jvara uvācha ।
namaḥ kṛṣṇāya harayē viṣṇavē prabhaviṣṇavē ।
ādidēvāya dēvāya purāṇāya gadābhṛtē ॥ 1 ॥
namaḥ sahasraśirasē sahasracharaṇāya cha ।
sahasrākṣa namō nityaṃ lōkānāmabhayaṅkara ॥ 2 ॥
udgīthāya namō dēva yajñādhipatayē namaḥ ।
namastē chakriṇē nityamasihastāya tē namaḥ ॥ 3 ॥
anantāya virūpāya namastē madhusūdana ।
namastē dēvadēvēśa tubhyaṃ dēva kapardinē ॥ 4 ॥
namastē rākṣasaghnāya namō rāghavarūpiṇē ।
jñānajñēyāya dēvāya nama ādyāya viṣṇavē ॥ 5 ॥
namastē narasiṃhāya daityarājavihāriṇē ।
namastubhyaṃ varāhāya daṃṣṭrōddhṛtavasundhara ॥ 6 ॥
trivikrama namastubhyaṃ baliyajñavināśana ।
vāsudēvāya dēvāya namaḥ kaṃsavināśana ॥ 7 ॥
namaḥ sarvātmanē dēva sarvakartrē namō namaḥ ।
prāsīda dēvadēvēśa bhītānāmabhayaṅkara ॥ 8 ॥
namāmi dēvadēvēśaṃ varēṇyamabhayapradam ।
viṣṇō tvāṃ sakalēśēśa tvāṃ gadādharamavyayam ॥ 9 ॥
namastē dēvadēvēśa bhītō'haṃ bhavanāśana ।
iti stutvā jagannāthaṃ nṛtyanniva tadā jvaraḥ ॥ 10 ॥
papāta pādayōrviṣṇōrniḥśvasan bhītabhītavat ।
prāsīda viṣṇō dēvēśa pīḍitō'smi janārdana ॥ 11 ॥
iti harivaṃśāntargataṃ jvarakṛtaṃ śrīkṛṣṇastōtraṃ sampūrṇam ।
harivaṃśa . adhyāya 111/7 . ।
