ध्यानम्
गलद्रक्तमुंडावलीकंठमाला
महाघोररावा सुदंष्ट्रा कराला ।
विवस्त्रा श्मशानालया मुक्तकेशी
महाकालकामाकुला कालिकेयम् ॥ 1 ॥
भुजे वामयुग्मे शिरोऽसिं दधाना
वरं दक्षयुग्मेऽभयं वै तथैव ।
सुमध्याऽपि तुंगस्तना भारनम्रा
लसद्रक्तसृक्कद्वया सुस्मितास्या ॥ 2 ॥
शवद्वंद्वकर्णावतंसा सुकेशी
लसत्प्रेतपाणिं प्रयुक्तैककांची ।
शवाकारमंचाधिरूढा शिवाभिः
चतुर्दिक्षुशब्दायमानाऽभिरेजे ॥ 3 ॥
स्तुतिः
विरंच्यादिदेवास्त्रयस्ते गुणास्त्रीन्
समाराध्य कालीं प्रधाना बभूवुः ।
अनादिं सुरादिं मखादिं भवादिं
स्वरूपं त्वदीयं न विंदंति देवाः ॥ 1 ॥
जगन्मोहिनीयं तु वाग्वादिनीयं
सुहृत्पोषिणी शत्रुसंहारणीयम् ।
वचस्तंभनीयं किमुच्चाटनीयं
स्वरूपं त्वदीयं न विंदंति देवाः ॥ 2 ॥
इयं स्वर्गदात्री पुनः कल्पवल्ली
मनोजास्तु कामान् यथार्थं प्रकुर्यात् ।
तथा ते कृतार्था भवंतीति नित्यं
स्वरूपं त्वदीयं न विंदंति देवाः ॥ 3 ॥
सुरापानमत्ता सुभक्तानुरक्ता
लसत्पूतचित्ते सदाविर्भवत्ते ।
जपध्यानपूजासुधाधौतपंका
स्वरूपं त्वदीयं न विंदंति देवाः ॥ 4 ॥
चिदानंदकंदं हसन्मंदमंदं
शरच्चंद्रकोटिप्रभापुंजबिंबम् ।
मुनीनां कवीनां हृदि द्योतयंतं
स्वरूपं त्वदीयं न विंदंति देवाः ॥ 5 ॥
महामेघकाली सुरक्तापि शुभ्रा
कदाचिद्विचित्राकृतिर्योगमाया ।
न बाला न वृद्धा न कामातुरापि
स्वरूपं त्वदीयं न विंदंति देवाः ॥ 6 ॥
क्षमस्वापराधं महागुप्तभावं
मया लोकमध्ये प्रकाशीकृतं यत् ।
तव ध्यानपूतेन चापल्यभावात्
स्वरूपं त्वदीयं न विंदंति देवाः ॥ 7 ॥
यदि ध्यानयुक्तं पठेद्यो मनुष्यः
तदा सर्वलोके विशालो भवेच्च ।
गृहे चाष्टसिद्धिर्मृते चापि मुक्तिः
स्वरूपं त्वदीयं न विंदंति देवाः ॥ 8 ॥
इति श्रीमच्छंकराचार्यविरचितं श्रीकालिकाष्टकम् ।
