ଶ୍ରୀଭଗଵାନୁଵାଚ ।
ଜ୍ଞାନଂ ପରମଗୁହ୍ୟଂ ମେ ୟଦ୍ଵିଜ୍ଞାନସମନ୍ଵିତମ୍ ।
ସରହସ୍ୟଂ ତଦଂଗଂ ଚ ଗୃହାଣ ଗଦିତଂ ମୟା ॥ 1 ॥
ୟାଵାନହଂ ୟଥାଭାଵୋ ୟଦ୍ରୂପଗୁଣକର୍ମକଃ ।
ତଥୈଵ ତତ୍ତ୍ଵଵିଜ୍ଞାନମସ୍ତୁ ତେ ମଦନୁଗ୍ରହାତ୍ ॥ 2 ॥
ଅହମେଵାସମେଵାଗ୍ରେ ନାନ୍ୟଦ୍ୟତ୍ସଦସତ୍ପରମ୍ ।
ପଶ୍ଚାଦହଂ ୟଦେତଚ୍ଚ ୟୋଽଵଶିଷ୍ୟେତ ସୋଽସ୍ମ୍ୟହମ୍ ॥ 3 ॥
ଋତେଽର୍ଥଂ ୟତ୍ପ୍ରତୀୟେତ ନ ପ୍ରତୀୟେତ ଚାତ୍ମନି ।
ତଦ୍ଵିଦ୍ୟାଦାତ୍ମନୋ ମାୟାଂ ୟଥାଽଭାସୋ ୟଥା ତମଃ ॥ 4 ॥
ୟଥା ମହାଂତି ଭୂତାନି ଭୂତେଷୂଚ୍ଚାଵଚେଷ୍ଵନୁ ।
ପ୍ରଵିଷ୍ଟାନ୍ୟପ୍ରଵିଷ୍ଟାନି ତଥା ତେଷୁ ନ ତେଷ୍ଵହମ୍ ॥ 5 ॥
ଏତାଵଦେଵ ଜିଜ୍ଞାସ୍ୟଂ ତତ୍ତ୍ଵଜିଜ୍ଞାସୁନାଽତ୍ମନଃ ।
ଅନ୍ଵୟଵ୍ୟତିରେକାଭ୍ୟାଂ ୟତ୍ସ୍ୟାତ୍ସର୍ଵତ୍ର ସର୍ଵଦା ॥ 6 ॥
ଏତନ୍ମତଂ ସମାତିଷ୍ଠ ପରମେଣ ସମାଧିନା ।
ଭଵାନ୍କଲ୍ପଵିକଲ୍ପେଷୁ ନ ଵିମୁହ୍ୟତି କର୍ହିଚିତ୍ ॥ 7 ॥
.. ଇତି ଶ୍ରୀମଦ୍ଭାଗଵତେ ମହାପୁରାଣେଽଷ୍ଟାଦଶସାହସ୍ର୍ୟାଂ
ସଂହିତାୟାଂ ଵୈୟସିକ୍ୟାଂ ଦ୍ଵିତୀୟସ୍କଂଧେ ଭଗଵଦ୍ବ୍ରହ୍ମସଂଵାଦେ
ନଵମାଧ୍ୟାୟାଂତର୍ଗତଂ ଚତୁଃଶ୍ଲୋକୀଭାଗଵତଂ ସମାପ୍ତମ୍ . ।
ଭାଗଵତପୁରାଣ . ଅଧ୍ୟାୟ 2/9/30-36 . ।
