ശ്രീഭഗവാനുവാച ।
ജ്ഞാനം പരമഗുഹ്യം മേ യദ്വിജ്ഞാനസമന്വിതമ് ।
സരഹസ്യം തദംഗം ച ഗൃഹാണ ഗദിതം മയാ ॥ 1 ॥
യാവാനഹം യഥാഭാവോ യദ്രൂപഗുണകര്മകഃ ।
തഥൈവ തത്ത്വവിജ്ഞാനമസ്തു തേ മദനുഗ്രഹാത് ॥ 2 ॥
അഹമേവാസമേവാഗ്രേ നാന്യദ്യത്സദസത്പരമ് ।
പശ്ചാദഹം യദേതച്ച യോഽവശിഷ്യേത സോഽസ്മ്യഹമ് ॥ 3 ॥
ഋതേഽര്ഥം യത്പ്രതീയേത ന പ്രതീയേത ചാത്മനി ।
തദ്വിദ്യാദാത്മനോ മായാം യഥാഽഭാസോ യഥാ തമഃ ॥ 4 ॥
യഥാ മഹാംതി ഭൂതാനി ഭൂതേഷൂച്ചാവചേഷ്വനു ।
പ്രവിഷ്ടാന്യപ്രവിഷ്ടാനി തഥാ തേഷു ന തേഷ്വഹമ് ॥ 5 ॥
ഏതാവദേവ ജിജ്ഞാസ്യം തത്ത്വജിജ്ഞാസുനാഽത്മനഃ ।
അന്വയവ്യതിരേകാഭ്യാം യത്സ്യാത്സർവത്ര സർവദാ ॥ 6 ॥
ഏതന്മതം സമാതിഷ്ഠ പരമേണ സമാധിനാ ।
ഭവാന്കല്പവികല്പേഷു ന വിമുഹ്യതി കര്ഹിചിത് ॥ 7 ॥
.. ഇതി ശ്രീമദ്ഭാഗവതേ മഹാപുരാണേഽഷ്ടാദശസാഹസ്ര്യാം
സംഹിതായാം വൈയസിക്യാം ദ്വിതീയസ്കംധേ ഭഗവദ്ബ്രഹ്മസംവാദേ
നവമാധ്യായാംതര്ഗതം ചതുഃശ്ലോകീഭാഗവതം സമാപ്തമ് . ।
ഭാഗവതപുരാണ . അധ്യായ 2/9/30-36 . ।
