ર-ન્નિ॒રવ॑દયતે ॥ 50 ॥

ઉદ॑મ્પ॒રેત્યાગ્ની᳚દ્ધ્રે જુહોતિ । એ॒ષા વૈ રુ॒દ્રસ્ય॒ દિક્ । સ્વાયા॑મે॒વ દિ॒શિ રુ॒દ્ર-ન્નિ॒રવ॑દયતે । રુદ્ર॒ યત્તે॒ ક્રયી॒ પર॒-ન્નામેત્યા॑હ । યદ્વા અ॑સ્ય॒ ક્રયી॒ પર॒-ન્નામ॑ । તેન॒ વા એ॒ષ હિ॑નસ્તિ । યગ્​મ્ હિ॒નસ્તિ॑ । તેનૈ॒વૈનગ્​મ્॑ સ॒હ શ॑મયતિ । તસ્મૈ॑ હુ॒તમ॑સિ ય॒મેષ્ટ॑મ॒સીત્યા॑હ । ય॒માદે॒વાસ્ય॑ મૃ॒ત્યુમવ॑યજતે ॥ 51 ॥

પ્રજા॑પતે॒ ન ત્વદે॒તાન્ય॒ન્ય ઇતિ॒ તસ્યૈ॑ ગૃ॒હે જુ॑હુયાત્ । યા-ઙ્કા॒મયે॑ત રા॒ષ્ટ્રમ॑સ્યૈ પ્ર॒જા સ્યા॒દિતિ॑ । રા॒ષ્ટ્રમે॒વાસ્યૈ᳚ પ્ર॒જા ભ॑વતિ । પ॒ર્ણ॒-મયે॑ના-દ્ધ્વ॒ર્યુ-ર॒ભિષિ॑ઞ્ચતિ । બ્ર॒હ્મ॒વ॒ર્ચ॒સમે॒વાસ્મિ॒ન્-ત્વિષિ॑-ન્દધાતિ । ઔદુ॑મ્બરેણ રાજ॒ન્યઃ॑ । ઊર્જ॑મે॒વાસ્મિ॑-ન્ન॒ન્નાદ્ય॑-ન્દધાતિ । આશ્વ॑ત્થેન॒ વૈશ્યઃ॑ । વિશ॑મે॒વાસ્મિ॒-ન્પુષ્ટિ॑-ન્દધાતિ । નૈય॑ગ્રોધેન॒ જન્યઃ॑( ) । મિ॒ત્રાણ્યે॒વાસ્મૈ॑ કલ્પયતિ । અથો॒ પ્રતિ॑ષ્ઠિત્યૈ ॥ 52 ॥
(ભ॒વ॒ - ત્યા॒હુઃ॒ - પુરુ॑ષ॒ - ઓજ॒સેત્યા॑હ - નિ॒રવ॑દયતે - યજતે॒ - જન્યો॒ દ્વે ચ॑) (અ. 8)

અનુવાકં 9 - સ્થારોહણમ્. વિજયઃ
ઇન્દ્ર॑સ્ય॒ વજ્રો॑-ઽસિ॒ વાર્ત્ર॑ઘ્ન॒ ઇતિ॒ રથ॑મુ॒પાવ॑હરતિ॒ વિજિ॑ત્યૈ । મિ॒ત્રાવરુ॑ણયોસ્ત્વા પ્રશા॒સ્ત્રોઃ પ્ર॒શિષા॑ યુન॒જ્મીત્યા॑હ । બ્રહ્મ॑ણૈ॒વૈન॑-ન્દે॒વતા᳚ભ્યાં-યુઁનક્તિ । પ્ર॒ષ્ટિ॒વા॒હિનં॑-યુઁનક્તિ । પ્ર॒ષ્ટિ॒વા॒હી વૈ દે॑વર॒થઃ । દે॒વ॒ર॒થ-મે॒વાસ્મૈ॑ યુનક્તિ । ત્રયો-ઽશ્વા॑ ભવન્તિ । રથ॑શ્ચતુ॒ર્થઃ । દ્વૌ સ॑વ્યેષ્ઠસાર॒થી । ષટ્-થ્સમ્પ॑દ્યન્તે ॥ 53 ॥

ષડ્વા ઋ॒તવઃ॑ । ઋ॒તુભિ॑રે॒વૈનં॑-યુઁનક્તિ । વિ॒ષ્ણુ॒ક્ર॒માન્-ક્ર॑મતે । વિષ્ણુ॑રે॒વ ભૂ॒ત્વેમાન્ ઁલો॒કાન॒ભિજ॑યતિ । યઃ, ક્ષ॒ત્રિયઃ॒ પ્રતિ॑હિતઃ । સો᳚-ઽન્વાર॑ભતે । રા॒ષ્ટ્રમે॒વ ભ॑વતિ । ત્રિ॒ષ્ટુભા॒ ઽન્વાર॑ભતે । ઇ॒ન્દ્રિ॒યં-વૈઁ ત્રિ॒ષ્ટુક્ । ઇ॒ન્દ્રિ॒યમે॒વ યજ॑માને દધાતિ ॥ 54 ॥

મ॒રુતા᳚-મ્પ્રસ॒વે જે॑ષ॒મિત્યા॑હ । મ॒રુદ્ભિ॑રે॒વ પ્રસૂ॑ત॒ ઉજ્જ॑યતિ । આ॒પ્ત-મ્મન॒ ઇત્યા॑હ । યદે॒વ મન॒સૈફ્સી᳚ત્ । તદા॑પત્ । રા॒જ॒ન્ય॑-ઞ્જિનાતિ । અના᳚ક્રાન્ત એ॒વાક્ર॑મતે । વિ વા એ॒ષ ઇ॑ન્દ્રિ॒યેણ॑ વી॒ર્યે॑ણર્ધ્યતે । યો રા॑જ॒ન્ય॑-ઞ્જિ॒નાતિ॑ । સમ॒હમિ॑ન્દ્રિ॒યેણ॑ વી॒ર્યે॑ણેત્યા॑હ ॥ 55 ॥

ઇ॒ન્દ્રિ॒યમે॒વ વી॒ર્ય॑મા॒ત્મન્-ધ॑ત્તે । પ॒શૂ॒ના-મ્મ॒ન્યુર॑સિ॒ તવે॑વ મે મ॒ન્યુર્ભૂ॑યા॒દિતિ॒ વારા॑હી ઉપા॒નહા॒વુપ॑ મુઞ્ચતે । પ॒શૂ॒નાં-વાઁ એ॒ષ મ॒ન્યુઃ । ય-દ્વ॑રા॒હઃ । તેનૈ॒વ પ॑શૂ॒ના-મ્મ॒ન્યુમા॒ત્મ-ન્ધ॑ત્તે । અ॒ભિ વા ઇ॒યગ્​મ્ સુ॑ષુવા॒ણ-ઙ્કા॑મયતે । તસ્યે᳚શ્વ॒રેન્દ્રિ॒યં-વીઁ॒ર્ય॑માદા॑તોઃ । વારા॑હી ઉપા॒નહા॒વુપ॑મુઞ્ચતે । અ॒સ્યા એ॒વાન્તર્ધ॑ત્તે । ઇ॒ન્દ્રિ॒યસ્ય॑ વી॒ર્ય॑સ્યાના᳚ત્ત્યૈ ॥ 56 ॥

નમો॑ મા॒ત્રે પૃ॑થિ॒વ્યા ઇત્યા॒હાહિગ્​મ્॑ સાયૈ । ઇય॑દ॒સ્યા-યુ॑ર॒સ્યાયુ॑ર્મે ધે॒હીત્યા॑હ । આયુરે॒વાત્મન્-ધ॑ત્તે । ઊર્ગ॒સ્યૂર્જ॑-મ્મે ધે॒હીત્યા॑હ । ઊર્જ॑મ॒વાત્મ-ન્ધ॑ત્તે । યુઙ્ઙ॑સિ॒ વર્ચો॑-ઽસિ॒ વર્ચો॒ મયિ॑ ધે॒હીત્યા॑હ । વર્ચ॑ એ॒વાત્મ-ન્ધ॑ત્તે । એ॒ક॒ધા બ્ર॒હ્મણ॒ ઉપ॑ હરતિ । એ॒ક॒ધૈવ યજ॑માન॒ આયુ॒રૂર્જં॒-વઁર્ચો॑ દધાતિ । ર॒થ॒વિ॒મો॒ચ॒નીયા॑ જુહોતિ॒ પ્રતિ॑ષ્ઠિત્યૈ ॥ 57 ॥

ત્રયો-ઽશ્વા॑ ભવન્તિ । રથ॑શ્ચતુ॒ર્થઃ । તસ્મા᳚-ચ્ચ॒તુર્જુ॑હોતિ । યદુ॒ભૌ સ॒હાવ॒તિષ્ઠે॑તામ્ । સ॒મા॒નં-લોઁ॒કમિ॑યાતામ્ । સ॒હ સ॑ગ્રંહી॒ત્રા ર॑થ॒વાહ॑ને॒ રથ॒માદ॑ધાતિ । સુ॒વ॒ર્ગાદે॒વૈનં॑-લોઁ॒કાદ॒ન્તર્દ॑ધાતિ । હ॒ગ્​મ્॒સ-શ્શુ॑ચિ॒ષદિત્યા દ॑ધાતિ । બ્રહ્મ॑ણૈ॒વૈન॑-મુપાવ॒હર॑તિ । બ્રહ્મ॒ણા ઽઽદ॑ધાતિ । અતિ॑ચ્છન્દ॒સા ઽઽદ॑ધાતિ । અતિ॑ચ્છન્દા॒ વૈ સર્વા॑ણિ॒ છન્દાગ્​મ્॑સિ । સર્વે॑ભિરે॒વૈન॒-ઞ્છન્દો॑ભિ॒-રાદ॑ધાતિ । વર્​ષ્મ॒ વા એ॒ષા છન્દ॑સામ્ । યદતિ॑ચ્છન્દાઃ । યદતિ॑ચ્છન્દસા॒ દધા॑તિ । વર્​ષ્મૈ॒વૈનગ્​મ્॑ સમા॒નાના᳚-ઙ્કરોતિ ॥ 58 ॥
(પ॒દ્ય॒ન્તે॒ - દ॒ધા॒તિ॒ - વી॒ર્યે॑ણેત્યા॒હા - ના᳚ત્યૈ॒ - પ્રતિ॑ષ્ઠિત્યૈ॒ - બ્રહ્મ॒ણા-ઽઽદ॑ધાતિ સ॒પ્ત ચ॑) (અ. 9)

અનુવાકં 10 - આસને સમુપવેશ-સ્સર્વૈસ્સેવ્યત્વ-ઞ્ચ
મિ॒ત્રો॑-ઽસિ॒ વરુ॑ણો॒-ઽસીત્યા॑હ । મૈ॒ત્રં-વાઁ અહઃ॑ । વા॒રુ॒ણી રાત્રિઃ॑ । અ॒હો॒રા॒ત્રાભ્યા॑-મે॒વૈન॑-મુ॒પાવ॑હરતિ । મિ॒ત્રો॑-ઽસિ॒ વરુ॑ણો॒સીત્યા॑હ । મૈ॒ત્રો વૈ દક્ષિ॑ણઃ । વા॒રુ॒ણ-સ્સ॒વ્યઃ । વૈ॒શ્વ॒દે॒વ્યા॑મિક્ષા᳚ । સ્વમે॒વૈનૌ॑ ભાગ॒ધેય॑-મુ॒પાવ॑હરતિ । સમ॒હં-વિઁશ્વૈ᳚ર્દે॒વૈ-રિત્યા॑હ ॥ 59 ॥

વૈ॒શ્વ॒દે॒વ્યો॑ વૈ પ્ર॒જાઃ । તા એ॒વાદ્યાઃ᳚ કુરુતે । ક્ષ॒ત્રસ્ય॒ નાભિ॑રસિ ક્ષ॒ત્રસ્ય॒ યોનિ॑-ર॒સીત્ય॑ધીવા॒સમા-સ્તૃ॑ણાતિ સયોનિ॒ત્વાય॑ । સ્યો॒નામાસી॑દ સુ॒ષદા॒માસી॒દેત્યા॑હ । ય॒થા॒ ય॒જુરે॒વૈ તત્ । મા ત્વા॑ હિગ્​મ્સી॒-ન્મા મા॑ હિગ્​મ્સી॒દિત્યા॒હા-હિગ્​મ્॑સાયૈ । નિષ॑સાદ ધૃ॒તવ્ર॑તો॒ વરુ॑ણઃ પ॒સ્ત્યા᳚સ્વા સામ્રા᳚જ્યાય સુ॒ક્રતુ॒રિત્યા॑હ । સામ્રા᳚જ્યમે॒વૈનગ્​મ્॑ સુ॒ક્રતુ॑-ઙ્કરોતિ । બ્રહ્મા(3)ન્ત્વગ્​મ્ રા॑જન્-બ્ર॒હ્મા-ઽસિ॑ સવિ॒તા-ઽસિ॑ સ॒ત્યસ॑વ॒ ઇત્યા॑હ । સ॒વિ॒તાર॑-મે॒વૈનગ્​મ્॑ સ॒ત્યસ॑વ-ઙ્કરોતિ ॥ 60 ॥

બ્રહ્મા(3)ન્ત્વગ્​મ્ રા॑જન્-બ્ર॒હ્મા-ઽસીન્દ્રો॑-ઽસિ સ॒ત્યૌજા॒ ઇત્યા॑હ । ઇન્દ્ર॑મે॒વૈનગ્​મ્॑ સ॒ત્યૌજ॑સ-ઙ્કરોતિ । બ્રહ્મા(3)ન્ત્વગ્​મ્ રા॑જન્-બ્ર॒હ્મા-ઽસિ॑ મિ॒ત્રો॑-ઽસિ સુ॒શેવ॒ ઇત્યા॑હ । મિ॒ત્રમે॒વૈનગ્​મ્॑ સુ॒શેવ॑-ઙ્કરોતિ । બ્રહ્મા(3)ન્ત્વગ્​મ્ રા॑જન્-બ્ર॒હ્મા-ઽસિ॒ વરુ॑ણો-ઽસિ સ॒ત્યધ॒ર્મેત્યા॑હ । વરુ॑ણમે॒વૈનગ્​મ્॑ સ॒ત્યધ॑ર્માણ-ઙ્કરોતિ । સ॒વિ॒તા-ઽસિ॑ સ॒ત્યસ॑વ॒ ઇત્યા॑હ । ગા॒ય॒ત્રી-મે॒વૈતેના॑ભિ॒વ્યાહ॑રતિ । ઇન્દ્રો॑-ઽસિ સ॒ત્યૌજા॒ ઇત્યા॑હ । ત્રિ॒ષ્ટુભ॑-મે॒વૈતેના॑ભિ॒-વ્યાહ॑રતિ ॥ 61 ॥

મિ॒ત્રો॑-ઽસિ સુ॒શેવ॒ ઇત્યા॑હ । જગ॑તી-મે॒વૈતેના॑ભિ॒વ્યાહ॑રતિ । સ॒ત્યમે॒તા દે॒વતાઃ᳚ । સ॒ત્યમે॒તાનિ॒ છન્દાગ્​મ્॑સિ । સ॒ત્યમે॒વાવ॑ રુન્ધે । વરુ॑ણો-ઽસિ સ॒ત્યધ॒ર્મેત્યા॑હ । અ॒નુ॒ષ્ટુભ॑-મે॒વૈતેના॑ભિ॒વ્યાહ॑રતિ । સ॒ત્યા॒નૃ॒તે વા અ॑નુ॒ષ્ટુપ્ । સ॒ત્યા॒નૃ॒તે વરુ॑ણઃ । સ॒ત્યા॒નૃ॒તે એ॒વાવ॑રુન્ધે ॥ 62 ॥

નૈનગ્​મ્॑ સત્યાનૃ॒તે ઉ॑દિ॒તે હિગ્ગ્॑સ્તઃ । ય એ॒વં-વેઁદ॑ । ઇન્દ્ર॑સ્ય॒ વજ્રો॑-ઽસિ॒ વાર્ત્ર॑ઘ્ન॒ ઇતિ॒ સ્ફ્ય-મ્પ્રય॑ચ્છતિ । વજ્રો॒ વૈ સ્ફ્યઃ । વજ્રે॑ણૈ॒વાસ્મા॑ અવરપ॒રગ્​મ્ ર॑ન્ધયતિ । એ॒વગ્​મ્ હિ તચ્છ્રેયઃ॑ । યદ॑સ્મા એ॒તે રદ્ધ્યે॑યુઃ । દિશો॒-ઽભ્ય॑યગ્​મ્ રાજા॑ ઽભૂ॒દિતિ॒ પઞ્ચા॒ક્ષાન્-પ્રય॑ચ્છતિ । એ॒તે વૈ સર્વે-ઽયાઃ᳚ । અપ॑રાજાયિન-મે॒વૈન॑-ઙ્કરોતિ ॥ 63 ॥

ઓ॒દ॒નમુદ્બ્રુ॑વતે । પ॒ર॒મે॒ષ્ઠી વા એ॒ષઃ । યદો॑દ॒નઃ । પ॒ર॒મામે॒વૈન॒ગ્ગ્॒ શ્રિય॑-ઙ્ગમયતિ । સુશ્લો॒કાઁ(4) સુમ॑ઙ્ગ॒લાઁ(4) સત્ય॑રા॒જા(3)નિત્યા॑હ । આ॒શિષ॑મે॒વૈતામા શા᳚સ્તે । શૌ॒ન॒-શ્શે॒પમાખ્યા॑પયતે । વ॒રુ॒ણ॒પા॒શા-દે॒વૈન॑-મ્મુઞ્ચતિ । પ॒ર॒-શ્શ॒ત-મ્ભ॑વતિ । શ॒તાયુઃ॒ પુરુ॑ષ-શ્શ॒તેન્દ્રિ॑યઃ( ) । આયુ॑ષ્યે॒વેન્દ્રિ॒યે પ્રતિ॑તિષ્ઠતિ । મા॒રુ॒તસ્ય॒ ચૈક॑વિગ્​મ્શતિકપાલસ્ય વૈશ્વદે॒વ્યૈ ચા॒મિક્ષા॑યા અ॒ગ્નયે᳚ સ્વિષ્ટ॒કૃતે॑ સ॒મવ॑દ્યતિ । દે॒વતા॑ભિરે॒વૈન॑-મુભ॒યતઃ॒ પરિ॑ગૃહ્ણાતિ । અ॒પા-ન્નપ્ત્રે॒ સ્વાહો॒ર્જો નપ્ત્રે॒ સ્વાહા॒-ઽગ્નયે॑ ગૃ॒હપ॑તયે॒ સ્વાહેતિ॑ તિ॒સ્ર આહુ॑તી-ર્જુહોતિ । ત્રય॑ ઇ॒મે લો॒કાઃ । એ॒ષ્વે॑વ લો॒કેષુ॒ પ્રતિ॑ તિષ્ઠતિ ॥ 64 ॥
(દે॒વૈરિત્યા॑હ - સ॒ત્યસ॑વ-ઙ્કરોતિ - ત્રિ॒ષ્ટુભ॑મે॒વૈતેના॑ભિ॒ વ્યાહ॑રતિ- સત્યાનૃ॒તે એ॒વાવ॑રુન્ધે - કરોતિ - શ॒તેન્દ્રિ॑ય॒-ષ્ષટ્ચ॑) (અ. 10)

(એ॒ત-દ્બ્રા᳚હ્મણાનિ - ધા॒ત્રે - રા॒ત્નિનાં᳚ - દેવસુ॒વા - મ॒ર્થેતો॒ - દેવી॒--ર્ દિશઃ॒ - સોમ॒સ્યે - ન્દ્ર॑સ્ય - મિ॒ત્રો દશ॑)

(એ॒ત-દ્બ્રા᳚હ્મણાનિ - વૈષ્ણ॒વ-ન્ત્રિ॑કપા॒લ - મન્નં॒-વૈઁ પૂ॒ષા - વાશા॒-સ્સ્થેત્યા॑હ॒ - દિશો॒ વ્યાસ્થા॑પય॒ - ત્યુદ॑મ્પ॒રેત્ય॒ - બ્રહ્મા(3)ન્ત્વગ્​મ્ રા॑જ॒-ઞ્ચતુ॑ષ્ષષ્ટિઃ

(એ॒ત-દ્બ્રા᳚હ્મણાનિ॒ - પ્રતિ॑ તિષ્ઠતિ)

॥ હરિઃ॑ ઓમ્ ॥

॥ કૃષ્ણ યજુર્વેદીય તૈત્તિરીય બ્રાહ્મણે પ્રથમાષ્ટકે સપ્તમઃ પ્રપાઠક-સ્સમાપ્તઃ ॥