ଜ୍ଵର ଉଵାଚ ।
ନମଃ କୃଷ୍ଣାୟ ହରୟେ ଵିଷ୍ଣଵେ ପ୍ରଭଵିଷ୍ଣଵେ ।
ଆଦିଦେଵାୟ ଦେଵାୟ ପୁରାଣାୟ ଗଦାଭୃତେ ॥ 1 ॥
ନମଃ ସହସ୍ରଶିରସେ ସହସ୍ରଚରଣାୟ ଚ ।
ସହସ୍ରାକ୍ଷ ନମୋ ନିତ୍ୟଂ ଲୋକାନାମଭୟଂକର ॥ 2 ॥
ଉଦ୍ଗୀଥାୟ ନମୋ ଦେଵ ୟଜ୍ଞାଧିପତୟେ ନମଃ ।
ନମସ୍ତେ ଚକ୍ରିଣେ ନିତ୍ୟମସିହସ୍ତାୟ ତେ ନମଃ ॥ 3 ॥
ଅନଂତାୟ ଵିରୂପାୟ ନମସ୍ତେ ମଧୁସୂଦନ ।
ନମସ୍ତେ ଦେଵଦେଵେଶ ତୁଭ୍ୟଂ ଦେଵ କପର୍ଦିନେ ॥ 4 ॥
ନମସ୍ତେ ରାକ୍ଷସଘ୍ନାୟ ନମୋ ରାଘଵରୂପିଣେ ।
ଜ୍ଞାନଜ୍ଞେୟାୟ ଦେଵାୟ ନମ ଆଦ୍ୟାୟ ଵିଷ୍ଣଵେ ॥ 5 ॥
ନମସ୍ତେ ନରସିଂହାୟ ଦୈତ୍ୟରାଜଵିହାରିଣେ ।
ନମସ୍ତୁଭ୍ୟଂ ଵରାହାୟ ଦଂଷ୍ଟ୍ରୋଦ୍ଧୃତଵସୁଂଧର ॥ 6 ॥
ତ୍ରିଵିକ୍ରମ ନମସ୍ତୁଭ୍ୟଂ ବଲିୟଜ୍ଞଵିନାଶନ ।
ଵାସୁଦେଵାୟ ଦେଵାୟ ନମଃ କଂସଵିନାଶନ ॥ 7 ॥
ନମଃ ସର୍ଵାତ୍ମନେ ଦେଵ ସର୍ଵକର୍ତ୍ରେ ନମୋ ନମଃ ।
ପ୍ରାସୀଦ ଦେଵଦେଵେଶ ଭୀତାନାମଭୟଂକର ॥ 8 ॥
ନମାମି ଦେଵଦେଵେଶଂ ଵରେଣ୍ୟମଭୟପ୍ରଦମ୍ ।
ଵିଷ୍ଣୋ ତ୍ଵାଂ ସକଲେଶେଶ ତ୍ଵାଂ ଗଦାଧରମଵ୍ୟୟମ୍ ॥ 9 ॥
ନମସ୍ତେ ଦେଵଦେଵେଶ ଭୀତୋଽହଂ ଭଵନାଶନ ।
ଇତି ସ୍ତୁତ୍ଵା ଜଗନ୍ନାଥଂ ନୃତ୍ୟନ୍ନିଵ ତଦା ଜ୍ଵରଃ ॥ 10 ॥
ପପାତ ପାଦୟୋର୍ଵିଷ୍ଣୋର୍ନିଃଶ୍ଵସନ୍ ଭୀତଭୀତଵତ୍ ।
ପ୍ରାସୀଦ ଵିଷ୍ଣୋ ଦେଵେଶ ପୀଡିତୋଽସ୍ମି ଜନାର୍ଦନ ॥ 11 ॥
ଇତି ହରିଵଂଶାଂତର୍ଗତଂ ଜ୍ଵରକୃତଂ ଶ୍ରୀକୃଷ୍ଣସ୍ତୋତ୍ରଂ ସଂପୂର୍ଣମ୍ ।
ହରିଵଂଶ . ଅଧ୍ୟାୟ 111/7 . ।
