ജ്വര ഉവാച ।
നമഃ കൃഷ്ണായ ഹരയേ വിഷ്ണവേ പ്രഭവിഷ്ണവേ ।
ആദിദേവായ ദേവായ പുരാണായ ഗദാഭൃതേ ॥ 1 ॥
നമഃ സഹസ്രശിരസേ സഹസ്രചരണായ ച ।
സഹസ്രാക്ഷ നമോ നിത്യം ലോകാനാമഭയംകര ॥ 2 ॥
ഉദ്ഗീഥായ നമോ ദേവ യജ്ഞാധിപതയേ നമഃ ।
നമസ്തേ ചക്രിണേ നിത്യമസിഹസ്തായ തേ നമഃ ॥ 3 ॥
അനംതായ വിരൂപായ നമസ്തേ മധുസൂദന ।
നമസ്തേ ദേവദേവേശ തുഭ്യം ദേവ കപര്ദിനേ ॥ 4 ॥
നമസ്തേ രാക്ഷസഘ്നായ നമോ രാഘവരൂപിണേ ।
ജ്ഞാനജ്ഞേയായ ദേവായ നമ ആദ്യായ വിഷ്ണവേ ॥ 5 ॥
നമസ്തേ നരസിംഹായ ദൈത്യരാജവിഹാരിണേ ।
നമസ്തുഭ്യം വരാഹായ ദംഷ്ട്രോദ്ധൃതവസുംധര ॥ 6 ॥
ത്രിവിക്രമ നമസ്തുഭ്യം ബലിയജ്ഞവിനാശന ।
വാസുദേവായ ദേവായ നമഃ കംസവിനാശന ॥ 7 ॥
നമഃ സർവാത്മനേ ദേവ സർവകര്ത്രേ നമോ നമഃ ।
പ്രാസീദ ദേവദേവേശ ഭീതാനാമഭയംകര ॥ 8 ॥
നമാമി ദേവദേവേശം വരേണ്യമഭയപ്രദമ് ।
വിഷ്ണോ ത്വാം സകലേശേശ ത്വാം ഗദാധരമവ്യയമ് ॥ 9 ॥
നമസ്തേ ദേവദേവേശ ഭീതോഽഹം ഭവനാശന ।
ഇതി സ്തുത്വാ ജഗന്നാഥം നൃത്യന്നിവ തദാ ജ്വരഃ ॥ 10 ॥
പപാത പാദയോർവിഷ്ണോര്നിഃശ്വസന് ഭീതഭീതവത് ।
പ്രാസീദ വിഷ്ണോ ദേവേശ പീഡിതോഽസ്മി ജനാര്ദന ॥ 11 ॥
ഇതി ഹരിവംശാംതര്ഗതം ജ്വരകൃതം ശ്രീകൃഷ്ണസ്തോത്രം സംപൂര്ണമ് ।
ഹരിവംശ . അധ്യായ 111/7 . ।
