શ્રી ગણેશાય નમઃ ।
અવ્યાદજોઽંઘ્રિ મણિમાંસ્તવ જાન્વથોરૂ
યજ્ઞોઽચ્યુતઃ કટિતટં જઠરં હયાસ્યઃ ।
હૃત્કેશવસ્ત્વદુર ઈશ ઇનસ્તુ કંઠં
વિષ્ણુર્ભુજં મુખમુરુક્રમ ઈશ્વરઃ કમ્ ॥ 1 ॥
ચક્ર્યગ્રતઃ સહગદો હરિરસ્તુ પશ્ચાત્
ત્વત્પાર્શ્વયોર્ધનુરસી મધુહાજનશ્ચ ।
કોણેષુ શંખ ઉરુગાય ઉપર્યુપેંદ્રસ્
તાર્ક્ષ્યઃ ક્ષિતૌ હલધરઃ પુરુષઃ સમંતાત્ ॥ 2 ॥
ઇંદ્રિયાણિ હૃષીકેશઃ પ્રાણાન્નારાયણોઽવતુ ।
શ્વેતદ્વીપપતિશ્ચિત્તં મનો યોગેશ્વરોઽવતુ ॥ 3 ॥
પૃશ્નિગર્ભસ્તુ તે બુદ્ધિમાત્માનં ભગવાન્પરઃ ।
ક્રીડંતં પાતુ ગોવિંદઃ શયાનં પાતુ માધવઃ ॥ 4 ॥
વ્રજંતમવ્યાદ્વૈકુંઠ આસીનં ત્વાં શ્રિયઃ પતિઃ ।
ભુંજાનં યજ્ઞભુક્પાતુ સર્વગ્રહભયંકરઃ ॥ 5 ॥
ડાકિન્યો યાતુધાન્યશ્ચ કુષ્માંડા યેઽર્ભકગ્રહાઃ ।
ભૂતપ્રેતપિશાચાશ્ચ યક્ષરક્ષોવિનાયકાઃ ॥ 6 ॥
કોટરા રેવતી જ્યેષ્ઠા પૂતના માતૃકાદયઃ ।
ઉન્માદા યે હ્યપસ્મારા દેહપ્રાણેંદ્રિયદ્રુહઃ ॥ 7 ॥
સ્વપ્નદૃષ્ટા મહોત્પાતા વૃદ્ધબાલગ્રહાશ્ચ યે ।
સર્વે નશ્યંતુ તે વિષ્ણોર્નામગ્રહણભીરવઃ ॥ 8 ॥
॥ ઇતિ શ્રીમદ્ભાગવતે દશમસ્કંધે ગોપીકૃતબાલરક્ષા સમાપ્તા ॥
