ජ්වර උවාච ।
නමඃ කෘෂ්ණාය හරයේ විෂ්ණවේ ප්රභවිෂ්ණවේ ।
ආදිදේවාය දේවාය පුරාණාය ගදාභෘතේ ॥ 1 ॥
නමඃ සහස්රශිරසේ සහස්රචරණාය ච ।
සහස්රාක්ෂ නමෝ නිත්යං ලෝකානාමභයංකර ॥ 2 ॥
උද්ගීථාය නමෝ දේව යජ්ඤාධිපතයේ නමඃ ।
නමස්තේ චක්රිණේ නිත්යමසිහස්තාය තේ නමඃ ॥ 3 ॥
අනංතාය විරූපාය නමස්තේ මධුසූදන ।
නමස්තේ දේවදේවේශ තුභ්යං දේව කපර්දිනේ ॥ 4 ॥
නමස්තේ රාක්ෂසඝ්නාය නමෝ රාඝවරූපිණේ ।
ජ්ඤානජ්ඤේයාය දේවාය නම ආද්යාය විෂ්ණවේ ॥ 5 ॥
නමස්තේ නරසිංහාය දෛත්යරාජවිහාරිණේ ।
නමස්තුභ්යං වරාහාය දංෂ්ට්රෝද්ධෘතවසුංධර ॥ 6 ॥
ත්රිවික්රම නමස්තුභ්යං බලියජ්ඤවිනාශන ।
වාසුදේවාය දේවාය නමඃ කංසවිනාශන ॥ 7 ॥
නමඃ සර්වාත්මනේ දේව සර්වකර්ත්රේ නමෝ නමඃ ।
ප්රාසීද දේවදේවේශ භීතානාමභයංකර ॥ 8 ॥
නමාමි දේවදේවේශං වරේණ්යමභයප්රදම් ।
විෂ්ණෝ ත්වාං සකලේශේශ ත්වාං ගදාධරමව්යයම් ॥ 9 ॥
නමස්තේ දේවදේවේශ භීතෝऽහං භවනාශන ।
ඉති ස්තුත්වා ජගන්නාථං නෘත්යන්නිව තදා ජ්වරඃ ॥ 10 ॥
පපාත පාදයෝර්විෂ්ණෝර්නිඃශ්වසන් භීතභීතවත් ।
ප්රාසීද විෂ්ණෝ දේවේශ පීඩිතෝऽස්මි ජනාර්දන ॥ 11 ॥
ඉති හරිවංශාංතර්ගතං ජ්වරකෘතං ශ්රීකෘෂ්ණස්තෝත්රං සංපූර්ණම් ।
හරිවංශ . අධ්යාය 111/7 . ।
