മനോജവം മാരുതതുല്യവേഗം
ജിതേംദ്രിയം ബുദ്ധിമതാം വരിഷ്ഠമ് ।
വാതാത്മജം വാനരയൂഥമുഖ്യം
ശ്രീരാമദൂതം ശിരസാ നമാമി ॥
അംജനാനംദനം വീരം ജാനകീശോകനാശനമ് ।
കപീശമക്ഷഹംതാരം വംദേ ലംകാഭയംകരമ് ॥
ഗോഷ്പദീകൃതവാരാശിം മശകീകൃതരാക്ഷസമ് ।
രാമായണമഹാമാലാരത്നം വംദേഽനിലാത്മജമ് ॥
യത്ര യത്ര രഘുനാഥകീര്തനം തത്ര തത്ര കൃതമസ്തകാംജലിമ് ।
ബാഷ്പവാരിപരിപൂര്ണലോചനം മാരുതിം നമത രാക്ഷസാംതകമ് ॥
വംദേ വാനര-നാരസിംഹ-ഖഗരാട്-ക്രോഡാശ്വവക്ത്രാംചിതം
നാനാലംകരണം ത്രിപംചനയനം ദേദീപ്യമാനം രുചാമ് ।
ഹസ്താഭൈരസിഖേടപുസ്തകസുധാഭാംഡം കുശാദ്രീന് ഹലം
ഖട്വാംഗം ഫണിവൃക്ഷധൃദ്ദശഭുജം സർവാരിഗർവാപഹമ് ॥
സർവാരിഷ്ടനിവാരകം ശുഭകരം പിംഗാക്ഷമക്ഷാപഹം
സീതാന്വേഷണതത്പരം കപിവരം കോടീംദുസൂര്യപ്രഭമ് ।
ലംകാദ്വീപഭയംകരം സകലദം സുഗ്രീവസമ്മാനിതം
ദേവേംദ്രാദി സമക്തദേവവിനുതം കാകുത്ഥദൂതം ഭജേ ॥
ബുദ്ധിര്ബലം യശോ ധൈര്യം നിര്ഭയത്വമരോഗതാ ।
അജാഡ്യം വാക്പടുത്വം ച ഹനുമച്ഛരണാദ്ഭവേത് ॥
നമോഽസ്തുരാമായ സലക്ഷ്മണായ ദേവ്യൈ ച തസ്യൈ ജനകാത്മജായൈ ।
നമോഽസ്തു രുദ്രേംദ്രയമാനിലേഭ്യോ നമോഽസ്തു ചംദ്രാര്കമരുദ്ഗണേഭ്യഃ ॥
ജയത്യതിബലോ രാമോ ലക്ഷ്മണശ്ച മഹാബലഃ ।
രാജാ ജയതി സുഗ്രീവോ രാഘവേണാഭിപാലിതഃ ॥
ദാസോഽഹം കോസലേംദ്രസ്യ രാമസ്യാക്ലിഷ്ടകര്മണഃ ।
ഹനുമാന് ശത്രുസൈന്യാനാം നിഹംതാ മാരുതാത്മജഃ ॥
ന രാവണസഹസ്രം മേ യുദ്ധേ പ്രതിബലം ഭവേത് ।
ശിലാഭിസ്തു പ്രഹരതഃ പാദപൈശ്ച സഹസ്രശഃ ॥
അര്ദയിത്വാ പുരീം ലംകാം അഭിവാദ്യ ച മൈഥിലീമ് ।
സമൃദ്ധാര്ഥോ ഗമിഷ്യാമി മിഷതാം സർവരക്ഷസാമ് ॥
ധര്മാത്മാ സത്യസംധശ്ച രാമോ ദാശരഥിര്യദി ।
പൌരുഷേ ചാപ്രതിദ്വംദ്വഃ ശരൈനം ജഹി രാവണിമ് ॥
സകൃദേവ പ്രപന്നായ തവാസ്മീതി ച യാചതേ ।
അഭയം സർവഭൂതേഭ്യഃ ദദാമ്യേതദ്വ്രതം മമ ॥
ഇതി സുംദരകാംഡ പ്രാര്ഥനാ ശ്ലോകാഃ സമാപ്താ ।
