కృష్ణ యజుర్వేదీయ తైత్తిరీయ ఆరణ్యకే ద్వితీయః ప్రపాఠకః - స్వాధ్యాయబ్రాహ్మణం

ఓ-న్నమః పరమాత్మనే, శ్రీ మహాగణపతయే నమః,
శ్రీ గురుభ్యో నమః । హ॒రిః॒ ఓమ్ ॥

అనువాకం 1
సహ॒ వై దే॒వానా॒-ఞ్చాసు॑రాణా-ఞ్చ య॒జ్ఞౌ ప్రత॑తావాస్తాం-వఀ॒యగ్గ్​ స్వ॒ర్గం-లోఀ॒కమే᳚ష్యామో వ॒యమే᳚ష్యామ॒ ఇతి॒ తే-ఽసు॑రా-స్స॒న్నహ్య॒ సహ॑సై॒వాచ॑ర-న్బ్రహ్మ॒చర్యే॑ణ॒ తప॑సైవ దే॒వాస్తే-ఽసు॑రా అముహ్య॒గ్గ్॒స్తే న ప్రాజా॑న॒గ్గ్॒స్తే పరా॑భవ॒న్తే న స్వ॒ర్గం-లోఀ॒కమా॑య॒న్, ప్రసృ॑తేన॒ వై య॒జ్ఞేన॑ దే॒వా-స్స్వ॒ర్గం-లోఀ॒కమా॑య॒-న్న ప్రసృ॑తే॒నాసు॑రా॒-న్పరా॑-ఽభావయ॒న్ ,ప్రసృ॑తో హ॒ వై య॑జ్ఞోపవీ॒తినో॑ య॒జ్ఞో-ఽప్ర॑సృ॒తో-ఽను॑పవీ॒తినో॒ యత్కిఞ్చ॑ బ్రాహ్మ॒ణో య॑జ్ఞోపవీ॒త్యధీ॑తే॒ యజ॑త ఏ॒వ త-త్తస్మా᳚-ద్యజ్ఞోపవీ॒త్యే॑వాధీ॑యీత యా॒జయే॒-ద్యజే॑త వా య॒జ్ఞస్య॒ ప్రసృ॑త్యా॒ , అజి॑నం॒-వాఀసో॑ వా దఖ్షిణ॒త ఉ॑ప॒వీయ॒ దఖ్షి॑ణ-మ్బా॒హుముద్ధ॑ర॒తే-ఽవ॑ ధత్తే స॒వ్యమితి॑ యజ్ఞోపవీ॒తమే॒తదే॒వ విప॑రీత-మ్ప్రాచీనావీ॒తగ్ం సం॒​వీఀత॑-మ్మాను॒షమ్ ॥ 1 ॥

అనువాకం 2
రఖ్షాగ్ం॑సి॒ హవా॑ పురోనువా॒కే తపో-ఽగ్ర॑మతిష్ఠన్త॒ తా-న్ప్ర॒జాప॑తి-ర్వ॒రేణో॒పామ॑న్త్రయత॒ తాని॒ వర॑మవృణీతాది॒త్యో నో॒ యోద్ధా॒ ఇతి॒ తా-న్ప్ర॒జాప॑తి-రబ్రవీ॒-ద్యోధ॑య॒ద్ధ్వమితి॒ తస్మా॒దుత్తి॑ష్ఠన్త॒గ్ం॒ హవా॒ తాని॒ రఖ్షాగ్॑స్యాది॒త్యం-యోఀధ॑యన్తి॒ యావ॑దస్త॒మన్వ॑గా॒-త్తాని॑ హ॒ వా ఏ॒తాని॒ రఖ్షాగ్ం॑సి గాయత్రి॒యా ఽభి॑మన్త్రితే॒నామ్భ॑సా శామ్యన్తి॒ తదు॑ హ॒ వా ఏ॒తే బ్ర॑హ్మవా॒దినః॑ పూ॒ర్వాభి॑ము॒ఖా-స్స॒న్ధ్యాయా᳚-ఙ్గాయత్రి॒యా-ఽభి॑మన్త్రితా॒ ఆప॑ ఊ॒ర్ధ్వం-విఀఖ్షి॑పన్తి॒ తా ఏ॒తా ఆపో॑ వ॒జ్రీభూ॒త్వా తాని॒ రఖ్షాగ్ం॑సి
మ॒న్దేహా-ఽరు॑ణే ద్వీ॒పే ప్రఖ్షి॑పన్తి॒ య-త్ప్ర॑దఖ్షి॒ణ-మ్ప్రక్ర॑మన్తి॒ తేన॑ పా॒ప్మాన॒మవ॑ ధూన్వన్త్యు॒ద్యన్త॑మస్తం॒-యఀన్త॑మాది॒త్య-మ॑భిద్ధ్యా॒యన్ కు॒ర్వ-న్బ్రా᳚హ్మ॒ణో వి॒ద్వాన్-థ్స॒కల॑-మ్భ॒ద్రమ॑శ్నుతే॒ ఽసావా॑ది॒త్యో బ్ర॒హ్మేతి॒ బ్రహ్మై॒వ స-న్బ్రహ్మా॒ప్యేతి॒ య ఏ॒వం-వేఀద॑ ॥ 2 ॥

అనువాకం 3
య-ద్దే॑వా దేవ॒హేడ॑నం॒ (దేవ॒హేళ॑నం॒) దేవా॑సశ్చకృ॒మా వ॒యమ్ ।
ఆది॑త్యా॒స్తస్మా᳚న్మా ముఞ్చత॒ర్తస్య॒ర్తేన॒ మామి॒త ॥
దేవా॑ జీవనకా॒మ్యా య-ద్వా॒చా-ఽనృ॑తమూది॒మ ।
తస్మా᳚న్న ఇ॒హ ము॑ఞ్చత॒ విశ్వే॑ దేవా-స్స॒జోష॑సః ॥
ఋ॒తేన॑ ద్యావాపృథివీ ఋ॒తేన॒ త్వగ్ం స॑రస్వతి ।
కృ॒తాన్నః॑ పా॒హ్యేన॑సో॒ య-త్కిఞ్చానృ॑తమూది॒మ ॥
ఇ॒న్ద్రా॒గ్నీ మి॒త్రావరు॑ణౌ॒ సోమో॑ ధా॒తా బృహ॒స్పతిః॑ ।
తే నో॑ ముఞ్చ॒న్త్వేన॑సో॒ యద॒న్యకృ॑తమారి॒మ ॥
స॒జా॒త॒శ॒గ్ం॒సాదు॒త జా॑మిశ॒గ్ం॒ సాజ్జ్యాయ॑స॒-శ్శగ్ంసా॑దు॒త వా॒ కనీ॑యసః ।
అనా॑ధృష్ట-న్దే॒వకృ॑తం॒-యఀదేన॒స్తస్మా॒-త్త్వమ॒స్మా-ఞ్జా॑తవేదో ముముగ్ధి ॥
యద్వా॒చా య-న్మన॑సా బా॒హుభ్యా॑-మూ॒రుభ్యా॑మష్ఠీ॒వద్భ్యా॑ శి॒శ్నైర్యదనృ॑త-ఞ్చకృ॒మా వ॒యమ్ ।
అ॒గ్నిర్మా॒ తస్మా॒దేన॑సా॒ గార్​హ॑పత్యః॒ ప్రము॑ఞ్చతు చకృ॒మ యాని॑ దుష్కృ॒తా ॥
యేన॑ త్రి॒తో అ॑ర్ణ॒వా-న్ని॑ర్బ॒భూవ॒ యేన॒ సూర్య॒-న్తమ॑సో నిర్ము॒మోచ॑ ।
యేనేన్ద్రో॒ విశ్వా॒ అజ॑హా॒దరా॑తీ॒స్తేనా॒హ-ఞ్జ్యోతి॑షా॒ జ్యోతి॑రానశా॒న ఆ᳚ఖ్షి ॥
య-త్కుసీ॑ద॒మప్ర॑తీత్త॒-మ్మయే॒హ యేన॑ య॒మస్య॑ ని॒ధినా॒ చరా॑మి ।
ఏ॒తత్తద॑గ్నే అనృ॒ణో భ॑వామి॒ జీవ॑న్నే॒వ ప్రతి॒ తత్తే॑ దధామి ॥
యన్మయి॑ మా॒తా గర్భే॑ స॒తి । ఏన॑శ్చ॒కార॒ యత్పి॒తా । అ॒గ్నిర్మా॒ తస్మా॒దేన॑సః ॥ యదా॑ పి॒పేష॑ మా॒తర॑-మ్పి॒తర᳚మ్ । పు॒త్రః ప్రము॑దితో॒ ధయన్న్॑ । అహిగ్ం॑సితౌ పి॒తరౌ॒ మయా॒ తత్ । తద॑గ్నే అనృ॒ణో భ॑వామి ॥ యద॒న్తరి॑ఖ్ష-మ్పృథి॒వీము॒త ద్యామ్ । యన్మా॒తర॑-మ్పి॒తరం॑-వాఀ జిహిగ్ంసి॒మ । అ॒గ్నిర్మా॒ తస్మా॒దేన॑సః ॥
యదా॒శసా॑ ని॒శసా॒ యత్ప॑రా॒శసా᳚ । యదేన॑శ్చ కృ॒మా నూత॑నం॒-యఀత్పు॑రా॒ణమ్ । అ॒గ్నిర్మా॒ తస్మా॒దేన॑సః ॥ అతి॑క్రామామి దురి॒తం-యఀదేనః॑ । జహా॑మి రి॒ప్ర-మ్ప॑ర॒మే స॒ధస్థే᳚ । యత్ర॒ యన్తి॑ సు॒కృతో॒ నాపి॑ దు॒ష్కృతః॑ । తమారో॑హామి సు॒కృతా॒-న్ను లో॒కమ్ ॥ త్రి॒తే దే॒వా అ॑మృజతై॒-తదేనః॑ । త్రి॒త ఏ॒తన్మ॑ను॒ష్యే॑షు మామృజే । తతో॑ మా॒ యది॒ కిఞ్చి॑దాన॒శే । అ॒గ్నిర్మా॒ తస్మా॒దేన॑సః ॥
ది॒వి జా॒తా అ॒ఫ్సు జా॒తాః । యా జా॒తా ఓష॑ధీభ్యః । అథో॒ యా అ॑గ్ని॒జా ఆపః॑ । తా న॑-శ్శున్ధన్తు॒ శున్ధ॑నీః ॥ యదాపో॒ నక్త॑-న్దురి॒త-ఞ్చరా॑మ । యద్వా॒ దివా॒ నూత॑నం॒-యఀత్పు॑రా॒ణమ్ । హిర॑ణ్య-వర్ణా॒స్తత॒ ఉత్పు॑నీత నః ॥ ఇ॒మ-మ్మే॑ వరుణ శ్రుధీ॒ హవ॑మ॒ద్యా చ॑ మృడయ । త్వామ॑వ॒స్యురా చ॑కే ॥
తత్త్వా॑ యామి॒ బ్రహ్మ॑ణా॒ వన్ద॑మాన॒-స్తదా శా᳚స్తే॒ యజ॑మానో హ॒విర్భిః॑ । అహే॑డమానో వరుణే॒హ బో॒ద్ధ్యురు॑శస॒ మా న॒ ఆయుః॒ ప్రమో॑షీః ॥ త్వ-న్నో॑ అగ్నే॒ వరు॑ణస్య వి॒ద్వా-న్దే॒వస్య॒ హేడో-ఽవ॑ యాసి సీష్ఠాః । యజి॑ష్ఠో॒ వహ్ని॑ తమ॒-శ్శోశు॑చానో॒ విశ్వా॒ ద్వేషా॑సి॒ ప్రము॑ముగ్ధ్య॒స్మత్ ॥ స త్వన్నో॑ అగ్నే-ఽవ॒మో భ॑వో॒తీ నేది॑ష్ఠో అ॒స్యా ఉ॒షసో॒ వ్యు॑ష్టౌ । అవ॑ యఖ్ష్వ నో॒ వరు॑ణ॒ రరా॑ణో వీ॒హి మృ॑డీ॒క సు॒హవో॑ న ఏధి ॥ త్వమ॑గ్నే అ॒యా-ఽసి॑ । అ॒యా సన్మన॑సా హి॒తః । అ॒యా సనఃఅ॒వ్యమూ॑హిషే । అ॒యా నో॑ ధేహి భేష॒జమ్ । ఇ॒ష్టో అ॒గ్నిరాహు॑తః । స్వాహా॑కృతః పిపర్తు నః । స్వ॒గా దే॒వేభ్య॑ ఇ॒ద-న్నమః॑ ॥ 3 ॥
(ము॒ము॒గ్ధి॒ స॒ప్త చ॑) (అ. 3)

అనువాకం 4
యదదీ᳚వ్యన్నృ॒ణమ॒హ-మ్బ॒భూవాది॑-థ్సన్వా సఞ్జ॒గర॒ జనే᳚భ్యః । అ॒గ్నిర్మా॒ తస్మా॒దిన్ద్ర॑శ్చ సం​విఀదా॒నౌ ప్రము॑ఞ్చతామ్ ॥ యద్ధస్తా᳚భ్యా-ఞ్చ॒కర॒ కిల్బి॑షాణ్య॒ఖ్షాణాం᳚-వఀ॒గ్నుము॑ప॒జిఘ్న॑మానః ।
ఉ॒గ్ర॒మ్ప॒శ్యా చ॑ రాష్ట్ర॒భృచ్చ॒ తాన్య॑ఫ్స॒రసా॒ వను॑దత్తా-మృ॒ణాని॑ ॥ ఉగ్ర॑పంశ్యే॒ రాష్ట్ర॑భృ॒-త్కిల్బి॑షాణి॒ యద॒ఖ్షవృ॑త్త॒మను॑దత్తమే॒తత్ ।
నేన్న॑ ఋ॒ణానృ॒ణవ॒ ఇథ్స॑మానో య॒మస్య॑ లో॒కే అధి॑ రజ్జు॒రాయ॑ ॥ అవ॑ తే॒ హేడో॑ వరుణ॒ నమో॑భి॒రవ॑ య॒జ్ఞేభి॑రీమహే హ॒విర్భిః॑ । ఖ్షయ॑న్న॒స్మభ్య॑మసుర ప్రచేతో॒ రాజ॒న్నేనాగ్ం॑సి శిశ్రథః కృ॒తాని॑ ॥ ఉదు॑త్త॒మం-వఀ ॑రుణ॒ పాశ॑మ॒స్మదవా॑-ఽధ॒మం-విఀమ॑ద్ధ్య॒మగ్గ్​ శ్ర॑థాయ । అథా॑ వ॒యమా॑దిత్య వ్ర॒తే తవా-ఽనా॑గసో॒ అది॑తయే స్యామ ॥ ఇ॒మ-మ్మే॑ వరుణ శ్రుధీ॒ హవ॑మ॒ద్యా చ॑ మృడయ । త్వామ॑వ॒స్యురా చ॑కే ॥
తత్త్వా॑ యామి॒ బ్రహ్మ॑ణా॒ వన్ద॑మాన॒-స్తదా శా᳚స్తే॒ యజ॑మానో హ॒విర్భిః॑ । అహే॑డమానో వరుణే॒హ బో॒ద్ధ్యురు॑శస॒ మా న॒ ఆయుః॒ ప్రమో॑షీః ॥ త్వ-న్నో॑ అగ్నే॒ వరు॑ణస్య వి॒ద్వా-న్దే॒వస్య॒ హేడో-ఽవ॑ యాసి సీష్ఠాః । యజి॑ష్ఠో॒ వహ్ని॑ తమ॒-శ్శోశు॑చానో॒ విశ్వా॒ ద్వేషా॑సి॒ ప్రము॑ముగ్ధ్య॒స్మత్ ॥ స త్వన్నో॑ అగ్నే-ఽవ॒మో భ॑వో॒తీ నేది॑ష్ఠో అ॒స్యా ఉ॒షసో॒ వ్యు॑ష్టౌ । అవ॑ యఖ్ష్వ నో॒ వరు॑ణ॒ రరా॑ణో వీ॒హి మృ॑డీ॒క సు॒హవో॑ న ఏధి ॥ సఙ్కు॑సుకో॒ వికు॑సుకో నిర్-ఋ॒థో యశ్చ॑ నిస్వ॒నః । తే-ఽ(1॒)స్మ-ద్యఖ్ష్మ॒మనా॑గసో దూ॒రా-ద్దూ॒రమ॑చీచతమ్ ॥ నిర్య॑ఖ్ష్మమచీచతే కృ॒త్యా-న్నిర్-ఋ॑తి-ఞ్చ । తేన॒ యో-ఽ(1॒)స్మథ్సమృ॑చ్ఛాతై॒ తమ॑స్మై॒ ప్రసు॑వామసి ॥ దు॒శ్శ॒గ్ం॒సా॒ను॒శ॒గ్ం॒సాభ్యా᳚-ఙ్ఘ॒ణేనా॑నుఘ॒ణేన॑ చ । తేనా॒న్యో-ఽ(1)॒స్మ-థ్సమృ॑చ్ఛాతై॒ తమ॑స్మై॒ ప్రసు॑వామసి ॥
సం​వఀర్చ॑సా॒ పయ॑సా॒ సన్త॒నూభి॒రగ॑న్మహి॒ మన॑సా॒ సగ్ం శి॒వేన॑ । త్వష్టా॑ నో॒ అత్ర॒ విద॑ధాతు రా॒యో-ఽను॑మార్​ష్టు త॒న్వో(1॒) య-ద్విలి॑ష్టమ్ ॥ 4 ॥
(కృ॒త్యా-న్నిర్-ఋ॑తి-ఞ్చ॒ పఞ్చ॑ చ) (అ. 4)

అనువాకం 5
ఆయు॑ష్టే వి॒శ్వతో॑ దధద॒యమ॒గ్నిర్వరే᳚ణ్యః ।
పున॑స్తే ప్రా॒ణ ఆయా॑తి॒ పరా॒ యఖ్ష్మగ్ం॑ సువామి తే ॥
ఆ॒యు॒ర్దా అ॑గ్నే హ॒విషో॑ జుషా॒ణో ఘృ॒తప్ర॑తీకో ఘృ॒తయో॑నిరేధి । ఘృ॒త-మ్పీ॒త్వా మధు॒ చారు॒ గవ్య॑-మ్పి॒తేవ॑ పు॒త్రమ॒భి ర॑ఖ్షతాది॒మమ్ ॥
ఇ॒మమ॑గ్న॒ ఆయు॑షే॒ వర్చ॑సే కృధి తి॒గ్మమోజో॑ వరుణ॒ సగ్ంశి॑శాధి । మా॒తేవా᳚స్మా అదితే॒ శర్మ॑ యచ్ఛ॒ విశ్వే॑ దేవా॒ జర॑దష్టి॒-ర్యథా-ఽస॑త్ ॥
అగ్న॒ ఆయూగ్ం॑షి పవస॒ ఆసు॒వోర్జ॒మిష॑-ఞ్చ నః ।
ఆ॒రే బా॑ధస్వ దు॒చ్ఛునా᳚మ్ ॥ అగ్నే॒ పవ॑స్వ॒ స్వపా॑ అ॒స్మే వర్చ॑-స్సు॒వీర్య᳚మ్ । దధ॑-ద్ర॒యి-మ్మయి॒ పోష᳚మ్ ॥ 5.1అ ॥
అ॒గ్నిర్-ఋషిః॒ పవ॑మానః॒ పాఞ్చ॑జన్యః పు॒రోహి॑తః । తమీ॑మహే మహాగ॒యమ్ ॥ అగ్నే॑ జా॒తా-న్ప్రణు॑దా న-స్స॒పత్నా॒-న్ప్రత్యజా॑తాఞ్జాతవేదో నుదస్వ ।
అ॒స్మే దీ॑దిహి సు॒మనా॒ అహే॑డ॒ఞ్ఛర్మ॑న్తే (అహే॑ళ॒ఞ్ఛర్మ॑న్తే) స్యామ త్రి॒వరూ॑థ ఉ॒ద్భౌ ॥
సహ॑సా జా॒తా-న్ప్రణు॑దా న-స్స॒పత్నా॒-న్ప్రత్యజా॑తాఞ్జాతవేదో నుదస్వ । అధి॑ నో బ్రూహి సుమన॒స్యమా॑నో వ॒యగ్గ్​ స్యా॑మ॒ ప్రణు॑దా న-స్స॒పత్నాన్॑ ॥ అగ్నే॒ యో నో॒-ఽభితో॒ జనో॒ వృకో॒ వారో॒ జిఘాగ్ం॑సతి । తాగ్​స్త్వం-వృఀ ॑త్రహఞ్జహి॒ వస్వ॒స్మభ్య॒మా భ॑ర ॥ అగ్నే॒ యో నో॑-ఽభి॒దాస॑తి సమా॒నో యశ్చ॒ నిష్ట్యః॑ । తం-వఀ॒యగ్ం స॒మిధ॑-ఙ్కృ॒త్వా తుభ్య॑మ॒గ్నే-ఽపి॑దద్ధ్మసి ॥ 5.1బ్ ॥

యో న॒-శ్శపా॒దశ॑పతో॒ యశ్చ॑ న॒-శ్శప॑త॒-శ్శపా᳚త్ ।
ఉ॒షాశ్చ॒ తస్మై॑ ని॒మ్రుక్చ॒ సర్వ॑-మ్పా॒పగ్ం సమూ॑హతామ్ ॥
యో న॑-స్స॒పత్నో॒ యో రణో॒ మర్తో॑-ఽభి॒దాస॑తి దేవాః ।
ఇ॒ద్ధ్మస్యే॑వ ప్ర॒ఖ్షాయ॑తో॒ మా తస్యోచ్ఛే॑షి॒ కిఞ్చ॒న ॥ యో మాన్ద్వేష్టి॑ జాతవేదో॒ య-ఞ్చా॒హ-న్ద్వేష్మి॒ యశ్చ॒ మామ్ । సర్వా॒గ్॒స్తాన॑గ్నే॒ సన్ద॑హ॒ యాగ్​శ్చా॒హ-న్ద్వేష్మి॒ యే చ॒ మామ్ ॥ యో అ॒స్మభ్య॑మరాతీ॒యా-ద్యశ్చ॑ నో॒ ద్వేష॑తే॒ జనః॑ । నిన్దా॒ద్యో అ॒స్మా-న్దిఫ్సా᳚చ్చ॒ సర్వా॒గ్॒స్తాన్మ॑ష్మ॒షా కు॑రు ॥
సగ్ంశి॑త-మ్మే॒ బ్రహ్మ॒ సగ్ంశి॑తం-వీఀ॒ర్యాం (1॒) బల᳚మ్ । సగ్ంశి॑త-ఙ్ఖ్ష॒త్ర-మ్మే॑ జి॒ష్ణు యస్యా॒హమస్మి॑ పు॒రోహి॑తః ॥
ఉదే॑షా-మ్బా॒హూ అ॑తిర॒ము-ద్వర్చో॒ అథో॒ బల᳚మ్ ।
ఖ్షి॒ణోమి॒ బ్రహ్మ॑ణా॒-ఽమిత్రా॒నున్న॑యామి॒ స్వాఀ(2) అ॒హమ్ ॥ పున॒ర్మనః॒ పున॒రాయు॑ర్మ॒ ఆగా॒-త్పున॒శ్చఖ్షుః॒ పున॒-శ్శ్రోత్ర॑-మ్మ॒ ఆగా॒త్
పునః॑ ప్రా॒ణః పున॒రాధీ॑త-మ్మ॒ ఆగా᳚త్ ।
వై॒శ్వా॒న॒రో మే-ఽద॑బ్ధస్తనూ॒పా అవ॑బాధతా-న్దురి॒తాని॒ విశ్వా᳚ ॥ 5.1చ్ ॥
(పోషం॑ - దద్ధ్మసి - పు॒రోహి॑తశ్చ॒త్వారి॑ చ) (అ. 5)

అనువాకం 6
వై॒శ్వా॒న॒రాయ॒ ప్రతి॑వేదయామో॒ యదీ॑నృ॒ణగ్ం స॑ఙ్గ॒రో దే॒వతా॑సు । స ఏ॒తా-న్పాశా᳚-న్ప్ర॒ముచ॒-న్ప్రవే॑ద॒ స నో॑ ముఞ్చాతు దురి॒తాదవ॒ద్యాత్ ॥
వై॒శ్వా॒న॒రః పవ॑యాన్నః ప॒విత్రై॒ర్య-థ్స॑ఙ్గ॒ర-మ॒భిధావా᳚మ్యా॒శామ్ । అనా॑జాన॒-న్మన॑సా॒ యాచ॑మానో॒ యదత్రైనో॒ అవ॒ త-థ్సు॑వామి ॥
అ॒మీ యే సు॒భగే॑ ది॒వి వి॒చృతౌ॒ నామ॒ తార॑కే ।
ప్రేహామృత॑స్య యచ్ఛతా-మే॒త-ద్బ॑ద్ధక॒మోచ॑నమ్ ॥
విజి॑హీర్​ష్వ లో॒కాన్ కృ॑ధి బ॒న్ధా-న్ము॑ఞ్చాసి॒ బద్ధ॑కమ్ । యోనే॑రివ॒ ప్రచ్యు॑తో॒ గర్భ॒-స్సర్వా᳚-న్ప॒థో అ॑నుష్వ ॥
స ప్ర॑జా॒న-న్ప్రతి॑గృభ్ణీత వి॒ద్వా-న్ప్ర॒జాప॑తిః ప్రథమ॒జా ఋ॒తస్య॑ । అ॒స్మాభి॑ర్ద॒త్త-ఞ్జ॒రసః॑ ప॒రస్తా॒దచ్ఛి॑న్న॒-న్తన్తు॑మను॒ సఞ్చ॑రేమ ॥ 6.1అ ॥

త॒త-న్తన్తు॒మన్వేకే॒ అను॒ సఞ్చ॑రన్తి॒ యేషా᳚-న్ద॒త్త-మ్పిత్ర్య॒మాయ॑నవత్ । అ॒బ॒న్ధ్వేకే॒ దద॑తః ప్ర॒యచ్ఛా॒-ద్దాతు॒చ్చే-చ్ఛ॒క్నవా॒గ్ం॒ స-స్స్వ॒ర్గ ఏ॑షామ్ ॥
ఆర॑భేథా॒మను॒ సగ్ంర॑భేథాగ్ం సమా॒న-మ్పన్థా॑మవథో ఘృ॒తేన॑ । యద్వా᳚-మ్పూ॒ర్త-మ్పరి॑విష్టం॒-యఀద॒గ్నౌ తస్మై॒ గోత్రా॑యే॒హ జాయా॑పతీ॒ సగ్ంర॑భేథామ్ ॥ యద॒న్తరి॑ఖ్ష-మ్పృథి॒వీము॒త ద్యాం-యఀన్మా॒తర॑-మ్పి॒తరం॑-వాఀ జిహిగ్ంసి॒మ ।
అ॒గ్నిర్మా॒ తస్మా॒దేన॑సో॒ గార్​హ॑పత్య॒ ఉన్నో॑ నేష-ద్దురి॒తా యాని॑ చకృ॒మ ॥ భూమి॑ర్మా॒తా-ఽది॑తిర్నో జ॒నిత్ర॒-మ్భ్రాతా॒న్తరి॑ఖ్ష-మ॒భిశ॑స్త ఏనః ।
ద్యౌర్నః॑ పి॒తా పి॑తృ॒యాచ్ఛ-మ్భ॑వాసి జా॒మి మి॒త్వా మా వి॑విథ్సి లో॒కాత్ ॥ యత్ర॑ సు॒హార్ద॑-స్సు॒కృతో॒ మద॑న్తే వి॒హాయ॒ రోగ॑-న్త॒న్వా(1)॒గ్గ్॒ స్వాయా᳚మ్ ।
అ॒శ్లో॒ణాఙ్గై॒రహ్రు॑తా-స్స్వ॒ర్గే తత్ర॑ పశ్యేమ పి॒తర॑-ఞ్చ పు॒త్రమ్ ॥ యదన్న॒మద్మ్యనృ॑తేన దేవా దా॒స్యన్నదా᳚స్యన్ను॒త వా॑ కరి॒ష్యన్న్ ।
య-ద్దే॒వానా॒-ఞ్చఖ్షు॒ష్యాగో॒ అస్తి॒ యదే॒వ కిఞ్చ॑ ప్రతిజగ్రా॒హమ॒గ్నిర్మా॒ తస్మా॑దనృ॒ణ-ఙ్కృ॑ణోతు ॥
యదన్న॒మద్మి॑ బహు॒ధా విరూ॑పం॒-వాఀసో॒ హిర॑ణ్యము॒త గామ॒జామవి᳚మ్ ।
య-ద్దే॒వానా॒-ఞ్చఖ్షు॒ష్యాగో॒ అస్తి॒ యదే॒వ కిఞ్చ॑ ప్రతిజగ్రా॒హమ॒గ్నిర్మా॒ తస్మా॑దనృ॒ణ-ఙ్కృ॑ణోతు ॥
య॒న్మయా॑ మన॑సా వా॒చా॒ కృ॒త॒మేనః॑ కదా॒చన ।
సర్వస్మా᳚-న్మేడి॑తో (మేళ॑తా) మో॒గ్ధి॒ త్వగ్ం హి
వేత్థ॑ యథాత॒థమ్ ॥ 6.1బ్ ॥
(చ॒రే॒మ॒ - పు॒త్రగ్ం షట్చ॑) (అ. 6)

అనువాకం 7
వాత॑రశనా హ॒ వా ఋష॑య-శ్శ్రమ॒ణా ఊ॒ర్ధ్వమ॑న్థి॒నో బ॑భూవు॒స్తా-నృష॑యో॒-ఽర్థ-మా॑య॒గ్గ్॒స్తే ని॒లాయ॑-మచర॒గ్గ్॒స్తే-ఽను॑ప్రవిశుః కూశ్మా॒ణ్డాని॒ తాగ్​-స్తేష్వన్వ॑విన్ద-ఞ్ఛ్ర॒ద్ధయా॑ చ॒ తప॑సా చ॒ , తానృష॑యో-ఽబ్రువన్ క॒థా ని॒లాయ॑-ఞ్చర॒థేతి॒ త ఋషీ॑నబ్రువ॒న్నమో॑ వో-ఽస్తు భగవన్తో॒-ఽస్మి-న్ధా᳚మ్ని॒ కేన॑ వ-స్సపర్యా॒మేతి॒ తానృష॑యో-ఽబ్రువ-న్ప॒విత్ర॑-న్నో బ్రూత॒ యేనా॑రే॒పస॑-స్స్యా॒మేతి॒ త ఏ॒తాని॑ సూ॒క్తాన్య॑పశ్య॒న్॒. ,
య-ద్దే॑వా దేవ॒హేడ॑నం॒ (దేవ॒హేళ॑నం॒) ఀయదదీ᳚వ్యన్నృ॒ణమ॒హ-మ్బ॒భూవాయు॑ష్టే వి॒శ్వతో॑
దధ॒దిత్యే॒తైరాజ్య॑-ఞ్జుహుత వైశ్వాన॒రాయ॒ ప్రతి॑వేదయామ॒ ఇత్యుప॑తిష్ఠత॒ యద॑ర్వా॒చీన॒మేనో᳚ భ్రూణహ॒త్యాయా॒స్తస్మా᳚-న్మోఖ్ష్యద్ధ్వ॒ ఇతి॒ ,త ఏ॒తైర॑జుహవు॒స్తే-ఽరే॒పసో॑-ఽభవన్ కర్మా॒దిష్వే॒తై-ర్జు॑హుయా-త్పూ॒తో దే॑వలో॒కా-న్థ్సమ॑శ్నుతే ॥ 7 ॥

అనువాకం 8
కూ॒శ్మా॒ణ్డై-ర్జు॑హుయా॒-ద్యో-ఽపూ॑త ఇవ॒ మన్యే॑త॒ యథా᳚ స్తే॒నో యథా᳚ భ్రూణ॒హైవమే॒ష భ॑వతి॒ యో-ఽయోనౌ॒ రేత॑-స్సి॒ఞ్చతి॒, యద॑ర్వా॒చీన॒మేనో᳚ భ్రూణహ॒త్యాయా॒స్తస్మా᳚-న్ముచ్యతే॒ యావ॒దేనో॑ దీ॒ఖ్షాముపై॑తి దీఖ్షి॒త ఏ॒తై-స్స॑త॒తి జు॑హోతి సం​వఀథ్స॒ర-న్దీ᳚ఖ్షి॒తో భ॑వతి సం​వఀథ్స॒రాదే॒వాత్మాన॑-మ్పునీతే॒ మాస॑-న్దీఖ్షి॒తో భ॑వతి॒ యో మాస॒-స్స సం​వఀథ్స॒ర-స్సం॑​వఀథ్స॒రాదే॒వాత్మాన॑-మ్పునీతే॒ చతు॑ర్విగ్ంశతి॒గ్ం॒ రాత్రీ᳚ర్దీఖ్షి॒తో భ॑వతి॒ చతు॑ర్విగ్ంశతి-రర్ధమా॒సా-స్సం॑​వఀథ్స॒ర-స్సం॑​వఀథ్స॒రాదే॒వాత్మాన॑-మ్పునీతే॒ ద్వాద॑శ॒ రాత్రీ᳚ర్దీఖ్షి॒తో భ॑వతి॒ ద్వాద॑శ॒ మాసా᳚-స్సం​వఀథ్స॒ర-స్సం॑​వఀథ్స॒రాదే॒వాత్మాన॑-మ్పునీతే॒ షడ్రాత్రీ᳚ర్దీఖ్షి॒తో భ॑వతి॒ షడ్వా ఋ॒తవ॑-స్సం​వఀథ్స॒ర-స్సం॑​వఀథ్స॒రాదే॒వాత్మాన॑-మ్పునీతే తి॒స్రో రాత్రీ᳚-ర్దీఖ్షి॒తో భ॑వతి త్రి॒పదా॑ గాయ॒త్రీ గా॑యత్రి॒యా ఏ॒వాత్మాన॑-మ్పునీతే॒ న మా॒గ్ం॒సమ॑శ్ఞీయా॒న్న స్త్రియ॒ముపే॑యా॒న్నోపర్యా॑సీత॒ జుగు॑ఫ్సే॒తానృ॑తా॒త్పయో᳚ బ్రాహ్మ॒ణస్య॑ వ్ర॒తం-యఀ ॑వా॒గూ రా॑జ॒న్య॑స్యా॒మిఖ్షా॒ వైశ్య॒స్యాథో॑ సౌ॒మ్యే-ఽప్య॑ద్ధ్వ॒ర ఏ॒తద్వ్ర॒త-మ్బ్రూ॑యా॒-ద్యది॒ మన్యే॑-తోప॒దస్యా॒మీత్యో॑ద॒న-న్ధా॒నా-స్సక్తూ᳚-ఙ్ఘృ॒తమిత్యను॑వ్రతయేదా॒త్మనో-ఽను॑పదాసాయ ॥ 8 ॥

అనువాకం 9
అ॒జాన్. హ॒ వై పృశ్ఞీగ్॑స్తప॒స్యమా॑నా॒-న్బ్రహ్మ॑ స్వయ॒మ్భ్వ॑భ్యాన॑ర్​ష॒త్త ఋష॑యో-ఽభవ॒-న్తదృషీ॑ణా-మృషి॒త్వ-న్తా-న్దే॒వతా॒ముపా॑తిష్ఠన్త య॒జ్ఞకా॑మా॒స్త ఏ॒త-మ్బ్ర॑హ్మయ॒జ్ఞ-మ॑పశ్య॒న్-తమా-ఽహ॑ర॒న్-తేనా॑యజన్త॒ యదృ॒చో-ఽద్ధ్యగీ॑షత॒ తాః పయ॑ ఆహుతయో దే॒వానా॑మభవ॒న్॒. య-ద్యజూగ్ం॑షి ఘృ॒తాహు॑తయో॒ య-థ్సామా॑ని॒ సోమా॑హుతయో॒ యదథ॑ర్వాఙ్గి॒రసో॒ మద్ధ్వా॑హుతయో॒ యద్బ్రా᳚హ్మ॒ణానీ॑తిహా॒సాన్-పు॑రా॒ణాని॒ కల్పా॒-న్గాథా॑ నారాశ॒గ్ం॒సీర్మే॑దాహు॒తయో॑ దే॒వానా॑-మభవ॒న్తాభిః॒, ఖ్షుధ॑-మ్పా॒ప్మాన॒-మపా᳚ఘ్న॒-న్నప॑హతపాప్మానో దే॒వా-స్స్వ॒ర్గం-లోఀ॒కమా॑య॒-న్బ్రహ్మ॑ణ॒-స్సాయు॑జ్య॒-మృష॑యో-ఽగచ్ఛన్న్ ॥ 9 ॥

అనువాకం 10
పఞ్చ॒ వా ఏ॒తే మ॑హాయ॒జ్ఞా-స్స॑త॒తి ప్రతా॑యన్తే సత॒తి సన్తి॑ష్ఠన్తే దేవయ॒జ్ఞః పి॑తృయ॒జ్ఞో భూ॑తయ॒జ్ఞో మ॑నుష్యయ॒జ్ఞో బ్ర॑హ్మయ॒జ్ఞ ఇతి॒ యద॒గ్నౌ జు॒హోత్య॒పి స॒మిధ॒-న్త-ద్దే॑వయ॒జ్ఞ-స్సన్తి॑ష్ఠతే॒ య-త్పి॒తృభ్య॑-స్స్వ॒ధా క॒రోత్యప్య॒పస్త-త్పి॑తృయ॒జ్ఞ-స్సన్తి॑ష్ఠతే॒య-ద్భూ॒తేభ్యో॑ బ॒లిగ్ం హర॑తి॒ త-ద్భూ॑తయ॒జ్ఞ-స్సన్తి॑ష్ఠతే॒ యద్బ్రా᳚హ్మ॒ణేభ్యో-ఽన్న॒-న్దదా॑తి॒ తన్మ॑నుష్యయ॒జ్ఞ-స్సన్తి॑ష్ఠతే॒ యథ్స్వా᳚ద్ధ్యా॒య-మధీ॑యీ॒-తైకా॑మప్యృ॒చం-యఀజుః॒-సామ॑ వా॒ తద్బ్ర॑హ్మయ॒జ్ఞ-స్సన్తి॑ష్ఠతే॒ యదృ॒చో-ఽధీ॑తే॒ పయ॑సః॒ కూల్యా॑ అస్య పి॒తౄ-న్థ్స్వ॒ధా అ॒భివ॑హన్తి॒ య-ద్యజూగ్ం॑షి ఘృ॒తస్య॑ కూల్యా॒ య-థ్సామా॑ని॒ సోమ॑ ఏభ్యః పవతే॒ యదథ॑ర్వాఙ్గి॒రసో॒ మధోః᳚ కూల్యా॒ యద్బ్రా᳚హ్మ॒ణా-నీ॑తిహా॒సాన్-పు॑రా॒ణాని॒ కల్పా॒-న్గాథా॑ నారాశ॒గ్ం॒సీ-ర్మేద॑సః॒ కూల్యా॑ అస్య పి॒తౄన్-థ్స్వ॒ధా అ॒భివ॑హన్తి॒ యదృ॒చో-ఽధీ॑తే॒ పయ॑ ఆహుతిభిరే॒వ త-ద్దే॒వాగ్​స్త॑ర్పయతి॒ య-ద్యజూగ్ం॑షి ఘృ॒తాహు॑తిభి॒ర్య-థ్సామా॑ని॒ సోమా॑హుతిభి॒-ర్యదథ॑ర్వాఙ్గి॒రసో॒ మద్ధ్వా॑హుతిభి॒-ర్యద్బ్రా᳚హ్మ॒ణా-నీ॑తిహా॒సాన్-పు॑రా॒ణాని॒ కల్పా॒-న్గాథా॑ నారాశ॒గ్ం॒సీ-ర్మే॑దాహు॒తిభి॑రే॒వ త-ద్దే॒వాగ్​స్త॑ర్పయతి॒ త ఏ॑న-న్తృ॒ప్తా ఆయు॑షా॒ తేజ॑సా॒ వర్చ॑సా శ్రి॒యా యశ॑సా బ్రహ్మవర్చ॒సేనా॒న్నాద్యే॑న చ తర్పయన్తి ॥ 10 ॥

అనువాకం 11
బ్ర॒హ్మ॒య॒జ్ఞేన॑ య॒ఖ్ష్యమా॑ణః॒ ప్రాచ్యా᳚-న్ది॒శి గ్రామా॒దఛ॑దిర్ద॒ర్॒శ ఉదీ᳚చ్యా-మ్ప్రాగుదీ॒చ్యాం-వోఀ॒దిత॑ ఆది॒త్యే ద॑ఖ్షిణ॒త ఉ॑ప॒వీయో॑ప॒విశ్య॒ హస్తా॑వవ॒నిజ్య॒ త్రిరాచా॑మే॒ద్ద్విః ప॑రి॒మృజ్య॑ స॒కృదు॑ప॒స్పృశ్య॒ శిర॒శ్చఖ్షు॑షీ॒ నాసి॑కే॒ శ్రోత్రే॒ హృద॑యమా॒లభ్య॒ య-త్త్రిరా॒చామ॑తి॒ తేన॒ ఋచః॑ ప్రీణాతి॒ యద్ద్విః ప॑రి॒మృజ॑తి॒ తేన యజూగ్ం॑షి॒ య-థ్స॒కృదు॑ప॒స్పృశ॑తి॒ తేన॒ సామా॑ని॒ (య-థ్స॒వ్య-మ్పా॒ణి పా॒దౌ ప్రో॒ఖ్షతి॒) యచ్ఛిర॒శ్చఖ్షు॑షీ॒ నాసి॑కే॒ శ్రోత్రే॒ హృద॑యమా॒లభ॑తే॒ తేనాథ॑ర్వాఙ్గి॒రసో᳚ బ్రాహ్మ॒ణా-నీ॑తిహా॒సా-న్పు॑రా॒ణాని॒ కల్పా॒-న్గాథా॑ నారాశ॒గ్ం॒సీః ప్రీ॑ణాతి॒ దర్భా॑ణా-మ్మ॒హదు॑ప॒స్తీర్యో॒పస్థ॑-ఙ్కృ॒త్వా ప్రాంఆసీ॑న-స్స్వాద్ధ్యా॒యమధీ॑యీతా॒పాం-వాఀ ఏ॒ష ఓష॑ధీనా॒గ్ం॒ రసో॒ య-ద్ద॒ర్భా-స్సర॑సమె॒వ బ్రహ్మ॑ కురుతే దఖ్షిణోత్త॒రౌ పా॒ణీ (పా॒దౌ) కృ॒త్వా సప॒విత్రా॒వోమితి॒ ప్రతి॑పద్యత ఏ॒తద్వై యజు॑స్త్రయీం-విఀ॒ద్యా-మ్ప్రత్యే॒షా వాగే॒తత్ప॑ర॒మమ॒ఖ్షర॒-న్తదే॒తదృ॒చా-ఽభ్యు॑క్తమృ॒చో అ॒ఖ్షరే॑ పర॒మే వ్యో॑మ॒న్॒. యస్మి॑-న్దే॒వా అధి॒ విశ్వే॑ నిషే॒దుర్యస్తన్న వేద॒ కిమృ॒చా క॑రిష్యతి॒ య ఇత్తద్వి॒దుస్త ఇ॒మే సమా॑సత॒ ఇతి॒ త్రీనే॒వ ప్రాయు॑ఙ్క్త॒ భూర్భువ॒స్స్వ॑రిత్యా॑హై॒తద్వై వా॒చ-స్స॒త్యం-యఀదే॒వ వా॒చ-స్స॒త్య-న్త-త్ప్రాయు॒ఙ్క్తాథ॑ సావి॒త్రీ-ఙ్గా॑య॒త్రీ-న్త్రిరన్వా॑హ ప॒చ్ఛో᳚-ఽర్ధర్చ॑శో-ఽనవా॒నగ్ం స॑వి॒తా శ్రియః॑ ప్రసవి॒తా శ్రియ॑మే॒వాప్నో॒త్ యథో᳚ ప్ర॒జ్ఞాత॑యై॒వ ప్ర॑తి॒పదా॒ ఛన్దాగ్ం॑సి॒ ప్రతి॑పద్యతే ॥ 11 ॥

అనువాకం 12
గ్రామే॒ మన॑సా స్వాద్ధ్యా॒యమధీ॑యీత॒ దివా॒ నక్తం॑-వేఀ॒తి హ॑ స్మా॒హ శౌ॒చ ఆ᳚హ్నే॒య ఉ॒తార॑ణ్యే॒-ఽబల॑ ఉ॒త వా॒చోత తిష్ఠ॑న్ను॒త వ్రజ॑న్ను॒తాసీ॑న ఉ॒త శయా॑నో॒-ఽధీయీ॑తై॒వ స్వా᳚ద్ధ్యా॒య-న్తప॑స్వీ॒ పుణ్యో॑ భవతి॒ య ఏ॒వం-విఀ॒ద్వాన్-థ్స్వా᳚ద్ధ్యా॒యమధీ॑తే॒ నమో॒ బ్రహ్మ॑ణే॒ నమో॑ అస్త్వ॒గ్నయే॒ నమః॑ పృథి॒వ్యై నమ॒ ఓష॑ధీభ్యః ।
నమో॑ వా॒చే నమో॑ వా॒చస్పత॑యే॒ నమో॒ విష్ణ॑వే బృహ॒తే క॑రోమి ॥ 12 ॥

అనువాకం 13
మ॒ద్ధ్యన్ది॑నే ప్ర॒బల॒మధీ॑యీతా॒సౌ ఖలు॒ వావైష ఆ॑ది॒త్యో యద్బ్రా᳚హ్మ॒ణస్తస్మా॒త్తర్​హి॒ తేఖ్ష్ణి॑ష్ఠ-న్తపతి॒ తదే॒షా-ఽభ్యు॑క్తా ॥
చి॒త్ర-న్దే॒వానా॒ముద॑గా॒దనీ॑క॒-ఞ్చఖ్షు॑ర్మి॒త్రస్య॒ వరు॑ణస్యా॒గ్నేః ।
ఆ-ఽప్రా॒ ద్యావా॑పృథి॒వీ అ॒న్తరి॑ఖ్ష॒గ్ం॒ సూర్య॑ ఆ॒త్మా జగ॑తస్త॒స్థుష॒శ్చేతి॒ స వా ఏ॒ష య॒జ్ఞ-స్స॒ద్యః ప్రతా॑యతే స॒ద్య-స్సన్తి॑ష్ఠతే॒ తస్య॒ ప్రాఖ్సా॒యమ॑వభృ॒థో నమో॒ బ్రహ్మ॑ణ॒ ఇతి॑ పరిధా॒నీయా॒-న్త్రిరన్వా॑హా॒ప ఉ॑ప॒స్పృశ్య॑ గృ॒హానే॑తి॒ తతో॒ యత్కిఞ్చ॒ దదా॑తి॒ సా దఖ్షి॑ణా ॥ 13 ॥

అనువాకం 14
తస్య॒ వా ఏ॒తస్య॑ య॒జ్ఞస్య॒ మేఘో॑ హవి॒ర్ధానం॑-విఀ॒ద్యుద॒గ్నిర్వ॒ర్॒షగ్ం హ॒వి-స్స్త॑నయి॒త్ను-ర్వ॑షట్కా॒రో యద॑వ॒స్ఫూర్జ॑తి॒ సో-ఽను॑వషట్కా॒రో వా॒యురా॒త్మా-ఽమా॑వా॒స్యా᳚ స్విష్ట॒కృద్య ఏ॒వం-విఀ॒ద్వాన్మే॒ఘే వ॒ర్॒షతి॑ వి॒ద్యోత॑మానే స్త॒నయ॑త్యవ॒స్ఫూర్జ॑తి॒ పవ॑మానే వా॒యావ॑మావా॒స్యా॑యాగ్​ స్వాద్ధ్యా॒యమధీ॑తే॒
తప॑ ఏ॒వ తత్త॑ప్యతే॒ తపో॑ హి స్వాద్ధ్యా॒య ఇత్యు॑త్త॒మ-న్నాకగ్ం॑ రోహత్యుత్త॒మ-స్స॑మా॒నానా᳚-మ్భవతి॒ యావ॑న్తగ్ం హ॒ వా ఇ॒మాం-విఀ॒త్తస్య॑ పూ॒ర్ణా-న్దద॑థ్స్వ॒ర్గం-లోఀ॒క-ఞ్జ॑యతి॒ తావ॑న్తం-లోఀ॒క-ఞ్జ॑యతి॒ భూయాగ్ం॑స-ఞ్చాఖ్ష॒య్య-ఞ్చాప॑ పునర్మృ॒త్యు-ఞ్జ॑యతి॒ బ్రహ్మ॑ణ॒-స్సాయు॑జ్య-ఙ్గచ్ఛతి ॥ 14 ॥

అనువాకం 15
తస్య॒ వా ఏ॒తస్య॑ య॒జ్ఞస్య॒ ద్వావ॑నద్ధ్యా॒యౌ యదా॒-ఽఽత్మా-ఽశుచి॒-ర్య-ద్దే॒శ-స్సమృ॑ద్ధిర్దైవ॒తాని॒ య ఏ॒వం-విఀ॒ద్వా-న్మ॑హారా॒త్ర ఉ॒షస్యుది॑తే॒ వ్రజ॒గ్గ్॒స్తిష్ఠ॒-న్నాసీ॑న॒-శ్శయా॑నో॒-ఽరణ్యే᳚ గ్రామే॒ వా యావ॑త్త॒రసగ్గ్॑ స్వాద్ధ్యా॒యమధీ॑తే॒ సర్వా᳚న్ ఀలో॒కాఞ్జ॑యతి॒ సర్వా᳚న్ ఀలో॒కాన॑నృ॒ణో-ఽను॒ సఞ్చ॑రతి॒ తదే॒షా-ఽభ్యు॑క్తా ॥ అ॒నృ॒ణా అ॒స్మిన్న॑నృ॒ణాః పర॑స్మిగ్గ్​స్తృ॒తీయే॑ లో॒కే అ॑నృ॒ణా-స్స్యా॑మ । యే దే॑వ॒యానా॑ ఉ॒త పి॑తృ॒యాణా॒-స్సర్వా᳚-న్ప॒థో అ॑నృ॒ణా ఆఖ్షీ॑యే॒మేత్య॒గ్నిం-వైఀ జా॒త-మ్పా॒ప్మా జ॑గ్రాహ॒ తన్దే॒వా ఆహు॑తీభిః పా॒ప్మాన॒మపా᳚ఘ్న॒-న్నాహు॑తీనాం-యఀ॒జ్ఞేన॑ య॒జ్ఞస్య॒ దఖ్షి॑ణాభి॒-ర్దఖ్షి॑ణానా-మ్బ్రాహ్మ॒ణేన॑ బ్రాహ్మ॒ణస్య॒ ఛన్దో॑భి॒-శ్ఛన్ద॑సాగ్​ స్వాద్ధ్యా॒యేనాప॑హతపాప్మా స్వాద్ధ్యా॒యో॑ దే॒వప॑విత్రం॒-వాఀ ఏ॒తత్తం-యోఀ-ఽనూ᳚-థ్సృ॒జత్యభా॑గో వా॒చి భ॑వ॒త్యభా॑గో నా॒కే తదే॒షా-ఽభ్యు॑క్తా ॥ యస్తి॒త్యాజ॑ సఖి॒విద॒గ్ం॒ సఖా॑య॒-న్న తస్య॑ వా॒చ్యపి॑ భా॒గో అ॑స్తి । యదీగ్ం॑ శృ॒ణోత్య॒లకగ్ం॑ శృణోతి॒ న హి ప్ర॒వేద॑ సుకృ॒తస్య॒ పన్థా॒మితి॒ తస్మా᳚-థ్స్వాద్ధ్యా॒యో-ఽద్ధ్యే॑త॒వ్యో॑ యం-యఀ ॑-ఙ్క్ర॒తుమధీ॑తే॒ తేన॑ తేనాస్యే॒ష్ట-మ్భ॑వత్య॒గ్నే-ర్వా॒యో-రా॑ది॒త్యస్య॒ సాయు॑జ్య-ఙ్గచ్ఛతి॒ తదే॒షా-ఽభ్యు॑క్తా ॥
యే అ॒ర్వాంఉ॒త వా॑ పురా॒ణే వే॒దం-విఀ॒ద్వాగ్ంస॑మ॒భితో॑ వదన్త్యాది॒త్యమే॒వ తే పరి॑వదన్తి॒ సర్వే॑ అ॒గ్ని-న్ద్వి॒తీయ॑-న్తృ॒తీయ॑-ఞ్చ హ॒గ్ం॒సమితి॒ యావ॑తీ॒ర్వై దే॒వతా॒స్తా-స్సర్వా॑ వేద॒విది॑ బ్రాహ్మ॒ణే వ॑సన్తి॒ తస్మా᳚-ద్బ్రాహ్మ॒ణేభ్యో॑ వేద॒విద్భ్యో॑ ది॒వేది॑వే॒ నమ॑స్కుర్యా॒న్నాశ్లీ॒ల-ఙ్కీ᳚ర్తయేదే॒తా ఏ॒వ దే॒వతాః᳚ ప్రీణాతి ॥ 15 ॥

అనువాకం 16
రిచ్య॑త ఇవ॒ వా ఏ॒ష ప్రేవ రి॑చ్యతే॒ యో యా॒జయ॑తి॒ ప్రతి॑ వా గృ॒హ్ణాతి॑ యా॒జయి॑త్వా ప్రతిగృ॒హ్య వా-ఽన॑శ్న॒న్త్రి-స్స్వా᳚ద్ధ్యా॒యం-వేఀ॒దమధీ॑యీత త్రిరా॒త్రం-వాఀ ॑ సావి॒త్రీ-ఙ్గా॑య॒త్రీ-మ॒న్వాతి॑రేచయతి॒ వరో॒ దఖ్షి॑ణా॒ వరే॑ణై॒వ వరగ్గ్॑ స్పృణోత్యా॒త్మా హి వరః॑ ॥ 16 ॥

అనువాకం 17
దు॒హే హ॒ వా ఏ॒ష ఛన్దాగ్ం॑సి॒ యో యా॒జయ॑తి॒ స యేన॑ యజ్ఞక్ర॒తునా॑ యా॒జయే॒-థ్సో-ఽర॑ణ్య-మ్ప॒రేత్య॑ శుచౌ దే॒శే స్వా᳚ద్ధ్యా॒య-మే॒వైన॒-మధీ॑యన్నాసీ॒త తస్యా॒నశ॑న-న్దీ॒ఖ్షా స్థా॒నము॑ప॒సద॒ ఆస॑నగ్ం సు॒త్యా వాగ్జు॒హూర్మన॑ ఉప॒భృద్ధృ॒తిర్ధ్రు॒వా ప్రా॒ణో హ॒వి-స్సామా᳚ద్ధ్వ॒ర్యు-స్స వా ఏ॒ష య॒జ్ఞః
ప్రా॒ణద॑ఖ్షి॒ణో-ఽన॑న్తదఖ్షిణ॒-స్సమృ॑ద్ధతరః ॥ 17 ॥

అనువాకం 18
క॒తి॒ధా-ఽవ॑కీర్ణీ ప్రవి॒శతి॑ చతు॒ర్ధేత్యా॑హు-ర్బ్రహ్మవా॒దినో॑ మ॒రుతః॑ ప్రా॒ణైరిన్ద్ర॒-మ్బలే॑న॒ బృహ॒స్పతి॑-మ్బ్రహ్మవర్చ॒సేనా॒గ్నిమే॒వేత॑రేణ॒ సర్వే॑ణ॒ తస్యై॒తా-మ్ప్రాయ॑శ్చిత్తిం-విఀ॒దాఞ్చ॑కార సుదే॒వః కా᳚శ్య॒పో యో
బ్ర॑హ్మచా॒ర్య॑వ॒కిరే॑దమావా॒స్యా॑యా॒గ్ం॒ రాత్ర్యా॑మ॒గ్ని-మ్ప్ర॒ణీయో॑పసమా॒ధాయ॒ ద్విరాజ్య॑స్యోప॒ఘాత॑-ఞ్జుహోతి॒ కామావ॑కీర్ణో॒-ఽస్మ్యవ॑కీర్ణో-ఽస్మి॒ కామ॒ కామా॑య॒ స్వాహా॒ కామాభి॑ద్రుగ్ధో॒-ఽస్మ్యభి॑ద్రుగ్ధో-ఽస్మి॒ కామ॒ కామా॑య॒ స్వాహేత్య॒మృతం॒-వాఀ ఆజ్య॑మ॒మృత॑మే॒వాత్మ-న్ధ॑త్తే హు॒త్వా ప్రయ॑తాఞ్జ॒లిః కవా॑తిర్యఙ్ఙ॒గ్నిమ॒భి మ॑న్త్రయేత॒ స-మ్మా॑ సిఞ్చన్తు మ॒రుత॒-స్సమిన్ద్ర॒-స్సమ్బృహ॒స్పతిః॑ ।
స-మ్మా॒-ఽయమ॒గ్ని-స్సి॑ఞ్చ॒త్వాయు॑షా చ॒ బలే॑న॒ చాయు॑ష్మన్త-ఙ్కరోత॒ మేతి॒ ప్రతి॑ హాస్మై మ॒రుతః॑ ప్రా॒ణా-న్ద॑ధతి॒ ప్రతీన్ద్రో॒ బల॒-మ్ప్రతి॒ బృహ॒స్పతి॑-ర్బ్రహ్మవర్చ॒స-మ్ప్రత్య॒గ్నిరి॒తర॒థ్సర్వ॒గ్ం॒ సర్వ॑తనుర్భూ॒త్వా సర్వ॒మాయు॑రేతి॒ త్రిర॒భిమ॑న్త్రయేత॒ త్రిష॑త్యా॒ హి దే॒వా యో-ఽపూ॑త ఇవ॒ మన్యే॑త॒ స ఇ॒త్థ-ఞ్జు॑హుయాది॒త్థ-మ॒భిమ॑న్త్రయేత॒ పునీ॑త ఏ॒వాత్మాన॒-మాయు॑రే॒వాత్మ-న్ధ॑త్తే॒ వరో॒ దఖ్షి॑ణా॒ వరే॑ణై॒వ వరగ్గ్॑ స్పృణోత్యా॒త్మా హి వరః॑ ॥ 18 ॥

అనువాకం 19
భూః ప్రప॑ద్యే॒ భువః॒ ప్రప॑ద్యే॒ స్వః॑ ప్రప॑ద్యే॒ భూర్భువ॒స్స్వః॑ ప్రప॑ద్యే॒ బ్రహ్మ॒ ప్రప॑ద్యే బ్రహ్మకో॒శ-మ్ప్రప॑ద్యే॒-ఽమృత॒-మ్ప్రప॑ద్యే-ఽమృతకో॒శ-మ్ప్రప॑ద్యే చతుర్జా॒ల-మ్బ్ర॑హ్మకో॒శం-యఀ-మ్మృ॒త్యుర్నావ॒పశ్య॑తి॒ త-మ్ప్రప॑ద్యే దే॒వా-న్ప్రప॑ద్యే దేవపు॒ర-మ్ప్రప॑ద్యే॒ పరీ॑వృతో॒ వరీ॑వృతో॒ బ్రహ్మ॑ణా॒ వర్మ॑ణా॒-ఽహ-న్తేజ॑సా॒ కశ్య॑పస్య॒ యస్మై॒ నమ॒స్తచ్ఛిరో॒ ధర్మో॑ మూ॒ర్ధాన॑-మ్బ్ర॒హ్మోత్త॑రా॒ హను॑ర్య॒జ్ఞో-ఽధ॑రా॒ విష్ణు॒ర్॒ హృద॑యగ్ం సం​వఀథ్స॒రః ప్ర॒జన॑నమ॒శ్వినౌ॑ పూర్వ॒పాదా॑వ॒త్రిర్మద్ధ్య॑-మ్మి॒త్రావరు॑ణా వపర॒పాదా॑వ॒గ్నిః పుచ్ఛ॑స్య ప్రథ॒మ-ఙ్కాణ్డ॒-న్తత॒ ఇన్ద్ర॒స్తతః॑ ప్ర॒జాప॑తి॒రభ॑య-ఞ్చతు॒ర్థగ్ం స వా ఏ॒ష ది॒వ్య-శ్శా᳚క్వ॒ర-శ్శిశు॑మార॒స్తగ్ం హ॒ య ఏ॒వం-వేఀదాప॑ పునర్మృ॒త్యు-ఞ్జ॑యతి॒ జయ॑తి స్వ॒ర్గం-లోఀ॒క-న్నాద్ధ్వని॒ ప్రమీ॑యతే॒ నాఫ్సు ప్రమీ॑యతే॒ నాగ్నౌ ప్రమీ॑యతే॒ నాన॒పత్యః॑ ప్రమీ॒యతే॑ ల॒ఘ్వాన్నో॑ భవతి ధ్రు॒వస్త్వమ॑సి ధ్రు॒వస్య ఖ్షి॑తమసి॒ త్వ-మ్భూ॒తానా॒మధి॑పతిరసి॒ త్వ-మ్భూ॒తానా॒గ్॒ శ్రేష్ఠో॑-ఽసి॒ త్వా-మ్భూ॒తాన్యుప॑ప॒ర్యావ॑ర్తన్తే॒ నమ॑స్తే॒ నమ॒-స్సర్వ॑-న్తే॒ నమో॒ నమః॑ ॥
[ఫాట భ్హేదం - నమో॒ నమ॑-శ్శిశుకుమారాయ॒ నమః॑ ] ॥ 19 ॥

అనువాకం 20
నమః॒ ప్రాచ్యై॑ ది॒శే యాశ్చ॑ దే॒వతా॑ ఏ॒తస్యా॒-మ్ప్రతి॑వసన్త్యే॒ తాభ్య॑శ్చ॒ నమో॒ నమో దఖ్షి॑ణాయై ది॒శే యాశ్చ॑ దే॒వతా॑ ఏ॒తస్యా॒-మ్ప్రతి॑వసన్త్యే॒ తాభ్య॑శ్చ॒ నమో॒ నమః॒ ప్రతీ᳚చ్యై ది॒శే యాశ్చ॑ దే॒వతా॑ ఏ॒తస్యా॒-మ్ప్రతి॑వసన్త్యే॒ తాభ్య॑శ్చ॒ నమో॒ నమ॒ ఉదీ᳚చ్యై ది॒శే యాశ్చ॑ దే॒వతా॑ ఏ॒తస్యా॒-మ్ప్రతి॑వసన్త్యే॒ తాభ్య॑శ్చ॒ నమో॒ నమ॑ ఊ॒ర్ధ్వాయై॑ ది॒శే యాశ్చ॑ దే॒వతా॑ ఏ॒తస్యా॒-మ్ప్రతి॑వసన్త్యే॒ తాభ్య॑శ్చ॒ నమో॒ నమో-ఽధ॑రాయై ది॒శే యాశ్చ॑ దే॒వతా॑ ఏ॒తస్యా॒-మ్ప్రతి॑వసన్త్యే॒ తాభ్య॑శ్చ॒ నమో॒ నమో॑-ఽవాన్త॒రాయై॑ ది॒శే యాశ్చ॑ దే॒వతా॑ ఏ॒తస్యా॒-మ్ప్రతి॑వసన్త్యే॒ తాభ్య॑శ్చ॒ నమో॒ నమో గఙ్గాయమునయోర్మద్ధ్యే యే॑ వస॒న్తి॒ తే మే ప్రసన్నాత్మానస్చిర-ఞ్జీవితం-వఀ ॑ర్ధయ॒న్తి॒ నమో గఙ్గాయమునయోర్ముని॑భ్యశ్చ॒ నమో॒ నమో గఙ్గాయమునయోర్ముని॑భ్యశ్చ॒ నమః ॥ 20 ॥

(సహ॒ - రఖ్షాగ్ం॑సి॒ - య-ద్దే॑వా-స్స॒ప్తద॑శ॒ - యదదీ᳚వ్య॒-న్పఞ్చ॑దశ॒ - యు॑ష్టే॒ చతు॑స్త్రిగ్ంశ-ద్- వైశ్వాన॒రాయ॒ షడ్విగ్ం॑శతి॒-ర్వాత॑రశనా హ - కుశ్మా॒ణ్డై- ర॒జాన్. హ॒ - పఞ్చ॑ - బ్రహ్మయ॒జ్ఞేన॒ - గ్రామే॑ - మ॒ద్ధ్యన్ది॑నే॒ - తస్య॒ వై మేఘ॒ - స్తస్య॒ వై ద్వౌ - రిచ్య॑తే - దు॒హే హ॑ - కతి॒ధా-ఽవ॑కీర్ణీ॒ - భూ--ర్ నమః॒ ప్రాచ్యై॑ విగ్ంశ॒తిః )

(సహ॑ వై - ముని॑భ్యశ్చ॒ నమః )

॥ హరిః॑ ఓమ్ ॥

॥ కృష్ణ యజుర్వేదీయ తైత్తిరీయ ఆరణ్యకే ద్వితీయః ప్రపాఠక-స్సమాప్తః ॥