વ્યાસ ઉવાચ ।
ઇત્યુક્તે તાભિરાશ્વાસ્ય ક્લાંતદેહોઽપિ પન્નગઃ ।
પ્રસીદ દેવદેવેતિ પ્રાહ વાક્યં શનૈઃ શનૈઃ ॥ 43 ॥
કાલીય ઉવાચ ।
તવાષ્ટગુણમૈશ્વર્યં નાથ સ્વાભવિકં પરમ્ ।
નિરસ્તાતિશયં યસ્ય તસ્ય સ્તોષ્યામિ કિન્વહમ્ ॥ 44 ॥
ત્વં પરસ્ત્વં પરસ્યાઽદ્યઃ પરં ત્વં તત્પરાત્મકમ્ ।
પરસ્માત્પરમો યસ્ત્વં તસ્ય સ્તોષ્યામિ કિં ન્વહમ્ ॥ 45 ॥
યથાઽહં ભવતા સૃષ્ટો જાત્યા રૂપેણ ચેશ્વરઃ ।
સ્વભાવેન ચ સંયુક્તસ્તથેદં ચેષ્ટિતં મયા ॥ 46 ॥
યદ્યન્યથા પ્રવર્તેય દેવદેવ તતો મયિ ।
ન્યાય્યો દંડનિપાતસ્તે તવૈવ વચનં યથા ॥ 47 ॥
તથાઽપિ યં જગત્સ્વામી દંડં પાતિતવાન્મયિ ।
સ સોઢોઽયં વરો દંડસ્ત્વત્તો નાન્યોઽસ્તુ મે વરઃ ॥ 48 ॥
હતવીર્યો હતવિષો દમિતોઽહં ત્વયાઽચ્યુત ।
જીવિતં દીયતામેકમાજ્ઞાપય કરોમિ કિમ્ ॥ 49 ॥
ઇતિ બ્રહ્મપુરાણે પંચાશીત્યધિકશતતમાધ્યાયાંતર્ગતં
કાલિયકૃતં શ્રીકૃષ્ણસ્તોત્રં સમાપ્તમ્ ।
બ્રહ્મપુરાણ . અધ્યાય 185/43-49 . ।
