dhyānam
galadraktamuṇḍāvalīkaṇṭhamālā
mahāghōrarāvā sudaṃṣṭrā karālā ।
vivastrā śmaśānālayā muktakēśī
mahākālakāmākulā kālikēyam ॥ 1 ॥
bhujē vāmayugmē śirō'siṃ dadhānā
varaṃ dakṣayugmē'bhayaṃ vai tathaiva ।
sumadhyā'pi tuṅgastanā bhāranamrā
lasadraktasṛkkadvayā susmitāsyā ॥ 2 ॥
śavadvandvakarṇāvataṃsā sukēśī
lasatprētapāṇiṃ prayuktaikakāñchī ।
śavākāramañchādhirūḍhā śivābhiḥ
chaturdikṣuśabdāyamānā'bhirējē ॥ 3 ॥
stutiḥ
virañchyādidēvāstrayastē guṇāstrīn
samārādhya kālīṃ pradhānā babhūvuḥ ।
anādiṃ surādiṃ makhādiṃ bhavādiṃ
svarūpaṃ tvadīyaṃ na vindanti dēvāḥ ॥ 1 ॥
jaganmōhinīyaṃ tu vāgvādinīyaṃ
suhṛtpōṣiṇī śatrusaṃhāraṇīyam ।
vachastambhanīyaṃ kimuchchāṭanīyaṃ
svarūpaṃ tvadīyaṃ na vindanti dēvāḥ ॥ 2 ॥
iyaṃ svargadātrī punaḥ kalpavallī
manōjāstu kāmān yathārthaṃ prakuryāt ।
tathā tē kṛtārthā bhavantīti nityaṃ
svarūpaṃ tvadīyaṃ na vindanti dēvāḥ ॥ 3 ॥
surāpānamattā subhaktānuraktā
lasatpūtachittē sadāvirbhavattē ।
japadhyānapūjāsudhādhautapaṅkā
svarūpaṃ tvadīyaṃ na vindanti dēvāḥ ॥ 4 ॥
chidānandakandaṃ hasanmandamandaṃ
śarachchandrakōṭiprabhāpuñjabimbam ।
munīnāṃ kavīnāṃ hṛdi dyōtayantaṃ
svarūpaṃ tvadīyaṃ na vindanti dēvāḥ ॥ 5 ॥
mahāmēghakālī suraktāpi śubhrā
kadāchidvichitrākṛtiryōgamāyā ।
na bālā na vṛddhā na kāmāturāpi
svarūpaṃ tvadīyaṃ na vindanti dēvāḥ ॥ 6 ॥
kṣamasvāparādhaṃ mahāguptabhāvaṃ
mayā lōkamadhyē prakāśīkṛtaṃ yat ।
tava dhyānapūtēna chāpalyabhāvāt
svarūpaṃ tvadīyaṃ na vindanti dēvāḥ ॥ 7 ॥
yadi dhyānayuktaṃ paṭhēdyō manuṣyaḥ
tadā sarvalōkē viśālō bhavēchcha ।
gṛhē chāṣṭasiddhirmṛtē chāpi muktiḥ
svarūpaṃ tvadīyaṃ na vindanti dēvāḥ ॥ 8 ॥
iti śrīmachChaṅkarāchāryavirachitaṃ śrīkālikāṣṭakam ।
