kṛṣṇa yajurvēdīya taittirīya āraṇyakē dvitīyaḥ prapāṭhakaḥ - svādhyāyabrāhmaṇaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1
saha̠ vai dē̠vānā̠-ñchāsu̍rāṇā-ñcha ya̠jñau prata̍tāvāstāṃ va̠yagg​ sva̠rgaṃ lō̠kamē̎ṣyāmō va̠yamē̎ṣyāma̠ iti̠ tē-'su̍rā-ssa̠nnahya̠ saha̍sai̠vācha̍ra-nbrahma̠charyē̍ṇa̠ tapa̍saiva dē̠vāstē-'su̍rā amuhya̠gg̠stē na prājā̍na̠gg̠stē parā̍bhava̠ntē na sva̠rgaṃ lō̠kamā̍ya̠n, prasṛ̍tēna̠ vai ya̠jñēna̍ dē̠vā-ssva̠rgaṃ lō̠kamā̍ya̠-nna prasṛ̍tē̠nāsu̍rā̠-nparā̍-'bhāvaya̠n ,prasṛ̍tō ha̠ vai ya̍jñōpavī̠tinō̍ ya̠jñō-'pra̍sṛ̠tō-'nu̍pavī̠tinō̠ yatkiñcha̍ brāhma̠ṇō ya̍jñōpavī̠tyadhī̍tē̠ yaja̍ta ē̠va ta-ttasmā̎-dyajñōpavī̠tyē̍vādhī̍yīta yā̠jayē̠-dyajē̍ta vā ya̠jñasya̠ prasṛ̍tyā̠ , aji̍na̠ṃ vāsō̍ vā dakṣiṇa̠ta u̍pa̠vīya̠ dakṣi̍ṇa-mbā̠humuddha̍ra̠tē-'va̍ dhattē sa̠vyamiti̍ yajñōpavī̠tamē̠tadē̠va vipa̍rīta-mprāchīnāvī̠tagṃ sa̠ṃvīta̍-mmānu̠ṣam ॥ 1 ॥

anuvākaṃ 2
rakṣāgṃ̍si̠ havā̍ purōnuvā̠kē tapō-'gra̍matiṣṭhanta̠ tā-npra̠jāpa̍ti-rva̠rēṇō̠pāma̍ntrayata̠ tāni̠ vara̍mavṛṇītādi̠tyō nō̠ yōddhā̠ iti̠ tā-npra̠jāpa̍ti-rabravī̠-dyōdha̍ya̠ddhvamiti̠ tasmā̠dutti̍ṣṭhanta̠gṃ̠ havā̠ tāni̠ rakṣāg̍syādi̠tyaṃ yōdha̍yanti̠ yāva̍dasta̠manva̍gā̠-ttāni̍ ha̠ vā ē̠tāni̠ rakṣāgṃ̍si gāyatri̠yā 'bhi̍mantritē̠nāmbha̍sā śāmyanti̠ tadu̍ ha̠ vā ē̠tē bra̍hmavā̠dina̍ḥ pū̠rvābhi̍mu̠khā-ssa̠ndhyāyā̎-ṅgāyatri̠yā-'bhi̍mantritā̠ āpa̍ ū̠rdhvaṃ vikṣi̍panti̠ tā ē̠tā āpō̍ va̠jrībhū̠tvā tāni̠ rakṣāgṃ̍si
ma̠ndēhā-'ru̍ṇē dvī̠pē prakṣi̍panti̠ ya-tpra̍dakṣi̠ṇa-mprakra̍manti̠ tēna̍ pā̠pmāna̠mava̍ dhūnvantyu̠dyanta̍masta̠ṃ yanta̍mādi̠tya-ma̍bhiddhyā̠yan ku̠rva-nbrā̎hma̠ṇō vi̠dvān-thsa̠kala̍-mbha̠drama̍śnutē̠ 'sāvā̍di̠tyō bra̠hmēti̠ brahmai̠va sa-nbrahmā̠pyēti̠ ya ē̠vaṃ vēda̍ ॥ 2 ॥

anuvākaṃ 3
ya-ddē̍vā dēva̠hēḍa̍na̠ṃ (dēva̠hēḻa̍na̠ṃ) dēvā̍saśchakṛ̠mā va̠yam ।
ādi̍tyā̠stasmā̎nmā muñchata̠rtasya̠rtēna̠ māmi̠ta ॥
dēvā̍ jīvanakā̠myā ya-dvā̠chā-'nṛ̍tamūdi̠ma ।
tasmā̎nna i̠ha mu̍ñchata̠ viśvē̍ dēvā-ssa̠jōṣa̍saḥ ॥
ṛ̠tēna̍ dyāvāpṛthivī ṛ̠tēna̠ tvagṃ sa̍rasvati ।
kṛ̠tānna̍ḥ pā̠hyēna̍sō̠ ya-tkiñchānṛ̍tamūdi̠ma ॥
i̠ndrā̠gnī mi̠trāvaru̍ṇau̠ sōmō̍ dhā̠tā bṛha̠spati̍ḥ ।
tē nō̍ muñcha̠ntvēna̍sō̠ yada̠nyakṛ̍tamāri̠ma ॥
sa̠jā̠ta̠śa̠gṃ̠sādu̠ta jā̍miśa̠gṃ̠ sājjyāya̍sa̠-śśagṃsā̍du̠ta vā̠ kanī̍yasaḥ ।
anā̍dhṛṣṭa-ndē̠vakṛ̍ta̠ṃ yadēna̠stasmā̠-ttvama̠smā-ñjā̍tavēdō mumugdhi ॥
yadvā̠chā ya-nmana̍sā bā̠hubhyā̍-mū̠rubhyā̍maṣṭhī̠vadbhyā̍ śi̠śnairyadanṛ̍ta-ñchakṛ̠mā va̠yam ।
a̠gnirmā̠ tasmā̠dēna̍sā̠ gār​ha̍patya̠ḥ pramu̍ñchatu chakṛ̠ma yāni̍ duṣkṛ̠tā ॥
yēna̍ tri̠tō a̍rṇa̠vā-nni̍rba̠bhūva̠ yēna̠ sūrya̠-ntama̍sō nirmu̠mōcha̍ ।
yēnēndrō̠ viśvā̠ aja̍hā̠darā̍tī̠stēnā̠ha-ñjyōti̍ṣā̠ jyōti̍rānaśā̠na ā̎kṣi ॥
ya-tkusī̍da̠mapra̍tītta̠-mmayē̠ha yēna̍ ya̠masya̍ ni̠dhinā̠ charā̍mi ।
ē̠tattada̍gnē anṛ̠ṇō bha̍vāmi̠ jīva̍nnē̠va prati̠ tattē̍ dadhāmi ॥
yanmayi̍ mā̠tā garbhē̍ sa̠ti । ēna̍ścha̠kāra̠ yatpi̠tā । a̠gnirmā̠ tasmā̠dēna̍saḥ ॥ yadā̍ pi̠pēṣa̍ mā̠tara̍-mpi̠tara̎m । pu̠traḥ pramu̍ditō̠ dhayann̍ । ahigṃ̍sitau pi̠tarau̠ mayā̠ tat । tada̍gnē anṛ̠ṇō bha̍vāmi ॥ yada̠ntari̍kṣa-mpṛthi̠vīmu̠ta dyām । yanmā̠tara̍-mpi̠tara̍ṃ vā jihigṃsi̠ma । a̠gnirmā̠ tasmā̠dēna̍saḥ ॥
yadā̠śasā̍ ni̠śasā̠ yatpa̍rā̠śasā̎ । yadēna̍ścha kṛ̠mā nūta̍na̠ṃ yatpu̍rā̠ṇam । a̠gnirmā̠ tasmā̠dēna̍saḥ ॥ ati̍krāmāmi duri̠taṃ yadēna̍ḥ । jahā̍mi ri̠pra-mpa̍ra̠mē sa̠dhasthē̎ । yatra̠ yanti̍ su̠kṛtō̠ nāpi̍ du̠ṣkṛta̍ḥ । tamārō̍hāmi su̠kṛtā̠-nnu lō̠kam ॥ tri̠tē dē̠vā a̍mṛjatai̠-tadēna̍ḥ । tri̠ta ē̠tanma̍nu̠ṣyē̍ṣu māmṛjē । tatō̍ mā̠ yadi̠ kiñchi̍dāna̠śē । a̠gnirmā̠ tasmā̠dēna̍saḥ ॥
di̠vi jā̠tā a̠phsu jā̠tāḥ । yā jā̠tā ōṣa̍dhībhyaḥ । athō̠ yā a̍gni̠jā āpa̍ḥ । tā na̍-śśundhantu̠ śundha̍nīḥ ॥ yadāpō̠ nakta̍-nduri̠ta-ñcharā̍ma । yadvā̠ divā̠ nūta̍na̠ṃ yatpu̍rā̠ṇam । hira̍ṇya-varṇā̠stata̠ utpu̍nīta naḥ ॥ i̠ma-mmē̍ varuṇa śrudhī̠ hava̍ma̠dyā cha̍ mṛḍaya । tvāma̍va̠syurā cha̍kē ॥
tattvā̍ yāmi̠ brahma̍ṇā̠ vanda̍māna̠-stadā śā̎stē̠ yaja̍mānō ha̠virbhi̍ḥ । ahē̍ḍamānō varuṇē̠ha bō̠ddhyuru̍śasa̠ mā na̠ āyu̠ḥ pramō̍ṣīḥ ॥ tva-nnō̍ agnē̠ varu̍ṇasya vi̠dvā-ndē̠vasya̠ hēḍō-'va̍ yāsi sīṣṭhāḥ । yaji̍ṣṭhō̠ vahni̍ tama̠-śśōśu̍chānō̠ viśvā̠ dvēṣā̍si̠ pramu̍mugdhya̠smat ॥ sa tvannō̍ agnē-'va̠mō bha̍vō̠tī nēdi̍ṣṭhō a̠syā u̠ṣasō̠ vyu̍ṣṭau । ava̍ yakṣva nō̠ varu̍ṇa̠ rarā̍ṇō vī̠hi mṛ̍ḍī̠ka su̠havō̍ na ēdhi ॥ tvama̍gnē a̠yā-'si̍ । a̠yā sanmana̍sā hi̠taḥ । a̠yā san.ha̠vyamū̍hiṣē । a̠yā nō̍ dhēhi bhēṣa̠jam । i̠ṣṭō a̠gnirāhu̍taḥ । svāhā̍kṛtaḥ pipartu naḥ । sva̠gā dē̠vēbhya̍ i̠da-nnama̍ḥ ॥ 3 ॥
(mu̠mu̠gdhi̠ sa̠pta cha̍) (a. 3)

anuvākaṃ 4
yadadī̎vyannṛ̠ṇama̠ha-mba̠bhūvādi̍-thsanvā sañja̠gara̠ janē̎bhyaḥ । a̠gnirmā̠ tasmā̠dindra̍ścha saṃvidā̠nau pramu̍ñchatām ॥ yaddhastā̎bhyā-ñcha̠kara̠ kilbi̍ṣāṇya̠kṣāṇā̎ṃ va̠gnumu̍pa̠jighna̍mānaḥ ।
u̠gra̠mpa̠śyā cha̍ rāṣṭra̠bhṛchcha̠ tānya̍phsa̠rasā̠ vanu̍dattā-mṛ̠ṇāni̍ ॥ ugra̍paṃśyē̠ rāṣṭra̍bhṛ̠-tkilbi̍ṣāṇi̠ yada̠kṣavṛ̍tta̠manu̍dattamē̠tat ।
nēnna̍ ṛ̠ṇānṛ̠ṇava̠ ithsa̍mānō ya̠masya̍ lō̠kē adhi̍ rajju̠rāya̍ ॥ ava̍ tē̠ hēḍō̍ varuṇa̠ namō̍bhi̠rava̍ ya̠jñēbhi̍rīmahē ha̠virbhi̍ḥ । kṣaya̍nna̠smabhya̍masura prachētō̠ rāja̠nnēnāgṃ̍si śiśrathaḥ kṛ̠tāni̍ ॥ udu̍tta̠maṃ va̍ruṇa̠ pāśa̍ma̠smadavā̍-'dha̠maṃ vima̍ddhya̠magg​ śra̍thāya । athā̍ va̠yamā̍ditya vra̠tē tavā-'nā̍gasō̠ adi̍tayē syāma ॥ i̠ma-mmē̍ varuṇa śrudhī̠ hava̍ma̠dyā cha̍ mṛḍaya । tvāma̍va̠syurā cha̍kē ॥
tattvā̍ yāmi̠ brahma̍ṇā̠ vanda̍māna̠-stadā śā̎stē̠ yaja̍mānō ha̠virbhi̍ḥ । ahē̍ḍamānō varuṇē̠ha bō̠ddhyuru̍śasa̠ mā na̠ āyu̠ḥ pramō̍ṣīḥ ॥ tva-nnō̍ agnē̠ varu̍ṇasya vi̠dvā-ndē̠vasya̠ hēḍō-'va̍ yāsi sīṣṭhāḥ । yaji̍ṣṭhō̠ vahni̍ tama̠-śśōśu̍chānō̠ viśvā̠ dvēṣā̍si̠ pramu̍mugdhya̠smat ॥ sa tvannō̍ agnē-'va̠mō bha̍vō̠tī nēdi̍ṣṭhō a̠syā u̠ṣasō̠ vyu̍ṣṭau । ava̍ yakṣva nō̠ varu̍ṇa̠ rarā̍ṇō vī̠hi mṛ̍ḍī̠ka su̠havō̍ na ēdhi ॥ saṅku̍sukō̠ viku̍sukō nir-ṛ̠thō yaścha̍ nisva̠naḥ । tē-'(1̠)sma-dyakṣma̠manā̍gasō dū̠rā-ddū̠rama̍chīchatam ॥ nirya̍kṣmamachīchatē kṛ̠tyā-nnir-ṛ̍ti-ñcha । tēna̠ yō-'(1̠)smathsamṛ̍chChātai̠ tama̍smai̠ prasu̍vāmasi ॥ du̠śśa̠gṃ̠sā̠nu̠śa̠gṃ̠sābhyā̎-ṅgha̠ṇēnā̍nugha̠ṇēna̍ cha । tēnā̠nyō-'(1)̠sma-thsamṛ̍chChātai̠ tama̍smai̠ prasu̍vāmasi ॥
saṃvarcha̍sā̠ paya̍sā̠ santa̠nūbhi̠raga̍nmahi̠ mana̍sā̠ sagṃ śi̠vēna̍ । tvaṣṭā̍ nō̠ atra̠ vida̍dhātu rā̠yō-'nu̍mār​ṣṭu ta̠nvō(1̠) ya-dvili̍ṣṭam ॥ 4 ॥
(kṛ̠tyā-nnir-ṛ̍ti-ñcha̠ pañcha̍ cha) (a. 4)

anuvākaṃ 5
āyu̍ṣṭē vi̠śvatō̍ dadhada̠yama̠gnirvarē̎ṇyaḥ ।
puna̍stē prā̠ṇa āyā̍ti̠ parā̠ yakṣmagṃ̍ suvāmi tē ॥
ā̠yu̠rdā a̍gnē ha̠viṣō̍ juṣā̠ṇō ghṛ̠tapra̍tīkō ghṛ̠tayō̍nirēdhi । ghṛ̠ta-mpī̠tvā madhu̠ chāru̠ gavya̍-mpi̠tēva̍ pu̠trama̠bhi ra̍kṣatādi̠mam ॥
i̠mama̍gna̠ āyu̍ṣē̠ varcha̍sē kṛdhi ti̠gmamōjō̍ varuṇa̠ sagṃśi̍śādhi । mā̠tēvā̎smā aditē̠ śarma̍ yachCha̠ viśvē̍ dēvā̠ jara̍daṣṭi̠-ryathā-'sa̍t ॥
agna̠ āyūgṃ̍ṣi pavasa̠ āsu̠vōrja̠miṣa̍-ñcha naḥ ।
ā̠rē bā̍dhasva du̠chChunā̎m ॥ agnē̠ pava̍sva̠ svapā̍ a̠smē varcha̍-ssu̠vīrya̎m । dadha̍-dra̠yi-mmayi̠ pōṣa̎m ॥ 5.1a ॥
a̠gnir-ṛṣi̠ḥ pava̍māna̠ḥ pāñcha̍janyaḥ pu̠rōhi̍taḥ । tamī̍mahē mahāga̠yam ॥ agnē̍ jā̠tā-npraṇu̍dā na-ssa̠patnā̠-npratyajā̍tāñjātavēdō nudasva ।
a̠smē dī̍dihi su̠manā̠ ahē̍ḍa̠ñCharma̍ntē (ahē̍ḻa̠ñCharma̍ntē) syāma tri̠varū̍tha u̠dbhau ॥
saha̍sā jā̠tā-npraṇu̍dā na-ssa̠patnā̠-npratyajā̍tāñjātavēdō nudasva । adhi̍ nō brūhi sumana̠syamā̍nō va̠yagg​ syā̍ma̠ praṇu̍dā na-ssa̠patnān̍ ॥ agnē̠ yō nō̠-'bhitō̠ janō̠ vṛkō̠ vārō̠ jighāgṃ̍sati । tāg​stvaṃ vṛ̍trahañjahi̠ vasva̠smabhya̠mā bha̍ra ॥ agnē̠ yō nō̍-'bhi̠dāsa̍ti samā̠nō yaścha̠ niṣṭya̍ḥ । taṃ va̠yagṃ sa̠midha̍-ṅkṛ̠tvā tubhya̍ma̠gnē-'pi̍daddhmasi ॥ 5.1b ॥

yō na̠-śśapā̠daśa̍patō̠ yaścha̍ na̠-śśapa̍ta̠-śśapā̎t ।
u̠ṣāścha̠ tasmai̍ ni̠mrukcha̠ sarva̍-mpā̠pagṃ samū̍hatām ॥
yō na̍-ssa̠patnō̠ yō raṇō̠ martō̍-'bhi̠dāsa̍ti dēvāḥ ।
i̠ddhmasyē̍va pra̠kṣāya̍tō̠ mā tasyōchChē̍ṣi̠ kiñcha̠na ॥ yō māndvēṣṭi̍ jātavēdō̠ ya-ñchā̠ha-ndvēṣmi̠ yaścha̠ mām । sarvā̠g̠stāna̍gnē̠ sanda̍ha̠ yāg​śchā̠ha-ndvēṣmi̠ yē cha̠ mām ॥ yō a̠smabhya̍marātī̠yā-dyaścha̍ nō̠ dvēṣa̍tē̠ jana̍ḥ । nindā̠dyō a̠smā-ndiphsā̎chcha̠ sarvā̠g̠stānma̍ṣma̠ṣā ku̍ru ॥
sagṃśi̍ta-mmē̠ brahma̠ sagṃśi̍taṃ vī̠ryām (1̠) bala̎m । sagṃśi̍ta-ṅkṣa̠tra-mmē̍ ji̠ṣṇu yasyā̠hamasmi̍ pu̠rōhi̍taḥ ॥
udē̍ṣā-mbā̠hū a̍tira̠mu-dvarchō̠ athō̠ bala̎m ।
kṣi̠ṇōmi̠ brahma̍ṇā̠-'mitrā̠nunna̍yāmi̠ svāँ(2) a̠ham ॥ puna̠rmana̠ḥ puna̠rāyu̍rma̠ āgā̠-tpuna̠śchakṣu̠ḥ puna̠-śśrōtra̍-mma̠ āgā̠t
puna̍ḥ prā̠ṇaḥ puna̠rādhī̍ta-mma̠ āgā̎t ।
vai̠śvā̠na̠rō mē-'da̍bdhastanū̠pā ava̍bādhatā-nduri̠tāni̠ viśvā̎ ॥ 5.1ch ॥
(pōṣa̍ṃ - daddhmasi - pu̠rōhi̍taścha̠tvāri̍ cha) (a. 5)

anuvākaṃ 6
vai̠śvā̠na̠rāya̠ prati̍vēdayāmō̠ yadī̍nṛ̠ṇagṃ sa̍ṅga̠rō dē̠vatā̍su । sa ē̠tā-npāśā̎-npra̠mucha̠-npravē̍da̠ sa nō̍ muñchātu duri̠tādava̠dyāt ॥
vai̠śvā̠na̠raḥ pava̍yānnaḥ pa̠vitrai̠rya-thsa̍ṅga̠ra-ma̠bhidhāvā̎myā̠śām । anā̍jāna̠-nmana̍sā̠ yācha̍mānō̠ yadatrainō̠ ava̠ ta-thsu̍vāmi ॥
a̠mī yē su̠bhagē̍ di̠vi vi̠chṛtau̠ nāma̠ tāra̍kē ।
prēhāmṛta̍sya yachChatā-mē̠ta-dba̍ddhaka̠mōcha̍nam ॥
viji̍hīr​ṣva lō̠kān kṛ̍dhi ba̠ndhā-nmu̍ñchāsi̠ baddha̍kam । yōnē̍riva̠ prachyu̍tō̠ garbha̠-ssarvā̎-npa̠thō a̍nuṣva ॥
sa pra̍jā̠na-nprati̍gṛbhṇīta vi̠dvā-npra̠jāpa̍tiḥ prathama̠jā ṛ̠tasya̍ । a̠smābhi̍rda̠tta-ñja̠rasa̍ḥ pa̠rastā̠dachChi̍nna̠-ntantu̍manu̠ sañcha̍rēma ॥ 6.1a ॥

ta̠ta-ntantu̠manvēkē̠ anu̠ sañcha̍ranti̠ yēṣā̎-nda̠tta-mpitrya̠māya̍navat । a̠ba̠ndhvēkē̠ dada̍taḥ pra̠yachChā̠-ddātu̠chchē-chCha̠knavā̠gṃ̠ sa-ssva̠rga ē̍ṣām ॥
āra̍bhēthā̠manu̠ sagṃra̍bhēthāgṃ samā̠na-mpanthā̍mavathō ghṛ̠tēna̍ । yadvā̎-mpū̠rta-mpari̍viṣṭa̠ṃ yada̠gnau tasmai̠ gōtrā̍yē̠ha jāyā̍patī̠ sagṃra̍bhēthām ॥ yada̠ntari̍kṣa-mpṛthi̠vīmu̠ta dyāṃ yanmā̠tara̍-mpi̠tara̍ṃ vā jihigṃsi̠ma ।
a̠gnirmā̠ tasmā̠dēna̍sō̠ gār​ha̍patya̠ unnō̍ nēṣa-dduri̠tā yāni̍ chakṛ̠ma ॥ bhūmi̍rmā̠tā-'di̍tirnō ja̠nitra̠-mbhrātā̠ntari̍kṣa-ma̠bhiśa̍sta ēnaḥ ।
dyaurna̍ḥ pi̠tā pi̍tṛ̠yāchCha-mbha̍vāsi jā̠mi mi̠tvā mā vi̍vithsi lō̠kāt ॥ yatra̍ su̠hārda̍-ssu̠kṛtō̠ mada̍ntē vi̠hāya̠ rōga̍-nta̠nvā(1)̠gg̠ svāyā̎m ।
a̠ślō̠ṇāṅgai̠rahru̍tā-ssva̠rgē tatra̍ paśyēma pi̠tara̍-ñcha pu̠tram ॥ yadanna̠madmyanṛ̍tēna dēvā dā̠syannadā̎syannu̠ta vā̍ kari̠ṣyann ।
ya-ddē̠vānā̠-ñchakṣu̠ṣyāgō̠ asti̠ yadē̠va kiñcha̍ pratijagrā̠hama̠gnirmā̠ tasmā̍danṛ̠ṇa-ṅkṛ̍ṇōtu ॥
yadanna̠madmi̍ bahu̠dhā virū̍pa̠ṃ vāsō̠ hira̍ṇyamu̠ta gāma̠jāmavi̎m ।
ya-ddē̠vānā̠-ñchakṣu̠ṣyāgō̠ asti̠ yadē̠va kiñcha̍ pratijagrā̠hama̠gnirmā̠ tasmā̍danṛ̠ṇa-ṅkṛ̍ṇōtu ॥
ya̠nmayā̍ mana̍sā vā̠chā̠ kṛ̠ta̠mēna̍ḥ kadā̠chana ।
sarvasmā̎-nmēḍi̍tō (mēḻa̍tā) mō̠gdhi̠ tvagṃ hi
vēttha̍ yathāta̠tham ॥ 6.1b ॥
(cha̠rē̠ma̠ - pu̠tragṃ ṣaṭcha̍) (a. 6)

anuvākaṃ 7
vāta̍raśanā ha̠ vā ṛṣa̍ya-śśrama̠ṇā ū̠rdhvama̍nthi̠nō ba̍bhūvu̠stā-nṛṣa̍yō̠-'rtha-mā̍ya̠gg̠stē ni̠lāya̍-machara̠gg̠stē-'nu̍praviśuḥ kūśmā̠ṇḍāni̠ tāg​-stēṣvanva̍vinda-ñChra̠ddhayā̍ cha̠ tapa̍sā cha̠ , tānṛṣa̍yō-'bruvan ka̠thā ni̠lāya̍-ñchara̠thēti̠ ta ṛṣī̍nabruva̠nnamō̍ vō-'stu bhagavantō̠-'smi-ndhā̎mni̠ kēna̍ va-ssaparyā̠mēti̠ tānṛṣa̍yō-'bruva-npa̠vitra̍-nnō brūta̠ yēnā̍rē̠pasa̍-ssyā̠mēti̠ ta ē̠tāni̍ sū̠ktānya̍paśya̠n̠. ,
ya-ddē̍vā dēva̠hēḍa̍na̠ṃ (dēva̠hēḻa̍na̠ṃ) ँyadadī̎vyannṛ̠ṇama̠ha-mba̠bhūvāyu̍ṣṭē vi̠śvatō̍
dadha̠dityē̠tairājya̍-ñjuhuta vaiśvāna̠rāya̠ prati̍vēdayāma̠ ityupa̍tiṣṭhata̠ yada̍rvā̠chīna̠mēnō̎ bhrūṇaha̠tyāyā̠stasmā̎-nmōkṣyaddhva̠ iti̠ ,ta ē̠taira̍juhavu̠stē-'rē̠pasō̍-'bhavan karmā̠diṣvē̠tai-rju̍huyā-tpū̠tō dē̍valō̠kā-nthsama̍śnutē ॥ 7 ॥

anuvākaṃ 8
kū̠śmā̠ṇḍai-rju̍huyā̠-dyō-'pū̍ta iva̠ manyē̍ta̠ yathā̎ stē̠nō yathā̎ bhrūṇa̠haivamē̠ṣa bha̍vati̠ yō-'yōnau̠ rēta̍-ssi̠ñchati̠, yada̍rvā̠chīna̠mēnō̎ bhrūṇaha̠tyāyā̠stasmā̎-nmuchyatē̠ yāva̠dēnō̍ dī̠kṣāmupai̍ti dīkṣi̠ta ē̠tai-ssa̍ta̠ti ju̍hōti saṃvathsa̠ra-ndī̎kṣi̠tō bha̍vati saṃvathsa̠rādē̠vātmāna̍-mpunītē̠ māsa̍-ndīkṣi̠tō bha̍vati̠ yō māsa̠-ssa saṃvathsa̠ra-ssa̍ṃvathsa̠rādē̠vātmāna̍-mpunītē̠ chatu̍rvigṃśati̠gṃ̠ rātrī̎rdīkṣi̠tō bha̍vati̠ chatu̍rvigṃśati-rardhamā̠sā-ssa̍ṃvathsa̠ra-ssa̍ṃvathsa̠rādē̠vātmāna̍-mpunītē̠ dvāda̍śa̠ rātrī̎rdīkṣi̠tō bha̍vati̠ dvāda̍śa̠ māsā̎-ssaṃvathsa̠ra-ssa̍ṃvathsa̠rādē̠vātmāna̍-mpunītē̠ ṣaḍrātrī̎rdīkṣi̠tō bha̍vati̠ ṣaḍvā ṛ̠tava̍-ssaṃvathsa̠ra-ssa̍ṃvathsa̠rādē̠vātmāna̍-mpunītē ti̠srō rātrī̎-rdīkṣi̠tō bha̍vati tri̠padā̍ gāya̠trī gā̍yatri̠yā ē̠vātmāna̍-mpunītē̠ na mā̠gṃ̠sama̍śñīyā̠nna striya̠mupē̍yā̠nnōparyā̍sīta̠ jugu̍phsē̠tānṛ̍tā̠tpayō̎ brāhma̠ṇasya̍ vra̠taṃ ya̍vā̠gū rā̍ja̠nya̍syā̠mikṣā̠ vaiśya̠syāthō̍ sau̠myē-'pya̍ddhva̠ra ē̠tadvra̠ta-mbrū̍yā̠-dyadi̠ manyē̍-tōpa̠dasyā̠mītyō̍da̠na-ndhā̠nā-ssaktū̎-ṅghṛ̠tamityanu̍vratayēdā̠tmanō-'nu̍padāsāya ॥ 8 ॥

anuvākaṃ 9
a̠jān. ha̠ vai pṛśñīg̍stapa̠syamā̍nā̠-nbrahma̍ svaya̠mbhva̍bhyāna̍r​ṣa̠tta ṛṣa̍yō-'bhava̠-ntadṛṣī̍ṇā-mṛṣi̠tva-ntā-ndē̠vatā̠mupā̍tiṣṭhanta ya̠jñakā̍mā̠sta ē̠ta-mbra̍hmaya̠jña-ma̍paśya̠n-tamā-'ha̍ra̠n-tēnā̍yajanta̠ yadṛ̠chō-'ddhyagī̍ṣata̠ tāḥ paya̍ āhutayō dē̠vānā̍mabhava̠n̠. ya-dyajūgṃ̍ṣi ghṛ̠tāhu̍tayō̠ ya-thsāmā̍ni̠ sōmā̍hutayō̠ yadatha̍rvāṅgi̠rasō̠ maddhvā̍hutayō̠ yadbrā̎hma̠ṇānī̍tihā̠sān-pu̍rā̠ṇāni̠ kalpā̠-ngāthā̍ nārāśa̠gṃ̠sīrmē̍dāhu̠tayō̍ dē̠vānā̍-mabhava̠ntābhi̠ḥ, kṣudha̍-mpā̠pmāna̠-mapā̎ghna̠-nnapa̍hatapāpmānō dē̠vā-ssva̠rgaṃ lō̠kamā̍ya̠-nbrahma̍ṇa̠-ssāyu̍jya̠-mṛṣa̍yō-'gachChann ॥ 9 ॥

anuvākaṃ 10
pañcha̠ vā ē̠tē ma̍hāya̠jñā-ssa̍ta̠ti pratā̍yantē sata̠ti santi̍ṣṭhantē dēvaya̠jñaḥ pi̍tṛya̠jñō bhū̍taya̠jñō ma̍nuṣyaya̠jñō bra̍hmaya̠jña iti̠ yada̠gnau ju̠hōtya̠pi sa̠midha̠-nta-ddē̍vaya̠jña-ssanti̍ṣṭhatē̠ ya-tpi̠tṛbhya̍-ssva̠dhā ka̠rōtyapya̠pasta-tpi̍tṛya̠jña-ssanti̍ṣṭhatē̠ya-dbhū̠tēbhyō̍ ba̠ligṃ hara̍ti̠ ta-dbhū̍taya̠jña-ssanti̍ṣṭhatē̠ yadbrā̎hma̠ṇēbhyō-'nna̠-ndadā̍ti̠ tanma̍nuṣyaya̠jña-ssanti̍ṣṭhatē̠ yathsvā̎ddhyā̠ya-madhī̍yī̠-taikā̍mapyṛ̠chaṃ yaju̠ḥ-sāma̍ vā̠ tadbra̍hmaya̠jña-ssanti̍ṣṭhatē̠ yadṛ̠chō-'dhī̍tē̠ paya̍sa̠ḥ kūlyā̍ asya pi̠tṝ-nthsva̠dhā a̠bhiva̍hanti̠ ya-dyajūgṃ̍ṣi ghṛ̠tasya̍ kūlyā̠ ya-thsāmā̍ni̠ sōma̍ ēbhyaḥ pavatē̠ yadatha̍rvāṅgi̠rasō̠ madhō̎ḥ kūlyā̠ yadbrā̎hma̠ṇā-nī̍tihā̠sān-pu̍rā̠ṇāni̠ kalpā̠-ngāthā̍ nārāśa̠gṃ̠sī-rmēda̍sa̠ḥ kūlyā̍ asya pi̠tṝn-thsva̠dhā a̠bhiva̍hanti̠ yadṛ̠chō-'dhī̍tē̠ paya̍ āhutibhirē̠va ta-ddē̠vāg​sta̍rpayati̠ ya-dyajūgṃ̍ṣi ghṛ̠tāhu̍tibhi̠rya-thsāmā̍ni̠ sōmā̍hutibhi̠-ryadatha̍rvāṅgi̠rasō̠ maddhvā̍hutibhi̠-ryadbrā̎hma̠ṇā-nī̍tihā̠sān-pu̍rā̠ṇāni̠ kalpā̠-ngāthā̍ nārāśa̠gṃ̠sī-rmē̍dāhu̠tibhi̍rē̠va ta-ddē̠vāg​sta̍rpayati̠ ta ē̍na-ntṛ̠ptā āyu̍ṣā̠ tēja̍sā̠ varcha̍sā śri̠yā yaśa̍sā brahmavarcha̠sēnā̠nnādyē̍na cha tarpayanti ॥ 10 ॥

anuvākaṃ 11
bra̠hma̠ya̠jñēna̍ ya̠kṣyamā̍ṇa̠ḥ prāchyā̎-ndi̠śi grāmā̠daCha̍dirda̠r̠śa udī̎chyā-mprāgudī̠chyāṃ vō̠dita̍ ādi̠tyē da̍kṣiṇa̠ta u̍pa̠vīyō̍pa̠viśya̠ hastā̍vava̠nijya̠ trirāchā̍mē̠ddviḥ pa̍ri̠mṛjya̍ sa̠kṛdu̍pa̠spṛśya̠ śira̠śchakṣu̍ṣī̠ nāsi̍kē̠ śrōtrē̠ hṛda̍yamā̠labhya̠ ya-ttrirā̠chāma̍ti̠ tēna̠ ṛcha̍ḥ prīṇāti̠ yaddviḥ pa̍ri̠mṛja̍ti̠ tēna yajūgṃ̍ṣi̠ ya-thsa̠kṛdu̍pa̠spṛśa̍ti̠ tēna̠ sāmā̍ni̠ (ya-thsa̠vya-mpā̠ṇi pā̠dau prō̠kṣati̠) yachChira̠śchakṣu̍ṣī̠ nāsi̍kē̠ śrōtrē̠ hṛda̍yamā̠labha̍tē̠ tēnātha̍rvāṅgi̠rasō̎ brāhma̠ṇā-nī̍tihā̠sā-npu̍rā̠ṇāni̠ kalpā̠-ngāthā̍ nārāśa̠gṃ̠sīḥ prī̍ṇāti̠ darbhā̍ṇā-mma̠hadu̍pa̠stīryō̠pastha̍-ṅkṛ̠tvā prāṃāsī̍na-ssvāddhyā̠yamadhī̍yītā̠pāṃ vā ē̠ṣa ōṣa̍dhīnā̠gṃ̠ rasō̠ ya-dda̠rbhā-ssara̍same̠va brahma̍ kurutē dakṣiṇōtta̠rau pā̠ṇī (pā̠dau) kṛ̠tvā sapa̠vitrā̠vōmiti̠ prati̍padyata ē̠tadvai yaju̍strayīṃ vi̠dyā-mpratyē̠ṣā vāgē̠tatpa̍ra̠mama̠kṣara̠-ntadē̠tadṛ̠chā-'bhyu̍ktamṛ̠chō a̠kṣarē̍ para̠mē vyō̍ma̠n̠. yasmi̍-ndē̠vā adhi̠ viśvē̍ niṣē̠duryastanna vēda̠ kimṛ̠chā ka̍riṣyati̠ ya ittadvi̠dusta i̠mē samā̍sata̠ iti̠ trīnē̠va prāyu̍ṅkta̠ bhūrbhuva̠ssva̍rityā̍hai̠tadvai vā̠cha-ssa̠tyaṃ yadē̠va vā̠cha-ssa̠tya-nta-tprāyu̠ṅktātha̍ sāvi̠trī-ṅgā̍ya̠trī-ntriranvā̍ha pa̠chChō̎-'rdharcha̍śō-'navā̠nagṃ sa̍vi̠tā śriya̍ḥ prasavi̠tā śriya̍mē̠vāpnō̠t yathō̎ pra̠jñāta̍yai̠va pra̍ti̠padā̠ Chandāgṃ̍si̠ prati̍padyatē ॥ 11 ॥

anuvākaṃ 12
grāmē̠ mana̍sā svāddhyā̠yamadhī̍yīta̠ divā̠ nakta̍ṃ vē̠ti ha̍ smā̠ha śau̠cha ā̎hnē̠ya u̠tāra̍ṇyē̠-'bala̍ u̠ta vā̠chōta tiṣṭha̍nnu̠ta vraja̍nnu̠tāsī̍na u̠ta śayā̍nō̠-'dhīyī̍tai̠va svā̎ddhyā̠ya-ntapa̍svī̠ puṇyō̍ bhavati̠ ya ē̠vaṃ vi̠dvān-thsvā̎ddhyā̠yamadhī̍tē̠ namō̠ brahma̍ṇē̠ namō̍ astva̠gnayē̠ nama̍ḥ pṛthi̠vyai nama̠ ōṣa̍dhībhyaḥ ।
namō̍ vā̠chē namō̍ vā̠chaspata̍yē̠ namō̠ viṣṇa̍vē bṛha̠tē ka̍rōmi ॥ 12 ॥

anuvākaṃ 13
ma̠ddhyandi̍nē pra̠bala̠madhī̍yītā̠sau khalu̠ vāvaiṣa ā̍di̠tyō yadbrā̎hma̠ṇastasmā̠ttar​hi̠ tēkṣṇi̍ṣṭha-ntapati̠ tadē̠ṣā-'bhyu̍ktā ॥
chi̠tra-ndē̠vānā̠muda̍gā̠danī̍ka̠-ñchakṣu̍rmi̠trasya̠ varu̍ṇasyā̠gnēḥ ।
ā-'prā̠ dyāvā̍pṛthi̠vī a̠ntari̍kṣa̠gṃ̠ sūrya̍ ā̠tmā jaga̍tasta̠sthuṣa̠śchēti̠ sa vā ē̠ṣa ya̠jña-ssa̠dyaḥ pratā̍yatē sa̠dya-ssanti̍ṣṭhatē̠ tasya̠ prākhsā̠yama̍vabhṛ̠thō namō̠ brahma̍ṇa̠ iti̍ paridhā̠nīyā̠-ntriranvā̍hā̠pa u̍pa̠spṛśya̍ gṛ̠hānē̍ti̠ tatō̠ yatkiñcha̠ dadā̍ti̠ sā dakṣi̍ṇā ॥ 13 ॥

anuvākaṃ 14
tasya̠ vā ē̠tasya̍ ya̠jñasya̠ mēghō̍ havi̠rdhāna̍ṃ vi̠dyuda̠gnirva̠r̠ṣagṃ ha̠vi-ssta̍nayi̠tnu-rva̍ṣaṭkā̠rō yada̍va̠sphūrja̍ti̠ sō-'nu̍vaṣaṭkā̠rō vā̠yurā̠tmā-'mā̍vā̠syā̎ sviṣṭa̠kṛdya ē̠vaṃ vi̠dvānmē̠ghē va̠r̠ṣati̍ vi̠dyōta̍mānē sta̠naya̍tyava̠sphūrja̍ti̠ pava̍mānē vā̠yāva̍māvā̠syā̍yāg​ svāddhyā̠yamadhī̍tē̠
tapa̍ ē̠va tatta̍pyatē̠ tapō̍ hi svāddhyā̠ya ityu̍tta̠ma-nnākagṃ̍ rōhatyutta̠ma-ssa̍mā̠nānā̎-mbhavati̠ yāva̍ntagṃ ha̠ vā i̠māṃ vi̠ttasya̍ pū̠rṇā-ndada̍thsva̠rgaṃ lō̠ka-ñja̍yati̠ tāva̍ntaṃ lō̠ka-ñja̍yati̠ bhūyāgṃ̍sa-ñchākṣa̠yya-ñchāpa̍ punarmṛ̠tyu-ñja̍yati̠ brahma̍ṇa̠-ssāyu̍jya-ṅgachChati ॥ 14 ॥

anuvākaṃ 15
tasya̠ vā ē̠tasya̍ ya̠jñasya̠ dvāva̍naddhyā̠yau yadā̠-''tmā-'śuchi̠-rya-ddē̠śa-ssamṛ̍ddhirdaiva̠tāni̠ ya ē̠vaṃ vi̠dvā-nma̍hārā̠tra u̠ṣasyudi̍tē̠ vraja̠gg̠stiṣṭha̠-nnāsī̍na̠-śśayā̍nō̠-'raṇyē̎ grāmē̠ vā yāva̍tta̠rasagg̍ svāddhyā̠yamadhī̍tē̠ sarvā̎n ँlō̠kāñja̍yati̠ sarvā̎n ँlō̠kāna̍nṛ̠ṇō-'nu̠ sañcha̍rati̠ tadē̠ṣā-'bhyu̍ktā ॥ a̠nṛ̠ṇā a̠sminna̍nṛ̠ṇāḥ para̍smigg​stṛ̠tīyē̍ lō̠kē a̍nṛ̠ṇā-ssyā̍ma । yē dē̍va̠yānā̍ u̠ta pi̍tṛ̠yāṇā̠-ssarvā̎-npa̠thō a̍nṛ̠ṇā ākṣī̍yē̠mētya̠gniṃ vai jā̠ta-mpā̠pmā ja̍grāha̠ tandē̠vā āhu̍tībhiḥ pā̠pmāna̠mapā̎ghna̠-nnāhu̍tīnāṃ ya̠jñēna̍ ya̠jñasya̠ dakṣi̍ṇābhi̠-rdakṣi̍ṇānā-mbrāhma̠ṇēna̍ brāhma̠ṇasya̠ Chandō̍bhi̠-śChanda̍sāg​ svāddhyā̠yēnāpa̍hatapāpmā svāddhyā̠yō̍ dē̠vapa̍vitra̠ṃ vā ē̠tattaṃ yō-'nū̎-thsṛ̠jatyabhā̍gō vā̠chi bha̍va̠tyabhā̍gō nā̠kē tadē̠ṣā-'bhyu̍ktā ॥ yasti̠tyāja̍ sakhi̠vida̠gṃ̠ sakhā̍ya̠-nna tasya̍ vā̠chyapi̍ bhā̠gō a̍sti । yadīgṃ̍ śṛ̠ṇōtya̠lakagṃ̍ śṛṇōti̠ na hi pra̠vēda̍ sukṛ̠tasya̠ panthā̠miti̠ tasmā̎-thsvāddhyā̠yō-'ddhyē̍ta̠vyō̍ yaṃ ya̍-ṅkra̠tumadhī̍tē̠ tēna̍ tēnāsyē̠ṣṭa-mbha̍vatya̠gnē-rvā̠yō-rā̍di̠tyasya̠ sāyu̍jya-ṅgachChati̠ tadē̠ṣā-'bhyu̍ktā ॥
yē a̠rvāṃu̠ta vā̍ purā̠ṇē vē̠daṃ vi̠dvāgṃsa̍ma̠bhitō̍ vadantyādi̠tyamē̠va tē pari̍vadanti̠ sarvē̍ a̠gni-ndvi̠tīya̍-ntṛ̠tīya̍-ñcha ha̠gṃ̠samiti̠ yāva̍tī̠rvai dē̠vatā̠stā-ssarvā̍ vēda̠vidi̍ brāhma̠ṇē va̍santi̠ tasmā̎-dbrāhma̠ṇēbhyō̍ vēda̠vidbhyō̍ di̠vēdi̍vē̠ nama̍skuryā̠nnāślī̠la-ṅkī̎rtayēdē̠tā ē̠va dē̠vatā̎ḥ prīṇāti ॥ 15 ॥

anuvākaṃ 16
richya̍ta iva̠ vā ē̠ṣa prēva ri̍chyatē̠ yō yā̠jaya̍ti̠ prati̍ vā gṛ̠hṇāti̍ yā̠jayi̍tvā pratigṛ̠hya vā-'na̍śna̠ntri-ssvā̎ddhyā̠yaṃ vē̠damadhī̍yīta trirā̠traṃ vā̍ sāvi̠trī-ṅgā̍ya̠trī-ma̠nvāti̍rēchayati̠ varō̠ dakṣi̍ṇā̠ varē̍ṇai̠va varagg̍ spṛṇōtyā̠tmā hi vara̍ḥ ॥ 16 ॥

anuvākaṃ 17
du̠hē ha̠ vā ē̠ṣa Chandāgṃ̍si̠ yō yā̠jaya̍ti̠ sa yēna̍ yajñakra̠tunā̍ yā̠jayē̠-thsō-'ra̍ṇya-mpa̠rētya̍ śuchau dē̠śē svā̎ddhyā̠ya-mē̠vaina̠-madhī̍yannāsī̠ta tasyā̠naśa̍na-ndī̠kṣā sthā̠namu̍pa̠sada̠ āsa̍nagṃ su̠tyā vāgju̠hūrmana̍ upa̠bhṛddhṛ̠tirdhru̠vā prā̠ṇō ha̠vi-ssāmā̎ddhva̠ryu-ssa vā ē̠ṣa ya̠jñaḥ
prā̠ṇada̍kṣi̠ṇō-'na̍ntadakṣiṇa̠-ssamṛ̍ddhataraḥ ॥ 17 ॥

anuvākaṃ 18
ka̠ti̠dhā-'va̍kīrṇī pravi̠śati̍ chatu̠rdhētyā̍hu-rbrahmavā̠dinō̍ ma̠ruta̍ḥ prā̠ṇairindra̠-mbalē̍na̠ bṛha̠spati̍-mbrahmavarcha̠sēnā̠gnimē̠vēta̍rēṇa̠ sarvē̍ṇa̠ tasyai̠tā-mprāya̍śchittiṃ vi̠dāñcha̍kāra sudē̠vaḥ kā̎śya̠pō yō
bra̍hmachā̠rya̍va̠kirē̍damāvā̠syā̍yā̠gṃ̠ rātryā̍ma̠gni-mpra̠ṇīyō̍pasamā̠dhāya̠ dvirājya̍syōpa̠ghāta̍-ñjuhōti̠ kāmāva̍kīrṇō̠-'smyava̍kīrṇō-'smi̠ kāma̠ kāmā̍ya̠ svāhā̠ kāmābhi̍drugdhō̠-'smyabhi̍drugdhō-'smi̠ kāma̠ kāmā̍ya̠ svāhētya̠mṛta̠ṃ vā ājya̍ma̠mṛta̍mē̠vātma-ndha̍ttē hu̠tvā praya̍tāñja̠liḥ kavā̍tiryaṅṅa̠gnima̠bhi ma̍ntrayēta̠ sa-mmā̍ siñchantu ma̠ruta̠-ssamindra̠-ssambṛha̠spati̍ḥ ।
sa-mmā̠-'yama̠gni-ssi̍ñcha̠tvāyu̍ṣā cha̠ balē̍na̠ chāyu̍ṣmanta-ṅkarōta̠ mēti̠ prati̍ hāsmai ma̠ruta̍ḥ prā̠ṇā-nda̍dhati̠ pratīndrō̠ bala̠-mprati̠ bṛha̠spati̍-rbrahmavarcha̠sa-mpratya̠gniri̠tara̠thsarva̠gṃ̠ sarva̍tanurbhū̠tvā sarva̠māyu̍rēti̠ trira̠bhima̍ntrayēta̠ triṣa̍tyā̠ hi dē̠vā yō-'pū̍ta iva̠ manyē̍ta̠ sa i̠ttha-ñju̍huyādi̠ttha-ma̠bhima̍ntrayēta̠ punī̍ta ē̠vātmāna̠-māyu̍rē̠vātma-ndha̍ttē̠ varō̠ dakṣi̍ṇā̠ varē̍ṇai̠va varagg̍ spṛṇōtyā̠tmā hi vara̍ḥ ॥ 18 ॥

anuvākaṃ 19
bhūḥ prapa̍dyē̠ bhuva̠ḥ prapa̍dyē̠ sva̍ḥ prapa̍dyē̠ bhūrbhuva̠ssva̍ḥ prapa̍dyē̠ brahma̠ prapa̍dyē brahmakō̠śa-mprapa̍dyē̠-'mṛta̠-mprapa̍dyē-'mṛtakō̠śa-mprapa̍dyē chaturjā̠la-mbra̍hmakō̠śaṃ ya-mmṛ̠tyurnāva̠paśya̍ti̠ ta-mprapa̍dyē dē̠vā-nprapa̍dyē dēvapu̠ra-mprapa̍dyē̠ parī̍vṛtō̠ varī̍vṛtō̠ brahma̍ṇā̠ varma̍ṇā̠-'ha-ntēja̍sā̠ kaśya̍pasya̠ yasmai̠ nama̠stachChirō̠ dharmō̍ mū̠rdhāna̍-mbra̠hmōtta̍rā̠ hanu̍rya̠jñō-'dha̍rā̠ viṣṇu̠r̠ hṛda̍yagṃ saṃvathsa̠raḥ pra̠jana̍nama̠śvinau̍ pūrva̠pādā̍va̠trirmaddhya̍-mmi̠trāvaru̍ṇā vapara̠pādā̍va̠gniḥ puchCha̍sya pratha̠ma-ṅkāṇḍa̠-ntata̠ indra̠stata̍ḥ pra̠jāpa̍ti̠rabha̍ya-ñchatu̠rthagṃ sa vā ē̠ṣa di̠vya-śśā̎kva̠ra-śśiśu̍māra̠stagṃ ha̠ ya ē̠vaṃ vēdāpa̍ punarmṛ̠tyu-ñja̍yati̠ jaya̍ti sva̠rgaṃ lō̠ka-nnāddhvani̠ pramī̍yatē̠ nāphsu pramī̍yatē̠ nāgnau pramī̍yatē̠ nāna̠patya̍ḥ pramī̠yatē̍ la̠ghvānnō̍ bhavati dhru̠vastvama̍si dhru̠vasya kṣi̍tamasi̠ tva-mbhū̠tānā̠madhi̍patirasi̠ tva-mbhū̠tānā̠g̠ śrēṣṭhō̍-'si̠ tvā-mbhū̠tānyupa̍pa̠ryāva̍rtantē̠ nama̍stē̠ nama̠-ssarva̍-ntē̠ namō̠ nama̍ḥ ॥
[phāṭa bhhēdam - namō̠ nama̍-śśiśukumārāya̠ nama̍ḥ ] ॥ 19 ॥

anuvākaṃ 20
nama̠ḥ prāchyai̍ di̠śē yāścha̍ dē̠vatā̍ ē̠tasyā̠-mprati̍vasantyē̠ tābhya̍ścha̠ namō̠ namō dakṣi̍ṇāyai di̠śē yāścha̍ dē̠vatā̍ ē̠tasyā̠-mprati̍vasantyē̠ tābhya̍ścha̠ namō̠ nama̠ḥ pratī̎chyai di̠śē yāścha̍ dē̠vatā̍ ē̠tasyā̠-mprati̍vasantyē̠ tābhya̍ścha̠ namō̠ nama̠ udī̎chyai di̠śē yāścha̍ dē̠vatā̍ ē̠tasyā̠-mprati̍vasantyē̠ tābhya̍ścha̠ namō̠ nama̍ ū̠rdhvāyai̍ di̠śē yāścha̍ dē̠vatā̍ ē̠tasyā̠-mprati̍vasantyē̠ tābhya̍ścha̠ namō̠ namō-'dha̍rāyai di̠śē yāścha̍ dē̠vatā̍ ē̠tasyā̠-mprati̍vasantyē̠ tābhya̍ścha̠ namō̠ namō̍-'vānta̠rāyai̍ di̠śē yāścha̍ dē̠vatā̍ ē̠tasyā̠-mprati̍vasantyē̠ tābhya̍ścha̠ namō̠ namō gaṅgāyamunayōrmaddhyē yē̍ vasa̠nti̠ tē mē prasannātmānaschira-ñjīvitaṃ va̍rdhaya̠nti̠ namō gaṅgāyamunayōrmuni̍bhyaścha̠ namō̠ namō gaṅgāyamunayōrmuni̍bhyaścha̠ namaḥ ॥ 20 ॥

(saha̠ - rakṣāgṃ̍si̠ - ya-ddē̍vā-ssa̠ptada̍śa̠ - yadadī̎vya̠-npañcha̍daśa̠ - yu̍ṣṭē̠ chatu̍strigṃśa-d- vaiśvāna̠rāya̠ ṣaḍvigṃ̍śati̠-rvāta̍raśanā ha - kuśmā̠ṇḍai- ra̠jān. ha̠ - pañcha̍ - brahmaya̠jñēna̠ - grāmē̍ - ma̠ddhyandi̍nē̠ - tasya̠ vai mēgha̠ - stasya̠ vai dvau - richya̍tē - du̠hē ha̍ - kati̠dhā-'va̍kīrṇī̠ - bhū--r nama̠ḥ prāchyai̍ vigṃśa̠tiḥ )

(saha̍ vai - muni̍bhyaścha̠ namaḥ )

॥ hari̍ḥ ōm ॥

॥ kṛṣṇa yajurvēdīya taittirīya āraṇyakē dvitīyaḥ prapāṭhaka-ssamāptaḥ ॥